Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - четвергъ, 21 сентября 2017 г. Сейчасъ на порталѣ посѣтителей - 19.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ДОМАШНЯЯ МОЛИТВА

О иконѣ Божіей Матери «Всѣхъ скорбящихъ Радости».

Икона Божией Матери Всех скорбящих РадостиЭта св. икона прославилась въ 1688 г. Сестра патр. Іоакима, Евѳимія, жившая въ Москвѣ, на Ордынкѣ, и страдавшая долгое время тяжелою неизлѣчимою раною въ боку такъ, что даже видны были внутренности, будучи еле жива, однажды, во время молитвы къ Спасителю и Матери Божіей, услышала голосъ, повелѣвшій ей помолиться предъ находившейся въ мѣстномъ приходскомъ храмѣ Преображенія иконою «Всѣхъ скорбящихъ Радость». Когда былъ отслуженъ молебенъ предъ св. иконою, принесенной въ домъ Евѳиміи, и больную окропили св. водою, она мгновенно почувствовала себя исцѣленною и сама встала съ постели. Это чудо совершилось 24 октября, и въ память его въ этотъ день былъ учрежденъ праздникъ «Всѣхъ скорбящихъ Радость». Матерь Божія на этой иконѣ изображена во весь ростъ; по обѣимъ сторонамъ Богоматери изображены два ангела, а у ногъ Ея молящіеся и притекающіе къ Ней за помощію и исцѣленіемъ. Многократные случаи чудотвореній, открывавшихся въ исцѣленіяхъ тяжкихъ болѣзней и въ другихъ знаменіяхъ подаваемой по молитвѣ предъ св. иконой небесной помощи, привлекаютъ вѣрующихъ и нынѣ въ молитвенное заступленіе Богоматери.

АКАѲИСТЫ

Ака́ѳистъ (второй) Пресвятѣ́й Богоро́дицѣ «Всѣ́хъ скорбя́щихъ Ра́дости».

Конда́къ 1.

Взбра́нной Воево́дѣ побѣди́тельная, я́ко изба́вльшеся отъ злы́хъ, благода́рственную пѣ́снь прино́симъ Ти́, раби́ Твои́, Богоро́дице. Ты́ же, я́ко иму́щая держа́ву непобѣди́мую, во вся́кихъ ско́рбѣхъ подъ Сво́й покро́въ и заступле́ніе на́съ пріими́ и сохрани́ неврежде́нныхъ, да ра́достно зове́мъ Ти́:

Ра́дуйся, Благода́тная Дѣ́во, подаю́щая всѣ́мъ скорбя́щимъ ра́дость.

Икосъ 1.

Ра́дуйся, отъ а́нгела ра́дость мíру пріи́мшая; ра́дуйся, Невмѣсти́маго всѣ́ми во чре́вѣ заче́ншая.

Ра́дуйся, Творца́ и Бо́га всѣ́хъ ро́ждшая; ра́дуйся, Ма́терію Его́ бы́ти сподо́бльшаяся.

Ра́дуйся, арха́нгельскаго гла́са исполне́ніе; ра́дуйся, кля́твы на́шея истребле́ніе.

Ра́дуйся, Ада́ма па́ки въ ра́й вве́дшая; ра́дуйся, Еву отъ вѣ́чнаго рыда́нія изба́вльшая.

Ра́дуйся, отъ у́зъ а́довыхъ свобожде́ніе; ра́дуйся, пре́лести вся́кія сокруше́ніе.

Ра́дуйся, ду́шъ на́шихъ спасе́ніе; [ра́дуйся, отъ у́зъ грѣхо́вныхъ свобожде́ніе].

Ра́дуйся, Благода́тная Дѣ́во, подаю́щая всѣ́мъ скорбя́щимъ ра́дость.

Конда́къ 2.

Ви́дя Госпо́дь Бо́гъ добро́ту души́ Твоея́, Пренепоро́чная Дѣ́во, избра́ Тя въ Ма́терь Предвѣ́чнаго Сы́на Своего́, и на́мъ вѣ́рнымъ дарова́ оби́димымъ Засту́пницу, печа́льнымъ Утѣше́ніе, скорбя́щимъ Ра́дость. Пріими́, Влады́чице Богоро́дице, сіе́ на́ше моле́ніе, призыва́ющихъ и́мя Твое́ и Сы́ну Твоему́ и Бо́гу на́шему зову́щихъ: Аллилу́ія.

Икосъ 2.

Ра́зумъ имѣ́емъ неразумѣ́нный, ка́ко досто́йно возвели́чати Тя́, вы́сшую серафи́мъ и херуви́мъ честнѣ́йшую, та́инствомъ рождества́ Сына́ Твоего́ и Бо́га? Онъ бо Тя́ просла́вити восхотѣ́ и на́съ, земноро́дныхъ, научи́ прибѣга́ти къ заступле́нію Твоему́. И мы́ Тебѣ́ во умиле́ніи се́рдца вопіе́мъ всегда́ си́це:

Ра́дуйся, Жизнода́вца всѣ́хъ и Бо́га во чре́во Твое́ пріи́мшая; ра́дуйся, рождество́мъ Бо́га и человѣ́ка соедини́вшая.

