Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - вторникъ, 27 iюня 2017 г. Сейчасъ на порталѣ посѣтителей - 23.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ДОМАШНЯЯ МОЛИТВА

О преподобныхъ отцахъ Кіево-Печерской лавры.

Собор всех преподобных отцов Киево-ПечерскихКіево-Печерская лавра — православный мужской монастырь въ южной части г. Кіева, среди холмистой мѣстности на берегу р. Днѣпра. Основана преп. Антоніемъ въ пол. XI в. Первая деревянная церковь построена 1062; на мѣстѣ ея преп. Ѳеодосій воздвигъ каменный соборъ (1073). Монастырь много страдалъ отъ набѣговъ половцевъ (1096) и татаръ (1240, 1483); титулъ лавры получилъ въ концѣ XVI в. Императоръ Петръ Великій возвелъ вокругъ монастыря крѣпость. Кіево-Печерская лавра — древнѣйшій и славнѣйший монастырь Святой Руси. Въ его пещерахъ («Ближнихъ» и «Дальнихъ») покоятся мощи 125 святыхъ чудотворцевъ.

Преподобные отцы Кіево-Печерской Лавры — покровители монашествующихъ и помощники всѣмъ православнымъ христіанамъ въ скорбяхъ и обстояніяхъ. Къ нимъ прибѣгаютъ за исцѣленіемъ въ тяжкихъ недугахъ, за помощью во время голода и бѣдствій, за защитой въ борьбѣ со страстями, за поддержкой въ различныхъ нуждахъ. Общая память Собора всѣхъ преподобныхъ Кіево-Печерскихъ совершается во 2-ю недѣлю Великаго поста; память Собора всѣхъ преподобныхъ, почивающихъ въ Ближнихъ пещерахъ (преп. Антонія)28 сентября (11 октября н. ст.); память Собора всѣхъ преподобныхъ, почивающихъ въ Дальнихъ пещерахъ (преп. Ѳеодосія)28 августа (10 сентября н. ст.).

КАНОНЫ МОЛЕБНЫЕ

Кано́нъ моле́бный ко всѣ́мъ преподо́бнымъ отце́мъ Пече́рскимъ [1].

Моли́твами святы́хъ оте́цъ на́шихъ, Го́споди Іису́се Христе́, Сы́не Бо́жій, поми́луй на́съ, ами́нь.

Святы́й Бо́же, Святы́й Крѣ́пкій, Святы́й Безсме́ртный, поми́луй на́съ. [Три́жды, и покло́ны три.]

Сла́ва Отцу́ и Сы́ну и Свято́му Ду́ху, и ны́нѣ и при́сно и во вѣ́ки вѣко́въ, ами́нь.

Пресвята́я Тро́ице, поми́луй на́съ: Го́споди, очи́сти грѣхи́ на́ша; Влады́ко, прости́ беззако́нія на́ша; Святы́й, посѣти́ и исцѣли́ не́мощи на́ша, и́мене Твоего́ ра́ди.

Го́споди поми́луй. [Три́жды.]
Сла́ва Отцу́ и Сы́ну и Свято́му Ду́ху, и ны́нѣ и при́сно и во вѣ́ки вѣко́въ, ами́нь.

Отче на́шъ, Иже еси́ на небесѣ́хъ! Да святи́тся и́мя Твое́, да пріи́детъ Ца́рствіе Твое́, да бу́детъ во́ля Твоя́, я́ко на небеси́ и на земли́. Хлѣ́бъ на́шъ насу́щный да́ждь на́мъ дне́сь; и оста́ви на́мъ до́лги на́ша, я́коже и мы́ оставля́емъ должнико́мъ на́шимъ; и не введи́ на́съ во искуше́ніе, но изба́ви на́съ отъ лука́ваго.

Го́споди Іису́се Христе́, Сы́не Бо́жій, поми́луй на́съ, ами́нь.
Та́же, Го́споди поми́луй. [12.]
Сла́ва Отцу́ и Сы́ну и Свято́му Ду́ху, и ны́нѣ и при́сно и во вѣ́ки вѣко́въ, ами́нь.

Пріиди́те, поклони́мся Царе́ви на́шему Бо́гу. [Покло́нъ.]

Пріиди́те, поклони́мся и припаде́мъ Христу́, Царе́ви на́шему Бо́гу. [Покло́нъ.]

Пріиди́те, поклони́мся и припаде́мъ самому́ Христу́, Царе́ви и Бо́гу на́шему. [Покло́нъ.]

Псало́мъ 142:

Го́споди, услы́ши моли́тву мою́, внуши́ моле́ніе мое́ во и́стинѣ Твое́й, услы́ши мя́ въ пра́вдѣ Твое́й и не вни́ди въ су́дъ съ рабо́мъ Твои́мъ, я́ко не оправди́тся предъ Тобо́ю вся́къ живы́й. Яко погна́ вра́гъ ду́шу мою́, смири́лъ е́сть въ зе́млю живо́тъ мо́й, посади́лъ мя́ е́сть въ те́мныхъ, я́ко ме́ртвыя вѣ́ка. И уны́ во мнѣ́ ду́хъ мо́й, во мнѣ́ смяте́ся се́рдце мое́. Помяну́хъ дни́ дре́внія, поучи́хся во всѣ́хъ дѣ́лѣхъ Твои́хъ, въ творе́ніихъ руку́ Твое́ю поуча́хся. Воздѣ́хъ къ Тебѣ́ ру́цѣ мои́, душа́ моя́, я́ко земля́ безво́дная Тебѣ́. Ско́ро услы́ши мя́, Го́споди, исчезе́ ду́хъ мо́й, не отврати́ лица́ Твоего́ отъ мене́, и уподо́блюся низходя́щимъ въ ро́въ. Слы́шану сотвори́ мнѣ́ зау́тра ми́лость Твою́, я́ко на Тя́ упова́хъ. Скажи́ мнѣ́, Го́споди, пу́ть въ о́ньже пойду́, я́ко къ Тебѣ́ взя́хъ ду́шу мою́. Изми́ мя отъ вра́гъ мои́хъ, Го́споди, къ Тебѣ́ прибѣго́хъ. Научи́ мя твори́ти во́лю Твою́, я́ко Ты́ еси́ Бо́гъ мо́й. Ду́хъ Тво́й благíй наста́витъ мя́ на зе́млю пра́ву. Имене Твоего́ ра́ди, Го́споди, живи́ши мя́, пра́вдою Твое́ю изведе́ши отъ печа́ли ду́шу мою́. И ми́лостію Твое́ю потреби́ши враги́ моя́, и погуби́ши вся́ стужа́ющія души́ мое́й, я́ко а́зъ ра́бъ Тво́й е́смь.

Сла́ва Отцу́ и Сы́ну и Свято́му Ду́ху, и ны́нѣ и при́сно и во вѣ́ки вѣко́въ, ами́нь.
Аллилу́ія, аллилу́ія, аллилу́ія, сла́ва Тебѣ́, Бо́же. [Три́жды, и покло́ны три.]

Та́же, Го́споди поми́луй. [12.]
Сла́ва Отцу́ и Сы́ну и Свято́му Ду́ху, и ны́нѣ и при́сно и во вѣ́ки вѣко́въ, ами́нь.

Посе́мъ: Бо́гъ Госпо́дь... [По гла́су тропаря:]

Бо́гъ Госпо́дь, и яви́ся на́мъ, благослове́нъ гряды́й во и́мя Госпо́дне.

