Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - понедѣльникъ, 22 мая 2017 г. Сейчасъ на порталѣ посѣтителей - 14.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ДОМАШНЯЯ МОЛИТВА

О святой великомученицѣ Варварѣ.

Святая великомученица ВарвараСвятая великомученица Варвара родилась въ г. Иліополѣ (нынѣшней Сиріи) во времена императора Максимина (305-311 гг.) въ знатной языческой семьѣ. Отецъ Варвары Діоскоръ, рано лишившись супруги, былъ страстно привязанъ къ своей единственной дочери. Чтобы уберечь красивую дѣвушку отъ постороннихъ взоровъ, онъ построилъ для нея спеціальный замокъ, откуда она могла выходить только съ разрѣшенія отца. Созерцая съ высоты башни красоту Божіяго міра, Варвара разочаровалась въ языческой религіи и испытывала сильное желаніе узнать его истиннаго Творца. Однажды, когда Діоскоръ находился въ длительномъ путешествіи, Варвара познакомилась съ мѣстными христіанками, которыя разсказали ей о Тріединомъ Богѣ, о неизреченномъ Божествѣ Іисуса Христа, о Его воплощеніи отъ Пречистой Дѣвы и о Его вольномъ страданіи и Воскресеніи. Принявъ крещеніе, дѣвушка стала ревностно служить Господу. Узнавъ объ этомъ, отецъ пришелъ въ ярость и жестоко избилъ ее, затѣмъ заключилъ подъ стражу, долго морилъ голодомъ и предалъ правителю города. Святая дѣва подверглась тяжкимъ пыткамъ, мукамъ, терзаніямъ. Наконецъ самъ отецъ обезглавилъ ее. Въ предсмертной молитвѣ святая великомученица Варвара просила Господа, чтобы Онъ избавлялъ всѣхъ, прибѣгающихъ къ ея помощи, отъ нечаянныхъ бѣдъ, отъ внезапной смерти безъ покаянія и изливалъ бы на нихъ Свою благодать. Въ отвѣтъ она услышала голосъ съ неба, обѣщавшій исполнить просимое. Память святой великомученицы Варвары совершается 4 (17) декабря.

КАНОНЫ МОЛЕБНЫЕ

Кано́нъ святѣ́й великому́ченицѣ Варва́рѣ [1].

Моли́твами святы́хъ оте́цъ на́шихъ, Го́споди Іису́се Христе́, Сы́не Бо́жій, поми́луй на́съ, ами́нь.

Святы́й Бо́же, Святы́й Крѣ́пкій, Святы́й Безсме́ртный, поми́луй на́съ. [Три́жды, и покло́ны три.]

Сла́ва Отцу́ и Сы́ну и Свято́му Ду́ху, и ны́нѣ и при́сно и во вѣ́ки вѣко́въ, ами́нь.

Пресвята́я Тро́ице, поми́луй на́съ: Го́споди, очи́сти грѣхи́ на́ша; Влады́ко, прости́ беззако́нія на́ша; Святы́й, посѣти́ и исцѣли́ не́мощи на́ша, и́мене Твоего́ ра́ди.

Го́споди поми́луй. [Три́жды.]
Сла́ва Отцу́ и Сы́ну и Свято́му Ду́ху, и ны́нѣ и при́сно и во вѣ́ки вѣко́въ, ами́нь.

Отче на́шъ, Иже еси́ на небесѣ́хъ! Да святи́тся и́мя Твое́, да пріи́детъ Ца́рствіе Твое́, да бу́детъ во́ля Твоя́, я́ко на небеси́ и на земли́. Хлѣ́бъ на́шъ насу́щный да́ждь на́мъ дне́сь; и оста́ви на́мъ до́лги на́ша, я́коже и мы́ оставля́емъ должнико́мъ на́шимъ; и не введи́ на́съ во искуше́ніе, но изба́ви на́съ отъ лука́ваго.

Го́споди Іису́се Христе́, Сы́не Бо́жій, поми́луй на́съ, ами́нь.
Та́же, Го́споди поми́луй. [12.]
Сла́ва Отцу́ и Сы́ну и Свято́му Ду́ху, и ны́нѣ и при́сно и во вѣ́ки вѣко́въ, ами́нь.

Пріиди́те, поклони́мся Царе́ви на́шему Бо́гу. [Покло́нъ.]

Пріиди́те, поклони́мся и припаде́мъ Христу́, Царе́ви на́шему Бо́гу. [Покло́нъ.]

Пріиди́те, поклони́мся и припаде́мъ самому́ Христу́, Царе́ви и Бо́гу на́шему. [Покло́нъ.]

