Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - среда, 22 ноября 2017 г. Сейчасъ на порталѣ посѣтителей - 16.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ДОМАШНЯЯ МОЛИТВА

Преп. Моисей Угринъ, Печерскій чудотворецъ († 1043 г.)

Преподобный Моисей Угрин, Печерский чудотворецПреп. Моисей Угринъ былъ родомъ изъ Венгріи. Вмѣстѣ со своими братьями святыми Георгіемъ и Ефремомъ пришелъ на Русь и поступилъ на службу къ Ростовскому князю св. страстотерпцу Борису. По смерти послѣдняго былъ плѣненъ польскимъ королемъ Болеславомъ и купленъ богатою полькою, которая плѣнилась его красотой. Долгое время госпожа склоняла его на преступную связь, но Моисей не поддался ея соблазнамъ; тайно принялъ монашескій подвигъ отъ аѳонскаго черноризца. Въ теченіе четырехъ лѣтъ панна пыталась совратить св. Моисея, доходя въ своемъ стремленіи до крайняго безстыдства. Когда же всѣ мѣры оказались безуспѣшными, она приказала оскопить святаго и сдѣлать его евнухомъ. Господь не оставилъ подвижника безъ отмщенія: въ 1027 году Болеславъ внезапно умеръ, въ народѣ произошелъ мятежъ, во время котораго были убиты многіе паны, въ томъ числѣ и нечестивая панна. Преп. Моисей былъ настолько измученъ и истерзанъ, что только черезъ нѣсколько лѣтъ, послѣ улучшенія здоровья, отправился въ Кіевъ къ преп. Антонію и до самой кончины подвизался въ его пещерѣ. Св. мощи и молитвенная помощь преп. Моисея исцѣляютъ отъ блудной страсти. Извѣстно, что преп. Іоаннъ Многострадальный, болѣе тридцати лѣтъ мучимый плотской похотью, по повелѣнію Божію, обратился съ молитвой къ св. Моисею и получилъ исцѣленіе. Божественный голосъ сказалъ св. Іоанну, что преп. Моисей въ своемъ подвигѣ за цѣломудріе сталъ выше Іосифа Прекраснаго. Память преп. Моисея Угрина — 26 іюля (8 августа).

АКАѲИСТЫ

Ака́ѳистъ преподо́бному Моисе́ю Угрину.

Конда́къ 1.

Ра́дуйся, преподо́бне о́тче Моисе́е, ди́вный чудотво́рче и чистоты́ побо́рниче.

Икосъ 1.

Ангеловъ Творе́цъ и Госпо́дь си́лъ яви́ тя́, досточу́дне, а́нгела во пло́ти и вѣ́рныхъ предста́теля. Прибѣга́юще у́бо къ заступле́нію твоему́, сицева́я ра́достная тебѣ́ прино́симъ:

Ра́дуйся, а́нгельскія чистоты́ ревни́телю. Ра́дуйся, предо́брый и́ноковъ наста́вниче. Ра́дуйся, цѣлому́дрія ди́вное свѣти́ло. Ра́дуйся, усе́рдный исполни́телю поста́ и воздержа́нія. Ра́дуйся, свѣ́тлый о́бразе кро́тости и смире́нія. Ра́дуйся, утѣше́ніе вѣ́рнымъ явля́яй. Ра́дуйся, оби́телей земны́хъ покрови́телю небе́сный. Ра́дуйся, яре́мъ благíй на ся́ взе́мшій.

Ра́дуйся, преподо́бне о́тче Моисе́е, ди́вный чудотво́рче и чистоты́ побо́рниче.

Конда́къ 2.

Ви́дя Госпо́дь чистоту́ се́рдца твоего́, избра́ тя́ зрѣ́ти сла́ву небе́сную. Егда́ съ двумя́ бра́тіями твои́ми во гра́дъ Кíевъ пресели́лся еси́ и святы́мъ страстоте́рпцемъ Бори́су и Глѣ́бу усе́рдно порабо́талъ еси́, тогда́ ты́, блаже́нне, въ моли́твахъ потща́лся еси́, ели́ко бѣ́ мо́щно ю́ношѣ святы́мъ подража́ти. Сего́ ра́ди съ весе́ліемъ возопія́лъ еси́ Бо́гу: Аллилу́ія.

