Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - среда, 22 ноября 2017 г. Сейчасъ на порталѣ посѣтителей - 11.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ДОМАШНЯЯ МОЛИТВА

Свт. Михаилъ, первый митр. Кіевскій и всея Россіи, чудотворецъ († 992 г.)

Святитель Михаил, первый митрополит Киевский и всея России, чудотворецПо однимъ сказаніямъ, онъ былъ сиріецъ, по другимъ — болгаринъ, по третьимъ — грекъ. По просьбѣ св. равноап. кн. Владиміра, онъ былъ присланъ въ Россію константинопольскимъ патр. Николаемъ Хрисовергомъ, для распространенія на Руси св. вѣры и устройства дѣлъ церковныхъ. Въ Россію св. Михаилъ явился съ ревностію апостольскою, съ духомъ пастырской любви и мудрости, отличавшимъ древнихъ восточныхъ святителей. Крестивъ 12 сыновей св. князя Владиміра и весь народъ Кіевскій, святитель съ отеческою кротостію и любовію заботился объ уничтоженіи языческихъ преданій и суевѣрій среди новообращенныхъ и распространеніи вѣры Христовой по лицу Русской земли. Онъ строилъ въ Кіевѣ и другихъ городахъ и весяхъ храмы, поставлялъ и назидалъ пресвитеровъ, избиралъ опытныхъ наставниковъ и имъ поручалъ дѣло обученія и образованія дѣтей въ страхѣ Божіемъ и цѣломудріи. Посѣтивъ Новгородъ и землю Ростовскую, святитель и здѣсь обратилъ многихъ ко Христу, разгоняя проповѣдью Евангелія тьму идолослуженія, утѣшая и укрѣпляя вѣрующихъ отеческими бесѣдами. Во всю жизнь свою святитель отличался кротостію, смиреніемъ, неутомимостію въ трудахъ и былъ истиннымъ отцемъ своей многочисленной паствы. Свт. Михаилъ скончался въ 992 г. Мощи его были положены въ Десятинную церковь, когда она была въ 996 г. закончена постройкой. Въ XII в. мощи его, обрѣтенныя нетлѣнными, перенесены въ Печерскій монастырь. Въ Лаврѣ первоначально память его праздновалась 15 іюля (по преданію день его кончины), съ 1730 г. перенесена на 30 сентября (день пренесенія его мощей).

АКАѲИСТЫ

Ака́ѳистъ святи́телю и чудотво́рцу Михаи́лу, пе́рвому митрополи́ту Кíевскому.

Конда́къ 1.

Избра́нный отъ Христа́ Бо́га сосу́дъ, по́сланъ бы́лъ еси́ въ зе́млю Россíйскую и язы́къ на́шъ святы́мъ креще́ніемъ просвѣти́лъ еси́, святи́телю о́тче Михаи́ле. Тѣ́мже Влады́цѣ своему́ на небеси́ ны́нѣ предстоя́, Тому́ моли́ся прилѣ́жно, отъ вся́кихъ бѣ́дъ и напа́стей изба́витися ста́ду твоему́, да зове́мъ тебѣ́:

Ра́дуйся, Михаи́ле, вели́кій іера́рше, Це́ркве Россíйскія пресла́вный первопресто́льниче.

Икосъ 1.

Ра́дуйся, вѣ́ры Христо́вы усе́рдный насади́телю; ра́дуйся, идолослуже́ніе искорени́вый, ра́дуйся, бѣсо́вскія же́ртвы упраздни́вый.

Ра́дуйся, свѣ́те, отъ восто́ка возсія́вый; ра́дуйся, тму́ идолобѣ́сія разгна́вый.

Ра́дуйся, уче́ніемъ Христо́вымъ лю́ди просвѣти́вый; ра́дуйся, и́дольскія тре́бы кресто́мъ разруши́вый.

Ра́дуйся, ни́ву Христо́ву до́брѣ воздѣ́лавый; ра́дуйся, благопло́дная сѣ́мена на не́й всѣ́явый.

Ра́дуйся, медото́чная уста́ Христо́ва; ра́дуйся, свирѣ́ль благозву́чная Ду́ха Свята́го.

Ра́дуйся, Михаи́ле, вели́кій іера́рше, Це́ркве Россíйскія пресла́вный первопресто́льниче.

Конда́къ 2.

Ви́дѣлъ еси́, святи́телю Михаи́ле, плоды́ трудо́въ твоея́ про́повѣди: гра́ждане бо сла́внаго гра́да Кíева, и́стинѣ твоего́ уче́нія все́ю душе́ю и се́рдцемъ вне́млюще, увѣ́роваша во Христа́, Истиннаго Бо́га, ме́рзскихъ же и́доловъ отврати́шася и, о́выхъ у́бо сокруша́ху, ины́хъ же съ поруга́ніемъ въ рѣку́ вмета́ху, въ ни́хже бѣ́си, — «о, лю́те на́мъ», — вопія́ху. Зря́ сія́, блаже́нне о́тче, ра́довался еси́ ду́хомъ твои́мъ, благода́рно поя́ Бо́гу: Аллилу́ія.

