Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - среда, 22 ноября 2017 г. Сейчасъ на порталѣ посѣтителей - 9.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ДОМАШНЯЯ МОЛИТВА

Свт. Варсонофій, еп. Тверской, Казанскій чудотворецъ († 1576 г.)

Святители Гурий, архиепископ Казанский, и Варсонофий, еп. ТверскойСвт. Варсонофій, еп. Тверской (въ мірѣ Іоаннъ) былъ сыномъ Серпуховскаго свящ. Василія. Въ молодости онъ попалъ въ плѣнъ къ крымскимъ татарамъ и провелъ у нихъ три года, причемъ изучилъ ихъ языкъ и грамоту. Съ полной покорностію волѣ Божіей онъ переносилъ тяжкую неволю, находя утѣшеніе въ частой и пламенной молитвѣ къ Богу и чтеніи псалмовъ Давида, которые онъ зналъ наизусть. По освобожденіи, св. Варсонофій поступилъ въ Спасо-Андрониковъ Московскій монастырь, и за строгую подвижническую жизнь былъ назначенъ Пѣшношскимъ игуменомъ. Въ Казани, куда онъ поѣхалъ помощникомъ архіеп. Гурія, къ которому имѣлъ искреннюю любовь и послушаніе, онъ основалъ Спасо-Преображенскій монастырь, и служилъ братіи образцомъ подвижнической жизни. По кончинѣ его открылось, что онъ носилъ вериги. По своему знанію татарского языка и нравовъ, онъ былъ полезнѣйшимъ сотрудникомъ св. Гурія; много татаръ привлекало къ нему еще его искусство врачеванія болѣзней. Въ 1567 г. св. Варсонофій былъ поставленъ епископомъ въ г. Тверь и, какъ добрый пастырь, ревностно заботился о своихъ пасомыхъ. Достигнувъ глубокой старости, св. Варсонофій возвратился (въ 1571 г.) на покой въ Спасо-Преображенскій монастырь, гдѣ и скончался 11 апрѣля 1576 г. Мощи его были обрѣтены нетлѣнными 4 октября 1595 г. и прославились многими чудесами.

АКАѲИСТЫ

Ака́ѳистъ святи́телю Варсоно́фію, Каза́нскому чудотво́рцу.

Конда́къ 1.

Возбра́нному святи́телю и чудотво́рцу Варсоно́фію соста́вимъ похвалу́, я́ко усе́рдному моли́твеннику на́шему и ско́рому помо́щнику. Ты́ же, святи́телю, я́ко имѣ́яй дерзнове́ніе ко Го́споду, умоли́ Его́ изба́вити на́съ отъ вся́кихъ бѣ́дъ и скорбе́й, да съ ра́достію зове́мъ ти́:

Ра́дуйся, Варсоно́фіе, Каза́нскій чудотво́рче.

Икосъ 1.

Ра́дуйся, благослове́нное ча́до благочести́ваго отца́, сподо́бившагося благода́ти свяще́нства. Ра́дуйся, благода́тный воспи́танниче благоговѣ́йнаго учи́теля. Ра́дуйся, ороше́нный благода́тію, лія́вшеюся отъ его́ наставле́ній. Ра́дуйся, о́троче, прія́вшій въ се́рдце твое́ нача́ло прему́дрости. Ра́дуйся, я́ко то́ю вся́ бу́яя ю́ности отъ се́рдца твоего́ отгна́лъ еси́. Ра́дуйся, ско́ро и спѣ́шно навы́кнувый наказа́нію зако́на Бо́жія. Ра́дуйся, ра́зумомъ и добродѣ́тельнымъ житіе́мъ пресвято́е и́мя Бо́жіе просла́вивый. Ра́дуйся, ра́досте и утѣше́ніе твои́мъ роди́телемъ. Ра́дуйся, кри́не, возраще́нный на земли́ для ра́йскихъ селе́ній. Ра́дуйся, моли́твенниче на́шъ усе́рдный. Ра́дуйся, крѣ́пкій на́шъ засту́пниче. Ра́дуйся, му́дрый и кро́ткій на́шъ наста́вниче.

