Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - четвергъ, 21 сентября 2017 г. Сейчасъ на порталѣ посѣтителей - 22.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ДОМАШНЯЯ МОЛИТВА

Мучц. Вѣра, Надежда, Любовь и мать ихъ Софія († ок. 137 г.)

Святые мученицы Вера, Надежда, Любовь и мать их СофияСв. Софія была вдова-христіанка и жила въ Римѣ вмѣстѣ съ тремя дочерями: 12-лѣтнею Вѣрою, 10-лѣтнею Надеждою и 9-лѣтнею Любовію, которыхъ воспитывала въ христіанскомъ благочестіи. Взятыя на мученія за Христа, юныя дѣвы, сіяя «добротою благочестія», приготовленныя молитвою и увѣщаніями матери, «явѣ укрѣпляеми любовію Создателя», безстрашно исповѣдали предъ царемъ свою вѣру, не отступили предъ жестокими муками, и всѣ три предъ глазами матери перенесли поджиганіе на раскаленной желѣзной рѣшеткѣ, горѣніе въ кипящей смолѣ, строганіе острымъ желѣзомъ, пригвожденіе къ колесу и біеніе палками, такъ что ихъ израненныя тѣла распадались кусками. Но и среди такихъ мученій онѣ оставались живы и, наконецъ, были усѣчены мечемъ. Св. Софія внутренне сострадала каждой изъ своихъ дочерей, матерински терзаясь отъ переносимыхъ ими жестокихъ истязаній. Тяжесть ея страданій еще болѣе усиливалась отъ того, что она наружно старалась сохранять спокойствіе и ободряла дѣтей-мученицъ. Для нея отраднѣе было бы вслѣдъ за ними принять мученическій вѣнецъ; но жестокій мучитель, желая еще болѣе усилить ея внутреннія мученія терзаніемъ объ утратѣ дѣтей, отпустилъ ее на свободу и позволилъ взять для погребенія истерзанныя тѣла ея дочерей. Св. Софія «три дня присѣдяше у гроба дщерей своихъ молящися» и здѣсь же, у гроба, по прошествіи этихъ трехъ дней, скончалась. Память свв. мученицъ — 17 (30) сентября.

АКАѲИСТЫ

Ака́ѳистъ святы́мъ му́ченицамъ Вѣ́рѣ, Наде́ждѣ и Любви́, и ма́тери и́хъ Софíи.

Конда́къ 1.

Избра́ннымъ раба́мъ Го́спода Вседержи́теля, Вѣ́рѣ, Наде́ждѣ и Любви́, и му́дрѣй ма́тери Софíи, похва́льная ва́мъ пѣ́нія умиле́нно возно́симъ. Вы́ же, я́ко дерзнове́ніе ко Христу́ Бо́гу иму́щія, моли́теся за ны́, во е́же изба́витися на́мъ грѣхо́въ и скорбе́й, да благода́рственно вопіе́мъ ва́мъ:

Ра́дуйтеся, Вѣ́ро, Наде́ждо и Любы́, ку́пно съ Софíею, ма́терію ва́шею прему́дрою.

Икосъ 1.

Ра́дуйтеся, единомы́сленныя сестры́, тріе́мъ добродѣ́телемъ тезоимени́тыя; ра́дуйтеся, въ повинове́ніи богому́дрѣй ма́тери ва́шей на степе́ни соверше́нствованія вше́дшія.

Ра́дуйтеся, а́ки три́ ра́йскія ве́тви, въ зловѣ́рнѣмъ Ри́мѣ возра́сшія; ра́дуйся, Софíе, дще́ремъ твои́мъ имена́ добродѣ́телей наре́кшая, я́же ве́щію исполня́ти научи́ла еси́.

Ра́дуйся, Вѣ́ро, вѣ́рою неви́димое я́ко ви́димое зрѣ́ти на́мъ помога́ющая; ра́дуйся, въ нетлѣ́ніе облече́нная.

Ра́дуйся, Наде́ждо, наде́ждею страда́нія на́ша во юдо́ли ско́рби ослабля́ющая и въ го́рняя десни́цею указу́ющая; ра́дуйся, Ца́рствіе небе́сное унаслѣ́довавшая.

Ра́дуйся, Любы́, любо́вію Боже́ственною блаже́нство безсме́ртныя жи́зни на́мъ открыва́ющая; ра́дуйся, благода́тію Ду́ха Свята́го осія́нная.

Ра́дуйся, Софíе, сíесть прему́дрость, прему́дрѣ дще́ри твоя́ воспита́вшая; ра́дуйся, въ добродѣ́телехъ вѣ́ры, наде́жды и любве́ на́съ утвержда́ющая.

Ра́дуйтеся, Вѣ́ро, Наде́ждо и Любы́, ку́пно съ Софíею, ма́терію ва́шею прему́дрою.

Конда́къ 2.

Ви́дящи му́драя Софíя слуги́, прише́дша зва́ти ю́ со дще́рьми ко царю́ Адріа́ну, и позна́вши вину́ призва́нія своего́, ста́ со ча́ды свои́ми на моли́тву, по́мощи Бо́га прося́щи. По моли́твѣ же, е́мшася за ру́цѣ, я́коже вѣне́цъ уплете́нный, идя́ху вку́пѣ, пою́ще Христу́ Бо́гу: Аллилу́ія.

Икосъ 2.

