Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - пятница, 24 марта 2017 г. Сейчасъ на порталѣ посѣтителей - 15.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ДОМАШНЯЯ МОЛИТВА

Свт. Иннокентій, еп. Иркутскій († 1731 г.)

Святитель Иннокентий, епископ Иркутский, чудотворецРодомъ изъ дворянъ Кульчицкихъ, переселившихся съ Волыни въ Черниговскую губернію, въ мірѣ Іоаннъ, онъ получилъ образованіе въ Кіевскомъ Братскомъ училищѣ. Въ Кіевѣ же, въ Печерской лаврѣ, онъ принялъ (въ 1708 г.) иночество и санъ священства. Съ 1710 г. онъ подвизался на педагогическомъ поприщѣ въ Московской Славяно-Греко-Латинской Академіи, преподавая тамъ словесность, а потомъ философію, метафизику и нравственное богословіе, состоя въ то же время префектомъ и имѣя надзоръ за порядкомъ жизни учащихся. Съ конца 1720 г. онъ былъ намѣстникомъ Александро-Невской лавры, а 5 мар. 1721 г. онъ былъ поставленъ во епископа Переславскаго и назначенъ въ русскую Пекинскую миссію; но, по проискамъ іезуитовъ, не былъ принятъ Китайскимъ правительствомъ и почти 5 лѣтъ провелъ въ Селенгинскѣ, трудясь въ проповѣданіи слова Божія инородцамъ, подвизаясь въ молитвѣ и занимаясь иконописаніемъ. Въ 1727 г. (15 янв.) онъ былъ назначенъ епископомъ Иркутскимъ и много потрудился надъ обращеніемъ въ христіанство и просвѣщеніемъ язычниковъ бурятъ и тунгусовъ и обученіемъ новообращенныхъ Закону Божію и русскому языку. далѣе>>

АКАѲИСТЫ

Ака́ѳистъ [тре́тій] святи́телю Инноке́нтію, Ирку́тскому чудотво́рцу.

Конда́къ 1.

Равноапо́стольный христіа́нскія вѣ́ры благовѣ́стниче, язы́ческаго зловѣ́рія искорени́телю, ско́рый въ бѣда́хъ и ско́рбехъ засту́пниче, благоутро́бія неистощи́мое сокро́вище, святи́телю о́тче Инноке́нтіе! Вели́каго тя́ предъ Го́сподемъ хода́тая и чуде́съ мно́жествомъ свидѣ́тельствованна помо́щника иму́ще, къ тебѣ́ во обстоя́ніи отъ вся́кихъ ну́ждъ и зо́лъ съ вѣ́рою, наде́ждею и любо́вію притека́емъ, и та́ко ти́ зове́мъ:

Ра́дуйся, Инноке́нтіе, святы́й уго́дниче Спа́са Христа́.

Икосъ 1.

Ра́дуйся, по и́мени твоему́, непоро́чность зна́менующему, яви́вый житіе́ твое́.

Ра́дуйся, непоро́чности сохране́ніемъ, а́нгеловъ житію́ подража́тель бы́вый.

Ра́дуйся, вѣ́рный Христо́ва Ева́нгелія служи́телю.

Ра́дуйся, архіере́евъ удобре́ніе.

Ра́дуйся, Це́ркве, невѣ́сты Христо́вы, драго́е украше́ніе.

Ра́дуйся, свя́тости житія́ и непоро́чности нра́вовъ учи́телю.

Ра́дуйся, Инноке́нтіе, святы́й уго́дниче Спа́са Христа́.

Конда́къ 2.

Ви́дя Госпо́дь Бо́гъ благопотре́бенъ тя́ сосу́дъ ко прія́тію даро́въ благода́ти, оби́льно излія́ въ твое́ се́рдце ду́ха прему́дрости и ра́зума, во е́же просвѣща́ти язы́ки, во тьмѣ́ и сѣ́ни сме́ртнѣй сѣдя́щія, ду́ха совѣ́та и крѣ́пости, во е́же превозмога́ти надъ враги́ спасе́нія ви́димыми и неви́димыми, ду́ха вѣ́дѣнія и благоче́стія, во е́же Христо́во ста́до пасти́ уче́ніемъ и житіе́мъ. Мы́ же, тя́ на спасе́ніе людíй та́ко пріугото́ванна уразумѣ́вше, со умиле́ніемъ Пода́телю всѣ́хъ бла́гъ Бо́гу зове́мъ: Аллилу́ія.

