Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - суббота, 18 ноября 2017 г. Сейчасъ на порталѣ посѣтителей - 24.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

ТРІОДІОНЪ, СІЕСТЬ ТРИПѢСНЕЦЪ,
Съ Бо́гомъ Святы́мъ, обдержа́й подоба́ющее ему́ послѣ́дованіе.

Слу́жба во святы́й и Вели́кій пято́къ.

[НА ВЕЧЕРНИ,]

Стека́ется про́чее собо́рище іуде́йское, да Содѣ́теля и Зижди́теля вся́ческихъ Пила́ту преда́стъ. О, беззако́нныхъ! О, невѣ́рныхъ! Яко Гряду́щаго суди́ти живы́мъ и ме́ртвымъ, на су́дъ гото́вятъ; Исцѣля́ющаго стра́сти, ко Страсте́мъ уготовля́ютъ. Го́споди Долготерпѣли́ве, ве́лія Твоя́ ми́лость, сла́ва Тебѣ́! [Два́жды.]

Іу́да беззако́нный, Го́споди, омочи́вый на Ве́чери ру́ку въ соли́лѣ съ Тобо́ю, простре́ къ беззако́ннымъ ру́цѣ прія́ти сре́бреники; и мѵ́ра умы́сливый цѣ́ну, Тебе́, Безцѣ́ннаго, не убоя́ся прода́ти; но́зѣ простры́й, во е́же умы́ти, Влады́ку облобыза́ льсти́вно, во е́же преда́ти беззако́ннымъ; ли́ка же апо́стольскаго отве́ргся, и три́десять пове́ргъ сре́бреники, Твоего́ тридне́внаго воскресе́нія не вѣ́дѣ, и́мже поми́луй на́съ. [Два́жды.]

Іу́да преда́тель, льсти́въ сы́й, льсти́внымъ лобза́ніемъ предаде́ Спа́са Го́спода, и Влады́ку всѣ́хъ, я́ко раба́, продаде́ іуде́омъ; я́ко овча́ на заколе́ніе, та́ко послѣ́доваше Агнецъ Бо́жій, Сы́нъ Отчій, еди́нъ Многоми́лостивый. [Два́жды.]

Іу́да, ра́бъ и льсте́цъ, учени́къ и навѣ́тникъ, дру́гъ и діа́волъ отъ дѣ́лъ яви́ся: послѣ́доваше бо Учи́телю, и на Него́ поуча́шеся преда́нію, глаго́лаше въ себѣ́: преда́мъ Того́ и пріобря́щу собра́нная имѣ́нія. Иска́ше же и мѵ́ру про́дану бы́ти, и Іису́са ле́стію я́ти. Отдаде́ цѣлова́ніе, предаде́ Христа́. И я́ко овча́ на заколе́ніе, си́це послѣ́доваше, еди́нъ Благоутро́бный и Человѣколю́бецъ. [Два́жды.]

Его́же проповѣ́да Агнца Иса́ія, гряде́тъ на заколе́ніе во́льное и плещи́ дае́тъ на ра́ны, лани́ты — на зауше́нія, лица́ же не отврати́ отъ срамоты́ заплева́ній, сме́ртію же безобра́зною осужда́ется. Вся́ Безгрѣ́шный во́лею пріе́млетъ, да всѣ́мъ да́руетъ изъ ме́ртвыхъ воскресе́ніе. [Два́жды.]

Сла́ва, и ны́нѣ, гла́съ 6:

Рожде́ніе ехи́дновъ вои́стинну Іу́да, я́дшихъ ма́нну въ пусты́ни и ро́пщущихъ на Пита́теля: еще́ бо бра́шну су́щу во устѣ́хъ и́хъ, клевета́ху на Бо́га неблагода́рніи; и се́й злочести́вый, Небе́сный Хлѣбъ во устѣ́хъ нося́й, на Спа́са преда́тельство содѣ́ла. О, нра́ва несы́тнаго и де́рзости безчеловѣ́чныя! Пита́ющаго продае́тъ и, Его́же любля́ше, Влады́ку, предая́ше на сме́рть: вои́стинну о́нѣхъ сы́нъ беззако́нный, и съ ни́ми па́губу наслѣ́дова. Но пощади́, Го́споди, ду́ши на́ша отъ такова́го безчеловѣ́чества, Еди́не въ долготерпѣ́ніи Неизрече́нный.

Вхо́дъ со Ева́нгеліемъ. Свѣ́те ти́хій...

Проки́менъ, гла́съ 1: Изми́ мя́, Го́споди, отъ человѣ́ка лука́ва,* отъ му́жа непра́ведна изба́ви мя́. Сти́хъ: Иже помы́слиша непра́вду въ се́рдцѣ ве́сь де́нь.

Исхо́да чте́ніе. [Глава́ 19.]

Рече́ Госпо́дь Моисе́ю: соше́дъ, засвидѣ́тельствуй лю́демъ и очи́сти я́ дне́сь и у́трѣ; и да исперу́тъ ри́зы, и да бу́дутъ гото́вы въ де́нь тре́тій: въ тре́тій бо де́нь сни́детъ Госпо́дь на го́ру Сина́йскую предъ всѣ́ми людьми́. И устро́иши лю́ди о́крестъ, глаго́ля: внемли́те себѣ́ не восходи́ти на го́ру и ничи́мже косну́тися ея́: вся́къ, прикосну́выйся горѣ́, сме́ртію у́мретъ. Не ко́снется е́й рука́, ка́меніемъ бо побіе́тся, или́ стрѣло́ю устрѣли́тся; а́ще ско́тъ, а́ще человѣ́къ, не бу́детъ жи́въ; егда́ же гла́си и трубы́ и о́блакъ оты́детъ отъ горы́, сíи взы́дутъ на го́ру. Сни́де же Моисе́й съ горы́ къ лю́демъ и освяти́ я́, и испра́ша ри́зы своя́. И рече́ лю́демъ: бу́дите гото́ви, три́ дни́ не входи́те къ жена́мъ. Бысть же въ тре́тій де́нь, бы́вшу ко у́тру, и бы́ша гла́си и мо́лнія, и о́блакъ мра́ченъ на горѣ́ Сина́йстѣй, гла́съ тру́бный глаша́ше зѣло́; и убоя́шася вси́ лю́діе, и́же въ полцѣ́. Изведе́ же Моисе́й лю́ди во срѣ́теніе Бо́гу изъ полка́, и ста́ша подъ горо́ю. Гора́ же Сина́йская дымя́шеся вся́, схожде́нія ра́ди Бо́жія на ню́ во огни́; и восхожда́ше ды́мъ, я́ко ды́мъ пе́щный, и ужасо́шася вси́ лю́діе зѣло́. Бы́ша же гла́си тру́бніи происходя́ще крѣ́пцы зѣло́. Моисе́й глаго́лаше, Бо́гъ же отвѣщава́ше ему́ гла́сомъ.

Проки́менъ, гла́съ 7: Изми́ мя́ отъ вра́гъ мои́хъ, Бо́же,* и отъ востаю́щихъ на мя́ изба́ви мя́. Сти́хъ: Изба́ви мя́ отъ дѣ́лающихъ беззако́ніе.

Іова чте́ніе. [Главы́ 38 и 42.]

Рече́ Госпо́дь Іову сквозѣ́ бу́рю и о́блаки: Кто́ се́й, скрыва́яй отъ Мене́ совѣ́тъ, содержа́й же глаго́лы въ се́рдцѣ, Мене́ же ли мни́тся утаи́ти? Препоя́ши, я́ко му́жъ, чре́сла твоя́: вопрошу́ же тя́, ты́ же Ми́ отвѣща́й. Гдѣ́ бы́лъ еси́, егда́ основа́хъ зе́млю? Возвѣсти́ Ми́, а́ще вѣ́си ра́зумъ? Кто́ положи́ мѣ́ры ея́, а́ще вѣ́си? Или́ кто́ наведы́й ве́рвь на ню́? На че́мже столпи́ ея́ утвержде́ни су́ть? Кто́ же е́сть положи́вый ка́мень краеуго́льный на не́й? Егда́ (сотворе́ны) бы́ша звѣ́зды, восхвали́ша Мя́ гла́сомъ ве́ліимъ вси́ а́нгели Мои́. Загради́хъ же мо́ре враты́, егда́ излива́шеся, изъ чре́ва ма́тере своея́ исходя́щее. Положи́хъ же ему́ о́блакъ во одѣя́ніе, мгло́ю же пови́хъ е́. И положи́хъ ему́ предѣ́лы, обложи́въ затво́ры и врата́. Рѣ́хъ же ему́: до сего́ до́йдеши, и не пре́йдеши, но въ тебѣ́ сокруша́тся во́лны твоя́. Или́ при тебѣ́ соста́вихъ свѣ́тъ у́тренній? Денни́ца же вѣ́сть чи́нъ сво́й, я́тися кри́лъ земли́, оттрясти́ нечести́выя отъ нея́. Или́ ты́, бре́ніе взе́мъ отъ земли́, созда́лъ еси́ живо́тно и глаго́ливаго сего́ посади́лъ еси́ на земли́? Отъя́лъ же ли еси́ отъ нечести́выхъ свѣ́тъ? Мы́шцу же го́рдыхъ сокруши́лъ ли еси́? Прише́лъ же ли еси́ на исто́чники мо́ря? Въ слѣда́хъ же бе́здны ходи́лъ ли еси́? Отверза́ются же ли тебѣ́ стра́хомъ врата́ сме́ртная? Вра́тницы же а́довы, ви́дѣвше тя́, убоя́шася ли? Навы́клъ же ли еси́ широты́ поднебе́сныя? Повѣ́ждь у́бо Ми́: коли́ка е́сть? Въ ко́ей же земли́ вселя́ется свѣ́тъ? Тмѣ́ же ко́е е́сть мѣ́сто? Аще у́бо введе́ши Мя́ въ предѣ́лы и́хъ, а́ще же ли и вѣ́си стези́ и́хъ? Вѣ́мъ у́бо, я́ко тогда́ рожде́нъ еси́, число́ же лѣ́тъ твои́хъ мно́го. Прише́лъ же ли еси́ въ сокро́вища снѣ́жная, и сокро́вища гра́дная ви́дѣлъ ли еси́? Подлежа́тъ же ли тебѣ́ въ ча́съ враго́въ въ де́нь бра́ней и ра́ти? Отвѣща́въ же Іовъ, рече́ ко Го́споду: Вѣ́мъ, я́ко вся мо́жеши, невозмо́жно же Тебѣ́ ничто́же. Кто́ е́сть тая́й отъ Тебе́ совѣ́тъ? Щадя́й же словеса́, и отъ Тебе́ мни́тся утаи́ти? Кто́ же возвѣсти́тъ ми́, и́хже не вѣ́дѣхъ, ве́лія и ди́вная, и́хже не зна́хъ? Послу́шай же мене́, Го́споди, да и а́зъ возглаго́лю: вопрошу́ же Тя́, Ты́ же мя́ научи́. Слу́хомъ у́бо у́ха слы́шахъ Тя́ пе́рвѣе, ны́нѣ же о́ко мое́ ви́дѣ Тя́.

Проро́чества Иса́іина чте́ніе. [Глава́ 50.]

