Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - пятница, 22 сентября 2017 г. Сейчасъ на порталѣ посѣтителей - 14.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ДОМАШНЯЯ МОЛИТВА

Преп. Тихонъ, Калужскій чудотворецъ († 1492 г.)

Преподобный Тихон, калужский чудотворецПреп. Тихонъ Медынскій, Калужскій чудотворецъ. Принявъ монашество въ юности, онъ удалился въ одно глухое мѣсто въ 15-ти верстахъ отъ Медыни, гдѣ и подвизался, прославившись «житія свѣтлостію и чудесъ дарованіями». Жилищемъ его было дупло громаднаго дуба, пищею — трава, а питьемъ — вода изъ выкопаннаго имъ самимъ колодезя. Онъ имѣлъ «кроткій нравъ и незлобивое сердце». Его братія состояла всего изъ двухъ учениковъ. Подаянія они не принимали, средствъ у нихъ не было, и подвижники сами обрабатывали неплодородную землю. За неимѣніемъ лошади, преп. Тихонъ, изнуренный постомъ и тѣлеснымъ недугомъ, самъ впрягался въ плугъ, а ученики управляли имъ. Такъ они обрабатывали свое поле. Вскорѣ по просьбѣ явившихся къ преп. Тихону любителей иночества, онъ основалъ здѣсь обителъ Успенія Божіей Матери, и до глубокой старости былъ ея настоятелемъ. Скончался мирно въ глубокой старости въ 1492 г. Мощи его почивали подъ спудомъ въ монастырскомъ соборномъ храмѣ Преображенія Господня. Въ XIX в. въ храмѣ велась запись наиболѣе значительныхъ исцѣленій, происшедшихъ по молитвамъ преп. Тихона. Большинство исцѣленій получали больные, одержимые душевными недугами, также выздоравливали многіе, страдавшіе глазными и дѣтскими болѣзнями. Память преп. Тихона — 16 (29) іюня.

АКАѲИСТЫ

Ака́ѳистъ преподо́бному отцу́ на́шему Ти́хону, Калу́жскому чудотво́рцу.

Конда́къ 1.

Ра́дуйся, преподо́бне о́тче на́шъ Ти́хоне чудотво́рче.

Икосъ 1.

Ангеловъ Творе́цъ, въ Тро́ицѣ Бо́гъ сла́вимый, предувѣ́дѣвый чи́стаго се́рдца твоего́ изволе́ніе, показа́ тя́ мíрови и́стиннаго ревни́теля благоче́стія и добродѣ́телей подви́жника, вся́ земна́я вмѣни́вшаго въ уме́ты. Того́ ра́ди мы́, любо́вію побѣжда́еми, вопіе́мъ ти́ си́це:

Ра́дуйся, богоно́сне, небе́сный человѣ́че; ра́дуйся, земны́й а́нгеле.

Ра́дуйся, обита́лище Пресвята́го Ду́ха; ра́дуйся, я́ко Бо́га ра́ди оте́чества страну́ оста́вилъ еси́.

Ра́дуйся, я́ко въ пусты́ню всели́лся еси́; ра́дуйся, я́ко слеза́ми о́ную напои́лъ еси́.

Ра́дуйся, я́ко тѣ́ми о́ную многопло́дну сотвори́лъ еси́; ра́дуйся, я́ко Боже́ственными пѣснопѣ́ніи сію́ просвѣти́лъ еси́.

Ра́дуйся, я́ко въ то́й учени́къ ста́до собра́лъ еси́; ра́дуйся, я́ко стра́ху Бо́жію тѣ́хъ научи́лъ еси́.

Ра́дуйся, я́ко и ны́нѣ непреста́нно мо́лишися ко Го́споду о соверша́ющихъ благоче́стно па́мять твою́; ра́дуйся, я́ко и на́съ соблюда́еши отъ враго́въ ви́димыхъ и неви́димыхъ.

Ра́дуйся, преподо́бне о́тче на́шъ Ти́хоне чудотво́рче.

Конда́къ 2.

Ви́дяще, я́ко дана́ тебѣ́ бы́сть отъ Го́спода, преподо́бне о́тче на́шъ Ти́хоне, благода́ть подава́ти ско́рое вспоможе́ніе всѣ́мъ, съ вѣ́рою къ святы́мъ твои́мъ моща́мъ приходя́щимъ, и содѣва́ти пресла́вная чудеса́, мы́, веселя́щеся, я́ко имѣ́емъ такова́го ми́лостиваго помо́щника, прославля́емъ Всеси́льнаго Бо́га и вопіе́мъ Ему́: Аллилу́ія.

