Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - четвергъ, 14 декабря 2017 г. Сейчасъ на порталѣ посѣтителей - 12.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ДОМАШНЯЯ МОЛИТВА

Преп. Діонисій Глушицкій, чудотворецъ († 1437 г.)

Преподобный Дионисий Глушицкий, Вологодский чудотворецПреп. Діонисій Глушицкій, въ мірѣ Димитрій, родился въ окрестностяхъ Вологды въ 1362 году. Кто были родители его и какъ прошли первые годы его жизни, неизвѣстно. Свѣдѣнія о преподобномъ начинаются со времени постриженія его въ иноки Діонисіемъ Святогорцемъ, игуменомъ Спасо-Каменнаго монастыря на Кубенскомъ озерѣ. Девять лѣтъ пробылъ Діонисій въ этомъ монастырѣ, а затѣмъ сталъ искать болѣе уединеннаго мѣста и удалился на рѣку Глушицу, куда, по прошествіи нѣкотораго времени, къ нему стали стекаться другіе подвижники и селились вблизи его кельи. Преподобный велъ суровую подвижническую жизнь, «постомъ и бдѣніемъ изнуряя тѣло», постоянно пребывая въ молитвѣ и налагая на себя тяжкія самоиспытанія. Преп. Діонисій былъ искусный живописецъ и ковачъ мѣди. Занимался онъ также плотничествомъ, кузнечнымъ ремесломъ, рѣзьбой по дереву. Самъ дѣлая все своими руками, преподобный ни одной минуты не проводилъ безъ труда и тогда только принимался за пищу, когда совершенно терялъ силы отъ истощенія. За 7 лѣтъ до своей кончины преп. Діонисій самъ выкопалъ себѣ могилу въ Сосновцѣ, ежедневно приходилъ къ ней, непрестанно напоминая себѣ о смерти, и нерѣдко простаивалъ надъ нею на морозѣ всю ночь, помышляя о томъ, какъ бы избѣжать хлада тьмы кромѣшной. Скончался онъ въ 1437 г., на 75 году своей жизни. Причисленъ къ лику на Московскомъ соборѣ 1547 г. Память преп. Діонисія — 1 (14) іюня.

АКАѲИСТЫ

Ака́ѳистъ преподо́бному и богоно́сному отцу́ на́шему Діони́сію, игу́мену Глуши́цкому, Во́логодскому чудотво́рцу.

Конда́къ 1.

Избра́нный воево́до во́иновъ духо́вныхъ, въ пусты́ни оби́тели возгради́вый и мно́жество и́нокъ собра́вый, свя́тостію житія́ и чудесы́ просія́вый и Бо́гу до́брѣ угоди́вый, преподо́бне о́тче Діони́сіе! Восхваля́емъ тя́ съ любо́вію, засту́пника на́шего. Ты́ же, я́ко имѣ́яй дерзнове́ніе ко Го́споду, моли́твами твои́ми отъ вся́кихъ на́съ бѣ́дъ свободи́, да зове́мъ ти́:

Ра́дуйся, Діони́сіе, вели́кій чудотво́рче.

Икосъ 1.

Ра́дуйся, звѣздо́ пресвѣ́тлая, полу́нощную страну́ духо́вно просвѣти́вшая; ра́дуйся, свѣти́льниче немерца́яй Бо́жія благода́ти.

Ра́дуйся, Ева́нгелія Христо́ва вѣрный послу́шателю; ра́дуйся, я́ко взе́мъ кре́стъ тво́й, во слѣ́дъ Христа́ усе́рдно отъ ю́ности и до ста́рости масти́тыя ходи́лъ еси́.

Ра́дуйся, подви́жническое духо́вное житіе́ возлюби́вый; ра́дуйся, стопы́ твоя́ на пу́ть спасе́нія неукло́нно напра́вивый.

Ра́дуйся, уси́ленно еди́наго на потре́бу взыска́вый; ра́дуйся, бла́га нетлѣ́нная и вѣ́чная па́че тлѣ́нныхъ и скороги́бнущихъ возжела́вый.

Ра́дуйся, тѣсноту́ и ско́рбь и́ноческаго житія́ избра́вый; ра́дуйся, сожи́тельства съ преподо́бными иска́вый.

Ра́дуйся, смире́ніемъ святы́мъ благоукраше́нный; ра́дуйся, терпѣ́ніемъ крѣ́пкимъ вся́ искуше́нія вра́жія отрази́вый.

Ра́дуйся, Діони́сіе, вели́кій чудотво́рче.

Конда́къ 2.

Ви́дѣвъ преподо́бный игу́менъ Діони́сій, прозорли́выми очесы́ свои́ми благопло́дную добро́ту души́ твоея́, преподо́бне о́тче, егда́ прише́лъ еси́ къ нему́ во оби́тель Спа́со-Ка́менскую, прія́тъ тя́ съ любо́вію и наставля́ше богому́дрѣ на по́двиги духо́вныя. Ты́ же, преблаже́нне, вся́ словеса́ его́ слага́лъ еси́ въ се́рдцѣ твое́мъ, и яви́лся еси́ до́брый учени́къ до́браго учи́теля, зовы́й ку́пно съ ни́мъ небе́сному Учи́телю Христу́ немо́лчную пѣ́снь: Аллилу́ія.

Икосъ 2.

