Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - четвергъ, 21 сентября 2017 г. Сейчасъ на порталѣ посѣтителей - 15.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ДОМАШНЯЯ МОЛИТВА

Преп. благов. кн. Олегъ Брянскій († ок. 1285 г.)

Преподобный благоверный князь Олег БрянскийСвятой благовѣрный князь Олегъ Романовичъ Брянскій (въ крещеніи Леонтій, въ иночествѣ Василій), сынъ благочестиваго князя Романа Михаиловича, внукъ святаго благовѣрнаго Михаила Всеволодовича, князя Черниговскаго, мученически скончавшагося въ Ордѣ въ 1246 году. Св. Олегъ съ дѣтства отличался глубокимъ благочестіемъ и стремленіемъ къ ангельскому образу. Познавъ суетность земнаго счастія, онъ предоставилъ Черниговское и Брянское княжества своему брату и его сыну, а самъ рѣшилъ служить Богу въ иноческомъ чинѣ. Въ 1275 году онъ соорудилъ Петровскую обитель въ Брянскѣ гдѣ принялъ постригъ съ именемъ Василій. Въ этомъ монастырѣ святой князь совершалъ иноческій подвигъ и скончался около 1285 года. Послѣ смерти Господь прославилъ Своего угодника даромъ чудотвореній. Мощи его почивали въ основанномъ имъ монастырѣ, который изъ благоговѣнія къ святому князю-подвижнику патріархъ Никонъ возводилъ на степень ставропигіи. По иконописному подлиннику, князь Олегъ «подобіемъ надсѣдъ, брада долѣ Власіевы, въ схимѣ, ризы преподобническія». Память св. благ. кн. Олега Брянскаго — 20 сентября / 3 октября (вмѣстѣ со св. муч. благ. кн. Михаиломъ Черниговскимъ) и 11/24 августа (вмѣстѣ съ преп. Поликарпомъ Брянскимъ).

АКАѲИСТЫ

Ака́ѳистъ преподо́бному благовѣ́рному кня́зю Оле́гу Бря́нскому.

Конда́къ 1.

Избра́нному уго́днику, ди́вному предъ Бо́гомъ предста́телю, гра́да Бря́нска покрови́телю, кня́зю Оле́гу пресвѣ́тлому принесе́мъ похвалы́, я́ко при́сному ду́шъ на́шихъ засту́пнику и те́плому на́шему моли́твеннику. Ты́ же, о звѣздо́ пресвѣ́тлая, осіява́й на́съ неоску́дно, да изба́вльшеся отъ бѣ́дъ и скорбе́й, со умиле́ніемъ вопіе́мъ ти́:

Ра́дуйся, уго́дниче Бо́жій кня́же Оле́же, гра́да Бря́нска чудотво́рче.

Икосъ 1.

Ангела о́бразомъ, а́ще и человѣ́ка естество́мъ, яви́ тя́ небесе́ и земли́ Созда́тель, отъ благочести́ваго бо ко́рене Михаи́ла страстоте́рпца, вели́каго кня́зя земли́ Черни́говскія, я́ко о́трасль пречестну́ю произрасти́вшаго, хода́таемъ гра́да Бря́нска тя́ содѣ́ла. Тѣ́мже житіе́ и по́двиги твоя́ чту́ще, Оле́же свя́те, согла́сно вопіе́мъ ти́:

Ра́дуйся, благочести́выхъ роди́телей пло́де богодарова́нный. Ра́дуйся, розго́ благовѣ́рнаго Михаи́ла, стяжа́вшаго му́ченическій вѣне́цъ. Ра́дуйся, достохва́льне подража́телю чернори́зцевъ чинонача́льницы, дще́ре Михаи́ловы, преподо́бныя Евфроси́ніи Су́ждальскія. Ра́дуйся, отъ младе́нческихъ пеле́нъ въ жили́ще Ду́ху Свято́му предугото́ванный. Ра́дуйся, я́ко еси́ отъ со́нма святы́хъ князе́й Россíйскихъ Бо́гомъ избра́нный. Ра́дуйся, несокруши́му вѣ́ру яви́вый въ себѣ́. Ра́дуйся, любо́вію ко Христу́ еще́ въ ю́ности пламенѣ́вый. Ра́дуйся, я́ко о́бразъ незло́бія и смире́нія да́же до конца́ показа́вый. Ра́дуйся, подви́жническаго вѣнца́ отъ мла́дости возжелѣ́вый. Ра́дуйся, добродѣ́телей сокро́вище пребога́тое. Ра́дуйся, подвиго́въ и́ноческихъ исполне́ніе превысо́кое.

