Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - суббота, 16 декабря 2017 г. Сейчасъ на порталѣ посѣтителей - 9.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ДОМАШНЯЯ МОЛИТВА

Преп. Симонъ, еп. Владимірскій, Печерскій чудотворецъ († 1226 г.)

Святитель Симон, епископ Владимирский, Печерский чудотворецПреп. Симонъ, епископъ Владимірскій и Суздальскій — инокъ Кіево-Печерскаго монастыря, свидѣтель и списатель житій угодниковъ печерскихъ, второй лѣтописцъ послѣ преп. Нестора. Съ 1206 г. игуменъ Рождественскаго монастыря во Владимірѣ. «Блаженный, милостивый, учительный». По просьбѣ св. Великаго Князя Георгія Всеволодовича былъ поставленъ первымъ епископомъ Владимірскимъ. Имъ описана слава Печерской обители въ письмѣ къ иноку Поликарпу. Это описаніе составило первую часть Патерика Печерского. — «...Разумѣй, братъ мой, какова слава и честь монастыря того! Я бы радъ былъ оставить свою епископію и работать въ томъ святомъ Печерскомъ монастырѣ... Истинно говорю тебѣ: сейчасъ же эту славу и честь святительства за ничто вмѣнилъ бы, лишь бы коломъ торчать за воротами, валяться соромъ въ Печерскомъ монастырѣ, чтобы люди попирали меня, или сдѣлаться однимъ изъ убогихъ, просящихъ милостыню у воротъ честной Лавры. Это лучше было бы для меня временной сей чести; больше желалъ бы я провести одинъ день въ дому Божіей Матери, чѣмъ жить тысячу лѣтъ въ селеніяхъ грѣшниковъ. Поистинѣ говорю тебѣ, гдѣ слышалъ ты о такихъ дивныхъ чудесахъ, какія творились въ святомъ Печерскомъ монастырѣ, — о такихъ божественнѣйшихъ отцахъ, которые, подобно лучамъ солнечнымъ, просіяли до конца вселенной?..» Память преп. Симона — 10 (23) мая.

АКАѲИСТЫ

Ака́ѳистъ и́же во святы́хъ отцу́ на́шему Си́мону, епи́скопу Влади́мірскому и Су́ждальскому, Пече́рскому чудотво́рцу.

Конда́къ 1.

Взбра́нный и пресла́вный защи́тниче на́шъ отъ вра́гъ спасе́нія на́шего ви́димыхъ и неви́димыхъ, святи́телю о́тче Си́моне всеблаже́нне, почита́юще честны́я и многоцѣле́бныя мо́щи твоя́, я́ко многоцѣ́нный зало́гъ неусы́пнаго предста́тельства твоего́ о на́съ ко Го́споду, со умиле́ніемъ благода́рственно зове́мъ ти́:

Ра́дуйся, о́тче Си́моне, прилѣ́жный о на́съ къ Бо́гу моли́твенниче.

Икосъ 1.

Ра́дуйся, въ служе́ніи твое́мъ спасе́нію бли́жнихъ, а́нгеловъ ди́вный подража́телю; ра́дуйся, въ ре́вности твое́й о сла́вѣ и́мене Бо́жія пресла́вный проро́ковъ послѣ́дователю.

Ра́дуйся, въ по́двизѣхъ благовѣствова́нія Христо́ва и́стинный апо́столовъ прее́мниче; ра́дуйся, въ трудѣ́хъ архипа́стырства равноче́стный пресла́внымъ святи́телемъ сопресто́льниче.

Ра́дуйся, строи́телю до́ма Бо́жія вѣ́рный и вои́стинну му́дрый; ра́дуйся, изъясни́телю велѣ́ній Госпо́днихъ нелѣ́ностный и вои́стинну учи́тельный.

Ра́дуйся, священнотаи́нниче, освяще́нный Бо́гомъ въ приноше́ніе же́ртвы Ему́ благопрія́тныя; ра́дуйся, пра́ведниче, его́же моли́тва мно́го мо́жетъ предъ Го́сподемъ поспѣшеству́ема.

Ра́дуйся, о́тче Си́моне, прилѣ́жный о на́съ къ Бо́гу моли́твенниче.

Конда́къ 2.

Ви́дя и слы́ша отъ ины́хъ самови́дцевъ равноа́нгельная житія́ преподо́бныхъ оте́цъ Пече́рскія Ла́вры, потща́лся еси́, богому́дре о́тче, не то́чію до́брѣ запечатлѣ́ти я́ на cкpижáлѣхъ се́рдца твоего́, но и писа́ніемъ достовѣ́рно извѣсти́ти я́ родо́мъ послѣ́днѣйшимъ, да вы́ну взира́юще на сконча́ніе жи́тельства уго́дниковъ Бо́жіихъ, и подража́юще вѣ́рѣ и́хъ, благоче́стно воспѣва́ютъ Ди́вному во святы́хъ Свои́хъ Го́споду: Аллилу́ія.

Икосъ 2.

Ра́зумъ спасе́нія вѣ́чнаго, да́нною ти́ свы́ше прему́дростію, просвѣща́лъ еси́ всѣ́мъ приближа́ющимся къ тебѣ́, и зако́ну Госпо́дню отъ у́стъ твои́хъ поуча́хуся мно́зи, хотя́щіи благоче́стно жи́ти. Сотвори́ у́бо предста́тельствомъ твои́мъ, свя́тче Бо́жій, да поне́ и на́ша страстьми́ омраче́нныя смы́слы благода́тно просвѣтя́тся, во е́же до́брѣ искуша́ти на́мъ, что́ е́сть во́ля Бо́жія блага́я и уго́дная и соверше́нная, да во всѣ́хъ за́повѣдехъ и оправда́ніихъ Госпо́днихъ ходя́ще безпоро́чно, дово́льни бу́демъ и ины́хъ на и́стинный пу́ть спасе́нія наста́вити. Сего́ ра́ди ублажа́емъ тя́:

Ра́дуйся, священноучи́телю, вои́стинну уста́ Бо́жія иму́щій; ра́дуйся, богому́дрый наста́вниче, изводя́й честно́е отъ недосто́йнаго.

