Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - суббота, 16 декабря 2017 г. Сейчасъ на порталѣ посѣтителей - 8.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ДОМАШНЯЯ МОЛИТВА

Св. муч. Вонифатій († 290 г.).

Святой мученик ВонифатийСвятой мученикъ Вонифатій пострадалъ за Христа въ царствованіе римскихъ императоровъ Діоклитіана и Максиміана (284-305). Онъ былъ рабомъ знатной римлянки Аглаиды. Она поручила ему управленіе ея домомъ и обширными имѣніями. Вонифатій состоялъ съ Аглаидой въ беззаконномъ сожительствѣ («въ нечистотѣ валяшася и піяница бяше»). Вмѣстѣ съ тѣмъ онъ былъ милостивъ къ нищимъ и охотно принималъ странниковъ. Сознавая себя рабомъ грѣха, Вонифатій молилъ Бога, чтобы Онъ избавилъ его отъ сѣтей дьявольскихъ и сдѣлалъ бы его побѣдителемъ надъ своими вожделѣніями и страстями. Господь услышалъ Своего раба, и устроилъ такъ, чтобы онъ могъ грѣховныя дѣла омыть кровью и увѣнчать душу свою вѣнцомъ мученическимъ. Въ то время на Востокѣ было сильное гоненіе на христіанъ. Аглаида пожелала имѣть у себя въ домѣ мощи святыхъ мучениковъ, надѣясь подъ ихъ покровительствомъ получить спасеніе. Посланный своею госпожею на Востокъ, Вонифатій въ г. Тарсѣ Киликійскомъ исповѣдалъ себя христіаниномъ и послѣ тяжкихъ истязаній былъ обезглавленъ въ въ 290 г. Спутники принесли тѣло его въ Римъ. Аглаида, узнавъ о мученической кончинѣ Вонифатія, устроила на Авентійскомъ холмѣ въ Римѣ церковь во имя его, положила въ ней мощи и начала вести жизнь въ покаяніи, смиреніи и воздержаніи. Она была удостоена отъ Бога дара чудотворенія и сканчалась мирно. — По молитвамъ святаго Вонифатія вѣрующіе люди обрѣтаютъ исцѣленіе отъ недуговъ, избавленіе отъ грѣховныхъ страстей — пьянства и распутства.

КАНОНЫ МОЛЕБНЫЕ

Кано́нъ свято́му му́ченику Вонифа́тію [1].

Моли́твами святы́хъ оте́цъ на́шихъ, Го́споди Іису́се Христе́, Сы́не Бо́жій, поми́луй на́съ, ами́нь.

Святы́й Бо́же, Святы́й Крѣ́пкій, Святы́й Безсме́ртный, поми́луй на́съ. [Три́жды, и покло́ны три.]

Сла́ва Отцу́ и Сы́ну и Свято́му Ду́ху, и ны́нѣ и при́сно и во вѣ́ки вѣко́въ, ами́нь.

Пресвята́я Тро́ице, поми́луй на́съ: Го́споди, очи́сти грѣхи́ на́ша; Влады́ко, прости́ беззако́нія на́ша; Святы́й, посѣти́ и исцѣли́ не́мощи на́ша, и́мене Твоего́ ра́ди.

Го́споди поми́луй. [Три́жды.]
Сла́ва Отцу́ и Сы́ну и Свято́му Ду́ху, и ны́нѣ и при́сно и во вѣ́ки вѣко́въ, ами́нь.

Отче на́шъ, Иже еси́ на небесѣ́хъ! Да святи́тся и́мя Твое́, да пріи́детъ Ца́рствіе Твое́, да бу́детъ во́ля Твоя́, я́ко на небеси́ и на земли́. Хлѣ́бъ на́шъ насу́щный да́ждь на́мъ дне́сь; и оста́ви на́мъ до́лги на́ша, я́коже и мы́ оставля́емъ должнико́мъ на́шимъ; и не введи́ на́съ во искуше́ніе, но изба́ви на́съ отъ лука́ваго.

Го́споди Іису́се Христе́, Сы́не Бо́жій, поми́луй на́съ, ами́нь.
Та́же, Го́споди поми́луй. [12.]
Сла́ва Отцу́ и Сы́ну и Свято́му Ду́ху, и ны́нѣ и при́сно и во вѣ́ки вѣко́въ, ами́нь.

Пріиди́те, поклони́мся Царе́ви на́шему Бо́гу. [Покло́нъ.]

Пріиди́те, поклони́мся и припаде́мъ Христу́, Царе́ви на́шему Бо́гу. [Покло́нъ.]

Пріиди́те, поклони́мся и припаде́мъ самому́ Христу́, Царе́ви и Бо́гу на́шему. [Покло́нъ.]