Икосъ 2.

Ра́зумъ богодухнове́нъ имѣ́я, о преподо́бне о́тче Моисе́е, ди́внымъ смотре́ніемъ Бо́жіимъ, егда́ на рѣцѣ́ Альтѣ бра́та твоего́ Гео́ргія во́и Святопо́лка погуби́ша вку́пѣ со святы́ми страстоте́рпцами Бори́сомъ и Глѣ́бомъ, ты́ же еди́нъ изба́вився убіе́нія, прише́лъ во гра́дъ Кíевъ къ Предисла́вѣ, сестрѣ́ Яросла́влей, и бы́лъ та́мо моля́ся ко Го́споду прилѣ́жно, тѣ́мже похваля́юще Бо́га, спа́сшаго тя́, глаго́лемъ ти́ си́це:

Ра́дуйся, нача́ло прему́дрости, стра́хъ Бо́жій, пра́виломъ жи́зни себѣ́ предъизбра́вый. Ра́дуйся, я́ко а́нгела-храни́теля николи́же опеча́лилъ еси́. Ра́дуйся, лучу́ Боже́ственнаго свѣ́та. Ра́дуйся, благоуха́нный кри́не дѣ́вства и нетлѣ́нія. Ра́дуйся, я́ко благоче́стіемъ твои́мъ угоди́лъ еси́ Христу́ Бо́гу. Ра́дуйся, къ Богоро́дицѣ моли́твенниче на́шъ неусы́пный. Ра́дуйся, не́мощей на́шихъ изря́дный цѣле́бниче. Ра́дуйся, избра́нный сосу́де Ду́ха Свята́го.

Ра́дуйся, преподо́бне о́тче Моисе́е, ди́вный чудотво́рче и чистоты́ побо́рниче.

Конда́къ 3.

Си́лою Вы́шняго, даро́ванною тебѣ́, и долготерпѣ́ніемъ твои́мъ бы́лъ еси́ вельми́ преукра́шенъ, егда́ же ведо́ша тя́ по ру́ку и но́гу желѣ́зы тя́жкими око́вана и тве́рдо стрежа́ху, любо́вію къ Бо́гу вы́ну пламенѣ́я, вопія́лъ еси́: Аллилу́ія.

Икосъ 3.

Имѣ́я благопрія́тную по благоче́стіи ре́вность, бы́лъ еси́ искуша́емь отъ нѣ́кія жены́ млады́я, иму́щія бога́тство мно́гое, ея́ же му́жъ съ Болесла́вомъ иды́й не возврати́ся; та́ у́бо пріе́мши во у́мъ ви́дѣнія добро́ту, уязви́ся вожделѣ́ніемъ плотски́мъ къ преподо́бному, о́нъ же вся́ терпя́ моля́шеся. Сему́ у́бо благоговѣ́йно удивля́ющеся, съ ра́достію вопіе́мъ тебѣ́:

Ра́дуйся, отъ мла́да во́зраста вда́вый себе́ на служе́ніе Го́споду. Ра́дуйся, Того́ еди́наго па́че всего́ возлюби́вый. Ра́дуйся, пло́ть ду́ху покори́вый. Ра́дуйся, вся́ по Бо́зѣ терпѣ́ти изво́ливый. Ра́дуйся, ко́зни вдовы́ бо́дро отрази́вый. Ра́дуйся, тѣ́снымъ путе́мъ ева́нгельскимъ ше́ствовавый. Ра́дуйся, Кíево-Пече́рскія Ла́вры свяще́нное украше́ніе. Ра́дуйся, я́ко тобо́ю Госпо́дь прославля́ется.

Ра́дуйся, преподо́бне о́тче Моисе́е, ди́вный чудотво́рче и чистоты́ побо́рниче.

Конда́къ 4.

Бу́рею одержи́ма помышле́ній, возшумѣ́ нечести́вая вдова́ на хра́мъ души́ твоея́, преподо́бне, увѣ́дѣвъ же тя́ вѣ́рнаго бы́ти раба́ Христо́ва, зѣло́ смяте́ся. Тѣ́мже и мы́, зря́ жите́йское мо́ре воздвиза́емое бу́рею страсте́й и напа́стей, притека́емъ къ ти́хому приста́нищу моли́твъ твои́хъ, вопія́ Христу́ Бо́гу: Аллилу́ія.