Разумѣ́въ тя́ сосу́дъ избра́нъ Бо́жія благода́ти бы́ти, игу́менъ Діони́сій возлюби́ тя, о́тче преподо́бне, и постри́же во святы́й и́ноческій о́бразъ, наименова́въ тя́ въ постриже́ніи и́менемъ свои́мъ Діони́сій, да бу́деши ему́ подража́тель и́менемъ и дѣ́лы преподо́бными. Сіе́ воспомина́юще, съ любо́вію тебѣ́ зове́мъ:

Ра́дуйся, и́ноче боголюбе́зный, во́лю твою́ во́ли Бо́жіей повину́вый; ра́дуйся, по Бо́зѣ послуша́ніе соверше́нное настоя́телю твоему́ яви́вый.

Ра́дуйся, за кро́тость нра́ва все́ю бра́тіею люби́мый; ра́дуйся, тяготы́ бли́жнихъ твои́хъ съ любо́вію носи́вый.

Ра́дуйся, во трудѣ́хъ и по́двизѣхъ и́ноческихъ преуспѣ́вый; ра́дуйся, вся́ послуша́нія монасты́рская безъ ро́пота исполня́вый.

Ра́дуйся, пра́здность душегуби́тельную возненави́дѣвый; ра́дуйся, моли́твы и бдѣ́нія всено́щная возлюби́вый.

Ра́дуйся, пе́рвый на моли́тву во хра́мъ Бо́жій приходи́вый; ра́дуйся, послѣ́дній по сконча́ніи богослуже́нія изъ него́ исходи́вый.

Ра́дуйся, примета́выйся усе́рдно въ дому́ Бо́жіи; ра́дуйся, я́ко ду́шу твою́ въ до́мъ Ду́ху Свято́му угото́валъ еси́.

Ра́дуйся, Діони́сіе, вели́кій чудотво́рче.

Конда́къ 3.

Си́лою Всевы́шняго укрѣпля́емый, вся́ искуше́нія діа́вольская бо́дренными моли́твами твои́ми побѣди́лъ еси́, о́тче Діони́сіе, и въ новонача́ліи и́ночестѣмъ вели́къ подви́жникъ показа́лся еси́, о не́мже игу́менъ Діони́сій и бра́тія его́ ра́довахуся и сла́вляху Бо́га, пою́ще Ему́: Аллилу́ія.

Икосъ 3.

Имѣ́я по́мыслъ чи́стъ и непоро́чну ду́шу, и ви́дѣвъ себе́ почита́ема въ Спа́со-Ка́менстѣй оби́тели, о́тче Діони́сіе, я́ко смире́нія рачи́тель, умы́слилъ еси́ бѣжа́ти отту́ду въ безмо́лвіе пусты́ни, да не превозноше́ніемъ су́етнымъ уловле́нъ бу́деши. Тѣ́мже, получи́въ благослове́ніе твоего́ настоя́теля, вку́пѣ со дру́гомъ твои́мъ, преподо́бнымъ Пахо́міемъ, удали́лся еси́ изъ оби́тели въ пусты́нное мѣ́сто, на Святу́ю Лу́ку, и та́мо безмо́лвно пребыва́лъ еси́ въ постѣ́хъ и моли́твахъ, идѣ́же, а́ки срѣта́юща тя́, земна́го а́нгела и небе́снаго человѣ́ка, благоумиле́нно вопіе́мъ ти́:

Ра́дуйся, безмо́лвія рачи́телю, пусты́ню духо́вно уплодоноси́вый; ра́дуйся, подви́жническимъ житіе́мъ твои́мъ сію́ просла́вивый.

Ра́дуйся, дре́во благопло́дное, при вода́хъ пусты́нныхъ возра́стшее; ра́дуйся, плоды́ мно́гія Христу́ принесы́й.

Ра́дуйся, сла́дость безмо́лвія пусты́ннаго вкуси́вый; ра́дуйся, посто́мъ и воздержа́ніемъ пло́ть твою́ ду́ху покори́вый.

Ра́дуйся, моли́твами сле́зными пла́мень страсте́й въ себѣ́ угаси́вый; ра́дуйся, безстра́стіе благода́тное стяжа́вый.

Ра́дуйся, богомы́сліемъ непреста́ннымъ у́мъ тво́й просвѣти́вый; ра́дуйся, трезве́ніе моли́твенное преобрѣты́й.

Ра́дуйся, Боже́ственнаго и́мене Іису́съ Христо́ва немо́лчный призыва́телю; ра́дуйся, за́повѣдей Христо́выхъ ре́вностный храни́телю.

Ра́дуйся, Діони́сіе, вели́кій чудотво́рче.

Конда́къ 4.

Бу́ря искуше́ній діа́вольскихъ не поколеба́ твоего́ терпѣ́нія и му́жества въ пусты́ни, преподо́бне о́тче, но я́ко крѣ́пкій адама́нтъ, не измѣни́лся еси́ отъ прираже́ній дре́вняго змíя человѣкоубíйцы, и сія́ крѣ́пкими моли́твами твои́ми побѣдоно́сно отрази́лъ еси́, во смире́ніи глубо́цѣмъ пребыва́я и со слеза́ми вопія́ ко Го́споду: Аллилу́ія.

Икосъ 4.

Слы́шимъ тя́, преподо́бне о́тче, хра́мъ Бо́жій во и́мя вели́каго святи́теля и чудотво́рца Никола́я въ пусты́ни твое́й, на Святѣ́й Лу́цѣ, люботру́дно созда́вшаго, къ нему́же во іере́я посвяще́нъ бы́лъ еси́ отъ руки́ архіепи́скопа Росто́вскаго Григо́рія, и я́ко храмозда́тель благослове́нный и священнотаи́нникъ Бо́жія благода́ти, досто́йно слы́шиши отъ на́съ сицева́я:

Ра́дуйся, хра́мъ Бо́жій въ души́ твое́й созда́вый; ра́дуйся, же́ртвы непоро́чныя Бо́гови принесы́й.