Икосъ 2.

Ра́зумъ богому́дрый стяжа́въ и усмотрѣ́въ суету́ мíра сего́, преподо́бне о́тче Ти́хоне, помышля́я о небе́сномъ, всели́лся еси́ въ пусты́ню, и въ не́й пресла́вный хра́мъ боголѣ́пнаго Преображе́нія Госпо́дня и оби́тель устро́ивъ, собра́лъ еси́ ту́ мно́жество учени́къ. Сего́ ра́ди вѣ́рніи научи́шася воспѣва́ти тебѣ́ си́це:

Ра́дуйся, я́ко ста́ду твоему́ оте́цъ и наста́вникъ бы́лъ еси́; ра́дуйся, я́ко смиренному́дріемъ тѣ́хъ исправля́лъ еси́.

Ра́дуйся, я́ко обы́чай кро́токъ имѣ́лъ еси́; ра́дуйся, я́ко незло́биво се́рдце стяжа́лъ еси́.

Ра́дуйся, я́ко земна́я отри́нувъ, умо́мъ твои́мъ къ небе́снымъ возше́лъ еси́; ра́дуйся, я́ко къ вы́шнему тече́ніе твое́ вы́ну исправля́лъ еси́.

Ра́дуйся, я́ко въ добродѣ́телехъ пресла́венъ обрѣ́лся еси́; ра́дуйся, я́ко кро́ткому Па́стырю Христу́ послѣ́довалъ еси́.

Ра́дуйся, я́ко а́лчущихъ пита́лъ еси́; ра́дуйся, я́ко жа́ждущія напоя́лъ еси́.

Ра́дуйся, я́ко всегда́ еди́но предъ очи́ма имѣ́лъ, е́же со Христо́мъ бы́ти; ра́дуйся, я́ко То́й тя́ пресели́ въ вѣ́чныя оби́тели блаже́нства.

Ра́дуйся, преподо́бне о́тче на́шъ Ти́хоне чудотво́рче.

Конда́къ 3.

Си́лою, да́нною ти́ свы́ше, блаже́нне Ти́хоне, долготу́ лѣ́тнюю, пусты́нное озлобле́ніе и въ потре́бныхъ ску́дость предъ очи́ма имѣ́я, терпѣ́лъ еси́ благода́рно, и тѣ́мъ Христа́ обрѣ́тъ въ души́ твое́й, Тому́ вы́ну воспѣва́лъ еси́: Аллилу́ія.

Икосъ 3.

Иму́ще тя́ вои́стинну, о́тче Ти́хоне, подви́жника крѣ́пкаго и моли́твенника бо́драго, и мы́сленно взира́юще на досточу́дныя твоя́ по́двиги и труды́, мы́, любо́вію твое́ю побѣжда́еми, уми́льно вопіе́мъ ти́ си́це:

Ра́дуйся, я́ко а́нгельски на земли́ пожи́лъ еси́; ра́дуйся, я́ко житія́ чистото́ю страну́ на́шу просвѣти́лъ еси́.

Ра́дуйся, я́ко тяготу́ ва́ра дневна́го поне́слъ еси́; ра́дуйся, я́ко сле́зными пото́ки зе́млю се́рдца твоего́ напои́лъ еси́.

Ра́дуйся, я́ко тѣ́ми лука́выхъ духо́въ ополче́нія попра́лъ еси́; ра́дуйся, я́ко молча́ніемъ язы́къ обузда́лъ еси́.

Ра́дуйся, я́ко благо́ю жи́знію твое́ю о́бразъ терпѣ́нія и смиренному́дрія на́мъ яви́лъ еси́; ра́дуйся, я́ко высоту́ добродѣ́телей дости́глъ еси́.

Ра́дуйся, я́ко воспрія́лъ еси́ Свята́го Ду́ха озаре́ніе; ра́дуйся, я́ко вои́стинну честна́ сме́рть твоя́, преподо́бне.

Ра́дуйся, я́ко и по сме́рти съ на́ми пребыва́еши; ра́дуйся, я́ко вѣ́рно почита́ющимъ тя́ во вся́кихъ ну́ждахъ помога́еши.

Ра́дуйся, преподо́бне о́тче на́шъ Ти́хоне чудотво́рче.

Конда́къ 4.

Бу́ря недоумѣ́нія смуща́етъ у́мъ на́шъ, ка́ко бо возмо́жемъ исчи́слити по́двиги твоя́, блаже́нне Ти́хоне, бдѣ́ніе и сухояде́ніе, непреста́нныя моли́твы и про́чія добродѣ́тели? Но мы́ ди́вно Бо́гу, въ тебѣ́ прославля́ющемуся, дерза́емъ воспѣва́ти: Аллилу́ія.

