Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - вторникъ, 17 октября 2017 г. Сейчасъ на порталѣ посѣтителей - 14.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ДОМАШНЯЯ МОЛИТВА

Икона Божіей Матери именуемая «Скоропослушница».

Икона Божией Матери именуемая СкоропослушницаВъ исторіи Дохіарскаго монастыря, находящейся въ Προσκυνητάριον τοῦ Δοχειαρίου, изданномъ печатью въ Бухарестѣ 1843 г., говорится о сей иконѣ слѣдующее: "Внѣ — предъ братскою трапезою, на стѣнѣ (въ нишѣ), въ незапамятныя времена написанъ образъ Пресвятыя Богородицы. Достойные полнаго вѣроятія отцы относили и прежде, и мы нынѣ относимъ, согласно ихъ отзывамъ, изображеніе этой иконы ко временамъ св. Неофита, основателя сей обители. (Святой Неофитъ жилъ въ X вѣкѣ.) Самый видъ этой иконы оправдываетъ сказаніе св. отцевъ, что она такъ отдалена отъ насъ своимъ происхожденіемъ, и что дѣйствительно чудотворна. Первый опытъ чудодѣйственной силы явила она на трапезарѣ этой обители слѣдующимъ образомъ: Предъ сею чудотворною иконою былъ проходъ, гдѣ отцы обыкновенно ходили въ трапезу; а трапезарь но своей должности чаще другихъ ходилъ тамъ, не только днемъ, но и ночью; ночью иногда онъ хаживалъ мимо этой иконы съ возжженной лучиною". далѣе>>

АКАѲИСТЫ

Ака́ѳистъ Пресвятѣ́й Влады́чицѣ на́шей Богоро́дицѣ, въ че́сть и па́мять явле́нія чудотво́рныя Ея́ ико́ны, имену́емыя Скоропослу́шница.

Конда́къ 1.

Избра́нной отъ всѣ́хъ родо́въ Бо́жіей Ма́тери и Цари́цѣ, скоропослу́шливо вне́млющей моли́твамъ смире́ннымъ, и то́ки цѣле́бныя излива́ющей вѣ́рнымъ отъ ико́ны Своея́ святы́я, благода́рственное прино́симъ пѣ́ніе; Ты́ же, всеми́лостивая Засту́пнице, преклони́ся благоутро́бно къ гла́сомъ на́шимъ хвале́бнымъ, и отъ вся́кихъ бѣ́дъ свободи́ ны́, зову́щія Ти́:

Ра́дуйся, всеблага́я Скоропослу́шнице, проше́нія на́ша во бла́го исполня́ющая.

Икосъ 1.

Ра́дуйся, непристу́пнаго Божества́ селе́ніе; ра́дуйся, а́нгельское непрестаю́щее удивле́ніе.

Ра́дуйся, трапе́зо свята́я, хлѣ́бомъ жи́зни на́съ пита́ющая; ра́дуйся, ма́слино благопло́дная, еле́емъ ми́лости сердца́ на́ша умаща́ющая.

Ра́дуйся, даро́въ Бо́жія благода́ти сокро́вищнице неистощи́мая; ра́дуйся, чуде́съ рѣко́ приснотеку́щая.

Ра́дуйся, оби́димыхъ засту́пнице; ра́дуйся, печа́льныхъ утѣ́шительнице.

Ра́дуйся, бѣ́дствующихъ помо́щнице; ра́дуйся, боля́щихъ цѣли́тельнице.

Ра́дуйся, разсла́бленныхъ укрѣпи́тельнице; ра́дуйся, плѣне́нныхъ свободи́тельнице.

Ра́дуйся, всеблага́я Скоропослу́шнице, проше́нія на́ша во бла́го исполня́ющая.

Конда́къ 2.

Ви́дяще милосе́рдіе Твое́ неисче́тное, Влады́чице, и мно́гая чудеса́, Тобо́ю явле́нная и присноявля́емая чрезъ святы́я ико́ны Твоя́, и́миже, я́ко звѣзда́ми богосвѣ́тлыми, ве́сь мíръ христіа́нскій укра́сила еси́, велича́емъ Тя́, возвели́чившую ро́дъ на́шъ Твои́мъ благоволе́ніемъ, и съ любо́вію покланя́емся пречи́стаго ли́ка Твоего́ изображе́нію, зову́ще Сы́ну Твоему́ Христу́ Бо́гу: Аллилу́ія.

Икосъ 2.

