Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - среда, 22 ноября 2017 г. Сейчасъ на порталѣ посѣтителей - 18.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ДОМАШНЯЯ МОЛИТВА

Преп. Никандръ, Псковскій чудотворецъ († 1581 г.)

Преподобный Никандр, Псковский чудотворецПреп. Никандръ Псковскій (въ крещеніи Никонъ) родился 24 іюля 1507 года въ семьѣ крестьянъ Филиппа и Анастасіи въ селѣ Виделебьѣ на Псковщинѣ. Съ юности отличался богобоязненностію, скромностью, чуждался дѣтскихъ игръ и любилъ посѣщать храмъ Божій. Удалившись на рѣку Демьянку (между Псковомъ и Порховомъ), онъ провелъ въ пустыни безмолвно нѣсколько лѣтъ въ суровыхъ отшельническихъ подвигахъ; затѣмъ, въ обители Саввы Крыпецкаго былъ постриженъ въ монашество. Избѣгая человѣческой славы, онъ снова удалился въ свою пустынную хижину на берега рѣки Демьянки. Пробывъ здѣсь 15 лѣтъ, преп. Никандръ (послѣ ограбленія его кельи и жестокаго избіенія его ворами, изъ которыхъ двое впослѣдствіи раскаялись) возвратился въ Крыпецкій монастырь, гдѣ братія избрала его въ уставщика, а затѣмъ въ келаря. Справедливая строгость преп. Никандра въ отправленіи имъ должности келаря и строго аскетическая жизнь казались тяжкими для нѣкоторыхъ изъ братіи. Замѣтивъ, что онъ тяготитъ собою другихъ и избѣгая неудовольствій, онъ снова отправился въ свое пустынное уединеніе на Демьянку. За святую жизнь онъ сподобился отъ Господа дара прозорливости и чудотворенія. Скончался въ 1581 г. Въ 1584 г. на благодатномъ мѣстѣ подвига преп. Никандра была создана обитель, которую стали называть Никандровой пустынью. Въ 1687 г. чудоточныя мощи преподобного были обрѣтены нетлѣнными и нынѣ почиваютъ въ его пустыни.

АКАѲИСТЫ

Ака́ѳистъ преподо́бному отцу́ на́шему Ника́ндру пустынножи́телю, Пско́вскому но́вому чудотво́рцу.

Конда́къ 1.

Возбра́нный отъ Нача́льника и Соверши́теля вѣ́ры, Го́спода Іису́са, да́нный во о́бразъ послѣ́дованія Правосла́вныя Це́ркви сосло́вію, до́блественный подви́жниче и чудотво́рче преди́вный, преподо́бне о́тче Ника́ндре! Похва́льная со благодаре́ніемъ прино́симъ ти́, моли́твенницы твои́, и́бо те́плымъ твои́мъ предста́тельствомъ у Царя́ Небе́снаго вся́ поле́зная и спаси́тельная хода́тайствуеши на́мъ. Яко имѣ́я дерзнове́ніе ко престо́лу Благода́ти, отъ вся́кихъ на́съ злоключе́ній свободи́, да зове́мъ ти́:

Ра́дуйся, преблаже́нне Ника́ндре, преподо́бне о́тче на́шъ.

Икосъ 1.

Ра́дуйся, благочести́ваго ко́рене благо́е прозябе́ніе; ра́дуйся, чу́дное всѣ́хъ христіа́нскихъ добродѣ́телей плодоприноше́ніе.

Ра́дуйся, младе́нче, при купѣ́ли обновле́нія посвяти́вый себе́ Го́споду на служе́нія вѣ́рная; ра́дуйся, пома́занниче, воспріе́мый свы́ше всеору́дія духо́вная.

Ра́дуйся, тѣ́ми отъ ю́ности на тѣ́ло свое́, на мíръ се́й и діа́вола себе́ ополчи́вый; ра́дуйся, ра́зумъ сво́й къ свѣ́ту боговѣ́дѣнія воспери́вый.

Ра́дуйся, очи́ма твои́ма всю́ду Го́спода иска́вый и въ Не́мъ намѣ́реніе полага́вый; ра́дуйся, слу́хи твои́ на воспрія́тіе глаго́ловъ Бо́жіихъ, и́миже возражда́ется вѣ́ра, обрати́вый.

Ра́дуйся, уста́ твоя́ на славосло́віе Бо́жіе и псалмопѣ́ніе, на назида́ніе и́скреннему твоему́ въ душеполе́зномъ отверза́яй; ра́дуйся, ру́цѣ твои́ на творе́ніе благодѣя́нія тре́бующимъ устроя́яй.

Ра́дуйся, но́зѣ твои́ ше́ствовати по путе́мъ оправда́ній Госпо́днихъ управля́яй; ра́дуйся, вся́ твоя́ душе́вная и тѣле́сная чу́вства на благоугожде́ніе Пода́телю всѣ́хъ бла́гъ устремля́яй.

Ра́дуйся, преблаже́нне Ника́ндре, преподо́бне о́тче на́шъ.

Конда́къ 2.

Ви́дящи преподо́бный Ника́ндръ душе́вныма очи́ма, я́ко въ мíрѣ се́мъ вся́ческая суета́, и я́ко недосто́йны су́ть стра́сти ны́нѣшняго вѣ́ка, иму́щей сла́вѣ яви́тися на небесѣ́хъ, потща́ся, отве́ргся себе́, мíра и я́же въ не́мъ, наставля́емь преподо́бными Евфроси́номъ и Са́ввою, тѣ́снымъ и приско́рбнымъ ше́ствовати путе́мъ въ го́рній небе́сный Іерусали́мъ. Его́же дости́гнувъ ны́нѣ, предстоя́ престо́лу Агнчу, досто́йно весели́тся съ ни́ми и со всѣ́ми избра́нными, поя́ Всеси́льному Бо́гу: Аллилу́ія.

Икосъ 2.

Ра́зумовъ Госпо́дь, напои́вый тя́, преподо́бне, слове́снымъ и неле́стнымъ млеко́мъ благоче́стія, сподо́би тя́ преспѣва́ти въ му́жа, въ мѣ́ру во́зраста соверше́нна, возраста́юща во спасе́ніе, да вку́сиши, я́ко бла́гъ Госпо́дь. Къ Нему́же приходя́щи, са́мъ я́ко ка́меніе жи́во зи́ждешися въ хра́мъ духо́венъ, въ святи́тельство свя́то, возноси́ти же́ртвы духо́вныя благопрія́тны Бо́гови. И да благоуспѣ́еши въ се́мъ, удали́вся отъ до́му твоего́, вда́лъ еси́ себе́ му́жу богобоя́зливу, навы́кнути отъ него́, я́же су́ть на потре́бу, увѣ́дѣти Писа́нія, въ ни́хже сокрове́нъ е́сть живо́тъ вѣ́чный, и да научи́ши на́съ приглаша́ти тебѣ́ такова́я:

Ра́дуйся, ю́ноше, вся́ дѣ́тская игра́лища, я́ко поползнове́ніе ко злу́, презрѣ́вый; ра́дуйся, мудрова́ніемъ го́рнихъ, а не земны́хъ, я́ко многоцѣ́ннымъ би́серомъ, сія́вый.

Ра́дуйся, о́нымъ лице́ твое́ и се́рдце украси́вый; ра́дуйся, Го́спода отъ всея́ души́ и всея́ крѣ́пости твоея́ возлюби́вый.

Ра́дуйся, не то́чію де́нь суббо́тный, но и вся́ дни́ живота́ Го́споду Бо́гу святи́вый; ра́дуйся, николи́же и́мене Го́спода Бо́га твоего́ всу́е пріи́мый.

Ра́дуйся, роди́телей твои́хъ любо́вію, послуша́ніемъ и воздая́ніемъ до́лжнымъ почти́вый; ра́дуйся, бли́жняго твоего́, я́ко себе́ сама́го возлюби́вый.

