Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - четвергъ, 21 сентября 2017 г. Сейчасъ на порталѣ посѣтителей - 21.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ДОМАШНЯЯ МОЛИТВА

Преп. Сергій Нуромскій, Вологодскій чудотворецъ († 1412 г.)

Преподобный Сергий Нуромский, Вологодский чудотворецПреп. Сергій Нуромскій, родомъ грекъ, пришелъ въ Россію изъ горы Аѳонской, прослышавъ о преп. Сергіи Радонежскомъ, и пожелалъ стать его ученикомъ. Черезъ малое время аѳонскій пришлецъ отошелъ на безмолвіе, съ благословеніемъ своего настоятеля, на сѣверъ, на рѣку Нурму въ Обнорской волости, протекавшую среди обширныхъ дремучихъ лѣсовъ. Здѣсь ему пришлось пережить бѣсовскія страхованія и нападеніе разбойниковъ, оставившихъ его еле живымъ. Въ другой разъ хотѣли напасть на него во время полунощной молитвы его. У нихъ были въ рукахъ орудія смерти; у Сергія были только четки. «Боже, въ помощь мою вонми», взывалъ отшельникъ. Разбойники бѣжали, охваченные непонятнымъ имъ ужасомъ, и больше не вернулись. А къ преп. Сергію стала собираться братія, и такъ возникла Нуромская обитель. Въ четырехъ верстахъ отъ нея подвизался другой ученикъ преп. Сергія Радонежскаго — преп. Павелъ Обнорскій, и отшельники сблизились. Преп. Сергій Нуромскій скончался 7 октября 1412 г., предсказавъ преп. Павлу основаніе имъ Свято-Троицкаго Обнорскаго монастыря. Въ теченіе столѣтія иноки преемственно, изъ поколѣнія въ поколѣніе передавали повѣствованіе о житіи и чудотвореніяхъ преп. Сергія. Въ сер. XVI столѣтія игуменъ Обнорскаго монастыря Протасій записалъ устныя преданія, а въ 1584 году игуменъ Глушицкой обители Іона собралъ свѣдѣнія и составилъ житіе св. подвижника. День памяти преп. Сергія Нуромскаго — 7 (20) октября.

АКАѲИСТЫ

Ака́ѳистъ преподо́бному и богоно́сному отцу́ на́шему Се́ргію Ну́ромскому, Во́логодскому чудотво́рцу.

Конда́къ 1.

Избра́нный уго́дниче Христо́въ, преподо́бне о́тче Се́ргіе, благохва́льная пѣ́нія о вели́кихъ твои́хъ чудесѣ́хъ принося́ще ти́ моли́твенницы твои́, прославля́емъ Просла́вльшагося въ тебѣ́ Бо́га на́шего. Ты́ же, я́ко имѣ́яй ве́ліе дерзнове́ніе къ Нему́, отъ вся́кихъ на́съ вре́менныхъ и вѣ́чныхъ бѣ́дъ твои́ми къ Нему́ моли́твами свободи́, да зове́мъ ти́:

Ра́дуйся, Се́ргіе преподо́бне, Ну́ромскій чудотво́рче.

Икосъ 1.

Ра́дуйся, отъ ю́ности твоея́ всѣ́мъ се́рдцемъ твои́мъ Го́спода возлюби́вый; ра́дуйся, и са́мъ отъ Него́ возлю́бленъ бы́вый.

Ра́дуйся, поуча́выйся въ Зако́нѣ Госпо́дни де́нь и но́щь; ра́дуйся, поуче́ніемъ си́мъ я́ко дре́во плодоно́сное, при исхо́дищихъ во́дъ благода́тныхъ насажде́нное, показа́выйся.

Ра́дуйся, чистоты́ вмѣсти́лище; ра́дуйся, до́ме вся́ческія святы́ни.

Ра́дуйся, благода́ти Бо́жія во вся́ дни́ житія́ испо́лненный; ра́дуйся, наслѣ́дниче небе́сныхъ дарова́ній.

Ра́дуйся, Се́ргіе преподо́бне, Ну́ромскій чудотво́рче.

Конда́къ 2.

Ви́дѣвъ, преподо́бне о́тче, я́ко вся́, я́же въ мíрѣ, су́етна су́ть и скороги́бнуща, изво́лилъ еси́ всеусе́рдное твое́ попече́ніе имѣ́ти о е́же ка́ко спасти́ ду́шу твою́. Мы́ же, о таковѣ́мъ твое́мъ спаси́тельнѣмъ произволе́ніи прославля́юще Бо́га, зове́мъ Ему́: Аллилу́ія.

