Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - суббота, 21 октября 2017 г. Сейчасъ на порталѣ посѣтителей - 18.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ДОМАШНЯЯ МОЛИТВА

Св. влмчц. Варвара († ок. 306 г.).

Святая великомученица ВарвараСвятая великомученица Варвара родилась въ г. Иліополѣ (нынѣшней Сиріи) во времена императора Максимина (305-311 гг.) въ знатной языческой семьѣ. Отецъ Варвары Діоскоръ, рано лишившись супруги, былъ страстно привязанъ къ своей единственной дочери. Чтобы уберечь красивую дѣвушку отъ постороннихъ взоровъ, онъ построилъ для нея спеціальный замокъ, откуда она могла выходить только съ разрѣшенія отца. Созерцая съ высоты башни красоту Божіяго міра, Варвара разочаровалась въ языческой религіи и испытывала сильное желаніе узнать его истиннаго Творца. Однажды, когда Діоскоръ находился въ длительномъ путешествіи, Варвара познакомилась съ мѣстными христіанками, которыя разсказали ей о Тріединомъ Богѣ, о неизреченномъ Божествѣ Іисуса Христа, о Его воплощеніи отъ Пречистой Дѣвы и о Его вольномъ страданіи и Воскресеніи. Принявъ крещеніе, дѣвушка стала ревностно служить Господу. Узнавъ объ этомъ, отецъ пришелъ въ ярость и жестоко избилъ ее, затѣмъ заключилъ подъ стражу, долго морилъ голодомъ и предалъ правителю города. Святая дѣва подверглась тяжкимъ пыткамъ, мукамъ, терзаніямъ. Наконецъ самъ отецъ обезглавилъ ее. Въ предсмертной молитвѣ святая великомученица Варвара просила Господа, чтобы Онъ избавлялъ всѣхъ, прибѣгающихъ къ ея помощи, отъ нечаянныхъ бѣдъ, отъ внезапной смерти безъ покаянія и изливалъ бы на нихъ Свою благодать. Въ отвѣтъ она услышала голосъ съ неба, обѣщавшій исполнить просимое. Память святой великомученицы Варвары совершается 4 (17) декабря.

АКАѲИСТЫ

Ака́ѳистъ святѣ́й великому́ченицѣ Варва́рѣ.

Конда́къ 1.

Избра́нной Бо́гомъ отъ идолослужи́тельнаго ро́да и призва́нной во язы́къ свя́тъ, въ лю́ди обновле́нія, невѣ́стѣ Христо́вѣ, я́ко избавля́ющіися тобо́ю отъ разли́чныхъ зо́лъ и обстоя́нія, благода́рственная пѣ́нія и хвале́нія воспису́емъ ти́, моли́твенницы твои́, свята́я и всехва́льная великому́ченице: ты́ же, иму́щи дерзнове́ніе ко Го́споду, отъ вся́кихъ на́съ бѣ́дъ свободи́, да съ ра́достію зове́мъ ти́:

Ра́дуйся, Варва́ро, невѣ́сто Христо́ва прекра́сная.

Икосъ 1.

Ангеловъ честну́ю и вселюбе́зную чистоту́ непоро́чно сохра́нши, честна́я Варва́ро, а́нгеломъ сожи́тельница бы́ти сподо́билася еси́, съ ни́миже егда́ пое́ши тро́ическую пѣ́снь Бо́гу на небеси́, услы́ши на́съ, пою́щихъ тебѣ́ на земли́ похва́льная пѣ́нія сія́:

Ра́дуйся, отрокови́це, Бо́гомъ Отце́мъ предуста́вленная бы́ти сообра́зна въ страда́ніи о́бразу Сы́на Его́; ра́дуйся, Сы́номъ Бо́жіимъ, Свѣ́томъ отъ Свѣ́та, призва́нная изъ тмы́ въ чу́дный свѣ́тъ вѣ́ры и благода́ти Его́.

Ра́дуйся, я́ко позва́вшему тя́ Свято́му Ду́ху, и сама́ тѣ́ломъ и ду́хомъ свята́ еси́; ра́дуйся, я́ко отъ скве́рны пло́ти и ду́ха непоро́чну тя́ соблюла́ еси́.

Ра́дуйся, рожде́нному отъ Дѣ́вы Жениху́ Христу́ дѣ́ву тя́ чи́стую обручи́вшая; ра́дуйся, земна́го обру́чника па́че Небе́снаго зна́ти не восхотѣ́вшая.

Ра́дуйся, кри́не дѣ́вства, посредѣ́ те́рнія и́дольскаго прора́стшій до́лѣ; ра́дуйся, цвѣ́те чистоты́, въ неувяда́емой сла́вѣ цвѣту́щій горѣ́.

Ра́дуйся, въ небе́сномъ вертогра́дѣ Христо́ва благоуха́нія наслажда́ющаяся; ра́дуйся, Краснѣ́йшаго па́че сыно́въ человѣ́ческихъ зрѣ́ніемъ та́мо утѣша́ющаяся.

Ра́дуйся, убѣли́вшая ри́зы твоя́ въ Кро́ви Агнчей на земли́; ра́дуйся, въ ли́цѣ дѣ́вственномъ послѣ́дующая Бо́жіему Агнцу на небеси́.

Ра́дуйся, Варва́ро, невѣ́сто Христо́ва прекра́сная.

Конда́къ 2.

Ви́дящи свята́я Варва́ра себе́ на высо́комъ столпѣ́ отъ отца́ поста́влену, помышля́ше себе́ ма́ніемъ Бо́жіимъ къ небеси́ бы́ти возводи́му. Разу́мная у́бо восхожде́нія въ се́рдцѣ свое́мъ поло́жши, тѣ́ми отъ тмы́ ко Свѣ́ту и отъ преле́стныхъ и́доловъ ко Истинному Бо́гу у́мнѣ восхожда́ше, пою́щи Ему́: Аллилу́ія.

Икосъ 2.