Икосъ 2.

Ра́зумъ благопотре́бенъ къ дѣ́ланію прія́тыхъ отъ Бо́га тала́нтовъ стяжа́ти хотя́, еще́ ю́нъ сы́й, водвори́лся еси́ въ вертогра́дѣ духо́вныя му́дрости пресла́внаго гра́да Кíева; соверше́нъ же въ житіи́ хотя́ бы́ти, сожи́тельство воспрія́лъ еси́ въ ли́кѣ и́ноковъ Свя́то-Пече́рскія Ла́вры, идѣ́же дости́глъ еси́ въ му́жа соверше́нна, въ мѣ́ру во́зраста исполне́нія Христо́ва. Мы́ же, твое́ зва́ніе и избра́ніе разсмотря́юще, съ любо́вію зове́мъ ти́:

Ра́дуйся, розго́ виногра́да, плодо́въ Ду́ха испо́лненная, да и́хъ оби́ліемъ страны́ Сиби́ри обогати́ши.

Ра́дуйся, сладкоуха́нный кри́не Госпо́день, на ю́гѣ процвѣты́й, да тѣ́мъ страны́ сѣ́вера облагоуха́еши и укра́сиши.

Ра́дуйся, въ земнѣ́мъ учи́лищи небе́снѣй му́дрости навы́кшій, да е́ю язы́ки на пу́ть спасе́нія наста́виши.

Ра́дуйся, я́ко на высоту́ добродѣ́телей, а́ки свѣти́льникъ на свѣ́щницѣ, поста́вленъ бы́лъ еси́, да мглу́ неподо́бнаго житія́ во изгна́ніи су́щихъ разго́ниши.

Ра́дуйся, вѣ́рный учениче́ Спа́са на́шего, во апо́стола язы́ковъ предъизбра́нный.

Ра́дуйся, ча́до послушли́вое Це́ркве Правосла́вныя, въ первосвяти́теля ирку́тскія па́ствы пронарече́нный.

Ра́дуйся, Инноке́нтіе, святы́й уго́дниче Спа́са Христа́.

Конда́къ 3.

Си́лою свы́ше тя́ облече́нна уразумѣ́вше Благовѣ́рный Ца́рь и святы́й Собо́ръ избра́ша тя́ во апо́стольское служе́ніе, проповѣ́дати Ева́нгеліе Ца́рства Христо́ва въ земли́ язы́ковъ, невѣ́дущихъ пѣ́ти во Святѣ́й Тро́ицѣ еди́ному Бо́гу: Аллилу́ія.

Икосъ 3.

Имѣ́я ре́вность апо́стольскую о спасе́ніи ду́шъ человѣ́ческихъ, подви́глся еси́ на вся́ труды́ и бѣды́ ше́ствія въ да́льныя страны́ ца́рства хи́новъ: но воспяще́нъ бы́въ въ предѣ́лы его́ вни́ти, во гра́дѣ Селенги́нстѣмъ препокое́ніе обрѣ́лъ еси́, идѣ́же тя́ ма́лое ста́до при́сныхъ ти́ по вѣ́рѣ привѣ́тствіи срѣ́те си́ми:

Ра́дуйся, но́вый апо́столе, на просвѣще́ніе язы́ковъ мно́гія страны́ прете́кшій.

Ра́дуйся, въ ше́ствіихъ пу́тныхъ, я́коже и Па́велъ, язы́ковъ апо́столъ, бѣды́ Христа́ ра́ди и Ева́нгелія бо́дрѣ срѣ́тивый.

Ра́дуйся, лучеза́рное Це́ркве Христо́вы свѣти́ло, на просвѣще́ніе восто́ка возше́дшее.

Ра́дуйся, боже́ственнаго огня́ носи́ло, теплоту́ любве́ Христо́вы во страны́ мра́за прине́сшее.

Ра́дуйся, ду́хомъ ре́вности апо́стольскія дви́жимый, ко язы́комъ монго́льскимъ поспѣши́вый.

Ра́дуйся, во изгна́ніи стра́ждущимъ поко́й душа́мъ во благо́мъ и́гѣ Христо́вѣмъ указа́вый.

Ра́дуйся, Инноке́нтіе, святы́й уго́дниче Спа́са Христа́.