Псало́мъ 142:

Го́споди, услы́ши моли́тву мою́, внуши́ моле́ніе мое́ во и́стинѣ Твое́й, услы́ши мя́ въ пра́вдѣ Твое́й и не вни́ди въ су́дъ съ рабо́мъ Твои́мъ, я́ко не оправди́тся предъ Тобо́ю вся́къ живы́й. Яко погна́ вра́гъ ду́шу мою́, смири́лъ е́сть въ зе́млю живо́тъ мо́й, посади́лъ мя́ е́сть въ те́мныхъ, я́ко ме́ртвыя вѣ́ка. И уны́ во мнѣ́ ду́хъ мо́й, во мнѣ́ смяте́ся се́рдце мое́. Помяну́хъ дни́ дре́внія, поучи́хся во всѣ́хъ дѣ́лѣхъ Твои́хъ, въ творе́ніихъ руку́ Твое́ю поуча́хся. Воздѣ́хъ къ Тебѣ́ ру́цѣ мои́, душа́ моя́, я́ко земля́ безво́дная Тебѣ́. Ско́ро услы́ши мя́, Го́споди, исчезе́ ду́хъ мо́й, не отврати́ лица́ Твоего́ отъ мене́, и уподо́блюся низходя́щимъ въ ро́въ. Слы́шану сотвори́ мнѣ́ зау́тра ми́лость Твою́, я́ко на Тя́ упова́хъ. Скажи́ мнѣ́, Го́споди, пу́ть въ о́ньже пойду́, я́ко къ Тебѣ́ взя́хъ ду́шу мою́. Изми́ мя отъ вра́гъ мои́хъ, Го́споди, къ Тебѣ́ прибѣго́хъ. Научи́ мя твори́ти во́лю Твою́, я́ко Ты́ еси́ Бо́гъ мо́й. Ду́хъ Тво́й благíй наста́витъ мя́ на зе́млю пра́ву. Имене Твоего́ ра́ди, Го́споди, живи́ши мя́, пра́вдою Твое́ю изведе́ши отъ печа́ли ду́шу мою́. И ми́лостію Твое́ю потреби́ши враги́ моя́, и погуби́ши вся́ стужа́ющія души́ мое́й, я́ко а́зъ ра́бъ Тво́й е́смь.

Сла́ва Отцу́ и Сы́ну и Свято́му Ду́ху, и ны́нѣ и при́сно и во вѣ́ки вѣко́въ, ами́нь.
Аллилу́ія, аллилу́ія, аллилу́ія, сла́ва Тебѣ́, Бо́же. [Три́жды, и покло́ны три.]

Та́же, Го́споди поми́луй. [12.]
Сла́ва Отцу́ и Сы́ну и Свято́му Ду́ху, и ны́нѣ и при́сно и во вѣ́ки вѣко́въ, ами́нь.

Посе́мъ: Бо́гъ Госпо́дь... [По гла́су тропаря:]

Бо́гъ Госпо́дь, и яви́ся на́мъ, благослове́нъ гряды́й во и́мя Госпо́дне.

Сти́хъ: Исповѣ́дайтеся Го́сподеви, я́ко бла́гъ, я́ко въ вѣ́къ ми́лость Его́.

Бо́гъ Госпо́дь, и яви́ся на́мъ, благослове́нъ гряды́й во и́мя Госпо́дне.

Сти́хъ: Обыше́дше обыдо́ша мя́, и и́менемъ Госпо́днимъ противля́хся и́мъ.

Бо́гъ Госпо́дь, и яви́ся на́мъ, благослове́нъ гряды́й во и́мя Госпо́дне.

Сти́хъ: Не умру́, но жи́въ бу́ду, и повѣ́мъ дѣла́ Госпо́дня.

Бо́гъ Госпо́дь, и яви́ся на́мъ, благослове́нъ гряды́й во и́мя Госпо́дне.

Сти́хъ: Ка́мень, eго́же небрего́ша зи́ждущіи, се́й бы́сть во главу́ у́гла, отъ Го́спода бы́сть се́й, и е́сть ди́венъ во очесѣ́хъ на́шихъ.

Бо́гъ Госпо́дь, и яви́ся на́мъ, благослове́нъ гряды́й во и́мя Госпо́дне.

Тропа́рь, гла́съ 4: [2]

Агнице всеблаже́нная Варва́ро, боже́ственнѣ озари́вшися свѣ́томъ Святы́я Тро́ицы трисо́лнечнымъ, и въ купѣ́ли утверди́вшися, въ побѣжде́ніе ле́сти оте́ческія, вѣ́ру исповѣ́дала еси́ Христо́ву. Тѣ́мъ, всечестна́я, свы́ше благода́ть тебѣ́ дарова́ Бо́гъ, исцѣля́ти неду́ги и болѣ́зни вся́. Его́же моли́, великому́ченице, да спасе́тъ ду́ши на́ша. [Два́жды.]

Сла́ва и ны́нѣ, богоро́диченъ:

Еже отъ вѣ́ка утае́нное, и а́нгеломъ несвѣ́домое та́инство: Тобо́ю, Богоро́дице, су́щимъ на земли́ яви́ся, Бо́гъ въ несли́тномъ соедине́ніи воплоща́емь, и кре́стъ во́лею на́съ ра́ди воспріи́мъ, и́мже воскреси́въ первозда́ннаго, спасе́ отъ сме́рти ду́ши на́ша.

