Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - среда, 22 ноября 2017 г. Сейчасъ на порталѣ посѣтителей - 5.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ДОМАШНЯЯ МОЛИТВА

Препмуч. Аѳанасій, иг. Брестскій († 1648 г.)

Преподобномученик Афанасий, игумен БрестскийСв. Аѳанасій, иг. Брестскій родился около 1597 г. отъ благородныхъ и благочестивыхъ родителей. Отлично образованный, онъ, познавъ суету міра, въ 1627 г. сдѣлался инокомъ въ Вильнѣ, затѣмъ подвизался въ обителяхъ: Кутеинской, Межегородской, Дубовской и, наконецъ, сдѣланъ былъ игуменомъ Симеоновскаго монастыря въ г. Брестъ-Литовскѣ. Въ этомъ санѣ онъ явился ревностнѣйшимъ защитникомъ православія отъ нападенія католиковъ. По проискамъ іезуитовъ, онъ потерпѣлъ въ Варшавѣ заключеніе въ темницѣ, гдѣ его подвергли побоямъ и морили голодомъ. Освобожденный изъ темницы (въ 1645 г.), онъ жилъ въ Кіевѣ, а затѣмъ переселился въ Брестъ, гдѣ за признаніе незаконности уніи былъ заключенъ въ подземную темницу. Искренно и беззавѣтно преданный православію, твердый исповѣдникъ св. истины, онъ оставался непреклоненъ, не убоялся и мученической кончины и смѣло объявилъ польскому правительству гнѣвъ Божій за оскорбленіе правъ человѣчества и за защиту, оказываемую тѣмъ, которые нагло оскорбляли Православную Церковь. За это онъ былъ обезглавленъ поляками въ 1648 г. (въ ночь съ 4 на 5 сент.), въ лагерѣ польскаго воеводы, близъ села Германовичей, въ 3 верстахъ отъ Бреста. Святое и чудоточащее тѣло великаго борца за православіе, страдальчески пріявшаго смерть за вѣру Христову, вскорѣ, по указанію одного семилѣтняго мальчика, было извлечено изъ земли и съ честію перенесено православными въ церковь Пресвятыя Богородицы, въ Симеоновскій монастырь. Дни памяти св. Аѳанасія — 5 (18) сентября и 20 іюля (2 августа).

АКАѲИСТЫ

Ака́ѳистъ свято́му преподобному́ченику Аѳана́сію, игу́мену Бре́стскому.

Конда́къ 1.

Избра́ннаго Бо́гомъ отъ ю́ности побо́рника правосла́вныя святы́я вѣ́ры и прія́вшаго му́ченическій вѣне́цъ за исповѣ́даніе ея́, свята́го преподобному́ченика Аѳана́сія похва́льными пѣ́сньми почти́мъ. Ты́ же, я́ко предстоя́й предъ престо́ломъ Царя́ сла́вы, отъ вся́кихъ на́съ бѣ́дъ свободи́, да зове́мъ ти́:

Ра́дуйся, преподобному́чениче Аѳана́сіе, похвало́ и украше́ніе на́ше.

Икосъ 1.

Ра́дуйся, измла́да Бо́га возлюби́вый; ра́дуйся, за́повѣди Его́ вѣ́рно сохрани́вый.

Ра́дуйся, соблю́дшій ду́шу твою́ страстьми́ непорабоще́нну; ра́дуйся, благода́тію Бо́жію просвѣще́нный.

Ра́дуйся, вѣ́ры Христо́вы и́стинный побо́рниче; ра́дуйся, оте́ческихъ преда́ній нело́жный защи́тниче.

Ра́дуйся, му́ченическими добро́тами укра́шенный; ра́дуйся, въ свѣ́тлый черто́гъ Госпо́день прія́тый.

Ра́дуйся, преподобному́чениче Аѳана́сіе, похвало́ и украше́ніе на́ше.

Конда́къ 2.

Ви́дѣвъ суету́ житія́ мирска́го, еще́ отъ ю́ности, въ мíрѣ пребыва́я, удаля́лся еси́ сла́достей житія́ сего́, моли́твѣ же и слу́жбѣ Бо́жіей усе́рдно прилежа́ и у́мъ сво́й богомы́сліемъ возвыша́я, при́сно воспѣва́лъ еси́ Го́сподеви а́нгельскую пѣ́снь: Аллилу́ія.

Икосъ 2.