Псало́мъ 142:

Го́споди, услы́ши моли́тву мою́, внуши́ моле́ніе мое́ во и́стинѣ Твое́й, услы́ши мя́ въ пра́вдѣ Твое́й и не вни́ди въ су́дъ съ рабо́мъ Твои́мъ, я́ко не оправди́тся предъ Тобо́ю вся́къ живы́й. Яко погна́ вра́гъ ду́шу мою́, смири́лъ е́сть въ зе́млю живо́тъ мо́й, посади́лъ мя́ е́сть въ те́мныхъ, я́ко ме́ртвыя вѣ́ка. И уны́ во мнѣ́ ду́хъ мо́й, во мнѣ́ смяте́ся се́рдце мое́. Помяну́хъ дни́ дре́внія, поучи́хся во всѣ́хъ дѣ́лѣхъ Твои́хъ, въ творе́ніихъ руку́ Твое́ю поуча́хся. Воздѣ́хъ къ Тебѣ́ ру́цѣ мои́, душа́ моя́, я́ко земля́ безво́дная Тебѣ́. Ско́ро услы́ши мя́, Го́споди, исчезе́ ду́хъ мо́й, не отврати́ лица́ Твоего́ отъ мене́, и уподо́блюся низходя́щимъ въ ро́въ. Слы́шану сотвори́ мнѣ́ зау́тра ми́лость Твою́, я́ко на Тя́ упова́хъ. Скажи́ мнѣ́, Го́споди, пу́ть въ о́ньже пойду́, я́ко къ Тебѣ́ взя́хъ ду́шу мою́. Изми́ мя отъ вра́гъ мои́хъ, Го́споди, къ Тебѣ́ прибѣго́хъ. Научи́ мя твори́ти во́лю Твою́, я́ко Ты́ еси́ Бо́гъ мо́й. Ду́хъ Тво́й благíй наста́витъ мя́ на зе́млю пра́ву. Имене Твоего́ ра́ди, Го́споди, живи́ши мя́, пра́вдою Твое́ю изведе́ши отъ печа́ли ду́шу мою́. И ми́лостію Твое́ю потреби́ши враги́ моя́, и погуби́ши вся́ стужа́ющія души́ мое́й, я́ко а́зъ ра́бъ Тво́й е́смь.

Сла́ва Отцу́ и Сы́ну и Свято́му Ду́ху, и ны́нѣ и при́сно и во вѣ́ки вѣко́въ, ами́нь.
Аллилу́ія, аллилу́ія, аллилу́ія, сла́ва Тебѣ́, Бо́же. [Три́жды, и покло́ны три.]

Та́же, Го́споди поми́луй. [12.]
Сла́ва Отцу́ и Сы́ну и Свято́му Ду́ху, и ны́нѣ и при́сно и во вѣ́ки вѣко́въ, ами́нь.

Посе́мъ: Бо́гъ Госпо́дь... [По гла́су тропаря:]

Бо́гъ Госпо́дь, и яви́ся на́мъ, благослове́нъ гряды́й во и́мя Госпо́дне.

Сти́хъ: Исповѣ́дайтеся Го́сподеви, я́ко бла́гъ, я́ко въ вѣ́къ ми́лость Его́.

Бо́гъ Госпо́дь, и яви́ся на́мъ, благослове́нъ гряды́й во и́мя Госпо́дне.

Сти́хъ: Обыше́дше обыдо́ша мя́, и и́менемъ Госпо́днимъ противля́хся и́мъ.

Бо́гъ Госпо́дь, и яви́ся на́мъ, благослове́нъ гряды́й во и́мя Госпо́дне.

Сти́хъ: Не умру́, но жи́въ бу́ду, и повѣ́мъ дѣла́ Госпо́дня.

Бо́гъ Госпо́дь, и яви́ся на́мъ, благослове́нъ гряды́й во и́мя Госпо́дне.

Сти́хъ: Ка́мень, eго́же небрего́ша зи́ждущіи, се́й бы́сть во главу́ у́гла, отъ Го́спода бы́сть се́й, и е́сть ди́венъ во очесѣ́хъ на́шихъ.

Бо́гъ Госпо́дь, и яви́ся на́мъ, благослове́нъ гряды́й во и́мя Госпо́дне.

Тропа́рь, гла́съ 4:

Къ сосло́вію по́сланъ му́чениковъ, му́ченикъ бы́лъ еси́ и́стиненъ, пострада́въ за Христа́ крѣпча́йше, всехва́льне, мощми́ же возврати́лся еси́ вѣ́рою посла́вшей тя́, Вонифа́тіе блаже́нне, моли́ Христа́ Бо́га прія́ти на́мъ грѣхо́въ проще́ніе. [Два́жды.]

Сла́ва, и ны́нѣ, богоро́диченъ, гла́съ то́йже:

Еже отъ вѣ́ка утае́нное, и а́нгеломъ несвѣ́домое та́инство: Тобо́ю, Богоро́дице, су́щимъ на земли́ яви́ся, Бо́гъ въ несли́тномъ соедине́ніи воплоща́емь, и кре́стъ во́лею на́съ ра́ди воспріи́мъ, и́мже воскреси́въ первозда́ннаго, спасе́ отъ сме́рти ду́ши на́ша.