Конда́къ 4.

Бу́рю за́висти дре́вній человѣ́ческихъ ду́шъ прельсти́тель воздви́же въ сердца́хъ хи́новъ сопроти́въ тебе́, во страну́ и́хъ гряду́щаго, благовѣ́стника ми́ра Христо́ва, и возста́ви на тя́ лжебра́тію, во е́же въ предѣ́лы хи́новъ твое́ возбрани́ти вхожде́ніе, да не навы́кнутъ хи́нове, вку́пѣ съ правосла́вными, изве́дшему лю́ди изъ тьмы́ во свѣ́тъ Сво́й чу́дный Христу́ Бо́гу пѣ́ти: Аллилу́ія.

Икосъ 4.

Услы́шавъ ухищре́нныя хи́новъ глаго́лы, я́ко не подоба́етъ ти́, іера́рху вели́кому Го́спода, бы́ти прія́ту въ и́хъ ца́рство, обрати́лся еси́ па́ки со Ева́нгеліемъ ко язы́комъ иноро́днымъ во странѣ́ Сиби́рстѣй, и́же съ ве́лію ра́достію тя́ пріе́мше, возопи́ша ти́ такова́я:

Ра́дуйся, хи́нами во и́хъ ца́рство не прія́тый, ко прія́тію же самѣ́ми а́нгелы въ небе́сное Ца́рство досто́йный.

Ра́дуйся, не ро́ду чужде́му хи́новъ, но своего́ ца́рства язы́комъ монго́льскимъ во апо́стола угото́ванный.

Ра́дуйся, я́ко возбране́ніемъ тебѣ́ благовѣ́стія язы́комъ ца́рства чужда́го ве́ліе бла́го язы́комъ Россíйскаго ца́рства устро́ися.

Ра́дуйся, я́ко про́повѣдію Ева́нгелія язы́комъ монго́льскимъ злоухищре́ніе врага́ ду́шъ человѣ́ческихъ же́стоко посрами́ся.

Ра́дуйся, я́ко твои́мъ посредѣ́ на́съ вселе́ніемъ невѣ́дущіи Бо́га въ позна́ніе и́стины приведо́шася, противля́ющіися же и́стинѣ обличи́шася.

Ра́дуйся, я́ко на житіе́ твое́ взира́юще, грѣ́шніи пока́яшася, беззако́нніи же уцѣлому́дришася.

Ра́дуйся, Инноке́нтіе, святы́й уго́дниче Спа́са Христа́.

Конда́къ 5.

Богото́чный прему́дрости исто́чникъ отъ оби́лія прису́щія ти́ благода́ти прото́ржеся въ пусты́ни монго́льстѣй, егда́ неразу́мніи хи́нове загради́ша то́ки ея́ въ предѣ́лы и́хъ омраче́ннаго ца́рства: ре́вностію бо апо́стольскою дви́жимь и во служе́ніи па́стырстѣмъ тружда́яся, о́во просвѣща́лъ еси́ свѣ́томъ Ева́нгелія Христо́ва невѣ́рующія язы́ки мого́льски, о́во утвержда́лъ еси́ вѣ́рующія въ послуша́ніи Правосла́вныя Це́ркве уста́вомъ; и та́ко научи́лъ еси́ и си́хъ и о́нѣхъ вку́пѣ воспѣва́ти Еди́ному всѣ́хъ человѣ́ковъ Спаси́телю Бо́гу: Аллилу́ія.

Икосъ 5.

Ви́дя Вседержи́тель, вся́ на по́льзу стро́яй, я́ко не приспѣ́ вре́мя, да просвѣтя́тся свѣ́томъ Ева́нгелія лю́діе ца́рства Хи́нскаго, дарова́ тя въ первосвяти́теля Ирку́тскія Це́ркве и учи́теля язы́ковъ Сиби́ри, е́же мы́ ны́нѣ ра́достно воспомина́юще, си́це зове́мъ ти́:

Ра́дуйся, первопресто́льниче Ирку́тскія Це́ркве, благовѣ́стіемъ Сиби́рскую о́бласть Россíйскаго ца́рства огласи́вый.

Ра́дуйся, свято́е нача́ло святи́телей ирку́тскія па́ствы, про́чимъ премѣня́емымъ, еди́ный ея́ несмѣ́нный блюсти́телю.