Та́же, псало́мъ 50-й:

Поми́луй мя́, Бо́же, по вели́цѣй ми́лости Твое́й, и по мно́жеству щедро́тъ Твои́хъ очи́сти беззако́ніе мое́. Наипа́че омы́й мя отъ беззако́нія моего́, и отъ грѣха́ моего́ очи́сти мя. Я́ко беззако́ніе мое́ а́зъ зна́ю и грѣ́хъ мо́й предо мно́ю е́сть вы́ну. Тебѣ́ Еди́ному согрѣши́хъ, и лука́вое предъ Тобо́ю сотвори́хъ, я́ко да оправди́шися во словесѣ́хъ Твои́хъ и побѣди́ши, внегда́ суди́ти Ти́. Се́ бо въ беззако́ніихъ зача́тъ е́смь, и во грѣсѣ́хъ роди́ мя́ ма́ти моя́. Се́ бо и́стину возлюби́лъ еси́, безвѣ́стная и та́йная прему́дрости Твоея́ яви́лъ ми́ еси́. Окропи́ши мя́ иссо́помъ, и очи́щуся, омы́еши мя́, и па́че снѣ́га убѣлю́ся. Слу́ху моему́ да́си ра́дость и весе́ліе, возра́дуются ко́сти смире́нныя. Отврати́ лице́ Твое́ отъ грѣ́хъ мои́хъ, и вся́ беззако́нія моя́ очи́сти. Се́рдце чи́сто сози́жди во мнѣ́, Бо́же, и ду́хъ пра́въ обнови́ во утро́бѣ мое́й. Не отве́ржи мене́ отъ лица́ Твоего́, и Ду́ха Твоего́ Свята́го не отъими́ отъ мене́. Возда́ждь ми́ ра́дость спасе́нія Твоего́, и Ду́хомъ Влады́чнимъ утверди́ мя́. Научу́ беззако́нныя путе́мъ Твои́мъ, и нечести́віи къ Тебѣ́ обратя́тся. Изба́ви мя́ отъ крове́й, Бо́же, Бо́же спасе́нія моего́, возра́дуется язы́къ мо́й пра́вдѣ Твое́й. Го́споди, устнѣ́ мои́ отве́рзеши, и уста́ моя́ возвѣстя́тъ хвалу́ Твою́. Я́ко а́ще бы восхотѣ́лъ еси́ же́ртвы, да́лъ бы́хъ убо́, всесожже́нія не благоволи́ши. Же́ртва Бо́гу ду́хъ сокруше́нъ, се́рдце сокруше́нно и смире́нно Бо́гъ не уничижи́тъ. Ублажи́, Го́споди, благоволе́ніемъ Твои́мъ Сіо́на, и да сози́ждутся стѣ́ны Іерусали́мскія. Тогда́ благоволи́ши же́ртву пра́вды, возноше́ніе и всесожега́емая: тогда́ возложа́тъ на олта́рь Тво́й тельцы́.

Кано́нъ, гла́съ 8.

Пѣ́снь 1.

Ирмо́съ: Во́ду проше́дъ, я́ко су́шу, и еги́петскаго зла́ избѣжа́въ, изра́ильтянинъ вопія́ше: Изба́вителю и Бо́гу на́шему пои́мъ.

Припѣ́въ: Свята́я великому́ченице Варва́ро, моли́ Бо́га о на́съ.

Во́ду нече́стія тимѣ́нну оста́вивши, къ водѣ́ чисти́тельной притекла́ еси́, Варва́ро, и на́ша очи́сти сердца́, чи́сто пѣ́ти твоя́ страда́нія.

Припѣ́въ: Свята́я великому́ченице Варва́ро, моли́ Бо́га о на́съ.

Водо́ю креще́нія очи́стившися, великому́ченице, чи́стому Жениху́, Христу́, прилѣпи́лася еси́, Ему́же и на́съ чи́сто присво́й, моли́твами твои́ми.

Сла́ва: Въ водѣ́ пото́пльшему змíя лука́ваго подо́бящися, кро́вію твое́ю страда́льческою вра́жію погрузи́ла еси́ си́лу, страстоно́сице, отъ него́же и на́мъ изба́витися Спа́са умоли́.

И ны́нѣ: Во́ду сле́зъ очища́ющую, Пречи́стая, пода́ждь ми́ и, очи́стивши мя́ отъ ка́ла беззако́ній, чи́ста предста́ви, Богороди́тельнице, Сы́ну Твоему́ и Бо́гу.

Катава́сія: Моли́ Бо́га о на́съ, свята́я великому́ченице Варва́ро, я́ко мы́ усе́рдно къ тебѣ́ прибѣга́емъ, ско́рой помо́щницѣ и моли́твенницѣ о душа́хъ на́шихъ. [Покло́нъ.]

Го́споди поми́луй. [Три́жды.]

Пѣ́снь 3.

Ирмо́съ: Небе́снаго кру́га Верхотво́рче, Го́споди, и Це́ркве Зижди́телю, Ты́ мене́ утверди́ въ любви́ Твое́й, жела́ній кра́ю, вѣ́рныхъ утвержде́ніе, еди́не Человѣколю́бче.

Припѣ́въ: Свята́я великому́ченице Варва́ро, моли́ Бо́га о на́съ.

Небе́снаго кру́га смотря́ющи украше́ніе, му́драя дѣ́во Варва́ро, Верхотво́рца позна́ла еси́, Его́же и возлю́бльши, Тому́ служи́ти изво́лила еси́; и на́съ въ любви́ Его́ утверди́, мо́лимся.

Припѣ́въ: Свята́я великому́ченице Варва́ро, моли́ Бо́га о на́съ.

Небе́снаго Творца́ въ Тро́ицѣ пресвѣ́тлое изобразу́ющи естество́, три́ окна́ въ ба́нѣ оте́честѣй изобрази́ти повелѣ́ла еси́, Тро́ическому покланя́тися уча́щи Божеству́, Ему́же и на́съ вѣ́чно покланя́тися сподо́би.

