Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - среда, 22 ноября 2017 г. Сейчасъ на порталѣ посѣтителей - 12.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ДОМАШНЯЯ МОЛИТВА

Свт. Гурій, архіеп. Казанскій, чудотворецъ († 1563 г.)

Святители Гурий, архиепископ Казанский, и Варсонофий, еп. ТверскойСвт. Гурій, въ мірѣ Григорій, родился въ г. Радонежѣ отъ бѣдныхъ дворянъ Руготиныхъ и былъ воспитанъ въ благочестіи и страхѣ Божіемъ. Отданный въ молодости на службу ко двору князя Пенькова, за свою скромность, благочестіе и честность онъ пользовался расположеніемъ князя, но, по зависти, былъ оклеветанъ недругами и два года просидѣлъ въ подземной темницѣ. По чудесномъ освобожденіи, постригся въ Волоколамскомъ монастырѣ и «бысть монахъ чудный». Въ 1543 г. онъ былъ избранъ братіей въ игумена монастыря. Оставивъ въ началѣ 1552 г. настоятельство, онъ подвизался въ той же обители, какъ простой инокъ. Въ началѣ 1554 г. былъ поставленъ настоятелемъ Селижарова монастыря. По желанію почитавшаго его царя Іоанна IV Грознаго, поставленъ въ 1555 г. первымъ первымъ архіепископомъ покореннаго въ 1552 г. Казанскаго царства. За время его святительства крестились многія тысячи магометанъ и язычниковъ. Ревностно неся тяжелые труды святительства, онъ въ то же время съ особою любовію занимался обученіемъ дѣтей грамотѣ. Св. Гурій былъ ревностнымъ проповѣдникомъ слова Божія и, когда тяжко заболѣлъ, то его приносили на носилкахъ въ храмъ, гдѣ онъ по прежнему ревностно поучалъ паству. Почувствовавъ приближеніе своей кончины, св. Гурій принялъ великую схиму и мирно почилъ, въ 1563 г. Согласно его завѣщанію, онъ былъ погребенъ въ Спасо-Преображенскомъ монастырѣ. Въ 1595 г. мощи св. Гурія были обрѣтены нетлѣнными и источающими мѵро. Отъ нихъ совершались многочисленныя чудеса и исцѣленія. Дни памяти свт. Гурія: 5 (18) декабря — преставленіе, 4 (17) октября — обрѣтеніе мощей и 20 іюня (3 іюля) — перенесеніе мощей.

АКАѲИСТЫ

Ака́ѳистъ святи́телю Гу́рію, Каза́нскому и Свія́жскому чудотво́рцу.

Конда́къ 1.

Возбра́нный святи́телю и чудотво́рче Гу́ріе, пріими́ отъ на́съ недосто́йныхъ подоба́ющую ти́ похвалу́, я́ко первосвяти́телю, учи́телю и покрови́телю гра́да Каза́ни. И, я́ко имѣ́яй дерзнове́ніе ко Го́споду, отъ вся́кихъ на́съ бѣ́дъ и скорбе́й избавля́й, да съ ра́достію зове́мъ ти́:

Ра́дуйся, Гу́ріе, Каза́нскій и Свія́жскій чудотво́рче.

Икосъ 1.

Ра́дуйся, предопредѣле́нный въ предвѣ́чнѣмъ совѣ́тѣ Бо́жіемъ къ просвѣще́нію невѣ́рныхъ; ра́дуйся, предочи́щенный для сего́ служе́нія сосу́де благода́ти Бо́жія.

Ра́дуйся, зла́то, искуше́нное въ горни́лѣ долговре́менныхъ страда́ній; ра́дуйся, съ ю́ности мíромъ отве́рженный и мíра отвергíйся.

Ра́дуйся, въ темни́цу неви́нно, я́ко Іо́сифъ, заключе́нный; ра́дуйся, въ то́й темни́цѣ прему́дрости небе́снѣй научи́выйся.

Ра́дуйся, въ темни́цѣ то́йжде свѣ́тъ, дарова́вшій тебѣ́ свобо́ду, узрѣ́вый; ра́дуйся, изъ нея́ чу́днымъ о́бразомъ изведе́нный.

Ра́дуйся, по получе́ніи свобо́ды всего́ себе́ Бо́гу порабо́тивый; ра́дуйся, чистоты́ и дѣ́вства храни́телю.

Ра́дуйся, поста́ и моли́твы ре́вностный блюсти́телю; ра́дуйся, до́блестный Христа́ послѣ́дователю.