Ра́зумъ несумнѣ́нный имѣ́ли есте́, святы́я, егда́ бо въ пала́ты ца́рскія введе́ны бы́сте, царе́ви Адріа́ну предста́сте съ лице́мъ свѣ́тлымъ, очесы́ весе́лыми и се́рдцемъ му́жественнымъ. Ца́рь же, зря́ честна́я ли́ца ва́ша неустраше́нна и му́дрость Софíи увѣ́дѣвъ, отложи́ на и́но вре́мя су́дъ сво́й и отсла́ вы́ къ нѣ́коей благоро́днѣй женѣ́, у нея́же пребы́сте три́ дни́, ма́тери ва́шей прему́дрѣй богодухнове́нными словесы́ де́нь и но́щь ва́съ поуча́ющей. Тѣ́мже ублажа́юще ва́съ, взыва́емъ си́це:

Ра́дуйтеся, три́ непоро́чныя а́гницы Христо́вы, вѣне́цъ добродѣ́телей въ себѣ́ совокупи́вшія; ра́дуйтеся, три́ добродѣ́тельныя сестры́, тве́рдую вѣ́ру, несумнѣ́нную наде́жду и нелицемѣ́рную любо́вь ко Го́споду Бо́гу яви́вшія.

Ра́дуйтеся, не пощадѣ́вшія красоты́ и мла́дости ва́шея, Краснѣ́йшаго ра́ди добро́тою па́че сыно́въ человѣ́ческихъ; ра́дуйся, Софíе, ча́да твоя́ возлю́бленная на по́двигъ му́ченическъ за Христа́ наставля́вшая.

Ра́дуйся, Вѣ́ро, муче́ніемъ за Христа́ вѣ́ру твою́ исповѣ́давшая; ра́дуйся, сестры́ твоя́ крѣ́пкою вѣ́рою воздвиза́вшая.

Ра́дуйся, Наде́ждо, тве́рдое надѣ́яніе на Христа́ возлага́вшая; ра́дуйся, сестры́ твоя́ неосла́бною наде́ждею укрѣпля́вшая.

Ра́дуйся, Любы́, му́ками за Христа́ любо́вь твою́ дѣ́йственную показа́вшая; ра́дуйся, сестры́ твоя́ огне́мъ любве́ огражда́вшая.

Ра́дуйся, Софíе, сла́дкая ча́да твоя́ увѣщава́вшая презрѣ́ти сла́ву и бога́тство, и всю́ сла́дость мíра сего́ тлѣ́ннаго; ра́дуйся, до́брыя дще́ри твоя́ до кро́ве ста́ти за Го́спода и умре́ти за Него́ усе́рдно учи́вшая.

Ра́дуйтеся, Вѣ́ро, Наде́ждо и Любы́, ку́пно съ Софíею, ма́терію ва́шею прему́дрою.

Конда́къ 3.

Си́лою Боже́ственною осѣне́ны бя́ху му́ченицы, я́же добродѣ́тели име́нъ свои́хъ яви́ша дѣ́ломъ въ по́двизѣхъ му́ченическихъ, воспѣва́юще Бо́гу: Аллилу́ія.

Икосъ 3.

Иму́ща въ себѣ́ святы́я му́ченицы сто́лпъ вѣ́ры, крилѣ́ наде́жды и о́гнь любве́, въ сла́дость послу́шающія отъ слове́съ ма́тере своея́, еди́на другу́ю въ долготерпѣ́ніи утвержда́ху и ра́достно идя́ху, жела́юща честна́го му́ченичества, е́же за Христа́. Тому́ покланя́ющеся, я́ко Бо́гу на́шему, сицевы́ми ва́съ воззва́ньми почита́емъ:

Ра́дуйтеся, ни ма́ло не поскорбѣ́вшія о лише́ніи вре́меннаго сего́ живота́ вѣ́чныя ра́ди жизни; ра́дуйтеся, че́сти ра́ди Христо́вы пло́ть на му́ки преда́вшія.

Ра́дуйтеся, три́ многоцѣ́нныя сосу́ды вѣ́ры, наде́жды и любве́ Бо́гу въ да́ръ прине́сшія; ра́дуйся, Софíе, я́ко, любве́ ра́ди презѣ́льныя ко дще́ремъ твои́мъ, всѣ́мъ се́рдцемъ возжелѣ́ла еси́, да Ца́рствіе Бо́жіе наслѣ́дуютъ.

Ра́дуйся, Вѣ́ро, ду́ши на́ша вѣ́рою озаря́ющая; ра́дуйся, къ ти́хому приста́нищу на́съ вознося́щая.

Ра́дуйся, Наде́ждо, сердца́ на́ша сла́достію наде́жды оживля́ющая; ра́дуйся, изъ пучи́ны отча́янія на́съ извлека́ющая.

Ра́дуйся, Любы́, страда́нія и ско́рби на́ша въ ра́дость прелага́ющая; ра́дуйся, ока́мененная сердца́ на́ша во умиле́ніе преводя́щая.

Ра́дуйся, Софíе, му́дростію на благо́е на́съ наставля́ющая; ра́дуйся, потемнѣ́нное о́ко ду́шъ на́шихъ просвѣща́ющая.

Ра́дуйтеся, Вѣ́ро, Наде́ждо и Любы́, ку́пно съ Софíею, ма́терію ва́шею прему́дрою.

Конда́къ 4.

Бу́ря я́рости мучи́телевы нападе́ на тя́, свята́я Вѣ́ро, но не поколеба́ тя; кто́ бо возмо́жетъ вѣ́ру неодоли́мую подви́гнути, адама́нта крѣпча́йшую, я́же вѣ́рныхъ научи́ла е́сть пѣ́ти съ тобо́ю Бо́гу: Аллилу́ія.