Ра́зумъ небе́сный открыва́я, Богоро́дице, благоволи́ла еси́ въ земно́мъ жре́біи Твое́мъ, Святѣ́й Горѣ́ Аѳо́нстѣй, мно́гими чудесы́ просла́вити ико́ну Твою́, ю́же Сама́ Скоропослу́шницею наименова́ла еси́ гла́сомъ боже́ственнымъ, отъ нея́ изше́дшимъ, да вси́ вѣ́дуще таково́е Твое́ о не́й благоволе́ніе, пѣ́сненно Тебѣ́ вопію́тъ:

Ра́дуйся, милосе́рдная всѣ́хъ на́съ о Христѣ́ Ма́ти; ра́дуйся, Ду́ха Свята́го жили́ще.

Ра́дуйся, любве́ Бо́жія къ человѣ́комъ проявле́ніе; ра́дуйся, ро́да человѣ́ческаго возвыше́ніе.

Ра́дуйся, свѣ́тлая пала́то Бо́га Сло́ва; ра́дуйся, Свята́я святы́хъ бо́льшая.

Ра́дуйся, ро́ждшая боже́ственнаго Агнца; ра́дуйся, возрасти́вшая на́мъ кла́съ живота́.

Ра́дуйся, бра́шна неги́блющаго ста́мно всезлата́я; ра́дуйся, Пита́тельнице Пита́теля вселе́нныя.

Ра́дуйся, я́ко предста́тельствомъ Твои́мъ спасти́ся упова́емъ; ра́дуйся, я́ко моли́твами Твои́ми наслѣ́діе небе́сное получи́ти ча́емъ.

Ра́дуйся, всеблага́я Скоропослу́шнице, проше́нія на́ша во бла́го исполня́ющая.

Конда́къ 3.

Си́лою Бо́жіею дѣ́йствуя, неблагоговѣ́йно ходи́вшаго предъ свято́ю Твое́ю ико́ною Дохіа́рскія оби́тели трапеза́ря Ни́ла слѣпото́ю и разслабле́ніемъ тѣ́ла наказа́ла еси́, Богоро́дице Дѣ́во, да про́чее не дерза́етъ оскорбля́ти Тя́ въ пречи́стѣмъ Твое́мъ о́бразѣ, его́же въ зало́гъ благоволе́нія Твоего́ все́й Аѳо́нстѣй горѣ́ дарова́ла еси́ ми́лостиво, да вси́ насе́льницы ея́ гла́сы преподо́бными вопію́тъ ро́ждшемуся отъ Тебе́ Бо́гу Сло́ву: Аллилу́ія.

Икосъ 3.

Имѣ́я любо́вь ве́лію къ лю́демъ, иску́пленнымъ Кро́вію Сы́на Твоего́ и Бо́га, Влады́чице Всеблага́я, покая́ніе трапеза́ря Ни́ла ми́лостиво прія́ла еси́ и исцѣле́ніе ему́ отъ слѣпоты́ и разслабле́нія дарова́ла еси́, да слу́житъ непреста́нно Тебѣ́ и моли́твы немо́лчныя прино́ситъ Ти́ предъ многоцѣле́бною Твое́ю ико́ною, взыва́я си́це:

Ра́дуйся, Іоаки́ма и Анны прозябе́ніе свято́е; ра́дуйся, Сокруши́вшаго главу́ дре́вняго змíя, ро́ждшая.

Ра́дуйся, Преблагослове́нная въ жена́хъ; ра́дуйся, ро́ждшая нетлѣ́нно Спа́са ду́шъ на́шихъ.

Ра́дуйся, дѣ́вство и рождество́ чуде́сно сочета́вшая; ра́дуйся, во обою́ непоро́чно Себе́ сохра́ньшая.

Ра́дуйся, всея́ вселе́нныя ве́ліе чу́до; ра́дуйся, всѣ́хъ родо́въ земны́хъ удивле́ніе.

Ра́дуйся, согрѣша́ющихъ исправле́ніе; ра́дуйся, ка́ющихся въ добродѣ́тели утвержде́ніе.

Ра́дуйся, непамятозло́бная наказа́тельнице; ра́дуйся, благосе́рдная вразуми́тельнице.

Ра́дуйся, всеблага́я Скоропослу́шнице, проше́нія на́ша во бла́го исполня́ющая.

Конда́къ 4.

Бу́ри жите́йскія избѣжа́вшіи, и въ ти́хое приста́нище спасе́нія на Го́ру Аѳо́нскую прите́кшіи, обрѣта́ютъ здѣ́ утѣше́ніе благода́тное и по́мощь Боже́ственную отъ святы́я ико́ны Твоея́, Богоро́дице, отъ нея́же лучи́ чуде́съ испуща́еши, и то́ки ми́лости Твоея́ излива́еши неоску́дно. Тѣ́мже вси́ хотя́щіи въ пусты́няхъ Аѳо́на жа́ти спасе́ніе, велича́я Ма́тернія щедро́ты Твоя́, благода́рственно воспѣва́ютъ Бо́гу: Аллилу́ія.