Ра́дуйся, уго́дниче Бо́жій кня́же Оле́же, гра́да Бря́нска чудотво́рче.

Конда́къ 2.

Ви́дя у́мныма очи́ма зра́ки пре́дковъ твои́хъ — Михаи́ла во Ордѣ́ отъ Баты́я за Христа́ сме́рть прія́вшаго и Евфроси́ніи преподо́бныя, па́че всѣ́хъ по́стницъ Россíйскихъ просія́вшія, потща́лся еси́, благовѣ́рне кня́же Оле́же, подража́ти си́мъ, а́ще и мла́дъ бы́лъ еси́. Мы́ же, прославля́юще Бо́га, о тебѣ́ ди́вно произво́ливша, воспѣва́емъ: Аллилу́ія.

Икосъ 2.

Ра́зумъ богопросвѣще́нный отъ ю́ности стяжава́я, къ небе́снымъ чи́стыя по́мыслы устреми́лъ еси́, се́рдце и слу́хъ склони́лъ ко гла́су оби́димыхъ и безпомо́щныхъ, милосе́рдіе и любо́вь къ бѣ́днымъ и си́рымъ яви́въ. Сего́ ра́ди пріими́ отъ на́съ сицева́я:

Ра́дуйся, ми́лости издѣ́тска преиспо́лненный. Ра́дуйся, печа́льныхъ благíй утѣ́шителю. Ра́дуйся, вдо́въ и сиро́тъ пита́телю. Ра́дуйся, въ бѣда́хъ су́щимъ предста́телю. Ра́дуйся, ско́рбныхъ серде́цъ цѣли́телю. Ра́дуйся, смире́ннаго о́трочества Христо́ва подража́телю. Ра́дуйся, роди́телей и зна́емыхъ свя́то почита́вый. Ра́дуйся, све́рстникомъ твои́мъ примѣ́ръ благонра́вія подава́вый. Ра́дуйся, отъ грѣхо́въ и страсте́й свобо́ду улучи́вый. Ра́дуйся, многопло́дный кла́съ вѣ́ры въ души́ твое́й произрасти́вый. Ра́дуйся, благоговѣ́йное отроча́, сниска́вшее да́ры стра́ха Бо́жія и благоче́стія.

Ра́дуйся, уго́дниче Бо́жій кня́же Оле́же, гра́да Бря́нска чудотво́рче.

Конда́къ 3.

Си́лою благода́ти Ду́ха Свята́го укрѣпля́емь, блаже́нне кня́же Оле́же, вознамѣ́рился еси́, прія́въ кре́стъ, послѣ́довати Христу́, егда́ и́ноцы Пече́рстіи принесо́ша во гра́дъ Бря́нскъ о́бразъ Пресвяты́я Богоро́дицы, су́щу неду́гующу роди́телю твоему́, благовѣ́рному кня́зю Рома́ну. Сего́ ра́ди Госпо́дь, испыту́яй сердца́ и утро́бы, свы́ше благослови́ тя́, зову́ща Ему́: Аллилу́ія.

Икосъ 3.

Имѣ́я еди́но помышле́ніе въ се́рдцы твое́мъ, е́же послужи́ти Христу́, плотско́е мудрова́ніе отложи́лъ еси́, и я́ко во́инъ благоиску́сенъ, броню́ спасе́нія стяжа́, да ра́туеши на враги́ неви́димыя. Тѣ́мже ублажа́юще твое́ изволе́ніе, вопіе́мъ ти́ си́це:

Ра́дуйся, носи́телю благода́ти Ду́ха Всесвята́го. Ра́дуйся, о́бразе нищеты́ духо́вныя. Ра́дуйся, огради́выйся несокруши́мымъ щито́мъ вѣ́ры. Ра́дуйся, прія́вый непобѣди́мое ору́жіе — Животворя́щій Кре́стъ Христо́въ. Ра́дуйся, дре́вняго благоче́стія блюсти́телю. Ра́дуйся, оте́ческихъ подвиго́въ ревни́телю. Ра́дуйся, свѣ́томъ благоразу́мія осія́нный. Ра́дуйся, преподо́біемъ и кро́тостію увѣнча́нный. Ра́дуйся, я́ко еси́ благово́нное Бо́гу моли́твы кади́ло. Ра́дуйся, оте́чества на́шего ди́вное прозябе́ніе. Ра́дуйся, ро́да князе́й Россíйскихъ украше́ніе.