Икосъ 4.

Слы́шащи му́драя ма́ти дще́ри своя́ предъ царе́мъ небоя́зненно Христа́ исповѣ́дающа и глаго́люща, я́ко того́ еди́наго жела́ютъ, е́же бы страда́ти и терпѣ́ти го́рькія му́ки сла́дкаго ра́ди Іису́са Христа́, ра́довашеся вельми́ и моля́ Бо́га, да укрѣпи́тъ я́ въ предлежа́щихъ му́кахъ. Сіе́ у́бо изволе́ніе похваля́юще, пе́рвѣйшей дще́ри му́дрыя ма́тере та́ко воспое́мъ:

Ра́дуйся, Вѣ́ро, немилосе́рдая біе́нія сладча́йшаго ра́ди Іису́са сла́дцѣ пріе́мшая; ра́дуйся, урѣ́занная сосца́ твоя́, а́ки два́ кри́на чистоты́, въ же́ртву Го́споду прине́сшая.

Ра́дуйся, я́ко отъ я́звы твоея́ вмѣ́сто кро́ве млеко́ истече́; ра́дуйся, я́ко на раскале́нное желѣ́зо положе́на была́ еси́.

Ра́дуйся, я́ко въ коно́бъ кипя́щь вве́ржена су́щи, ни ма́ло не опали́лася еси́, ниже́ вреди́лася еси́; ра́дуйся, пла́мень страсте́й на́шихъ небе́сною прохла́дою утиша́ющая.

Ра́дуйся, о́гнь муче́ній на́шихъ въ болѣ́знехъ угаша́ющая; ра́дуйся, зна́меніемъ вѣ́ры посредѣ́ напа́стей на́съ зна́менающая.

Ра́дуйся, щито́мъ вѣ́ры во бра́ни со враго́мъ на́съ покрыва́ющая; ра́дуйся, честну́ю главу́ твою́ за Главу́ Це́ркве, Христа́ Бо́га, подъ ме́чь ра́достно прекло́ншая.

Ра́дуйся, я́ко обагре́ніемъ кро́ве твоея́, а́ки червлени́цею, одѣ́яна, яви́лася еси́ очесе́мъ Безсме́ртнаго Жениха́ твоего́; ра́дуйся, къ жела́нному кра́ю прише́дшая и люби́маго Спа́са и Го́спода узрѣ́вшая.

Ра́дуйтеся, Вѣ́ро, Наде́ждо и Любы́, ку́пно съ Софíею, ма́терію ва́шею прему́дрою.

Конда́къ 5.

Богозда́ннымъ звѣзда́мъ уподо́билися есте́, Вѣ́ро, Наде́ждо и Любы́, всѣ́мъ бо се́рдцемъ прилѣпи́вшася ко еди́ному вѣ́чному Животу́ и Красотѣ́ неизрѣче́ннѣй, Іису́су Христу́, ско́ро ше́ствовасте, во е́же умре́ти за Него́ и наслади́тися Боже́ственнаго Его́ видѣ́нія, пою́ща Ему́: Аллилу́ія.

Икосъ 5.

Ви́дѣвша добропобѣ́дныя сестры́ святу́ю Вѣ́ру ра́достно за Христа́ пострада́вшу, и са́ми хотя́ху ду́ши своя́ за Него́ положи́ти: ца́рь же Наде́жду святу́ю нача́тъ испы́товати, и ви́дѣвъ ю́ съ сестро́ю единомы́сленну су́щу, на му́ки вдаде́ ю́, оба́че ничто́же успѣ́. Мы́ же, Наде́жду святу́ю о сицево́мъ ея́ мудрова́ніи ублажа́юще, воспое́мъ и просла́вимъ ю́:

Ра́дуйся, Наде́ждо, же́стоко біе́нная, оба́че пресвѣ́тлую наде́жду на Го́спода не потеря́вшая; ра́дуйся, му́ки твоя́ безро́потно въ молча́ніи терпѣ́вшая.

Ра́дуйся, и на́мъ крѣ́пкое терпѣ́ніе подаю́щая; ра́дуйся, я́ко въ разжже́ннѣй пещи́ неопаля́ема бы́вши, хвалу́ Бо́гу возсыла́ла еси́.

Ра́дуйся, я́ко и на́съ во страда́ніихъ хвали́ти Бо́га науча́еши; ра́дуйся, я́ко ногтьми́ желѣ́зными стро́гана была́ еси́.

Ра́дуйся, на́съ, су́щихъ въ ско́рбехъ, луча́ми наде́жды осіява́ющая; ра́дуйся, я́ко чу́дное нѣ́кое благоуха́ніе отъ я́звъ твои́хъ исхожда́ше.

Ра́дуйся, непоколеби́мое упова́ніе на Го́спода Іису́са неизмѣ́нно сохра́ншая; ра́дуйся, безнаде́жность и безси́ліе въ сердца́хъ на́шихъ истребля́ющая.

Ра́дуйся, ме́чное посѣче́ніе за Христа́ ра́достно пріи́мшая; ра́дуйся, я́сная денни́це, на́мъ, печа́льми земны́ми угнете́ннымъ, ми́ръ вѣ́чный раскрыва́ющая.

Ра́дуйтеся, Вѣ́ро, Наде́ждо и Любы́, ку́пно съ Софíею, ма́терію ва́шею прему́дрою.

Конда́къ 6.