Та́же, псало́мъ 50-й:

Поми́луй мя́, Бо́же, по вели́цѣй ми́лости Твое́й, и по мно́жеству щедро́тъ Твои́хъ очи́сти беззако́ніе мое́. Наипа́че омы́й мя отъ беззако́нія моего́, и отъ грѣха́ моего́ очи́сти мя. Я́ко беззако́ніе мое́ а́зъ зна́ю и грѣ́хъ мо́й предо мно́ю е́сть вы́ну. Тебѣ́ Еди́ному согрѣши́хъ, и лука́вое предъ Тобо́ю сотвори́хъ, я́ко да оправди́шися во словесѣ́хъ Твои́хъ и побѣди́ши, внегда́ суди́ти Ти́. Се́ бо въ беззако́ніихъ зача́тъ е́смь, и во грѣсѣ́хъ роди́ мя́ ма́ти моя́. Се́ бо и́стину возлюби́лъ еси́, безвѣ́стная и та́йная прему́дрости Твоея́ яви́лъ ми́ еси́. Окропи́ши мя́ иссо́помъ, и очи́щуся, омы́еши мя́, и па́че снѣ́га убѣлю́ся. Слу́ху моему́ да́си ра́дость и весе́ліе, возра́дуются ко́сти смире́нныя. Отврати́ лице́ Твое́ отъ грѣ́хъ мои́хъ, и вся́ беззако́нія моя́ очи́сти. Се́рдце чи́сто сози́жди во мнѣ́, Бо́же, и ду́хъ пра́въ обнови́ во утро́бѣ мое́й. Не отве́ржи мене́ отъ лица́ Твоего́, и Ду́ха Твоего́ Свята́го не отъими́ отъ мене́. Возда́ждь ми́ ра́дость спасе́нія Твоего́, и Ду́хомъ Влады́чнимъ утверди́ мя́. Научу́ беззако́нныя путе́мъ Твои́мъ, и нечести́віи къ Тебѣ́ обратя́тся. Изба́ви мя́ отъ крове́й, Бо́же, Бо́же спасе́нія моего́, возра́дуется язы́къ мо́й пра́вдѣ Твое́й. Го́споди, устнѣ́ мои́ отве́рзеши, и уста́ моя́ возвѣстя́тъ хвалу́ Твою́. Я́ко а́ще бы восхотѣ́лъ еси́ же́ртвы, да́лъ бы́хъ убо́, всесожже́нія не благоволи́ши. Же́ртва Бо́гу ду́хъ сокруше́нъ, се́рдце сокруше́нно и смире́нно Бо́гъ не уничижи́тъ. Ублажи́, Го́споди, благоволе́ніемъ Твои́мъ Сіо́на, и да сози́ждутся стѣ́ны Іерусали́мскія. Тогда́ благоволи́ши же́ртву пра́вды, возноше́ніе и всесожега́емая: тогда́ возложа́тъ на олта́рь Тво́й тельцы́.

Кано́нъ, его́же краегране́сіе: Вѣ́рнѣ тя́ пою́, му́чениче пресвѣ́тле. Творе́ніе Іо́сифово. Гла́съ 4. [2]

Пѣ́снь 1.

Ирмо́съ: Триста́ты крѣ́пкія, Рожде́йся отъ Дѣ́вы, безстра́стія во глубинѣ́, души́ трича́стное потопи́, молю́ся, да Тебѣ́, я́ко въ тимпа́нѣ, во умерщвле́ніи тѣлесе́ побѣ́дное воспою́ пѣ́ніе.

Припѣ́въ: Святы́й му́чениче Вонифа́тіе, моли́ Бо́га о на́съ. [Покло́нъ.]

Усе́рднымъ по́мысломъ подвиго́мъ ревнова́въ до́блихъ страда́льцевъ, пострада́лъ еси́ крѣ́пко и змíя умертви́лъ еси́ страда́ніи твои́ми живоно́сными, страда́льче Вонифа́тіе, святы́хъ а́нгеловъ собесѣ́дниче.

Припѣ́въ: Святы́й му́чениче Вонифа́тіе, моли́ Бо́га о на́съ.

Ви́дѣвъ на земли́ вра́жію ле́сть, излія́нну лю́тѣ, до́блій страда́льче, ду́шу распали́въ жела́ніемъ боже́ственнѣйшимъ, вше́лъ еси́ въ три́знище небоя́зненнымъ, треблаже́нне, мудрова́ніемъ.

Сла́ва: Му́дростію Боже́ственною просвѣща́емый, блаже́нне, нему́дрыя враги́ объюро́дилъ еси́, Христа́ возвѣща́я, дебельство́мъ пло́ти уподо́бльшася, и́мже яви́тися восхотѣ́, Вонифа́тіе, му́чениче многострада́льне.

И ны́нѣ: Го́ру Бо́жію, ю́же прови́дѣ Даніи́лъ, ски́нію мы́сленную, Марíю Чи́стую, сла́вы свяще́ніе, трапе́зу, Боже́ственный хлѣ́бъ вмѣ́щшую, вси́ вѣ́рніи, единому́дренно воспои́мъ.

Катава́сія: Изба́ви отъ бѣ́дъ рабы́ своя́, святы́й му́чениче Вонифа́тіе, я́ко вси́ по Бо́зѣ къ тебѣ́ прибѣга́емъ, ты́ бо мо́лиши за на́съ Христа́ Бо́га на́шего. [Покло́нъ.]

Го́споди поми́луй. [Три́жды.]

Пѣ́снь 3.

Ирмо́съ: Яко непло́ды роди́ отъ язы́къ Це́рковь, и мно́гое въ ча́дѣхъ изнемо́же со́нмище, чу́дному Бо́гу на́шему возопіи́мъ: Свя́тъ еси́, Го́споди.

Припѣ́въ: Святы́й му́чениче Вонифа́тіе, моли́ Бо́га о на́съ.

Якоже возжелѣ́лъ еси́, сла́вне, свобо́ду вы́шнюю, отъ и́га рабо́ты избавля́ешися, страсте́мъ честны́мъ поревнова́въ, сла́вне, Иже за милосе́рдіе раба́ Бы́вшаго.