Икосъ 4.

Слы́шавъ гла́съ боже́ственный отъ святы́я ико́ны Твоея́, Влады́чице, трапеза́рь Ни́лъ позна́ Тя́ Скоропослу́шницу бы́ти всѣ́мъ, съ вѣ́рою и любо́вію притека́ющимъ къ чудотво́рному Твоему́ о́бразу, и, прія́въ отъ него́ вразумле́ніе своему́ невѣ́жествію и прозрѣ́ніе свои́мъ слѣпотству́ющимъ очесе́мъ, возгласи́ Тебѣ́ благода́рственно отъ души́:

Ра́дуйся, вре́меннымъ наказа́ніемъ невѣ́ждъ умудря́ющая; ра́дуйся, согрѣша́ющихъ покая́ніе ми́лостиво пріе́млющая.

Ра́дуйся, на пу́ть исправле́нія заблужда́ющихся направля́ющая; ра́дуйся, ра́ны грѣхо́вныя благоутро́бно врачу́ющая.

Ра́дуйся, въ нерадѣ́ніи коснѣ́ющихъ любвеоби́льно облича́ющая; ра́дуйся, го́рестію тѣле́сныхъ страда́ній вѣ́чныхъ му́къ избавля́ющая.

Ра́дуйся, волне́ніе страсте́й утиша́ющая; ра́дуйся, ру́ку по́мощи Твоея́ погиба́ющимъ простира́ющая.

Ра́дуйся, безнаде́жныхъ наде́ждо; ра́дуйся, скорбя́щихъ отра́до.

Ра́дуйся, наги́хъ одѣя́ніе; ра́дуйся, си́рыхъ призрѣ́ніе.

Ра́дуйся, всеблага́я Скоропослу́шнице, проше́нія на́ша во бла́го исполня́ющая.

Конда́къ 5.

Боговѣща́нныя глаго́лы Твоя́, увѣ́дѣвше и́ноцы оби́тели Дохіа́рскія, Тебѣ́, боже́ственнѣй Скоропослу́шницѣ, хра́мъ сооруди́ша при трапе́зѣ, идѣ́же чудотво́рная ико́на Твоя́ пребыва́етъ, Пречи́стая Дѣ́во, и вся́ вѣ́рныя утѣша́етъ зна́меньми Твоея́ ми́лости, ея́же не лиши́ и на́съ, смире́нныхъ, по до́лгу Тя́ воспѣва́ющихъ, и вопію́щихъ чуде́съ Творцу́ Бо́гу: Аллилу́ія.

Икосъ 5.

Ви́дѣвше то́ки чуде́съ, отъ святы́я ико́ны Твоея́ Скоропослу́шницы источа́емыя, вси́ и́ноцы Горы́ Аѳо́нскія стека́хуся къ не́й на поклоне́ніе. Ты́ же, Ма́ти Бо́жія, всѣ́мъ, по коего́ждо потре́бѣ, дары́ ми́лости Твоея́ неоску́дно подава́ла еси́ отъ чудотво́рнаго Твоего́ о́браза, подвиза́я благода́рно вопи́ти Тебѣ́:

Ра́дуйся, Ма́ти милосе́рдія и щедро́тъ; ра́дуйся, одушевле́нный престо́ле Вседержи́теля.

Ра́дуйся, Сы́ну Бо́жію пло́ть заимода́вшая; ра́дуйся, черто́же безсѣ́меннаго уневѣ́щенія.

Ра́дуйся, Безпло́тнаго воплоти́вшая; ра́дуйся, Бо́га съ человѣ́ки соедини́вшая.

Ра́дуйся, преподо́бныхъ всежела́тельное зрѣ́ніе; ра́дуйся, по́стниковъ боже́ственное ра́дованіе.

Ра́дуйся, пустынножи́телей ти́хое весе́ліе; ра́дуйся, и́ноковъ крѣ́пкое упова́ніе.

Ра́дуйся, де́монскія полки́ побѣжда́ющая; ра́дуйся, враги́ спасе́нія человѣ́ческаго посрамля́ющая.

Ра́дуйся, всеблага́я Скоропослу́шнице, проше́нія на́ша во бла́го исполня́ющая.

Конда́къ 6.

Проповѣ́дуетъ Гора́ Аѳо́нская ми́лости и чудеса́ Твоя́, Преблагослове́нная Ма́ти Го́спода на́шего, и свѣ́тло красу́ется мно́гими чудотво́рными Твои́ми ико́нами, посредѣ́ ко́ихъ ико́на Твоя́, Скоропослу́шница Тобо́ю нарече́нная, я́ко луна́ по́лная, луча́ми чуде́съ немерца́емо сія́етъ, просвѣща́я ду́ши на́ша свѣ́томъ Бо́жія благода́ти, и подвиза́я ны́ хвале́бно взыва́ти просла́вльшему Тя́ Тріеди́ному Бо́гу: Аллилу́ія.

