Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - среда, 22 ноября 2017 г. Сейчасъ на порталѣ посѣтителей - 15.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ДОМАШНЯЯ МОЛИТВА

О иконѣ Божіей Матери «Утоли моя печали».

Икона Божией Матери, именуемая Утоли моя печалиСамый древній и извѣстный изъ списковъ иконы «Утоли моя печали» былъ принесенъ казаками въ Москву въ 1640 году въ царствованіе Алексѣя Михайловича. Въ 1760 г. эта св. икона явилась въ сонномъ видѣніи одной страдавшей неизлѣчимымъ разслабленіемъ женщинѣ знатнаго происхожденія, жившей вдали отъ Москвы, при чемъ больная услышала отъ св. образа голосъ, повелѣвающій ей помолиться предъ образомъ Божіей Матери съ надписью «Утоли моя печали». Когда страдающая женщина была привезена въ Москву и внесена въ означенную церковь, то не нашла въ ней явившейся ей въ видѣніи св. иконы. Узнавъ объ этомъ, мѣстный священникъ приказалъ принести съ колокольни хранившіяся тамъ древнія иконы. Среди нихъ оказалась и икона съ такой надписью. Она вся была покрыта пылью, но больная сразу узнала въ ней ту, которую удостоилась видѣть во снѣ. По совершеніи молебствія предъ этой св. иконой, больная приложилась къ св. образу и получила исцѣленіе. Это чудо совершилось 25 января 1760 г. Съ тѣхъ поръ этотъ день установленъ днемъ празднованія иконѣ Богородицы «Утоли моя печали».

АКАѲИСТЫ

Ака́ѳистъ Пресвятѣ́й Богоро́дицѣ, честно́му Ея́ о́бразу «Утоли́ моя́ печа́ли».

Конда́къ 1.

Взбра́нное на́мъ и ди́вное избавле́ніе дарова́ся, Тво́й о́бразъ честны́й, Преблагослове́нная Дѣ́во Влады́чице Богоро́дице, я́ко изба́вльшеся отъ злы́хъ явле́ніемъ его́ и къ нему́ взира́юще, воспису́емъ Ти́ благода́рственная раби́ Твои́, Богоро́дице, но́ я́ко иму́щая держа́ву непобѣди́мую, отъ вся́кихъ на́съ бѣ́дъ свободи́, да зове́мъ Ти́:

Ра́дуйся, Ра́досте на́ша, изба́ви на́съ отъ вся́каго зла́ и утоли́ на́ша печа́ли.

Икосъ 1.

Ра́дуйся, Ты́ Отца́ Безнача́льнаго благослове́ніе. Ра́дуйся, Ты́ Сы́на Превѣ́чнаго жили́ще. Ра́дуйся, Ты́ Ду́ха Свята́го пребыва́ніе. Ра́дуйся, я́ко Тебе́ сла́вятъ многоочи́тіи херуви́ми. Ра́дуйся, я́ко Тебѣ́ похва́льная прино́сятъ шестокрила́тіи серафи́ми. Ра́дуйся, я́ко Тебе́ вся́ небе́сная во́инства велича́ютъ. Ра́дуйся, я́ко Тебе́ вся́ колѣ́на земна́я Ма́терь Бо́жію исповѣ́дуютъ. Ра́дуйся, я́ко Тобо́ю вся́ вселе́нная весе́лія исполня́ется. Ра́дуйся, я́ко Тобо́ю вся́ болѣ́зни на́ша исцѣля́ются. Ра́дуйся, Твои́ми бо моли́твами печа́ли на́ша утоля́ются. Ра́дуйся, Твои́ми бо хода́тайствы вся́ проше́нія на́ша исполня́ются. Ра́дуйся, я́ко Тебѣ́ и Сы́ну Твоему́ въ Твое́й честнѣ́й ико́нѣ благода́рно покланя́емся.

Ра́дуйся, Ра́досте на́ша, изба́ви на́съ отъ вся́каго зла́ и утоли́ на́ша печа́ли.

Конда́къ 2.

Ви́дятъ Тя́, Богоизбра́нная Отрокови́це, вся́ небе́сныя си́лы предстоя́щу всегда́ престо́лу сла́вы небе́снаго Царя́ и за христіа́ны къ Сы́ну и Бо́гу моля́щуюся, небе́сная Цари́це. Мы́ же, грѣ́шніи, на земли́ зря́ще Твою́ святу́ю ико́ну и къ не́й припа́дающе, Тебѣ́ ра́достно покланя́емся, зову́ще: Аллилу́ія.

Икосъ 2.