Ра́дуйся, преподо́бно и пра́ведно пожи́вый; ра́дуйся, дерзнове́ніе мно́гое ко Го́споду стяжа́вый.

Ра́дуйся, моли́твами твои́ми зна́менія и чудеса́ соверша́яй; ра́дуйся, благода́ти Бо́жія преиспо́лненный.

Ра́дуйся, блаже́нный храмозда́телю; ра́дуйся, оби́тели пусты́нныя основа́телю.

Ра́дуйся, мно́гая ча́да духо́вная собра́вый; ра́дуйся, ко спасе́нію и́хъ до́брѣ руководи́вый.

Ра́дуйся, пра́вило преподо́бнаго и́ноческаго житія́; ра́дуйся, о́бразе богоугожде́нія и́стиннаго.

Ра́дуйся, Діони́сіе, вели́кій чудотво́рче.

Конда́къ 5.

Богому́дрѣ управля́лъ еси́, о́тче Діони́сіе, оби́телію пусты́нною на Святѣ́й Лу́цѣ, я́же, я́ко кри́нъ въ пусты́ни, процвѣте́ духо́вно: оба́че, стужи́въ си́ молво́ю человѣ́ческою, настоя́тельство въ не́й вручи́лъ еси́ спо́стнику твоему́, преподо́бному Пахо́мію, са́мъ же удали́лся еси́ въ пусты́ню глубоча́йшую, на рѣку́ Глуши́цу, да та́мо еди́нъ Еди́ному Бо́гу возмо́жеши невозбра́нно пѣ́ти а́нгельскую пѣ́снь: Аллилу́ія.

Икосъ 5.

Ви́дѣвъ красоту́ мѣ́ста пусты́ннаго въ лѣсно́й де́бри, на рѣцѣ́ Глуши́цѣ, о́тче преподо́бне, и слы́шавъ на не́мъ зво́нъ церко́вный, позна́лъ еси́ во́лю Бо́жію, та́мо тебѣ́ всели́тися и оби́тель возгради́ти. Тѣ́мже помоли́вся со слеза́ми, ке́ллію ма́лу подъ дре́вомъ чере́мховымъ та́мо себѣ́ постро́илъ еси́, освяти́въ мѣ́сто о́ное во оби́тель во и́мя Пресвяты́я Богоро́дицы, честна́го и сла́внаго Ея́ Покро́ва, идѣ́же мы́ ны́нѣ тя́ ублажа́емъ и пое́мъ:

Ра́дуйся, пустынножи́телей сла́во и похвало́; ра́дуйся, ди́вный избра́нниче Бо́жій, де́брь пусты́нную и́ноки насели́вый.

Ра́дуйся, ла́вру пресла́вную та́мо сооруди́вый; ра́дуйся, изря́дный слуго́ Пресвяты́я Богоро́дицы.

Ра́дуйся, вѣ́рный уго́дниче Сы́на Ея́ и Бо́га; ра́дуйся, при́сный радѣ́телю спасе́нія ду́шъ человѣ́ческихъ.

Ра́дуйся, сотвори́вый и научи́вый; ра́дуйся, ве́лій нарече́нный во Ца́рствіи небе́снѣмъ.

Ра́дуйся, го́рлице пустыннолюби́вая, Глуши́цкую де́брь пѣ́ніемъ моли́твеннымъ огласи́вшая; ра́дуйся, въ пусты́ни славосло́віи непреста́нными Бо́га сла́вивый.

Ра́дуйся, сле́зъ твои́хъ тече́ньми безпло́дную зе́млю духо́вно напои́вый; ра́дуйся, прозябе́нія богоуго́дная на не́й возрасти́вый.

Ра́дуйся, Діони́сіе, вели́кій чудотво́рче.

Конда́къ 6.

Проповѣ́дуетъ пусты́нная Ла́вра твоя́, о́тче Діони́сіе, труды́ и по́двиги твоя́, при устрое́ніи ея́ подъя́тыя, ка́ко, сооружа́я въ не́й хра́мы Бо́жія, рука́ма твои́ма ко труду́ дѣ́лателей прикаса́лся еси́, ико́ны же святы́я для ни́хъ благолѣ́пно написа́лъ еси́, иску́сный иконопи́сецъ бы́въ. Тѣ́мже ны́нѣ во хра́мѣхъ небе́сныхъ почива́еши и лицезрѣ́нія Бо́жія наслажда́ешися, зовы́й всѣ́хъ Творцу́ со а́нгелы и святы́ми: Аллилу́ія.

Икосъ 6.

Возсія́лъ еси́ я́ко со́лнце пресвѣ́тлое въ пусты́ни Глуши́цтѣй, о́тче Діони́сіе, и сія́ніемъ до́брыхъ дѣ́лъ твои́хъ привле́клъ еси́ во оби́тель твою́ мно́ги ревни́тели богоугожде́нія и́стиннаго, и́же стека́хуся къ тебѣ́ отвсю́ду, да руково́дствуеши и́хъ ко спасе́нію. И та́ко мно́гая ча́да о Христѣ́ стяжа́лъ еси́, преблаже́нне, отъ ни́хже уго́дницы Бо́жіи, преподо́бніи ученицы́ твои́, Амфило́хій, Мака́рій, Тара́сій и Ѳеодо́сій, вку́пѣ съ тобо́ю въ ли́цѣ святы́хъ просла́влени су́ть отъ Го́спода. Съ ни́ми у́бо тя́ восхваля́емъ и зове́мъ:

Ра́дуйся, а́вво богому́дрый, и́нокъ мно́жество собра́вый; ра́дуйся, даро́въ Свята́го Ду́ха сосу́де непоро́чный.