Ра́зумъ неуразумѣ́нный о Еди́номъ всея́ тва́ри Творцѣ́ разумѣ́ти дѣ́ва свята́я Варва́ра и́щущи, бесѣ́доваше со свои́мъ си ра́зумомъ, глаго́ля: отъ те́мныхъ куми́ровъ чу́днымъ свѣти́ламъ небе́снымъ ка́ко бѣ́ созда́тися мо́щно, рцы́ ми? Къ не́йже о́нъ со псало́мникомъ рече́: вси́ Бо́зи язы́къ бѣ́сове, Еди́нъ же е́сть Бо́гъ и Госпо́дь, Иже небеса́ и вся́ свѣти́ла и́хъ сотвори́. Таково́му твоему́, му́драя дѣ́во, ра́зуму дивя́щеся, глаго́лемъ:

Ра́дуйся, па́че ста́рецъ идолослужи́тельныхъ разу́мнѣйшая; ра́дуйся, па́че мудреце́въ мíра сего́ мудрѣ́йшая.

Ра́дуйся, я́ко тебѣ́ безвѣ́стная и та́йная прему́дрости Своея́ Бо́гъ яви́лъ е́сть; ра́дуйся, я́ко тебе́ и́стиннаго богосло́вія Са́мъ Бо́гъ Сло́во научи́лъ е́сть.

Ра́дуйся, всѣ́хъ звѣздоче́тцевъ умо́мъ Христо́вымъ превозше́дшая; ра́дуйся, я́вственнѣе па́че о́нѣхъ небе́сный кру́гъ прозрѣ́вшая.

Ра́дуйся, я́ко въ тва́ри, а́ки въ зерца́лѣ, Самаго́ Творца́ усмотрѣ́ла еси́; ра́дуйся, я́ко въ созда́нныхъ свѣти́лахъ Несозда́нный Свѣ́тъ узрѣ́ла еси́.

Ра́дуйся, ны́нѣ уже́ кромѣ́ зерца́ла свѣ́тъ лица́ Бо́жія на небеси́ зря́щая; ра́дуйся, тѣ́мъ свѣ́томъ неизрече́нно веселя́щаяся.

Ра́дуйся, у́мная звѣздо́, ея́же озаре́ніемъ лице́ Бо́жіе, я́ко со́лнце, свѣ́тло на́мъ явля́ется; ра́дуйся, мы́сленная луно́, е́юже но́щь заблужде́нія я́ко де́нь просвѣща́ется.

Ра́дуйся, Варва́ро, невѣ́сто Христо́ва прекра́сная.

Конда́къ 3.

Си́ла Вы́шняго даде́ тогда́ святѣ́й Варва́рѣ, я́коже дре́вле проро́ку Іезекíилю, лице́ адама́нтово, си́льно предъ всѣ́ми идолослужи́тельми, во е́же не убоя́тися е́й отъ звѣ́рскаго лица́ и́хъ, ни ужаса́тися лю́таго преще́нія. Тѣ́мже со дерзнове́ніемъ мужему́дренная дѣ́ва взыва́ше: Тро́ицу чту́, Еди́но Божество́, и То́й вѣ́рою покланя́ющися, велегла́сно пою́: Аллилу́ія.

Икосъ 3.

Иму́щи свята́я Варва́ра свы́ше да́нную себѣ́ му́дрость, востече́ къ дѣ́лателемъ ба́ни оте́ческія, и о́нѣмъ проявля́я та́йну Святы́я Тро́ицы, повелѣ́ три́ о́кна въ ба́нѣ устро́ити. Аще, — рече́, — идолослужи́теле уста́ и́мутъ и не глаго́лютъ сла́вы и́стиннаго Бо́га, то ка́менныя въ се́й ба́нѣ стѣ́ны треми́ о́кнами, а́ки треми́ устна́ми, да свидѣ́тельствуютъ, я́ко Еди́нъ е́сть Бо́гъ, въ Тро́ицѣ Святѣ́й отъ всея́ тва́ри сла́вимый и покланя́емый. За таково́е у́бо мудрова́ніе, свята́я Варва́ро, пріими́ похвалу́ сію́:

Ра́дуйся, въ треоко́нной ба́нѣ купѣ́ль свята́го креще́нія, во и́мя Тро́ицы Пресвяты́я, изобрази́вшая; ра́дуйся, въ купѣ́ли воды́ и Ду́ха, къ си́мъ же и кро́ве твоея́ му́ченическія, тебе́ измы́вшая.

Ра́дуйся, я́ко треми́ о́кнами тму́ многобо́жія, Тро́ицѣ Святѣ́й проти́внаго, прогна́ла еси́; ра́дуйся, я́ко о́кнами треми́ Свѣ́тъ Тро́ическій я́сно узрѣ́ла еси́.

Ра́дуйся, я́ко тѣ́ми треми́ о́кнами призрѣ́ на тя́ Со́лнце Пра́вды, тридне́вно возсія́вшее отъ гро́ба; ра́дуйся, я́ко тѣ́ми тебѣ́ возсія́ де́нь Тро́ическаго спасе́нія.

Ра́дуйся, се́рдце твое́ Еди́ному въ Тро́ицѣ Бо́гу всегда́ отве́рсто имѣ́вшая; ра́дуйся, чу́вства твоя́ предъ бра́нію тріе́хъ враго́въ: пло́ти, мíра и діа́вола, крѣ́пко заключи́вшая.

Ра́дуйся, я́ко въ души́ твое́й три́ мы́сленная о́кна: вѣ́ры, наде́жды и любве́, устро́ила еси́; ра́дуйся, я́ко тѣ́ми треми́ о́кнами при Тро́ическомъ Божествѣ́ треми́ де́ньми воздви́женную Тѣ́ла Христо́ва Це́рковь усмотрѣ́ла еси́.

Ра́дуйся, я́ко тебѣ́ небеса́ отъ тріе́хъ іера́рхій а́нгельскихъ отверзо́шася; ра́дуйся, я́ко тебе́ го́рнія оби́тели Тро́ическія ра́достно прія́ша.

Ра́дуйся, Варва́ро, невѣ́сто Христо́ва прекра́сная.

Конда́къ 4.