Ра́дуйся, дѣ́лателю непосты́дный, я́ко во спасе́ніе бли́жнихъ твои́хъ благопло́дно потруди́лся еси́; ра́дуйся, благíй и вѣ́рный ра́бе, я́ко Го́споду госпо́дствующихъ вои́стинну до́брѣ послужи́лъ еси́.

Ра́дуйся, о́тче богому́дре, написа́вый въ науче́ніе на́ше словеса́ прему́дра; ра́дуйся, я́ко тѣ́ми и по отше́ствіи твое́мъ на́съ уча́ не престае́ши.

Ра́дуйся, я́ко со уго́дники Пече́рскими, и́хже житія́ написа́лъ еси́, во оби́телѣхъ небе́сныхъ водворя́ешися; ра́дуйся, я́ко хода́тайствуеши ко Го́споду, да и мы́ съ ни́ми въ кни́ги живо́тныя напи́шемся.

Ра́дуйся, о́тче Си́моне, прилѣ́жный о на́съ къ Бо́гу моли́твенниче.

Конда́къ 3.

Си́лою благода́тною свы́ше осѣне́нъ, на бра́нь проти́ву си́лъ преиспо́днихъ укрѣпи́лся еси́, посто́мъ же и моли́твою вся́ навѣ́ты и́хъ и кова́рства до конца́ отрази́лъ еси́, тѣ́мже, всеблаже́нне, не преста́й моля́ся ко Го́споду и о на́шемъ укрѣпле́ніи на бра́нь ко враго́мъ спасе́нія на́шего, да побѣди́вше вся́ ко́зни и́хъ, благода́рственно вопіе́мъ о тебѣ́ Бо́гу: Аллилу́ія.

Икосъ 3.

Имѣ́я отъ Го́спода оби́ліе дарова́ній духо́вныхъ, возсія́лъ еси́, богому́дре о́тче, отъ безмо́лвія пеще́рнаго въ далеча́йшія страны́ свѣ́томъ добродѣ́телей твои́хъ, и мно́зи жела́ху тя́ въ предводи́теля и наста́вника себѣ́ имѣ́ти, тѣ́мже и избра́нъ бы́лъ еси́ во игу́мена оби́тели и́ноческія, я́же во гра́дѣ Влади́мірѣ, да просвѣти́тся свѣ́тъ тво́й въ просвѣще́ніе мно́жайшихъ. Сего́ ра́ди велича́емъ тя́:

Ра́дуйся, святы́я Пече́рскія Ла́вры благопло́дное насажде́ніе; ра́дуйся, оби́тели Пресвяты́я Богоро́дицы благоуха́нное прозябе́ніе.

Ра́дуйся, по́стническаго ли́ка преподо́бныхъ свѣти́ло многосвѣ́тлое; ра́дуйся, по́двиговъ и́ноческихъ зерца́ло преизя́щное.

Ра́дуйся, я́ко въ житіи́ твое́мъ Анто́нію ди́вному подража́лъ еси́; ра́дуйся, я́ко въ по́двизѣхъ твои́хъ Ѳеодо́сію чу́дному ревнова́лъ еси́.

Ра́дуйся, я́ко послу́шающихъ тебе́ упра́вилъ еси́ ко спасе́нію вѣ́чному; ра́дуйся, я́ко повину́ющимся тебѣ́ бы́лъ еси́ хода́тай Ца́рствія небе́снаго.

Ра́дуйся, о́тче Си́моне, прилѣ́жный о на́съ къ Бо́гу моли́твенниче.

Конда́къ 4.

Бу́рю страсте́й и свирѣ́пѣющія во́лны похоте́й плотски́хъ до конца́ утоли́лъ еси́ посто́мъ, и бдѣ́ніемъ, и моли́твою, благода́тію же Бо́жіею охраня́емь, дости́глъ еси́ во оти́шіе безстра́стія. Тѣ́мже у́бо изми́, о́тче преподо́бне, моли́твами твои́ми и на́съ, недосто́йныхъ, отъ пото́па страсте́й и поги́бели вѣ́чныя, да спаса́ющему тобо́ю Всеще́дрому Бо́гу благода́рственно вопіе́мъ: Аллилу́ія.

Икосъ 4.

Слы́ша о по́двизѣхъ твои́хъ, и ви́дя исправле́нія твоя́ во игу́менствѣ, благовѣ́рный кня́зь Гео́ргій зѣло́ любля́ше тя́, и въ че́сти ве́ліей имѣ́яше тя́, уго́дниче Бо́жій, тѣ́мже моле́ніемъ его́ возведе́нъ бы́лъ еси́ на архипа́стырскій престо́лъ богоспаса́емыхъ градо́въ Влади́міра и Су́ждаля, идѣ́же па́че просія́лъ еси́ благи́ми дѣ́лы, уче́ніемъ просвѣща́я, любо́вію согрѣва́я, благода́тію же отъ Бо́га испроше́нною живо́тъ подая́ всѣ́мъ, ублажа́ющимъ тя́ зва́ніи си́ми:

Ра́дуйся, іера́рше, благода́тію Свята́го Ду́ха освяще́нный; ра́дуйся, архипа́стырю, вои́стинну Бо́гомъ избра́нный.

Ра́дуйся, пита́телю, пи́щею сло́ва Бо́жія вѣ́рныя насыща́ющій; ра́дуйся, святи́телю, благода́тію Боже́ственною ду́ши на́ша освяща́ющій.

Ра́дуйся, и́стинный учи́телю, показа́вый въ науче́ніе на́ше вѣ́ру твою́ отъ дѣ́лъ твои́хъ; ра́дуйся, благоиску́сный наста́вниче, поуча́яй на́съ кро́тости и прему́дрости не cлóвoмъ то́чію, но и о́бразомъ житія́ твоего́.

Ра́дуйся, пресла́вный миротво́рче, я́ко мяту́щуюся Це́рковь Влади́мірскую прише́ствіемъ твои́мъ возвесели́лъ еси́; ра́дуйся, благосе́рдый о́тче, я́ко любо́вію и кро́тостію духо́вная ча́да твоя́ обра́довалъ еси́.

Ра́дуйся, о́тче Си́моне, прилѣ́жный о на́съ къ Бо́гу моли́твенниче.

Конда́къ 5.

