Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - пятница, 22 сентября 2017 г. Сейчасъ на порталѣ посѣтителей - 12.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ДОМАШНЯЯ МОЛИТВА

Прав. Іосифъ Обручникъ († ок. 30 г.)

Святой праведный Иосиф, обручник Пресвятой Девы МарииСв. и праведный старецъ Іосифъ происходилъ изъ царскаго рода Давида (Матѳ. 1, 6; Лук. 1, 27). Св. Евангелистъ называетъ его «праведнымъ» (Матѳ. 1, 18), что, по замѣчанію св. Іоанна Златоуста, показываетъ, что обрученникъ Пресвятыя Дѣвы «имѣлъ всѣ добродѣтели». Онъ жилъ въ Назаретѣ и снискивалъ пропитаніе трудами рукъ своихъ, будучи древодѣломъ, т. е. плотникомъ. Какъ человѣкъ строго благочестивый, Іосифъ былъ вполнѣ достойнымъ великой чести — быть ближайшимъ зрителемъ исполненія «великой тайны благочестія» (1 Тим. 3, 16). Онъ былъ уже 80-лѣтнимъ старцемъ и много лѣтъ жилъ во вдовствѣ, когда застигло его избраніе Промысла Божія быть хранителемъ дѣвства Пресвятой Богородицы, давшей обѣтъ безбрачія. О воплощеніи черезъ Нее Сына Божія ему возвѣстилъ ангелъ. Святой Іосифъ присутствовалъ при поклоненіи пастырей новорожденному Богомладенцу и при поклоненіи Ему волхвовъ. По указанію ангела онъ бѣжалъ съ Матерью Божіей и Богомладенцемъ Іисусомъ въ Египетъ, спасая Ихъ отъ гнѣва царя Ирода. Въ Египтѣ онъ жилъ съ Дѣвой Маріей и Богомладенцемъ, зарабатывая на Ихъ пропитаніе трудомъ плотника. Іосифу не суждено было видѣть страданій Іисуса Христа, Его смерти и воскресенія. Преданіе говоритъ, что онъ жилъ 110 лѣтъ и умеръ не задолго до времени вступленія Спасителя на служеніе человѣчеству. Память прав. Іосифа — въ недѣлю по Рождествѣ Христовѣ и въ недѣлю свв. праотецъ).

АКАѲИСТЫ

Ака́ѳистъ свято́му и пра́ведному Іо́сифу, обру́чнику Пресвяты́я Дѣ́вы Марíи.

Конда́къ 1.

Избра́нный храни́телю Пресвяты́я Дѣ́вы Марíи, пѣ́стуне и корми́телю Богочеловѣ́ка, пра́ведный Іо́сифе, прославля́я служе́ніе твое́ неизрече́ннѣй та́йнѣ воплоще́нія Бо́га Сло́ва, похва́льная воспису́емъ ти́. Ты́ же ны́нѣ, предстоя́ престо́лу Христа́ Бо́га на́шего, и имѣ́я ве́ліе дерзнове́ніе къ Нему́, моли́ся о на́съ, взыва́ющихъ ти́:

Ра́дуйся, пра́ведный Іо́сифе, ско́рый помо́щниче и моли́твенниче о душа́хъ на́шихъ.

Икосъ 1.

Ра́дуйся, честна́я о́трасле отъ ко́рене Іессе́ова. Ра́дуйся, вну́трь украше́нный ца́рскимъ вели́чіемъ. Ра́дуйся, ску́достію въ земно́мъ духо́вное стяжа́вый бога́тство. Ра́дуйся, безвѣ́стностью сла́ву вѣ́чную обрѣты́й. Ра́дуйся, сла́вный па́че царе́й. Ра́дуйся, пра́ведный па́че патріа́рховъ и пра́отцевъ.

Ра́дуйся, пра́ведный Іо́сифе, ско́рый помо́щниче и моли́твенниче о душа́хъ на́шихъ.

Конда́къ 2.