Припѣ́въ: Святы́й му́чениче Вонифа́тіе, моли́ Бо́га о на́съ.

Плотски́хъ вы́шшій я́влься мудрова́ній измѣне́ніемъ боже́ственнымъ, внеза́пу вся́къ прило́гъ лю́тыхъ претерпѣ́лъ еси́, ра́дуяся, му́чениче Вонифа́тіе.

Сла́ва: Тебе́ сама́го отве́рглся еси́, и къ подвиго́мъ и боре́ніемъ врага́ изше́лъ еси́, Креста́ ору́жіемъ укрѣпи́вся, и, побѣди́тель бы́въ, просла́вился еси́, му́чениче Вонифа́тіе.

И ны́нѣ: Себе́ Сама́го истощи́, Оте́ческихъ не истощи́въ во чре́вѣ Твое́мъ нѣ́дръ, пресу́щный Бо́гъ и Тво́й Сы́нъ бы́сть, Всенепоро́чная, спаса́я человѣ́чество.

Катава́сія: Изба́ви отъ бѣ́дъ рабы́ своя́, святы́й му́чениче Вонифа́тіе, я́ко вси́ по Бо́зѣ къ тебѣ́ прибѣга́емъ, ты́ бо мо́лиши за на́съ Христа́ Бо́га на́шего. [Покло́нъ.]

Го́споди поми́луй. [Три́жды.]

Сѣда́ленъ, гла́съ 4. Подо́бенъ: Вознесы́йся.

Къ сосло́вію по́сланъ му́чениковъ, му́ченикъ бы́лъ еси́ и́стиненъ, пострада́въ за Христа́ крѣпча́йше, всехва́льне, бре́мя же, блаже́нне, отда́лся еси́ вѣ́рою посла́вшей тя́, Вонифа́тіе блаже́нне. Но прилѣ́жно моли́ прія́ти всѣ́мъ согрѣше́ній соверше́нное проще́ніе.

Сла́ва, и ны́нѣ, богоро́диченъ:

Грѣхолюби́въ сы́й, молю́ Тя, безгрѣ́шнаго Бо́га ро́ждшую, взе́млющаго грѣхи́ мíра, Пречи́стая, многогрѣ́шную ду́шу мою́ уще́дрити и грѣхи́ моя́ мно́гія очи́стити: грѣ́шнымъ бо Ты́ еси́ очище́ніе, и спасе́ніе вѣ́рнымъ, и заступле́ніе.

Пѣ́снь 4.

Ирмо́съ: Любве́ ра́ди, Ще́дре, Твоего́ о́браза на Крестѣ́ Твое́мъ ста́лъ еси́, и раста́яшася язы́цы: Ты́ бо еси́, Человѣколю́бче, крѣ́пость моя́ и хвале́ніе.

Припѣ́въ: Святы́й му́чениче Вонифа́тіе, моли́ Бо́га о на́съ.

Ублажа́я стра́ждущихъ терпѣ́ніе, подо́біемъ, му́чениче, честны́хъ страда́ній си́мъ уподо́бился еси́, богому́дре пребога́те.

Припѣ́въ: Святы́й му́чениче Вонифа́тіе, моли́ Бо́га о на́съ.

Иды́й вѣ́рою къ му́чениковъ боже́ственному сосло́вію, блаже́нне, тебе́ сама́го жела́ющи бре́мя досточу́дное, богому́дре, отда́лъ еси́.

Сла́ва: Очище́нъ, я́коже зла́то, му́чениче, я́звъ горни́ломъ, чистѣ́йшій яви́лся еси́, нося́ Зижди́теля страсте́й изображе́ніе.

И ны́нѣ: Дѣ́вство по Рождествѣ́ запеча́тано познава́ющи, Отрокови́це, несказа́нно рожде́ннаго Сло́ва изъ боку́ Твое́ю вѣ́рно велича́ла еси́.

Катава́сія: Изба́ви отъ бѣ́дъ рабы́ своя́, святы́й му́чениче Вонифа́тіе, я́ко вси́ по Бо́зѣ къ тебѣ́ прибѣга́емъ, ты́ бо мо́лиши за на́съ Христа́ Бо́га на́шего. [Покло́нъ.]

Го́споди поми́луй. [Три́жды.]

Пѣ́снь 5.

Ирмо́съ: Просвѣще́ніе Твое́, Го́споди, низпосли́ на́мъ и отъ мглы́ прегрѣше́ній разрѣши́ ны, Бла́же, Тво́й ми́ръ да́руяй.

Припѣ́въ: Святы́й му́чениче Вонифа́тіе, моли́ Бо́га о на́съ.

Яко свѣтоза́рная возше́лъ еси́ звѣзда́ отъ за́падъ, и заше́лъ еси́, му́чениче, страда́ньми терпѣли́вно, а́біе къ за́падомъ возсія́лъ еси́, озаря́я концы́.

Припѣ́въ: Святы́й му́чениче Вонифа́тіе, моли́ Бо́га о на́съ.

Му́ченически подвиза́лся еси́, ногте́й терза́нія, о́стрыми, му́чениче, тростьми́ сбода́емь, и лука́ваго жа́ла вѣ́рно притупля́я благода́тію.

Сла́ва: Вра́жія изнемого́ша, богому́дре, на тя́ кова́рствія, и́бо къ Бо́гу воззрѣ́ніемъ неукло́ннымъ плотскíя ра́ны, я́коже безпло́тенъ, терпѣ́лъ еси́.