Ра́зумъ тво́й Боже́ственными уче́ньми просвѣща́я, кра́сная мíра сего́, преподобному́чениче, отри́нулъ еси́, чесо́ ра́ди, водворя́яся во оби́тель Свята́го Ду́ха гра́да Ви́льны и та́мо моли́твою и поще́ніемъ во служе́ніе Христу́ себе́ уготовля́я, душеполе́зное сокро́вище стяжа́лъ еси́. Мы́ же, твое́ высо́кое любому́дріе ублажа́я, прино́симъ ти́ похвалы́ сія́:

Ра́дуйся, прельще́нія ю́наго во́зраста побѣди́вый; ра́дуйся, отъ ю́ности житія́ богобоя́зненнаго сла́дость вкуси́вый.

Ра́дуйся, велѣ́ній Христо́выхъ измла́да исполни́телю; ра́дуйся, чистоты́ душе́вныя и тѣле́сныя усе́рдный храни́телю.

Ра́дуйся, подви́жниче, угожде́ніе Бо́гу па́че всего́ возлюби́вый; ра́дуйся, о́бразъ отверже́нія себе́ на́мъ показа́вый.

Ра́дуйся, я́ко путе́мъ приско́рбнымъ ко Христу́ послѣ́довалъ еси́; ра́дуйся, я́ко въ ра́йскія оби́тели возше́лъ еси́.

Ра́дуйся, преподобному́чениче Аѳана́сіе, похвало́ и украше́ніе на́ше.

Конда́къ 3.

Си́ла Всевы́шняго охраня́ющи тя́ непреста́нно въ житіи́ твое́мъ, я́вѣ показа́ тя, я́ко сосу́дъ избра́нный во е́же служи́ти Бо́гови и наставля́ти лю́ди ко спасе́нію. Тѣ́мже и мы́, таково́е Боже́ственное смотре́ніе о тебѣ́ зря́ще, воспѣва́емъ ку́пно съ тобо́ю хвале́бную пѣ́снь въ Тро́ицѣ сла́вимому Бо́гу: Аллилу́ія.

Икосъ 3.

Иму́щи при́сно предъ очи́ма свои́ма же́ртву Христо́ву, за грѣхи́ людскíя принесе́нную, же́ртвенно преда́лъ еси́ житіе́ твое́ въ ру́цѣ Бо́жіи и, взе́мъ кре́стъ долготерпѣ́нія и злострада́нія, Христу́ послѣ́довалъ еси́. Тѣ́мъ же и мы́, ублажа́юще христоподража́тельное житіе́ твое́, воспѣва́емъ ти́ си́це:

Ра́дуйся, въ се́рдцѣ твое́мъ о́бразъ Христа́ непреста́нно носи́вый; ра́дуйся, Христу́ рабо́тати и и́скренно Ему́ служи́ти лю́ди научи́вый.

Ра́дуйся, я́ко очеса́ми мы́сленными къ Свѣ́ту навече́рнему устремля́лся еси́; ра́дуйся, я́ко къ небеси́ путе́мъ приско́рбнымъ возше́лъ еси́.

Ра́дуйся, за́повѣдей Христо́выхъ и завѣ́товъ апо́стольскихъ усе́рднѣйшій храни́телю; ра́дуйся, спасе́ніе ду́шъ па́ствы твоя́ изря́дный рачи́телю.

Ра́дуйся, житіе́мъ твои́мъ пра́веднымъ Бо́гу угоди́вый; ра́дуйся, наслѣ́діе Ца́рствія небе́снаго богоугожде́ніемъ себѣ́ улучи́вый.

Ра́дуйся, преподобному́чениче Аѳана́сіе, похвало́ и украше́ніе на́ше.

Конда́къ 4.

Бу́рю гоне́ній воздвиго́ша врази́ проти́во оби́тели Дубо́йскія, ю́же устроя́я, содѣ́лалъ еси́, преподобному́чениче, опло́томъ вѣ́ры правосла́вныя. Ты́ же видѣ́ніемъ небе́снымъ озаре́нный, ввѣ́ривъ судьбы́ бра́тіи твоея́ Бо́жію промышле́нію, усе́рдно моля́ся съ не́ю Бо́гови, взыва́лъ Ему́: Аллилу́ія.

Икосъ 4.

Слы́шавше насе́льницы гра́да Бе́реста, о богоуго́дномъ житіи́ и́ноковъ Купяти́цкія оби́тели, проси́ша игу́мена сея́ оби́тели, да избере́тъ еди́наго изъ бра́тіи поста́вити во игу́мена оби́тели Бересте́йскія. Егда́ же бра́тія недоумѣва́ша, кому́ вда́ти же́злъ игу́менства, про́мыслъ Бо́жій жре́біемъ указа́ на тя́, я́ко досто́йный сосу́дъ Боже́ственныя благода́ти. Тѣ́мъ же и мы́, дивя́ся чу́дному промышле́нію Бо́жію о тебѣ́, достохва́льно взыва́емъ ти́:

Ра́дуйся, па́стырю, отъ Самого́ Бо́га предука́занный; ра́дуйся, нача́льниче оби́тели, свы́ше избра́нный.

