Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - вторникъ, 27 iюня 2017 г. Сейчасъ на порталѣ посѣтителей - 23.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ДОМАШНЯЯ МОЛИТВА

Преп. Никита Столпникъ, Переяславскій чудотворецъ († 1186 г.)

Преподобный Никита Столпник, Переяславский чудотворецРодомъ изъ Переяславля Залѣсскаго, сборщикъ податей, онъ былъ преданъ лихоимству и весело жилъ въ полномъ довольствѣ. Однажды, услыхавъ въ церкви слова: «измыйтеся и чисти будете» (Ис. 1, 16-21), Никита былъ глубоко потрясенъ ими. Въ тотъ же день, когда его жена начала варить мясо къ обѣду, то увидѣла кровь въ сосудѣ, а потомъ разные члены человѣческаго тѣла. Извѣщенный объ этомъ, Никита понялъ, что его занятіе есть то же, что грабежъ и убійство людей. Оставивъ жену, дѣтей и несправедливо пріобрѣтенное богатство, онъ удалился въ Переяславскую (Никитскую) обитель и близъ нея нагой сѣлъ въ тростниковое болото, гдѣ былъ поѣдаемъ комарами и мошками. Послѣ столь глубокаго раскаянія, онъ облекся въ иноческія одежды. Живя въ тѣсной кельѣ, «постомъ и бдѣніемъ изнуряя тѣло», преп. Никита проводилъ дни и ночи въ молитвѣ, пѣніи псалмовъ и чтеніи житій святыхъ, нося тяжелыя вериги и каменную тяжелую шапку. Съ благословенія игумена, преп. Никита взошелъ на столпъ и подвизался на немъ никѣмъ незримый. За святую жизнь преп. Никита удостоился благодати изгнанія бѣсовъ и исцѣленія недуговъ. Скончался онъ мученически, будучи убитъ людьми, хотѣвшими воспользоваться его блестящими отъ молитвенныхъ подвиговъ веригами, которыя они сочли за серебряныя. Кончину его предположительно относятъ къ 1186 г. Св. мощи преп. Никиты обрѣтены нетлѣнными въ началѣ XV в.; память его — 24 мая (6 іюня).

АКАѲИСТЫ

Ака́ѳистъ преподо́бному отцу́ на́шему Ники́тѣ Сто́лпнику, Переясла́вскому чудотво́рцу.

Конда́къ 1.

Взбра́нный чудотво́рче и вели́кій Христо́въ уго́дниче! Восхваля́емъ тя́ съ любо́вію, ча́да твоя́, те́пла предста́теля къ Бо́гу тебе́ стяжа́вше. Ты́ же моли́ просла́вившаго тя́ Го́спода отъ вся́кихъ на́мъ бѣ́дъ свободи́тися, зову́щимъ:

Pа́дуйся, Ники́то преподо́бне, сто́лпниче и чудотво́рче.

Икосъ 1.

Ра́дуйся, сосу́де избра́нный, свы́ше Бо́гомъ предувѣ́данный; ра́дуйся, въ хра́мъ Ду́ха Всесвята́го предуста́вленный.

Ра́дуйся, сподо́бивыйся Боже́ственнаго призва́нія; ра́дуйся, удосто́ивыйся отъ Го́спода оправда́нія.

Ра́дуйся, благода́ть Бо́жію, умягча́ющую се́рдце твое́, получи́вый; ра́дуйся, очисти́тельнаго покая́нія то́ки сле́зъ источи́вый.

Ра́дуйся, вѣ́ру въ призва́вшаго тя́ Го́спода несумнѣ́нну воспрія́вый; ра́дуйся, всего́ себе́ води́тельству Бо́жію преда́вый.

Ра́дуйся, супру́жницу и клевре́товъ твои́хъ Го́спода ра́ди оста́вивый; ра́дуйся, невозвра́тное твое́ ше́ствіе къ сниска́нію спасе́нія напра́вивый.

Ра́дуйся, Ца́рствія небе́снаго стяжа́телю; ра́дуйся, о всѣ́хъ къ тебѣ́ притека́ющихъ те́плый ко Го́споду предста́телю.

Pа́дуйся, Ники́то преподо́бне, сто́лпниче и чудотво́рче.

Конда́къ 2.