Бу́ря я́рости ве́лія отца́ твоего́, ды́шущаго преще́ніемъ и убíйствомъ, возшумѣ́ на хра́мъ души́ твоея́, свята́я Варва́ро, но того́ не возмо́же поколеба́ти: основа́нъ бо бѣ́ на тве́рдомъ вѣ́ры Христо́вы ка́мени, на не́мже ты́, му́драя дѣ́во, неподви́жимо стоя́щи, укрѣпля́ющему тя́ Іису́су Христу́ пѣ́снь воспѣва́ла еси́: Аллилу́ія.

Икосъ 4.

Слы́шавъ отъ тебе́, му́дрыя дще́ри, оте́цъ тво́й Діоско́ръ неслы́шанная о Святѣ́й Тро́ицѣ словеса́, я́ко а́спидъ глухíй затка́ у́ши своя́ и по подо́бію зміи́ну съ жа́ломъ ядоно́снымъ устреми́ся со острíемъ меча́ на твое́ убíйство; но ты́, невѣ́сто Христо́ва Варва́ро, подража́ющи Жениха́ твоего́ Іису́са, бѣжа́вшаго отъ меча́ Иродова, бѣ́гала еси́ отъ меча́ Діоско́рова, жела́ющи се́рдце его́ отъ звѣ́рскія я́рости въ любо́вь оте́ческую обрати́ти. Мы́ же разу́мное твое́ бѣ́гство зва́ніи почита́емъ си́ми:

Ра́дуйся, блаже́нная, изгна́нная изъ до́му земна́го пра́вды ра́ди; ра́дуйся, бога́тая въ Бо́га, лише́нная оте́ческихъ бога́тствъ Христа́ ра́ди.

Ра́дуйся, я́ко твоего́ обнища́нія е́сть Ца́рствіе небе́сное; ра́дуйся, я́ко тебѣ́ угото́вася вѣ́чныхъ бла́гъ сокро́вище.

Ра́дуйся, слове́сная а́гнице, отъ зла́го во́лка мучи́теля къ До́брому Па́стырю Христу́ прибѣ́гшая; ра́дуйся, во дво́ръ пра́ведныхъ ове́цъ Его́, одесну́ю стоя́щихъ, вше́дшая.

Ра́дуйся, незло́бивая голуби́це, отъ земна́го вра́на въ покро́въ небе́снаго Орла́ прелетѣ́вшая; ра́дуйся, въ кро́вѣ крилу́ Его́ до́брый тебѣ́ покро́въ обрѣ́тшая.

Ра́дуйся, Небе́снаго Отца́ дщи́ честна́я, я́ко отъ земна́го роди́теля съ безче́стіемъ на сме́рть гони́ма была́ еси́; ра́дуйся, я́ко отъ безсме́ртнаго Го́спода Сла́вы въ жи́знь вѣ́чную со сла́вою прія́та еси́.

Ра́дуйся, тоя́жде и на́мъ жи́зни присножела́ющая хода́таице; ра́дуйся, прилѣ́жная о на́съ къ Бо́гу моли́твеннице.

Ра́дуйся, Варва́ро, невѣ́сто Христо́ва прекра́сная.

Конда́къ 5.

Боготе́чной звѣздѣ́ была́ еси́ подо́бна, свята́я великомуче́нице Варва́ро: бѣжа́щи бо предъ отце́мъ твои́мъ, наставля́ла еси́ того́ та́инственнѣ на пу́ть, веду́щій ко Пра́ведному Со́лнцу, отъ Дѣ́вы возсія́вшему, Христу́ Бо́гу. Оба́че о́нъ душе́вныма ослѣпле́нъ очи́ма, а́біе и тѣле́сныма не узрѣ́ тя предъ собо́ю бѣжа́щую: ты́ бо сквозѣ́ ка́менную, тебѣ́ велѣ́ніемъ Бо́жіимъ разступи́вшуюся, го́ру проше́дши, скры́лася еси́ отъ о́чію его́ въ ка́менной пеще́рѣ, да отъ среды́ ка́менія, я́ко пти́ца, да́си гла́съ Бо́гу, воспѣва́ющи: Аллилу́ія.

Икосъ 5.

Ви́дѣвше тя́ па́стыріе, верху́ горы́ о́вцы пасу́щіи, въ ка́мени кры́ющуюся, дивля́хуся, глаго́люще: что́ сія́ слове́сная а́гница? Ко́его во́лка бѣ́гаетъ? И се́ Діоско́ръ, па́че во́лка лютѣ́йшій, востече́ на го́ру, и тебе́ та́мо кры́вшуюся обрѣ́тъ, и похи́тивъ за дѣви́ческія твоя́ власы́, влеча́ше ко своему́ до́му по жесто́кому пути́, на не́мже тя́, вѣ́рніи, срѣта́емъ привѣ́тствіи си́ми:

Ра́дуйся, младо́му еле́ню на гора́хъ арома́тскихъ уподо́бившаяся; ра́дуйся, го́рняя, па́че до́льнихъ, восхожде́нія въ се́рдцѣ твое́мъ полага́ющи, возлюби́вшая.

Ра́дуйся, избы́вшая поги́бельнаго идолослуже́нія ро́ва; ра́дуйся, на го́ру Тро́ическаго поклоне́нія восте́кшая.

Ра́дуйся, сквозѣ́ ка́меніе проше́дшая, отъ каменносе́рдаго бѣ́гающи гоне́нія; ра́дуйся, средѣ́ ка́менія Ка́мень Христа́, утвержда́ющаго тя́, обрѣ́тшая.

Ра́дуйся, въ пеще́ру ка́менную вше́дшая, ви́дѣти Іису́са во гро́бѣ ка́менномъ бы́вша положе́нна; ра́дуйся, уже́ Того́ ви́дящая на престо́лѣ Сла́вы сѣдя́ща.

Ра́дуйся, я́ко власы́ главы́ твоея́ за Христа́, храня́щаго, да и вла́съ главы́ человѣ́ческія не поги́бнетъ, исто́ргани су́ть на земли́; ра́дуйся, я́ко тíи отъ Христа́ изочте́ни су́ть ко увѣнча́нію на небеси́.

Ра́дуйся, власы́ твоя́ кро́вію до́лѣ, я́ко цвѣта́ми, обагри́вшая; ра́дуйся, заплете́ніе власо́въ твои́хъ окровавле́нныхъ въ вѣне́цъ тебѣ́ златы́й обрати́вшая.