Ра́дуйся, о́тче, святы́хъ оте́цъ въ насажде́ніи благоче́стія и искорене́ніи нече́стія подража́телю.

Ра́дуйся, па́стырскому служе́нію уготовля́емыхъ трудолюби́вый учи́телю.

Ра́дуйся, па́стырю до́брый, гото́вый ду́шу твою́ положи́ти за о́вцы твоя́.

Ра́дуйся, неусы́пный стра́же, ввѣ́ренныя ти́ ду́ши, бдѣ́ннымъ моле́ніемъ и пу́тнымъ обхожде́ніемъ, до́брѣ сохрани́вый.

Ра́дуйся, Инноке́нтіе, святы́й уго́дниче Спа́са Христа́.

Конда́къ 6.

Богопроповѣ́дниковъ Христо́выхъ апо́столовъ труды́ на ся́ подъе́мъ, о́ныхъ наслѣ́довалъ еси́ по́двиги и лише́нія, ско́рби и озлобле́нія: но вся́ ра́ди Христа́ и Ева́нгелія до́блественно поне́слъ еси́, и вся́ ны́, не то́чію благоду́шствующія, но и скорбя́щія, научи́лъ еси́ пѣ́ти Бо́гу: Аллилу́ія.

Икосъ 6.

Возсія́ла е́сть па́че со́лнца, во огни́ искуше́ній и скорбе́й очище́нная, душа́ твоя́, до́блественный подви́жниче Христо́въ: а́ще бо въ не́мощехъ и болѣ́знехъ претружде́но бя́ше тѣ́ло твое́, но ду́хомъ при́сно сы́й бо́дръ, вы́ну побѣжда́лъ еси́ враги́ Христо́вы Це́ркве. Сего́ ра́ди и мы́, тобо́ю въ ско́рбехъ утѣша́еми, побѣ́дная ти́ си́це вопіе́мъ:

Ра́дуйся, во́ине Христо́въ, во всеору́жіи Бо́жіи проти́ву нача́лъ и власте́й и міродержи́телей тьмы́ вѣ́ка сего́ подвиза́выйся.

Ра́дуйся, и́стиною а́ки по́ясомъ препоя́санный, язы́ковъ шата́нія разруши́вый.

Ра́дуйся, пра́вдою а́ки въ броня́ оболче́нный, вся́ навѣ́тникъ клеветы́ недѣ́йственны сотвори́вый.

Радуйся, но́зѣ во благовѣствова́ніе ми́ра обуве́ннѣ имѣ́вый, главу́ дре́вняго змíя попра́вый.

Ра́дуйся, вѣ́рою а́ки щито́мъ покрове́нный, вся́ разжже́нныя лука́ваго стрѣ́лы угаси́вый.

Ра́дуйся, шле́мъ спасе́нія и ме́чь духо́вный воспрія́вый, и вся́ враги́, а́ки воево́да возбра́нный, низложи́вый.

Ра́дуйся, Инноке́нтіе, святы́й уго́дниче Спа́са Христа́.

Конда́къ 7.

Хотя́й милосе́рдый Госпо́дь не то́чію па́ствѣ ирку́тстѣй, но и вся́кому бли́жнему же и да́льнему тя́ дарова́ти въ ско́рбехъ утѣ́шителя, въ бѣда́хъ ско́раго помо́щника и отъ болѣ́зней цѣли́теля, ускори́ тя́ разрѣши́ти отъ у́зъ сея́ бре́нныя пло́ти, да по всѣ́мъ градо́мъ и ве́семъ чудесы́ и исцѣле́ньми Бо́га просла́виши и вся́ Ему́ воздви́гнеши пѣ́ти: Аллилу́ія.

Икосъ 7.

Къ но́вому и нестарѣ́ющемуся на небесѣ́хъ жи́тельству уготовля́я тво́й восхо́дъ, писа́ніемъ со одра́ болѣ́зни всесмире́нно проси́лъ еси́ іере́и гра́да Ирку́тска со христіа́ны правосла́вными, да воспою́тъ во хра́мѣхъ Богоро́дицѣ пара́клисисъ: мы́ же, зря́ще тя́ по преставле́ніи просла́влена Бо́гомъ, къ тебѣ́ самому́ си́це взыва́емъ:

Ра́дуйся, ратобо́рче Христо́въ, по́двигомъ до́брымъ подвиза́выйся.