Проповѣ́дникомъ и апо́столомъ богоно́снымъ подо́бны бы́сте, богому́дрыя сестры́: добродѣ́тельми бо ва́шими проповѣ́дасте всѣ́мъ вѣ́рнымъ вѣ́ру, наде́жду и любо́вь ко Го́споду, Влады́цѣ всѣ́хъ, Тому́ пою́ще: Аллилу́ія.

Икосъ 6.

Возсія́ла еси́, а́ки со́лнце, Любы́ свята́я, кто́ бо си́це за возлю́бленнаго Го́спода своего́ можа́ше ста́ти, я́коже любы́, поне́же пи́сано е́сть: «крѣпка́ я́ко сме́рть любы́, вода́ мно́га не мо́жетъ угаси́ти любве́, и рѣ́ки не потопя́тъ ея́». Мо́лимъ ти ся ны́нѣ, Любы́ свята́я, серафи́мскимъ пла́менемъ любве́ ко Го́споду горя́щая, обнови́ ока́мененная и изсо́хшая сердца́ на́ша, возжги́ въ на́съ, оскудѣ́вшихъ любо́вію, свѣ́тъ любве́, да возлю́бльше Го́спода и вся́ бли́жнія на́ша, тебе́, я́ко моли́твенницу на́шу, восхва́лимъ си́це:

Ра́дуйся, Любы́, я́ко любве́ твоея́ ко Христу́ во́ды мно́ги пре́лестей мірски́хъ не угаси́ша; ра́дуйся, я́ко вся́ ласка́нія и да́ры царе́вы отве́ргши, ду́шу твою́ за Го́спода положи́ла еси́.

Ра́дуйся, я́ко любве́ твоея́ рѣ́ки бѣ́дъ и страда́ній не потопи́ша; ра́дуйся, за Го́спода Іису́са на колеси́ протя́гнутая, же́зліемъ біе́нная, све́рдлами прободе́нная и въ пе́щь о́гненную вве́рженная.

Ра́дуйся, я́ко въ лю́тыхъ му́кахъ твои́хъ си́лою Бо́жіею укрѣпля́ема была́ еси́; ра́дуйся, кро́вію твое́ю, любве́ ра́ди къ Безсме́ртному Жениху́ твоему́ Христу́ излія́нною, въ хла́дныхъ сердца́хъ на́шихъ любо́вь возбужда́ющая.

Ра́дуйся, я́вѣ показа́вшая на́мъ, я́ко любве́ ра́ди вся́ муче́нія сла́дцѣ претерпѣва́ются; ра́дуйся, яви́вшая на́мъ, я́ко любы́ Боже́ственная приво́дитъ къ животу́ вѣ́чному.

Ра́дуйся, са́мою ве́щію увѣ́рившая, я́ко любы́ Боже́ственная открове́ніе е́сть безсме́ртія; ра́дуйся, я́ко ни ка́яже мучи́тельства возмого́ша разлучи́ти Любо́вь отъ любве́ Христо́вы.

Ра́дуйся, въ му́кахъ апо́стольски вѣща́вшая, я́ко не разлучи́тъ тя́ отъ любве́ Бо́жія ни ско́рбь, ни тѣснота́, ни гоне́ніе, ни гла́дъ, ни нагота́, ни бѣда́, ни ме́чь; ра́дуйся, любве́ ра́ди Христо́вы мече́мъ во главу́ усѣ́ченная.

Ра́дуйтеся, Вѣ́ро, Наде́ждо и Любы́, ку́пно съ Софíею, ма́терію ва́шею прему́дрою.

Конда́къ 7.

Хотя́ща скорѣ́е отъ тѣ́ла разлучи́тися и со Христо́мъ бы́ти святы́я дѣ́вы, егда́ на ме́чное посѣче́ніе идя́ху, еди́на другу́ю и ма́терь свою́ Софíю объе́млюща лобыза́хуся, дру́жескому на́съ любле́нію поуча́юще, да вси́ ку́пно пое́мъ Бо́гу: Аллилу́ія.

Икосъ 7.

Но́вое чу́до показа́ Госпо́дь, егда́ по́мощь Свою́ посла́ страда́вшимъ за исповѣ́даніе и́мене Его́ толи́ко ю́нымъ дѣ́вамъ: вѣ́рою бо, наде́ждею и любо́вію укрѣпля́емы и возноси́мы бы́вша, до́блественнѣ по́двиги своя́ сконча́ша. Мы́ же въ единомы́сліи и единоду́шіи до конца́ живота́ пребы́вшихъ мо́лимъ ва́съ, да и на́мъ низпо́слете единомы́сліе въ соверше́ніи до́брыхъ дѣ́лъ, умиле́нно велича́ющимъ ва́съ:

Ра́дуйтеся, Вѣ́ро, Наде́ждо и Любы́, еди́нѣмъ путе́мъ муче́ній до вра́тъ небе́сныхъ ше́дшія; ра́дуйтеся, въ пресвѣ́тлый черто́гъ прелюбе́знаго Жениха́ ва́шего во гла́сѣ ра́дованія вше́дшія.

Ра́дуйтеся, я́ко Іису́съ Христо́съ просвѣти́, я́коже звѣ́зды на небеси́, ра́ны на тѣлесѣ́хъ ва́шихъ; ра́дуйся, Софíе, до́блественнѣ на му́ки ча́дъ твои́хъ взира́вшая.

Ра́дуйтеся, я́ко небе́сною красото́ю, ея́же о́ко не ви́дѣ, украси́ Госпо́дь добро́ту ва́шу, му́ками отъя́тую; ра́дуйтеся, вѣнцы́ воздая́нія пріе́мшія.