И ны́нѣ: Скве́рны вся́кія омы́й, Дѣ́во, ду́шу мою́, вопію́ Ти, и спаси́ мя, Чи́стая, Яже и́стиннаго Бо́га Спа́са на земли́ вопло́щшая.

Катава́сія: Изба́ви отъ бѣ́дъ рабы́ своя́, святы́й му́чениче Вонифа́тіе, я́ко вси́ по Бо́зѣ къ тебѣ́ прибѣга́емъ, ты́ бо мо́лиши за на́съ Христа́ Бо́га на́шего. [Покло́нъ.]

Го́споди поми́луй. [Три́жды.]

Пѣ́снь 6.

Ирмо́съ: Возопи́, прообразу́я погребе́ніе тридне́вное, проро́къ Іо́на, въ ки́тѣ моля́ся: отъ тли́ изба́ви мя́, Іису́се, Царю́ си́лъ.

Припѣ́въ: Святы́й му́чениче Вонифа́тіе, моли́ Бо́га о на́съ.

Біе́мый, ра́нами плотски́ми уязви́лъ еси́ безбо́жныя, неисцѣ́льно неду́гующія невѣ́дѣніемъ, и боля́щимъ яви́лся еси́ вра́чь, страда́льче Вонифа́тіе.

Припѣ́въ: Святы́й му́чениче Вонифа́тіе, моли́ Бо́га о на́съ.

Возвыша́емь къ Бо́гу, блаже́нне, прило́гомъ подвиго́въ, враги́ неви́димыя разрази́лъ еси́ и низринове́ннымъ помо́щникъ, страстоте́рпче, бы́лъ еси́.

Сла́ва: Влачи́мь по земли́, я́коже ка́мень многоцѣ́ненъ, страда́льче, пре́лести низложи́лъ еси́ утвержде́ніе, вѣ́рныхъ же сердца́ наипа́че вѣ́рою утверди́лъ еси́.

И ны́нѣ: Купина́ Тя́ прообража́ше, Всенепоро́чная, пе́рвѣе, горя́щи и ника́коже опаля́ема, Пречи́стая, и́бо, я́коже она́, не опали́лася еси́, Бо́га вопло́щши.

Катава́сія: Изба́ви отъ бѣ́дъ рабы́ своя́, святы́й му́чениче Вонифа́тіе, я́ко вси́ по Бо́зѣ къ тебѣ́ прибѣга́емъ, ты́ бо мо́лиши за на́съ Христа́ Бо́га на́шего. [Покло́нъ.]

Го́споди поми́луй. [Три́жды.] Сла́ва и ны́нѣ.

Конда́къ, гла́съ 4. Подо́бенъ: Яви́лся еси́.

Свяще́ніе непоро́чное самово́льнѣ Тебе́ приве́лъ еси́, Иже отъ Дѣ́вы тебе́ ра́ди роди́тися хотя́щему, свя́те вѣнчено́сче, прему́дре Вонифа́тіе.

Инъ конда́къ [изъ ака́ѳиста], гла́съ 8.

Избра́нный во́ине Христо́въ, вѣнце́мъ сла́вы украше́нный, му́ченическою сме́ртію вѣ́чныя сме́рти изба́вивыйся, отъ мра́ка грѣхо́внаго отврати́выйся и къ вѣ́чному свѣ́ту прише́дый, пріими́ моле́ніе на́ше, въ похвалу́ тебѣ́ приноси́мое, и на́съ изба́ви отъ сѣте́й лука́ваго врага́ на́шего, да тебѣ́ съ ра́достію побѣ́дною зове́мъ: Ра́дуйся, Вонифа́тіе, му́чениче многострада́льный.

Икосъ:

Ангеломъ свѣ́тлымъ, о́гнь муче́ній твои́хъ росо́ю благода́ти угаси́вшимъ, огражде́нъ бы́лъ еси́, страда́льче Христо́въ Вонифа́тіе, да не когда́ я́ко грѣ́шникъ нераска́янный поги́бнеши, и предъ Го́сподемъ въ оде́ждѣ мра́чнѣй предста́неши. Научи́ и на́съ облещи́ся въ свѣ́тлыя ри́зы свя́тости, тебѣ́ зову́щихъ: Ра́дуйся, жи́знь за Христа́ отда́вый; ра́дуйся, страда́ніямъ Его́ подража́вый. Ра́дуйся, о́чи своя́ къ Бо́гу обрати́вый; ра́дуйся, во́лю свою́ въ добродѣ́телѣхъ укрѣпи́вый. Ра́дуйся, ра́бе Христо́въ вѣ́рный; ра́дуйся, святы́й коне́цъ житія́ своего́ пріе́мый. Ра́дуйся, къ покая́нію сердца́ обраща́яй; ра́дуйся, ко Христу́, Пути́ и́стинному, приводя́й. Ра́дуйся, Ду́хомъ Святы́мъ просвѣще́нный; ра́дуйся, собла́знами мíра сего́ не прельще́нный. Ра́дуйся, змíя лука́ваго посрами́вый; ра́дуйся, святы́хъ ли́къ возвесели́вый. Ра́дуйся, Вонифа́тіе, му́чениче многострада́льный.

Пѣ́снь 7.