Pа́дуйся, во правосла́віи бра́тію оби́тели твоея́ укрѣпи́вый; ра́дуйся, моли́твѣ и терпѣ́нію житіе́мъ твои́мъ вся́ научи́вый.

Ра́дуйся, оби́тели твоея́ честны́я отъ вра́жескихъ ко́зней охрани́телю; ра́дуйся, и насе́льниковъ земли́ Бересте́йскія въ охране́ніи вѣ́ры святы́я тве́рдый руководи́телю.

Ра́дуйся, въ по́тѣ лица́ твоего́ Бо́га ра́ди потруди́выйся; ра́дуйся, вѣ́рный ра́бе, до́брымъ дѣ́лателемъ виногра́да Христо́ва яви́выйся.

Ра́дуйся, преподобному́чениче Аѳана́сіе, похвало́ и украше́ніе на́ше.

Конда́къ 5.

Боготе́чной звѣздѣ́ подо́бенъ бы́лъ еси́ преподобному́чениче Аѳана́сіе, въ житіи́ твое́мъ дѣя́ньми и уче́ньми до́брѣ па́ству твою́ назида́я и пу́ть и́стинный къ го́рнему Іерусали́му е́й указу́я. Тѣ́мъ же и ны́нѣ на небесѣ́хъ сія́еши сла́вою вѣ́чною и ку́пно со ли́ки пра́ведныхъ воспѣва́еши хвале́бную пѣ́снь Бо́гови: Аллилу́ія.

Икосъ 5.

Ви́дѣвъ, я́ко въ защище́ніи вѣ́рныхъ ча́дъ твои́хъ не довлѣ́етъ надѣ́ятися на си́лы человѣ́ческія, все́ упова́ніе твое́ возложи́лъ еси́ на по́мощь Засту́пницы ро́да христіа́нскаго, моля́ся предъ о́бразомъ Ея́ святы́мъ, имену́емымъ Ма́тери Бо́жія Купяти́цкія и въ ча́съ те́плыя моли́твы твоея́ услы́шалъ еси́ гла́съ Ея́, повелѣва́ющій ти́ бо́дрственно за вѣ́ру святу́ю стоя́ти и па́ству твою́ предъ си́льными мíра сего́ защища́ти. Сего́ ра́ди вѣ́рніи научи́шася воспѣва́ти тебѣ́ такова́я:

Ра́дуйся, въ житіи́ земнѣ́мъ слы́шати гла́съ Пречи́стыя Влады́чицы сподо́бивыйся; ра́дуйся, гла́сомъ Ея́ служи́ти Бо́гу призва́нный.

Ра́дуйся, въ защище́ніи оби́димымъ крѣ́пкое забра́ло; ра́дуйся, си́льнымъ мíра сего́ небоя́зненный суда́ Бо́жія провозвѣсти́телю.

Ра́дуйся, вожделѣ́ній иновѣ́рія разруши́телю; ра́дуйся, пра́вды Бо́жія въ сердца́хъ возстаю́щихъ и вражду́ющихъ на святу́ю вѣ́ру утверди́телю.

Ра́дуйся, па́стырю до́брый, ду́шу свою́ положи́ти за о́вцы своя́ изво́ливый; ра́дуйся, за пра́вду гоне́нія и ско́рби претерпѣ́вый.

Ра́дуйся, преподобному́чениче Аѳана́сіе, похвало́ и украше́ніе на́ше.

Конда́къ 6.

Проповѣ́дникъ уче́нія Христо́ва вои́стинну яви́лся еси́, преподобному́чениче Аѳана́сіе, сло́вомъ твои́мъ въ вѣ́рѣ наставля́я, житіе́мъ во благоче́стіи вѣ́рныхъ утвержда́я и всѣ́хъ поуча́я съ любо́вію пѣ́ти Бо́гу: Аллилу́ія.

Икосъ 6.

