Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - воскресенiе, 23 iюля 2017 г. Сейчасъ на порталѣ посѣтителей - 20.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

ТРІОДЬ ПОСТНАЯ.

Въ недѣ́лю втору́ю Вели́каго поста́.
Слу́жба собо́ру преподо́бныхъ и богоно́сныхъ отце́въ на́шихъ Пече́рскихъ.

НА МАЛѢЙ ВЕЧЕРНИ,
На Го́споди воззва́хъ: стихи́ры воскре́сны гла́са, по обы́чаю.
Сла́ва, гла́съ 4:

Пріиди́те, восхва́лимъ, вѣ́рніи, святы́хъ тве́рдая исправле́нія, и́миже до́брѣ Творцу́ благоугоди́ша до́бліи, и съ Дави́домъ Бо́гу воспои́мъ: на́мъ же зѣло́ че́стни бы́ша дру́зи Твои́, Го́споди, зѣло́ утверди́шася нача́льства и́хъ въ Тебѣ́, Христѣ́ и Спаси́тели ду́шъ на́шихъ.

И ны́нѣ: гла́са.

На стихо́внѣ стихи́ры, гла́съ 4. Подо́бенъ: Яко до́бля.

Пе́рвѣйшій ли́къ богоно́сныхъ оте́цъ,* во пеще́рѣ посто́мъ просія́вшихъ,* а́ки до́брыхъ ору́жниковъ Христо́выхъ,* пріиди́те, лю́діе, пѣ́сньми предусря́щемъ:* се́ бо отъ мы́сленнаго Сіо́на* со ско́ростію къ на́мъ прихо́дятъ,* несу́ще отъ исполне́нія своего́,* и подаю́тъ благода́ть неоску́дну,* че́стно собо́ръ и́хъ почита́ющимъ.

Сти́хъ: Воззва́ша пра́ведніи,* и Госпо́дь услы́ша и́хъ.

Еже на тве́рдѣ чу́вственнѣй* и́ноческое собра́ніе,* я́ко звѣ́зды мы́сленныя,* честно́е не́бо озари́вшее,* дне́сь во свято́мъ хра́мѣ соше́дшеся,* лю́діе, свѣщи́ нося́ще, предсрѣта́йте,* и моле́бными гла́сы воззови́те, глаго́люще:* богоно́сніи и преблаже́нніи,* моли́теся о пою́щихъ любо́вію ва́ше сочета́ніе.

Сти́хъ: Весели́теся о Го́сподѣ* и ра́дуйтеся, пра́ведніи.

Веселя́щеся, ли́цы христолюби́выхъ люде́й,* стецы́теся празднолю́бнѣ дне́сь съ на́ми,* и похва́льныя вѣнцы́ плету́ще,* собо́ръ богоно́сныхъ оте́цъ цѣлу́йте,* всѣ́хъ по и́мени единоку́пно призыва́юще,* и́же въ пеще́рѣ посто́мъ просія́ша* и озаря́ютъ луча́ми своея́ благода́ти,* ду́ши любо́вію велича́ющихъ,* и вѣ́рно па́мять и́хъ соверша́ющихъ.

Сла́ва, гла́съ 6:

Царю́ Сла́вы присносу́щныя, Кре́стъ Сво́й, а́ки копіе́, водрузи́вшу, стече́ся по́стническое собра́ніе, и ста́ на горѣ́ Пече́рской по́лкъ богознамени́тый преподо́бныхъ оте́цъ, нося́ще ору́жіе на врага́ непобѣди́мо, и́мже до конца́ де́монская ополче́нія низложи́ша; и прише́дше въ небе́сное селе́ніе, воспрія́ша побѣ́дныя вѣнцы́ отъ Христа́ Бо́га и Спа́са на́шего, и мо́лятся непреста́нно о душа́хъ на́шихъ.

И ны́нѣ, богоро́диченъ, гла́съ то́йже: Богоро́дице, Ты́ еси́ лоза́ и́стинная...

Тропа́рь воскре́сенъ, гла́са. Сла́ва, гла́съ 2:

Егда́ снидо́сте во гро́бы, и самѣ́хъ себе́ заключи́сте, тогда́, стра́сти умертви́вше плотскíя, спогребо́стеся Христу́, богоно́сніи, и діа́вольскія въ подзе́мныхъ разруши́сте огра́ды, сего́ ра́ди а́нгели вѣнцы́ съ небе́съ ва́мъ подаю́тъ.

И ны́нѣ, богоро́диченъ: Вся́ па́че смы́сла...



НА ВЕЛИЦѢЙ ВЕЧЕРНИ,
На Го́споди воззва́хъ: стихи́ры октоиха на 4, та́же святы́хъ [на 6], гла́съ 6. Подо́бенъ: Все отло́жше.

Цѣвни́цею пѣ́сней духо́вныхъ лику́юще,* созыва́емъ вся́ празднолю́бныхъ собо́ры* восхвали́ти трудолю́бныхъ* богоно́сныхъ оте́цъ сочета́ніе.* И сему́ во основа́ніе полага́емъ* вели́каго и чу́днаго Анто́нія,* и Ѳеодо́сія богому́драго,* и́хже ра́ди* и всѣ́хъ оте́цъ Пече́рскихъ моли́твами* про́симъ человѣколю́бія Твоего́, Христе́, всѣ́хъ Царю́,* пода́ждь лю́демъ Твои́мъ благода́ть* и спаси́ отъ бѣ́дъ ду́ши,* въ па́мяти и́хъ, вѣ́рно хва́лящихъ Тя́.

Воспое́мъ вси́ пѣ́сньми благоговѣ́йно* Анто́нія Пече́рскаго,* верхо́внаго отце́мъ* и всему́ собо́ру нача́ло,* и сего́ добродѣ́телемъ* нелѣ́ностнаго ревни́теля,* свѣ́тлую лучу́, богоно́снаго Варлаа́ма,* вку́пѣ хвала́ми почти́мъ* и во гла́сѣ ра́дованія воззове́мъ, глаго́люще:* преподо́бніи отцы́ на́ши всеблаже́нніи,* проси́те отъ Христа́ Бо́га* ми́лость улучи́ти* любо́вію па́мять ва́шу соверша́ющимъ.

Ра́дуйся, благоплодови́тая Россíйская земле́,* воспита́вшая гра́жданы* вы́шняго Іерусали́ма,* воспо́й шу́момъ весе́лаго пра́зднованія* и ты́, ту́чная горо́ Пече́рская,* собра́вшая во́ины Царю́ Небе́сному* и показа́вшая крѣ́пкія му́жи* жела́ній духо́вныхъ,* къ ни́мже рцѣ́мъ ны́нѣ, глаго́люще:* богоно́сніи отцы́,* мы́сленная свѣти́ла,* просвѣти́те свѣ́томъ ва́шея благода́ти* ду́ши любо́вію собо́ръ ва́шъ почита́ющихъ.