Ви́дя супру́жницу твою́, дивя́щуюся премѣне́нію снѣ́дныхъ мя́съ, я́кобы въ человѣ́ческія чле́ны, и недоумѣва́ющую о неисповѣди́мыхъ судьба́хъ Бо́жіихъ, свы́ше озаре́нъ, исповѣ́далъ еси́, я́ко Госпо́дь на покая́ніе тя́ призыва́етъ, и а́біе позна́лъ еси́ спаса́ющему тя́ Бо́гу пѣ́ти: Аллилу́ія.

Икосъ 2.

Ра́зумъ недоразумѣва́емый, въ ди́вномъ призва́ніи твое́мъ проявле́нный разумѣ́ти ища́, преподо́бне о́тче Ники́то, помышля́лъ еси́, ка́ко о Го́споде возмощи́ мíръ и діа́вола посрами́ти, къ ла́врѣ свята́го великому́ченика Ники́ты а́біе поте́клъ еси́, идѣ́же и а́нгельскій о́бразъ на ся́ воспріи́мъ, до́бль во́инъ Христо́въ показа́лся еси́. Мы́ же, Го́спода спа́сшаго тя́ прославля́юще, ра́достно вопіе́мъ ти́:

Ра́дуйся, я́ко мыта́рь, ко Го́споду о поми́лованіи вопія́вый; ра́дуйся, я́ко заблу́дшій сы́нъ, Отца́ Небе́снаго взыска́вый.

Ра́дуйся, я́ко ханане́я, отъ Христа́ не отступа́вый; ра́дуйся, я́ко блудни́ца, о грѣсѣ́хъ рыда́вый.

Ра́дуйся, я́ко Езекíя, уми́льно моли́выйся; ра́дуйся, я́ко Манассíя, въ покая́ніи смири́выйся.

Ра́дуйся, я́ко Іовъ, искуше́нія крѣ́пко терпѣ́вый; ра́дуйся, я́ко Даніи́лъ, прему́дрость Бо́жію разумѣ́ти вожделѣ́вый.

Ра́дуйся, Дави́дово раска́яніе яви́вый; ра́дуйся, Петро́вы сле́зы источи́вый.

Ра́дуйся, пу́ть и́стинный къ животу́ вѣ́чному обрѣты́й; ра́дуйся, я́ко кри́нъ, любо́вію Боже́ственною процвѣты́й.

Pа́дуйся, Ники́то преподо́бне, сто́лпниче и чудотво́рче.

Конда́къ 3.

Си́ла Вы́шняго осѣни́ тя, преподо́бне о́тче Ники́то, егда́ въ нача́лѣ не бы́лъ еси́ удосто́енъ прія́тія въ ла́вру великому́ченика Ники́ты, и трехдне́внымъ твои́мъ предъ враты́ о́ныя присѣдѣ́ніемъ и всенаро́днымъ грѣхо́въ твои́хъ исповѣ́даніемъ, побѣди́теля на діа́вола тя́ яви́, науча́я на́съ Даю́щему крѣ́пость лю́демъ Свои́мъ Бо́гу пѣ́ти: Аллилу́ія.

Икосъ 3.

Имѣ́яй богопрія́тное стремле́ніе во святѣ́й ла́врѣ великому́ченика Ники́ты водвори́тися, но отъ сея́ бы́въ отрѣва́емь, въ ти́нное бла́то на́гъ пове́рглся еси́ на терза́ніе мши́цемъ и гадо́мъ. Мы́ же, толи́ко крѣ́пкому твоему́ терпѣ́нію дивя́щеся, вопіе́мъ ти́:

Ра́дуйся, мíру еди́ножды навсегда́ уме́рый; ра́дуйся, нераска́янно вся́ кра́сная мíра сего́ презрѣ́вый.

Ра́дуйся, тщесла́вныя по́мыслы смири́вый; ра́дуйся, мы́сль въ Бо́зѣ утверди́вый.

Ра́дуйся, сребролю́біе изсуши́вый; ра́дуйся, сластолю́біе умертви́вый.

Ра́дуйся, вся́кій гнѣ́въ и избы́токъ зло́бы отложи́вый; ра́дуйся, смиренному́дріе возлюби́вый.

Ра́дуйся, ду́шу твою́ по сло́ву Христа́ возненави́дѣвый; ра́дуйся, дѣ́лы благи́ми Веліа́ра преоби́дѣвый.

Ра́дуйся, пло́ть со страстьми́ и похотьми́ распны́й; ра́дуйся, по обраще́ніи твое́мъ не себѣ́, но еди́ному Бо́гу живы́й.

Pа́дуйся, Ники́то преподо́бне, сто́лпниче и чудотво́рче.