Икосъ 2.

Ра́зумъ богодухнове́ненъ имѣ́я, досточу́дне о́тче Михаи́ле, бу́ія лю́ди боже́ственнымъ твои́мъ уче́ніемъ до́брѣ наказа́въ, и гла́домъ душе́внымъ та́ющія, ева́нгельскимъ сло́ва хлѣ́бомъ напита́въ, Христо́ви сія́ приве́лъ еси́. Ему́ же, святи́телю, моли́ся, о похваля́ющихъ тя́ си́це:

Ра́дуйся, Це́ркве красото́; ра́дуйся, архіере́евъ добро́то.

Ра́дуйся, Правосла́вія свѣти́ло; ра́дуйся, благоче́стія пра́вило.

Ра́дуйся, люде́й Россíйскихъ вели́кій учи́телю; ра́дуйся, проро́чествія во апо́столѣхъ Первозва́ннаго сла́вный соверши́телю.

Ра́дуйся, ли́ка богоизбра́ннаго отце́въ Пече́рскихъ предстоя́телю; ра́дуйся, равноапо́столамъ Кири́ллу и Меѳо́дію равностоя́телю.

Ра́дуйся, двана́десять сыно́въ Влади́міра купѣ́лію креще́нія отроди́вый; ра́дуйся, тѣ́мъ все́й земли́ его́ усе́рдно послужи́вый.

Ра́дуйся, вѣ́ру Христо́ву распространи́вый; ра́дуйся, пре́лесть де́монскую низложи́вый.

Ра́дуйся, Михаи́ле, вели́кій іера́рше, Це́ркве Россíйскія пресла́вный первопресто́льниче.

Конда́къ 3.

Си́лою богоуго́дныхъ моли́твъ твои́хъ, свя́те, пра́отцемъ на́шимъ пособи́вый въ Еди́наго Истиннаго Бо́га увѣ́ровати, ло́жныя же бо́ги отри́нути и сокруши́ти. Помози́ и на́мъ мла́томъ добродѣ́тельнаго житія́ сокруши́ти душе́вныя кумíры на́ши: го́рдость у́бо — смире́ніемъ, сребролю́біе же — нестяжа́ніемъ, блу́дъ — цѣлому́дріемъ, гнѣ́въ — кро́тостію, чревоуго́діе — воздержа́ніемъ, за́висть — доброжела́ніемъ, уны́ніе же — крѣ́пкимъ на Бо́га упова́ніемъ. Да та́ко избы́вше перу́новъ духо́вныхъ, возмо́жемъ Бо́гу предста́ти, Ему́ же ты́, о́тче, научи́лъ еси́ на́съ вѣ́ровати и пѣ́ти непреста́нно: Аллилу́ія.

Икосъ 3.

Иму́щи ква́съ вѣ́ры во Христа́, жена́, богому́драя княги́ня Ольга, о́ный въ са́тѣхъ люде́й Россíйскихъ сокры́. Тобо́ю же, по во́лѣ Всемогу́щаго, все́ тѣ́сто держа́вы Влади́міровы сква́сивъ, возрасте́ въ вѣ́ру Христо́ву. Сего́ ра́ди пріими́ отъ на́шего усе́рдія досто́йныя похвалы́ тебѣ́:

Ра́дуйся, Бо́жіе къ Россíи благоволе́ніе; ра́дуйся, моли́твъ святы́я Ольги исполне́ніе.

Ра́дуйся, славнодержа́внаго Влади́міра вели́кій совѣтода́телю; ра́дуйся, новоизбра́нныхъ люде́й Христо́выхъ му́дрый назида́телю.

Ра́дуйся, и́мже Ца́ріе на́ши и вси́ лю́діе Россíйстіи спаса́ются; ра́дуйся, и́мже архіере́и на́ши, свяще́нницы же и мона́си хва́лятся.

Pа́дуйся, и́мже ни́щіи отъ Бо́га богатѣ́ютъ и прославля́ются; ра́дуйся, и́мже претружде́нные ста́рцы чрезъ вѣ́ру Христо́ву въ раи́ упокоева́ются.

Ра́дуйся, и́мже младе́нцы преста́вшіися, — «оса́нна въ вы́шнихъ» — вопію́тъ; ра́дуйся, и́мже ду́ши сыно́въ Россíйскихъ, я́ко и́скры, по сте́блію къ небеси́ теку́тъ.

Ра́дуйся, земли́ на́шея прекра́сное благослове́ніе; ра́дуйся, пресла́внаго гра́да Кíева освяще́ніе.

Ра́дуйся, Михаи́ле, вели́кій іера́рше, Це́ркве Россíйскія пресла́вный первопресто́льниче.

Конда́къ 4.