Госпо́дь дае́тъ Мнѣ́ язы́къ науче́нія, е́же разумѣ́ти, егда́ подоба́етъ рещи́ сло́во, положи́ Мя́ у́тро у́тро, приложи́ Ми́ у́хо, е́же слы́шати. И наказа́ніе Госпо́дне отверза́етъ у́ши Мои́, Азъ же не проти́влюся, ни противоглаго́лю. Плещи́ Мои́ вдахъ на ра́ны и лани́тѣ Мои́ на зауше́нія, лица́ же Моего́ не отврати́хъ отъ студа́ заплева́ній. И Госпо́дь, Госпо́дь помо́щникъ Ми́ бы́сть, сего́ ра́ди не усрами́хся, но положи́хъ лице́ Свое́, а́ки тве́рдый ка́мень, и разумѣ́хъ, я́ко не постыжду́ся. Зане́ приближа́ется Оправда́вый Мя́. Кто пря́йся со Мно́ю? Да сопротивоста́нетъ Мнѣ́ ку́пно. И кто́ судя́йся со Мно́ю? Да прибли́жится ко Мнѣ́. Се́ Госпо́дь, Госпо́дь помо́жетъ Ми́! Кто́ озло́битъ Мя́? Се́ вси́ вы́, я́ко ри́за обетша́ете и я́ко мо́ліе изъя́стъ вы́. Кто́ въ ва́съ боя́йся Го́спода? Да послу́шаетъ гла́са Отрока Его́. Ходя́щіи во тмѣ́ и нѣ́сть и́мъ свѣ́та, надѣ́йтеся на и́мя Госпо́дне и утверди́теся о Бо́зѣ. Се́ вси́ вы́ о́гнь раждиза́ете и укрѣпля́ете пла́мень; ходи́те свѣ́томъ огня́ ва́шего, и пла́менемъ, его́же разжего́сте. Мене́ ра́ди бы́ша сія́ ва́мъ: въ печа́ли у́спнете.

Та́же ектенія́ ма́лая. Трисвято́е.

Проки́менъ Апо́стола, гла́съ 7: Кня́зи лю́дстіи собра́шася вку́пѣ* на Го́спода и на Христа́ Его́. Сти́хъ: Вску́ю шата́шася, язы́цы, и лю́діе, поучи́шася тще́тнымъ? Апо́столъ къ Кори́нѳяномъ, зача́ло 149: Бра́тіе, азъ прія́хъ отъ Го́спода... Аллилу́ія, гла́съ 6: Блаже́нъ, разумѣва́яй на ни́ща и убо́га, въ де́нь лю́тъ изба́витъ его́ Госпо́дь. Сти́хъ: Врази́ мои́ рѣ́ша мнѣ́ зла́я: когда́ у́мретъ и поги́бнетъ и́мя его́? Сти́хъ: Яды́й хлѣ́бы Моя́, возвели́чи на Мя́ запина́ніе. Ева́нгеліе отъ Матѳе́я, зача́ло 107: Рече́ Госпо́дь Свои́мъ ученико́мъ: вѣ́сте, я́ко по двою́ дню́ Па́сха бу́детъ... И по чи́ну Боже́ственная Литургíя Вели́каго Васи́лія.

Вмѣ́сто же херуви́мскія пѣ́сни пое́мъ тропа́рь се́й, на гла́съ 6, три́жды.

Ве́чери Твоея́ Та́йныя дне́сь, Сы́не Бо́жій, прича́стника мя́ пріими́, не бо́ враго́мъ Твои́мъ та́йну повѣ́мъ, ни лобза́нія Ти́ да́мъ, я́ко Іу́да, но я́ко разбо́йникъ исповѣ́даю Тя́: помяни́ мя́, Го́споди, во Ца́рствіи Твое́мъ!

То́йже и прича́стенъ, и вмѣ́сто: Да испо́лнятся уста́ на́ша... То́йже пое́мъ мно́жицею, до́ндеже причастя́тся бра́тія Боже́ственныхъ Та́инъ. По заамво́нной же моли́твѣ быва́етъ умове́ніе, и его́ послѣ́дованіе, я́коже явля́етъ уста́въ. Та́же дае́тся антидо́ръ. И отпу́стъ. На трапе́зѣ же причаща́емся вина́ и еле́я.


[НА ПОВЕЧЕРІИ.]
Въ то́йже Вели́кій четверто́къ повече́ріе глаго́лемъ ма́лое, на не́мже пое́мъ трипѣ́снецъ. Творе́ніе господи́на Андре́я Кри́тскаго, гла́съ 8.

Пѣ́снь 5.

Ирмо́съ: Мра́къ души́ моея́ разжени́, Свѣтода́вче Христе́ Бо́же, началоро́дную тму́ изгна́въ бе́здны, и да́руй ми́ свѣ́тъ повелѣ́ній Твои́хъ, Сло́ве, да у́тренюя, сла́влю Тя́.

Украси́ся ве́черя, и угото́вася Тебѣ́ па́сха, я́коже ре́клъ еси́, Христе́, но Іу́да на преда́ніе Твое́ поуча́шеся, сы́й съ Тобо́ю внѣ́ Твоея́ цѣны́, соглаша́шеся сребролю́біемъ.

Востае́тъ съ ве́чери и ле́нтіемъ препоясу́ется по чре́сломъ Христо́съ во́лею, и преклоня́етъ вы́ю, Петру́ вопію́щу: никогда́же мои́ но́зѣ умы́еши, Тво́рче мо́й, но оба́че омы́й.

Прія́тъ хлѣбъ въ ру́цѣ, на преда́ніе Іу́да, льсти́вый учени́къ, и́мже и преда́ніе содѣ́ла Тебѣ́, простира́ше но́зѣ, и́хже са́мъ еси́ омы́лъ и ле́нтіемъ оте́рлъ.

Лобза́ніемъ льсти́внымъ Іу́да тогда́ уста́ распира́ше Тебѣ́, и́миже тѣ́ло Твое́, Сло́ве, недосто́йно омака́ше, вопія́ Тебѣ́, — ра́дуйся, Учи́телю! — лобза́тель и преда́тель, ра́бъ и льсте́цъ.

Пе́тръ, я́коже зря́ше содѣва́емая тогда́, у́жасомъ одержи́мь бы́въ, рабы́ни обличи́ся худы́мъ вопроше́ніемъ, и́бо отве́ржеся Тебе́, Го́спода, не то́кмо, я́коже ре́клъ еси́, но и я́ко вѣ́далъ еси́, вся́ Вѣ́дый.

Зауша́ется Зижди́тель, и ударя́ется тва́рь поноше́ніемъ Его́: тро́стію біе́тся хотя́, и вы́шняя преклоня́ются: оплева́ется Судія́, и основа́нія вся́ земна́я подвиза́ются.

Сла́ва: Те́рніемъ вѣнчава́ется Бо́гъ, зе́млю всю́ украше́й цвѣ́ты, и ра́ны пріе́млетъ, и терпи́тъ поноше́ніе долготерпѣли́вно, и багряни́цу поруга́нія но́ситъ, и терпи́тъ вся́ Бо́гъ сы́й, и стра́ждетъ Свое́ю пло́тію.

И ны́нѣ, [богоро́диченъ]: Да вопіе́тъ Іоа́ннъ, сказу́я уче́ніи Боже́ственными воплоще́ніе Твое́: Сло́во пло́ть бы́въ изъ Дѣ́вы непрело́жно, и пребы́сть естество́мъ Бо́гъ, я́коже бѣ́, не отступи́въ Оте́ческихъ Его́ нѣ́дръ.

[Ирмо́съ: Мра́къ души́ моея́ разжени́, Свѣтода́вче Христе́ Бо́же, началоро́дную тму́ изгна́въ бе́здны, и да́руй ми́ свѣ́тъ повелѣ́ній Твои́хъ, Сло́ве, да у́тренюя, сла́влю Тя́.]

Пѣ́снь 8.

Ирмо́съ: Покрыва́яй вода́ми превы́спренняя Своя́, полага́яй мо́рю предѣ́лъ песо́къ, и содержа́й вся́, Тя́ пое́тъ со́лнце, Тя́ сла́витъ луна́, Тебѣ́ прино́ситъ пѣ́снь вся́ тва́рь, я́ко Содѣ́телю всѣ́хъ во вѣ́ки.

Одѣва́яй о́блаки не́бо, Іису́се, на престо́лѣ сла́вы ца́рствуя съ Нетлѣ́ннымъ Отце́мъ, Ты́, пріе́мь ле́нтій, си́мъ препоя́сался еси́ омы́ти но́ги бре́нніи, ве́сь Огнь сы́й, Сло́ве, а́ще и воплоти́лся еси́.

Якоже вся́ омы́въ, возле́гъ Іису́съ, къ Свои́мъ ученико́мъ глаго́летъ: вѣ́сте вси́, что́ сотвори́хъ ны́нѣ? Образъ бо да́хъ ва́мъ смире́нія всѣ́мъ, да и́же хо́щетъ пе́рвый бы́ти, да бу́детъ всѣ́хъ послѣ́дній произволе́ніемъ.

Чи́сти у́бо есте́, но не вси́ вы́, — Христо́съ друго́мъ, возлежа́щимъ на ве́чери, рече́. Еди́нъ у́бо къ друго́му не довѣ́дяще, рече́, сло́ва. Тѣ́мже по си́хъ глаго́летъ я́вѣ и́мя преда́теля.

Якоже сія́ глаго́ля, на горѣ́ Елео́нстѣй прише́дъ Судія́ всѣ́хъ со ученики́, тогда́ у́бо глаго́лаше: пріиди́те и по́йдемъ отсю́ду, приспѣ́ бо уже́ преда́тель; никто́же отве́ржися Мене́: во́лею бо стражду́.

О, ле́стнаго лобза́нія! — Ра́дуйся, Учи́телю! — Христу́ Іу́да глаго́летъ, вку́пѣ съ сло́вомъ преда́стъ на заколе́ніе. Се́ бо даде́ зна́меніе беззако́ннымъ: Его́же а́зъ лобжу́, То́й е́сть, Его́же преда́ти ва́мъ обѣща́хся.

Ятъ бы́въ, Бо́же на́шъ, отъ беззако́нныхъ люде́й, и не пререку́я отню́дъ, ни вопія́, Агнче Бо́жій, претерпѣ́лъ еси́ вся́, испыта́тися, и суди́тися, и біе́нъ бы́ти, свя́занъ и ведо́мъ бы́ти со ору́жіи и дреко́льми къ Каіа́фѣ.

Да ра́спнется, — вопія́ху евре́йстіи лю́діе со свяще́нники и кни́жники, — Іису́съ Христо́съ. О, лю́діе невѣ́рніи! Что́ бо сотвори́ Яви́выйся, воздви́гнувый Ла́заря отъ гро́ба и пу́ть сотвори́вый человѣ́комъ на спасе́ніе?

Пила́тову суди́щу беззако́нніи лю́діе крича́ще, вопія́ху: распни́ Сего́, отпусти́ же на́мъ свя́зана су́ща Вара́вву убíйцу! Христа́ же, пе́рвѣе би́въ, возми́, возми́, распни́ со злодѣ́и!

Благослови́мъ Отца́, и Сы́на, и Свята́го Ду́ха, Го́спода.

О, несказа́ннаго истоща́нія! О, неизглаго́ланнаго совѣ́та! Яко о́гнь сы́й, омы́лъ еси́ но́зѣ преда́телю, Спа́се; омы́въ же, не опали́лъ еси́, и подава́я хлѣ́бъ на ве́чери, и та́йной слу́жбѣ науча́лъ еси́.

И ны́нѣ, богоро́диченъ: О, но́ваго слы́шанія! Бо́гъ — Сы́нъ Жены́ и безсе́менна рождества́! Безму́жная — Ма́ти и рожде́нное — Бо́гъ. О, ужа́снаго слы́шанія! О, зача́тія стра́шнаго! О, Дѣ́вы нетлѣ́ннаго рождества́! Вои́стинну па́че ума́ вся́ и вы́ше вѣ́дѣнія.

[Хва́лимъ, благослови́мъ, покланя́емся Го́сподеви, пою́ще и превознося́ще во вся́ вѣ́ки.

Ирмо́съ: Покрыва́яй вода́ми превы́спренняя Своя́, полага́яй мо́рю предѣ́лъ песо́къ, и содержа́й вся́, Тя́ пое́тъ со́лнце, Тя́ сла́витъ луна́, Тебѣ́ прино́ситъ пѣ́снь вся́ тва́рь, я́ко Содѣ́телю всѣ́хъ во вѣ́ки.]