Конда́къ 4.

Бу́рю вну́трь имѣ́я помышле́ній сумни́тельныхъ, святы́я ла́вры игу́менъ смяте́ся, зря́ тебе́, грѣхолюби́ва бы́вша, на по́двиги и́ночествующихъ толи́ко бо́дренно дерза́юща, въ мѣ́стѣ тѣ́снѣ тя́ затвори́ во испыта́ніе блага́го твоего́ произволе́нія; ты́ же на діа́вола, я́ко Дави́дъ на Голіа́ѳа, единобо́рствовати ра́достно съ ка́менемъ вѣ́ры поте́клъ еси́, поя́ Го́споду си́лъ: Аллилу́ія.

Икосъ 4.

Слы́шавъ сказа́нія житíй дре́внихъ подви́жниковъ, преподо́бне, ка́ко отъ Го́спода наставля́еми и укрѣпля́еми, труды́ ко трудо́мъ прилага́ху, тѣ́мъ подража́ти возревнова́лъ еси́, и тя́жкія вери́ги, по благослове́нію игу́мена, на ся́ возложи́въ, де́нь и но́щь въ моли́твахъ пребыва́лъ еси́. Мы́ же, ди́вное твое́ подви́жничество прославля́я, зове́мъ ти́ такова́я:

Ра́дуйся, житіе́мъ отце́въ пусты́нныхъ плѣне́нный; ра́дуйся, любо́вію Боже́ственною распале́нный.

Ра́дуйся, произво́льное у́зничество возлюби́вый; ра́дуйся, во умерщвле́ніе пло́ти желѣ́за на себе́ возложи́вый.

Ра́дуйся, въ по́двизѣхъ неутоми́мый; ра́дуйся, во благоче́стіи неохлади́мый.

Ра́дуйся, во пло́ти безпло́тныхъ а́нгеловъ сожи́телю; ра́дуйся, своего́ произволе́нія во́ли Бо́жіей покори́телю.

Ра́дуйся, исправле́ніи твои́ми безпло́тныхъ удиви́вый; ра́дуйся, равноа́нгельнаго житія́ о́бразъ и́стинный на́мъ яви́вый.

Ра́дуйся, въ собесѣ́дованіе съ Бо́гомъ вы́ну углубле́нный; ра́дуйся, благода́тію Бо́жіею преобогаще́нный.

Pа́дуйся, Ники́то преподо́бне, сто́лпниче и чудотво́рче.

Конда́къ 5.

Богопѣ́сненную псалти́рь къ достиже́ніи небе́снаго оте́чества, я́ко свѣти́льникъ, во умѣ́ твое́мъ вы́ну содержа́, то́ю прославля́лъ еси́ Небе́снаго Отца́, воспѣва́я: Аллилу́ія.

Икосъ 5.

Ви́дѣвше бли́жніи и да́льніи, е́же по Бо́зѣ житіе́ твое́, преподо́бне, чу́дному твои́хъ нра́вовъ измѣне́нію удивля́хуся, добродѣ́тели же и по́двиги твоя́ прославля́ху, съ ни́ми же и мы́ си́це вопіе́мъ ти́:

Ра́дуйся, я́ко въ ста́рости крѣ́пость му́жескую показа́лъ еси́; ра́дуйся, я́ко обѣ́тъ и́ночества дѣла́ми оправда́лъ еси́.

Ра́дуйся, въ многостра́стнѣй пло́ти подвиза́выйся, я́ко безпло́тный; ра́дуйся, благи́ми по́мыслы и дѣ́лы многопло́дный.

Ра́дуйся, твои́ми по́двиги отъ облѣне́нія на́съ возставля́яй; ра́дуйся, твое́ю жи́знію пу́ть ко спасе́нію всѣ́мъ изъявля́яй.

Ра́дуйся, любо́вь ве́лію къ Бо́гу показа́вый; ра́дуйся, многообра́знѣ по́мощь Бо́жію испыта́вый.

Ра́дуйся, Бо́жіей любви́ къ ка́ющимся зерца́ло; ра́дуйся, подвиза́ющимся на діа́вола крѣ́пкое забра́ло.

Ра́дуйся, вы́ну о на́съ съ моли́твою Бо́гу предстоя́щій; ра́дуйся, и подне́сь оби́тель твою́ неруши́му храня́щій.

Pа́дуйся, Ники́то преподо́бне, сто́лпниче и чудотво́рче.

Конда́къ 6.