Ра́дуйся, Варсоно́фіе, Каза́нскій чудотво́рче.

Конда́къ 2.

Ви́дя суету́ мíра и привре́менныхъ бла́гъ его́, ты́, святи́телю Варсоно́фіе, еди́наго Бо́га крѣ́пко отъ ю́ности твоея́ возлюби́лъ еси́ и слеза́ми моли́твенными ра́дость небе́сную на земли́ сѣ́ялъ еси́. Тѣ́мже мы́, ра́дуяся, вопіе́мъ съ тобо́ю Бо́гу: Аллилу́ія.

Икосъ 2.

Разу́мно уразумѣ́въ попуще́ніе прему́драго Про́мысла, хотя́щаго предугото́вати изъ тебе́ но́ваго проповѣ́дника вѣ́ры Христо́вы для невѣ́рующихъ ага́рянъ, ты́, святи́телю Христо́въ, благоду́шно въ ю́ности твое́й кре́стъ плѣ́на поне́слъ еси́ и въ странѣ́ плѣне́нія вѣ́денію язы́ка ага́рянскаго научи́лся еси́. Сего́ ра́ди пріими́ отъ на́съ похвалы́ сія́:

Ра́дуйся, предугото́ванный сосу́де мѵ́ра Христо́ва, излія́ннаго на невѣ́ровавшихъ. Ра́дуйся, па́стырю, воспи́танный посредѣ́ волко́въ. Ра́дуйся, свѣти́льниче Це́ркве, предугото́ванный подъ спу́домъ. Ра́дуйся, сто́лпе Це́ркве Правосла́вныя, укрѣпле́нный кресто́мъ. Ра́дуйся, смире́ніемъ, кро́тостію и послуша́ніемъ плѣни́вшихъ тя́ удиви́вый. Ра́дуйся, тѣ́ми любо́вь и́хъ къ тебѣ́ пріобрѣты́й. Ра́дуйся, сле́зный сѣ́ятелю ра́дости небе́сныя. Ра́дуйся, всего́ себе́ во́лѣ Бо́жіей преда́вый. Ра́дуйся, ра́йскій кри́не, посредѣ́ те́рній на земли́ произра́стшій. Ра́дуйся, би́сере многоцѣ́нный, зла́томъ отъ плѣ́на иску́пленный. Ра́дуйся, отца́ и ма́терь ра́ди Христа́ оста́вивый. Ра́дуйся, дѣ́вства и чистоты́ храни́телю.

Ра́дуйся, Варсоно́фіе, Каза́нскій чудотво́рче.

Конда́къ 3.

Си́лу Христа́ Спаси́теля, влеку́щую къ Нему́, уразумѣ́въ, святи́телю, ты́ душе́ю и тѣ́ломъ сему́ влече́нію послѣ́довалъ еси́, и я́ко а́нгелъ, на крилѣ́хъ поста́ и моли́твы къ Нему́ воспари́лъ еси́, непреста́нно воспѣва́я Бо́гу: Аллилу́ія.

Икосъ 3.

Имѣ́я во умѣ́ и се́рдцѣ твое́мъ еди́наго Бо́га, ты́, святи́телю, вся́ кра́сная мíра сего́ презрѣ́лъ еси́ и уедине́ніе съ нестяжа́ніемъ крѣ́пко возлюби́лъ еси́, служа́ Бо́гу посто́мъ и моли́твою. Тѣ́мже вопіе́мъ ти́:

Ра́дуйся, Го́спода Бо́га вѣ́рный служи́телю. Ра́дуйся, ве́сь у́мъ тво́й богомы́сліемъ освяти́вый. Ра́дуйся, усе́рдный и вѣ́рный во́ли Христо́вой исполни́телю. Ра́дуйся, прему́дрый мона́ховъ наста́вниче. Ра́дуйся, до́брый о ни́хъ попечи́телю. Ра́дуйся, дѣ́вства и чистоты́ храни́телю. Ра́дуйся, люби́миче бра́тіи твоея́. Ра́дуйся, о́бразе и подви́жниче добродѣ́телей. Ра́дуйся, зерца́ло ева́нгельскаго соверше́нства. Ра́дуйся, живы́й сви́тче зако́на Бо́жія. Ра́дуйся, вѣ́рный подража́телю Христо́въ.