Боготе́чная звѣзда́ яви́лся еси́ на высо́комъ степе́ни святи́тельства, я́сно пу́ть за́повѣдей Го́споднихъ показу́я всѣ́мъ, хотя́щимъ благоче́стно жи́ти. Тѣ́мже у́бо озари́, о́тче преподо́бне, и на́съ, во тмѣ́ страсте́й пребыва́ющихъ, сія́ніемъ добродѣ́телей твои́хъ, да та́ко во дни́ благообра́зно ходя́ще, вопіе́мъ о тебѣ́ съ благодаре́ніемъ Бо́гу: Аллилу́ія.

Икосъ 5.

Ви́дя, я́ко въ мíрѣ се́мъ вся́ческая суета́ и тлѣ́нію прича́стна, потща́лся еси́ вседу́шно, богоблаже́нне о́тче, еди́ному Превѣ́чному Бо́гу благоугоди́ти, и не вотще́ бы́ша труды́ твоя́: премѣни́лъ бо еси́ тлѣ́нная на нетлѣ́нная, наипа́че же сподо́бился еси́ блаже́ннаго предстоя́нія предъ престо́ломъ Го́спода сла́вы, во Ца́рствіи небе́снѣмъ. Та́мо у́бо, свя́тче Бо́жій, не забу́ди и на́съ, притека́ющихъ къ заступле́нію твоему́, и съ любо́вію вопію́щихъ къ тебѣ́ такова́я:

Ра́дуйся, нищеты́ ра́ди духо́вныя бога́тство нетлѣ́нное стяжа́вый; ра́дуйся, пла́чемъ и печа́лію, я́же по Бо́зѣ, утѣше́ніе вѣ́чное воспрія́вый.

Ра́дуйся, кро́тостію и незло́біемъ Ца́рствіе небе́сное наслѣ́довавый; ра́дуйся, чистото́ю се́рдца лицезрѣ́нія Бо́жія сподо́бивыйся.

Ра́дуйся, до́блій во́ине Христо́въ, и вождю́ благоиску́сный во́иновъ духо́вныхъ; ра́дуйся, ратобо́рче Госпо́день, низложи́вый врага́ те́мнаго ору́жіи пра́вды десны́ми и шу́ими.

Ра́дуйся, богоблаже́нный подви́жниче, я́ко по́двигомъ до́брымъ подвиза́лся еси́; ра́дуйся, и́стинный пра́ведниче, я́ко предъ Го́сподемъ пра́вды непоро́ченъ и пра́веденъ обрѣ́лся еси́.

Ра́дуйся, о́тче Си́моне, прилѣ́жный о на́съ къ Бо́гу моли́твенниче.

Конда́къ 6.

Про́повѣдь ева́нгельскую, я́ко смиря́яй себе́ вознесе́тся, всѣ́мъ се́рдцемъ и все́ю мы́слію твое́ю воспрія́лъ еси́, досточу́дне о́тче, тѣ́мже а́ще и досто́йнѣ оде́ждою святи́тельства одѣ́ялся еси́, оба́че тѣ́мъ не вознося́ся, смиреному́дренно жела́лъ еси́, лу́чше тебѣ́ еди́нъ де́нь а́ки сме́тію въ дому́ та́мо Бо́жія Ма́тере примета́тися, не́жели ты́сящу лѣ́тъ сла́виму бы́ти на престо́лѣ. О, всеблаже́нне, испроси́ и на́мъ у Щедрода́вца Го́спода достолюбе́зную добродѣ́тель нищеты́ духо́вныя, да не высо́кая о себѣ́ му́дрствующе, но смире́нными веду́щеся, благопрія́тно вопіе́мъ Бо́гу: Аллилу́ія.

Икосъ 6.

Возсія́лъ еси́ во свѣ́тлостехъ святы́хъ со́лнца свѣтлѣ́йше, вѣнце́мъ благоволе́нія Бо́жія, добро́ты же неизрече́нныя и сла́вы непрестаю́щія благода́тно украша́емь. Тѣ́мже, всеблаже́нне, не преста́й моля́ся ко Го́споду си́лъ и Царю́ сла́вы о всѣ́хъ, притека́ющихъ къ заступле́нію твоему́, и велича́ющихъ тя́ благохвале́ніи си́ми:

Ра́дуйся, преблаже́нне, я́ко прія́лъ еси́ Ца́рствіе благолѣ́пія отъ Царя́ Небе́снаго; ра́дуйся, преподо́бне, я́ко вѣнча́лся еси́ сла́вою и че́стію отъ руки́ Госпо́дни.

Ра́дуйся, ка́ющихся со умиле́ніемъ хода́таю преусе́рдный; ра́дуйся, борю́щихся со страстьми́ и похотьми́ помо́щниче преизря́дный.

Ра́дуйся, и́щущимъ уврачева́нія уязвле́нной со́вѣсти цѣли́телю прему́дрый; ра́дуйся, уныва́ющихъ и безнаде́ждныхъ утѣ́шителю пресла́дкій.

Ра́дуйся, заблужда́ющихъ и въ самозабве́ніи жи́тельствующихъ исправи́телю прекро́ткій; ра́дуйся, лука́внующихъ и беззако́ннующихъ обличи́телю незло́бивый.

Ра́дуйся, о́тче Си́моне, прилѣ́жный о на́съ къ Бо́гу моли́твенниче.

Конда́къ 7.

Хотя́й всѣ́мъ человѣ́комъ спасти́ся и въ ра́зумъ и́стины пріити́, многоми́лостивый и долготерпѣли́вый Госпо́дь дарова́ на́мъ во освяще́ніе, защище́ніе и отра́ду честны́я и многоцѣле́бныя мо́щи твоя́, святи́телю о́тче Си́моне. Въ ни́хже съ вѣ́рою и любо́вію пріе́млюще стра́жа на́мъ неотсту́пна, благода́рственно вопіе́мъ си́це благоволи́вшему о на́съ Го́споду: Аллилу́ія.

Икосъ 7.

Но́ва небесе́ и но́вы земли́ благода́тію Бо́жіею дости́глъ еси́, всеблаже́нне о́тче, къ ни́мъ же и мы́ недосто́йніи стяжа́хомъ тя́ путеводи́теля и наста́вника, тѣ́мже мо́лимъ тя́: не попусти́ на́съ поги́бнути въ де́брѣхъ грѣхо́вныхъ, но приведи́ на́съ стезе́ю пра́вою въ страну́ свѣ́та и ра́дости вѣ́чныя, съ любо́вію вопію́щихъ тебѣ́:

Ра́дуйся, го́рняго мíра обита́телю всеблаже́нный; ра́дуйся, до́льняго мíра засту́пниче многомо́щный.