Сла́ва: Небе́снаго черто́га жела́ющи, небе́сному Жениху́ чистоту́ дѣ́вства твоего́ соблюла́ еси́, вре́меннаго презрѣ́вши; и мене́ въ чистотѣ́ Тому́ служи́ти, му́ченице, укрѣпи́.

И ны́нѣ: Небе́снаго Творца́, Богоро́дице Всепѣ́тая, поро́ждши, небе́съ простра́ннѣйша яви́лася еси́; мене́ отъ простра́ннаго пути́ поги́бельна укло́нши, на небе́сный пу́ть наста́ви, молю́ся.

Катава́сія: Моли́ Бо́га о на́съ, свята́я великому́ченице Варва́ро, я́ко мы́ усе́рдно къ тебѣ́ прибѣга́емъ, ско́рой помо́щницѣ и моли́твенницѣ о душа́хъ на́шихъ. [Покло́нъ.]

Го́споди поми́луй. [Три́жды.]

Сѣда́ленъ, гла́съ 3. Подо́бенъ: Красотѣ́ дѣ́вства.

Въ страда́ніи твое́мъ вся́ удиви́ла еси́, я́ко претерпѣ́вши мучи́телей ра́ны, вяза́нія, му́ки и темни́цы, Варва́ро прехва́льная. Тѣ́мже и вѣне́цъ съ небесе́ тебѣ́ даде́ Христо́съ, къ Нему́же, возжелѣ́вши усе́рдно, притекла́ еси́; То́й благода́ть подаде́ тебѣ́, му́ченице, врачева́нія источа́ти человѣ́комъ.

Сла́ва, и ны́нѣ, богоро́диченъ:

Боже́ственная ски́нія была́ еси́, Сло́ва, еди́на Пречи́стая Ма́ти Дѣ́во, чистото́ю а́нгелы превозше́дшая; па́че всѣ́хъ мене́, пе́рсть бы́вша, оскверне́на плотьски́ми прегрѣше́ньми, очи́сти моли́твъ Твои́хъ Боже́ственными вода́ми, подаю́щи, Чи́стая, ве́лію ми́лость.

Пѣ́снь 4.

Ирмо́съ: Услы́шахъ, Го́споди, смотре́нія Твоего́ та́инство, разумѣ́хъ дѣла́ Твоя́, и просла́вихъ Твое́ Божcтво́.

Припѣ́въ: Свята́я великому́ченице Варва́ро, моли́ Бо́га о на́съ.

Услы́шавши, Варва́ро, небеса́, повѣ́дающа сла́ву Бо́жію, на земли́ Бо́га сла́вити возжела́ла еси́, Его́же сла́вы и на́съ сподо́би.

Припѣ́въ: Свята́я великому́ченице Варва́ро, моли́ Бо́га о на́съ.

Услы́шавъ оте́цъ тво́й тебе́, Вы́шняго Отца́ исповѣ́дующую, гоня́ше на убіе́ніе, но не возмо́же отто́ргнути отъ и́стиннаго Бо́га.

Сла́ва: Услы́шавши преще́нія оте́ческая и му́ки отъ него́ терпя́щи, Варва́ро, непоколеби́ма пребыла́ еси́, и мене́ непоколеби́ма въ добродѣ́телехъ упра́ви.

И ны́нѣ: Услы́ши, Пречи́стая Влады́чице, моле́ніе мое́, и изба́ви мя́ отъ зо́лъ, и гла́съ благослове́нныхъ, призыва́ющій въ Ца́рство, слы́шати удосто́й.

Катава́сія: Моли́ Бо́га о на́съ, свята́я великому́ченице Варва́ро, я́ко мы́ усе́рдно къ тебѣ́ прибѣга́емъ, ско́рой помо́щницѣ и моли́твенницѣ о душа́хъ на́шихъ. [Покло́нъ.]

Го́споди поми́луй. [Три́жды.]

Пѣ́снь 5.

Ирмо́съ: Просвѣти́ на́съ повелѣ́ніи Твои́ми, Го́споди, и мы́шцею Твое́ю высо́кою Тво́й ми́ръ пода́ждь на́мъ, Человѣколю́бче.

Припѣ́въ: Свята́я великому́ченице Варва́ро, моли́ Бо́га о на́съ.

Просвѣти́вши свѣщу́ свою́, му́ченице, вѣ́рою, свѣща́ми опали́ти тѣ́ло твое́ предала́ еси́, въ черто́гъ небе́сный свѣ́тло вни́ти жела́ющи.

Припѣ́въ: Свята́я великому́ченице Варва́ро, моли́ Бо́га о на́съ.

Просвѣща́хуся вѣ́рою невѣ́ріемъ омраче́нніи лю́діе, ви́дяще тя́, жже́нія, біе́нія, рѣ́занія терпя́щую до́блественнѣ, му́ченице.

Сла́ва: Просвѣти́ мя, о Варва́ро, омраче́ннаго мгло́ю грѣхо́вною, и свѣ́томъ невече́рнимъ осіява́тися, свѣ́тлая дѣ́во, молю́ся, сотвори́.

И ны́нѣ: Просвѣти́ла еси́ потемне́ное естество́, Богоро́дице, Свѣ́тъ и́стинный ро́ждши; тѣ́мже и мене́, свѣ́томъ просвѣти́вши, отъ мра́чныхъ вра́гъ свободи́.

