Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - пятница, 22 сентября 2017 г. Сейчасъ на порталѣ посѣтителей - 12.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ДОМАШНЯЯ МОЛИТВА

Препмучц. Параскева Римская († ок.138-161 г.)

Святая преподобномученица Параскева РимскаяСв. премучц. Параскева пострадала за вѣру въ Христа въ царствованіе римскаго имп. Антонина Пія (138-161). Она родилась въ Римѣ и была единственной дочерью благочестивыхъ христіанъ, дарованная имъ по ихъ усердной молитвѣ. Послѣ смерти родителей она раздала все свое имѣніе нищимъ и, принявъ монашество, проповѣдывала язычникамъ Христа. Была схвачена. Послѣ принужденій къ отреченію отъ Христа, св. исповѣдница, за свою твердость въ вѣрѣ, была брошена въ котелъ съ кипящими масломъ и смолою. Чудесно оставшись невредимой и бросивъ кипящей жидкости въ глаза любопытствовавшему мучителю, она ослѣпила его; но потомъ, по его просьбѣ, исцѣлила его и своимъ чудомъ многихъ обратила ко Христу. Отпущенная на свободу, св. Параскева вновь отправилась по разнымъ городамъ съ проповѣдью христіанскаго ученія. Въ одномъ городѣ, гдѣ правителемъ былъ нѣкто Асклипій, святую схватили и вновь предали суду. Убѣдившись, что она не отречется отъ Христа, мучители бросили ее въ пещеру, гдѣ жилъ змѣй и куда бросали приговоренныхъ къ смерти преступниковъ. Св. Параскева крестнымъ знаменіемъ поразила змѣя и осталась невредимой. Увидѣвъ такое чудо, Асклипій и его приближенные увѣровали во Христа. Вновь св. Параскева отправилась проповѣдовать ученіе Христа Спасителя. Въ другомъ городѣ мѣстный правитель по имени Тарасій подвергъ св. многочисленнымъ жестокимъ пыткамъ, а затѣмъ приказалъ отсѣчь ей голову мечомъ. Память св. премучц. Параскевы — 26 іюля (8 августа).

АКАѲИСТЫ

Ака́ѳистъ святѣ́й преподобному́ченицѣ Параске́вѣ Ри́мстѣй.

Конда́къ 1.

Ра́дуйся, преподобному́ченице Христо́ва, Параске́во всесла́вная.

Икосъ 1.

Ангелъ Госпо́день по́сланъ бы́сть возвѣсти́ти непло́днымъ роди́телемъ твои́мъ, преподобному́ченице, я́ко Бо́гъ моли́тву и́хъ услы́ша: роди́ти бо и́мутъ дще́рь благослове́нную, Ца́рствія небе́снаго наслѣ́дницу. Таково́му, преди́вному предвозвѣще́нію о рожде́ніи твое́мъ дивя́щеся, я́ко избра́нницу Бо́жію ублажа́емъ тя́ похвала́ми си́ми:

Ра́дуйся, а́нгельскимъ прорече́ніемъ провозвѣще́нная; ра́дуйся, непло́діе роди́телей свои́хъ рожде́ніемъ твои́мъ разрѣши́вшая.

Ра́дуйся, мно́гими моли́твами у Бо́га испро́шенная; ра́дуйся, всѣ́хъ въ моли́твѣ не уныва́ти научи́вшая.

Ра́дуйся, блага́го ко́рене свято́е прозябе́ніе; ра́дуйся, христолюби́выхъ отца́ и ма́тере дще́рь боголюбе́зная.

Ра́дуйся, отъ чре́ва ма́терня на служе́ніе Христу́ предъизбра́нная; ра́дуйся, Жениху́ Нетлѣ́нному дѣ́вство твое́ обручи́вшая.

Ра́дуйся, Боже́ственнаго къ лю́демъ милосе́рдія явле́ніе; ра́дуйся, моли́твы кади́ло непреста́нное.

Ра́дуйся, лѣни́выхъ обличе́ніе; ра́дуйся, сумня́щихся благо́е утвержде́ніе.

