Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - понедѣльникъ, 22 мая 2017 г. Сейчасъ на порталѣ посѣтителей - 14.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ДОМАШНЯЯ МОЛИТВА

Свт. Савва, первый архіеп. Сербскій († 1237 г.)

Святитель Савва, первый архиепископ СербскийСвятый Савва былъ сынъ знаменитаго основателя самостоятельнаго сербскаго государства, великаго сербскаго жупана Стефана Немани, въ иночествѣ Симеона, прославляемаго Церковію, какъ святаго покровителя Сербіи. Стефанъ Неманя жилъ въ двѣнадцатомъ столѣтіи. Онъ объединилъ большую часть сербскихъ земель и доставилъ имъ политическую независимость. Сынъ его Савва явился создателемъ независимой сербской Церкви. Савва былъ самымъ младшимъ изъ дѣтей Стефана Немани и супруги его Анны. Родители, имѣя уже нѣсколько дѣтей, обратились къ Господу съ молитвой, чтобы Онъ даровалъ имъ еще сына, который былъ бы насадителемъ благочестія въ ихъ отечествѣ и прославилъ его. Они давали обѣтъ послѣ того оставаться до смерти въ чистотѣ. Молитва родителей была услышана: у нихъ родился сынъ, котораго въ святомъ крещеніи они назвали Растько, иначе Растиславъ, какъ бы предвидя возрастаніе въ духовной славѣ какъ ихъ сына, такъ вмѣстѣ съ нимъ и ихъ дорогаго отечества. Обрадованные милостью Божіею, родители приложили всѣ старанія къ доброму воспитанію сына. По минованіи лѣтъ младенчества, они помѣстили его въ особыхъ палатахъ, приставили воспитателей и позаботились о своевременномъ обученіи его грамотѣ. далѣе>>

АКАѲИСТЫ

Ака́ѳистъ святи́телю Са́ввѣ, архіепи́скопу Се́рбскому.
Его́ па́мять пра́зднуется се́рбами 14-го Іаннуа́рія, други́ми же правосла́вными 12-го.

Конда́къ 1.

Избра́нный отъ Царя́ си́лъ Го́спода Іису́са Христа́ и призва́нный благода́тію отъ кра́левскаго ро́да во и́ночество и архіере́йство, первосвяти́телю Се́рбскія Це́ркве, богоно́сне о́тче Са́вво, удовли́ на́съ восхваля́ти тя́ съ любо́вію, я́ко богодарова́ннаго па́стыря и учи́теля на́шего; ты́ же, имѣ́я дерзнове́ніе ко Го́споду, вку́пѣ съ отце́мъ и бра́томъ твои́ма по пло́ти, мѵроточи́вымъ Симео́номъ и преподо́бнымъ Си́мономъ, первовѣнча́ннымъ кра́лемъ, моли́ся вы́ну о спасе́ніи всего́ достоя́нія своего́, правосла́внаго наро́да се́рбскаго, и о на́съ грѣ́шныхъ, избавля́я отъ вся́кихъ зо́лъ, бѣ́дъ и скорбе́й, вопію́щія ти́:

Ра́дуйся, святи́телю Са́вво, первопа́стырю и учи́телю Се́рбскій, ди́вный чудотво́рче.

Икосъ 1.

Ра́дуйся, отца́ благочести́ваго и ма́тере благонра́вныя, сы́не Бо́гомъ возлю́бленне; ра́дуйся, еди́наго Бо́га всѣ́мъ се́рдцемъ твои́мъ возлюби́вый; ра́дуйся, рожде́ніемъ твои́мъ роди́теля утѣ́шивый и непло́діе ею́ разрѣши́вый; ра́дуйся, пло́дъ благослове́нный, мно́гими моли́твами испро́шенный; ра́дуйся, кра́левскаго ро́да Не́мани о́трасль святопрозя́бшая; ра́дуйся, Се́рбскія земли́ духо́вная красото́; ра́дуйся, роди́телю твое́ю въ ста́рости утѣше́ніе и ра́дованіе; ра́дуйся, и́ма па́че други́хъ ча́дъ, зѣло́ люби́мый; ра́дуйся, плотоуго́діе еще́ во мла́дости отве́ргнувый; ра́дуйся, о благи́хъ небе́сныхъ па́че не́же о земны́хъ вы́ну помышля́вый; ра́дуйся, чистоты́ душе́вныя и тѣле́сныя до́брый рачи́телю.

Ра́дуйся, святи́телю Са́вво, первопа́стырю и учи́телю Се́рбскій, ди́вный чудотво́рче.

Конда́къ 2.

Ви́дѣвъ суету́ и непостоя́нство сла́вы земны́я, Са́вво богому́дре, устреми́лся еси́ ду́хомъ твои́мъ въ го́рняя ко Го́споду, Иже зря́ твое́ жела́ніе боже́ственное, посла́ къ тебѣ́ и́нока преподо́бнаго изъ святы́я горы́ Аѳо́нскія, его́же поуче́ніемъ наставля́емый, оста́вилъ еси́ роди́теля твоя́ и оте́чество твое́, въ жре́бій же земны́й Пресвяты́я Богоро́дицы на святу́ю го́ру Аѳо́нскую прише́лъ еси́, и та́мо во оби́тели Россíйстѣй водвори́лся еси́, зовы́й немо́лчно съ рабо́тающими Го́сподеви, а́нгельскую пѣ́снь: Аллилу́ія.

Икосъ 2.