Пѣ́снь 9.

Ирмо́съ: Благослове́нъ Госпо́дь Бо́гъ Изра́илевъ, воздви́гнувый ро́гъ спасе́нія на́мъ въ дому́ Дави́довѣ, Отрока Своего́, въ ни́хже посѣти́ на́съ Восто́къ съ высоты́ и напра́вилъ ны́ е́сть на пу́ть ми́ра.

Па́ки вы спите́, — Христо́съ ученико́мъ рече́, — бди́те, прибли́жися ча́съ, про́чее воста́ните, и́демъ, дру́зи Мои́, се́ преда́тель учени́къ, всю́ спи́ру имѣ́я, гряде́тъ преда́ти Мя́ человѣкоубíйцамъ.

Лобза́ніе твое́ льсти́вное и цѣлова́ніе го́рькое, кому́ зове́ши, ле́стче, глаго́ля бо: ра́дуйся, Равви́! — Христо́съ ко Іу́дѣ вѣща́ше. — Дру́же, на не́же прише́лъ еси́, рече́: а́ще бо цѣлова́ти прише́лъ еси́, что́ предлага́еши но́жъ, ме́домъ пома́занный?

Пила́тову суди́щу, Непови́нный Судія́, во́лею прише́лъ еси́ предста́ти, Христе́, и изба́вити на́съ отъ долго́въ на́шихъ. Тѣ́мже претерпѣ́лъ еси́, Благíй, пло́тію ура́ненъ бы́ти, да вси́ пріи́мемъ свобожде́ніе.

Милосе́рдія Пучи́на, ка́ко предстои́тъ Огнь Пила́ту, сѣ́ну и тро́сти и земли́ су́щей, его́же не опали́ Огнь Божества́ Христо́съ, но пожида́ше терпѣли́вно, и́же естество́мъ свобо́дь, я́ко Человѣколю́бецъ.

Возми́, возми́, распни́ глаго́лемаго Христа́! — іуде́е взыва́ху Пила́ту иногда́. Сей же ру́це омыва́ше и тро́стію и́мъ писа́ше на Него́ вину́, всѣ́мъ да́рующую безсме́ртіе.

Вопію́ще беззако́нніи Пила́ту изли́ше, — возми́, возми́, распни́ Христа́! — прося́ху уби́ти, я́ко осужде́на. Не Се́й ли воскреси́ ме́ртвыя, прокаже́нныя очи́сти, кровоточи́вую исцѣли́, разсла́бленныя стягну́въ?

Что́ бо зло́ сотвори́, я́ко взыва́ете вельми́: возми́, возми́, распни́ Его́? — Пила́тъ иногда́ вопія́ше лю́демъ неразу́мнымъ, — вины́ не обрѣта́ю въ Не́мъ. Они́ же го́рько вопія́ху: возми́, возми́, распни́ Спа́са всѣ́хъ!

О, іуде́е беззако́нніи! О, неразу́мніи лю́діе! Не помяну́сте ли что́ отъ чуде́съ Христо́выхъ, мно́жество исцѣле́ній? Но и всея́ Его́ не разумѣ́сте ли Боже́ственныя си́лы, я́коже пе́рвіи отцы́ ва́ши, ны́нѣ же и вы́ не разумѣ́сте?

Сла́ва: Біе́нъ бы́въ, Зижди́телю мо́й, и преда́лся еси́ мене́ ра́ди распя́тися, да спасе́ніе мое́ посредѣ́ земли́ содѣ́лавъ, источи́ши мíрови жи́знь и обезсме́ртиши честно́ю Твое́ю кро́вію покланя́ющіяся Тебѣ́.

И ны́нѣ, богоро́диченъ: Агница Твоя́, Влады́ко, предстоя́щи у Креста́ и рыда́ющи, Тебе́, Творца́ вся́ческихъ, зря́ше Твое́ долготерпѣ́ніе: во́лею бо роди́лся еси́ пло́тію и Стра́сти вся́ въ не́й претерпѣ́лъ еси́, да спасе́ши мíръ.

[Ирмо́съ: Благослове́нъ Госпо́дь Бо́гъ Изра́илевъ, воздви́гнувый ро́гъ спасе́нія на́мъ въ дому́ Дави́довѣ, Отрока Своего́, въ ни́хже посѣти́ на́съ Восто́къ съ высоты́ и напра́вилъ ны́ е́сть на пу́ть ми́ра.]


[НА УТРЕНИ.]
Послѣ́дованіе святы́хъ и спаси́тельныхъ Страсте́й Го́спода на́шего Іису́са Христа́.

Во святы́й и Вели́кій четверто́къ ве́чера, во 2-й ча́съ но́щи зна́менуетъ. И собра́вшимся на́мъ во хра́мъ, благослови́вшу свяще́ннику, пое́мъ нача́ло, по обы́чаю, я́коже указа́ся въ четверто́къ 5-я недѣ́ли. Та́же шестопса́лміе. Посе́мъ ектенія́ вели́кая, и по возгла́сѣ пое́мъ: Аллилу́ія.., на гла́съ 8. И тропа́рь: Егда́ сла́вніи ученицы́.., три́жды, ко́сно и со сладкопѣ́ніемъ. Пи́санъ въ Вели́кій четверто́къ на у́трени. Та́же ектенія́ ма́лая. И даю́тся свѣщи́ бра́тіи отъ екклисіа́рха. И глаго́летъ свяще́нникъ: И о сподо́битися на́мъ... И чте́тъ пе́рвое Ева́нгеліе отъ Іоа́нна, завѣ́та святы́хъ Страсте́й, зача́ло 46: Рече́ Госпо́дь Свои́мъ ученико́мъ: ны́нѣ просла́вися Сы́нъ Человѣ́ческій... Коне́цъ: И ученицы́ Его́. И сконча́вшуся Ева́нгелію, пое́мъ: Сла́ва долготерпѣ́нію Твоему́, Го́споди. И а́біе пое́мъ антифо́ны, повторя́юще вся́ тропари́.

Антифо́нъ 1.

Гла́съ 8: Кня́зи лю́дстіи собра́шася на Го́спода и на Христа́ Его́. [Два́жды.]

То́йже: Сло́во законопресту́пное возложи́ша на Мя́. Го́споди, Го́споди, не оста́ви Мене́! [Два́жды.]

Чу́вствія на́ша чи́ста Христо́ви предста́вимъ, и я́ко дру́зи Его́, ду́ши на́ша пожре́мъ Его́ ра́ди, и не попече́ньми жите́йскими соугнета́емся, я́ко Іу́да, но въ клѣ́техъ на́шихъ возопіи́мъ: Отче на́шъ, Иже на небесѣ́хъ, отъ лука́ваго изба́ви на́съ! [Два́жды.]

Сла́ва, богоро́диченъ:

Дѣ́ва родила́ еси́, Неискусобра́чная, и Дѣ́ва пребыла́ еси́, Ма́ти Безневѣ́стная, Богоро́дице Марíе, Христа́ Бо́га на́шего моли́ спасти́ся на́мъ.

И ны́нѣ, то́йже.

Антифо́нъ 2.

Гла́съ 6: Тече́ глаго́ля Іу́да беззако́ннымъ кни́жникомъ: что́ мнѣ́ хо́щете да́ти и а́зъ ва́мъ преда́мъ Его́? Среди́ же совѣщава́ющихъ Са́мъ стоя́лъ еси́ неви́димо Совѣщава́емый. Сердцевѣ́дче, пощади́ ду́ши на́ша! [Два́жды.]

Ми́лостію Бо́гови послу́жимъ, я́коже Марíя на ве́чери, и не стя́жимъ сребролю́бія, я́ко Іу́да, да всегда́ со Христо́мъ Бо́гомъ бу́демъ. [Два́жды.]

Сла́ва, богоро́диченъ:

Его́же родила́ еси́, Дѣ́во, неизрече́нно, вы́ну я́ко Человѣколю́бца не преста́й моля́щи, да отъ бѣ́дъ спасе́тъ вся́ къ Тебѣ́ прибѣга́ющія.

И ны́нѣ, то́йже.

Антифо́нъ 3.

Гла́съ 2: Ла́зарева ра́ди воста́нія, Го́споди, — оса́нна, — Тебѣ́ зва́ху дѣ́ти евре́йскія, Человѣколю́бче. Беззако́нный же Іу́да не восхотѣ́ разумѣ́ти. [Два́жды.]

На ве́чери Твое́й, Христе́ Бо́же, ученико́мъ Твои́мъ предглаго́лалъ еси́: еди́нъ отъ ва́съ преда́стъ Мя́. Беззако́нный же Іу́да не восхотѣ́ разумѣ́ти. [Два́жды.]

Іоа́нну вопроси́вшу: Го́споди, предая́й Тя́ кто́ е́сть? Того́ хлѣ́бомъ показа́лъ еси́. Беззако́нный же Іу́да не восхотѣ́ разумѣ́ти. [Два́жды.]

На три́десятихъ сре́бреницѣхъ, Го́споди, и на лобза́ніи льсти́вномъ, иска́ху іуде́е уби́ти Тя́. Беззако́нный же Іу́да не восхотѣ́ разумѣ́ти. [Два́жды.]

На умове́ніи Твое́мъ, Христе́ Бо́же, ученико́мъ Твои́мъ повелѣ́лъ еси́: си́це твори́те, я́коже ви́дите. Беззако́нный же Іу́да не восхотѣ́ разумѣ́ти. [Два́жды.]

Бди́те и моли́теся, да не вни́дете въ напа́сть, — ученико́мъ Твои́мъ, Христе́ Бо́же на́шъ, глаго́лалъ еси́. Беззако́нный же Іу́да не восхотѣ́ разумѣ́ти. [Два́жды.]

Сла́ва, богоро́диченъ:

Спаси́ отъ бѣ́дъ рабы́ Твоя́, Богоро́дице, я́ко вси́ по Бо́зѣ къ Тебѣ́ прибѣга́емъ, я́ко неруши́мѣй стѣнѣ́ и предста́тельству.

И ны́нѣ, то́йже.

Сѣда́ленъ. [Не сѣди́мъ же на сицевы́хъ сѣда́льнахъ, за е́же свяще́ннику кади́ти святы́й олта́рь, но, стоя́ще, пое́мъ я́.] Гла́съ 7:

На ве́чери ученики́ пита́я, притворе́ніе преда́нія вѣ́дый, на не́й Іу́ду обличи́лъ еси́, неиспра́вленна у́бо сего́ вѣ́дый; позна́ти же всѣ́мъ хотя́, я́ко во́лею преда́лся еси́, да мíръ исхити́ши отъ чужда́го, Долготерпѣли́ве, сла́ва Тебѣ́!

Сла́ва, коне́цъ. И ны́нѣ, ве́сь.

Та́же: И о сподо́битися на́мъ... И чте́тъ свяще́нникъ второ́е Ева́нгеліе, отъ Іоа́нна, зача́ло 58: Во вре́мя о́но, изы́де Іису́съ со ученики́... Коне́цъ: Но да ядя́тъ фа́ску. По Ева́нгеліи же пое́мъ

Антифо́нъ 4.

Гла́съ 5: Дне́сь Іу́да оставля́етъ Учи́теля и пріе́млетъ діа́вола, ослѣпля́ется стра́стію сребролю́бія, отпа́даетъ Свѣ́та, омраче́нный: ка́ко бо можа́ше зрѣ́ти, Свѣти́ло прода́вый на три́десятихъ сре́бреницѣхъ? Но на́мъ возсія́ Страда́вый за мíръ. Къ Нему́же возопіи́мъ: пострада́вый и сострада́вый человѣ́комъ, Го́споди, сла́ва Тебѣ́! [Два́жды.]

