Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - пятница, 22 сентября 2017 г. Сейчасъ на порталѣ посѣтителей - 12.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ДОМАШНЯЯ МОЛИТВА

Велмуч. Никита Готѳскій († 372 г.)

Великомученик Никита ГотфскийГотѳскій воинъ, онъ жилъ на берегахъ Дуная и, «отеческое безбожіе возненавидѣвъ», принялъ вѣру Христову и сталъ ревностно распространять ее среди своихъ соотечественниковъ. Въ это время открылась среди готѳовъ междоусобная война. Побѣжденный княземъ-язычникомъ Аѳанарихомъ князь-христіанинъ Фритигернъ долженъ былъ бѣжать въ Грецію. Собравъ здѣсь войско, онъ возвратился на берега Дуная и побѣдилъ Атанариха. Какъ христіанинъ, Фритигернъ началъ обращать въ христіанство своихъ подданныхъ, чему не мало содѣйствовалъ св. Никита проповѣдію и примѣромъ святой жизни. Вскорѣ Аѳанарихъ отнялъ власть у Фритигерна и началъ жестоко преслѣдовать христіанъ. Св. Никита, отличавшійся «твердостію души», мужественно обличалъ Аѳанариха, желая обратить его на путь истины и добра. Схваченный врагами вѣры Христовой, св. Никита былъ преданъ тяжкимъ мученіямъ. Но жестокость мучителей не могла побѣдить мужество воина Христова. Своимъ великодушнымъ перенесеніемъ страданій св. Никита побѣдилъ «всю демонскую крѣпость» и послѣ истязаній былъ вверженъ въ огонь ок. 372 г. Его тѣло, неповрежденное огнемъ, было брошено безъ погребенія, но потомъ однимъ изъ друзей его отнесено въ Киликійскую страну, гдѣ прославилось многими чудесами, а затѣмъ было перенесено въ Константинополь. Память св. велмуч. Никиты — 15 (28) сентября.

АКАѲИСТЫ

Ака́ѳистъ свято́му великому́ченику Ники́тѣ.

Конда́къ 1.

Избра́нный страстоте́рпче Христо́въ и до́блій во́ине Царя́ царе́й, Ники́то пресла́вне, ору́жіемъ Креста́ враги́ ви́димыя и неви́димыя крѣ́пцѣ побѣди́вый и во всесожже́ніе ту́чное, я́ко же́ртву благопрія́тну, себе́ сама́го Го́сподеви принесы́й, въ пѣ́снехъ съ любо́вію восхваля́емъ тя́, свята́го предста́теля на́шего, и ра́достно тебѣ́ вопіе́мъ:

Ра́дуйся, великому́чениче и чудотво́рче Ники́то.

Икосъ 1.

Ра́дуйся, благовѣ́стниче Ева́нгельскія и́стины; ра́дуйся, язы́ческое нече́стіе попра́вый.

Ра́дуйся, вѣ́ру Христо́ву возлюби́вый; ра́дуйся, страну́ Го́тѳскую духо́вно просвѣти́вый.

Ра́дуйся, діа́вола и слуги́ его́ обличи́вый; ра́дуйся, по и́мени твоему́ тѣ́хъ побѣдоно́сно низложи́вый.

Ра́дуйся, да́же до кро́ве во исповѣ́даніи Христо́вѣ послужи́вый; ра́дуйся, муче́нія многови́дная за Христа́ до́блестно претерпѣ́вый.

Ра́дуйся, огне́мъ всесожже́нный и во оби́тели ра́йскія вознесе́нный; ра́дуйся, же́ртва непоро́чная Тро́ицѣ Святѣ́й яви́выйся.

Ра́дуйся, сто́лпе крѣ́пкій святы́я Це́ркве; ра́дуйся, красото́ и основа́ніе вѣ́ры Христо́вы.

Ра́дуйся, великому́чениче и чудотво́рче Ники́то.

Конда́къ 2.

Ви́дѣвъ Аѳана́рихъ, лю́тый христіа́нъ мучи́тель, ка́ко святы́й Ники́та вѣ́ру Христо́ву въ го́тѳѣхъ побѣдоно́сно проповѣ́дуетъ, а́ки звѣ́рь ди́вій на́нь устреми́ся и му́ками лю́тыми содробля́ше того́ тѣ́ло. Оба́че му́жества души́ его́ поколеба́ти не возмо́же, зане́ то́й побѣди́тель мучи́телей я́влься, побѣдоно́сно воспѣва́ше Христу́ Бо́гу: Аллилу́ія.

Икосъ 2.

