Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - четвергъ, 21 сентября 2017 г. Сейчасъ на порталѣ посѣтителей - 23.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ДОМАШНЯЯ МОЛИТВА

О Успеніи Пресвятой Богородицы.

Успение Пресвятой БогородицыПослѣ вознесенія на небо Іисуса Христа, Пресвятая Дѣва, оставаясь, согласно завѣщанію Сына, на попеченіи св. Іоанна Богослова (Іоан. 19, 26-27), постоянно пребывала въ подвигѣ поста и молитвы и въ живѣйшемъ желаніи созерцать Сына, сѣдящаго одесную Бога. Но устроенію Промысла Божія, Пресвятая Богородица, «происшедши отъ чреслъ смертныхъ», «имѣла кончину сообразную съ природой», для отрады всѣхъ людей, чтобы и они не страшились проходить на небо тѣми же вратами смерти, которыми прошла Царица Небесная, раздѣляя участь земнородныхъ. День кончины Пресвятыя Богородицы былъ открытъ Ей отъ Господа за три дня до Ея успенія чрезъ явившагося Ей (неподалеку отъ Масличной горы) архангела Гавріила съ пальмовою вѣтвію въ рукахъ и возвѣстившаго Ей о времени Ея отшествія изъ здѣшняго міра. Преставленіе Пресвятой Богородицы (по общепринятому преданію, послѣдовавшее въ 48 г.) было ознаменовано чудесами, которыя воспѣваетъ св. Церковь. далѣе>>

АКАѲИСТЫ

Ака́ѳистъ Успе́нію Пресвяты́я Богоро́дицы.

Конда́къ 1.

Избра́нной отъ всѣ́хъ родо́въ Бо́жіей Ма́тери и Цари́цѣ, восходя́щей отъ земли́ къ небеси́, благоговѣ́йная пѣ́нія о пречестно́мъ Твое́мъ Успе́ніи прино́симъ раби́ Твои́, Богоро́дице. Ты́ же, я́ко иму́щая побѣ́ду надъ сме́ртію, отъ вся́кихъ на́съ смертоно́сныхъ бѣ́дъ свободи́, да зове́мъ Ти́:

Ра́дуйся, Обра́дованная, во Успе́ніи Твое́мъ на́съ не оставля́ющая.

Икосъ 1.

Ра́дуйся, прера́дованная Ма́ти Царе́ва; ра́дуйся, небе́сная Цари́це, Ма́ти Бо́га и Го́спода небесе́ и земли́.

Ра́дуйся, предпочте́нная превели́чествомъ прише́ствія къ Тебѣ́ Сы́на Твоего́ и Бо́га; ра́дуйся, возвели́ченная извѣще́ніемъ Твоего́ къ Сы́ну отше́ствія.

Ра́дуйся, отъ всѣ́хъ родо́въ Бо́гомъ избра́нная; ра́дуйся, свято́е вмѣсти́лище Сло́ва Бо́жія.

Ра́дуйся, проро́ческаго прорече́нія исполне́ніе; ра́дуйся, апо́столомъ пречестны́й вѣ́нче.

Ра́дуйся, царе́мъ удобре́ніе и держа́во; ра́дуйся, святи́телемъ украше́ніе и свяще́нникомъ добро́то.

Ра́дуйся, богому́дрыхъ и́ноковъ возведе́ніе къ го́рнему Ца́рствію; ра́дуйся, отверза́ющая ра́йскія две́ри христіа́нскому ро́ду, при́сно Тя́ блажа́щему.

Ра́дуйся, Обра́дованная, во Успе́ніи Твое́мъ на́съ не оставля́ющая.

Конда́къ 2.

Ви́дяще апо́столовъ ли́къ, всеси́льнымъ манове́ніемъ отъ коне́цъ земли́ на о́блацѣхъ предста́вшихъ ко пречестно́му Твоему́, Пренепоро́чная, Успе́нію, священнонача́льницы: Діони́сій небе́сный таи́нникъ, Іероѳе́й ди́вный и Тимоѳе́й съ боголѣ́пною че́стію свяще́нства, поя́ху Бо́гу: Аллилу́ія.

Икосъ 2.

Разу́мная вся́ тва́рь, старѣ́йшая чинонача́лія а́нгельская, пріидо́ша со свои́мъ Царе́мъ, Иже во Своя́ живонача́льнѣйшія ру́цѣ ду́шу Ма́тере Своея́ прія́тъ; те́плый же вѣ́рою Пе́тръ со слеза́ми мно́гая къ Не́й изрече́, зовы́й:

Ра́дуйся, ко премíрнымъ, Ма́ти Творца́ мíру, восходя́щая; ра́дуйся, къ пренебе́снымъ, простра́ннѣйшая небе́съ, взе́млющаяся.

Ра́дуйся, четвероча́стное стихíй освяти́вшая Твои́мъ восхожде́ніемъ; ра́дуйся, небе́сныхъ возвесели́вшая Твои́мъ прехожде́ніемъ.

Ра́дуйся, во Іерусали́мъ го́рній прекра́сный прія́тая; ра́дуйся, въ нерукотворе́нныя хра́мы прера́достно вше́дшая.

Ра́дуйся, херуви́мовъ и серафи́мовъ Цари́це; ра́дуйся, арха́нгеловъ и а́нгеловъ Влады́чице.