Ра́дуйся, ю́ность твою́ въ цѣлому́дріи обучи́вый; ра́дуйся, я́ко дѣ́ву чи́сту, Жениху́ Христу́ себе́ обручи́вый.

Ра́дуйся, пи́санная въ зако́нѣ благода́тію Бо́жіею сотвори́вый, и въ усоверше́ніе сего́ еще́ еди́но доконча́вый; ра́дуйся, вся́ имѣ́нія твоя́ прода́вый, и да живо́тъ вѣ́чный наслѣ́диши, ни́щимъ разда́вый.

Ра́дуйся, преблаже́нне Ника́ндре, преподо́бне о́тче на́шъ.

Конда́къ 3.

Си́ла Боже́ственнаго Ева́нгельскаго сло́ва, — пріиди́те ко Мнѣ́ вси́ тружда́ющіися и обремене́нніи, и Азъ упоко́ю вы́, — подо́бно мечу́ обою́ду остру́, прони́кну твое́, преблаже́нне, ре́вностное се́рдце, бы́вшу тебѣ́ со благоговѣ́ніемъ во святѣ́мъ хра́мѣ. Его́же дѣ́йствія толи́ко испо́лненъ бы́лъ еси́, я́ко ничесому́ запина́ющу, па́че же пу́ть тебѣ́ показу́ющему Бо́жіимъ изволе́ніемъ му́жу Ѳео́дору, просте́рши ду́хъ тво́й, я́ко го́рлица въ пусты́ню непроходи́мую водвори́лся еси́, и та́мо воздви́гши нѣ́кое жили́ще, себе́ самаго́ предста́вилъ еси́ селе́ніемъ Бо́гу Вы́шнему, поя́ Ему́ въ по́двизѣхъ моли́твы и поще́нія всегда́: Аллилу́ія.

Икосъ 3.

Иму́щи основа́ніемъ богоуго́днаго житія́ твоего́, преблаже́нне о́тче на́шъ, смире́ніе, кро́тость и нетщесла́віе, да Оте́цъ тво́й, ви́дяй въ та́йнѣ, возда́стъ тебѣ́ я́вѣ, мни́лъ еси́ мѣста́ пусты́нная бы́ти сокрове́ніемъ твоея́ добродѣ́тели. Но я́коже рече́ся, — нѣ́сть гла́съ, и́же не услы́шится, — та́ко и свято́е житіе́ твое́ просла́вися во окре́стныхъ страна́хъ. И да не ка́ко па́костникъ пло́ти, а́ггелъ сатани́нъ, препне́тъ твоему́ ше́ствію, и да не иску́ситъ тя́ похвали́тися о се́мъ, сего́ ра́ди оста́вивъ мѣ́сто пребыва́нія твоего́, Бо́гу лу́чшее что́ о тебѣ́ предзрѣ́вшу, прите́клъ еси́ во оби́тель свята́го Іоа́нна Богосло́ва, и открове́ннымъ гла́сомъ предъ Це́рковію и а́нгелами изре́кши свяще́нныя обѣ́ты, вда́лъ еси́ себе́ во служе́ніе и́ноческое. Тѣ́мже воспѣва́емъ ти́ такова́я:

Ра́дуйся, во́ине, не двѣма́ господи́нома рабо́тати, но Еди́ному то́чію, Живу́щему на небесѣ́хъ, восхотѣ́вый; ра́дуйся, вся́ повелѣ́нная чрезъ нача́льниковъ поста́вленныхъ отъ Него́, съ ра́достію, а не съ воздыха́ющи, твори́вый.

Ра́дуйся, понесы́й терпѣливоду́шно и са́мая вели́кая озлобле́нія; ра́дуйся, пло́ть твою́, вою́ющую на ду́ха, умертви́вый чрезъ моли́тву и суро́вая поще́нія.

Ра́дуйся, уедине́нно въ богомы́сліи и слеза́хъ но́щи проводи́вый; ра́дуйся, тѣ́ло твое́, во умерщвле́ніе страсте́й, на снѣде́ніе лета́ющимъ живо́тнымъ обнажи́вый.

Ра́дуйся, кровьми́ му́ченическими во свидѣ́тельство непрело́жныя вѣ́ры обагре́нный; ра́дуйся, по распя́тіи ве́тхаго Ада́ма, но́вымъ, Иже е́сть Христо́съ, въ преподо́біи и пра́вдѣ оживотворе́нный.

Ра́дуйся, крести́выйся во Христа́; ра́дуйся, обле́кшійся во вся́ велелѣ́поты Его́.

Ра́дуйся, хлѣ́ба а́нгельскаго во дво́рѣхъ вы́шняго Сіо́на вкуша́яй; ра́дуйся, глаго́ломъ Бо́жіимъ на труды́ многоразли́чныя себе́ укрѣпля́яй.

Ра́дуйся, преблаже́нне Ника́ндре, преподо́бне о́тче на́шъ.

Конда́къ 4.

Бу́ря смуще́нія, воздвиза́емая вѣ́тры многоразли́чныхъ о преподо́бномъ житіи́ твое́мъ помышле́ній, пребыва́ющихъ съ тобо́ю въ общежи́тельствѣ, коле́блетъ кора́бль смире́нія твоего́. Ты́ же, смире́нія рачи́телю, па́че и па́че исполня́яся о́нымъ, гряде́ши па́ки въ пусты́ню, ю́же ти́ указа́ гла́съ Неви́димаго отъ олтаря́ исходя́й, да та́мо на вя́щшіе по́двиги, препоя́савшися си́лою свы́ше, обрати́шися, попира́я си́лою Креста́ вся́ сопроти́внаго ко́зни, да та́ко сопле́тше побѣдоно́сный вѣне́цъ, удосто́ишися прія́ти на главу́ твою́ отъ руки́ Го́спода, всегда́ побѣди́тели на́съ Творя́щаго, поя́ Ему́: Аллилу́ія.

Икосъ 4.

Су́щу ти́ на мѣ́стѣ, вели́кій подви́жниче, идѣ́же бѣ́ устро́ено жили́ще твое́, Бо́гу та́ко дѣ́йствующу, тече́ніе твое́ соверша́лъ еси́ въ те́плыхъ моли́твахъ, во упова́ніи несомни́тельнемъ, я́ко не изнемо́жетъ отъ Бо́га вся́къ глаго́лъ, и въ любви́, отъ нея́же ни ра́нами, ни преще́ніемъ, ни гла́домъ, ни ино́ю ко́ею ну́ждою отвлече́нъ бы́ти возмо́глъ еси́. Оба́че діа́волъ, я́ко ле́въ, искíй кого́ поглоти́ти, наусти́ безчеловѣ́чныя разбо́йники, е́же преда́ти тя́ губле́нію, но ничто́же возмо́же. Па́че же просла́вися твое́ неизрече́нное терпѣ́ніе: егда́ бо отъ я́звы копіе́мъ въ ре́бра ве́сь обагре́нъ бы́лъ еси́ кро́вію, тогда́ возопи́лъ еси́ въ души́ твое́й, я́коже Стефа́нъ: Отче, отпусти́ и́мъ! Мы́ же, зря́ще твое́ крѣ́пкое благоду́шіе, со удивле́ніемъ вопіе́мъ ти́ такова́я:

Ра́дуйся, страда́льче, посвяти́вый въ же́ртву прія́тну Бо́гови себе́ сама́го; ра́дуйся, не убоя́выйся отъ убива́ющихъ тѣ́ло, души́ же не могу́щихъ уби́ти.

Ра́дуйся, ка́меню непоколеби́мый, отъ него́же вся́ во́лны свирѣ́пѣющія сокруша́ются; ра́дуйся, я́ко въ тебѣ́ вѣ́ра, любо́вь, смире́ніе и незло́біе явля́ются.