Возсія́лъ еси́, преподобному́чениче, я́ко свѣти́льникъ, свѣтя́й на свѣ́щницѣ и́стиныя вѣ́ры Христо́вы, высото́ю ума́ твоего́ озаря́я ду́ши вѣ́рныхъ и разгоня́я тму́ нече́стія и невѣ́рія, сего́ ра́ди избра́ша тя́ лю́діе, я́ко побо́рника вѣ́ры сея́, предста́ти предъ лице́мъ си́льныхъ мíра сего́ и огради́ти ю́ отъ злоко́зненныхъ навѣ́товъ возстаю́щихъ на ню́. Тѣ́мже и мы́ досто́йно ублажа́емъ тя́ похвала́ми си́ми:

Ра́дуйся, су́щимъ въ напа́стѣхъ ско́рый помо́щниче; ра́дуйся, оби́димымъ крѣ́пкій засту́пниче.

Ра́дуйся, па́ствы твоея́ во благоустрое́ніи житія́ церко́внаго му́дрый руководи́телю; ра́дуйся, малоду́шіемъ коле́блемыхъ вѣ́рный укрѣпи́телю.

Ра́дуйся, вражде́бныхъ навѣ́товъ достохва́льный отрази́телю; ра́дуйся, безпо́мощныхъ при́сный защи́тителю.

Ра́дуйся, огра́дою крѣ́пкою оби́димыхъ яви́выйся; ра́дуйся, предъ лице́мъ си́льныхъ мíра сего́ изрещи́ пра́вду не убоя́выйся.

Ра́дуйся, преподобному́чениче Аѳана́сіе, похвало́ и украше́ніе на́ше.

Конда́къ 7.

Хотя́й непреста́нно житіе́мъ свои́мъ Бо́гу благоугожда́ти, подвигополо́жникъ бы́лъ еси́, преподобному́чениче Аѳана́сіе, неосла́бный о́бразъ бра́тіи твое́й подая́ въ трудѣ́хъ, бдѣ́ніихъ и поще́ніихъ, съ любо́вію поуча́лъ еси́ и́хъ, призыва́я служи́ти Бо́гу и пѣ́ти Тому́: Аллилу́ія.

Икосъ 7.

Но́ваго по́двига и́ноческаго житія́ вожделѣ́въ, не отри́нулъ еси́ проше́нія и́ноковъ оби́тели Дубо́йскія возложи́ти на ся́ бре́мя во благоустрое́ніи ея́ и, ше́дъ во оби́тель сію́, узрѣ́лъ еси́ на пути́ му́жа убо́га, е́ле жи́ва су́ща и, самаряни́ну милосе́рдому подо́бящися, подъя́лъ еси́ его́ на раме́на твоя́ и не́слъ еси́, внима́я неизрече́ннымъ его́ глаго́ломъ. Се́й же му́жъ, внеза́пу скры́выйся отъ тебе́, назва́ся сладча́йшимъ и́менемъ Іису́съ. Сего́ ра́ди и мы́, та́йнѣ твоего́ боговидѣ́нія дивя́щеся, со умиле́ніемъ тебѣ́ вопіе́мъ:

Ра́дуйся, ко милосе́рдію ду́шу твою́ предуготова́вый; ра́дуйся, о́бразъ сострада́нія лю́демъ собо́ю яви́вый.

Ра́дуйся, глаго́лы Госпо́дни слы́шати сподо́бивыйся; ра́дуйся, открове́ніе ди́вныхъ та́инъ отъ Бо́га воспрія́вый.

Ра́дуйся, богови́дче Христо́въ; ра́дуйся, богови́дцу Моисе́ови уподо́бивыйся.

Ра́дуйся, та́инниче Бо́жій, еще́ на земли́ небе́сныхъ бла́гъ вкуси́вый; ра́дуйся, я́ко Са́мъ Пастыренача́льникъ Іису́съ призва́ти тя́ на по́двигъ благоволи́вый.

Ра́дуйся, преподобному́чениче Аѳана́сіе, похвало́ и украше́ніе на́ше.

Конда́къ 8.

Стра́ненъ и безу́менъ показа́лся, еси́ лю́демъ, преподобному́чениче, егда́, Христа́ ра́ди юро́дство воспрія́въ на сто́гнахъ ца́рствующаго гра́да и́стину святы́я правосла́вныя вѣ́ры защища́я и гнѣ́вомъ Бо́жіимъ отше́дшихъ отъ сея́ и́стины устраша́я, восклица́лъ еси́: «го́ре отсту́пникомъ и невѣ́рнымъ! вѣ́ра бо правосла́вная я́ко со́лнце возсія́етъ!» Мы́ же словеса́ сія́, я́ко проро́чествіе пріе́млюще, моли́твенно къ тебѣ́ взыва́емъ: объюродѣ́вшій у́мъ на́шъ на стезю́ и́стины напра́ви, да съ тобо́ю взыва́емъ Бо́гу: Аллилу́ія.

Икосъ 8.

