Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - вторникъ, 17 октября 2017 г. Сейчасъ на порталѣ посѣтителей - 13.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-УЧИТЕЛЬНАЯ ЛИТЕРАТУРА

КНИГА, ГЛАГОЛЕМАЯ «ЗЛАТОУСТЪ»,
Въ не́йже вся́ко ухищре́ніе Боже́ственнаго Писа́нія, истолко́вано святы́мъ вели́кимъ Іоа́нномъ Златоу́стомъ и про́чими святы́ми отцы́.

Сло́во 67.
Во святу́ю и вели́кую Свѣ́тлую недѣ́лю Воскресе́нія Христа́ Бо́га на́шего, поуче́ніе свята́го Іоа́нна Златоу́стаго, ка́ко воскре́се Госпо́дь на́шъ Іису́съ Христо́съ отъ ме́ртвыхъ.

Жи́дове же, слы́шавше то́, бѣ́ша вси́, я́ко ме́ртви. И совѣща́вше сребро́ мно́го да́ти во́иномъ, моли́ша и́хъ, глаго́люще: «рцы́те та́ко, я́ко ученицы́ Его́ но́щію, прише́дше, украдо́ша И, на́мъ спя́щимъ. Да а́ще услы́шано се́ бу́детъ у иге́мона, и мы́ утоли́мъ его́, и ва́съ безпеча́льны сотвори́мъ». О, беззако́нніи жи́дове! Кто́ же мíръ ве́сь увѣща́етъ? Го́ре ва́мъ, окая́нніи жи́дове, я́ко совѣща́сте совѣ́тъ зо́лъ; я́ко «ча́да Бо́жія» нарече́ни бы́сте, ны́нѣ же пси́ яви́стеся зло́бою. Го́ре ва́мъ, жестосе́рдіи и необрѣ́занніи се́рдцы, я́ко лю́діе Госпо́дни су́ще, а́ки во́лцы бы́сте, и зу́бы изостри́сте на Агнца Бо́жія, и чу́жди сла́вы Его́ бы́сте. Го́ре ва́мъ, неразу́мивымъ, я́ко возлюби́сте а́дъ и вѣ́чный о́гнь. Адъ бо, егда́ изы́дутъ су́щіи въ сокро́вищахъ его́, ва́съ въ тѣ́хъ мѣ́сто жде́тъ, глаго́ля: «еда́ кто́ почíетъ отъ жидо́въ, и́же на Христа́ ру́ки возложи́ша и мене́ плѣне́на сотвори́ша. Аще бо они́ не бы́ша совѣща́ли на Го́спода зло́, не бы́хъ а́зъ сели́ка прія́лъ. Егда́ же пріиму́ и́хъ, и сведу́ и́хъ въ преиспо́дняя, идѣ́же оте́цъ и́хъ, діа́волъ, затворе́нъ во огни́ вѣ́чномъ и въ че́рвіи неусыпа́ющемъ, да навы́кнутъ не воева́ти на Бо́га сла́вы, ни глаго́лати непра́вды». Го́ре ва́мъ, окая́нніи жи́дове, я́ко свѣ́тъ оста́вльше, тму́ возлюби́сте. Ва́съ бо дѣ́льма рече́ Иса́ія проро́къ: го́ре полага́ющимъ свѣ́тъ во тму́ и тму́ во свѣ́тъ, и глаго́лющимъ го́рькое сла́дко, а сла́дкое го́рько. О, го́ре ва́мъ жи́дове, егда́ у́зрите Дре́во, на не́мъ же Христа́ распя́сте, Спа́са всему́ мíру, и ве́сь мíръ покланя́ющеся ему́, и Го́спода, гряду́ща по облако́мъ небе́снымъ со а́нгельскими си́лами ва́съ осуди́ти. О, го́ре ва́мъ, жи́дове, я́ко совѣща́сте совѣ́тъ зо́лъ умори́ти Безсме́ртнаго. Но То́й живе́тъ во́ вѣки вѣко́мъ, вы́ же невѣ́ріемъ обумро́сте. То́й ца́рствуетъ во вѣ́ки, а ва́съ, невѣ́рующихъ Ему́, во вѣ́ки и́мать му́чити.