Ра́дуйся, прибѣ́жище вѣ́рнымъ и избавле́ніе; ра́дуйся, достоя́нію Твоему́ по́мощь и защище́ніе.

Ра́дуйся, о все́мъ мíрѣ христіа́нскомъ къ Бо́гу хода́таице; ра́дуйся, бла́гъ вся́ческихъ всеблага́я пода́тельнице.

Ра́дуйся, Обра́дованная, во Успе́ніи Твое́мъ на́съ не оставля́ющая.

Конда́къ 3.

Си́ла Вы́шняго восхи́ти отъ Индíи Ѳому́, за нѣ́кое изволе́ніе Бо́жіе не прилу́чшуся ему́ въ пречестно́е Успе́ніе Богома́тере, и предпоста́ви живопріе́мному Ея́ гро́бу, и́же, Преста́вльшуюся прини́къ ви́дѣти, уразумѣ́ вознесе́нную на небеса́ съ тѣ́ломъ и, вѣ́ровавъ, о се́мъ возопи́: Аллилу́ія.

Икосъ 3.

Имѣ́я въ себѣ́ помышле́ніе учени́къ, я́ко Бо́жіимъ смотре́ніемъ бѣ́ ему́ не обрѣсти́ся ко провожде́нію Богома́тере съ про́чими вку́пѣ, обра́дованъ бы́въ о безсме́ртнѣмъ Ея́ Успе́ніи, сія́ вопія́ше къ Не́й:

Ра́дуйся, воспріе́млемая отъ земли́ дла́ньма Сы́на Твоего́; ра́дуйся, ко превы́шнимъ возше́дшая наслажда́тися сла́вы Его́.

Ра́дуйся, провожда́емая отъ всѣ́хъ чинонача́лій а́нгельскихъ въ го́рняя; ра́дуйся, подъе́млемая херуви́мы въ небе́сная и наднебе́сная.

Ра́дуйся, въ небе́сныхъ вратѣ́хъ отъ старѣ́йшихъ си́лъ велелѣ́пно пѣ́сньми возноси́мая; ра́дуйся, отъ всѣ́хъ небе́сныхъ гра́жданъ окружа́емая и блажи́мая.

Ра́дуйся, не́бо земно́е, къ го́рнему селе́нію возвы́шенное; ра́дуйся, престо́ле Госпо́день, отъ земли́ вознесе́нный въ Ца́рствіе небе́сное.

Ра́дуйся, предста́тельство на́ше и крѣ́пкое заступле́ніе; ра́дуйся, грѣ́шникомъ спору́чнице во спасе́ніе.

Ра́дуйся, христіа́номъ Цари́це и по Бо́зѣ наде́ждо небе́снаго Ца́рствія; ра́дуйся, Ма́ти Живота́ и по Го́сподѣ на́мъ упова́ніе жи́зни вѣ́чныя.

Ра́дуйся, Обра́дованная, во Успе́ніи Твое́мъ на́съ не оставля́ющая.

Конда́къ 4.

Бу́рю вну́трь имѣ́я помышле́ній невѣ́рныхъ евре́инъ Афѳо́ній, и зря́ богоно́сными апо́столы Богома́тере пречестно́е тѣ́ло всече́стнѣ ко гро́бу несе́нное, ко опроверже́нію устреми́ся; внеза́пу же, егда́ со ослѣпле́ніемъ о́чію, ру́цѣ его́ отъя́тѣ ко одру́ прилѣпле́нѣ ви́сястѣ, вѣ́рою Ма́терь Бо́жію исповѣ́даше, вопія́ Бо́гу: Аллилу́ія.

Икосъ 4.

Слы́шавше таи́нницы и самови́дцы Сло́ва а́нгеловъ, пою́щихъ превы́шними пѣ́сньми при погребе́ніи богопрія́тнаго тѣ́ла Бо́жія Ма́тере, и че́сть пода́ти хотя́ще богоуго́дную, потща́шася согла́сно пѣ́ти, глаго́люще:

Ра́дуйся, благовѣ́стіе пріе́мшая о проше́ствіи Твое́мъ въ го́рнее Ца́рствіе; ра́дуйся, отъ благовѣсти́вшаго Гавріи́ла пріе́мшая радо́стнаго рая́ вра́віе.

Ра́дуйся, пречестно́е херуви́мское мно́жество просвѣти́вшая; ра́дуйся, пресла́вное серафи́мское естество́ возра́довавшая.

Ра́дуйся, отъ патріа́рховъ прообразова́нная; ра́дуйся, отъ проро́ковъ предвозвѣще́нная.

Ра́дуйся, злу́ю де́рзость іуде́еву ско́ро отмсти́вшая; ра́дуйся, исцѣле́ніе тому́жде пода́вшая.

Ра́дуйся, обрати́вшая въ вѣ́ру Афѳо́ніево невѣ́ріе; ра́дуйся, вѣ́рное того́ пріе́мшая исповѣ́даніе.

Ра́дуйся, возводя́щая къ небеси́ любо́вь и вѣ́ру къ Тебѣ́ иму́щихъ; ра́дуйся, спаса́ющая вѣ́рою и́мя Твое́ призыва́ющихъ.

Ра́дуйся, Обра́дованная, во Успе́ніи Твое́мъ на́съ не оставля́ющая.

Конда́къ 5.