Икосъ 2.

Ра́зумъ боже́ственный имѣ́я и теплѣ́йшее ко Го́споду произволе́ніе, позна́лъ еси́, преподо́бне, я́ко бла́го е́сть человѣ́ку, и́же во́зметъ яре́мъ Госпо́день на ся́ отъ ю́ности своея́, и сего́ ра́ди, отве́ргся мíра, бы́лъ еси́ мона́хъ. Тѣ́мже зове́мъ ти́:

Ра́дуйся, и́го крестоноше́нія Христо́ва возлюби́вый; ра́дуйся, вослѣ́дъ Го́спода твоего́ нелѣ́ностно устреми́выйся.

Ра́дуйся, ру́ку твою́ на ра́ло спасе́нія возложи́вый, никогда́же вспя́ть обраща́яся; ра́дуйся, за́дняя забыва́я, въ пере́дняя усе́рдно простира́выйся.

Ра́дуйся, благоду́шнымъ терпѣ́ніемъ скорбе́й оби́тели небе́сныя дости́гнувый; ра́дуйся, ны́нѣ о всѣ́хъ, въ печа́лехъ су́щихъ, моли́твенниче теплѣ́йшій.

Ра́дуйся, скорбя́щихъ ско́рое утѣше́ніе; ра́дуйся, уныва́ющихъ утѣ́шителю благода́тный.

Ра́дуйся, Се́ргіе преподо́бне, Ну́ромскій чудотво́рче.

Конда́къ 3.

Си́ла Вы́шняго осѣни́ тя, преподо́бне, и препоя́са тя́ на враги́ ви́димыя и неви́димыя, и́хже побѣди́въ, утверди́лъ еси́ на ка́мени недви́жимѣмъ за́повѣдей Христо́выхъ мы́сленніи но́зѣ твои́, и вше́дъ въ небе́сныя оби́тели, ра́достно зове́ши Бо́гу: Аллилу́ія.

Икосъ 3.

Имѣ́я въ се́рдцѣ твое́мъ всесоверше́нное жела́ніе рабо́тати Го́сподеви со стра́хомъ и ра́доватися Ему́ со тре́петомъ, оста́вилъ еси́ оте́чество твое́ и прише́лъ еси́ въ го́ру Аѳо́нскую, идѣ́же, со отъя́тіемъ власо́въ главы́ твоея́, отложи́лъ еси́ ве́тхаго своего́ человѣ́ка со страстьми́ и похотьми́ его́. Тѣ́мже пріими́ отъ на́съ пѣ́нія сицева́я:

Ра́дуйся, ра́бе Бо́жій, благíй и вѣ́рный; ра́дуйся, ни́ву душе́вную твою́ нелѣ́ностно воздѣ́лавый.

Ра́дуйся, горы́ Аѳо́нскія все́льниче; ра́дуйся, добродѣ́телей оте́цъ преподо́бныхъ горы́ тоя́, пре́жде тебе́ бы́вшихъ, сонаслѣ́дниче.

Ра́дуйся, мона́хомъ богодухнове́нное свѣти́ло; ра́дуйся, ко гра́ду небе́сному всѣ́хъ путевождю́ благонаде́жный.

Ра́дуйся, пустынножи́телей украше́ніе; ра́дуйся, безмо́лвія рачи́телю теплѣ́йшій.

Ра́дуйся, Се́ргіе преподо́бне, Ну́ромскій чудотво́рче.

Конда́къ 4.

Бу́рю многомяте́жнаго мíра страсте́й возненави́дѣвъ, о́тче, устрани́лся еси́ всѣ́хъ его́ красо́тъ: въ пусты́ню же все́лься, преподо́бне, Крести́телю въ житіи́ послѣ́довалъ еси́, и Иліи́ поревнова́лъ еси́ проро́ку. Ны́нѣ у́бо и́стинно вѣ́чную въ небе́сныхъ дво́рѣхъ получи́лъ сла́ву, съ ни́ми предстои́ши Бо́гу, поя́ Тому́: Аллилу́ія.

Икосъ 4.