Дне́сь Іу́да притворя́етъ богоче́стіе и отчужда́ется дарова́нія; сы́й учени́къ, быва́етъ преда́тель: во обы́чномъ лобза́ніи ле́сть покрыва́етъ и предпочита́етъ Влады́чнія любве́ несмы́сленно рабо́тати сребролю́бію, наста́вникъ бы́въ собо́рища беззако́ннаго. Мы́ же, иму́ще спасе́ніе — Христа́, Того́ просла́вимъ. [Два́жды.]

Гла́съ 1: Братолю́біе стя́жимъ, я́ко во Христѣ́ бра́тія, а не неми́лостивное е́же къ бли́жнимъ на́шимъ, да не я́ко ра́бъ осу́димся неми́лостивый, пѣ́нязей ра́ди, и я́ко Іу́да раска́явшеся, ничто́же по́льзуемся. [Два́жды.]

Сла́ва, богоро́диченъ:

Пресла́вная о Тебѣ́ глаго́лашася вездѣ́, я́ко родила́ еси́ пло́тію всѣ́хъ Творца́, Богоро́дице Марíе, Всепѣ́тая и Неискусобра́чная.

И ны́нѣ, то́йже.

Антифо́нъ 5.

Гла́съ 6: Учени́къ Учи́теля соглаша́ше цѣ́ну и на три́десятихъ сре́бреницѣхъ продаде́ Го́спода, лобза́ніемъ льсти́внымъ предая́ Его́ беззако́нникомъ на сме́рть. [Два́жды.]

Дне́сь глаго́лаше Зижди́тель небесе́ и земли́ Свои́мъ ученико́мъ: прибли́жися ча́съ и приспѣ́ Іу́да, предая́й Мене́, да никто́же отве́ржется Мене́, ви́дя Мя́ на Крестѣ́ посредѣ́ двою́ разбо́йнику: стражду́ бо я́ко человѣ́къ, и спасу́, я́ко Человѣколю́бецъ, въ Мя́ вѣ́рующія. [Два́жды.]

Сла́ва, богоро́диченъ:

Неизрече́нно въ послѣ́дняя Заче́ншая, и Ро́ждшая Созда́теля Твоего́, Того́ моли́ спасти́ся душа́мъ на́шимъ.

И ны́нѣ, то́йже.

Антифо́нъ 6.

Гла́съ 7: Дне́сь бди́тъ Іу́да преда́ти Го́спода, Превѣ́чнаго Спа́са мíра, Иже отъ пяти́ хлѣ́бъ насы́тившаго мно́жества. Дне́сь беззако́нный отмета́ется Учи́теля, учени́къ бы́въ, Влады́ку предаде́, сребро́мъ продаде́ ма́нною насы́тившаго челове́ка. [Два́жды.]

Дне́сь Кресту́ пригвозди́ша іуде́е Го́спода, пресѣ́кшаго мо́ре жезло́мъ и прове́дшаго и́хъ въ пусты́ню. Дне́сь копіе́мъ ре́бра Его́ прободо́ша, я́звами ра́нившаго и́хъ ра́ди Еги́пта, и же́лчію напои́ша, ма́нну — пи́щу и́мъ одожди́вшаго. [Два́жды.]

Го́споди, на Стра́сть во́льную прише́дъ, вопія́лъ еси́ ученико́мъ Твои́мъ: а́ще и еди́наго часа́ не возмого́сте бдѣ́ти со Мно́ю, ка́ко обѣща́стеся умре́ти Мене́ ра́ди? Поне́ Іу́ду зри́те, ка́ко не спи́тъ, но тщи́тся преда́ти Мя́ беззако́ннымъ. Воста́ните, моли́теся, да не кто́ Мене́ отве́ржется, зря́ Мене́ на Крестѣ́. Долготерпѣли́ве, сла́ва Тебѣ́! [Два́жды.]

Сла́ва, богоро́диченъ:

Ра́дуйся, Богоро́дице, Невмѣсти́маго въ небесѣ́хъ вмѣсти́вшая во утро́бѣ Твое́й; ра́дуйся, Дѣ́во, проро́ковъ проповѣ́даніе, Еюже на́мъ возсія́ Емману́илъ; ра́дуйся, Ма́ти Христа́ Бо́га.

И ны́нѣ, то́йже.

Сѣда́ленъ, гла́съ 7:

Кíй тя́ о́бразъ, Іу́до, преда́теля Спа́су содѣ́ла? Еда́ отъ ли́ка тя́ апо́стольска разлучи́? Еда́ дарова́нія исцѣле́ній лиши́? Еда́ со о́нѣми вечеря́въ, тебе́ отъ трапе́зы отри́ну? Еда́ ины́хъ но́ги умы́въ, твои́ же презрѣ́? О, коли́кихъ бла́гъ непа́мятливъ бы́лъ еси́! И тво́й у́бо неблагода́рный облича́ется нра́въ. Того́ же безмѣ́рное проповѣ́дуется долготерпѣ́ніе и ве́лія ми́лость.

Сла́ва, и ны́нѣ, то́йже.

Ева́нгеліе 3-е отъ Матѳе́я, зача́ло 109: Во вре́мя о́но, во́ини, е́мше Іису́са, ведо́ша къ Каіа́фѣ архіере́ови... Коне́цъ: Пла́кася го́рько.

Антифо́нъ 7.

Гла́съ 8: Емшимъ Тя́ беззако́ннымъ, претерпѣва́я, си́це вопія́лъ еси́, Го́споди: а́ще и порази́сте Па́стыря и расточи́сте двана́десять ове́цъ ученики́ Моя́, можа́хъ вя́щше, не́жели двана́десять легео́новъ предста́вити а́нгеловъ. Но долготерплю́, да испо́лнятся, я́же яви́хъ ва́мъ проро́ки Мои́ми, безвѣ́стная и та́йная. Го́споди, сла́ва Тебѣ́! [Два́жды.]

Три́щи отве́ргся Пе́тръ, а́біе рече́нное ему́ разумѣ́, но принесе́ къ Тебѣ́ сле́зы покая́нія: Бо́же, очи́сти мя́ и спаси́ мя́! [Два́жды.]

Сла́ва, богоро́диченъ:

Яко врата́ спаси́тельная, и ра́й кра́сный, и Свѣ́та присносу́щнаго о́блакъ, су́щую Святу́ю Дѣ́ву воспои́мъ вси́, глаго́люще Ей, е́же ра́дуйся.

И ны́нѣ, то́йже.

Антифо́нъ 8.

Гла́съ 2: Рцы́те, беззако́нніи, что́ слы́шасте отъ Спа́са на́шего? Не зако́нъ ли положи́ и проро́ческая уче́нія? Ка́ко у́бо помы́слисте Пила́ту преда́ти, Иже отъ Бо́га, Бо́га Сло́ва, и Изба́вителя ду́шъ на́шихъ? [Два́жды.]

Да ра́спнется! — вопія́ху Твои́хъ дарова́ній при́сно наслажда́ющіися, и злодѣ́я вмѣ́сто Благодѣ́теля проша́ху прія́ти пра́ведниковъ убíйцы. Молча́лъ же еси́, Христе́, терпя́ ихъ суровство́, пострада́ти хотя́ и спасти́ на́съ, я́ко Человѣколю́бецъ. [Два́жды.]

Сла́ва, богоро́диченъ:

Яко не и́мамы дерзнове́нія за премно́гія грѣхи́ на́ша, Ты́, Иже отъ Тебе́ Ро́ждшагося, моли́, Богоро́дице Дѣ́во: мно́го бо мо́жетъ моле́ніе Ма́тернее ко благосе́рдію Влады́ки. Не пре́зри грѣ́шныхъ мольбы́, Всечи́стая, я́ко Ми́лостивъ е́сть и спасти́ могíй, Иже и страда́ти о на́съ изво́ливый.

И ны́нѣ, то́йже.

Антифо́нъ 9.

Гла́съ 3: Поста́виша три́десять сре́брениковъ, цѣ́ну Цѣне́ннаго, Его́же оцѣни́ша отъ сыно́въ Изра́илевыхъ. Бди́те и моли́теся, да не вни́дете во искуше́ніе: ду́хъ у́бо бо́дръ, пло́ть же немощна́, сего́ ра́ди бди́те. [Два́жды.]

Да́ша въ снѣ́дь Мою́ же́лчь и въ жа́жду Мою́ напои́ша Мя́ о́цта. Ты́ же, Го́споди, возста́ви мя́ и возда́мъ и́мъ. [Два́жды.]

Сла́ва, богоро́диченъ:

Иже отъ язы́къ, пое́мъ Тя́, Богоро́дице Чи́стая, я́ко Христа́, Бо́га на́шего родила́ еси́, отъ кля́твы человѣ́ки Тобо́ю свобо́ждшаго.

И ны́нѣ, то́йже.

Сѣда́ленъ, гла́съ 8:

О, ка́ко Іу́да иногда́, Тво́й учени́къ, преда́тельству поуча́шеся на Тя́, свечеря́ льсти́вно, навѣ́тникъ и непра́ведникъ? Ше́дъ, рече́ свяще́нникомъ: что́ ми́ подае́те, и преда́мъ ва́мъ Онаго, зако́нъ разори́вшаго и оскверни́вшаго суббо́ту? Долготерпѣли́ве Го́споди, сла́ва Тебѣ́!

Сла́ва, и ны́нѣ, то́йже.

Ева́нгеліе 4-е, отъ Іоа́нна, зача́ло 59: Во вре́мя о́но, ведо́ша Іису́са отъ Каіа́фы въ прето́ръ... Коне́цъ: Предаде́ Его́ и́мъ, да ра́спнется.

Антифо́нъ 10.

Гла́съ 6: Одѣя́йся свѣ́томъ, я́ко ри́зою, на́гъ на судѣ́ стоя́ше, и въ лани́ту ударе́ніе прія́тъ отъ ру́къ, и́хже созда́; беззако́нніи же лю́діе на Крестѣ́ пригвозди́ша Го́спода сла́вы. Тогда́ заве́са церко́вная раздра́ся, со́лнце поме́рче, не терпя́ зрѣ́ти Бо́га досажда́ема, Его́же трепе́щутъ вся́ческая, Тому́ поклони́мся. [Два́жды.]

Учени́къ отве́ржеся, разбо́йникъ возопи́: помяни́ мя́, Го́споди, во Ца́рствіи Твое́мъ! [Два́жды.]

Сла́ва, богоро́диченъ:

Умири́ мíръ, отъ Дѣ́вы изво́ливый, Го́споди, пло́ть носи́ти за рабы́, да согла́сно Тебе́ славосло́вимъ, Человѣколю́бче.

И ны́нѣ, то́йже.

Антифо́нъ 11.

Гла́съ 6: За блага́я, я́же сотвори́лъ еси́, Христе́, ро́ду евре́йскому, распя́ти Тя́ осуди́ша, о́цта и же́лчи напои́вше Тя́. Но да́ждь и́мъ, Го́споди, по дѣло́мъ и́хъ, я́ко не разумѣ́ша Твоего́ снизхожде́нія. [Два́жды.]

О преда́тельствѣ не дово́льни бы́ша, Христе́, ро́ди евре́йстіи, но покива́ху глава́ми свои́ми, хулу́ и руга́ніе принося́ще. Но да́ждь и́мъ, Го́споди, по дѣло́мъ и́хъ, я́ко не разумѣ́ша Твоего́ смотре́нія. [Два́жды.]

Ниже́ земля́, я́ко потрясе́ся, ниже́ ка́меніе, я́ко разсѣ́деся, евре́овъ увѣща́ша, ниже́ церко́вная завѣ́са, ниже́ ме́ртвыхъ воскресе́ніе. Но да́ждь и́мъ, Го́споди, по дѣло́мъ и́хъ, я́ко тще́тнымъ на Тя́ поучи́шася. [Два́жды.]