Ра́дуйся, христіа́нскаго ро́да обновле́ніе; ра́дуйся, отъ истлѣ́нія на́ше избавле́ніе.

Ра́дуйся, ро́ждшая па́че всѣ́хъ Краснѣ́йшаго добро́тами; ра́дуйся, увѣ́рившая на́съ Его́ щедро́тами.

Ра́дуйся, па́че со́лнечнаго сія́нія свѣтлѣ́йшая; ра́дуйся, Ма́ти, вы́сшая всѣ́хъ матере́й и святѣ́йшая.

Ра́дуйся, пріе́млющая моле́нія вѣ́рныхъ; ра́дуйся, снабдѣва́ющая неоску́дно въ житіи́ бѣ́дныхъ.

Ра́дуйся, ско́рби душе́вныя и тѣле́сныя разрѣша́ющая; ра́дуйся, ра́достію ду́ши на́ша напая́ющая.

Ра́дуйся, Благода́тная Дѣ́во, подаю́щая всѣ́мъ скорбя́щимъ ра́дость.

Конда́къ 3.

Си́льна еси́ во все́мъ упроси́ти Сы́на Твоего́ и Бо́га на́шего: преклоне́но бо у́хо Его́ ко у́слышанію моле́нія Твоего́ о на́съ. Ты́, Влады́чице, ели́ка восхо́щеши, вся́ упроси́ти мо́жеши, я́ко Ма́ти Го́спода, воскре́сшаго изъ ме́ртвыхъ и возне́сшагося на не́бо, на́съ же земны́хъ сподо́бльшаго всегда́ пѣ́ти о Тебѣ́ Бо́гу: Аллилу́ія.

Икосъ 3.

Имѣ́емъ мы́ Тебе́, Влады́чице Богоро́дице, вѣ́рную Хода́таицу спасе́нія на́шего. Тебѣ́ бо Еди́нѣй даде́ся, я́ко Ма́тери, благода́ти да́ръ отъ Сы́на Твоего́ и Бо́га на́шего: щедро́ты излива́ти, и на́съ спаса́ти и заступа́ти во всѣ́хъ на́шихъ ско́рбѣхъ, бѣда́хъ и напа́стѣхъ. Сего́ ра́ди благода́рственно Тебѣ́ вопіе́мъ:

Ра́дуйся, цари́цемъ Цари́це и ма́теремъ Ма́ти милосе́рдая; ра́дуйся, Защи́тнице ро́да на́шего всенаде́жная.

Ра́дуйся, у престо́ла Царя́ всѣ́хъ и Бо́га стоя́щая; ра́дуйся, моле́ніе о на́съ Ему́ принося́щая.

Ра́дуйся, я́ко ру́цѣ Свои́ къ Сы́ну Твоему́ и Бо́гу на́шему простира́еши; ра́дуйся, я́ко на́ши моли́твы Ему́ возсыла́еши.

Ра́дуйся, я́ко вѣ́рно прибѣга́ющихъ къ Тебѣ́ во все́мъ сохраня́еши; ра́дуйся, я́ко смире́ніе и кро́тость въ ду́ши на́ши вселя́еши.

Ра́дуйся, преклоня́ющая гнѣ́въ Бо́жій на ми́лость; ра́дуйся, обраща́ющая ско́рби на́ши на ра́дость.

Ра́дуйся, въ бѣда́хъ и напа́стѣхъ на́ше избавле́ніе; ра́дуйся, ско́рое больны́мъ исцѣле́ніе.

Ра́дуйся, Благода́тная Дѣ́во, подаю́щая всѣ́мъ скорбя́щимъ ра́дость.

Конда́къ 4.

Бу́ря мно́гихъ бѣ́дъ, напа́стей и скорбе́й нахо́дитъ на ны́, мы́ же не́мощны терпѣ́ти и носи́ти и́хъ, грѣ́хъ ра́ди на́шихъ, и не и́мамы ина́го врачева́нія, ра́звѣ Тебѣ́, о, Богома́ти Пречи́стая! Ничто́же бо Тебѣ́ невозмо́жно, и а́ще Ты́ восхо́щеши, мо́жеши отъ бѣ́дъ изба́вити и спасти́ на́съ, вѣ́рно и умиле́нно къ Тебѣ́ прибѣга́ющихъ, и моля́щихся, и со слеза́ми вопію́щихъ Бо́гу: Аллилу́ія.

Икосъ 4.

Слы́ша Госпо́дь моли́тву Твою́, я́ко ма́тернюю, о на́съ, и прія́тъ ю́, и вся́ Твоя́ проше́нія исполня́етъ. Мы́ же, неизрече́ннаго милосе́рдія Твоего́ неизчерпа́емую бе́здну врачева́нія душе́внаго и тѣле́снаго ви́дѣвше, дерза́емъ глаго́лати си́це:

Ра́дуйся, врачевство́ грѣхо́вныхъ на́шихъ страсте́й, и́мъ же исцѣля́емся; ра́дуйся, наде́ждо бла́гъ вѣ́чныхъ, е́ю же подкрѣпля́емся.