[Ины стихи́ры,] гласъ 8. Подо́бенъ: О, пресла́внаго чудесе́!

Небе́снаго Царя́ воево́да, Ѳеодо́сій богому́дрый,* по́лкъ во́иновъ духо́вныхъ,* преподо́бныхъ оте́цъ, собра́,* и́хже по́двиги ублажа́юще,* пѣ́сненныя похвалы́ и́мъ принесе́мъ,* и возопіи́мъ, глаго́люще:* я́ко иму́щіи дерзнове́ніе ко Влады́цѣ всѣ́хъ и Бо́гу,* проси́те душа́мъ на́шимъ ве́лія ми́лости* и мíру всему́ умире́нія.

Видѣ́ніе у́мнымъ очеса́мъ зри́тся чуде́сно:* пламеноно́сныя крилѣ́* иму́ще во́ини духо́вніи,* отъ небе́съ прихо́дятъ отцы́ всеблаже́нніи,* и въ по́мощь на́шу ускоря́ютъ, на міроде́ржца ополча́ющеся.* Къ ни́мже припаде́мъ, зову́ще:* ва́съ призыва́емъ, неусы́пніи засту́пницы на́ши,* потщи́теся изба́вити на́съ отъ находя́щихъ враго́въ на́шихъ* и да́ти на́мъ отъ скорбе́й избавле́ніе.

Разруши́ нападе́нія вра́жія,* преподо́бне о́тче на́шъ Ѳеодо́сіе,* ста́до твое́ огражда́ющи во́и небе́сными,* при́сно бо совѣ́туютъ* нахожде́ніи злы́ми разори́ти е́,* но ты́, я́ко ско́ръ сы́й въ по́мощь,* да́ждь заступле́ніе къ тебѣ́ притѣка́ющимъ* и прося́щимъ твоего́ избавле́нія* и не отщети́ въ печа́лехъ посѣще́нія.

Сла́ва, гла́съ 8:

Кто́ изглаго́летъ си́лы Госпо́дни или́ кíй язы́къ изрече́тъ земноро́дныхъ чу́дное житіе́ ва́ше, богоно́сніи отцы́ на́ши Пече́рскіи? Ка́ко страда́нія претерпѣ́сте, и каковы́ по́двиги понесо́сте, бдѣ́ніемъ, посто́мъ и слеза́ми пло́ть свою́ изможда́юще, моли́твами и смире́ніемъ сокруша́юще горды́ню вра́жію, и въ ме́ртвенномъ тѣ́лѣ, а́ки а́нгели, просія́вше, въ небе́сныя кро́вы пресели́стеся. Отню́дуже посѣти́те въ дне́шній де́нь хвала́ми воспѣва́ющихъ честно́е ва́ше по́стническое о Бо́зѣ собра́ніе, и проси́те отъ Христа́ Бо́га улучи́ти на́мъ ве́лію ми́лость.

И ны́нѣ, богоро́диченъ догма́тъ гла́са.
Та́же вхо́дъ. Проки́менъ дне́, и чте́нія три́ преподо́бнымъ.

Прему́дрости Соломо́ни чте́ніе.

Пра́ведныхъ ду́ши въ руцѣ́ Бо́жіей, и не прико́снется и́хъ му́ка. Непщева́ни бы́ша во очесѣ́хъ безу́мныхъ умре́ти, и вмѣни́ся озлобле́ніе исхо́дъ и́хъ, и е́же отъ на́съ ше́ствіе — сокруше́ніе, они́ же су́ть въ ми́рѣ. Ибо предъ лице́мъ человѣ́ческимъ, а́ще и му́ку пріи́мутъ, упова́ніе и́хъ безсме́ртія испо́лнено. И вма́лѣ нака́зани бы́вше, вели́кими благодѣ́тельствовани бу́дутъ, я́ко Бо́гъ искуси́ я́ и обрѣ́те и́хъ досто́йны Себѣ́. Я́ко зла́то въ горни́лѣ, искуси́ и́хъ и, я́ко всепло́діе же́ртвенное, прія́тъ я́. И во вре́мя посѣще́нія и́хъ, возсія́ютъ, и я́ко и́скры по сте́блію, потеку́тъ. Су́дятъ язы́комъ и облада́ютъ людьми́, и воцари́тся Госпо́дь въ ни́хъ во вѣ́ки. Надѣ́ющіися На́нь разумѣ́ютъ и́стину и вѣ́рніи въ любви́ пребу́дутъ Ему́, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

Прему́дрости Соломо́ни чте́ніе.

Пра́ведницы во вѣ́ки живу́тъ, и въ Го́сподѣ мзда́ и́хъ, и попече́ніе и́хъ у Вы́шняго. Сего́ ра́ди пріи́мутъ ца́рствіе благолѣ́пія и вѣне́цъ добро́ты отъ руки́ Госпо́дни, зане́ десни́цею покры́етъ я́ и мы́шцею защити́тъ и́хъ. Пріи́метъ всеору́жіе — рве́ніе свое́ и вооружи́тъ тва́рь въ ме́сть враго́мъ. Облече́тся въ броня́ пра́вды и возложи́тъ шле́мъ — су́дъ нелицемѣ́ренъ. Пріи́метъ щи́тъ непобѣди́мый — преподо́біе, поостри́тъ же напра́сный гнѣ́въ — во ору́жіе, спобо́ретъ же съ ни́мъ мíръ на безу́мныя. По́йдутъ праволу́чныя стрѣ́лы мо́лніины и, я́ко отъ благокру́гла лу́ка облако́въ, на намѣ́реніе полетя́тъ, и отъ каменоме́тныя я́рости испо́лнь паду́тъ гра́ды. Вознегоду́етъ на ни́хъ вода́ морска́я, рѣ́ки же потопя́тъ я́ на́гло. Сопроти́въ ста́нетъ и́мъ ду́хъ си́лы и, я́ко ви́хоръ, развѣ́етъ и́хъ, и опустоши́тъ всю́ зе́млю беззако́ніе, и злодѣ́йство преврати́тъ престо́лы си́льныхъ. Слы́шите у́бо, ца́ріе, и разумѣ́йте, навы́кните, судіи́ конце́въ земли́. Внуши́те держа́щіи мно́жества и гордя́щіися о наро́дѣхъ язы́ковъ, я́ко дана́ е́сть отъ Го́спода держа́ва ва́мъ и си́ла отъ Вы́шняго.

Прему́дрости Соломо́ни чте́ніе.