Мы́ же, вѣ́рніи, оста́вльше злому́дрыхъ жидо́въ, къ Госпо́дню Воскресе́нію съ весе́ліемъ притеце́мъ. Егда́ воскре́се Христо́съ отъ ме́ртвыхъ, пріидо́стѣ двѣ́ женѣ́ ко́ гробу, Марíя Магдалы́ня и друга́я Марíя, я́же е́сть Ма́ти Іису́сова, и пла́кастѣся, я́ко не обрѣто́стѣ тѣ́ла Госпо́дня. Пото́мъ же, срѣ́тшѣ Его́ о́бѣ Марíи и пе́рвіи ра́дость отъ Него́ пріе́мшѣ, отыдо́стѣ во своя́ си́. Магдалы́ня же Марíя па́ки на́ гробъ пріи́де и, не обрѣ́тши Его́, гла́съ а́нгельскъ слы́ша. Второ́е же и о́тъ Господа слы́ша, я́ко рече́: варя́ю вы́ въ Галиле́и. И обра́щшися, узрѣ́ Го́спода стоя́ща, и мня́щи вертогра́даря су́ща, вопроша́ше Его́: «а́ще свѣ́си, гдѣ́ Госпо́дь положе́нъ е́сть?» Іису́съ же рече́ къ не́й: «Марíе! Что́ пла́чеши и кого́ и́щеши? Уста́вися отъ пла́ча, ра́дость пріи́мши. Идѣ́же бо ра́дость, ту́ бѣжи́тъ сѣ́тованіе и ско́рбь. Идѣ́же весе́ліе, ту́ ра́дости о́бразы. Азъ е́смь Іису́съ, Сы́нъ Дѣ́выя. Азъ е́смь Іису́съ, потреби́вый мíру грѣхи́. Азъ е́смь Іису́съ, попра́вый сме́рть. Азъ е́смь Іису́съ, испрове́ргій а́да. Азъ е́смь Іису́съ, благовѣсти́вый ме́ртвымъ наде́жду воскресе́нія. Азъ е́смь Іису́съ, претерпѣ́вый распя́тіе за спасе́ніе всего́ мíра. Азъ е́смь Іису́съ, воста́вый тридне́вно изъ ме́ртвыхъ, я́коже пре́жде рѣ́хъ ва́мъ. Не́бо и земля́ ми́мо и́дутъ, словеса́ же Моя́ не ми́мо и́дутъ. Азъ е́смь кре́щшимся краси́тель. О Мнѣ́ Па́велъ возопіе́тъ, глаго́ля: ели́цы во Христа́ крести́стеся, во Христа́ облеко́стеся. Азъ е́смь Іису́съ, пода́тель ми́ра и весе́лія. Преста́ните отъ сле́зъ и пла́ча, и въ ра́дость облецы́теся, и апо́столомъ благовѣсти́те, отъ́яхъ бо вся́ку сле́зу отъ вся́каго лица́. Мно́ю осужде́ная Евва оправда́ся, и изгна́нный Ада́мъ возврати́ся, и ле́сть разори́ся, лука́вый змíй попра́нъ бы́сть, и непрія́знь паде́. Жи́дове пла́чутъ безъ утѣше́нія, фарисе́и рыда́ютъ злѣ́. Кре́стъ — поспѣ́шникъ Ми́ е́сть, а гро́бъ — свидѣ́тель. Сме́рть же побѣ́ду Мнѣ́ исповѣ́даетъ. О Мнѣ́ человѣ́чь ро́дъ обнови́ся. О Мнѣ́ уме́ршіи воста́ша. Се́ тридне́внаго Воскресе́нія плоды́. Се́й де́нь, въ о́ньже Пе́рвенецъ изъ ме́ртвыхъ воста́хъ и ра́дость мíрови пода́хъ. Се́й де́нь, въ о́ньже Петро́ви и апо́столомъ ва́ми проповѣ́даю Моего́ Воскресе́нія благовѣ́щеніе. Ше́дше у́бо, рцы́те бра́тіи Мое́й и Петро́ви, я́ко воста́лъ е́смь отъ ме́ртвыхъ, и варя́ю вы́ въ Галиле́и, ту́ Мя́ ви́дите».