Ра́дуйся, Ея́ же моли́твою живе́мъ и пита́емся; ра́дуйся, я́ко щедро́тами отъ Тебе́, па́че ме́да и со́та, наслажда́емся.

Ра́дуйся, Угля Боже́ственнаго кади́льнице всезлата́я; ра́дуйся, я́ко благово́нія арома́ты въ душа́хъ на́шихъ сохраня́еши.

Ра́дуйся, я́ко грѣхо́вныя во́лны Тобо́ю ста́нутъ въ тишину́; ра́дуйся, я́ко ко спасе́нію ду́ши на́ши просвѣща́еши.

Ра́дуйся, нему́дрымъ открыва́ющая му́дрость; ра́дуйся, младе́нцевъ сохраня́ющая въ крѣ́пости.

Ра́дуйся, я́ко соврати́вшихся па́ки на пу́ть вѣ́ренъ направля́еши; ра́дуйся, я́ко всѣ́хъ лише́нныхъ Бо́жія ми́лости Свое́ю моли́твою исправля́еши.

Ра́дуйся, Благода́тная Дѣ́во, подаю́щая всѣ́мъ скорбя́щимъ ра́дость.

Конда́къ 5.

Боготе́чную звѣзду́ яви́ на́мъ Госпо́дь Бо́гъ Тебе́, избра́нную Себѣ́ въ Ма́терь, пріе́млющую земноро́дныхъ моле́нія: вся́къ бо ли́къ небе́сныхъ и земны́хъ ублажа́етъ Тя́, Пренепоро́чную Ма́терь Христа́ Бо́га на́шего. Сего́ ра́ди и мы́, грѣ́шніи, вѣ́дуще Тя́ ско́рую Засту́пницу во вся́кихъ злы́хъ нахожде́ніяхъ, ско́рбѣхъ и неду́зѣхъ, благода́рственно о се́мъ Бо́гу вопіе́мъ: Аллилу́ія.

Икосъ 5.

Ви́дяще мно́жество чуде́съ Твои́хъ, ка́ко больны́хъ и неду́жныхъ исцѣля́еши, отъ бѣсны́хъ бѣ́сы прогоня́еши и отъ оби́дъ защища́еши, вопіе́мъ Ти́, Влады́чице:

Ра́дуйся, звѣздо́, сія́ніемъ, па́че со́лнца, небеса́ украша́ющая; ра́дуйся, проще́ніемъ отъ Бо́га грѣхо́въ на́шихъ ду́ши на́ши утѣша́ющая.

Ра́дуйся, я́ко прино́сиши Бо́гу моле́нія Тебѣ́ моля́щихся; ра́дуйся, исполня́ющая проше́нія прося́щихъ.

Ра́дуйся, ра́досте всѣ́мъ скорбя́щимъ; ра́дуйся, еди́ное прибѣ́жище печа́льнымъ.

Ра́дуйся, въ бѣда́хъ и ско́рбѣхъ ско́рое заступле́ніе; ра́дуйся, боля́щихъ отъ всѣ́хъ неду́говъ исцѣле́ніе.

Ра́дуйся, неча́емыхъ зо́лъ прогна́ніе; ра́дуйся, отъ напра́сныя клеветы́ избавле́ніе.

Ра́дуйся, я́ко вси́ Тобо́ю му́ки вѣ́чныя свобожда́емся; ра́дуйся, я́ко Тобо́ю ко спасе́нію ду́шъ на́шихъ наставля́емся.

Ра́дуйся, Благода́тная Дѣ́во, подаю́щая всѣ́мъ скорбя́щимъ ра́дость.

Конда́къ 6.

Проповѣ́дницы вселе́нныя, богоно́сніи апо́столи, по соверше́ніи це́ркве въ пресвято́е и́мя Твое́, Ма́тери Бо́жіей, егда́ евангели́стъ Лука́, написа́въ, принесе́ къ Тебѣ́ изображе́ніе пречи́стаго лица́ Твоего́, зва́ша Тебе́ на освяще́ніе, Ты́ же рекла́ еси́ и́мъ: «иди́те съ ми́ромъ, и Азъ та́мо съ ва́ми е́смь»; и апо́столи, вше́дше въ це́рковь, обрѣто́ша на стѣнѣ́ зра́ка Твоего́ подо́біе самопи́санно. Мы́ же о таковѣ́мъ чудеси́ дивя́щеся, прекло́ньше колѣ́на, взыва́емъ Бо́гу. Аллилу́ія.

Икосъ 6.