Пра́ведникъ, а́ще пости́гнетъ сконча́тися, въ поко́и бу́детъ. Осу́дитъ же пра́ведникъ умира́яй живу́щія нечести́выя. У́зрятъ бо кончи́ну пра́веднаго и не разумѣ́ютъ, что́ совѣща́ша о не́мъ, я́ко пове́ржетъ Госпо́дь нечести́выя безгла́сны ни́цъ и поколе́блетъ и́хъ отъ основа́ній, и до послѣ́дняго исче́знутъ въ болѣ́зни, и па́мять и́хъ поги́бнетъ. Пріи́дутъ бо въ помышле́ніе согрѣше́ній свои́хъ ужа́сни, и обличи́тъ и́хъ сопроти́въ беззако́нія и́хъ. Тогда́ ста́нетъ въ дерзнове́ніи мно́зѣ пра́ведникъ предъ лице́мъ оскорби́вшихъ его́ и отмета́ющихъ труды́ его́. Ви́дѣвше же его́, смяту́тся стра́хомъ мно́гимъ и ужа́снутся о пресла́вномъ спасе́ніи его́. Реку́тъ бо въ себѣ́, ка́ющеся, и въ тѣснотѣ́ ду́ха воздо́хнутъ и реку́тъ: се́й бѣ́, его́же имѣ́хомъ нѣ́когда въ посмѣ́хъ и въ при́тчу поноше́нія, безу́мніи, житіе́ его́ вмѣни́хомъ неи́стово и кончи́ну его́ безче́стну. Ка́ко вмѣни́ся въ сынѣ́хъ Бо́жіихъ, и во святы́хъ жре́бій его́ е́сть? У́бо заблуди́хомъ отъ пути́ и́стиннаго, и пра́вды свѣ́тъ не облиста́ на́мъ, и со́лнце не возсія́ на́мъ. Беззако́нныхъ испо́лнихомся сте́зь и поги́бели, и ходи́хомъ стези́ непрохо́дны, пути́ же Госпо́дня не разумѣ́хомъ.

На литíи стихи́ра хра́ма, та́же стихи́ры, гла́съ 4. [Подо́бенъ: Да́лъ еси́ зна́меніе.]

Плотско́е мудрова́ніе, покоре́ніемъ ума́* плѣни́сте въ послуша́ніе Христо́во,* отцы́ преблаже́нніи,* и стра́стное мо́ре преплы́вше,* достиго́сте кра́йнято жела́нія,* тѣ́мъ дарова́ ва́мъ* по́чести зва́нія вы́шняго* Іису́съ Человѣколю́бецъ* и Спа́съ ду́шъ на́шихъ.

Угаси́сте пе́щь мірски́хъ пристра́стій* и самохо́тныя молвы́,* сле́зными пото́ки* и коне́чною нището́ю, отцы́ преподо́бніи,* и я́ко въ черто́зѣ свѣ́тлѣ,* въ те́мныхъ пребы́сте пеще́рахъ,* а́нгельски славосло́вяще* Іису́са Человѣколю́бца* и Спа́са ду́шъ на́шихъ.

Отъ бре́нныя страсте́й глубины́,* скорбе́й и попече́ній жите́йскихъ* у́мъ очи́стивше,* отцы́ богоно́сніи,* упова́ніемъ бу́дущія жи́зни* вся́ тлѣ́нная презрѣ́сте.* И ны́нѣ, въ нетлѣ́нной жи́зни су́ще,* моли́те за ны́ Іису́са Человѣколю́бца* и Спа́са ду́шъ на́шихъ.

Сла́ва, гла́съ 1:

Волнобу́рныя молвы́ житія́ избѣ́гше, ко оти́шію же пеще́ры святы́я дости́гше и та́мо трудолю́бнѣ Го́сподеви угоди́вше, ны́нѣ Вы́шняго Сіо́на есте́ гра́ждане, и Ца́рствія Бо́жія су́ще сы́нове, моли́теся, отцы́ богоно́сніи, прича́стіе сла́вы ва́шея улучи́ти при́сно собо́ръ ва́шъ любо́вію почита́ющимъ.

И ны́нѣ, богоро́диченъ:

Небе́сныхъ чино́въ ра́дованіе, на земли́ человѣ́ковъ крѣ́пкое предста́тельство, Пречи́стая Дѣ́во, спаси́ ны, и́же къ Тебѣ́ прибѣга́ющія, я́ко на Тя́ упова́ніе по Бо́зѣ, Богоро́дице, возложи́хомъ.

На стихо́внѣ стихи́ры воскре́сны. Сла́ва, гла́съ 8:

Престо́лу Трисо́лнечнаго Божества́ предстоя́щіи и бога́тно осіява́еми непристу́пными свѣ́тлостьми, отцы́ на́ши всеблаже́нніи, и́же на земли́ любе́зно предстоя́щихъ и собо́ръ ва́шъ дне́сь гла́сы воспѣва́ющихъ, страсте́й и бѣ́дъ свободи́те, я́ко при́сніи къ Бо́гу хода́таи, и моли́твенницы о душа́хъ на́шихъ.

И ны́нѣ, богоро́диченъ, гла́съ то́йже: Безневѣ́стная Дѣ́во...
Тропари́: Богоро́дице Дѣ́во.., два́жды и преподо́бнымъ еди́ножды.



НА УТРЕНИ,
На Бо́гъ Госпо́дь: Тропа́рь воскре́сенъ два́жды.
Сла́ва, преподо́бныхъ. И ны́нѣ, богоро́диченъ.

По каѳи́смахъ сѣда́льны воскре́сны.

Велича́ніе:

Велича́емъ ва́съ, преподо́бніи отцы́ на́ши Пече́рскіи, и чте́мъ святу́ю па́мять ва́шу, вы́ бо мо́лите о на́съ Христа́, Бо́га на́шего.

[Сти́хъ 1: Ра́дуйтеся, пра́ведніи, о Го́сподѣ, пра́вымъ подоба́етъ похвала́. Сти́хъ 2: Сѣ́ющіи слеза́ми ра́достію по́жнутъ. Сти́хъ 3: Восхва́лятся преподо́бніи во сла́вѣ и возра́дуются на ло́жахъ свои́хъ. Сти́хъ 4: Весели́теся о Го́сподѣ и ра́дуйтеся, пра́ведніи, и хвали́теся, вси́ пра́віи се́рдцемъ.]

Та́же тропари́ по непоро́чныхъ.
По поліеле́и ипакои́ и сѣда́ленъ, гла́съ 4. Подо́бенъ: Яви́лся еси́.