Слы́шавъ, я́ко богохрани́мѣй держа́вѣ Россíйстѣй возсія́ свѣтоза́рное свѣти́ло — вели́кій а́вва Се́ргій, восхотѣ́лъ еси́ учени́къ его́ бы́ти, и сего́ ра́ди о́ставль го́ру Аѳо́нскую, устреми́лся еси́ къ ца́рствующему гра́ду Москвѣ́, да возмо́жеши жела́ніе твое́ испо́лнити. Мы́ же, мы́сленно тя́ на пути́ се́мъ срѣта́юще, зове́мъ:

Ра́дуйся, смире́нія блага́го ревни́телю; ра́дуйся, му́дрости духо́вныя иска́телю неусы́пный.

Ра́дуйся, и́ноче благоиску́сный; ра́дуйся, стра́нниче богоизбра́нный.

Ра́дуйся, сподви́жникъ соиме́нному ти́ вели́кому Се́ргію бы́ти сподо́бивыйся; ра́дуйся, отъ него́ вселюбе́зно прія́тый.

Ра́дуйся, вели́каго учи́теля освяще́нный учениче́; ра́дуйся, сообита́телю его́ на небесѣ́хъ.

Ра́дуйся, Се́ргіе преподо́бне, Ну́ромскій чудотво́рче.

Конда́къ 5.

Боготе́чнѣй звѣздѣ́ подо́бяся, я́коже еле́нь на исто́чники водны́я, си́це ты́, преподо́бне, поте́клъ еси́ въ предѣ́лы Во́логодскія, искíй безмо́лвія. Дости́гъ же пусты́ни Ну́ромскія и ту́ водрузи́въ Кре́стъ Христо́въ, воспѣ́лъ еси́ Ему́ благода́рственно: Аллилу́ія.

Икосъ 5.

Ви́дѣвше тя́, преподо́бне о́тче, еди́наго на еди́нѣ Го́сподеви въ пусты́ни рабо́тающа, и мнѣ́вше у тебе́ обрѣсти́ мно́гая веще́ственная сокро́вища, лю́тѣ нападо́ша на тя́ разбо́йницы, отъ ни́хже и ра́ны мно́ги подъя́лъ еси́, но а́біе Христо́съ исцѣли́ тя. Сего́ ра́ди мы́ взыва́емъ ти́ такова́я:

Ра́дуйся, кри́не ра́йскаго прозябе́нія, во удо́ліихъ Ну́ромскихъ произрасты́й; ра́дуйся, пусты́ни Во́логодскія цвѣ́те благоуха́нный.

Ра́дуйся, му́чениковъ соприча́стниче; ра́дуйся, Го́сподеви твоему́ незло́біемъ уподо́бивыйся.

Ра́дуйся, нището́ю твое́ю бога́тъ бы́вый; ра́дуйся, смире́ніемъ твои́мъ Христо́ви подража́вый.

Ра́дуйся, пусты́ни благода́тное украше́ніе; ра́дуйся, мíрови свѣти́льниче пресвѣ́тлый.

Ра́дуйся, Се́ргіе преподо́бне, Ну́ромскій чудотво́рче.

Конда́къ 6.

Проповѣ́дуетъ да́нную ти́ отъ Бо́га благода́ть цѣле́бную человѣ́къ мно́жество: разсла́бленныя бо исцѣля́еши, неду́гующимъ, ума́ лише́ннымъ и бѣсны́мъ здра́віе подава́еши, слѣпы́я просвѣща́еши и хромы́я твори́ши ходи́ти. Прославля́юще у́бо оби́льную благода́ть въ тебѣ́ обита́ющую, благоговѣ́йнѣ вопіе́мъ Бо́гу: Аллилу́ія.

Икосъ 6.

Возсія́лъ еси́ я́ко звѣзда́ пресвѣ́тлая отъ Аѳо́на и отъ оби́тели вели́каго тезоимени́таго тебѣ́ отца́ сѣ́вернѣй странѣ́ се́й, свя́те Се́ргіе: бѣсо́встіи же полцы́, не терпя́ще тя́ въ пусты́ни, мно́жицею устраши́ти тя́ устремля́хуся, но оба́че, си́лою моли́твъ твои́хъ прогоня́еми, бѣжа́ша. Отъ и́хже навѣ́товъ и на́съ изба́ви моли́твами твои́ми, да зове́мъ ти́ си́це:

Ра́дуйся, бѣсо́мъ стра́шный прогони́телю; ра́дуйся, пре́лести и́хъ потреби́телю.