Ра́дуйся, Варва́ро, невѣ́сто Христо́ва прекра́сная.

Конда́къ 6.

Проповѣ́дникомъ богоно́снымъ, апо́столомъ Христо́вымъ, поревнова́вши дерзнове́нно, предъ лице́мъ мучи́телей проповѣ́дала еси́ Христа́ Истиннаго Бо́га: и Его́ ра́ди лю́тыя ра́ны, власяны́ми ру́бы къ о́стрымъ чре́піемъ болѣ́зненно потира́емыя, му́жественно претерпѣ́ла еси́, свята́я Варва́ро. Та́же въ темни́цу всажде́на, въ не́й а́ки въ черто́зѣ о Христѣ́ Іису́сѣ ликова́ла еси́, пою́щи Ему́: Аллилу́ія.

Икосъ 6.

Возсія́вый въ се́рдцѣ твое́мъ просвѣще́ніе и́стиннаго богоразу́мія, возсія́ и во очесѣ́хъ твои́хъ свѣ́тъ Боже́ственнаго лица́ Своего́ Христо́съ Госпо́дь: То́й бо, я́ко возлю́бленный тво́й Жени́хъ, въ полу́нощи къ тебѣ́, непоро́чнѣй Свое́й невѣ́стѣ, въ темни́цу прише́дъ, любе́зно тя́ посѣти́, отъ ра́нъ исцѣли́ и свѣ́тлостію лица́ Своего́ неизрече́нно ду́шу твою́ возвесели́, на́съ же, вѣ́рныхъ, научи́ пѣ́ти тебѣ́ сицева́я:

Ра́дуйся, за страда́вшаго біе́ніе Христа́ неща́дно біе́нная; ра́дуйся, біе́нія терпѣ́ніемъ неви́димаго врага́ уби́вшая.

Ра́дуйся, я́звы Го́спода Твоего́ на тѣ́лѣ твое́мъ носи́вшая; ра́дуйся, отъ всѣ́хъ я́звъ, Тѣ́мжде Го́сподемъ, на тѣ́лѣ твое́мъ исцѣлѣ́вшая.

Ра́дуйся, я́ко Са́мъ Госпо́дь, Свѣ́тъ мíра, тебѣ́ въ темни́цѣ бы́вшей Себе́ яви́лъ е́сть; ра́дуйся, я́ко Са́мъ души́ и тѣ́ла Вра́чь тебе́ больну́ю посѣти́лъ е́сть.

Ра́дуйся, чрезъ земну́ю темни́цу въ небе́сный черто́гъ свѣ́тло вше́дшая; ра́дуйся, отъ крове́й твои́хъ бра́чную тебѣ́ оде́жду истка́вшая.

Ра́дуйся, я́ко тобо́ю отъ мно́гихъ ра́нъ грѣ́шніи исцѣля́ются; ра́дуйся, я́ко тобо́ю отъ всѣ́хъ болѣ́зней съ вѣ́рою тя́ призыва́ющіи уздравля́ются.

Ра́дуйся, у́зъ грѣхо́вныхъ ско́рая рѣши́тельнице; ра́дуйся, я́звъ многозло́бныхъ до́брая цѣле́бнице.

Ра́дуйся, Варва́ро, невѣ́сто Христо́ва прекра́сная.

Конда́къ 7.

Хотя́щу безу́мному мучи́телю жела́ніе свое́ улучи́ти, и еще́ покуша́ющемуся ласка́тельными словесы́ тебе́, свята́я Варва́ро, отъ Истиннаго Бо́га отврати́ти ко преле́стнымъ и́доломъ, ты́, я́ко му́драя дѣ́ва, отвѣща́ла еси́ тому́: пе́рвѣе тве́рдый адама́нтъ въ мя́гкій во́скъ претвори́ши, не́жели мене́ отврати́ши отъ Христа́ Бо́га моего́; Того́ бо, со Отце́мъ и Святы́мъ Ду́хомъ, Еди́наго Истиннаго Бо́га исповѣ́дую, сла́влю, хвалю́, и пою́ Ему́: Аллилу́ія.

Икосъ 7.

Но́вую показа́ безчеловѣ́чія я́рость звѣрообра́зный мучи́тель, егда́ тебе́, свята́я великому́ченице Варва́ро, повелѣ́ на дре́вѣ повѣ́сити, и ноготьми́ желѣ́зными тѣ́ло твое́ строга́ти, и свѣща́ми горя́щими твоя́ опаля́ти ре́бра, еще́ же и мла́томъ во главу́ тя́жко би́ти. Сіе́ пачеесте́ственное терпѣ́ніе твое́ благоговѣ́йно воспомина́юще, похвала́ми блажи́мъ тя́ си́ми:

Ра́дуйся, я́ко повѣ́шена была́ еси́ на дре́вѣ, Христа́ ра́ди на Крестѣ́ распя́таго; ра́дуйся, стро́гана по ре́бромъ Іису́са ра́ди, копіе́мъ въ ре́бра прободе́ннаго.

Ра́дуйся, я́ко о́гнь любве́ къ Бо́гу въ се́рдцѣ твое́мъ возжегла́ еси́; ра́дуйся, я́ко за Того́ о́гненными свѣща́ми пали́ма была́ еси́.

Ра́дуйся, твердѣ́йшая адама́нта въ терпѣ́ніи невреди́момъ; ра́дуйся, крѣпча́йшая ка́меннаго столпа́ въ му́жествѣ непоколеби́момъ.

Ра́дуйся, я́ко мла́томъ, би́вшимъ тя́ по главѣ́, вѣне́цъ Ца́рствія тебѣ́ искова́ся; ра́дуйся, я́ко тѣ́мже мла́томъ глава́ врага́ твоего́ сокруши́ся.

Ра́дуйся, я́ко со Христо́мъ, Его́ ра́ди, на земли́ страда́ла еси́; ра́дуйся, я́ко съ Ни́мъ и о Не́мъ на небеси́ прославля́ешися.

Ра́дуйся, всѣ́хъ враго́въ на́шихъ крѣ́пкая побѣди́тельнице; ра́дуйся, во всѣ́хъ бѣда́хъ на́шихъ ско́рая помо́щнице.