Ра́зумъ пода́ждь на́мъ, всеусе́рдная Предста́тельница на́ша, небе́сная Цари́це, изъ у́стъ бо на́съ, скве́рныхъ, ка́ко мо́щно пѣ́ти Твоему́ и́мени? Яко благи́хъ еси́ на́мъ Хода́таица, си́льна еси́ вспомоществова́ти во вся́кой на́ми тре́буемой по́мощи, да Тебѣ́ со умиле́ніемъ зове́мъ си́це:

Ра́дуйся, моли́твы о на́съ къ Сы́ну и Бо́гу во утѣше́ніе принося́щая. Ра́дуйся, Твои́ми моли́твами о́чи на́ша отъ вѣ́чнаго рыда́нія избавля́ющая. Ра́дуйся, Твои́ми Ма́терними моли́твами Сы́на и Бо́га на ми́лость къ на́мъ преклоня́ющая. Ра́дуйся, Твои́ми моли́твами пра́ведный на на́съ гнѣ́въ Бо́жій утоля́ющая. Ра́дуйся, Твои́ми хода́тайствы грѣхи́ на́ша проща́ющая. Ра́дуйся, Твое́ю по́мощію стра́сти на́ша истребля́ющая. Ра́дуйся, Твои́мъ предста́тельствомъ вре́менная на́ша ско́рби разруша́ющая. Ра́дуйся, Ты́ во вся́кихъ бѣда́хъ и ну́ждахъ на́мъ помога́ющая. Ра́дуйся, Тя́ сла́вящихъ всегда́ прославля́ющая. Pа́дуйся, Твое́ю ра́достію печа́ли на́ша утоля́ющая. Ра́дуйся, непреста́нное на́мъ весе́ліе подава́ющая. Ра́дуйся, Ты́ на́мъ ра́йскія две́ри отверза́ющая.

Ра́дуйся, Ра́досте на́ша, изба́ви на́съ отъ вся́каго зла́ и утоли́ на́ша печа́ли.

Конда́къ 3.

Си́ла Вы́шняго осѣни́ Тя́ къ ско́рому и те́плому заступле́нію вѣ́рно притека́ющихъ къ Тебѣ́ и честно́му Твоему́ о́бразу покланя́ющихся, еди́ной бо то́кмо Тебѣ́, Нетлѣ́нной и Пречи́стѣй Богома́тери, даде́ся да́ръ вся́кое благо́е на́ше проше́ніе исполня́ти, и еди́на Ты́ мо́жеши на́мъ помощи́, ели́ко хо́щеши. Тѣ́мъ вся́къ во́зрастъ славосло́витъ Сы́на Твоего́ и Бо́га на́шего, зовы́й: Аллилу́ія.

Икосъ 3.

Имѣ́яй бога́тство милосе́рдія неоску́дное, всѣ́мъ конце́мъ земны́мъ простира́еши ру́ку по́мощи и подае́ши боля́щимъ исцѣле́ніе, стра́ждущимъ осла́бу, слѣпы́мъ прозрѣ́ніе и всѣ́мъ вся́ по свое́й и́хъ потре́бѣ исполня́еши. Мы́ же Тебѣ́ благода́рно си́це пое́мъ:

Ра́дуйся, еди́на Ма́ти, милосе́рдіе на́мъ явля́ющая. Ра́дуйся, ми́лости сокро́вище многоцѣ́нное на́мъ открыва́ющая. Ра́дуйся, безчи́сленныя щедро́ты всѣ́мъ подава́ющая. Ра́дуйся, сло́во прему́дрости прося́щимъ да́рующая. Ра́дуйся, преспѣ́яніе ра́зума ю́нымъ подава́ющая. Ра́дуйся, ра́ны на́ша грѣхо́вныя истребля́ющая. Ра́дуйся, пра́ведныхъ въ ра́йскихъ селе́ніихъ насажда́ющая. Ра́дуйся, отча́яннымъ бу́дущихъ бла́гъ Наде́ждо и Укрѣпле́ніе. Ра́дуйся, всѣ́хъ па́дшихъ ско́ро къ благода́ти возставля́ющая. Ра́дуйся, всѣ́мъ во вся́кой тре́буемой отъ Тебе́ по́мощи помога́ющая.

Ра́дуйся, Ра́досте на́ша, изба́ви на́съ отъ вся́каго зла́ и утоли́ на́ша печа́ли.

Конда́къ 4.

Бу́рею мно́гихъ бѣ́дъ одержи́мымъ на́мъ всегда́ помога́еши, небе́сная Цари́це, съ вѣ́рою прибѣга́ющимъ къ Тебѣ́ и покланя́ющимся цѣльбоно́снѣй Твое́й ико́нѣ, е́й же первопи́саннѣй иногда́ рекла́ еси́: «съ си́мъ о́бразомъ благода́ть Моя́ и си́ла». И мы́ и́стинно вѣ́руемъ, я́ко послу́шаеши проше́нія призыва́ющихъ и́мя свято́е Твое́ и Сы́ну Твоему́ зову́щихъ: Аллилу́ія.