Сти́хъ: Исповѣ́дайтеся Го́сподеви, я́ко бла́гъ, я́ко въ вѣ́къ ми́лость Его́.

Бо́гъ Госпо́дь, и яви́ся на́мъ, благослове́нъ гряды́й во и́мя Госпо́дне.

Сти́хъ: Обыше́дше обыдо́ша мя́, и и́менемъ Госпо́днимъ противля́хся и́мъ.

Бо́гъ Госпо́дь, и яви́ся на́мъ, благослове́нъ гряды́й во и́мя Госпо́дне.

Сти́хъ: Не умру́, но жи́въ бу́ду, и повѣ́мъ дѣла́ Госпо́дня.

Бо́гъ Госпо́дь, и яви́ся на́мъ, благослове́нъ гряды́й во и́мя Госпо́дне.

Сти́хъ: Ка́мень, eго́же небрего́ша зи́ждущіи, се́й бы́сть во главу́ у́гла, отъ Го́спода бы́сть се́й, и е́сть ди́венъ во очесѣ́хъ на́шихъ.

Бо́гъ Госпо́дь, и яви́ся на́мъ, благослове́нъ гряды́й во и́мя Госпо́дне.

Тропа́рь, гла́съ 2:

Егда́ снидо́сте во гро́бы, и самѣ́хъ себе́ заключи́сте, тогда́, стра́сти умертви́вше плотскíя, спогребо́стеся Христу́, богоно́сніи, и діа́вольскія въ подзе́мныхъ разруши́сте огра́ды, сего́ ра́ди а́нгели вѣнцы́ съ небе́съ ва́мъ подаю́тъ. [Два́жды.]

Сла́ва и ны́нѣ, богоро́диченъ:

Вся́, па́че смы́сла, вся́ пресла́вная Твоя́, Богоро́дице, та́инства, чистотѣ́ запеча́танной и дѣ́вству храни́му, Ма́ти позна́лася еси́ нело́жна, Бо́га ро́ждши Истиннаго. Того́ моли́ спасти́ся душа́мъ на́шимъ.

Та́же, псало́мъ 50-й:

Поми́луй мя́, Бо́же, по вели́цѣй ми́лости Твое́й, и по мно́жеству щедро́тъ Твои́хъ очи́сти беззако́ніе мое́. Наипа́че омы́й мя отъ беззако́нія моего́, и отъ грѣха́ моего́ очи́сти мя. Я́ко беззако́ніе мое́ а́зъ зна́ю и грѣ́хъ мо́й предо мно́ю е́сть вы́ну. Тебѣ́ Еди́ному согрѣши́хъ, и лука́вое предъ Тобо́ю сотвори́хъ, я́ко да оправди́шися во словесѣ́хъ Твои́хъ и побѣди́ши, внегда́ суди́ти Ти́. Се́ бо въ беззако́ніихъ зача́тъ е́смь, и во грѣсѣ́хъ роди́ мя́ ма́ти моя́. Се́ бо и́стину возлюби́лъ еси́, безвѣ́стная и та́йная прему́дрости Твоея́ яви́лъ ми́ еси́. Окропи́ши мя́ иссо́помъ, и очи́щуся, омы́еши мя́, и па́че снѣ́га убѣлю́ся. Слу́ху моему́ да́си ра́дость и весе́ліе, возра́дуются ко́сти смире́нныя. Отврати́ лице́ Твое́ отъ грѣ́хъ мои́хъ, и вся́ беззако́нія моя́ очи́сти. Се́рдце чи́сто сози́жди во мнѣ́, Бо́же, и ду́хъ пра́въ обнови́ во утро́бѣ мое́й. Не отве́ржи мене́ отъ лица́ Твоего́, и Ду́ха Твоего́ Свята́го не отъими́ отъ мене́. Возда́ждь ми́ ра́дость спасе́нія Твоего́, и Ду́хомъ Влады́чнимъ утверди́ мя́. Научу́ беззако́нныя путе́мъ Твои́мъ, и нечести́віи къ Тебѣ́ обратя́тся. Изба́ви мя́ отъ крове́й, Бо́же, Бо́же спасе́нія моего́, возра́дуется язы́къ мо́й пра́вдѣ Твое́й. Го́споди, устнѣ́ мои́ отве́рзеши, и уста́ моя́ возвѣстя́тъ хвалу́ Твою́. Я́ко а́ще бы восхотѣ́лъ еси́ же́ртвы, да́лъ бы́хъ убо́, всесожже́нія не благоволи́ши. Же́ртва Бо́гу ду́хъ сокруше́нъ, се́рдце сокруше́нно и смире́нно Бо́гъ не уничижи́тъ. Ублажи́, Го́споди, благоволе́ніемъ Твои́мъ Сіо́на, и да сози́ждутся стѣ́ны Іерусали́мскія. Тогда́ благоволи́ши же́ртву пра́вды, возноше́ніе и всесожега́емая: тогда́ возложа́тъ на олта́рь Тво́й тельцы́.

Кано́нъ преподо́бнымъ, гла́съ 8. [2]

Пѣ́снь 1.

Ирмо́съ: Во́ду проше́дъ, я́ко су́шу, и еги́петскаго зла́ избѣжа́въ, изра́ильтянинъ вопія́ше: Изба́вителю и Бо́гу на́шему пои́мъ.

Припѣ́въ: Преподо́бніи отцы́ Пече́рскіи, моли́те Бо́га о на́съ.

Въ па́мяти преподо́бныхъ Твои́хъ, да́ждь, Христе́ мо́й, по́мощь свы́ше и научи́ мя, умудря́я Святы́мъ Твои́мъ Паракли́томъ, да принесу́ пѣ́сненное хвале́ніе Тебѣ́, еди́ному Влады́цѣ.

Припѣ́въ: Преподо́бніи отцы́ Пече́рскіи, моли́те Бо́га о на́съ.

Во́ду преходи́ти пѣ́сненныхъ слове́съ въ па́мять ва́шу, богоно́сніи отцы́, хотя́ща мя́, въ тишинѣ́ у́мной всегда́ испра́вите, и отъ бу́рныхъ страсте́й удержи́те, да въ ва́шемъ хвале́ніи съ пѣ́снію возвели́чу и́мя Бо́га моего́.

Припѣ́въ: Преподо́бніи отцы́ Пече́рскіи, моли́те Бо́га о на́съ.

Собо́ръ богоно́сныхъ оте́цъ о Бо́зѣ собра́ся, лю́діе, пріиди́те въ поклоне́ніе, несу́ще съ собо́ю одушевле́нныя же́ртвы, се́ бо призыва́ютъ ны́, да принесе́мъ сла́ву Царю́ всѣ́хъ, еди́ному Влады́цѣ.

Припѣ́въ: Преподо́бніи отцы́ Пече́рскіи, моли́те Бо́га о на́съ.

Благоплодови́тое дре́во и ма́сличная вѣ́твь, отъ Аѳо́на принесе́нная на сію́ го́ру, вели́кій Анто́ній, его́же плода́ми увеселя́юще ду́ши на́ша, прино́симъ пѣ́снь Тебѣ́, Христу́, всѣ́хъ Влады́цѣ.

Сла́ва: Сла́ву Твою́, Тро́ице Свята́я, въ жи́зни се́й преподо́бніи въ души́ свое́й сохрани́ша, тѣ́мъ сподо́бишася отъ Тебе́ присносу́щныя сла́вы, ея́же и мы́ да не лиши́мся, собо́ръ и́хъ дне́сь Тебѣ́ въ моли́тву представля́емъ.