Ра́дуйтеся, а́ки три́ звѣзды́, Со́лнцемъ пра́вды озаре́нныя; ра́дуйся, Софíе, въ му́жественнѣмъ исповѣ́даніи дще́рьми твои́ми и́мене Христо́ва утѣше́ніе ве́ліе обрѣ́тшая.

Ра́дуйтеся, мглу́ сомнѣ́ній на́шихъ разсѣява́ющія; ра́дуйтеся, на́съ, удруче́нныхъ страда́ньми душе́вными и тѣле́сными, подкрѣпля́ющія.

Ра́дуйтеся, красото́ю любве́ сердца́ на́ша украша́ющія; ра́дуйся, Софíе, крѣ́посте и утѣше́ніе изнемога́ющихъ въ бѣда́хъ и ну́ждахъ.

Ра́дуйтеся, Вѣ́ро, Наде́ждо и Любы́, ку́пно съ Софíею, ма́терію ва́шею прему́дрою.

Конда́къ 8.

Стра́нное и непоня́тное на́мъ немощны́мъ, въ мірски́хъ сласте́хъ погря́знувшимъ, зри́мъ дѣ́ло, я́ко Софíя свята́я, возлю́бленныхъ ча́дъ свои́хъ ви́дящи лю́тыя и го́рькія му́ки и сме́рти, ни ма́ло не поскорбѣ́, но возра́довася зѣло́ ду́хомъ, пою́щи Бо́гу: Аллилу́ія.

Икосъ 8.

Вся бѣ́ въ вы́шнихъ му́драя Софíя, егда́ дще́ри своя́ сла́дкими словесы́ и му́дрыми увѣща́ньми на муче́нія подвиза́ше. Аще же отъ естества́ къ слеза́мъ преклоня́шеся а́біе, отъ любве́ Христо́вы прелага́шеся на ра́дость, печа́ль бо серде́чную и болѣ́знь о ча́дѣхъ ма́тернюю побѣди́ въ не́й любы́ Бо́жія. Ве́ліею у́бо любо́вію дще́ри своя́ лю́бящи, па́че всего́ тѣ́мъ Ца́рствія небе́снаго жела́ше. Сего́ ра́ди, чудя́щеся му́дрости и вели́цѣй любви́ твое́й ко дще́ремъ и сла́вяще тя́, взыва́емъ:

Ра́дуйся, Софíе, я́ко возвесели́ся душа́ твоя́ о блаже́ннѣй кончи́нѣ дще́рей твои́хъ, свято́е и́мя Го́спода дерзнове́нно исповѣ́давшихъ; ра́дуйся, въ му́ченичестѣмъ вѣнча́ніи ча́дъ твои́хъ че́сть и сла́ву прія́вшая.

Ра́дуйся, уча́стія му́ченическаго и спребыва́нія со дще́рьми въ небе́снѣй сла́вѣ Христа́ Бо́га сподо́бльшаяся; ра́дуйся, честна́я тѣлеса́ дще́рей твои́хъ съ ра́достными слеза́ми погре́бшая.

Ра́дуйся, три́ дни́ гро́бу и́хъ присѣдѣ́вшая и сно́мъ сме́рти о Го́сподѣ почи́вшая; ра́дуйся, а́ще и не пло́тію, оба́че се́рдцемъ за Христа́ страда́вшая.

Ра́дуйся, я́ко три́ добродѣ́тельныя дще́ри, си́ми вѣ́ру, наде́жду, любо́вь къ Бо́гу яви́вши, въ да́ръ Пресвятѣ́й Тро́ицѣ принесла́ еси́; ра́дуйся, я́ко чадоро́дія ра́ди спасла́ся еси́.

Ра́дуйся, ди́вная ма́ти, благíя па́мяти досто́йная; ра́дуйся, дще́ри твоя́, да кро́вь свою́ за Христа́ пролію́тъ, моли́вшая.

Ра́дуйся, умудря́ющая ны́, да блюде́мъ непрело́жно добродѣ́тели вѣ́ры, наде́жды и любве́; ра́дуйся, Животворя́щей Тро́ицѣ за ны́ моля́щаяся.

Ра́дуйтеся, Вѣ́ро, Наде́ждо и Любы́, ку́пно съ Софíею, ма́терію ва́шею прему́дрою.

Конда́къ 9.

Вси а́нгели дивля́хуся о страда́ніихъ ва́шихъ, святы́я му́ченицы, и побѣ́ду ва́шу надъ діа́воломъ торжеству́юще, ду́ши же ва́ша къ небеси́ провожда́юще, воспѣва́ху Христу́ Бо́гу: Аллилу́ія.

Икосъ 9.

Вѣтíи велерѣ́чивіи вся́ страда́нія ва́ша за Христа́ не возмо́гутъ изрещи́, дивя́щеся же толи́кимъ подвиго́мъ, во млады́хъ лѣ́тѣхъ подъя́тымъ, немотству́ютъ. Мы́ же о честнѣ́й кончи́нѣ ва́шей Бо́га прославля́юще, велича́емъ ва́съ си́це:

Ра́дуйтеся, Вѣ́ро, Наде́ждо и Любы́, пою́щія хвалу́ Бо́гу, на не́бо небесе́ возше́дшему; ра́дуйтеся, щи́те вѣ́ры, броне́ наде́жды и свѣти́льниче любве́.

Ра́дуйтеся, зрѣ́ніемъ пресвѣ́тлаго лица́ Бо́жія наслажда́ющіяся; ра́дуйся, Софíе, благочести́выя ма́тери на му́дрое воспита́ніе ча́дъ и́хъ наставля́ющая.

