Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - четвергъ, 21 сентября 2017 г. Сейчасъ на порталѣ посѣтителей - 17.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ДОМАШНЯЯ МОЛИТВА

Объ иконѣ Божіей Матери, именуемой «Нечаянная Радость».

Икона Божией Матери именуемая Нечаянная РадостьИкона Божіей Матеря «Нечаянная Радость» названа такъ въ память объ исцѣленіи нѣкоего грѣшника черезъ святую икону молитвами Пречистой Богородицы. Преданіе о чудѣ описано свт. Димитріемъ Ростовскимъ въ его книгѣ «Руно орошенное». Въ сказаніи говорится: нѣкій беззаконникъ проводилъ жизнь въ грѣхахъ, однако имѣлъ обыкновеніе преклоняться предъ иконой Богоматери и приносить Ей архангельское привѣтствіе: «Радуйся, Благодатная!» Матерь Божія не отвергла его молитвы. Она стала молить Бога о помилованіи грѣшника. И Господь даровалъ ему покаяніе чудеснымъ образомъ: однажды, когда человѣкъ тотъ, собираясь идти на грѣшное дѣло, по своему обыкновенію всталъ на молитву передъ образомъ Богородицы, внезапно онъ въ страхѣ увидѣлъ, что изъ ребра, рукъ и ногъ Младенца потоками течетъ кровь, какъ нѣкогда на Голгоѳѣ. Божія Матерь открыла беззаконнику, что онъ и другіе грѣшники вновь и вновь распинаютъ Сына Ея, когда творятъ грѣхи. Потрясенный до глубины души, съ сокрушеннымъ сердцемъ, молилъ человѣкъ Пресвятую Богородицу быть ему Заступницей передъ Богомъ и Ходатаицей о прощеніи его грѣховъ. Матерь Божія до тѣхъ поръ не прекращала Своихъ молитвъ за грѣшника, пока не услышала отъ Господа Іисуса Христа слова: «Нынѣ прощаются ему грѣхи Тебе ради». Человѣкъ тотъ осозналъ глубину своего паденія и съ помощью Божіей оставилъ грѣшную жизнь. До конца дней со слезами и благодарностью онъ молился Божіей Матери, по ходатайству Которой получилъ нечаянную радость покаянія и прощенія грѣховъ отъ Господа и Спасителя нашего Іисуса Христа. Дни празднованія — 9 (22) Декабря и 1 (14) Мая.

АКАѲИСТЫ

Ака́ѳистъ Пресвятѣ́й Богоро́дицѣ ра́ди чудотво́рнаго Ея́ о́браза «Неча́янныя Ра́дости».

Конда́къ 1.

Ра́дуйся, неча́янную ра́дость вѣ́рнымъ да́рующая.

Икосъ 1.

Ангели и пра́ведныхъ ду́ши удиви́шася, егда́ предста́ла еси́ предъ Сы́номъ Твои́мъ и Бо́гомъ, и мно́гимъ моле́ніемъ хода́тайствовала еси́ о человѣ́цѣ, при́сно во грѣсѣ́хъ пребыва́ющемъ. Мы́ же, очи́ма вѣ́ры толи́кое Твое́ благоутро́біе зря́ще, со умиле́ніемъ взыва́емъ Ти́ си́це:

Ра́дуйся, моли́твы всѣ́хъ христіа́нъ пріе́млющая. Pа́дуйся, и са́мыхъ отча́янныхъ грѣ́шниковъ моле́нія не отверга́ющая. Ра́дуйся, къ Сы́ну Твоему́ о ни́хъ предста́тельствующая. Pа́дуйся, неча́янную ра́дость спасе́нія и́мъ подаю́щая. Ра́дуйся, предста́тельствомъ Твои́мъ ве́сь мíръ спаса́ющая. Pа́дуйся, вся́ на́ша печа́ли утоля́ющая. Ра́дуйся, Ма́ти всѣ́хъ Бо́га, озло́бленныхъ ду́ши утѣша́ющая. Pа́дуйся, житіе́ на́ше до́брѣ устроя́ющая. Ра́дуйся, избавле́ніе отъ грѣхо́въ всѣ́мъ человѣ́комъ прине́сшая. Pа́дуйся, Ра́дость всему́ мíру роди́вшая.

Ра́дуйся, неча́янную ра́дость вѣ́рнымъ да́рующая.

Конда́къ 2.

Ви́дящи Пресвята́я человѣ́ка, а́ще и беззако́нна, но на вся́къ де́нь съ вѣ́рою и упова́ніемъ предъ честно́ю Ея́ ико́ною до́лу поверга́ющагося и арха́нгельское привѣ́тствіе Ей принося́щаго, вня́тъ и такова́го грѣ́шника славосло́вію, да вси́, зря́ще Ея́ Ма́тернее милосе́рдіе, на не́бѣ и на землѣ́ вопію́тъ Бо́гу: Аллилу́ія.

Икосъ 2.