Возсія́ на́мъ благода́ть Бо́жія, самопи́санное изображе́ніе пречи́стаго лица́ Твоего́, Влады́чице Дѣ́во Богоро́дице. Ты́ бо, на первопи́санную ико́ну зря́щи, Сама́ изрекла́ еси́: «бу́ди на не́й благода́ть Моя́ и си́ла», и сло́во Твое́ сбы́стся со вла́стію Твое́ю. Тѣ́мъ же мы́, похва́льная Тебѣ́ принося́ще, вопіе́мъ си́це:

Ра́дуйся, я́ко благода́ти Бо́жія мо́ре неисчерпа́емое; ра́дуйся, я́ко милосе́рдія Его́ глубина́ неизмѣ́римая.

Ра́дуйся, всего́ мíра Влады́чице; ра́дуйся, христіа́нскаго ро́да Засту́пнице.

Ра́дуйся, Це́ркве неруши́мая стѣно́; ра́дуйся, благоговѣ́йныхъ іере́евъ похвало́.

Ра́дуйся, свѣще́, освѣти́вшая свѣ́томъ озаре́ннымъ; ра́дуйся, наставля́ющая на́съ ше́ствовати путе́мъ спасе́ннымъ.

Ра́дуйся, упова́ніе и наде́ждо ненаде́жныхъ; ра́дуйся, взыска́ніе поги́бшихъ.

Ра́дуйся, въ бѣда́хъ бы́строе избавле́ніе; ра́дуйся, скорбя́щихъ ра́достное утѣше́ніе.

Ра́дуйся, Благода́тная Дѣ́во, подаю́щая всѣ́мъ скорбя́щимъ ра́дость.

Конда́къ 7.

Ходя́щихъ съ вѣ́рою во хра́мъ Тво́й святы́й, Влады́чице Богоро́дице, спаса́еши и сохраня́еши отъ вся́каго зла́го обстоя́нія, взира́ющихъ ра́достнымъ се́рдцемъ на чудотво́рную и святу́ю ико́ну Твою́, гдѣ́ зри́тся Твое́ милосе́рдіе къ прося́щимъ по́мощи. Сего́ ра́ди и мы́ уми́льно взыва́емъ: о, Преблагослове́нная Влады́чице! пода́ждь на́мъ, скорбя́щимъ въ бѣда́хъ на́шихъ, ра́дость, боля́щимъ исцѣле́ніе, я́ко да усе́рдно вопіе́мъ о Тебѣ́ всѣ́хъ Бо́гу: Аллилу́ія.

Икосъ 7.

Но́вый пу́ть показа́ла еси́ еконо́му Ѳео́филу покая́нія и обраще́нія его́ па́ки къ Творцу́ всѣ́хъ и Бо́гу: о́нъ бо отве́ржеся Его́ и Тебе́, Преблагослове́нная Богоро́дице, но принесе́ покая́ніе и моли́твенную пѣ́снь изрече́ во хра́мѣ Твое́мъ предъ ико́ною Твое́ю, я́ко Засту́пницѣ ро́да христіа́нскаго, я́же Ты́, Дѣ́во, прія́ла еси́ и проше́нія его́ испо́лнила еси́. Пріими́, Влады́чице, и на́ше моле́ніе, и не пре́зри на́съ, глаго́лющихъ Тебѣ́ си́це:

Ра́дуйся, проше́нія на́ша исполня́ющая; ра́дуйся, ско́рби ду́шъ и тѣле́съ на́шихъ ра́достію услажда́ющая.

Ра́дуйся, пода́тельнице пи́щи а́лчущимъ; ра́дуйся, питіе́ неисчерпа́емое жа́ждущимъ.

Ра́дуйся, я́ко отъ Тебе́ глухи́мъ отверза́ется слы́шаніе; ра́дуйся, я́ко отъ Тебе́ подае́тся слѣпы́мъ прозрѣ́ніе.

Ра́дуйся, наги́мъ всѣ́мъ и неиму́щимъ одѣя́ніе; ра́дуйся, всѣ́мъ изнемога́ющимъ вспоможе́ніе.

Ра́дуйся, отъ бѣ́дъ и болѣ́зней на́съ сохраня́ющая; ра́дуйся, отча́янныхъ въ наде́ждѣ па́ки соблюда́ющая.

Ра́дуйся, Благода́тная Дѣ́во, подаю́щая всѣ́мъ скорбя́щимъ ра́дость.

Конда́къ 8.

Стра́нно е́сть явле́ніе чудотво́рныя ико́ны Твоея́, Богома́ти Пречи́стая, я́ко бо по возду́ху благода́тію Бо́жіею носи́ма бы́сть: и что́ Тя́ подви́же къ толи́кому чу́дному явле́нію, ра́звѣ еди́но Ма́тернее о на́съ смотрѣ́ніе. Сего́ ра́ди мо́лимся Тебѣ́: посѣти́ на́съ, грѣ́шныхъ, въ бѣда́хъ, ско́рбѣхъ и неду́зѣхъ стра́ждущихъ, да дерза́емъ съ ра́достію воспѣва́ти Бо́гу а́нгельское пѣ́ніе: Аллилу́ія.

Икосъ 8.