Ви́дя Дѣ́ву Марíю, при хра́мѣ воспита́вшуюся, совершеннолѣ́тню су́щу, первосвяще́нникъ Заха́рія возопи́ ко Го́споду: Го́споди, покажи́ му́жа, досто́йнаго обручи́тися съ Дѣ́вою; егда́ же процвѣте́ же́злъ Іо́сифа, вруча́я ему́ Дѣ́ву, воспѣва́ше Бо́гу: Аллилу́ія.

Икосъ 2.

Разу́мна е́сть всѣ́мъ конце́мъ земли́ пра́ведность твоя́, святы́й Іо́сифе, я́ко несравне́нныя че́сти сподо́бился еси́ обру́ченникомъ бы́ти Преблагослове́нныя Дѣ́вы, изъ Нея́же безму́жно произы́де Христо́съ Бо́гъ. Ты́ бо крѣ́пкія ра́ди вѣ́ры, чистоты́, смире́нія и преспѣ́янія во всѣ́хъ добродѣ́телехъ на сіе́ избра́нъ бы́лъ еси́. Тѣ́мже взыва́емъ ти́:

Ра́дуйся, пра́ведне Чистѣ́йшей обручи́выйся. Ра́дуйся, му́же вѣ́ры, прія́вшій подъ кро́въ сво́й святу́ю Дѣ́ву Марíю, вѣ́рою содѣ́лавшуюся Престо́ломъ Бо́жіимъ. Ра́дуйся, смире́нный ду́хомъ. Ра́дуйся, про́стый се́рдцемъ. Ра́дуйся, добродѣ́телями преукраше́нный. Ра́дуйся, святы́й, Святѣ́йшей послужи́вшій.

Ра́дуйся, пра́ведный Іо́сифе, ско́рый помо́щниче и моли́твенниче о душа́хъ на́шихъ.

Конда́къ 3.

Си́ла Вы́шняго осѣни́ тогда́ къ зача́тію Неискусобра́чную, ди́вной та́йны не вѣ́дущу Іо́сифу, да отъ Самого́ Бо́га науче́нный, возопіе́тъ къ Нему́: Аллилу́ія.

Икосъ 3.

Иму́щую богопрія́тную утро́бу Дѣ́ву ви́дѣвъ, Іо́сифъ смяте́ся, зря́ не къ бра́чнѣй и бракоокра́дованную помышля́я; но пра́веденъ сы́й, восхотѣ́ Ю та́й пусти́ти, Бо́гу, вѣ́дущему вся́, су́дъ ввѣря́я и на́съ научи́въ взыва́ти къ нему́:

Ра́дуйся, цѣлому́дрія ревни́телю. Ра́дуйся, изра́ильтянине, въ не́мже льсти́ нѣ́сть. Ра́дуйся, благíй се́рдцемъ. Ра́дуйся, кро́ткій нра́вы. Ра́дуйся, все́ упова́ніе на Бо́га полага́яй. Ра́дуйся, промышле́нію Его́ себе́ и други́хъ ввѣря́яй.

Ра́дуйся, пра́ведный Іо́сифе, ско́рый помо́щниче и моли́твенниче о душа́хъ на́шихъ.

Конда́къ 4.

Бу́рю помышле́ній сумни́тельныхъ цѣлому́дреннаго Іо́сифа укроща́я, а́нгелъ открыва́етъ та́йну рожде́нія отъ Безневѣ́стныя Марíи Сы́на Бо́жія, Спаси́теля мíра, я́коже глаго́ла: и нарече́ши и́мя Ему́ Іису́съ, То́й бо спасе́тъ лю́ди Своя́ отъ грѣ́хъ и́хъ, Ему́же вопіе́мъ вси́: Аллилу́ія.

Икосъ 4.