Ра́дуйся, Гу́ріе, Каза́нскій и Свія́жскій чудотво́рче.

Конда́къ 2.

Ви́дя себе́ неви́нно оклеве́тана, осужде́нна и въ мра́чнѣй темни́цѣ пи́щею безслове́сныхъ пита́ема, глаго́лалъ еси́, святи́телю, са́мъ себѣ́: «а́ще не бы́ Госпо́дь Бо́гъ попусти́лъ сему́ бы́ти со мно́ю, не бы́ пости́гла мя́ напа́сть сія́, тѣ́мже пою́ Ему́: Аллилу́ія».

Икосъ 2.

Ра́зумъ Боже́ственный имѣ́я, святи́телю, ты́ въ та́йну суде́бъ Бо́жіихъ о тебѣ́ углуби́лся еси́ и въ неви́ннѣмъ заточе́ніи твое́мъ бла́гость и́хъ прови́дѣлъ еси́. Тѣ́мже пріими́ отъ на́съ сицева́я:

Ра́дуйся, въ бѣда́хъ и тѣснота́хъ твои́хъ бла́гость Бо́жію ви́дѣвый; ра́дуйся, во всѣ́хъ злы́хъ свои́хъ Бо́га благослови́вый.

Ра́дуйся, за притѣсни́телей свои́хъ Бо́гу моли́выйся; ра́дуйся, проще́ніе и́мъ у Го́спода испроси́вый.

Ра́дуйся, те́плою моли́твою къ Бо́гу себе́ успоко́ивый; ра́дуйся, е́ю дово́льство и утѣше́ніе въ теснотѣ́ твое́й себѣ́ обрѣты́й.

Ра́дуйся, свобо́ды чу́днымъ о́бразомъ сподо́бивыйся; ра́дуйся, ди́вный въ се́мъ апо́столу Петру́ наслѣ́дниче.

Ра́дуйся, терпѣли́вый учениче́ Христа́ Спаси́теля; ра́дуйся, взе́мшій Его́ благо́е и́го на себе́.

Ра́дуйся, поне́сшій Его́ ле́гкое бре́мя; ра́дуйся, мона́ховъ украше́ніе.

Ра́дуйся, Гу́ріе, Каза́нскій и Свія́жскій чудотво́рче.

Конда́къ 3.

Си́ла Вы́шняго осѣни́ тя, святи́телю, егда́ съ постриже́ніемъ власо́въ всего́ себе́ всецѣ́ло Ему́ посвяти́лъ еси́. Тѣ́мже въ чистотѣ́, постѣ́ и моли́твѣ непреста́нно воспѣва́лъ еси́ Бо́гу: Аллилу́ія.

Икосъ 3.

Имѣ́я и́стинное вѣ́дѣніе о ко́зняхъ мíра, пло́ти и діа́вола, ты́, святи́телю, крѣ́пко проти́ву тѣ́хъ вооружи́лся еси́ бдѣ́ніемъ, посто́мъ и моли́твою. Тѣ́мже вопіе́мъ ти́:

Ра́дуйся, неусы́пный Христо́въ во́ине; ра́дуйся, при́сно блюды́й ду́шу твою́ отъ скве́рнъ пло́ти и мíра, и ко́зней діа́вола.

Ра́дуйся, опа́сность отъ ни́хъ благовре́меннѣ предви́дѣвый; ра́дуйся, посто́мъ пло́ть твою́ изнури́вый.

Ра́дуйся, всецѣ́ло ду́ху твоему́ пло́ть порабо́тивый; ра́дуйся, со страстьми́ и похотьми́ пло́ть распя́вый.

Ра́дуйся, моли́твою ду́хъ тво́й окрили́вый; ра́дуйся, на крилѣ́хъ моли́твы всегда́ въ го́рняя пари́вый.

Ра́дуйся, и на зе́млю благода́ть Бо́жію моли́твами твои́ми привлека́вый; ра́дуйся, усе́рдный о всѣ́хъ моли́твенниче.

Ра́дуйся, земны́й а́нгеле и небе́сный человѣ́че; ра́дуйся, мона́ховъ му́дрый и кро́ткій наста́вниче.

Ра́дуйся, Гу́ріе, Каза́нскій и Свія́жскій чудотво́рче.

Конда́къ 4.

Бу́рю вну́трь имѣ́лъ еси́ помышле́ній сумни́тельныхъ, егда́ во игу́мена поста́вленъ бы́лъ еси́ Іо́сифовой оби́тели, во смире́ніи помышля́я о тру́дности сего́ служе́нія и сла́бости си́лъ твои́хъ. Тѣ́мже и служе́ніе игу́мена съ себе́ сложи́лъ еси́, и въ поко́ѣ ду́ха Бо́гу пѣ́лъ еси́: Аллилу́ія.