Ра́дуйся, уго́дниче Бо́жій кня́же Оле́же, гра́да Бря́нска чудотво́рче.

Конда́къ 4.

Бу́ря страсте́й и треволне́ній жите́йскихъ не возмо́же поколеба́ти тя́, преблаже́нне кня́же Оле́же, оба́че научи́ благоиску́сно иска́ти приста́нище спасе́нія тве́рдое. Тѣ́мже сугу́бо возсія́ въ души́ твое́й нетлѣ́нная красота́ безстра́стія, уго́дная Вседѣ́телю Бо́гу, Ему́же воспѣва́лъ еси́: Аллилу́ія.

Икосъ 4.

Слы́шавъ сестру́ твою́ единоутро́бну, княги́ню земли́ Волы́нскія Ольгу, глаго́лющу, я́ко уме́ршу му́жеви ея́, еди́нъ е́сть жре́бій на земли́ — прія́ти о́бразъ и́ноческій, са́мъ поревнова́лъ еси́ твоея́ сестры́ произволе́нію, и пе́рвѣе въ вертогра́дѣ роди́телей твои́хъ уедине́нно водвори́лся еси́, послѣди́ же, прія́въ и са́мъ и́ноческое постриже́ніе, отше́лъ еси́ на мѣ́сто, ти́ рече́нное, да та́мо ми́рно Го́сподеви порабо́таеши. Мы́ же, о́бразу му́жества духо́внаго дивя́щеся, восхваля́емъ тя́ си́це:

Ра́дуйся, презрѣ́вый сла́ву и вла́сть наслѣ́дственную. Ра́дуйся, сокруши́вый тщесла́віе и горды́ню. Ра́дуйся, земны́я по́чести ни во что́же вмѣня́яй. Ра́дуйся, Ца́рствія го́рняго искíй. Ра́дуйся, отрече́ніемъ высо́кая стяжа́вый. Ра́дуйся, труды́ ко трудо́мъ, посты́ ко посто́мъ прилага́вый. Ра́дуйся, я́ко моли́твами и бдѣ́ніемъ Ца́рство небе́сное улучи́лъ еси́. Ра́дуйся, я́ко и́го благо́е на ра́мо подъя́лъ еси́. Ра́дуйся, отъ мла́дости на вся́ по́двиги и́ноческія укрѣпи́выйся. Ра́дуйся, неви́нности сосу́де. Ра́дуйся, уедине́нія цвѣ́те.

Ра́дуйся, уго́дниче Бо́жій кня́же Оле́же, гра́да Бря́нска чудотво́рче.

Конда́къ 5.

Свѣтоно́сну лучу́ уподо́бился еси́, преподо́бне кня́же Оле́же, егда́ позна́въ, я́ко ве́лія бла́га мо́жеши принести́ оте́честву, и во о́бразѣ и́ночестѣмъ, на мѣ́стѣ пусты́ннѣ посели́лся еси́. Благопрія́тно бо бы́сть Творцу́ твое́ хотѣ́ніе, во е́же рабо́тати Ему́ въ преподо́біи и вы́ну пѣ́ти пѣ́снь: Аллилу́ія.

Икосъ 5.

Ви́дѣвше благолюби́віи лю́діе гра́да Бря́нска пра́ведное по Бо́зѣ житіе́ твое́, сла́вляху тя́ и попремно́гу че́ствоваху щедро́ты и по́двиги твоя́. Ты́ же смире́ніе и́стинное возлюби́въ и похвалы́ человѣ́ческія пренебре́гъ, горды́нею не уя́звленъ пребы́лъ еси́. Сего́ ра́ди съ любо́вію прино́симъ ти́ такова́я:

Ра́дуйся, возлюби́вый святы́ню До́ма Бо́жія. Ра́дуйся, въ тѣлеси́ твое́мъ живы́й хра́мъ Ду́ху Свято́му угото́вивый. Ра́дуйся, дре́внимъ пустынножи́телемъ до́брѣ подража́вый. Ра́дуйся, въ постѣ́ и моли́твахъ вы́ну пребыва́вый. Ра́дуйся, христоимени́тымъ лю́демъ благоче́стія учи́телю. Ра́дуйся, рабо́мъ Бо́жіимъ усе́рдный служи́телю. Ра́дуйся, я́ко непреста́ннымъ бдѣ́ніемъ безпло́тнымъ уподо́бился еси́. Ра́дуйся, я́ко ничто́же су́етно тебѣ́ прирази́ся. Ра́дуйся, воздержа́нія наста́вниче. Ра́дуйся, по́стниче достолюбе́зне. Ра́дуйся, сластолю́бцевъ посрамле́ніе.