Боготе́чныя звѣ́зды, апо́столи святíи, въ поднебе́снѣй разсѣ́янніи ра́ди Ева́нгелія, восхище́ни бы́ша на о́блацѣхъ, по широтѣ́ возду́шной, ко погребе́нію Ма́тере Госпо́дня, Юже пѣ́ньми и пѣ́сньми провожда́юще, съ невеще́ственными взыва́ху: Аллилу́ія.

Икосъ 5.

Ви́дѣвше богови́дцы своего́ Влады́ку, въ ру́цѣ Ма́тере Своея́ ду́шу пріе́мша, и Го́спода Того́ разумѣ́вше, потща́шася священносло́вія пѣ́сньми благосло́внѣ воспѣ́ти Ю:

Ра́дуйся, Цари́це, надъ всѣ́ми Ца́рствующаго носи́вшая; ра́дуйся, и Сама́ рука́ма Его́ Сыно́внима носи́мая.

Ра́дуйся, ски́птре ца́рскій въ Христо́вой десни́це; ра́дуйся, въ руцѣ́ Но́я вѣ́тво голуби́цы.

Ра́дуйся, же́зле Ааро́новъ, прозя́бшій нетлѣ́ніе; ра́дуйся, кри́не неувяда́емый, процвѣ́тшій безсме́ртіе.

Ра́дуйся, богоотца́ Дави́да цѣвни́це богодохнове́нная; ра́дуйся, проро́чествія его́ возста́вшая сло́во, псалти́рю и гу́сли прекра́сныя.

Ра́дуйся, одушевле́нный святы́ни Госпо́дни киво́те; ра́дуйся, въ поко́й Госпо́день воскре́сшій на́шъ животе́.

Ра́дуйся, ски́ніе, отъ херуви́мовъ осѣня́емая; ра́дуйся, Свята́я святы́хъ, отъ серафи́мовъ глаго́лемая.

Ра́дуйся, Обра́дованная, во Успе́ніи Твое́мъ на́съ не оставля́ющая.

Конда́къ 6.

Проповѣ́дницы богоно́сніи апо́столи, по отше́ствіи ко премíрнымъ Бо́жія Ма́тере во о́бщемъ сѣдѣ́ніи обы́чныя трапе́зы бы́вше и предложе́ніе ча́сти хлѣ́ба во и́мя Госпо́дне вознося́ще, внеза́пу свы́ше Богоро́дицу Цари́цу, прише́дшую со свѣтоно́сными а́нгелы, зря́ху и, ми́ръ тѣ́мъ отъ Сы́на и Бо́га пода́вшую слы́шавше, возгласи́ша о се́мъ: Аллилу́ія.

Икосъ 6.

Возсія́ на́мъ Со́лнце пра́вды, Христо́съ Бо́гъ отъ Твои́хъ пречи́стыхъ ложе́снъ, во́лею и благоразу́міемъ проповѣ́данія чрезъ апо́столы мíръ просвѣти́ и Тя́, Богома́терь, отъ ро́да и въ ро́дъ просла́ви. Тѣ́мже и мы́ вси́ ублажа́емъ Тя́, вопію́ще Ти́:

Ра́дуйся, присноблаже́нная отъ всѣ́хъ родо́въ во вѣ́ки; ра́дуйся, благоутро́бная и ми́лостивая на человѣ́ки.

Ра́дуйся, учени́ческому ли́ку обѣща́ніе испо́лнившая; ра́дуйся, присѣще́ніемъ Твои́мъ отъ Сы́на Твоего́ и Бо́га, ми́ръ тому́ пода́вшая.

Ра́дуйся, всежела́тельное святы́хъ сла́дкое зрѣ́ніе; ра́дуйся, преподо́бныхъ ма́терей и дѣ́въ святы́хъ всевеселя́щее ра́дованіе.

Ра́дуйся, преходя́щая ра́йское селе́ніе пра́ведныхъ; ра́дуйся, посѣща́ющая всѣ́хъ во сла́вѣ небе́сной су́щихъ.

Ра́дуйся, нача́ло человѣ́ческаго спасе́нія; ра́дуйся, исполне́ніе всѣ́хъ благи́хъ жела́нія.

Ра́дуйся, по Бо́зѣ, Царѣ́ ца́рствующихъ, Богоро́дице Цари́це; ра́дуйся, по Го́сподѣ госпо́дствующихъ, Влады́цѣ на́шемъ, Госпоже́ и Влады́чице.

Ра́дуйся, Обра́дованная, во Успе́ніи Твое́мъ на́съ не оставля́ющая.

Конда́къ 7.

Хотя́щихъ всѣ́хъ съ вѣ́рою входи́ти въ хра́мъ Тво́й святы́й, Богоро́дице, при́сно спаса́еши, и сла́вящихъ Тя́ отъ вся́кихъ напа́стей и бѣ́дъ свобожда́еши; тѣ́мже и Благовѣ́рному Импера́тору на́шему, присноблажа́щему Тя́, побѣ́ды на сопроти́вныхъ да́руй и вся́ ко спасе́нію проше́нія на́мъ подава́й, о се́мъ моля́щимся Тебѣ́ и пою́щимъ Бо́гу: Аллилу́ія.

Икосъ 7.