Мно́гими скорбьми́ пу́ть жи́зни сея́ преидо́сте, и дости́гше кра́я у́мнаго жела́нія, въ черто́гъ Боже́ственныя сла́вы всели́стеся; и ны́нѣ, ра́дующеся со всѣ́хъ Царе́мъ и Бо́гомъ, моли́теся, я́ко да и мы́ ва́шего весе́лія прича́стницы бу́демъ, ва́шъ собо́ръ почита́ющіи, отцы́ всеблаже́нніи.

[Инъ сѣда́ленъ,] гла́съ 3:

Бра́къ Агнчій въ черто́зѣ небе́сномъ услы́шавше, и зва́нію Царя́ Вы́шняго ко всѣ́мъ бы́вшу, вся́ мірска́я пристра́стія оста́висте, отцы́ богоно́сніи, и сле́зными струя́ми ри́зы своя́ испра́вше, чи́сти внидо́сте въ трапе́зу Христа́ Бо́га; но пре́жде да́же не затворя́тся две́ри того́ вхо́да, моли́теся, я́ко да и мы́, покая́ніемъ вше́дше, ва́мъ прича́стницы бу́демъ.

Сла́ва, гла́съ 8. Подо́бенъ: Прему́дрости.

Зва́нію Го́спода своего́ послѣ́дующе, кре́стъ, а́ки же́злъ, въ ру́цѣ воспріе́мше, не убоя́стеся стра́ха, предстоя́щаго во тмѣ́, но упова́ніемъ преидо́сте къ безбѣ́дному приста́нищу, и по́двиговъ свои́хъ обрѣ́тше воздая́ніе, веселите́ся въ свѣ́тѣ непристу́пномъ; тѣ́мже ва́съ почита́емъ, отцы́ всеблаже́нніи, я́ко при́сно моля́щихъ Христа́ Бо́га согрѣше́ній оставле́ніе дарова́ти пра́зднующимъ любо́вію святу́ю па́мять ва́шу.

И ны́нѣ, богоро́диченъ:

Яко еди́ну въ жена́хъ Благослове́нную и дѣ́вамъ похвалу́ и украше́ніе, въ бра́нехъ непребори́мую по́мощь, немощны́мъ утвержде́ніе и ско́рое посѣще́ніе въ печа́ли су́щимъ иму́ще Тя́, Богоневѣ́стная Дѣ́во, дне́сь въ пречестно́мъ Твое́мъ хра́мѣ припа́даемъ и мольбы́ на́ша къ Тебѣ́ прино́симъ, я́ко да мо́лиши Христа́ Бо́га, согрѣше́ній оставле́ніе дарова́ти, благоче́стно покланя́ющимся Пресвято́му Рождеству́ Твоему́.

Степе́нна и проки́менъ гла́са. Ева́нгеліе воскре́сно. По 50-мъ псалмѣ́: Покая́нія отве́рзи ми́ две́ри...

З  р  и́:    Аще же хра́мъ:

Проки́менъ, гла́съ 4: Честна́ предъ Го́сподемъ* сме́рть преподо́бныхъ Его́.
Сти́хъ: Что́ возда́мъ Го́сподеви о всѣ́хъ, я́же воздаде́ ми́? Вся́кое дыха́ніе.. Ева́нгеліе Матѳе́я, зача́ло 43.

По 50-мъ псалмѣ́:

Сла́ва: Моли́твами преподо́бныхъ оте́цъ на́шихъ Пече́рскихъ, Ми́лостиве, очи́сти мно́жество согрѣше́ній на́шихъ.

И ны́нѣ: Моли́твами Богоро́дицы...

[Та́же] стихира, гласъ 2:

Преподо́бніи отцы́, мíра красоты́ и пи́щу вре́менную возненави́дѣвшіи, и и́ноческое житіе́ возлю́бльшіи, а́нгеломъ собесѣ́дницы яви́стеся, и свѣти́льницы многосвѣ́тліи вселе́нныя, чудесы́ свои́ми, я́коже второ́е со́лнце, сія́юще, о всѣ́хъ на́съ моли́теся ко Го́споду, соверша́ющихъ свяще́нную па́мять ва́шу; мы́ бо ча́да ва́ша и о́вцы слове́сныя уче́ній ва́шихъ, и ва́съ на по́мощь призыва́емъ, прося́ще ва́ми прія́ти ми́ръ и ве́лію ми́лость.

[Да́же до здѣ́ хра́ма преподо́бнымъ.]

Кано́нъ воскре́сенъ окто́иха со ирмосо́мъ на 4, и тріо́ди на 4, та́же святы́мъ на 6, гла́съ 6.

Пѣ́снь 1.

Ирмо́съ: Во́ду проше́дъ, я́ко су́шу, и еги́петскаго зла́ избѣжа́въ, изра́ильтянинъ вопія́ше: Изба́вителю и Бо́гу на́шему пои́мъ.

Въ па́мяти преподо́бныхъ Твои́хъ, да́ждь, Христе́ мо́й, по́мощь свы́ше и научи́ мя, умудря́я Святы́мъ Твои́мъ Паракли́томъ, да принесу́ пѣ́сненное хвале́ніе Тебѣ́, еди́ному Влады́цѣ.

Во́ду преходи́ти пѣ́сненныхъ слове́съ въ па́мять ва́шу, богоно́сніи отцы́, хотя́ща мя́, въ тишинѣ́ у́мной всегда́ испра́вите, и отъ бу́рныхъ страсте́й удержи́те, да въ ва́шемъ хвале́ніи съ пѣ́снію возвели́чу и́мя Бо́га моего́.

Собо́ръ богоно́сныхъ оте́цъ о Бо́зѣ собра́ся, лю́діе, пріиди́те въ поклоне́ніе, несу́ще съ собо́ю одушевле́нныя же́ртвы, се́ бо призыва́ютъ ны́, да принесе́мъ сла́ву Царю́ всѣ́хъ, еди́ному Влады́цѣ.

Благоплодови́тое дре́во и ма́сличная вѣ́твь, отъ Аѳо́на принесе́нная на сію́ го́ру, вели́кій Анто́ній, его́же плода́ми увеселя́юще ду́ши на́ша, прино́симъ пѣ́снь Тебѣ́, Христу́, всѣ́хъ Влады́цѣ.

Сла́ва: Сла́ву Твою́, Тро́ице Свята́я, въ жи́зни се́й преподо́бніи въ души́ свое́й сохрани́ша, тѣ́мъ сподо́бишася отъ Тебе́ присносу́щныя сла́вы, ея́же и мы́ да не лиши́мся, собо́ръ и́хъ дне́сь Тебѣ́ въ моли́тву представля́емъ.