Разумѣ́вше отше́ствіе твое́, роди́теля твоя́ пла́кастѣся го́рцѣ, скорбя́ще о твое́мъ лише́ніи, Са́вво преподо́бне, та́же помы́слиша и а́біе посла́ша иска́ти тя́ да́же до Аѳо́на вѣ́рныя слу́ги своя́, я́ко да убѣдя́тъ тя́ къ ни́ма возврати́тися. Ты́ же, свя́те, прише́ствіе по́сланныхъ слу́гъ увѣ́дѣвъ, му́дрѣ съ ни́ми бесѣ́довалъ еси́, та́же отъ ни́хъ удали́вся, на пи́ргъ высо́кій возше́лъ еси́, и та́мо постриже́ніе и́ноческое воспрія́вый, кра́левскую ри́зу твою́, вку́пѣ съ власы́ главы́ твоея́, въ постриже́ніи отъя́тыми, посла́ннымъ тѣ́мъ съ пи́рга пове́рглъ еси́, заповѣ́давъ и́мъ рещи́ роди́телема твои́ма, я́ко сы́нъ ею́ Ра́стко, уже́ и́нокъ Са́вва е́сть. Такову́ю ре́вность твою́ о спасе́ніи помина́юще, зове́мъ ти́ си́це:

Ра́дуйся, владѣ́нія земна́го сла́ву презрѣ́вый; ра́дуйся, роди́теля твоя́ и оте́чество твое́ Христа́ ра́ди оста́вивый; ра́дуйся, на святу́ю Аѳо́нскую го́ру рабо́тати Го́сподеви прише́дый; ра́дуйся, во оби́тели Россíйстѣй та́мо водвори́выйся; ра́дуйся, сея́ оби́тели постри́женецъ бы́вый; ра́дуйся, по́двиги твои́ми о́ную просла́вивый; ра́дуйся, я́ко въ не́й досе́лѣ и́мя твое́ моли́твенно ублажа́ется; ра́дуйся, я́ко оби́тель сія́ тобо́ю свѣ́тло красу́ется; ра́дуйся, по́двиги поста́ и моли́твы отце́въ Аѳо́нскихъ удиви́вый; ра́дуйся, во еди́ной власяни́цѣ босы́ма нога́ма оби́тели Аѳо́нскія обоше́дый; ра́дуйся, тала́нтъ, вруче́нный ти́, умно́живый; ра́дуйся, въ послуша́ніе ста́рцу богому́дрому во оби́тели Ватопе́дстѣй себе́ преда́вый; ра́дуйся, во смире́ніи и терпѣ́ніи зѣло́ преуспѣ́вый.

Ра́дуйся, святи́телю Са́вво, первопа́стырю и учи́телю Се́рбскій, ди́вный чудотво́рче.

Конда́къ 3.

Си́лою Всевы́шняго укрѣпля́емый, свя́тче Бо́жій, по́двиги вели́кія во и́ночествѣ соверша́лъ еси́, во оби́тели Ватопе́дстѣй на Аѳо́нѣ, посто́мъ, бдѣ́ніемъ и вся́кимъ изнуре́ніемъ умерщвля́я пло́ть твою́, мра́зъ и зно́й терпѣ́лъ еси́, а́ки безпло́тный, и бо́съ ходя́й по о́строму ка́мени неуязви́мъ пребыва́лъ еси́, покоря́я пло́ть ду́ху, любо́вію ко Го́споду вы́ну пламенѣ́вый, во е́же пѣ́ти тебѣ́ немо́лчную Ему́ пѣ́снь: Аллилу́ія.

Икосъ 3.

Имѣ́я попече́ніе о спасе́ніи душе́внѣмъ роди́телю твое́ю, о́тче Са́вво, вы́ну моли́лся еси́ о се́мъ Бо́гу. Благíй же Человѣколю́бецъ, творя́й во́лю боя́щихся Его́, внуши́ роди́телема твои́ма писа́ніемъ твои́мъ къ ни́ма зѣло́ умиле́ннымъ, владѣ́ніе земно́е оста́вити и постриже́ніе и́ноческое воспрія́ти. Сего́ ра́ди оте́цъ тво́й, преподо́бный Симео́нъ, изъ Се́рбіи на Аѳо́нъ пріи́де и вку́пѣ съ тобо́ю въ Ватопе́дѣ водвори́ся, съ ни́мъ же тя́ ны́нѣ ублажа́емъ и зове́мъ:

Ра́дуйся, спасе́нія душе́внаго роди́телю твое́ю усе́рдный жела́телю; ра́дуйся, ко оставле́нію сла́вы земны́я, и́ма богому́дрый совѣтода́телю и увѣща́телю; ра́дуйся, прише́ствіемъ къ тебѣ́ на Аѳо́нъ отца́ твоего́ зѣло́ утѣ́шенный; ра́дуйся, спо́стникъ и сомоли́твенникъ ему́ бы́вый; ра́дуйся, по́двиги и́ноческія нести́ ему́ помога́вый; ра́дуйся, не́мощи его́ ста́рческія терпѣли́во носи́вый; ра́дуйся, въ неду́зѣхъ ему́ любвеоби́льно послужи́вый; ра́дуйся, тяготу́ скорбе́й и лише́ній пусты́нныхъ ему́ облегчи́вый; ра́дуйся, по́двиги твои́ми по́двиги о́тчія восполня́вый; ра́дуйся, уго́дника Бо́жія и́стиннаго его́ соверши́вый; ра́дуйся, его́ благослове́ніемъ святы́мъ осѣне́нный; ра́дуйся, вку́пѣ съ ни́мъ отъ вѣ́рныхъ люде́й моли́твенно почита́емый.

Ра́дуйся, святи́телю Са́вво, первопа́стырю и учи́телю Се́рбскій, ди́вный чудотво́рче.

Конда́къ 4.