Ра́дуйся, главу́ змíеву уязви́вый моли́твами твои́ми; ра́дуйся, кова́рства враго́въ спасе́нія на́шего ни во что́же обраща́яй.

Ра́дуйся, во́ине Христо́въ непобѣди́мый; ра́дуйся, ду́хи лука́вствія смиренному́дріемъ покори́вый.

Ра́дуйся, вѣ́рнымъ на враги́ посо́бствуяй; ра́дуйся, усе́рдно къ заступле́нію твоему́ притека́ющимъ во бра́ни мы́сленнѣй ско́ро помога́яй.

Ра́дуйся, Се́ргіе преподо́бне, Ну́ромскій чудотво́рче.

Конда́къ 7.

Хотя́щу ти́, преподо́бне, еди́ному въ безмо́лвіи житіе́ твое́ сконча́ти, Госпо́дь устроя́етъ тя́ па́стыря и учи́теля мона́шескому собо́ру: совокупи́въ бо и́ноковъ ли́ки и воздви́гъ хра́мъ Спа́су Христу́, нелѣ́ностно Ему́ порабо́талъ еси́, во дни́ и въ нощи́ со ученики́ твои́ми зовы́й: Аллилу́ія.

Икосъ 7.

Но́вый вои́стину побѣдоно́сецъ на плотскíя стра́сти яви́лся еси́, преподо́бне, и кто́ возмо́жетъ воспѣ́ти боре́нія твоя́, исчести́ труды́, болѣ́зни и по́двиги, въ ни́хже тече́ніе по́стничества соверши́лъ еси́? Къ си́хъ похвале́нію не дово́льни су́ще, любо́вію па́че почита́емъ тя́ и вѣ́рно ти́ сицева́я прино́симъ:

Ра́дуйся, гла́домъ и жа́ждою пло́ть твою́ удручи́вый; ра́дуйся, вся́ко сладостра́стіе всено́щными бдѣ́ніи увяди́вый.

Ра́дуйся, въ моли́твахъ и поще́ніихъ подвиза́выйся и въ безстра́стіе облекíйся; ра́дуйся, преди́вное воздержа́нія зерца́ло.

Ра́дуйся, я́ко, стра́ждущей отъ мра́за пло́ти твое́й, теплото́ю любве́ Христо́вы согрѣва́шеся ду́хъ тво́й; ра́дуйся, я́ко зно́емъ опаля́ема тя́ роса́ Боже́ственныя благода́ти прохлажда́ше.

Ра́дуйся, преподо́бныхъ ли́ку вели́кая сла́во; ра́дуйся, по́двиговъ и соверше́нства о́бразе достоподража́тельный.

Ра́дуйся, Се́ргіе преподо́бне, Ну́ромскій чудотво́рче.

Конда́къ 8.

Стра́нное и пачеесте́ственное житіе́ преподо́бнаго Па́вла ви́дѣвъ, блаже́нне, бы́лъ еси́ того́ спо́стникъ и собесѣ́дникъ: во обои́хъ бо ва́съ бя́ше еди́нъ и то́йжде ду́хъ, и сего́ ра́ди два́, я́ко еди́нъ, теко́сте ко Го́споду, пою́ще: Аллилу́ія.

Икосъ 8.

Ве́сь еси́ въ вы́шнихъ, но и ни́жнихъ не оставля́еши, преподо́бне о́тче Се́ргіе: при́сно со Христо́мъ ца́рствуеши, и отъ на́съ, грѣ́шныхъ, моли́твы къ Нему́ возсыла́еши. Не то́чію бо припа́дающія къ цѣльбоно́сному твоему́ гро́бу, но и дале́че отстоя́щія, призыва́ющія же всечестно́е и́мя твое́, предста́тельствомъ твои́мъ соблюда́еши отъ вся́каго зла́. Тѣ́мже во умиле́ніи зове́мъ ти́:

Ра́дуйся, прибѣ́жище на́ше въ ско́рбехъ; ра́дуйся, приста́нище на́ше во обстоя́ніихъ.

Ра́дуйся, цѣли́телю болѣ́зней душе́вныхъ вку́пѣ и тѣле́сныхъ; ра́дуйся, посѣти́телю въ не́мощехъ лежа́щихъ.

Ра́дуйся, я́ко призыва́емый ско́ро на по́мощь предваря́еши; ра́дуйся, я́ко печа́ли жите́йскія отъ человѣ́къ отъе́млеши.