Ра́зумъ человѣ́ческій вои́стину превосхо́дитъ любо́вь Твоя́ къ ро́ду христіа́нскому, я́ко и тогда́ не преста́ла еси́ отъ хода́тайства Твоего́ о человѣ́цѣ беззако́нномъ, егда́ Сы́нъ Тво́й показа́ Тебѣ́ я́звы гвозди́ныя, грѣхи́ человѣ́ческими Ему́ содѣ́янныя. Зря́ще Тя́ толи́ко неотсту́пную Предста́тельницу за на́съ, грѣ́шныхъ, со слеза́ми вопіе́мъ Ти́:

Ра́дуйся, Засту́пнице усе́рдная ро́да христіа́нскаго, отъ Бо́га на́мъ дарова́нная. Ра́дуйся, Путеводи́тельнице на́ша къ небе́сному оте́честву на́съ возводя́щая. Ра́дуйся, вѣ́рныхъ огражде́ніе и прибѣ́жище. Ра́дуйся, по́моще всѣ́хъ, призыва́ющихъ и́мя Твое́ свято́е. Ра́дуйся, всѣ́ми презрѣ́нныхъ и отве́рженныхъ отъ ро́ва поги́бели исхища́ющая. Ра́дуйся, тѣ́хъ на пу́ть пра́вый обраща́ющая. Ра́дуйся, непреста́нное уны́ніе и мра́къ душе́вный отгоня́ющая. Ра́дуйся, ижди́вшимъ отъ неду́га у́мъ но́вый и лу́чшій смы́слъ подаю́щая. Ра́дуйся, оста́вленныхъ врача́ми на Своя́ всемо́щныя ру́цѣ пріе́млющая.

Ра́дуйся, неча́янную ра́дость вѣ́рнымъ да́рующая.

Конда́къ 3.

Си́ла благода́ти преизоби́ловала та́мо, идѣ́же умно́жися грѣ́хъ; да ра́дуются на небеси́ вси́ а́нгели о еди́нѣмъ грѣ́шницѣ пока́явшемся, пою́ще предъ престо́ломъ Бо́жіимъ: Аллилу́ія.

Икосъ 3.

Иму́щи къ ро́ду христіа́нскому Ма́тернее милосе́рдіе, всѣ́мъ съ вѣ́рою и упова́ніемъ прибѣга́ющимъ къ Тебѣ́ подае́ши ру́ку по́мощи, Влады́чице, да вси́ еди́нѣмъ се́рдцемъ и еди́ными усты́ славосло́віе прино́сятъ Ти́ сицево́е:

Ра́дуйся, я́ко Тобо́ю къ на́мъ нисхо́дитъ Бо́жіе благоволе́ніе. Ра́дуйся, я́ко Тобо́ю и мы́ и́мамы вя́щшее къ Бо́гу дерзнове́ніе. Ра́дуйся, я́ко во всѣ́хъ бѣда́хъ и обстоя́ніяхъ на́шихъ прино́сиши Сы́ну Твоему́ усе́рдныя о на́съ моли́твы. Ра́дуйся, я́ко и на́ша моли́твы прія́тными Бо́гу содѣ́ловаеши. Ра́дуйся, я́ко неви́димыхъ враго́въ отъ на́съ отгоня́еши. Ра́дуйся, я́ко отъ ви́димыхъ враго́въ на́съ избавля́еши. Ра́дуйся, я́ко сердца́ злы́хъ человѣ́къ умягча́еши. Ра́дуйся, я́ко отъ клеветы́, досажде́нія и укоре́нія на́съ изыма́еши. Ра́дуйся, я́ко Тобо́ю вся́ блага́я жела́нія на́ша исполня́ются. Ра́дуйся, я́ко мно́го мо́жетъ моли́тва Твоя́ предъ Сы́номъ Твои́мъ и Бо́гомъ.

Ра́дуйся, неча́янную ра́дость вѣ́рнымъ да́рующая.

Конда́къ 4.

Бу́рю вну́трь имѣ́я грѣхо́вныхъ помышле́ній, человѣ́къ беззако́ненъ моля́шеся предъ честно́ю ико́ною Твое́ю и, ви́дѣвъ кро́вь, отъ я́звъ Предвѣ́чнаго Сы́на Твоего́ пото́ками, я́коже на крестѣ́, теку́щую, паде́ отъ стра́ха и съ рыда́ніемъ та́ко вопія́ше Ти́: «поми́луй мя́, о Ма́ти милосе́рдія, да не преодолѣ́етъ зло́ба моя́ неизрече́нныя бла́гости и милосе́рдія Твоего́, Ты́ бо еси́ всѣ́мъ грѣ́шникомъ еди́на наде́жда и прибѣ́жище; преклони́ся у́бо на ми́лость, Блага́я Ма́ти, и умоли́ о мнѣ́ Сы́на Твоего́ и Творца́ моего́, да непреста́нно зову́ Ему́: Аллилу́ія».

Икосъ 4.