Бу́рею мо́ря жите́йскаго обурева́емымъ, ти́хое приста́нище на Аѳо́нѣ постро́ити потща́лся еси́, о́тче Са́вво, и́ноческую се́рбскому ро́ду оби́тель, Хиленда́рь имену́ему, ю́же Пресвятѣ́й Богоро́дицѣ посвяти́лъ еси́, хра́мы Бо́жіими и зда́ньми мно́гими сію́ украси́въ, имѣ́ніемъ же дово́льнымъ ю́ снабди́въ, и гра́мматами царе́й утверди́въ, въ не́йже и са́мъ съ роди́телемъ твои́мъ, преподо́бнымъ Симео́номъ, всели́лся еси́ жи́ти. Сего́ ра́ди оби́тель сія́ вы́ о́ба кти́торома свои́ма почита́етъ, и па́мяти ва́ши торжеству́ющи, моле́бно возсыла́етъ хвале́бную пѣ́снь Бо́гу: Аллилу́ія.

Икосъ 4.

Слы́шавъ зва́ніе Бо́жіе преподо́бный Симео́нъ, къ вѣ́чнымъ оби́телемъ его́ призыва́ющее, стяжа́ тя́, Са́вво богоно́сне, моли́твеннаго помо́щника при исхо́дѣ свое́мъ, и на руку́ твое́ю сыно́вню ду́хъ сво́й Го́сподеви предаде́, тѣ́ло же его́ свято́е ты́ съ подоба́ющею че́стію во гро́бѣ мра́морнѣ въ собо́рнѣмъ хра́мѣ Хиленда́рскія оби́тели положи́лъ еси́, и моли́твами твои́ми моще́мъ отца́ твоего́ мѵроточе́нія благода́ть отъ Бо́га испроси́лъ еси́, си́мъ подвиза́я вѣ́рныя лю́ди зва́ти къ тебѣ́:

Ра́дуйся, всеси́льный и богопрія́тный къ Бо́гу моли́твенниче; ра́дуйся, равноа́нгельный человѣ́че; ра́дуйся, я́ко святы́я мо́щи и са́мый гро́бъ отца́ твоего́, по моли́твѣ твое́й къ Бо́гу, мѵ́ро благоуха́нное и цѣле́бное источи́ша; ра́дуйся, я́ко си́мъ зѣло́ обра́дованный Бо́га немо́лчно славосло́вилъ еси́; ра́дуйся, я́ко оте́цъ тво́й преподо́бный, по сме́рти послуша́ніе ди́вное тебѣ́ показа́; ра́дуйся, я́ко по твоему́ проше́нію, изся́кшее отъ гро́ба мѵ́ро, па́ки источи́ся; ра́дуйся, во сла́вѣ святы́хъ отца́ твоего́ та́инственно созерца́вый; ра́дуйся, во свѣ́тломъ видѣ́ніи обѣтова́нія благíя отъ него́ услы́шавый; ра́дуйся, я́ко по за́повѣди отца́ твоего́ мо́щи его́ отъ Аѳо́на въ Се́рбію тобо́ю принесе́ни бы́ша; ра́дуйся, я́ко та́ко въ оби́тели Студе́ницкой со сла́вою мно́гою тобо́ю положе́ни бы́ша; ра́дуйся, прославле́нія отца́ твоего́ въ ли́цѣ святы́хъ вино́вниче; ра́дуйся, святы́я па́мяти его́ усе́рдный почита́телю.

Ра́дуйся, святи́телю Са́вво, первопа́стырю и учи́телю Се́рбскій, ди́вный чудотво́рче.

Конда́къ 5.

Богосія́нное свѣти́ло бы́въ, Са́вво богому́дре, во́лею Пастыренача́льника Іису́са, на свѣ́щницѣ Се́рбскія Це́ркве поста́вленъ бы́лъ еси́, и отъ патріа́рха Вселе́нскаго во архіепи́скопа се́рбскому наро́ду отъ земли́ его́ яви́лся еси́, его́же тща́тельнѣ вездѣ́ и всегда́ поуча́лъ еси́ въ вѣ́рѣ святѣ́й правосла́внѣй тве́рдо и неукло́нно пребыва́ти, богоуго́дно же возноси́ти хвале́бную пѣ́снь Пресвятѣ́й Тро́ицѣ: Аллилу́ія.

Икосъ 5.

Ви́дѣвъ себе́ разлуча́ема съ люби́мою тобо́ю аѳо́нскою пусты́нею, о́тче Са́вво, скорбѣ́лъ еси́ ду́хомъ твои́мъ, оба́че Пресвята́я Богоро́дица яви́ся ти́ въ свѣ́тломъ видѣ́ніи, и обѣтова́ньми по́мощи отъ Нея́ и заступле́нія, скорбя́щую ду́шу утѣши́ и укрѣпи́. Тебѣ́ си́це обра́довану видѣ́ніемъ и бесѣ́дою Цари́цы Небе́сныя, и мы́, земнíи, ра́достно вопіе́мъ:

Ра́дуйся, избра́нный сосу́де Ду́ха Свята́го; ра́дуйся, при хирото́ніи твое́й свѣ́томъ небе́снымъ свы́ше осія́нный; ра́дуйся, таи́нниче Пресвяты́я Тро́ицы; ра́дуйся, собесѣ́дниче Пресвяты́я Богоро́дицы; ра́дуйся, слы́шавый отъ у́стъ Ея́ ми́лостивыя глаго́лы; ра́дуйся, пріе́мый отъ Нея́ обѣтова́ніе по́мощи и заступле́нія; ра́дуйся, равноапо́столный Се́рбскія страны́ первопресто́льниче; ра́дуйся, учреди́телю богоблагослове́нныя іера́рхіи, поставле́ніемъ епи́скоповъ въ Се́рбстѣй держа́вѣ; ра́дуйся, кра́снѣи но́зѣ твои́ напра́вивый къ распростране́нію про́повѣди Ева́нгельскія; ра́дуйся, Се́рбію свѣ́томъ Христо́вымъ соверше́нно просвѣти́вый; ра́дуйся, мно́ги хра́мы Бо́жіи и оби́тели и́ноческія въ не́й воздви́гнувый; ра́дуйся, щедрода́тельный ми́лостыни пода́телю; ра́дуйся, благосе́рдный ни́щихъ пита́телю.