Но́вую показа́ тва́рь, я́влься на́мъ, всѣ́хъ Творе́цъ Госпо́дь Тобо́ю, Богоро́дице. Ты́ же сро́дное промышле́ніе о на́съ къ Нему́ иму́щи, че́стнѣ почита́ющихъ пречестно́е Твое́ Успе́ніе, пріими́ сицева́я Тебѣ́ вопію́щихъ:

Ра́дуйся, Ма́ти Бо́гу, избра́нная отъ земны́хъ; ра́дуйся, превы́шшая земны́хъ и небе́сныхъ.

Ра́дуйся, херуви́мовъ и серафи́мовъ горѣ́ превозше́дшая; ра́дуйся, ли́къ учени́ческій о́блакомъ ко погребе́нію Ти́ до́лѣ совоку́пльшая.

Ра́дуйся, Ѳому́ по погребе́ніи Твое́мъ си́лою Бо́жіею предпоста́вившая изря́днѣе; ра́дуйся, чрезъ него́ увѣ́рившая Твое́ на не́бо съ пло́тію преселе́ніе.

Ра́дуйся, красото́ю всѣ́хъ добродѣ́телей укра́шенная; ра́дуйся, Краснѣ́йшему па́че сыно́въ человѣ́ческихъ Сы́нови Своему́ сопричте́нная.

Ра́дуйся, я́ко фи́никсъ, пло́тію воскре́сшею процвѣ́тшая; ра́дуйся, я́ко ке́дръ въ Лива́нѣ небе́сномъ, умно́жившаяся.

Ра́дуйся, дре́во живота́, насажде́нное посредѣ́ рая́ превы́шняго; ра́дуйся, ковче́же мы́сленный, возвы́шенный въ го́рняя отъ пото́па сме́ртнаго.

Ра́дуйся, Обра́дованная, во Успе́ніи Твое́мъ на́съ не оставля́ющая.

Конда́къ 8.

Стра́нно въ превы́шнихъ вѣ́дуще Тя́, Избра́нная, я́ко со́лнце, Влады́чице, вну́трь пренебе́сныхъ недомы́слимыхъ красо́тъ и неизрече́нныхъ добро́тъ, уми́льно къ Сы́ну и Бо́гу, дла́ньма Его́ держи́му, возше́дшую и прера́достно прекло́ньшуюся живонача́льнѣй Его́ десни́цѣ, о се́мъ вы́ну вопіе́мъ: Аллилу́ія.

Икосъ 8.

Вся́ бы́вши горѣ́, къ небе́снымъ взята́ и, земны́хъ не оставля́я, Богома́ти, рука́ма Сыно́внима носи́ма, въ незаходи́мая вни́де, во о́ный гра́дъ всесвѣтя́щій и прекра́сный, Іерусали́мъ вы́шній, херуви́мы обстои́ма со всѣ́ми небе́сными си́лами, идѣ́же слы́шитъ пою́щихъ сія́:

Ра́дуйся, Ея́же пресвята́я душа́ въ вы́шнемъ всесвѣ́тломъ Сіо́нѣ вселя́ется; ра́дуйся, Ея́же и нетлѣ́нное тѣ́ло та́можде съ душе́ю ку́пно прославля́ется.

Ра́дуйся, вше́дшая въ престо́льный гра́дъ Самаго́ Вседержи́теля; ра́дуйся, возне́сшаяся въ прекра́сный ра́й вы́шняго Насади́теля.

Ра́дуйся, пренесе́нная во гра́дъ, основа́нный отъ ка́меней всесвѣтя́шихъ; ра́дуйся, введе́нная во огра́ду, обстои́мую во́и си́лъ превы́шнихъ.

Ра́дуйся, превы́шше небе́съ во благолѣ́піе Бо́жіе взята́я; ра́дуйся, па́че всѣ́хъ невеще́ственныхъ умо́въ почте́нная.

Ра́дуйся, принося́щая къ Сы́ну Своему́ и Бо́гу моле́ніе вѣ́рныхъ; ра́дуйся, и Сама́ непреста́нно у престо́ла Сы́на Твоего́ и Бо́га моля́щаяся о всѣ́хъ.

Ра́дуйся, предста́тельнице къ Бо́гу, мíръ спаса́ющая; ра́дуйся, засту́пнице, ро́ду христіа́нскому отъ Бо́га дарова́нная.

Ра́дуйся, Обра́дованная, во Успе́ніи Твое́мъ на́съ не оставля́ющая.

Конда́къ 9.

Вся́кое естество́ а́нгельское превозно́ситъ Тя́, Богоро́дице, человѣ́честіи же ро́ди вси́ Ма́терь Тя́ Бо́жію сла́вимъ и почита́емъ пречестно́е Твое́ Успе́ніе, Цари́це: Тебе́ бо ра́ди земнíи небе́снымъ совокупля́ются, согла́сно пою́ще Бо́гу: Аллилу́ія.

Икосъ 9.

Витíйства боговѣща́нныхъ про́роческихъ рече́ній ны́нѣ зри́мъ о Тебѣ́ сбы́вшаяся, Богоро́дице, я́ко вои́стинну Бо́га пло́тію родила́ еси́ на́мъ. Тѣ́мже та́инству словесе́ Бо́жія вѣ́рующе, вопіе́мъ:

Ра́дуйся, зако́на и проро́ковъ глави́зно соверше́нная; ра́дуйся, звѣздо́ Іа́ковля, Валаа́момъ пророкова́нная.