Проповѣ́даютъ тя́жкія твоя́ вери́ги, смиренному́дре Ники́то, труды́ и болѣ́зни, Бо́га ра́ди тобо́ю подъя́тыя, и́хже ра́ди ди́вно просла́ви тя́ Госпо́дь, оби́льныя исцѣле́ній струи́ тобо́ю источа́я на́мъ, да вы́ну пое́мъ Ему́: Аллилу́ія.

Икосъ 6.

Возсія́вшая въ сокруше́ннѣмъ се́рдцѣ твое́мъ благода́ть Всесвята́го Ду́ха, прови́дца бу́дущихъ, и ско́раго навѣ́туемымъ отъ бѣсо́въ свободи́теля показа́ тя́, преподо́бне, науча́я всѣ́хъ вопи́ти тебѣ́ си́це:

Ра́дуйся, пре́дняя, я́ко настоя́щая прорека́вый; ра́дуйся, да́льная, я́ко бли́зъ су́щая прозира́вый.

Ра́дуйся, я́ко кня́зю Михаи́лу вину́ разслабле́нія его́ тѣле́снаго объясни́лъ еси́; ра́дуйся, я́ко му́ченическую кончи́ну ему́ и боля́рину его́ бы́ти предвѣсти́лъ еси́.

Ра́дуйся, со проро́ки просла́вленный; ра́дуйся, чудотво́рцемъ сопричи́сленный.

Ра́дуйся, горды́ни діа́волей низложи́телю; ра́дуйся, бѣсо́въ прогони́телю.

Ра́дуйся, си́лу вра́жію попра́вый; ра́дуйся, въ си́лѣ Бо́жіей преспѣва́вый.

Ра́дуйся, я́ко Ца́рствіе Бо́жіе вну́трь себе́ стяжа́лъ еси́; ра́дуйся, я́ко Христа́ на вѣ́ки въ тебѣ́ жи́ти воспрія́лъ еси́.

Pа́дуйся, Ники́то преподо́бне, сто́лпниче и чудотво́рче.

Конда́къ 7.

Хотя́щу діа́волу явле́ніемъ свои́мъ во о́бразѣ драко́на устраши́ти тя́, стоя́ща на моли́твѣ, ору́жіемъ креста́ пораже́ніе всеконе́чное нане́слъ еси́, побѣди́телю Бо́гу воспѣва́я: Аллилу́ія.

Икосъ 7.

Но́вую тва́рь показа́ тя́ Зижди́тель, отъ міролю́бія къ толи́кому боголю́бію се́рдце твое́ обрати́въ, преподо́бне о́тче, я́ко ты́ на сто́лпъ, а́ки Илія́ на о́гненную колесни́цу, возше́дъ, бдѣ́ніе, по́стъ и моли́тву, а́ки ко́ни быстроте́чныя отъ земли́ къ небеси́ стяжа́лъ еси́, и та́ко ко Христу́ предста́въ, вы́ну хода́тайствуеши о на́съ, вопію́щихъ тебѣ́:

Ра́дуйся, я́ко е́же по Бо́зѣ и́стинное житіе́ позна́лъ еси́; ра́дуйся, я́ко то́е и́щущимъ дѣла́ми показа́лъ еси́.

Ра́дуйся, велему́дровъ вѣ́ка сего́ обуи́вый; ра́дуйся, и́стинную му́дрость въ смиренному́дріи бы́ти яви́вый.

Ра́дуйся, и́го Христа́ воспрія́вый; ра́дуйся, бла́гость о́наго житіе́мъ оправда́вый.

Ра́дуйся, я́звы Го́спода Іису́са любе́знѣ на тѣ́лѣ твое́мъ поне́сшій; ра́дуйся, всего́ себе́ въ же́ртву Го́сподеви прине́сшій.

Ра́дуйся, земны́й стра́нниче; ра́дуйся, Бо́жій избра́нниче.

Ра́дуйся, мона́ховъ наста́вниче; ра́дуйся, богопрія́тный о на́съ моли́твенниче.

Pа́дуйся, Ники́то преподо́бне, сто́лпниче и чудотво́рче.

Конда́къ 8.

Стра́нное и пресла́вное чу́до ви́дится всѣ́мъ, притека́ющимъ къ тебѣ́, о́тче Ники́то, я́ко и вода́ отъ изры́тыхъ тобо́ю кладенце́въ, че́рплемая съ вѣ́рою, тѣле́сныя и душе́вныя неду́ги исцѣля́етъ, науча́я чудодѣ́ющему Бо́гу пѣ́ти: Аллилу́ія.