И ны́нѣ: Въ пе́рвое благоро́діе Приве́дшая ро́дъ человѣ́ческій святы́мъ Рождество́мъ Твои́мъ, обезче́щенна мя́ бѣсо́вскими ла́яніи, приведи́ ко сла́вѣ у́мнѣй, да вы́ну пою́ Ти: ра́дуйся, сла́во правосла́вныхъ, Чи́стая Ма́ти Дѣ́во.

Катава́сія: Моли́те Бо́га о на́съ, преподо́бніи отцы́ на́ши Анто́ніе и Ѳеодо́сіе и вси́ преподо́бніи Пече́рскіи, я́ко мы́ усе́рдно къ ва́мъ прибѣга́емъ, ско́рымъ помо́щникомъ и моли́твенникомъ о душа́хъ на́шихъ. [Покло́нъ.]

Го́споди поми́луй. [Три́жды.]

Пѣ́снь 3.

Ирмо́съ: Небе́снаго кру́га Верхотво́рче, Го́споди, и Це́ркве Зижди́телю, Ты́ мене́ утверди́ въ любви́ Твое́й, жела́ній кра́ю, вѣ́рныхъ утвержде́ніе, еди́не Человѣколю́бче.

Припѣ́въ: Преподо́бніи отцы́ Пече́рскіи, моли́те Бо́га о на́съ.

Небе́снаго и земна́го кру́га Созда́тель созда́ мѣ́сто сіе́, и ва́съ, до́брыя гра́жданы, въ не́мъ поста́ви, треблаже́нніи отцы́. Причти́те на́съ въ сожи́тіе ва́ше нетлѣ́нное и жела́емаго кра́я ми́лости дости́гнути моли́теся, мо́лимъ ва́съ.

Припѣ́въ: Преподо́бніи отцы́ Пече́рскіи, моли́те Бо́га о на́съ.

Изъ горы́ по предуви́дѣнію Бо́жію свѣти́ла яви́шася на земли́ богоно́сніи отцы́ и просвѣти́ша Россíйскую зе́млю свѣ́тлостію житія́ своего́, е́же мы́ чту́ще, удивля́емся и славосло́вимъ, Христе́, си́лу Твою́.

Припѣ́въ: Преподо́бніи отцы́ Пече́рскіи, моли́те Бо́га о на́съ.

Удивля́емся, я́ко, во пло́ти су́ще, вы́шше естества́ по́двигъ пріе́мше, а́нгеломъ уподо́бишася, ду́ши бо своя́ впери́вше въ любо́вь Бо́жію, ничто́же въ мíрѣ па́че тоя́ предпочто́ша, отъ нея́же въ немощно́й пло́ти прія́ша, Христе́, си́лу Твою́.

Припѣ́въ: Преподо́бніи отцы́ Пече́рскіи, моли́те Бо́га о на́съ.

Страсте́й мглу́ всю́ и по́хоть вре́дну отло́жше, терпѣ́ніемъ востеко́ша на предлежа́щій по́двигъ преподо́бніи Твои́, Го́споди. Тѣ́мже озари́шася отъ Тебе́ благода́тію, ходя́ще во свѣ́тѣ повелѣ́ній Твои́хъ, Спа́се.

Сла́ва: Во Еди́номъ Существѣ́ Тріѵпоста́сное прославля́емъ Божество́, Отца́ и Сы́на и Ду́ха Пресвята́го, Еди́наго же Тя́ пое́мъ Бо́га, и покланя́ющеся въ па́мяти преподо́бныхъ оте́цъ на́шихъ, славосло́вимъ си́лу Твою́.

И ны́нѣ: Сло́вомъ неизглаго́ланное весе́ліе су́щи преподо́бныхъ, ра́дости мя́ о́ныхъ прича́стника сотвори́ и сла́вы святы́хъ не лиши́, я́ко вся́ Тебѣ́ о Бо́зѣ возмо́жна, и твори́ши, ели́ка хо́щеши, Марíе Богоневѣ́сто.

Катава́сія: Моли́те Бо́га о на́съ, преподо́бніи отцы́ на́ши Анто́ніе и Ѳеодо́сіе и вси́ преподо́бніи Пече́рскіи, я́ко мы́ усе́рдно къ ва́мъ прибѣга́емъ, ско́рымъ помо́щникомъ и моли́твенникомъ о душа́хъ на́шихъ. [Покло́нъ.]

Го́споди поми́луй. [Три́жды.]

Сѣда́ленъ, гла́съ 8:

Звѣ́зды мы́сленныя, озаря́ющія Россíйскую зе́млю, богоно́сныхъ оте́цъ собо́ръ почита́ти дерза́ю, но, страстьми́ омраче́нную имы́й ду́шу, умо́мъ недоумѣ́ю; разжени́те тму́ непостоя́нныя мы́сли, да че́стно воспою́ пѣ́снь ва́мъ, отцы́ преблаже́нніи.

Сла́ва, гла́съ 2:

Поще́ніемъ просія́вшихъ и свѣ́тлыми по́двиги преподо́бныхъ оте́цъ Пече́рскихъ чи́стое житіе́ и труды́ кто́ восхвали́ти мо́щенъ? Оба́че отъ любве́, я́же къ ни́мъ, пѣ́сненныя да́ры прино́симъ, тíи бо, со а́нгелы предстоя́ще, при́сно мо́лятся Го́сподеви о всѣ́хъ на́съ.

И ны́нѣ, богоро́диченъ:

Милосе́рдія су́щи исто́чникъ, ми́лости сподо́би на́съ, Богоро́дице, при́зри на лю́ди согрѣши́вшія, яви́, я́ко при́сно, си́лу Твою́, на Тя́ бо упова́юще, — ра́дуйся, — вопіе́мъ Ти́, я́коже иногда́ Гавріи́лъ, безпло́тныхъ архистрати́гъ.

Пѣ́снь 4.

Ирмо́съ: Услы́шахъ, Го́споди, смотре́нія Твоего́ та́инство, разумѣ́хъ дѣла́ Твоя́, и просла́вихъ Твое́ Божcтво́.

Припѣ́въ: Преподо́бніи отцы́ Пече́рскіи, моли́те Бо́га о на́съ.

Неусы́пнѣ серде́чное видѣ́ніе иму́ще къ Бо́гу, бы́сте незло́бивіи, а́ки младе́нцы, но я́ро о́ко имѣ́сте на бѣ́сы, я́ко и и́мене ва́шего и́мъ трепета́ти. Мо́лимъ ва́съ, моли́теся, да и отъ на́съ нападе́нія вра́жія со студо́мъ возвратя́тся.

Припѣ́въ: Преподо́бніи отцы́ Пече́рскіи, моли́те Бо́га о на́съ.

Одержи́мь е́смь любо́вію восхвали́ти ва́шъ собо́ръ, отцы́ богоно́сніи, вы́ бо хвали́ми есте́ отъ Бо́га и человѣ́къ, я́ко въ жи́зни се́й сла́ву мíра сего́ презрѣ́сте, да испо́лните повелѣ́нія Христо́ва.

Припѣ́въ: Преподо́бніи отцы́ Пече́рскіи, моли́те Бо́га о на́съ.

Кíй язы́къ изрече́тъ сла́ву ва́шу, о преподо́бніи, ю́же мно́гими труда́ми стяжа́сте, благода́тію же наверши́сте? И сія́ зна́менія явля́ютъ чуде́сная ва́ша благотворе́нія и исцѣле́нія, и́миже и на́съ, немощны́хъ, не пре́зрите, да возмо́жемъ испо́лнити повелѣ́нія Христо́ва.