Слы́шавъ въ писа́ніи Го́спода, глаго́лющаго: се́ Дѣ́ва въ чре́вѣ пріи́метъ и роди́тъ сы́на Емману́ила, вѣ́ровалъ еси́, пра́ведный Іо́сифе, глаго́ланному отъ а́нгела, я́ко кни́гу запечатлѣ́нную, въ не́йже пе́рстомъ Отчимъ написа́ся Сло́во, прія́лъ еси́ Марíю въ до́мъ сво́й, я́ко ра́бъ, служа́ Непоро́чнѣй со стра́хомъ и ре́вностію. Сего́ ра́ди взыва́емъ ти́:

Ра́дуйся, я́ко приложи́лъ еси́ се́рдце твое́ къ позна́нію зако́на Бо́жія. Ра́дуйся, я́ко откры́лъ еси́ смы́слъ тво́й къ приня́тію та́инъ Бо́жіихъ. Ра́дуйся, я́ко пре́жде всѣ́хъ люде́й сподо́бился еси́ увѣ́дѣти ве́лію благоче́стія та́йну, я́ко на земли́ яви́ся Бо́гъ. Ра́дуйся, я́ко позна́лъ еси́ прише́ствіе Его́ бы́ти ра́ди спасе́нія люде́й отъ грѣ́хъ и́хъ. Ра́дуйся, я́ко несомнѣ́нно увѣ́ровалъ еси́, я́же бы́ша тебѣ́ открове́на. Ра́дуйся, я́ко вѣ́ра вмѣни́ся тебѣ́ въ пра́вду.

Ра́дуйся, пра́ведный Іо́сифе, ско́рый помо́щниче и моли́твенниче о душа́хъ на́шихъ.

Конда́къ 5.

Богоизбра́нную Отрокови́цу пріи́мши въ до́мъ сво́й, блаже́нне Іо́сифе, люби́лъ еси́ Ю, я́ко обру́чницу, почита́лъ еси́ Ю, я́ко Пречи́стую Дѣ́ву и Ма́терь Спаси́теля мíра, и служи́лъ Ей со стра́хомъ и благоговѣ́ніемъ, вседу́шно подвиза́яся, да соверша́тся вся́ въ зако́нѣ и проро́цѣхъ пи́санная, и ку́пно съ Марíею вопія́ Бо́гу: Аллилу́ія.

Икосъ 5.

Ви́дѣвъ въ я́слехъ Виѳлее́мскихъ Звѣзду́, возсія́вшую отъ Іа́кова, пе́рвый поклони́лся еси́ Рожде́нному, и егда́ не́бо звѣзду́, а́нгели пѣ́ніе, па́стыри исповѣ́даніе и волсви́ поклоне́ніе и да́ры приноша́ху Ему́, ты́ же, пра́ведный Іо́сифе, всего́ себе́ прине́слъ еси́ въ да́ръ Го́споду, и жи́знь, и попече́нія, и труды́ отдава́я на служе́ніе Ему́. Сего́ ра́ди вопіе́мъ ти́:

Ра́дуйся, узрѣ́вшій пре́жде всѣ́хъ восхожде́ніе на земли́ незаходи́маго Со́лнца пра́вды. Ра́дуйся, пе́рвый на земли́ свидѣ́телю и служи́телю воплоще́нія Сы́на Бо́жія, пре́жде вѣ́къ отъ Отца́ рожде́ннаго. Ра́дуйся, те́ктоне земны́й, сподо́бивыйся и́мени отца́ Архите́ктона Небе́снаго. Ра́дуйся, храни́телю и попечи́телю Отроча́ти, Ему́же со стра́хомъ слу́жатъ чи́ны а́нгельскіе. Ра́дуйся, благоговѣ́йный служи́телю Ма́тери Бо́га Сло́ва.

Ра́дуйся, пра́ведный Іо́сифе, ско́рый помо́щниче и моли́твенниче о душа́хъ на́шихъ.

Конда́къ 6.

Проповѣ́даннаго зако́номъ и проро́ки я́ко человѣ́ка осмодне́вна обрѣ́залъ еси́, и храни́мое въ Тро́ичномъ совѣ́тѣ и́мя Іису́съ, я́ко драгоцѣ́нный би́серъ отъ сокро́вищъ пренебе́сныхъ принесе́нный, во открове́ніе всѣ́хъ люде́й по́далъ еси́, Іо́сифе, и́мже а́нгеловъ удиви́въ, человѣ́ковъ обра́довавъ, де́моновъ устраши́въ, и, я́ко мѵ́ромъ благово́ннымъ всю́ вселе́нную облагоуха́въ, возопи́лъ еси́ къ Бо́гу: Аллилу́ія.