Ра́дуйся, киво́те честны́й, дарова́ніи духо́вными преукраше́нный; ра́дуйся, ка́меню драгíй, Це́рковь Христо́ву украша́ющій.

Ра́дуйся, я́ко нетлѣ́ніемъ моще́й твои́хъ проповѣ́дуется мíру бу́дущее всѣ́хъ воскресе́ніе; ра́дуйся, я́ко и на́мъ недосто́йнимъ дарова́ся отъ ни́хъ многоцѣ́нный зало́гъ твоего́ заступле́нія.

Ра́дуйся, сокро́вище милосе́рдія къ на́мъ Бо́жія неисчерпа́емое; ра́дуйся, храни́лище дарова́ній на́мъ благода́тныхъ неиждива́емое.

Ра́дуйся, о́тче Си́моне, прилѣ́жный о на́съ къ Бо́гу моли́твенниче.

Конда́къ 8.

Стра́нное преселе́ніе твое́ отъ земны́хъ въ небе́сная пресвѣ́тлая мѣста́ вѣ́дуще, устрани́мся су́етныхъ пре́лестей мíра сего́, помышля́юще, я́ко ты́, всеблаже́нне, подобостра́стенъ бы́въ на́мъ, мíръ се́й преле́стный, и вся́ зла́я въ не́мъ побѣди́лъ еси́, на́мъ оста́вль о́бразъ до́брыхъ по́двиговъ твои́хъ. О толи́кой у́бо побѣ́дѣ твое́й ра́дости испо́лнени, торже́ственно вопіе́мъ Бо́гу: Аллилу́ія.

Икосъ 8.

Ве́сь испо́лненъ бы́въ любве́ Боже́ственныя, всѣ́мъ бы́ти вся́ восхотѣ́лъ еси́, по о́бразу свята́го апо́стола Па́вла, тѣ́мже, богоблаже́нне, явля́лъ еси́ всѣ́мъ, приближа́ющимся къ тебѣ́ коему́ждо благопотре́бну по́мощь, неусы́пно тружда́яся въ науче́ніи, утѣше́ніи и утвержде́ніи и́хъ въ вѣ́рѣ и благоче́стіи, да вся́ко нѣ́кія спасе́ши. Сего́ ра́ди со благоговѣ́ніемъ прино́симъ ти́ похвалы́ сицевы́я:

Ра́дуйся, правосла́вія и благоче́стія учи́телю богому́дрый; ра́дуйся, воздержа́нія и цѣлому́дрія наста́вниче преизря́дный.

Ра́дуйся, кро́ткихъ и благи́хъ нра́вовъ благоиску́сный насади́телю; ра́дуйся, нечести́выхъ и душетлѣ́нныхъ обы́чаевъ неукло́нный искорени́телю.

Ра́дуйся, стужа́емыхъ и обурева́емыхъ нечи́стыми по́мыслы вѣ́рный помо́щниче; ра́дуйся, злосло́вимыхъ и оклевета́емыхъ благонаде́ждный защи́тниче.

Ра́дуйся, малоду́шіемъ коле́блемыхъ и во уны́ніи закоснѣва́ющихъ извѣ́стный ободри́телю; ра́дуйся, въ печа́ли и злострада́ніи су́щихъ незри́мый предста́телю.

Ра́дуйся, о́тче Си́моне, прилѣ́жный о на́съ къ Бо́гу моли́твенниче.

Конда́къ 9.

Вся́къ грѣ́хъ содѣ́яхомъ, вся́кою нечистото́ю оскверни́хомъ ду́ши на́ша, ты́ же, святи́телю Христо́въ, чи́ста соблюды́й себе́ благода́тію Боже́ственною отъ вся́кія скве́рны пло́ти и ду́ха, облагоуха́й на́съ твое́ю святы́нею, да со стра́хомъ Бо́жіимъ про́чее въ мíрѣ се́мъ жи́тельствующе, со вся́кою же чистото́ю созида́юще себе́ въ жили́ще Бо́жіе ду́хомъ, чи́стымъ се́рдцемъ и нескве́рными усты́ вопіе́мъ Бо́гу: Аллилу́ія.

Икосъ 9.

Витíйская многовѣща́нія и ри́торскую хи́трость отве́ргше, и́скреннимъ то́чію се́рдцемъ въ пѣ́снехъ духо́вныхъ велича́емъ тя́, засту́пника на́шего, святи́телю Христо́въ о́тче Си́моне, хва́лимъ богоуго́дное житіе́ твое́, торжеству́емъ сла́ву твою́, и покланя́ющеся честны́мъ моще́мъ твои́мъ, уми́льно глаго́лемъ:

Ра́дуйся, небе́снаго Архіере́я іера́рше святѣ́йшій; ра́дуйся, Ду́ха Свята́го орга́не преизя́щнѣйшій.

Ра́дуйся, я́ко а́нгельскій о́бразъ воспріи́мь, а́нгельски на земли́ пожи́лъ еси́; ра́дуйся, я́ко святи́тельскимъ са́номъ облече́нъ, небе́сною святы́нею просія́лъ еси́.

Ра́дуйся, я́ко во и́ночествѣ и архипа́стырствѣ сугу́бо Христу́ Го́споду послужи́лъ еси́; ра́дуйся, я́ко за сугу́быя по́двиги твоя́ сугу́бый вѣне́цъ отъ Него́ воспрія́лъ еси́.

Ра́дуйся, и́стинный Христо́въ послѣ́дователю, не прельсти́выйся сла́вою мíра сего́; ра́дуйся, благíй и вѣ́рный ра́бе, вше́дый въ ра́дость Го́спода твоего́.

Ра́дуйся, о́тче Си́моне, прилѣ́жный о на́съ къ Бо́гу моли́твенниче.

Конда́къ 10.