Ирмо́съ: Авраа́мстіи иногда́ въ Вавило́нѣ о́троцы пе́щный пла́мень попра́ша, пѣ́сньми взыва́юще: оте́цъ на́шихъ Бо́же, благослове́нъ еси́.

Припѣ́въ: Святы́й му́чениче Вонифа́тіе, моли́ Бо́га о на́съ.

Колѣ́нъ не преклони́въ истука́ннымъ, во искуше́ніе ве́рглся еси́ велича́йшее, и́стинно, му́чениче, въ пе́щь, въ не́йже ороша́емый, благода́рствовалъ еси́ Христу́ во вѣ́ки.

Припѣ́въ: Святы́й му́чениче Вонифа́тіе, моли́ Бо́га о на́съ.

Разори́ти крѣ́пость твоего́ исповѣ́данія тща́ся, льстивому́дренный во вну́тренняя твоя́ клоко́чущее о́лово неми́лостивно влива́етъ, но я́вѣ посрами́ся.

Сла́ва: Посѣ́ченъ бы́въ усе́рдно въ честну́ю твою́ главу́, врага́ льсти́ваго многоко́зненную главу́ отсѣ́клъ еси́ твоего́ му́жества мече́мъ, му́чениче Христо́въ богому́дре.

И ны́нѣ: Да гла́сы подоба́ющими пѣсносло́влю Тя́, Отрокови́це, страсте́й мя́ изба́ви моли́твами Твои́ми, бѣ́дъ же и скорбе́й и лука́выхъ человѣ́къ, озло́бити мя́ и́щущихъ.

Катава́сія: Изба́ви отъ бѣ́дъ рабы́ своя́, святы́й му́чениче Вонифа́тіе, я́ко вси́ по Бо́зѣ къ тебѣ́ прибѣга́емъ, ты́ бо мо́лиши за на́съ Христа́ Бо́га на́шего. [Покло́нъ.]

Го́споди поми́луй. [Три́жды.]

Пѣ́снь 8.

Ирмо́съ: Изба́вителю всѣ́хъ Всеси́льне, посредѣ́ пла́мене благоче́ствовавшія, снизше́дъ, ороси́лъ еси́ и научи́лъ еси́ пѣ́ти: вся́ дѣла́, благослови́те, по́йте Го́спода.

Припѣ́въ: Святы́й му́чениче Вонифа́тіе, моли́ Бо́га о на́съ.

Поле́зно твое́ дѣ́лая спасе́ніе Христо́съ, Вонифа́тіе, взыска́юща моще́й добропобѣ́дныхъ му́чениковъ, тя́ укрѣпля́етъ, е́же вѣ́рно взыска́лъ еси́ са́мъ бы́ти.

Припѣ́въ: Святы́й му́чениче Вонифа́тіе, моли́ Бо́га о на́съ.

Блаже́ннѣй госпожи́ блаже́нно сокро́вище пода́лся еси́, блаже́нне, и́мже обогати́вшися, поя́ше весе́лымъ се́рдцемъ: вся́ дѣла́, благослови́те, по́йте Го́спода.

Припѣ́въ: Святы́й му́чениче Вонифа́тіе, моли́ Бо́га о на́съ.

Со тща́ніемъ сла́вная жена́, воздви́гши хра́мъ свяще́ннѣйшій, тя́ въ не́мъ положи́, су́щій Боже́ственныя Тро́ицы хра́мъ, страстоте́рпче Христо́въ Вонифа́тіе.

Сла́ва: Умертви́вся за любо́вь Зижди́теля, умерщвля́ющаго стра́сти тлетво́рныя, животворя́й моли́твою твое́ю я́сно вопію́щія: вся́ дѣла́, благослови́те, по́йте Го́спода.

И ны́нѣ: На Тя́, Чи́стую, Пребоже́ственный, низше́дъ, я́коже вѣ́сть, воплоти́ся и человѣ́ки обожи́, пѣснопою́щія, Дѣ́во: вся́ дѣла́, благослови́те, по́йте Го́спода.

Катава́сія: Изба́ви отъ бѣ́дъ рабы́ своя́, святы́й му́чениче Вонифа́тіе, я́ко вси́ по Бо́зѣ къ тебѣ́ прибѣга́емъ, ты́ бо мо́лиши за на́съ Христа́ Бо́га на́шего. [Покло́нъ.]

Го́споди поми́луй. [Три́жды.]

Пѣ́снь 9.

Ирмо́съ: Ева у́бо неду́гомъ преслуша́нія кля́тву всели́ла е́сть, Ты́ же, Дѣ́во Богоро́дице, прозябе́ніемъ чревоноше́нія мíрови благослове́ніе процвѣла́ еси́. Тѣ́мъ Тя́ вси́ велича́емъ.

Припѣ́въ: Святы́й му́чениче Вонифа́тіе, моли́ Бо́га о на́съ. [Покло́нъ.]

Ви́дѣвши тя́, бре́мя свяще́нное, ра́довашеся, вопію́щи, приснопо́мнимая: раба́ посла́хъ тя́, блаже́нне, господи́на и́стинна пріе́млю, рабо́ты мя́ зо́лъ избавля́юща твои́ми благопрія́тными мольба́ми.

Припѣ́въ: Святы́й му́чениче Вонифа́тіе, моли́ Бо́га о на́съ.