И ны́нѣ: Въ пе́рвое благоро́діе Приве́дшая ро́дъ человѣ́ческій святы́мъ Рождество́мъ Твои́мъ, обезче́щенна мя́ бѣсо́вскими ла́яніи, приведи́ ко сла́вѣ у́мнѣй, да вы́ну пою́ Ти: ра́дуйся, сла́во правосла́вныхъ, Чи́стая Ма́ти Дѣ́во.

Катава́сія тріо́ди: Отве́рзи уста́ моя́...

Пѣ́снь 3.

Ирмо́съ: Небе́снаго кру́га Верхотво́рче, Го́споди, и Це́ркве Зижди́телю, Ты́ мене́ утверди́ въ любви́ Твое́й, жела́ній кра́ю, вѣ́рныхъ утвержде́ніе, еди́не Человѣколю́бче.

Небе́снаго и земна́го кру́га Созда́тель созда́ мѣ́сто сіе́, и ва́съ, до́брыя гра́жданы, въ не́мъ поста́ви, треблаже́нніи отцы́. Причти́те на́съ въ сожи́тіе ва́ше нетлѣ́нное и жела́емаго кра́я ми́лости дости́гнути моли́теся, мо́лимъ ва́съ.

Изъ горы́ по предуви́дѣнію Бо́жію свѣти́ла яви́шася на земли́ богоно́сніи отцы́ и просвѣти́ша Россíйскую зе́млю свѣ́тлостію житія́ своего́, е́же мы́ чту́ще, удивля́емся и славосло́вимъ, Христе́, си́лу Твою́.

Удивля́емся, я́ко, во пло́ти су́ще, вы́шше естества́ по́двигъ пріе́мше, а́нгеломъ уподо́бишася, ду́ши бо своя́ впери́вше въ любо́вь Бо́жію, ничто́же въ мíрѣ па́че тоя́ предпочто́ша, отъ нея́же въ немощно́й пло́ти прія́ша, Христе́, си́лу Твою́.

Страсте́й мглу́ всю́ и по́хоть вре́дну отло́жше, терпѣ́ніемъ востеко́ша на предлежа́щій по́двигъ преподо́бніи Твои́, Го́споди. Тѣ́мже озари́шася отъ Тебе́ благода́тію, ходя́ще во свѣ́тѣ повелѣ́ній Твои́хъ, Спа́се.

Сла́ва: Во Еди́номъ Существѣ́ Тріѵпоста́сное прославля́емъ Божество́, Отца́ и Сы́на и Ду́ха Пресвята́го, Еди́наго же Тя́ пое́мъ Бо́га, и покланя́ющеся въ па́мяти преподо́бныхъ оте́цъ на́шихъ, славосло́вимъ си́лу Твою́.

И ны́нѣ: Сло́вомъ неизглаго́ланное весе́ліе су́щи преподо́бныхъ, ра́дости мя́ о́ныхъ прича́стника сотвори́ и сла́вы святы́хъ не лиши́, я́ко вся́ Тебѣ́ о Бо́зѣ возмо́жна, и твори́ши, ели́ка хо́щеши, Марíе Богоневѣ́сто.

Сѣда́ленъ, гла́съ 8:

Звѣ́зды мы́сленныя, озаря́ющія Россíйскую зе́млю, богоно́сныхъ оте́цъ собо́ръ почита́ти дерза́ю, но, страстьми́ омраче́нную имы́й ду́шу, умо́мъ недоумѣ́ю; разжени́те тму́ непостоя́нныя мы́сли, да че́стно воспою́ пѣ́снь ва́мъ, отцы́ преблаже́нніи.

Сла́ва, гла́съ 2:

Поще́ніемъ просія́вшихъ и свѣ́тлыми по́двиги преподо́бныхъ оте́цъ Пече́рскихъ чи́стое житіе́ и труды́ кто́ восхвали́ти мо́щенъ? Оба́че отъ любве́, я́же къ ни́мъ, пѣ́сненныя да́ры прино́симъ, тíи бо, со а́нгелы предстоя́ще, при́сно мо́лятся Го́сподеви о всѣ́хъ на́съ.

И ны́нѣ, богоро́диченъ:

Милосе́рдія су́щи исто́чникъ, ми́лости сподо́би на́съ, Богоро́дице, при́зри на лю́ди согрѣши́вшія, яви́, я́ко при́сно, си́лу Твою́, на Тя́ бо упова́юще, — ра́дуйся, — вопіе́мъ Ти́, я́коже иногда́ Гавріи́лъ, безпло́тныхъ архистрати́гъ.

Пѣ́снь 4.

Ирмо́съ: Услы́шахъ, Го́споди, смотре́нія Твоего́ та́инство, разумѣ́хъ дѣла́ Твоя́, и просла́вихъ Твое́ Божcтво́.

Неусы́пнѣ серде́чное видѣ́ніе иму́ще къ Бо́гу, бы́сте незло́бивіи, а́ки младе́нцы, но я́ро о́ко имѣ́сте на бѣ́сы, я́ко и и́мене ва́шего и́мъ трепета́ти. Мо́лимъ ва́съ, моли́теся, да и отъ на́съ нападе́нія вра́жія со студо́мъ возвратя́тся.

Одержи́мь е́смь любо́вію восхвали́ти ва́шъ собо́ръ, отцы́ богоно́сніи, вы́ бо хвали́ми есте́ отъ Бо́га и человѣ́къ, я́ко въ жи́зни се́й сла́ву мíра сего́ презрѣ́сте, да испо́лните повелѣ́нія Христо́ва.

Кíй язы́къ изрече́тъ сла́ву ва́шу, о преподо́бніи, ю́же мно́гими труда́ми стяжа́сте, благода́тію же наверши́сте? И сія́ зна́менія явля́ютъ чуде́сная ва́ша благотворе́нія и исцѣле́нія, и́миже и на́съ, немощны́хъ, не пре́зрите, да возмо́жемъ испо́лнити повелѣ́нія Христо́ва.

Госпо́дь пасе́тъ ва́съ ны́нѣ на мѣ́стѣ зла́чнѣ, преблаже́нніи отцы́, и ко́е уже́ ва́съ лиша́етъ бла́го? Пото́къ бо сла́дости ва́съ напая́етъ, отъ него́же поне́ ка́плею еди́ною житія́ на́шего го́ресть, мо́лимся, услади́те, да ра́достно Бо́гу на́шему воспое́мъ.

Сла́ва: Ду́хъ Пресвяты́й спослушеству́етъ ду́хови ва́шему, отцы́ богоно́сніи, я́ко есте́ ча́да Бо́жія и снаслѣ́дницы Христо́вы, и Ему́же рабо́тасте, съ Ни́мъ и прославля́етеся, пою́ще: благослове́нъ Бо́гъ оте́цъ на́шихъ.