Бу́рю, и́доловъ сокруша́ющую, ощути́вше бѣ́си, рыда́юще, вопія́ху: «о, лю́те на́шему окая́нству, я́ко пре́жде почита́еми отъ всѣ́хъ бы́хомъ, ны́нѣ же поруга́ніе отъ еди́наго подъе́млемъ прише́льца, и́же у́читъ человѣ́ки во Христа́ у́бо вѣ́ровати, на́съ же сокруша́ти, Еди́ному Бо́гу пою́ще: Аллилу́ія».

Икосъ 4.

Слы́шимъ дре́вле отъ Боже́ственнаго Писа́нія, я́ко падо́ша стѣ́ны Іерихо́нскія, Іису́сомъ Нави́номъ, киво́ту обноси́му: нынѣ же вѣ́мы, я́ко и́доли падо́ша тебѣ́, святи́телю Михаи́ле во страну́ Россíйскую прише́дшу. Тѣ́мже мы́, ча́да твоя́, тобо́ю въ пресвѣ́тлую креще́нія оде́жду одѣ́янніи, благода́рно восхваля́емъ тя́ си́це зову́ще:

Ра́дуйся, свѣти́льниче, на гора́хъ Кíевскихъ свѣ́тло возсія́вый; ра́дуйся, изъ тмы́ къ свѣ́ту лю́ди приведы́й.

Ра́дуйся, те́рніе многобо́жія весьма́ истреби́вый; ра́дуйся, теплото́ю любве́ Боже́ственныя ду́ши оте́цъ на́шихъ согрѣ́вый.

Ра́дуйся, усты́ твои́ми Христа́, Сы́на Бо́жія, проповѣ́давый; ра́дуйся, о́гненнымъ язы́комъ твои́мъ и́дольское нече́стіе обличи́вый.

Ра́дуйся, въ Тріеди́наго Бо́га вѣ́ровати отцы́ на́ши научи́вый; ра́дуйся, добропло́дная древеса́ ра́я Іису́сова насади́вый.

Ра́дуйся, я́ко отъ тебе́ лю́діе Россíйстіи водо́ю благода́ти омы́шася; ра́дуйся, я́ко тобо́ю душе́вная очеса́ и́хъ во святѣ́й купѣ́ли откры́шася.

Ра́дуйся, я́ко тобо́ю, во сла́ву Бо́жію, це́ркви мно́гія созда́шася; ра́дуйся, я́ко тобо́ю оби́тели и́ноковъ согради́шася.

Ра́дуйся, Михаи́ле, вели́кій іера́рше, Це́ркве Россíйскія пресла́вный первопресто́льниче.

Конда́къ 5.

Богосія́ннаго свѣти́льника тя́, Михаи́ле богому́дре, вели́кій Влади́міръ во омраче́нную идолослуже́ніемъ Россíйскую зе́млю приведе́, да и здѣ́ твои́мъ прише́ствіемъ освятя́тся лю́діе и и́стинныя вѣ́ры позна́ніемъ вразумя́тся, правосла́вно и богоуго́дно возноси́ти хвале́бную пѣ́снь Пресвятѣ́й Тро́ицѣ: Аллилу́ія.

Икосъ 5.

Слы́шавъ патріа́рхъ Царягра́да, я́ко Влади́міръ креще́ніе свято́е воспрія́ и его́, я́ко святи́телей преднача́льника, моля́ше, да му́драго учи́теля въ Корсу́нь гра́дъ пришле́тъ и того́ митрополи́та земли́ Ру́сстѣй поста́витъ, возра́довася зѣло́ и со освяще́ннымъ собо́ромъ совѣ́тъ сотвори́въ, избра́ тя́, свя́те, сіе́ вели́кое послуша́ніе испо́лнити. Лю́ди же Россíйстіи тя́ срѣ́тивше и благоговѣ́йный зра́къ лица́ твоего́ ви́дѣвше, бесѣ́ды же твоея́ сла́дость слы́шавше, глаго́лаху:

Ра́дуйся, благíй на́шъ наста́вниче; ра́дуйся, апо́стольскія вла́сти и че́сти прее́мниче.

Ра́дуйся, во архіере́ехъ сла́вный; ра́дуйся, въ вѣ́рѣ вели́кій.

Ра́дуйся, въ повелѣ́ніихъ доброразсуди́тельный; ра́дуйся, въ поуче́ніихъ пресла́достный.

Ра́дуйся, кро́ткій нра́вомъ; ра́дуйся, высо́кій по Бо́зѣ житіе́мъ.

Ра́дуйся, пра́вды усе́рдный рачи́телю; ра́дуйся, непра́вды гро́зный обличи́телю.

Ра́дуйся, я́ко твои́ми моли́твами отъ вѣ́чныя сме́рти упова́емъ избѣжа́ти; ра́дуйся, я́ко твои́ми уче́ньми жи́знь вѣ́чную вѣ́руемъ стяжа́ти.

Ра́дуйся, Михаи́ле, вели́кій іера́рше, Це́ркве Россíйскія пресла́вный первопресто́льниче.

Конда́къ 6.