Сла́ва, богоро́диченъ:

Бо́га отъ Тебе́ воплоще́ннаго позна́хомъ, Богоро́дице Дѣ́во, еди́на Чи́стая, еди́на Благослове́нная, тѣ́мъ непреста́нно Тя́, воспѣва́юще, велича́емъ.

И ны́нѣ, то́йже.

Антифо́нъ 12.

Гла́съ 8: Сія́ глаго́летъ Госпо́дь іуде́омъ: лю́діе Мои́, что́ сотвори́хъ ва́мъ? Или́ чи́мъ ва́мъ стужи́хъ? Слѣпцы́ ва́ши просвѣти́хъ, прокаже́нныя очи́стихъ, му́жа, су́ща на одрѣ́, возста́вихъ. Лю́діе Мои́, что́ сотвори́хъ ва́мъ? И что́ Ми́ возда́сте? За ма́нну — же́лчь, за во́ду — о́цетъ, за е́же люби́ти Мя́ — ко Кресту́ Мя́ пригвозди́сте. Ктому́ не терплю́ про́чее, призову́ Моя́ язы́ки, и тíи Мя́ просла́вятъ со Отце́мъ и Ду́хомъ, и Азъ и́мъ да́рую живо́тъ вѣ́чный. [Два́жды.]

Дне́сь церко́вная завѣ́са на обличе́ніе беззако́нныхъ раздира́ется, и со́лнце лучи́ своя́ скрыва́етъ, Влады́ку зря́ распина́ема. [Два́жды.]

Законополо́жницы Изра́илевы, іуде́е и фарисе́е, ли́къ апо́стольскій вопіе́тъ къ ва́мъ: се́ Хра́мъ, Его́же вы́ разори́сте, се́ Агнецъ, Его́же вы́ распя́сте и гро́бу преда́сте, но вла́стію Свое́ю воскре́се. Не льсти́теся, іуде́е: То́й бо е́сть, Иже въ мо́ри спасы́й и въ пусты́ни пита́вый. То́й е́сть Живо́тъ, и Свѣ́тъ, и Ми́ръ мíрови. [Два́жды.]

Сла́ва, богоро́диченъ:

Ра́дуйся, врата́ Царя́ сла́вы, я́же Вы́шній Еди́нъ про́йде и па́ки запечатлѣ́нна оста́ви, во спасе́ніе ду́шъ на́шихъ.

И ны́нѣ, то́йже.

Сѣда́ленъ, гла́съ 8:

Егда́ предста́лъ еси́ Каіа́фѣ, Бо́же, и преда́лся еси́ Пила́ту, Судіе́, небе́сныя си́лы отъ стра́ха поколеба́шася. Егда́ же возне́слся еси́ на Дре́во посредѣ́ двою́ разбо́йнику, вмѣни́лся еси́ съ беззако́нными, Безгрѣ́шне, за е́же спасти́ человѣ́ка. Незло́биве Го́споди, сла́ва Тебѣ́!

Сла́ва, и ны́нѣ, то́йже.

Ева́нгеліе 5-е, отъ Матѳе́я, зача́ло 111: Во вре́мя о́но, ви́дѣвъ Іу́да, преда́вый Іису́са... Коне́цъ: Понести́ Кре́стъ Его́.

Антифо́нъ 13.

Гла́съ 6: Собра́ніе іуде́йское у Пила́та испроси́ша распя́ти Тя́, Го́споди; вины́ бо въ Тебѣ́ не обрѣ́тше, пови́ннаго Вара́вву свободи́ша, и Тебе́, Пра́веднаго, осуди́ша, скве́рнаго убíйства грѣ́хъ наслѣ́довавше. Но да́ждь и́мъ, Го́споди, воздая́ніе и́хъ, я́ко тще́тнымъ на Тя́ поучи́шася. [Два́жды.]

Его́же вся́ ужаса́ются и трепе́щутъ, и вся́къ язы́къ пое́тъ, Христа́, Бо́жію Си́лу и Бо́жію Прему́дрость, свяще́нницы за лани́ту уда́риша, и да́ша Ему́ же́лчь; и вся́ пострада́ти изво́ли, спасти́ ны́ хотя́ отъ беззако́ній на́шихъ Свое́ю Кро́вію, я́ко Человѣколю́бецъ. [Два́жды.]

Сла́ва, богоро́диченъ:

Богоро́дице, ро́ждшая сло́вомъ па́че сло́ва Созда́теля Своего́, Того́ моли́ спасти́ ду́ши на́ша.

И ны́нѣ, то́йже.

Антифо́нъ 14.

Гла́съ 8: Го́споди, Иже разбо́йника, спу́тника пріе́мый, въ кро́ви ру́цѣ оскверни́вшаго, и на́съ съ ни́мъ причти́, я́ко Бла́гъ и Человѣколю́бецъ. [Два́жды.]

Ма́лъ гла́съ испусти́ разбо́йникъ на крестѣ́, ве́лію вѣ́ру обрѣ́те, во еди́номъ мгнове́ніи спасе́ся, и пе́рвый, ра́йская врата́ отве́рзъ, вни́де. Иже того́ покая́ніе воспріе́мый, Го́споди, сла́ва Тебѣ́! [Два́жды.]

Сла́ва, богоро́диченъ:

Ра́дуйся, а́нгеломъ ра́дость мíра пріе́мшая; ра́дуйся, ро́ждшая Творца́ Твоего́ и Го́спода; ра́дуйся, сподо́бльшаяся бы́ти Ма́ти Бо́жія.

И ны́нѣ, то́йже.

Антифо́нъ 15.

Гла́съ 6: Дне́сь ви́ситъ на Дре́вѣ, Иже на вода́хъ зе́млю повѣ́сивый; вѣнце́мъ отъ те́рнія облага́ется, Иже а́нгеловъ Ца́рь; въ ло́жную багряни́цу облачи́тся, одѣва́яй не́бо о́блаки; зауше́ніе прія́тъ, Иже во Іорда́нѣ свободи́вый Ада́ма; гвоздьми́ пригвозди́ся Жени́хъ Церко́вный; копіе́мъ прободе́ся Сы́нъ Дѣ́вы. Покланя́емся Cтрасте́мъ Твои́мъ, Христе́; покланя́емся Страсте́мъ Твои́мъ, Христе́; покланя́емся Cтрасте́мъ Твои́мъ, Христе́. Покажи́ намъ и сла́вное Твое́ Воскресе́ніе! [Два́жды.]

Не я́ко іуде́е пра́зднуемъ, и́бо Па́сха на́ша — за ны́ пожре́ся Христо́съ, но очи́стимъ са́ми себе́ отъ вся́кія скве́рны и чи́стѣ помо́лимся Ему́: воскресни́, Го́споди, спаси́ на́съ, я́ко Человѣколю́бецъ! [Два́жды.]

Кре́стъ Тво́й, Го́споди — жи́знь и заступле́ніе лю́демъ Твои́мъ е́сть, и на́нь надѣ́ющеся, Тебе́, распя́таго Бо́га на́шего, пое́мъ: поми́луй на́съ! [Два́жды.]

Сла́ва, богоро́диченъ:

Ви́дящи Тя́ ви́сима, Христе́, Тебе́ Ро́ждшая вопія́ше: что́ стра́нное, е́же ви́жду, та́инство, Сы́не Мо́й? Ка́ко на Дре́вѣ умира́еши, пло́тію водруже́нъ, Жи́зни Пода́телю?

И ны́нѣ, то́йже.

Сѣда́ленъ, гла́съ 4:

Искупи́лъ ны́ еси́ отъ кля́твы зако́нныя честно́ю Твое́ю Кро́вію, на Крестѣ́ пригвозди́вся и копіе́мъ пробо́дся, безсме́ртіе источи́лъ еси́ человѣ́комъ, Спа́се на́шъ, сла́ва Тебѣ́!

Сла́ва, и ны́нѣ, то́йже.

Ева́нгеліе 6-е, отъ Ма́рка, зача́ло 67: Во вре́мя о́но, во́ини ведо́ша Іису́са... Коне́цъ: Да ви́димъ и вѣ́ру име́мъ Ему́.

Та́же блаже́нны, поста́вимъ стихо́въ 8, гла́съ 4:

Во Ца́рствіи Твое́мъ помяни́ на́съ, Го́споди, егда́ пріи́деши, во Ца́рствіи Твое́мъ.

Блаже́ни ни́щіи ду́хомъ, я́ко тѣ́хъ е́сть Ца́рство небе́сное.

Блаже́ни пла́чущіи, я́ко тíи утѣ́шатся.

Блаже́ни кро́тціи, я́ко тíи наслѣ́дятъ зе́млю.

Блаже́ни а́лчущіи и жа́ждущіи пра́вды, я́ко тíи насы́тятся.

Дре́вомъ Ада́мъ рая́ бы́сть изселе́нъ, Дре́вомъ же Кре́стнымъ разбо́йникъ въ ра́й всели́ся. Овъ у́бо вку́шь, за́повѣдь отве́рже Сотво́ршаго; о́въ же сраспина́емь, Бо́га Тя́ исповѣ́да тая́щагося. Помяни́ и на́съ, Спа́се, во Ца́рствіи Твое́мъ!

Блаже́ни ми́лостивіи, я́ко тíи поми́ловани бу́дутъ.

Зако́ну Творца́ отъ ученика́ купи́ша беззако́нніи и, я́ко законопресту́пника, Того́ Пила́тову суди́щу предста́виша, зову́ще: распни́, въ пусты́ни си́мъ Маннода́вшаго. Мы́ же, пра́веднаго разбо́йника подража́вше, вѣ́рою зове́мъ: помяни́ и на́съ, Спа́се, во Ца́рствіи Твое́мъ.

Блаже́ни чи́стіи се́рдцемъ, я́ко тíи Бо́га у́зрятъ.

Богоубíйцъ собо́ръ, іуде́йскій язы́къ беззако́нный, къ Пила́ту неи́стовнѣ зовы́й, глаго́лаше: распни́ Христа́ непови́ннаго, Вара́вву же па́че на́мъ отпусти́. Мы́ же вѣща́имъ къ Нему́ разбо́йника благоразу́мнаго гла́съ: помяни́ и на́съ, Спа́се, во Ца́рствіи Твое́мъ!

Блаже́ни миротво́рцы, я́ко тíи сы́нове Бо́жіи нареку́тся.

Живоно́сная Твоя́ ре́бра, я́ко изъ Еде́ма исто́чникъ источа́ющая, Це́рковь Твою́, Христе́, я́ко слове́сный напая́етъ ра́й, отсю́ду раздѣля́яся, я́ко въ нача́ла, въ четы́ри Ева́нгелія, мíръ напая́я, тва́рь веселя́ и язы́ки вѣ́рно науча́я покланя́тися Ца́рствію Твоему́.

Блаже́ни изгна́ни пра́вды ра́ди, я́ко тѣ́хъ е́сть Ца́рство небе́сное.

Распя́лся еси́ мене́ ра́ди, да мнѣ́ источи́ши оставле́ніе; прободе́нъ бы́лъ еси́ въ ре́бра, да ка́пли жи́зни источи́ши ми́; гвоздьми́ пригвозди́лся еси́, да а́зъ глубино́ю Страсте́й Твои́хъ къ высотѣ́ держа́вы Твоея́ увѣря́емь, зову́ Ти́: Живода́вче Христе́, сла́ва Кресту́, Спа́се, и Стра́сти Твое́й!

Блаже́ни есте́, егда́ поно́сятъ ва́мъ, и изжену́тъ, и реку́тъ вся́къ зо́лъ глаго́лъ на вы́ лжу́ще, Мене́ ра́ди.

Распина́ему Тебѣ́, Христе́, вся́ тва́рь, ви́дящи, трепета́ше, основа́нія земли́ колеба́хуся стра́хомъ держа́вы Твоея́, свѣти́ла скрыва́хуся и церко́вная раздра́ся завѣ́са, го́ры вострепета́ша и ка́меніе разсѣ́деся, и разбо́йникъ вѣ́рный зове́тъ съ на́ми, Спа́се, е́же помяни́ во Ца́рствіи Твое́мъ!