Ра́дуйся, святи́телю Са́вво, первопа́стырю и учи́телю Се́рбскій, ди́вный чудотво́рче.

Конда́къ 6.

Проповѣ́дникъ Правосла́вныя вѣ́ры яви́лся еси́ въ Се́рбіи, Са́вво свяще́нне, егда́ въ собо́рнѣмъ хра́мѣ твое́мъ Жи́чстѣмъ си́мволъ Правосла́вныя вѣ́ры громогла́сно исповѣ́далъ еси́, и се́й исповѣ́дати па́ству твою́ научи́лъ еси́, да вси́ единомы́сленни пребу́дутъ съ тобо́ю, и возмо́гутъ еди́нѣми усты́ и еди́нѣмъ се́рдцемъ пѣ́ти вку́пѣ съ тобо́ю пѣ́снь хвалы́ и благодаре́нія Тріѵпоста́сному Бо́гу: Аллилу́ія.

Икосъ 6.

Возсія́лъ еси́, святи́телю Христо́въ, я́ко звѣзда́ пресвѣ́тлая въ оте́чествѣ твое́мъ земнѣ́мъ, и лю́ди твоя́ въ Правосла́внѣй вѣ́рѣ и благоче́стіи утвержда́лъ еси́ златослове́сными поуче́ніи твои́ми, е́реси же и раско́лы искореня́лъ еси́ мече́мъ сло́ва Бо́жія. Сего́ ра́ди тя́, я́ко а́нгела Бо́жія лю́ди се́рбстіи почита́ху, зову́ще и велегла́сно глаго́люще:

Ра́дуйся, архіере́ю, вла́сть вяза́ти и рѣши́ти досто́йно воспрія́вый; ра́дуйся, іера́рше, во всеору́жіе Христо́во облече́нный; ра́дуйся, па́стырю до́брый, гото́вый ду́шу свою́ положи́ти за богода́нныя ти́ лю́ди и па́ству твою́; ра́дуйся, усе́рдный дѣ́лателю виногра́да Госпо́дня; ра́дуйся, свѣти́льниче, сія́ющій и просвѣща́ющій сердца́ человѣ́ческая; ра́дуйся, лучу́ пресвѣ́тлый Со́лнца пра́вды Христа́; ра́дуйся, чудотворе́нія да́ромъ отъ Го́спода просла́вленный; ра́дуйся, исцѣле́нія мно́гая рука́ма твои́ма соверши́вый; ра́дуйся, разсла́бленнаго моли́твою твое́ю здра́ва сотвори́вый; ра́дуйся, вражду́ единокро́вныхъ благода́тно умиротвори́вый; ра́дуся, въ ста́нъ непрія́зненныхъ еди́нъ ходи́вый; ра́дуйся, словесы́ твои́ми враждова́вшихъ смири́вый; ра́дуйся, уме́ршаго бра́та кра́ля Стефа́на воскреси́вый и жела́ніе его́ испо́лнь, въ и́ночество облекíй его́, наре́кши Си́мономъ.

Ра́дуйся, святи́телю Са́вво, первопа́стырю и учи́телю Се́рбскій, ди́вный чудотво́рче.

Конда́къ 7.

Хотѣ́ніе еди́но имѣ́лъ еси́, свя́тче Бо́жій, е́же Бо́гу благоугожда́ти и спасе́нію душе́вному бли́жнихъ твои́хъ служи́ти. Сего́ ра́ди не да́лъ еси́ сна́ очи́ма твои́ма, ни вѣ́ждома дрема́нія, нелѣ́ностно подвиза́яся во бла́го святы́я Це́ркве Се́рбскія и во спасе́ніе и по́льзу ввѣ́ренныхъ ти́ отъ Бо́га благовѣ́рныхъ люде́й, и вои́стинну содѣ́лался еси́ сто́лпъ Правосла́вія и сохране́ніе наро́да се́рбскаго непоколеби́мое, и́же тя́ неле́стно хва́литъ и зове́тъ укрѣпи́вшему тя́ Це́ркве Зижди́телю Христу́: Аллилу́ія.

Икосъ 7.

Но́ваго тя́ Никола́я Мѵрликíйскаго и Златоу́ста Царегра́дскаго стяжа́ земля́ Се́рбская: чудесы́ бо твои́ми пе́рвому подо́бенъ бы́лъ еси́, златослове́сными же уче́ніи второ́му подража́лъ еси́, святи́телю о́тче на́шъ Са́вво, вои́стинну досто́йный благохвале́ній таковы́хъ:

Ра́дуйся, немо́лчный проповѣ́дниче Ева́нгелія Христо́ва; ра́дуйся, вѣ́рный послѣ́дователю преда́ній апо́стольскихъ; ра́дуйся, святы́хъ богоно́сныхъ оте́цъ нра́вы себѣ́ усво́ивый; ра́дуйся, те́плый моли́твенниче о душа́хъ на́шихъ; ра́дуйся, неусы́пное моле́ніе въ типика́рницѣ каре́йстѣй на Аѳо́нѣ соверша́ти повелѣ́вый; ра́дуйся, благовре́менно и безвре́менно па́ству твою́ благоче́стію поуча́вый; ра́дуйся, мечу́, е́реси и раско́лы посѣка́яй; ра́дуйся, гро́ме, соблазни́телей устраша́яй; ра́дуйся, оби́димыхъ засту́пниче; ра́дуйся, вдо́въ и сиро́тъ благодѣ́телю; ра́дуйся, скорбя́щихъ утѣ́шителю; ра́дуйся, ка́ющихся съ Бо́гомъ примири́телю; ра́дуйся, отроко́въ богому́дрый наказа́телю; ра́дуйся, младе́нцевъ любвеоби́льный покрови́телю и богому́дрый наста́вниче.