Ра́дуйся, о́дре Царя́ Вели́каго, вѣща́нный Соломо́номъ; ра́дуйся, руно́, ороше́нное Іису́сомъ, образова́нное Гедео́номъ.

Ра́дуйся, неопали́мая купино́, законополо́жникомъ предзри́мая; ра́дуйся, горо́ свята́я, му́жемъ жела́нія усмотре́нная.

Ра́дуйся, лѣ́ствице небе́сная, Іа́ковомъ предви́димая; ра́дуйся, две́ре непроходи́мая, Іезекíилемъ предзри́мая.

Ра́дуйся, со́лнце селе́нія Христо́ва, псалмопѣ́вцемъ предъявле́нное; ра́дуйся, та́инство, многообра́знѣ проро́ки пронарече́нное.

Ра́дуйся, проро́ческихъ глаго́лъ всѣ́хъ, предрече́нныхъ о Тебѣ́, коне́цъ прине́сшая; ра́дуйся, вы́шняго смотре́нія вся́ за спасе́ніе мíра соверши́вшая.

Ра́дуйся, Обра́дованная, во Успе́ніи Твое́мъ на́съ не оставля́ющая.

Конда́къ 10.

Спасти́ хотя́ мíръ, Иже всѣ́хъ Госпо́дь отъ земна́го Тя́ ро́да избра́ въ Ма́терь Себѣ́ и, на́съ дѣ́ля бы́въ человѣ́къ, взы́де, отню́дуже сни́де, къ небеси́ отъ земли́, и Тебе́ съ Собо́ю возведе́ ко пребыва́нію во сла́вѣ вѣ́чной и соца́рствованію съ Собо́ю, конца́ не иму́щему. Тѣ́мже, я́ко Бо́гъ, слы́шитъ отъ всѣ́хъ: Аллилу́ія.

Икосъ 10.

Стѣна́ еси́ вѣ́рнымъ, Богоро́дице Дѣ́во, и заступле́ніе всѣ́мъ, къ Тебѣ́ прибѣга́ющимъ, и́бо небесе́ и земли́ Творе́цъ, отъ Тебе́ пло́тію проше́дъ, Пречи́стая, ду́хомъ и тѣ́ломъ въ небе́сная Тя́ пресели́, ко ближа́йшему предста́тельству о всѣ́хъ, и́хже приглаша́ти научи́:

Ра́дуйся, гра́де Царя́ Вели́каго верху́ горы́ небе́сныя; ра́дуйся, стѣно́ и покро́ве, не кры́ющійся отъ на́шего притека́нія.

Ра́дуйся, вѣ́рнымъ царе́мъ на враги́ посо́бствующая; ра́дуйся, наше́ствія ага́рянская побѣжда́ющая.

Ра́дуйся, вѣ́ры благочести́выя недви́жимое сохране́ніе; ра́дуйся, ерети́чествующихъ полко́въ разоре́ніе.

Ра́дуйся, ра́дость и умире́ніе мíру су́щая; ра́дуйся, всегуби́тельнаго а́да попра́вшая.

Ра́дуйся, во́инствующихъ на пло́ть, цѣлому́дріемъ изря́дное вѣнча́ніе; ра́дуйся, му́ченическихъ по́двиговъ всечестно́е прославле́ніе.

Ра́дуйся, преподо́бныхъ трудо́мъ хода́таице блаже́ннаго упокое́нія; ра́дуйся, и́нокомъ благоскорбя́щимъ пода́тельнице вѣ́чнаго ра́дованія.

Ра́дуйся, Обра́дованная, во Успе́ніи Твое́мъ на́съ не оставля́ющая.

Конда́къ 11.

Пѣ́ніе вся́кое богодухнове́нныхъ пѣ́сней не довлѣ́етъ отъ на́съ ко похвалѣ́ всечестна́го Успе́нія Твоего́, Всехва́льная Влады́чице, Цари́це Богоро́дице, но усе́рдно Тебѣ́ прино́симъ, я́ко Ма́тери Царя́ всѣ́хъ, смире́нное моле́ніе на́ше, съ небе́сными чи́нми пою́ще Еди́ному досто́йно прославля́ющему Тя́ Бо́гу: Аллилу́ія.

Икосъ 11.

Свѣтопріе́мная свѣща́ и́стиннаго Свѣ́та су́щимъ на́мъ на земли́ я́вльшися, ду́ши просвѣща́еши и чту́щихъ Твое́ всечестно́е преставле́ніе къ ра́зуму Боже́ственному наставля́еши, да пое́мъ Ти́ сицева́я:

Ра́дуйся, свѣще́ неугаси́мая Огня́ невеще́ственнаго; ра́дуйся, заре́ незаходи́мая Свѣ́та невече́рняго.

Ра́дуйся, луно́, отъ Со́лнца пра́вды облистава́емая; ра́дуйся, свѣ́тлосте, во тмѣ́ свѣтя́щая.

Ра́дуйся, свѣти́льниче, на свѣ́щницѣ превы́шнѣмъ поста́вленный; ра́дуйся, исто́чниче жи́зни, изъ гро́ба во свѣ́тъ изведе́нный.

Ра́дуйся, Ма́ти Свѣ́та у́мнаго, благочести́выхъ ду́ши просвѣща́ющаго; ра́дуйся, Ма́ти всѣ́хъ Бо́га, озло́бленныхъ ду́ши утѣша́ющаго.