Припѣ́въ: Преподо́бніи отцы́ Пече́рскіи, моли́те Бо́га о на́съ.

Госпо́дь пасе́тъ ва́съ ны́нѣ на мѣ́стѣ зла́чнѣ, преблаже́нніи отцы́, и ко́е уже́ ва́съ лиша́етъ бла́го? Пото́къ бо сла́дости ва́съ напая́етъ, отъ него́же поне́ ка́плею еди́ною житія́ на́шего го́ресть, мо́лимся, услади́те, да ра́достно Бо́гу на́шему воспое́мъ.

Сла́ва: Ду́хъ Пресвяты́й спослушеству́етъ ду́хови ва́шему, отцы́ богоно́сніи, я́ко есте́ ча́да Бо́жія и снаслѣ́дницы Христо́вы, и Ему́же рабо́тасте, съ Ни́мъ и прославля́етеся, пою́ще: благослове́нъ Бо́гъ оте́цъ на́шихъ.

И ны́нѣ: Вся́ сла́ва Твоя́, Дщи́ Царе́ва, вну́трь, одѣ́яна и преукраше́нна предстои́ши Тро́ическому Престо́лу, отню́ду же сія́я па́че со́лнца луча́ми бла́гости Твоея́, при́зри на ны́, да вы́ну пое́мъ, Ма́ти Дѣ́во, си́лу Твою́.

Катава́сія: Моли́те Бо́га о на́съ, преподо́бніи отцы́ на́ши Анто́ніе и Ѳеодо́сіе и вси́ преподо́бніи Пече́рскіи, я́ко мы́ усе́рдно къ ва́мъ прибѣга́емъ, ско́рымъ помо́щникомъ и моли́твенникомъ о душа́хъ на́шихъ. [Покло́нъ.]

Го́споди поми́луй. [Три́жды.]

Пѣ́снь 5.

Ирмо́съ: Просвѣти́ на́съ повелѣ́ніи Твои́ми, Го́споди, и мы́шцею Твое́ю высо́кою Тво́й ми́ръ пода́ждь на́мъ, Человѣколю́бче.

Припѣ́въ: Преподо́бніи отцы́ Пече́рскіи, моли́те Бо́га о на́съ.

Просвѣти́ша всю́ Россíйскую зе́млю да́нною и́мъ благода́тію отцы́ всеблаже́нніи, и тма́ уже́ зловѣ́рія въ коне́цъ поги́бе. Ты́я лучи́ простри́ на ны́ моле́нія и́хъ ра́ди, мо́лимтися, еди́не Человѣколю́бче.

Припѣ́въ: Преподо́бніи отцы́ Пече́рскіи, моли́те Бо́га о на́съ.

Въ горѣ́ святѣ́й, въ те́мной пеще́рѣ ку́щи своя́ водрузи́сте, отцы́ преблаже́нніи, Бо́жій ра́й сотвори́сте и огусти́сте добродѣ́тельми и чудесы́, а́ки благоплодови́тыми древеса́ми, отъ ни́хже приходя́щіи вѣ́рно пріе́млютъ исцѣле́нія плоды́ и ва́съ хвала́ми велича́ютъ.

Припѣ́въ: Преподо́бніи отцы́ Пече́рскіи, моли́те Бо́га о на́съ.

Изше́дъ на зла́чное по́ле мы́сленнаго рая́ пеще́ры святы́я, услажда́юся благово́нными арома́ты, я́же источа́ютъ мо́щи ва́ша, преподо́бніи отцы́, и ве́село Созда́телю Бо́гу пѣ́снь умо́мъ возсыла́ю.

Припѣ́въ: Преподо́бніи отцы́ Пече́рскіи, моли́те Бо́га о на́съ.

Вертогра́дъ заключе́нъ ты́ еси́, пеще́ро свята́я, въ тебѣ́ бо Сади́тель Вы́шній насади́ мно́жество древе́съ, богоно́сныхъ оте́цъ, а́ки ке́дровъ лива́нскихъ, и́же досяго́ша небе́съ высото́ю, и́мже удивля́яся, пою́ пѣ́снь Бо́гу моему́.

Сла́ва: Сла́ва Тебѣ́, Тро́ице Пресвята́я, я́ко просла́вила еси́ мѣ́сто земно́е, небе́сному гра́жданы подо́бное, въ и́хже па́мяти приноси́мымъ отъ на́съ пѣ́ніемъ Тя́, Отче и Сы́не и Ду́ше Святы́й, съ раболѣ́пнымъ поклоне́ніемъ, грѣ́шніи, сла́вимъ и Твое́ Еди́но Божество́ превозно́симъ.

И ны́нѣ: Къ преподо́бныхъ селе́нію отъ дѣ́лъ восхо́да не имы́й, къ Тебѣ́ прибѣга́ю, Влады́чице Богоро́дице, Ты́ бо еси́ две́рь небе́сная и проро́комъ ви́дѣнная лѣ́стница, по благода́ти у́бо Твое́й да́ждь восхожде́ніе въ се́рдцѣ мое́мъ и отве́рзи ми́ две́ри ми́лости Твоея́.

Катава́сія: Моли́те Бо́га о на́съ, преподо́бніи отцы́ на́ши Анто́ніе и Ѳеодо́сіе и вси́ преподо́бніи Пече́рскіи, я́ко мы́ усе́рдно къ ва́мъ прибѣга́емъ, ско́рымъ помо́щникомъ и моли́твенникомъ о душа́хъ на́шихъ. [Покло́нъ.]

Го́споди поми́луй. [Три́жды.]

Пѣ́снь 6.

Ирмо́съ: Моли́тву пролію́ ко Го́споду и Тому́ возвѣщу́ печа́ли моя́, я́ко зо́лъ душа́ моя́ испо́лнися и живо́тъ мо́й а́ду прибли́жися, и молю́ся, я́ко Іо́на: отъ тли́, Бо́же, возведи́ мя.

Припѣ́въ: Преподо́бніи отцы́ Пече́рскіи, моли́те Бо́га о на́съ.

Моли́твы на́ша прино́симъ ва́мъ, о богоно́сніи отцы́, вы́ бо есте́ моли́твенницы о на́съ къ Бо́гу и хода́таи, хода́тайствомъ у́бо ва́шимъ отъ тли́ грѣхо́вныя изба́вите честны́й ва́шъ собо́ръ почита́ющихъ.

Припѣ́въ: Преподо́бніи отцы́ Пече́рскіи, моли́те Бо́га о на́съ.

Ра́й мы́сленный еси́, Пече́рская свята́я горо́, умно́жившая у́мная древеса́ — блаже́нныя отцы́, и́хже исчести́ по еди́ному не могу́ще, о всѣ́хъ вку́пѣ хвалу́ и пѣ́снь прино́симъ еди́ному Влады́цѣ.

Припѣ́въ: Преподо́бніи отцы́ Пече́рскіи, моли́те Бо́га о на́съ.

Ихже изведе́ восто́къ и Россíйская страна́ и израсти́ Пече́рская гора́, а́ки богонасажде́нная древеса́, си́хъ плоды́ объе́млюще, лю́діе, стеци́теся почти́ти, и пѣ́снь принесе́мъ Влады́цѣ.

Припѣ́въ: Преподо́бніи отцы́ Пече́рскіи, моли́те Бо́га о на́съ.