Ра́дуйся, му́жу скорбе́й, ра́дующійся со святы́мъ Па́вломъ во страда́ніяхъ свои́хъ; ра́дуйся, пріе́млющій ра́дость, весе́ліе и мзду́ мно́гу на небесѣ́хъ.

Ра́дуйся, кро́вію твое́ю, я́ко гла́сомъ вопію́щимъ на не́бо, о́выхъ ослѣпле́ніемъ оче́съ и потопле́ніемъ порази́вый; ра́дуйся, то́южде кро́вію о́выхъ на пу́ть и́стинный раска́янія обрати́вый.

Ра́дуйся, прише́дшимъ и́мъ къ тебѣ́ не гро́зныя и ме́стныя взо́ры яви́вый; ра́дуйся, я́ко оте́цъ сердобо́льный развраще́нныхъ ча́дъ не оскорби́вый.

Ра́дуйся, излія́ніемъ кро́ви твоея́ вѣнча́выйся съ му́ченики и страстоте́рпцы; ра́дуйся, не то́чію о всѣ́хъ притека́ющихъ къ тебѣ́ съ вѣ́рою, но и о врага́хъ твои́хъ те́плый моли́твенниче.

Ра́дуйся, преблаже́нне Ника́ндре, преподо́бне о́тче на́шъ.

Конда́къ 5.

Боготе́чная звѣзда́, заи́мствующая свѣ́тъ сво́й отъ и́стиннаго Со́лнца пра́вды, Го́спода Іису́са, яви́лся еси́ на́мъ, богоблаже́нне Ника́ндре, въ мра́чной но́щи многостра́стнаго житія́ сего́ спя́щимъ и заблужда́ющимъ, показу́яй на́мъ пе́рвѣе вре́мя воста́нія отъ сна́ грѣхо́внаго. Та́же благови́днымъ о́бразомъ свои́мъ, вѣ́рнымъ сло́вомъ, житіе́мъ, любо́вію, ду́хомъ, вѣ́рою, чистото́ю, кро́тостію и терпѣ́ніемъ, веду́щи по пути́ спасе́нія къ го́рнему небе́сному Оте́честву всѣ́хъ, прибѣга́ющихъ къ тебѣ́ и вопію́щихъ къ Бо́гу: Аллилу́ія.

Икосъ 5.

Ви́дѣвше Правосла́вныя Це́ркви благочести́вая ча́да, па́че же окре́стніи, ре́вностное твое́ по за́повѣдемъ Госпо́днимъ житіе́, и благода́ть Ду́ха Свята́го обита́ющую въ се́рдцѣ твое́мъ, е́юже умудри́вся во спасе́ніе, преподава́лъ еси́ послу́шающимъ тя́ оте́ческая наказа́нія, и е́юже врачева́лъ еси́ не то́кмо неду́ги душе́вныя, но и тѣле́сныя, притека́ху къ тебѣ́ съ вѣ́рою не возвраща́ющеся то́щи, но я́коже о́блацы поднебе́сніи испо́лнени вла́ги, ороша́ху ни́вы серде́цъ свои́хъ, возвраща́юще благíя плоды́ вѣ́ры, и вопію́ще такова́я:

Ра́дуйся, исто́чниче, среди́ безво́дныхъ мѣ́стъ источа́ющій сла́дкія во́ды поле́зныхъ уче́ній; ра́дуйся, наста́вниче предо́брый въ наде́ждѣ тре́бующихъ о Бо́жіи милосе́рдіи увѣре́ній.

Ра́дуйся, дре́во благосѣнноли́ственное, успокоя́ющее прохла́дою и утѣше́ніемъ во юдо́ли се́й стра́нствующихъ; ра́дуйся, соверше́нными плода́ми о́наго насыща́ющее пра́вды Христо́вой а́лчущихъ.

Ра́дуйся, мѵрова́рнице, на вся́ неду́ги врачева́нія содержа́щая; ра́дуйся, о́ная, я́ко вра́чь скороми́лостивый, безме́здно неду́гующимъ подава́ющій.

Ра́дуйся, ми́лости превели́кія и скорбя́щимъ скоропредста́тельнаго сострада́нія храни́лище; ра́дуйся, непови́нныхъ разрѣше́ніе и осужде́нныхъ пра́ведное суди́лище.

Ра́дуйся, потща́выйся о нищетѣ́ духо́внѣй и то́ю всели́вый вну́трь тя́ Ца́рствіе Бо́жіе; ра́дуйся, прилѣжа́вый неосла́бно чистотѣ́ душе́вной и тѣле́сной, и то́ю же зри́ши Бо́га.

Ра́дуйся, свѣти́льниче, еле́емъ дарова́ній Ду́ха Свята́го возже́нный; ра́дуйся, на высо́ко мѣ́сто сла́вы небе́сныя вознесе́нный.

Ра́дуйся, преблаже́нне Ника́ндре, преподо́бне о́тче на́шъ.

Конда́къ 6.

Проповѣ́дуютъ безмо́лвныя пусты́ни, оби́тели, гра́ды и ве́си безстра́стное житіе́ твое́, е́же стяжа́лъ еси́, богому́дре! Пе́рвѣе умертви́вши пло́ть твою́ бдѣ́ніемъ, поще́ніемъ, стоя́ніемъ на молитвосло́віяхъ, ниже́ возлега́ніемъ на ре́бра, то́чію преклоне́ніемъ главы́ и ма́лымъ дрема́ніемъ. Противу́ же діа́вольскихъ наважде́ній и по́лчищъ его́, овогда́ во вса́дники на ко́нѣхъ, съ тимпа́ны и кли́чами, овогда́ въ лю́тыхъ волко́въ и ди́віихъ звѣре́й преобража́вшихся, вооружа́лся еси́: о́выхъ пораже́ніемъ жезла́, о́выхъ си́лою креста́, и си́мъ, я́ко вели́кій Константи́нъ, побѣжда́лъ еси́. О не́мже хваля́ся, я́ко ору́жіи непобѣди́момъ, пое́ши Распя́тому на не́мъ всегда́: Аллилу́ія.

Икосъ 6.

Возсія́лъ еси́ ца́рству Правосла́вно-Россíйскому подъ лѣ́ты вели́кій свѣти́льникъ, поста́вленный не подъ спу́домъ, но на свѣ́щницѣ, испо́лненъ еле́я чи́ста вѣ́ры, наде́жды и любви́ къ Сотво́ршему тя́, па́че же христіа́нскаго терпѣ́нія, незло́бія и чу́днаго воздержа́нія отъ бра́шенъ, да яви́ши всѣ́мъ, любо́вію чту́щимъ тя́, я́ко не о хлѣ́бѣ еди́номъ жи́въ бу́детъ человѣ́къ, но о вся́комъ глаго́лѣ, исходя́щемъ изъ у́стъ Бо́жіихъ. Тѣ́мже и мы́, покрыва́еміи тмо́ю грѣхопаде́ній, а́лчущіи и жа́ждущіи ду́хомъ, взира́юще на тя́, ра́достная приглаша́емъ та́ко:

Ра́дуйся, во́ине Христа́ Бо́га на́шего избра́нный, пребыва́ющій Ему́ вѣ́ренъ да́же до сме́рти; ра́дуйся, во бра́ни житія́ неви́димыхъ враго́въ му́жественнѣ побѣди́вый.

Ра́дуйся, во служе́ніи твое́мъ, я́ко тече́цъ ско́рый, не возврати́выйся вспя́ть; ра́дуйся, сѣ́мя сло́ва Бо́жія не на се́рдце ка́менно, но на се́рдце пло́тяно пріи́мый.

Ра́дуйся, произрасти́вшій благíя плоды́, съ ни́миже яви́лся мíрови; ра́дуйся, я́ко тѣ́ми мíръ прославля́етъ Отца, Иже е́сть на небесѣ́хъ.

Ра́дуйся, наде́жду твою́ и въ жи́зни и въ сме́рти возложи́вый на Го́спода еди́на; ра́дуйся, то́ю покори́вый вся́ тебѣ́ сопроти́вная.