Икосъ 4.

Слы́шавше и ви́дѣвше свято́е житіе́ твое́, [вси́] удивля́хуся си́лѣ благода́ти, изъ у́стъ твои́хъ исходя́щей, и прославля́ху Бо́га. Сего́ ра́ди и мы́ ра́достно ублажа́емъ тя́:

Ра́дуйся, ди́вный избра́нниче Бо́жій. Ра́дуйся, су́етную сла́ву мíра сего́ во уме́ты вмѣни́вый. Ра́дуйся, за сладча́йшаго Іису́са ду́шу твою́ положи́вый. Ра́дуйся, у престо́ла Бо́жія предстоя́й съ го́рними си́лами. Ра́дуйся, на высоту́ безстра́стія возше́дый. Ра́дуйся, преподо́бне о́тче, въ терпѣ́ніи неодолѣ́нный. Ра́дуйся, Свѣ́та невече́рняго прича́стниче. Ра́дуйся, ве́лію благода́ть отъ Го́спода стяжа́вый.

Ра́дуйся, преподо́бне о́тче Моисе́е, ди́вный чудотво́рче и чистоты́ побо́рниче.

Конда́къ 5.

Боготе́чною звѣздо́ю яви́ тя́ мíру житіе́ твое́, преподо́бне о́тче Моисе́е, я́ко всего́ па́че возлюби́лъ еси́ чистоту́ душе́вную и тѣле́сную, и ра́ди му́къ вре́менныхъ упова́я изба́вленъ бы́ти вѣ́чныхъ му́къ, воспѣва́лъ еси́ благода́рнѣ Бо́гу: Аллилу́ія.

Икосъ 5.

Ви́дя вра́гъ ро́да человѣ́ческаго чи́стое и свято́е житіе́ твое́, па́че распаля́етъ вдову́, я́же облече́ тя́ во ри́зы многоцѣ́нныя и сла́дкими бра́шны пита́ше, безсту́дно влача́ше на дѣ́ло неподо́бное, ты́ же, о́тче святы́й, прилѣжа́ше па́че посту́ и моли́твѣ. Сего́ ра́ди воспѣва́емъ ти́ си́це:

Ра́дуйся, до́брый во́ине Христо́въ. Ра́дуйся, святы́я Це́ркве похвало́ и ра́дованіе. Ра́дуйся, дара́ми благода́тными преиспо́лненный. Ра́дуйся, не сло́вомъ то́чію, но мно́жае па́че дѣ́ломъ на́съ поуча́яй. Ра́дуйся, разли́чными напа́стьми и искуше́ньми отягче́нныхъ ско́ро посо́бствующій. Ра́дуйся, избра́нниче Христо́въ, чудесы́ свидѣ́тельствованный. Ра́дуйся, въ по́двигахъ земно́е тече́ніе соверши́вый. Ра́дуйся, сподо́бивыйся зрѣ́ти сла́ву Бо́жію.

Ра́дуйся, преподо́бне о́тче Моисе́е, ди́вный чудотво́рче и чистоты́ побо́рниче.

Конда́къ 6.

Проповѣ́дуется во все́мъ мíрѣ до́блесть по́двига твоего́, блаже́нне, и́бо ни во что́же вмѣня́лъ еси́ житіе́ мíра сего́. Гла́домъ умы́сли зла́я жена́ умори́ти тя́, вве́рженнаго въ темни́цу. Дру́зи же увѣщава́ху тя́, глаго́люще: «кто́ не посмѣе́тся твоему́ безу́мію? у́не ти́ е́сть покори́тися женѣ́ се́й». Ты́ же, блаже́нне, рече́: «вы́шняго ра́ди Ца́рства вся́ сія́ преоби́дѣхъ, поя́ Бо́гу: Аллилу́ія».

Икосъ 6.