Ра́дуйся, святи́телю Са́вво, первопа́стырю и учи́телю Се́рбскій, ди́вный чудотво́рче.

Конда́къ 8.

Стра́нникъ и пришле́цъ восхотѣ́лъ еси́, Христа́ ра́ди бы́ти, святи́телю Са́вво, подража́яй Спа́су ду́шъ на́шихъ, не имѣ́вшему гдѣ́ главу́ приклони́ти, Его́же ра́ди ты́ оте́чество твое́ оста́вилъ еси́, и на поклоне́ніе святы́мъ мѣсто́мъ въ разли́чныя страны́ поте́клъ еси́, съ вѣ́рою и любо́вію святы́нямъ въ ни́хъ покланя́яся, ми́лостыню же мно́гу це́рквамъ, оби́телемъ и ни́щимъ раздава́я и воспѣва́я при́сно Бо́гу: Аллилу́ія.

Икосъ 8.

Ве́сь въ Бо́зѣ бы́вый, святи́телю преподо́бне, о Бо́зѣ стопѣ́ твои́ стра́нничестѣи напра́вилъ еси́ и во святѣ́мъ гра́дѣ Іерусали́мѣ, мѣста́ свята́я, житіе́мъ и страда́ніемъ Христа́ Спаси́теля ознамено́ванная, моли́твенно обходи́лъ еси́, си́мъ покланя́яся и сле́зы те́плыя отъ о́чію твое́ю излива́я, я́ко же́ртву любве́ твоея́ къ пострада́вшему на́съ ра́ди Го́споду, Иже внуша́етъ на́мъ вопи́ти тебѣ́:

Ра́дуйся, му́дрый стра́нниче, искíй оте́чествія небе́снаго; ра́дуйся, Христо́въ избра́нниче, презрѣ́вый вся́ бла́га земна́я; ра́дуйся, свята́го гра́да Іерусали́ма до́льняго благоговѣ́йный покло́нниче; ра́дуйся, свѣ́тлаго гра́да Іерусали́ма го́рняго усе́рдный и му́дрый иска́телю; ра́дуйся, Царьгра́дъ, Палести́ну, Еги́петъ, Сина́й и Аѳо́нъ посѣти́вый; ра́дуйся, Ливíю, Ѳиваи́ду, Антіохíю, Сирíю и Арме́нію обходи́вый; ра́дуйся, по мо́рю и су́ши многотру́дно путеше́ствовавый; ра́дуйся, мно́гія вели́кія святы́ни въ пути́ твое́мъ собра́вый; ра́дуйся, отъ па́стырей Правосла́вныя Це́ркве вездѣ́ съ любо́вію и че́стію пріе́млемый; ра́дуйся, отъ ни́щихъ и убо́гихъ за благотворе́нія твоя́ благословля́емый; ра́дуйся, плѣ́нниковъ свободи́телю; ра́дуйся, пустынножи́телей утѣ́шителю.

Ра́дуйся, святи́телю Са́вво, первопа́стырю и учи́телю Се́рбскій, ди́вный чудотво́рче.

Конда́къ 9.

Вси́ и́ноцы вели́кія Ла́вры преподо́бнаго Са́ввы Освяще́ннаго съ ра́достію срѣто́ша тя́, богому́дре Са́вво, егда́ къ ни́мъ на поклоне́ніе прише́лъ еси́, и позна́ша тя́ ди́внаго прише́льца, отъ лѣ́тъ дре́внихъ и́мъ обѣтова́ннаго. Тѣ́мже тебѣ́, я́ко досто́йному, же́злъ преподо́бнаго Са́ввы Освяще́ннаго и двѣ́ ико́нѣ Богоро́дични чудотво́рнѣи, Троеру́чицы и Млекопита́тельницы имену́емѣи, на благослове́ніе дарова́ша ти́, пою́ще гла́сы преподо́бными Творцу́ вся́ческихъ Бо́гу: Аллилу́ія.

Икосъ 9.

Вѣтíйство человѣ́ческое не довлѣ́етъ къ прославле́нію мно́гихъ чуде́съ твои́хъ, святи́телю іера́рше приснопа́мятне: мо́ре бо волну́ющееся моли́твою твое́ю укроти́лъ еси́, и ры́бу ди́вно изъ глубины́ морскíя въ корабли́ прія́лъ еси́, неду́жныя возложе́ніемъ руку́ твое́ю исцѣля́лъ еси́ и ме́ртвыя пресла́вно воскреша́лъ еси́, я́ко вѣ́рный учени́къ Христа́ Бо́га. Тѣ́мже тебѣ́ вопіе́мъ хвале́бно, ублажа́я тя́ си́це:

Ра́дуйся, обѣтова́ній Ева́нгельскихъ исполне́ніе пріе́мый; ра́дуйся, смире́ніемъ высо́кая стяжа́вый; ра́дуйся, врачу́ безме́здный, исцѣля́яй неду́ги душе́вныя и тѣле́сныя; ра́дуйся, цѣле́бниче благода́тный въ болѣ́знехъ съ вѣ́рою къ тебѣ́ притека́ющимъ; ра́дуйся, я́ко ру́цѣ твои́ честнѣ́и ору́дія цѣле́бъ яви́стася; ра́дуйся, я́ко се́ю возложе́ніемъ моли́твеннымъ, боля́щимъ здра́віе подава́лъ еси́; ра́дуйся, я́ко въ чужды́хъ страна́хъ пребыва́я, и́мя Христо́во чудесы́ твои́ми прославля́лъ еси́; ра́дуйся, я́ко отъ гра́да въ гра́дъ преходя́, вѣ́рныя во благоче́стіи утвержда́лъ еси́; ра́дуйся, я́ко отъ восто́ка и до за́пада хва́льно бы́сть и́мя твое́; ра́дуйся, я́ко бли́жнихъ и да́льнихъ усе́рдно ко Христу́ приводи́лъ еси́; ра́дуйся, вселе́нную я́ко со́лнце пресвѣ́тлое, обтекíй; ра́дуйся, я́ко луна́ по́лная богоуго́дное тече́ніе соверши́вый.