Икосъ 4.

Слы́ша держа́вный ца́рь Іоа́ннъ о твои́хъ святы́хъ по́двигахъ въ постѣ́ и моли́твѣ, повелѣ́ тя́ па́ки поста́вити во игу́мена Селижа́ровой оби́тели. Ты́ же, пріе́мый во́лю царе́ву за во́лю Бо́жію, па́ки взя́лъ еси́ вруче́нный тебѣ́ же́злъ правле́нія и труды́ ко трудо́мъ прилага́лъ еси́. Тѣ́мже пріими́ отъ на́съ сицева́я:

Ра́дуйся, свѣти́льниче, не таи́мый подъ спу́домъ; ра́дуйся, свѣ́те, во тмѣ́ сія́яй.

Ра́дуйся, во́лю Бо́жію въ во́лѣ царе́вой усмотрѣ́вый; ра́дуйся, всецѣ́ло себе́ о́ной преда́вый.

Ра́дуйся, исполни́телю во́ли Бо́жіей усе́рдный; ра́дуйся, чи́на церко́внаго стро́гій блюсти́телю.

Ра́дуйся, благочи́нія монасты́рского вѣ́рный храни́телю; ра́дуйся, побо́рниче Правосла́вныя вѣ́ры.

Ра́дуйся, усе́рдный храни́телю оте́ческихъ преда́ній; ра́дуйся, сосу́де благода́ти Бо́жія.

Ра́дуйся, живы́й сви́тче зако́на Бо́жія; ра́дуйся, апо́столе Каза́нскія о́бласти.

Ра́дуйся, Гу́ріе, Каза́нскій и Свія́жскій чудотво́рче.

Конда́къ 5.

Боготе́чному со́лнцу уподо́би тя́, святи́телю, Госпо́дь Бо́гъ, въ ди́вномъ твое́мъ избра́ніи на святи́тельскій престо́лъ, егда́ тебѣ́ жре́біемъ указа́ бы́ти первосвяти́телемъ Каза́нскія Це́ркве. Мы́ же пое́мъ Бо́гу, яви́вшему на тебѣ́ благода́ть и ми́лость Свою́: Аллилу́ія.

Икосъ 5.

Ви́дѣвше держа́вный ца́рь Іоа́ннъ и вси́ правосла́вніи лю́діе чу́дное Бо́жіе избра́ніе тя́ по жре́бію въ первосвяти́теля Каза́нскія Це́ркве, ра́довахуся. Мы́ же со благоговѣ́ніемъ воспѣва́емъ ти́ си́це:

Ра́дуйся, люби́миче Бо́жій, ука́занный жре́біемъ; ра́дуйся, служи́телю Госпо́день, предопредѣле́нный для́ воздѣ́ланія но́выя ни́вы.

Ра́дуйся, па́стырю слове́снаго ста́да Христо́ва, блужда́вшаго по верте́памъ невѣ́рія и нече́стія; ра́дуйся, потае́нный свѣти́льниче, ди́вно поста́вленный на высоту́ Це́ркве Бо́жія.

Ра́дуйся, проповѣ́дниче Ева́нгелія Христо́ва въ странѣ́ нече́стія магомета́нскаго; ра́дуйся, принесы́й свѣ́тъ Христо́въ въ страну́ тмы́ и заблужде́ній.

Ра́дуйся, крѣ́пкая наде́ждо Це́ркве Правосла́вныя; ра́дуйся, исполни́телю благи́хъ жела́ній царя́ держа́внаго.

Ра́дуйся, обра́довавый его́ твои́мъ ре́вностнымъ служе́ніемъ; ра́дуйся, ра́досте и утѣше́ніе всѣ́хъ градо́въ, и́же сподо́бишася тя́ ви́дѣти и отъ тебе́ благослови́тися.

Ра́дуйся, сосу́де благода́ти, просвѣща́ющей вѣ́рныхъ; ра́дуйся, первосвяти́телю Каза́нскія о́бласти.

Ра́дуйся, Гу́ріе, Каза́нскій и Свія́жскій чудотво́рче.

Конда́къ 6.