Слы́шавше небожи́тели о чуде́снѣмъ моли́твами Твои́ми спасе́ніи и́хъ земна́го ги́бнущаго бра́та, просла́виша Тя́, благосе́рдую Цари́цу небесе́ и земли́. И мы́, грѣ́шніи, свѣ́давше таково́е подо́бнаго на́мъ грѣ́шника заступле́ніе, а́ще и недоумѣва́етъ язы́къ на́шъ восхвали́ти Тя́ по достоя́нію, отъ глубины́ умиле́ннаго се́рдца на́шего воспѣва́емъ Ти́ си́це:

Ра́дуйся, спору́чнице спасе́нія грѣ́шныхъ. Ра́дуйся, взыска́ніе поги́бшихъ. Ра́дуйся, неча́янная грѣ́шныхъ ра́досте. Ра́дуйся, предста́тельнице къ Бо́гу, мíръ отъ бѣ́дъ спаса́ющая. Ра́дуйся, я́ко гла́са моли́твъ Твои́хъ бѣ́си трепе́щутъ. Ра́дуйся, я́ко а́нгели сему́ ра́дуются. Ра́дуйся, я́ко и на́съ, земноро́дныхъ, си́ла моли́твъ Твои́хъ весе́лія исполня́етъ. Ра́дуйся, я́ко тѣ́ми отъ ти́ны грѣхо́въ на́съ изыма́еши. Ра́дуйся, я́ко пла́мень страсте́й на́шихъ угаша́еши.

Ра́дуйся, неча́янную ра́дость вѣ́рнымъ да́рующая.

Конда́къ 5.

Боготе́чную звѣзду́ — чудотво́рную ико́ну Ма́тере Твоея́ показа́лъ еси́ на́мъ, Го́споди, и́бо, взира́юще на о́бразъ Ея́ тѣле́сныма очи́ма, умо́мъ и се́рдцемъ къ Первообра́знѣй возвыша́емся и Ею къ Тебѣ́ востека́емъ, пою́ще: Аллилу́ія.

Икосъ 5.

Ви́дѣвше а́нгели храни́тели христіа́нъ, я́ко Бо́жія Ма́терь споспѣшеству́етъ и́мъ въ наставле́ніи тѣ́хъ, заступле́ніи и спасе́ніи, потща́шася си́це возопи́ти Честнѣ́йшей херуви́мъ и Сла́внѣйшей безъ сравне́нія серафи́мъ:

Ра́дуйся, съ Сы́номъ Твои́мъ и Бо́гомъ вѣ́чно ца́рствующая. Ра́дуйся, Ему́ всегда́ о ро́дѣ христіа́нстѣмъ моле́нія принося́щая. Ра́дуйся, въ христіа́нской вѣ́рѣ и благоче́стіи наста́внице. Ра́дуйся, ересе́й и тлѣтво́рныхъ раско́ловъ искорени́тельнице. Ра́дуйся, отъ растлѣва́ющихъ ду́шу и тѣ́ло собла́зновъ сохраня́ющая. Ра́дуйся, отъ опа́сныхъ обстоя́ній и внеза́пныя сме́рти безъ покая́нія и свята́го Причаще́нія избавля́ющая. Ра́дуйся, упова́ющимъ на Тя́ живота́ непосты́дный коне́цъ да́рующая. Ра́дуйся, и по сме́рти за отше́дшую на су́дъ Госпо́день ду́шу предъ Сы́номъ Твои́мъ неотсту́пно хода́тайствующая. Ра́дуйся, Твои́мъ Ма́тернимъ предста́тельствомъ отъ вѣ́чнаго муче́нія сію́ избавля́ющая.

Ра́дуйся, неча́янную ра́дость вѣ́рнымъ да́рующая.

Конда́къ 6.

Проповѣ́дникъ чу́днаго Твоего́ милосе́рдія, дарова́ннаго нѣ́коему человѣ́ку беззако́нну, яви́ся святы́й Дими́трій Росто́вскій, и́же, спису́я вели́кая, и сла́вная и изря́дная дѣла́ Бо́жія, въ Тебѣ́ явле́нная, предаде́ пи́сьмени и сіе́ дѣ́ло ми́лости Твоея́ въ наученіе и утѣше́ніе всѣ́мъ вѣ́рнымъ, да и тíи, во грѣсѣ́хъ, бѣда́хъ, ско́рбехъ и озлобле́ніихъ су́ще, мно́гажды на вся́къ де́нь съ вѣ́рою въ моли́твѣ предъ о́бразомъ Твои́мъ колѣ́на преклоня́ютъ и, тѣ́хъ избы́вше, вопію́тъ Бо́гу: Аллилу́ія.

Икосъ 6.

Возсія́ на́мъ, я́ко пресвѣ́тлая заря́, чудотво́рная ико́на Твоя́, Богома́ти, прогоня́я тму́ бѣ́дъ и скорбе́й отъ всѣ́хъ, съ любо́вію вопію́щихъ Ти́ си́це:

Ра́дуйся, цѣли́тельнице на́ша въ болѣ́знехъ тѣле́сныхъ. Ра́дуйся, блага́я утѣ́шительнице въ печа́лехъ на́шихъ душе́вныхъ. Ра́дуйся, ско́рбь на́шу въ ра́дость претворя́ющая. Ра́дуйся, ненадѣ́ющихся несумнѣ́нною наде́ждою возвеселя́ющая. Ра́дуйся, а́лчущихъ пита́тельнице. Ра́дуйся, наги́хъ одѣя́ніе. Ра́дуйся, вдо́въ утѣ́шительнице. Ра́дуйся, безма́тернихъ сиро́тъ незри́мая воспита́тельнице. Ра́дуйся, непра́ведно гони́мыхъ и оби́димыхъ засту́пнице. Ра́дуйся, гоня́щихъ и оби́дящихъ правосу́дная отмсти́тельнице.