Ра́дуйся, ученики́ святы́я и богоуго́дныя духо́вно воспита́вый; ра́дуйся, ку́пно съ ни́ми на небеси́ и на земли́ просла́вленный.

Ра́дуйся, общежи́тіе бра́тское во оби́тели твое́й учреди́вый; ра́дуйся, уста́вы его́ са́мъ вѣ́рно всегда́ храни́вый.

Ра́дуйся, послуша́ніе имѣ́ти бра́тіи твое́й законоположи́вый; ра́дуйся, непослуша́ніе въ ни́хъ гро́зно наказа́вый.

Ра́дуйся, я́ко ми́лостыню убо́гимъ неоску́дно подава́лъ еси́; ра́дуйся, я́ко во дни́ гла́да во оби́тели твое́й мно́ги препита́лъ еси́.

Ра́дуйся, та́темъ похи́тившимъ достоя́ніе оби́тели твоея́, не мсти́вый; ра́дуйся, добро́мъ за зло́ и́мъ возда́вый.

Ра́дуйся, Діони́сіе, вели́кій чудотво́рче.

Конда́къ 7.

Хотя́ вра́гъ спасе́нія человѣ́ческаго устраши́ти тя́, преподо́бне о́тче, привидѣ́ніи свои́ми смуща́ше тя́ во вре́мя нощны́я твоея́ моли́твы, и два́жды біе́ніемъ лю́тымъ ура́ни твое́ тѣ́ло, я́ко бы́ти на не́мъ я́звамъ мно́гимъ. Оба́че ты́ непоколеби́мь въ по́двизѣ твое́мъ пребы́лъ еси́, и я́звы сія́ до́блественнѣ носи́лъ еси́, я́ко во́инъ Іису́съ Христо́въ и му́чениковъ сострада́лецъ. Тѣ́мже вла́сть ве́лію на ду́хи нечи́стыя отъ Го́спода получи́лъ еси́, я́ко про́чее не дерза́ти и́мъ приступи́ти къ тебѣ́, внегда́ пѣ́лъ еси́ Бо́гу: Аллилу́ія.

Икосъ 7.

Но́вую оби́тель и́ноческую въ пусты́ни Сосно́вецтѣй возгради́лъ еси́, преподо́бне о́тче, и въ не́й хра́мъ Бо́жій, во и́мя Предте́чи Госпо́дня Іоа́нна, созда́лъ еси́, въ ню́же изъ Ла́вры твоея́ на безмо́лвіе уединя́лся еси́, и заповѣ́далъ еси́, да та́мо по кончи́нѣ твое́й погребе́нъ бу́деши, да не запустѣ́етъ мѣ́сто сіе́, тобо́ю возлю́бленное. Помина́юще у́бо таково́е твое́ о безмо́лвіи раче́ніе и благо́е ко сме́рти пріуготовле́ніе, зове́мъ ти́:

Ра́дуйся, ма́слино благопло́дная, въ пусты́ни возра́стшая; ра́дуйся, еле́емъ до́брыхъ дѣ́лъ твои́хъ ду́ши вѣ́рныхъ умасти́вый.

Ра́дуйся, дре́внихъ вели́кихъ преподо́бныхъ оте́цъ ди́вный подража́телю; ра́дуйся, Ѳиваи́ды Россíйскія основа́телю.

Ра́дуйся, до ста́рости масти́тыя Бо́гу нелѣ́ностно послужи́вый; ра́дуйся, хлѣ́бъ су́хъ еди́ножды въ де́нь вкуша́вый.

Ра́дуйся, въ постѣ́ суро́вѣмъ и моли́твахъ непреста́нныхъ всю́ жи́знь твою́ препроводи́вый; ра́дуйся, поко́й тѣле́сный возненави́дѣвый.

Ра́дуйся, кни́ги и ико́ны святы́я трудолю́бно писа́вый; ра́дуйся, сна́ и отдохнове́нія ма́ло пріима́вый.

Ра́дуйся, вся́ твори́вый во сла́ву Бо́жію и на по́льзу душе́вную бли́жнихъ твои́хъ; ра́дуйся, всего́ себе́ въ же́ртву благопрія́тну Бо́гови принесы́й.

Ра́дуйся, Діони́сіе, вели́кій чудотво́рче.

Конда́къ 8.

Стра́нника и прише́льца въ мíрѣ се́мъ помышля́я себе́ бы́ти, преподо́бне о́тче, о часѣ́ сме́ртнѣмъ непреста́нно па́мятовалъ еси́, и моги́лу себѣ́ въ Сосно́вецтѣй оби́тели твое́й рука́ма твои́ма ископа́лъ еси́, надъ не́юже моли́твенно пла́калъ еси́, воспомина́я сме́рть и су́дъ Бо́жій. Мо́лимъ тя́, уго́дниче Бо́жій, примѣ́ромъ твои́мъ святы́мъ научи́ и ны́, грѣ́шныя, не забыва́ти гро́знаго часа́ сме́ртнаго, но при́сно гото́витися къ нему́ и благоумиле́нно пѣ́ти Бо́гу: Аллилу́ія.

Икосъ 8.