Ра́дуйся, преподобному́ченице Христо́ва, Параске́во всесла́вная.

Конда́къ 2.

Ви́дѣвше мíра суету́ и непостоя́нство, Параске́во богому́драя, отъ мíра удали́тися вожделѣ́ла еси́, да возмо́жеши непреста́нно благоугожда́ти Христу́ Бо́гу, и невозбра́нно и́го Его́ благо́е понести́, въ моли́твахъ же при́сно прилежа́ти, зову́ща Ему́: Аллилу́ія.

Икосъ 2.

Ра́зумъ небе́сный стяжа́вши, преподобному́ченице Параске́во, по кончи́нѣ роди́телей твои́хъ, вся́ имѣ́нія, ни́щимъ раздала́ е́сть, въ пу́ть исповѣ́данія Христо́ва усе́рдно поте́кши, того́ ра́ди восхваля́емъ тя́ си́це:

Ра́дуйся, нището́ю духо́вною и вѣ́рою обогати́вшаяся; ра́дуйся, бога́тство мíра возненави́дѣвшая.

Ра́дуйся, красото́ю душе́вною просія́вшая; ра́дуйся, о тѣле́сной добро́тѣ небре́гшая.

Ра́дуйся, любо́вію ко Христу́ се́рдце твое́ просвѣти́вшая; ра́дуйся, благода́тію Свята́го Ду́ха ду́шу твою́ испо́лнившая.

Ра́дуйся, исповѣ́данія и́мене Его́ не убоя́вшаяся; ра́дуйся, тѣ́ло твое́ на муче́нія лю́тыя преда́вшая.

Ра́дуйся, исповѣ́днице Христо́ва непоколеби́мая; ра́дуйся, страстоте́рпице Іису́сова многострада́льная.

Ра́дуйся, благовѣ́стнице Ева́нгелія богому́драя; ра́дуйся, добродѣ́телей мно́гихъ вмѣсти́лище.

Ра́дуйся, преподобному́ченице Христо́ва, Параске́во всесла́вная.

Конда́къ 3.

Си́лою Бо́жіею свы́ше укрѣпля́ема, свята́я преподобному́ченице Параске́во, не́мощь естества́ же́нскаго отложи́ла еси́, и, въ броню́ исповѣ́данія Христо́ва обле́кшися, со идолослужи́тели крѣ́пко ра́товала еси́, и́же а́ще и лю́тыми муче́ньми отъ любве́ Христа́ Бо́га тя́ отврати́ти тща́хуся, но терпѣ́ніемъ твои́мъ побѣжде́ни яви́шася, а́нгеломъ о тебѣ́ воспѣва́ющимъ: Аллилу́ія.

Икосъ 3.

Имѣ́ла еси́ ду́шу, му́жествомъ о Христѣ́ преиспо́лненную, Параске́во богому́драя, мучи́телей нечести́выхъ крѣ́пко посрами́ла еси́, тѣ́мже мучи́тельству и́хъ посмѣва́ющися, а́ки въ чужде́мъ тѣлеси́ бы́вши, Христа́ ра́ди вся́ претерпѣ́ла еси́, на́съ же научи́ла еси́ воспѣва́ти ти́ сицева́я:

Ра́дуйся, громогла́сная Бо́жія исповѣ́днице; ра́дуйся, сладча́йшаго Іису́са невѣ́сто прекра́сная.

Ра́дуйся, дѣ́вство непоро́чное Ему́ въ да́ръ прине́сшая; ра́дуйся, кро́вь твою́ за Него́ пролія́вшая.

Ра́дуйся, предъ судіи́ и мучи́тели и́мя Его́ не боя́зненно исповѣ́давшая; ра́дуйся, свидѣ́телей муче́ній твои́хъ къ вѣ́рѣ приве́дшая.

Ра́дуйся, въ моли́твахъ на́шихъ те́плое прибѣ́жище; ра́дуйся, на́шего на Го́спода упова́нія утвержде́ніе.

Ра́дуйся, люби́телемъ вре́менныхъ наслажде́ній обличе́ніе; ра́дуйся, го́рнихъ и́щущихъ ободре́ніе.