Ра́дуйтеся, поуча́ющія ны́, да взы́щемъ Го́спода, и жива́ бу́детъ душа́ на́ша; ра́дуйтеся, съ вѣ́рою, наде́ждею и любо́вію прибѣга́ющихъ къ ва́мъ те́плыя моли́твенницы.

Ра́дуйтеся, наказу́ющія [науча́ющія] ны́, я́ко вся́ сла́дость и пре́лесть мíра сего́ я́ко ды́мъ изчеза́етъ, я́ко пра́хъ отъ вѣ́тра размета́ется и въ пе́рсть обраща́ется; ра́дуйся, Софíе, всѣ́мъ се́рдцемъ Го́спода Бо́га возлю́бльшая.

Ра́дуйтеся, а́ки тріе́ свѣ́тліи ключи́, ко Еди́ному Исто́чнику жи́зни прите́кшіи; ра́дуйтеся, а́ки тріе́ благово́нніи цвѣ́ти, на еди́нѣй благопло́днѣй вѣ́тви прозя́бшія.

Ра́дуйтеся, а́ки три́ зерца́ла, безпредѣ́льную красоту́ Бо́жію въ себѣ́ отража́ющая; ра́дуйся, Софíе, а́ки ма́слина, три́ вѣ́тви, отягче́нныя изоби́льными плоды́ даро́въ Бо́жіихъ, произра́стшая.

Ра́дуйтеся, Вѣ́ро, Наде́ждо и Любы́, ку́пно съ Софíею, ма́терію ва́шею прему́дрою.

Конда́къ 10.

Спасти́ хотя́ща ду́ши своя́ святы́я му́ченицы, любве́ ра́ди Христо́вы ласка́нія царе́ва и бога́тства мíра сего́ тлѣ́ннаго презрѣ́ша и ра́достно кончи́ну му́ченическую за Христа́ прія́ша, пою́ще Ему́: Аллилу́ія.

Икосъ 10.

Стѣна́ми вѣ́ры, наде́жды и любве́ явля́ются святы́я му́ченицы всѣ́мъ, прибѣга́ющимъ къ ни́мъ съ те́плою и усе́рдною моли́твою, и си́це въ печа́лехъ и напа́стехъ къ ни́мъ взыва́ющимъ:

Ра́дуйтеся, я́звъ грѣхо́вныхъ до́брыя цѣли́тельницы; ра́дуйтеся, во тмѣ́ печа́ли на́шея свѣ́томъ упова́нія ны́ озаря́ющія.

Ра́дуйтеся, посредѣ́ напа́стей и скорбе́й ди́вный поко́й на́мъ посыла́ющія; ра́дуйся, Софíе, о на́съ, въ злострада́ніихъ пове́рженныхъ, му́дрое попече́ніе явля́ющая.

Ра́дуйся, Вѣ́ро, кре́стъ спасе́нія предъ на́ми воздвиза́ющая; ра́дуйся, не́мощи на́ша по моли́твамъ къ тебѣ́ исцѣля́ющая.

Ра́дуйся, Наде́ждо, я́корь избавле́нія на́мъ подаю́щая; ра́дуйся, уны́ніе серде́цъ на́шихъ бла́гостно отъе́млющая.

Ра́дуйся, Любы́, твои́мъ ко Го́споду хода́тайствомъ въ злѣ́й напа́сти отъ неча́янныя сме́рти ны́ огражда́ющая; ра́дуйся, изнемога́ющія си́лы на́ша на бо́дрость возставля́ющая.

Ра́дуйся, Софíе, прилѣ́жная о на́съ къ Бо́гу моли́твеннице; ра́дуйся, въ до́брыхъ дѣ́лѣхъ на́шихъ му́драя наста́внице.

Ра́дуйтеся, Вѣ́ро, Наде́ждо и Любы́, ку́пно съ Софíею, ма́терію ва́шею прему́дрою.

Конда́къ 11.

Пѣ́ніе сіе́ похва́льное а́ще бы и тмочи́сленное приноша́хомъ ва́мъ, святы́я му́ченицы, не бы́ довлѣ́ло ко прославле́нію добродѣ́телей и по́двиговъ ва́шихъ. Оба́че хвалу́ Бо́гу возсыла́юще за вся́, я́же во святы́хъ Свои́хъ на́мъ явля́етъ, Тому́ пое́мъ: Аллилу́ія.

Икосъ 11.

Свѣ́томъ небе́снымъ предъ Го́сподомъ горя́щимъ свѣща́мъ подо́бны Вѣ́ра, Наде́жда и Любы́, ку́пно съ ма́терію и́хъ Софíею, къ ни́мже припа́даемъ, моля́ще, да просвѣтя́тъ ны́, омраче́нныя печа́льми и изъ глубины́ серде́цъ зову́щія:

Ра́дуйтеся, ри́зы ва́ша въ кро́ви Агнчей на земли́ убѣли́вшія; ра́дуйтеся, живота́ вѣ́чнаго на́мъ хода́таицы.

Ра́дуйтеся, ду́шъ, и́щущихъ поко́я въ милосе́рдіи Бо́жіи, утвержде́ніе и охране́ніе; ра́дуйся, Софíе, отъ суеты́ мірскíя ны́ огражда́ющая.

Ра́дуйся, Вѣ́ро, доброцѣ́нная кади́льнице, ѳиміа́мъ хвалы́ Бо́гу вознося́щая; ра́дуйся, на́съ грѣ́шныхъ вѣ́рою просвѣща́ющая.