И ны́нѣ: Вся́ сла́ва Твоя́, Дщи́ Царе́ва, вну́трь, одѣ́яна и преукраше́нна предстои́ши Тро́ическому Престо́лу, отню́ду же сія́я па́че со́лнца луча́ми бла́гости Твоея́, при́зри на ны́, да вы́ну пое́мъ, Ма́ти Дѣ́во, си́лу Твою́.

Пѣ́снь 5.

Ирмо́съ: Просвѣти́ на́съ повелѣ́ніи Твои́ми, Го́споди, и мы́шцею Твое́ю высо́кою Тво́й ми́ръ пода́ждь на́мъ, Человѣколю́бче.

Просвѣти́ша всю́ Россíйскую зе́млю да́нною и́мъ благода́тію отцы́ всеблаже́нніи, и тма́ уже́ зловѣ́рія въ коне́цъ поги́бе. Ты́я лучи́ простри́ на ны́ моле́нія и́хъ ра́ди, мо́лимтися, еди́не Человѣколю́бче.

Въ горѣ́ святѣ́й, въ те́мной пеще́рѣ ку́щи своя́ водрузи́сте, отцы́ преблаже́нніи, Бо́жій ра́й сотвори́сте и огусти́сте добродѣ́тельми и чудесы́, а́ки благоплодови́тыми древеса́ми, отъ ни́хже приходя́щіи вѣ́рно пріе́млютъ исцѣле́нія плоды́ и ва́съ хвала́ми велича́ютъ.

Изше́дъ на зла́чное по́ле мы́сленнаго рая́ пеще́ры святы́я, услажда́юся благово́нными арома́ты, я́же источа́ютъ мо́щи ва́ша, преподо́бніи отцы́, и ве́село Созда́телю Бо́гу пѣ́снь умо́мъ возсыла́ю.

Вертогра́дъ заключе́нъ ты́ еси́, пеще́ро свята́я, въ тебѣ́ бо Сади́тель Вы́шній насади́ мно́жество древе́съ, богоно́сныхъ оте́цъ, а́ки ке́дровъ лива́нскихъ, и́же досяго́ша небе́съ высото́ю, и́мже удивля́яся, пою́ пѣ́снь Бо́гу моему́.

Сла́ва: Сла́ва Тебѣ́, Тро́ице Пресвята́я, я́ко просла́вила еси́ мѣ́сто земно́е, небе́сному гра́жданы подо́бное, въ и́хже па́мяти приноси́мымъ отъ на́съ пѣ́ніемъ Тя́, Отче и Сы́не и Ду́ше Святы́й, съ раболѣ́пнымъ поклоне́ніемъ, грѣ́шніи, сла́вимъ и Твое́ Еди́но Божество́ превозно́симъ.

И ны́нѣ: Къ преподо́бныхъ селе́нію отъ дѣ́лъ восхо́да не имы́й, къ Тебѣ́ прибѣга́ю, Влады́чице Богоро́дице, Ты́ бо еси́ две́рь небе́сная и проро́комъ ви́дѣнная лѣ́стница, по благода́ти у́бо Твое́й да́ждь восхожде́ніе въ се́рдцѣ мое́мъ и отве́рзи ми́ две́ри ми́лости Твоея́.

Пѣ́снь 6.

Ирмо́съ: Моли́тву пролію́ ко Го́споду и Тому́ возвѣщу́ печа́ли моя́, я́ко зо́лъ душа́ моя́ испо́лнися и живо́тъ мо́й а́ду прибли́жися, и молю́ся, я́ко Іо́на: отъ тли́, Бо́же, возведи́ мя.

Моли́твы на́ша прино́симъ ва́мъ, о богоно́сніи отцы́, вы́ бо есте́ моли́твенницы о на́съ къ Бо́гу и хода́таи, хода́тайствомъ у́бо ва́шимъ отъ тли́ грѣхо́вныя изба́вите честны́й ва́шъ собо́ръ почита́ющихъ.

Ра́й мы́сленный еси́, Пече́рская свята́я горо́, умно́жившая у́мная древеса́ — блаже́нныя отцы́, и́хже исчести́ по еди́ному не могу́ще, о всѣ́хъ вку́пѣ хвалу́ и пѣ́снь прино́симъ еди́ному Влады́цѣ.

Ихже изведе́ восто́къ и Россíйская страна́ и израсти́ Пече́рская гора́, а́ки богонасажде́нная древеса́, си́хъ плоды́ объе́млюще, лю́діе, стеци́теся почти́ти, и пѣ́снь принесе́мъ Влады́цѣ.

Дре́внихъ оте́цъ стопа́мъ послѣ́дующе, не уклони́стеся ни ма́ло отъ и́хъ трудо́въ, тѣ́мже ра́вный дина́рь вѣ́чныя жи́зни отъ Христа́ пріе́мше, со а́нгелы сла́вите превѣ́чное Того́ Божество́.

Сла́ва: Впадо́хъ въ ру́ки враго́въ мы́сленныхъ и око́ванъ е́смь отъ ни́хъ тя́жкими пу́ты, отъ ни́хже бра́тъ не изба́витъ. Ты́, Тро́ице Пресвята́я, я́ко Ми́лостивая, созда́ніе Твое́ поми́луй и бла́гостію Твое́ю отъ у́зъ сме́ртныхъ свободи́.

И ны́нѣ: Сла́вити Тя́ всегда́ кто́ не хо́щетъ, Чи́стая Дѣ́во, чу́ждъ е́сть спасе́нія своего́: сла́ва бо Твоя́ всѣ́мъ простре́ся во спасе́ніе, сла́вящимъ Тя́, Марíе Богоневѣ́сто.

Конда́къ, гла́съ 8. [Подо́бенъ: Взбра́нной.]

Отцы́ всечестнíи, ли́че богокра́сный, чуде́съ мно́гихъ исто́чницы, мѵ́ро источа́ющіи, сокро́вища краснобога́тная Госпо́дня, въ земли́ сокрове́нная, не преста́йте, мо́лимъ вы́, о на́съ моли́тися ко Го́споду, да зове́мъ ва́мъ: ра́дуйтеся, всему́ мíру свѣти́льницы.