«Ве́сь еси́ жела́ніе мое́ и ра́дость моя́, сладча́йшій Іису́се», — взыва́лъ еси́ ко Го́споду, преподобному́чениче, егда́ веде́нъ бы́лъ на мѣ́сто муче́нія твоего́: ду́шу бо твою́ преда́въ въ ру́цѣ Бо́жіи, тѣ́ло твое́ сла́дцѣ преда́лъ еси́ въ ру́цѣ мучи́телей твои́хъ. Такова́я любо́вь твоя́ ко Го́споду и кро́тость твоя́ мучи́телей смути́, и сего́ ра́ди еди́нъ отъ во́инъ, отъ его́же руки́ пови́ненъ бы́лъ еси́ прія́ти сме́рть, дивя́ся му́жеству твоему́, благослове́нія оте́ческаго и проще́нія за сіе́ безу́мное дѣ́ло у тебе́ испроси́. Мы́ же, благоговѣ́йно воспомина́юще сіе́, похвала́ми ублажа́емъ тя́ си́ми:

Ра́дуйся, любо́вію ко Христу́, а́ки многоцѣ́ннымъ би́серомъ, ду́шу твою́ украси́вый; ра́дуйся, дѣ́йственнымъ проповѣ́даніемъ сея́ любве́ вѣ́рный пу́ть во святы́я на́мъ указа́вый.

Ра́дуйся, му́жественнымъ смире́ніемъ враго́въ твои́хъ удиви́вый; ра́дуйся, кро́тостію твое́ю ослѣпле́ннымъ враждо́ю къ тебѣ́ мучи́телемъ у́мное прозрѣ́ніе дарова́вый.

Ра́дуйся, му́жественно сме́рть претерпѣ́вый; ра́дуйся, небе́сную Іису́сову сла́дость вкуси́вый.

Ра́дуйся, немо́лчная исповѣ́дниковъ сла́во; ра́дуйся, преди́вная му́чениковъ похвало́.

Ра́дуйся, преподобному́чениче Аѳана́сіе, похвало́ и украше́ніе на́ше.

Конда́къ 9.

Вси́ ви́дящи тя́ въ темни́чнѣмъ заточе́ніи, преподобному́чениче, зѣло́ дивля́хуся твоему́ непоколеби́мому стоя́нію за вѣ́ру и́стинную святу́ю, завѣ́ты бо оте́ческія соблюда́я, не то́кмо не устраши́лся еси́ у́зъ, оплева́ній и поруга́ній, но му́жественно вся́ сія́ терпя́ за Христа́, сле́знаго испо́лнившися умиле́нія, благода́рственно воспѣва́лъ еси́ Бо́гу: Аллилу́ія.

Икосъ 9.

Витíи многовѣща́нніи не возмо́гутъ изрещи́ ра́дости тоя́ вели́кія, е́юже испо́лнени бы́ша сердца́ дости́гшихъ вѣ́рно чти́ти святу́ю па́мять твою́: сíи, весе́ліемъ одержи́міи, помы́слиша воздви́гнути хра́мъ на мѣ́стѣ му́ченическія кончи́ны твоея́, мѣ́сто же сіе́ и по тріе́хъ стѣ́хъ лѣ́тѣхъ по кончи́нѣ твое́й сохра́нно бѣ́ въ па́мяти вѣ́рныхъ. Те́рнъ бо, прора́стшій на кро́ви твое́й, я́ко свидѣ́тель нело́жный, соблюда́ше мѣ́сто сіе́ отъ людска́го забве́нія, и свѣща́ во гро́бѣ твое́мъ, ю́же имѣ́лъ еси́ въ ру́цѣхъ твои́хъ въ ча́съ кончи́ны твоея́, и́стиствова мѣ́сто твоего́ упокое́нія. О се́мъ у́бо ра́дующеся, вѣ́рніи восклица́ху ти́:

Ра́дуйся, путе́мъ терни́стымъ житія́ твоего́ грѣхо́вная те́рнія души́ твоея́ умертви́вый; ра́дуйся, я́ко те́рніемъ прора́стшимъ на гро́бѣ твое́мъ, мѣ́сто упокое́нія твоего́ показа́вый и тѣ́мъ ра́дость ве́лію вѣ́рнымъ твои́мъ яви́вый.

Ра́дуйся, храни́телю обы́чаевъ церко́вныхъ, со свѣще́ю возжже́нною сме́рть воспрія́вый; ра́дуйся, въ зна́меніи свѣщи́ возжже́нныя о́бразно та́йну сія́нія сла́вы твоея́ предобрази́вый.