Ра́дуйся, Варсоно́фіе, Каза́нскій чудотво́рче.

Конда́къ 4.

Бу́ря вну́треннихъ ско́рбныхъ помышле́ній обы́де тя́, святи́телю, егда́ внеза́пу въ чу́ждую зе́млю плѣне́нъ бы́лъ еси́, идѣ́же и го́рькія сле́зы пролива́лъ еси́. Егда́же всецѣ́ло во́лѣ Бо́жіей преда́лся еси́, тогда́ непреста́нно ди́вному въ судьба́хъ Свои́хъ Бо́гу вопія́лъ еси́: Аллилу́ія.

Икосъ 4.

Слы́шавъ о свято́мъ житіи́ твое́мъ, ца́рь Іоа́ннъ ра́довася, я́ко Россíя имя́ше таковы́я потае́нныя уго́дники Бо́жія, и не тая́й свѣти́льника подъ спу́домъ, устро́и тебе́ бы́ти игу́мена Пѣ́сношскія оби́тели. Мы́ же, ра́дуясь, вопіе́мъ ти́:

Ра́дуйся, свѣти́льниче, изъ-подъ спу́да на свѣ́щникъ поста́вленный. Ра́дуйся, моли́твенниче неусы́пный. Ра́дуйся, врачу́ ра́нъ серде́чныхъ прозорли́вый. Ра́дуйся, цѣли́телю грѣхо́вныхъ неду́говъ. Ра́дуйся, великоду́шный стропти́вости препобѣди́телю. Ра́дуйся, сострада́тельный и терпѣли́вый бра́тіи твоея́ люби́телю. Ра́дуйся, неви́димыхъ враго́въ му́дрый прогони́телю. Ра́дуйся, благоговѣ́йный Бо́жій служи́телю. Ра́дуйся, благочи́нія монасты́рскаго му́дрый устрои́телю. Ра́дуйся, обра́дованный посѣще́ніемъ твоея́ оби́тели отъ царя́ держа́внаго. Ра́дуйся, обра́довавый его́ твои́мъ благоговѣ́ніемъ и смире́ніемъ. Ра́дуйся, а́нгеле во о́бразѣ человѣ́честѣмъ.

Ра́дуйся, Варсоно́фіе, Каза́нскій чудотво́рче.

Конда́къ 5.

Боготе́чнѣй звѣздѣ́ подо́бенъ бы́лъ еси́, святи́телю, въ восхожде́ніи твое́мъ на тве́рдь церко́вную, и послѣ́дуя, я́ко со́лнцу, святи́телю Гу́рію, по во́лѣ царя́ держа́внаго ше́ствовалъ еси́ въ богоспаса́емый гра́дъ Каза́нь, поя́ Бо́гу: Аллилу́ія.

Икосъ 5.

Ви́дѣша тя́, святи́телю, правосла́вніи жи́тели гра́да Каза́ни, устроя́ющаго въ не́й пе́рвую оби́тель во и́мя боголѣ́пнаго Спа́сова Преображе́нія, и въ благоговѣ́йной ра́дости о Го́сподѣ, творя́щемъ ди́вная дѣла́ Своя́, вопія́ху тебѣ́ си́це:

Ра́дуйся, нече́стія ре́вностный искорени́телю. Ра́дуйся, благоче́стія усе́рдный ревни́телю. Ра́дуйся, Магоме́ѳовы тмы́ ди́вный прогони́телю. Ра́дуйся, свѣ́та Христо́ва ре́вностный распространи́телю. Ра́дуйся, пе́рвыя оби́тели въ Каза́ни устрои́телю. Ра́дуйся, ди́вный избра́нниче Бо́жій. Ра́дуйся, благода́ть и ми́лость Госпо́дню въ бра́тіи твое́й водвори́вый. Ра́дуйся, число́ и́ноковъ умно́живый. Ра́дуйся, благочи́нія церко́внаго блюсти́телю. Ра́дуйся, пѣ́нія боже́ственнаго иску́сный учи́телю. Ра́дуйся, безчи́нія и нече́стія му́дрый обличи́телю.