Ра́дуйся, въ боре́ніихъ су́щимъ помо́щнице; ра́дуйся, оби́димымъ благо́е утѣше́ніе.

Ра́дуйся, преподобному́ченице Христо́ва, Параске́во всесла́вная.

Конда́къ 4.

Бу́рею невѣ́рія одержи́мый ца́рь Антони́нъ удиви́ся, егда́ тя́ ви́дѣ въ котлѣ́ кипя́щемъ невреди́му. Егда́ же ру́цѣ свои́, отъ котла́ испо́лнивши, на лице́ мучи́теля пове́ргла еси́, то́й опале́нъ вопія́ше: «поми́луй мя́, рабо́ и́стиннаго Бо́га, и да́ждь ми́ свѣ́тъ оче́й мои́хъ, да увѣ́рую въ Бо́га, Его́ же ты́ проповѣ́дуеши, и пою́ Ему́ ку́пно съ тобо́ю: Аллилу́ія».

Икосъ 4.

Слы́шавше мно́гая и лю́тая страда́нія твоя́, Параске́во пресла́вная, и мы́, грѣ́шніи, терпѣ́нію твоему́ умиле́нно диви́мся, ка́ко и желѣ́зо разже́нное на главѣ́ твое́й носи́ла еси́, и біе́нія лю́тая мно́гажды претерпѣ́ла еси́. Тѣ́мже тя́ ублажа́юще зове́мъ:

Ра́дуйся, я́звы Го́спода Іису́са на тѣ́лѣ твое́мъ носи́вшая; ра́дуйся, Того́ еди́наго возлюби́вшая.

Ра́дуйся, о укрѣпля́ющемъ тя́ Го́сподѣ вся́ возмо́гшая; ра́дуйся, чудеса́ мно́гія во увѣре́ніе идолослужи́телей сотвори́вшая.

Ра́дуйся, терпѣ́ніемъ мучи́телей твои́хъ препобѣди́вшая; ра́дуйся, невѣ́рнаго царя́ покара́вшая.

Ра́дуйся, и исцѣле́ніе тому́ ми́лостиво пода́вшая; ра́дуйся, среди́ наро́да ри́мскаго, и́мя Христо́во вельми́ просла́вившая.

Ра́дуйся, всѣ́мъ язы́комъ о́бразъ долготерпѣ́нія яви́вшая; ра́дуйся, всѣ́мъ родо́мъ исполне́ніе вѣ́ры показа́вшая.

Ра́дуйся, восхваля́ющимъ по́двиги твоя́ благода́тное просвѣще́ніе да́рующая; ра́дуйся, о грѣсѣ́хъ и́хъ Го́спода умоля́ющая.

Ра́дуйся, преподобному́ченице Христо́ва, Параске́во всесла́вная.

Конда́къ 5.

Боготе́чной звѣздѣ́ уподо́билася еси́, свята́я преподобному́ченице Параске́во, гра́ды и страны́ мно́гія обходя́щи и и́мя Христо́во проповѣ́дающи, за Него́ же мно́гажды да́же до кро́ве пострада́ла еси́, тѣ́мже дне́сь Тому́жде Го́споду предстои́ши, непреста́нно воспѣва́ющи а́нгельскую пѣ́снь: Аллилу́ія.

Икосъ 5.

Ви́дѣвше лю́діе пресла́вное чу́до твое́, преподобному́ченице, ка́ко драко́на вели́каго и́мени Бо́жія призыва́ніемъ порази́ла еси́, во Христа́ а́біе увѣ́роваша, глаго́люще ти́:

Ра́дуйся, Го́спода и Христа́ твоего́ страда́ньми и чудесы́ просла́вившая; ра́дуйся, спасе́нія мно́гихъ ду́шъ человѣ́ческихъ вино́внице.

Ра́дуйся, добропобѣ́дная страстоте́рпице Христо́ва; ра́дуйся, многочуде́сная свидѣ́тельнице Іису́сова.

Ра́дуйся, насади́тельнице вѣ́ры и́стинныя; ра́дуйся, ми́лостивая цѣли́тельнице неду́говъ человѣ́ческихъ.