Разумѣ́въ му́къ тѣле́сныхъ безбѣ́дность, я́ко на пи́ръ, на муче́нія за Христа́ изше́лъ еси́, свя́те Ники́то, ико́ну Пресвяты́я Богоро́дицы съ собо́ю имѣ́я, съ не́юже и во всѣ́хъ му́кахъ неразлу́ченъ пребы́лъ еси́ и, тоя́ си́лою благода́тно укрѣпля́емь, побѣдоно́сно пу́ть муче́ній проше́лъ еси́, и отъ Христа́ увѣнча́лся еси́. На́съ же науча́еши вопи́ти тебѣ́ такова́я:

Ра́дуйся, о не́мже возра́довашася а́нгели; ра́дуйся, ему́же удиви́шася человѣ́цы.

Ра́дуйся, крѣ́пкаго терпѣ́нія адама́нте; ра́дуйся, соверше́ннаго му́жества о́бразе.

Ра́дуйся, діа́вола побѣди́телю; ра́дуйся, всѣ́хъ слу́гъ его́ посрами́телю.

Ра́дуйся, во́ине Христо́въ непобѣди́мый; ра́дуйся, Кре́стъ Христо́въ во ору́жіе побѣ́ды пріе́мый.

Ра́дуйся, тѣ́мъ вся́ враги́ низложи́вый; ра́дуйся, въ броню́ вѣ́ры Христо́вы облече́нный.

Ра́дуйся, отъ Христо́вой десни́цы свы́ше увѣнча́нный; ра́дуйся, а́нгельскимъ лико́мъ сопричте́нный.

Ра́дуйся, великому́чениче и чудотво́рче Ники́то.

Конда́къ 3.

Си́ла Бо́жія въ тебѣ́, Ники́то великому́чениче добропобѣ́дне, сла́вно просла́вися, не то́кмо бо мучи́теля Аѳана́риха, но и сама́го діа́вола терпѣ́ніемъ твои́мъ побѣди́лъ еси́, и му́жество души́ твоея́ яви́въ, огне́мъ всесожже́гся, яко фе́никсъ, въ вѣ́чной жи́зни обнови́лся еси́ и во оби́тели го́рнія душе́ю твое́ю возлетѣ́лъ еси́, во е́же со а́нгелы пѣ́ти Бо́гу: Аллилу́ія.

Икосъ 3.

Имѣ́яй ве́лію о Христѣ́ крѣ́пость, вре́менныя му́ки, мучи́телемъ тебѣ́ налага́емыя, Ники́то прему́дре, ни во что́же вмѣни́лъ еси́ и ра́дуяся во о́гнь вше́лъ еси́: во огни́ бо, я́ко въ цвѣ́тницѣ, сла́ву Бо́жію воспѣ́лъ еси́. Тѣ́мже и мы́ тя́ сла́вимъ и воспѣва́емъ гла́сы таковы́ми:

Ра́дуйся, страстоте́рпче Христо́въ, въ чудесѣ́хъ преди́вный; ра́дуйся, во огни́ сме́рть вкуси́вый и не опале́нъ пребы́вый.

Ра́дуйся, Аѳана́риха и клевре́ты его́ си́мъ удиви́вый; ра́дуйся, вся́ вѣ́рныя утѣ́шивый.

Ра́дуйся, всѣ́мъ о Го́сподѣ терпя́щимъ утвержде́ніе; ра́дуйся, лѣни́вымъ и слабоду́шнымъ обличе́ніе.

Ра́дуйся, чудесы́ мно́гими по сме́рти просла́вленный; ра́дуйся, благода́ть цѣле́бную отъ Го́спода пріе́мый.

Ра́дуйся, Го́тѳскія страны́ сла́во и похвало́; ра́дуйся, Це́ркви святы́я ра́дованіе и утѣше́ніе.

Ра́дуйся, святы́й предста́телю и моли́твенниче на́шъ ко Го́споду; ра́дуйся, оби́тели сея́ святы́я при́сный засту́пниче.

Ра́дуйся, во́ине Іису́совъ добропобѣ́дный; ра́дуйся, люби́миче Его́ пріи́скренній.

Ра́дуйся, великому́чениче и чудотво́рче Ники́то.

Конда́къ 4.

Бу́ря лю́тыхъ му́къ не потопи́ корабля́ души́ твоея́, Ники́то преди́вне, но приведе́ тя къ ти́хому блаже́нства вѣ́чнаго приста́нищу: кресто́мъ бо Христо́вымъ вооружи́вся, свя́те, преше́лъ еси́ о́гнь муче́ній невреди́мо и дости́глъ еси́ въ вѣ́чный поко́й, идѣ́же сла́дцѣ пое́ши Христу́ Бо́гу пѣ́снь: Аллилу́ія.