Икосъ 6.

Возсія́ла еси́ въ пречи́стѣй ико́нѣ Твое́й, Марíе Богоро́дице, свѣ́тъ спасе́нія всѣ́мъ, блужда́ющимъ во тмѣ́ грѣхо́въ и страсте́й, и сію́ нарекла́ еси́ Скоропослу́шницею, моля́щимся предъ не́ю съ вѣ́рою и благоговѣ́ніемъ отъ души́, ско́рую по́мощь Твою́ подаю́щи вопію́щимъ Ти́ такова́я:

Ра́дуйся, мо́лніе, ду́ши просвѣща́ющая; ра́дуйся, гро́ме, соблазня́ющія устраша́яй.

Ра́дуйся, благооти́шное прибѣ́жище утомле́нныхъ треволне́ніемъ жите́йскаго мо́ря; ра́дуйся, небу́рное приста́нище обурева́емыхъ волна́ми страсте́й.

Ра́дуйся, ю́ныхъ наста́внице цѣлому́дрія; ра́дуйся, покро́ве и огражде́ніе дѣ́вства.

Ра́дуйся, окамене́ніе серде́чное умягча́ющая; ра́дуйся, хла́дность душе́вную благода́тно согрѣва́ющая.

Ра́дуйся, на стезю́ спасе́нія вѣ́рныхъ наставля́ющая; ра́дуйся, отъ путе́й поги́бельныхъ претыка́ющихся удаля́ющая.

Ра́дуйся, спору́чнице на́ша къ Сы́ну Твоему́ и Бо́гу; ра́дуйся, при́сно умоля́ющая Его́ о поми́лованіи на́съ грѣ́шныхъ.

Ра́дуйся, всеблага́я Скоропослу́шнице, проше́нія на́ша во бла́го исполня́ющая.

Конда́къ 7.

Хотя́ всѣ́мъ показа́ти любо́вь Твою́ ве́лію къ христіа́нскому ро́ду, Богоро́дице Преблага́я, въ жре́бій Тво́й земны́й Го́ру Аѳо́нскую избра́ла еси́, и въ не́й селе́нія и́ноческая умно́жила еси́, да вси́ обурева́еміи мірско́ю суето́ю, возмо́гутъ обрѣта́ти здѣ́ ти́хое и удо́бное приста́нище ко спасе́нію и, Тобо́ю вспомоществу́еми, сподо́бятся наслѣ́дія небе́снаго, и пѣ́ти со святы́ми Пресвятѣ́й Тро́ицѣ: Аллилу́ія.

Икосъ 7.

Но́вое зна́меніе милосе́рдія Твоего́ яви́ла еси́, Влады́чице, въ чуде́снѣмъ прославле́ніи святы́я ико́ны Твоея́ Скоропослу́шницы, не то́кмо и́нокомъ Горы́ Аѳо́нскія, но и всѣ́мъ правосла́внымъ христіа́номъ, въ ни́хже благоговѣ́йно че́ствуется сея́ ико́ны Твоея́ изображе́ніе, да вси́ Тебѣ́ зову́тъ:

Ра́дуйся, Бо́га на́шего Ма́ти; ра́дуйся, въ рождествѣ́ и по рождествѣ́ Дѣ́во.

Ра́дуйся, я́ко Тя́ блажа́тъ вси́ ро́ди; ра́дуйся, я́ко сотвори́ Тебѣ́ вели́чіе Си́льный.

Ра́дуйся, я́ко призрѣ́ на смире́ніе Твое́ Госпо́дь; ра́дуйся, я́ко возжелѣ́ добро́ты Твоея́ Ца́рь царе́й.

Ра́дуйся, Дщи́ благослове́нная Отца́ Небе́снаго; ра́дуйся, Роди́тельнице неискусому́жная Сы́на Предвѣ́чнаго.

Ра́дуйся, прія́телище непоро́чное Ду́ха Свята́го; ра́дуйся, Таи́ннице Боже́ственныя благода́ти.

Ра́дуйся, го́рняго мíра украше́ніе; ра́дуйся, до́льняго мíра заступле́ніе.

Ра́дуйся, всеблага́я Скоропослу́шнице, проше́нія на́ша во бла́го исполня́ющая.

Конда́къ 8.