Проповѣ́дникомъ богоно́снымъ избра́нъ бы́лъ еси́ для Каза́нскія о́бласти, святи́телю, тѣ́мже святолѣ́пно ше́ствовалъ еси́ изъ ца́рствующаго гра́да Москвы́ въ новопросвѣще́нный гра́дъ Каза́нь, освяща́я ше́ствіемъ и благослове́ніемъ твои́мъ гра́ды и ве́си на пути́, и непреста́нно воспѣва́я Бо́гу: Аллилу́ія.

Икосъ 6.

Возсія́вый въ богоспаса́емомъ гра́дѣ Каза́ни Свѣ́тъ и́стины — Христо́съ Бо́гъ на́шъ, и прогна́вый тму́ магомета́нскаго и язы́ческаго нече́стія, избра́ тя, святи́телю, въ пе́рваго здѣ́ служи́теля и исполни́теля свято́й во́ли Его́. Тѣ́мже освяти́ тя и просла́ви, на́съ же научи́ вопи́ти тебѣ́ си́це:

Ра́дуйся, свѣ́та и́стины распространи́телю; ра́дуйся, діа́вольскія тмы́ прогна́телю.

Ра́дуйся, пе́рвый сѣ́ятелю на но́вой ни́вѣ Бо́жіей; ра́дуйся, му́дрый возрасти́телю на не́й стори́чныхъ кла́совъ.

Ра́дуйся, неутоми́мый ея́ напои́телю; ра́дуйся, дру́же царя́ земна́го, исполня́ющаго во́лю Царя́ Небе́снаго.

Ра́дуйся, вѣ́рный служи́телю Царя́ Небе́снаго; ра́дуйся, апо́столе Каза́нскія Це́ркве.

Ра́дуйся, привлека́яй къ вѣ́рѣ невѣ́рующихъ чи́стою Христо́вою любо́вію; ра́дуйся, дру́же Христо́въ, приводя́й лю́ди къ благоговѣ́нію предъ Бо́гомъ.

Ра́дуйся, притѣсня́емыхъ вдо́въ и сиро́тъ защи́тниче; ра́дуйся, всѣ́хъ притека́ющихъ къ тебѣ́ засту́пниче.

Ра́дуйся, Гу́ріе, Каза́нскій и Свія́жскій чудотво́рче.

Конда́къ 7.

Хотя́й устро́ити та́йну спасе́нія каза́нскихъ тата́ръ и язы́чниковъ, Христо́съ Бо́гъ на́шъ избра́ тя́, святи́телю, въ апо́стола и просвѣти́теля страны́ сея́. Ты́ же, уразумѣ́въ та́йну спасе́нія, вопія́лъ еси́ Бо́гу: Аллилу́ія.

Икосъ 7.

Но́вое чу́до показа́ Госпо́дь и Спа́съ на́шъ, Іису́съ Христо́съ, избра́вый тя́ въ первосвяти́теля Каза́нскія Це́ркве, егда́ тя еди́наго изъ четыре́хъ жре́біемъ указа́ все́й Свое́й Правосла́вной Це́ркви. Мы́ же, дивя́щеся, вопіе́мъ ти́ си́це:

Ра́дуйся, отъ вѣ́чности предопредѣле́нный просвѣти́телю Каза́нскія о́бласти; ра́дуйся, сокрове́нный до вре́мене сосу́де благода́ти Бо́жія.

Ра́дуйся, избра́ніемъ твои́мъ всю́ Це́рковь удиви́вый и обра́довавый; ра́дуйся, тѣ́мже избра́ніемъ въ пре́данности Бо́гу укрѣпи́выйся.

Ра́дуйся, ди́вное твое́ избра́ніе служе́ніемъ твои́мъ оправда́вый; ра́дуйся, съ благослове́нія Бо́жія гряды́й въ Каза́нь во и́мя Госпо́дне.

Ра́дуйся, въ пути́ твое́мъ непреста́нно воспѣва́яй и благословля́яй; ра́дуйся, ве́сь пу́ть тво́й моли́твами освяти́вый.

Ра́дуйся, безбѣ́дно на па́ству твою́ прише́дый; ра́дуйся, благода́тный обнови́телю и освяти́телю гра́да Каза́ни.

Ра́дуйся, благолѣ́пнаго хра́ма Пресвяты́я Богоро́дицы созда́телю; ра́дуйся, обра́довавый правосла́вныхъ каза́нскихъ жи́телей твои́мъ прише́ствіемъ.

Ра́дуйся, Гу́ріе, Каза́нскій и Свія́жскій чудотво́рче.

Конда́къ 8.