Ра́дуйся, быстротеку́щій о́рле, тече́ніе твое́ въ превы́спреннихъ селе́ніихъ сконча́вый.

Ра́дуйся, во́ине Царя́ Небе́снаго, вся́ обѣ́ты Христу́ Царю́ и Бо́гу на́шему вѣ́рно соблюды́й.

Ра́дуйся, я́ко про́чее уже́ вѣне́цъ пра́вды тебѣ́ соблюде́ся.

Ра́дуйся, по преселе́ніи во оби́тели Отца́ Небе́снаго не оставля́яй посѣща́ти на́шъ гра́дъ и оби́тель сію́.

Ра́дуйся, те́плый о на́съ моли́твенниче, не престаю́щь о на́съ у престо́ла Царя́ Небе́снаго хода́тайствовати.

Ра́дуйся, Инноке́нтіе, святы́й уго́дниче Спа́са Христа́.

Конда́къ 8.

Стра́нное всѣ́мъ чу́до показа́ся, егда́ древя́ная це́рковь, подъ ея́же олтаре́мъ почива́лъ еси́ отъ трудо́въ сего́ вре́меннаго житія́, посредѣ́ всея́ оби́тели запале́нія, я́ко дре́вняя купина́, огне́мъ опаля́ема не сгара́ше. Чту́щіи же па́мять твою́, я́вѣ уразумѣ́вше, я́ко твои́хъ ра́ди моще́й соверша́ется сіе́ чу́до, со стра́хомъ и ра́достію, храня́щему тя́ Бо́гу, мно́жицею взыва́ху: Аллилу́ія.

Икосъ 8.

Вси́ лю́діе, прите́кшіи во оби́тель твою́ и це́рковь, въ не́йже почива́ху мо́щи твоя́, огне́мъ опаля́ему ви́дяще, приступи́вше ко архипа́стырю, те́плѣ его́ моля́ху, да изнесу́тъ ра́ку святы́хъ моще́й твои́хъ: о́нъ же, ду́хомъ вѣ́ры испо́лнь, наде́ждею сохране́нія отъ огня́ не то́чію моще́й твои́хъ, но и всея́ це́ркве, всѣ́хъ ободря́ше. Лю́діе же, сбытіе́ слове́съ архипа́стыря а́біе узрѣ́вше, благода́рными ти́ гла́сы, чудотво́рче, воззва́ша:

Ра́дуйся, свѣти́льниче Це́ркве, изъ-подъ спу́да па́че блиста́нія о́гненнаго возсія́вый.

Ра́дуйся, несгара́ніемъ храни́лища моще́й твои́хъ, о нетлѣ́ніи ихъ пресла́вно провозвѣсти́вый.

Ра́дуйся, таковы́мъ зна́меніемъ о твое́мъ съ на́ми сопребыва́ніи удостовѣ́ривый.

Ра́дуйся, це́ркве сохране́ніемъ, въ тебѣ́ отъ бѣ́дъ засту́пника на́мъ откры́вый.

Ра́дуйся, и гра́да на́шего, посредѣ́ запале́ній о́гненныхъ, мно́гажды удоборазумѣва́емый храни́телю.

Ра́дуйся, наипа́че о избавле́ніи на́съ отъ огня́ гее́нскаго при́сный на́шъ предъ Го́сподемъ хода́таю.

Ра́дуйся, Инноке́нтіе, святы́й уго́дниче Спа́са Христа́.

Конда́къ 9.

Вси́ ли́цы а́нгеловъ да́ша сла́ву, че́сть и благодаре́ніе Сѣдя́щему на Престо́лѣ, Живу́щему во вѣ́ки вѣко́въ Бо́гу и Агнцу, егда́, убѣле́нная свѣ́тлостію непоро́чности, душа́ твоя́, святи́телю Христо́въ Инноке́нтіе, вознесе́ся на не́бо, въ сожи́тельство а́нгеловъ. Мы́ же, прославле́ніемъ на земли́ святы́хъ моще́й твои́хъ увѣ́рившеся о твое́й на небесѣ́хъ сла́вѣ, съ весе́ліемъ просла́вльшему тя́ Бо́гу при́сно взыва́емъ пѣ́снь: Аллилу́ія.

Икосъ 9.