Ра́дуйся, уго́дниче Бо́жій кня́же Оле́же, гра́да Бря́нска чудотво́рче.

Конда́къ 6.

Проповѣ́дникъ вѣ́ры правосла́вныя и ревни́тель благоче́стія сло́вомъ и житіе́мъ бы́лъ еси́, благовѣ́рне кня́же Оле́же: еди́нымъ бо жела́ніемъ горя́, да всѣ́хъ во гра́дѣ твое́мъ приведе́ши ко Христу́ и научи́ши вку́пѣ съ тобо́ю воспѣва́ти Ему́: Аллилу́ія.

Икосъ 6.

Возсія́лъ е́сть въ де́брехъ гра́дъ Бря́нскъ о́крестъ облежа́щихъ я́ко у́тренняя заря́, и я́ко звѣ́зды небе́сныя озари́ша добродѣ́тели твоя́ вся́ та́мо жи́вшія. О ни́хже и ны́нѣ никто́же умолчи́тъ прославля́ти тя́ си́ми похва́льными словесы́:

Ра́дуйся, я́ко сто́лпъ о́гненный во тмѣ́ грѣхо́внѣй заблу́ждшимъ возсія́вый. Ра́дуйся, пу́ть ше́ствующимъ по тебѣ́ отъ земли́ на не́бо показа́вый. Ра́дуйся, наста́вниче и́ноковъ пустыннолюби́выхъ. Ра́дуйся, па́стырю, пасы́й на па́житехъ живоно́сныхъ. Ра́дуйся, благода́ти чи́стая струе́. Ра́дуйся, страны́ Бря́нскія сла́во и утвержде́ніе. Ра́дуйся, ма́слино, еле́й ми́лостей Госпо́днихъ источа́ющая. Ра́дуйся, лозо́, упова́ніемъ обѣтова́ній непреходя́щихъ напая́ющая. Ра́дуйся, зерца́ло умиле́нія. Ра́дуйся, храни́лище отрече́нія. Ра́дуйся, я́ко то́ки богодухнове́нныхъ уче́ній излія́лъ еси́.

Ра́дуйся, уго́дниче Бо́жій кня́же Оле́же, гра́да Бря́нска чудотво́рче.

Конда́къ 7.

Хотя́й досто́йнѣ по́двигомъ до́брымъ подвиза́тися и вѣ́ру нераздѣ́льну со святы́ми соблюсти́, пе́рвѣе укрѣпи́лъ еси́ у́мъ чте́ніемъ боже́ственныхъ слове́съ и житíй оте́ческихъ, та́же навы́клъ еси́ подража́ти подвиго́мъ святы́хъ, послѣди́же вся́ вре́менная во уме́ты вмѣни́лъ и бога́тства мно́гая оста́вилъ еси́, ни́щъ и убо́гъ пребыва́я, да непреткнове́нно прино́сиши Бо́гу пѣ́снь: Аллилу́ія.

Икосъ 7.

Но́вая Ѳиваи́да яви́ся ти́, преподо́бне кня́же Оле́же, де́брь Бря́нская, въ не́йже оби́тели во и́мя Первоверхо́вныхъ Апо́столъ основа́ніе положи́. Та́мо бо хра́мъ ма́лъ и ке́лліи убо́ги созда́въ, ве́ліими труды́ и бдѣ́ніемъ непреста́ннымъ украси́ равноа́нгельное твое́ житіе́, пѣ́ніемъ же, поще́ніемъ и моли́твами о́бразъ бы́въ твои́мъ ученико́мъ. Сего́ ра́ди пріими́, о́тче преподо́бне, сицева́я:

Ра́дуйся, багряни́цу кня́жескую на власяни́цу и́ноческую во́льнѣ премѣни́вый. Ра́дуйся, посто́мъ, бдѣ́ніемъ и моли́твами Христу́ Бо́гу до́брѣ угоди́вый. Ра́дуйся, я́ко оби́тель и хра́мъ во и́мя святы́хъ Апо́столъ воздви́глъ еси́. Ра́дуйся, я́ко приста́нище благооти́шное пловце́мъ мо́ря жите́йскаго угото́валъ еси́. Ра́дуйся, скве́рны грѣхо́вныя избѣжа́вый. Ра́дуйся, сугу́бъ пло́дъ соверше́нства стяжа́вый. Ра́дуйся, неусы́пнаго бдѣ́нія учи́телю. Ра́дуйся, трезве́нія у́мнаго и безмо́лвія люби́телю. Ра́дуйся, ра́ди Го́спода вся́ кра́сная мíра презрѣ́вый. Ра́дуйся, пла́мень страсте́й попаля́яй. Ра́дуйся, росо́, ду́ши вѣ́рныя услажда́ющая.

Ра́дуйся, уго́дниче Бо́жій кня́же Оле́же, гра́да Бря́нска чудотво́рче.

Конда́къ 8.

Стра́нно и ди́вно бы́сть житіе́ твое́, преподо́бне, въ оби́тели, егда́ послѣ́дуя уго́днику Бо́жію Ѳеодо́сію, Ла́вры Пече́рскія нача́льнику, са́мъ бы́въ игу́менъ, вся́ послуша́нія я́ко ра́бъ исполня́ше, бдя́ неусы́пно, во власяни́цу и вре́тище одѣва́шеся, вма́лѣ на древя́ннѣ ло́жи поко́й имѣ́я, па́че же на вся́къ ча́съ неуста́нно вопія́ Бо́гу: Аллилу́ія.

Икосъ 8.

Ве́сь ра́вною ко всѣ́мъ горя́ любо́вію, достохва́льне кня́же Оле́же, наставля́ше бра́тію оби́тели твоея́, да вси́ еди́но бу́дутъ во благочи́ніи, несе́ніи обѣ́товъ и́ночества, служе́ніи церко́внѣмъ, чте́ніи и пѣ́ніи. Того́ ра́ди подвига́еши согла́сно зва́ти тебѣ́ си́це:

Ра́дуйся, те́плою моли́твою прибѣга́ющихъ къ тебѣ́ отъ зо́лъ огражда́яй. Ра́дуйся, бѣ́дствующимъ многомо́щнѣ помога́яй. Ра́дуйся, посѣти́телю въ не́мощехъ су́щихъ. Ра́дуйся, засту́пниче въ напа́сти впа́вшихъ. Ра́дуйся, я́ко и́ноковъ до́брѣ наставля́еши. Ра́дуйся, я́ко о всѣ́хъ ча́дѣхъ Це́ркве Го́спода умоля́еши. Ра́дуйся, путеводи́телю ди́вный. Ра́дуйся, вождю́ духо́вныхъ во́иновъ благоиску́сный. Ра́дуйся, благоче́стія сто́лпе. Ра́дуйся, ско́рбныхъ серде́цъ врачева́телю. Ра́дуйся, Россíйскаго и́ночества насади́телю.

Ра́дуйся, уго́дниче Бо́жій кня́же Оле́же, гра́да Бря́нска чудотво́рче.

Конда́къ 9.

Естеству́ а́нгельскому подража́я, вся́кія бѣ́ды, ско́рби и напа́стей избавля́лъ еси́, преподо́бне кня́же, приходи́вшихъ къ тебѣ́ съ вѣ́рою, вре́менная бла́га я́вѣ и та́йнѣ въ ну́ждахъ су́щимъ раздѣля́я, да ку́пно съ тобо́ю вси́ Всеще́дрому Бо́гу возглаша́ютъ: Аллилу́ія.

Икосъ 9.