Икосъ 4.

Слы́шавше бли́жніи и да́льніи, преподо́бне о́тче на́шъ Ти́хоне, ангелоподо́бное твое́ житіе́, и я́ко моли́твою твое́ю мно́ги, съ вѣ́рою притека́ющіи къ ра́цѣ моще́й твои́хъ, исцѣле́ніе пріе́млютъ отъ разнообра́зныхъ неду́говъ, благода́рнѣ воспомина́юще о толи́кихъ твои́хъ благодѣя́ніихъ, ра́достно взыва́ютъ къ тебѣ́ такова́я:

Ра́дуйся, неду́гующихъ врачу́; ра́дуйся, ско́рбнымъ сострада́телю.

Ра́дуйся, въ душе́вныхъ и тѣле́сныхъ не́мощехъ ско́рый цѣли́телю; ра́дуйся, еле́й ми́лости подаю́щій.

Ра́дуйся, свѣти́льникъ, благоче́стіемъ сія́ющій; ра́дуйся, я́ко дре́во благора́сленное при вода́хъ.

Ра́дуйся, я́ко мно́ги вѣ́тви добродѣ́телей израсти́лъ еси́; ра́дуйся, я́ко подъ сѣ́нь пусты́ни твоея́ хотя́щихъ спасе́нія пріима́лъ еси́.

Ра́дуйся, я́ко о тѣ́хъ моли́твенникъ те́плъ въ жи́зни твое́й бы́лъ еси́; ра́дуйся, я́ко благи́ми дѣ́лы ду́шу твою́ укра́силъ еси́.

Ра́дуйся, я́ко вели́ку благода́ть и си́лу отъ Бо́га прія́лъ еси́; ра́дуйся, прося́щимъ ми́лости пода́телю.

Ра́дуйся, преподо́бне о́тче на́шъ Ти́хоне чудотво́рче.

Конда́къ 5.

Боготе́чная звѣзда́ яви́лся еси́ во странѣ́ на́шей, наставля́я всѣ́хъ на пу́ть спасе́нія: призыва́ющихъ бо тя́ вско́рѣ предваря́еши и отъ вся́кихъ бѣ́дъ и напа́стей избавля́еши, вѣ́рныя же науча́еши спаса́ющему тобо́ю Бо́гу взыва́ти: Аллилу́ія.

Икосъ 5.

Ви́дѣвше Россíйстіи наро́ди богоспаса́емыя страны́ сея́ пречу́дное по Бо́зѣ житіе́ твое́, Ти́хоне преподо́бне, я́ко а́ще и послѣди́ лѣ́тъ на́мъ возсія́лъ еси́, но дре́внихъ оте́цъ че́сти сподо́бился еси́, дарова́нія чуде́съ досто́йно пріи́мъ отъ Бо́га, того́ ра́ди научи́шася пѣ́ти тебѣ́:

Ра́дуйся, вели́кій Бо́гу уго́дниче; ра́дуйся, я́ко во вре́меннѣй жи́зни, любве́ ра́ди къ Го́споду, вы́ну во спасе́ніе души́ твоея́ труди́лся еси́.

Ра́дуйся, я́ко Его́же по́мощію оста́вль тлѣ́нная, стяжа́лъ еси́ бла́га нетлѣ́нная; ра́дуйся, я́ко благода́тію Бо́жіею сподо́бился еси́ стоя́ти у престо́ла Влады́чня.

Ра́дуйся, я́ко та́ко сподо́бился еси́ бы́ти прича́стникомъ сла́вы вѣ́чныя; ра́дуйся, та́мо получи́вый благода́ть хода́тайствовати о на́съ.

Ра́дуйся, ско́рый помо́щниче призыва́ющимъ тя́; ра́дуйся, гото́вый пособи́телю христіа́номъ.

Ра́дуйся, правосла́вному на́шему ца́рству защити́телю; ра́дуйся, мно́гая чудеса́ благода́тію Свята́го Ду́ха содѣ́явый.

Ра́дуйся, Тѣ́мъ слѣпы́мъ прозрѣ́ніе подава́яй; ра́дуйся, хромы́мъ хожде́ніе исправля́яй.

Ра́дуйся, преподо́бне о́тче на́шъ Ти́хоне чудотво́рче.

Конда́къ 6.