Икосъ 4.

Слы́ша Госпо́дь Твоя́ на небеси́ о на́съ хода́тайства, взбра́нная Пала́то Ду́ха Свята́го, исполня́етъ Твоя́ проше́нія. Мы́ же, грѣ́шніи, на земли́, ви́дѣвше святу́ю Твою́ ико́ну, я́ко свѣтоза́рное со́лнце на́мъ свѣтя́щуюся, Тебѣ́ я́ко Бо́жіей Ма́тери дерза́емъ глаго́лати:

Ра́дуйся, Со́лнце мы́сленное на́мъ явля́ющая. Ра́дуйся, свѣ́томъ немерца́ющимъ на́съ просвѣща́ющая. Ра́дуйся, умерщвле́нныхъ на́съ грѣха́ми оживля́ющая. Ра́дуйся, непло́днымъ ма́теремъ ложесна́ разрѣша́ющая. Ра́дуйся, неча́янно находя́щихъ на на́съ злы́хъ враго́въ ско́ро прогоня́ющая. Ра́дуйся, жела́емыхъ бла́гъ всегда́ на́съ наслажда́ющая. Ра́дуйся, ско́ро въ бѣда́хъ и въ печа́лѣхъ на́съ утѣша́ющая. Ра́дуйся, вѣ́рою и́мя Твое́ призыва́ющихъ отъ неча́янныя сме́рти спаса́ющая. Ра́дуйся, на Тя́ упова́ющимъ безконе́чный живо́тъ да́рующая. Ра́дуйся, вѣ́ру и любо́вь къ Тебѣ́ иму́щихъ къ небеси́ возводя́щая. Ра́дуйся, Предста́тельство на́ше крѣ́пкое. Ра́дуйся, во вся́кихъ обстоя́тельствахъ на́съ защища́ющая.

Ра́дуйся, Ра́досте на́ша, изба́ви на́съ отъ вся́каго зла́ и утоли́ на́ша печа́ли.

Конда́къ 5.

Боготе́чную звѣзду́, честну́ю Твою́ ико́ну Ты́ на́мъ показа́ла еси́, Влады́чице мíра, къ не́йже мы́ зря́ще и вѣ́рою серде́чною моля́щеся, Тебѣ́, Богоро́дице, глаго́лемъ: «Ты́ еси́ на́мъ щи́тъ непобѣди́мый и стѣна́ необори́мая, вопію́щимъ Ти́: Аллилу́ія».

Икосъ 5.

Ви́дѣша си́лы небе́сныя на руку́ Твое́ю Созда́вшаго Свои́ма рука́ма человѣ́ки и Влады́ку разумѣва́юще Его́. Мы́ же, грѣ́шніи, на земли́ зря́ще изображе́нную Тебе́, Пречи́стую Ма́терь Его́, любе́зно Свои́ ру́цѣ къ на́мъ простира́ющую, къ Тебѣ́ уми́льно зове́мъ:

Ра́дуйся, на руку́ Твое́ю Огнь Боже́ственный неопа́льно держа́щая, Имже грѣхи́ на́ша попаля́ются. Ра́дуйся, на руку́ Твое́ю Свѣ́та Неприкоснове́ннаго носи́вшая, Имже ду́ши на́ша просвѣща́ются. Ра́дуйся, враго́въ на́шихъ ви́димыхъ и неви́димыхъ побѣжда́ющая. Ра́дуйся, любо́вь и милосе́рдіе къ на́мъ явля́ющая. Ра́дуйся, ру́цѣ Твои́ въ поруче́ніе о на́съ къ Бо́гу принося́щая. Ра́дуйся, вхо́дъ въ Ца́рствіе небе́сное на́мъ отверза́ющая. Ра́дуйся, Твое́ю по́мощію на́съ защища́ющая. Ра́дуйся, Твои́мъ хода́тайствомъ грѣхи́ на́ша проща́ющая. Ра́дуйся, Твои́мъ моле́ніемъ печа́ли на́ша утоля́ющая. Ра́дуйся, я́ко Твои́мъ предста́тельствомъ вся́кихъ бла́гъ наслажда́емся. Ра́дуйся, я́ко Тобо́ю вся́ во благи́хъ жела́нія на́ша исполня́ются.

Ра́дуйся, Ра́досте на́ша, изба́ви на́съ отъ вся́каго зла́ и утоли́ на́ша печа́ли.