Ра́дуйся, Наде́ждо, въ ско́рби утѣше́ніе и прибѣ́жище на́ше; ра́дуйся, въ печа́лехъ на́шихъ лучеза́рная вѣ́стнице избавле́нія.

Ра́дуйся, Любы́, незло́біе и кро́тость въ сердца́ на́ша влива́ющая; ра́дуйся, та́инственная звѣздо́, отъ тѣсноты́ земны́я горѣ́ ны́ вознося́щая.

Ра́дуйся, Софíе, му́драя и пречестна́я дѣтоводи́тельнице; ра́дуйся, богому́драго житія́ моля́щимся ти́ устрои́тельнице.

Ра́дуйтеся, Вѣ́ро, Наде́ждо и Любы́, ку́пно съ Софíею, ма́терію ва́шею прему́дрою.

Конда́къ 12.

Благода́ть Бо́жію прія́ти сподо́бившіяся, моли́те о на́съ, святы́я му́ченицы, Пречи́стаго Влады́ку Христа́, да ми́лостивъ бу́детъ къ на́мъ, грѣ́шнымъ, съ вѣ́рою, наде́ждею и любо́вію Ему́ Еди́ному, Го́споду и Спа́су на́шему, смире́нно пою́щимъ: Аллилу́ія.

Икосъ 12.

Пое́мъ ва́ша крѣ́пкія по́двиги, вѣ́рою, наде́ждею и любо́вію проникнове́нныя, почита́емъ страда́нія ва́ша презѣ́льная, хва́лимъ ди́вное терпѣ́ніе ва́ше, ублажа́емъ кончи́ну, за Христа́ ва́ми ра́достно подъя́тую, велича́емъ необори́мое му́жество ва́ше, святы́я му́ченицы Вѣ́ро, Наде́ждо и Любы́, и му́драя ма́ти Софíе, и, прославля́юще ва́съ, взыва́емъ си́це:

Ра́дуйтеся, а́ки три́ струи́ мо́лніины, отъ восто́къ да́же до за́падъ добродѣ́тельми свои́ми просія́вшія; ра́дуйтеся, фіа́ли вѣ́ры, наде́жды и любве́, животво́рнымъ питіе́мъ ду́ши на́ша напая́ющіи.

Ра́дуйтеся, тріе́ свѣтоза́рніи путіе́, ко престо́лу сла́вы Госпо́дни на́съ веду́щіи; ра́дуйся, Софíе, ча́дъ ра́ди твои́хъ отъ ли́ка святы́хъ похвале́нная.

Ра́дуйся, Вѣ́ро, цвѣ́те вѣ́ры, па́че снѣ́га бѣлѣ́йшій; ра́дуйся, услажде́ніе стра́ждущихъ.

Ра́дуйся, Наде́ждо, угнете́нныхъ серде́цъ возноше́ніе; ра́дуйся, а́ки пото́къ цѣльбоно́сный, жа́жду скорбя́щихъ ду́шъ утоля́ющая.

Ра́дуйся, Любы́, вѣ́нче изъ ми́ра, ра́дованія и бла́гости соплете́нный; ра́дуйся, у́мная зарни́це вѣ́чности.

Ра́дуйся, Софíе, же́зле си́лы, кро́тцѣ и му́дрѣ ча́да наказу́яй; ра́дуйся, боговѣ́дѣнія пресвѣ́тлая луче́, душа́мъ на́шимъ возсіява́ющая.

Ра́дуйтеся, Вѣ́ро, Наде́ждо и Любы́, ку́пно съ Софíею, ма́терію ва́шею прему́дрою.

Конда́къ 13.

О, святы́я и достохва́льныя му́ченицы, Вѣ́ро, Наде́ждо и Любы́, и му́драя ма́ти Софíе, ны́нѣ пріе́мша ма́лое сіе́ моле́ніе на́ше, отъ вся́кихъ ны́ бѣ́дъ, болѣ́зней и скорбе́й моли́твами ва́шими изба́вите, да сподо́бльшеся во Ца́рствіи небе́снѣмъ зрѣ́ти безсме́ртнаго Го́спода Іису́са, съ ва́ми вку́пѣ воспое́мъ Ему́: Аллилу́ія.

[Се́й конда́къ глаго́лется три́жды. Та́же и́косъ 1-й: Ангели на небеси́ ра́довахуся... И конда́къ 1-й: Избра́ннымъ раба́мъ Го́спода Вседержи́теля...]

Моли́тва пе́рвая святы́мъ му́ченицамъ Вѣ́рѣ, Наде́ждѣ и Любви́, и ма́тери и́хъ Софíи.

О, святы́я и достохва́льныя му́ченицы Вѣ́ро, Наде́ждо и Любы́, и до́блестныхъ дще́рей му́драя ма́ти Софíе, къ ва́мъ ны́нѣ притеце́мъ со усе́рдною моли́твою. Что́ бо па́че возмо́жетъ предста́тельствовати за ны́ предъ Го́сподемъ, а́ще не вѣ́ра, наде́жда и любы́, три́ сія́ краеуго́льныя добродѣ́тели, въ ни́хже о́бразъ нарѣче́нныя, са́мою ве́щію ты́я яви́сте! Умоли́те Го́спода, да въ ско́рбехъ и напа́стехъ неизрѣче́нною благода́тію Свое́ю покры́етъ ны́, спасе́тъ и сохрани́тъ, я́ко Бла́гъ е́сть и Человѣколю́бецъ. Того́ сла́ву, я́ко со́лнце незаходи́мое, ны́нѣ зря́ща свѣтолѣ́пну, споспѣ́шствуйте на́мъ въ смире́нныхъ моле́ніихъ на́шихъ, да прости́тъ Госпо́дь Бо́гъ грѣхи́ и беззако́нія на́ша, и да поми́луетъ на́съ грѣ́шныхъ и недосто́йныхъ щедро́тъ Его́. Моли́те у́бо о на́съ, святы́я му́ченицы, Го́спода на́шего Іису́са Христа́, Ему́же сла́ву возсыла́емъ со Безнача́льнымъ Его́ Отце́мъ и Пресвяты́мъ и Благи́мъ и Животворя́щимъ Его́ Ду́хомъ, ны́нѣ и при́сно и во вѣ́ки вѣко́въ. Ами́нь.