Дре́внихъ оте́цъ стопа́мъ послѣ́дующе, не уклони́стеся ни ма́ло отъ и́хъ трудо́въ, тѣ́мже ра́вный дина́рь вѣ́чныя жи́зни отъ Христа́ пріе́мше, со а́нгелы сла́вите превѣ́чное Того́ Божество́.

Сла́ва: Впадо́хъ въ ру́ки враго́въ мы́сленныхъ и око́ванъ е́смь отъ ни́хъ тя́жкими пу́ты, отъ ни́хже бра́тъ не изба́витъ. Ты́, Тро́ице Пресвята́я, я́ко Ми́лостивая, созда́ніе Твое́ поми́луй и бла́гостію Твое́ю отъ у́зъ сме́ртныхъ свободи́.

И ны́нѣ: Сла́вити Тя́ всегда́ кто́ не хо́щетъ, Чи́стая Дѣ́во, чу́ждъ е́сть спасе́нія своего́: сла́ва бо Твоя́ всѣ́мъ простре́ся во спасе́ніе, сла́вящимъ Тя́, Марíе Богоневѣ́сто.

Катава́сія: Моли́те Бо́га о на́съ, преподо́бніи отцы́ на́ши Анто́ніе и Ѳеодо́сіе и вси́ преподо́бніи Пече́рскіи, я́ко мы́ усе́рдно къ ва́мъ прибѣга́емъ, ско́рымъ помо́щникомъ и моли́твенникомъ о душа́хъ на́шихъ. [Покло́нъ.]

Го́споди поми́луй. [Три́жды.] Сла́ва и ны́нѣ.

Конда́къ, гла́съ 8. Подо́бенъ: Взбра́нной.

Отцы́ всечестнíи, ли́че богокра́сный, чуде́съ мно́гихъ исто́чницы, мѵ́ро источа́ющіи, сокро́вища краснобога́тная Госпо́дня, въ земли́ сокрове́нная, не преста́йте, мо́лимъ вы́, о на́съ моли́тися ко Го́споду, да зове́мъ ва́мъ: ра́дуйтеся, всему́ мíру свѣти́льницы.

Икосъ:

Ангельски пожи́вшія на земли́, и а́нгеломъ равностоя́тели я́вльшіяся на небеси́, съ тѣ́мижде и неизрече́нныя о́ныя наслажда́ющіяся добро́ты, достоблаже́нныя отцы́ на́ша, помо́щники и засту́пники те́плыя, пріиди́те, вѣ́рніи, восхва́лимъ, къ ни́мъ вопію́ще: ра́дуйся, Анто́ніе, со́лнцу подо́бный свѣти́льниче; ра́дуйся, зерца́ло и о́бразе всѣ́мъ преподо́бнымъ Россíйскимъ; ра́дуйся, вторы́й Моисе́е, мы́сленныя скрижа́ли, добродѣ́тели твоя́ на́мъ отъ горы́ святы́я принесы́й. Ра́дуйся, Ѳеодо́сіе, ангелови́дный человѣ́че; ра́дуйся, звѣздо́ у́тренняя, тьму́ невѣ́дѣнія прогоня́ющая; ра́дуйся, забра́ло необори́мое отъ вра́гъ ви́димыхъ и неви́димыхъ. Ра́дуйтеся, вси́ преподо́бніи отцы́ на́ши Пече́рскіи; ра́дуйтеся, земнíи а́нгели и небе́сніи человѣ́цы; ра́дуйтеся, благоуха́нніи цвѣ́ти ра́йстіи; ра́дуйтеся, пребога́тая сокро́вища сокрове́нная въ земли́; ра́дуйтеся, би́серіе многоцѣ́нніи, отъ пеще́ры, а́ки отъ мо́ря, просія́вшіи; ра́дуйтеся, на́ша похвало́ и всѣ́мъ прибѣга́ющимъ къ ва́мъ изба́вителіе от бѣ́дъ; ра́дуйтеся, всему́ мíру свѣти́льницы.

Пѣ́снь 7.

Ирмо́съ: Отъ Іуде́и доше́дше, о́троцы, въ Вавило́нѣ иногда́, вѣ́рою Тро́ическою пла́мень пе́щный попра́ша, пою́ще: отце́въ Бо́же, благослове́нъ еси́.

Припѣ́въ: Преподо́бніи отцы́ Пече́рскіи, моли́те Бо́га о на́съ.

Ту́чная еси́ и усыре́нная, Пече́рская горо́, въ твои́хъ бо гра́жданѣхъ изво́ли Вы́шній селе́ніе Свое́ положи́ти, тѣ́мже и мы́ съ ни́ми пое́мъ: оте́цъ на́шихъ Бо́же, благослове́нъ еси́.

Припѣ́въ: Преподо́бніи отцы́ Пече́рскіи, моли́те Бо́га о на́съ.

Сми́рны испо́лнена и хо́лму Лива́нскому подо́бна еси́, Пече́рская горо́, ка́плющая мѵ́ры богоно́сныхъ оте́цъ на исцѣле́ніе болѣ́зней тлетво́рныхъ, и́хже мы́ благоуха́ніе пріе́млюще, пое́мъ: оте́цъ на́шихъ Бо́же, благослове́нъ еси́.

Припѣ́въ: Преподо́бніи отцы́ Пече́рскіи, моли́те Бо́га о на́съ.

Цари́цы Небе́сныя селе́ніе еси́, святопече́рская горо́, ю́же си́льныхъ мно́жество преподо́бныхъ оте́цъ окружа́ютъ, вси́ ору́жія изощре́нны иму́ще, моли́твы проти́ву міроде́ржца, пою́тъ пѣ́снь Бо́гу: пое́мъ и превозно́симъ Его́ во вѣ́ки.

Припѣ́въ: Преподо́бніи отцы́ Пече́рскіи, моли́те Бо́га о на́съ.

Восто́къ и за́падъ, ю́гъ и сѣ́веръ ви́дитъ во огра́дѣ твое́й, Пече́рская горо́, исто́чникъ, кипя́щій мѵ́ры чуде́съ богоно́сныхъ оте́цъ, излива́ющійся всѣ́мъ изоби́льно, и́же пою́тъ и превозно́сятъ Го́спода во вѣ́ки.

Сла́ва: Прославля́ющія святы́хъ Твои́хъ просла́ви, Преблага́я Тро́ице, сла́вою, ю́же угото́вала еси́ отъ вѣ́ка рабо́мъ Твои́мъ, и сподо́би пѣ́ти: оте́цъ на́шихъ Бо́же, благослове́нъ еси́.

И ны́нѣ: Прера́дованная Ма́ти и Цари́це, ра́достная Тебѣ́ принося́щихъ ра́дости вѣ́чныя сподо́би и отве́рзи ра́йскія две́ри христіа́нскому всему́ ро́ду, при́сно Тебѣ́ пою́щему: Богоро́дице, благослове́нна еси́.

Катава́сія: Моли́те Бо́га о на́съ, преподо́бніи отцы́ на́ши Анто́ніе и Ѳеодо́сіе и вси́ преподо́бніи Пече́рскіи, я́ко мы́ усе́рдно къ ва́мъ прибѣга́емъ, ско́рымъ помо́щникомъ и моли́твенникомъ о душа́хъ на́шихъ. [Покло́нъ.]

Го́споди поми́луй. [Три́жды.]

Пѣ́снь 8.

Ирмо́съ: Царя́ Небе́снаго, Его́же пою́тъ во́и а́нгельстіи, хвали́те и превозноси́те во вся́ вѣ́ки.