Конда́къ 6.

Проповѣ́дницы богоно́сніи апо́столи, по Вознесе́ніи Госпо́дни, при освяще́ніи хра́ма Твоего́ неви́димою руко́ю изображе́нный шаро́вными подо́біи на стѣнѣ́ обрѣ́тше о́бразъ Тво́й, Влады́чице, рожде́нному отъ Тебе́ Бо́гу воспѣ́ша: Аллилу́ія.

Икосъ 6.

Возсія́ла еси́ прему́дростію отъ и́стиннаго Со́лнца пра́вды, богоизбра́нная Отрокови́це, и, лучи́ и́стиннаго богоразу́мія испуща́ющи, тѣ́ми освѣща́еши всѣ́хъ, вѣ́рою исповѣ́дающихъ Тя́ и́стинную Ма́терь Бо́жію бы́ти, вопію́щихъ си́це:

Ра́дуйся, всѣ́хъ на небеси́ сла́вою Твое́ю просвѣща́ющая. Ра́дуйся, нача́ло человѣ́ческаго спасе́нія устроя́ющая. Ра́дуйся, ковче́же жи́зни на́шея, отъ пото́па сме́ртнаго на́съ сохраня́ющій. Ра́дуйся, въ ра́йскихъ селе́ніяхъ жи́ти на́мъ да́рующая. Ра́дуйся, Предста́тельница на́ша къ Бо́гу, мíръ спаса́ющая. Ра́дуйся, въ бѣда́хъ су́щихъ ско́ро заступа́ющая. Ра́дуйся, вся́кія болѣ́зни человѣ́ческія, тѣле́сныя и душе́вныя, исцѣля́ющая. Ра́дуйся, нѣмы́мъ и косноязы́чнымъ словеса́ отверза́ющая. Ра́дуйся, вся́каго бла́га прося́щимъ у Тебе́ Пода́тельнице. Ра́дуйся, уче́ніе благода́ти всѣ́мъ источа́ющая. Ра́дуйся, тѣ́мъ вся́кій чи́нъ и во́зрастъ дово́льно услажда́ющая. Ра́дуйся, всѣ́хъ благíя жела́нія исполня́ющая.

Ра́дуйся, Ра́досте на́ша, изба́ви на́съ отъ вся́каго зла́ и утоли́ на́ша печа́ли.

Конда́къ 7.

Хотя́ долготерпѣли́вый Всеви́дѣцъ Госпо́дь яви́ти Своего́ человѣколю́бія и щедро́тъ бе́здну, избра́ Тебе́ Себѣ́ въ Ма́терь, ми́лости неисчерпа́емый Исто́чниче, да а́ще кто́ пра́веднымъ судо́мъ Бо́жіимъ осужде́нія досто́инъ, Твои́мъ всемо́щнымъ хода́тайствомъ сохране́нъ бу́детъ, и Сы́ну Твоему́ и Бо́гу на́шему велегла́сно зове́тъ: Аллилу́ія.

Икосъ 7.

Ди́вна показа́лъ еси́ дѣла́ Твоя́ въ Пречи́стѣй Ма́тери Твое́й, Го́споди, и ди́вну дарова́лъ еси́ на́мъ Ея́ ико́ну, па́че луче́й со́лнечныхъ просвѣща́ющую люде́й, я́ко са́мую зря́щихъ Богоро́дицу, и вѣ́рою серде́чною отъ души́ любо́вію вопію́щихъ такова́я:

Ра́дуйся, ико́ну Твою́ на земли́ я́ко о́блакъ всѣ́мъ распростира́ющая. Ра́дуйся, то́ю па́че надѣ́янія милосе́рдое къ на́мъ заступле́ніе явля́ющая. Ра́дуйся, Твое́ю ико́ною исто́чники чуде́съ всю́ду источа́ющая. Ра́дуйся, явле́ніемъ Твоея́ ико́ны вся́ лю́ди просвѣща́ющая. Ра́дуйся, то́ю но́вое зна́меніе благода́ти въ Це́ркви явля́ющая. Ра́дуйся, я́ко на ико́ну Твою́ взира́юще, Само́й Тебѣ́, и́стиннѣй Богоро́дицѣ, покланя́емся. Ра́дуйся, ико́ною Твое́ю, я́ко столпо́мъ о́гненнымъ, мра́къ грѣха́ отгоня́ющая. Ра́дуйся, то́ю печа́ли на́ша утоля́ющая. Ра́дуйся, Це́рковь освяти́вшая тоя́ явле́ніемъ. Ра́дуйся, я́ко мы́, грѣ́шніи, сохраня́емся Твои́мъ заступле́ніемъ. Ра́дуйся, вре́тище ско́рби на́шея растерза́ющая. Ра́дуйся, вѣ́чною ра́достію на́съ одѣва́ющая.

