Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - суббота, 18 ноября 2017 г. Сейчасъ на порталѣ посѣтителей - 21.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

ТРІОДІОНЪ, СІЕСТЬ ТРИПѢСНЕЦЪ,
Съ Бо́гомъ Святы́мъ, обдержа́й подоба́ющее ему́ послѣ́дованіе.

Слу́жба во святы́й и Вели́кій четверто́къ.

[НА ВЕЧЕРНИ,]
Во святу́ю и Вели́кую сре́ду ве́чера, во свѣти́льничное, обы́чное стихосло́віе отъ трисвята́го, безъ покло́новъ. Стихосло́вимъ же и Ко Го́споду, внегда́ скорбѣ́ти ми́.., безъ покло́новъ.
На Го́споди воззва́хъ: поста́вимъ стихо́въ 10 и пое́мъ самогла́сны, гла́съ 1:

Многоцѣ́нное мѵ́ро блудни́ца смѣси́ со слеза́ми и излія́ на пречи́стѣи но́зѣ Твои́, облобыза́ющи. Оную а́біе оправда́лъ еси́, на́мъ же проще́ніе да́руй, Пострада́вый о на́съ, и спаси́ на́съ.

Егда́ грѣ́шная приноша́ше мѵ́ро, тогда́ учени́къ соглаша́шеся пребеззако́ннымъ. Овая у́бо ра́довашеся, истоща́ющи мѵ́ро многоцѣ́нное, се́й же тща́шеся прода́ти Безцѣ́ннаго. Сія́ Влады́ку познава́ше, а се́й отъ Влады́ки разлуча́шеся. Сія́ свобожда́шеся, а Іу́да ра́бъ быва́ше врагу́. Лю́то е́сть лѣ́ность, ве́ліе покая́ніе: е́же мнѣ́ да́руй, Спа́се, пострада́вый о на́съ, и спаси́ на́съ.

О, Іу́дина окая́нства! Зря́ше блудни́цу, цѣлу́ющую стопы́, и умышля́ше ле́стію преда́нія цѣлова́ніе. Оная власы́ разрѣши́, а се́й я́ростію вяза́шеся, нося́ вмѣ́сто мѵ́ра злосмра́дную зло́бу: за́висть бо не вѣ́сть предпочита́ти поле́зное. О, Іу́дина окая́нства! Отъ него́же изба́ви, Бо́же, ду́ши на́ша.

Гла́съ 2:

Грѣ́шная тече́ къ мѵ́ру, купи́ти многоцѣ́нное мѵ́ро, е́же пома́зати Благодѣ́теля, и мѵропрода́телю вопія́ше: да́ждь ми́ мѵ́ро, да пома́жу и а́зъ Очи́стившаго вся́ моя́ грѣхи́.

Гла́съ 6:

Погруже́ная грѣхо́мъ, обрѣ́те Тя́, приста́нище спасе́нія, ви́ждь и мѵ́ра со слеза́ми растворя́ющую, Тебѣ́ вопія́ше: ви́ждь, согрѣша́ющихъ покая́нія ожида́яй. Но, Влады́ко, спаси́ мя отъ волны́ грѣхо́вныя, вели́кія ра́ди Твоея́ ми́лости.

Дне́сь Христо́съ прихо́дитъ въ до́мъ фарисе́овъ, и жена́ грѣ́шница приступи́вши къ нога́мъ, валя́шеся, вопію́щи: ви́ждь погруже́нную грѣхо́мъ, отча́янную дѣя́ній ра́ди, негнуша́емую отъ Твоея́ бла́гости, и да́ждь ми́, Го́споди, оставле́ніе злы́хъ, и спаси́ мя.

Простре́ блудни́ца власы́ Тебѣ́, Влады́цѣ, простре́ Іу́да ру́цѣ беззако́ннымъ: о́ва у́бо прія́ти оставле́ніе, о́въ же взя́ти сре́бреники. Тѣ́мже Тебѣ́ вопіе́мъ, про́даному и свобо́ждшему на́съ: Го́споди, сла́ва Тебѣ́!

Приступи́ жена́ злосмра́дная и оскверне́ная, сле́зы пролива́ющи, лю́бящи, Спа́се, страсть исповѣ́дающи: ка́ко воззрю́ къ Тебѣ́, Влады́цѣ? Са́мъ бо прише́лъ еси́ спасти́ блудни́цу. Изъ глубины́ уме́ршую мя́ воскреси́, Иже Ла́заря воздви́гнувый изъ гро́ба четверодне́вна. Пріими́ мя окая́нную, Го́споди, и спаси́ мя.

Отча́янная житія́ ра́ди и увѣ́домая нра́ва ра́ди, мѵ́ра нося́щая приступи́ Тебѣ́, вопію́щи: да не отве́ржеши мене́, блу́дную, Роди́выйся отъ Дѣ́вы; да не пре́зриши моя́ сле́зы, ра́досте а́нгеловъ; но пріими́ мя, ка́ющуюся, ю́же не отри́нулъ еси́ согрѣша́ющую, Го́споди, вели́кія ра́ди Твоея́ ми́лости.