Ра́дуйся, упова́ющимъ на Тя́ живота́ коне́цъ непосты́дный дару́ющая; ра́дуйся, достоя́ніе Бо́жіимъ и Свои́мъ рабо́мъ на Судѣ́ Сы́на Твоего́ одесну́ю Его́ устроя́ющая.

Ра́дуйся, Преблаже́нная, я́ко Тобо́ю блаже́ни есмы́ и мы́, и́же помо́щницу Тя́ и́мамы; ра́дуйся, Преблагослове́нная въ ро́дъ и ро́дъ, яко Госпо́дь съ Тобо́ю, и Тобо́ю съ на́ми.

Ра́дуйся, Обра́дованная, во Успе́ніи Твое́мъ на́съ не оставля́ющая.

Конда́къ 12.

Благода́ть высокопресто́льныя сла́вы, на небесѣ́хъ дарова́нную Богома́тери, почте́нной сѣдѣ́ніемъ одесну́ю Сы́на Ея́ и Бо́га ви́дяще го́рніи умы́, подъя́ша Ю престо́ли и си́лы, окружи́ша нача́ла и вла́сти, припадо́ша страшніи херуви́ми, серафи́ми и госпо́дства, со арха́нгелы и а́нгелы вопію́ще: Аллилу́ія.

Икосъ 12.

Пою́ще всечестно́е Твое́ Успе́ніе, восхваля́емъ вси́ ко пренебе́снымъ возше́ствіе Твое́, Цари́це Богома́ти. Ты́ же освяти́, просла́ви и спаси́ всѣ́хъ, любо́вію пою́щихъ Тебѣ́:

Ра́дуйся, очи́стившая зе́млю пречи́стыми но́гъ Твои́хъ стопа́ми; ра́дуйся, освяти́вшая возду́хъ восхожде́ніемъ Твои́мъ къ небеси́.

Ра́дуйся, на небе́сный кру́гъ возступи́вшая; ра́дуйся, вся́ добро́ты неизрече́нныя зря́щая.

Ра́дуйся, во сла́вѣ присѣдя́щая престо́лу Сы́на Твоего́ и Бо́га; ра́дуйся, съ Сы́номъ и Бо́гомъ вѣ́чно ца́рствующая.

Ра́дуйся, красото́ въ десни́цѣ Госпо́дней, украша́ющая блажа́щихъ Тя́ всѣ́хъ небе́сныхъ; ра́дуйся, обра́довавшая надѣ́яніемъ на Тя́ всѣ́хъ земны́хъ.

Ра́дуйся, облече́нная въ со́лнце, сія́ющая благода́тію и сла́вою все́й вселе́ннѣй; ра́дуйся, обѣща́вшая сохраня́ти и спаса́ти призыва́ющихъ Тя́ всѣ́хъ въ поднебе́сной.

Ра́дуйся, отъ христіа́нскихъ родо́въ Ма́ти Бо́жія почита́емая и Богоро́дица имену́емая; ра́дуйся, отъ восто́къ со́лнца до за́падъ пресла́вно и правосла́вно отъ всѣ́хъ благочести́выхъ сла́вимая.

Ра́дуйся, Обра́дованная, во Успе́ніи Твое́мъ на́съ не оставля́ющая.

Конда́къ 13.

О, Всепѣ́тая Ма́ти Безсме́ртнаго Царя́ небесе́ и земли́, Христа́ Бо́га на́шего, живу́щая и по сме́рти, ны́нѣшняя приноше́нія о всечестно́мъ Твое́мъ Успе́ніи отъ на́съ пріе́мши, въ жи́зни се́й и въ сме́ртномъ успе́ніи на́шемъ отъ вся́кія напа́сти, бѣ́дъ и му́ки изба́ви и небе́снаго Ца́рствія на́съ, Цари́це, сподо́би, о Тебѣ́ вопію́щихъ: Аллилу́ія.

[Се́й конда́къ чте́тся три́жды. И па́ки чту́тся и́косъ 1-й: Ангелъ предста́тель... и конда́къ 1-й: Избра́нной отъ всѣ́хъ родо́въ...]

Моли́тва ко Пресвятѣ́й Богоро́дицѣ.