Ра́дуйся, я́ко хра́момъ, со́зданнымъ въ па́мять твою́ на гро́бѣ твое́мъ, сла́вно и́мя твое́ отъ люде́й прославля́ется; ра́дуйся, я́ко на гро́бѣ твое́мъ, я́коже и дре́вле на гробѣ́хъ му́ченическихъ, же́ртва Христо́ва за грѣхи́ людскíя прино́сится.

Ра́дуйся, неизсяка́емый исто́чниче блаже́нныя па́мяти о тебѣ́ па́мяти на земли́; ра́дуйся, цвѣ́томъ нетлѣ́нія укра́шенный на небеси́.

Ра́дуйся, преподобному́чениче Аѳана́сіе, похвало́ и украше́ніе на́ше.

Конда́къ 10.

Спасти́ хотя́й ду́шу твою́, о житіи́ се́мъ привре́меннѣмъ нерадѣ́лъ еси́, преподобному́чениче, егда́ бо на тя́ осужде́ніе сме́рти изы́де, съ ра́достію вели́кою преда́лъ еси́ ду́шу въ ру́цѣ Бо́гови, воспѣва́я Ему́, въ му́ченическомъ по́двизѣ тебе́ укрѣпля́ющему, хвале́бную пѣ́снь: Аллилу́ія.

Икосъ 10.

Стѣно́ю огражде́нія Це́ркви Правосла́внѣй обѣща́лся еси́ бы́ти, проро́чески на сіе́ указу́я въ предсме́ртнемъ завѣ́тѣ ученико́мъ твои́мъ: «та́мо, идѣ́же тѣ́ло мое́ изъя́звленное и остру́пленное за и́мя Бо́жіе поло́жено бу́детъ, вѣ́ра правосла́вная процвѣте́тъ, я́ко кри́нъ посредѣ́ те́рнія и я́ко и́скра въ теплѣ́ сокры́тая яви́тся, возсія́етъ и повсю́ду освѣти́тъ». Сего́ ра́ди и мы́, сла́вяще Бо́га, ди́внаго во святы́хъ Свои́хъ, и тя́ ублажа́емъ:

Ра́дуйся, я́ко за и́стину ско́рби мно́гія и я́звы претерпѣ́лъ еси́; ра́дуйся, я́ко за исповѣ́даніе и защище́ніе вѣ́ры правосла́вныя нетлѣ́ніе моще́й твои́хъ во блаже́ннѣмъ упокое́ніи прія́лъ еси́.

Ра́дуйся, духо́вно слѣпотству́ющихъ и въ зако́нѣ Госпо́дни заблужда́ющихъ пречу́дный руководи́телю; ра́дуйся, всѣ́хъ напа́стей и бѣ́дъ, обурева́ющихъ вѣ́рное ста́до Христо́во, отрази́телю.

Ра́дуйся, прославле́ніемъ моще́й твои́хъ превели́кія ра́дости на́съ испо́лнивый; ра́дуйся, и невѣ́рныя нетлѣ́ніемъ тѣлесе́ твоего́ къ позна́нію и́стины правосла́вія приведы́й.

Ра́дуйся, твои́мъ прорече́ніемъ въ наде́жди торжества́ вѣ́ры и́стинныя на́съ укрѣпи́вый; ра́дуйся, и по успе́ніи твое́мъ превели́кимъ сея́ вѣ́ры защи́тникомъ себе́ яви́вый.

Ра́дуйся, преподобному́чениче Аѳана́сіе, похвало́ и украше́ніе на́ше.

Конда́къ 11.

Пѣ́ніе всеумиле́нное принесо́ша Бо́гови ученицы́ твои́, преподобному́чениче, егда́ обрѣто́ша сокры́то отъ люде́й, чту́щихъ па́мять твою́, мѣ́сто твоего́ упокое́нія, и мо́щи твои́ нетлѣ́нно пребыва́ющія, оба́че и мы́, взира́юще на такову́ю ми́лость Бо́жію на́мъ я́вленную, благода́рственно вопіе́мъ просла́вившему тя́ Бо́гу: Аллилу́ія.

Икосъ 11.

Свѣти́льникъ житія́ благоче́стнаго вѣ́рному ста́ду твоему́ бы́лъ еси́, преподобному́чениче Аѳана́сіе, въ души́ твое́й Боже́ственная бога́тства Ду́ха Свята́го собра́въ, за Христа́ му́ченичество исповѣ́данія прія́лъ еси́. Тѣ́мже и мы́, моли́твами твои́ми просвѣ́щшеся, вопіе́мъ ти́:

Ра́дуйся, свѣти́льниче благода́тный житія́ благоче́стнаго; ра́дуйся, вѣ́ру, наде́жду и любо́вь до конца́ сохрани́вый.