Возсія́лъ еси́ въ бре́нной пло́ти свѣ́томъ небе́снымъ, глаго́ля слова́ ева́нгельскія: «не ожени́выйся пече́тся о Госпо́днихъ, ка́ко угоди́ти Го́сподеви». Тѣ́мже вопіе́мъ ти́:

Ра́дуйся, о́тче, свѣ́томъ добродѣ́телей твои́хъ мíръ озари́вый. Ра́дуйся, о́гнь любве́ Христо́вы въ себѣ́ носи́вый. Ра́дуйся, въ бѣда́хъ ско́рый помо́щниче. Ра́дуйся, а́нгельское житіе́ явля́яй. Ра́дуйся, не приложи́вый се́рдца къ земно́му наслажде́нію. Ра́дуйся, моли́твенниче о чту́щихъ святу́ю па́мять твою́. Ра́дуйся, поко́я вѣ́чного дости́гнувый. Ра́дуйся, неизрече́нныхъ бла́гъ наслѣ́дниче.

Ра́дуйся, преподо́бне о́тче Моисе́е, ди́вный чудотво́рче и чистоты́ побо́рниче.

Конда́къ 7.

Хотя́й непреста́нно житіе́мъ и вѣ́рою Го́споду благоугожда́ти, бы́лъ еси́ отъ чернори́зца святы́я Аѳо́нскія горы́ облече́нъ во святы́й, а́нгельскій, и́ноческій о́бразъ. Тѣ́мже, сія́ніемъ по́двиговъ твои́хъ просвѣще́нни, усе́рдно велича́емъ тя́ и просла́вльшему тя́ Христу́ Бо́гу вопіе́мъ: Аллилу́ія.

Икосъ 7.

Но́вое показа́ зло́ о́ная лука́вая жена́, егда́ въ безу́міи свое́мъ оскопи́ти тя́ повелѣ́ша, ты́ же я́ко ме́ртвъ лежа́лъ еси́ отъ тече́нія кро́ве, едва́ ма́ло въ себѣ́ дыха́нія имѣ́я. Благоговѣ́йнѣ у́бо воспомина́я долготерпѣ́ніе твое́, блажи́мъ тя́ похвала́ми си́ми:

Ра́дуйся, я́ко о́гнь любве́ къ Бо́гу въ се́рдцѣ твое́мъ непреста́нно сохрани́вый. Ра́дуйся, бо́дрости и трезве́нія предо́брый учи́телю. Ра́дуйся, вѣ́рныхъ ко спасе́нію наставля́ющій. Ра́дуйся, твердѣ́е адама́нта въ терпѣ́ніи яви́выйся, и́бо кро́вію твое́ю, я́ко багряни́цею Це́рковь украси́ся. Ра́дуйся, къ преподо́бному Анто́нію рабо́тати Го́сподеви прише́дый. Ра́дуйся, чудесы́ твои́ми оби́тель Пече́рскую просла́вивый. Ра́дуйся, покори́вый во́лю свою́ во́лѣ Отца́ Небе́снаго.

Ра́дуйся, преподо́бне о́тче Моисе́е, ди́вный чудотво́рче и чистоты́ побо́рниче.

Конда́къ 8.

Стра́нное чу́до явля́ется притека́ющимъ къ тебѣ́, блаже́нне Моисе́е, и́бо дарова́ тебѣ́ Госпо́дь побѣжда́ти стра́сти. Та́же подража́я пе́рвому Моисе́ю, творя́щему же́зломъ чудеса́, же́зломъ стра́сть бра́тнюю исцѣли́лъ еси́. Мы́ же, благодаря́ о се́мъ Бо́га, дарова́вшаго тебѣ́ такову́ю крѣ́пость, съ любо́вію взыва́емъ: Аллилу́ія.

Икосъ 8.

Ве́сь благода́тныхъ дарова́ній испо́лненный, десятолѣ́тнымъ безмо́лвіемъ пеще́рнымъ равноа́нгельскимъ просія́лъ еси́ свѣ́томъ небе́снымъ и сподо́бился еси́ богови́децъ бы́ти, обрѣ́теся бо досто́инъ блаже́нства чи́стыхъ се́рдцемъ, преподо́бне о́тче Моисе́е. Сего́ ра́ди по до́лгу зове́мъ ти́:

Ра́дуйся, я́ко тобо́ю Госпо́дь отъ страсте́й исцѣле́ніе да́руетъ. Ра́дуйся, блаже́нне, за́повѣдь чи́стымъ се́рдцемъ бы́ти вѣ́рно испо́лнивый. Ра́дуйся, я́ко свѣ́тъ Боже́ственный зрѣ́ти сподо́бился еси́. Ра́дуйся, о душа́хъ на́шихъ непреста́нный моли́твенниче. Ра́дуйся, дре́внихъ, святы́хъ, богоно́сныхъ оте́цъ нра́вы себѣ́ усво́ивый. Ра́дуйся, высо́кая преподо́бныхъ похвало́. Ра́дуйся, во смире́ніи зѣло́ преуспѣ́вый. Ра́дуйся, я́ко успе́ніе твое́ прославля́етъ свята́я Це́рковь.