Икосъ 4.

Слы́шавше, диви́шася христіа́не, ка́ко звѣзда́ лучеза́рная въ нощи́ дру́гу твоему́ Маріа́ну святы́я мо́щи твоя́, му́чениче Ники́то, показа́, я́коже дре́вле волхва́мъ въ Виѳлее́мѣ Христа́ ро́ждшагося. О се́мъ у́бо Маріа́нъ ра́дуяся, че́стно тѣ́ло твое́, страстоте́рпче, въ дому́ свое́мъ погреба́етъ, си́це къ тебѣ́ взыва́я:

Ра́дуйся, уго́дниче Бо́жій, на небеси́ и на земли́ просла́вленный; ра́дуйся, вѣнцено́сче добропобѣ́дный.

Ра́дуйся, сокро́вище исцѣле́ній многоцѣ́нное; ра́дуйся, мѵроуха́нный ра́йскаго прозябе́нія цвѣ́те.

Ра́дуйся, небе́сныхъ ра́дованіе и земны́хъ утѣше́ніе; ра́дуйся, боля́щихъ безме́здное врачева́ніе.

Ра́дуйся, пресвѣ́тлаго му́ченическаго во́инства добро́то; ра́дуйся, вѣ́рныхъ некра́домое бога́тство.

Ра́дуйся, небе́снымъ зна́меніемъ погребе́ніе честно́е улучи́вый; ра́дуйся, да́ры благода́тными дру́гу твоему́ возда́вый.

Ра́дуйся, изоби́ліемъ бла́гъ земны́хъ до́мъ его́ благослови́вый; ра́дуйся, чудесы́ мно́гими о́ный просла́вивый.

Ра́дуйся, великому́чениче и чудотво́рче Ники́то.

Конда́къ 5.

Боготе́чный исто́чникъ исцѣле́ній яви́ся въ дому́ Маріа́на гро́бъ тво́й честны́й, свя́те Ники́то, егда́ то́й въ страну́ гре́ческую пресели́вся, мо́щи твоя́ святы́я та́мо пренесе́ и въ хра́мѣ Бо́жіемъ, во и́мя твое́ созда́нномъ, о́ныя положи́ на о́бщее поклоне́ніе вѣ́рнымъ, Бо́гу, тя́ просла́вльшему, воспѣ́вшимъ: Аллилу́ія.

Икосъ 5.

Ви́дѣвше чудеса́ пресла́вная, Ники́то свя́те, отъ моще́й твои́хъ истека́ющая, Авксе́нтій епи́скопъ восхотѣ́ ча́сть и́хъ въ ины́й гра́дъ отдѣли́ти. Но того́ начина́ніе дерзнове́нное а́біе воспяти́лъ еси́ и ру́ку, моще́мъ твои́мъ прикосну́вшуюся, омертвѣ́ніемъ порази́лъ еси́, до́ндеже Авксе́нтій о́ный съ покая́ніемъ къ тебѣ́ припаде́ и, исцѣле́ніе отъ тебе́ прія́въ, си́це глаго́лаше:

Ра́дуйся, долготерпѣли́вый Христо́въ подража́телю; ра́дуйся, съ наказа́ніемъ твои́мъ ми́лость и мнѣ́ яви́вый.

Ра́дуйся, начина́ніе дерзнове́нное чуде́сно воспяти́вый; ра́дуйся, усо́хшую ру́ку а́біе исцѣли́вый.

Ра́дуйся, и по сме́рти о Христѣ́ жи́въ пребыва́яй; ра́дуйся, и по уме́ртвіи чудеса́ соверша́яй.

Ра́дуйся, нетлѣ́ніемъ просла́вленный на земли́; ра́дуйся, за по́двигъ тво́й вѣнча́нный на небеси́.

Ра́дуйся, извѣ́стный умилостиви́телю Царя́ Христа́; ра́дуйся, за вѣ́рныхъ мо́щный предъ Ни́мъ предста́телю.

Ра́дуйся, и согрѣша́ющія вразумля́яй; ра́дуйся, и маловѣ́рныя умудря́яй.

Ра́дуйся, великому́чениче и чудотво́рче Ники́то.

Конда́къ 6.

Проповѣ́дуемъ чудеса́ твоя́, не таи́мъ ми́лостей твои́хъ цѣле́бныхъ, великому́чениче Ники́то: отъ лѣ́тъ бо дре́внихъ отце́мъ на́шимъ сія́ вѣ́домы бы́ша, и хра́мы Бо́жіи во и́мя твое́ свято́е въ странѣ́ на́шей Россíйстѣй созида́хуся, идѣ́же и ли́ка твоего́ о́брази чудесы́ просла́вишася, и вся́ вѣ́рныя въ вѣ́рѣ утвержда́ютъ, къ небеси́ же сердца́ и́хъ восхища́ютъ, пою́щихъ Бо́гу: Аллилу́ія.