Спасти́ся хотя́ще отъ разли́чныхъ напа́стей и бѣ́дъ мíра сего́, тебе́, всеблагíй о́тче, те́плаго предста́теля и многомо́щнаго моли́твенника къ Бо́гу, призыва́емъ: не тще́тну у́бо сотвори́ наде́жду на́шу на заступле́ніе твое́, не оста́ви на́съ ми́лостію твое́ю; бу́ди на́мъ защи́тникъ необори́мый отъ вра́гъ ви́димыхъ и неви́димыхъ, и помо́щникъ въ напа́стехъ, ну́ждехъ и ско́рбехъ; изба́ви на́съ хода́тайствомъ твои́мъ отъ лю́тыхъ бѣ́дъ и искуше́ній. Да не въ смуще́ніи ду́ха, но отъ избы́тка се́рдца, ра́достно всегда́ глаго́лемъ Бо́гу: Аллилу́ія.

Икосъ 10.

Стѣ́ны го́рняго Іерусали́ма, ему́же Худо́жникъ и Содѣ́тель Бо́гъ, иму́щія основа́ній двана́десять, и на ни́хъ име́нъ двана́десять апо́столовъ Агнчихъ, не во открове́ніи та́инственномъ, но я́вѣ зри́ши ны́нѣ, свя́тче Бо́жій. Не преста́й у́бо моля́ся ко Го́споду о вопію́щихъ къ тебѣ́ такова́я:

Pа́дуйся, подви́жниче богоблаже́нный, по́двигомъ до́брымъ подвиза́выйся, да благода́ть предъ Го́сподемъ обря́щеши; ра́дуйся, добропобѣ́дный во́ине, ку́плями жите́йскими не обяза́выйся, да Воево́дѣ уго́денъ бу́деши.

Ра́дуйся, я́ко и́ноческими твои́ми по́двиги удиви́лъ еси́ а́нгеловъ ли́ки; ра́дуйся, я́ко святи́тельскими твои́ми исправле́ніи возвесели́лъ еси́ человѣ́ковъ собо́ри.

Ра́дуйся, благоче́стно тружда́ющихся на по́льзу о́бщую всегда́ гото́вый споспѣ́шниче; ра́дуйся, благи́хъ наста́вниковъ и воспита́телей ю́ношества незри́мый совѣ́тниче.

Ра́дуйся, ни́щихъ и убо́гихъ благосе́рдый попечи́телю; ра́дуйся, си́рыхъ и стра́ждущихъ благоутро́бнѣйшій покрови́телю.

Ра́дуйся, о́тче Си́моне, прилѣ́жный о на́съ къ Бо́гу моли́твенниче.

Конда́къ 11.

Пѣ́ніе умиле́нное, съ вѣ́рою и любо́вію, прино́симъ ти́, уго́дниче Бо́жій, и прославля́я просла́вльшаго тя́ Го́спода, всеусе́рдно мо́лимся тебѣ́: сохрани́ предста́тельствомъ твои́мъ, во здра́віи и вся́комъ благополу́чіи Благочести́вѣйшаго Госуда́ря на́шего, Импера́тора [и́мярекъ] и ве́сь Ца́рствующій До́мъ, и соблюди́ Ихъ отъ вся́каго зла́го обстоя́нія, да ми́рно и безмяте́жно въ держа́вѣ Ихъ [или́: жи́тельство твое́, лю́ди Россíйскія, и соблюди́ на́съ отъ вся́каго зла́го обстоя́нія, да ми́рно и безмяте́жно въ держа́вѣ на́шей[1] жи́тельствующе, со благодаре́ніемъ Царю́ ца́рствующихъ и Го́споду госпо́дствующихъ воспѣва́емъ: Аллилу́ія.

Икосъ 11.

Свѣ́томъ до́брыхъ дѣ́лъ твои́хъ прославля́я на земли́ Отца́ Небе́снаго, и просвѣща́я во тмѣ́ грѣхо́внѣй пребыва́ющія, толи́ко смире́нъ се́рдцемъ бы́лъ еси́, досточу́дне о́тче, я́ко въ посла́ніи твое́мъ къ блаже́нному Полика́рпу, исповѣ́дуя себе́ грѣ́шника бы́ти, смиренному́дренно написа́лъ еси́: «Азъ грѣ́шный епи́скопъ Си́монъ тужу́, скорблю́ и пла́чу, жела́я во святѣ́й оби́тели Пече́рской сконча́тися, и положе́нъ бы́ти во блаже́нной то́й пе́рсти, да бы́ поне́ ма́лу отра́ду мно́гихъ грѣхо́въ мои́хъ прія́лъ, моли́твъ ра́ди преподо́бныхъ оте́цъ Анто́нія и Ѳеодо́сія, и единому́дренныхъ и́мъ ученико́въ и́хъ». Тѣ́мже ны́нѣ прославля́я Бо́га, испо́лнившаго во благи́хъ жела́ніе се́рдца твоего́, и просла́вившаго тя́ за смире́ніе твое́ сла́вою неизглаго́ланною, пріими́ отъ на́съ похвалы́ сицевы́я:

Ра́дуйся, я́ко смире́ніемъ твои́мъ вои́стинну высо́кая и пресла́вная стяжа́лъ еси́; ра́дуйся, я́ко тѣ́мъ наипа́че смире́нному се́рдцемъ Го́споду Іису́су прибли́жился еси́.

Ра́дуйся, Пресвяты́я Богоро́дицы изря́дный люби́миче и преи́скренній люби́телю; ра́дуйся, благолѣ́пныя оби́тели Ея́ избра́нный пито́мниче и преусе́рдный ревни́телю.

Ра́дуйся, я́ко честно́е тѣ́ло твое́, по жела́нію твоему́, во блаже́нной то́й пе́рсти положи́ся; ра́дуйся, я́ко ду́хъ тво́й въ со́нмѣ духо́въ безпло́тныхъ со уго́дники Пече́рскими на небеси́ предъ Го́сподемъ ра́дуется.

Ра́дуйся, го́рняго Іерусали́ма граждани́не избра́нный; ра́дуйся, небе́снаго Сіо́на обита́телю всеблаже́нный.

Ра́дуйся, о́тче Си́моне, прилѣ́жный о на́съ къ Бо́гу моли́твенниче.

Конда́къ 12.