Ви́дите ли у́бо благосе́рдіе Влады́ки всея́ тва́ри? Ни еди́наго же ученика́ и́менемъ не нарече́, то́кмо Петра́. Почто́, Го́споди, того́ еди́наго и́мя нарече́? Зане́же друзíи не реко́ша: «а́ще случи́тся на́мъ съ Тобо́ю и умре́ти, не отве́ржемся Тебе́», а се́й ре́къ, и отве́ржеся Мене́ три́жды, и раска́явся, пла́кася го́рько. Тѣ́мже бои́тся предъ лице́ Мое́ ити́, мня́, я́ко не отпуще́нъ грѣ́хъ его́, сего́ ра́ди реко́хъ и Петро́ви. Рцы́те ему́, да безъ сумнѣ́нія со ученики́ Мои́ми пріи́детъ и у́зритъ Мя́. Рцы́те Петро́ви: «ника́коже устраши́ся, не ума́лихъ бо тя́ отъ лица́ сла́вы, и не сотвори́хъ тя́ ме́ньша отъ ли́ка апо́стольска. Аще и Іоа́нна люблю́, и тому́ я́ко чи́сту преда́хъ Ма́терь Мою́, но и тебѣ́ да́хъ ключи́ Ца́рства небе́снаго. Не устраша́йся у́бо пріити́ ко Мнѣ́, его́же бо а́ще свя́жеши на земли́, бу́детъ свя́занъ на небесѣ́хъ, и его́же а́ще разрѣши́ши на земли́, бу́детъ разрѣше́нъ на́ небесѣхъ. Не убо́йся, Пе́тре, не оста́вихъ тебе́ отъ первосѣда́нія со ученики́ Мои́ми; е́же бо ти́ обѣща́хъ, то́ и сконча́ю, на ка́мени бо твоея́ вѣ́ры сози́жду Це́рковь Мою́, и врата́ а́дова не одолѣ́ютъ е́й. Ты́ упасе́ши Ми́ о́вцы. Ты́ упасе́ши а́гнцы Моя́, и ты́ ста́неши одесну́ю Мене́, я́ко чинонача́льникъ. Не бо́йся, Пе́тре, зане́же отве́ржеся Мене́; ви́дѣхъ бо сле́зы твоя́ и отпусти́хъ ти́ согрѣше́нія твоя́. Добро́ бы бы́ло и Іу́дѣ, а́ще бы пока́ялся, а не къ дре́ву бы потща́лся и не обѣ́силъ бы себе́, ка́ющихся бо е́смь Бо́гъ: и сего́ ра́ди снидо́хъ на́ землю, да покая́ніе мíрови пода́мъ. Мытаре́мъ бо и блуднико́мъ толи́ка мно́жества грѣхо́въ отпусти́хъ, а тебѣ́ ли еди́наго не отпущу́? Азъ бо ка́ющихся люблю́, помяни́, я́ко прослези́хся за Іу́ду, и хотѣ́хъ, да бы́ не поги́блъ. Добро́ бы ему́ бы́ло, егда́ сре́бреники пове́рже въ це́ркви, а́ще бы покая́лся; но поне́же безъ покая́нія пребы́сть, сего́ ра́ди вѣ́чно му́чимъ е́сть. Ты́ же, Пе́тре, не бо́йся; ви́дѣхъ бо сле́зы твоя́ и отпусти́хъ ти́ грѣ́хъ тво́й. Дави́ду у́бо, дво́е зло́ сотво́ршу, — прелюбодѣ́йство и убíйство, — вся́ отпусти́хъ ему́ и на пе́рвый са́нъ проро́чества поста́вихъ. Тебѣ́ же, оста́вльшу Мене́ ра́ди до́мъ, жену́ и дѣ́ти, еди́наго ли грѣха́ не оста́влю? Не бо́йся Пе́тре, Азъ е́смь рекíй: ра́дость быва́етъ на́ небеси о еди́номъ грѣ́шницѣ ка́ющемся. Азъ е́смь рекíй: пріиди́те ко Мнѣ́, вси́ тружда́ющіися и обремене́ніи, и Азъ поко́ю вы́. Добро́ бы бы́ло Іу́дѣ, а́ще бы ся́ возврати́лъ ко Мнѣ́, а не у́жемъ удавле́нія обяза́лся, и са́мъ ся́ погуби́лъ, — Азъ бы грѣхи́ его́ на Крестѣ́ пригвозди́лъ. Се́й у́бо пови́ненъ бы́сть, и не прокля́хъ его́, но па́че та́кожде умы́хъ ему́ но́зѣ и хлѣ́бъ пода́хъ, я́коже и про́чимъ ученико́мъ, и ника́коже поймы́ ему́ сотвори́хъ, дабы́ прише́лъ въ покая́ніе. И не восхотѣ́, сего́ ра́ди му́чимъ е́сть вѣ́чно. Ты́ же, пока́явся, не убо́йся яви́ти Ми ся со ученики́ Мои́ми. Толма́ у́бо, Пе́тре, тебе́ не ума́лихъ, я́ко и стѣ́нь тво́й неду́жныя исцѣли́тъ, и убру́сцы и по́яси твои́ прожену́тъ бѣ́сы, и каса́ніе руки́ твоея́ отъ рожде́нія хрома́го на тече́ніе возбы́стритъ.