О, Пресвята́я Богоро́дице Дѣ́во, Влады́чице, вы́шшая а́нгелъ и арха́нгелъ и всея́ тва́ри честнѣ́йшая, а́нгельское вели́кое удивле́ніе, проро́ческая высо́кая про́повѣдь, апо́стольская пресла́вная похвало́, святи́телей изря́дное украше́ніе, му́чениковъ крѣ́пкое утвержде́ніе, и́ноковъ спаси́тельное наставле́ніе, по́стниковъ неизнемога́ющее воздержа́ніе, дѣ́вствующихъ чистото́ и сла́во, ма́терей ти́хое весе́ліе, младе́нцевъ му́дросте и наказа́ніе, вдови́цъ и си́рыхъ корми́тельнице, наги́хъ одѣя́ніе, боля́щихъ здра́віе, плѣ́нниковъ избавле́ніе, по мо́рю пла́вающихъ тишино́, обурева́емыхъ небу́рное приста́нище, блужда́ющихъ нетру́дная наста́внице, путеше́ствующихъ ле́гкое прохожде́ніе, тружда́ющихся благо́е поко́ище, въ бѣда́хъ су́щихъ ско́рая засту́пнице, оби́димыхъ покро́ве и прибѣ́жище, ненадѣ́ющихся надѣ́яніе, тре́бующихъ помо́щнице, печа́льныхъ при́сное утѣше́ніе, ненави́димыхъ любо́вное смире́ніе, грѣ́шниковъ спасе́ніе и къ Бо́гу присвое́ніе, правовѣ́рныхъ всѣ́хъ тве́рдое огражде́ніе, непобѣди́мое поможе́ніе и заступле́ніе! Тобо́ю на́мъ, Влады́чице, Неви́димый ви́димъ бы́сть, и Тебѣ́ мольбу́ прино́симъ, Госпоже́, грѣ́шніи раби́ Твои́: О, преми́лостивая и пречу́дная Свѣ́та у́мнаго Цари́це, ро́ждшая Царя́ Христа́, Бо́га на́шего, Живода́вца всѣ́хъ, отъ небе́сныхъ сла́вимая и отъ земны́хъ хвали́мая, а́нгельскій у́ме, свѣтоза́рная звѣздо́, святы́хъ пресвятѣ́йшая, Цари́це цари́цъ, Влады́чице всѣ́хъ тва́рей, Боголѣ́пная Дѣви́це, нескве́рная Невѣ́сто, пала́то Ду́ха Пресвята́го, о́гненный престо́ле неви́димаго Царя́, небе́сный киво́те, носи́ло Сло́ва Бо́жія, огнеобра́зная колесни́це, поко́ище жива́го Бо́га, неизрече́нное составле́ніе пло́ти Христо́вы, гнѣздо́ Орла́ небе́снаго, го́рлице богогла́сная, голуби́це кро́ткая, ти́хая и незло́бивая, Ма́ти чадолюби́вая, ми́лостей бе́здно, разверга́ющая ту́чу гнѣ́ва Бо́жія, неизмѣ́римая глубино́, неизрече́нная та́йно, несвѣ́домое чу́до, нерукотворе́нная Це́ркве Еди́наго Царя́ всѣ́хъ вѣ́къ, благоуха́нное кади́ло, честна́я багряни́це, боготка́нная порфи́ро, душе́вный раю́, живоно́снаго са́да о́трасле, цвѣ́те прекра́сный, процвѣ́тшій на́мъ небе́сное весе́ліе, гро́зде спасе́нія на́шего, ча́ше Царя́ небе́снаго, въ не́йже раствори́ся отъ Ду́ха Свята́го вино́ неисчерпа́емыя благода́ти, хода́таице зако́на, зача́ло и́стинныя вѣ́ры Христо́вы непоколеби́мый сто́лпе, еретико́въ па́губо, мечу́ я́рости Бо́жія на богопроти́вныхъ, бѣсо́въ устраше́ніе, во бране́хъ побѣжде́ніе, христіа́нъ всѣ́хъ нело́жная храни́тельнице и мíра всего́ извѣ́стное спасе́ніе! О, Всеми́лостивая Госпоже́, Дѣ́во Влады́чице, Богоро́дице, услы́ши на́съ, моля́щихся Тебѣ́, и яви́ ми́лость Твою́ на лю́дехъ Твои́хъ, моли́ Сы́на Своего́ изба́витися на́мъ отъ вся́каго зла́ и сохрани́ оби́тель на́шу и вся́ку оби́тель, и гра́дъ, и страну́ вѣ́рныхъ, и лю́ди, благоче́стно прибѣга́ющія и призыва́ющія и́мя Твое́ свято́е, отъ вся́кія напа́сти, губи́тельства, гла́да, тру́са, пото́па, огня́, меча́, наше́ствія иноплеме́нниковъ и междоусо́бныя бра́ни, отъ вся́кія болѣ́зни и вся́каго обстоя́нія, да ни ра́нами, ни преще́ніемъ, ни мо́ромъ, ни вся́кимъ пра́веднымъ гнѣ́вомъ Бо́жіимъ ума́лятся раби́ Твои́. Но соблюда́й и спаса́й ми́лостію Свое́ю, Госпоже́, за ны́ моля́щися, и поле́зное благорастворе́ніе возду́ха во вре́мени пло́днаго приноше́нія на́мъ да́руй. Облегчи́, возста́ви и поми́луй, Преми́лостивая Влады́чице, Богоро́дице препѣ́тая, во вся́кой бѣдѣ́ и ну́ждѣ су́щія. Помяни́ рабы́ Твоя́ и не пре́зри сле́зъ и воздыха́нія на́шего, и обнови́ на́съ бла́гостію Своея́ ми́лости, да со благодаре́ніемъ утѣша́емся, обрѣ́тше Тя́ Помо́щницу. Умилосе́рдися, Госпоже́ Пречи́стая, на немощны́я