Благода́тію, отъ Го́спода и Пода́теля вся́кія благосты́ни умоле́нною, просвѣти́, о́тче богоно́сне, ду́ши на́ша къ разумѣ́нію спаси́тельныхъ и́стинъ вѣ́ры Христо́вы и къ прія́тію до́брыхъ уче́ній благоче́стія ева́нгельскаго, да прему́дростію, и ра́зумомъ, и во всѣ́хъ добродѣ́телехъ преспѣва́юще, и та́кo досто́йно ходя́ще зва́нія, въ не́мже поста́влени есмы́, со благодаре́ніемъ Еди́ному Отцу́ свѣ́товъ и Бо́гу ра́зумовъ во вѣ́ки воспѣва́емъ: Аллилу́ія.

Икосъ 12.

Пою́ще и превознося́ще Бо́га, ди́внаго во святы́хъ Свои́хъ, прославля́емъ труды́ и по́двиги твоя́, и́миже Го́спода на земли́ просла́вилъ еси́, святи́телю о́тче Си́моне: хва́лимъ ре́вность твою́ по Бо́зѣ, ублажа́емъ служе́ніе твое́ спасе́нію бли́жнихъ, сла́вимъ кро́тость твою́, велича́емъ смиренному́дріе твое́, почита́емъ свяще́нную па́мять твою́, и со умиле́ніемъ благоче́стно зове́мъ ти́:

Ра́дуйся, я́ко житія́ преподо́бныхъ Пече́рскихъ люботру́дно въ назида́ніе на́ше собра́лъ еси́; ра́дуйся, я́ко та́ и на скрижа́лѣхъ се́рдца твоего́ до́брѣ написа́лъ еси́.

Ра́дуйся, смиренному́дре, николи́же вознесы́йся въ се́рдцѣ твое́мъ, я́ко че́стенъ и сла́венъ еси́; ра́дуйся, пра́ведне, никогда́же прельсти́выйся мы́слію, я́ко грѣxá не и́маши.

Ра́дуйся, я́ко главу́ седмогла́ваго змíя седми́цею дарова́ній духо́вныхъ сте́рлъ еси́; ра́дуйся, я́ко въ воздая́ніе за по́двиги и труды́ твоя́ вѣнце́мъ нетлѣ́нія отъ Го́спода вѣнча́лся еси́.

Ра́дуйся, я́ко со а́нгельскими ли́ки вы́ну на небеси́ Творца́ славосло́виши; ра́дуйся, я́ко со избра́нными Его́ во оби́телехъ ра́йскихъ при́сно торжеству́еши.

Ра́дуйся, о́тче Си́моне, прилѣ́жный о на́съ къ Бо́гу моли́твенниче.

Конда́къ 13.

О, вели́кій и пресла́вный уго́дниче Христо́въ, святи́телю о́тче Си́моне! Пріими́ благоутро́бно сіе́ ма́лое моле́ніе, отъ на́съ недосто́йныхъ со благодаре́ніемъ въ похвалу́ тебѣ́ приноси́мое: бу́ди засту́пникъ и покрови́тель всѣ́мъ, моли́твенно притека́ющимъ къ заступле́нію твоему́ съ вѣ́рою, и любо́вію, и упова́ніемъ, изба́ви на́съ отъ враго́въ ви́димыхъ и неви́димыхъ, отъ вся́кихъ бѣ́дъ, скорбе́й и напа́стей, да ми́рно и благоче́стно пожи́вше въ вѣ́цѣ се́мъ, сподо́бимся съ тобо́ю и всѣ́ми святы́ми вѣ́чно въ ра́дости блаже́ннѣй воспѣва́ти Бо́гу: Аллилу́ія.

[Се́й конда́къ глаго́ли три́жды. И па́ки чте́тся 1-й и́косъ: Ангелъ Го́спода Вседержи́теля вои́стинну... и конда́къ 1-й: Избра́нный и пресла́вный защи́тниче на́шъ...]

Моли́тва пе́рвая и́же во святы́хъ отцу́ на́шему Си́мону, епи́скопу Влади́мірскому и Су́ждальскому, Пече́рскому чудотво́рцу.