Моли́тва втора́я тѣ́мже святы́мъ му́ченицамъ.

Ва́съ, святы́я му́ченицы, Вѣ́ро, Наде́ждо и Любы́, сла́вимъ, велича́емъ и ублажа́емъ, ку́пно съ му́дрою ма́терію Софíею, е́йже покланя́емся, я́ко о́бразъ богому́драго попече́нія явля́ющей. Умоли́, свята́я Вѣ́ро, Творца́ ви́димыхъ и неви́димыхъ, да вѣ́ру крѣ́пку, небла́зненну и неруши́му пода́стъ на́мъ. Хода́тайствуй, свята́я Наде́ждо, предъ Го́сподемъ Іису́сомъ за на́съ грѣ́шныхъ, да упова́ніе на блага́я не отжене́тъ отъ на́съ и отъ вся́кія ско́рби и ну́жды да изба́витъ ны́. Исповѣ́ждь, свята́я Любы́, Ду́ху и́стины, Утѣ́шителю, напа́сти и печа́ли на́ша, да То́й свы́ше сла́дость небе́сную ниспо́слетъ душа́мъ на́шимъ. Помози́те у́бо въ бѣда́хъ на́шихъ, святы́я му́ченицы, и ку́пно съ му́дрою ма́терію ва́шею Софíею, моли́те Царя́ царе́й и Го́спода госпо́дствующихъ, да сохрани́тъ подъ покро́вомъ Свои́мъ Благочести́вѣйшаго Госуда́ря на́шего и Самоде́ржца, Импера́тора [и́мярекъ] всея́ Россíи, успѣ́хъ да́руя во благи́хъ попече́ніихъ Его́ о держа́вѣ и лю́дехъ Его́. [Или́: стра́ждущую страну́ Россíйскую отъ лю́тыхъ безбо́жникъ и вла́сти и́хъ Христо́съ Бо́гъ да свободи́тъ, и да возста́витъ престо́лъ правосла́вныхъ царе́й; вѣ́рныхъ рабо́въ твои́хъ, въ ско́рби и печа́ли де́нь и но́щь вопію́щихъ къ Нему́, многоболѣ́зный во́пль да услы́шитъ, и да изведе́тъ отъ поги́бели живо́тъ на́шъ.] Со слеза́ми умиле́нно припа́дающе къ ва́мъ, ва́шего те́плаго предста́телства предъ Бо́гомъ усе́рдно мо́лимъ, да ку́пно съ ва́ми и со всѣ́ми святы́ми превознесе́мъ и препросла́вимъ пресвято́е и вели́кое и́мя Отца́ и Сы́на и Свята́го Ду́ха Бо́га, Предвѣ́чнаго Влады́ки и благи́хъ Содѣ́теля, ны́нѣ и при́сно и во вѣ́ки вѣко́въ. Ами́нь.

Тропа́рь, гла́съ 4:

Торжеству́етъ Це́рковь перворо́дныхъ, и свесели́тся пріе́мля ма́терь о ча́дѣхъ веселя́щуюся, я́же я́ко му́дрости тезоимени́тая, тро́йственнымъ богосло́вскимъ добродѣ́телемъ равночи́сленныя породи́. Ты́я съ му́дрыми дѣ́вами зри́тъ уневѣ́стившіяся Жениху́ Бо́гу Сло́ву. Съ не́ю и мы́ духо́внѣ въ па́мяти и́хъ свесели́мся, глаго́люще: Тро́ицы побо́рницы, Вѣ́ро, Любве́ и Наде́ждо, въ вѣ́рѣ, любви́ и наде́ждѣ утверди́те на́съ.

Конда́къ, гла́съ 1:

Софíи честны́я свяще́ннѣйшія вѣ́тви Вѣ́ра и Наде́жда и Любо́вь показа́вшеся, му́дрость обуи́ша е́ллинскую благода́тію, и пострада́вше, и побѣдоно́сицы яви́вшеся, вѣнце́мъ нетлѣ́ннымъ отъ всѣ́хъ Влады́ки Христа́ увязо́шася.

Велича́ніе:

Велича́емъ ва́съ, страстоте́рпицы святы́я, и чте́мъ честна́я страда́нія ва́ша, я́же за Христа́ претерпѣ́ли есте́.

Источникъ: Акаѳистъ святымъ мученицамъ Вѣрѣ, Надеждѣ и Любви, и матери ихъ Софіи, ихже память празднуется мѣсяца Септемврія въ 17-й день. Составилъ Леонидъ Денисовъ. — Тисненіе первое. — СПб.: Сѵнодальная Типографія, 1893. — 64 с.

/ Къ оглавленію раздѣла /


Наверхъ / Къ титульной страницѣ

0