Проповѣ́дуетъ Калу́жская на́ша страна́ труды́ твоя́ и по́двиги, богому́дре Ти́хоне, подъя́тыя тобо́ю душе́внаго ра́ди твоего́ спасе́нія, его́же ра́ди просла́ви тя́ Госпо́дь сла́вою боголѣ́пною. Тѣ́мже въ пусты́ни я́ко дре́во благоплодови́тое яви́лся еси́, отъ него́же духо́вно пита́емся, благодаря́ще Бо́га и вопію́ще къ Нему́: Аллилу́ія.

Икосъ 6.

Возсія́ правосла́внѣй Россíйстѣй земли́ на́шей просвѣще́ніе соверше́нныхъ твои́хъ добродѣ́телей и чуде́съ, преподо́бне о́тче Ти́хоне, о ни́хже благодаря́ще Бо́га, да́вшаго тебѣ́ такову́ю благода́ть, къ тебѣ́, я́ко къ те́плому о на́съ моли́твеннику, ра́достная воспѣва́емъ, глаго́люще:

Ра́дуйся, живы́й а́нгельски на земли́; ра́дуйся, отъ страсте́й грѣхо́вныхъ себе́ удали́вый.

Ра́дуйся, о́бразъ и́стиннаго терпѣ́нія бы́вый; ра́дуйся, соверше́нное смире́ніе на́мъ въ себѣ́ яви́вый.

Ра́дуйся, наста́вниче спасе́нію; ра́дуйся, грѣ́шныхъ приводя́й ко исправле́нію.

Ра́дуйся, Христо́выхъ за́повѣдей исполни́телю; ра́дуйся, ду́шъ немощны́хъ цѣли́телю.

Ра́дуйся, лука́выхъ духо́въ прогони́телю; ра́дуйся, благоче́стія ревни́телю.

Ра́дуйся, неоску́дный ми́лости пода́телю; ра́дуйся, благи́хъ жела́ній исполни́телю.

Ра́дуйся, преподо́бне о́тче на́шъ Ти́хоне чудотво́рче.

Конда́къ 7.

Хотя́ избра́нъ до́мъ Ду́ху Свято́му себе́ сотвори́ти, потща́лся еси́ тѣ́снымъ и приско́рбнымъ путе́мъ, веду́щимъ въ жи́знь вѣ́чную, ити́, е́же благода́тію Бо́жіею отъ ю́ности твоея́ соверши́въ непоро́чно, тѣ́мъ дости́глъ еси́ въ небе́сномъ всера́достномъ пребыва́ніи воздая́нія, и та́мо благода́рственно пое́ши Бо́гу: Аллилу́ія.

Икосъ 7.

Но́вую благода́ть показа́ всѣ́хъ Влады́ка тебѣ́, богому́дре Ти́хоне: мно́гая бо и пресла́вная чудеса́ въ мíрѣ живу́щимъ лю́демъ дѣ́йствуеши и ско́рымъ твои́мъ хода́тайствомъ посо́бствуеши. Тѣ́мже вопіе́мъ тебѣ́ такова́я:

Ра́дуйся, и́нокомъ до́брый наста́вниче; ра́дуйся, пусты́ню имѣ́вый я́ко ти́хое приста́нище.

Ра́дуйся, я́ко въ то́й а́ки безпло́тенъ пожи́лъ еси́; ра́дуйся, а́ки многомяте́жіе мíра презрѣ́лъ еси́.

Ра́дуйся, непостоя́нную суету́ я́ко пра́хъ вмѣни́вый; ра́дуйся, я́ко къ премíрнымъ у́мъ тво́й возве́лъ еси́.

Ра́дуйся, я́ко безмо́лвіемъ воздержа́лъ еси́ тѣле́сныя чу́вства; ра́дуйся, я́ко тѣ́мъ Бо́гу угоди́лъ еси́.

Ра́дуйся, а́нгельскую жи́знь стяжа́вый; ра́дуйся, я́ко ко отше́ствію отъ мíра сего́ всегда́ себе́ гото́вилъ еси́.

Ра́дуйся, я́ко благи́ми дѣ́лы ду́шу твою́ украша́лъ еси́; ра́дуйся, о лю́дехъ нело́жный моли́твенниче.

Ра́дуйся, преподо́бне о́тче на́шъ Ти́хоне чудотво́рче.

Конда́къ 8.