Ра́дуйся, неча́янную ра́дость вѣ́рнымъ да́рующая.

Конда́къ 7.

Хотя́ Законода́вецъ правосу́дный Госпо́дь Са́мъ бы́ти зако́на Исполни́тель и яви́ти милосе́рдія Своего́ бе́здну, преклони́ся на усе́рдное моле́ніе Твое́, Преблагослове́нная Ма́ти Дѣ́во, о человѣ́цѣ беззако́ннѣ, глаго́ля: «зако́нъ повелѣва́етъ, да сы́нъ чти́тъ ма́терь. Азъ Сы́нъ Тво́й, Ты́ же Ма́ти Моя́: Азъ Тя́ до́лженъ чти́ти, послу́шая Твоего́ моле́нія; бу́ди у́бо, я́коже хо́щеши: ны́нѣ проща́ются ему́ грѣси́ Тебе́ ра́ди». Мы́ же, ви́дя такову́ю си́лу моли́твы Хода́таицы на́шей о проще́ніи согрѣше́ній на́шихъ, просла́вимъ милосе́рдіе и неизрече́нное благоутро́біе Ея́, зову́ще: Аллилу́ія.

Икосъ 7.

Но́вое ди́вное и сла́вное зна́меніе всѣ́мъ вѣ́рнымъ яви́ся, я́ко не то́кмо Ма́тери Твое́й, но и пречи́стому Ея́ ли́ку, на дскѣ́ изображе́нному, си́лу чудотворе́нія дарова́лъ еси́, Го́споди. Сему́ та́инству дивя́щеся, во умиле́ніи се́рдца вопіе́мъ къ Не́й такова́я:

Ра́дуйся, прему́дрости и бла́гости Бо́жія открове́ніе. Ра́дуйся, вѣ́ры утвержде́ніе. Ра́дуйся, благода́ти явле́ніе. Ра́дуйся, душеполе́зныхъ зна́ній дарова́ніе. Ра́дуйся, душевре́дныхъ уче́ній низложе́ніе. Ра́дуйся, беззако́нныхъ на́выковъ нетру́дное преодолѣ́ніе. Ра́дуйся, сло́во прему́дрости прося́щимъ да́рующая. Ра́дуйся, несмы́сленныхъ разу́мными содѣ́ловающая. Ра́дуйся, дѣ́темъ, неудо́бь уча́щимся, ра́зумъ подаю́щая. Ра́дуйся, ю́ности блага́я охрани́тельнице и наста́внице.

Ра́дуйся, неча́янную ра́дость вѣ́рнымъ да́рующая.

Конда́къ 8.

Стра́нное и ужа́сное видѣ́ніе бы́сть нѣ́коему человѣ́ку беззако́нну, показу́я ему́ бла́гость Госпо́дню, предста́тельствомъ Богома́тери грѣхи́ его́ проща́ющую. Сего́ ра́ди отто́лѣ, испра́вль свое́ житіе́, поживе́ богоуго́днѣ. Си́це и мы́, сла́вная дѣла́ и многоразли́чную прему́дрость Бо́жію въ мíрѣ и жи́зни на́шей ви́дяще, устрани́мся земны́я суеты́ и изли́шнихъ жите́йскихъ попече́ній, и у́мъ и се́рдце на́ше на небеса́ возведе́мъ, пою́ще Бо́гу: Аллилу́ія.

Икосъ 8.

Вся́ въ вы́шнихъ пребыва́ющи, и ни́жнихъ ника́коже отступи́ла еси́, премилосе́рдая Цари́це небесе́ и земли́: а́ще бо по Успе́ніи Твое́мъ и взошла́ еси́ на небеса́ съ пречи́стою Твое́ю пло́тію, оба́че и грѣ́шныя земли́ не оста́вила еси́, явля́ющися прича́стница промышле́нія Сы́на Твоего́ о ро́дѣ христіа́нскомъ. Сего́ ра́ди Тя́ по до́лгу ублажа́емъ:

Ра́дуйся, сія́ніемъ пречи́стыя души́ Твоея́ всю́ зе́млю просвѣти́вшая. Ра́дуйся, чистото́ю тѣлесе́ Твоего́ вся́ небеса́ возвесели́вшая. Ра́дуйся, промышле́нія Сы́на Твоего́ о ро́дѣ христіа́нстѣмъ свята́я служи́тельнице. Ра́дуйся, о все́мъ мíрѣ усе́рдная предста́тельнице. Ра́дуйся, всѣ́хъ на́съ при крестѣ́ Сы́на Твоего́ усынови́вшая. Ра́дуйся, всегда́ Ма́тернюю любо́вь къ на́мъ явля́ющая. Ра́дуйся, всѣ́хъ даро́въ, духо́вныхъ и тѣле́сныхъ, незави́стная пода́тельнице. Ра́дуйся, бла́гъ вре́менныхъ хода́таице. Ра́дуйся, две́ри Ца́рствія Христо́ва вѣ́рнымъ отверза́ющая. Ра́дуйся, и на земли́ чи́стаго весе́лія сердца́ и́хъ исполня́ющая.