Ра́дуйся, о́ною, я́ко непобѣди́мымъ щито́мъ, себе́ огради́вый; ра́дуйся, любо́вію твое́ю неразлу́чно себе́ Жениху́ Христу́ уневѣ́стивый.

Ра́дуйся, то́ю всѣ́хъ блаже́нствъ, и́хже стяжа́ кро́вію свое́ю, при́сно наслажда́ющійся; ра́дуйся, я́ко сѣдѣ́ніемъ Христа́ одесну́ю Бо́га, и хода́тайствомъ Его́ вопи́лъ еси́ въ се́рдцы твое́мъ: Авва Отче!

Ра́дуйся, преблаже́нне Ника́ндре, преподо́бне о́тче на́шъ.

Конда́къ 7.

Хотя́щу нѣ́коему богобоя́зливу му́жу Симео́ну пріити́ поклони́тися тебѣ́ и насы́титися сла́достныхъ уче́ній твои́хъ, и́миже возмо́глъ бы укрѣпи́ти ду́шу свою́, якова́я и улучи́лъ е́стъ. Но ты́, прозорли́вче, предре́клъ еси́ ему́ скороприближа́ющуюся кончи́ну и предугото́валъ еси́ его́ къ ми́рному отше́ствію изъ сея́ плаче́вныя юдо́ли въ вѣ́чную несконча́емую жи́знь: чесо́ ра́ди пріи́мъ и́ноческій о́бразъ, устреми́въ ду́шу свою́ горѣ́, и до́брѣ пожи́въ, сконча́ся и пресели́ся во блаже́нная нѣ́дра Авраа́мова. О чесо́мъ ты́, прославля́я Бо́га, пое́ши благода́рственная: Аллилу́ія.

Икосъ 7.

Но́ваго тя́ проро́ка яви́ на земли́ ди́вный въ высо́кихъ Госпо́дь, раздѣля́яй кому́ждо дарова́нія Свята́го Ду́ха, дарова́въ тебѣ́ си́лу прозорли́вости: благоро́дну бо нѣ́коему му́жу Петру́, заматорѣ́вшу во дне́хъ свои́хъ съ жено́ю и безча́дну, чуде́сно приведе́нному къ тебѣ́, предре́клъ еси́ ему́, я́ко и́мать роди́тися сы́нъ ему́, и я́ко воздви́гнется на мѣ́стѣ безмо́лвія твоего́ хра́мъ Пресвяты́я Богома́тере, и распространи́тся мѣ́сто сіе́ и просла́вится, е́же и сбы́стся. Чесово́му удивля́ющеся, вопіе́мъ ти́:

Ра́дуйся, му́жу прорече́ній, исполне́ніемъ дѣ́ла увѣнча́нныхъ; ра́дуйся, бу́дущая, я́ко настоя́щая, благода́тію Бо́жіею созерца́ющій.

Ра́дуйся, благогла́сная труба́, е́юже воздвиза́ются сердца́ земноро́дныхъ уны́лая; ра́дуйся, духо́вная скрижа́ль, на не́йже изображены́ су́ть предсказа́нія нело́жная.

Ра́дуйся, и́ноковъ пустынножи́тельныхъ наста́вниче и основа́телю; ра́дуйся, моли́твами твои́ми оби́тели чу́дныя распространи́телю.

Ра́дуйся, оскудѣ́нія монасты́рская оби́льнѣ испо́лнивый и отъ хи́щниковъ чуде́снѣ защити́вый; ра́дуйся, до́брѣ ста́до, тобо́ю со́бранное, ко спасе́нію наставля́яй.

Ра́дуйся, о́бразе нищеты́ духо́вныя благови́дный; ра́дуйся, вся́ мíра сего́ кра́сная, я́ко скороисчеза́ющая, Бо́га ра́ди презрѣ́вый.

Ра́дуйся, мно́гія лю́ди отъ пути́ грѣхо́внаго ко Го́споду обрати́вый и спасы́й; ра́дуйся, призыва́ющихъ тя́ утѣше́ній духо́вныхъ исполня́ющій.

Ра́дуйся, преблаже́нне Ника́ндре, преподо́бне о́тче на́шъ.

Конда́къ 8.

Стра́нное видѣ́ніе и слы́шаніе не плѣня́ющимъ ра́зума въ послуша́ніе вѣ́ры и не покаря́ющимся и́стинѣ явля́ется бы́ти сіе́: я́ко овогда́ чрезъ со́нное видѣ́ніе, просте́ртіемъ руки́ твоея́, овогда́ чрезъ глаго́лъ привѣ́тливъ, овогда́ чрезъ разли́чная зна́менія, разсла́бленнымъ, боля́щимъ, неду́гующимъ соверше́нное подае́ши исцѣле́ніе. Мы́ же, вѣ́рою плѣня́еми, я́ко Бо́гу вся́ возмо́жна су́ть, и, вѣ́руяй въ Мя́, дѣла́, — я́коже рече́ Христо́съ, — я́же Азъ творю́, бо́льша си́хъ сотвори́тъ, — прославля́емъ въ тебѣ́ чудотворя́щаго Бо́га. Тебе́ же исповѣ́дающе досто́йнымъ всемогу́щества Его́ ору́діемъ бы́ти, велегла́сно вопіе́мъ: Аллилу́ія.

Икосъ 8.

Ве́сь бы́въ пре́данъ Бо́гу: ра́зумомъ — я́ко помышля́ти о Не́мъ, во́лею — я́ко твори́ти уго́дная Ему́, па́мятію — приводя́ себѣ́ необъе́млемое присносу́щіе Его́, вся́ назира́ющее и вся́ вѣ́дущее, предста́вилъ еси́ и тѣ́ло твое́, изможди́въ и очи́стивъ е́ бдѣ́ніемъ, поще́ніемъ и чу́днымъ воздержа́ніемъ, да сподо́бишися бы́ти селе́ніе Бо́гу Вы́шнему, да пребу́деши во Христѣ́, и То́й въ тебѣ́. Сего́ ра́ди во вре́мя свята́го поста́ прите́калъ еси́ въ Демья́нскую оби́тель, и въ соверше́ніе всѣ́хъ твои́хъ добродѣ́телей, наслажда́лся еси́ трапе́зы Госпо́дни, вкуша́я со благоговѣ́ніемъ и весе́ліемъ Тѣ́ло и Кро́вь Іису́са Христа́. Мы́ же, взира́юще на тя́, любе́зно вопіе́мъ ти́:

Ра́дуйся, и́стинный учениче́ Христо́въ, Его́же жела́ніемъ возжелѣ́лъ еси́ испо́лнити во́лю; ра́дуйся, ше́ствовавый отъ вѣ́ры въ вѣ́ру, отъ сла́вы въ сла́ву.

Ра́дуйся, приснотеку́щаго живода́тельнаго исто́чника сла́достей наслади́выйся; ра́дуйся, вкуше́ніемъ бра́шна неги́блющаго, вѣ́чнаго, предвкуси́вый небе́сная блаже́нства.

Ра́дуйся, удосто́ивыйся непостижи́маго та́инства, на не́же прини́кнути а́нгели жела́ютъ, о́бщникъ бы́ти; ра́дуйся, чрезъ соедине́ніе сіе́ призва́нный со Христо́мъ въ Ца́рствѣ сла́вы жи́ти.

Ра́дуйся, человѣ́че, испо́лненный богомы́слія и презрѣ́вый вся́ земна́я; ра́дуйся, во отвраще́ніе е́же не ви́дѣти суеты́, главу́ и лице́ схи́мою покры́вый.

Ра́дуйся, о вре́мени кончи́ны твоея́, е́же отъ человѣ́къ никто́же вѣ́сть, предвозвѣсти́вый; ра́дуйся, по нѣ́коемъ неду́зѣ ма́ломъ, крестообра́зно ру́цѣ къ пе́рсемъ сложи́вый.