Икосъ 8.

Ве́сь отъ Всесвята́го Бо́га облагода́тствованъ еси́, преподо́бне о́тче, я́ко ду́хомъ престо́лу Бо́жію предстои́ши, тѣ́ломъ же въ нѣ́дрѣ земли́ почива́я, отъ гро́ба твоего́ подае́ши цѣльбы́. Сего́ ра́ди и взыва́емъ ти́ такова́я:

Ра́дуйся, вѣ́рный ра́бе Влады́ки Всеблага́го; ра́дуйся, хра́ме преукраше́нный Ду́ха Всесвята́го.

Ра́дуйся, Царя́ Небе́снаго предстоя́телю; ра́дуйся, ско́рый проше́ній пода́телю.

Ра́дуйся, исто́чниче исцѣле́ній; ра́дуйся, сокро́вищнице чудотворе́ній.

Ра́дуйся, ви́димыми чудесы́ неви́димую благода́ть, въ тебѣ́ су́щую, явля́яй; ра́дуйся, вѣ́рныхъ ду́ши зна́меньми въ вѣ́рѣ утвержда́я.

Ра́дуйся, ча́дамъ Це́ркви лучеза́рный свѣти́льниче; ра́дуйся, ди́вный Христо́въ уго́дниче.

Ра́дуйся, увѣнча́нный подви́жниче; ра́дуйся, Бо́гу при́сный люби́миче.

Pа́дуйся, Ники́то преподо́бне, сто́лпниче и чудотво́рче.

Конда́къ 9.

Вся́кое естество́ а́нгельское удиви́ся вели́кому свы́ше тебѣ́ дарова́нію, преподо́бне Ники́то, я́ко и дре́вяный по́сохъ тво́й, стра́ждущему тѣле́снымъ разслабле́ніемъ Черни́говскому кня́зю Михаи́лу по́сланный отъ тебе́ и въ ру́ку и́мъ прія́тый, а́біе исцѣле́ніе тому́ дарова́ и научи́ его́ пѣ́ти чудодѣ́ющему тобо́ю Бо́гу: Аллилу́ія.

Икосъ 9.

Вѣтíи многовѣща́нніи недоумѣ́ютъ по достоя́нію восхвали́ти тя́, достосла́вне о́тче, я́ко па́че естества́ си́лу вра́жію пресла́вно низлага́еши. Еще́ бо въ тѣлеси́ пребыва́я, бѣ́са, ше́ствовавшу къ тебѣ́ кня́зю Михаи́лу я́вльшася во о́бразѣ и́нока и благо́е кня́же предпрія́тіе воспяща́вша, ви́димо къ столпу́ твоему́ и́менемъ Христа́ пригвозди́лъ еси́, и подне́сь ту́южде вла́сть на бѣ́сы явля́еши, разруша́я злоко́зненныя дѣ́йства и́хъ на человѣ́ковъ. Сего́ ра́ди и зове́мъ ти́ си́це:

Ра́дуйся, лжи́ діа́волей обличи́телю; ра́дуйся, пре́лести бѣсо́вскія посрами́телю.

Ра́дуйся, вла́сть на ду́хи нечи́стыя прія́вый; ра́дуйся, ту́южде и по сме́рти удержа́вый.

Ра́дуйся, я́ко де́мони и гро́ба твоего́ трепе́щутъ; ра́дуйся, я́ко на ни́хъ и вери́ги твоя́ стрѣ́лы паля́щія ме́щутъ.

Ра́дуйся, я́ко бѣ́сныя во оби́тель твою́ то́чію ну́ждею привлача́еми быва́ютъ; ра́дуйся, я́ко о́ніи здра́ви и смы́слящіи ту́ю оставля́ютъ.

Ра́дуйся, я́ко де́мони здѣ́ и не хотя́ще себе́ открыва́ютъ; ра́дуйся, я́ко тобо́ю гони́ми, изъ одержи́мыхъ и́ми ско́ро убѣга́ютъ.

Ра́дуйся, рѣка́ исцѣле́ній быстроте́чная; ра́дуйся, стра́жа оби́тели вѣ́чная.

Pа́дуйся, Ники́то преподо́бне, сто́лпниче и чудотво́рче.

Конда́къ 10.