Икосъ 6.

Возсія́вшій тебѣ́, пра́ведный Іо́сифе, въ Младе́нцѣ Іису́сѣ, прорече́ніемъ Симео́на, Свѣ́тъ во открове́ніе язы́ковъ и сла́ву люде́й Изра́илевыхъ, а́біе о́блакомъ ско́рби покрыва́ется: наро́дъ бо смуща́ется, Иродъ бѣсну́ется, души́ Отроча́ти ища́, въ се́рдце Ма́тери ору́жіе проити́ предрека́ется, да вѣ́ра и терпѣ́ніе твое́ я́вны бу́дутъ всѣ́мъ. Тѣ́мже тебѣ́, я́ко крѣ́пкому въ терпѣ́ніи и въ вѣ́рѣ непоколеби́мому, взыва́емъ:

Ра́дуйся, я́ко зла́то въ горни́лѣ, очища́емый непреста́нно искуше́ніями. Ра́дуйся, въ ра́дости смире́нный, въ ско́рби же терпѣли́вый. Ра́дуйся, всегда́ вѣ́рный та́йнамъ, ввѣ́реннымъ тебѣ́. Ра́дуйся, въ му́жествѣ непоколеби́мый. Ра́дуйся, вѣ́рою, я́ко звѣздо́ю, въ мра́чныхъ путе́хъ жи́зни руководи́мый. Ра́дуйся, упова́ніе на Бо́га, я́ко я́корь, въ бу́ряхъ жите́йскаго пла́ванія имѣ́вый.

Ра́дуйся, пра́ведный Іо́сифе, ско́рый помо́щниче и моли́твенниче о душа́хъ на́шихъ.

Конда́къ 7.

Хотя́й спасти́ отъ зло́бы Иродовы Прише́дшаго спасти́ мíръ, не вопроша́лъ еси́, ди́вный Іо́сифе, а́нгела, даю́щаго ти́ повелѣ́ніе о бѣ́гствѣ въ Еги́петъ, — ины́я Спаса́яй Себе́ ли не мо́жетъ спасти́? Но́, я́ко му́жъ вѣ́ры, я́ко но́вый Авраа́мъ, вы́ну гото́въ сы́й на послуша́ніе, не помышля́я о труда́хъ пути́, ниже́ испыту́я вре́мени возвраще́нія, а́біе же съ Марíею и Младе́нцемъ устреми́лся еси́ въ Еги́петъ, ра́достно вопія́ Бо́гу: Аллилу́ія.

Икосъ 7.

Но́вый въ Еги́птѣ показа́лся еси́ Іо́сифъ па́че о́наго дре́вняго патріа́рха, спа́сшаго лю́ди Еги́петскія отъ гла́да: ты́ бо спа́слъ еси́ отъ сме́рти Спаси́теля мíра и лю́демъ Еги́петскимъ, гла́домъ нече́стія ги́бнущимъ, Хлѣ́бъ Живо́тный прине́слъ еси́, и сѣмена́ вѣ́чной жи́зни насѣ́ялъ еси́, отъ ни́хже возрасте́ ди́вное прозябе́ніе въ пусты́няхъ Еги́петскихъ. Тѣ́мже вопіе́мъ ти́:

Ра́дуйся, ско́рби и труды́ Христа́ ра́ди въ пути́ ра́достно терпѣ́вый. Ра́дуйся, дѣтоводи́телю Отрока Іису́са, въ пусты́ни води́вшаго иногда́ Изра́иля столпо́мъ о́гненнымъ и о́блачнымъ. Ра́дуйся, пита́телю Пита́вшаго лю́ди Своя́ ма́нною. Ра́дуйся, носи́вшій на рука́хъ Творца́ и Носи́теля всея́ тва́ри. Ра́дуйся, спасы́й отъ Иродовой зло́бы Спа́сшаго иногда́ лю́ди Бо́жіи отъ го́рькой рабо́ты фарао́новой. Ра́дуйся, Еги́пту за ра́бство благода́ть сыноположе́нія предуказа́вый.

Ра́дуйся, пра́ведный Іо́сифе, ско́рый помо́щниче и моли́твенниче о душа́хъ на́шихъ.