Ве́сь въ Бо́зѣ бы́въ, преподо́бне о́тче, о Бо́зѣ и благоугожде́ніи Ему́ бесѣ́довалъ еси́ со ученики́ твои́ми, со слеза́ми умоля́я и́хъ вѣ́рно храни́ти за́повѣди Христо́вы. Тѣ́мже, я́ко возше́дый на высоту́ соверше́нства духо́внаго, видѣ́ній и открове́ній Боже́ственныхъ сподо́бился еси́, и прозорли́вства да́ръ свы́ше получи́лъ еси́, да и мы́ тебѣ́ пое́мъ:

Ра́дуйся, врачу́ благоиску́сный неду́говъ душе́вныхъ; ра́дуйся, бу́дущая я́ко настоя́щая прови́дѣвый.

Ра́дуйся, а́нгела Бо́жія ви́дѣти сподо́бивыйся; ра́дуйся, о умноже́ніи бра́тіи во оби́тели твое́й извѣще́ніе отъ него́ пріе́мый.

Ра́дуйся, благоволе́ніемъ Пресвяты́я Богоро́дицы осѣне́нный; ра́дуйся, хра́мъ Бо́жій прекра́сенъ во и́мя Ея́ свято́е сооруди́вый.

Ра́дуйся, мно́гія хра́мы Бо́жія не то́кмо во оби́телехъ твои́хъ, но и во окре́стныхъ ве́сехъ люботру́дно постро́ивый; ра́дуйся, о славосло́віи Бо́жіи зѣло́ поревнова́вый.

Ра́дуйся, ни́щій ду́хомъ, но мно́гія духо́вно обогати́вый; ра́дуйся, кро́ткій се́рдцемъ, съ ненави́дѣвшими тя́ ми́ренъ бы́вый.

Ра́дуйся, и́стинный Христо́въ подо́бниче; ра́дуйся, ангелонра́вный человѣ́че.

Ра́дуйся, Діони́сіе, вели́кій чудотво́рче.

Конда́къ 9.

Вси́ ученицы́ твои́, преподо́бне о́тче, го́рцѣ пла́каху, егда́ собра́въ и́хъ, повѣ́далъ еси́ и́мъ приближе́ніе твоея́ кончи́ны, и настоя́теля и́мъ, вмѣ́сто себе́, преподо́бнаго Амфило́хія поста́вилъ еси́, заповѣ́давъ тому́ блюсти́ уста́въ общежи́тельный во твои́хъ оби́телехъ и вѣ́рно руководи́ти бра́тію твою́ ко спасе́нію, да благопрія́тно пою́тъ Бо́гу: Аллилу́ія.

Икосъ 9.

Вѣтíи человѣ́честіи не довлѣ́ютъ ко изглаго́ланію любве́ твоея́ святы́я, преподо́бне о́тче Діони́сіе, ея́же ко ученико́мъ твои́мъ преиспо́лненъ бы́лъ еси́, егда́ возлежа́ на одрѣ́ сме́ртнѣмъ, послѣ́днее поуче́ніе и́мъ сотвори́лъ еси́, богому́дренно увѣща́я и́хъ любо́вь имѣ́ти между́ собо́ю и ничто́же предпочита́ти па́че любве́ Христо́вы. О се́мъ умиля́ющеся душа́ми на́шими, вопіе́мъ ти́:

Ра́дуйся, свяще́нная главо́, Тро́ическою заре́ю свы́ше озаре́нная; ра́дуйся, исто́чниче медото́чный уче́нія Боже́ственнаго.

Ра́дуйся, ученики́ твоя́ пріи́скреннѣ возлюби́вый; ра́дуйся, вся́ ну́жная ко спасе́нію и́мъ возвѣсти́вый.

Ра́дуйся, всю́ бра́тію твою́ прости́вый и благослови́вый; ра́дуйся, посме́ртныя моли́твы твоя́ и́мъ обѣтова́вый.

Ра́дуйся, я́ко свѣ́телъ и ра́достенъ на одрѣ́ сме́ртнѣмъ возлежа́лъ еси́; ра́дуйся, я́ко благонаде́женъ о спасе́ніи твое́мъ бы́лъ еси́.

Ра́дуйся, свя́то и богоуго́дно тече́ніе земно́е соверши́вый; ра́дуйся, че́стно и преподо́бно о Го́сподѣ почи́вый.

Ра́дуйся, я́ко три́ дни́ предъ кончи́ною твое́ю въ соверше́ннѣмъ безмо́лвіи препроводи́лъ еси́; ра́дуйся, я́ко моли́твы благоумиле́нныя Го́сподеви возноси́лъ еси́.

Ра́дуйся, Діони́сіе, вели́кій чудотво́рче.

Конда́къ 10.

Спасе́нія души́ твоея́ и благоустрое́нія святы́я оби́тели твоея́ съ пла́чемъ и слеза́ми проси́лъ еси́ у Го́спода Іису́са Христа́ и Пречи́стыя Его́ Ма́тере, преподо́бне о́тче Діони́сіе, и извѣще́ніе благо́е получи́лъ еси́ отъ Пресвяты́я Богоро́дицы, я́ко вся́ проси́мая тобо́ю испо́лнена бу́дутъ, и я́ко Сама́ Она́ бу́детъ при́сная Покрови́тельница и Засту́пница оби́тели твоея́. Тѣ́мже ра́достно воспѣ́лъ еси́ Сы́ну Ея́ и Бо́гу: Аллилу́ія.

Икосъ 10.