Стра́нники и прише́льцы есмы́ на земли́ и, по глаго́лу апо́стола, не и́мамы здѣ́ пребыва́ющаго гра́да; но́ къ кому́ прибѣ́гнемъ, Влады́чице, въ ско́рбехъ стра́нствія на́шего, а́ще не къ Тебѣ́, Всеблага́я? Не отве́ржи на́съ, Ма́ти Бо́жія, не рцы́ на́мъ: не вѣ́мъ ва́съ, грѣхо́въ ра́ди ва́шихъ! Но поми́луй на́съ, си́рыхъ и безпомо́щныхъ, и пріими́ на́съ въ вѣ́чныя кро́вы, Покрови́тельнице на́ша, да ра́достно вопіе́мъ во сла́вѣ небе́снѣй Царю́ сла́вы Христу́: Аллилу́ія.

Икосъ 8.

Всѣ́мъ вѣ́рнымъ утѣ́шительно е́сть взира́ти на святу́ю ико́ну Твою́, Влады́чице, на не́йже зри́мъ Тя́, на руку́ Твое́ю держа́щую Предвѣ́чнаго Младе́нца Го́спода на́шего Іису́са Христа́, Ему́же покланя́ющеся боголѣ́пно я́ко Творцу́ и Бо́гу на́шему, Тебѣ́, и́стиннѣй Богоро́дице, умиле́нно глаго́лемъ:

Ра́дуйся, обра́дованная арха́нгельскимъ благовѣ́щеніемъ Приснодѣ́во; ра́дуйся, Невѣ́сто неневѣ́стная.

Ра́дуйся, Ма́ти Свѣ́та у́мнаго, всѣ́хъ ду́ши просвѣща́ющаго; ра́дуйся, престо́ле одушевле́нный небесе́ и земли́ Творца́.

Ра́дуйся, кро́ткая голуби́це; ра́дуйся, непоро́чная а́гнице.

Ра́дуйся, ча́ше, че́рплющая ра́дость; ра́дуйся, неисчерпа́емый сосу́де воды́ живо́тныя.

Ра́дуйся, мѵрополо́жнице благоуха́нія Христо́ва; ра́дуйся, Еюже злосмра́діе страсте́й на́шихъ отго́нится.

Ра́дуйся, Еюже позна́хомъ Сы́на Бо́жія; ра́дуйся, Еюже научи́хомся поклоня́тися Тріеди́ному Бо́гу.

Ра́дуйся, всеблага́я Скоропослу́шнице, проше́нія на́ша во бла́го исполня́ющая.

Конда́къ 9.

Вси ро́ди блажа́тъ Тя́ по до́лгу, благослове́нная Марíе Богоро́дице, отъ восто́ка бо и до за́пада хва́льно и́мя Твое́; и́ноковъ же ли́цы Покрови́тельницу Тя́ свою́ имену́ютъ, наипа́че подвиза́ющіися въ жре́біи Твое́мъ — Горѣ́ Аѳо́нстѣй, ю́же осо́бымъ благоволе́ніемъ Твои́мъ осѣни́ла еси́, мно́гая чудеса́ въ не́й содѣва́ющи, и ми́лости Твоя́ бога́тыя насе́льникомъ ея́ явля́ющи, да благода́рно вопію́тъ о Тебѣ́ Бо́гу: Аллилу́ія.

Икосъ 9.

Вѣтíи суему́дренніи недоумѣва́ютъ позна́ти та́йну Твоего́ приснодѣ́вства, Богоро́дице, ниже́ мо́гутъ изъясни́ти си́лу чудотво́рную, отъ ико́нъ Твои́хъ проистека́ющую, во исцѣле́ніе неду́жныхъ, и на вся́ку по́льзу душе́вную и тѣле́сную человѣ́комъ. Мы́ же правосла́вно и несомнѣ́нно Приснодѣ́вою Тя́ исповѣ́дующе, вѣ́рно покланя́емся ико́нѣ Твое́й святѣ́й, и вопіе́мъ Ти́ си́це:

Ра́дуйся, невѣ́рныхъ сомни́тельное слы́шаніе; ра́дуйся, вѣ́рныхъ извѣ́стная похвало́.

Ра́дуйся, изъ боку́ чи́сту Христа́ нетлѣ́нно ро́ждшая; ра́дуйся, ключи́ дѣ́вства невреди́вшая въ рождествѣ́ Твое́мъ.

Ра́дуйся, Ма́ти и Дѣ́во преблагослове́нная; ра́дуйся, Богоро́дице препросла́вленная.

Ра́дуйся, дѣ́въ велича́ніе; ра́дуйся, ма́терей при́сное ра́дованіе.

Ра́дуйся, еди́на непоро́чная и до́брая въ жена́хъ; ра́дуйся, обѣтова́ннаго Сокруши́теля главы́ змíя, ро́ждшая.