Стра́нное избра́ніе твое́, святи́телю, помышля́я, и боголѣ́пное ше́ствіе твое́ на но́вую па́ству твою́ зна́я, съ благоговѣ́ніемъ возво́димъ умы́ и сердца́ свои́ къ Бо́гу, та́ко устро́ившему ди́вное твое́ прославле́ніе, поя́ Ему́: Аллилу́ія.

Икосъ 8.

Ве́сь у́мъ тво́й, святи́телю, впери́лъ еси́ къ Бо́гу и всего́ себе́ пре́далъ еси́ святѣ́й во́лѣ Его́, егда́ вступи́лъ еси́ на престо́лъ Каза́нскія па́ствы твоея́, ю́же и не престая́ поуча́лъ еси́ сло́вомъ и дѣ́ломъ. Тѣ́мже пріими́ отъ на́съ похвалы́ сія́:

Ра́дуйся, до́брый па́стырю, всегда́ гото́вый положи́ти ду́шу свою́ за о́вцы па́жити твоея́; рáдyйcя, му́дрый храни́телю ста́да твоего́ отъ волко́въ, хотя́щихъ губи́ти е́.

Ра́дуйся, неутоми́мый дѣ́лателю въ вертогра́дѣ Христо́вомъ; ра́дуйся, наста́вниче па́стырей и учи́телей твоея́ па́ствы.

Ра́дуйся, разу́мный вождю́ въ житіи́ по за́повѣдемъ Бо́жіимъ и преда́ніемъ апо́стольскимъ; ра́дуйся, о́тче, просвѣти́телю и попечи́телю всѣ́хъ новокреще́нныхъ.

Ра́дуйся, кро́ткій и добросерде́чный убѣди́телю въ и́стинѣ и Боже́ственности христіа́нскія вѣ́ры невѣ́рующихъ; ра́дуйся, богому́дрый вразуми́телю люде́й мы́слящихъ.

Рaдyйcя, му́дрый руководи́телю твои́хъ сотру́дниковъ; ра́дуйся, благопопечи́тельный о́тче всѣ́хъ сиротству́ющихъ.

Ра́дуйся, притѣсня́емыхъ засту́пниче; ра́дуйся, хода́таю за невѣ́рныхъ, позна́вшихъ и́стину.

Ра́дуйся, Гу́ріе, Каза́нскій и Свія́жскій чудотво́рче.

Конда́къ 9.

Вся́кое естество́ а́нгельское удиви́ся многотру́днымъ твои́мъ па́стырскимъ по́двигомъ, показу́емымъ во бдѣ́ніи, постѣ́, моли́твѣ, и въ неусы́пномъ попече́ніи о ста́дѣ твое́мъ. Ты́ бо, святи́телю, де́нно и но́щно бѣсе́дуя съ Бо́гомъ моли́твою, сло́вомъ и дѣ́ломъ непреста́нно воспѣва́лъ Ему́: Аллилу́ія.

Икосъ 9.

Вѣтíи многовѣща́нныя, я́ко ры́бы безгла́сныя ви́димъ о тебѣ́, святи́телю, недоумѣва́ютъ бо глаго́лати, е́же ка́ко, и отше́льникомъ денно-но́щною моли́твою примѣ́ръ подава́еши, и па́ству твою́ примѣ́рно управля́еши. Мы́ же, дивя́щеся, благоговѣ́йно вопіе́мъ ти́:

Ра́дуйся, па́стырю, подава́яй примѣ́ръ мона́шествующимъ; ра́дуйся, собесѣ́дниче съ Бо́гомъ, науча́яй всѣ́хъ послѣ́дованію твоему́ примѣ́ру.

Ра́дуйся, тлетво́рнаго сна́ прогони́телю; ра́дуйся, посту́ и бдѣ́нію учи́телю.

Ра́дуйся, лѣни́выхъ возбуди́телю; ра́дуйся, примѣ́рный Бо́жій подви́жниче.

Ра́дуйся, му́дро привлека́вый невѣ́рныхъ къ приня́тію Правосла́вныя вѣ́ры; ра́дуйся, неутоми́мый проповѣ́дниче сло́ва Бо́жія.

Ра́дуйся, сло́во сіе́ здра́во, немяте́жно и учи́тельно преподава́вый; ра́дуйся, благоразу́мный вразуми́телю магомета́нъ въ и́стинѣ христіа́нскія вѣ́ры.

Ра́дуйся, ди́вный указа́телю всѣ́мъ невѣ́рующимъ на вели́чіе и сла́ву Іису́са Христа́; ра́дуйся, му́дро привлека́яй къ Нему́ всѣ́хъ и вся́.