Конда́къ 8.

Стра́нное ви́дѣвъ чу́до, е́же о Іису́сѣ, Бо́га по предрече́нію роди́тися во пло́ти имѣ́юща, и Младе́нца пови́та въ я́слехъ, Дѣ́ву Ма́терь, а́нгеловъ славосло́віе и пло́ти обрѣ́заніе, волхво́въ съ восто́ка прише́ствіе съ да́ры на поклоне́ніе и бѣ́гство въ Еги́петъ отъ Иродова неи́стовства, спасе́ніе всѣ́хъ люде́й и Свѣ́тъ язы́ковъ, я́коже рече́ Симео́нъ, и ору́жіе въ се́рдцѣ Роди́вшей, позна́лъ еси́ Его́ Бо́га и́стинна бы́ти и и́стинна Человѣ́ка, и сего́ ра́ди возопи́лъ еси́ Ему́: Аллилу́ія.

Икосъ 8.

Всего́ себе́ преда́въ Бо́гу, чрезъ а́нгела воззва́вшему Сы́на Своего́ изъ Еги́пта, послѣ́довалъ еси́ велѣ́нію Его́ и всели́лся еси́ съ Іису́сомъ и Ма́терію Его́ въ Назаре́тѣ, да сбу́дется сло́во проро́ка о Не́мъ, я́ко Назоре́й нарече́тся. Тѣ́мже и мы́ тебѣ́, я́ко вѣ́рному слугѣ́ Бо́жію, вопіе́мъ:

Ра́дуйся, споспѣ́шниче Бо́жія изволе́нія. Ра́дуйся, соуча́стниче Бо́жія домострои́тельства. Ра́дуйся, при́сный собесѣ́дниче а́нгеловъ. Ра́дуйся, на земли́ въ глубины́ та́инъ небе́сныхъ посвяще́нный. Ра́дуйся, проро́ковъ прорече́нія о Іису́сѣ слы́шавый. Ра́дуйся, вся́ благоговѣ́йно въ глубинѣ́ се́рдца сохрани́вый, никому́же повѣ́дая.

Ра́дуйся, пра́ведный Іо́сифе, ско́рый помо́щниче и моли́твенниче о душа́хъ на́шихъ.

Конда́къ 9.

Вся́ко колѣ́но небе́сныхъ, земны́хъ и преиспо́днихъ покланя́ется о и́мени Іису́совомъ; тебѣ́ же, чу́дный Іо́сифе, повину́яся бѣ́ Отроча Іису́съ, я́ко отцу́. Мы́ же таково́му къ тебѣ́ снисхожде́нію Го́спода чудя́щеся, вопіе́мъ Ему́: Аллилу́ія.

Икосъ 9.

Витíя многовѣща́нная недоумѣ́ютъ по достоя́нію восхвали́ти тя́, пра́ведный Іо́сифе: Ма́терь Бо́жія, Цари́ца не́ба и земли́ имену́етъ тя́ господи́номъ свои́мъ, воплоти́вшійся Сы́нъ Бо́жій нарица́етъ тя́ отце́мъ, и до́мъ тво́й на земли́ бы́сть вмѣсти́лище Святы́ни пренебе́сныя, я́ко въ не́мъ обита́ше Ца́рь не́ба и земли́. Тѣ́мже мы́ смире́нно вопіе́мъ ти́:

Ра́дуйся, избра́нниче Бо́жій, и́же храня́ше киво́тъ святы́ни пренебе́сныя. Ра́дуйся, ди́вный те́ктоне, въ его́же до́мѣ живя́ше Творе́цъ не́ба и земли́. Ра́дуйся, пита́телю и попечи́телю Отрока Іису́са, Иже, я́ко Бо́гъ, дае́тъ бытіе́ всѣ́мъ тва́рямъ и промышля́етъ о все́мъ мíрѣ, ви́димомъ и неви́димомъ. Ра́дуйся, я́ко на земли́ сподо́бился еси́ лицезрѣ́ти Сы́на Бо́жія и держа́ти Его́ въ объя́тіяхъ, и лобыза́ти Его́. Ра́дуйся, я́ко и по отше́ствіи въ го́рнія оби́тели во свѣ́тѣ лица́ Его́, Царя́ сла́вы, блаже́нствуеши и вы́ну прославля́еши Его́ со Отце́мъ и Святы́мъ Ду́хомъ.