Ра́дуйся, и грѣ́шныя лю́ди любо́вію твое́ю не оста́вившая; ра́дуйся, о просвѣще́ніи ду́шъ на́шихъ возревнова́вшая.

Ра́дуйся, труды́ мно́гія Ева́нгелія ра́ди подъя́вшая; ра́дуйся, сего́ ра́ди ве́лія въ Ца́рствіи небе́снѣмъ пронарече́нная.

Ра́дуйся, ли́ка дѣ́вственницъ украше́ніе; ра́дуйся, полка́ му́ченическаго похвало́ пресла́вная.

Ра́дуйся, преподобному́ченице Христо́ва, Параске́во всесла́вная.

Конда́къ 6.

Проповѣ́дникомъ Христо́вымъ, богоно́снымъ апо́столомъ вѣ́рно подража́ла еси́, Параске́во многострада́льная, и въ проповѣ́даніи Ева́нгелія чрезъ все́ житіе́ твое́ подвиза́лася еси́, человѣ́ки во спасе́ніе уловля́ющи. Тѣ́мже чуде́съ дарова́ніемъ отъ Христа́ Бо́га обогати́лася еси́, о ни́хъ же и невѣ́рніи въ вѣ́ру пріидо́ша и воспѣ́ша Бо́гу: Аллилу́ія.

Икосъ 6.

Возсія́ла еси́, я́ко звѣзда́, на тве́рди Це́ркви Христо́вой, Параске́во добропобѣ́дная, и всѣ́мъ на́мъ о́бразомъ житія́ твоего́ свѣ́тиши я́сно, тѣ́мже вѣ́рою и любо́вію па́мять твою́ святу́ю почита́юще, вопіе́мъ ти́:

Ра́дуйся, подви́жнице Бо́жія, посто́мъ и моли́твою воспита́нная; ра́дуйся, голуби́це непоро́чная, кро́тости и незло́бія преиспо́лненная.

Ра́дуйся, за своя́ мучи́тели моли́твы Го́сподеви приноси́вшая; ра́дуйся, Христу́ Спаси́телю на́шему тѣ́мъ уподо́бившаяся.

Ра́дуйся, зло́бу враго́въ добро́мъ препобѣди́вшая; ра́дуйся, Стефа́на первому́ченика вѣнцу́ поревнова́вшая.

Ра́дуйся, ева́нгельскихъ за́повѣдей вѣ́рная исполни́тельнице; ра́дуйся, невѣ́рія гро́зная обличи́тельнице.

Ра́дуйся, ка́ющихся проще́нія отъ Бо́га ско́рая пода́тельнице; ра́дуйся, вѣ́рныхъ ко спасе́нію до́брая наста́внице.

Ра́дуйся, сердца́ на́ша умиле́нія исполня́ющая; ра́дуйся, по́мыслы на́ша къ Бо́гу вознося́щая.

Ра́дуйся, преподобному́ченице Христо́ва, Параске́во всесла́вная.

Конда́къ 7.

Хотя́щи ду́шу свою́ за Христа́ положи́ти, и сего́ ра́ди мно́гая муче́нія претерпѣ́вши, отъ нечести́ваго мучи́теля Тара́сія во главу́ усѣ́чена была́ еси́, но отъ Христа́ вѣне́цъ нетлѣ́нный на главу́ свою́ прія́ла еси́, а душе́ю твое́ю въ го́рнія оби́тели ра́йскія востекла́ еси́, идѣ́же со а́нгелы и всѣ́ми святы́ми сла́дцѣ пое́ши Тріеди́ному Бо́гу: Аллилу́ія.

Икосъ 7.

Но́вый живо́тъ вѣ́чный прія́ла еси́, богохва́льная, егда́ ме́чною кончи́ною отъ пло́ти разрѣши́вшися, на бра́къ небе́снаго Жениха́ возшла́ еси́. Его́ же моля́щи не преста́й за ны́, грѣ́шныя, любо́вію страда́нія твоя́ че́ствующія и глаго́лющія при́сно:

Ра́дуйся, му́ченическое тече́ніе твое́ ме́чною кончи́ною увѣнча́вшая; ра́дуйся, тѣ́мъ главу́ неви́димаго змíя сте́ршая.