Ра́дуйся, преподо́бне о́тче Моисе́е, ди́вный чудотво́рче и чистоты́ побо́рниче.

Конда́къ 9.

Все́ естество́ а́нгельское удиви́ся высотѣ́ чистоты́ твоея́, Це́рковь же па́ки прославля́етъ тя́, я́ко вели́кій таи́нникъ Бо́жія благода́ти бы́лъ еси́ и зрѣ́ти лице́мъ къ Лицу́ Го́спода удосто́ился еси́, да и мы́ съ тобо́ю вы́ну вопіе́мъ: Аллилу́ія.

Икосъ 9.

Витíи многовѣща́нніи не возмо́гутъ изрещи́ чистоту́ твою́, блаже́нне, мы́ же любо́вію побѣжда́еми дерза́емъ воспѣ́ти тебѣ́ похвалы́ таковы́я:

Ра́дуйся, немощны́хъ укрѣпле́ніе. Ра́дуйся, ско́рбныхъ и печа́льныхъ утѣше́ніе. Ра́дуйся, до́брыхъ насади́телю. Ра́дуйся, за дѣ́вственную чистоту́ отъ Го́спода вѣнча́нный. Ра́дуйся, Бо́жія сла́вы те́плый рачи́телю. Ра́дуйся, тала́нтъ вруче́нный ти́ умно́живый. Ра́дуйся, Христа́ Бо́га всѣ́мъ се́рдцемъ возлюби́вый. Ра́дуйся, свѣти́льниче, просвѣща́ющій сердца́ па́мять твою́ чту́щихъ.

Ра́дуйся, преподо́бне о́тче Моисе́е, ди́вный чудотво́рче и чистоты́ побо́рниче.

Конда́къ 10.

Спасти́ хотя́ твою́ ду́шу, неради́лъ еси́ о твое́й пло́ти и въ Ла́врѣ Пече́рстѣй свята́го Анто́нія коне́цъ стра́нствія земна́го соверши́лъ еси́, почи́въ о Го́сподѣ кончи́ною пра́ведною и свято́ю, я́ко побѣди́тель не съ человѣ́ки, но со а́нгелы воспѣва́лъ еси́ Бо́гу: Аллилу́ія.

Икосъ 10.

Стѣно́ю терпѣ́нія огради́вся, Царя́ Небе́снаго, Христа́, вѣ́рный служи́тель бы́лъ еси́, житіе́ твое́ тѣ́сною стезе́ю проше́лъ еси́. Мы́ же, чту́ще любо́вію па́мять твоего́ преставле́нія и моще́й твои́хъ честны́хъ обрѣ́тенія, ублажа́емъ тя́, вопію́ще такова́я:

Ра́дуйся, пресла́вный на́шъ засту́пниче. Ра́дуйся, предваря́ющій проше́нія призыва́ющихъ тя́ во искуше́ніихъ. Ра́дуйся, мно́гими скорбьми́ въ ра́дость Го́спода вше́дый. Ра́дуйся, сле́зъ излія́ньми ду́шу твою́ омы́вый. Pа́дуйся, я́ко сло́во апо́стольское, — «любы́ долготерпи́тъ», — испо́лнивый. Ра́дуйся, блаже́нство ра́йское со святы́ми унаслѣ́довавый. Ра́дуйся, богоуго́днымъ житіе́мъ вѣ́ру утверди́вый. Ра́дуйся, бли́жнимъ и да́льнимъ по́мощь свою́ подава́яй. Ра́дуйся, мíра го́рняго блаже́нный обита́телю.

Ра́дуйся, преподобне, отче Моисее, дивный чудотворче и чистоты поборниче.

Конда́къ 11.