Ра́дуйтеся и весели́теся, я́ко мзда́ ва́ша мно́га на небесѣ́хъ.

Рукописа́ніе на́ше на Крестѣ́ растерза́лъ еси́, Го́споди, и, вмѣни́вся въ ме́ртвыхъ, та́мошняго мучи́теля связа́лъ еси́, изба́вль всѣ́хъ отъ у́зъ сме́ртныхъ Воскресе́ніемъ Твои́мъ, и́мже просвѣти́хомся, Человѣколю́бче Го́споди, и вопіе́мъ Тебѣ́: помяни́ и на́съ, Спа́се, во Ца́рствіи Твое́мъ!

Сла́ва:

Отца́ и Сы́на и Ду́ха Свята́го вси́ единому́дренно, вѣ́рніи, славосло́вити досто́йно помо́лимся, Еди́ницу Божества́, въ Тріе́хъ су́щую Ѵпоста́сѣхъ, неслія́нну пребыва́ющу, про́сту, нераздѣ́льну и непристу́пну, Еюже избавля́емся о́гненнаго муче́нія.

И ны́нѣ, богоро́диченъ:

Ма́терь Твою́, Христе́, пло́тію безсѣ́менно ро́ждшую Тя́, и Дѣ́ву вои́стинну, и по рождествѣ́ пребы́вшую нетлѣ́нну, Сію́ Тебѣ́ приво́димъ въ моли́тву, Влады́ко Многоми́лостиве, прегрѣше́ній проще́нію дарова́тися всегда́ зову́щимъ: помяни́ на́съ, Спа́се, во Ца́рствіи Твое́мъ!

Проки́менъ, гла́съ 4: Раздѣли́ша ри́зы Моя́ себѣ́,* и о оде́жди Мое́й мета́ша жре́бій. Сти́хъ: Бо́же, Бо́же Мой, вонми́ Ми́, вску́ю оста́вилъ Мя́ еси́?

Ева́нгеліе 7-е, отъ Матѳе́я, зача́ло 113: Во вре́мя о́но, прише́дше во́ини... Коне́цъ: Вои́стинну Бо́жій Сы́нъ бѣ́ Се́й.

И полага́ется чте́ніе. Та́же псало́мъ 50-й.

И посе́мъ Ева́нгеліе 8-е, отъ Луки́, зача́ло 111: Во вре́мя о́но, ведя́ху со Іису́сомъ и и́на два́... Коне́цъ: Отъ Галиле́и, зря́ще си́хъ.

И а́біе пое́мъ трипѣ́снецъ, творе́ніе господи́на Космы́: ирмосы́ по два́жды, тропари́ на 12. Послѣди́ же ирмо́съ, о́ба ли́ка вку́пѣ. Акростихи́съ, или́ краегране́сіе, трипѣ́снца е́сть: Προσάββατον τε, е́же е́сть: Предсуббо́тіе же. Гла́съ 6.

Пѣ́снь 5.

[Π] Ирмо́съ: Къ Тебѣ́ у́тренюю, милосе́рдія ра́ди Себе́ истощи́вшему непрело́жно и до страсте́й безстра́стно прекло́ншемуся, Сло́ве Бо́жій: ми́ръ пода́ждь ми́, па́дшему, Человѣколю́бче.

[Ρ] Умы́вше но́ги, и предочи́стившеся та́инства причаще́ніемъ Боже́ственнаго ны́нѣ, Христе́, Твоего́, служи́теліе отъ Сіо́на на Елео́нскую го́ру вели́кую съ Тобо́ю взыдо́ша, пою́ще Тя́, Человѣколю́бче.

[Ο] Зри́те, — ре́клъ еси́, — дру́зи, не бо́йтеся; ны́нѣ бо прибли́жися ча́съ, я́ту Ми́ бы́ти и убіе́ну рука́ма беззако́нныхъ; вси́ же расточите́ся, Мене́ оста́вивше, и́хже соберу́ проповѣ́дати Мя́, Человѣколю́бца.

Конда́къ, гла́съ 8:

На́съ ра́ди Распя́таго, пріиди́те, вси́ воспои́мъ, Того́ бо ви́дѣ Марíя на дре́вѣ и глаго́лаше: а́ще и распя́тіе терпи́ши, Ты́ еси́ Сы́нъ и Бо́гъ Мо́й.

Икосъ:

Своего́ Агнца Агница зря́щи къ заколе́нію влеко́ма, послѣ́доваше Марíя просте́ртыми власы́ со инѣ́ми жена́ми, сія́ вопію́щи: ка́мо и́деши, Ча́до? чесо́ ра́ди ско́рое тече́ніе соверша́еши? еда́ другíй бра́къ па́ки е́сть въ Ка́нѣ Галиле́йстѣй, и та́мо ны́нѣ тщи́шися, да отъ воды́ и́мъ вино́ сотвори́ши? иду́ ли съ Тобо́ю, Ча́до, или́ па́че пожду́ Тебе́? Да́ждь Ми́ сло́во, Сло́ве, не молча́ мимоиди́ Мене́, Чи́сту соблюды́й Мя́, Ты́ бо еси́ Сы́нъ и Бо́гъ Мо́й.

Синакса́рь.

Стихи́ на распя́тіе:
                 Живы́й еси́, Бо́же, Ты́ и умерщвле́нный на Дре́вѣ;
                 О, мертвече́ нагíй и Бо́га Жива́го Сло́ве!

Стихи́ на сраспе́ншагося Христу́ разбо́йника:
                 Заключе́нная отве́рзе Еде́мская врата́;
                 Вложи́въ разбо́йникъ клю́чь, — е́же «помяни́ мя́!»

Во святы́й и Вели́кій пято́къ, святы́я, и спаси́тельныя, и стра́шныя Стра́сти соверша́емъ Го́спода и Бо́га Спа́са на́шего Іису́са Христа́, я́же на́съ ра́ди во́лею прія́тъ. Оплева́нія, біе́нія, зауше́нія, доса́ды, насмѣя́нія, багря́ную оде́жду, тро́сть, гу́бу, о́цетъ, гво́здія, копіе́, и по си́хъ всѣ́хъ Кре́стъ и сме́рть, — я́же вся́ въ пято́къ содѣ́яшася.

По внегда́ бо на три́десятихъ сре́бреницѣхъ отъ дру́га и ученика́ про́данъ бы́въ, предаде́ся, пре́жде ко Аннѣ отво́дится архіере́ю, и́же посыла́етъ Его́ къ Каіа́фѣ, идѣ́же оплева́нъ бы́сть и зауша́емь по лани́тѣ, ку́пно же поруга́емь и посмѣва́емь, слы́шаше: «прорцы́ на́мъ, Христе́, кто́ е́сть уда́ривый Тя́?» Та́мо же и лжесвидѣ́тели пріидо́ша оклевета́ющіи, я́ко рече́: «разори́те хра́мъ се́й, и тре́ми де́ньми воздви́гну и́». И я́ко рече́ Себе́ Сы́на Бо́жія, егда́ и архіере́й, хулы́ не терпя́, ри́зу свою́ растерза́. Утру же бы́вшу, отво́дится къ Пила́ту въ прето́ръ, и тíи не внидо́ша, глаго́летъ, да не оскверня́тся, но да ядя́тъ па́сху. Па́сху же ве́сь пра́здникъ глаго́летъ, или́ и тогда́ бы́сть, я́коже подоба́ше. Христо́съ же пре́жде еди́наго дне́ сію́ сотвори́ зако́нную па́сху, сзакла́тися хотя́ въ пято́къ.

Изше́дъ же Пила́тъ, вопроша́етъ я́, о чесо́мъ Его́ оглаго́луютъ? И, поне́же ничто́же подо́бно обрѣ́те во оглаго́ланіи, посыла́етъ Его́ къ Каіа́фѣ. Онъ же — па́ки къ Пила́ту, и́бо то́й бѣ́ на Его́ убíйство устремля́яйся. Онъ же глаго́летъ: «поими́те Его́ вы́ и распни́те, и по зако́ну ва́шему суди́те». Они́ же па́ки глаго́лютъ: «не досто́итъ на́мъ уби́ти никого́же», распя́ти Пила́та поощря́юще. Вопроша́етъ же Христа́ Пила́тъ: «а́ще ца́рь іуде́овъ е́сть?» Онъ же не исповѣ́дуетъ, но Вѣ́чный: «не бо отъ мíра сего́ Мое́ Ца́рство», глаго́летъ. Хотя́ же отрѣши́ти Его́ Пила́тъ, пе́рвѣе у́бо о́нѣмъ глаго́летъ, ни еди́ныя на Него́ вины́ благоли́чныя обрѣта́ти. Та́же еди́наго на кíйждо пра́здникъ свя́зня обы́чай отрѣша́ти предлага́етъ, — и́мже уго́денъ Вара́вва па́че Христа́ мни́тся. Пила́тъ же іуде́омъ да́руяй, би́въ Іису́са пре́жде, изво́дитъ съ во́ины, во одѣя́ніе оболче́на червле́ное, терно́вымъ же вѣнце́мъ обложе́нна, и въ десни́цу Его́ тро́сть вложи́въ, руга́ема же отъ во́инъ: «ра́дуйся! — глаго́лющихъ, — Царю́ Іуде́йскій!» Оба́че си́це ко благода́ти поруга́вся, па́ки глаго́летъ Пила́тъ: «ни еди́ну же сме́рти вину́ обрѣта́ю въ Не́мъ». Они́ же: «но мы́ Его́ уму́чимъ, глаго́люще, я́ко Себе́ имену́етъ Сы́на Бо́жія». Си́мъ же глаго́лемымъ, Іису́съ молча́ше, наро́дъ же крича́ще къ Пила́ту: «распни́, распни́ Его́!» Безче́стною бо сме́ртію обложи́ти Его́ хотя́ху, да отъ среды́ благу́ю Его́ па́мять сотворя́тъ. Пила́тъ же, а́ки бы срамля́я и́хъ, глаго́летъ: «Царя́ ли ва́шего распну́?» Они́ же не имѣ́ти глаго́лютъ и́наго царя́, но ке́саря. Поне́же бо хулу́ ре́кше, ничто́же успѣ́ша, на ке́саря возно́сятъ, да поне́ си́це неи́стовство испо́лнятъ. Глаго́лютъ бо: «вся́къ, и́же царя́ себе́ творя́й, прерѣку́етъ ке́сарю». Въ си́хъ же су́щимъ, жена́ къ Пила́ту посла́, сны́ стра́шными убоя́вшися, — «ничто́же», — глаго́лющи, — «тебѣ́ и Пра́веднику Оному; уже́ бо Его́ ра́ди мно́гая въ нощи́ пострада́хъ». И то́й, умы́вся, Кро́ве Онаго вину́ отража́етъ. Они́ же крича́ху: «Кро́вь Его́ на на́съ и на ча́да на́ша! Аще Сего́ оста́виши свобо́дна, нѣ́си дру́гъ ке́сарю». Сего́ у́бо убоя́вся Пила́тъ, а́ще и опа́сно Того́ вѣ́дый непови́нна, кре́стному осужде́нію издае́тъ, отрѣши́въ Вара́вву. Сіе́ же ви́дѣвъ Іу́да, сре́бреники пове́ргъ, отхо́дитъ и, отше́дъ, удавле́нію себе́ предаде́, на дре́вѣ обѣ́сився, послѣди́ же зѣло́ наду́вся, растерза́ется.