Ра́дуйся, святи́телю Са́вво, первопа́стырю и учи́телю Се́рбскій, ди́вный чудотво́рче.

Конда́къ 10.

Спасе́нія наде́жду несумнѣ́нную имѣ́я, святи́телю уго́дниче Бо́жій, во гра́дъ Те́рновъ прише́лъ еси́ и здѣ́ коне́цъ стра́нствія земна́го соверши́лъ еси́, почи́въ о Го́сподѣ кончи́ною пра́ведною и свято́ю, е́ю же мно́гъ пла́чь земли́ Се́рбстѣй сотвори́лъ еси́. Оба́че вѣ́руемъ, о́тче и архіере́ю на́шъ, я́ко а́ще и внѣ́ оте́чества, по смотре́нію Госпо́дню почи́лъ еси́, неразлу́ченъ же съ ни́мъ ду́хомъ твои́мъ пребыва́еши и вы́ну мо́лишися Бо́гу о воспѣва́ющихъ Ему́ пѣ́снь: Аллилу́ія.

Икосъ 10.

Царя́ Небе́снаго Христа́ вѣ́рный ра́бъ и служи́тель бы́лъ еси́, богоно́сне о́тче на́шъ Са́вво, и а́ще почи́лъ еси́ о Го́сподѣ сно́мъ сме́рти, оба́че чудотвори́ти не престае́ши и по сме́рти: свяще́нная и всечестна́я ра́ка твоя́ враче́бница яви́ся неду́гомъ человѣ́ческимъ, и са́мая пе́рсть отъ гро́ба твоего́ цѣле́бна бы́сть, я́ко всѣ́мъ зва́ти тебѣ́:

Ра́дуйся, первопресто́льниче свя́те Се́рбскія страны́, со святы́ми почива́яй; ра́дуйся, уго́дниче Христо́въ, и по сме́рти пресла́вно чудодѣ́йствуяй; ра́дуйся, гра́дъ Те́рновъ преподо́бною твое́ю кончи́ною освяти́вый; ра́дуйся, Бо́лгарскую страну́ чудесы́ твои́ми благода́тно озари́вый; ра́дуйся, по жела́нію твоему́ въ по́двизѣ стра́нствія жи́знь сконча́вый; ра́дуйся, внѣ́ оте́чества твоего́ сно́мъ сме́ртнымъ опочи́вый; ра́дуйся, я́ко сме́рть твоя́ честна́ предъ Го́сподемъ; ра́дуйся, я́ко успе́ніе твое́ торжеству́етъ свята́я Правосла́вная Це́рковь; ра́дуйся, я́ко архистрати́гъ Се́рбскія страны́, во́емъ ея́ во бра́нехъ побора́яй; ра́дуйся, покро́вомъ моли́твъ твои́хъ па́ству твою́ при́сно соблюда́яй; ра́дуйся, просвѣще́нія духо́внаго распространи́телю и насади́телю; ра́дуйся, младе́нцевъ и отроко́въ любвеоби́льный наста́вниче, учи́лищъ же христіа́нскихъ покрови́телю и озари́телю.

Ра́дуйся, святи́телю Са́вво, первопа́стырю и учи́телю Се́рбскій, ди́вный чудотво́рче.

Конда́къ 11.

Пѣ́ніемъ моле́бнымъ честву́емъ тя́ и велича́емъ, святи́телю, Бо́жій уго́дниче, и вѣ́рно соверша́емъ святу́ю па́мять твою́: а́ще бо и въ Се́рбіи просія́лъ еси́, вся́ же Це́рковь вселе́нныя стяжа́ тя до́бля побо́рника, предста́теля и моли́твенника ко Го́споду. Тѣ́мже, помина́я житіе́ твое́ богоуго́дное и мно́гія по́двиги твоя́ и чудеса́, прославля́емъ просла́вльшаго тя́ Го́спода Іису́са, и смиренному́дренно вопіе́мъ Ему́: Аллилу́ія.

Икосъ 11.

Свѣ́тлостію чуде́съ сія́я, любо́вь твою́ къ Се́рбіи показа́лъ еси́, равноапо́стольне святи́телю Са́вво, егда́ благоволи́лъ еси́ принесе́ннымъ бы́ти святы́мъ моще́мъ твои́мъ въ оте́чество твое́ земно́е; ты́ бо отечестволю́бецъ бы́въ при жи́зни, и по успе́ніи таковы́мъ яви́лся еси́, и къ лю́бящей тя́ па́ствѣ твое́й возврати́тися моща́ми твои́ми восхотѣ́лъ еси́, да возвесели́ши ча́дъ твои́хъ, тебѣ́ вопію́щихъ:

Ра́дуйся, началопа́стырю Се́рбскій, па́ству твою́ моли́твенно назира́яй; ра́дуйся, благíй предста́телю съ вѣ́рою тя́ призыва́ющихъ; ра́дуйся, я́ко моще́мъ твои́мъ святы́мъ въ Се́рбію принесе́ннымъ бы́ти восхотѣ́лъ еси́; ра́дуйся, я́ко во́лю твою́ о се́мъ царю́ Бо́лгарскому Асе́ну въ видѣ́ніи возвѣсти́лъ еси́; ра́дуйся, со сла́вою и че́стію изъ Те́рнова въ Се́рбію принесе́нный; ра́дуйся, въ собо́рнѣмъ хра́мѣ Миле́шевы, я́ко твоея́ ка́ѳедры, съ любо́вію прія́тый и че́стно положе́нный; ра́дуйся, брата́ничемъ твои́мъ, Се́рбскимъ кра́лемъ Владисла́вомъ, благоговѣ́йно почита́емый; ра́дуйся, прее́мникомъ твои́мъ, святи́телемъ Арсе́ніемъ, моли́твенно ублажа́емый; ра́дуйся, всѣ́ми людьми́ се́рбскими ра́достно прія́тый; ра́дуйся, прише́ствіемъ твои́мъ печа́ль па́ствы твоея́ утоли́вый; ра́дуйся, чудесы́ мно́гими отъ гро́ба твоего́ свя́тость твою́ озна́меновавый; ра́дуйся, поля́, го́ры и де́бри ше́ствіемъ освяти́вый; ра́дуйся, богоуго́днымъ житіе́мъ, му́дростію и вели́кимъ тща́ніемъ Правосла́віе въ наро́дѣ свое́мъ утверди́вый; ра́дуйся, благода́тнымъ заступле́ніемъ и по отше́ствіи твое́мъ его́ сохраня́яй; ра́дуйся, а́нгеле житіе́мъ, проро́че благода́тію Свята́го Ду́ха, апо́столе благовѣствова́ніемъ, му́чениче исповѣ́даніемъ.

Ра́дуйся, святи́телю Са́вво, первопа́стырю и учи́телю Се́рбскій, ди́вный чудотво́рче.

Конда́къ 12.

Благода́ти Бо́жія сокро́вище, святы́я и нетлѣ́нныя мо́щи твоя́, Са́вво, о́тче на́шъ, грѣ́хъ ра́ди на́шихъ отъ нечести́выхъ ага́рянъ, враго́въ христіа́нскихъ, огню́ пре́дани бы́ша. Оба́че вѣ́руемъ, я́ко ты́ и ны́нѣ съ на́ми еси́, я́коже и пре́жде, егда́ благоволи́лъ еси́ моща́ми твои́ми ви́димо ро́дъ сво́й утѣша́ти, и моли́твами твои́ми на́съ сохраня́еши отъ вся́каго зла́. Тѣ́мже покланя́ющеся мѣ́сту свято́му, на не́мже мо́щи твоя́ злочести́выми огню́ преда́шася, лобыза́емъ пе́рсть, и́ми освяще́нную, и пое́мъ Бо́гу: Аллилу́ія.

Икосъ 12.

Пою́ще свято́е и богоуго́дное житіе́ твое́ и мно́гая пресла́вная чудотворе́нія твоя́, святи́телю о́тче на́шъ Са́вво, смире́нно про́симъ тя́: не возгнуша́йся на́шихъ не довлѣ́ющихъ похва́лъ, и́миже тя́, отъ усе́рдія на́шего че́ствовати дерза́емъ, но приклони́ся ми́лостивно къ зову́щимъ ти́ всеусе́рдно хвале́нія такова́я:

Ра́дуйся, сострада́тельный и любвеоби́льный Се́рбскія страны́ и неусы́пный храни́телю; ра́дуйся, я́ко съ не́ю вку́пѣ отъ злы́хъ ага́рянъ въ моще́хъ твои́хъ о́гненное искуше́ніе прія́вый; ра́дуйся, столпо́мъ сія́ющимъ до небе́съ надъ сожига́емыми моща́ми твои́ми, свя́тость и́хъ чуде́снѣ прояви́вый; ра́дуйся, соже́гшаго мо́щи твоя́ воево́ду ага́рянскаго гро́зно наказа́вый; ра́дуйся, и по сожже́ніи моще́й твои́хъ чудотвори́ти непреста́вый; ра́дуйся, и са́мое мѣ́сто сожже́нія и́хъ благода́ти прича́стно сотвори́вый; ра́дуйся, въ видѣ́ніихъ и со́ніихъ вѣ́рныя посѣща́яй; ра́дуйся, бли́жнимъ и да́льнимъ по́мощь твою́ подава́яй; ра́дуйся, Правосла́вныя Це́ркве боголѣ́пное украше́ніе; ра́дуйся, архіере́евъ сла́во и похвало́; ра́дуйся, въ ли́цѣ преподо́бныхъ сія́ющая звѣздо́; ра́дуйся, по Бо́зѣ и Богоро́дицѣ, крѣ́пкое на́ше упова́ніе.

Ра́дуйся, святи́телю Са́вво, первопа́стырю и учи́телю Се́рбскій, ди́вный чудотво́рче.

Конда́къ 13.

О, пресвяты́й и преди́вный чудотво́рче, святи́телю о́тче на́шъ Са́вво, Се́рбскія страны́ покрови́телю и всѣ́хъ правосла́вныхъ христіа́нъ предста́телю! Пріими́ ми́лостивно сіе́ ма́лое моле́ніе на́ше, въ похвалу́ тебѣ́ приноси́мое, и моли́твами твои́ми ко Го́споду, изба́ви на́съ отъ бѣ́дъ вре́менныхъ и вѣ́чныхъ, и сподо́би на́съ вку́пѣ съ тобо́ю въ Ца́рствіи небе́снѣмъ пѣ́ти Бо́гу, Спаси́телю на́шему: Аллилу́ія.

[Се́й конда́къ глаго́ли три́жды. И па́ки чте́тся 1-й и́косъ: Ангельскую чистоту́ отъ ю́ности возлюби́въ... и за си́мъ конда́къ 1-й: Избра́нный отъ Царя́ си́лъ...]

Моли́тва пе́рвая.