Икосъ 6.

Возсія́ша чудеса́ мно́гая отъ святы́я ико́ны чудотво́рца Ники́ты, во оби́тели его́ пребыва́ющія и вся́ вѣ́рныя къ пѣ́нію му́ченика подвиза́ющія. Тѣ́мже и мы́ съ любо́вію святу́ю па́мять его́ чти́мъ и пѣ́сненно ему́ вопіе́мъ:

Ра́дуйся, чуде́съ исто́чниче преизоби́льный; ра́дуйся, ми́лости пода́телю преди́вный.

Ра́дуйся, побѣдоно́сче, Бо́гомъ просла́вленный; ра́дуйся, цѣле́бниче неду́говъ душе́вныхъ и тѣле́сныхъ.

Ра́дуйся, боля́щихъ младе́нцевъ при́сный врачева́телю; ра́дуйся, скорбя́щихъ и уныва́ющихъ благода́тный посѣти́телю.

Ра́дуйся, си́лы діа́вольстѣй крѣ́пкій посрами́телю; ра́дуйся, на ду́хи нечи́стыя вла́сть отъ Го́спода пріе́мый.

Ра́дуйся, дѣ́йства діа́вольскаго отъ человѣ́къ прогони́телю; ра́дуйся, отъ бѣснова́нія лю́таго стра́ждущихъ свободи́телю.

Ра́дуйся, апо́стольскихъ даро́въ пріе́мниче; ра́дуйся, а́нгельскія кро́тости подража́телю.

Ра́дуйся, великому́чениче и чудотво́рче Ники́то.

Конда́къ 7.

Хотя́щимъ на́мъ сла́вити по́двиги твоя́ и чудеса́, великому́чениче пресла́вне, помози́ свы́ше да́нною ти́ благода́тію, сердца́ же на́ша отъ грѣхо́вныхъ помышле́ній очи́сти, да досто́йно и неосужде́нно просла́вимъ тя́, о тебѣ́ воспѣва́я Христу́ Бо́гу хвале́бную пѣ́снь: Аллилу́ія.

Икосъ 7.

Ди́внаго побѣдоно́сца и сла́внаго во́ина Христо́ва, Ники́ту великоимени́таго кто́ просла́витъ по достоя́нію отъ земноро́дныхъ? Се́й бо Веліа́ра побѣди́ и вся слу́ги его́ низложи́, Христа́ же, Царя́ и Бо́га, вѣ́рно да́же до сме́рти исповѣ́да и отъ Него́ просла́вленъ бы́сть. Тѣ́мже, въ хра́мѣ Его́ святѣ́мъ лику́юще и предъ чудотво́рною ико́ною того́ моля́щеся, взыва́емъ та́ко:

Ра́дуйся, въ юдо́ли се́й земно́й на́ше утѣше́ніе; ра́дуйся, по Бо́зѣ и Пресвятѣ́й Богоро́дицѣ на́ше упова́ніе.

Ра́дуйся, а́нгельскихъ лико́въ собесѣ́дниче; ра́дуйся, святы́хъ всѣ́хъ соприча́стниче.

Ра́дуйся, му́ченическаго пресвѣ́тлаго собо́ра сія́ющая звѣздо́; ра́дуйся, отъ го́рнихъ высо́тъ на́съ, грѣ́шныхъ, посѣща́яй.

Ра́дуйся, да́ры цѣле́бныя земноро́днымъ подава́яй; ра́дуйся, къ бѣ́дствующимъ на по́мощь ускоря́яй.

Ра́дуйся, моля́щихся моли́твы ми́лостиво пріе́мляй; ра́дуйся, лю́бящимъ тя́ любо́вію свято́ю воздава́яй.

Ра́дуйся, всеще́дрый и ми́лостивый на́шъ предста́телю; ра́дуйся, всеблагíй и скоропредста́тельный на́шъ покрови́телю.

Ра́дуйся, великому́чениче и чудотво́рче Ники́то.

Конда́къ 8.