Вѣтíямъ любому́дрымъ на се́рдце не взыдо́ша, я́же ти́, Христо́въ уго́дниче, угото́ва Госпо́дь во оби́телехъ небе́сныхъ. Мы́ же, пра́зднующе твое́ на небеси́ прославле́ніе, си́це тя́ на земли́ ублажа́юще зове́мъ:

Ра́дуйся, мно́гу на небесѣ́хъ, многообра́знаго ра́ди на земли́ служе́нія, мзду́ воспріе́мый.

Ра́дуйся, дѣ́вственниче, въ пе́рвенцы Бо́гу и Агнцу впи́саный.

Ра́дуйся, страда́льче, вку́пѣ со прише́дшими отъ ско́рби ве́лія, въ ри́захъ бѣ́лыхъ предъ престо́ломъ спасе́ніе и сла́ву воспѣва́яй.

Ра́дуйся, апо́столе язы́ковъ, престо́ломъ апо́cтольскимъ на небеси́ почте́нный.

Ра́дуйся, па́стырю научи́вый и сотвори́вый, и сего́ ра́ди ве́ліимъ во Ца́рствіи небе́снѣмъ отъ Христа́ нарече́нный.

Ра́дуйся, воево́до возбра́нный, сосѣдѣ́нія Побѣди́телю а́да и сме́рти на престо́лѣ сподо́бивыйся.

Ра́дуйся, Инноке́нтіе, святы́й уго́дниче Спа́са Христа́.

Конда́къ 10.

Спасе́нія посредѣ́ земли́ содѣ́лавый, Человѣколю́бецъ Госпо́дь посѣти́ страну́ Сиби́рскую Свое́ю ми́лостію и щедро́тами: въ ра́цѣ бо моще́й твои́хъ, вели́кій уго́дниче Христо́въ, откры́лъ е́сть на́мъ зна́меніе твоего́ те́плаго о на́съ на небеси́ хода́тайства, его́же сподобля́еми, вси́ благовѣ́рніи лю́діе страны́ Сиби́рскія, еди́нѣми усты́ и се́рдцемъ пою́тъ Бо́гу: Аллилу́ія.

Икосъ 10.

Стѣна́ еси́ необори́мая, засту́пниче на́шъ, гра́ду и странѣ́ се́й отъ нахожде́ній вся́кихъ зо́лъ и скорбе́й: явле́ніемъ бо чуде́съ твои́хъ увѣ́рихомся, я́ко ве́ліе стяжа́лъ еси́ дерзнове́ніе у Го́спода. Сего́ ра́ди си́це зове́мъ ти́:

Ра́дуйся, страны́ Сиби́рскія богодарова́нный храни́телю и засту́пниче, хода́таю и помо́щниче.

Ра́дуйся, я́ко вку́пѣ со а́нгелы по́сланъ еси́ во служе́ніе за хотя́щихъ наслѣ́довати спасе́ніе, и всѣ́мъ стра́ждущимъ неоску́дное подае́ши утѣше́ніе.

Ра́дуйся, драгоцѣ́нное на́мъ въ ра́цѣ моще́й твои́хъ наслѣ́діе оста́вивый.

Ра́дуйся, я́ко во оби́тели Вознесе́нстѣй всѣ́хъ притека́ющихъ къ тебѣ́ срѣта́еши съ любо́вію.

Ра́дуйся, и на вся́комъ мѣ́стѣ тя́ съ вѣ́рою призыва́ющимъ ско́рый помо́щникъ явля́яйся.

Ра́дуйся, и не и́щущимъ тя́, ниже́ вѣ́дущимъ, я́ко до́брый наста́вникъ, вра́чь же и покрови́тель мно́гажды познава́емый.

Ра́дуйся, Инноке́нтіе, святы́й уго́дниче Спа́са Христа́.

Конда́къ 11.

Пѣ́ніе вся́кое не довлѣ́етъ къ прославле́нію чуде́съ твои́хъ, чудотво́рче преди́вный, и́миже не то́чію вѣ́рныя, но и невѣ́рныя удивля́еши: вѣ́руемъ же и надѣ́емся, я́ко твои́ми моли́твами и во мра́цѣ идолослуже́нія су́щіи изъ тьмы́ и сѣ́ни сме́ртныя изы́дутъ и съ на́ми ку́пно просла́вльшему тя́ Бо́гу воззову́тъ: Аллилу́ія.

Икосъ 11.