Сла́ва, и ны́нѣ, гла́съ 8. Творе́ніе Кассіа́ны и́нокини:

Го́споди, я́же во мно́гія грѣхи́ впа́дшая жена́, Твое́ ощути́вшая Божество́, мѵроно́сицы взе́мши чинъ, рыда́ющи, мѵ́ро Тебе́ пре́жде погребе́нія прино́ситъ. — Увы́ мнѣ́, — глаго́лющи, — я́ко но́щь мнѣ́ е́сть разжже́ніе блуда́ невоздержа́нна, мра́чное же и безлу́нное раче́ніе грѣха́. Пріими́ моя́ исто́чники сле́зъ, Иже облака́ми производя́й мо́ря во́ду. Приклони́ся къ мои́мъ воздыха́ніемъ серде́чнымъ, приклони́вый небеса́, неизрече́ннымъ Твои́мъ истоща́ніемъ, да облобыжу́ пречи́стѣи Твои́ но́зѣ, и отру́ сія́ па́ки главы́ моея́ власы́, и́хже въ раи́ Ева, по полу́дни, шу́момъ у́ши огласи́вши, стра́хомъ скры́ся. Грѣхо́въ мои́хъ мно́жества и суде́бъ Твои́хъ бе́здны кто́ изслѣ́дитъ? Душеспа́сче Спа́се мо́й, да мя́, Твою́ рабу́, не пре́зриши, Иже безмѣ́рную имѣ́яй ми́лость.

Вхо́дъ со Ева́нгеліемъ. Свѣ́те ти́хій...

Проки́менъ, псало́мъ 135-й, гла́съ 4: Исповѣ́дайтеся Бо́гу небе́сному,* я́ко Бла́гъ, я́ко въ вѣ́къ ми́лость Его́. Сти́хъ: Исповѣ́дайтеся Бо́гу бого́въ, я́ко въ вѣ́къ ми́лость Его́.

Исхо́да чте́ніе. [Глава́ 2.]

Бы́сть во дни́ мно́гія о́ны: вели́къ бы́въ Моисе́й, изы́де къ бра́тіямъ свои́мъ, сыно́мъ Изра́илевымъ. Разумѣ́въ же болѣ́знь и́хъ, ви́дѣ человѣ́ка еги́птянина, бію́ща нѣ́коего евре́анина отъ бра́тіи его́, сыно́въ Изра́илевыхъ. Обозрѣ́вся же сѣ́мо и ова́мо, никого́же ви́дѣ; и порази́въ еги́птянина, скры́ его́ въ песцѣ́. Изше́дъ же во вторы́й де́нь, ви́дѣ два́ му́жа евре́анина, бію́щіяся, и глаго́ла оби́дящему: чесо́ ра́ди ты́ біе́ши и́скренняго? Онъ же рече́: кто тя поста́ви кня́зя и судію́ надъ на́ми? Еда́ уби́ти мя́ ты́ хо́щеши, и́мже о́бразомъ уби́лъ еси́ вчера́ еги́птянина? Убоя́ся же Моисе́й, и рече́: а́ще си́це явле́нъ бы́сть глаго́лъ се́й? Услы́ша же фарао́нъ глаго́лъ се́й и иска́ше уби́ти Моисе́я. Оты́де же Моисе́й отъ лица́ фарао́нова и всели́ся въ земли́ Мадіа́мстѣй. Прише́дъ же въ зе́млю Мадіа́мскую, сѣ́де при кла́дязѣ. Свяще́ннику же Мадіа́мскому бѣ́ша се́дмь дще́рей, пасу́щихъ о́вцы отца́ своего́ Іоѳо́ра. Прише́дше же, че́рпаху, до́ндеже напо́лниша коры́та, напои́ти о́вцы отца́ своего́ Іоѳо́ра. Прише́дше же па́стыріе, изгна́ша я́. Воста́въ же Моисе́й изба́ви и́хъ, и налія́ и́мъ, и напои́ о́вцы и́хъ. Пріидо́ша же къ Рагуи́лу, отцу́ своему́, о́нъ же рече́ и́мъ: что́ я́ко ускори́сте пріити́ дне́сь? Оныя же реко́ша: человѣ́къ еги́птянинъ изба́ви на́съ отъ па́стырей, и наче́рпа на́мъ, и напои́ о́вцы на́ша. Онъ же рече́ дще́ремъ свои́мъ: и гдѣ́ е́сть? и вску́ю си́це оста́висте человѣ́ка? Призови́те у́бо его́, да я́стъ хлѣ́бъ. Всели́ся же Моисе́й у человѣ́ка, и даде́ Сепфо́ру, дще́рь свою́, Моисе́ю въ жену́. Во чре́вѣ же заче́нши жена́, роди́ сы́на. И нарече́ Моисе́й и́мя ему́: Гирса́мъ, глаго́ля: я́ко пришле́цъ е́смь въ земли́ чужде́й. Еще́ же заче́нши, роди́ сы́на втора́го, и нарече́ и́мя ему́: Еліезе́ръ, глаго́ля: Бо́гъ бо отца́ моего́ помо́щникъ мо́й, и изба́ви мя́ изъ руки́ фарао́новы.