Проповѣ́дникъ Христо́вы вѣ́ры яви́лся еси́ въ Новѣгра́дѣ, Михаи́ле свяще́нне, въ о́ньже прише́дъ, и́долы сокруша́я, тре́бища разоря́я, лю́ди крести́лъ еси́, це́ркви созида́лъ еси́ и пресви́теры по градо́мъ и ве́сямъ поставля́лъ еси́, братолю́бію и христіа́нскому житію́ лю́ди поуча́я и увѣщева́я, да вси́ еди́ными усты́ и еди́нымъ се́рдцемъ съ тобо́ю навы́кнутъ Христу́ Бо́гу пѣ́ти: Аллилу́ія.

Икосъ 6.

Возсія́лъ еси́, святи́телю Христо́въ, я́ко звѣзда́ пресвѣ́тлая во оте́чествіи на́шемъ, и тму́ идолобѣ́сія свѣ́томъ боже́ственныхъ твои́хъ уче́ній до конца́ подави́лъ еси́. Сего́ ра́ди тя́, я́ко а́нгела Бо́жія, лю́ди Россíйстіи почита́ху, зову́ще:

Ра́дуйся, вѣ́ры на́шея во Христа́ нача́ло; ра́дуйся, Це́ркве Бо́жія въ Россíи основа́ніе.

Ра́дуйся, іера́рхомъ въ проповѣ́даніи сло́ва ева́нгельскаго о́бразе; ра́дуйся, и́нокомъ, въ пу́ть богоуго́днаго житія́ теку́щимъ, пра́вило.

Ра́дуйся, пра́ведной жи́зни міря́номъ вино́вниче; ра́дуйся, всѣ́мъ добродѣ́тельно живу́щимъ вѣне́чниче.

Ра́дуйся, чистото́ю ду́шу твою́ укра́сивый; ра́дуйся, пу́ть житія́ вре́меннаго во смире́ніи ду́ха препроводи́вый.

Ра́дуйся, дѣ́лы благи́ми свѣ́тло просія́вый; ра́дуйся, премно́гими чудесы́ лю́ди удиви́вый.

Ра́дуйся, я́ко сло́во бла́го о па́ствѣ твое́й Пастыренача́льнику Христу́ возда́лъ еси́; ра́дуйся, я́ко отъ руку́ Его́ пра́ведное воздая́ніе прія́лъ ecи́.

Ра́дуйся, Михаи́ле, вели́кій іера́рше, Це́ркве Россíйскія пресла́вный первопресто́льниче.

Конда́къ 7.

Хотя́ Преблагíй Бо́гъ но́выя лю́ди Себѣ́ избра́ти, пе́рвѣе въ позна́ніе Боже́ственное вели́каго во царѣ́хъ Влади́міра приведе́, и́же у́мнымъ сія́ніемъ благода́ти во святѣ́й купѣ́ли освѣ́щся, прія́тъ тя́ па́стыря вы́шнимъ открове́ніемъ, въ Россíю же ко овца́мъ свои́мъ, въ невѣ́ріи заблу́ждшимъ, приведе́. Тѣ́ же уче́ніемъ и креще́ніемъ во и́мя Отца́, и Сы́на, и Свята́го Ду́ха въ водѣ́ сія́ омы́въ, во дво́ръ Христо́въ приве́лъ еси́. Съ ни́ми же ны́нѣ престо́лу Его́ предстоя́, моли́ся да и на́съ сподо́битъ съ тобо́ю на небеси́ приноси́ти пѣ́снь Ему́: Аллилу́ія.

Икосъ 7.

Но́ваго тя́ апо́стола зри́мъ, архіере́е блаже́нне Михаи́ле, зе́млю Россíйскую обтека́юща, я́ко дости́гнути тебѣ́ и ко гра́ду Росто́ву, идѣ́же люде́й вели́кое мно́жество крести́лъ еси́ и вѣ́ровати въ Тро́ицѣ Еди́ному Бо́гу научи́лъ еси́, благоче́стію и благоразу́мію ты́я наказа́въ и це́ркви мно́гія воздви́гъ, пресви́теры же и діа́коны и́мъ поста́вилъ еси́, и уста́вы благоче́стны тѣ́мъ препода́лъ еси́, глаго́лющимъ тебѣ́ сицева́я:

Ра́дуйся, благода́тію креще́нія главу́ Россíи, а́ки діади́мою увѣнча́вый; ра́дуйся, Правосла́віемъ, а́ки пе́рстнемъ, зе́млю на́шу Христу́ обручи́вый.

Ра́дуйся, сію́ въ благоче́стіе, а́ки въ порфи́ру ца́рскую облачи́вый; ра́дуйся, Ева́нгеліе Христо́во, а́ки гри́вну злату́ю на вы́ю ея́ возложи́вый.

Ра́дуйся, Кре́стъ Госпо́день въ держа́ву непобѣди́мую е́й дарова́вый; ра́дуйся, вся́ ча́да ея́ правосла́вная Христу́ Го́споду и Пречи́стѣй Его́ Ма́тери усынови́вый.