Стра́нствіе земно́е соверши́въ и пу́ть муче́ній проше́дъ побѣдоно́сно, великому́чениче Ники́то, отъ дѣ́лъ благотворе́нія не почи́лъ еси́, но отъ го́рнихъ высо́тъ оби́тель твою́ и лю́ди, вѣ́рно тебѣ́ моля́щіяся, назира́я, разли́чная на́мъ подае́ши дарова́нія: даде́ся бо тебѣ́ отъ Го́спода ве́лія благода́ть неду́жныя врачева́ти, оби́димыя заступа́ти, сиро́тствующія младе́нцы окормля́ти. Тѣ́мже благода́рно тя́ сла́вимъ и Бо́гу, тя́ просла́вльшему, пое́мъ пѣ́снь: Аллилу́ія.

Икосъ 8.

Ве́сь въ Бо́зѣ бы́въ, страстоте́рпче Христо́въ, о Бо́зѣ чудеса́ мно́гія соверши́лъ еси́ въ жи́зни и по сме́рти и, дерзнове́ніе къ Тому́ получи́въ, вы́ну мо́лишися за лю́ди христоимени́тыя и вѣ́рно тя́ на по́мощь призыва́ющимъ посо́бствуеши. Не оста́ви у́бо и на́съ благода́тною твое́ю по́мощію и заступле́ніемъ, да благода́рно тебѣ́ зове́мъ:

Ра́дуйся, преди́вный христіа́нъ помо́щниче; ра́дуйся, пресла́вный вѣ́рующихъ засту́пниче.

Ра́дуйся, великоимени́тый во́иновъ спобо́рниче; ра́дуйся, вдови́цъ, и сиро́тъ прибѣ́жище.

Ра́дуйся, въ со́ніихъ и видѣ́ніихъ вѣ́рныя посѣща́яй; ра́дуйся, въ бѣда́хъ и напа́стѣхъ и́хъ на по́мощь ускоря́яй.

Ра́дуйся, побѣ́ды тезоимени́тый; ра́дуйся, вѣнцено́сче наро́читый.

Ра́дуйся, святы́я Це́ркве крѣ́пкій сто́лпе; ра́дуйся, правосла́вныхъ щите́ и забра́ло.

Ра́дуйся, ца́рскаго ски́птра утвержде́ніе; ра́дуйся, правосла́внаго ца́рства сохране́ніе.

Ра́дуйся, великому́чениче и чудотво́рче Ники́то.

Конда́къ 9.

Вси́ сы́нове Россíйстіи отъ лѣ́тъ дре́внихъ проповѣ́дуютъ благода́тную твою́ по́мощь во бра́нѣхъ, Ники́то преди́вный, я́ко во́емъ правосла́внымъ при́сно на супоста́ты посо́бствуеши и моли́твами твои́ми на иноплеме́нники, вою́ющія на на́съ и на вѣ́ру на́шу, пра́во побѣ́ды на́мъ да́руеши: сіе́ бо во дни́ наше́ствій тата́рскихъ мно́жицею отъ лѣ́тъ дре́внихъ отцы́ на́ша увѣ́дѣша. Тѣ́мже, тя́ по до́лгу ублажа́юще, пое́мъ о тебѣ́ Бо́гу: Аллилу́ія.

Икосъ 9.

Витíйство на́ше не довлѣ́етъ просла́вити тя́ по достоя́нію, великому́чениче Христо́въ Ники́то, оба́че ты́, я́ко благíй и ми́лостивый подража́тель Христо́въ, не возгнуша́йся на́шихъ убо́гихъ пѣсноглаше́ній, но пріими́ сія́ въ бла́го, произволе́нія серде́цъ на́шихъ вѣ́дый, и неотсту́пенъ бу́ди на́мъ помо́щникъ, вся́ блага́я да́руя на́мъ твои́ми моли́твами, да благоумиле́нно тебѣ́ зове́мъ:

Ра́дуйся, ке́дре благосѣнноли́ственный, и́мже покрыва́ются мно́зи; ра́дуйся, цвѣ́те прекра́сный, и́мже утѣша́ются лю́діе.

Ра́дуйся, ма́слино благопло́дная, еле́й ми́лости на́мъ оби́льно источа́ющая; ра́дуйся, кипари́се са́да Христо́ва, приходя́щія къ тебѣ́ благоуха́яй.

Ра́дуйся, христолюби́вому во́инству неви́димый воево́до; ра́дуйся, иновѣ́рныхъ во́евъ стра́хъ и пораже́ніе.

Ра́дуйся, страны́ христіа́нскія великоимени́тый покрови́телю; ра́дуйся, со святи́телемъ Никола́емъ при́сный ея́ предста́телю.

Ра́дуйся, на нечести́ваго Мама́я вели́кому кня́зю Дими́трію неви́димо посо́бствовавый; ра́дуйся, царю́ Іоа́нну подъ Каза́нію благода́тно спобо́рствовавшій.