Ра́дуйся, Ра́досте на́ша, изба́ви на́съ отъ вся́каго зла́ и утоли́ на́ша печа́ли.

Конда́къ 8.

Стра́нну и пресла́вну въ Це́ркви я́вльшуюся, святу́ю Твою́ ико́ну а́нгели воспѣ́ша, апо́столи просла́виша, ли́къ святи́телей поклони́шася, мы́ же грѣ́шніи, припа́дающе, ожида́емъ Твоея́ вели́кія и бога́тыя ми́лости, съ весе́ліемъ вопію́ще: Аллилу́ія.

Икосъ 8.

Всѣ́ми вы́шними и ни́жними влады́чествуяй Госпо́дь, ви́дѣвъ Тя́ Ма́терь Свою́ всегда́ предстоя́щу Ему́ и со умиле́ніемъ Ему́ принося́щу моле́ніе о на́съ, грѣ́шныхъ, обѣща́ испо́лнити вся́ проше́нія Твоя́. Мы́ же, грѣ́шніи, надѣ́яся на Твоя́ Ма́тернія о на́съ моли́твы, благода́рственная Тебѣ́ прино́симъ си́це:

Ра́дуйся, съ Сы́номъ Твои́мъ и Бо́гомъ вѣ́чно ца́рствующая. Ра́дуйся, Ему́ же всегда́ о на́съ моле́нія принося́щая. Ра́дуйся, всѣ́хъ, къ Тебѣ́ прибѣга́ющихъ, Твое́ю ми́лостію покрыва́ющая. Ра́дуйся, всѣ́хъ Ра́досте, печа́ли на́ша утоля́ющая. Ра́дуйся, примире́ніе на́ше съ Бо́гомъ содѣ́лавшая. Ра́дуйся, Бо́га и человѣ́ка соедини́вшая. Ра́дуйся, спасе́ніе человѣ́ческое устро́ившая. Ра́дуйся, прароди́тельнаго грѣха́ кля́тву разруши́вшая. Ра́дуйся, сме́ртное на́ше естество́ безсме́ртіемъ просвѣти́вшая. Ра́дуйся, жесто́кость се́рдца на́шего умили́вшая. Ра́дуйся, отча́янныхъ къ Бо́гу возводя́щая. Ра́дуйся, сосу́ды сме́ртныя, на на́съ угото́ванныя, сокруши́вшая.

Ра́дуйся, Ра́досте на́ша, изба́ви на́съ отъ вся́каго зла́ и утоли́ на́ша печа́ли.

Конда́къ 9.

Все́ естество́ а́нгельское похва́льныя пѣ́сни прино́ситъ Тебѣ́, Бо́жіей Ма́тери и Засту́пницѣ всѣ́хъ припа́дающихъ Тебѣ́ и прося́щихъ Твоея́ по́мощи, я́ко тве́рдымъ и крѣ́пкимъ Твои́мъ предста́тельствомъ пра́ведныхъ весели́ши, грѣ́шныхъ заступа́еши и отъ бѣ́дъ избавля́еши, и печа́ли утоля́еши, и мо́лишися о всѣ́хъ вѣ́рою зову́щихъ: Аллилу́ія.

Икосъ 9.

Вѣтíя многовѣща́нныя, я́ко ры́бы безгла́сныя, недоумѣ́ютъ хвали́ти сла́вный, Влады́чице, ико́ны Твоея́ пра́здникъ, ниже́ отъ скве́рныхъ усте́нъ на́шихъ приноси́мыя Ти́ похвалы́ досто́йны, оба́че, неисче́тныя благодѣя́нія, ико́ною Твое́ю на́мъ явля́емыя, ви́дѣвше, душе́ю и се́рдцемъ ра́дующеся, Тебѣ́ глаго́лемъ:

Ра́дуйся, отъ гла́да на́съ Хлѣ́бомъ жи́зни пита́ющая. Ра́дуйся, отъ губи́тельства сме́ртнаго безсме́ртіемъ на́съ соблюда́ющая. Ра́дуйся, отъ тру́са грѣхо́внаго на́съ сохраня́ющая. Ра́дуйся, отъ пото́па сме́ртнаго руко́ю Твое́ю крѣ́пкою на́съ избавля́ющая. Ра́дуйся, отъ огня́ росо́ю моли́твъ Твои́хъ на́съ восхища́ющая. Ра́дуйся, отъ бѣ́дъ си́льнымъ Твои́мъ предста́тельствомъ на́съ защища́ющая. Ра́дуйся, отъ меча́ си́лою Твое́ю на́съ охраня́ющая. Ра́дуйся, отъ наше́ствія иноплеме́нникъ на́съ спаса́ющая. Ра́дуйся, отъ междоусо́бныя бра́ни и́стиннымъ ми́ромъ на́съ огражда́ющая. Ра́дуйся, отъ смертоно́сныя ра́ны прибѣга́ющихъ къ Тебѣ́ исцѣля́ющая. Ра́дуйся, отъ належа́щаго пра́веднаго преще́нія Бо́жія Твои́мъ моле́ніемъ на́съ свобожда́ющая. Ра́дуйся, отъ вся́кія на́съ я́звы Твои́мъ честны́мъ хода́тайствомъ изыма́ющая.