Катава́сія: Моли́ Бо́га о на́съ, свята́я великому́ченице Варва́ро, я́ко мы́ усе́рдно къ тебѣ́ прибѣга́емъ, ско́рой помо́щницѣ и моли́твенницѣ о душа́хъ на́шихъ. [Покло́нъ.]

Го́споди поми́луй. [Три́жды.]

Пѣ́снь 6.

Ирмо́съ: Моли́тву пролію́ ко Го́споду и Тому́ возвѣщу́ печа́ли моя́, я́ко зо́лъ душа́ моя́ испо́лнися и живо́тъ мо́й а́ду прибли́жися, и молю́ся, я́ко Іо́на: отъ тли́, Бо́же, возведи́ мя.

Припѣ́въ: Свята́я великому́ченице Варва́ро, моли́ Бо́га о на́съ.

Моли́тву твою́ страда́льческую услы́шавъ, Христо́съ, Варва́ро, въ темни́цѣ затворе́нную посѣти́, цѣ́лость ра́намъ подаде́ и на по́двигъ укрѣпи́; ты́ же моя́ ра́ны грѣхо́вныя уврачу́й, му́ченице, молю́ся.

Припѣ́въ: Свята́я великому́ченице Варва́ро, моли́ Бо́га о на́съ.

Моли́твою ти́, и страда́льческимъ тве́рдымъ терпѣ́ніемъ, и чу́днымъ исцѣлѣ́ніемъ Іуліанíю отъ злоче́стія привлекла́ еси́ страда́ти съ тобо́ю за Христа́, привлецы́ и мене́ къ го́рнему мудрова́нію, страстоно́сице.

Сла́ва: Моли́тву вся́къ принося́й съ вѣ́рою тебѣ́, му́ченице, и къ моща́мъ твои́мъ святы́мъ притека́яй, душе́вныхъ страсте́й и тѣле́сныхъ исцѣле́ніе ско́ро пріе́млетъ, е́же и на́мъ бога́тно подава́й, мо́лимся.

И ны́нѣ: Моли́тву на́шу пріими́, Пречи́стая, и моли́твою Ти́ всемо́щною, изба́вити на́съ отъ вра́гъ ви́димыхъ и неви́димыхъ, отъ грѣхо́въ же и вся́кія му́ки, моли́, Его́же родила́ еси́, Человѣколю́бца Бо́га.

Катава́сія: Моли́ Бо́га о на́съ, свята́я великому́ченице Варва́ро, я́ко мы́ усе́рдно къ тебѣ́ прибѣга́емъ, ско́рой помо́щницѣ и моли́твенницѣ о душа́хъ на́шихъ. [Покло́нъ.]

Го́споди поми́луй. [Три́жды.] Сла́ва и ны́нѣ.

Конда́къ, гла́съ 4. Подо́бенъ: Вознесы́йся на Кре́стъ.

Въ Тро́ицѣ благоче́стно пѣва́емому, послѣ́довавши Бо́гу, страстоте́рпице, и́дольская притупи́ла еси́ чти́лища; посредѣ́ же по́двига страда́льчествующи, Варва́ро, мучи́телей преще́нія не устраши́лася еси́, мужему́дренная, велегла́сно пою́щи при́сно: Тро́ицу чту́, еди́но Божество́.

Икосъ:

Уневѣ́стившуюся Христу́ муче́ніемъ Варва́ру, соше́дшеся, почти́мъ досто́йно: я́ко да, тоя́ моли́твами па́губы душетлѣ́нныя изба́вльшеся и губи́тельства, тру́са и паде́жа, житіе́ въ ми́рѣ препрово́димъ, сподо́бившеся со всѣ́ми святы́ми, отъ вѣ́ка Бо́гу благоугоди́вшими, ходи́ти во свѣ́тѣ и пѣ́ти съ ни́ми: удиви́лъ еси́, Спа́се, твоя́ ми́лости всѣ́мъ человѣ́комъ, вѣ́рою исповѣ́дающимъ: Тро́ицу чти́мъ, еди́но Божество́.

Пѣ́снь 7.

Ирмо́съ: Дѣ́ти евре́йстіи въ пещи́ попра́ша пла́мень дерзнове́нно и на ро́су о́гнь прело́жше, вопія́ху: благослове́нъ еси́, Го́споди Бо́же, во вѣ́ки.

Припѣ́въ: Свята́я великому́ченице Варва́ро, моли́ Бо́га о на́съ.

Дѣ́ти евре́йскія а́нгелъ отъ огня́ неопа́льны сохрани́вый и тебе́, Варва́ро, на́гу води́му, отъ студа́ защити́, оде́ждою свы́ше обле́къ, пою́щую: благослове́нъ еси́, Го́споди Бо́же, во вѣ́ки.

Припѣ́въ: Свята́я великому́ченице Варва́ро, моли́ Бо́га о на́съ.

Дѣ́тское игра́лище вмѣня́ющи му́ки, не пощади́ла еси́ тѣ́ла твоего́, е́же бы́ти ему́ за Христа́ стру́жему и о́стро стира́ему, великому́ченице, пою́щи: благослове́нъ еси́, Го́споди Бо́же, во вѣ́ки.