Ра́дуйся, соиме́ннаго ти́ боля́рина Рома́нова, твоего́ усе́рднаго чти́теля, родонача́льника До́ма Ца́рскаго яви́вый; ра́дуйся, хра́мъ Бо́жій, во и́мя твое́ и́мъ созда́нный, благоволе́ніемъ твои́мъ осѣни́вый.

Ра́дуйся, великому́чениче и чудотво́рче Ники́то.

Конда́къ 10.

Спа́са Христа́ за лю́ди, тя́ чту́щія, умоли́, Ники́то чудодѣ́йственне, и, я́коже отце́мъ на́шимъ дре́вле, та́ко и ны́нѣ на́мъ смире́ннымъ во блага́я посо́бствовати не преста́й, страстоте́рпче Христо́въ, побѣ́ды тезоимени́те, но и на враги́ одолѣ́ніе у Го́спода Царю́ на́шему испроси́, да сла́вимъ тя́ при́сно и пое́мъ Царю́ царе́й побѣ́дную пѣ́снь: Аллилу́ія.

Икосъ 10.

Стѣно́ю моли́твъ твои́хъ, великому́чениче Ники́то, оби́тель твою́ святу́ю вы́ну сохраня́й отъ вся́каго зла́ и въ не́й вся́ живу́щія и подвиза́ющія путе́мъ пра́вымъ во Ца́рствіе Христо́во руководи́, зане́ даде́ся тебѣ́ благода́ть моли́тися о лю́дѣхъ. Сего́ ра́ди со усе́рдіемъ тебѣ́ пое́мъ:

Ра́дуйся, дѣ́вственныхъ ликостоя́ній неотсту́пный храни́телю; ра́дуйся, дѣ́въ и вдови́цъ, благоче́стно и́ночествующихъ, небе́сный наста́вниче.

Ра́дуйся, моли́твами твои́ми, я́ко ко́кошь птенцы́ своя́, на́съ сохраня́яй; ра́дуйся, я́ко оре́лъ крыла́ма свои́ма, на́съ покрыва́яй и соблюда́яй.

Ра́дуйся, ста́рымъ сѣди́намъ си́лы обновля́яй; ра́дуйся, ю́нымъ въ благоче́стіи и цѣлому́дріи утвержде́ніе.

Ра́дуйся, нача́льствующимъ во бла́го помо́щниче; ра́дуйся, всѣ́мъ ревну́ющимъ о спасе́ніи при́сный споспѣ́шниче.

Ра́дуйся, чудесы́ твои́ми на́съ утѣша́яй; ра́дуйся, враги́ неви́димыя отъ на́съ отража́яй.

Ра́дуйся, ца́рствующаго гра́да свяще́нное украше́ніе; ра́дуйся, небе́снаго рая́ свѣ́тлый граждани́не.

Ра́дуйся, великому́чениче и чудотво́рче Ники́то.

Конда́къ 11.

Пѣ́ніе моле́бное на́ше, предъ чудотво́рною ико́ною твое́ю приноси́мое дне́сь, ми́лостиво услы́ши, великому́чениче Христо́въ Ники́то, и утро́бу щедро́тъ твои́хъ не затвори́ на́мъ, вы́ну тре́бующимъ твоея́ благода́тныя по́мощи, но бу́ди, я́коже и до дне́сь бы́лъ еси́, благíй на́шъ предста́тель и при́сный за ны́ ко Го́споду моли́твенникъ, да о тебѣ́ ра́дующеся и Бо́га сла́вяще, пое́мъ Ему́: Аллилу́ія.

Икосъ 11.

Свѣтоза́рный свѣти́льникъ и преди́вный чудотво́рецъ великому́ченикъ Ники́та яви́ся, то́й бо отъ лѣ́тъ дре́внихъ оте́чествіе на́ше и оби́тель на́шу свои́ми моли́твами и щедро́тами не оставля́етъ, но я́ко побѣди́тель, вся́ враги́ на́ша ви́димыя же и неви́димыя отража́етъ и благоче́стно въ ми́рѣ жи́ти на́съ устроя́етъ. Тѣ́мже и отъ на́съ, уго́дниче Бо́жій, сіе́ благода́рное славосло́віе пріими́:

Ра́дуйся, вели́кій на́шъ предста́телю; ра́дуйся, на́шихъ враго́въ неви́димыхъ побѣди́телю.

Ра́дуйся, преоблада́ти и́мъ надъ на́ми не попуща́яй; ра́дуйся, вся́ ко́зни и́хъ, а́ки паучи́ну, расторга́яй.