Свѣти́льникъ не поставля́ется подъ спу́домъ, но на свѣ́щникъ возлага́ется, да входя́щіи ви́дятъ свѣ́тъ: сего́ ра́ди и твоя́ святы́я мо́щи изведе́ изъ-подъ спу́да Госпо́дь, я́ко да входя́щіи во оби́тель твою́, отъ сего́ чу́днаго свѣ́та вѣ́рою просвѣща́еми и исцѣле́нія отъ тебе́ пріе́млюще, взыва́ютъ къ тебѣ́ си́це:

Ра́дуйся, наста́вниче прему́дрый, мы́сли бла́ги и хотѣ́нія свя́та на се́рдце полага́яй.

Ра́дуйся, вождю́ благонаде́жный, на пу́ть спасе́нія направля́яй.

Ра́дуйся, предъ престо́ломъ Царя́ Небе́снаго о спасе́ніи ду́шъ на́шихъ хода́тайствуяй.

Ра́дуйся, ско́рый помо́щниче, отъ нахожде́нія зо́лъ и скорбе́й сохраня́яй.

Ра́дуйся, врачу́ сострада́тельный, отъ болѣ́зней душе́вныхъ же и тѣле́сныхъ свобожда́яй.

Ра́дуйся, оста́вленныхъ врачми́ отъ одра́ сме́рти воздвиза́яй.

Ра́дуйся, Инноке́нтіе, святы́й уго́дниче Спа́са Христа́.

Конда́къ 12.

Благода́тію Бо́жіею испо́лнена тя́ позна́вше не то́чію бли́зъ су́щіи, но и во страна́хъ да́льнихъ обита́ющіи, съ вѣ́рою притека́ютъ къ ра́цѣ моще́й твои́хъ: ты́ же, вне́мля и́хъ моле́ніемъ, не преста́ни напу́тствовати всѣ́хъ да́ры исцѣле́ній и чуде́съ твои́хъ, да отъ восто́къ со́лнца до за́падъ вси́ воспою́тъ чудодѣ́йствующему Бо́гу: Аллилу́ія.

Икосъ 12.

Пою́ще чудеса́ твоя́, и́миже по преставле́ніи, па́че же по обрѣ́теніи святы́хъ моще́й твои́хъ, Бо́га просла́вилъ еси́, благода́рно тебѣ́ си́це зове́мъ:

Ра́дуйся, жи́лами разсла́бленныя со одра́ болѣ́зни возста́вивый.

Ра́дуйся, сокруше́ніемъ но́гъ и ру́къ стра́ждущія, а́ки николи́же страда́вшія устро́ивый.

Ра́дуйся, стру́пами покры́тыя и ра́нами уя́звленныя цѣ́лы и здра́вы содѣ́лавый.

Ра́дуйся, зрѣ́ніе слѣпы́мъ возврати́вый и изумле́нныя на здра́вый смы́слъ наста́вивый.

Ра́дуйся, во отча́яніи живота́ къ сме́рти уготовля́емыя къ жи́зни па́ки возврати́вый.

Ра́дуйся, ни еди́нѣй же болѣ́зни ко исцѣле́нію тебѣ́ бы́ти неудо́бнѣй, чуде́съ мно́жествомъ засвидѣ́тельствовавый.

Ра́дуйся, Инноке́нтіе, святы́й уго́дниче Спа́са Христа́.

Конда́къ 13.

О, вели́кій Христо́въ уго́дниче, ми́лостивый на́шъ наста́вниче, благоутро́бія сокро́вище, правовѣ́рія учи́телю, архіере́евъ похвало́, безпо́мощныхъ засту́пниче, о́тче на́шъ Инноке́нтіе! Моли́ Христа́ Бо́га, да сподо́битъ на́съ земно́е по́прище безъ поро́ка прейти́ и егда́, я́ко Пра́ведный Судія́, со а́нгелы Свои́ми во сла́вѣ пріи́детъ суди́ти живы́хъ и ме́ртвыхъ, да не отлучи́тъ на́съ отъ со́нма спаса́емыхъ, но да сотвори́тъ на́съ прича́стники Ца́рства небеснаго, во е́же та́мо вку́пѣ съ тобо́ю, отце́мъ на́шимъ, вы́ну сла́вити Его́ и воспѣва́ти Ему́ со Отце́мъ и Святы́мъ Ду́хомъ во вѣ́ки вѣко́въ: Аллилу́ія.