Припѣ́въ: Преподо́бніи отцы́ Пече́рскіи, моли́те Бо́га о на́съ.

Во огра́дѣ пеще́ры святы́я проходя́ умо́мъ, зри́мъ на тве́рди ея́ мно́жество, а́ки звѣ́здъ, оте́цъ преподо́бныхъ, и́хже исчи́слити не возмо́жно. Тѣ́мъ о всѣ́хъ возда́вше хвалу́ Бо́гу, мо́лимъ, да да́стъ на́мъ съ ни́ми превозноси́ти Его́ во вѣ́ки.

Припѣ́въ: Преподо́бніи отцы́ Пече́рскіи, моли́те Бо́га о на́съ.

Проя́вльшаго на горѣ́ свято́й Пече́рской ва́съ, свѣти́ла вели́кая, отцы́ богоно́сніи, отню́ду же благода́тныя лучи́ простро́сте и всю́ Россíйскую зе́млю чудесы́ просвѣти́сте, тѣ́мже пое́мъ Го́спода и превозно́симъ во вѣ́ки.

Припѣ́въ: Преподо́бніи отцы́ Пече́рскіи, моли́те Бо́га о на́съ.

Не многобу́рное мо́ре, но пеще́ра свята́я явля́етъ ва́ша мо́щи, а́ки би́серіе драго́е, уго́дницы Бо́жіи, и обогаща́ете чуде́съ излія́ніи всѣ́хъ къ ва́мъ съ вѣ́рою приходя́щихъ и превознося́щихъ Го́спода хвала́ми во вѣ́ки.

Припѣ́въ: Преподо́бніи отцы́ Пече́рскіи, моли́те Бо́га о на́съ.

Гла́съ ра́дованія и шу́мъ празднолю́бныхъ стѣка́ется восхвали́ти собо́ръ ва́шъ, отцы́ Пече́рскіи; тѣ́хъ у́бо хвале́нія пріе́мше, отъ всѣ́хъ скорбе́й и печа́лей спаса́йте, да всегда́ ва́съ велича́емъ.

Сла́ва: Сла́вы ра́ди и́мене Твоего́, Пресу́щественная Тро́ице, просла́вила еси́ пра́ведныхъ Твои́хъ и мѣ́сто сіе́; бла́гостію у́бо Твое́ю пода́ждь и на́мъ, Бла́же, сла́ву святы́хъ во сла́вѣ Твое́й зрѣ́ти, и съ ни́ми Тебе́ сла́вити, въ тріе́хъ ѵпоста́сѣхъ Еди́наго Бо́га.

И ны́нѣ: Свя́занъ е́смь мно́гими плени́цами страсте́й, и нѣ́сть ми́ разрѣше́нія наде́жды, но Ты́ поми́луй мя́, я́ко Ма́ти Бо́га вы́шняго, и разрѣши́ мя отъ ни́хъ, Ты́ бо Еди́на си́льна еси́ по Бо́зѣ грѣхо́вныя плени́цы разрѣши́ти.

Катава́сія: Моли́те Бо́га о на́съ, преподо́бніи отцы́ на́ши Анто́ніе и Ѳеодо́сіе и вси́ преподо́бніи Пече́рскіи, я́ко мы́ усе́рдно къ ва́мъ прибѣга́емъ, ско́рымъ помо́щникомъ и моли́твенникомъ о душа́хъ на́шихъ. [Покло́нъ.]

Го́споди поми́луй. [Три́жды.]

Пѣ́снь 9.

Ирмо́съ: Вои́стинну Богоро́дицу, Тя́ исповѣ́дуемъ, спасе́нніи Тобо́ю, Дѣ́во Чи́стая, съ безпло́тными ли́ки Тя́ велича́юще.

Припѣ́въ: Преподо́бніи отцы́ Пече́рскіи, моли́те Бо́га о на́съ.

Вои́стинну пре́жде юдо́ль бѣ́ плаче́вная и верте́пъ разбо́йникомъ гора́ сія́ свята́я, ны́нѣ же до́мъ Бо́жій е́сть, и живу́щіи въ не́мъ блаже́нни, я́ко ва́ми освяти́ся, богоно́сніи отцы́: сего́ ра́ди всѣ́хъ ва́съ велича́емъ.

Припѣ́въ: Преподо́бніи отцы́ Пече́рскіи, моли́те Бо́га о на́съ.

Ра́достною душе́ю взе́мше кре́стное и́го и ра́ломъ трудо́въ го́ру сію́ воздѣ́лавше, насади́сте сады́ по́товъ ва́шихъ, богоно́сніи отцы́, мы́сленныхъ, и́хже плоды́ объе́мше, увеселя́емъ ду́ши на́ша и всѣ́хъ ва́съ велича́емъ.

Припѣ́въ: Преподо́бніи отцы́ Пече́рскіи, моли́те Бо́га о на́съ.

Во еди́нъ пу́ть за́повѣдей Госпо́днихъ ходя́ще, разли́чная сѣ́мена сѣ́ясте: о́въ чистоту́, о́въ послуша́ніе, и́нъ по́стъ, другíй нищету́, труды́ и сле́зы. Оба́че вси́ ра́вно ра́дости рукоя́ти пожина́ете, отъ ни́хже и на́мъ да́рствуйте, да вы́ну ва́съ всѣ́хъ велича́емъ.

Припѣ́въ: Преподо́бніи отцы́ Пече́рскіи, моли́те Бо́га о на́съ.

Отъ мѣ́ста плаче́внаго на безплаче́вное преше́дшихъ, мо́лимъ ва́съ, отцы́ преблаже́нніи, на́съ, па́мять ва́шу вку́пѣ почита́ющихъ, вся́кія ско́рби избавля́йте, да вси́ ва́съ велича́емъ.

Сла́ва: Сла́ва Ты́ еси́, Тро́ице, преподо́бныхъ оте́цъ ли́ку, и неги́блющее весе́ліе, о Тебѣ́ бо мíръ и пло́ть съ неви́димымъ враго́мъ побѣди́вше, прія́ша вѣнцы́ и ра́дуются со а́нгелы, Тя́ всегда́ велича́юще.

И ны́нѣ: Сла́вимъ Тя́, пресла́вный гра́де Бо́жій, Тебе́ бо Са́мъ основа́ Вы́шній и даде́ въ прибѣ́жище всѣ́мъ отъ лица́ вра́жія бѣжа́щимъ. И на́мъ бу́ди въ приста́нище, да Тя́ вы́ну велича́емъ.

Катава́сія: Моли́те Бо́га о на́съ, преподо́бніи отцы́ на́ши Анто́ніе и Ѳеодо́сіе и вси́ преподо́бніи Пече́рскіи, я́ко мы́ усе́рдно къ ва́мъ прибѣга́емъ, ско́рымъ помо́щникомъ и моли́твенникомъ о душа́хъ на́шихъ. [Покло́нъ.]

Го́споди поми́луй. [Три́жды.]
Посе́мъ задосто́йникъ, гласъ 8:

Влады́чице, пріими́ моли́тву ра́бъ Свои́хъ и изба́ви на́съ отъ вся́кія ну́жды и печа́ли. Ты́ еси́, Богоро́дице, ору́жіе на́ше и стѣна́. Ты́ еси́ Засту́пнице, и къ Тебѣ́ прибѣга́емъ, Тя́ и ны́нѣ на моли́тву призыва́емъ, да изба́виши ны́ отъ вра́гъ на́шихъ. Возвели́чимъ Тя́ вси́, Пренепоро́чную Ма́терь Христа́ Бо́га на́шего, Юже осѣни́ Ду́хъ Пресвяты́й. [Покло́нъ до земли́.]