лю́ди Твоя́, наде́ждо на́ша. Разсѣ́янныя собери́, заблу́дшія на пу́ть пра́вый наста́ви, отпа́дшія отъ благочести́выя оте́ческія вѣ́ры па́ки возврати́, ста́рость поддержи́, ю́ныя вразуми́, младе́нцы воспита́й и просла́ви сла́вящія Тя́, изря́днѣе же — Це́рковь Сы́на Твоего́ соблюди́ и сохрани́ въ долготу́ днíй. О, ми́лостивая и преми́лостивая Цари́це небесе́ и земли́, Богоро́дице Приснодѣ́во! Хода́тайствомъ Твои́мъ поми́луй Благочести́вѣйшаго, Самодержа́внѣйшаго, Вели́каго Госуда́ря на́шего, Импера́тора [и́мярекъ] всея́ Россíи, и Супру́гу Его́, Благочести́вѣйшую Госуда́рыню, Императри́цу [и́мярекъ], Наслѣ́дника Его́, Благовѣ́рнаго Госуда́ря, Цесаре́вича и Вели́каго Кня́зя [и́мярекъ], и ве́сь ца́рствующій До́мъ, пала́ту и все́ во́инство Ихъ, и вся́ правосла́вныя христіа́ны, сохраня́ющи и́хъ подъ кро́вомъ ми́лости Твоея́, ри́зою Твое́ю честно́ю защити́ и моли́ изъ Тебе́ вопло́щшагося безъ сѣ́мене Христа́, Бо́га на́шего, да препоя́шетъ ны́ свы́ше си́лою на вся́ ви́димыя и неви́димыя враги́ на́ша, на иноплеме́нники и единоплеме́нники, вою́ющія на на́съ и на вѣ́ру на́шу правосла́вную. Спаси́ же и поми́луй, Госпоже́, Святѣ́йшій Прави́тельствующій Сѵно́дъ, и преосвяще́нныя митрополи́ты, архіепи́скопы и епи́скопы правосла́вныя, іере́и же и діа́коны и ве́сь приче́тъ церко́вный, и вся́ правовѣ́рныя лю́ди, покланя́ющіяся и моля́щіяся предъ честно́ю Твое́ю ико́ною. При́зри на всѣ́хъ на́съ призрѣ́ніемъ ми́лостивнаго Твоего́ заступле́нія, воздви́гни на́съ изъ глубины́ грѣхо́вныя и просвѣти́ о́чи серде́чныя ко зрѣ́нію спасе́нія. Ми́лостива на́мъ бу́ди здѣ́ и на стра́шномъ Судѣ́ Сы́на Твоего́ о на́съ умоли́, преста́вльшіяся во благоче́стіи отъ житія́ сего́ рабы́ Твоя́ въ вѣ́чной жи́зни со а́нгелы и арха́нгелы, и со всѣ́ми святы́ми причти́, да одесну́ю Сы́на Твоего́ Бо́га предста́нутъ, и моли́твою Твое́ю сподо́би вся́ правосла́вныя христіа́ны со Христо́мъ жи́ти и ра́дости а́нгельскія въ небе́сныхъ селе́ніихъ наслажда́тися. Ты́ бо еси́, Госпоже́, сла́ва небе́сныхъ и упова́ніе земны́хъ, Ты́ на́ша наде́жда и засту́пница всѣ́хъ притека́ющихъ къ Тебѣ́ и Твоея́ святы́я по́мощи прося́щихъ. Ты́ моле́бница на́ша те́плая къ Сы́ну Твоему́ и Бо́гу на́шему. Твоя́ Ма́терняя моли́тва мно́го мо́жетъ на умоле́ніе Влады́ки, и Твои́мъ предста́тельствомъ ко престо́лу благода́ти Пресвяты́хъ и Животворя́щихъ Его́ Та́инъ приступа́ти дерза́емъ, а́ще и недосто́йніи. Тѣ́мже всечестны́й о́бразъ Тво́й и руко́ю Твое́ю держи́маго Вседержи́теля ви́дяще на ико́нѣ, ра́дуемся, грѣ́шніи, со умиле́ніемъ припа́дающе, и любо́вію се́й цѣлу́емъ, ча́юще, Госпоже́, Твои́ми святы́ми богопрія́тными моли́твами дойти́ небе́сныя безконе́чныя жи́зни и непосты́дно ста́ти въ де́нь су́дный одесну́ю Сы́на Твоего́ и Бо́га на́шего, сла́вяще Его́ ку́пно со Безнача́льнымъ Отце́мъ и Пресвяты́мъ, Благи́мъ, Животворя́щимъ и Единосу́щнымъ Ду́хомъ, во вѣ́ки вѣко́въ. Ами́нь.

Тропа́рь, гла́съ 1:

Въ рождествѣ́ дѣ́вство сохрани́ла eси́, во успе́ніи мíра не оста́вила eси́, Богоро́дице, преста́вилася eси́ къ животу́, Ма́ти су́щи Живота́, и моли́твами Твои́ми избавля́еши отъ сме́рти ду́ши на́ша.

Конда́къ, гла́съ 2:

Въ моли́твахъ неусыпа́ющую Богоро́дицу и въ предста́тельствахъ непрело́жное упова́ніе, гро́бъ и умерщвле́ніе не удержа́ста: я́коже бо Живота́ Ма́терь, къ животу́ преста́ви, во утро́бу Всели́выйся приснодѣ́вственную.

Велича́ніе:

Велича́емъ Тя́, Пренепоро́чная Ма́ти Христа́ Бо́га на́шего, и всесла́вное сла́вимъ Успе́ніе Твое́.

Источникъ: Ака́ѳистъ Успе́нію Пресвяты́я Богоро́дицы. — Кíевъ: Въ тѵпогра́фіи Кіевопече́рскія Ла́ѵры, 1863. — Л. 17 об. – 45 об.

/ Къ оглавленію раздѣла /


Наверхъ / Къ титульной страницѣ

0