Спасти́ хотя́ ду́шу твою́, богому́дре о́тче, въ кро́тости и смиренному́дріи Христо́вѣ вы́ну поуча́лся и ди́вно преуспѣ́лъ еси́. Тѣ́мже и рабо́мъ твои́мъ, хотя́щимъ ну́ждно изъя́ти ду́шу твою́, ничто́же прере́клъ, ниже́ возопи́лъ еси́, но, я́ко а́гнецъ незло́бивый, главу́ подклони́въ, сме́рть отъ тѣ́хъ прія́лъ еси́, поя́ Бо́гу: Аллилу́ія.

Икосъ 10.

Стѣна́ еси́ всѣ́мъ, воспѣва́ющимъ тя́ и притека́ющимъ съ вѣ́рою къ заступле́нію твоему́, Ники́то сто́лпниче. Тѣ́мже и на́мъ, къ тебѣ́ прибѣга́ющимъ, бу́ди сто́лпъ непоколеби́мь, отъ вся́кихъ на́съ бѣ́дъ и напа́стей вы́ну застѣня́я и огражда́я, за е́же и пое́мъ тебѣ́ такова́я:

Ра́дуйся, приста́нище обурева́емыхъ; ра́дуйся, по́моще озлобля́емыхъ.

Ра́дуйся, ско́рбныхъ утѣ́шителю; ра́дуйся, немощны́хъ укрѣпи́телю.

Ра́дуйся, грѣ́шнымъ Бо́га умилостивля́яй; ра́дуйся, благи́хъ въ добрѣ́ утвержда́яй.

Ра́дуйся, ка́ющихся свои́мъ примѣ́ромъ ободря́яй; ра́дуйся, о спасе́ніи подвиза́ющимся спобора́яй.

Ра́дуйся, мяту́щихся по́мыслами умири́телю; ра́дуйся, вра́жіихъ навѣ́товъ отрази́телю.

Ра́дуйся, на́шихъ царе́й держа́во и похвало́; ра́дуйся, гра́да Переясла́вля утвержде́ніе и красото́.

Pа́дуйся, Ники́то преподо́бне, сто́лпниче и чудотво́рче.

Конда́къ 11.

Пѣ́ніе благода́рственное Го́споду прино́сятъ вси́, пріе́млющіи, ви́дящіи и слы́шащіи многочи́сленная чудеса́, отъ тя́жкихъ вери́гъ и гро́ба твоего́ быва́ющая си́лою Бо́жіею, ю́же ты́ вы́ну на небесѣ́хъ прославля́еши, поя́ Бо́гу: Аллилу́ія.

Икосъ 11.

Свѣтоза́рное свѣти́ло, на тве́рди церко́внѣй возсія́вшее, преподо́бне о́тче Ники́то, показа́ша тя́ три́ огневи́дныя столпы́, я́вльшіяся надъ пове́рженными отъ убíйцъ твои́хъ и я́ко дре́во въ вода́хъ Во́лжскихъ пла́вавшими твои́ми вери́гами, я́же и положи́ти здѣ́ на гро́бѣ твое́мъ, я́ко по́честь трудо́въ твои́хъ, въ нощнѣ́мъ видѣ́ніи повелѣ́лъ еси́. Чесо́ ра́ди твое́ водворе́ніе во свѣ́тлостѣхъ святы́хъ бы́ти уразумѣ́вше, тя́ воспѣва́емъ:

Ра́дуйся, жи́телю Боже́ственнаго селе́нія; ра́дуйся, дости́гшій вѣ́чнаго упокое́нія.

Ра́дуйся, бла́гъ неизрече́нныхъ наслажда́ющійся; ра́дуйся, лицезрѣ́нія Бо́жія насыща́ющійся.

Ра́дуйся, со а́нгелы при́сно лику́ющій; ра́дуйся, трисвяту́ю пѣ́снь немо́лчно пою́щій.

Ра́дуйся, съ преподо́бными ублажа́емый; ра́дуйся, съ му́чениками увѣнчава́емый.

Ра́дуйся, ра́достію вѣ́чною преисполня́емый; ра́дуйся, любо́вію Боже́ственною преуслажда́емый.

Ра́дуйся, я́ко тобо́ю Вы́шній на небеси́ и на земли́ сла́вится; ра́дуйся, я́ко и ты́ сего́ ра́ди Вы́шнимъ на небеси́ и на земли́ просла́вися.

Pа́дуйся, Ники́то преподо́бне, сто́лпниче и чудотво́рче.

Конда́къ 12.