О, свяще́нная главо́, вели́кій уго́дниче Бо́жій, святи́телю Христо́въ и чудотво́рче, преподо́бне и богоно́сне о́тче Си́моне! Къ тебѣ́, небе́сному засту́пнику и те́плому предста́телю на́шему съ вѣ́рою и любо́вію припа́даемъ и со упова́ніемъ всеусе́рдно мо́лимъ тя́: яви́ милосе́рдіе твое́ на́мъ смире́ннымъ и грѣ́шнымъ, и проле́й те́плыя моли́твы твоя́ о на́съ ко Го́споду, Ему́же со а́нгелы и всѣ́ми святы́ми предстои́ши на небеси́ во сла́вѣ вѣ́чнѣй. Вѣ́мы, свя́тче Бо́жій, я́ко сво́йственно е́сть тебѣ́ милосе́рдіе, и́бо еще́ на земли́ живу́щу ти́, еди́но имѣ́лъ еси́ попече́ніе, е́же спаса́ти отъ поги́бели грѣхо́вныя ду́ши человѣческія. Тѣ́мже у́бо потщи́ся, благосе́рде, предстоя́ стра́шному престо́лу Го́спода сла́вы, хода́тайствовати о на́шемъ спасе́ніи, да не поги́бнемъ лю́тѣ со беззако́ніи на́шими. Вѣ́руемъ, о́тче всеблаже́нне, я́ко ты́ и́же Христо́вою любо́вію, бли́жнія твоя́ возлюби́лъ еси́, внегда́ пребыва́лъ еси́ въ мíрѣ се́мъ, кольми́ па́че лю́биши вся́ ны́ о Го́сподѣ на небесѣ́хъ водворя́яся. Тѣ́мже всеусе́рдно мо́лимъ тя́, я́ко отца́ на́мъ су́ща, да вы́ну соблюда́еши ны́ подъ покро́вомъ твои́мъ отъ вся́каго зла́. Ты́, о́тче преподо́бне, не то́чію са́мъ вѣ́рою пра́вою и благи́ми дѣ́лы до́брѣ угоди́вый Го́сподеви, но и ины́хъ научи́вый пра́во вѣ́ровати и во́лю Бо́жію твори́ти, ве́лій нарече́нъ еси́ во Ца́рствіи небе́снѣмъ, по нело́жному обѣтова́нію Христо́ву, тѣ́мже у́бо наста́ви и на́съ, да́нною тебѣ́ отъ Го́спода благода́тію, та́ко вѣ́ровати, и та́ко путе́мъ за́повѣдей Госпо́днихъ ше́ствовати, я́ко не то́чію на́мъ самѣ́мъ николи́же на поги́бельный пу́ть невѣ́рія и на стезю́ повелѣ́ніямъ Бо́жіимъ проти́ву соврати́тися, но па́че да бу́демъ дово́льни и ины́хъ во правовѣ́ріи утверди́ти и на пу́ть и́стиннаго благоче́стія наста́вити. О, преблаже́нне, потщи́ся у́бо о се́мъ наипа́че умоля́ти Щедрода́вца Бо́га, да пода́стъ на́мъ вѣ́ру пра́ву и несумнѣ́нну, благоче́стіе и́скреннее и непоколеби́мое, братолю́біе нелицемѣ́рное, и преспѣ́яніе во всѣ́хъ благи́хъ дѣ́лѣхъ, да вы́ну памяту́юще зва́ніе и избра́ніе на́ше, бу́демъ, я́коже учи́тъ святы́й апо́столъ, соверше́нни и испо́лнени во вся́кой во́ли Бо́жіей, никому́же не полага́юще претыка́нія или́ собла́зна ни сло́вомъ, ни житіе́мъ на́шимъ, но всегда́ промышля́юще то́чію до́брая предъ Бо́гомъ и человѣ́ки. Еще́ же припа́дающе мо́лимъ тя́, уго́дниче Христо́въ, предста́тельствомъ ко Всеми́лостивому Влады́цѣ и Царю́ ца́рствующихъ: да сохрани́тъ подъ покро́вомъ Своея́ бла́гости, во здра́віи и непримѣня́емомъ благополу́чіи, Благочести́вѣйшаго Госуда́ря на́шего Импера́тора [и́мярекъ] и ве́сь Ца́рствующій До́мъ и изба́витъ и́хъ отъ вся́каго зла́го обстоя́нія [или́: стра́ждущую страну́ Россíйскую отъ лю́тыхъ безбо́жникъ и вла́сти и́хъ Госпо́дь да свободи́тъ, и да возста́витъ престо́лъ правосла́вныхъ царе́й; вѣ́рныхъ рабо́въ Его́, въ ско́рби и печа́ли де́нь и но́щь вопію́щихъ къ Нему́, многоболѣ́зный во́пль да услы́шитъ и да изведе́тъ отъ поги́бели живо́тъ на́шъ[2]; да соблюде́тъ Це́рковь святу́ю отъ ересе́й и раско́ловъ, держа́ву же Правосла́вно-Россíйскую отъ вся́каго мяте́жа, бра́ней и нестрое́ній; да да́стъ па́стыремъ Це́ркви святу́ю ре́вность о спасе́ніи пасо́мыхъ и просвѣще́ніи невѣ́рующихъ свѣ́томъ богоразу́мія, и да умудри́тъ и́хъ пра́во пра́вити сло́во и́стины; да да́руетъ нача́льствующимъ му́дрость и си́лу, подчине́ннымъ усе́рдіе и благопокорли́вость, судія́мъ прозорли́вость и нелицепрія́тіе, супру́гомъ вѣ́рность и единоду́шіе, роди́телемъ ра́зумъ и благоче́стіе, ча́домъ кро́тость и послуша́ніе, наста́вникомъ и воспита́телемъ ю́ношества доброучи́тельность и смиренному́дріе, уча́щимся и воспиту́емымъ благо́е въ вѣ́рѣ и благоче́стіи науче́ніе и возраста́ніе, всѣ́мъ же лю́демъ вся́къ да́ръ коему́ждо благопотре́бенъ, вся́ку благовре́менну по́мощь во благи́хъ дѣ́лѣхъ, и вся́ ко спасе́нію и сла́вѣ Бо́жіей подоба́ющая. Сохрани́, о́тче преподо́бне, твои́ми богопрія́тными моли́твами ца́рствующія гра́ды, и вся́ гра́ды и ве́си держа́вы Россíйскія, и гра́дъ се́й, и до́мъ се́й, отъ вся́каго зла́ и нападе́ній вра́жіихъ, вся́ же правовѣ́рныя лю́ди, съ любо́вію и упова́ніемъ притека́ющія къ покро́ву твоему́, и благоче́стно покланя́ющіяся моще́мъ твои́мъ, осѣни́ небе́снымъ твои́мъ благослове́ніемъ, и вся́ проше́нія и́хъ во бла́го испо́лни. Ей, уго́дниче Бо́жій, не пре́зри моле́ній на́шихъ, и не посрами́ на́съ отъ упова́нія и ча́янія на́шего! Се́ бо мы́ недосто́йніи, и смире́нніи, и мно́гихъ грѣхо́въ испо́лненніи, вѣ́дуще, я́ко грѣ́шники Бо́гъ не послу́шаетъ, но а́ще ќто богочте́цъ е́сть и во́лю Его́ твори́тъ, того́ послу́шаетъ, ко твоему́ прибѣга́емъ предста́тельству, тобо́ю дерза́емъ умоля́ти милосе́рдіе Бо́жіе: вѣ́руемъ бо, всеблаже́нне, я́ко ели́ка а́ще ты́, пра́веденъ сы́й, воспро́сиши въ моли́твѣ отъ Бо́га, да́стъ ти́ Бо́гъ. Тѣ́мже у́бо бу́ди те́плый о на́съ предста́тель ко Щедрода́вцу Бо́гу, да твое́ю по́мощію и заступле́ніемъ ми́рно и благоче́стно пожи́вше на земли́, сподо́бимся и небе́сныхъ бла́гъ воспрія́тія, сла́вяще и превознося́ще Отца́ и Сы́на и Свята́го Ду́ха, Еди́наго въ Тро́ицѣ сла́вимаго и покланя́емаго Бо́га, и твое́ ми́лостивое предста́тельство во вѣ́ки вѣко́въ. Ами́нь.

Моли́тва втора́я святи́телю Христо́ву Си́мону.