О, свяще́нная главо́, пресла́вный чудотво́рче, святи́телю Христо́въ Са́вво, Се́рбскія земли́ первопресто́льниче, храни́телю и просвѣти́телю, всѣ́хъ же христіа́нъ благонаде́жный предъ Го́сподемъ предста́телю! Тебѣ́ припа́даемъ и мо́лимся: да́ждь на́мъ бы́ти прича́стникомъ любве́ твоея́ къ Бо́гу и бли́жнему, е́ю же при жи́зни свята́я душа́ твоя́ преиспо́лнена бы́сть. Озари́ на́съ и́стиною, просвѣти́ у́мъ и се́рдце на́ше свѣ́томъ Боже́ственнаго уче́нія, научи́ на́съ тебѣ́ подража́ти вѣ́рно, Бо́га и бли́жняго на́шего люби́ти и за́повѣди Госпо́дни соверша́ти непогрѣши́тельно, да бу́демъ и мы́ ча́да твоя́, не по и́мени то́кмо, но всѣ́мъ житіе́мъ на́шимъ. Моли́ся, святы́й архіере́ю, о святѣ́й Правосла́внѣй Це́ркви и оте́чествѣ твое́мъ земнѣ́мъ, при́сно тя́ любо́вію чту́щемъ. При́зри благоутро́бно на вся́ку ду́шу вѣ́рныхъ твои́хъ чти́телей, ми́лости и по́мощи твоея́ и́щущихъ, бу́ди всѣ́мъ на́мъ въ болѣ́знехъ цѣли́тель, въ ско́рбехъ утѣ́шитель, въ печа́лехъ посѣти́тель, въ бѣда́хъ и ну́ждахъ помо́щникъ, въ ча́съ же сме́ртный ми́лостивый покрови́тель и защи́титель, да по́мощію моли́твъ твои́хъ святы́хъ, сподо́бимся и мы́ грѣ́шніи спасе́ніе вѣ́рное получи́ти и Ца́рствіе Христо́во унаслѣ́довати. Ей, свя́тче Бо́жій, не посрами́ упова́нія на́шего, е́же на тя́ крѣ́пко возлага́емъ, но яви́ на́мъ твое́ многомо́щное заступле́ніе, да сла́вимъ и пое́мъ ди́внаго во святы́хъ Свои́хъ Бо́га Отца́ и Сы́на и Свята́го Ду́ха, всегда́, ны́нѣ и при́сно и во вѣ́ки вѣко́въ. Ами́нь.

Моли́тва втора́я.

Во святи́телехъ вели́кое украше́ніе, богому́дре о́тче Са́вво, мо́лимся раби́ твои́ и припа́дающе, вопіе́мъ ти́: не оста́ви свои́хъ ча́дъ, о́тче, но бу́ди всегда́ съ на́ми, я́коже обѣща́лся еси́, да и мы́ по до́лгу воспое́мъ тя́, ублажи́мъ тя́ и просла́вимъ вели́чіе и си́лу твою́ и досто́йную пѣ́снь принесе́мъ ти́, вопію́ще и глаго́люще: тебе́ ублажа́емъ, святи́телю; тебе́ воспѣва́емъ, свѣти́льниче; тебе́ покланя́емся, о́тче Са́вво! Моли́, мо́лимтися, спасти́ся пою́щимъ святу́ю твою́ па́мять. Ами́нь.

Тропа́рь святи́телю Са́ввѣ, гла́съ 3:

Пути́, вводя́щаго въ жи́знь, наста́вникъ, и первопресто́льникъ, и учи́тель бы́лъ еси́: пе́рвѣе бо прише́дъ, святи́телю Са́вво, оте́чество твое́ просвѣти́лъ еси́ и, породи́въ то́е Ду́хомъ Святы́мъ, я́ко древа́ ма́слинная, въ мы́сленнѣмъ раи́ насади́лъ еси́ всеосвяще́нная твоя́ ча́да. Тѣ́мъ, я́ко апо́столомъ и святи́телемъ сопресто́льна чту́ще тя́, мо́лимъ: моли́ Христа́ Бо́га дарова́ти на́мъ ве́лію ми́лость.

Сла́ва, и ны́нѣ, богоро́диченъ:

Тя́, хода́тайствовавшую спасе́ніе ро́да на́шего, воспѣва́емъ, Богоро́дице Дѣ́во: пло́тію бо, отъ Тебе́ воспрія́тою, Сы́нъ Тво́й и Бо́гъ на́шъ, Кресто́мъ воспріи́мъ стра́сть, изба́ви на́съ отъ тли́, я́ко Человѣколю́бецъ.

Конда́къ, гла́съ 8:

Яко первосвяти́теля вели́каго и апо́столовъ соо́бщника, Це́рковь прославля́етъ тя́ люде́й твои́хъ, преподо́бне, но я́ко имѣ́я дерзнове́ніе ко Христу́ Бо́гу, моли́твами твои́ми отъ вся́кихъ на́съ бѣ́дъ спаса́й, да зове́мъ ти́: ра́дуйся, о́тче Са́вво богому́дре.

Велича́ніе:

Велича́емъ тя́, святи́телю о́тче Са́вво, и чте́мъ святу́ю па́мять твою́, ты́ бо мо́лиши за на́съ Христа́ Бо́га на́шего.

Источникъ: Ака́ѳистъ Пресвятѣ́й Богоро́дицѣ, предъ ико́ною Ея́ имену́емою Троеру́чица. — Ака́ѳистъ святи́телю Са́ввѣ, архіепи́скопу Се́рбскому. — Моли́твы о спасе́ніи Се́рбскаго наро́да, наро́чито на Ко́совѣ и въ Мето́хіи. — Изданіе Русско-Сербскаго Братства святыхъ Царя Николая и владыки Николая. — М., 2008. — С. 39-79.

/ Къ оглавленію раздѣла /


Наверхъ / Къ титульной страницѣ

0