Ра́дуйся, ду́хъ тво́й съ весе́ліемъ въ ру́цѣ Госпо́дни преда́вый; ра́дуйся, житіе́ земно́е боже́ственнымъ гла́сомъ, — благослове́нъ Бо́гъ, си́це благоволи́вый, сла́ва Тебѣ́, — запечатлѣ́вый.

Ра́дуйся, преблаже́нне Ника́ндре, преподо́бне о́тче на́шъ.

Конда́къ 9.

Вся́кому естеству́ человѣ́ческому и а́нгельскому досто́итъ диви́тися вели́кимъ отъ страны́ твоея́ по́двигомъ и чу́дному свы́ше тебѣ́ дарова́нію: толи́ко бо порабо́тилъ еси́ пло́ть твою́ ду́хови, я́ко на земли́ невеще́ственное, равноа́нгельное житіе́ показа́лъ еси́, и живя́ ду́хомъ, ду́хомъ и ходи́лъ еси́, и во пло́ти, а́ки безпло́тенъ яви́лся еси́. Сего́ ра́ди мно́гихъ чуде́съ творе́нія отъ Го́спода пріе́мъ, чи́стою и богопрія́тною душе́ю, благода́тію Того́, ко избра́ннымъ причте́нъ еси́ небе́снымъ си́ламъ въ несконча́емомъ Ца́рствіи, идѣ́же пое́ши Всеси́льному Бо́гу: Аллилу́ія.

Икосъ 9.

Витíевъ многовѣща́нныхъ язы́къ недоумѣ́етъ тя́, досто́йный вся́кія сла́вы, сла́вне преподо́бне о́тче Ника́ндре, по достоя́нію восхвали́ти и благолѣ́пно просла́вити па́че есте́ственная дѣла́ твоя́, я́же твори́лъ еси́ на земли́ во пло́ти су́щу ти́. Но и по преставле́ніи твое́мъ въ вѣ́чное Ца́рство сла́вы, идѣ́же ны́нѣ по трудѣ́хъ и по́двизѣхъ сла́достно почива́еши, мно́гая и пресла́вная чудеса́ твори́ти на́мъ не престае́ши: честна́я бо ра́ка, идѣ́же почива́ютъ святы́я твоя́ мо́щи, е́сть подо́бна Силоа́му, отню́дуже хромы́е, слѣпы́е, неду́жные и разсла́бленные здра́віе улуча́ютъ. Мы́ же, имѣ́я таково́е безцѣ́нное сокро́вище, благода́рствіемъ убѣжда́еми, воспѣва́емъ та́ко:

Ра́дуйся, земны́й а́нгеле и небе́сный человѣ́че; ра́дуйся, во пло́ти живы́й духо́вно, въ мíрѣ премíрно.

Ра́дуйся, честно́е носи́ло и похвале́ніе Святы́я Тро́ицы; ра́дуйся, трича́стное души́ твоея́ посвяти́вый Еди́ному Го́споду.

Ра́дуйся, крило́ма ра́зума возлетѣ́вый къ Трисо́лнечному Свѣ́ту; ра́дуйся, во́лею твое́ю потща́выйся святи́ти себе́, я́коже свя́тъ Госпо́дь Бо́гъ на́шъ.

Ра́дуйся, имѣ́яй попече́ніе не себѣ́ то́чію, но и всѣ́мъ блаже́нства дости́гнути; ра́дуйся, испо́лненный ми́ра и любви́ Бо́жія, ко всѣ́мъ миролюби́въ и братолюби́въ бы́лъ еси́.

Ра́дуйся, осѣня́емый Ду́хомъ благода́тей, и притека́ющихъ къ тебѣ́ во спасе́ніе умудря́яй; ра́дуйся, въ раска́яніе прише́дшихъ милосе́рдіемъ Бо́жіимъ утѣша́яй.

Ра́дуйся, предъ лице́мъ Бо́жіимъ, я́ко ра́бъ предъ Го́сподемъ, ходи́вый; ра́дуйся, подви́жниче, та́ко те́кшій, я́ко дости́глъ еси́ вѣнца́ твоего́, его́же и на́съ улучи́ти сподо́би.

Ра́дуйся, преблаже́нне Ника́ндре, преподо́бне о́тче на́шъ.

Конда́къ 10.

Спасе́ніе хотя́ улучи́ти душѣ́ твое́й, преподо́бне, отъ ю́ности твоея́, да́же до кончи́ны, ше́ствовалъ еси́ путе́мъ у́зкимъ и приско́рбнымъ, взе́мъ кре́стъ на ра́мо, вѣ́дящи, я́ко широ́кій и простра́нный пу́ть е́сть вводя́й въ па́губу. Тѣ́мже а́ще и те́рніе, и непроходи́мая мѣста́, и зла́я приключе́нія запина́ху тебѣ́, оба́че, предше́ствующу тебѣ́ вѣ́рному Вождю́ и Побо́рнику Іису́су, дости́глъ еси́ во дворы́ небе́сныя, идѣ́же ра́достей неизглаго́ланныхъ, я́же о́ко не ви́дѣ, и у́хо не слы́ша, и на се́рдце человѣ́ку не взыдо́ша, наслажда́яся, вопіе́ши Бо́гу: Аллилу́ія.

Икосъ 10.

Стѣна́ необори́мая еси́ всѣ́мъ земноро́днымъ, ко ско́рому твоему́ заступле́нію и предста́тельству притека́ющимъ, преблаже́нне о́тче Ника́ндре! Тѣ́мже и на́мъ, къ святы́мъ моща́мъ твои́мъ, неви́димыми а́нгелами стерего́мымъ, съ вѣ́рою приходя́щимъ, и ми́лостивыя коему́ждо по потре́бѣ по́мощи прося́щимъ, бу́ди стѣна́ крѣ́пкая и опло́тъ неруши́мый, отъ вся́кихъ на́съ бѣ́дъ застѣня́я и огражда́я. За е́же мы́ вопіе́мъ тебѣ́ такова́я:

Ра́дуйся, бы́стрый предста́телю, пріе́млющій проше́нія на́ша и на же́ртвенникъ благоутро́бія Бо́жія вознося́щій; ра́дуйся, коего́ждо проше́нія въ и́хъ по́льзу исполня́ющій.

Ра́дуйся, ско́рое услы́шаніе ни́щихъ; ра́дуйся, сердобо́льный судія́ вдовиэцъ и отеэцъ си́рыхъ.

Ра́дуйся, озлобля́емыхъ непови́нно ре́вностный защи́тителю; ра́дуйся, боля́щихъ душе́ю и тѣ́ломъ безме́здный исцѣли́телю.

Ра́дуйся, пи́ще и отра́до а́лчущихъ и жа́ждущихъ; ра́дуйся, согрѣ́яніе во мра́зѣхъ су́щихъ.

Ра́дуйся, обурева́емыхъ немяте́жное приста́нище; ра́дуйся, до́брый ко́рмчій, житія́ сего́ кора́бль управля́ющій.

Ра́дуйся, оскудѣ́нія оби́тели твоея́ бога́тнѣ испо́лнивый; ра́дуйся, хра́мы святы́я и зда́нія, снѣде́нныя огне́мъ, согрѣ́яніемъ серде́цъ благоговѣ́ющихъ благолѣ́пнѣ обнови́вый.

Ра́дуйся, преблаже́нне Ника́ндре, преподо́бне о́тче на́шъ.

Конда́къ 11.