Ра́дуйся, Варва́ро, невѣ́сто Христо́ва прекра́сная.

Конда́къ 8.

Стра́нное и стра́шное святы́я Варва́ры страда́ніе ви́дящи, благовѣ́рная въ жена́хъ Іуліанíя удиви́ся зѣло́, ка́ко млада́ отрокови́ца въ ю́ностнѣмъ тѣлеси́ таковы́я му́жественно за Христа́ терпи́тъ му́ки? Та́же, сле́знаго испо́лнившися умиле́нія, благода́рственно и та́ возопи́ Христу́ Бо́гу: Аллилу́ія.

Икосъ 8.

Ве́сь Сладча́йшій Іису́съ сла́дость, ве́сь жела́ніе тебѣ́ бы́сть, свята́я Варва́ро; сла́дцѣ бо Его́ ра́ди го́рькія терпѣ́ла еси́ му́ки, глаго́лющи: ча́шу страда́ній, ю́же даде́ ми Возлю́бленный мо́й Жени́хъ, не и́мамъ ли пи́ти? Тѣ́мже и сама́ показа́лася еси́ ча́ша, сла́дость чуде́сныхъ исцѣле́ній излива́ющая всѣ́мъ вопію́щимъ къ тебѣ́ сицева́я:

Ра́дуйся, отве́ргшая во а́дское го́ре и́дольскую го́ресть; ра́дуйся, возлюби́вшая небе́сную Іису́сову сла́дость.

Ра́дуйся, мы́сленная ста́мно, ма́нну бра́шна творе́нія во́ли Бо́жія въ себѣ́ иму́щая; ра́дуйся, вѣ́рныхъ во благи́хъ жела́ніе исполня́ющая.

Ра́дуйся, рѣко́ испо́лненная благода́ти Бо́жія вода́ми; ра́дуйся, источниче, кипящій чудесъ изліяніи.

Ра́дуйся, я́ко пчела́, отъ злово́нного и́дольскихъ же́ртвъ ды́ма отлетѣ́вшая; ра́дуйся, во благоуха́нную мѵ́ра Христо́ва воню́ сла́дцѣ прите́кшая.

Ра́дуйся, я́ко твои́ми во все́мъ тѣ́лѣ я́звами была́ еси́ подо́бна со́ту; ра́дуйся, я́ко кро́ве твоея́ ка́пли сладча́йшія па́че ме́да бы́ша Пресла́дкому Іису́су.

Ра́дуйся, я́ко всѣ́мъ вѣ́рнымъ воспомина́ніе твое́ пресла́дко; ра́дуйся, я́ко все́й Це́ркви Христо́вой и́мя твое́ прече́стно.

Ра́дуйся, Варва́ро, невѣ́сто Христо́ва прекра́сная.

Конда́къ 9.

Все́ естество́ а́нгельское ве́ліею возра́довася ра́достію, узрѣ́вши му́жественную крѣ́пость твою́, свята́я и непобѣди́мая му́ченице Варва́ро: ви́дѣвше бо а́нгельстіи чи́нове ве́тхаго врага́, прего́рдаго кня́зя тмы́, со всѣ́мъ его́ бѣсо́вскимъ и и́дольскимъ по́лчищемъ отъ тебе́, еди́ныя млады́я дѣ́вы, посра́мленнаго, побѣжде́ннаго же и подъ но́зѣ твои́ пове́рженнаго, ве́ліимъ гла́сомъ возопи́ша Бо́гу: Аллилу́ія.

Икосъ 9.

Вітíи многовѣща́нніи ри́торскими свои́ми язы́ки не возмо́гутъ изрещи́ вели́чества твои́хъ болѣ́зненныхъ страда́ній, о Варва́ро! Кто́ бо ска́жетъ болѣ́знь твою́, коли́ка бѣ́, егда́ сосца твоя́ урѣ́зана бы́ша? Кто́ изрече́тъ сту́дъ лица́ дѣви́ческаго, егда́ обнаже́на по всему́ гра́ду отъ беззако́нныхъ мучи́телей води́ма была́ еси́? Сицеву́ю болѣ́знь и безче́стіе твое́ мы́ то́чію воспомяну́вше, содрога́емся и со умиле́ніемъ глаго́лемъ си́це:

Ра́дуйся, до́брая лѣтора́сли са́да Іису́сова; ра́дуйся, и́стинная лозо́ виногра́да Христо́ва.

Ра́дуйся, два́ сосца́ твоя́ отрѣ́занная, а́ки два́ гре́зна въ че́сть Го́сподеви твоему́ прине́сшая; ра́дуйся, кро́вь твою́, а́ки вино́ умиле́нія, отъ тѣ́хъ источи́вшая.

Ра́дуйся, я́ко Христа́ ра́ди обнаже́ннаго и ты́ ри́зъ твои́хъ совлече́на была́ еси́; ра́дуйся, я́ко Его́ ра́ди, во Іерусали́мѣ руга́тельнѣ води́маго, и ты́ по гра́ду на поруга́ніе води́ма была́ еси́.

Ра́дуйся, отъ а́нгела свѣ́тлою оде́ждою въ наготѣ́ твое́й одѣ́янная; ра́дуйся, то́ю отъ сту́дныхъ оче́съ неви́димо покрове́нная.

Ра́дуйся, чу́дный а́нгеломъ и человѣ́комъ позо́ръ бы́вшая; ра́дуйся, и самѣ́хъ мучи́телей терпѣ́ніемъ твои́мъ удиви́вшая.

Ра́дуйся, я́ко Са́мъ Госпо́дь свы́ше призрѣ́ на твоя́ страда́нія; ра́дуйся, я́ко Са́мъ То́й Подвигополо́жникъ похвали́ по́двиги твоя́.

Ра́дуйся, Варва́ро, невѣ́сто Христо́ва прекра́сная.

Конда́къ 10.