Ра́дуйся, а́нгельскаго житія́ ревни́телю; ра́дуйся, ли́ковъ святы́хъ всѣ́хъ соприча́стниче.

Ра́дуйся, Се́ргіе преподо́бне, Ну́ромскій чудотво́рче.

Конда́къ 9.

Отъ вся́кихъ бѣ́дъ, скорбе́й и напа́стей избавля́й на́съ, преподо́бне, твои́ми ко Го́споду многомо́щными моли́твами, и да́руй на́мъ и вре́менная блага́я, и вѣ́чное ра́дованіе получи́ти, да ку́пно съ тобо́ю воззове́мъ: Аллилу́ія.

Икосъ 9.

Витíйство человѣ́ческое не возмо́жетъ изрещи́, ка́ко мно́зѣхъ лѣ́тѣхъ преставле́нія твоего́ и́ноку Ники́фору яви́лся еси́, глаго́ля: «рцы́ игу́мену и бра́тіи, да очи́стятъ гро́бъ мо́й, не хо́щетъ бо Госпо́дь ему́ въ забве́ніи бы́ти». Мы́ же, благода́рни су́ще Бо́гу, дарова́вшему на́мъ тебе́, Своего́ уго́дника, вопіе́мъ ти́ сицева́я:

Ра́дуйся, подви́жниче всеусе́рднѣйшій, во врата́ ра́йскія вше́дый; ра́дуйся, и о спасе́ніи земны́хъ бра́тій твои́хъ пещи́ся не престая́й.

Ра́дуйся, гро́бъ тво́й и тѣ́ло твое́, я́коже сосу́дъ благода́ти, на́мъ оста́вивый; ра́дуйся, отъ ни́хъ струи́ исцѣле́нія излива́ти не престая́й.

Ра́дуйся, Христо́вымъ словесе́мъ послѣ́дователю, съ Ни́мъ ны́нѣ на небесѣ́хъ ца́рствуяй; ра́дуйся, сѣ́явый слеза́ми, да съ ра́достію рукоя́ти твоя́ по́жнеши во вре́мя свое́.

Ра́дуйся, пути́ же́стоки за словеса́ усте́нъ Го́спода твоего́ сохрани́вый; ра́дуйся, отъ пе́рваго и до единонадеся́таго часа́ жи́зни твоея́ Ему́ то́чію еди́ному служи́вый.

Ра́дуйся, Се́ргіе преподо́бне, Ну́ромскій чудотво́рче.

Конда́къ 10.

Спасти́ся хотя́ще вѣ́рніи отъ грѣхо́въ и страсте́й многообра́зныхъ, о́тче, предста́теля тя́ себѣ́ и побо́рника поставля́ютъ и не лиша́ются упова́нія своего́: наставля́еши бо на спасе́нія стези́ усе́рдно къ тебѣ́ притека́ющія и Бо́гу вѣ́рно вопію́щія: Аллилу́ія.

Икосъ 10.

Стѣ́ну тя́, засту́пника и моли́твенника те́пла обрѣ́тше, преподо́бне, изъ глубины́ се́рдца, я́ко благоуха́нное кади́ло, со воздыха́ніемъ Бо́гу возсыла́емъ хвалы́. Тебѣ́ же, при́сному су́щу моли́твеннику, сицева́я прино́симъ пѣ́нія:

Ра́дуйся, плодо́въ добродѣ́тельныхъ благопроцвѣ́тшая ни́во; ра́дуйся, благочести́выхъ ду́шъ преизря́дное украше́ніе.

Ра́дуйся, земны́мъ засту́пниче крѣ́пкій; ра́дуйся, послу́шателю ско́рый притека́ющихъ къ тебѣ́.

Ра́дуйся, свѣти́льниче, мра́къ де́монскій дале́че отрѣва́яй; ра́дуйся, душетлѣ́нныхъ неду́говъ тму́ отгоня́яй.

Ра́дуйся, я́ко многоразли́чная благодѣя́нія тобо́ю свы́ше подава́ема быва́ютъ; ра́дуйся, я́ко всѣ́хъ моле́нія дерзнове́нно Вы́шнему прино́сиши.

Ра́дуйся, Се́ргіе преподо́бне, Ну́ромскій чудотво́рче.

Конда́къ 11.