Ра́дуйся, па́дшихъ прароди́телей осужде́нія дре́вняго изба́вльшая; ра́дуйся, Еде́мъ заключе́нный человѣ́комъ отве́рзшая Рождество́мъ Твои́мъ.

Ра́дуйся, всеблага́я Скоропослу́шнице, проше́нія на́ша во бла́го исполня́ющая.

Конда́къ 10.

Спасе́ніе устроя́я христоимени́тымъ лю́демъ, благоволи́ла еси́, Богоро́дице, земны́й жре́бій Тво́й, Го́ру Аѳо́нскую, въ населе́ніе и́нокомъ опредѣли́ти, и рекла́ еси́ въ видѣ́ніи пе́рвому пустынножи́телю Аѳо́нскому, преподо́бному Петру́, бы́ти Горѣ́ се́й въ жили́ще и́нокомъ при́сное, обѣтова́ніи благи́ми утѣ́шивъ его́, я́ко бу́деши Помо́щница и Покрови́тельница всѣ́мъ, подвиза́ющимся въ не́й богоуго́дно, дара́ми потре́бными и́хъ снабдѣва́ющи, и отъ вся́кихъ бѣ́дъ спаса́ющи, да невозбра́нно пою́тъ Бо́гу: Аллилу́ія.

Икосъ 10.

Стѣна́ еси́ заступле́нія, Дѣ́во, и́нокомъ правосла́внымъ, и всѣ́мъ подви́жникомъ дѣ́вства и чистоты́. Тѣ́мже жре́бій Тво́й земны́й, Го́ру Аѳо́нскую, невхо́дну жена́мъ сотвори́ла еси́, да безъ собла́зна грѣхо́внаго пребыва́ютъ въ не́й и́ноцы, на Тебе́ еди́ну по Бо́зѣ наде́жду спасе́нія возлага́юще, и Тебѣ́ зову́ще си́це:

Ра́дуйся, неувяда́емый цвѣ́те дѣ́вства; ра́дуйся, кри́не се́льный чистоты́.

Ра́дуйся, свѣтоно́сная сѣ́не небе́сная, ревни́телей чистоты́ осѣня́ющая; ра́дуйся, прему́дрости Бо́жія сви́тче, рачи́телей цѣлому́дрія умудря́ющая.

Ра́дуйся, и́нокомъ благоподвиза́ющимся Хода́таице спасе́нія; ра́дуйся, пустынножи́телей Горы́ Аѳо́нскія Покро́ве и Огражде́ніе.

Ра́дуйся, ра́дость благода́тную излива́ющая въ сердца́ боголюби́вая; ра́дуйся, утѣше́ніе духо́вное подаю́щая душа́мъ огорче́ннымъ.

Ра́дуйся, младопита́тельнице дѣ́въ и безма́тернихъ сиро́тъ; ра́дуйся, любо́вію Жениха́ безсме́ртнаго дѣ́вственная ликостоя́нія услажда́ющая.

Ра́дуйся, въ тя́жкой борьбѣ́ съ прираже́ніями страсте́й плотски́хъ крѣ́пкая помо́щнице; ра́дуйся, оби́телей и́ноческихъ неусы́пная блюсти́тельнице.

Ра́дуйся, всеблага́я Скоропослу́шнице, проше́нія на́ша во бла́го исполня́ющая.

Конда́къ 11.

Пѣ́ніе на́ше смире́нное, отъ полноты́ любве́ и усе́рдія Тебѣ́ приноси́мое, не пре́зри, Чи́стая, и не отврати́ся отъ на́съ, оскверне́нныхъ мно́гими грѣхми́, но помози́ на́мъ, Всеблага́я, покая́ніемъ очи́ститися отъ скве́рны грѣхо́вныя, и преуспѣ́ти въ чи́стѣмъ и богоуго́днѣмъ житіи́, Тя́ подвигополо́жницу и помо́щницу въ се́мъ иму́ще, да возмо́жемъ досто́йно и пра́ведно вопи́ти ко Го́споду: Аллилу́ія.

Икосъ 11.

Свѣ́тлыми луча́ми чуде́съ свята́я ико́на Твоя́ немерца́емо сія́етъ, Богоро́дице Дѣ́во, и ве́сь мíръ благода́тно озаря́етъ, прогоня́я вся́кое вра́жіе дѣ́йство си́лою Бо́жіею, отъ Нея́ исходя́щею; тѣ́мже ра́дуемся мы́, грѣ́шніи, иму́ще таковы́й зало́гъ Твоего́ къ на́мъ благоволе́нія, и Тебѣ́, Скоропослу́шницѣ моле́ній на́шихъ, благода́рственно взыва́емъ:

Ра́дуйся, денни́це со́лнца незаходи́маго; ра́дуйся, заре́ дне́ невече́рняго.