Спасти́ хотя́ ду́шу твою́, о тѣ́лѣ твое́мъ вся́чески неради́ла еси́, свята́я Варва́ро: егда́ бо на тя́ ме́чное на сме́рть осужде́ніе изы́де, ты́ подъ ме́чь о́стрый, а́ки подъ вѣне́цъ, кра́сный, ра́достно иду́щи, Бо́гу, въ му́ченическомъ по́двизѣ тебе́ укрѣпля́ющему, воспѣва́ла еси́ пѣ́снь: Аллилу́ія.

Икосъ 10.

Стѣны́ ка́менныя тве́рдѣе окамене́ный се́рдцемъ бы́сть Діоско́ръ, тво́й, свята́я Варва́ро, не уже́ роди́тель, но лю́тый мучи́тель: то́й бо, я́ко услы́ша твое́ ме́чное на сме́рть осужде́ніе, не то́чію о сме́рти твое́й не поболѣ́, но и са́мъ свои́мъ мече́мъ на мѣ́стѣ осужде́нія твою́ святу́ю усѣче́ главу́, и та́ко, по предрече́нію Госпо́дню, окая́нный оте́цъ предаде́ на сме́рть свое́ ча́до. Въ то́й у́бо блаже́ннѣй твое́й кончи́нѣ пріими́ отъ на́съ пѣ́нія сія́:

Ра́дуйся, за главу́ Це́ркве — Христа́ подъ ме́чь главу́ твою́ прекло́ншая; ра́дуйся, за любо́вь къ небе́сному человѣколюби́вому Отцу́ Безсме́ртному на сме́рть отъ земна́го безчеловѣ́чнаго отца́ тлѣ́ннаго пре́данная.

Ра́дуйся, тече́ніе му́ченическаго пути́ сконча́вшая до́брѣ; ра́дуйся, вѣ́ру безсме́ртному Обру́чнику Христу до сме́рти сохра́ншая бо́дрѣ.

Ра́дуйся, си́лою свы́ше на бра́нь проти́ву си́лъ преиспо́днихъ препоя́санная; ра́дуйся, побѣдоно́сною сла́вою въ вы́шнихъ отъ Христа́ Побѣди́теля одѣ́янная.

Ра́дуйся, ору́жіемъ благоволе́нія Бо́жія вѣнча́нная на земли́; ра́дуйся, цвѣ́томъ нетлѣ́нія украше́нная на небеси́.

Ра́дуйся, дѣ́вамъ добро́то и похвале́ніе; ра́дуйся, му́ченикомъ красото́ и ра́дованіе.

Ра́дуйся, христіа́номъ крѣ́пкое прибѣ́жище; ра́дуйся, вѣ́рнымъ тве́рдое заступле́ніе.

Ра́дуйся, Варва́ро, невѣ́сто Христо́ва прекра́сная.

Конда́къ 11.

Пѣ́ніе на́ше похва́льное, а́ще бы и тмочи́сленное, вѣ́мы, я́ко нѣ́сть дово́льно по достоя́нію восхвали́ти тя́, свята́я и всехва́льная му́ченице Варва́ро; оба́че мы́, Бо́жіихъ тобо́ю на́мъ оби́льно подава́емыхъ дарова́ній благода́рни су́ще, Бо́гу, въ тебѣ́ Свои́ми благодѣя́ніи прославля́емому, благода́рственными усты́ пое́мъ: Аллилу́ія.

Икосъ 11.

Свѣтопріе́мную свѣщу́, на небе́сномъ свѣ́щницѣ предъ престо́ломъ Святы́я Тро́ицы поста́вленную, зри́мъ у́мныма очи́ма тебе́, свята́я дѣ́во Варва́ро: отону́дуже, егда́ нощны́й грѣхо́въ на́шихъ мра́къ луча́ми моли́твъ твои́хъ просвѣща́еши и на́съ на свѣ́тлую спасе́нія стезю́ наставля́еши, по до́лгу досто́йна еси́ отъ на́съ зва́ніемъ бы́ти почита́ема си́мъ:

Ра́дуйся, свѣтоу́мная луче́, во свѣ́тлость немерца́ющую прилуче́нная; ра́дуйся, мы́сленная денни́це, де́нь невече́рній озаря́ти возше́дшая.

Ра́дуйся, благово́нная сми́рно, Це́рковь Христо́ву благоуха́ющая; ра́дуйся, злата́я кади́льнице, ѳиміа́мъ моли́твы о на́съ къ Бо́гу принося́щая.

Ра́дуйся, мѵрополо́жнице исцѣле́ній неоску́дная; ра́дуйся, сокро́вище Бо́жіихъ даро́въ неиждиви́тельное.

Ра́дуйся, ча́ше, отъ оби́лія до́му Бо́жія че́рплющая ра́дость; ра́дуйся, сосу́де, отъ исполне́нія Христо́ва пріе́млющій всѣ́хъ бла́гъ небе́сныхъ сла́дость.

Ра́дуйся, адама́нте, пе́рстень безсме́ртнаго со Христо́мъ обруче́нія украси́вый; ра́дуйся, вѣ́нче добро́ты, въ руцѣ́ Госпо́дней держи́мый.

Ра́дуйся, я́ко на тя́ Ца́рь Сла́вы, Госпо́дь си́лъ, сла́ву и велелѣ́піе возложи́лъ е́сть; ра́дуйся, я́ко тебѣ́ Ца́рь ца́рствующихъ и Госпо́дь госпо́дствующихъ Ца́рство Свое́ и госпо́дствіе дарова́лъ е́сть.

Ра́дуйся, Варва́ро, невѣ́сто Христо́ва прекра́сная.

Конда́къ 12.

Благода́ть отъ Бо́га дана́ ти е́сть, храни́ти и соблюда́ти отъ внеза́пныя болѣ́зни и на́глыя сме́рти вся́каго человѣ́ка, вѣ́рою, любо́вію и благоговѣ́ніемъ честна́я твоя́ страда́нія воспомина́ющаго и почита́ющаго; тоя́ благода́ти не лиши́ и на́съ, до́брая дѣ́во Варва́ро, да и мы́, здра́ви су́ще тѣ́ломъ и ду́хомъ въ ны́нѣшней и бу́дущей жи́зни о тебѣ́ пое́мъ Бо́гу: Аллилу́ія.

Икосъ 12.