Сла́ва: Дѣте́й евре́йскихъ и а́зъ подража́я, Варва́ро, хвалю́ Христа́, да́вшаго тебѣ́ крѣ́пость; ты́ же мя́, на по́двигъ добродѣ́телей укрѣ́пльши, оде́ждою небе́сною облещи́ся сподо́би во вѣ́ки.

И ны́нѣ: Дѣторо́дію Твоему́, Дѣ́вою и по рождествѣ́ пребы́вшу, дивлю́ся, Богоро́дице; удиви́ у́бо и на мнѣ́ ми́лость Сы́на Твоего́, да, поми́лованъ Тобо́ю, пою́: благослове́нъ Бо́гъ, ублагослови́вый Тя́, Ма́терь Свою́, во вѣ́ки.

Катава́сія: Моли́ Бо́га о на́съ, свята́я великому́ченице Варва́ро, я́ко мы́ усе́рдно къ тебѣ́ прибѣга́емъ, ско́рой помо́щницѣ и моли́твенницѣ о душа́хъ на́шихъ. [Покло́нъ.]

Го́споди поми́луй. [Три́жды.]

Пѣ́снь 8.

Ирмо́съ: Побѣди́тели мучи́теля и пла́мене благода́тію Твое́ю бы́вше, за́повѣдемъ Твои́мъ зѣло́ прилежа́ще, о́троцы вопія́ху: благослови́те, вся́ дѣла́ Госпо́дня, Го́спода.

Припѣ́въ: Свята́я великому́ченице Варва́ро, моли́ Бо́га о на́съ.

Побѣди́теліе непобѣди́мыя твоея́ вѣ́ры мучи́теле тща́щеся бы́ти, сосца́ твоя́ неща́дно отрѣ́зоваху, ты́ же, тве́рдо терпя́щи, млеко́мъ уче́нія о Бо́зѣ напои́ла еси́ предстоя́щія и благословя́щія Христа́ во вѣ́ки.

Припѣ́въ: Свята́я великому́ченице Варва́ро, моли́ Бо́га о на́съ.

Побѣди́ла еси́ му́жествомъ твои́мъ, му́ченице Варва́ро, вся́ мучи́тельскія ухищре́нія. Моли́ у́бо Влады́ку Христа́, мо́лимъ тя́, всѣ́мъ вѣ́рнымъ на враги́ побѣ́ду да́ти, пою́щимъ: благослови́те вся́ дѣла́ Го́спода, и превозноси́те Его́ во вѣ́ки.

Сла́ва: Побѣди́тельница суро́ваго отца́ твоего́ яви́лася еси́ му́ченице: о́нъ бо небе́снымъ огне́мъ во а́дскій о́гнь низведе́ся, ты́ же на не́бо возшла́ еси́, е́же и мнѣ́ исхода́тайствуй, отъ огня́ избавля́ющи мя́ во вѣ́ки.

И ны́нѣ: Побѣди́, Пречи́стая, враго́въ ви́димыхъ и неви́димыхъ, низложи́ти на́съ тща́щихся, и страсте́й мя́ вся́кихъ изба́ви, да пою́ торже́ственнѣ: благослови́те, вся́ дѣла́, Го́спода и превозноси́те Его́ во вѣ́ки.

Катава́сія: Моли́ Бо́га о на́съ, свята́я великому́ченице Варва́ро, я́ко мы́ усе́рдно къ тебѣ́ прибѣга́емъ, ско́рой помо́щницѣ и моли́твенницѣ о душа́хъ на́шихъ. [Покло́нъ.]

Го́споди поми́луй. [Три́жды.]

Пѣ́снь 9.

Ирмо́съ: Вои́стинну Богоро́дицу, Тя́ исповѣ́дуемъ, спасе́нніи Тобо́ю, Дѣ́во Чи́стая, съ безпло́тными ли́ки Тя́ велича́юще.

Припѣ́въ: Свята́я великому́ченице Варва́ро, моли́ Бо́га о на́съ.

Вои́стинну Бо́га исповѣ́дающи, му́ченице, черто́гъ небе́сный наслѣ́дила еси́, его́же и на́съ сподо́би, да съ Тобо́ю Христа́ вѣ́чно велича́емъ.

Припѣ́въ: Свята́я великому́ченице Варва́ро, моли́ Бо́га о на́съ.

Вои́стинну на тебѣ́, Варва́ро, испо́лнися Христо́во прорече́ніе: преда́стъ оте́цъ ча́до на сме́рть, е́юже ты́ вѣ́чный живо́тъ обрѣла́ еси́.

Сла́ва: Вои́стинну никто́же притека́яй къ тебѣ́, страстоно́сице, то́щъ благода́ти твоея́ отхо́дитъ, ея́же и мене́ испо́лни, молю́ся.

И ны́нѣ: Вои́стинну и́стиннаго Бо́га пло́тію, Богоро́дице, родила́ еси́, Его́же ми́лостива на́мъ въ де́нь Суда́ содѣ́лай, да безконе́чно съ Ни́мъ Тя́ велича́емъ.

Катава́сія: Моли́ Бо́га о на́съ, свята́я великому́ченице Варва́ро, я́ко мы́ усе́рдно къ тебѣ́ прибѣга́емъ, ско́рой помо́щницѣ и моли́твенницѣ о душа́хъ на́шихъ. [Покло́нъ.]

Го́споди поми́луй. [Три́жды.]