Проки́менъ, псало́мъ 137-й, гла́съ 4: Го́споди, ми́лость Твоя́ во вѣ́къ,* дѣ́лъ руку́ Твое́ю не пре́зри. Сти́хъ: Исповѣ́мся Тебѣ́, Го́споди, всѣ́мъ се́рдцемъ мои́мъ, и предъ а́нгелы воспою́ Тебѣ́.

Іова чте́ніе. [Глава́ 2.]

Бы́сть я́ко де́нь се́й, и пріидо́ша а́нгели Бо́жіи предста́ти предъ Го́сподемъ; и діа́волъ пріи́де посредѣ́ и́хъ предста́ти предъ Го́сподемъ. И рече́ Госпо́дь діа́волу: отку́ду ты́ гряде́ши? Тогда́ рече́ діа́волъ предъ Го́сподемъ: проше́дъ поднебе́сную и обше́дъ всю́ зе́млю, пріидо́хъ. И рече́ Госпо́дь къ діа́волу: вня́лъ ли еси́ у́бо (мы́слію твое́ю) рабу́ моему́ Іову? Яко нѣ́сть такова́ отъ су́щихъ на земли́: человѣ́къ незло́бивъ, и́стиненъ, непоро́ченъ, богочести́въ, удаля́яйся отъ вся́каго зла́, еще́ же придержи́тся незло́бія. Ты́ же ре́клъ еси́ имѣ́нія его́ погуби́ти вотще́. Отвѣща́въ же діа́волъ Го́сподеви, рече́: ко́жу за ко́жу, и вся́, ели́ка и́мать человѣ́къ, да́стъ за ду́шу свою́. Оба́че посли́ ру́ку Твою́ и косни́ся косте́мъ его́ и пло́ти его́, — а́ще не въ лице́ Тя́ благослови́тъ! Рече́ же Госпо́дь діа́волу: се́ предаю́ ти́ его́, то́кмо ду́шу его́ соблюди́. Изы́де же діа́волъ отъ лица́ Госпо́дня, и порази́ Іова гно́емъ лю́тымъ отъ но́гъ да́же до главы́. И взя́ (Іовъ) чре́пъ, да острога́етъ гно́й сво́й, и то́й сѣдя́ше на гно́ищи внѣ́ гра́да. Вре́мени же мно́гу мину́вшу, рече́ къ нему́ жена́ его́, глаго́лющи: доко́лѣ терпи́ши, се́ пожду́ вре́мя еще́ ма́ло, ча́ющи наде́жди спасе́нія моего́. Се́ бо потреби́ся отъ земли́ па́мять твоя́, сы́нове твои́ и дще́ри, моего́ чре́ва болѣ́зни и труды́, и́миже вотще́ труди́хся съ болѣ́зньми. Ты же самъ въ гнои́ черве́й сѣди́ши, обнощева́я внѣ безъ покро́ва; и азъ скита́ющися и служа́щи, мѣ́сто отъ мѣ́ста преходя́щи, и до́мъ отъ до́му, ожида́ющи со́лнца, когда́ за́йдетъ, да почíю отъ трудо́въ мои́хъ и отъ болѣ́зней, я́же мя́ ны́нѣ обдержа́тъ. Но рцы́ глаго́лъ нѣ́кій ко Го́споду, и умри́! Онъ же, воззрѣ́въ, рече́ къ не́й: вску́ю, я́ко еди́на отъ безу́мныхъ же́нъ, возглаго́лала еси́? Аще блага́я прія́хомъ отъ руки́ Госпо́дни, злы́хъ ли не стерпи́мъ? Во всѣ́хъ си́хъ, приключи́вшихся ему́, ничи́мже согрѣши́ Іовъ устна́ма предъ Бо́гомъ, (и не даде́ безу́мія Бо́гу).

Та́же: Да испра́вится моли́тва моя́... Ева́нгеліе отъ Матѳе́я, зача́ло 108. И про́чее послѣ́дованіе Преждеосвяще́нныхъ. И по пренесе́ніи честны́хъ Даро́въ покло́ны три́. И а́біе упраждня́ются соверше́нно въ це́ркви быва́емыя покло́ны. Въ ке́лліяхъ же да́же и до Вели́каго Пятка́ соверша́ются.


[НА ПОВЕЧЕРІИ.]
Повече́ріе же глаго́лемъ ма́лое, на не́мже пое́мъ трипѣ́снецъ господи́на Андре́я, Вели́каго четвертка́, гла́съ 6.