Ра́дуйся, Гу́ріе, Каза́нскій и Свія́жскій чудотво́рче.

Конда́къ 10.

Спасти́ хотя́ магомета́нъ и язы́чниковъ, въ но́вой па́ствѣ твое́й находя́щихся, ты́, я́ко до́брый па́стырь, всю́ му́дрость твою́ къ сему́ употреби́лъ еси́, и непреста́нно Бо́га въ по́мощь призыва́лъ еси́, воспѣва́я Ему́: Аллилу́ія.

Икосъ 10.

Стѣна́ еси́ вѣ́рующимъ и къ тебѣ́ прибѣга́ющимъ, и́бо небесе́ и земли́ Творе́цъ устро́и тя́, святи́телю, вѣ́ры укрѣпи́теля, невѣ́рія же обличи́теля, на́съ же научи́ взыва́ти тебѣ́ си́це:

Ра́дуйся, сто́лпе правосла́вно вѣ́рующихъ; ра́дуйся, отверза́ющій и́мъ две́рь спасе́нія.

Ра́дуйся, наста́вниче му́дрости о Христѣ́ Спаси́телѣ; ра́дуйся, препода́телю Боже́ственныя благода́ти.

Ра́дуйся, обнови́телю растлѣ́ннаго человѣ́чества въ невѣ́рующихъ; ра́дуйся, настави́телю ма́ло смы́слящихъ и не смы́слящихъ.

Ра́дуйся, бѣсо́вскія ко́зни проразумѣва́яй; ра́дуйся, си́лу Христо́ву проповѣ́дуяй.

Ра́дуйся, дѣ́вство и чистоту́ храня́й и проповѣ́дуяй; ра́дуйся, дру́же Жениха́, ра́дующійся о сочета́ніи съ Ни́мъ чи́стыхъ и незло́бивыхъ ду́шъ.

Ра́дуйся, архитрикли́не бра́ка, соедини́вшаго безчи́сленное мно́жество ду́шъ съ небе́снымъ Женихо́мъ; ра́дуйся, ревну́яй Бо́жіею ре́вностію о вѣ́рности Христу́ ду́шъ христіа́нскихъ.

Ра́дуйся, Гу́ріе, Каза́нскій и Свія́жскій чудотво́рче.

Конда́къ 11.

Пѣ́ніе вся́кое побѣжда́ется, спростре́тися тща́щееся ко мно́жеству мно́гихъ твои́хъ добродѣ́телей, святи́телю. Никíя бо пѣ́сни мо́гутъ бы́ти равночи́сленны и́мъ. Тѣ́мже, благоговѣ́я предъ тобо́ю, пое́мъ Бо́гу: Аллилу́ія.

Икосъ 11.

Свѣтопріе́мнаго свѣти́льника су́щимъ во тмѣ́ неразу́мія ви́димъ въ тебѣ́, святи́телю: невеще́ственный бо вжига́ющи о́гнь, разгоня́еши тму́ невѣ́рія и на всѣ́хъ оби́льно пролива́еши свѣ́тъ Христо́въ, просвѣща́яй вся́каго человѣ́ка, гряду́щаго въ мíръ. Тѣ́мже по до́лгу взыва́емъ ти́ си́це:

Ра́дуйся, свѣти́льниче, возжже́нный огне́мъ съ престо́ла Бо́жія; ра́дуйся, прича́стниче сла́вы Госпо́дней.

Ра́дуйся, прославля́яй Просла́вльшаго тя́; ра́дуйся, пронося́й сла́ву Его́ по безсла́внѣй о́бласти нече́стія.

Ра́дуйся, озаря́яй умы́ и сердца́ люде́й, сѣдя́щихъ во тмѣ́ и сѣ́ни сме́ртнѣй; ра́дуйся, исто́чниче, оби́льно излива́яй во́ду благода́ти Бо́жіей.

Ра́дуйся, напая́яй е́ю умы́ и сердца́ жа́ждущихъ спасе́нія; ра́дуйся, указа́телю небе́снаго рая́ невѣ́дущимъ его́.

Ра́дуйся, вѣ́рный руководи́телю всѣ́хъ послѣ́дующихъ тебѣ́; ра́дуйся, отверза́яй две́ри Ца́рствія Бо́жія ше́ствующимъ по тебѣ́.

Ра́дуйся, представля́яй и́хъ престо́лу Бо́жію; ра́дуйся, сопричисля́яй и́хъ къ со́нму святы́хъ Бо́жіихъ.

Ра́дуйся, Гу́ріе, Каза́нскій и Свія́жскій чудотво́рче.