Посе́мъ задосто́йникъ, гласъ 8:

Влады́чице, пріими́ моли́тву ра́бъ Свои́хъ и изба́ви на́съ отъ вся́кія ну́жды и печа́ли. Ты́ еси́, Богоро́дице, ору́жіе на́ше и стѣна́. Ты́ еси́ Засту́пнице, и къ Тебѣ́ прибѣга́емъ, Тя́ и ны́нѣ на моли́тву призыва́емъ, да изба́виши ны́ отъ вра́гъ на́шихъ. Возвели́чимъ Тя́ вси́, Пренепоро́чную Ма́терь Христа́ Бо́га на́шего, Юже осѣни́ Ду́хъ Пресвяты́й. [Покло́нъ до земли́.]

Та́же:

Святы́й Бо́же, Святы́й Крѣ́пкій, Святы́й Безсме́ртный, поми́луй на́съ. [Три́жды, и покло́ны три.]

Сла́ва Отцу́ и Сы́ну и Свято́му Ду́ху, и ны́нѣ и при́сно и во вѣ́ки вѣко́въ, ами́нь.

Пресвята́я Тро́ице, поми́луй на́съ: Го́споди, очи́сти грѣхи́ на́ша; Влады́ко, прости́ беззако́нія на́ша; Святы́й, посѣти́ и исцѣли́ не́мощи на́ша, и́мене Твоего́ ра́ди.

Го́споди поми́луй. [Три́жды.]
Сла́ва Отцу́ и Сы́ну и Свято́му Ду́ху, и ны́нѣ и при́сно и во вѣ́ки вѣко́въ, ами́нь.

Отче на́шъ, Иже еси́ на небесѣ́хъ! Да святи́тся и́мя Твое́, да пріи́детъ Ца́рствіе Твое́, да бу́детъ во́ля Твоя́, я́ко на небеси́ и на земли́. Хлѣ́бъ на́шъ насу́щный да́ждь на́мъ дне́сь; и оста́ви на́мъ до́лги на́ша, я́коже и мы́ оставля́емъ должнико́мъ на́шимъ; и не введи́ на́съ во искуше́ніе, но изба́ви на́съ отъ лука́ваго.

Го́споди Іису́се Христе́, Сы́не Бо́жій, поми́луй на́съ, ами́нь.

Тропа́рь, гла́съ 4:

Агнице всеблаже́нная Варва́ро, боже́ственнѣ озари́вшися свѣ́томъ Святы́я Тро́ицы трисо́лнечнымъ, и въ купѣ́ли утверди́вшися, въ побѣжде́ніе ле́сти оте́ческія, вѣ́ру исповѣ́дала еси́ Христо́ву. Тѣ́мъ, всечестна́я, свы́ше благода́ть тебѣ́ дарова́ Бо́гъ, исцѣля́ти неду́ги и болѣ́зни вся́. Его́же моли́, великому́ченице, да спасе́тъ ду́ши на́ша.

Сла́ва, конда́къ, гла́съ то́й же:

Въ Тро́ицѣ благоче́стно пѣва́емому, послѣ́довавши Бо́гу, страстоте́рпице, и́дольская притупи́ла еси́ чти́лища; посредѣ́ же по́двига страда́льчествующи, Варва́ро, мучи́телей преще́нія не устраши́лася еси́, мужему́дренная, велегла́сно пою́щи при́сно: Тро́ицу чту́, еди́но Божество́.

И ны́нѣ, богоро́диченъ:

Еже отъ вѣ́ка утае́нное, и а́нгеломъ несвѣ́домое та́инство: Тобо́ю, Богоро́дице, су́щимъ на земли́ яви́ся, Бо́гъ въ несли́тномъ соедине́ніи воплоща́емь, и кре́стъ во́лею на́съ ра́ди воспріи́мъ, и́мже воскреси́въ первозда́ннаго, спасе́ отъ сме́рти ду́ши на́ша.

Го́споди поми́луй. [40.]
Сла́ва Отцу́ и Сы́ну и Свято́му Ду́ху, и ны́нѣ и при́сно и во вѣ́ки вѣко́въ, ами́нь.

Моли́тва ко святѣ́й великому́ченицѣ Варва́рѣ.
Припѣ́въ: Свята́я великому́ченице Варва́ро, моли́ Бо́га о на́съ.