Та́же:

Святы́й Бо́же, Святы́й Крѣ́пкій, Святы́й Безсме́ртный, поми́луй на́съ. [Три́жды, и покло́ны три.]

Сла́ва Отцу́ и Сы́ну и Свято́му Ду́ху, и ны́нѣ и при́сно и во вѣ́ки вѣко́въ, ами́нь.

Пресвята́я Тро́ице, поми́луй на́съ: Го́споди, очи́сти грѣхи́ на́ша; Влады́ко, прости́ беззако́нія на́ша; Святы́й, посѣти́ и исцѣли́ не́мощи на́ша, и́мене Твоего́ ра́ди.

Го́споди поми́луй. [Три́жды.]
Сла́ва Отцу́ и Сы́ну и Свято́му Ду́ху, и ны́нѣ и при́сно и во вѣ́ки вѣко́въ, ами́нь.

Отче на́шъ, Иже еси́ на небесѣ́хъ! Да святи́тся и́мя Твое́, да пріи́детъ Ца́рствіе Твое́, да бу́детъ во́ля Твоя́, я́ко на небеси́ и на земли́. Хлѣ́бъ на́шъ насу́щный да́ждь на́мъ дне́сь; и оста́ви на́мъ до́лги на́ша, я́коже и мы́ оставля́емъ должнико́мъ на́шимъ; и не введи́ на́съ во искуше́ніе, но изба́ви на́съ отъ лука́ваго.

Го́споди Іису́се Христе́, Сы́не Бо́жій, поми́луй на́съ, ами́нь.

Тропа́рь, гла́съ 2:

Егда́ снидо́сте во гро́бы, и самѣ́хъ себе́ заключи́сте, тогда́, стра́сти умертви́вше плотскíя, спогребо́стеся Христу́, богоно́сніи, и діа́вольскія въ подзе́мныхъ разруши́сте огра́ды, сего́ ра́ди а́нгели вѣнцы́ съ небе́съ ва́мъ подаю́тъ.

Сла́ва, конда́къ, гла́съ 8:

Отцы́ всечестнíи, ли́че богокра́сный, чуде́съ мно́гихъ исто́чницы, мѵ́ро источа́ющіи, сокро́вища краснобога́тная Госпо́дня, въ земли́ сокрове́нная, не преста́йте, мо́лимъ вы́, о на́съ моли́тися ко Го́споду, да зове́мъ ва́мъ: ра́дуйтеся, всему́ мíру свѣти́льницы.

И ны́нѣ, богоро́диченъ, гла́съ 2:

Вся́, па́че смы́сла, вся́ пресла́вная Твоя́, Богоро́дице, та́инства, чистотѣ́ запеча́танной и дѣ́вству храни́му, Ма́ти позна́лася еси́ нело́жна, Бо́га ро́ждши Истиннаго. Того́ моли́ спасти́ся душа́мъ на́шимъ.

Го́споди поми́луй. [40.]
Сла́ва Отцу́ и Сы́ну и Свято́му Ду́ху, и ны́нѣ и при́сно и во вѣ́ки вѣко́въ, ами́нь.

Моли́тва ко всѣ́мъ преподо́бнымъ отце́мъ Пече́рскимъ [3].
Припѣ́въ: Преподо́бніи отцы́ Пече́рскіи, моли́те Бо́га о на́съ.