Пѣ́ніемъ ака́ѳиста честву́емъ тя́ и велича́емъ, преподо́бне о́тче Моисе́е, ре́вностно соверша́юще святу́ю па́мять твою́. Ты́ же, ми́лостивно пріи́мше ма́лое моле́ніе на́ше, бу́ди на́мъ побо́рникомъ, предста́телемъ и моли́твенникомъ ко Го́споду. Мы́ же, помина́я житіе́ твое́ богоуго́дное и по́двиги твоя́ многотру́дныя, воспѣва́емъ просла́вльшему тя́ Творцу́: Аллилу́ія.

Икосъ 11.

Свѣтопода́тельному свѣти́льнику подо́бны честны́я и цѣльбоно́сныя мо́щи твоя́, досточу́дне о́тче Моисе́е, свѣ́тъ бо невече́рній возсіява́етъ отъ ни́хъ чрезъ чудесы́ оби́льныя, тѣ́мже отъ любве́ серде́чныя восклица́емъ тебѣ́ ра́достно:

Ра́дуйся, сме́ртію вре́менною преше́дый въ живо́тъ вѣ́чный. Pа́дуйся, Іоа́нна Многострада́льного чуде́сно уврачева́вый. Ра́дуйся, кри́не возраще́нный на земли́ для ра́йскихъ селе́ній. Pа́дуйся, дѣ́лателю до́брый виногра́да небе́снаго. Ра́дуйся, ма́слино многопло́дная са́да Іису́сова. Pа́дуйся, преподо́бныхъ Пече́рскихъ отце́въ велича́ніе. Ра́дуйся, ти́хое приста́нище обурева́емыхъ страстьми́. Pа́дуйся, во все́мъ мíрѣ Бо́гомъ просла́вленный.

Ра́дуйся, преподо́бне о́тче Моисе́е, ди́вный чудотво́рче и чистоты́ побо́рниче.

Конда́къ 12.

Благода́ть дана́ ти́ отъ Бо́га соблюда́ти отъ нечи́стыя стра́сти вся́каго человѣ́ка, съ вѣ́рою и любо́вію къ заступле́нію твоему́ прибѣга́ющаго. Мы́ же Го́споду, дарова́вшему на́мъ тебе́, ско́раго, ми́лостиваго врачева́теля, благода́рственнѣ воспѣва́емъ: Аллилу́ія.

Икосъ 12.

Пою́ще равноа́нгельское житіе́ твое́, ублажа́емъ тя́, о́тче Моисе́е, я́ко моли́твенника о на́съ предъ Го́сподемъ, засту́пника и наста́вника ко спасе́нію, и со умиле́ніемъ возглаша́емъ ти́ такова́я:

Ра́дуйся, о мíрѣ моли́твенниче преизря́дне. Pа́дуйся, не то́чію и́нокомъ, но и міря́номъ пу́ть къ не́бу озаря́ющій. Ра́дуйся, всѣ́хъ сердца́ любо́вію твое́ю къ себѣ́ привлека́ющій. Pа́дуйся, мно́жествомъ чуде́съ отъ Бо́га просла́вленный. Ра́дуйся, стра́нниче, оте́чествія небе́снаго дости́гнувый. Pа́дуйся, терпѣ́ніемъ скорбе́й дре́внему Іову подража́вый. Ра́дуйся, во искуше́ніихъ при́сный помо́щниче. Pа́дуйся, мѵ́ро цѣле́бное Бо́жія благода́ти. Ра́дуйся, о тебѣ́ бо ра́дуются а́нгели и Бо́га сла́вятъ человѣ́цы.

Ра́дуйся, преподо́бне о́тче Моисе́е, ди́вный чудотво́рче и чистоты́ побо́рниче.

Конда́къ 13.

О, преди́вный уго́дниче и святы́й чудотво́рче, преподо́бне о́тче Моисе́е, ма́лое сіе́ пѣсносло́віе, съ любо́вію въ похвалу́ тебѣ́ приноси́мое, отъ на́съ ми́лостивно пріе́мши, умоли́ всѣ́хъ Творца́ и Го́спода дарова́ти на́мъ душе́вное спасе́ніе и тѣле́сное здра́віе, вѣ́рно воспѣва́ющимъ Бо́гу: Аллилу́ія.