Яко кри́нъ, во удо́ліихъ мы́сленныхъ процвѣ́лъ еси́ му́чениковъ, Вонифа́тіе, я́коже фи́никсъ, возвы́сился еси́, я́ко ке́дръ, позна́лся еси́ мѵродыха́ненъ, яви́лся еси́ избра́нный, я́ко кипари́съ, благово́нствуя ду́ши на́ша.

Припѣ́въ: Святы́й му́чениче Вонифа́тіе, моли́ Бо́га о на́съ.

Дне́сь па́мять твоя́ на́мъ возсія́, страстоте́рпче, я́коже со́лнце, сія́ніемъ Боже́ственныхъ дарова́ній, просвѣща́ющи ду́ши пою́щихъ тя́, страсте́й же мглу́ отгоня́ющи, му́чениче богому́дре всеблаже́нне.

Сла́ва: Яко со́лнце отъ за́падъ, возсія́лъ еси́ и восто́чнаго гра́да дости́глъ еси́, идѣ́же пострада́въ и сме́ртію заше́дъ, къ жи́зни восте́клъ еси́ и Ри́мъ свѣ́тлый дости́глъ еси́, сего́ огражда́я мольба́ми твои́ми.

И ны́нѣ: Свѣ́томъ мя́ озари́ Твои́мъ, Всенепоро́чная, во тмѣ́ содержи́маго грѣхо́внѣй, Богоро́дице, и пода́ждь во дне́ ходи́ти Боже́ственныхъ повелѣ́ній, Богоневѣ́сто, я́ко да пою́ Тя, Всепѣ́тую.

Катава́сія: Изба́ви отъ бѣ́дъ рабы́ своя́, святы́й му́чениче Вонифа́тіе, я́ко вси́ по Бо́зѣ къ тебѣ́ прибѣга́емъ, ты́ бо мо́лиши за на́съ Христа́ Бо́га на́шего. [Покло́нъ.]

Го́споди поми́луй. [Три́жды.]

Посе́мъ задосто́йникъ, гласъ 8:

Влады́чице, пріими́ моли́тву ра́бъ Свои́хъ и изба́ви на́съ отъ вся́кія ну́жды и печа́ли. Ты́ еси́, Богоро́дице, ору́жіе на́ше и стѣна́. Ты́ еси́ Засту́пнице, и къ Тебѣ́ прибѣга́емъ, Тя́ и ны́нѣ на моли́тву призыва́емъ, да изба́виши ны́ отъ вра́гъ на́шихъ. Возвели́чимъ Тя́ вси́, Пренепоро́чную Ма́терь Христа́ Бо́га на́шего, Юже осѣни́ Ду́хъ Пресвяты́й. [Покло́нъ до земли́.]

Та́же:

Святы́й Бо́же, Святы́й Крѣ́пкій, Святы́й Безсме́ртный, поми́луй на́съ. [Три́жды, и покло́ны три.]

Сла́ва Отцу́ и Сы́ну и Свято́му Ду́ху, и ны́нѣ и при́сно и во вѣ́ки вѣко́въ, ами́нь.

Пресвята́я Тро́ице, поми́луй на́съ: Го́споди, очи́сти грѣхи́ на́ша; Влады́ко, прости́ беззако́нія на́ша; Святы́й, посѣти́ и исцѣли́ не́мощи на́ша, и́мене Твоего́ ра́ди.

Го́споди поми́луй. [Три́жды.]
Сла́ва Отцу́ и Сы́ну и Свято́му Ду́ху, и ны́нѣ и при́сно и во вѣ́ки вѣко́въ, ами́нь.

Отче на́шъ, Иже еси́ на небесѣ́хъ! Да святи́тся и́мя Твое́, да пріи́детъ Ца́рствіе Твое́, да бу́детъ во́ля Твоя́, я́ко на небеси́ и на земли́. Хлѣ́бъ на́шъ насу́щный да́ждь на́мъ дне́сь; и оста́ви на́мъ до́лги на́ша, я́коже и мы́ оставля́емъ должнико́мъ на́шимъ; и не введи́ на́съ во искуше́ніе, но изба́ви на́съ отъ лука́ваго.

Го́споди Іису́се Христе́, Сы́не Бо́жій, поми́луй на́съ, ами́нь.

Тропа́рь, гла́съ 4:

Къ сосло́вію по́сланъ му́чениковъ, му́ченикъ бы́лъ еси́ и́стиненъ, пострада́въ за Христа́ крѣпча́йше, всехва́льне, мощми́ же возврати́лся еси́ вѣ́рою посла́вшей тя́, Вонифа́тіе блаже́нне, моли́ Христа́ Бо́га прія́ти на́мъ грѣхо́въ проще́ніе.

Конда́къ, гла́съ 4. Подо́бенъ: Яви́лся еси́.

Свяще́ніе непоро́чное самово́льнѣ Тебе́ приве́лъ еси́, Иже отъ Дѣ́вы тебе́ ра́ди роди́тися хотя́щему, свя́те вѣнчено́сче, прему́дре Вонифа́тіе.

И ны́нѣ, богоро́диченъ, гла́съ 4:

Еже отъ вѣ́ка утае́нное, и а́нгеломъ несвѣ́домое та́инство: Тобо́ю, Богоро́дице, су́щимъ на земли́ яви́ся, Бо́гъ въ несли́тномъ соедине́ніи воплоща́емь, и кре́стъ во́лею на́съ ра́ди воспріи́мъ, и́мже воскреси́въ первозда́ннаго, спасе́ отъ сме́рти ду́ши на́ша.