Пое́мъ твоя́ крѣ́пкія по́двиги, почита́емъ страда́нія, хва́лимъ долготерпѣ́ніе, ублажа́емъ святу́ю твою́ кончи́ну, сла́вимъ твое́ въ немощно́мъ тѣ́лѣ показа́вшееся непобѣди́мое му́жество, и́мже на земли́ и на небеси́ просла́вилася еси́, свята́я и добропобѣ́дная великому́ченице Варва́ро, и въ че́сть твои́хъ побѣдоно́сныхъ по́двиговъ и страда́ній похва́льная воспису́емъ ти́ сія́:

Ра́дуйся, отъ а́нгельскихъ чино́въ въ сожи́тельство и́хъ любе́зно прія́тая; ра́дуйся, отъ дѣ́вственныхъ лико́въ въ черто́гъ небе́сный ра́достно введе́нная.

Ра́дуйся, отъ му́ченическихъ полко́въ подъ вѣне́цъ сла́вы провожда́емая во гла́сѣ ра́дованія; ра́дуйся, отъ всѣ́хъ жи́телей небе́сныхъ пріе́мшая о Го́сподѣ цѣлова́ніе.

Ра́дуйся, я́ко мзда́ твоя́ мно́га е́сть на небесѣ́хъ; ра́дуйся я́ко ра́дость твоя́ вѣ́чна е́сть во свѣ́тлости святы́хъ.

Ра́дуйся, отъ вра́гъ ви́димыхъ и неви́димыхъ крѣ́пкая на́мъ засту́пнице; ра́дуйся, ра́дости на́мъ, благода́ти же и сла́вы вѣ́чныя хода́таице.

Ра́дуйся, душе́вныхъ и тѣле́сныхъ неду́говъ на́шихъ цѣли́тельнице; ра́дуйся, спаси́тельныхъ бла́гъ земны́хъ и небе́сныхъ пода́тельнице.

Ра́дуйся, я́ко тобо́ю отъ неча́янныя и вѣ́чныя сме́рти сохране́ни бы́ти упова́емъ; ра́дуйся, я́ко тобо́ю вѣ́чную жи́знь улучи́ти благонаде́жно ча́емъ.

Ра́дуйся, Варва́ро, невѣ́сто Христо́ва прекра́сная.

Конда́къ 13.

О, многострада́льная и всехва́льная свята́я великому́ченице Варва́ро! Ны́нѣшнее на́ше моле́ніе пріе́мши, отъ вся́кихъ болѣ́зней душе́вныхъ и тѣле́сныхъ, и вра́гъ ви́димыхъ и неви́димыхъ на́съ изба́ви, и отъ вѣ́чнаго муче́нія твои́мъ богопрія́тнымъ хода́тайствомъ сохрани́, да съ тобо́ю на земли́ живы́хъ во вѣ́ки пое́мъ Бо́гу: Аллилу́ія.

[Се́й конда́къ глаго́ли три́жды. И па́ки чту́тся 1-й и́косъ: Ангеловъ честну́ю... и конда́къ 1-й: Избра́нной Бо́гомъ...]

Моли́тва ко святѣ́й великому́ченицѣ Варва́рѣ.

Свята́я сла́вная и всехва́льная великому́ченице Христо́ва Варва́ро! Со́бранніи дне́сь въ хра́мѣ твое́мъ Боже́ственномъ лю́ди, и ра́цѣ моще́й твои́хъ покланя́ющіися и любо́вію цѣлу́ющіи, страда́нія же твоя́ му́ченическая, и въ ни́хъ Сама́го Страстополо́жника Христа́, да́вшаго тебѣ́ не то́чію е́же въ Него́ вѣ́ровати, но и е́же по Не́мъ страда́ти, похвала́ми ублажа́ющіи, мо́лимъ тя́, извѣ́стная жела́нія на́шего хода́таице: моли́ съ на́ми и о на́съ умоля́емаго отъ своего́ благоутро́бія Бо́га, да ми́лостивно услы́шитъ на́съ, прося́щихъ Его́ благосты́ню, и не отста́витъ отъ на́съ вся́ ко спасе́нію и житію́ ну́ждная проше́нія, и да́руетъ христіа́нскую кончи́ну животу́ на́шему безболѣ́зненну, непосты́дну, ми́рну, Боже́ственныхъ Та́инъ прича́стну, и всѣ́мъ на вся́комъ мѣ́стѣ, во вся́кой ско́рби и обстоя́ніи, тре́бующимъ Его́ человѣколю́бія и по́мощи, вели́кую Свою́ пода́стъ ми́лость, да благода́тію Бо́жіею и твои́мъ те́плымъ предста́тельствомъ, душе́ю и тѣ́ломъ всегда́ здра́ви пребыва́юще, сла́вимъ ди́внаго во святы́хъ Свои́хъ Бо́га Изра́илева, не удаля́ющаго по́мощи Своея́ отъ на́съ всегда́, ны́нѣ и при́сно и во вѣ́ки вѣко́въ. Ами́нь.

Моли́тва втора́я ко святѣ́й великому́ченицѣ Варва́рѣ.