Пѣ́ніе всеумиле́нное Го́сподеви воспѣва́лъ еси́ во вся́ дни́ житія́ твоего́, преподо́бне, непреста́нно и́мя Христо́во нося́ во устна́хъ и се́рдцѣ твое́мъ, сего́ ра́ди очи́стивъ вну́тренняго твоего́ человѣ́ка, слико́вникъ яви́лся еси́ а́нгельскимъ чино́мъ, съ ни́ми поя́ Вседержи́телю: Аллилу́ія.

Икосъ 11.

Свѣти́ло яви́лся еси́ свѣтоза́рное, преподо́бне Се́ргіе, во странѣ́ Во́логодстѣй: свѣ́тлостію бо житія́ и дѣ́лъ твои́хъ, и зна́меньми чуде́съ озаря́еши ду́ши на́ша. Сего́ ра́ди мы́, притека́юще къ ра́цѣ моще́й твои́хъ, глаго́лемъ ти́ такова́я:

Ра́дуйся, свѣ́тлое со́лнце, блиста́ніи твои́ми просвѣща́ющее вѣ́рныхъ; ра́дуйся, сосу́де мѵ́ра Боже́ственнаго, облагоуха́яй припа́дающихъ къ тебѣ́ со усе́рдіемъ.

Ра́дуйся, во страна́хъ Еллинскихъ роди́выйся, богохрани́мѣй же держа́вѣ Россíйстѣй Бо́гомъ да́нный; ра́дуйся, сѣ́верныя страны́ на́шея украше́ніе велелѣ́пное.

Ра́дуйся, гра́ду Во́логдѣ похвало́ высо́кая; ра́дуйся, хра́му, въ не́мже почива́ютъ мо́щи твоя́, утвержде́ніе непоколеби́мое.

Ра́дуйся, благоукраси́телю пусты́ни Ну́ромскія; ра́дуйся, мно́гія и́ноки па́стырскимъ жезло́мъ твои́мъ ко Христу́ приведы́й.

Ра́дуйся, Се́ргіе преподо́бне, Ну́ромскій чудотво́рче.

Конда́къ 12.

Благода́ть, да́нную ти́, и по́двиги твоя́ никто́же изрещи́ возмо́жетъ, о́тче Се́ргіе: въ пусты́ни бо нестяжа́тельно живы́й, съ Бо́гомъ и а́нгелы бесѣ́довалъ еси́, отъ человѣ́къ бѣ́гая. Ны́нѣ у́бо въ небе́сныхъ черто́зѣхъ ра́дуяся, пое́ши Го́споду Бо́гу: Аллилу́ія.

Икосъ 12.

Пое́мъ до́бльственныя по́двиги твоя́, ублажа́емъ достохва́льную кончи́ну, почита́емъ и свяще́нную па́мять твою́, преподо́бне, въ не́йже, я́ко еди́ному отъ друго́въ Бо́жіихъ, похва́льная ти́ си́це вопіе́мъ:

Ра́дуйся, я́ко свѣ́тлыми по́двиги твои́ми ко Свѣ́ту Невече́рнему вше́лъ еси́; ра́дуйся, я́ко со безпло́тными трисвяту́ю пѣ́снь немо́лчно взыва́еши.

Ра́дуйся, неизрече́нныхъ бла́гъ наслѣ́дниче; ра́дуйся, ликова́нія во Ца́рствіи небе́снѣмъ при́сно наслажда́ешися.

Ра́дуйся, я́ко предстои́ши во сла́вѣ Пресвятѣ́й Тро́ицѣ; ра́дуйся, я́ко въ па́мяти твое́й Христо́ву Це́рковь весели́ши неизрече́нно.

Ра́дуйся, я́ко тобо́ю по́стницы и пустынножи́тиліе въ по́двизѣхъ укрѣпля́ются; ра́дуйся, я́ко вѣ́рніи благоправле́ніемъ твои́мъ по стопа́мъ за́повѣдей Бо́жіихъ ше́ствовати науча́ются.

Ра́дуйся, Се́ргіе преподо́бне, Ну́ромскій чудотво́рче.

Конда́къ 13.

О, вели́кій и пресла́вный уго́дниче Христо́въ, преподо́бне о́тче Се́ргіе! Пріими́ сіе́ ма́лое отъ на́съ приноси́мое тебѣ́ пѣ́ніе, и потщи́ся ско́ро умоли́ти ми́лостиваго Бо́га и Влады́ку, да твои́мъ хода́тайствомъ изба́витъ на́съ отъ вра́гъ ви́димыхъ и неви́димыхъ, отъ вся́кія напа́сти и ско́рби, отъ внеза́пныя сме́рти и бу́дущія му́ки, да съ тобо́ю и со всѣ́ми святы́ми сподо́бимся непреста́нно пѣ́ти Ему́: Аллилу́ія.