Всѣ́ми вои́стину просла́влена су́ть чудеса́ ико́ны святы́я Твоея́, къ не́й бо отъ всѣ́хъ стра́нъ и градо́въ стека́ются вѣ́рныхъ мно́жество приноси́ти моле́ніе и прія́ти цѣльбу́ скорбе́й свои́хъ: Ты́ бо еси́ всѣ́хъ скорбя́щихъ Ра́дость. Сего́ ра́ди, почита́юще де́нь явле́нія святы́я ико́ны Твоея́, дерза́емъ похва́льная Тебѣ́ вопи́ти:

Ра́дуйся, христіа́нскаго ро́да Храни́тельнице; ра́дуйся, вѣ́рная во все́мъ Покрови́тельнице.

Ра́дуйся, моле́ніе на́ше пріе́млющая; ра́дуйся, покро́вомъ Свои́мъ на́съ покрыва́ющая.

Ра́дуйся, отъ гла́да на́съ пита́ющая; ра́дуйся, отъ наводне́нія и потопле́нія изыма́ющая.

Ра́дуйся, отъ стра́ха и тру́са сохраня́ющая; ра́дуйся, во все́мъ на́съ снабдѣва́ющая.

Ра́дуйся, въ бѣда́хъ и ско́рбѣхъ поможе́ніе; ра́дуйся, въ печа́лѣхъ на́шихъ ра́достное утѣше́ніе.

Ра́дуйся, я́ко проше́нія скорбя́щихъ исполня́еши ра́достію; ра́дуйся, утѣша́ющая ду́ши на́ша небе́снаго Ца́рствія сла́достію.

Ра́дуйся, Благода́тная Дѣ́во, подаю́щая всѣ́мъ скорбя́щимъ ра́дость.

Конда́къ 9.

Все́ естество́ а́нгельское стека́ется къ престо́лу Царя́ Вы́шняго и, предстоя́ со стра́хомъ, внима́етъ моли́твѣ Твое́й о на́съ, грѣ́шныхъ, къ Сы́ну Твоему́ и Бо́гу на́шему: Онъ бо вся́ проше́нія Твоя́ исполня́етъ. Сего́ ра́ди мо́лимся Тебѣ́, о Богома́ти, имѣ́ющей да́ръ неду́ги отгоня́ти и отъ скорбе́й и бѣ́дъ избавля́ти: возбуди́ на́съ всегда́ пѣ́ти о Тебѣ́ Бо́гу: Аллилу́ія.

Икосъ 9.

Витíй многовѣща́нныхъ язы́къ недоумѣва́етъ досто́йно воспѣ́ти вели́чіе Твое́: ка́ко ве́сь мíръ храни́ши, Всеблагослове́нная Богоро́дице, отъ вся́каго навѣ́та сопроти́вна и зла́го обстоя́нія? Сего́ ра́ди дерза́емъ мы́ Тебѣ́ въ простотѣ́ се́рдца на́шего умиле́нно вопи́ти:

Ра́дуйся, въ бра́нѣхъ си́льно помога́ющая; ра́дуйся, христоимени́тое во́инство укрѣпля́ющая.

Ра́дуйся, я́ко мíръ тишино́ю огражда́еши; ра́дуйся, я́ко безпомо́щныхъ си́льными твори́ши.

Ра́дуйся, я́ко вся́кія печа́ли человѣ́комъ утоля́еши; ра́дуйся, я́ко боля́щимъ здра́віе возстановля́еши.

Ра́дуйся, я́ко сѣ́ти лука́выхъ сокруша́еши; ра́дуйся, я́ко отъ злы́хъ человѣ́къ на́съ сохраня́еши.

Ра́дуйся, я́ко отъ напа́стей и бѣ́дъ избавля́еши; ра́дуйся, я́ко ко спасе́нію ду́ши на́ши наставля́еши.

Ра́дуйся, Благода́тная Дѣ́во, подаю́щая всѣ́мъ скорбя́щимъ ра́дость.

Конда́къ 10.

Спасти́ хотя́ ве́сь мíръ, всѣ́мъ Госпо́дь обѣща́ живо́тъ вѣ́чный, но мы́, грѣ́шніи, запя́ти бы́хомъ умо́мъ, не исполня́юще слове́съ Его́, досто́йни за сіе́ стра́шнаго суда́ Его́ и преще́нія, и никто́же возмо́жетъ помощи́ на́мъ, то́кмо Ты́, Ма́ти Бо́га Вы́шняго. Тебѣ́ припа́дающе, про́симъ: пріими́, Влады́чице, моле́нія на́ша и приклони́ на ми́лость Сы́на Твоего́ и Бо́га на́шего; изба́вити на́съ вѣ́чныхъ му́къ, вся́каго вре́меннаго зла́го, и лю́таго нахожде́нія враго́въ ви́димыхъ и неви́димыхъ, и вся́кихъ скорбе́й, утѣсня́ющихъ на́съ, о Тебѣ́ Бо́гу всѣ́хъ зову́щихъ: Аллилу́ія.

Икосъ 10.