Го́споди поми́луй. [40.]
Сла́ва Отцу́ и Сы́ну и Свято́му Ду́ху, и ны́нѣ и при́сно и во вѣ́ки вѣко́въ, ами́нь.

Моли́тва ко свято́му му́ченику Вонифа́тію. [3]
Припѣ́въ: Святы́й му́чениче Вонифа́тіе, моли́ Бо́га о на́съ.

О, многострада́льный и всехва́льный му́чениче Вонифа́тіе! Ко твоему́ заступле́нію ны́нѣ прибѣга́емъ, моле́ній на́съ, пою́щихъ тебе́, не отве́ржи, но ми́лостиво услы́ши на́съ. Ви́ждь бра́тію и се́стры на́ша, тя́жкимъ неду́гомъ пія́нства одержи́мыя, ви́ждь того́ ра́ди отъ ма́тере своея́ Це́ркве Христо́вой и вѣ́чнаго спасе́нія отпа́дающія. О, святы́й му́чениче Христо́въ, косни́ся се́рдцу и́хъ да́нною ти́ отъ Бо́га благода́тію, ско́ро возста́ви отъ паде́ній грѣхо́вныхъ и ко спаси́тельному воздержа́нію приведи́ и́хъ. Умоли́ Го́спода Бо́га, Его́же ра́ди страда́лъ еси́, да, прости́въ на́мъ согрѣше́нія на́ша, не отврати́тъ ми́лости Своея́ отъ сыно́въ Свои́хъ, но да укрѣпи́тъ въ на́съ трезве́ніе и цѣлому́дріе, да помо́жетъ Свое́ю десни́цею трезвя́щимся спаси́тельный обѣ́тъ сво́й до конца́ сохрани́ти, во дни́ и въ нощи́ о не́мъ бо́дрствующе, и до́брый отвѣ́тъ о не́мъ на возда́ти на стра́шнѣмъ Суди́щѣ. Пріими́, уго́дниче Бо́жій, моли́твы ма́терей, о ча́дѣхъ свои́хъ сле́зы пролива́ющихъ; же́нъ честны́хъ, о мужѣ́хъ свои́хъ рыда́ющихъ; ча́дъ си́рыхъ и убо́гихъ, отъ пія́ницъ оста́вленныхъ; всѣ́хъ на́съ, ико́нѣ твое́й припа́дающихъ, и да пріи́детъ се́й во́пль на́шъ моли́твами твои́ми ко престо́лу Всевы́шняго, дарова́ти всѣ́мъ, по моли́твамъ и́хъ, здра́віе и спасе́ніе ду́шъ и тѣле́съ, наипа́че же Ца́рствіе небе́сное. Покры́й и соблюди́ на́съ отъ лука́ваго ловле́нія и всѣ́хъ ко́зней вра́жіихъ, въ стра́шный ча́съ исхо́да на́шего помози́ прейти́ непреткнове́нно возду́шныя мыта́рства, и моли́твами твои́ми изба́ви вѣ́чнаго осужде́нія. Умоли́ же Го́спода дарова́ти на́мъ къ оте́честву на́шему любо́вь нелицемѣ́рную и непоколеби́мую, предъ врага́ми Це́ркве святы́я, ви́димыми и неви́димыми, си́лу непобѣди́мую, да покры́етъ на́съ ми́лость Бо́жія въ несконча́емыя вѣ́ки вѣко́въ. Ами́нь.

Таже:

Честнѣ́йшую херуви́мъ и сла́внѣйшую безъ сравне́нія серафи́мъ, безъ истлѣ́нія Бо́га Сло́ва ро́ждшую, су́щую Богоро́дицу, Тя́ велича́емъ. [Покло́нъ до земли́.]

Сла́ва Отцу́ и Сы́ну и Свято́му Ду́ху, и ны́нѣ и при́сно и во вѣ́ки вѣко́въ, ами́нь.
Го́споди поми́луй. [Три́жды.]

И отпу́стъ: Го́споди Іису́се Христе́, Сы́не Бо́жій, моли́твъ ра́ди Пречи́стыя Твоея́ Ма́тере, и свята́го му́ченика Вонифа́тія, и всѣ́хъ святы́хъ, поми́луй и спаси́ на́съ, я́ко Бла́гъ и Человѣколю́бецъ, ами́нь.

Примѣчанія:
[1] Послѣдованіе молебнаго канона приводится въ томъ видѣ, въ какомъ его можетъ совершать мірянинъ въ своей домашней молитвѣ — безъ возгласовъ и молитвъ священнослужителей.
[2] Канонъ печатается по изданію: Минíа, мѣ́сяцъ Деке́мврій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 162 об. – 165.
[3] Молитва приводятся по изданію: Ака́ѳистъ свято́му му́ченику Вонифа́тію, его́же па́мять пра́зднуется Мѣ́сяца Деке́мврія въ 19-й де́нь. — Соста́вилъ руководи́тель Вонифа́тіевскаго Бра́тства въ Петрогра́дѣ на Борово́й у́лицѣ, свяще́нникъ Андре́й Простосе́рдовъ. — Пг.: Тре́тья Госуда́рственная Типогра́фія, 1918. — C. 21-22.

/ Къ оглавленію раздѣла /


Наверхъ / Къ титульной страницѣ

0