О, всехва́льный и всечестны́й архіере́ю, святи́телю Христо́въ, преподо́бне и богоно́сне о́тче Си́моне! При́зри, съ сво́йственнымъ тебѣ́ благосе́рдіемъ, отъ высо́тъ небе́сныхъ, идѣ́же со а́нгелы и всѣ́ми святы́ми Го́споду сла́вы предстои́ши, на на́съ недосто́йныхъ и до́лу прекло́нныхъ, смире́нныхъ же и грѣ́шныхъ, притека́ющихъ къ многомо́щному предста́тельству твоему́ съ вѣ́рою, любо́вію и упова́ніемъ. Простри́ моли́твенно преподо́бныя ру́цѣ твоя́ ко Го́споду и Влады́цѣ, и испроси́ отъ щедрода́тельныя Его́ благосты́ни оставле́ніе согрѣше́ній на́шихъ во́льныхъ и нево́льныхъ, покая́ніе серде́чное, здра́віе душе́вное и тѣле́сное, житіе́ ми́рное и безмяте́жное, возду́ха благорастворе́ніе, земли́ плодоно́сіе, жите́йскихъ потре́бъ дово́льство, во все́мъ благо́е поспѣше́ніе, и да не во зло́ обрати́мъ дару́емая на́мъ блага́я, но во сла́ву пресвята́го и́мене Его́, и во спасе́ніе на́ше. Еще́ же припа́дающе мо́лимъ тя́, потщи́ся, благосе́рде, предста́тельствовати ко Го́споду Человѣколю́бцу, да изба́витъ на́съ, по вели́цѣй Свое́й ми́лости, отъ вся́кихъ бѣ́дъ и скорбе́й, отъ вся́кихъ неду́говъ и болѣ́зней, отъ внеза́пныя сме́рти и отъ всѣ́хъ озлобле́ній, отъ вся́кихъ ко́зней враго́въ ви́димыхъ и неви́димыхъ и отъ вся́каго зла́: да укрѣпи́тъ въ на́съ пра́вую вѣ́ру и благоче́стіе нелицемѣ́рное, и да пода́стъ на́мъ си́лы къ борьбѣ́ со страстьми́ и похотьми́ на́шими; да соблюде́тъ на́съ отъ нечести́выхъ и душепа́губныхъ уче́ній невѣ́рія и суевѣ́рія, и́миже навѣ́туется въ на́съ святооте́ческая правосла́вная вѣ́ра, и да изба́витъ на́съ отъ вся́кихъ прираже́ній ду́ха, и́же ны́нѣ дѣ́йствуетъ въ сынѣ́хъ противле́нія; да всади́тъ въ сердца́ на́ша ду́хъ смире́нія и кро́тости, ду́хъ братолю́бія и незло́бія, ду́хъ терпѣ́нія и цѣлому́дрія, ду́хъ святы́я ре́вности о сла́вѣ Бо́жіей и спасе́ніи бли́жнихъ; да при́зритъ благоутро́бно на вся́ку ду́шу, тре́бующую благода́тныя Его́ ми́лости, и да́руетъ, по неизрече́ннымъ щедро́тамъ Своего́ человѣколю́бія, боля́щимъ исцѣле́ніе, скорбя́щимъ утѣше́ніе, малоду́шнымъ успокое́ніе, уныва́ющимъ ободре́ніе, стра́ждущимъ осла́бу, бѣ́дствующимъ по́мощь, си́рымъ покро́въ, безпрію́тнымъ приста́нище, оби́димымъ защи́ту, злосло́вимымъ терпѣ́ніе, уничижа́емымъ великоду́шіе, гони́мымъ заступле́ніе, оклевета́емымъ оправда́ніе, и всѣ́мъ, во вся́кихъ ну́ждахъ и злострада́ніяхъ су́щимъ, душе́вную отра́ду, и ско́рое избавле́ніе. Ей, свя́тче Бо́жій, бу́ди те́плый моли́твенникъ и прилѣ́жный хода́тай ко Го́споду о вся́кой души́ вѣ́рныхъ твои́хъ чти́телей, и́щущихъ твоея́ по́мощи, да никто́же во упова́ніи свое́мъ на тя́ посpáмленъ бу́детъ, но вси́ предста́тельствомъ твои́мъ да обря́щутъ, во вся́кихъ обстоя́ніихъ, благода́ть и ми́лость Всеще́драго Бо́га, Ему́же подоба́етъ вся́кая сла́ва, че́сть и поклоне́ніе, ны́нѣ и при́сно, и во вѣ́ки вѣко́въ. Ами́нь.

Тропа́рь, гла́съ 1:

Житíй преподо́бныхъ оте́цъ Пече́рскихъ списа́телю извѣ́стный, святи́телю Христо́въ Си́моне преблаже́нне, моли́ся прилѣ́жно съ ни́ми Христу́ Бо́гу, да упра́витъ въ ми́рѣ живо́тъ на́шъ, и въ кни́ги живо́тныя да напи́шетъ ны́, спаса́я ду́ши на́ша.

Конда́къ, гла́съ 2:

Святи́тельства оде́ждею, а́ще и досто́йнѣ одѣ́ялся еси́, оба́че тѣ́мъ не вознося́ся, жела́лъ еси́ па́че сме́тіемъ предъ враты́ Ла́вры Пече́рскія поврещи́ся, смиренному́дре Си́моне. Тѣ́мже, не а́ки сме́тіе, вра́тъ внѣ́, но я́ко сокро́вище, вну́трь святы́я пеще́ры положе́нъ бы́ти сподо́бился еси́, и ны́нѣ на небеси́ Го́сподеви предстоя́, моли́ся о на́съ, чту́щихъ тя́.

Велича́ніе:

Велича́емъ тя́, святи́телю о́тче Си́моне, и чте́мъ святу́ю па́мять твою́, ты́ бо мо́лиши за на́съ Христа́ Бо́га на́шего.

Примѣчанія:
[1] См. «Акаѳисты русскимъ святымъ». Томъ 1-й: А-Г. СПб.: Издательство «Титулъ», 1995, с. 422.
[2] Тамъ же, с. 425.

Источникъ: Ака́ѳистъ и́же во святы́хъ отцу́ на́шему Си́мону, епи́скопу Влади́мірскому и Су́ждальскому, Пече́рскому чудотво́рцу. Па́мять его́ пра́зднуется Мѣ́сяца Ма́ія въ 10-й де́нь. — М: Въ Сѵнода́льной Тѵпогра́фіи, 1892. — 34 л.

/ Къ оглавленію раздѣла /


Наверхъ / Къ титульной страницѣ

0