Ра́дуйся, у́тро спасе́нія на́мъ возсія́вшая; ра́дуйся, ро́ждшая Жениха́ безсме́ртнаго ду́шъ человѣ́ческихъ.

Ра́дуйся, жела́нія на́ша богоуго́дная исполня́ющая; ра́дуйся, въ ско́рбехъ и обстоя́ніихъ на по́мощь къ на́мъ благоутро́бно ускоря́ющая.

Ра́дуйся, раю́ мы́сленный, вся́каго утѣше́нія духо́внаго преиспо́лненный; ра́дуйся, отъ исполне́нія Твоего́ и на́мъ ка́пли утѣше́нія источа́ющая.

Ра́дуйся, зно́й страсте́й на́шихъ прохлажда́ющая; ра́дуйся, благода́тное безстра́стіе и́щущимъ, его́ усе́рдно подаю́щая.

Ра́дуйся, всѣ́хъ въ чистотѣ́ цѣлому́дрія живу́щихъ зѣло́ лю́бящая; ра́дуйся, въ со́ніихъ и видѣ́ніихъ избра́нники Бо́жія посѣща́ющая.

Ра́дуйся, всеблага́я Скоропослу́шнице, проше́нія на́ша во бла́го исполня́ющая.

Конда́къ 12.

Благода́ть Бо́жія, прису́щая святѣ́й ико́нѣ Твое́й, Скоропослу́шница Тобо́ю нарече́ннѣй, Богома́ти Влады́чице, влече́тъ къ Не́й всѣ́хъ скорбя́щихъ и обремене́нныхъ, и нетщи́ отхо́дятъ они́ отъ сего́ исто́чника Твои́хъ ми́лостей и щедро́тъ: въ ско́рбехъ отра́ду, въ напа́стехъ защи́ту, въ болѣ́знехъ — цѣльбу́ неоску́дно получа́я отъ чудотво́рнаго о́браза Твоего́, Всеблага́я, и благода́рственно вопію́тъ благи́хъ пода́телю Бо́гу: Аллилу́ія.

Икосъ 12.

Пою́ще чудеса́ Твоя́, Влады́чице, и ве́лію ми́лость Твою́ къ христіа́нскому ро́ду, вѣ́мы, я́ко недово́льни есмы́ къ досто́йному прославле́нію Тебе́, Честнѣ́йшей херуви́мъ и Сла́внѣйшей безъ сравне́нія серафи́мъ, оба́че надѣ́ющеся на безприкла́дное милосе́рдіе Твое́, Всеблага́я, смиренному́дренно прино́симъ Ти́ пѣ́сни таковы́я:

Ра́дуйся, приста́нище небу́рное подви́жниковъ благоче́стія; ра́дуйся, безмо́лвствующихъ сла́дкая собесѣ́днице.

Ра́дуйся, въ пусты́няхъ и гора́хъ скита́ющихся благода́тная отра́до; ра́дуйся, та́йныхъ среди́ мíра рабо́въ Бо́жіихъ та́йное вразумле́ніе.

Ра́дуйся, грѣ́шниковъ ка́ющихся съ Бо́гомъ примире́ніе; ра́дуйся, Горы́ Аѳо́нскія верхо́вная Прави́тельнице.

Ра́дуйся, Петра́ пустыннолюби́ваго посѣще́ніемъ Твои́мъ здѣ́ озари́вшая; ра́дуйся, Аѳана́сія богому́драго явле́ніемъ Твои́мъ здѣ́ облагода́тствовавшая.

Ра́дуйся, мно́гія преподо́бныя Аѳо́нскія сла́вою небе́сною просла́вльшая; ра́дуйся, насе́льникомъ Горы́ сея́ осо́бую любо́вь Твою́ явля́ющая.

Ра́дуйся, тѣле́съ на́шихъ безме́здная Цѣли́тельнице; ра́дуйся, ду́шъ на́шихъ къ Ца́рствію го́рнему Путеводи́тельнице.

Ра́дуйся, всеблага́я Скоропослу́шнице, проше́нія на́ша во бла́го исполня́ющая.

Конда́къ 13.

О, Всепѣ́тая Ма́ти, Скоропослу́шницею наре́кшаяся во святѣ́й ико́нѣ Твое́й, Богоро́дице Марíе! Пріими́ ми́лостивно сіе́ ма́лое моле́ніе на́ше, е́же отъ усе́рдія на́шего принесо́хомъ Ти́ съ вѣ́рою и любо́вію, и умоли́ приснопокланя́емую Тро́ицу изба́вити ны́ гее́нны о́гненныя, тмы́ несвѣти́мыя и муче́нія вѣ́чнаго, да предста́тельствомъ Твои́мъ унаслѣ́димъ Ца́рствіе небе́сное, и сподо́бимся со святы́ми пѣ́ти Бо́гу: Аллилу́ія.