Витíйство человѣ́ческое не довлѣ́етъ досто́йнѣ восхвали́ти тя́, пресла́вне кня́же Оле́же: мно́га бо моле́нія и поще́нія въ животѣ́ твое́мъ соверши́лъ еси́, неисче́тны сле́зы и воздыха́нія ко Го́споду прине́слъ еси́, ди́вныя по́двиги сотвори́лъ еси́. Оба́че мы́ отъ простоты́ се́рдца, любо́вію подвиза́еми, возглаша́емъ ти́ такова́я:

Ра́дуйся, славосло́віемъ немо́лчнымъ а́нгеломъ уподо́бивыйся. Ра́дуйся, неусыпа́ющимъ моли́твенникомъ сопричты́йся. Ра́дуйся, на враги́ ви́димыя и неви́димыя на́мъ спобо́рниче. Ра́дуйся, преподо́бныхъ и пра́ведныхъ сонаслѣ́дниче. Ра́дуйся, я́ко во оби́тели Отца́ Небе́снаго ликовству́еши. Ра́дуйся, луче́ Тріѵпоста́снаго Свѣ́та. Ра́дуйся, денни́це Це́ркве Россíйскія. Ра́дуйся, свя́тости кри́не. Ра́дуйся, спасе́нія гла́се. Ра́дуйся, го́рлице духо́вная, ве́сну гряду́щаго вѣ́ка показу́ющая.

Ра́дуйся, уго́дниче Бо́жій кня́же Оле́же, гра́да Бря́нска чудотво́рче.

Конда́къ 10.

Спасти́ хотя́ ду́шу свою́, примѣ́ръ благíй показа́лъ еси́, свя́те Оле́же, и́мже вся́ ны́ учи́ши неради́ти о пло́ти и суета́хъ мірски́хъ, нелѣ́ностно же иска́ти богоугожде́нія. Помози́ у́бо на́мъ подража́ти тебѣ́ въ се́мъ непреста́нно, да обы́кнувше украша́тися добродѣ́телми, воспои́мъ уми́льно Го́сподеви: Аллилу́ія.

Икосъ 10.

Стѣна́ тве́рда и заступле́ніе бы́лъ еси́, благовѣ́рне кня́же Оле́же, всѣ́мъ и́нокомъ оби́тели твоея́: о́вого бо оте́чески назида́ше, о́вого кро́тцѣ облича́ше, ины́я съ любо́вію увѣщава́я, о́ныя гро́зно осужда́я, наипа́че же предъ кончи́ною твое́ю вся́ ко спасе́нію потре́бная заповѣ́далъ еси́ и́мъ. Тѣ́мже и на́съ, убо́гихъ, упаси́ до́брѣ, и наде́ждею крѣ́пкою на́мъ бу́ди, да зове́мъ ти́ сла́дцѣ:

Ра́дуйся, огра́до собра́ннаго тобо́ю ста́да духо́вныхъ ове́цъ. Ра́дуйся, вождю́, пу́ть вѣ́рный указу́яй. Ра́дуйся, щи́те крѣ́пкій, при́сно ны́ защища́яй. Ра́дуйся, мечу́ Бо́жій, зла́я и душевре́дная посѣка́яй. Ра́дуйся, ко́рмчію хотя́щихъ спасти́ся. Ра́дуйся, необурева́емое приста́нище жите́йскаго пла́ванія. Ра́дуйся, го́рняго мíра украше́ніе. Ра́дуйся, до́льняго мíра огражде́ніе. Ра́дуйся, благодѣя́нія мно́га источа́яй. Ра́дуйся, ми́лостію твое́ю вся́ покрыва́яй. Ра́дуйся, со святы́ми на небеси́ вѣ́чно ца́рствуяй.

Ра́дуйся, уго́дниче Бо́жій кня́же Оле́же, гра́да Бря́нска чудотво́рче.

Конда́къ 11.

Пѣ́ніе немо́лчное прине́слъ еси́ Пресвятѣ́й Тро́ицѣ въ ча́съ кончи́ны твоея́, достохва́льне кня́же Оле́же: «хвала́ Бо́гу благодѣ́йствующу, — глаго́лалъ еси́, возлежа́ на сме́ртнѣмъ одрѣ́, — зрю́ уже́ бре́гъ мо́ря жите́йскаго, и́мже досе́лѣ ноша́шеся моя́ у́тлая ладія́». Тѣ́мже со упова́ніемъ ра́достно прише́лъ еси́ во оби́тели го́рнія, идѣ́же со а́нгельскими ли́ки пое́ши пѣ́снь вели́кую: Аллилу́ія.

Икосъ 11.