Пѣ́нію вся́кому земноро́дныхъ досто́итъ умо́лкнути въ прославле́ніи превыша́ющихъ си́лы человѣ́ческія трудо́въ твои́хъ, и́миже до́брѣ потруди́лся еси́ въ пусты́ни, воздѣ́лывая ни́ву се́рдца твоего́ къ духо́вному плодоноше́нію. Кто́ бо отъ человѣ́къ возвели́читъ суро́вое житіе́ твое́? Кто́ просла́витъ му́жественныя по́двиги твоя́: безмо́лвіе соверше́нное, смире́ніе, незло́біе, нищету́ духо́вную, по́стъ многодне́вный, моли́тву непреста́нную, чистоту́ по вну́треннему и внѣ́шнему человѣ́ку? За ня́же сподо́бился еси́ со всѣ́ми безъ поро́ка послѣ́дующими Агнцу, въ преподо́біи и пра́вдѣ пожи́вшими, пѣ́ти: Аллилу́ія.

Икосъ 11.

Свѣтоза́рное свѣти́ло яви́лся еси́ не то́чію во страна́хъ Нова́града и Пско́ва, но и всю́ богоспаса́емую Россíю освѣща́еши златови́дными луча́ми твоего́ пусты́ннаго и богоуго́днаго житія́, преподо́бне, и оби́льными вода́ми, отъ цѣльбоно́сныхъ моще́й твои́хъ, напая́еши всѣ́хъ вѣ́рныхъ, вопію́щихъ къ тебѣ́ такова́я:

Ра́дуйся, исповѣ́давый Христа́ Іису́са сло́вомъ и дѣ́ломъ предъ человѣ́ки; ра́дуйся, я́ко въ воздая́ніе за сія́, исповѣ́данъ еси́ отъ Него́ предъ а́нгелы Бо́жіими во вѣ́ки.

Ра́дуйся, благíй дѣ́лателю виногра́да Христо́ва, поне́сшій тяготу́ дне́ и ва́ръ; ра́дуйся, плоды́ трудо́въ твои́хъ, я́ко перворо́дное, прине́сшій Го́споду въ да́ръ.

Ра́дуйся, мѵ́ромъ сле́зъ твои́хъ въ вѣ́рѣ пома́завый но́зѣ Іису́са; ра́дуйся, я́ко, идѣ́же гла́съ Ева́нгельскій проница́етъ, возвѣща́ется и́мя твое́.

Ра́дуйся, тѣ́ло твое́ угото́вавый въ жили́ще Ду́ху Свято́му; ра́дуйся, и по сме́рти, дѣ́йствовати Ему́же въ не́мъ лю́демъ на по́льзу, удосто́ивыйся.

Ра́дуйся, я́ко моще́й твои́хъ де́монскія си́лы трепе́щутъ; ра́дуйся, я́ко мо́щи твои́ коему́ждо въ приключи́вшихся печа́лехъ увеселе́ніе источа́ютъ.

Ра́дуйся, восте́кшій на небеса́ душе́ю, я́ко Илія́ Елиссе́еви же оста́вивый ми́лоть, ты́ же на́мъ мо́щи твоя́; ра́дуйся, я́ко си́лою и́хъ, я́коже то́й ми́лотію раздѣля́ше во́ды, мы́, лобыза́юще я́, раздѣля́емъ во́ды скорбе́й и ше́ствуемъ по су́шѣ исполне́нія жела́ній во благи́хъ.

Ра́дуйся, преблаже́нне Ника́ндре, преподо́бне о́тче на́шъ.

Конда́къ 12.

Благода́ть, да́нную преподо́бному Се́ргію, проповѣ́даше иногда́ вели́кій кня́зь Дими́трій съ во́и свои́ми, егда́ то́й моли́твою его́ и по́мощію дву́хъ мона́ховъ, да́нныхъ ему́ отъ него́, нечести́выхъ ага́рянъ побѣди́лъ е́сть. Ра́вно и мы́ благода́ть твою́ проповѣ́дуемъ, егда́, облежа́щу Пско́въ злочести́вому Бато́рію съ по́лчищи свои́ми, прове́лъ еси́ моли́твою твое́ю жи́телей страны́ сея́ безвре́дныхъ посреди́ огня́ и меча́, ше́дшихъ со освяще́ннымъ собо́ромъ на погребе́ніе твоего́ тѣ́ла. Отуну́дуже почерпа́юще наде́жду, избавля́тися и вся́кой странѣ́, чту́щей тя́, отъ наше́ствія иноплеме́нныхъ твои́мъ заступле́ніемъ, вопіе́мъ Бо́гу: Аллилу́ія.

Икосъ 12.

Пою́ще благоговѣ́йно пусты́нническія по́двиги твоя́, уго́дниче Бо́жій Ника́ндре, и́миже дости́глъ еси́ безсме́ртныя сла́вы на небесѣ́хъ, и всечестно́е твое́ успе́ніе въ сме́рти, прославля́емъ се́рдцемъ и устна́ми Бо́га вся́каго утѣше́нія и щедро́тъ, дарова́вшаго на́мъ тебе́, такова́го му́жественнаго подви́жника на неви́димыхъ враго́въ въ послѣ́дованіе, и такова́го ми́лостиваго отца́, и́же и по преставле́ніи свое́мъ на́съ не оставля́еши, но оби́льными чуде́съ вода́ми всегда́ напая́еши, очища́еши и прохлажда́еши. Тѣ́мже, надгро́бную соверша́юще пѣ́снь, ублажа́емъ достопа́мятное житіе́ твое́ любе́знымъ воспомина́ніемъ и усе́рднымъ цѣлова́ніемъ:

Ра́дуйся, человѣ́че Бо́жій, девятью́ блаже́нствами Ева́нгельскими укра́шенный; ра́дуйся, во свѣтѣ́ніе чуде́сное Це́ркви Правосла́вной на высотѣ́ поста́вленный.

Ра́дуйся, уподо́бивыйся Ону́фрію и Се́ргію вели́кимъ, подража́я житіе́мъ въ пусты́нѣ; ра́дуйся, Алекса́ндру Сви́рскому, я́вльшемуся ти́ сугу́бо на укрѣпле́ніе проти́ву нападе́ній бѣсо́вскихъ, послѣ́довавый въ святы́ни.

Ра́дуйся, Моисе́ю богови́дцу поревнова́вый въ презрѣ́ніи вре́менныхъ сла́достей; ра́дуйся, поноше́ніе Христо́во вмѣни́вый бо́льшее бога́тство, па́че всѣ́хъ сокро́вищь, взира́я на мздовоздая́ніе небе́сныхъ ра́достей.

Ра́дуйся, ми́ръ имѣ́вый и святы́ню со всѣ́ми, и́хже ра́ди зри́ши Бо́га; ра́дуйся, по степе́немъ добродѣ́телей приступи́вый ко гра́ду Бо́га Жива́го, къ Іерусали́му небе́сному.

Ра́дуйся, отту́ду хода́тайствомъ твои́мъ ниспосыла́ющій вся́ на́мъ блага́я, вре́менная и вѣ́чная; ра́дуйся, побѣди́телю ви́димыхъ и неви́димыхъ враго́въ, сотворе́нный столпо́мъ въ Це́ркви, на не́мже напи́сано и́мя Бо́жіе.

Ра́дуйся, уме́рый мíрови жи́въ же Бо́гови, ме́ртвымъ душе́ю да́рующій жи́ти; ра́дуйся, живы́й во вѣ́ки во Ца́рствіи небе́сномъ со Христо́мъ, съ Ни́мже и на́мъ моли́ бы́ти.

Ра́дуйся, преблаже́нне Ника́ндре, преподо́бне о́тче на́шъ.

Конда́къ 13.