Стра́нное чу́до и вы́ше ума́: ты́ бо пресла́вную отъ Бо́га пріе́мъ благода́ть, съ вѣ́рою прибѣга́ющимъ къ тебѣ́ источа́еши дарова́нія исцѣле́ній, преподо́бне о́тче Ти́хоне. Сего́ ра́ди сла́витъ тя́ свяще́нная твоя́ оби́тель, идѣ́же положено́ свято́е твое́ тѣ́ло, и мы́, усе́рдное моле́ніе здѣ́ принося́ще, благодари́мъ просла́вльшаго тя́ Го́спода и вы́ну вопіе́мъ Ему́: Аллилу́ія.

Икосъ 8.

Ве́сь еси́ и всѣ́мъ вои́стинну, преподо́бне о́тче Ти́хоне, ди́венъ яви́лся еси́: а́ще бо и пло́ть въ мíрѣ носи́лъ еси́, но вся́ плотска́я мудрова́нія презрѣ́въ, а́нгельски на земли́ пожи́лъ еси́. Мы́ же, ви́дѣвше толи́кія твоя́ по́двиги, благода́рными устна́ми вопіе́мъ ти́:

Ра́дуйся, собесѣ́дниче а́нгеловъ; ра́дуйся, украше́ніе пра́ведныхъ.

Ра́дуйся, ла́стовице сладкопѣ́снивая; ра́дуйся, орга́не Ду́ха Свята́го.

Ра́дуйся, цѣвни́це духо́вная; ра́дуйся, о́тче чадолюби́вый.

Ра́дуйся, ста́да твоего́ па́стырю до́брый; ра́дуйся, благíй и вѣ́рный ра́бе.

Ра́дуйся, дѣ́лателю виногра́да Христо́ва; ра́дуйся, да́нный тебѣ́ тала́нтъ отъ Бо́га усугу́бивый.

Ра́дуйся, неподви́жимый благоче́стія сто́лпе; ра́дуйся, непоколеби́мое огражде́ніе вѣ́ры.

Ра́дуйся, преподо́бне о́тче на́шъ Ти́хоне чудотво́рче.

Конда́къ 9.

Вся́кія болѣ́зни на́ша и печа́ли утоли́, вели́кій на́шъ засту́пниче, преподо́бне о́тче Ти́хоне, и пода́ждь на́мъ послѣ́довати твоему́ житію́, сла́ву земну́ю ни во что́же вмѣня́ти и че́сть вре́менную презира́ти. Тоя́ бо ра́ди добродѣ́тели просла́ви тя́ Бо́гъ на небеси́, идѣ́же ны́нѣ Ему́ ты́ предстои́ши и непреста́нно воспѣва́еши: Аллилу́ія.

Икосъ 9.

Витíя многовѣща́нныя недоумѣ́ютъ досто́йно сла́вити тя́, преподо́бне о́тче Ти́хоне, и́бо мно́гая и пресла́вная чудодѣ́йствія источа́еши благода́тію Бо́жіею. Мы́ же, любо́вію побѣжда́еми, дерза́емъ пѣ́ти тебѣ́ си́це:

Ра́дуйся, слѣпы́мъ просвѣти́телю; ра́дуйся, хромы́хъ испра́вителю.

Ра́дуйся, разсла́бленныхъ цѣли́телю; ра́дуйся, злы́хъ по́мысловъ прогони́телю.

Ра́дуйся, скорбя́щихъ утѣше́ніе; ра́дуйся, я́ко х́ульная уста́ вра́жія загради́лъ еси́.

Ра́дуйся, я́ко ослабѣ́вшая сердца́ къ вѣ́рѣ и упова́нію наста́вилъ еси́; ра́дуйся, я́ко твои́ми моли́твами тѣ́хъ спа́слъ еси́.

Ра́дуйся, я́ко тму́ суевѣ́рія прогна́лъ еси́; ра́дуйся, я́ко къ небе́сному свѣ́ту мно́гихъ напра́вилъ еси́.

Ра́дуйся, свѣти́льниче, сія́ющій добродѣ́тельми; ра́дуйся, еди́наго Бо́га и́стинный исповѣ́дниче.

Ра́дуйся, преподо́бне о́тче на́шъ Ти́хоне чудотво́рче.

Конда́къ 10.

Спасти́ хотя́ ду́шу твою́, преподо́бне о́тче Ти́хоне, въ ю́ности во́зраста своего́ оста́вя оте́чество твое́ и страну́, дости́глъ еси́ ца́рствующаго гра́да Москвы́, и коне́чнаго ра́ди смире́нія своего́ воспрія́въ и́ноческій о́бразъ, всели́лся еси́ въ пусты́нѣ, идѣ́же устро́ивъ хра́мъ боголѣ́пнаго Преображе́нія и собра́въ учени́къ мно́жество, богоуго́дно подвиза́лся еси́ въ постѣ́ и воздержа́ніи, терпя́ разли́чная искуше́нія благода́рно, и рабо́тая Го́сподеви, Ему́же на небесѣ́хъ предстоя́, ны́нѣ вопіе́ши: Аллилу́ія.