Конда́къ 12.

Благода́ть, да́нную ти́ отъ Бо́га, оби́льно излива́еши на всѣ́хъ, притека́ющихъ съ вѣ́рою къ ра́цѣ святы́хъ моще́й твои́хъ, святи́телю. Тѣ́мже мы́, дивя́щеся мно́жеству чуде́съ, тобо́ю соверша́емыхъ, пое́мъ Бо́гу, прославля́ющему тя́: Аллилу́ія.

Икосъ 12.

Пою́ще хвале́бную пѣ́снь тебѣ́, святи́телю, просла́вленный Бо́гомъ на небеси́ и на земли́, воспѣва́емъ ти́ си́це:

Ра́дуйся, во свѣ́тѣ предстоя́й престо́лу Вы́шняго; ра́дуйся, всегда́ воспѣва́яй сла́ву Бо́жію.

Ра́дуйся, непреста́нно зря́й Бо́га лице́мъ къ лицу́; ра́дуйся, приника́яй въ та́йну Пресвяты́я Тро́ицы.

Ра́дуйся, усе́рдный Ея́ покло́нниче; ра́дуйся, послѣ́дователю Агнцу Бо́жію, взе́мшему грѣхи́ мíра.

Ра́дуйся, предводи́телю всѣ́хъ спасе́нныхъ и спаса́емыхъ тобо́ю; ра́дуйся, и на́съ, грѣ́шныхъ, въ мíрѣ се́мъ не оставля́яй.

Ра́дуйся, не тѣ́сно въ любви́ твое́й всѣ́хъ вмѣща́яй; ра́дуйся, любвеоби́льный о всѣ́хъ на́съ моли́твенниче.

Ра́дуйся, па́ствы твоея́ покрови́телю; ра́дуйся, гра́ду Каза́ни похвало́ и украше́ніе.

Ра́дуйся, Гу́ріе, Каза́нскій и Свія́жскій чудотво́рче.

Конда́къ 13.

О, всеблаже́нный и святы́й святи́телю о́тче Гу́ріе, при́сный на́шъ наста́вниче, хода́таю и покрови́телю, моли́ о на́съ Христа́ Бо́га, да изба́витъ па́ству твою́ и вся́ гра́ды и ве́си христіа́нскія отъ вра́гъ ви́димыхъ и неви́димыхъ, отъ наше́ствія иноплеме́нникъ, отъ неду́га и гла́да, отъ вся́кія ско́рби и смертоно́сныя ра́ны, и гряду́щія му́ки, вопію́щихъ Ему́: Аллилу́ія.

[Се́й конда́къ глаго́лется три́жды. Та́же и́косъ 1-й: Ангеловъ Творе́цъ... И конда́къ 1-й: Возбра́нный святи́телю...]

Моли́тва святи́телю Гу́рію, Каза́нскому и Свія́жскому чудотво́рцу.

Святи́телю о́тче Гу́ріе, предстоя́ свяще́нной ра́кѣ многоцѣле́бныхъ моще́й твои́хъ, мо́лимъ тя́ усе́рдно бы́ти всегда́ и вездѣ́ на́шимъ хода́таемъ, засту́пникомъ и покрови́телемъ. Исхода́тайствуй па́ствѣ твое́й ми́ръ, тишину́, благоде́нствіе, здра́віе и спасе́ніе. Бу́ди постоя́ннымъ на́шимъ засту́пникомъ отъ всѣ́хъ враго́въ, ви́димыхъ и неви́димыхъ, покрыва́й на́съ отъ нахожде́нія всѣ́хъ бѣ́дъ, напа́стей и скорбе́й, па́че же отъ искуше́ній врага́ те́мнаго. Предстоя́щимъ же здѣ́ и моля́щимся испроси́ у Го́спода Бо́га вся́, я́же ко спасе́нію своему́ они́ про́сятъ у Него́ въ свои́хъ ну́ждахъ и ско́рбехъ, да все́ мы́ съ тобо́ю прославля́емъ всесвято́е и́мя Отца́ и Сы́на и Свята́го Ду́ха, ны́нѣ и при́сно, и во вѣ́ки вѣко́въ. Ами́нь.