Пѣ́снь 4.

Ирмо́съ: Услы́ша проро́къ прише́ствіе Твое́, Го́споди, и убоя́ся, я́ко хо́щеши отъ Дѣ́вы роди́тися и человѣ́комъ яви́тися, и глаго́лаше: услы́шахъ слу́хъ Тво́й и убоя́хся, сла́ва си́лѣ Твое́й, Го́споди.

Го́рница по́стланая прія́тъ Тя́, Созда́теля, и стаи́нники, и та́мо Па́сху сконча́лъ еси́, и та́мо содѣ́лалъ еси́ та́инства; та́мо бо двѣма́ по́сланома ны́нѣ ученико́ма Твои́ма Па́сха угото́вася Тебѣ́.

Иди́те ко о́нсицѣ, — вся́ Вѣ́дый предглаго́летъ апо́столомъ, — и блаже́нъ е́сть, и́же мо́жетъ вѣ́рно прія́ти Го́спода: го́рницу у́бо се́рдце предугото́вавъ, и ве́черю — благоче́стіе.

Нра́въ сребролю́бія, и о́бразъ тво́й безу́мія испо́лнь несмы́сленный Іу́до: ввѣ́ренъ бо бы́въ еди́нъ то́кмо ковче́жцу, вся́ко не преклони́лся еси́ къ милосе́рдію, но заключи́лъ еси́ жесто́каго твоего́ се́рдца утро́бу, преда́въ Еди́наго Благоутро́бнаго.

Нра́въ богоубíйцъ прода́нію сребролю́бца смѣси́выйся: о́въ у́бо ко убіе́нію вооружи́вся, о́въ же къ сре́бреникомъ устремля́шеся; удавле́ніемъ бо тогда́ предразсуди́въ покая́ніе злѣ́, е́же жи́ти лиши́ся.

Лобыза́ніе испо́лнено льсти́, е́же — ра́дуйся, — со ору́жіемъ, льсти́вый Іу́до; язы́комъ у́бо провѣщава́еши я́же къ соедине́нію, нра́вомъ же помава́еши къ разстоя́нію: преда́ти бо беззако́нникомъ Благодѣ́теля ле́стнѣ поучи́лся еси́.

Лобыза́еши и продае́ши, Іу́до; цѣлу́еши — и не стыди́шися, ле́стію притекíй. Кто́, ненави́дя, лобыза́етъ, треокая́нне? Кто́, любя́, продае́тъ на цѣнѣ́? Лобыза́ніе твоего́ безсту́днаго злосовѣ́тія облича́етъ произволе́ніе.

Сла́ва, [тро́иченъ]: Нераздѣ́льное Существо́мъ, несли́тное Ли́цы, богосло́влю Тя́, Тро́ическое Еди́но Божество́, я́ко единоца́рственное и сопресто́льное. Вопію́ Ти пѣ́снь вели́кую, въ вы́шнихъ трегу́бо пѣсносло́вимую.

И ны́нѣ, богоро́диченъ: Зача́тіе — па́че сло́ва, рождество́ Твое́ — па́че естества́, Богороди́тельнице. Ово у́бо — отъ Ду́ха безъ сѣ́мене; о́во же — зако́новъ естества́ тая́щееся, я́ко нетлѣ́нно и па́че естества́ вся́каго рожде́нія: Бо́гъ бо ражда́емое.

[Ирмо́съ: Услы́ша проро́къ прише́ствіе Твое́, Го́споди, и убоя́ся, я́ко хо́щеши отъ Дѣ́вы роди́тися и человѣ́комъ яви́тися, и глаго́лаше: услы́шахъ слу́хъ Тво́й и убоя́хся, сла́ва си́лѣ Твое́й, Го́споди.]

[Го́споди, поми́луй, три́жды. Сла́ва, и ны́нѣ.]
Сѣда́ленъ, гла́съ 4. Подо́бенъ: Яви́лся еси́ дне́сь.

Яды́й Влады́ко со ученики́ Твои́ми, та́инственно яви́лъ еси́ всесвято́е Твое́ заколе́ніе, и́мже тли́ изба́вихомся, честна́я Твоя́ почита́ющіи страда́нія.

Пѣ́снь 8.

Ирмо́съ: Его́же во́инства небе́сная сла́вятъ, и трепе́щутъ херуви́ми и серафи́ми, вся́ко дыха́ніе и тва́рь, по́йте, благослови́те и превозноси́те во вся́ вѣ́ки.

Зако́нное сконча́въ повелѣ́ніе, скрижа́ли зако́нныя Написа́вый въ Сина́и, снѣде́ у́бо Па́сху дре́внюю и сѣно́вную, бы́сть же Па́сха та́йная и живоже́ртвенная.

Отъ вѣ́ка сокрове́нную, Христе́, прему́дрость тайноводя́, показа́лъ еси́ ку́пно всѣ́мъ апо́столомъ, Спа́се, на ве́чери, ю́же Це́рквамъ преда́ша богоно́сніи.