Прему́драя и всекра́сная свята́я великому́ченице Христо́ва Варва́ро! Блаже́нна еси́, я́ко премíрная му́дрости Бо́жія пло́ть и кро́вь не яви́ тебѣ́, но Са́мъ Бо́гъ Оте́цъ Небе́сный, Иже тебе́, вѣ́ры ра́ди отъ невѣ́рнаго отца́ оста́вленную, изгна́нную и умерщвле́нную, въ дше́рь Себѣ́ возлю́бленную прія́тъ: за тлѣ́нное земна́го имѣ́нія наслѣ́діе пло́ти нетлѣ́ніе дарова́; труды́ му́ченическіи упокое́ніемъ небе́сного измѣни́ Ца́рствія; вре́менное твое́ житіе́, сме́ртію Его́ ра́ди пресѣче́нное, сицево́ю воспросла́ви по́честію, я́ко ду́шу съ ли́ки небе́сныхъ вчини́ духо́въ, тѣ́ло же, на земли́ въ хра́мѣ и́хъ а́нгельскомъ положе́нное, а́нгеломъ заповѣ́да сохрани́ти цѣ́ло, че́стно и многочуде́сно. Блаже́нна еси́, Христу́ Сы́ну Бо́жію, Жениху́ небе́сному уневѣще́нная дѣ́во, Его́же добро́ты твоея́ рачи́теля имѣ́ти жела́ющи, всю́ себе́ страда́ніемъ, ра́нами, у́довъ рѣ́заніемъ и са́мыя главы́ усѣче́ніемъ, а́ки у́тварьми дража́йшими потща́лася еси́ украси́ти; да та́ко, я́ко жена́ вѣ́рна главѣ́ свое́й му́жу, Христу́ ду́хомъ и тѣ́ломъ соедини́шися неразлу́чно, глаго́лющи: обрѣто́хъ, Его́же возлюби́ душа́ моя́, удержа́хъ Его́, и не оста́вихъ Его́. Блаже́нна еси́, я́ко Святы́й Ду́хъ на тебѣ́ почи́лъ е́сть, и́мже духо́вными духо́вная разсужда́ти науче́на, вся́ ду́хи лука́вствія во и́долахъ, я́ко па́губная отри́нула еси́, и еди́наго Бо́га Ду́ха позна́вши, я́ко и́стинная покло́нница, ду́хомъ и и́стиною кла́нятися изво́лила еси́, проповѣ́днически глаго́лющи: Тро́ицу чту́, еди́но Божество́. Сію́ Святу́ю Тро́ицу, Юже въ животѣ́ и сме́рти исповѣ́даніемъ и страда́ніемъ свои́мъ просла́вила еси́, умоли́ о мнѣ́, предста́тельнице моя́, я́ко да и а́зъ всегда́ тро́йственною, вѣ́ры, любве́ и наде́жды, ту́южде Святу́ю Тро́ицу почита́ю добродѣ́телію. Имамъ свѣти́льникъ вѣ́ры, но пра́зденъ благи́хъ дѣ́лъ еле́я, ты́, му́драя дѣ́во, страда́льческую пло́ть твою́, кро́ве испо́лненну и ра́нами пролива́ющуюся, а́ки свѣти́льникъ иму́щая, да́ждь отъ еле́я твоего́, да тѣ́мъ душе́вную мою́ свѣщу́ украси́вши, сподо́блюся по тебѣ́ вни́ти въ черто́гъ небе́сный. Пресе́льникъ а́зъ е́смь на земли́ и пришле́цъ, я́коже вси́ отцы́ мои́; бла́гъ вѣ́чныхъ наслѣ́днице и, блаже́нная, обѣ́да въ Ца́рствіи небе́сномъ прича́стнице, я́ко въ стра́нствіи житія́, трапе́зы боже́ственныя угоще́нія, си́це и во исхо́дѣ отъ мíра, жела́емаго сподо́би мя́ напу́тствованія; и егда́ въ коне́цъ сно́мъ сме́рти начну́ усыпа́ти, косни́ся тогда́ изнемога́ющія пло́ти моея́, я́ко иногда́ а́нгелъ Иліи́, глаго́лющи: воста́ни, я́ждь и пíй, я́ко да благода́тію боже́ственныхъ Тѣ́ла и Кро́ве та́инъ укрѣпле́нъ, преиду́ въ крѣ́пости я́ди тоя́ дале́кій пу́ть сме́рти, да́же до горы́ небе́сныя; и та́мо, Его́же ты́ чрезъ три́ о́кна ба́нныя пре́жде вѣ́рою Бо́га Тро́ицу узрѣ́ла еси́, Сего́ ку́пно съ тобо́ю лице́мъ къ лицу́ да удосто́юся ви́дѣти, и сла́вити Его́ въ несконча́емыя вѣ́ки, ами́нь.

Тропа́рь святы́я, гла́съ 8:

Варва́ру святу́ю почти́мъ: вра́жія бо сѣ́ти сокруши́, и я́ко пти́ца, изба́вися отъ ни́хъ по́мощію и ору́жіемъ Креста́, всечестна́я.

Инъ тропа́рь святы́я, гла́съ 4:

Агнице всеблаже́нная Варва́ро, Боже́ственнѣ озари́вшися свѣ́томъ Святы́я Тро́ицы трисо́лнечнымъ, и въ купѣ́ли утверди́вшися, въ побѣжде́ніе ле́сти оте́ческія, вѣ́ру исповѣ́дала еси́ Христо́ву. Тѣ́мъ, всечестна́я, свы́ше благода́ть тебѣ́ дарова́ Бо́гъ, исцѣля́ти неду́ги и болѣ́зни вся́. Его́же моли́, великому́ченице, да спасе́тъ ду́ши на́ша.

Сла́ва и ны́нѣ, богоро́диченъ:

Еже отъ вѣ́ка утае́нное, и а́нгеломъ несвѣ́домое та́инство: Тобо́ю, Богоро́дице, су́щимъ на земли́ яви́ся, Бо́гъ въ несли́тномъ соедине́ніи воплоща́емь, и кре́стъ во́лею на́съ ра́ди воспріи́мъ, и́мже воскреси́въ первозда́ннаго, спасе́ отъ сме́рти ду́ши на́ша.

Конда́къ, гла́съ 4. Подо́бенъ: Вознесы́йся на Кре́стъ.

Въ Тро́ицѣ благоче́стно пѣва́емому, послѣ́довавши Бо́гу, страстоте́рпице, и́дольская притупи́ла еси́ чти́лища; посредѣ́ же по́двига страда́льчествующи, Варва́ро, мучи́телей преще́нія не устраши́лася еси́, мужему́дренная, велегла́сно пою́щи при́сно: Тро́ицу чту́, еди́но Божество́.

Величан́е:

Велича́емъ тя́, страстоте́рпице Христо́ва Варва́ро, и чте́мъ честно́е страда́ніе твое́, е́же за Христа́ претерпѣ́ла еси́.

Источникъ: Ака́ѳистъ свят́й великому́ченицѣ Варва́рѣ. — Кíевъ: Въ Тѵпогра́фіи Кіевопече́рской Ла́ѵры, 1757. — Л. 6 об. – 28 об.

/ Къ оглавленію раздѣла /


Наверхъ / Къ титульной страницѣ

0