Стѣ́ну необори́мую къ заступле́нію и покро́ву вѣ́рныхъ имѣ́емъ Тя́, Премилосе́рдая Засту́пнице: Ты́ на́съ заступи́, покры́й, соблюди́; Твоя́ бо ма́терняя моли́тва мно́го помога́етъ на́мъ, си́рымъ и безпомо́щнымъ; Тебѣ́ испроси́ти у Сы́на Твоего́ и Бо́га на́шего вся́ возмо́жна су́ть. Сего́ ра́ди вопіе́мъ Ти́, зову́ще:

Ра́дуйся, еди́на Ма́ти милосе́рдая; ра́дуйся, Хада́таице на́шего спасе́нія.

Ра́дуйся, я́ко Тобо́ю мíру даде́ся ра́дость; ра́дуйся, влива́ющая въ ду́ши на́ши небе́сную сла́дость.

Ра́дуйся, вся́кое хитрослове́сіе приво́диши во обличе́ніе; ра́дуйся, злы́хъ совѣ́товъ разруше́ніе.

Ра́дуйся, отъ враго́въ ви́димыхъ и неви́димыхъ сохране́ніе; ра́дуйся, злы́хъ серде́цъ умягче́ніе.

Ра́дуйся, небу́рное приста́нище пла́вающимъ; ра́дуйся, вѣ́рное храни́лище утопа́ющимъ.

Ра́дуйся, я́ко во всѣ́хъ ско́рбѣхъ и ну́ждахъ помога́еши; ра́дуйся, я́ко больны́хъ и неду́жныхъ посѣща́еши.

Ра́дуйся, Благода́тная Дѣ́во, подаю́щая всѣ́мъ скорбя́щимъ ра́дость.

Конда́къ 11.

Пѣ́ніе и моле́ніе благода́рственное прино́симъ Ти́, раби́ Твои́, Богоро́дице. Ты́ бо еси́ Засту́пница ро́да человѣ́ческаго. При́зри на на́съ, безпомо́щныхъ, и моли́твою Твое́ю къ Бо́гу укроти́ гнѣ́въ Его́, стремя́щійся на на́съ, и умоли́ изба́вити на́съ отъ вся́кія лю́тыя ско́рби и болѣ́зни, да и мы́ вопіе́мъ Ему́, Бо́гу на́шему: Аллилу́ія.

Икосъ 11.

Свѣтопріе́мная свѣща́, возже́нная у́глемъ благода́ти Бо́жія, яви́ся на освѣще́ніе и ко спасе́нію ду́шъ на́шихъ. Мы́ же, любо́вію чту́ще де́нь пра́зднества Твоего́ и восхваля́юще чудеса́ Твоя́, дерза́емъ вопи́ти Тебѣ́ си́це:

Ра́дуйся, царе́й правосла́вныхъ укрѣпле́ніе; ра́дуйся, во бра́нѣхъ на враги́ одолѣ́ніе.

Ра́дуйся, проти́вныхъ всѣ́хъ побѣжда́ющая; ра́дуйся, отъ междоусо́бныя бра́ни на́съ сохраня́ющая.

Ра́дуйся, сла́во правосла́вныхъ честна́я; ра́дуйся, дѣ́вствующихъ цѣлому́дріе.

Ра́дуйся, щи́тъ, и́мже отъ враго́въ защища́емся; ра́дуйся, Еюже отъ бѣ́дъ и скорбе́й ско́ро избавля́емся.

Ра́дуйся, обурева́емымъ ти́хое приста́нище; ра́дуйся, боля́щихъ исцѣле́ніе ско́рое и чуде́сное.

Ра́дуйся, непосты́дное на́ше во все́мъ заступле́ніе; ра́дуйся, въ де́нь су́дный наде́жда и защище́ніе.

Ра́дуйся, Благода́тная Дѣ́во, подаю́щая всѣ́мъ скорбя́щимъ ра́дость.

Конда́къ 12.

Благода́тію, да́нною Тебѣ́ отъ Вы́шняго, изображе́ніе Твое́ на прибѣ́жище вѣ́рнымъ яви́ла еси́. Мы́ же, вѣ́рніи, еди́ну Тя́ чти́мъ Влады́чицу на́шу Богоро́дицу и Приснодѣ́ву, въ бѣда́хъ, ско́рбѣхъ и болѣ́знѣхъ ско́рую и вѣ́рную Засту́пницу. Сего́ ра́ди отъ ве́ліей ра́дости взыва́емъ о Тебѣ́ къ Бо́гу: Аллилу́ія.

Икосъ 12.

Пою́щіе Тя́ умы́ утверди́, Пренепоро́чная Дѣ́во, крѣ́пкая Засту́пнице всего́ мíра, и пода́ждь на́мъ по́мощь моли́твами Твои́ми, Пречи́стая Богоро́дице: ско́рби у́бо нахо́дятъ на ны́, печа́ли умножа́ются и враги́ ополча́ются. Побѣди́ супоста́тъ на́шихъ, да посра́мятся вси́, явля́ющіи рабо́мъ Твои́мъ зла́я. Сего́ ра́ди мы́ усе́рдно Тебѣ́ зове́мъ, вопію́ще:

Ра́дуйся, Ма́ти, избра́нная отъ всѣ́хъ родо́въ во вѣ́къ; ра́дуйся, покрыва́ющая кро́вомъ всѣ́хъ человѣ́къ.