И воста́вше ученицы́, идо́ша съ ра́достію вели́кою въ Галиле́ю на́ гору, на ню́ же повелѣ́ и́мъ Іису́съ, и ви́дѣвше Его́, поклони́шася Ему́. И сбы́сться все́ проро́чество, е́же сего́ ра́ди глаго́лаше, о стра́сти, и о погребе́ніи, и о Воскресе́ніи Го́спода Бо́га на́шего. Сія́ вся́ пострада́ Христо́съ на́съ ра́ди, да ны́ сотвори́тъ наслѣ́дники безсме́ртію: и ми́ръ всему́ мíру пода́въ, и весе́ліе и ра́дость це́рквамъ дарова́, и Ца́рство небе́сное вѣ́рнымъ обѣща́въ, побѣди́лище непобѣди́мое, Кре́стъ Сво́й, христіа́номъ пода́въ. Кто́ у́бо не и́мать диви́тися вели́цѣй се́й та́йнѣ, я́же о на́съ? Кто́ же не и́мать просла́вити Пригво́ждьшагося на́съ ра́ди на Крестѣ́? И кто́ не и́мать поклони́тися Воскре́сшему изъ ме́ртвыхъ? И кто́ не и́мать воспѣ́ти Упраздни́вшаго Кресто́мъ жа́ло сме́рти? И а́ще хо́щеши увѣ́дати Кре́стную си́лу, послу́шай разу́мно.

Кре́стъ — прогони́тель е́сть бѣсо́мъ; Кре́стъ — побѣ́да на діа́вола; Кре́стъ — христіа́номъ похвала́; Кре́стъ — царе́мъ возвелича́ніе; Кре́стъ — влады́камъ возноше́ніе; Кре́стъ — князе́мъ си́ла непобѣди́мая; Кре́стъ — ору́жіе на враги́; Кре́стъ — покро́въ вѣ́рнымъ; Кре́стъ — спасе́ніе душа́мъ; Кре́стъ — огражде́ніе це́рквамъ; Кре́стъ — свобо́да крести́вшимся; Кре́стъ — красота́ христіа́номъ; Кре́стъ — сохране́ніе вѣ́рнымъ. Си́мъ зна́меніемъ стѣ́ны сопоста́тныхъ па́даютъ. Си́мъ зна́меніемъ бѣ́си погиба́ютъ, и все́ покаря́ется Дре́ву Кре́стному, си́лы дѣ́льма Пропя́таго на не́мъ. И не то́чію ны́нѣ побѣжда́етъ о́бразъ Кре́стный ра́тныхъ, но и пре́жде сего́ побѣжда́ше и одолѣва́ша. Да не чуди́теся, я́ко такову́ си́лу и́мать Кре́стъ, я́ко и о́бразъ его́ и начерта́ніе побѣжда́ше проти́вныя полки́.