Благода́ть чуде́съ твои́хъ, преподо́бне о́тче Ники́то, въ се́рдцѣ первосвяти́теля Фо́тія ве́ліе ко отыска́нію многоцѣле́бныхъ моще́й твои́хъ жела́ніе возжже́. Ты́ же, богому́дре, а́ще и попусти́лъ еси́ откопа́ти и ви́дѣти нетлѣ́нное и чудесы́ благоуха́ющее тѣ́ло твое́; оба́че я́коже и пре́жде человѣ́ческія сла́вы убѣга́вшій, всѣ́хъ изъ хра́ма, а́ки бу́рею, изри́нувъ, па́ки себе́ въ зе́млю скры́лъ еси́. Чесо́ ра́ди ди́вному во святы́хъ Свои́хъ Бо́гу Іа́ковлю воспѣва́емъ: Аллилу́ія.

Икосъ 12.

Пою́ще пресла́вно дѣ́йствующаго тобо́ю чудеса́ Царя́ Небе́снаго, тя́, о́тче достосла́вне, восхваля́емъ, а́ще и недосто́йными уста́ми, оба́че усе́рдно ублажа́я тя́ си́це:

Ра́дуйся, честно́е Пресвяты́я Тро́ицы носи́ло и похвале́ніе; ра́дуйся, святы́ни Ду́ха чи́стое и непоро́чное селе́ніе.

Ра́дуйся, чуде́съ пучи́но, Бо́гомъ излія́нная; ра́дуйся, мѵрова́рнице, на вся́ неду́ги врачева́ніями преизоби́льная.

Ра́дуйся, о́бразе а́гнцемъ и па́стыремъ; ра́дуйся, преукраше́нный вся́кимъ Боже́ственнымъ дарова́ніемъ.

Ра́дуйся, пра́вило вѣ́ры и о́бразе кро́тости духо́вныя; ра́дуйся, зри́телю красоты́ Боже́ственныя неизрече́нныя.

Ра́дуйся, мѵ́ра Христо́ва благоуха́ніе; ра́дуйся, многоцвѣ́тный кри́не ра́йскаго прозябе́нія.

Ра́дуйся, я́ко а́нгели о твои́хъ исправле́ніихъ ра́дуются; ра́дуйся, я́ко мно́зи человѣ́цы по твоему́ примѣ́ру и предста́тельству спаса́ются.

Pа́дуйся, Ники́то преподо́бне, сто́лпниче и чудотво́рче.

Конда́къ 13.

О, пресла́вный чудотво́рче и вели́кій Христо́въ уго́дниче, а́вво Ники́то преподобному́чениче! Ны́нѣшнее на́ше хвале́бное приноше́ніе пріе́мши, не оста́ви при́сно хода́тайствовати о на́съ у Отца́ Небе́снаго, да въ житіи́ се́мъ сѣ́тей вра́жіихъ и пре́лести бѣсо́вскія избы́вше, возду́шныхъ мыта́рствъ и гее́нны вси́ избѣ́гнемъ, и все́льшеся въ го́рній Іерусали́мъ, сподо́бимся съ тобо́ю пѣ́ти Всеблаго́му Бо́гу на́шему вѣ́чно немо́лчное: Аллилу́ія.

[Се́й конда́къ глаго́ли три́жды. И па́ки чте́тся 1-й и́косъ: Ангеловъ подо́бника... и конда́къ 1-й: Взбра́нный чудотво́рче...]

Моли́тва преподо́бному Ники́тѣ Сто́лпнику, Переясла́вскому чудотво́рцу.