Еди́нъ отъ ва́съ ле́стію преда́стъ Мя́, евре́емъ прода́въ въ но́щь сію́, — сіе́ Христо́съ возопи́въ, смуща́ше дру́ги; тогда́ еди́нъ ко еди́ному, недоумѣва́яся, колеба́шеся.

Смири́вся на́съ ра́ди, Бога́тый, отъ ве́чери воста́въ, ле́нтій пріе́мъ, си́мъ препоя́сался еси́, и прекло́нь вы́ю, омы́лъ еси́ но́ги ученико́въ и преда́теля.

Па́че ума́ и неизрече́нна ра́зума высотѣ́ Твое́й, Іису́се, кто́ не удиви́тся! Яко бре́нію предста́лъ еси́, Содѣ́телю вся́ческихъ, омыва́я у́бо но́ги, отира́я же и ле́нтіемъ.

Учени́къ, его́же любля́ше Госпо́дь, на пе́рси возле́гъ, рече́ къ Нему́: кто́ е́сть предая́й Тя́? Христо́съ же ко о́ному: се́й, вложи́вый въ соли́ло ны́нѣ ру́ку.

Учени́къ, хлѣ́бъ пріе́мый, по хлѣ́бѣ отлуча́ется, прода́нію поуча́яйся, тече́тъ ко іуде́емъ, глаго́летъ беззако́ннымъ: что́ мнѣ́ хо́щете да́ти, и а́зъ Его́ ва́мъ преда́мъ?

Благослови́мъ Отца́, и Сы́на, и Свята́го Ду́ха, Го́спода.

[Тро́иченъ:] Еди́наго Бо́га по Существу́ чту́, Три́ Ѵпоста́си пою́ опредѣли́тельнѣ, и́ныя, но не и́наковыя, поне́же Божество́ Еди́но, въ Тріе́хъ Ли́цехъ, и́бо Оте́цъ, и Сы́нъ, и Боже́ственный Ду́хъ.

И ны́нѣ, богоро́диченъ: Изба́ви на́съ, Іису́се, Спа́се на́шъ, отъ ле́сти лука́ваго и напа́сти. Пріими́ Богоро́дицу, моля́щуюся непреста́нно: Ма́ти бо е́сть и мо́жетъ Тя́ умоли́ти.

Хва́лимъ, благослови́мъ, [покланя́емся Го́сподеви, пою́ще и превознося́ще во вся́ вѣ́ки].

И па́ки ирмо́съ: Его́же во́инства небе́сная [сла́вятъ, и трепе́щутъ херуви́ми и серафи́ми, вся́ко дыха́ніе и тва́рь, по́йте, благослови́те и превозноси́те во вся́ вѣ́ки.]

И покло́нъ.

Пѣ́снь 9.

Ирмо́съ: Безсѣ́меннаго зача́тія рождество́ несказа́нное, Ма́тере Безму́жныя нетлѣ́ненъ Пло́дъ: Бо́жіе бо рожде́ніе обновля́етъ естества́. Тѣ́мже Тя́ вси́ ро́ди, я́ко Богоневѣ́стную Ма́терь, правосла́вно велича́емъ.

Вели́кое та́инство Твоего́ вочеловѣ́ченія, на ве́чери совозлежа́щу Тебѣ́ ученико́мъ Твои́мъ, Человѣколю́бче, откры́въ, ре́клъ еси́: яди́те Хлѣ́бъ живо́тный вѣ́рою, пíйте и Кро́вь, излія́нную отъ Богоре́бреннаго заколе́нія.

Сѣ́нь небе́сная яви́ся го́рница, идѣ́же Па́сху Христо́съ соверши́, ве́черя безкро́вная и слове́сная слу́жба; трапе́за же та́мо соверше́нныхъ Та́инъ — мы́сленный же́ртвенникъ.

Па́сха Христо́съ е́сть вели́кая и всечестна́я, снѣде́нъ бы́въ, я́ко хлѣ́бъ, закла́нъ же, я́ко овча́: То́й бо вознесе́ся о на́съ Же́ртва. Того́ Тѣ́ла благоче́стно и Того́ Кро́ве вси́ та́йно причаща́емся.

Хлѣ́бъ благослови́въ, Хлѣ́бъ сы́й Небе́сный, благодари́въ Отцу́ Роди́телю, пріе́мый, и ча́шу ученико́мъ дава́лъ еси́: пріими́те, яди́те, — вопія́, — сіе́ е́сть Тѣ́ло Мое́ и Кро́вь нетлѣ́нныя жи́зни.

Ами́нь, — глаго́ля, рече́ ро́ждіямъ Лоза́, апо́столомъ — Христо́съ Истина, — отсе́лѣ не и́мамъ пи́ти отъ лозы́ питіе́, до́ндеже пію́ е́ но́вое во сла́вѣ Отца́ Моего́ съ ва́ми, наслѣ́дники Мои́ми.