Ра́дуйся, во гла́сѣ пѣ́нія а́нгельскаго на не́бо душе́ю твое́ю воспари́вшая; ра́дуйся, му́ченическій ли́къ на небесѣ́хъ возвесели́вшая.

Ра́дуйся, по́стническій по́лкъ возра́довавшая; ра́дуйся, дѣ́вственнаго со́нма веселя́щее украше́ніе.

Ра́дуйся, по́стническое житіе́, му́ченическую же кончи́ну въ себѣ́ сочета́вшая; ра́дуйся, и на́съ о добродѣ́тели ревнова́ти подвиза́ющая.

Ра́дуйся, свя́то и непоро́чно на землѣ́ пожи́вшая; ра́дуйся, и́дольскую ле́сть обличи́вшая.

Ра́дуйся, де́моны посрами́вшая; ра́дуйся, мучи́телю по́мыслъ покая́нія вложи́вшая.

Ра́дуйся, преподобному́ченице Христо́ва, Параске́во всесла́вная.

Конда́къ 8.

Стра́нно е́сть невѣ́рнымъ ви́дѣти, ка́ко отъ еди́наго моли́твеннаго призыва́нія и́мени твоего́ свята́го, Параске́во многострада́льная, неду́жнымъ исцѣле́нія подаю́тся и ду́хи нечи́стіи отъ человѣ́къ отбѣга́ютъ, на́мъ грѣ́шнымъ тебѣ́ въ по́мощь призыва́ющимъ и пою́щимъ Бо́гу: Аллилу́ія.

Икосъ 8.

Вся́ Це́рковь Христо́ва честна́я страда́нія твоя́, свята́я и всехва́льная преподобному́ченице, прославля́етъ, исцѣле́ній же благода́ть отъ тебе́ пріе́млетъ и ра́достно взыва́етъ ти́ глаго́люще:

Ра́дуйся, въ житіи́ и по сме́рти мно́гими чудесы́ просла́вленная; ра́дуйся, да́ры цѣле́бныя незави́стно подаю́щая.

Ра́дуйся, лю́бящимъ и чту́щимъ тя́ любо́вію сугу́бою воздаю́щая; ра́дуйся, во благи́хъ проше́нія на́ша ско́ро исполня́ющая.

Ра́дуйся, въ неду́зѣхъ стра́ждущія благода́тно посѣща́ющая; ра́дуйся, неисцѣ́льныя болѣ́зни ско́ро исцѣля́ющая.

Ра́дуйся, болѣ́зни терпѣ́ти хотя́щимъ по́мощь да́рствующая; ра́дуйся, душе́вныя стра́сти побора́ти помога́ющая.

Ра́дуйся, я́ко на по́двигъ долготерпѣ́нія твоего́ зря́ще, малоду́шія на́шего устыжда́емся; ра́дуйся, я́ко му́жество твое́ воспомина́юще, вои́нствовати на пло́ть подвиза́емся.

Ра́дуйся, въ животѣ́ твое́мъ мно́гія лю́ди просвѣти́вшая; ра́дуйся, по преставле́ніи твое́мъ мно́жайшія ро́ды во благоче́стіи утверди́вшая.

Ра́дуйся, преподобному́ченице Христо́ва, Параске́во всесла́вная.

Конда́къ 9.

Вси́ а́нгели небе́сніи и святы́хъ ли́цы ра́достно тя́, преподобному́ченице, срѣто́ша, егда́ во врата́ Ца́рствія небе́снаго возшла́ еси́, во е́же мзду́ твои́мъ по́двигомъ и страда́ніямъ отъ Го́спода прія́ти. Убо и на́мъ, недосто́йнымъ, наслѣ́діе вѣ́чное со святы́ми испроси́, моля́щи да сподо́битъ на́съ Госпо́дь ку́пно съ тобо́ю пѣ́ти Ему́ во Ца́рствіи небе́снѣмъ: Аллилу́ія.

Икосъ 9.