Царя́ Небе́снаго Христа́ вѣ́рный ра́бъ бы́лъ еси́, преподо́бне о́тче, во вся́ дни́ житія́ твоего́ земна́го, тѣ́мже и кончи́ною преди́вною просла́ви тя́, я́ко и́стиннаго Своего́ уго́дника: свѣ́томъ бо небе́снымъ возсія́ лице́ твое́ при исхо́дѣ твое́мъ, и вѣне́цъ сія́яй ви́димь бы́сть на главѣ́ твое́й, и вся́ ке́ллія твоя́ испо́лнися благоуха́нія, егда́ пре́далъ еси́ святу́ю ду́шу твою́ въ ру́цѣ Бо́жіи. О се́мъ чудя́щеся, а́ки надгро́бную пѣ́снь прино́симъ ти́ благохвале́нія такова́я:

Ра́дуйся, вели́кій уго́дниче Бо́жій, я́ко свѣ́тлою кончи́ною твое́ю ученики́ твоя́ удиви́лъ еси́; ра́дуйся, я́ко пла́чь и́хъ утѣше́ніемъ духо́внымъ измѣни́лъ еси́.

Ра́дуйся, сиро́тство и́хъ духо́вно вознагради́вый; ра́дуйся, печа́ль и́хъ благода́тно утоли́вый.

Ра́дуйся, вѣ́чно-блаже́нныя жи́зни наслѣ́дниче; ра́дуйся, нетлѣ́нныя ра́дости святы́хъ соприча́стниче.

Ра́дуйся, вѣнцено́сче, отъ Христо́вы десни́цы увѣнча́нный; ра́дуйся, сія́ніемъ Трисо́лнечнымъ озаре́нный.

Ра́дуйся, во свѣ́тлостехъ святы́хъ опочи́вый; ра́дуйся, воздая́ніе трудо́мъ твои́мъ та́мо получи́вый.

Ра́дуйся, оби́тели твоея́ святы́я похвало́ и ра́дованіе; ра́дуйся, Це́ркве Христо́вы благода́тное украше́ніе.

Ра́дуйся, Діони́сіе, вели́кій чудотво́рче.

Конда́къ 11.

Пѣ́ніе погреба́льное со слеза́ми мно́гими соверша́ху ученицы́ твои́, преподо́бне о́тче, надъ тѣ́ломъ твои́мъ святы́мъ, провожда́юще тя́ къ мѣ́сту посме́ртнаго твоего́ поко́я во оби́тель Сосно́вецкую, и се́ а́біе ста́ ко́нь, и́же гро́бъ тво́й везя́ше, и не дви́гашеся по пути́. Сіе́ же ви́дѣвъ, преподо́бный Амфило́хій повелѣ́, да и́ный, люби́мый тобо́ю ко́нь впряже́нъ бу́детъ въ колесни́цу, и то́й ле́гцѣ довезе́ тя до моги́лы. Сицево́е погребе́ніе твое́ благоговѣ́йно воспомина́юще, пое́мъ Ди́вному во святы́хъ Свои́хъ Бо́гу хвале́бную пѣ́снь: Аллилу́ія.

Икосъ 11.

Свѣтопода́тельный свѣти́льникъ Бо́жія благода́ти явля́ешися и по сме́рти, преподо́бне о́тче Діони́сіе, соверша́я чудеса́ мно́гая отъ свята́го твоего́ гро́ба, отъ него́же неду́жніи исцѣля́хуся, слѣпíи зрѣ́ніе получа́ху, бѣснова́тіи отъ мучи́тельства діа́воля свобожда́хуся, и всѣ́мъ тре́бующимъ оби́льно ми́лость Бо́жія подава́шеся. Сего́ ра́ди вопіе́мъ ти́ усе́рдно:

Ра́дуйся, благода́тныхъ даро́въ всеще́дрый пода́телю; ра́дуйся, неду́говъ злы́хъ прогони́телю.

Ра́дуйся, врачу́ безме́здный и скоропредста́тельный; ра́дуйся, цѣле́бниче благода́тный.

Ра́дуйся, въ со́ніихъ и видѣ́ніихъ вѣ́рныя посѣща́яй; ра́дуйся, бли́жнимъ и да́льнимъ по́мощь твою́ явля́яй.

Ра́дуйся, разсла́бленныхъ укрѣпи́телю; ра́дуйся, на ду́хи нечи́стыя крѣ́пкій вои́телю.

Ра́дуйся, отъ привидѣ́ній и страхова́ній вра́жіихъ мно́гія изба́вивый; ра́дуйся, бѣснова́тыхъ отъ томле́нія діа́воля свободи́вый.

Ра́дуйся, хода́таю на́шъ при́сный; ра́дуйся, моли́твенниче за ны́ немо́лчный.

Ра́дуйся, Діони́сіе, вели́кій чудотво́рче.

Конда́къ 12.

Благода́ть Бо́жія, осѣня́ющая святу́ю и многоцѣле́бную ра́ку моще́й твои́хъ, преподо́бне о́тче Діони́сіе, и крѣ́пкое предста́тельство твое́ ко Го́споду о всѣ́хъ, съ вѣ́рою притека́ющихъ ко твоему́ заступле́нію, увѣ́риша во свя́тости твое́й собо́ръ святи́телей святы́я Всероссíйскія Це́ркве, и́же торже́ственно къ ли́ку святы́хъ Бо́жіихъ тя́ причто́ша и чудотво́рца пресла́вна тя́ наименова́ша, пою́ще Бо́гу, тя́ просла́вльшему, пѣ́снь: Аллилу́ія.