Икосъ 10.

Стѣна́ тве́рдая яви́лся еси́ всѣ́мъ человѣ́комъ, къ заступле́нію твоему́ прибѣга́ющимъ, преподо́бне о́тче Ти́хоне, тѣ́мже и на́съ, къ тебѣ́ притека́ющихъ и твоея́ святы́я по́мощи прося́щихъ, отъ вся́кихъ бѣ́дъ и напа́стей заступа́й и огражда́й, за е́же мы́ вопіе́мъ къ тебѣ́ такова́я:

Ра́дуйся, бога́тства мíра сего́ возненави́дѣвый; ра́дуйся, нетлѣ́нная сокро́вища на небесѣ́хъ возлюби́вый.

Ра́дуйся, еди́наго безцѣ́ннаго би́сера — Христа́ Бо́га пріобрѣты́й; ра́дуйся, [вся́, я́же въ мíрѣ се́мъ, я́ко уме́ты вмѣни́вый.

Ра́дуйся,] и́ноческую нищету́ возлюби́вый; ра́дуйся, я́ко съ то́ю во всѣ́ дни́ и́ноческія жи́зни твоея́ пребы́лъ еси́ неразлу́чно.

Ра́дуйся, я́ко то́ю стяжа́лъ еси́ бога́тая сокро́вища на небеси́; ра́дуйся, я́ко а́нгельскія дости́глъ еси́ чи́ны, и́хже житію́ непоро́чно поревнова́лъ еси́.

Ра́дуйся, я́ко уневѣ́стилъ еси́ ду́шу твою́ Жениху́ Христу́; ра́дуйся, я́ко отъ Него́ на небесѣ́хъ обрѣ́лъ еси́ мзду́ трудо́въ твои́хъ.

Ра́дуйся, я́ко вше́лъ еси́ въ ра́дость Го́спода твоего́; ра́дуйся, я́ко та́мо наслажда́ешися вѣ́чныя сла́вы Его́.

Ра́дуйся, преподо́бне о́тче на́шъ Ти́хоне чудотво́рче.

Конда́къ 11.

Пѣ́ніе благода́рственное Христу́ Бо́гу, тя́, преподо́бне о́тче Ти́хоне, прославля́ющему, вси́ правосла́вніи возсыла́ютъ, я́ко Госпо́дь дарова́лъ е́сть ти́ мно́гихъ чуде́съ си́лу вся́кія неду́ги исцѣля́ти. Ему́же ты́ предстои́ши у престо́ла Его́ на небесѣ́хъ, на́съ же земны́хъ всѣ́хъ науча́еши въ Тро́ицѣ Еди́ному Бо́гу воспѣва́ти: Аллилу́ія.

Икосъ 11.

Свѣтоза́рнымъ свѣ́томъ блиста́етъ пресла́вный хра́мъ тво́й, преподо́бне о́тче Ти́хоне чудотво́рче, имѣ́я цѣльбоно́сный тво́й гро́бъ, я́ко свѣти́льникъ пресвѣ́тлый, да входя́ще ви́димъ, и благоговѣ́йно че́ствуя тя́, дерза́емъ глаго́лати тебѣ́:

Ра́дуйся, свѣти́льниче свѣ́та небе́снаго; ра́дуйся, я́ко луча́ми святы́ни твоея́ на́съ озаря́еши.

Ра́дуйся, я́ко блиста́ніемъ чуде́съ твои́хъ на́шу страну́ просвѣща́еши; ра́дуйся, я́ко притека́ющихъ къ тебѣ́ утѣша́еши.

Ра́дуйся, врачу́ ду́шъ на́шихъ благопрія́тнѣйшій; ра́дуйся, скорбя́щихъ грѣха́ми всера́достное утѣше́ніе.

Ра́дуйся, отча́янныхъ наде́жда спасе́нія; ра́дуйся, оби́димыхъ ско́рый засту́пниче.

Ра́дуйся, пра́вды и́стинный храни́телю; ра́дуйся, крѣ́пкій на́шъ сто́лпе и забра́ло.

Ра́дуйся, пла́мень, пожиза́яй злоче́стіе; ра́дуйся, росоно́сный о́блакъ благода́ти, возраща́яй благоче́стіе.

Ра́дуйся, преподо́бне о́тче на́шъ Ти́хоне чудотво́рче.