Ра́дуйся, Ра́досте на́ша, изба́ви на́съ отъ вся́каго зла́ и утоли́ на́ша печа́ли.

Конда́къ 10.

Спасти́ хотя́ ро́дъ человѣ́ческій отъ пре́лести вра́жія, Человѣколю́бецъ Госпо́дь, Тебе́ Ма́терь Свою́ дарова́ земны́мъ на по́мощь, глаго́ля: «сы́нове человѣ́честіи, се́ Ма́ти Моя́ Покро́въ и Прибѣ́жище ва́мъ да бу́детъ, печа́льнымъ Утѣше́ніе, скорбя́щимъ Ра́дованіе, оби́димымъ Засту́пница, да всѣ́хъ изъ глубины́ грѣхо́вныя воздви́гнетъ, вопію́щихъ: Аллилу́ія».

Икосъ 10.

«Царю́ Небе́сный, — та́ко мо́литъ за ны́ всегда́ небе́сная Цари́ца, — пріими́ вся́каго человѣ́ка, сла́вящаго Тя́ и призыва́ющаго и́мя Твое́, идѣ́же быва́етъ па́мять свято́му и́мени Твоему́, и прославля́ющихъ Мя́ и́мене Твоего́ ра́ди, и не отри́ни и́хъ отъ лица́ Твоего́, но благоволи́ въ ни́хъ, и пріими́ отъ ни́хъ вся́кое моле́ніе и всѣ́хъ отъ бѣ́дъ изба́ви». Мы́ же, грѣ́шніи, надѣ́ющеся на Твоя́ Ма́тернія моли́твы, зове́мъ си́це:

Ра́дуйся, я́ко Ты́ Моли́твенница на́ша къ Бо́гу те́плая. Ра́дуйся, я́ко Твоя́ ма́терняя моли́тва мно́го мо́жетъ, Влады́ку умилостивля́ющая. Ра́дуйся, отча́янныхъ Наде́ждо, печа́ли и́хъ утоля́ющая. Ра́дуйся, Твое́ю благода́тію на́ше недосто́инство осіява́ющая. Ра́дуйся, на́шу скве́рну Твое́ю чистото́ю очища́ющая. Ра́дуйся, моле́нія на́ша Твои́мъ благоуха́ніемъ исправля́ющая. Ра́дуйся, бре́ніе на́ше тлѣ́нное въ нетлѣ́ніе обраща́ющая. Ра́дуйся, неможе́ніе на́ше врачу́ющая. Ра́дуйся, вся́ на́ша болѣ́зни душе́вныя и тѣле́сныя исцѣля́ющая. Ра́дуйся, наше́дшій на на́съ о́блакъ страсте́й, скорбе́й и печа́лей ско́ро разгоня́ющая. Ра́дуйся, си́льнымъ Твои́мъ проше́ніемъ вся́ поле́зная да́рующая.

Ра́дуйся, Ра́досте на́ша, изба́ви на́съ отъ вся́каго зла́ и утоли́ на́ша печа́ли.

Конда́къ 11.

Пѣ́ніе всеумиле́нное пріими́ отъ на́съ, небе́сная Цари́це, и моли́тву, приноси́мую Тебѣ́, Дѣ́во Богоро́дице, услы́ши: къ Тебѣ́ бо въ напа́стехъ, ско́рбехъ и печа́лехъ прибѣга́емъ и предъ Тобо́ю въ бѣда́хъ на́шихъ сле́зы пролива́емъ, и мо́лимъ: «утоли́ на́ша печа́ли, и пріими́ сію́ же́ртву Твои́хъ рабо́въ, зову́щихъ: Аллилу́ія».

Икосъ 11.