Икосъ:

Ангельски пожи́вшія на земли́, и а́нгеломъ равностоя́тели я́вльшіяся на небеси́, съ тѣ́мижде и неизрече́нныя о́ныя наслажда́ющіяся добро́ты, достоблаже́нныя отцы́ на́ша, помо́щники и засту́пники те́плыя, пріиди́те, вѣ́рніи, восхва́лимъ, къ ни́мъ вопію́ще: ра́дуйся, Анто́ніе, со́лнцу подо́бный свѣти́льниче; ра́дуйся, зерца́ло и о́бразе всѣ́мъ преподо́бнымъ Россíйскимъ; ра́дуйся, вторы́й Моисе́е, мы́сленныя скрижа́ли, добродѣ́тели твоя́ на́мъ отъ горы́ святы́я принесы́й. Ра́дуйся, Ѳеодо́сіе, ангелови́дный человѣ́че; ра́дуйся, звѣздо́ у́тренняя, тьму́ невѣ́дѣнія прогоня́ющая; ра́дуйся, забра́ло необори́мое отъ вра́гъ ви́димыхъ и неви́димыхъ. Ра́дуйтеся, вси́ преподо́бніи отцы́ на́ши Пече́рскіи; ра́дуйтеся, земнíи а́нгели и небе́сніи человѣ́цы; ра́дуйтеся, благоуха́нніи цвѣ́ти ра́йстіи; ра́дуйтеся, пребога́тая сокро́вища сокрове́нная въ земли́; ра́дуйтеся, би́серіе многоцѣ́нніи, отъ пеще́ры, а́ки отъ мо́ря, просія́вшіи; ра́дуйтеся, на́ша похвало́ и всѣ́мъ прибѣга́ющимъ къ ва́мъ изба́вителіе от бѣ́дъ; ра́дуйтеся, всему́ мíру свѣти́льницы.

Пѣ́снь 7.

Ирмо́съ: Отъ Іуде́и доше́дше, о́троцы, въ Вавило́нѣ иногда́, вѣ́рою Тро́ическою пла́мень пе́щный попра́ша, пою́ще: отце́въ Бо́же, благослове́нъ еси́.

Ту́чная еси́ и усыре́нная, Пече́рская горо́, въ твои́хъ бо гра́жданѣхъ изво́ли Вы́шній селе́ніе Свое́ положи́ти, тѣ́мже и мы́ съ ни́ми пое́мъ: оте́цъ на́шихъ Бо́же, благослове́нъ еси́.

Смѵ́рны испо́лнена и хо́лму Лива́нскому подо́бна еси́, Пече́рская горо́, ка́плющая мѵ́ры богоно́сныхъ оте́цъ на исцѣле́ніе болѣ́зней тлетво́рныхъ, и́хже мы́ благоуха́ніе пріе́млюще, пое́мъ: оте́цъ на́шихъ Бо́же, благослове́нъ еси́.

Цари́цы Небе́сныя селе́ніе еси́, святопече́рская горо́, ю́же си́льныхъ мно́жество преподо́бныхъ оте́цъ окружа́ютъ, вси́ ору́жія изощре́нны иму́ще, моли́твы проти́ву міроде́ржца, пою́тъ пѣ́снь Бо́гу: пое́мъ и превозно́симъ Его́ во вѣ́ки.

Восто́къ и за́падъ, ю́гъ и сѣ́веръ ви́дитъ во огра́дѣ твое́й, Пече́рская горо́, исто́чникъ, кипя́щій мѵ́ры чуде́съ богоно́сныхъ оте́цъ, излива́ющійся всѣ́мъ изоби́льно, и́же пою́тъ и превозно́сятъ Го́спода во вѣ́ки.

Сла́ва: Прославля́ющія святы́хъ Твои́хъ просла́ви, Преблага́я Тро́ице, сла́вою, ю́же угото́вала еси́ отъ вѣ́ка рабо́мъ Твои́мъ, и сподо́би пѣ́ти: оте́цъ на́шихъ Бо́же, благослове́нъ еси́.

И ны́нѣ: Прера́дованная Ма́ти и Цари́це, ра́достная Тебѣ́ принося́щихъ ра́дости вѣ́чныя сподо́би и отве́рзи ра́йскія две́ри христіа́нскому всему́ ро́ду, при́сно Тебѣ́ пою́щему: Богоро́дице, благослове́нна еси́.

Пѣ́снь 8.

Ирмо́съ: Царя́ Небе́снаго, Его́же пою́тъ во́и а́нгельстіи, хвали́те и превозноси́те во вся́ вѣ́ки.

Во огра́дѣ пеще́ры святы́я проходя́ умо́мъ, зри́мъ на тве́рди ея́ мно́жество, а́ки звѣ́здъ, оте́цъ преподо́бныхъ, и́хже исчи́слити не возмо́жно. Тѣ́мъ о всѣ́хъ возда́вше хвалу́ Бо́гу, мо́лимъ, да да́стъ на́мъ съ ни́ми превозноси́ти Его́ во вѣ́ки.

Проя́вльшаго на горѣ́ свято́й Пече́рской ва́съ, свѣти́ла вели́кая, отцы́ богоно́сніи, отню́ду же благода́тныя лучи́ простро́сте и всю́ Россíйскую зе́млю чудесы́ просвѣти́сте, тѣ́мже пое́мъ Го́спода и превозно́симъ во вѣ́ки.

Не многобу́рное мо́ре, но пеще́ра свята́я явля́етъ ва́ша мо́щи, а́ки би́серіе драго́е, уго́дницы Бо́жіи, и обогаща́ете чуде́съ излія́ніи всѣ́хъ къ ва́мъ съ вѣ́рою приходя́щихъ и превознося́щихъ Го́спода хвала́ми во вѣ́ки.

Гла́съ ра́дованія и шу́мъ празднолю́бныхъ стѣка́ется восхвали́ти собо́ръ ва́шъ, отцы́ Пече́рскіи; тѣ́хъ у́бо хвале́нія пріе́мше, отъ всѣ́хъ скорбе́й и печа́лей спаса́йте, да всегда́ ва́съ велича́емъ.

Сла́ва: Сла́вы ра́ди и́мене Твоего́, Пресу́щественная Тро́ице, просла́вила еси́ пра́ведныхъ Твои́хъ и мѣ́сто сіе́; бла́гостію у́бо Твое́ю пода́ждь и на́мъ, Бла́же, сла́ву святы́хъ во сла́вѣ Твое́й зрѣ́ти, и съ ни́ми Тебе́ сла́вити, въ тріе́хъ ѵпоста́сѣхъ Еди́наго Бо́га.

И ны́нѣ: Свя́занъ е́смь мно́гими плени́цами страсте́й, и нѣ́сть ми́ разрѣше́нія наде́жды, но Ты́ поми́луй мя́, я́ко Ма́ти Бо́га вы́шняго, и разрѣши́ мя отъ ни́хъ, Ты́ бо Еди́на си́льна еси́ по Бо́зѣ грѣхо́вныя плени́цы разрѣши́ти.

Пѣ́снь 9.

Ирмо́съ: Вои́стинну Богоро́дицу, Тя́ исповѣ́дуемъ, спасе́нніи Тобо́ю, Дѣ́во Чи́стая, съ безпло́тными ли́ки Тя́ велича́юще.