Ра́дуйся, женише́ Це́ркве пресвѣ́тлый; ра́дуйся, сы́не Небе́снаго Отца́ пресла́вный.

Ра́дуйся, о́тче отце́въ, велелѣ́пая красото́; ра́дуйся, па́стырю па́стырей, велехва́льная добро́то.

Ра́дуйся, и всѣ́хъ родо́въ Россíйскихъ моли́твенниче; ра́дуйся, небе́сныхъ а́нгеловъ собесѣ́дниче.

Ра́дуйся, Михаи́ле, вели́кій іера́рше, Це́ркве Россíйскія пресла́вный первопресто́льниче.

Конда́къ 8.

Стра́нствующимъ и блужда́ющимъ въ пусты́ни идолослуже́нія сыно́мъ Россíйскимъ бы́лъ еси́ путево́ждь въ зе́млю обѣтова́нную, преподо́бне о́тче Михаи́ле, а́ще и не четы́редесять лѣ́тъ, я́коже Моисе́й, но четы́ре лѣ́та то́чію лю́ди Кíевскія страны́ дѣтоводи́лъ еси́, не ма́нною тлѣ́нною, но Истиннымъ Хлѣ́бомъ, съ небесе́ Сше́дшимъ, сія́ пита́я, Иже е́сть Христо́съ Госпо́дь. Сему́ у́бо пое́мъ о тебѣ́ пѣ́снь: Аллилу́ія.

Икосъ 8.

Ве́сь въ Бо́зѣ бы́въ, архипа́стырю приснопа́мятне, угожда́ти Тому́ при́сно па́ству твою́ поуча́лъ еси́, ча́да твоя́ духо́вная умоля́я ничто́же любви́ Христо́вой предпочита́ти. Мы́ же твои́хъ ча́дъ духо́вныхъ вну́цы, тебѣ́ глаго́лемъ си́це:

Ра́дуйся, Христа́ Го́спода все́ю душе́ю и се́рдцемъ возлюби́вый; ра́дуйся, вѣ́ровати Ему́ и люби́ти Его́ и на́съ научи́вый.

Ра́дуйся, я́ко Бо́гy вельми́ yгоди́лъ еси́; ра́дуйся, я́ко зако́нъ Боже́ственный на́мъ препода́лъ еси́.

Ра́дуйся, небе́снаго Влады́ки ра́бе благíй и вѣ́рный; ра́дуйся, да́нный тебѣ́ тала́нтъ не сокры́вый, но трудолю́бно умно́живый.

Ра́дуйся, мно́гу ку́плю и́мъ сотвори́вый; ра́дуйся, похвалу́ ве́лію отъ Го́спода твоего́ получи́вый.

Ра́дуйся, подъ и́го благо́е Христо́во, со смире́ніемъ вы́ю свою́ подклони́вый; ра́дуйся, тяготу́ дне́ и ва́ръ, въ виногра́дѣ Его́ со усе́рдіемъ подъя́вый.

Ра́дуйся, дина́рія вмѣ́сто, небе́сное Ца́рствіе отъ Христа́ воспрія́вый; ра́дуйся, въ ра́йскихъ оби́телѣхъ по трудѣ́хъ твои́хъ сла́дцѣ почи́вый.

Ра́дуйся, Михаи́ле, вели́кій іера́рше, Це́ркве Россíйскія пресла́вный первопресто́льниче.

Конда́къ 9.

Вси́ лю́діе Россíйстіи, пе́рвѣе язы́ческимъ многобо́жіемъ блужда́вшіи, ны́нѣ же тобо́ю, святи́телю Бо́жій Михаи́ле, до́брѣ наста́вленніи къ боговѣ́дѣнію пріидо́ша и во святѣ́й купѣ́ли отъ слѣпоты́ разу́мныхъ оче́съ изба́вльшеся, Еди́наго Созда́теля своего́ прославля́ютъ, Тому́ воспѣва́юще: Аллилу́ія.

Икосъ 9.

Витíйство человѣ́ческое не довлѣ́етъ къ прославле́нію трудо́въ и по́двиговъ твои́хъ, духоно́сне о́тче, я́же ты́ подъя́лъ еси́. Та́ко бо по вѣ́рѣ ревнова́лъ еси́, я́ко и къ безбо́жнымъ aга́ряномъ, къ болга́ромъ и сарацы́номъ му́жа нѣ́коего Ма́рка филосо́фа на про́повѣдь посла́лъ и лю́ди ко Христу́ призыва́лъ. Ны́нѣ же глаго́лемъ тебѣ́ си́це:

Ра́дуйся, подо́бно Иліи́ по Го́сподѣ Бо́зѣ поревнова́вый; ра́дуйся, о распростране́ніи святы́я вѣ́ры Его́ мно́го порадѣ́вый.

Ра́дуйся, во сла́ву Христо́ву потруди́выйся; ра́дуйся, достопокланя́емое и́мя Его́ предъ язы́ки пронесы́й.