Ра́дуйся, неча́янную ра́дость вѣ́рнымъ да́рующая.

Конда́къ 9.

Вся́кое естество́ а́нгельское удиви́ся дѣ́лу Твоего́ милосе́рдія, Го́споди, я́ко дарова́лъ еси́ толи́ко тве́рдую и те́плую Засту́пницу и Помо́щницу ро́ду христіа́нскому, на́мъ неви́димо спребыва́ющу, слы́шащу же Тебѣ́ пою́щихъ: Аллилу́ія.

Икосъ 9.

Витíи многовѣща́нніи, но не богопросвѣще́нныя суесло́вятъ, я́ко поклоне́ніе свято́му о́бразу а́ки бы поклоне́ніе и́долу е́сть; не разумѣ́ютъ бо, я́ко че́сть, свято́му о́бразу воздава́емая, на Первообра́зная восхо́дитъ. Мы́ же не то́кмо сія́ до́брѣ вѣ́дуще, но и отъ вѣ́рныхъ человѣ́къ о мно́гихъ чудотворе́ніяхъ отъ ли́ка Богома́тере слы́шаще, и са́ми поклоне́ніемъ ему́ потре́бная ко вре́меннѣй и вѣ́чнѣй жи́зни пріе́млюще, съ весе́ліемъ Богоро́дицѣ взыва́емъ:

Ра́дуйся, я́ко отъ свяще́ннаго ли́ка Твоего́ чудеса́ дѣ́ются. Ра́дуйся, я́ко утаи́ся прему́дрость и благода́ть сія́ отъ му́дрыхъ и разу́мныхъ вѣ́ка сего́. Ра́дуйся, я́ко откры́ся та́ младе́нцемъ въ вѣ́рѣ. Ра́дуйся, я́ко прославля́ющихъ Тя́ прославля́еши. Ра́дуйся, я́ко отверга́ющихъ Тя́ предъ всѣ́ми посрамля́еши. Ра́дуйся, я́ко отъ потопле́нія, огня́ и меча́, отъ смертоно́сныя я́звы и отъ вся́каго зла́ прибѣга́ющихъ къ Тебѣ́ избавля́еши. Ра́дуйся, я́ко вся́ болѣ́зни человѣ́ческія, душе́вныя и тѣле́сныя, ми́лостивно врачу́еши. Ра́дуйся, я́ко пра́ведный гнѣ́въ Бо́жій на на́съ Твои́мъ моле́ніемъ ско́ро утоля́еши. Ра́дуйся, я́ко Ты́ еси́ ти́хое приста́нище отъ бу́рь пла́вающимъ по мо́рю жите́йскому. Ра́дуйся, я́ко и по концѣ́ жите́йскаго пла́ванія на́шего наде́жно приво́диши на́съ въ необурева́емую страну́ Ца́рствія Христо́ва.

Ра́дуйся, неча́янную ра́дость вѣ́рнымъ да́рующая.

Конда́къ 10.

Спасти́ хотя́ человѣ́ка нѣ́коего беззако́нна отъ заблужде́нія жи́зненнаго пути́ его́, ди́вное видѣ́ніе отъ пречестны́я ико́ны Твоея́ показа́ла еси́ ему́, Преблагослове́нная, да, чу́до ви́дя, пока́ется и, изъ глубины́ грѣхо́вныя милосе́рдымъ промышле́ніемъ Твои́мъ воздви́гнутый, вопіе́тъ Бо́гу: Аллилу́ія.

Икосъ 10.

Стѣна́ еси́ дѣ́вамъ, Богоро́дице Дѣ́во, и всѣ́мъ къ Тебѣ́ притека́ющимъ, и́бо небесе́ и земли́ Творе́цъ, всели́выйся во утро́бу Твою́ и отъ Тебе́ роди́выйся, яви́ Тя́, Приснодѣ́ву, стра́жа дѣ́вства, чистоты́ и цѣлому́дрія, и сосу́дъ вся́кія добродѣ́тели, и всѣ́хъ возглаша́ти Тебѣ́ научи́:

Ра́дуйся, сто́лпе и огражде́ніе дѣ́вства. Ра́дуйся, чистоты́ и цѣлому́дрія незри́мая охрани́тельнице. Ра́дуйся, до́брая дѣ́вамъ наста́внице. Ра́дуйся, невѣ́стъ блага́я украси́тельнице и спору́чнице. Ра́дуйся, всежела́нное соверше́ніе благи́хъ супру́жествъ. Ра́дуйся, ма́терей дѣтородя́щихъ ско́рое разрѣше́ніе. Ра́дуйся, младе́нцевъ воспита́ніе и благода́тное охране́ніе. Ра́дуйся, безча́дныхъ роди́телей плода́ми вѣ́ры и Ду́ха веселя́щая. Ра́дуйся, ма́терей скорбя́щихъ утѣше́ніе. Ра́дуйся, та́йное весе́ліе чи́стыхъ дѣ́въ и вдови́цъ.