Конда́къ 12.

Благода́ть, да́нную тебѣ́ отъ Бо́га, преподо́бне о́тче Ти́хоне, свѣ́дуще, тебе́ на́шего ми́лостиваго отца́ прилѣ́жно про́симъ: проле́й ны́нѣ те́плую твою́ моли́тву о на́съ грѣ́шныхъ ко Го́споду, да да́руетъ Благочести́вѣйшему ИМПЕРАТОРУ на́шему [и́мярекъ] побѣ́ды на враги́, и ца́рство ЕГО да утверди́тъ и укрѣпи́тъ, це́рковь же святу́ю и вѣ́ру правосла́вную да сохрани́тъ и вся́ правосла́вныя христіа́ны поми́луетъ, всегда́ вопію́щія Ему́: Аллилу́ія.

Икосъ 12.

Пою́ще ди́внаго во святы́хъ Свои́хъ Бо́га на́шего, преподо́бне о́тче на́шъ Ти́хоне, и почита́юще всечестно́е твое́ успе́ніе, я́ко и по преставле́ніи твое́мъ не оставля́еши на́съ благода́тными чуде́съ дарова́ніи, ско́рое твое́ на́мъ во вся́кихъ ну́ждахъ и печа́лѣхъ поможе́ніе прославля́емъ, и вопіе́мъ къ тебѣ́ си́це:

Ра́дуйся, вели́кій на́шъ моли́твенниче; ра́дуйся, извѣ́стный Бо́га умилостиви́телю.

Ра́дуйся, всѣ́хъ правосла́вныхъ ско́рый помо́щниче; ра́дуйся, въ бѣда́хъ всѣ́мъ ско́рый засту́пниче.

Ра́дуйся, си́льный въ напа́стехъ защи́тниче; ра́дуйся, а́лчущимъ корми́телю.

Ра́дуйся, ско́рый врачу́ всѣ́мъ къ тебѣ́ прибѣга́ющимъ; ра́дуйся, вся́кихъ исцѣле́ній исто́чниче.

Ра́дуйся, лю́те стра́ждущимъ помо́щниче; ра́дуйся, вездѣ́ и всѣ́мъ ско́рый предста́телю.

Ра́дуйся, страны́ на́шея похвало́ и утвержде́ніе; ра́дуйся, правосла́вному во́инству на́шему си́ла и укрѣпле́ніе.

Ра́дуйся, преподо́бне о́тче на́шъ Ти́хоне чудотво́рче.

Конда́къ 13.

О, вели́кій и пресла́вный чудотво́рче и засту́пниче на́шъ, Ти́хоне блаже́нне! Пріими́ сіе́ приноси́мое тебѣ́ моле́ніе и благопрія́тнымъ твои́мъ хода́тайствомъ умоли́ Го́спода си́лъ дарова́ти здра́віе и долгоде́нствіе Благочести́вѣйшему ИМПЕРАТОРУ на́шему [и́мярекъ] и все́й держа́вѣ ЕГО, и всѣ́мъ на́мъ изба́витися отъ вся́кихъ скорбе́й, бѣ́дъ и напа́стей, и гряду́щая въ небе́сныхъ блага́я улучи́ти, вопію́щимъ Ему́: Аллилу́ія.

[Се́й конда́къ глаго́лется три́жды. Та́же и́косъ 1-й: Ангеловъ Творе́цъ... И конда́къ 1-й: Возбра́нный чудотво́рче...]

Моли́тва преподо́бному отцу́ на́шему Ти́хону чудотво́рцу.