Продае́ши на три́десятихъ сре́бреницѣхъ Го́спода и не помышля́еши, Іу́до беззако́нный, Ве́чери та́инство или́ честно́е умове́ніе. О, ка́ко попо́лзся паде́ніемъ, въ коне́цъ свѣ́та прише́лъ еси́, удавле́ніе облобыза́въ!

Ру́цѣ просте́рлъ еси́, и́миже хлѣ́бъ прія́лъ еси́ нетлѣ́нія, прія́ти сре́бреники; уста́ къ цѣлова́нію принося́ льсти́вно, и́миже Тѣ́ло Христо́во и Кро́вь прія́лъ еси́; но, — го́ре тебѣ́! — я́коже рече́ Христо́съ.

Христо́съ учреди́ мíръ, небе́сный и Боже́ственный Хлѣ́бъ. Пріиди́те у́бо, христолю́бцы, бре́нными устна́ми, чи́стыми же сердцы́, пріи́мемъ вѣ́рно жре́мую Па́сху, въ на́съ священнодѣ́йствуемую.

Сла́ва, [тро́иченъ]: Отца́ просла́вимъ, Сы́на превознесе́мъ, Боже́ственному Ду́ху вѣ́рно поклони́мся: Тро́ицѣ Нераздѣ́льнѣй, Еди́ницѣ по Существу́, я́ко Свѣ́ту и Свѣ́томъ, Животу́ и Живото́мъ, животворя́щему и просвѣща́ющему концы́.

И ны́нѣ, богоро́диченъ: Черто́гъ небе́сный и Невѣ́ста Приснодѣ́ва, еди́на яви́лася еси́, Бо́га носи́вши, ро́ждши же непрело́жно, изъ Тебе́ воплоще́нна. Тѣ́мже Тя́ вси́ ро́ди, я́ко Богоневѣ́стную Ма́терь, правосла́вно велича́емъ.

И па́ки ирмо́съ: Безсѣ́меннаго зача́тія рождество́ несказа́нное, Ма́тере Безму́жныя нетлѣ́ненъ Пло́дъ: Бо́жіе бо рожде́ніе обновля́етъ естества́. Тѣ́мже Тя́ вси́ ро́ди, я́ко Богоневѣ́стную Ма́терь, правосла́вно велича́емъ.

И про́чее повече́рія ма́лаго, по обы́чаю. И отпу́стъ, и твори́мъ покло́ны три́, вси́ ра́вно ко́сно. И бы́вшей моли́твѣ отъ предстоя́теля, отхо́димъ въ ке́лліи своя́.

[Зри́:] Вѣ́домо же бу́ди, я́ко отъ сего́ свята́го дне́, полу́нощница не пое́тся въ це́ркви, до седми́цы Ѳомины́.


[НА УТРЕНИ,]

Во святы́й и Вели́кій четверто́къ на у́трени, кле́плетъ параекклисіа́рхъ въ седмы́й ча́съ но́щи, и собра́вшимся на́мъ въ це́рковь, и сотво́ршу свяще́ннику нача́ло: Благослове́нъ Бо́гъ на́шъ.., начина́емъ а́біе, по обы́чаю. Та́же шестопса́лміе. По исполне́ніи шестопса́лмія,

Аллилу́ія.., на гла́съ 8. И тропа́рь гла́съ 8, три́жды:

Егда́ сла́вніи ученицы́ на умове́ніи Ве́чери просвѣща́хуся, тогда́ Іу́да злочести́вый сребролю́біемъ неду́говавъ, омрача́шеся, и беззако́ннымъ судія́мъ Тебе́, Пра́веднаго Судію́, предае́тъ. Ви́ждь, имѣ́ній рачи́телю, си́хъ ра́ди удавле́ніе употреби́вша! Бѣжи́ несы́тыя души́, Учи́телю такова́я дерзну́вшія. Иже о всѣ́хъ Благíй, Го́споди, сла́ва Тебѣ́!

Та́же, Ева́нгеліе отъ Луки́ зача́ло 108-е, безъ присту́пки: Во вре́мя о́но, приближа́шеся пра́здникъ опрѣсно́къ... Коне́цъ въ зача́лѣ 109-мъ: По Не́мъ же идо́ша ученицы́ Его́. И псало́мъ 50-й. Моли́твы же: Спаси́, Бо́же, лю́ди Твоя́.., не глаго́лемъ. И начина́емъ кано́нъ, творе́ніе господи́на Космы́, гла́съ 6: ирмосы́ по два́жды, тропари́ же на 6.

Кано́нъ, его́же краестро́чіе: Τῇ μακρᾷ πέμπτῃ μακρὸν ὕμνον ἐξάδω, е́же е́сть: Въ Вели́кій четверто́къ до́лгую пѣ́снь пою́.
Пѣ́снь 1.