Ра́дуйся, усе́рдіемъ во уче́ніи Христо́вѣ апо́столомъ уподо́бивыйся; ра́дуйся, во спасе́ніи ду́шъ человѣ́ческихъ Самому́ Христу́ подража́вый.

Ра́дуйся, любве́ Боже́ственныя испо́лненный; ра́дуйся, сострада́ніемъ къ бли́жнему насыще́нный.

Ра́дуйся, гро́ме, ка́пища язы́ческая разруша́яй; ра́дуйся, тимпа́не велегла́сный, сла́ву Божества́ Христо́ва возвѣща́яй.

Ра́дуйся, я́ко дерзнове́ніе ве́ліе ны́нѣ ко Христу́ и́маши; ра́дуйся, я́ко престо́лу Его́ въ ра́дости неизрече́ннѣй предстои́ши.

Ра́дуйся, Михаи́ле, вели́кій іера́рше, Це́ркве Россíйскія пресла́вный первопресто́льниче.

Конда́къ 10.

Спасе́нія лю́демъ жела́я и Це́ркви до́браго утвержде́нія, па́стырю на́шъ преблагíй, потща́лся еси́ изря́дно вся́ устро́ити о Россíйстѣмъ пле́мени новоизбра́нныхъ: па́стыри и учи́тели по градо́мъ поста́вилъ еси́ и тѣ́мъ ста́до слове́сныхъ ове́цъ споручи́въ, Пастыренача́льнику Христу́ сца́рствовати са́мъ отше́лъ еси́ на вели́кій пла́чь и рыда́ніе па́ству твою́ и кня́зя Влади́міра подви́гнувъ, къ моще́мъ твои́мъ припа́дающихъ, Бо́гу же жа́лостнѣ зову́щихъ: Аллилу́ія.

Икосъ 10.

Царя́ Небе́снаго, Христа́ Бо́га, вѣ́рный ра́бъ и служи́тель бы́лъ еси́, о́тче на́шъ Михаи́ле, и а́ще о Го́сподѣ сно́мъ cме́рти почи́лъ еси́, оба́че свято́е тѣ́ло твое́ тлѣ́нію бы́сть неприча́стно, неду́гомъ же человѣ́ческимъ врачева́тельно яви́ся. Тѣ́мже ра́цѣ моще́й твои́хъ предстоя́ще, моли́твенно восхваля́емъ тя́:

Ра́дуйся, я́ко нетлѣ́ніемъ тѣ́ла твоего́ на земли́ свѣ́тиши; ра́дуйся, я́ко свя́тостію души́ твоея́ на небеси́ блиста́еши.

Ра́дуйся, страны́ Россíйскія пресвѣ́тлое озаре́ніе; ра́дуйся, вели́каго хра́ма сего́ преизря́дное украше́ніе.

Ра́дуйся, гра́да твоего́ Кíева вели́кій засту́пниче; ра́дуйся, оби́тели Пече́рскія усе́рдный моли́твенниче.

Ра́дуйся, о всѣ́хъ ча́дѣхъ Це́ркве Правосла́вныя те́плый предъ Бо́гомъ хода́таю; ра́дуйся, всѣ́мъ, призыва́ющимъ тя́ на по́мощь, ско́рый предста́телю.

Ра́дуйся, я́ко богоуго́днымъ житіе́мъ твои́мъ, а́ки со́лнцемъ пресвѣ́тлымъ всѣ́хъ на́съ просвѣща́еши; ра́дуйся, я́ко апо́стольскими труда́ми твои́ми ве́сь мíръ удивля́еши.

Ра́дуйся, его́же тѣ́ло пречестно́е я́ко кипари́съ благово́нный, въ це́ркви Бо́жіи благоуха́етъ; ра́дуйся, его́же душа́ пресвята́я, я́ко ке́дръ въ раи́ Христо́вѣ, въ ра́дости процвѣта́етъ.

Ра́дуйся, Михаи́ле, вели́кій іера́рше, Це́ркве Россíйскія пресла́вный первопресто́льниче.

Конда́къ 11.

Пѣ́ніемъ хвале́бнымъ велича́емъ тя́, святи́телю Бо́жій Михаи́ле, и хода́тая у престо́ла небе́снаго Влады́ки имѣ́ти тебе́ ча́емъ. Не посрами́ у́бо вѣ́ры на́шея, па́стырю предо́брый, но пріими́ моли́твы на́ша, я́ко кади́ло благово́нное, и умоли́ Христа́, да да́руетъ и на́мъ добродѣ́тельнѣ жи́знь на́шу сконча́ти и съ тобо́ю у Христа́ водвори́тися, да услы́шимъ гла́съ тво́й къ Нему́ о на́съ: «се́ а́зъ и дѣ́ти, я́же ми да́лъ еси́, Го́споди», и къ Нему́ съ тобо́ю вку́пѣ воспое́мъ: Аллилу́ія.

Икосъ 11.