Тропа́рь [на преставле́ніе, 5-го декабря́], гла́съ 4:

Пра́вило вѣ́ры и о́бразъ цѣлому́дрія, учи́теля до́брыхъ дѣ́лъ и наста́вника спасе́нія даде́ тя́ Госпо́дь новопросвѣще́нному гра́ду Каза́ни, въ не́мже пріобрѣ́лъ еси́ но́выя отъ язы́къ лю́ди и приве́лъ еси́ я́ Христо́ви. Сего́ ра́ди въ па́мять твою́ ра́достно соше́дшеся, че́стнѣ пра́зднуемъ свято́е твое́ успе́ніе, ты́ же, о́тче на́шъ, святи́телю Христо́въ Гу́ріе, моли́ Христа́ Бо́га спасти́ся душа́мъ на́шимъ.

Инъ тропа́рь [на обрѣ́теніе моще́й, 4-го октября́], гла́съ 3:

Пе́рвіе учи́теліе пре́жде те́мному, ны́нѣ же свѣ́тлому и новопросвѣще́нному гра́ду Каза́ни, пе́рвіи возвѣсти́теліе пути́ спаси́тельнаго, и́стинніи храни́теліе апо́стольскихъ преда́ній, столпи́ непоколеби́міи, благоче́стія учи́теліе и Правосла́вія наста́вницы, Гу́ріе и Варсоно́фіе, Влады́ку всѣ́хъ моли́те ми́ръ вселе́ннѣй дарова́ти и душа́мъ на́шимъ ве́лію ми́лость.

Инъ тропа́рь [на пренесе́ніе моще́й, 20-го ію́ня], гла́съ 4:

Яко кри́нъ благово́нный, мѵроточи́выя твоя́ мо́щи отъ вертогра́да це́ркве Спа́совы въ вертогра́дъ це́ркве Богоро́дичны че́стнѣ принесо́шася, святи́телю Гу́ріе, я́ко же бо да́ръ че́стенъ, тя́ дарова́въ Христо́съ Пречи́стѣй Ма́тери Свое́й, и испо́лнися хра́мъ Ея́ святы́й благоуха́нія твоего́, и возра́довася архіере́йскій престо́лъ, пріе́мши тя́, первосѣда́теля своего́. Возвесели́ся же собо́ръ вѣ́рныхъ со святи́телемъ и священнонача́льники о пресла́вномъ цѣльбоно́сныхъ твои́хъ моще́й пренесе́ніи, е́же мы́ ра́достно пра́зднующе, мо́лимъ тя́, уго́дниче Бо́жій: моли́ Христа́ Бо́га пода́ти Импера́тору на́шему на враги́ побѣ́ду и ми́ръ, и душа́мъ на́шимъ ми́ръ и ве́лію ми́лость.

Конда́къ [5-го декабря́ и 20-го ію́ня], гла́съ 4:

Чу́вственныя стра́сти побѣди́въ, чистото́ю, я́ко со́лнце, возсія́лъ еси́, чи́сто житіе́ до конца́ сохрани́въ, и отъ невѣ́рія въ вѣ́ру мно́гихъ ко Христу́ приве́лъ еси́, того́ ра́ди отъ Бо́га нетлѣ́ніемъ почте́нъ, чудесы́ твои́ми вся́ удиви́лъ еси́. Мо́лимъ у́бо тя́, святи́телю Гу́ріе, моли́твами твои́ми отъ бѣ́дъ изба́ви на́съ, да зове́мъ ти́: ра́дуйся, о́тче преди́вный, гра́ду Каза́ни похвала́ и утвержде́ніе.

Инъ конда́къ [4-го октября́], гла́съ 4:

Чу́вственныя стра́сти побѣди́въ, чистото́ю, я́ко со́лнце, возсія́лъ еси́, чи́сто житіе́ до конца́ сохрани́въ, и отъ невѣ́рія въ вѣ́ру мно́гихъ ко Христу́ приве́лъ еси́, и Того́ ра́ди отъ Бо́га нетлѣ́ніемъ почте́нъ бы́лъ еси́ и чудесы́ удивля́емь. Мо́лимъ тя́, святи́телю Гу́ріе, моли́твами твои́ми отъ бѣ́дъ изба́ви на́съ, да зове́мъ ти́: ра́дуйся, о́тче преди́вный, гра́ду Каза́ни похвала́ и утвержде́ніе.

Велича́ніе.

Велича́емъ тя́, святи́телю о́тче Гу́ріе, и чте́мъ святу́ю па́мять твою́, ты́ бо мо́лиши за на́съ Христа́ Бо́га на́шего.

Источникъ: Ака́ѳистъ святи́телю Гу́рію, Каза́нскому и Свія́жскому чудотво́рцу. — М.: Сѵнода́льная Тѵпогра́фія, 1899. — 16 л.

/ Къ оглавленію раздѣла /


Наверхъ / Къ титульной страницѣ

0