Ра́дуйся, Варсоно́фіе, Каза́нскій чудотво́рче.

Конда́къ 6.

Проповѣ́дникъ богоно́сный яви́лся еси́, святи́телю, во гра́дѣ Каза́ни, облича́я нечести́выхъ покло́нниковъ лжепроро́ка самѣ́мъ и́хъ язы́комъ, и не могу́щихъ ничто́же рещи́ проти́ву тебе́ обраща́я къ Еди́ному въ Тро́ицѣ сла́вимому Бо́гу, поя́ Ему́: Аллилу́ія.

Икосъ 6.

Возсія́ въ Каза́ни просвѣще́ніе и́стины и отгна́ отъ нея́ тму́ нече́стія Христо́съ, и́стинный Бо́гъ на́шъ, Ему́же въ се́мъ усе́рдно послужи́лъ еси́, святи́телю. Тѣ́мже взыва́емъ ти́ си́це:

Ра́дуйся, насади́телю ни́вы Христо́вы въ странѣ́ нече́стія. Ра́дуйся, напои́телю о́ной живы́ми вода́ми Христо́ва уче́нія. Ра́дуйся, ничто́же себѣ́ воспису́яй, но вся́ къ еди́ному Бо́гу относя́й. Ра́дуйся, вождю́ во́инства Христо́ва, посѣка́ющаго вся́ проти́вныя си́лы нече́стія. Ра́дуйся, а́нгеле, по́сланный отъ Бо́га ко истребле́нію пле́велъ на ни́вѣ Его́. Ра́дуйся, дру́же Бо́жій, жела́ющій всѣ́мъ спасе́нія. Ра́дуйся, благода́тный врачу́ ду́шъ и тѣле́съ. Ра́дуйся, кро́ткій указа́телю лжи́вости магомета́нскія вѣ́ры держа́щимся ея́. Ра́дуйся, му́дрый удостовѣри́телю въ Боже́ственности вѣ́ры христіа́нскія. Ра́дуйся, невѣ́рныхъ учи́телю вѣ́ры въ Пресвяту́ю Тро́ицу. Ра́дуйся, свѣти́ло, сія́ющее на тве́рди Каза́нскія о́бласти. Ра́дуйся, теплото́, согрѣва́ющая всѣ́хъ, притека́ющихъ къ тебѣ́, любо́вію.

Ра́дуйся, Варсоно́фіе, Каза́нскій чудотво́рче.

Конда́къ 7.

Хотя́й устро́ити спасе́ніе Каза́нскихъ тата́ръ, научи́ тя́, святи́телю, враче́бной хи́трости, да бу́деши и́мъ вра́чь ду́шъ и тѣле́съ. Ты́ же, имѣ́я любо́вь богоподо́бную, принима́лъ еси́ вся́ неду́жныя, притека́ющія къ тебѣ́, указу́я коему́ждо на благопотре́бное врачевство́, па́че же на Всецѣли́теля Го́спода Іису́са Христа́, поя́ Ему́: Аллилу́ія.

Икосъ 7.

Но́вое и ди́вное сре́дство къ обраще́нію невѣ́рныхъ показа́ Госпо́дь въ твое́мъ, святи́телю, врачева́ніи тѣле́сныхъ болѣ́зней, привлека́я къ тебѣ́ мно́жество неду́жныхъ вся́каго ро́да, и́хже, ку́пно съ при́сными и́хъ, ко Христу́ приводи́лъ еси́. Тѣ́мже, безме́здный врачу́, пріими́ отъ на́съ такова́я:

Ра́дуйся, безме́зднымъ враче́мъ му́дрый подража́телю. Ра́дуйся, я́ко позна́лъ еси́ благода́тную си́лу и́хъ безме́зднаго врачева́нія. Ра́дуйся, врачева́вый неду́жныя, привлече́нія ра́ди къ вѣ́рѣ невѣ́рующихъ. Ра́дуйся, употребля́вый врачева́ніе тѣле́сное къ сла́вѣ и́мене Бо́жія и ко спасе́нію бли́жнихъ. Ра́дуйся, ре́вностный сотру́дниче святи́теля Гу́рія. Ра́дуйся, и́скренній и вѣ́рный его́ дру́же. Ра́дуйся, упокои́телю его́ на одрѣ́ сме́ртномъ. Ра́дуйся, и по сме́рти съ ни́мъ не разлучи́выйся. Ра́дуйся, моли́твенниче на́шъ усе́рдный. Ра́дуйся, храни́телю оби́тели твоея́ неусы́пный. Ра́дуйся, гра́ду Каза́ни похвало́ и утвержде́ніе. Ра́дуйся, свѣти́ло, сія́ющее на тве́рди Правосла́вныя Це́ркве.

Ра́дуйся, Варсоно́фіе, Каза́нскій чудотво́рче.

Конда́къ 8.

Стра́нное бѣ́ предсказа́ніе о тебѣ́, святи́телю, прозорли́ваго святи́теля Ака́кія, и́же еще́ во вре́мя твоего́ іеродіа́конства предрече́, я́ко бу́деши въ богоспаса́емомъ гра́де Тфе́ри управля́ти людьми́ Бо́жіими. Мы́ же, благоговѣ́я предъ Бо́гомъ, ди́вно устроя́вшемъ твое́ Ему́ служе́ніе, пое́мъ Ему́: Аллилу́ія.

Икосъ 8.

Ве́сь бы́лъ еси́ Бо́жій, святи́телю, егда́ поста́вленъ бы́лъ еси́ во епи́скопа богоспаса́емому гра́ду Тфе́ри, служа́ Бо́гу тѣ́ломъ и душе́ю: тѣ́ло изнуря́я посто́мъ и непреста́ннымъ трудо́мъ, ду́шу же пита́я моли́твою и сло́вомъ Бо́жіимъ. Тѣ́мже пріими́ отъ на́съ сицева́я:

Ра́дуйся, свѣти́льниче Тферскíя Це́ркве. Ра́дуйся, до́брый ея́ па́стырю. Ра́дуйся, слове́сныхъ ове́цъ му́дрый пита́телю. Ра́дуйся, вѣ́рный Христо́въ подража́телю. Ра́дуйся, апо́столовъ наслѣ́дниче. Ра́дуйся, неутоми́мый дѣ́лателю ни́вы Бо́жія. Ра́дуйся, благовре́менный ея́ напои́телю. Ра́дуйся, оте́ческихъ преда́ній храни́телю. Ра́дуйся, вѣ́ры Христо́вы правосла́вный учи́телю. Ра́дуйся, стро́гій поста́ блюсти́телю. Ра́дуйся, о́бразъ вѣ́рующимъ въ тебѣ́ само́мъ написа́вый. Ра́дуйся, неусы́пный моли́твенниче о ста́дѣ твое́мъ.

Ра́дуйся, Варсоно́фіе, Каза́нскій чудотво́рче.

Конда́къ 9.

Вси́ а́нгели небе́сніи восхвали́ша Бо́га, дарова́вшаго тебѣ́, святи́телю, чу́дный да́ръ врачева́нія тѣле́сныхъ и душе́вныхъ болѣ́зней, и́мже всѣ́хъ привлека́лъ еси́, поя́ Бо́гу: Аллилу́ія.

Икосъ 9.

Витíи многовѣща́нніи ри́торскими свои́ми язы́ки не возмо́гутъ изрещи́ па́стырскихъ твои́хъ по́двиговъ, святи́телю: ка́ко бо мо́щно вся́ повѣ́дати о стро́гости поста́ твоего́ или́ о неусы́пномъ препровожде́ніи ноще́й въ моли́твѣ? Мы́ же благоговѣ́йно взыва́емъ ти́ си́це:

Ра́дуйся, па́стырю, въ стро́гомъ постѣ́ себе́ содержа́вый. Ра́дуйся, подви́жниче благоче́стія, но́щи въ моли́твѣ безъ сна́ препроводи́вый. Ра́дуйся, собесѣ́дниче Бо́жій. Ра́дуйся, сѣ́ятелю небе́сныя ра́дости твои́ми моли́твенными слеза́ми. Ра́дуйся, пло́ть твою́ всецѣ́ло ду́хови порабо́тивый. Ра́дуйся, со страстьми́ и по́хотьми ю́ распя́вый. Ра́дуйся, Тферску́ю па́ству твою́ отъ зара́зы моли́твами сохрани́вый. Ра́дуйся, сердобо́льный о вѣ́рныхъ попечи́телю. Ра́дуйся, во всѣ́хъ скорбя́хъ и́хъ утѣ́шителю. Ра́дуйся, па́стырю милосе́рдный ко всѣ́мъ бѣ́дствующимъ. Ра́дуйся, уча́стниче во всѣ́хъ ско́рбехъ и ну́ждахъ бли́жнихъ твои́хъ. Ра́дуйся, сострада́телю всѣ́мъ стра́ждущимъ.

Ра́дуйся, Варсоно́фіе, Каза́нскій чудотво́рче.

Конда́къ 10.

Спасти́ хотя́ ду́шу твою́, святи́телю, ты́, возжелѣ́въ поко́я духо́внаго, Тферску́ю па́ству твою́ въ ста́рости оста́вилъ еси́ и пересели́лся еси́ па́ки въ устро́енную тобо́ю Каза́нскую оби́тель боголѣ́пнаго Спа́сова Преображе́нія, поя́ въ не́й до конца́ земна́го житія́ твоего́ Бо́гу: Аллилу́ія.

Икосъ 10.

Стѣна́ и крѣ́пкое огражде́ніе бы́лъ еси́, святи́телю, Каза́нскія твоея́ оби́тели, отвраща́я отъ нея́ всѣ́ бѣды́ и напа́сти святы́ми твои́ми моли́твами, и примѣ́ромъ свои́мъ утвержда́я въ бра́тіи благоче́стіе и свя́тость. Тѣ́мже по до́лгу вопіе́мъ ти́:

Ра́дуйся, сто́лпе благоче́стія. Ра́дуйся, трудолюби́вый моли́твенниче. Ра́дуйся, поста́ и моли́твы учи́телю. Ра́дуйся, ми́лостыни ще́дрый раздая́телю. Ра́дуйся, благочи́нія церко́внаго ревни́телю. Ра́дуйся, наста́вниче мона́ховъ предо́брый. Ра́дуйся, неопусти́тельный посѣти́телю ежедне́вныя слу́жбы Бо́жія. Ра́дуйся, земны́й а́нгеле и небе́сный человѣ́че. Ра́дуйся, отъ земли́ на не́бо возлетѣ́вый. Ра́дуйся, и по сме́рти твое́й на́съ не оставля́яй. Ра́дуйся, при́сный на́шъ благодѣ́телю. Ра́дуйся, всегда́шній на́шъ во Христѣ́ наста́вниче и попечи́телю.

Ра́дуйся, Варсоно́фіе, Каза́нскій чудотво́рче.

Конда́къ 11.

Пѣ́ніе всеумиле́нное прино́симъ ти́, святи́телю, и мо́лимъ тя́ умоли́ти Христа́ Бо́га, да да́руетъ всѣ́мъ на́мъ благода́ть и си́лу ко спасе́нію, да вы́ну съ тобо́ю пое́мъ Ему́: Аллилу́ія.

Икосъ 11.

Свѣтопріе́мный свѣти́льникъ и́стиннаго Свѣ́та су́щимъ на земли́ явля́ешися, святи́телю Варсоно́фіе, просвѣща́еши бо сердца́ вѣ́рныхъ, и къ ра́зуму Боже́ственному вся́ наставля́еши, поуча́я и на́съ ра́достно взыва́ти тебѣ́:

Ра́дуйся, святи́телю, предстоя́й престо́лу Бо́жію. Ра́дуйся, Пресвяты́я Тро́ицы присноблаже́нный служи́телю. Ра́дуйся, предстоя́й и послѣ́дуяй Агнцу Бо́жію. Ра́дуйся, Ма́тере Бо́жія собесѣ́дниче. Ра́дуйся, херуви́мовъ и серафи́мовъ соо́бщниче. Ра́дуйся, арха́нгеловъ и а́нгеловъ сослужи́телю. Ра́дуйся, Предте́чи Госпо́дня спредстоя́телю. Ра́дуйся, апо́столовъ подража́телю. Ра́дуйся, му́чениковъ соревнова́телю. Ра́дуйся, святи́телей равностоя́телю. Ра́дуйся, преподо́бныхъ украше́ніе. Ра́дуйся, всѣ́хъ святы́хъ сожи́телю.