[Се́й конда́къ глаго́лется три́жды. Та́же и́косъ 1-й: Ангеловъ Творе́цъ и Госпо́дь си́лъ... И конда́къ 1-й: Возбра́нный чудотво́рче...]

Моли́тва преподо́бному Моисе́ю Угрину.

О, пречу́дный и богоно́сный о́тче Моисе́е, изря́дный уго́дниче Христо́въ и вели́кій чудотво́рче! Къ тебѣ́ смире́нно припа́даемъ и мо́лимся: да́ждь на́мъ бы́ти прича́стникомъ любве́ твоея́ къ Бо́гу и бли́жнему, помози́ на́мъ твори́ти во́лю Госпо́дню въ простотѣ́ се́рдца и смире́ніи, за́повѣди Госпо́дни соверша́ти непогрѣши́тельно; при́зри благоутро́бно на вся́кую ду́шу вѣ́рныхъ твои́хъ чти́телей, ми́лости и по́мощи твоея́ и́щущихъ. Ей, всеблагíй уго́дниче Бо́жій, услы́ши на́съ, моля́щихся тебѣ́, и не пре́зри на́съ, тре́бующихъ твоего́ заступле́нія и досто́йную пѣ́снь тебѣ́ принося́щихъ! Тебе́ ублажа́емъ, о́тче Моисе́е, тя́ воспѣва́емъ, чистоты́ свѣти́льниче, прославля́юще ми́лостиваго Бо́га, во Святѣ́й Безнача́льнѣй Тро́ицѣ сла́вимаго, Отца́ и Сы́на и Свята́го Ду́ха, ны́нѣ и при́сно и во вѣ́ки вѣко́въ. Ами́нь.

Тропа́рь, гла́съ 3:

Друга́го тя́ Іо́сифа, вели́кій чистоты́ и цѣлому́дрія рачи́телю, всече́стне и равноа́нгельне Моисе́е, свяще́нными пѣ́сньми восхваля́юще, грѣ́шніи, мо́лимтися прилѣ́жно: моли́ Христа́ Бо́га, я́ко да исцѣли́тъ вся́ на́ша стра́сти и пода́стъ ве́лію ми́лость.

Инъ тропа́рь, гла́съ то́йже:

Труды́ и по́двиги со страстьми́ по чистотѣ́ твое́й ви́дя, свя́те, кто́ не удиви́тся? Гла́дъ бо, темни́цу и ра́ны пріе́мля, не порабо́тился еси́ сласте́мъ ля́ховицы, но, я́ко ца́рь, страстьми́ облада́яй, ны́нѣ и тогда́ возпросла́вился еси́ отъ Всеви́дящаго человѣ́ческая сердца́, отъ Него́же во искуше́ніихъ всѣ́мъ посо́бствовати благода́ть пріе́мь, посо́бствуй и на́мъ, твою́ па́мять чту́щимъ, Моисе́е преподо́бне.

Конда́къ, гла́съ 3:

Въ вы́шнихъ еди́наго Бо́га ища́, земна́я вся́ презрѣ́лъ еси́, о тѣлеси́ свое́мъ неради́въ, на му́ки му́жески себе́ вда́лъ еси́, гла́дъ, жа́жду, у́зы, въ темни́цѣ затворя́емь, до́блественно претерпѣ́лъ еси́, біе́нія, кро́ве излія́ніе и удо́въ отрѣ́заніе, чи́стаго ра́ди дѣ́вства твоего́, му́жески поне́слъ еси́. И ны́нѣ съ дѣ́вственными ли́ки предстоя́ Пресвятѣ́й Тро́ицѣ, отъ всѣ́хъ искуше́ній моли́ изба́витися вопію́щимъ ти́: ра́дуйся, Моисе́е, о́тче блаже́ннѣйшій.

Велича́ніе:

Ублажа́емъ тя́, преподо́бне о́тче Моисе́е, и чте́мъ святу́ю па́мять твою́, наста́вниче мона́ховъ и собесѣ́дниче а́нгеловъ.

Источникъ: Рѣдкіе акаѳисты Кіево-Печерской Лавры. — Кіевъ: Информаціонно-издательскій центръ Украинской Православной Церкви, 1996. — С. 227-237.

/ Къ оглавленію раздѣла /


Наверхъ / Къ титульной страницѣ

0