[Се́й конда́къ глаго́ли три́жды. И па́ки чте́тся 1-й и́косъ: Ангеломъ уподо́бился еси́ непоро́чнымъ житіе́мъ... и конда́къ 1-й: Равноапо́стольный христіа́нскія вѣ́ры благовѣ́стниче.]

Моли́тва святи́телю Инноке́нтію, Ирку́тскому чудотво́рцу.

О, вели́кій Христо́въ уго́дниче, святи́телю о́тче Инноке́нтіе! Услы́ши на́съ, тебѣ́ моля́щихся. Ты́ вѣ́си на́ша ско́рби и неду́ги, слы́шиши воздыха́нія мно́жества къ тебѣ́ притека́ющихъ; сего́ ра́ди къ тебѣ́, я́ко отцу́ на́шему, ско́рому помо́щнику и те́плому моли́твеннику, зове́мъ: не оста́ви на́съ твои́мъ у Бо́га хода́тайствомъ. Мы́ при́сно заблужда́емся отъ пути́ спасе́нія — руководи́ на́съ, ми́лостивый на́шъ наста́вниче. Мы́ не́мощни въ вѣ́рѣ — утверди́ на́съ, правовѣ́рія учи́телю. Мы́ зѣло́ убо́зи сотвори́хомся до́брыхъ дѣ́лъ — обогати́ на́съ, благоутро́бія сокро́вище. Мы́ при́сно навѣ́туеми есмы́ отъ вра́гъ ви́димыхъ и неви́димыхъ и озлобля́еми — помози́ на́мъ, безпо́мощныхъ засту́пниче. Гнѣ́въ Бо́жій, пра́ведно дви́жимый на ны́ за беззако́нія на́ша, отврати́ отъ на́съ твои́мъ хода́тайствомъ у престо́ла Судіи́ Бо́га, Ему́же ты́ предстои́ши на небеси́, о́тче іера́рше, архіере́евъ похвало́. Услы́ши, мо́лимъ тя́, вели́кій Христо́въ уго́дниче, и здѣ́ съ моле́ніемъ тебѣ́ предстоя́щія, и вся́, на вся́комъ мѣ́стѣ тебе́ съ вѣ́рою призыва́ющія: и испроси́ моли́твами твои́ми у Отца́ Небе́снаго всѣ́мъ на́мъ проще́ніе грѣхо́въ на́шихъ и отъ бѣ́дъ избавле́ніе. Ты́ бо еси́ свидѣ́тельствованный безчи́сленными чудесы́ помо́щникъ, засту́пникъ и моли́твенникъ, и о тебѣ́ сла́ву возсыла́емъ Отцу́ и Сы́ну и Свято́му Ду́ху, и ны́нѣ и при́сно, и во вѣ́ки вѣко́въ. Ами́нь.

Тропа́рь святи́телю Инноке́нтію, гла́съ 3:

Свѣти́льниче Це́ркве пресвѣ́тлый, озари́вый луча́ми добро́тъ твои́хъ страну́ сію́, и исцѣле́ньми мно́гими притека́ющихъ къ ра́цѣ твое́й съ вѣ́рою Бо́га просла́вивый, мо́лимъ тя́, святи́телю о́тче Инноке́нтіе, огражда́й моли́твами твои́ми гра́дъ се́й отъ всѣ́хъ бѣ́дъ и печа́ли.

Конда́къ гла́съ 4:

Непоро́чности соиме́ннаго па́стыря, проповѣ́дника вѣ́ры въ язы́цѣхъ монго́льскихъ, сла́ву и украше́ніе Ирку́тскія па́ствы, любо́вію восхва́лимъ вси́ вѣ́рніи: то́й бо е́сть храни́тель страны́ сея́, и моли́твенникъ о душа́хъ на́шихъ.

Велича́ніе:

Велича́емъ тя́, святи́телю о́тче Инноке́нтіе, и чте́мъ святу́ю па́мять твою́, ты́ бо мо́лиши за на́съ Христа́ Бо́га на́шего.

Источникъ: Ака́ѳистъ святи́телю Инноке́нтію, Ирку́тскому чудотво́рцу. — Тисне́ніе четве́ртое. —СПб.: Сѵнода́льная Тѵпогра́фія, 1906. — 56 с.

/ Къ оглавленію раздѣла /


Наверхъ / Къ титульной страницѣ

0