Ра́дуйся, и въ ча́съ сме́ртный лю́бящихъ и чту́щихъ тя́ не оставля́яй; ра́дуйся, отъ наси́лія діа́вольскаго и́хъ мо́щно сохраня́яй.

Ра́дуйся, о спасе́ніи на́шемъ Бо́га вы́ну умоля́яй; ра́дуйся, на мыта́рствахъ возду́шныхъ вѣ́рнымъ по́мощь твою́ явля́яй.

Ра́дуйся, и на земли́ неду́говъ лю́тыхъ прогони́телю; ра́дуйся, болѣ́зней неисцѣли́мыхъ цѣли́телю.

Ра́дуйся, безнаде́жныхъ наде́ждо; ра́дуйся, христіа́нъ похвало́.

Ра́дуйся, великому́чениче и чудотво́рче Ники́то.

Конда́къ 12.

Благода́ть Бо́жію ви́димъ отъ святы́я и чудотво́рныя ико́ны твоея́ дѣ́йствующую, Ники́то великоимени́те, къ не́й бо съ вѣ́рою притека́ющіи исцѣле́нія получа́ютъ и здра́вы изъ хра́ма твоего́ отхо́дятъ, тѣ́мже и мы́ тво́й свяще́нный о́бразъ благоговѣ́йно почита́емъ и съ любо́вію лобыза́емъ, и пое́мъ тобо́ю чудодѣ́йствующему Христу́ Бо́гу: Аллилу́ія.

Икосъ 12.

Пою́ще твоя́ ми́лости и мно́гое къ стра́ждущимъ сострада́ніе, великому́чениче Ники́то, сла́вимъ и велича́емъ тя́, Бо́гомъ возвели́ченнаго, и отъ любве́ серде́чныя воспѣва́емъ ти́ пѣ́сни таковы́я:

Ра́дуйся, бѣ́дствующихъ ско́рый помо́щниче; ра́дуйся, богатя́щихся вразумле́ніе.

Ра́дуйся, все́й Россíи Бо́гомъ да́нный покрови́телю; ра́дуйся, оби́тели твоея́ при́сное ра́дованіе, ра́дуйся, хода́таю о не́й немо́лчный.

Ра́дуйся, моля́щихся врачу́ безме́здный; ра́дуйся, ко исцѣле́нію еди́ныя то́кмо вѣ́ры тре́буяй.

Ра́дуйся, ду́ши и тѣлеса́ исцѣля́яй; ра́дуйся, вѣ́рнымъ вы́ну помога́яй.

Ра́дуйся, маловѣ́рныхъ въ вѣ́рѣ утвержда́яй; ра́дуйся, вѣ́ры отвра́щихся гро́зно наказу́яй.

Ра́дуйся, стра́ха Бо́жія учи́телю; ра́дуйся, де́рзости самочи́нныя обличи́телю.

Ра́дуйся, великому́чениче и чудотво́рче Ники́то.

Конда́къ 13.

О, вели́кій уго́дниче Бо́жій, страстоте́рпче Христо́въ и чудотво́рче Ники́то! Вонми́ моли́твѣ на́шей и ма́лаго моле́нія сего́ на́шего не пре́зри, но Христа́ Бо́га умоли́ изба́витися на́мъ отъ муче́ній вѣ́чныхъ, небе́снаго же Ца́рствія чрезъ покая́ніе сподо́битися, да съ тобо́ю воспое́мъ на земли́ живы́хъ пѣ́снь Бо́гу: Аллилу́ія.

[Се́й конда́къ глаго́лется три́жды. Та́же и́косъ 1-й: Ангельски на земли́ пожи́въ... И конда́къ 1-й: Избра́нный страстоте́рпче Христо́въ...]

Моли́тва свято́му великому́ченику Ники́тѣ.