Ра́дуйся, неча́янную ра́дость вѣ́рнымъ да́рующая.

Конда́къ 11.

Пѣ́ніе всеумиле́нное принося́ще Ти́, недосто́йніи, про́симъ Тебе́, Дѣ́во Богоро́дице: не пре́зри гла́са рабо́въ Твои́хъ, къ Тебѣ́ бо въ напа́стехъ и ско́рбехъ прибѣга́емъ и предъ Тобо́ю въ бѣда́хъ на́шихъ сле́зы пролива́емъ, пою́ще: Аллилу́ія.

Икосъ 11.

Свѣтопода́тельную свѣщу́, су́щимъ во тмѣ́ грѣха́ и юдо́ли пла́ча яви́вшуюся, зри́мъ Святу́ю Дѣ́ву: духо́вный бо о́гнь моли́твъ Свои́хъ, наставле́нія и утѣше́нія возжига́ющи, прево́дитъ къ Свѣ́ту Невече́рнему всѣ́хъ, воззва́ніи почита́ющихъ Ю си́ми:

Ра́дуйся, луче́ отъ Со́лнца пра́вды — Христа́ Бо́га на́шего. Ра́дуйся, нечи́стую со́вѣсть просвѣща́ющая. Ра́дуйся, та́йная и неудо́бь предви́дѣнная вся́ до́брѣ вѣ́дущая и и́мже подоба́етъ сказу́ющая. Ра́дуйся, лжи́выхъ прови́дцевъ и су́етная гада́нія посрамля́ющая. Ра́дуйся, въ ча́съ недоумѣ́ній мы́сль бла́гу на се́рдце полага́ющая. Ра́дуйся, въ постѣ́, моли́твѣ и богомы́сліи пребыва́ющимъ при́сно спребыва́ющая. Ра́дуйся, вѣ́рныхъ па́стырей Це́ркви ободря́ющая и вразумля́ющая. Ра́дуйся, богобоя́зненныхъ и́ноковъ и и́нокинь при́сное утѣше́ніе. Ра́дуйся, ка́ющихся предъ Бо́гомъ грѣ́шниковъ непосты́дная засту́пнице. Ра́дуйся, всѣ́хъ христіа́нъ те́плая хода́таице.

Ра́дуйся, неча́янную ра́дость вѣ́рнымъ да́рующая.

Конда́къ 12.

Благода́ть Боже́ственную испроси́ на́мъ у Сы́на Твоего́ и Бо́га, простри́ на́мъ ру́ку по́мощи, отжени́ отъ на́съ вся́каго врага́ и супоста́та, умири́ на́шу жи́знь, да не поги́бнемъ лю́тѣ, безъ покая́нія, но пріими́ на́съ въ вѣ́чныя кро́вы, Богороди́тельнице, да ра́дующеся пое́мъ Бо́гу, Тобо́ю на́съ спаса́ющему: Аллилу́ія.

Икосъ 12.

Пою́ще неизрече́нное Ма́тернее Твое́ милосе́рдіе къ человѣ́ку беззако́нну, восхваля́емъ Тя́ вси́, я́ко тве́рдую Предста́тельницу за на́съ, грѣ́шныхъ, и покланя́емся Тебѣ́, о на́съ моля́щейся: вѣ́руемъ бо и упова́емъ, я́ко испро́сиши у Сы́на Твоего́ и Бо́га блага́я вре́менная и вѣ́чная всѣ́мъ, съ любо́вію вопію́щимъ Ти́ си́це:

Ра́дуйся, всѣ́хъ навѣ́товъ и искуше́ніи, отъ мíра, пло́ти и діа́вола находя́щихъ, попра́ніе. Ра́дуйся, неча́емое примире́ніе ожесточе́нно вражду́ющихъ. Ра́дуйся, недовѣ́домое исправле́ніе нераска́янныхъ грѣ́шниковъ. Ра́дуйся, изнемога́ющихъ отъ уны́нія и печа́ли ско́рая утѣ́шительнице. Ра́дуйся, благода́тію смире́нія и терпѣ́нія на́съ снабдѣва́ющая. Ра́дуйся клятвопреступле́ній и непра́ведныхъ стяжа́ній всенаро́дное обличе́ніе. Ра́дуйся, отъ дома́шнія бра́ни и вражды́ единокро́вныхъ ми́ромъ и любо́вію огражда́ющая. Ра́дуйся, отъ па́губныхъ начина́ній и несмы́сленныхъ пожела́ній на́съ незри́мо отвраща́ющая. Ра́дуйся, во благи́хъ намѣ́реніяхъ на́шихъ при́сная споспѣ́шнице. Ра́дуйся, въ ча́съ кончи́ны всѣ́мъ на́мъ помо́щнице.