[Се́й конда́къ чте́тся три́жды. И па́ки чту́тся и́косъ 1-й: Ангеловъ ли́цы благоговѣ́йно Тебѣ́ слу́жатъ... и конда́къ и 1-й: Избра́ннѣй отъ всѣ́хъ родо́въ Бо́жіей Ма́тери и Цари́цѣ...]

Моли́тва ко Пресвятѣ́й Богоро́дицѣ Скоропослу́шницѣ.

Преблагослове́нная Влады́чице, Приснодѣ́во Богоро́дице, Бо́га Сло́ва па́че вся́каго сло́ва на спасе́ніе на́ше ро́ждшая, и благода́ть Его́ преизоби́льно па́че всѣ́хъ прія́вшая, мо́ре я́вльшаяся Боже́ственныхъ дарова́ній и чуде́съ приснотеку́щая рѣка́, излива́ющая бла́гость всѣ́мъ, съ вѣ́рою къ Тебѣ́ прибѣга́ющимъ! Чудотво́рному Твоему́ о́бразу припа́дающе, мо́лимся Тебѣ́, всеще́дрѣй Ма́тери человѣколюби́ваго Влады́ки: удиви́ на на́съ пребога́тыя ми́лости Твоя́ и проше́нія на́ша, приноси́мая Тебѣ́, Скоропослу́шницѣ, ускори́ испо́лнити, все́, е́же на по́льзу во утѣше́ніе и спасе́ніе коему́ждо устроя́ющи. Посѣти́, Преблага́я, рабы́ Твоя́ благода́тію Твое́ю, и пода́ждь неду́гующимъ цѣльбу́ и соверше́нное здра́віе, обурева́емымъ тишину́, плѣне́ннымъ свобо́ду, и разли́чными о́бразы стра́ждущихъ утѣ́ши. Изба́ви, Всеми́лостивая Госпоже́, вся́къ гра́дъ и страну́ отъ гла́да, я́звы, тру́са, пото́па, огня́, меча́ и ины́я ка́зни вре́менныя и вѣ́чныя, Ма́тернимъ Твои́мъ дерзнове́ніемъ отвраща́ющи гнѣ́въ Бо́жій. И душе́вного разслабле́нія, обурева́нія страсте́й и грѣхопаде́ній свободи́ рабы́ Твоя́, я́ко да непреткнове́нно во вся́комъ благоче́стіи пожи́вше въ се́мъ вѣ́цѣ, и въ бу́дущемъ вѣ́чныхъ бла́гъ сподо́бимся благода́тію и человѣколю́біемъ Сы́на Твоего́ и Бо́га, Ему́же подоба́етъ вся́кая сла́ва, че́сть и поклоне́ніе, со Безнача́льнымъ Его́ Отце́мъ и Пресвяты́мъ Ду́хомъ, ны́нѣ и при́сно и во вѣ́ки вѣко́въ. Ами́нь.

Тропа́рь, гла́съ 4:

Къ Богоро́дицѣ притеце́мъ, су́щіи въ бѣда́хъ, и святѣ́й ико́нѣ Ея́ ны́нѣ припаде́мъ, съ вѣ́рою зову́ще изъ глубины́ души́: ско́ро на́ше услы́ши моле́ніе, Дѣ́во, я́ко Скоропослу́шница наре́кшаяся. Тебе́ бо раби́ Твои́ въ ну́ждахъ гото́вую Помо́щницу и́мамы.

Конда́къ, гла́съ 8:

Въ мо́ри жите́йстѣмъ обурева́еміи, треволне́нію подпа́даемъ страсте́й и искуше́ній. Пода́ждь у́бо на́мъ, Госпоже́, ру́ку по́мощи, я́коже Петро́ви Сы́нъ Тво́й, и ускори́ отъ бѣ́дъ изба́вити ны́, да зове́мъ Ти́: ра́дуйся, всеблага́я Скоропослу́шнице.

Велича́ніе:

Велича́емъ Тя́, Пресвята́я Дѣ́во, и чте́мъ о́бразъ Тво́й святы́й, и́мже то́чиши исцѣле́нія всѣ́мъ, съ вѣ́рою притека́ющимъ.

Источникъ: Ака́ѳистъ Пресвятѣ́й Влады́чицѣ на́шей Богоро́дицѣ, въ че́сть и па́мять явле́нія чудотво́рныя Ея́ ико́ны, имену́емыя «Скоропослу́шница». — Изда́ніе четве́ртое. — М.: Въ Сѵнодальной Тѵпографіи, 1894. — 50 с.

/ Къ оглавленію раздѣла /


Наверхъ / Къ титульной страницѣ

0