Икосъ 12.

Пое́мъ по́двиги и чудотворе́нія твоя́, вели́кій уго́дниче Бо́жій, прославля́емъ благосе́рдіе твое́ и ми́лость ко вся́цѣй души́ христіа́нстѣй, по́мощи отъ тебе́ и́щущей, не таи́мъ вели́кихъ благодѣя́ній твои́хъ, явле́нныхъ и при́сно явля́емыхъ тобо́ю вѣ́рующимъ и моле́бно соверша́юще святу́ю па́мять твою́, во псалмѣ́хъ и пѣ́снехъ духо́вныхъ, си́це благоумиле́нно тебѣ́ зове́мъ:

Ра́дуйся, Пресвяты́я и Живонача́льныя Тро́ицы вѣ́рный служи́телю; ра́дуйся, Пресвяты́я Влады́чицы Богоро́дицы всеусе́рдный почита́телю.

Ра́дуйся, а́нгельскихъ ли́ковъ собесѣ́дниче; ра́дуйся, Предте́чи Госпо́дня пустыннолюби́вый подража́телю.

Ра́дуйся, патріа́рховъ ветхозавѣ́тныхъ непоро́чнымъ житіе́мъ подо́бниче; ра́дуйся, проро́комъ Бо́жіимъ прозорли́востію равноче́стный.

Ра́дуйся, апо́столомъ Христо́вымъ пра́вою вѣ́рою единонра́вный; ра́дуйся, святи́телей богому́дрыхъ прехва́льный учениче́.

Ра́дуйся, му́чениковъ многострада́льныхъ въ терпѣ́ніи соревнова́телю; ра́дуйся, преподо́бныхъ свѣ́тлая красото́.

Ра́дуйся, пра́ведныхъ сонаслѣ́дниче; ра́дуйся, всѣ́хъ святы́хъ при́сный дру́же.

Ра́дуйся, Діони́сіе, вели́кій чудотво́рче.

Конда́къ 13.

О, великій угодниче Божій и преславный чудотворче, преподобне отче Діонисіе! Вонми гласу моленій и пѣній нашихъ, въ похвалу тебѣ приносимыхъ, и умоли Господа Бога избавити насъ отъ геены огненныя и сподобити блаженства святыхъ, да купно съ тобою воспоемъ Ему во вѣки: Аллилу́ія.

[Се́й конда́къ глаго́ли три́жды. И па́ки чте́тся 1-й и́косъ: Ангелъ земны́й и человѣ́къ небе́сный... и конда́къ 1-й: Избра́нный воево́до во́иновъ духо́вныхъ...]

Моли́твы преподо́бному Діони́сію, игу́мену Глуши́цкому, Во́логодскому чудотво́рцу:

Моли́тва пе́рвая.

О, свяще́нная главо́, преди́вный подви́жниче, пресла́вный чудотво́рче, преподо́бне и богоно́сне о́тче Діони́сіе! Къ тебѣ́ прибѣга́емъ съ вѣ́рою и мо́лимся съ любо́вію отъ души́: помоли́ся за ны́, грѣ́шныя, ко Го́споду Бо́гу, Созда́телю и Промысли́телю на́шему, и испроси́ на́мъ отъ Него́ вели́кія и бога́тыя ми́лости: здра́віе, благоде́нствіе, земли́ плодоно́сіе, возду́ха благорастворе́ніе, ми́рное и безмяте́жное во благоче́стіи житіе́, вѣ́ры Правосла́вныя умноже́ніе, ца́рствію Россíйскому утвержде́ніе, Благовѣ́рному Импера́тору на́шему [и́мярекъ] на враги́ побѣ́ду и одолѣ́ніе, оби́тели твое́й святѣ́й благоустрое́ніе, и всѣ́мъ подвиза́ющимся въ не́й и на поклоне́ніе приходя́щимъ ми́лость Бо́жію и спасе́ніе. И па́ки припа́дающе къ тебѣ́, ча́да твоя́, отца́ на́мъ су́ща, про́симъ: святы́ми моли́твами твои́ми приведи́ на́съ въ ти́хое приста́нище жи́зни вѣ́чныя, и сподо́би на́съ житіе́ сіе́ вре́менное благоче́стно и богоуго́дно сконча́ти, ми́рную христіа́нскую кончи́ну получи́ти и унаслѣ́довати Ца́рствіе небе́сное, человѣколю́біемъ, бла́гостію и ми́лостію Отца́ и Сы́на и Свята́го Ду́ха, въ Тро́ицѣ сла́вимаго Бо́га, и твои́мъ святы́мъ заступле́ніемъ, во вѣ́ки вѣко́въ. Ами́нь.

Моли́тва втора́я.