Свѣтопріе́мная свѣще́ и́стиннаго Свѣ́та су́щихъ на земли́ я́вльшися, ду́ши просвѣща́еши чту́щихъ Твоея́ ико́ны явле́ніе и къ ра́зуму Боже́ственному наставля́еши пою́щихъ Ти́ сицева́я:

Ра́дуйся, Свѣще́ неугаси́мая Огня́ невеще́ственнаго, на́съ просвѣща́ющая. Ра́дуйся, Заре́ незаходи́маго Свѣ́та Боже́ственнаго, на́съ озаря́ющая. Ра́дуйся, Со́лнце пра́вды, на́съ облиста́ющее. Ра́дуйся, исто́чникъ жи́зни ра́йскія на́мъ источа́ющая. Ра́дуйся, Ма́ти Свѣ́та и́стиннаго, благочести́выхъ ду́ши просвѣща́ющая. Ра́дуйся, Ма́ти всѣ́хъ Бо́га, озло́бленныхъ всѣ́хъ ду́ши утѣша́ющая. Ра́дуйся, Тя́ на по́мощь призыва́ющихъ и и́мя Твое́ сла́вящихъ спаса́ющая. Ра́дуйся, упова́ющимъ на Тя́ живота́ непосты́дный коне́цъ да́рующая. Ра́дуйся, всѣ́мъ родо́мъ, Тя́ Ма́терь Бо́жію почита́ющимъ и Богоро́дицу имену́ющимъ, непреста́нно помога́ющая. Ра́дуйся, осѣне́ніемъ святы́я Твоея́ ико́ны злы́хъ духо́въ мечта́нія отъ на́съ прогоня́ющая. Ра́дуйся, во внеза́пныхъ на на́съ находя́щихъ ско́рбехъ и печа́лехъ ско́ро на́съ утѣша́ющая. Ра́дуйся, всему́ мíру ра́дость да́рующая.

Ра́дуйся, Ра́досте на́ша, изба́ви на́съ отъ вся́каго зла́ и утоли́ на́ша печа́ли.

Конда́къ 12.

Благода́ть Боже́ственную испроси́ на́мъ у небе́снаго Влады́ки Сы́на Твоего́ и Бо́га, и простри́ на́мъ ру́ку по́мощи, и моли́твами Твои́ми утоли́ на́ша печа́ли, покры́й на́съ кро́вомъ крилу́ Твое́ю, отжени́ отъ на́съ вся́каго врага́ и супоста́та, умири́ на́шу жи́знь, да не поги́бнемъ лю́тѣ, но пріими́ на́съ въ вѣ́чныя кро́вы, Покрови́тельнице на́ша, да ра́дующеся Тебѣ́ зове́мъ: Аллилу́ія.

Икосъ 12.

Пою́ще Тя́, держа́вную Помо́щницу, хва́лимъ Тя́ и, моля́щеся Тебѣ́ со умиле́ніемъ, вѣ́руемъ и исповѣ́дуемъ, я́ко испро́сиши блага́я, и вре́менная, и вѣ́чная, воспѣва́ющимъ Ти́:

Ра́дуйся, моли́твами Твои́ми ве́сь мíръ спаса́ющая. Ра́дуйся, всю́ вселе́нную хода́тайствомъ Твои́мъ заступа́ющая. Ра́дуйся, правосла́внымъ царе́мъ на ва́рвары побѣ́ды подава́ющая. Ра́дуйся, наше́ствія на христіа́ны иноплеме́нныхъ побѣжда́ющая. Ра́дуйся, въ вѣ́рѣ благочести́выя сохраня́ющая. Ра́дуйся, непочита́ющихъ ико́ны Твоя́ святы́я, я́ко пра́хъ отъ лица́ земли́ развѣва́ющая. Ра́дуйся, покланя́ющимся ико́нѣ Твое́й, и Тя́ на по́мощь призыва́ющимъ, и въ печа́лехъ бѣ́дствующимъ ско́ро помога́ющая. Ра́дуйся, на́съ грѣ́шныхъ ко спасе́нію и воспрія́тію бла́гъ вѣ́чныхъ наставля́ющая. Ра́дуйся, безконе́чнаго Ца́рствія у Сы́на Твоего́ и Бо́га на́шего всѣ́мъ на́мъ испроша́ющая. Ра́дуйся, вѣ́рнымъ безконе́чную жи́знь да́рующая. Ра́дуйся, всѣ́мъ во вся́кой потре́бѣ вся́ поле́зная и блага́я подава́ющая.

Ра́дуйся, Ра́досте на́ша, изба́ви на́съ отъ вся́каго зла́ и утоли́ на́ша печа́ли.

Конда́къ 13.