Свѣтоза́рная луча́ бы́лъ еси́, богому́дре о́тче Михаи́ле, во тмѣ́ многобо́жія сѣдя́щимъ, путеводя́щая къ Со́лнцу пра́вды Христу́ Бо́гу, Ему́ же моли́ся, во свѣ́тѣ за́повѣдей Его́ вcегда́ на́мъ пребыва́ти, ра́достное пѣ́ніе тебѣ́ принося́щимъ:

Ра́дуйся, свѣти́льниче Трисія́ннаго Свѣ́та; ра́дуйся, заре́ незаходи́маго Со́лнца.

Ра́дуйся, огню́, и́дольское нече́стіе попаля́яй; рáдуйся, пла́меню, ерети́ческая уче́нія пожига́яй.

Ра́дуйся, святи́телю, поуча́яй всѣ́хъ, я́ко нѣ́сть ина́го Бо́га, кромѣ́ Небе́снаго; ра́дуйся, человѣ́ковъ вразуми́телю, глаго́ляй, я́ко нѣ́сть спасе́нія внѣ́ собо́рныя апо́стольскія Це́ркве.

Ра́дуйся, на богоуго́дное житіе́ наставля́яй; ра́дуйся, въ небе́сное Ца́рствіе пу́ть показу́яй.

Ра́дуйся, звѣздо́ путеводя́щая ко Христу́; ра́дуйся, путю́, и́мже пріидо́хомъ къ и́стинному Бо́гу.

Ра́дуйся, ключу́, врата́ ра́йская сыново́мъ Россíйскимъ отве́рзый; ра́дуйся, хода́таю, безчи́сленное мно́жество си́хъ та́мо водвори́вый.

Ра́дуйся, Михаи́ле, вели́кій іера́рше, Це́ркве Россíйскія пресла́вный первопресто́льниче.

Конда́къ 12.

Благода́ть Бо́жія по лѣ́техъ мно́зѣхъ тѣ́ло твое́ свято́е нетлѣ́нно въ земли́ соблюде́, въ це́ркви Десяти́ннѣй положе́но, и я́ко сокро́вище многоцѣ́нное па́ствѣ твое́й цѣ́ло и невреди́мо сіе́ яви́, я́ко ниже́ оде́ждъ твои́хъ свяще́нныхъ косну́тися тлѣ́нію. Отсю́ду у́бо вѣ́рою уразумѣ́хомъ, я́ко Христу́ предстои́ши и мо́лишися о почита́ющихъ тя́ и пою́щихъ Ему́ тебе́ ра́ди: Аллилу́ія.

Икосъ 12.

Пою́ще свято́е и пресла́вное житіе́ твое́, Михаи́ле равноапо́стольне, почита́емъ твою́ свяще́нную па́мять, ре́вность же твою́ по Бо́зѣ восхваля́емъ, любо́вь твою́ ко Христу́ и къ бли́жнему превозно́симъ. Ты́ же, о всеблаже́ннѣйшій о́тче, не возгнуша́йся смире́ннымъ си́мъ пѣ́ніемъ:

Ра́дуйся, я́ко престо́лу Пресвяты́я Тро́ицы предстои́ши; ра́дуйся, я́ко Всемогу́щаго о все́мъ мíрѣ мо́лиши.

Ра́дуйся, я́ко со арха́нгелы и а́нгелы трисвяту́ю пѣ́снь на небеси́ пое́ши; ра́дуйся, я́ко со апо́столы въ ра́йскихъ оби́телехъ пребыва́еши.

Ра́дуйся, я́ко съ ли́ки святи́телей предъ Бо́гомъ о душа́хъ на́шихъ хода́тайствуеши; ра́дуйся, я́ко съ полки́ преподо́бныхъ спасе́нію на́шему споспѣшеству́еши.

Ра́дуйся, я́ко съ Пречи́стою Дѣ́вою Богоро́дицею, ру́цѣ свои́ пречестны́я о ми́рѣ оте́чества на́шего ко Христу́ воздѣва́еши; ра́дуйся, я́ко о соедине́ніи люде́й непреста́нно Его́ умоля́еши.

Ра́дуйся, со проро́ки и му́чeники вы́шняго Ца́рствія наслѣ́дниче; ра́дуйся, рая́ Бо́жія со всѣ́ми святы́ми единовсе́льниче.

Ра́дуйся, небе́сныхъ вели́чій и красо́тъ зри́телю; ра́дуйся, безконе́чныхъ сла́достей и блаже́нствъ ра́йскихъ облада́телю.

Ра́дуйся, Михаи́ле, вели́кій іера́рше, Це́ркве Россíйскія пресла́вный первопресто́льниче.

Конда́къ 13.

О, всехва́льный и преди́вный чудотво́рче, о́тче на́шъ Михаи́ле, Россíйскія страны́ пе́рвый святи́телю и всѣ́хъ правосла́вныхъ христіа́нъ предста́телю, пріими́ сіе́ ма́лое моле́ніе на́ше, въ похвалу́ тебѣ́ приноси́мое, и моли́твами твои́ми испроси́ на́мъ у Бо́га въ вѣ́цѣ се́мъ житіе́ ти́хое и добродѣ́телей испо́лненное, да и въ жи́зни бу́дущей сподо́бимся ку́пно съ тобо́ю пѣ́ти въ Тро́ицѣ Еди́ному Бóгy: Аллилу́ія.