Ра́дуйся, ма́тернія сле́зы о на́съ излива́ющая; ра́дуйся, грѣхи́ на́ши омыва́ющая.

Ра́дуйся, я́ко въ ри́зу нетлѣ́нія ду́ши на́ша облека́еши; ра́дуйся, я́ко во вся́кой ну́ждѣ на́мъ помога́еши.

Ра́дуйся, я́ко ско́рби душе́вныя и тѣле́сныя исцѣля́еши; ра́дуйся, я́ко отъ гла́да хлѣ́бомъ живо́тнымъ на́съ пита́еши.

Ра́дуйся, я́ко Твои́ми щедро́тами наслажда́емся; ра́дуйся, я́ко въ жи́зни на́шей Тобо́ю исправля́емся.

Ра́дуйся, я́ко къ покая́нію на́съ наставля́еши; ра́дуйся, я́ко въ стра́шный де́нь суда́ грѣ́шнымъ помога́еши.

Ра́дуйся, Благода́тная Дѣ́во, подаю́щая всѣ́мъ скорбя́щимъ ра́дость.

Конда́къ 13.

О, Всепѣ́тая Ма́ти, ро́ждшая Христа́ Бо́га на́шего, услы́ши гла́съ скорбя́щихъ рабо́въ Твои́хъ! Къ Тебѣ́ возво́димъ о́чи, къ Тебѣ́ простира́емъ ру́цѣ, и изъ глубины́ души́ на́шея зове́мъ: пріими́ ма́лое сіе́ моле́ніе на́ше, Всеблагослове́нная Госпоже́ Цари́це, и воззри́ о́комъ милосе́рдія Твоего́; изба́ви на́съ отъ бѣ́дъ, скорбе́й и напа́стей; неду́ги исцѣли́, напра́сныя клеветы́ потреби́, и не попусти́ на́мъ поги́бнути отъ гла́да, тру́са и пото́па и отъ внеза́пныя сме́рти, со слеза́ми вопію́щимъ Бо́гу: Аллилу́ія.

[Се́й конда́къ глаго́лется три́жды. Та́же и́косъ 1-й: Ангелъ предста́тель... И конда́къ 1-й: Взбра́нной Воево́дѣ...]

Моли́тва ко Пресвятѣ́й Богоро́дицѣ.

О, Преcвята́я Богоро́дице, вы́сшая херуви́мъ и честнѣ́йшая серафи́мъ, ро́ждшая Христа́ Бо́га на́шего, а́нгельское вели́кое удивле́ніе, проро́чествія исполне́ніе, богоизбра́нная Отрокови́це, Цари́це не́бу и земли́, всѣ́хъ скорбя́щихъ ра́досте, оби́димыхъ засту́пнице, а́лчущихъ пита́тельнице, обурева́емыхъ приста́нище, больны́хъ посѣще́ніе, немощны́хъ покро́ве и заступле́ніе, си́рыхъ покрови́тельнице, пла́вающихъ тишино́, путеше́ствующихъ поспѣше́ніе, тружда́ющихоя поко́ище, наги́хъ одѣя́ніе, ни́щихъ бога́тство неистощи́мое, ма́терей ти́хое весе́ліе, младе́нцевъ крѣ́посте, всѣ́мъ безпомо́щнымъ гото́вое во все́мъ поможе́ніе, христіа́нскаго ро́да на́шего нело́жная покрови́тельнице. О, Всеми́лостивая Дѣ́во, Влады́чице, Богоро́дице! Тебѣ́ еди́ной отъ Всевы́шняго даде́ся, я́ко Ма́тери, благода́ти да́ръ во все́мъ заступа́ти на́съ и спаса́ти. О, Всепѣ́тая Ма́ти, Дѣ́во Богоро́дице! Услы́ши гла́съ моля́щихся ра́бъ Твои́хъ, и стоя́щихъ предъ чудотво́рною ико́ною Твое́ю: взира́я на о́ную, я́ко и́стинную Тебе́ зри́мъ Богоро́дицу, вѣ́рою и любо́вію отъ души́ припа́дая покланя́емся, и псало́мски дерза́емъ вопи́ти Тебѣ́: слы́ши, Дщи́, и ви́ждь, и приклони́ у́хо Твое́, услы́ши моле́ніе на́ше, я́ко услы́шаны Тобо́ю мно́жество вѣ́рныхъ въ разли́чныхъ ско́рбѣхъ: вся́къ бо по свое́й ско́рби про́ситъ у Тебе́, я́ко отъ Си́льной, по́мощи, избавле́нія и заступле́нія, и Ты́ проше́нія и́хъ, я́ко всѣ́хъ скорбя́щихъ Ра́дость, исполня́еши, и ра́достію ду́ши и́хъ услажда́еши. О, ми́лостивая и преми́лостивая Госпоже́, Цари́це Богоро́дице! Ты́, я́же восхо́щеши, вся́ упроси́ти у Сы́на Твоего́, Христа́ Бо́га на́шего, мо́жеши: не отри́ни на́съ отъ Твоего́ заступле́нія, пода́ждь свобожде́ніе отъ бѣ́дъ и скорбе́й на́шихъ; изба́ви на́съ, Всенепоро́чная, ви́димыхъ и неви́димыхъ враго́въ, и злы́хъ человѣ́къ, клеве́щущихъ на ны́; не попусти́ на на́съ гла́да, тру́са, пото́па, огня́ и меча́; бу́ди на́мъ по́мощію не отсту́пною всегда́, и моли́ Сы́на Твоего́ и Бо́га на́шего, я́ко да одесну́ю поста́витъ на́съ въ стра́шный де́нь суда́, ра́ди Твоего́ предста́тельства о на́съ. Ему́же сла́ва, и держа́ва, со Безнача́льнымъ Его́ Отце́мъ и Святы́мъ Ду́хомъ, ны́нѣ и при́сно, и во вѣ́ки вѣко́въ. Ами́нь.