О, преблаже́нне, преподо́бне, вели́кій чудотво́рче Ника́ндре, ми́лостивѣйшій во дне́хъ на́шихъ покрови́телю и о́тче! Ны́нѣшнее пріими́ отъ се́рдца, подоба́ющее тебѣ́, приноси́мое моле́ніе, и твои́мъ непосты́днымъ хода́тайствомъ у небе́снаго Царя́ сохрани́ и поми́луй Благочести́вѣйшаго Импера́тора на́шего [и́мярекъ] и вся́ лю́ди, ски́петру Его́ подчине́нныя, [или́: испроси́: стра́ждущую страну́ Россíйскую отъ лю́тыхъ безбо́жникъ и вла́сти и́хъ Госпо́дь да свободи́тъ, и да возста́витъ престо́лъ правосла́вныхъ царе́й; вѣ́рныхъ рабо́въ Его́, въ ско́рби и печа́ли де́нь и но́щь вопію́щихъ къ Нему́, многоболѣ́зный во́пль да услы́шитъ, и да изведе́тъ отъ поги́бели живо́тъ на́шъ,[1] отъ вра́гъ ви́димыхъ и неви́димыхъ, отъ вся́кихъ бѣ́дъ, напа́стей и скорбе́й. И исхода́тайствуй всѣ́мъ, усе́рдно призыва́ющимъ тя́, про́чее вре́мя живота́ въ ми́рѣ и и́стинномъ покая́ніи сконча́вше, въ небе́сномъ Ца́рствіи съ тобо́ю пѣ́ти во вѣ́ки: Аллилу́ія.

[Се́й конда́къ глаго́лется три́жды. Та́же и́косъ 1-й: Ангельскими девяточи́сленными си́лами окружа́емый сла́вы Госпо́дь... И конда́къ 1-й: Возбра́нный отъ Нача́льника и Соверши́теля вѣ́ры, Го́спода Іису́са...]

Моли́тва пе́рвая преподо́бному отцу́ на́шему Ника́ндру, Пско́вскому но́вому чудотво́рцу.

О, преподо́бне и преблаже́нне о́тче на́шъ Ника́ндре, граждани́не го́рняго Іерусали́ма, дру́же и сподви́жниче избра́нныхъ во́евъ небе́сныхъ, прославля́яй вы́ну Тріѵпоста́снаго Бо́га! Воззри́ на на́съ ми́лостивно, предстоя́щихъ ны́нѣ ра́цѣ честны́хъ моще́й твои́хъ, и всѣ́ми на́шими чу́вствы пригвожде́нныхъ ко сласте́мъ вѣ́ка сего́, обрати́ ко взыска́нію блаже́нствъ го́рнихъ. Ты́ вселя́ешися во оби́телехъ небе́сныхъ съ примíрными ду́хами Це́ркви торжеству́ющія, мы́ во́инствуемъ еще́, во многотру́дномъ вѣ́цѣ се́мъ, съ неви́димыми врага́ми. Отстои́мъ отъ тебе́ не толи́ко мѣ́стомъ, ели́ко грѣха́ми и беззако́ніями, и́миже прогнѣвля́емъ по вся́къ ча́съ Го́спода и сами́хъ себе́ приво́димъ на па́губу, но къ тебѣ́, я́ко на́мъ соесте́ственному, прибѣга́емъ и взыва́емъ съ те́плыми слеза́ми: наста́ви и вразуми́ на́съ ходи́ти по стопа́мъ твои́мъ, бу́ди на пути́ се́мъ избра́ннымъ вожде́мъ на́шимъ, я́коже дре́вле Моисе́й лю́демъ Изра́ильскимъ. Неотсту́пно бо отъ тебе́, о́тче на́шъ, сострада́ніе къ скорбя́щимъ и человѣколю́біе тре́бующимъ отъ тебе́ по́мощи въ напа́стехъ и во благовре́меніи: живу́щу бо тебѣ́ на земли́, не о свое́мъ то́кмо спасе́ніи тща́ніе приложи́ся, но и о всѣ́хъ, къ тебѣ́ притека́ющихъ, моле́ніе приноси́лъ еси́ ко Всевы́шнему, да не пре́зритъ дѣ́ло ру́къ Свои́хъ, ниже́ погуби́тъ со беззако́ніями. Оте́ческая наказа́нія твоя́, е́же ходи́ти по стопа́мъ за́повѣдей Госпо́днихъ, прозябо́ша въ сердца́хъ сыно́въ твои́хъ, я́ко сѣ́мя до́брое, съ плодоноше́ніемъ. Неду́жныя, разсла́бленныя, боля́щія, скорбя́щія, озло́бленныя проповѣ́даютъ со славосло́віемъ ско́рую твою́ по́мощь, исцѣле́ніе и заступле́ніе: вся́ же твоя́ свята́я жи́знь бы́сть зерца́ломъ вся́кихъ добродѣ́телей. Аще толи́къ бы́лъ еси́, учениче́ Христо́въ, на земли́ — коли́къ ны́нѣ еси́ на небеси́! Ты́ вы́ну предстои́ши престо́лу непристу́пнаго Бо́га, и въ Не́мъ, я́ко въ зерца́лѣ, зри́ши вся́ на́ша ну́жды и проше́нія. Ты́ свесели́шися со а́нгелы Бо́жіими о еди́номъ грѣ́шницѣ ка́ющемся, ра́достію ве́ліею: и милосе́рдіе Бо́жіе, и любы́ Его́ къ ро́ду человѣ́ческому неоску́дны, и твое́ дерзнове́ніе къ Нему́ мно́го. Испроси́ у Всеми́лостиваго Пода́теля всѣ́хъ бла́гъ, ми́ръ и святы́ню Це́ркви Его́, подъ зна́меніемъ Креста́ во́инствующей, побѣду́ и одолѣ́ніе на неви́димыхъ враго́въ ея́ и единомы́сліе въ вѣ́рѣ. Заблу́ждшія же отъ Правосла́вія къ позна́нію и́стины призови́, невѣ́рныя просвѣти́ свѣ́томъ Ева́нгелія, грѣ́шныя къ покая́нію приведи́ и обрати́, дѣ́вствующимъ чистоту́ и цѣлому́дріе да́руй, бра́чнымъ — святы́ню, вдови́цамъ и си́рымъ бу́ди препита́ніе, ни́щимъ — покро́въ, стра́нствующимъ — возвраще́ніе, пла́вающимъ — приста́нище, ка́ющимся проще́ніе испроси́, пла́чущимъ — утѣше́ніе, тре́бующимъ — по́мощь, напа́дствуемымъ — заступле́ніе, болны́мъ — ско́рое исцѣле́ніе, и вся́кому проше́нію во благи́хъ исполне́ніе. Не отри́ни на́съ съ вѣ́рою и любо́вію тебе́ призыва́ющихъ! Аще бо и недосто́йни есмы́ толи́каго отца́ и хода́тая, оскверне́ни душе́ю и тѣлесы́ су́ще, но ты́, бы́въ подража́тель человѣколю́бія Бо́жія, содѣ́лай на́съ, твои́ми моли́твами, досто́йны чрезъ обраще́ніе съ пути́ зла́го на пути́ ми́рны добродѣ́телей. Но́вградъ и Пско́въ, и вся́ Россíя, просвѣще́нная твои́мъ богоуго́днымъ житіе́мъ и чудесы́, проповѣ́дуютъ тя́ бы́ти те́плаго засту́пника. Яви́ и на́мъ, недосто́йнымъ, ми́лости твоя́! Вѣ́руемъ, я́ко ду́хомъ на́мъ сопрису́тствуеши, па́че же и тѣ́ломъ съ на́ми пребыва́еши — се́, предлежа́тъ оча́мъ на́шимъ нетлѣ́нные и цѣльбоно́сные твои́ мо́щи, и́хже новопросла́ви Госпо́дь явле́ніемъ мно́гихъ чуде́съ. Тѣ́мъ, предстоя́ и́мъ, я́ко жи́ву тебѣ́ су́щу, припа́даемъ и смире́нно мо́лимъ: пріими́ моле́нія на́ша и вознеси́ я́ на же́ртвенникъ благоутро́бія Бо́жія, я́ко да низпо́слетъ на́мъ всеси́льную благода́ть Свою́, укрѣпля́ющую на́съ во благо́мъ житіи́, и благовре́менну и неко́сненну въ ну́ждахъ на́шихъ по́мощь: ума́ — благопостоя́ніе, тѣлесе́мъ — здра́віе, житію́ — благопотре́бная, ми́ръ во дне́хъ на́шихъ, возду́ха — благорастворе́ніе, о́гнь любви́ и вся́каго благоче́стія, въ моли́твѣ — чистоту́ серде́чную, въ злоключе́ніи — терпѣ́ніе и упова́ніе, въ наде́ждѣ — весе́ліе, и вре́мя на покая́ніе. Яко да и настоя́щихъ зо́лъ избѣ́гше, удосто́имся пресели́тися во блаже́нныя оби́тели небе́сныя, идѣ́же ты́ ны́нѣ вселя́ешися со всѣ́ми Бо́гу угоди́вшими, и прославля́еши Тріѵпоста́снаго Бо́га, Отца́ и Сы́на и Свята́го Ду́ха, ны́нѣ и при́сно и во вѣ́ки вѣко́въ. Ами́нь.