О, Всепѣ́тая Ма́ти, небе́сная Цари́це и Влады́чице, Дѣ́во Богоро́дице, ро́ждшая всѣ́хъ святы́хъ Святѣ́йшее Сло́во! Ны́нѣшнее пріе́мши приноше́ніе, утоли́ на́ша печа́ли и изба́ви на́съ отъ вся́кихъ напа́стей, бѣ́дъ, скорбе́й и вѣ́чнаго осужде́нія и гряду́щаго изми́ муче́нія, и сподо́би на́съ, рабо́въ Твои́хъ, въ вѣ́чныхъ ра́йскихъ селе́ніяхъ водвори́тися, зову́щихъ: Аллилу́ія.

[Се́й конда́къ глаго́лется три́жды. Та́же и́косъ 1-й: Ангелъ мно́жество... И конда́къ 1-й: Взбра́нное на́мъ...]

Молитва ко Пресвятѣй Богородицѣ [1].

Наде́ждо всѣ́мъ конце́мъ земли́, Пречи́стая Дѣ́во, Госпоже́ Богоро́дице, утѣше́ніе мое́! Не гнуша́йся мене́ грѣ́шнаго, на Твою́ бо ми́лость упова́ю: угаси́ ми́ пла́мень грѣхо́вный и покая́ніемъ ороси́ изсо́хшее мое́ се́рдце, очи́сти у́мъ мо́й отъ грѣхо́вныхъ по́мысловъ, пріими́ мольбу́, отъ души́ и се́рдца со воздыха́ніемъ приноси́мую Тебѣ́. Буди́ о мнѣ́ Хода́таица къ Сы́ну Твоему́ и Бо́гу, и укроти́ гнѣ́въ Его́ ма́терними Твои́ми моли́твами. Душе́вныя и тѣле́сныя я́звы исцѣли́, Госпоже́ Влады́чице, утоли́ болѣ́зни души́ и тѣ́ла, утиши́ бу́рю злы́хъ нападе́ній вра́жескихъ, отыми́ бре́мя грѣхо́въ мои́хъ, и не оста́ви мене́ до конца́ поги́бнути, и печа́лію сокруше́нное се́рдце мое́ утѣ́ши, да сла́влю Тя́ до послѣ́дняго издыха́нія моего́. Ами́нь.

Тропа́рь, гла́съ 5:

Утоли́ болѣ́зни многовоздыха́ющія души́ моея́, утоли́вшая вся́ку слезу́ отъ лица́ земли́, Ты́ бо человѣ́комъ болѣ́зни отго́ниши и грѣ́шныхъ ско́рби разруша́еши, Тебе́ бо вси́ стяжа́хомъ наде́жду и утвержде́ніе, Пресвята́я Ма́ти Дѣ́во.

Конда́къ, гла́съ 6:

Не ввѣ́ри мя́ человѣ́ческому предста́тельству, Пресвята́я Влады́чице, но пріими́ моле́ніе раба́ Твоего́: ско́рбь бо обдержи́тъ мя́, терпѣ́ти не могу́ де́монскаго стрѣля́нія, покро́ва не и́мамъ, ниже́ гдѣ́ прибѣ́гну, окая́нный, всегда́ побѣжда́емь, и утѣше́нія не и́мамъ, ра́звѣ Тебе́, Влады́чице мíра, упова́ніе и предста́тельство вѣ́рныхъ, не пре́зри моле́ніе мое́, поле́зно сотвори́.

Велича́ніе:

Велича́емъ Тя́, Пресвята́я Дѣ́во, Богоизбра́нная Отрокови́це, и чте́мъ о́бразъ Тво́й святы́й, и́мже то́чиши исцѣле́нія всѣ́мъ, съ вѣ́рою притека́ющимъ.

Примѣчаніе:
[1] Молитва Пресвятой Богородицѣ приводится по изданію: Полный сборникъ молитвъ Спасителю, Пресвятой Троицѣ, Божіей Матери, святымъ угодникамъ Божіимъ и безплотнымъ силамъ, читаемыхъ предъ святыми иконами на молебнахъ и всенощныхъ бдѣніяхъ, съ присоединеніемъ тропарей и величаній. — Изданіе второе, значительно дополненное. — Составленъ изъ одобренныхъ Св. Сѵнодомъ и духовною цензурою акаѳистовъ и церковныхъ службъ, настоятелемъ С.-Петербургскаго Адмиралтейскаго Собора, протоіереемъ А. Ставровскимъ. — СПб.: Типографія товарищества «Общественная польза», 1914. — С. 20.

Источникъ: Слу́жба Пресвятѣ́й Богоро́дицѣ, соверша́емая въ де́нь пра́зднества свято́й чудотво́рной Ея́ ико́ны, имену́емой: Утоли́ моя́ печа́ли. — СПб: Въ Сѵнода́льной Тѵпогра́фіи, 1860. — С. 20-51.

/ Къ оглавленію раздѣла /


Наверхъ / Къ титульной страницѣ

0