О, свяще́нная главо́, вели́кій чудотво́рче, преподо́бне о́тче на́шъ Ти́хоне преблаже́нне и пресла́вне, Ду́ха Свята́го испо́лненне, по́стниковъ похвало́, мона́шествующихъ сла́во, пусты́ни украси́телю, те́плый о на́съ грѣ́шныхъ моли́твенниче! Ны́нѣ со а́нгельскими во́инствы предстоя́й у престо́ла всѣ́хъ Царя́ сла́вы Го́спода, и наслажда́яся свѣ́та Единосу́щныя Тро́ицы, и съ го́рними си́лами воспѣва́я трисвяту́ю пѣ́снь, я́ко дерзнове́ніе имѣ́я, моли́ся Всеми́лостивому Влады́цѣ, спасти́ вся́ вѣ́рующія во и́мя Его́. Испроси́ ми́ръ и тишину́ святы́мъ це́рквамъ ниспосла́ти, вѣ́рѣ правосла́внѣй укрѣпле́ніе, [Благочести́вѣйшему Самодержа́внѣйшему Вели́кому Госуда́рю на́шему ИМПЕРАТОРУ [и́мярекъ], и всему́ наслѣ́дію Его́, здра́віе дарова́ти, и покори́ти и́мъ вся́ проти́вныя язы́ки, бра́ни хотя́щія,] ви́димыя и неви́димыя враги́ низложи́ти, гра́ды на́ша утверди́ти, мíръ ве́сь умири́ти. Моли́ Ми́лостиваго Бо́га, да твои́мъ благопрія́тнымъ хода́тайствомъ вся́ правосла́вныя христіа́ны изба́витъ Онъ отъ гла́да, губи́тельства, тру́са, пото́па, огня́, меча́, отъ наше́ствія иноплеме́нникъ и междоусо́бныя бра́ни, ста́рыя да подкрѣпи́тъ, ю́ныя да наста́витъ, нему́дрыя умудри́тъ, боля́щія исцѣли́тъ, плѣне́нныя и ю́зники свободи́тъ, сироты́ засту́питъ, младе́нцы воспита́етъ, и вся́ лю́ди сохрани́тъ отъ всѣ́хъ бѣ́дъ и напа́стей и отъ нападе́нія вра́жія, и смертоно́сныя я́звы, и тлетво́рныхъ вѣ́тръ, и отъ вся́каго зла́. Дне́сь же съ вѣ́рою приходя́щихъ рабо́въ твои́хъ [и́мярекъ], со стра́хомъ и любо́вію [припа́дающихъ ко свято́му гро́бу многоцѣле́бныхъ моще́й твои́хъ, и] о́бразъ подо́бія твоего́ любе́зно цѣлу́ющихъ, я́ко те́плый на́шъ засту́пниче, сохрани́, и въ ско́рбныхъ обстоя́ніихъ на́шихъ предста́ни, душе́вныхъ и тѣле́сныхъ страсте́й свободи́, въ де́нь стра́шнаго суда́ шу́яго стоя́нія изба́ви, и съ десны́ми овца́ми моли́твами твои́ми ста́ти сподо́би, и слы́шати блаже́нный о́ный гла́съ Влады́ки Христа́ Бо́га на́шего: пріиди́те, благослове́нніи Отца́ Моего́, наслѣ́дуйте угото́ванное ва́мъ Ца́рство отъ сложе́нія мíра. Ему́же подоба́етъ вся́кая сла́ва, че́сть и поклоне́ніе, со безнача́льнымъ Его́ Отце́мъ, и со Пресвяты́мъ и благи́мъ и животворя́щимъ Его́ Ду́хомъ, ны́нѣ и при́сно и во вѣ́ки вѣко́въ. Ами́нь.

Тропа́рь, гла́съ 4:

Яко свѣти́льникъ пресвѣ́тлый, яви́лся еси́ въ Россíйстѣй земли́, преподо́бне о́тче на́шъ Ти́хоне, въ пусты́ни всели́вся, въ не́йже преходя́ жесто́кое жи́тельство, я́ко безпло́тенъ, пожи́лъ еси́, сего́ ра́ди и чуде́съ дарова́ніемъ обогати́ тя Бо́гъ. Тѣ́мъ и мы́, притека́юще къ ра́цѣ моще́й твои́мъ, уми́льно глаго́лемъ: о́тче преподо́бне, моли́ Христа́ Бо́га спасти́ся душа́мъ на́шимъ.

Конда́къ, гла́съ 8:

Оте́чества удали́вся, преподо́бне, въ пусты́ню всели́лся еси́, идѣ́же жесто́кое житіе́ твое́ показа́лъ еси́ и, мно́гихъ добродѣ́тельми удиви́въ, дарова́ніе чуде́съ отъ Христа́ прія́лъ еси́. Тѣ́мже помина́й на́съ, чту́щихъ па́мять твою́, да зове́мъ ти́: ра́дуйся, преподо́бне Ти́хоне, о́тче на́шъ.

Велича́ніе:

Ублажа́емъ тя́, преподо́бне о́тче Ти́хоне, и чте́мъ святу́ю па́мять твою́, наста́вниче мона́ховъ и собесѣ́дниче а́нгеловъ.

Источникъ: Слу́жба [съ Ака́ѳистомъ] преподо́бному Ти́хону, Калу́жскому чудотво́рцу. — СПб: Въ Сѵнода́льной Тѵпогра́фіи, 1868. — С. 21-38, 43-47.

/ Къ оглавленію раздѣла /


Наверхъ / Къ титульной страницѣ

0