О, вели́кій Христо́въ уго́дниче, святы́й и многомо́щный на́шъ предста́телю и всея́ сѣ́верныя Во́логодскія страны́ небе́сный покрови́телю, преподо́бне и преблаже́нне о́тче Діони́сіе! Ты́ на небеси́ престо́лу Пресвяты́я Тро́ицы со а́нгелы предстои́ши, здѣ́ же на земли́, во всечестнѣ́мъ се́мъ хра́мѣ, святы́ми моща́ми твои́ми почива́еши, и да́нною ти́ свы́ше благода́тію многоразли́чная соверша́еши чудеса́, неду́жнымъ исцѣле́нія подава́я. Ты́ святы́я и преподо́бныя ученики́ стяжа́лъ еси́ на мѣ́стѣ се́мъ, Амфило́хія, Мака́рія, Тара́сія и Ѳеодо́сія, съ ни́миже ны́нѣ ра́дости нетлѣ́нныя во оби́телехъ небе́сныхъ наслажда́ешися и на многомо́щныя моли́твы за на́съ, грѣ́шныхъ, сія́ вку́пѣ съ тобо́ю подвиза́еши. При́зри у́бо ми́лостивно на предстоя́щія честнѣ́й ра́цѣ твое́й лю́ди, умиле́нно моля́щіяся и прося́щія отъ тебе́ по́мощи и заступле́нія. Простри́ моли́твенно ко Го́споду Бо́гу преподо́бніи твои́ ру́цѣ и, я́ко имѣ́яй ве́ліе къ Нему́ дерзнове́ніе, испроси́ на́мъ отъ Него́ оставле́ніе согрѣше́ній на́шихъ во́льныхъ и нево́льныхъ. Въ болѣ́знехъ стра́ждущимъ да́руй исцѣле́ніе, скорбя́щимъ утѣше́ніе низпосли́, бѣ́дствующимъ ско́рую по́мощь твою́ пода́ждь, всѣ́мъ же чту́щимъ тя́ поми́лованіе и спасе́ніе и во все́мъ благо́мъ благо́е поспѣше́ніе исхода́тайствуй. Да твои́мъ святы́мъ предста́тельствомъ получи́вше благода́ть и ми́лость отъ Го́спода, Ца́рствіе небе́сное унаслѣ́дуемъ, и вку́пѣ съ тобо́ю и со ученики́ твои́ми просла́вимъ вели́кое человѣколю́біе Тріеди́наго Бо́га, Отца́ и Сы́на и Свята́го Ду́ха, во вѣ́ки вѣко́въ. Ами́нь.

Моли́тва тре́тія.

О, до́брый на́шъ па́стырю и наста́вниче, святы́я оби́тели сея́ приснопомина́емый первонача́льниче и основа́телю, преподо́бне о́тче Діони́сіе! Па́мятующе любо́вь твою́ ко ученико́мъ твои́мъ и твое́ попече́ніе о и́хъ душе́внѣмъ спасе́ніи, припа́даемъ ти́ и мо́лимся: помози́ и на́мъ, грѣ́шнымъ, святы́ми моли́твами твои́ми, покая́ніемъ очи́ститися отъ грѣхо́въ на́шихъ и досто́йнымъ яви́тися поми́лованія и проще́нія отъ Го́спода и Созда́теля на́шего. Соблюди́ предста́тельствомъ твои́мъ святу́ю оби́тель твою́ и всю́ страну́ Правосла́вно-Россíйскую невреди́мы отъ вся́каго зла́, и вся́ лю́ди, жи́тельствующія во оби́тели твое́й и на поклоне́ніе къ тебѣ́ приходя́щія во о́ную, осѣни́ небе́снымъ твои́мъ благослове́ніемъ, и въ ско́рбехъ, бѣда́хъ и болѣ́знехъ утѣше́ніе, избавле́ніе и исцѣле́ніе моли́твенно и́мъ пода́ждь. Да благода́рно сла́вимъ и велича́емъ Го́спода, ди́внаго во святы́хъ Свои́хъ, чрезъ тебе́ на́мъ благодѣ́тельствующаго и ди́вно въ тебѣ́ просла́вльшагося, Отца́ и Сы́на и Свята́го Ду́ха, во вѣ́ки вѣко́въ. Ами́нь.

Тропа́рь, гла́съ 1:

Боже́ственною любо́вію отъ ю́ности распала́емь, Діони́сіе преподо́бне, вся́, я́же въ мíрѣ кра́сная, возненави́дѣвъ, Христа́ еди́наго возлюби́лъ еси́, и сего́ ра́ди во вну́треннюю пусты́ню всели́лся еси́, со звѣрьми́ живы́й, ве́сь Христу́. Отону́дуже и Всеви́дящее Око, твоя́ труды́ ви́дѣвъ, да́ромъ чуде́съ и по преставле́ніи обогати́лъ тя́ е́сть. Тѣ́мже вопіе́мъ ти́: моли́ непреста́нно о всѣ́хъ на́съ, честну́ю па́мять твою́ при́сно въ пѣ́снехъ почита́ющихъ.

Конда́къ, гла́съ 8:

Все́ твое́ у́мное жела́ніе къ Бо́гу впери́въ, Тому́ невозвра́тно отъ души́ послѣ́довалъ еси́, въ пусты́ню всели́вся, и, та́мо а́нгельски пожи́въ, мно́гимъ пу́ть бы́лъ еси́ ко спасе́нію; сего́ ра́ди и Христо́съ тебе́ просла́ви и да́ромъ чуде́съ обогати́. Тѣ́мже вси́ вопіе́мъ ти́: ра́дуйся, Діони́сіе преподо́бне, пусты́нный жи́телю.

Велича́ніе:

Ублажа́емъ тя́, преподо́бне о́тче Діони́сіе, и чте́мъ святу́ю па́мять твою́, наста́вниче мона́ховъ и собесѣ́дниче а́нгеловъ.

Источникъ: Ака́ѳистъ преподо́бному и богоно́сному отцу́ на́шему Діони́сію, игу́мену Глуши́цкому, Во́логодскому чудотво́рцу, его́же свята́я па́мять мѣ́сяца Іу́нія въ 1-й де́нь. — Пг.: Сѵнода́льная Тѵпогра́фія, 1914. — 55 с.

/ Къ оглавленію раздѣла /


Наверхъ / Къ титульной страницѣ

0