Ра́дуйся, неча́янную ра́дость вѣ́рнымъ да́рующая.

Конда́къ 13.

О, Всепѣ́тая Ма́ти, Невмѣсти́маго Бо́га во чре́вѣ вмѣсти́вшая и Ра́дость всему́ мíру роди́вшая! Ны́нѣшнее пріими́ пѣ́ніе, вся́ на́ша печа́ли на ра́дость преложи́, и отъ вся́кія изба́ви напа́сти всѣ́хъ и бу́дущія изми́ му́ки, о Тебѣ́ вопію́щихъ: Аллилу́ія.

[Се́й конда́къ глаго́лется три́жды. Та́же и́косъ 1-й: Ангели и пра́ведныхъ ду́ши удиви́шася... И конда́къ 1-й: Избра́нной отъ всѣ́хъ родо́въ...]

Моли́тва ко Пресвятѣ́й Богоро́дицѣ передъ ико́ною Ея́ «Неча́янная Ра́дость» имену́емою.

О, Пресвята́я Дѣ́во, Всеблага́го Сы́на Ма́ти Всеблага́я, ца́рствующаго гра́да и свята́го хра́ма сего́ Покрови́тельнице, всѣ́хъ су́щихъ во грѣсѣ́хъ, ско́рбѣхъ, бѣда́хъ и болѣ́знехъ Вѣ́рная Предста́тельнице и Засту́пнице! Пріими́ моле́бное пѣ́ніе сіе́ отъ на́съ, недосто́йныхъ ра́бъ Твои́хъ, Тебѣ́ возноси́мое, и я́коже дре́вле грѣ́шника, на вся́къ де́нь мно́гажды предъ честно́ю ико́ною Твое́ю моли́вшагося, не презрѣ́ла еси́, но дарова́ла еси́ ему́ неча́янную ра́дость покая́нія, и преклони́ла еси́ Сы́на Твоего́ мно́гимъ и усе́рднымъ къ Нему́ хода́тайствомъ къ проще́нію сего́ грѣ́шнаго и заблу́ждшагося, та́ко и ны́нѣ не пре́зри моле́нія на́съ, недосто́йныхъ ра́бъ Твои́хъ, и умоли́ Сы́на Твоего́ и Бо́га на́шего, да и всѣ́мъ на́мъ, съ вѣ́рою и умиле́ніемъ покланя́ющимся предъ цѣльбоно́снымъ о́бразомъ Твои́мъ, да́руетъ неча́янную по коего́ждо потре́бѣ ра́дость: грѣ́шникомъ, погря́зшимъ во глубинѣ́ зо́лъ и страсте́й — вседѣ́йственное вразумле́ніе, покая́ніе и спасе́ніе; су́щимъ въ ско́рбехъ и печа́лехъ — утѣше́ніе; обрѣта́ющимся въ бѣда́хъ и озлобле́ніихъ — соверше́нное си́хъ избытіе́; малоду́шнымъ и ненаде́жнымъ — наде́жду и терпѣ́ніе; въ ра́дости и изоби́ліи живу́щимъ — непреста́нное Благодѣ́телю благодаре́ніе; бѣ́дствующимъ — милосе́рдіе; су́щимъ въ болѣ́зни и долгонеду́жіи и оста́вленнымъ врача́ми — неча́емое исцѣле́ніе и укрѣпле́ніе; ижди́вшимъ отъ неду́га у́мъ — ума́ возвраще́ніе и обновле́ніе; отходя́щимъ въ вѣ́чную и несконча́емую жи́знь — па́мять сме́ртную, умиле́ніе и сокруше́ніе о грѣсѣ́хъ, ду́хъ бо́дръ и тве́рдую на милосе́рдіе Судіи́ наде́жду.