Во́ини у́бо, тро́стію по главѣ́ Его́ поруга́вше, обременя́ютъ Ему́ Кре́стъ. Та́же отъ Киринíи Си́мона пону́дивше, Кре́стъ понести́ задѣва́ютъ. О часѣ́ же тре́тіемъ, на Ло́бнѣмъ мѣ́стѣ бы́вше, та́мо распина́ютъ Его́, отобо́юду Тому́ и друга́я два́ разбо́йника обѣ́сивше, да и Онъ, я́ко злодѣ́й, вмѣни́тся. Ху́дости же ра́ди, раздѣле́ніе во́ини ри́замъ Его́ полага́ютъ, жре́біемъ же нешве́ную Его́ оде́жду даю́тъ, вся́кое доса́ды премно́жество дѣ́лающе. Не сія́ же то́чію, но и на Крестѣ́ су́щу руга́ющеся глаго́лаху: «уа́! разоря́яй хра́мъ и треми́ де́ньми созида́яй, спаси́ Са́мъ Себе́». И па́ки: «ины́я спасе́, Себе́ ли не мо́жетъ спасти́?» И па́ки: «а́ще Ца́рь Изра́илевъ е́сть, да сни́детъ ны́нѣ со Креста́, и вѣ́руемъ въ Него́». И у́бо а́ще и́стину глаго́лаху, подоба́ше несумнѣ́нно къ Нему́ приступи́ти, — не то́чію бо Изра́илевъ Ца́рь познава́шеся, но и всего́ мíра. Что́ бо хотя́ше, е́же помрачи́тися со́лнцу на часы́ три́, и посредѣ́ у́бо дне́? — Да всѣ́мъ бу́детъ Стра́сть явле́на. Еже земли́ трясти́ся, ка́менію разсѣда́тися, — противообра́зное іуде́овъ облича́ющему. Мно́гимъ тѣлесе́мъ воскре́снути, — во увѣре́ніе о́бщаго воскресе́нія и въ явле́ніе Стра́ждущаго си́лы. Завѣ́сѣ церко́вной раздира́тися, я́ко хра́му яря́щуся, за е́же въ не́мъ Стра́ждущему сла́виму, и мно́гимъ открыва́ющему незри́мая.

Въ тре́тій у́бо ча́съ распя́тся Христо́съ, я́коже боже́ственный Ма́рко глаго́летъ. Отъ шеста́го же часа́ до девя́таго тма́ бы́сть, егда́ и Ло́нгинъ со́тникъ пресла́вная ви́дѣвъ, и па́че со́лнца, вельми́ воззва́: «вои́стинну Сы́нъ бѣ́ Бо́жій Се́й!» Отъ разбо́йниковъ у́бо еди́нъ досажда́ше Іису́су, другíй же возбраня́ше ему́, претя́ запрети́телнѣйше, и Христа́, Сы́на Бо́жія исповѣ́дуетъ. Вѣ́рѣ же его́ Спа́съ воздая́, е́же съ Собо́ю въ раи́ обѣщава́етъ пребыва́ніе. Вся́кой у́бо доса́дѣ на Не́мъ испо́лншейся, Пила́тъ и ти́тлъ надписа́ на Не́мъ, глаго́лющь: «Іису́съ Назаряни́нъ, Ца́рь Іуде́йскій». Аще и они́ возбраня́ху не писа́ти си́це, но я́ко Онъ рече́, си́це. Пила́тъ же, «е́же писа́хъ, писа́хъ», па́ки проти́ву рече́. Та́же Спа́су возре́кшу: «жа́жду!», — иссо́пъ со о́цтомъ Ему́ растворя́ютъ. И ре́къ: «соверши́шася!» — [и] прекло́нь главу́, предаде́ ду́хъ. Всѣ́мъ же отше́дшимъ, Ма́ти Его́ предстоя́ще у Креста́, и сестра́ ея́, Марíя Клео́пова, ю́же Іа́ковъ роди́, Клео́пѣ безча́дну уме́ршу; еще́ же и Іоа́ннъ, люби́мый Ему́ учени́къ. Неразу́мніи у́бо іуде́е, ниже́ на Крестѣ́ тѣлесе́ зрѣ́ти довлѣ́еми, проси́ша Пила́та, поне́же вели́кій бѣ́ де́нь па́схи и пято́къ, да осужде́нныхъ го́лени сокруша́тся, я́ко да скорѣ́е сме́рть пріи́детъ. И о́вѣхъ у́бо го́лени сокруши́ша, еще́ бо жи́ви бя́ху. На Іису́са же прише́дше, я́ко ви́дѣша Его́ уже́ уме́рша, е́же сокруши́ти у́бо, оста́виша. Еди́нъ же нѣ́кто во́иновъ, Ло́нгинъ зово́мый, безу́мнымъ угожда́я, воздви́гъ копіе́, въ десна́я ре́бра пробода́етъ Христа́, и а́біе изы́де кро́вь и вода́. Ово у́бо, я́ко человѣ́ка, о́во же, я́ко па́че человѣ́ка. Или́, кро́вь у́бо — Боже́ственныхъ ра́ди освяще́ній прича́стія, вода́ же — креще́нія ра́ди. То́й бо двоето́чный исто́чникъ вои́стинну, е́же по на́мъ содержи́тъ та́инство. Сія́ и Іоа́ннъ, ви́дѣвъ, свидѣ́тельствова, и и́стинно е́сть свидѣ́тельство его́, я́ко предстоя́ при всѣ́хъ и ви́дя, пи́шетъ, и я́ко а́ще бы ло́жная имѣ́лъ глаго́лати, не бы́ на безче́стіе Учи́телю непщу́емая списа́лъ. Сему́, глаго́лютъ, тогда́ су́щу, сосу́домъ нѣ́кимъ отъ живото́чныхъ ре́бръ Боже́ственную и Пресвяту́ю Кро́вь прія́ти.

Си́мъ же та́ко преесте́ственно содѣ́янымъ, поне́же къ ве́черу бя́ше уже́, Іо́сифъ, и́же отъ Аримаѳе́я, исхо́дитъ, учени́къ пре́жде, я́коже про́чіи, утае́нный, и къ Пила́ту прише́дъ со дерзнове́ніемъ, я́ко зна́ему су́щу, про́ситъ тѣ́ло Іису́сово; о́нъ же взя́ти повелѣва́етъ. И у́бо съ Креста́ сіе́ сне́мъ, всеблагоговѣ́йно положи́. И уже́ прише́дшей но́щи, прихо́дитъ Никоди́мъ, нося́ смѵ́рны и ало́й нѣ́кое смѣ́шеніе, сострое́ное вре́менемъ, и плащани́цею обви́вше, я́коже обы́чай бѣ́ іуде́омъ твори́ти, бли́зу положи́ша, во изсѣ́ченномъ отъ ка́мене гро́бѣ Іо́сифовѣ, идѣ́же никто́же пре́жде лежа́, да не Христу́ воскре́сшу, ино́му воскресе́ніе напи́шутъ. Смѣше́нію же ало́я и смѵ́рны, прилѣпи́тельнымъ су́щимъ, евангели́стъ воспомяну́, — да егда́ ви́дятъ плащани́цу и суда́рь, во гро́бѣ оста́влены, не непщу́ютъ укра́дену Ему́ бы́ти: ка́ко бо свобо́дѣ толи́цей не су́щей, я́коже и отто́ргнути о́ная, си́це всажде́нная пло́ти?

Сія́ вся́ пресла́вно бы́вшая въ тогда́шнее пятка́ вре́мя, и на́мъ си́хъ всѣ́хъ па́мять твори́ти съ сокруше́ніемъ се́рдца и умиле́ніемъ богоно́сніи отцы́ повелѣ́ша.

Вѣ́домо же у́бо, я́ко въ шесты́й де́нь седми́цы, я́вѣ въ пято́къ распя́тся Госпо́дь, зане́же и въ шесты́й де́нь изнача́ла созда́тися человѣ́ку. Но и въ шесты́й ча́съ дне́ на Крестѣ́ повѣ́шенъ бы́сть, зане́ въ то́й ча́съ, я́коже глаго́лютъ, и Ада́мъ на отрече́нное дре́во ру́цѣ просте́ръ, косну́ся, и у́мре: подоба́ше бо въ о́ньже ча́съ сокруше́ну, въ то́й па́ки возсозда́тися. Въ вертогра́дѣ же — я́ко и Ада́мъ въ раи́. Го́рькое питіе́ — вкуше́ніе образова́ше. Зауше́ніе — на́шу свобо́ду явля́ше. Оплева́ніе и безче́стное обвожде́ніе — е́же о на́съ че́сть. Терно́вый вѣне́цъ — кля́твы, я́же на на́съ, отгна́ніе. Багря́ная оде́жда — за ко́жаныя ри́зы и за е́же на на́съ ца́рскую у́тварь. Гво́здіе — всеконе́чное на́шего грѣха́ недвиже́ніе. Кре́стъ — дре́во, е́же въ раи́. Пронзе́нная ре́бра — Ада́мово образова́ху ребро́, отъ него́же Ева, отъ нея́же — преступле́ніе. Копіе́ — пла́менное ору́жіе мнѣ́ отвраща́етъ. Изъ ре́бръ вода́ — о́бразъ креще́нія. Кро́вь и тро́сть — и́миже на́мъ червле́ными пи́смены, я́ко Ца́рь, дре́внее оте́чество дарова́ и подписа́.

Глаго́лется у́бо Ада́мовѣ главѣ́ та́мо лежа́ти, идѣ́же и Христо́съ — Глава́ всѣ́хъ, распя́тся. Крести́ся у́бо Христо́вою Кро́вію исте́кшею. Ло́бное же мѣ́сто глаго́лется, зане́же въ пото́пѣ восте́кшей внѣ́ земли́ Ада́мовѣ главѣ́, ко́сти то́чію носи́мѣ бы́ти, я́ко нѣ́коему чу́ду зри́мому, ю́же Соломо́нъ че́стію пра́отца, со всѣ́мъ свои́мъ во́инствомъ, ка́меніемъ мно́жайшимъ покры́. Тѣ́мже и мѣ́сто то́ отто́лѣ «Лиѳострото́нъ», сíесть «Каменопо́стланное» именова́ся. Глаго́лютъ у́бо святы́хъ изя́щніи, отъ преда́нія имѣ́ти, и самому́ Ада́му та́мо отъ а́нгела погребе́ну бы́ти. Идѣ́же у́бо тру́пъ, та́мо и Оре́лъ пріи́де — Христо́съ, Вѣ́чный Ца́рь, Но́вый Ада́мъ, ве́тхаго и дре́вомъ па́дшаго Ада́ма Дре́вомъ исцѣля́яй.

Преесте́ственнымъ и е́же о на́съ неизче́тнымъ Твои́мъ благоутро́біемъ, Христе́ Бо́же, поми́луй на́съ, ами́нь.

Пѣ́снь 8.

[Σ] Ирмо́съ: Сто́лпъ зло́бы богопроти́вныя боже́ственніи о́троцы обличи́ша, на Христа́ же шата́ющееся беззако́нныхъ собо́рище совѣ́туетъ тще́тная, уби́ти поуча́ется живо́тъ Держа́щаго дла́нію. Его́же вся́ тва́рь благослови́тъ, сла́вящи во вѣ́ки.

[Α] Отъ вѣ́ждей ученико́мъ ны́нѣ со'нъ, ре́клъ еси́, Христе́, отряси́те, въ моли́твѣ же бди́те, да не въ напа́сть вни́дете, и наипа́че, Си́моне: крѣпча́йшему бо бо́лій иску́съ. Разумѣ́й Мя́, Пе́тре, Его́же вся́ тва́рь благослови́тъ, сла́вящи во вѣ́ки.

[Β] Скве́рна сло́ва усте́нъ, никогда́же изреку́ Тебѣ́, Влады́ко, съ Тобо́ю умру́, я́ко благоразу́менъ, а́ще и вси́ отве́ргутся, — возопи́ Пе́тръ. — Ни пло́ть, ниже́ кро́вь, но Оте́цъ Тво́й откры́ ми́ Тя́, Его́же вся́ тва́рь благослови́тъ, сла́вящи во вѣ́ки.