Моли́тва ина́я.

О, преподо́бне и достоблаже́нне о́тче на́шъ Ника́ндре, по́стниче терпѣливоду́шный, безмо́лвія рачи́телю предо́блій, учи́телю духо́вный спасти́ся хотя́щимъ, наказа́телю прети́хій лѣни́вымъ, разрѣши́телю тлетво́рныхъ страсте́й незло́бивый, му́жу жела́ній, прозорли́вства проро́ческаго исполне́ніе, предвозгла́сная цѣвни́це бу́дущихъ, адама́нте вѣ́ры во Христа́ несѣко́мый, незы́блемый сто́лпе терпѣ́нія, соверши́телю за́повѣдей Творца́ твоего́ благопослушли́вый, плотоно́сный а́нгеле и Ду́ха Свята́го вмѣсти́лище благово́нное, жи́телю пусты́нный и бѣсо́въ прогони́телю, испо́лнителю всѣ́хъ добродѣ́телей смиренному́дрый, небе́сный человѣ́че и сожи́телю го́рнимъ чинонача́ліямъ, земны́й а́нгеле, кро́тостію ду́ха кро́ткихъ зе́млю наслѣ́довавый, дру́же Христо́въ и уго́дниче Пресвяты́я Богоро́дицы, я́же и ра́ку цѣльбоно́сныхъ моще́й твои́хъ во хра́мѣ Свое́мъ просла́вити благоизво́ли, я́ко Ма́ти су́щи Творца́ и Зижди́теля всея́ тва́ри и Храни́тельница всѣ́хъ тружда́ющихся и обремене́нныхъ. Та́я бо незави́стно и отъ ра́ки твоея́, преподо́бне, чуде́сному дождю́ на вѣ́рныхъ излива́тися повелѣ́. Къ не́йже припа́дающе, любе́зно мо́лимъ тя́, досточу́дне: не преста́й моли́ти Пресвяту́ю и Живонача́льную Тро́ицу, низпосла́ти Благовѣ́рному Импера́тору на́шему здра́віе, тишину́ и долгоде́нствіе, на враги́ же побѣ́ду и одолѣ́ніе, и отъ навѣ́тъ вра́жіихъ во́инству Его́ сохрани́тися въ ми́рѣ; [или́: держа́вѣ нашей тишину́ и долгоде́нствіе, на враги́ же побѣ́ду и одолѣ́ніе, и отъ навѣ́тъ вра́жіихъ во́инству сохрани́тися въ ми́рѣ[2] це́рквамъ — согла́сіе, и всѣ́мъ лю́демъ тишину́ и изоби́ліе благи́хъ дарова́ти. И угаси́, блаже́нне, моли́твами твои́ми, паря́щія на ны́ разжже́нныя бѣсо́вскія стрѣ́лы, да не прико́снется на́мъ зло́ба грѣхо́вная, и всѣ́мъ вся́ ми́лостивнѣ да́руя, при́зри и на мя́, смире́ннаго своего́ раба́: свя́занъ бо е́смь лю́тѣ плѣни́цами прегрѣше́ній, и влеко́мъ, увы́ мнѣ́! въ пучи́ну стра́стнаго мо́ря неодержа́нно. Сего́ ра́ди прилѣ́жно молю́ святы́ню твою́, пребога́те, и припа́даю любе́зно къ ра́цѣ моще́й твои́хъ со слеза́ми: предста́ни мнѣ́ на пути́ бѣ́дственнаго житія́ сего́, расто́ргни у́зы, отжени́ стра́сти, осла́би отъ грѣхо́вныхъ вери́гъ, изба́ви мя́ отъ належа́щія ско́рби и вся́каго зла́, разрѣши́ мя отъ болѣ́зненныхъ у́зъ и спасе́ніе да́руй, я́ко да спа́сшеся моли́твами твои́ми, воспою́ и просла́влю въ Тро́ицѣ сла́вимаго Еди́наго Бо́га, Отца́ и Сы́на и Свята́го Ду́ха, ны́нѣ и въ безконе́чныя вѣ́ки вѣко́въ. Ами́нь.

Тропа́рь, гла́съ 4:

Гла́съ Боже́ственный, и́же во Ева́нгеліи, услы́шавъ, преподо́бне о́тче Ника́ндре, — пріиди́те ко Мнѣ́, вси́ тружда́ющіися и обремене́нніи, и Азъ упоко́ю вы́, — и пріе́мъ кре́стъ, послѣ́довалъ еси́ Христу́, мíръ оста́вль, въ пусты́ню всели́лся еси́, поще́ніемъ же и бдѣ́ніемъ небе́сный да́ръ воспріи́мъ, ду́ши неду́жныхъ, приходя́щихъ къ тебѣ́ съ вѣ́рою, исцѣля́еши, тѣ́мже и со а́нгелы сра́дуется, преподо́бне, ду́хъ тво́й.

Инъ тропа́рь, гла́съ 6:

Свѣти́ло незаходи́маго свѣ́та странѣ́ на́шей яви́лся еси́, богоблаже́нне, до́блественнѣ претерпѣ́въ вра́жія озлобле́нія, біе́ніе и ра́ны я́ко оде́жда нетлѣ́нія вмѣни́шася тебѣ́, со звѣрьми́ бо бра́вся и отъ человѣ́къ злы́хъ прободе́нія пріи́мъ, о тѣ́хъ моли́лся еси́: не поста́ви и́мъ грѣха́ сего́, глаго́ля. Тѣ́мже Влады́цѣ Христу́ уподо́бился еси́, достохва́льне Ника́ндре, о́тче на́шъ, моли́ся о душа́хъ на́шихъ.

Конда́къ, гла́съ 1:

Яко лучу́ тя́ со́лнечную Христо́съ показа́, преподо́бне, сія́еши бо въ земли́ Россíйстѣй чуде́съ благода́тію и отгоня́еши тму́ страсте́й же и скорбе́й отъ приходя́щихъ къ тебѣ́ съ вѣ́рою. Тѣ́мже почита́емъ твою́ па́мять, Ника́ндре, о́тче на́шъ, и вопіе́мъ ти́: ра́дуйся, пустынножи́телей красото́ и странѣ́ на́шей похвало́ и утвержде́ніе.

Велича́ніе:

Ублажа́емъ тя́, преподо́бне о́тче Ника́ндре, и чте́мъ святу́ю па́мять твою́, наста́вниче мона́ховъ и собесѣ́дниче а́нгеловъ.

Примѣчанія:
[1] См.: «Акаѳисты русскимъ святымъ». Томъ 3-й: Н-Ѳ. — СПб.: Издательство «Титулъ», 1996.
[2] Тамъ же.

Источникъ: Слу́жба преподо́бному Ника́ндру, Пско́вскому чудотво́рцу, съ ака́ѳистомъ и житіе́мъ его́. — М.: Въ Сѵнода́льной Тѵпогра́фіи, 1805. — Л. 45 – 78, 85 об. – 93 об.

/ Къ оглавленію раздѣла /


Наверхъ / Къ титульной страницѣ

0