[Τ] Ирмо́съ: Сѣче́ное сѣче́тся мо́ре Чермно́е, волнопита́емая же изсуша́ется глубина́, та́яжде ку́пно безору́жнымъ бы́вши проходи́ма, и всеору́жнымъ гро́бъ. Пѣ́снь же богокра́сная воспѣва́шеся: сла́вно просла́вися Христо́съ, Бо́гъ на́шъ.

[Η] Всевино́вная и пода́тельная жи́зни, безмѣ́рная Му́дрость Бо́жія, созда́ хра́мъ Себѣ́ отъ Чи́стыя Неискусому́жныя Ма́тере: въ хра́мъ бо тѣле́сно оболкíйся, сла́вно просла́вися Христо́съ, Бо́гъ на́шъ.

[Μ] Тайноводя́щи дру́ги Своя́, душепита́тельную уготовля́етъ Трапе́зу, безсме́ртія же вои́стинну Му́дрость Бо́жія растворя́етъ Ча́шу вѣ́рнымъ. Присту́пимъ благоче́стно и возопіи́мъ: сла́вно просла́вися Христо́съ, Бо́гъ на́шъ.

[Α] Услы́шимъ вси́, вѣ́рніи, созыва́ющую высо́кимъ проповѣ́даніемъ Несозда́нную и Есте́ственную Прему́дрость Бо́жію, вопіе́тъ бо: вкуси́те, и разумѣ́вше, я́ко Христо́съ Азъ, возопíйте: сла́вно просла́вися Христо́съ, Бо́гъ на́шъ.

Послѣди́ же па́ки ирмо́съ, о́ба ли́ка вку́пѣ.

Пѣ́снь 3.

[Κ] Ирмо́съ: Госпо́дь, Сы́й, всѣ́хъ и Зижди́тель Бо́гъ, созда́нное, Безстра́стный, обнища́въ, Себѣ́ соедини́, и Па́сха, за я́же хотя́ше умре́ти, Са́мъ Сы́й, Себе́ предпожре́: яди́те, — вопія́, — Тѣ́ло Мое́ и вѣ́рою утверди́теся.

[Ρ] Изба́вительною всего́ ро́да человѣ́ча, Твое́ю, Бла́же, Твоя́ ученики́ напои́лъ еси́ весе́лія Ча́шею, напо́лнивъ ю́, Са́мъ бо Себе́ священнодѣ́йствуеши, — пíйте, — вопія́, — Кро́вь Мою́ и вѣ́рою утверди́теся.

[Α] Безу́мный мужъ, и́же въ ва́съ преда́тель, — ученико́мъ Твои́мъ предре́клъ еси́, Незло́биве, — не уразумѣ́етъ си́хъ, и то́й, несмы́сленъ сы́й, не и́мать разумѣ́ти. Оба́че во Мнѣ́ пребу́дите и вѣ́рою утверди́теся.

Сѣда́ленъ, гла́съ 1. Подо́бенъ: Гро́бъ Тво́й.

Езе́ра, и исто́чники, и моря́ Сотвори́вый, смире́нію на́съ наказу́я изря́дному, ле́нтіемъ опоя́сався, ученико́въ но́ги умы́, смиря́яся премно́жествомъ благоутро́бія и возвыша́я на́съ отъ про́пастей зло́бы, еди́нъ Человѣколю́бецъ.

Сла́ва, гла́съ 3. Подо́бенъ: Боже́ственныя вѣ́ры.

Смиря́яся за благоутро́біе, но́ги умы́лъ еси́ ученико́въ Твои́хъ, къ тече́нію Боже́ственному сія́ напра́вилъ еси́; не повину́яся же Пе́тръ умы́тися, а́біе Боже́ственному повину́ется повелѣ́нію, омыва́емь, и Тебѣ́ прилѣ́жно моля́ся, дарова́ти на́мъ ве́лію ми́лость.

И ны́нѣ, гла́съ 4. Подо́бенъ: Яви́лся еси́ дне́сь.

Яды́й, Влады́ко, со ученики́ Твои́ми, та́инственно яви́лъ еси́ всесвято́е Твое́ заколе́ніе, и́мже тли́ изба́вихомся, честна́я Твоя́ почита́ющіи страда́нія.

Пѣ́снь 4.

[Π] Ирмо́съ: Прови́дѣвъ проро́къ та́йну Твою́ неизрече́нную, Христе́, провозгласи́: положи́лъ еси́ тве́рдую любо́вь крѣ́пости, Отче Ще́дрый, Единоро́днаго бо Сы́на, Благíй, очище́ніе въ мíръ посла́лъ еси́.

[Ε] На Стра́сть, всѣ́мъ су́щимъ изъ Ада́ма источи́вшую безстра́стіе, Христе́, гряды́й, друго́мъ Твои́мъ ре́клъ еси́: съ ва́ми Па́схи сея́ причасти́тися возжела́хъ; Единоро́днаго бо Мя́ очище́ніе Оте́цъ въ мíръ посла́лъ е́сть.