Разумѣ́йте о́браза си́лу: же́злъ Моисе́овъ имя́ше о́бразъ Креста́, я́коже рече́ Па́велъ апо́столъ: пія́ху бо отъ духо́внаго послѣ́дующаго Ка́мене, Ка́мень же бѣ́ Христо́съ. Се́й же́злъ, о́бразъ Кре́стный, коли́ка у́бо сотвори́лъ е́сть проти́внымъ зла́, вѣ́рнымъ же добра́? Рѣ́ки Еги́петскія о́нымъ Моисе́й на кро́вь преложи́. Пру́ги, и хру́сты, и жа́бы, и гра́дъ, и тму́ неосяза́ему, и мглу́, и сме́рть на пе́рвенцы, жезло́мъ нанесе́. На́нь же бѣ́ нанесе́нъ же́злъ, то́ все́ побѣжда́шеся. Жезло́мъ изба́вилъ е́сть Бо́гъ ро́дъ евре́йскій отъ лю́тыя рабо́ты фарао́новы. Кре́стнымъ бо зна́меніемъ спа́слъ и́хъ е́сть, и и́стинѣ не поклони́шася. Егда́ бо сквозѣ́ Чермно́е мо́ре проидо́ша, ничто́ же имя́ше Моисе́й, то́кмо зна́меніе Кре́стное. И се́ фарао́нъ по ни́хъ пожене́ со мно́гимъ ору́жіемъ и мно́жество безчи́сленное муже́й хра́брыхъ съ ни́мъ. Мо́ре, ви́дѣвъ его́, не убоя́ся, жезла́ же Моисе́ова ви́дѣвъ о́бразъ, и убоя́ся: неосія́емая пучи́на разве́рзеся, и многошу́мный гла́съ во́лнъ разступи́ся, и неудержа́нная пучи́на морска́я стѣно́ю одесну́ю, и стѣно́ю ошу́юю и́мъ бы́сть; и сія́ спа́слъ е́сть, а о́ны потопи́лъ. Разумѣ́ ли о́браза си́лу? Поклони́ся Кре́стнѣй си́лѣ и́стиннѣй. Предзря́ Моисе́й Креста́, хотя́ща сія́ти по все́й вселе́ннѣй, и тѣ́мъ о́бразомъ вся́ враги́ побѣжда́ше. Егда́ бо посла́ Іису́са На́ввина бра́тися съ супоста́ты, просте́ртіемъ руку́ крестообра́зно, укрѣпля́шеся Іису́съ На́ввинъ на враги́, и побѣжда́ше я́. Тѣ́мже Креста́ о́бразъ, побѣ́ды и при Моисе́и явля́ше. Мно́го у́бо е́сть сло́во е́же о Крестѣ́, и неизрече́нная его́ си́ла.

Мно́го тща́ніе имя́ше діа́волъ е́же поста́вити Кре́стъ, не вѣ́дый си́лы его́: егда́ же поста́вленъ бы́сть, не мо́жетъ зрѣ́ти на́нь. Поклоня́ющіи же ся Кресту́ побѣжда́ютъ діа́вола. Всеси́ленъ е́сть Кре́стъ Христо́въ, всѣ́мъ благотворя́ и отъ всѣ́хъ поклоне́ніе пріе́млетъ. Ви́ждь благодѣя́ніе его́: а́ще кто́ ни́щъ е́сть, и помо́лится ему́, и а́біе до́мъ его́ обогати́тся; или́ кто́ бу́рею посреди́ мо́ря потопля́емь, зна́меніемъ Кре́стнымъ въ ти́хое приста́нище приста́нетъ; или́ а́ще кто́ на одрѣ́ лежа́, и во вся́кой бѣдѣ́ Креста́ помо́щника себѣ́ призыва́етъ, отъ вся́кія болѣ́зни и бѣды́ свобо́дь быва́етъ; или́ кто́ мно́жествомъ грѣхо́въ одержи́мь, зна́меніемъ Кре́стнымъ отъ бу́ри грѣхо́вныя спасе́нъ бу́детъ и въ ми́рное Приста́нище до́йдетъ, е́же е́сть Христо́съ Бо́гъ на́шъ, пригвожде́нный на Крестѣ́, и во́ гробѣ положе́нъ, изъ ме́ртвыхъ воста́, просвѣща́я вся́ческая.

Тому́ сла́ва со Отце́мъ и Святы́мъ Ду́хомъ, ны́нѣ и при́сно и во́ вѣки вѣко́мъ, ами́нь.

Источникъ: Кни́га, глаго́лемая «Златоу́стъ», въ не́йже вся́ко ухищре́ніе Боже́ственнаго Писа́нія, истолко́вано святы́мъ вели́кимъ Іоа́нномъ Златоу́стомъ и про́чими святы́ми отцы́. — М.: При Свя́то-Тро́ицко-Введе́нской це́ркви, въ тѵпогра́фіи единовѣ́рцевъ, 1910. — Л. 198 – 201.

/ Къ оглавленію раздѣла /


Наверхъ / Къ титульной страницѣ

0