Витíйство человѣ́ческое не довлѣ́етъ, во е́же по достоя́нію тя́, Параске́во всеблаже́нная, просла́вити, оба́че любо́вію твое́ю побѣжда́еми, прино́симъ ти́ хвале́нія сицева́я:

Ра́дуйся, со Христо́мъ вѣ́чно ца́рствующая и о на́съ Его́ умоля́ющая; ра́дуйся, да́ры Его́ Боже́ственныя моли́твами твои́ми ще́дро на́мъ подаю́щая.

Ра́дуйся, ка́ющимся снизхожде́ніе; ра́дуйся, подвиза́ющимся благо́е наставле́ніе.

Ра́дуйся, отъ го́рнихъ высо́тъ къ земноро́днымъ ми́лоство приника́ющая; ра́дуйся, искуше́нія де́монская моли́твою твое́ю отража́ющая.

Ра́дуйся, Кре́стъ Христо́въ десни́цею твое́ю взе́мшая; ра́дуйся, вѣ́твь побѣ́дную въ шу́йцу свою́ прія́вшая.

Ра́дуйся, у́мъ на́шъ горѣ́ вознося́щая; ра́дуйся, и всѣ́мъ, во спасе́ніи тружда́ющимся, по́мощь неви́димо подаю́щая.

Ра́дуйся, а́нгеломъ прорече́нная; ра́дуйся, и собесѣ́днице а́нгеломъ яви́вшаяся.

Ра́дуйся, преподобному́ченице Христо́ва, Параске́во всесла́вная.

Конда́къ 10.

Спасти́ся моля́щимся ти́ пособля́ющи, свята́я преподобному́ченице, съ вѣ́рою приходя́щимъ въ хра́мъ тво́й святы́й, да́ры благода́тныя при́сно подае́ши, и вся́кое во благи́хъ проше́ніе на́ше ско́ро исполня́еши, я́ко дерзнове́ніе ве́ліе ко Христу́ Бо́гу стяжа́вши. Ему́ же ра́достно пое́ши побѣ́дную пѣ́снь: Аллилу́ія.

Икосъ 10.

Стѣно́ю моли́твъ твои́хъ, преподобному́ченице, отъ вся́каго искуше́нія діа́вольскаго на́съ огради́, да не пора́дуется вра́гъ паде́ніямъ на́шимъ, но тобо́ю крѣ́пко да посрами́тся въ на́съ, хвале́бно зову́щихъ ти́:

Ра́дуйся, по Бо́зѣ и Богоро́дицѣ крѣ́пкое на́ше упова́ніе; ра́дуйся, непосты́дное въ бѣда́хъ предста́тельство.

Ра́дуйся, въ со́ніихъ и видѣ́ніихъ вѣ́рныя посѣща́ющая; ра́дуйся, и невѣ́рнымъ да́ры цѣле́бныя ми́лостиво подава́ющая.

Ра́дуйся, звѣздо́ Бо́жія благода́ти, е́юже мра́къ въ на́съ прогоня́ется; ра́дуйся, чуде́съ пучи́но, всѣ́хъ на́съ неоску́дно напоя́ющая.

Ра́дуйся, воздержа́ніемъ дре́вней Іуди́ѳи уподо́бившаяся; ра́дуйся, му́жествомъ сію́ превозше́дшая.

Ра́дуйся, я́ко Христо́вы мѵроно́сицы Христа́ возлюби́вшая; ра́дуйся, Тому́ вѣ́рная въ муче́ніяхъ свои́хъ пребы́вшая.

Ра́дуйся, по глаго́лу Его́ просла́вленная; ра́дуйся, Того́ вы́ну лице́мъ къ Лицу́ созерца́ющая.

Ра́дуйся, преподобному́ченице Христо́ва, Параске́во всесла́вная.

Конда́къ 11.

Пѣ́ніе на́ше хвале́бное не дово́льно е́сть къ прославле́нію мно́гихъ и преди́вныхъ чудотворе́ній твои́хъ, свята́я преподобному́ченице, оба́че, я́ко блага́я и ми́лостивая Христо́ва подража́тельница, благосе́рдіемъ твои́мъ на на́съ грѣ́шныхъ воззри́, и святы́ми и благомо́щными твои́ми моли́твами ко Го́споду, ми́ръ душе́вный на́мъ испроси́, во е́же взыва́ти Бо́гу: Аллилу́ія.