Ра́дуйся, со Христо́мъ, Его́же отъ ю́ности возлюби́лъ еси́, на вѣ́ки соедини́выйся; ра́дуйся, мзду́ ве́лію за житіе́ твое́ сла́вное отъ Него́ воспрія́вый.

Ра́дуйся, звѣздо́ лучеза́рная надъ земле́ю на́шею возсія́вшая; ра́дуйся, Ца́рствія небе́сного и сла́вы вѣ́чныя неслѣ́дниче.

Ра́дуйся, нетлѣ́ніемъ моще́й твои́хъ о́бразъ воскресе́нія на́шего яви́вый; ра́дуйся, я́ко и́мя твое́ по все́й странѣ́ на́шей отъ конца́ въ коне́цъ прославля́ется.

Ра́дуйся, страны́ на́шея крѣ́пкое огражде́ніе; ра́дуйся, при́сное предъ Бо́гомъ на́ше защище́ніе.

Ра́дуйся, преподобному́чениче Аѳана́сіе, похвало́ и украше́ніе на́ше.

Конда́къ 12.

Благода́ть цѣльбоно́сна дана́ отъ Бо́га нетлѣ́нному твоему́ тѣлеси́, егда́ бо о́трокъ, на сме́ртнѣмъ одрѣ́ лежа́щъ, прикосну́ся ра́цѣ твое́й, а́біе исцѣлѣ́. Благода́ти сея́, преподобному́чениче Аѳана́сіе, и на́мъ, немощны́мъ, испроси́, да и мы́ здра́ви су́ще тѣ́ломъ и ду́хомъ, въ се́й и бу́дущей жи́зни о тебѣ́ пое́мъ Бо́гу: Аллилу́ія.

Икосъ 12.

Пою́ще твое́ сла́вное и непреобори́мое стоя́ніе за вѣ́ру и́стинную, ублажа́емъ, преподобному́чениче, и святу́ю твою́ кончи́ну, е́юже на земли́ и на небеси́ просла́вился еси́, и прино́симъ ти́ похвалы́ сія́:

Ра́дуйся, непоколеби́мый сто́лпе вѣ́ры Христо́вой и оте́ческихъ преда́ній; ра́дуйся, я́ко тобо́ю Це́рковь вѣ́рныхъ просвѣща́ется.

Ра́дуйся, вѣ́рный ра́бе Христо́въ, любо́вь ко Христу́ свое́ю кро́вію запечатлѣ́вый; ра́дуйся, за вѣ́ру и страда́нія въ ра́дость Го́спода прія́тый.

Ра́дуйся, вѣ́рнымъ ча́домъ твои́мъ и́стинный пу́ть во оби́тели показа́вый; ра́дуйся, во оби́телѣхъ Христо́выхъ на ско́рби на́ши призира́ющій.

Ра́дуйся, отъ вра́гъ ви́димыхъ и неви́димыхъ крѣ́пкій на́шъ засту́пниче; ра́дуйся, даро́ванной отъ Го́спода ми́лости неоску́дный исто́чниче.

Ра́дуйся, душе́вныхъ и тѣле́сныхъ неду́говъ на́шихъ цѣле́бниче; ра́дуйся, всеусе́рдный ко спасе́нію на́шъ наста́вниче.

Ра́дуйся, преподобному́чениче Аѳана́сіе, похвало́ и украше́ніе на́ше.

Конда́къ 13.

О, всехва́льный уго́дниче Христо́въ, преподобному́чениче Аѳана́сіе, пріими́ сіе́, ма́лое моле́ніе на́ше, въ похвалу́ тебѣ́ приноси́мое! Бу́ди неосла́бный моли́твенникъ на́мъ предъ престо́ломъ Всевы́шняго, и те́плымъ предста́тельствомъ твои́мъ изба́ви на́съ отъ зо́лъ земны́хъ и гряду́щаго муче́нія, да съ тобо́ю воспѣва́емъ Бо́гу: Аллилу́ія.

[Се́й конда́къ глаго́лется три́жды. Та́же и́косъ 1-й: Ангельскій чи́нъ воспрія́вши... И конда́къ 1-й: Избра́ннаго Бо́гомъ...]