Яко свѣтопріе́мную свѣщу́, у́глемъ благода́ти возжже́нную, ви́дѣша ученицы́ лице́ твое́, уго́дниче Бо́жій, въ ча́съ кончи́ны свѣ́томъ невече́рнимъ осія́нное. Сего́ ра́ди ско́рбь разлуче́нія съ тобо́ю ди́внымъ си́мъ утѣше́ніемъ раствори́вше, съ тре́петомъ и ра́достію взира́ху на пречестны́я мо́щи твоя́, и отше́ствіе твое́ просла́виша зва́ніи си́ми:

Ра́дуйся, по трудѣ́хъ вре́менныхъ поко́й вѣ́чный улучи́вый. Ра́дуйся, земно́е тече́ніе достохва́льнѣ сконча́вый. Ра́дуйся, вѣне́цъ безсме́ртныя жи́зни прія́вый. Ра́дуйся, престо́лу Вседержи́теля ны́нѣ предстоя́й. Ра́дуйся, добродѣ́тельми мíрови свѣтя́й. Ра́дуйся, святы́нею твое́ю гра́дъ на́шъ присѣща́яй. Ра́дуйся, и́ночествующимъ о́бразъ до́брыхъ подвиго́въ подава́яй. Ра́дуйся, я́ко лучи́ невече́рняго свѣ́та ли́къ тво́й озари́ша. Ра́дуйся, я́ко въ ри́зы нетлѣ́нія честны́я мо́щи твоя́ облеко́шася. Ра́дуйся, лампа́до небе́снаго блиста́нія. Ра́дуйся, горни́ло моли́твеннаго куре́нія.

Ра́дуйся, уго́дниче Бо́жій кня́же Оле́же, гра́да Бря́нска чудотво́рче.

Конда́къ 12.

Благода́ть и ми́лость испроси́ на́мъ у Христа́, Влады́ки на́шего, благовѣ́рне кня́же Оле́же, окорми́ предста́тельствомъ твои́мъ, отжени́ отъ на́съ вся́каго врага́ и проти́вника, научи́ подража́ти тебѣ́, да изба́вльшеся искуше́ній, пре́лести и бѣ́дъ, прославля́емъ тя́ по достоя́нію, воспѣва́юще пѣ́снь благодаре́нія: Аллилу́ія.

Икосъ 12.

Пою́ще по́двиги ди́внаго житія́ твоего́ и честно́е преставле́ніе твое́, уго́дниче Бо́жій Оле́же, чти́мъ па́мять твою́ вси́, я́ко небе́снаго предста́теля и помо́щника, отъ Го́спода на́мъ дарова́ннаго. Ты́ же и по преставле́ніи гра́дъ тво́й не оставля́яй, посѣти́ ми́лостію принося́щихъ ти́ похвалы́ сицевы́я:

Ра́дуйся, во сла́вѣ отъ земли́ на не́бо пресели́выйся. Ра́дуйся, ли́ку избра́нныхъ та́мо пріобщи́выйся. Ра́дуйся, странѣ́ на́шей на враги́ спобо́рствуяй. Ра́дуйся, во́инству на́шему во бране́хъ спосо́бствуяй. Ра́дуйся, я́ко предѣ́лы оте́чества на́шего неусы́пно защища́еши. Ра́дуйся, я́ко гра́дъ Бря́нскъ и оби́тель тобо́ю созда́нную, при́сно покрыва́еши. Ра́дуйся, во́ине Царя́ ца́рствующихъ. Ра́дуйся, боголюби́вымъ душа́мъ благода́ти пода́телю. Ра́дуйся, моли́твениче на́шъ усе́рдный. Ра́дуйся, помо́щниче на́шъ ско́рый.

Ра́дуйся, уго́дниче Бо́жій кня́же Оле́же, гра́да Бря́нска чудотво́рче.

Конда́къ 13.

О, пречу́дне и пресла́вне уго́дниче Бо́жій, благовѣ́рне кня́же Оле́же, пріими́ сіе́ ма́лое хвале́ніе отъ недосто́йныхъ ра́бъ свои́хъ: огради́ оби́тель твою́ и моли́твами твои́ми сохрани́ отъ вра́гъ ви́дныхъ и неви́димыхъ, отъ неду́говъ и скорбе́й, отъ смертоно́стныя я́звы и гряду́щія му́ки, да и ны́нѣ и во вѣ́ки вѣко́въ воспѣва́емъ Бо́гу: Аллилу́ія.

[Се́й конда́къ глаго́лется три́жды. Та́же и́косъ 1-й: Ангела о́бразомъ... И конда́къ 1-й: Избра́нному уго́днику...]

Молитва.