Преблаже́нніи, присносла́вніи, преподо́бніи отцы́, святíи первонача́льницы Пече́рскіи, Анто́ніе и Ѳеодо́сіе, свы́ше Бо́гомъ дарова́нніи, дво́ице благода́тная, сою́зомъ соверше́нства, любо́вію къ Бо́гу и бли́жнему соедине́нная, не то́чію въ жи́зни се́й вре́менной друголю́бнѣ труди́вшіися о по́льзѣ душе́вной и́ночествующихъ и въ мíрѣ благоче́стно живу́щихъ, но и по отше́ствіи свое́мъ въ жи́знь вѣ́чную обѣща́вшіися посо́бствовати всѣ́мъ и моли́тися ко Го́споду Бо́гу и Пресвятѣ́й Богоро́дице о спасе́ніи всѣ́хъ, наипа́че грѣ́шниковъ, отъ ни́хже пе́рвый е́смь а́зъ. Къ ва́мъ, уго́дникомъ Бо́жіимъ и Пресвяты́я Богоро́дицы, я́ко и́стиннымъ хода́таемъ спасе́нія, притека́я, смире́нно молю́ся: предста́ните мнѣ́ въ по́мощь, у́зами грѣхо́въ свя́занному, и помоли́теся о мнѣ́, ку́пно же и всѣ́хъ наслѣ́дниковъ богоуго́днаго ва́шего житія́ и снаслѣ́дниковъ Ца́рствія небе́снаго подви́гните на многомогу́щія моли́твы, всѣ́хъ бо ва́съ, недосто́йный, призыва́ти на заступле́ніе дерза́ю, жела́я отъ всѣ́хъ грѣхо́въ мои́хъ ва́ми свобожде́ніе получи́ти. Вси́ преподо́бніи отцы́ Пече́рскіи, богоуго́дно труди́вшіися и нетлѣ́нно въ пеще́рахъ почива́ющіи, святíи іера́рси, священнонача́льницы, священнои́ноцы, по́стницы, му́ченицы, дѣ́вственницы, чудотво́рцы, вы́ есте́ ро́дъ избра́нъ, ца́рское свяще́ніе, язы́къ свя́тъ, лю́діе обновле́нія, извѣсти́теліе добродѣ́телей изъ тмы́ тлѣ́нныя сея́ жи́зни Призва́вшаго ва́съ въ чу́дный свѣ́тъ; ва́съ бо ни земля́ потаи́ла е́сть, а́ще же кíихъ и потаи́ла, подъ спу́домъ почива́ющихъ, но, вѣ́рую, я́ко всѣ́хъ не́бо прія́ло е́сть, и я́ко сла́вы ва́шея исповѣ́сти, та́ко и име́нъ ва́шихъ исчести́ ми не возмо́жно, мно́жеству бо звѣ́здному уподо́бистеся, ра́звѣ Са́мъ, исчита́яй мно́жество звѣ́здъ и всѣ́мъ и́мъ имена́ нарица́яй, исповѣ́данный отъ ва́съ на земли́ Ца́рь сла́вы, Христо́съ, всѣ́хъ ва́съ, преподо́бныхъ Свои́хъ, по и́мени напи́санныхъ на небесѣ́хъ, исчита́етъ и соверше́нно исповѣ́дуетъ предъ Отце́мъ Свои́мъ Небе́снымъ. Помози́те мнѣ́, грѣ́шному, въ сокруше́ніи и смире́ніи се́рдца моего́ припа́дая, молю́ся ва́мъ, свѣ́тъ су́ще мíру и свѣти́льницы, изъ-подъ спу́да пеще́рнаго поста́влени душа́ми на свѣ́щницѣ небе́сномъ, осіява́йте мя́, омраче́ннаго навѣ́ты вра́жіими, свѣ́томъ благода́ти свы́ше, да въ не́мъ ходя́щъ, не преткну́ о ка́мень ноги́ моея́. Вы́ есте́ сосу́ди, въ че́сть избра́нніи, испо́лненніи благода́ти Бо́жія оби́льно, молю́: сподо́бите мя́, грѣ́шнаго, отъ исполне́нія ва́шего прія́ти. Вы́ есте́ со́ль земли́, а́зъ же е́смь земля́, бу́дите мнѣ́ со́лію, соблюда́юще всецѣ́ло ду́шу и тѣ́ло мое́ отъ согни́тія грѣхо́внаго. Вси́ вы́, преподо́бніи Пече́рскіи, вра́чеве благода́тніи, исцѣля́ющіи вся́къ неду́гъ и вся́ку я́зю въ лю́дехъ, молю́ся ва́мъ, святíи: исцѣли́те и моя́ душе́вныя и тѣле́сныя я́звы, да досто́йно прославля́ю Бо́га въ души́ и тѣлеси́ мое́мъ, всѣ́хъ ва́съ во все́мъ благодаря́. Вы́ бы́сте а́лчущіи и жа́ждущіи пра́вды, ны́нѣ же блаже́ннаго обѣ́да въ Ца́рствіи Бо́жіи досто́йно насыща́етеся. Смире́нно колѣ́на се́рдца моего́ преклоня́я, молю́ ва́съ: подади́те и мнѣ́, а́лчущему и жа́ждущему, тоя́жде благода́ти, поне́ отъ крупи́цъ па́дающихъ отъ трапе́зы ва́шея, и насыти́те ду́шу мою́ тщу́ и ду́шу а́лчущу испо́лните бла́гъ. О, всеще́дріи госпо́діе! всѣ́хъ ва́съ до́брый Па́стырь пасе́тъ, и ничто́же ва́съ уже́ лиши́тъ. Ва́шими благопрія́тными моли́твами содѣ́лайте, да и мене́, а́ще и недосто́йнаго, ничто́же лиши́тъ бла́го; мо́жете бо, преподо́бніи вси́, всѣ́мъ вся́ о укрѣпля́ющемъ всѣ́хъ ва́съ Іису́сѣ Христѣ́. Бу́дите, уго́дницы Бо́жіи, и мнѣ́, окая́нному, вси́ вся́, да съ про́чіими всѣ́ми и мене́, къ ва́мъ всеусе́рдно притека́ющаго, приобря́щете. Аще бо мно́го мо́жетъ моли́тва еди́наго пра́веднаго, поспѣшеству́емая во благо́е, кольми́ па́че ва́съ, пра́ведныхъ и преподо́бныхъ мно́гихъ, мо́гутъ моли́твы вся́ у всеми́лостиваго Бо́га. Не два́ или́ тріе́ во и́мя Христо́во со́брани есте́, и не два́ совѣща́стеся на земли́ проси́ти во и́мя Христо́во Отца́ Небе́снаго, но ве́ліе мно́жество ва́съ, о преподо́бніи! Помоли́теся о мнѣ́, еди́номъ отъ грѣ́шныхъ, а́зъ же вѣ́рую, я́ко Бо́гъ, прославля́емый въ совѣ́тѣ всѣ́хъ ва́съ, преподо́бныхъ Свои́хъ, услы́шитъ проше́ніе со́бранныхъ и совѣща́нныхъ во и́мя Его́. Изгуби́хъ, окая́нный, грѣхопаде́ньми мои́ми благода́ть Бо́жію, вы́, святíи Пече́рскіи, мно́жествомъ свои́мъ поищи́те, молю́, вои́стинну обря́щете. Увы́ мнѣ́! затворе́ны предо мно́ю, недосто́йнымъ, две́ри милосе́рдія, вы́, преподо́бніи уго́дницы Бо́жіи, вси́ потолцы́те, и отве́рзутся ра́ди ва́съ мнѣ́, грѣ́шному, я́ко да и а́зъ къ ва́шему мно́жественному числу́, съ бо́льшею ва́шею сла́вою, ва́шими святы́ми моли́твами, причте́нъ бы́ти сподо́блюся. О достохва́льніи, преподо́бніи отцы́ Пече́рскіи! вы́ есте́ ра́дованіе Царя́ Небе́снаго, вы́ благопрія́тная же́ртва Вы́шняго, вы́ гра́ждане но́ваго Іерусали́ма, вы́ наслѣ́дницы Ца́рствія Бо́жія! Та́ко бо вси́ теко́сте, я́ко и жела́емое пости́гнусте. Молю́, и мои́мъ нога́мъ благо́е тече́ніе въ пути́ за́повѣдей Госпо́днихъ содѣ́лайте и жела́емое пости́гнути грѣ́шнаго мене́ сподо́бите ва́шими многомо́щными хода́тайствы, да вше́дъ въ до́мъ Ца́рствія вѣ́чнаго, возра́дуюся и возвеселю́ся, благодаря́ всѣ́хъ ва́съ, преподо́бныхъ, о таково́й любви́ ва́шей ко бли́жнему, и ку́пно съ ва́ми восхвалю́ и возвели́чу во хвале́ніи Еди́наго въ Тро́ицѣ Пресвятѣ́й, отъ всея́ тва́ри на небеси́ и на земли́ хвали́маго, благослови́маго и покланя́емаго Всеми́лостиваго Бо́га, Отца́ и Сы́на и Свята́го Ду́ха, съ Пречи́стою и Присноблаже́нною Дѣ́вою Богоро́дицею, ны́нѣ, и при́сно, и во вѣ́ки вѣко́въ, ами́нь.

Таже:

Честнѣ́йшую херуви́мъ и сла́внѣйшую безъ сравне́нія серафи́мъ, безъ истлѣ́нія Бо́га Сло́ва ро́ждшую, су́щую Богоро́дицу, Тя́ велича́емъ. [Покло́нъ до земли́.]

Сла́ва Отцу́ и Сы́ну и Свято́му Ду́ху, и ны́нѣ и при́сно и во вѣ́ки вѣко́въ, ами́нь.
Го́споди поми́луй. [Три́жды.]

И отпу́стъ: Го́споди Іису́се Христе́, Сы́не Бо́жій, моли́твъ ра́ди Пречи́стыя Твоея́ Ма́тере, преподо́бныхъ и богоно́сныхъ оте́цъ на́шихъ Анто́нія и Ѳеодо́сія и про́чихъ чудотво́рцевъ Пече́рскихъ, и всѣ́хъ святы́хъ, поми́луй и спаси́ на́съ, я́ко Бла́гъ и Человѣколю́бецъ, ами́нь.

Примѣчанія:
[1] Послѣдованіе молебнаго канона приводится въ томъ видѣ, въ какомъ его можетъ совершать мірянинъ въ своей домашней молитвѣ — безъ возгласовъ и молитвъ священнослужителей.
[2] Канонъ печатается по изданію: Пече́рская Минíа. Ча́сть втора́я. — Кíевъ: Въ тѵпогра́фіи Кíево-Пече́рскія Ла́ѵры, 2007. — С. 5-22. (Тропари канона свѣрены съ изданіемъ: Слу́жбы Преподо́бнымъ отце́мъ Пече́рскимъ, и́хже мо́щы въ Бли́жной и Да́льной пеще́рѣ нетлѣ́нно почива́ютъ. — Кíевъ: Въ тѵпогра́фіи Кíево-Пече́рскія Ла́ѵры, 1785. — Л. 3 об. – 7.; 139 – 143.)
[3] См. Ака́ѳисты съ кано́ны, и про́чая душеполе́зная моле́нія. — Кíевъ: Въ Тѵпогра́фіи Кіевопече́рской Ла́ѵры, 1754. — Л. 268 об. – 271.

/ Къ оглавленію раздѣла /


Наверхъ / Къ титульной страницѣ

0