О, всечестна́я главо́, преподо́бне о́тче преблаже́нне, вели́кій а́вво Ники́то преподобному́чениче! Не забу́ди ни́щихъ твои́хъ до конца́, но помина́й на́съ всегда́ во святы́хъ свои́хъ и благопрія́тныхъ моли́твахъ къ Бо́гу, и не забу́ди присѣща́ти ча́дъ свои́хъ. Моли́ за ны́, о́тче благíй и избра́нниче Христо́въ, я́ко имѣ́яй дерзнове́ніе къ небе́сному Царю́, и не премолчи́ за ны́ ко Го́споду, и не пре́зри на́съ, вѣ́рою и любо́вію чту́щихъ тя́. Помина́й на́съ, недосто́йныхъ, у престо́ла Вседержи́телева и не преста́й моля́ся за на́съ ко Христу́ Бо́гу, тебѣ́ бо дана́ бы́сть благода́ть моли́тися за ны́. Не мни́мъ бо тя́ ме́ртва су́ща, а́ще бо и тѣ́ломъ преста́вился еси́ отъ на́съ, но и по сме́рти у́бо жи́въ пребыва́еши. Не отступа́й отъ на́съ ду́хомъ, сохраня́я и соблюда́я на́съ отъ стрѣ́лъ вра́жіихъ и вся́кія пре́лести бѣсо́вскія, засту́пниче и моли́твенниче на́шъ до́брый. Аще бо и моще́й твои́хъ ра́ка предъ очи́ма на́шима ви́дима е́сть всегда́, но свята́я твоя́ душа́ со а́нгельскими во́инствы, со безпло́тными ли́ки, съ небе́сными си́лами у престо́ла Вседержи́теля Бо́га въ лѣ́поту досто́йно весели́тся. Вѣ́дуще у́бо тя́ вои́стинну и по сме́рти жи́ва су́ща, тебѣ́ припа́даемъ, и тебѣ́ мо́лимся, и ми́лися дѣ́емъ, е́же моли́тися о на́съ Всеси́льному Бо́гу о по́льзѣ ду́шъ на́шихъ, и испроси́ на́мъ вре́мя на покая́ніе и невозбра́нно прейти́ отъ земли́ на не́бо, и го́рькихъ мыта́рствъ, и возду́шныхъ князе́й, и вѣ́чныя му́ки изба́витися на́мъ, и небе́сному Ца́рствію наслѣ́дникомъ бы́ти со всѣ́ми пра́ведными, отъ вѣ́ка угоди́вшими Ему́, Го́споду на́шему Іису́су Христу́. Ему́же подоба́етъ вся́кая сла́ва, че́сть и поклоне́ніе, со Безнача́льнымъ Его́ Отце́мъ и Святы́мъ Ду́хомъ, ны́нѣ и при́сно и во вѣ́ки вѣко́въ. Ами́нь.

Тропа́рь, 4: [1]

Христо́ву му́ченику тезоимени́тъ бы́лъ еси́, преподо́бне, мно́ги по́двиги и труды́ претерпѣ́лъ еси́ Христа́ ра́ди, Его́же ра́ди вери́ги носи́лъ еси́, блаже́нне. Того́ ны́нѣ о на́съ моли́, Ники́то преподо́бне, душе́вныя на́ша и тѣле́сныя стра́сти уврачева́ти, и́же вѣ́рою и любо́вію почита́ющихъ при́сно па́мять твою́.

Инъ тропа́рь, гла́съ то́йже:

Правосла́внымъ смы́сломъ ю́ношская возжелѣ́нія возненави́дѣвъ и до́блественныя нра́вы воспріи́мъ, врага́ побѣди́лъ еси́, и во благоразу́міи Бо́гу угоди́лъ еси́, и свы́ше отъ Него́ пріе́мъ да́ръ чуде́съ, бѣ́сы прогоня́ти, неду́ги исцѣля́ти, Ники́то пресла́вне, моли́ Христа́ Бо́га, да спасе́тъ ду́ши на́ша.

Конда́къ, гла́съ 8:

Христа́ ра́ди отъ твои́хъ рабо́въ ну́ждную сме́рть претерпѣ́лъ еси́ и вѣне́цъ нетлѣ́нія отъ Него́ воспрія́лъ еси́, приходя́щимъ же съ вѣ́рою отъ честна́го твоего́ гро́ба подае́ши цѣльбы́, о Ники́то преподо́бне, моли́твенниче о душа́хъ на́шихъ.

Велича́ніе:

Ублажа́емъ тя́, преподо́бне о́тче Ники́то, и чте́мъ святу́ю па́мять твою́, наста́вниче мона́ховъ и собесѣ́дниче а́нгеловъ.

Примѣчаніе:
[1] Сей тропарь есть твореніе Царя Іоанна Васильевича Грознаго, особенно благоговѣвшаго къ памяти преподобнаго. Тропарь сохранился на вышитой супругою Іоанна Анастасіею пеленѣ, съ изображеніемъ преподобнаго Никиты, хранящейся въ обители. (Примѣч. настоятеля обители, представившаго къ печатанію сей акаѳистъ въ рукописи.)

Источникъ: Ака́ѳистъ преподо́бному отцу́ на́шему Ники́тѣ Сто́лпнику, Переясла́вскому чудотво́рцу. — М.: Въ Сѵнода́льной Тѵпогра́фіи, 1860. — 24 с.

/ Къ оглавленію раздѣла /


Наверхъ / Къ титульной страницѣ

0