[Се́й конда́къ глаго́лется три́жды. Та́же и́косъ 1-й: Арха́нгеловъ и а́нгеловъ Ца́рь... И конда́къ 1-й: Избра́нный отъ Христа́ Бо́га сосу́дъ...]

Моли́тва святи́телю Христо́ву Михаи́лу.

О, святы́й, вели́кій и пресла́вный архипа́стырю и о́тче нáшъ Михаи́ле, страны́ Россíйскія первопресто́льниче и просвѣти́телю, всѣ́хъ же племе́нъ христіа́нскихъ благонаде́жный предъ Бо́гомъ хода́таю! Тебѣ́ припа́дающе, мо́лимся: помози́ на́мъ бы́ти твоея́ къ Бо́гу любве́ подража́телемъ, е́ю же въ земнѣ́мъ животѣ́ твое́мъ преиспо́лненъ бы́лъ еси́. Просвѣти́ умы́ и сердца́ на́ша свѣ́томъ Боже́ственнаго уче́нія, научи́ на́съ тебе́ послѣ́довати вѣ́рно и за́повѣди Госпо́дни усе́рдно твори́ти, да яви́мся ча́да твоя́ не и́менемъ то́кмо, но и всѣ́мъ житіе́мъ та́ко позна́емся. Моли́ся, равноапо́стольне іера́рше, о Це́ркви Россíйстѣй, о гра́дѣ твое́мъ и оби́тели, въ не́й же нетлѣ́нно мо́щи твоя́ святы́я почива́ютъ, и о все́мъ оте́чествѣ на́шемъ, при́зри ми́лостивно на вся́ вѣ́рныя твоя́ чти́тели, по́мощи твоея́ и́щущія, бу́ди всѣ́мъ въ болѣ́знѣхъ — цѣли́тель, въ ско́рбѣхъ и печа́лѣхъ — утѣ́шитель, въ бѣда́хъ и ну́ждахъ — помо́щникъ, въ ча́съ же сме́ртный — засту́пникъ и покрови́тель, да твое́ю по́мощію сподо́бимся и мы́, грѣ́шніи, спасе́ніе получи́ти и Ца́рствіе Христо́во наслѣ́довати. Ей, святи́телю Христо́въ, а́ще восхо́щеши, мо́жеши помощи́ на́мъ, да на по́мощь твою́ упова́юше, просла́вимъ ди́внаго во святы́хъ Свои́хъ Бо́га, Отца́ и Сы́на и Свята́го Ду́ха, ны́нѣ и при́сно и во вѣ́ки вѣко́въ. Ами́нь.

Тропа́рь, гла́съ 4:

Дне́сь проро́чествіе во апо́столѣхъ Первозва́ннаго испо́лнися: се́ бо на си́хъ гора́хъ возсія́ благода́ть и вѣ́ра умно́жися. И и́же невѣ́ріемъ обветша́вшіи, боже́ственною купѣ́лію отроди́шася и бы́ша лю́діе обновле́нія, ца́рское свяще́ніе, язы́къ свя́тъ, Христо́во ста́до, ему́же ты́ пе́рвый па́стырь яви́лся еси́, я́ко пе́рвѣе креще́ніемъ послужи́вый. И ны́нѣ, предстоя́ Влады́цѣ Христу́ Бо́гу, моли́ всѣ́мъ сыно́мъ Россíйскимъ спасти́ся, и́маши бо дерзнове́ніе, я́ко іера́рхъ Бо́жій и священнослужи́тель.

Конда́къ, гла́съ 2:

Моисе́й вторы́й Россíи яви́лся еси́, о́тче, пренесы́й мы́сленный виногра́дъ отъ еги́петскаго идолослуже́нія, въ зе́млю, проро́чествіемъ предувѣ́дѣну, о не́йже подобообра́зно рещи́: бу́детъ утвержде́ніе вѣ́ры на земли́, и на версѣ́хъ го́ръ Кíевскихъ превознесе́тся па́че Лива́на пло́дъ, пита́ющъ мíра всего́; отъ него́же вкуси́вше, ублажа́емъ тя́, Михаи́ле, Бо́жій святи́телю.

Велича́ніе:

Велича́емъ тя́, святи́телю о́тче Михаи́ле, и чте́мъ святу́ю па́мять твою́, ты́ бо мо́лиши за на́съ Христа́ Бо́га на́шего.

Источникъ: Ака́ѳистъ святи́телю и чудотво́рцу Михаи́лу, пе́рвому митрополи́ту Кíевскому. — Кíевъ: Тѵпогра́фія Кíево-Пече́рской Успе́нской Ла́вры, 1914. — 29 л.

/ Къ оглавленію раздѣла /


Наверхъ / Къ титульной страницѣ

0