Моли́тва свято́му преподобному́ченику Аѳана́сію, игу́мену Бре́стскому. [1]

О, вели́кій уго́дниче Христо́въ, святы́й преподобному́чениче Аѳана́сіе! Къ тебѣ́ мы́, грѣ́шніи и смиpе́ніи, я́ко те́плому на́шему засту́пнику и ско́рому помо́щнику, моли́твенно прибѣга́емъ и изъ глубины́ се́рдца взыва́емъ: при́зри на ны́ ско́ро и умоли́ человѣколю́бца Бо́га, да не осу́дитъ на́съ, грѣ́шныхъ, по беззако́ніямъ на́шимъ, но да сотвори́тъ съ на́ми по вели́цѣй Свое́й ми́лости. Охрани́ на́съ свои́мъ заступле́ніемъ отъ облежа́щаго ны́ суему́дрія и неправовѣ́рія и, я́ко па́стырь до́брый, упаси́ заблу́ждшія о́вцы ста́да Христо́ва и во дворы́ Госпо́дни сія́ всели́. Огради́ на́съ отъ собла́зновъ, ересе́й и раско́ловъ, и наста́ви тве́рдо въ вѣ́рѣ правосла́внѣй подвиза́тися. Потщи́ся, ско́рый о на́съ предста́телю, благопрія́тнымъ твои́мъ хода́тайствомъ умоли́ти Го́спода, да ниспо́слетъ на́мъ ти́хое и богоуго́дное житіе́, уврачу́етъ Свое́ю благода́тію на́ша болѣ́зни душе́вныя и тѣле́сныя, согрѣ́етъ на́ша сердца́ любо́вію дру́гъ ко дру́гу и сотвори́тъ ны́ братолю́бны и единомы́сленны. Испроси́ та́кожде у Го́спода и всего́ потре́бнаго для житія́ на́шего тѣле́снаго: земли́ плодоро́дія, благорастворе́нія возду́ховъ и ми́рнаго устрое́нія. Страну́ на́шу, ве́си и гра́ды охрани́ моли́твами твои́ми отъ огня́, пото́па, тру́са, вра́жескаго наше́ствія и вну́треннихъ нестрое́ній. Егда́ же приспѣ́етъ ча́съ кончи́ны на́шея, утверди́ въ на́съ па́мять сме́ртную, да и мы́, въ и́стиннѣмъ покая́ніи и чи́стѣмъ свѣ́дѣніи со́вѣсти на́шея предста́вше ко Го́споду, сподо́бимся десна́го стоя́нія и со всѣ́ми святы́ми воспое́мъ сла́ву Отцу́ и Сы́ну и Свято́му Ду́ху во вѣ́ки вѣко́въ. Ами́нь.

Тропа́рь, гла́съ 2:

Блаже́нъ еси́, о́тче на́шъ Аѳана́сіе, я́ко вѣ́рно пожи́лъ еси́, стоя́ бо́дренно за святу́ю Восто́чную вѣ́ру, со умиле́ніемъ при́сно поя́ несѣда́льное Пречи́стѣй, заповѣ́дуя никому́же наруша́ти Правосла́вныя вѣ́ры святы́я, пострада́въ за свидѣ́тельство и́стины да́же до сме́рти. Мы́ же, чту́ще святы́ню твою́, со дерзнове́ніемъ взыва́емъ ти́: о́тче на́шъ, преподобному́чениче Аѳана́сіе, похвало́ и украше́ніе на́ше.

Конда́къ, гла́съ 4:

Мона́шескаго житія́ украше́ніе и му́чениковъ красоту́ яви́лъ себе́ житіе́мъ твои́мъ, Аѳана́сіе, и, я́ко со́лнце пресвѣ́тлое, лю́демъ правосла́внымъ возсія́лъ еси́. Тѣ́мже и Христо́съ да́ромъ чуде́съ обогати́ тя, да чту́ще пресвѣ́тлую па́мять твою́, зове́мъ ти́: помина́й ста́до твое́ моли́твами твои́ми, преподо́бне.

Велича́ніе:

Ублажа́емъ тя́, святы́й преподобному́чениче Аѳана́сіе, и чте́мъ святу́ю па́мять твою́, наста́вниче мона́ховъ и собесѣ́дниче а́нгеловъ.

Примѣчаніе:
[1] Молитва св. преподобномученику Аѳанасію приводится по изданію: «Акаѳисты русскимъ святымъ. Томъ 1-й: А-Г. СПб.: Издательство «Титулъ», 1995, С. 401-402.»

Источникъ: Житіе и страданія св. преподобномученика Аѳанасія, игумена Брестскаго (1595-1648). Составилъ протоіерей Константинъ Зноско. — Jordanville: Тѵпографія преп. Іова Почаевскаго, 1992. — С. 13-33.

/ Къ оглавленію раздѣла /


Наверхъ / Къ титульной страницѣ

0