Вои́стинну пре́жде юдо́ль бѣ́ плаче́вная и верте́пъ разбо́йникомъ гора́ сія́ свята́я, ны́нѣ же до́мъ Бо́жій е́сть, и живу́щіи въ не́мъ блаже́нни, я́ко ва́ми освяти́ся, богоно́сніи отцы́: сего́ ра́ди всѣ́хъ ва́съ велича́емъ.

Ра́достною душе́ю взе́мше кре́стное и́го и ра́ломъ трудо́въ го́ру сію́ воздѣ́лавше, насади́сте сады́ по́товъ ва́шихъ, богоно́сніи отцы́, мы́сленныхъ, и́хже плоды́ объе́мше, увеселя́емъ ду́ши на́ша и всѣ́хъ ва́съ велича́емъ.

Во еди́нъ пу́ть за́повѣдей Госпо́днихъ ходя́ще, разли́чная сѣ́мена сѣ́ясте: о́въ чистоту́, о́въ послуша́ніе, и́нъ по́стъ, другíй нищету́, труды́ и сле́зы. Оба́че вси́ ра́вно ра́дости рукоя́ти пожина́ете, отъ ни́хже и на́мъ да́рствуйте, да вы́ну ва́съ всѣ́хъ велича́емъ.

Отъ мѣ́ста плаче́внаго на безплаче́вное преше́дшихъ, мо́лимъ ва́съ, отцы́ преблаже́нніи, на́съ, па́мять ва́шу вку́пѣ почита́ющихъ, вся́кія ско́рби избавля́йте, да вси́ ва́съ велича́емъ.

Сла́ва: Сла́ва Ты́ еси́, Тро́ице, преподо́бныхъ оте́цъ ли́ку, и неги́блющее весе́ліе, о Тебѣ́ бо мíръ и пло́ть съ неви́димымъ враго́мъ побѣди́вше, прія́ша вѣнцы́ и ра́дуются со а́нгелы, Тя́ всегда́ велича́юще.

И ны́нѣ: Сла́вимъ Тя́, пресла́вный гра́де Бо́жій, Тебе́ бо Са́мъ основа́ Вы́шній и даде́ въ прибѣ́жище всѣ́мъ отъ лица́ вра́жія бѣжа́щимъ. И на́мъ бу́ди въ приста́нище, да Тя́ вы́ну велича́емъ.

Ексапостила́рій воскре́сенъ.
Сла́ва, [преподо́бнымъ:]

Ца́рское свяще́ніе, ро́де избра́нный, іера́рси святíи, свяще́нницы, мона́си, дѣ́вственницы, чудотво́рцы и все́ по́стническое сосло́віе преподо́бныхъ оте́цъ Пече́рскихъ, собери́теся дне́сь на моли́тву, да ва́съ ра́ди Ца́рь сла́вы спасе́тъ Импера́тора и вся́ лю́ди [совр. изд.: правосла́вныя лю́ди], благоче́стно собо́ръ ва́шъ почита́ющихъ.

И ны́нѣ, богоро́диченъ:

Святы́хъ Святѣ́йшую Тя́ сла́вимъ, Чи́стая Дѣ́во, и велича́емъ отъ Тебе́ рожде́нное Сло́во, Ты́ же пріими́ и отъ на́съ славосло́віе сіе́, и да́ждь сла́вити Тя́, идѣ́же вси́ святíи Ма́терь Тя́ Бо́жію сла́вятъ.

На хвали́техъ стихи́ры воскресны 4.
И преподо́бныхъ, гла́съ 2. Подо́бенъ: До́ме Евфра́ѳовъ.

Богоизбра́нніи дѣ́лателіе,* преподо́бніи отцы́ на́ши Пече́рскіи,* мы́сленный добродѣ́телей на земли́ виногра́дъ насади́сте,* отъ него́же возрасте́ ва́мъ* досто́йный пло́дъ вѣ́чнаго живота́. [Два́жды.]

Сти́хъ: Восхва́лятся преподо́бніи во сла́вѣ,* и возра́дуются на ло́жахъ свои́хъ.

Посѣ́ясте въ горѣ́ сле́зы,* да пло́дъ дово́льный,* ра́дость во дво́рѣхъ Госпо́днихъ, процвѣте́тъ;* ея́же вы́ наслажда́ющеся во вѣ́ки,* моли́теся за ны́ ко Го́споду.

Сти́хъ: Блаже́ни вси́ боя́щіися Го́спода,* ходя́щіи въ путе́хъ Его́.

Мо́лвъ жите́йскихъ изба́витися жела́юще,* всели́стеся въ пеще́ру,* идѣ́же трудолю́бнѣ пожи́вше,* въ вѣ́чный поко́й внидо́сте;* моли́теся та́мо за ны́ Влады́цѣ Христу́.

Сла́ва, самогла́сенъ тріо́ди. И ны́нѣ: Преблагослове́нна еси́...



НА ЛИТУРГІИ,

Блаже́нна воскре́сна на 6 и отъ кано́на преподо́бныхъ пѣ́снь 6-я на 4. Проки́менъ, воскре́сенъ и преподо́бнымъ, гла́съ 7: Честна́ предъ Го́сподемъ сме́рть преподо́бныхъ Его́. Апо́столъ воскре́сенъ и преподо́бнымъ, къ Гала́томъ, зача́ло 213. Аллилу́ія гла́са и преподо́бнымъ, гла́съ 6: Блаже́нъ му́жъ, боя́йся Го́спода, въ за́повѣдехъ Его́ восхо́щетъ зѣло́. Ева́нгеліе воскре́сно и преподо́бнымъ, отъ Луки́, зача́ло 24. Прича́стенъ воскре́сенъ и преподо́бнымъ: Ра́дуйтеся, пра́ведніи, о Го́сподѣ, [пра́вымъ подоба́етъ похвала́.]

Слу́жбу святи́телю Григо́рію пое́мъ на повече́ріи, идѣ́же разсу́дитъ екклесіа́рхъ.

Источникъ: Пече́рская Минíа. [Ча́сть втора́я.] — Кíевъ: Въ тѵпогра́фіи Кíево-Пече́рскія Ла́ѵры, 2007. — С. 5-22.

Свѣрено съ изданіемъ: Слу́жбы Преподо́бнымъ отце́мъ Пече́рскимъ, и́хже мо́щы въ Бли́жной и Да́льной пеще́рѣ нетлѣ́нно почива́ютъ. — Кíевъ: Въ тѵпогра́фіи Кíево-Пече́рскія Ла́ѵры, 1785. — Л. 1. – 7 об., 137 об. – 143 об.

/ Къ оглавленію раздѣла /


Наверхъ / Къ титульной страницѣ

0