О, пречу́дный о́тче, благовѣ́рный кня́же Оле́же, уго́дниче Христо́въ усе́рдный, моли́твенниче ко Го́споду те́плый, защи́тниче въ бѣда́хъ и утѣ́шителю въ печа́лехъ неусы́пный! Воззри́, преблаже́нне, моли́твенно на гра́дъ тво́й и ви́ждь ча́да твоя́, смире́нно къ тебѣ́ припа́дающая и служи́ти тебѣ́ хотя́щая. Не отве́ргни тре́бующія твоея́ по́мощи, но я́ко благодѣ́тель и хода́тай, моли́ при́сно Го́спода Бо́га и Спа́са на́шего Іису́са Христа́, да благослови́тъ страну́ Россíйскую, въ ми́рѣ и благовѣ́ріи ю́ сохраня́я, гра́ды умножа́я, достоя́ніе свое́ соблюда́я. Вознеси́, богоно́сне о́тче на́шъ, сіе́ ма́лое моле́ніе недосто́йныхъ ра́бъ твои́хъ Влады́цѣ Христу́, да утверди́тъ во святѣ́й Правосла́внѣй Це́ркви живы́й ду́хъ пра́выя вѣ́ры и любве́, благоче́стіе непоколеби́мо, любому́дріе христопослѣ́довательно. Да да́руетъ Госпо́дь па́стыремъ ре́вность попече́нія о спасе́ніи люде́й, во е́же невѣ́рущія просвѣти́ти, заблу́ждшія наста́вити, отпа́дшія обрати́ти и привлещи́. Изря́днее же да вся́ ча́да Це́ркве Правосла́вныя чи́ста сохрани́тъ отъ мірски́хъ искуше́ній, похоте́й плотски́хъ, суему́дрія суевѣ́рій и наважде́ній вра́жескихъ. Ей, уго́дниче Бо́жій, не пре́зри на́съ, моля́щихся тебѣ́, но помози́ на́мъ ско́рымъ предста́тельствомъ твои́мъ, да вся́кихъ бѣ́дъ, напа́стей и скорбе́й въ се́й жи́зни вре́меннѣй избѣжа́вше, кончи́ну непосты́дну обрѣте́мъ, и та́ко на земли́ богоуго́дно пожи́вше, жи́зни ра́йскія на небеси́ сподо́бимся, идѣ́же вку́пѣ съ тобо́ю просла́вимъ человѣколю́біе и щедро́ты въ Тро́ицѣ сла́вимаго Бо́га Отца́, Сы́на и Свята́го Ду́ха, во вѣ́ки вѣко́въ. Ами́нь.

Тропа́рь, гла́съ 8:

Отъ ю́ности возлюби́въ Христа́ всѣ́мъ се́рдцемъ, преподо́бне, сла́ву земну́ю, я́ко преходя́щую, оста́вилъ еси́, и ца́рство земно́е въ ничто́же вмѣни́въ, ли́ку и́нокъ ра́достно приче́лся еси́, и труды́ мно́гими гра́дъ Бря́нскъ, а́ки со́лнце пресвѣ́тло, озари́лъ еси́. Тѣ́мъ бы́въ Тро́ицы украше́ніе, моли́, кня́же Оле́же, Христа́ Бо́га, спасти́ся душа́мъ на́шимъ.

Конда́къ, гла́съ 4:

Уподо́бился еси́ плодоно́снѣй лѣ́торасли отъ ко́рене честна́го, Оле́же благоро́дне, и́стину возлюби́въ и нетлѣ́нный Христо́въ живо́тъ. Тѣ́мже моли́твою, бдѣ́ніемъ и поще́ніемъ свѣти́льникъ вели́кій бы́въ твои́мъ ученико́мъ, просвѣти́, блаже́нне, оте́чество твое́ и спаси́ ду́ши на́ша.

Велича́ніе:

Ублажа́емъ тя́, святы́й благовѣ́рный кня́же Оле́же, и чте́мъ святу́ю па́мять твою́, ты́ бо мо́лиши за на́съ Христа́ Бо́га на́шего.

Источникъ: Акаѳисты русскимъ святымъ. / [Отв. ред. Наталія Николаевна Шумскихъ]. — Томъ 3-й: Н-Ѳ. — СПб.: Издательство «Титулъ», 1996. — С. 130-140.

/ Къ оглавленію раздѣла /


Наверхъ / Къ титульной страницѣ

0