Моли́тва ина́я.

О, Пресвята́я Дѣ́во, Ма́ти Христа́ Бо́га на́шего, Цари́це небесе́ и земли́! Вонми́ болѣ́зненному воздыха́нію ду́шъ на́шихъ, при́зри съ высоты́ святы́я Твоея́ на на́съ, съ вѣ́рою и любо́вію покланя́ющихся пречи́стому о́бразу Твоему́. Се́ бо грѣха́ми погружа́еми, и скорбя́ми обурева́еми, взира́я на о́бразъ Тво́й, прино́симъ Тебѣ́ смире́нная моле́нія на́ша: не и́мамы бо ины́я по́мощи, предста́тельства и утѣше́нія, ра́звѣ Тебе́, о Ма́ти всѣ́хъ скорбя́щихъ и обремене́нныхъ; помози́ на́мъ, немощны́мъ, утоли́ ско́рбь на́шу, наста́ви на́съ, заблу́ждшихъ на пу́ть пра́вый, уврачу́й болѣ́зненныя сердца́ на́ши, и спаси́ безнаде́жныхъ, да́руй на́мъ про́чее вре́мя живота́ на́шего въ ми́рѣ и покая́ніи соверши́ти, пода́ждь христіа́нскую кончи́ну, и на стра́шномъ судѣ́ Сы́на Твоего́ яви́ся на́мъ милосе́рдною Предста́тельницею, да всегда́ пое́мъ, велича́емъ и сла́вимъ Тя́, я́ко Благу́ю Засту́пницу ро́да христіа́нскаго, со всѣ́ми угоди́вшими Бо́гу. Ами́нь.

Тропа́рь, гла́съ 4:

Къ Богоро́дицѣ прилѣ́жно ны́нѣ притеце́мъ, грѣ́шніи и смире́нніи, и припаде́мъ, въ покая́ніи зову́ще изъ глубины́ души́: Влады́чице, помози́, на ны́ милосе́рдовавши, потщи́ся, погиба́емъ отъ мно́жества прегрѣше́ній, не отврати́ Твоя́ рабы́ тщи́, Тя́ бо и еди́ну наде́жду и́мамы.

Инъ тропа́рь, гла́съ то́йже:

Не умолчи́мъ никогда́, Богоро́дице, си́лы Твоя́ глаго́лати, недосто́йніи. Аще бо Ты́ не бы́ предстоя́ла, моля́щи, кто́ бы на́съ изба́вилъ отъ толи́кихъ бѣ́дъ? Кто́ же бы сохрани́лъ до ны́нѣ свобо́дны? Не отсту́пимъ, Влады́чице, отъ Тебе́, Твоя́ бо рабы́ спаса́еши при́сно отъ вся́кихъ лю́тыхъ.

Конда́къ, гла́съ 6:

Не и́мамы ины́я по́мощи, не и́мамы ины́я наде́жды, ра́звѣ Тебе́, Влады́чице, Ты́ на́мъ помози́, на Тебе́ надѣ́емся и Тобо́ю хва́лимся, Твои́ бо есмы́ раби́, да не постыди́мся.

Велича́ніе:

Велича́емъ Тя́, Пресвята́я Дѣ́во, и чте́мъ о́бразъ Тво́й святы́й, и́мже то́чиши исцѣле́нія всѣ́мъ, съ вѣ́рою притека́ющимъ.

Источникъ: Акаѳистъ Пресвятѣй Богородицѣ «Всѣхъ скорбящихъ Радости». — Нижній-Новгородъ: Типо-Литографія И. М. Машистова, 1913. — 23 с.

/ Къ оглавленію раздѣла /


Наверхъ / Къ титульной страницѣ

0