Икосъ 11.

Свѣ́тлыми луча́ми чуде́съ немерца́емо сія́еши, Параске́во богохва́льная, вся́ же, благоче́стно жи́ти хотя́щія, благода́тно къ незаходи́мому Со́лнцу пра́вды, Христу́ Бо́гу, путево́диши, зову́щихъ ти́ си́це:

Ра́дуйся, цѣлому́дрія цвѣ́те драгíй и прекра́сный; ра́дуйся, мѵровмѣсти́лище, арома́ты ра́йскими преиспо́лненное.

Ра́дуйся, отъ исполне́нія твоего́ и на́мъ да́ры благода́тныя неоску́дно источа́ющая; ра́дуйся, до́блестная исповѣ́днице Христо́ва, благода́тію облече́нная.

Ра́дуйся, во смире́ніи твое́мъ на небеси́ и на земли́ ди́вно возвели́ченная; ра́дуйся, нището́ю вре́менною бога́тство нетлѣ́нное стяжа́вшая.

Ра́дуйся, о Ца́рствіи Бо́жіемъ пла́чь духо́вный вы́ну я́вльшая; ра́дуйся, въ муче́ніяхъ тѣлеси́ своего́ пла́чу не преда́вшаяся.

Ра́дуйся, кро́тостію твоего́ языка́ Христу́ унаслѣ́довавшаяся; ра́дуйся, пра́вды Его́ алка́вшая.

Ра́дуйся, о пи́щѣ тлѣ́ннѣй Его́ ра́ди забы́вшая; ра́дуйся, ми́лость Бо́жію и на невѣ́рныхъ моли́твою твое́ю призыва́вшая.

Ра́дуйся, преподобному́ченице Христо́ва, Параске́во всесла́вная.

Конда́къ 12.

Благода́ть Госпо́дня моли́твами твои́ми исто́чнику воды́ отъ лѣ́тъ дре́внихъ здѣ́ дарова́ся. Тѣ́мже и хра́му Бо́жію со оби́телію дѣ́въ созда́тися та́мо во и́мя твое́ благоволи́ла еси́. Сію́ у́бо вы́ну присѣща́й и не забу́ди духо́вныхъ ча́дъ твои́хъ, въ преподо́біи тебѣ́ подража́ти хотя́щихъ, и пою́щихъ Бо́гу: Аллилу́ія.

Икосъ 12.

Пою́ще твоя́ по́двиги и страда́нія, и мно́гая чудеса́ твоя́, свята́я и всехва́льная Параске́во, мо́лимся ти́ приле́жно: моли́ся о на́съ къ просла́вльшему тя́ Влады́цѣ о е́же изба́витися на́мъ отъ поги́бели вѣ́чныя, ча́сть же спаса́емыхъ улучи́ти, благода́рно зову́щихъ:

Ра́дуйся, вѣнцено́сице, отъ руки́ Христо́вы увѣнча́нная; ра́дуйся, чистото́ю се́рдца боговидѣ́нія сподо́бившаяся.

Ра́дуйся, мно́гая лю́ди, Христу́ тобо́ю увѣ́ровавшія, Бо́гу примири́вшая; ра́дуйся, не́нависть отъ человѣ́къ Христа́ ра́ди прія́вшая.

Ра́дуйся, стра́шныя му́ки Его́ ра́ди подъя́вшая; ра́дуйся, съ свѣ́тлою свѣще́ю на бра́къ Жениха́ небе́снаго прише́дшая.

Ра́дуйся, свѣще́ Бо́жія ре́вности, еле́емъ ми́лости испо́лненная; ра́дуйся, ду́ши на́ша ма́стію Ду́ха Свята́го, въ тебѣ́ живу́щаго, умаща́ющая.

Ра́дуйся, дще́рь благослове́нная Отца́ Небе́снаго; ра́дуйся, я́ко мзда́ твоя́ мно́га на небеси́.