Прему́драя и всекра́сная свята́я великому́ченице Христо́ва Варва́ро! Блаже́нна еси́, я́ко премíрная му́дрости Бо́жія пло́ть и кро́вь не яви́ тебѣ́, но Са́мъ Бо́гъ Оте́цъ Небе́сный, Иже тебе́, вѣ́ры ра́ди отъ невѣ́рнаго отца́ оста́вленную, изгна́нную и умерщвле́нную, въ дше́рь Себѣ́ возлю́бленную прія́тъ: за тлѣ́нное земна́го имѣ́нія наслѣ́діе пло́ти нетлѣ́ніе дарова́; труды́ му́ченическіи упокое́ніемъ небе́сного измѣни́ Ца́рствія; вре́менное твое́ житіе́, сме́ртію Его́ ра́ди пресѣче́нное, сицево́ю воспросла́ви по́честію, я́ко ду́шу съ ли́ки небе́сныхъ вчини́ духо́въ, тѣ́ло же, на земли́ въ хра́мѣ и́хъ а́нгельскомъ положе́нное, а́нгеломъ заповѣ́да сохрани́ти цѣ́ло, че́стно и многочуде́сно. Блаже́нна еси́, Христу́ Сы́ну Бо́жію, Жениху́ небе́сному уневѣще́нная дѣ́во, Его́же добро́ты твоея́ рачи́теля имѣ́ти жела́ющи, всю́ себе́ страда́ніемъ, ра́нами, у́довъ рѣ́заніемъ и са́мыя главы́ усѣче́ніемъ, а́ки у́тварьми дража́йшими потща́лася еси́ украси́ти; да та́ко, я́ко жена́ вѣ́рна главѣ́ свое́й му́жу, Христу́ ду́хомъ и тѣ́ломъ соедини́шися неразлу́чно, глаго́лющи: обрѣто́хъ, Его́же возлюби́ душа́ моя́, удержа́хъ Его́, и не оста́вихъ Его́. Блаже́нна еси́, я́ко Святы́й Ду́хъ на тебѣ́ почи́лъ е́сть, и́мже духо́вными духо́вная разсужда́ти науче́на, вся́ ду́хи лука́вствія во и́долахъ, я́ко па́губная отри́нула еси́, и еди́наго Бо́га Ду́ха позна́вши, я́ко и́стинная покло́нница, ду́хомъ и и́стиною кла́нятися изво́лила еси́, проповѣ́днически глаго́лющи: Тро́ицу чту́, еди́но Божество́. Сію́ Святу́ю Тро́ицу, Юже въ животѣ́ и сме́рти исповѣ́даніемъ и страда́ніемъ свои́мъ просла́вила еси́, умоли́ о мнѣ́, предста́тельнице моя́, я́ко да и а́зъ всегда́ тро́йственною, вѣ́ры, любве́ и наде́жды, ту́южде Святу́ю Тро́ицу почита́ю добродѣ́телію. Имамъ свѣти́льникъ вѣ́ры, но пра́зденъ благи́хъ дѣ́лъ еле́я, ты́, му́драя дѣ́во, страда́льческую пло́ть твою́, кро́ве испо́лненну и ра́нами пролива́ющуюся, а́ки свѣти́льникъ иму́щая, да́ждь отъ еле́я твоего́, да тѣ́мъ душе́вную мою́ свѣщу́ украси́вши, сподо́блюся по тебѣ́ вни́ти въ черто́гъ небе́сный. Пресе́льникъ а́зъ е́смь на земли́ и пришле́цъ, я́коже вси́ отцы́ мои́; бла́гъ вѣ́чныхъ наслѣ́днице и, блаже́нная, обѣ́да въ Ца́рствіи небе́сномъ прича́стнице, я́ко въ стра́нствіи житія́, трапе́зы боже́ственныя угоще́нія, си́це и во исхо́дѣ отъ мíра, жела́емаго сподо́би мя́ напу́тствованія; и егда́ въ коне́цъ сно́мъ сме́рти начну́ усыпа́ти, косни́ся тогда́ изнемога́ющія пло́ти моея́, я́ко иногда́ а́нгелъ Иліи́, глаго́лющи: воста́ни, я́ждь и пíй, я́ко да благода́тію боже́ственныхъ Тѣ́ла и Кро́ве та́инъ укрѣпле́нъ, преиду́ въ крѣ́пости я́ди тоя́ дале́кій пу́ть сме́рти, да́же до горы́ небе́сныя; и та́мо, Его́же ты́ чрезъ три́ о́кна ба́нныя пре́жде вѣ́рою Бо́га Тро́ицу узрѣ́ла еси́, Сего́ ку́пно съ тобо́ю лице́мъ къ лицу́ да удосто́юся ви́дѣти, и сла́вити Его́ въ несконча́емыя вѣ́ки, ами́нь.

Таже:

Честнѣ́йшую херуви́мъ и сла́внѣйшую безъ сравне́нія серафи́мъ, безъ истлѣ́нія Бо́га Сло́ва ро́ждшую, су́щую Богоро́дицу, Тя́ велича́емъ. [Покло́нъ до земли́.]

Сла́ва Отцу́ и Сы́ну и Свято́му Ду́ху, и ны́нѣ и при́сно и во вѣ́ки вѣко́въ, ами́нь.
Го́споди поми́луй. [Три́жды.]

И отпу́стъ: Го́споди Іису́се Христе́, Сы́не Бо́жій, моли́твъ ра́ди Пречи́стыя Твоея́ Ма́тере, и святы́я великому́ченицы Варва́ры, и всѣ́хъ святы́хъ, поми́луй и спаси́ на́съ, я́ко Бла́гъ и Человѣколю́бецъ, ами́нь.

Примѣчанія:
[1] Послѣдованіе молебнаго канона приводится въ томъ видѣ, въ какомъ его можетъ совершать мірянинъ въ своей домашней молитвѣ — безъ возгласовъ и молитвъ священнослужителей.
[2] Тропарь, канонъ и молитва печатаются по изданію: Ака́ѳистъ святѣ́й великому́ченицѣ Варва́рѣ. — Кíевъ: Въ Тѵпогра́фіи Кіевопече́рской Ла́ѵры, 1757. — Л. 4 – 6; 27 об. – 30.

/ Къ оглавленію раздѣла /


Наверхъ / Къ титульной страницѣ

0