[Се́й конда́къ глаго́лется три́жды. Та́же и́косъ 1-й: Ангелъ земны́й и человѣ́къ небе́сный... И конда́къ 1-й: Избра́нный уго́дниче Христо́въ...]

Моли́твы преподо́бному отцу́ на́шему Се́ргію Ну́ромскому чудотво́рцу.

Моли́тва пе́рвая.

О, вели́кій чудотво́рче, преподо́бне о́тче на́шъ Се́ргіе! Услы́ши на́съ, грѣ́шныхъ, моля́щихся тебѣ́ и и́мя твое́ свято́е на по́мощь призыва́ющихъ, не пре́зри на́съ, чту́щихъ тя́. Моли́ о на́съ, грѣ́шныхъ, Содѣ́теля на́шего Го́спода Бо́га, тебѣ́ бо даде́ся благода́ть моли́тися за на́съ. Не мни́мъ бо тя́ ме́ртва су́ща: а́ще бо тѣ́ломъ и преста́вился еси́ отъ на́съ, и ра́ка твоя́ предъ очи́ма на́шима ви́дима е́сть, но свята́я твоя́ душа́ со а́нгельскими ли́ки предстои́тъ у престо́ла Вседержи́телева. О, па́стырю на́шъ, преподо́бне о́тче Се́ргіе! Потщи́ся сохрани́ти на́съ отъ па́губныхъ враго́въ, и отъ внеза́пныя сме́рти, и отъ бѣсо́вскаго искуше́нія, умо́мъ отъ малоду́шія помраче́нныхъ. Не оста́ви на́съ, свѣти́льниче Христо́въ, плѣне́нныхъ бы́ти, но помози́ на́мъ моли́твами твои́ми отъ вѣ́чныя му́ки изба́витися и наслѣ́дники Ца́рствія небе́снаго бы́ти со всѣ́ми святы́ми отъ вѣ́ка угоди́вшими Го́споду Бо́гу на́шему Іису́су Христу́, Ему́же подоба́етъ че́сть, поклоне́ніе, сла́ва и держа́ва, со Безнача́льнымъ Его́ Отце́мъ и Пресвяты́мъ и Благи́мъ и Животворя́щимъ Его́ Ду́хомъ, ны́нѣ и при́сно и во вѣ́ки вѣко́въ. Ами́нь.

Моли́тва ина́я.