Ра́дуйся, я́ко моли́твы твоя́ дѣ́йственны на земли́; ра́дуйся, я́ко си́лы твоея́ трепе́щутъ преиспо́дніи.

Ра́дуйся, преподобному́ченице Христо́ва, Параске́во всесла́вная.

Конда́къ 13.

О, свята́я и многострада́льная преподобному́ченице Параске́во! Пріими́ ми́лостивно ма́лое моле́ніе сіе́ на́ше, и умоли́ Святу́ю и при́сно Покланя́емую Тро́ицу изба́вити на́съ отъ муче́ній вѣ́чныхъ, и сподо́бити, вку́пѣ съ тобо́ю, Ца́рствіе небе́сное улучи́ти, и вѣ́чно Созда́телю на́шему пѣ́ти: Аллилу́ія.

[Се́й конда́къ глаго́лется три́жды. Та́же и́косъ 1-й: Ангелъ Госпо́день по́сланъ бы́сть... И конда́къ 1-й: Избра́ннѣй невѣ́стѣ Христо́вой...]

Моли́тва святѣ́й преподобному́ченицѣ Параске́вѣ.

О, свята́я и многострада́льная преподобному́ченице Параске́во! Къ тебѣ́, а́ки те́плѣй за ны́ къ Бо́гу моли́твенницѣ, припа́даемъ и приле́жно мо́лимся: умоли́ Го́спода и Влады́ку на́шего проба́вити ми́лость Свою́ къ на́мъ, недосто́йнымъ рабо́мъ Его́, дарова́ти же на́мъ душе́вное и тѣле́сное здра́віе, земли́ плодоно́сіе, возду́ха благорастворе́ніе, во благоче́стіи христіа́нстѣмъ преуспѣ́яніе, къ житію́ вре́менному ну́жная дово́льная, и вся́ ко спасе́нію потре́бная, да ми́рно и благоче́стно пожи́вше, сподо́бимся благу́ю кончи́ну христіа́нскую улучи́ти и Ца́рствіе небе́сное наслѣ́дити. Ей, предста́тельнице на́ша блага́я! Не посрами́ упова́нія на́шего, е́же по Бо́зѣ и Пресвятѣ́й Богоро́дицѣ крѣ́пко на Тя́ возлага́емъ, но бу́ди на́мъ хода́таица во спасе́ніе, да сподо́бимся вку́пѣ съ тобо́ю и всѣ́ми святы́ми въ ра́дости блаже́нства вѣ́чнаго, сла́вити во твое́мъ заступле́ніи вели́кую ми́лость Бо́га на́шего, Отца́ и Сы́на и Свята́го Ду́ха, ны́нѣ и при́сно, и во вѣ́ки вѣко́въ. Ами́нь.

Тропа́рь, гла́съ 1:

Тща́ніе сообра́зно твоему́ и́мени содѣ́лавши, тезоимени́тая, равноимя́нную тебѣ́ вѣ́ру въ сожи́тельство избра́ла еси́, Параске́во побѣдоно́сная, тѣ́мже излива́еши исцѣле́нія и мо́лишися о душа́хъ на́шихъ.

Конда́къ, гла́съ 4. Подо́бенъ: Яви́лся еси́ дне́сь.

Хра́мъ тво́й, всечестна́я, я́ко враче́бницу душе́вную обрѣ́тше, въ не́мъ вси́ вѣ́рніи велегла́сно почита́емъ тя́, преподобному́ченице Параске́во сла́вная.

Велича́ніе:

Велича́емъ тя́, страстоте́рпице свята́я Параске́во, и чте́мъ святу́ю па́мять твою́, ты́ бо мо́лиши за на́съ Христа́ Бо́га на́шего.

Источникъ: Слу́жба [со ака́ѳистомъ] святѣ́й преподобному́ченицѣ Параске́вѣ. — Поча́евъ: Въ тѵпогра́фіи Поча́евской Ла́вры, 1911. — Л. 6 об. – 17.

/ Къ оглавленію раздѣла /


Наверхъ / Къ титульной страницѣ

0