О, вели́кій страстоте́рпче Христо́въ и чудотво́рче великому́чениче Ники́то! Припа́дающе къ свято́му и чудотво́рному о́бразу твоему́, по́двиги же и чудеса́ твоя́ и мно́гое сострада́ніе твое́ къ лю́демъ прославля́юще, мо́лимъ тя́ прилѣ́жно: яви́ на́мъ, смире́ннымъ и грѣ́шнымъ, свято́е и многомо́щное твое́ заступле́ніе, се́ бо грѣ́хъ ра́ди на́шихъ не и́мамы свобо́ды ча́дъ Бо́жіихъ, е́же о потре́бахъ на́шихъ Го́спода и Влады́ку на́шего дерзнове́нно проси́ти, но тебе́ моли́твенника къ нему́ благопрія́тнаго предлага́емъ и о твое́мъ предста́тельствѣ взыва́емъ, испроси́ на́мъ у Го́спода благопотре́бныя да́ры душа́мъ и тѣлесе́мъ на́шимъ, вѣ́ру пра́вую, спасе́нія наде́жду несумнѣ́нную, любо́вь же ко всѣ́мъ нелицемѣ́рную, во искуше́ніихъ му́жество, въ злострада́ніихъ терпѣ́ніе, въ моли́твахъ постоя́нство, ду́шъ и тѣле́съ здра́віе, земли́ плодоно́сіе, возду́ха благорастворе́ніе, жите́йскихъ потре́бъ дово́льство, ми́рное и благоче́стное на земли́ житіе́, христіа́нскую житія́ кончи́ну и до́брый отвѣ́тъ на стра́шнѣмъ суди́щѣ Христо́вѣмъ. Еще́ же, о страстоте́рпче Христо́въ, у Царя́ Небе́снаго испроси́ Благочести́вѣйшему Царю́ на́шему ми́ръ, здра́віе и спасе́ніе, и на враги́ побѣ́ду и одолѣ́ніе, всему́ же богохрани́мому ца́рству Его́ благоустрое́ніе, тишину́ и благоде́нствіе. Христолюби́вому во́инству Его́ бу́ди сора́тай и помо́щникъ на враги́ и всѣ́мъ лю́демъ правосла́внымъ [Или́: Мо́лимъ тя́, страстоте́рпче Христо́въ, моли́ся Го́сподеви: стра́ждущую страну́ Россíйскую отъ лю́тыхъ безбо́жникъ и вла́сти и́хъ Госпо́дь да свободи́тъ, и да возста́витъ престо́лъ правосла́вныхъ царе́й; вѣ́рныхъ рабо́въ твои́хъ, въ ско́рби и печа́ли де́нь и но́щь вопію́щихъ къ тебѣ́, многоболѣ́зный во́пль да услы́шитъ, и да изведе́тъ отъ поги́бели живо́тъ на́шъ; всѣ́мъ же лю́демъ правосла́внымъ] яви́ твое́ свято́е заступле́ніе: боля́щія исцѣли́, скорбя́щія утѣ́ши, бѣ́дствующимъ помози́. Ей, уго́дниче Бо́жій и му́чениче долготерпѣли́вый! Не забу́ди святу́ю оби́тель твою́ и вся́ живу́щія въ не́й и подвиза́ющіяся и́нокини же и мірскíя, но поспѣши́ и́мъ въ смире́ніи и терпѣ́ніи носи́ти и́го Христо́во и отъ вся́кихъ бѣ́дъ и искуше́ній ми́лостивнѣ изба́ви. Всѣ́хъ у́бо на́съ приведи́ въ ти́хое приста́нище спасе́нія и наслѣ́дники сподо́би бы́ти пресвѣ́тлаго Ца́рствія Христо́ва святы́ми твои́ми моли́твами, да сла́вимъ и пое́мъ вели́кія щедро́ты Отца́ и Сы́на и Свята́го Ду́ха, въ Тро́ицѣ сла́вимаго и покланя́емаго Бо́га, и твое́ свято́е заступле́ніе во вѣ́ки вѣко́въ. Ами́нь.

Тропа́рь, гла́съ 4:

Кре́стъ Христо́въ, я́ко нѣ́кое ору́жіе, усе́рдно воспріи́мъ, и къ боре́нію враго́въ прите́клъ еси́, и, за Христа́ пострада́въ, послѣди́ огне́мъ свяще́нную твою́ ду́шу Го́споду пре́далъ еси́, отону́дуже и даро́въ исцѣле́нія отъ Него́ сподо́бился еси́ прія́ти, великому́чениче Ники́то. Моли́ Христа́ Бо́га спасти́ся душа́мъ на́шимъ.

Конда́къ, гла́съ 2:

Пре́лести посѣ́къ держа́ву стоя́ніемъ твои́мъ и побѣ́ды пріи́мъ вѣне́цъ во страда́льчествѣхъ твои́хъ, со а́нгелы, сла́вне, ра́дуешися, Ники́то тезоимени́тe, съ ни́ми Христа́ Бо́га моля́ непреста́нно о всѣ́хъ на́съ.

Велича́ніе:

Велича́емъ тя́, страстоте́рпче святы́й Ники́то, и чте́мъ честна́я страда́нія твоя́, я́же за Христа́ претерпѣ́лъ еси́.

Источникъ: Ака́ѳистъ свято́му великому́ченику Ники́тѣ. — М.: Сѵнода́льная Тѵпогра́фія, 1912. — 19 л.

/ Къ оглавленію раздѣла /


Наверхъ / Къ титульной страницѣ

0