Ра́дуйся, Варсоно́фіе, Каза́нскій чудотво́рче.

Конда́къ 12.

Благода́ть, да́нную ти́ отъ Бо́га, вѣ́дуще, притека́емъ къ ра́цѣ моще́й твои́хъ, святи́телю Варсоно́фіе, усе́рдно умоля́юще тя́ о неоставле́ніи на́съ святы́ми твои́ми моли́твами, да и мы́, по сконча́ніи на́шего земна́го жи́тельства, съ тобо́ю воспое́мъ Бо́гу: Аллилу́ія.

Икосъ 12.

Пою́ще блаже́нную кончи́ну твою́, е́юже, я́ко оре́лъ, въ го́рняя воспари́лъ еси́, мо́лимъ тя́, святи́телю Варсоно́фіе, бы́ти на́мъ во все́мъ ко бла́гу помо́щникомъ, и всегда́ слы́шати ны́, усе́рдно взыва́ющихъ ти́:

Ра́дуйся, святи́телей похвало́. Ра́дуйся, ско́рый помо́щниче съ вѣ́рою къ тебѣ́ притека́ющимъ. Ра́дуйся, неусы́пный храни́телю и́ноковъ твоея́ оби́тели. Ра́дуйся, защи́тниче гра́ду Каза́ни. Ра́дуйся, усе́рдный моли́твенниче о всѣ́хъ, къ тебѣ́ притека́ющихъ. Ра́дуйся, врачу́ неду́гующихъ. Ра́дуйся, па́стырю, соблюда́яй слове́сное ста́до твое́. Ра́дуйся, помо́щниче и защи́тниче оби́димыхъ. Ра́дуйся, дарова́телю ра́дости пла́чущимъ. Ра́дуйся, обурева́емыхъ наста́вниче. Ра́дуйся, ско́рбныхъ утѣше́ніе. Ра́дуйся, спаса́емыхъ ободри́телю и подкрѣпи́телю.

Ра́дуйся, Варсоно́фіе, Каза́нскій чудотво́рче.

Конда́къ 13.

О, всеблаже́нный и святы́й святи́телю, о́тче Варсоно́фіе, святы́ми твои́ми моли́твами умоли́ Го́спода Бо́га, е́же изба́вити всѣ́хъ на́съ, притека́ющихъ къ тебѣ́, отъ вся́кія ско́рби, отъ вся́кихъ бѣ́дъ и напа́стей, и отъ вся́каго зла́, душе́внаго и тѣле́снаго, да вы́ну съ тобо́ю пое́мъ Ему́: Аллилу́ія.

[Се́й конда́къ глаго́лется три́жды. Та́же и́косъ 1-й: Ангеловъ Творе́цъ... И конда́къ 1-й: Возбра́нному святи́телю...]

Моли́тва святи́телю Варсоно́фію, Каза́нскому чудотво́рцу.