[Β] Глубину́ прему́дрости Боже́ственныя и ра́зума, не всю́ испыта́лъ еси́, бе́здну же Мои́хъ суде́бъ не пости́глъ еси́, человѣ́че, — Госпо́дь рече́. — Пло́ть у́бо сы́й, не хвали́ся: три́жды бо отве́ржешися Мене́, Его́же вся́ тва́рь благослови́тъ, сла́вящи во вѣ́ки.

[Α] Отрица́ешися, Си́моне Пе́тре, е́же сотвори́ши ско́ро, я́коже рече́ся, и къ тебѣ́ отрокови́ца, еди́на прише́дши, устраши́тъ тя́, — Госпо́дь рече́. — Го́рцѣ прослези́въ, обря́щеши Мя́ оба́че Ми́лостива, Его́же вся́ тва́рь благослови́тъ, сла́вящи во вѣ́ки.

Пѣ́снь 9.

[Τ] Ирмо́съ: Честнѣ́йшую херуви́мъ и сла́внѣйшую безъ сравне́нія серафи́мъ, безъ истлѣ́нія Бо́га Сло́ва ро́ждшую, су́щую Богоро́дицу, Тя́ велича́емъ.

[Ο] Па́губное собо́рище богоме́рзскихъ, лука́внующихъ богоубíйцъ со́нмище, предста́, Христе́, Тебѣ́, и я́ко непра́ведника влеча́ше Зижди́теля всѣ́хъ, Его́же велича́емъ.

[Ν] Зако́на не разумѣ́юще нечести́віи, гласо́мъ проро́ческимъ поуча́ющеся вотще́, я́ко овча́ влеча́ху Тя́, всѣ́хъ Влады́ку, непра́ведно закла́ти, Его́же велича́емъ.

[Τ] Язы́комъ изда́нную Жи́знь, съ кни́жники уби́ти свяще́нницы преда́ху, уя́звлени самозави́стною зло́бою, естество́мъ Животода́вца, Его́же велича́емъ.

[Ε] Обыдо́ша, я́ко пси́ мно́зи, и уда́риша, Царю́, лани́ту Твою́ зауше́ніемъ, вопроша́ху Тя́, Тебе́ же ло́жна свидѣ́тельствоваху. И вся́ претерпѣ́въ, всѣ́хъ спа́слъ еси́.

Та́же ексапостила́рій, три́жды:

Разбо́йника благоразу́мнаго во еди́номъ часѣ́ ра́еви сподо́билъ еси́, Го́споди, и мене́ Дре́вомъ Кре́стнымъ просвѣти́ и спаси́ мя́.

Та́же Ева́нгеліе 9-е, отъ Іоа́нна, зача́ло 61: Во вре́мя о́но, стоя́ху при Крестѣ́ Іису́совѣ... Коне́цъ: Воззря́тъ На́нь, Его́же прободо́ша.

И а́біе, Вся́кое дыха́ніе.., на гла́съ 3, поста́вимъ стихи́ 4 и пое́мъ стихи́ры самогла́сны три́, повторя́юще пе́рвый:

Два́ и лука́вная сотвори́, перворожде́нный сы́нъ Мо́й, Изра́иль: Мене́ оста́ви, Исто́чника воды́ живо́тныя, и ископа́ себѣ́ кладене́цъ сокруше́нный; Мене́ на дре́вѣ распя́тъ, Вара́вву же испроси́ и отпусти́. Ужасе́ся не́бо о се́мъ и со́лнце лучи́ скры́, ты́ же, Изра́илю, не усрами́лся еси́, но сме́рти Мя́ пре́далъ еси́. Оста́ви и́мъ, Отче Святы́й, не вѣ́дятъ бо, что́ сотвори́ша.

Кíйждо у́дъ святы́я Твоея́ пло́ти безче́стіе, на́съ ра́ди, претерпѣ́: те́рніе — глава́; лице́ — оплева́нія; че́люсти — зауше́нія; уста́ — во о́цтѣ растворе́нную же́лчь вку́сомъ; ушеса́ — хуле́нія злочести́вая; плещи́ — біе́нія; и рука́ — тро́сть; всего́ тѣлесе́ — протяже́нія на Крестѣ́; чле́нове — гво́здія; и ре́бра — копіе́. Пострада́вый за ны́ и отъ страсте́й свободи́вый на́съ, снизше́дый къ на́мъ человѣколю́біемъ и вознесы́й на́съ, Всеси́льне Спа́се, поми́луй на́съ!

Распе́ншуся Ти́, Христе́, вся́ тва́рь, ви́дящи, трепета́ше, основа́нія земли́ позыба́шася стра́хомъ держа́вы Твоея́. Тебѣ́ бо возне́сшуся дне́сь, ро́дъ евре́йскій поги́бе, церко́вная завѣ́са раздра́ся на дво́е, и ме́ртвіи отъ гробо́въ воскресо́ша; со́тникъ, ви́дѣвъ чу́до, ужасе́ся. Предстоя́щи же Ма́ти Твоя́, вопія́ше, рыда́ющи ма́терски: ка́ко не возрыда́ю и утро́бы Моея́ не бію́, зря́щи Тя́ на́га, я́ко осужде́на, на Дре́вѣ ви́сяща? Распны́йся, и погребы́йся, и воскресы́й изъ ме́ртвыхъ, Го́споди, сла́ва Тебѣ́!

Сла́ва, гла́съ 6:

Совлеко́ша съ Мене́ ри́зы Моя́ и облеко́ша Мя́ въ ри́зу червле́ну, возложи́ша на главу́ Мою́ вѣне́цъ отъ те́рній и въ десну́ю Мою́ ру́ку вда́ша тро́сть, да сокрушу́ и́хъ, я́ко сосу́ды скуде́льничи.

И ны́нѣ, гла́съ то́йже:

Плещи́ Моя́ да́хъ на ра́ны, лица́ же Моего́ не отврати́хъ отъ заплева́ній, суди́щу Пила́тову предста́хъ и Кре́стъ претерпѣ́хъ за спасе́ніе мíра.

Та́же Ева́нгеліе 10-е, отъ Ма́рка, зача́ло 69: Во вре́мя о́но, пріи́де Іо́сифъ... Коне́цъ: Зря́сте, гдѣ́ Его́ полага́ху.

Та́же: Сла́ва въ вы́шнихъ Бо́гу... Свяще́нникъ же ектенію́: Испо́лнимъ у́треннюю моли́тву... И про́чее, по обы́чаю. И по возгла́сѣ: Яко Бо́гъ ми́лости...

Абіе Ева́нгеліе 11-е, отъ Іоа́нна, зача́ло 62: Во вре́мя о́но, моли́ Пила́та Іо́сифъ... Коне́цъ: Положи́ста Іису́са.

И пое́мъ стихи́ры самогла́сны, о́ба ли́ка вку́пѣ, гла́съ 1:

Вся́ тва́рь измѣня́шеся стра́хомъ, зря́щи Тя́ на Крестѣ́ ви́сима, Христе́: со́лнце омрача́шеся и земли́ основа́нія сотряса́хуся, вся́ сострада́ху Созда́вшему вся́. Во́лею на́съ ра́ди претерпѣ́вый, Го́споди, сла́ва Тебѣ́!

Гла́съ 2:

Сти́хъ: Раздѣли́ша ри́зы Моя́ себѣ́, и о оде́жди Мое́й мета́ша жре́бій.

Лю́діе злочести́віи и беззако́нніи, вску́ю поуча́ются тще́тнымъ? Вску́ю Живота́ всѣ́хъ на сме́рть осуди́ша? Ве́ліе чу́до, я́ко Созда́тель мíра въ ру́ки беззако́нныхъ предае́тся, и на Дре́во возвыша́ется Человѣколю́бецъ, да я́же во а́дѣ ю́зники свободи́тъ зову́щія: Долготерпѣли́ве Го́споди, сла́ва Тебѣ́!

Сти́хъ: Да́ша въ снѣ́дь Мою́ же́лчь и въ жа́жду Мою́ напои́ша Мя́ о́цта.

Дне́сь зря́щи Тя́, Непоро́чная Дѣ́ва, на Крестѣ́, Сло́ве, возвыша́ема, рыда́ющи ма́тернею утро́бою, уязвля́шеся се́рдцемъ го́рцѣ, и стеня́щи болѣ́зненно изъ глубины́ души́, лице́ со власы́ терза́ющи. Тѣ́мже и пе́рси бію́щи, взыва́ше жа́лостно: увы́ Мнѣ́, Боже́ственное Ча́до! увы́ Мнѣ́, Свѣ́те мíра! что́ заше́лъ еси́ отъ о́чію Мое́ю, Агнче Бо́жій? Тѣ́мже во́инства безпло́тныхъ, тре́петомъ содержи́ми бя́ху, глаго́люще: Непостижи́ме Го́споди, сла́ва Тебѣ́.

Сти́хъ: Бо́гъ же, Ца́рь на́шъ, пре́жде вѣ́ка содѣ́ла спасе́ніе посредѣ́ земли́.

На Дре́вѣ ви́дящи ви́сима, Христе́, Тебе́, всѣ́хъ Зижди́теля и Бо́га, безсѣ́менно Ро́ждшая Тя́ вопія́ше го́рько: Сы́не Мо́й! Гдѣ́ добро́та за́йде зра́ка Твоего́? Не терплю́ зрѣ́ти Тя́, непра́ведно распина́ема; потщи́ся у́бо, воста́ни, я́ко да ви́жу и Азъ Твое́ изъ ме́ртвыхъ тридне́вное Воскресе́ніе!

Сла́ва, гла́съ 8:

Го́споди, восходя́щу Ти́ на Кре́стъ, стра́хъ и тре́петъ нападе́ на тва́рь, и земли́ у́бо возбраня́лъ еси́ поглоти́ти распина́ющихъ Тя́, а́ду же повелѣва́лъ еси́ испусти́ти ю́зники на обновле́ніе человѣ́ковъ. Судіе́ живы́хъ и ме́ртвыхъ, жи́знь прише́лъ еси́ пода́ти, а не сме́рть. Человѣколю́бче, сла́ва Тебѣ́!

И ны́нѣ, гла́съ 6:

Уже́ омака́ется тро́сть изрече́нія, отъ суде́й непра́ведныхъ Іису́съ суди́мь быва́етъ и осужда́ется на Кре́стъ, и стра́ждетъ тва́рь, на Крестѣ́ ви́дящи Го́спода. Но естество́мъ тѣлесе́, мене́ ра́ди стражда́й, Благíй Го́споди, сла́ва Тебѣ́!

Та́же Ева́нгеліе 12-е, отъ Матѳе́я, зача́ло 114: Во у́трій де́нь, и́же е́сть по пятцѣ́... Коне́цъ: Зна́менавше ка́мень съ кустодíею.

Та́же: Бла́го е́сть исповѣ́датися Го́сподеви... Трисвято́е. [И] по Отче на́шъ...

Тропа́рь, гла́съ 4:

Искупи́лъ ны́ еси́ отъ кля́твы зако́нныя честно́ю Твое́ю Кро́вію, на Крестѣ́ пригвозди́вся и копіе́мъ пробо́дся, безсме́ртіе источи́лъ еси́ человѣ́комъ, Спа́се на́шъ, сла́ва Тебѣ́!

Та́же ектенія́ обы́чная. И отпу́стъ.
Пе́рвый же ча́съ не совокупля́емъ ны́нѣ, но о второ́мъ часѣ́ дне́.

Источникъ: Тріо́діонъ, сíесть трипѣ́снецъ. — Кíевъ: Въ тѵпогра́фіи Кíево-Пече́рской Успе́нской Ла́вры, 1864. — Л. 375 об. – 390.

/ Къ оглавленію раздѣла /


Наверхъ / Къ титульной страницѣ

0