О, преподо́бне и достоблаже́нне о́тче Се́ргіе, до́брый на́шъ па́стырю и учи́телю! Ты́ еще́ на земли́ се́й ра́бъ пріи́скренній Спа́са Христа́ показа́лся еси́, и мно́гія да́ры благода́тныя отъ Него́ прія́ти сподо́бился еси́, по блаже́ннѣмъ же твое́мъ успе́ніи престо́лу непристу́пныя Его́ сла́вы предстоя́, ве́ліе къ Нему́ дерзнове́ніе и́маши. Сего́ ра́ди моли́ и о на́съ, вла́ющихся въ пусты́ни мíра сего́ и суе́тъ его́. Огради́ на́съ предста́тельствомъ твои́мъ отъ всѣ́хъ вра́гъ ви́димыхъ и неви́димыхъ, отъ тлетво́рныхъ вѣ́тръ, смертоно́сныя я́звы, отъ гла́да, тру́са, пото́па, огня́, меча́, наше́ствія иноплеме́нныхъ и отъ вся́каго зла́. Наипа́че же, свя́тче Бо́жій, проле́й те́плое твое́ моле́ніе ко Го́споду о богохрани́мѣй держа́вѣ Россíйстѣй, да въ ми́рѣ, тишинѣ́ и благоде́нствіи жи́тельствуемъ. Моли́, о́тче свяще́нный, Царя́ ца́рствующихъ и Го́спода госпо́дствующихъ о Благочести́вѣйшемъ, Самодержа́внѣйшемъ, Вели́комъ Госуда́рѣ на́шемъ, Импера́торѣ [и́мярекъ] и о все́мъ Ца́рствующемъ До́мѣ Его́, да, си́лою Бо́жіею и всемо́щнымъ заступле́ніемъ твои́мъ охраня́емь, долгото́ю же днíй и крѣ́постію си́лъ испо́лненъ, мно́гая блага́я во бла́го люде́й Свои́хъ соверши́тъ. [Или́: стра́ждущую страну́ Россíйскую отъ лю́тыхъ безбо́жникъ и вла́сти и́хъ Госпо́дь да свободи́тъ, и да возста́витъ престо́лъ правосла́вныхъ царе́й; вѣ́рныхъ рабо́въ Его́, въ ско́рби и печа́ли де́нь и но́щь вопію́щихъ къ Нему́, многоболѣ́зный во́пль да услы́шитъ, и да изведе́тъ отъ поги́бели живо́тъ на́шъ[1]. Огражда́й же моле́ніемъ твои́мъ, преподо́бне, Це́рковь Христо́ву Правосла́вную отъ е́ресей и раско́ловъ, ри́зу Христо́ву раздра́ти тща́щихся, испроси́ па́стыремъ — святы́ню, па́ствѣ — о спасе́ніи ре́вность, ста́рцемъ — крѣ́пость и благо́е напу́тствіе въ жи́знь вѣ́чную, сре́днимъ — лу́чшимъ бы́ти, ю́ныя — уцѣлому́дри и послуша́нію научи́. На́мъ же всѣ́мъ, уго́дниче Бо́жій, вре́мя на покая́ніе испроси́, да не во грѣсѣ́хъ на́шихъ у́мремъ, но да моли́твами твои́ми, плоды́ досто́йны покая́нія прине́сшимъ, вѣ́чную присноблаже́нную жи́знь и сопребыва́ніе со святы́ми Его́ да́руетъ на́мъ Госпо́дь, да прославля́емъ гла́сы немо́лчными Его́ неизрече́нное милосе́рдіе въ безконе́чныя вѣ́ки вѣко́въ. Ами́нь.

Тропа́рь, гла́съ 8:

Жела́ніемъ духо́внымъ разгара́яся, преблаже́нне, сле́зъ твои́хъ тече́ніемъ ду́шу твою́ напои́лъ еси́, и я́же изъ глубины́ воздыха́ньми уязвля́я се́рдце твое́, бо́дренными моли́твами, и всено́щнымъ предстоя́ніемъ Влады́цѣ Христу́ многодобродѣ́теленъ пло́дъ прине́слъ еси́ са́мъ себе́. Сего́ ра́ди, я́ко Бо́жій уго́дникъ, свѣти́ло мíру показа́лся еси́, сія́я чудесы́. Се́ргіе преподо́бне о́тче на́шъ, те́плый моли́твенниче, Бо́га всегда́ моли́, да спасе́тъ ду́ши на́ша.

Конда́къ, гла́съ 8:

Яко звѣзда́ пресвѣ́тлая, отъ Святы́я горы́ провозше́дъ, добро́тами чуде́съ твои́хъ ве́сь мíръ просвѣти́лъ еси́: взе́мъ бо кре́стъ Христо́въ, послѣ́довалъ еси́ Ему́, и въ пусты́ннѣмъ озлобле́ніи, въ моли́твахъ и поще́ніихъ, во бдѣ́ніихъ и злострада́ніихъ изнури́лъ еси́ пло́ть твою́, тѣ́мже и Христо́съ да́ромъ чуде́съ обогати́ тебе́. Ему́же о на́съ моля́ся, посѣща́й ча́да твоя́, да зове́мъ ти́: ра́дуйся, Се́ргіе о́тче на́шъ, пусты́нный жи́телю.

Велича́ніе:

Ублажа́емъ тя́, преподо́бне о́тче Се́ргіе, и чте́мъ святу́ю па́мять твою́, наста́вниче мона́ховъ и собесѣ́дниче а́нгеловъ.

Примѣчаніе:
[1] См.: «Акаѳисты русскимъ святымъ». Томъ 3-й: Н-Ѳ. — СПб.: Издательство «Титулъ», 1996.

Источникъ: Слу́жба и Ака́ѳистъ преподо́бному отцу́ на́шему Се́ргію Ну́ромскому, Во́логодскому чудотво́рцу, его́же па́мять пра́зднуемъ мѣ́сяца Окто́врія въ 7-й де́нь. — СПб.: Сѵнода́льная Тѵпогра́фія, 1912. — С. 33-61, 74-80.

/ Къ оглавленію раздѣла /


Наверхъ / Къ титульной страницѣ

0