Прини́кни, святи́телю Варсоно́фіе, съ го́рнихъ селе́ній на притека́ющихъ къ ра́цѣ моще́й твои́хъ и вонми́ моле́нію и́хъ. Умоли́ Го́спода Бо́га дарова́ти всѣ́мъ на́мъ, е́же ко спасе́нію на́шему мы́ про́симъ у Него́ при святы́хъ моща́хъ твои́хъ. Бу́ди всѣ́мъ на́мъ засту́пникъ и хода́тай въ ну́ждахъ на́шихъ и проше́ніяхъ, испроси́ благоде́нствіе, долгоде́нствіе, здра́віе же и спасе́ніе, и во все́мъ благо́е поспѣше́ніе Благочести́вѣйшему, Самодержа́внейшему, Вели́кому Госуда́рю на́шему Импера́тору [и́мярекъ] всея́ Россíи, Супру́гѣ Его́, Благочести́вѣйшей Госуда́рынѣ Императри́цѣ [и́мярекъ], Наслѣ́днику Его́, Благовѣ́рному Госуда́рю, Цесаре́вичу и Вели́кому Кня́зю [и́мярекъ], и всему́ Ца́рствующему До́му. Умоли́ Го́спода Бо́га дарова́ти въ ца́рствованіе Его́ крѣ́пкій и ненаруши́мый ми́ръ, благочи́ніе, просвѣще́ніе умо́въ и серде́цъ, и земли́ плодоно́сіе, па́стыремъ — святы́ню, зако́намъ — пра́вду и си́лу, военача́льникомъ — му́дрость и непобѣди́мое му́жество, градонача́льникомъ — су́дъ, во́инству — пре́данность Вѣ́рѣ, Царю́ и Оте́честву, и неодоли́мую хра́брость, всѣ́мъ же правосла́внымъ христіа́номъ — здра́віе и благоче́стіе. Сохраня́й оби́тель твою́ святу́ю отъ всѣ́хъ навѣ́товъ вра́жіихъ, да сло́вомъ и дѣ́ломъ прославля́ется въ не́й всесвято́е и́мя Отца́ и Сы́на и Свята́го Ду́ха, ны́нѣ и при́сно и во вѣ́ки вѣко́въ. Ами́нь.

Тропа́рь [на преставле́ніе, 11-го апрѣ́ля], гла́съ 3:

Возвѣсти́телю пути́ спаси́тельнаго, и́стинный храни́телю апо́стольскихъ преда́ній, сто́лпе непоколеби́мый, благоче́стія учи́телю и Правосла́вія наста́вниче, святи́телю Варсоно́фіе, Влады́ку всѣ́хъ моли́ ми́ръ вселе́ннѣй дарова́ти и душа́мъ на́шимъ ве́лію ми́лость.

Инъ тропа́рь [на обрѣ́теніе моще́й, 4-го октября́], гла́съ 3:

Пе́рвіе учи́теліе пре́жде те́мному, ны́нѣ же свѣ́тлому и новопросвѣще́нному гра́ду Каза́ни, пе́рвіи возвѣсти́теліе пути́ спаси́тельнаго, и́стинніи храни́теліе апо́стольскихъ преда́ній, столпи́ непоколеби́міи, благоче́стія учи́теліе и Правосла́вія наста́вницы, Гу́ріе и Варсоно́фіе, Влады́ку всѣ́хъ моли́те ми́ръ вселе́ннѣй дарова́ти и душа́мъ на́шимъ ве́лію ми́лость.

Конда́къ, гла́съ 6:

Воздержа́ніемъ тѣ́ло ду́ху порабо́тивъ, ду́шу же равноа́нгельну сотвори́лъ еси́, сего́ ра́ди святи́тельства са́номъ поче́тся, чи́стѣ Чистѣ́йшему предстои́ши. Моли́ Христа́ Бо́га, святи́телю, спасти́ Импера́тора на́шего Вседержа́внаго, благоче́стія содержи́теля и лю́ди твоя́, свя́те, да вси́ вопіе́мъ ти́: ра́дуйся, о́тче преподо́бне Варсоно́фіе, гра́ду на́шему Каза́ни похвала́ и утвержде́ніе.

Велича́ніе:

Велича́емъ тя́, святи́телю о́тче Варсоно́фіе, и чте́мъ святу́ю па́мять твою́, ты́ бо мо́лиши за на́съ Христа́ Бо́га на́шего.

Источникъ: Ака́ѳистъ святи́телю Варсоно́фію, Каза́нскому чудотво́рцу. — СПб.: Въ Сѵнода́льной Тѵпогра́фіи, 1860. — 50 с.

/ Къ оглавленію раздѣла /


Наверхъ / Къ титульной страницѣ

0