О, Госпоже́ Пресвята́я! Умилосе́рдися ко все́мъ, чту́щимъ всечестно́е и́мя Твое́, и всѣ́мъ яви́ всемо́щный покро́въ Тво́й и заступле́ніе: во благоче́стіи, чистотѣ́ и честнѣ́мъ жи́тельствѣ пребыва́ющія до послѣ́дняго и́хъ сконча́нія во бла́гости соблюди́; злы́я бла́ги сотвори́; заблу́ждшія на пу́ть пра́вый наста́ви; вся́кому дѣ́лу благо́му и Сы́ну Твоему́ уго́дному споспѣшеству́й; вся́кое дѣ́ло зло́е и богопроти́вное разруши́; въ, недоумѣ́ніи и тру́дныхъ и опа́сныхъ обстоя́ніихъ обрѣта́ющимся незри́мую по́мощь и вразумле́ніе съ небесе́ низпосли́, отъ искуше́ній, собла́зновъ и поги́бели спаси́, отъ всѣ́хъ злы́хъ человѣ́къ и отъ враго́въ ви́димыхъ и неви́димыхъ защити́ и сохрани́; пла́вающимъ спла́вай, путеше́ствующимъ спутеше́ствуй; су́щимъ въ ну́ждѣ и гла́дѣ бу́ди пита́тельница; неиму́щимъ кро́ва и приста́нища бу́ди покро́въ и прибѣ́жище; наги́мъ пода́ждь одѣя́ніе, оби́димымъ и непра́ведно гони́мымъ — заступле́ніе; клевету́, поноше́ніе и хуле́ніе терпя́щія незри́мо оправда́й; клеветники́ и хули́тели предъ всѣ́ми обличи́; ожесточе́нно вражду́ющимъ неча́емое пода́ждь примире́ніе, и всѣ́мъ на́мъ — дру́гъ ко дру́гу любо́вь, ми́ръ, и благоче́стіе, и здра́віе съ долгоде́нствіемъ. Супру́жества въ любви́ и единомы́сліи сохрани́; супру́ги, во враждѣ́ и раздѣле́ніи су́щія, умири́, соедини́ я́ дру́гъ ко дру́гу и положи́ и́мъ сою́зъ любве́ неразруши́мый; ма́теремъ, дѣ́ти родя́щимъ, ско́рое пода́ждь разрѣше́ніе, младе́нцы воспита́й, ю́ныя уцѣлому́дри, отве́рзи и́мъ у́мъ къ воспрія́тію вся́каго поле́знаго уче́нія, стра́ху Бо́жію, воздержа́нію и трудолю́бію наста́ви; отъ дома́шнія бра́ни и вражды́ единокро́вныхъ ми́ромъ и любо́вію огради́; безма́тернихъ сиро́тъ бу́ди Ма́терь, отъ вся́каго поро́ка и скве́рны отврати́ я́ и всему́ благо́му и богоуго́дному научи́, прельще́нныя же и во грѣ́хъ и нечистоту́ впа́дшія, скве́рну грѣха́ отъя́вши, изъ бе́здны поги́бели изведи́; вдо́въ бу́ди утѣ́шительница и помо́щница, ста́рости бу́ди же́злъ; отъ внеза́пныя сме́рти безъ покая́нія всѣ́хъ на́съ изба́ви и всѣ́мъ на́мъ христіа́нскую кончи́ну живота́ на́шего, безболѣ́зненну, непосты́дну, ми́рну и до́брый отвѣ́тъ на стра́шнѣмъ суди́щи Христо́вѣ да́руй; преста́вльшіяся въ вѣ́рѣ и покая́ніи отъ житія́ сего́ со а́нгелы и всѣ́ми святы́ми жи́ти сотвори́; сконча́вшимся внеза́пною сме́ртію ми́лостива бы́ти Сы́на Твоего́ умоли́ и о всѣ́хъ усо́пшихъ, и́же не и́мутъ сро́дниковъ, о упокое́ніи и́хъ Сы́на Твоего́ умоля́ющихъ, Сама́ бу́ди непреста́нная и те́плая моли́твенница и хода́таица. Да вси́ на небеси́ и на земли́ вѣ́дятъ Тя́, я́ко тве́рдую и непосты́дную Предста́тельницу ро́да христіа́нскаго, и, вѣ́дуще, сла́вятъ Тя́ и Тобо́ю Сы́на Твоего́, со Безнача́льнымъ Его́ Отце́мъ и Единосу́щнымъ Его́ Ду́хомъ, ны́нѣ и при́сно и во вѣ́ки вѣко́въ. Ами́нь.

Тропа́рь, гла́съ 4:

Дне́сь, вѣ́рніи лю́діе, духо́вно торжеству́емъ, Засту́пницу усе́рдную ро́да христіа́нскаго прославля́юще, и ко пречи́стому Ея́ о́бразу притека́юще, взыва́емъ си́це: О, Преми́лостивая Влады́чице Богоро́дице! пода́ждь на́мъ неча́янную ра́дость, обремене́ннымъ грѣхи́ и скорбьми́ мно́гими, и изба́ви на́съ отъ вся́каго зла́, моля́щи Сы́на Твоего́, Христа́ Бо́га на́шего, спасти́ ду́ши на́ша.

Конда́къ, гла́съ 6:

Не и́мамы ины́я по́мощи, не и́мамы ины́я наде́жды, ра́звѣ Тебе́, Влады́чице, Ты́ на́мъ помози́, на Тебе́ надѣ́емся и Тобо́ю хва́лимся, Твои́ бо есмы́ раби́, да не постыди́мся.

Велича́ніе:

Велича́емъ Тя́, Пресвята́я Дѣ́во, Богоизбра́нная Отрокови́це, и чте́мъ о́бразъ Тво́й святы́й, и́мже то́чиши исцѣле́нія всѣ́мъ, съ вѣ́рою притека́ющимъ.

Источникъ: Акаѳистъ Пресвятѣй Богородицѣ ради чудотворнаго Ея образа «Нечаянныя Радости». — Изданіе пятое. — М.: Синодальная Типографія, 1911. — 48 с.

/ Къ оглавленію раздѣла /


Наверхъ / Къ титульной страницѣ

0