Ра́дуйся, пра́ведный Іо́сифе, ско́рый помо́щниче и моли́твенниче о душа́хъ на́шихъ.

Конда́къ 10.

Спасти́ мо́жеши вся́каго, къ твоему́ предста́тельству и заступле́нію прибѣга́ющаго, блаже́нне Іо́сифе, ка́ко бо, Иже на земли́ бѣ́ повину́яся тебѣ́ во все́мъ, не услы́шитъ тя́ предстоя́ща ны́нѣ предъ Ни́мъ на не́бѣ и вопію́ща съ а́нгельскими ли́ки: Аллилу́ія.

Икосъ 10.

Стѣна́ еси́ крѣ́пкая всѣ́мъ, къ твоему́ предста́тельству прибѣга́ющимъ, пра́ведный Іо́сифе, тѣ́мже не пре́зри и на́съ, къ твоему́ заступле́нію притека́ющихъ, въ бу́ряхъ искуше́ній, въ бѣда́хъ и ско́рбехъ жите́йскихъ взыва́ющихъ ти́:

Ра́дуйся, ско́рый засту́пниче на́шъ въ ну́ждахъ и напа́стехъ. Ра́дуйся, си́льный предста́телю о на́съ предъ Бо́гомъ. Ра́дуйся, тве́рдое упова́ніе на́ше въ бу́рѣ смуще́нія и недоумѣ́ній. Ра́дуйся, ско́рое избавле́ніе отъ клеветы́ человѣ́ческія. Ра́дуйся, пита́телю Того́, Иже но́ситъ вся́ческая глаго́ломъ си́лы Своея́. Ра́дуйся, избавля́ющій на́съ отъ гла́да душе́внаго и вся́кія ско́рби.

Ра́дуйся, пра́ведный Іо́сифе, ско́рый помо́щниче и моли́твенниче о душа́хъ на́шихъ.

Конда́къ 11.

Пѣ́ніе всеумиле́нное прино́симъ ти́, богому́дре Іо́сифе, и мо́лимъ тя́, я́коже храни́лъ еси́ отъ вся́каго вреда́ и озлобле́нія Самого́ Христа́ Го́спода, сохрани́ свои́мъ предста́тельствомъ предъ Ни́мъ Це́рковь Его́ святу́ю Правосла́вную отъ вся́каго озлобле́нія враго́въ ви́димыхъ и неви́димыхъ, огради́ заступле́ніемъ твои́мъ отъ вся́кія ко́зни Благочести́вѣйшаго Госуда́ря на́шего [и́мярекъ] и все́ ца́рство Его́, да ти́хое и безмо́лвное житіе́ провожда́юще, вопіе́мъ Бо́гу: Аллилу́ія.

Икосъ 11.

Свѣтопода́тельна Свѣти́льника, су́щимъ во тмѣ́ неразу́мія я́вльшагося, узрѣ́лъ еси́ во хра́мѣ двоенадесятилѣ́тняго Отрока Іису́са, подаю́ща свѣ́тъ и́стиннаго вѣ́дѣнія учи́телямъ зако́на Бо́жія и открыва́юща та́йну Своего́ вели́каго служе́нія по предопредѣле́нію Отца́ Нeбе́снаго. Тѣ́мже вопіе́мъ ти́:

Ра́дуйся, вѣ́рный храни́телю зако́на оте́ческаго. Ра́дуйся, я́ко ревну́я о соблюде́ніи зако́на, и Отрока Іису́са въ до́мъ Отца́ Небе́снаго приводи́лъ еси́. Ра́дуйся, я́ко егда́ оста́ Отрокъ Іису́съ въ Іерусали́мѣ, мнѣ́вше Его́ въ дружи́нѣ су́ща, вку́пѣ съ Ма́терію Его́ оте́чески печа́лися о Не́мъ. Ра́дуйся, я́ко иска́ Его́ во сро́дницѣхъ и зна́емыхъ и не обрѣ́тше, возврати́ся въ Іерусали́мъ и по тріе́хъ дне́хъ обрѣ́те Его́ въ це́ркви, сѣдя́щаго посредѣ́ учи́телей и послу́шающаго и́хъ, и вопроша́ющаго и́хъ. Ра́дуйся, я́ко слы́шалъ еси́ открове́ніе та́йны, егда́ глаго́лаше Отрокъ Іису́съ: не вѣ́сте ли, я́ко въ тѣ́хъ, я́же Отца́ Моего́, досто́итъ бы́ти Ми́? Ра́дуйся, ви́дѣвый и свидѣ́тельствовавый, я́ко Іису́съ преспѣва́ше прему́дростію и во́зрастомъ, и благода́тію у Бо́га и человѣ́къ.

Ра́дуйся, пра́ведный Іо́сифе, ско́рый помо́щниче и моли́твенниче о душа́хъ на́шихъ.

Конда́къ 12.

Благода́тію у Бо́га и человѣ́ковъ ви́дя преспѣва́юща Отрока Іису́са и съ во́зрастомъ тѣ́ла прему́дростію преспѣва́юща, вся́ слага́лъ еси́ въ се́рдцѣ твое́мъ, я́ко ра́бъ вѣ́рный, храня́ ввѣ́ренное сокро́вище въ та́йнѣ до дне́, внегда́ нача́ша вопи́ти Ему́ вси́ вѣ́рующіи я́ко Бо́гу и Спаси́телю мíра: Аллилу́ія.

Икосъ 12.

Пою́ще труды́ и по́двиги твоя́, сла́вимъ и блаже́нное успе́ніе твое́: на рука́хъ бо Бо́га Сло́ва и Ма́тери Его́ сла́дцѣ почи́лъ еси́ отъ трудо́въ твои́хъ, пра́ведный Іо́сифе, блаже́нной вѣ́чности имѣ́я несомнѣ́нное увѣре́ніе. Тѣ́мже вопіе́мъ ти́:

Ра́дуйся, вѣ́рный въ вели́комъ служе́ніи. Ра́дуйся, сего́ ра́ди велича́йшей по́чести отъ Бо́га сподо́бивыйся. Ра́дуйся, содружи́выйся на земли́ съ сла́вою и красото́ю не́ба. Ра́дуйся, Отце́мъ бу́дущаго вѣ́ка въ бу́дущій вѣ́къ съ ми́ромъ отпуще́нный. Ра́дуйся, благовѣствова́вый Дави́ду ра́дость ве́лію. Ра́дуйся, всѣ́мъ су́щимъ во а́дѣ вѣ́сть извѣ́стную прине́сшій, я́ко пріи́де Христо́съ, имѣ́яй свободи́ти и спасти́ ро́дъ человѣ́ческій.

Ра́дуйся, пра́ведный Іо́сифе, ско́рый помо́щниче и моли́твенниче о душа́хъ на́шихъ.

Конда́къ 13.

О, святы́й и пра́ведный Іо́сифе! Пріими́ сіе́ ма́лое моле́ніе на́ше и твои́мъ си́льнымъ хода́тайствомъ ко Христу́ Бо́гу умоли́ Его́, да благода́тію Свое́ю содѣ́лаетъ на́съ тве́рды и непоколеби́мы въ Правосла́вной вѣ́рѣ, ре́вностны и непреткнове́нны въ соблюде́ніи за́повѣдей Его́, и да́руетъ вся́ поле́зная къ вре́менному и вѣ́чному житію́ на́мъ, вопію́щимъ Ему́: Аллилу́ія.

[Се́й конда́къ глаго́лется три́жды. Та́же и́косъ 1-й: Ангеломъ непостижи́мую та́йну... И конда́къ 1-й: Избра́нный храни́телю...]

Моли́тва свято́му и пра́ведному Іо́сифу, обру́чнику Пресвяты́я Дѣ́вы Марíи.

О, святы́й пра́ведный Іо́сифе! Еще́ сы́й на земли́, ве́ліе имѣ́лъ еси́ дерзнове́ніе къ Сы́ну Бо́жію, Иже благоизво́ли именова́ти тя́ отце́мъ Свои́мъ, я́ко обру́ченика Своея́ Ма́тери, и послу́шати тя́. Вѣ́руемъ, я́ко ны́нѣ, водворя́яся съ ли́ки пра́ведныхъ во оби́телехъ небе́сныхъ, услы́шанъ бу́деши во вся́комъ твое́мъ проше́ніи къ Бо́гу и Спаси́телю на́шему. Тѣ́мже, прибѣга́я къ твоему́ покро́ву и заступле́нію, про́симъ и смире́нно мо́лимъ тя́: я́коже са́мъ бу́ри сомни́тельныхъ помышле́ній изба́вленъ бы́лъ еси́, си́це изба́ви и на́съ, обурева́емыхъ волна́ми смуще́ній и страсте́й; я́коже огражда́лъ еси́ Всенепоро́чную Дѣ́ву отъ клеветы́ человѣ́ческія, огради́ и на́съ та́кожде отъ вся́кія клеветы́ напра́сныя; я́коже храни́лъ еси́ отъ вся́кого вреда́ и озлобле́нія воплоти́вшагося Го́спода, си́це сохраня́й твои́мъ заступле́ніемъ Це́рковь Его́ Правосла́вную и всѣ́хъ на́съ отъ вся́каго озлобле́нія и вреда́. Вѣ́си, свя́тче Бо́жій, я́ко и Сы́нъ Бо́жій во дне́хъ пло́ти Своея́ въ тѣле́сныхъ потре́бахъ ну́жду имѣ́яше, и ты́ послужи́лъ еси́ и́мъ, того́ ра́ди мо́лимъ тя́, и на́шимъ вре́меннымъ ну́ждамъ благопоспѣши́ твои́мъ хода́тайствомъ, подая́ на́мъ вся́ блага́я, потре́бная въ житіи́ се́мъ. Изря́днѣе же про́симъ тя́, исхода́тайствуй на́мъ оставле́ніе грѣхо́въ прія́ти отъ нарече́ннаго Сы́на твоего́, Единоро́днаго Сы́на Бо́жія, Го́спода на́шего Іису́са Христа́ и досто́йны бы́ти наслѣ́дія Ца́рства небе́снаго, да, въ го́рнихъ селе́ніяхъ съ тобо́ю водворя́ющеся, всегда́ сла́вимъ Еди́наго Тріѵпоста́снаго Бо́га, Отца́ и Сы́на и Свята́го Ду́ха, ны́нѣ и во вѣ́ки вѣко́въ. Ами́нь.

Тропа́рь, гла́съ 2:

Благовѣству́й, Іо́сифе, Дави́ду чудеса́, богоотцу́: Дѣ́ву ви́дѣлъ еси́ ро́ждшую, съ па́стыри славосло́вилъ еси́, съ волхвы́ поклони́лся еси́, а́нгеломъ вѣ́сть пріе́мъ. Моли́ Христа́ Бо́га спасти́ ду́ши на́ша.

Конда́къ, гла́съ 3:

Весе́лія дне́сь Дави́дъ исполня́ется боже́ственный, Іо́сифъ же хвале́ніе со Іа́ковомъ прино́ситъ: вѣне́цъ бо сро́дствомъ Христо́вымъ пріе́мше, ра́дуются, и неизрече́нно на земли́ Ро́ждшагося воспѣва́ютъ, и вопію́тъ: Ще́дре, спаса́й Тебе́ чту́щія.

Велича́ніе:

Велича́емъ тя́, святы́й пра́ведный Іо́сифе, и чте́мъ святу́ю па́мять твою́, ты́ бо мо́лиши за на́съ Христа́ Бо́га на́шего.

Источникъ: Ака́ѳистъ свято́му и пра́ведному Іо́сифу, обру́чнику Пресвяты́я Дѣ́вы Марíи. — Изда́ніе второ́е. —СПб.: Въ Сѵнода́льной Тѵпогра́фіи, 1873. — С. 3-38.

/ Къ оглавленію раздѣла /


Наверхъ / Къ титульной страницѣ

0