[Μ] Причаща́яся Ча́ши, ученико́мъ вопія́лъ еси́, Безсме́ртне: плода́ ло́знаго ктому́ не пію́ про́чее, съ ва́ми живя́; Единоро́днаго бо Мя́ очище́ніе Оте́цъ въ мíръ посла́лъ е́сть.

[Π] Питіе́ но́вое па́че сло́ва, Азъ глаго́лю, во Ца́рствіи Мое́мъ, — Христо́съ друго́мъ, — пію́, я́коже бо Бо́гъ съ ва́ми бо́ги бу́ду, — ре́клъ еси́, — Единоро́днаго бо Мя́ очище́ніе Оте́цъ въ мíръ посла́лъ е́сть.

Пѣ́снь 5.

[Τ] Ирмо́съ: Сою́зомъ любве́ связу́еми, апо́столи, влады́чествующему всѣ́ми себе́ Христу́ возло́жше, кра́сны но́ги очища́ху, благовѣству́юще всѣ́мъ ми́ръ.

[Η] Неодержи́мую держа́щая и превы́спреннюю, на возду́сѣ, во́ду, бе́здны обуздова́ющая и моря́ востязу́ющая Бо́жія Прему́дрость, во́ду во умыва́льницу влива́етъ, но́ги же омыва́етъ рабо́въ Влады́ка.

[Μ] Ученико́мъ показу́етъ смире́нія о́бразъ Влады́ка, о́блаки облага́яй не́бо, препоясу́ется ле́нтіемъ и преклоня́етъ колѣ́на, рабо́мъ омы́ти но́ги, въ Его́же руцѣ́ дыха́ніе всѣ́хъ су́щихъ.

Пѣ́снь 6.

[Α] Ирмо́съ: Бе́здна послѣ́дняя грѣхо́въ обы́де мя́, и, волне́нія не ктому́ терпя́, я́ко Іо́на Влады́цѣ, вопію́ Ти: отъ тли́ мя возведи́.

[Κ] Го́спода глаша́ете Мя́, о ученицы́, и Учи́теля: е́смь бо, — Спа́се, вопія́лъ еси́. — Тѣ́мже подража́йте о́бразъ, его́же во Мнѣ́ ви́десте.

[Ρ] Скве́рны кто́ не имѣ́я, омы́ти не тре́буетъ но́гъ; чи́сти же, о ученицы́ вы́, но не вси́: мгнове́ніемъ бо безчи́нно еди́нъ отъ ва́съ неи́стовствуетъ.

Конда́къ, гла́съ 2. Подо́бенъ: Вы́шнихъ ища́.

Хлѣ́бъ пріе́мь въ ру́цѣ преда́тель, сокрове́нно ты́я простира́етъ, и пріе́млетъ цѣ́ну Созда́вшаго Свои́ма рука́ма человѣ́ка, и неиспра́вленъ пребы́сть Іу́да, ра́бъ и льсте́цъ.

Икосъ:

Та́йной трапе́зѣ, въ стра́сѣ прибли́жившеся вси́, чи́стыми душа́ми Хлѣ́бъ пріи́мемъ, спребыва́юще Влады́цѣ, да ви́димъ, ка́ко умыва́етъ но́ги ученико́въ, и сотвори́мъ, я́коже ви́димъ, дру́гъ дру́гу покаря́ющеся и дру́гъ дру́гу но́зѣ умыва́юще. Христо́съ бо та́ко повелѣ́ Свои́мъ ученико́мъ, предре́къ та́ко твори́ти, но не услы́ша Іу́да, ра́бъ и льсте́цъ.

Синакса́рь:

Стихи́ во свяще́нное умове́ніе:
                 Умыва́етъ ученико́въ въ ве́черъ Бо́гъ но́ги,
                 Его́же нога́ попира́я бѣ́, во Еде́мѣ преще́ніе дре́вле.

На Та́инственную Ве́черю стихи́:
                 Сугу́бая ве́черя: па́сху бо зако́на но́ситъ,
                 И Па́сху но́вую — Кро́вь [и] Тѣ́ло Влады́чнее.

На преесте́ственную моли́тву стихи́:
                 Моли́тва и страши́лище — труды́ крове́й,
                 Христе́, лицу́ я́вѣ моля́ся,
                 Сме́рть, врага́ прельща́я въ си́хъ.

На преда́тельство стихи́:
                 Что́ тре́бѣ ноже́й? Что́ древе́съ людоле́стцы,
                 На хотя́щаго умре́ти во избавле́ніе мíра?

Во святы́й и Вели́кій четверто́къ, и́же вся́ до́брѣ счини́вшіи боже́ственніи отцы́, дру́гъ другопріима́тельно отъ боже́ственныхъ же апо́столъ, и Свяще́нныхъ и Боже́ственныхъ Ева́нгелій, преда́ша на́мъ четы́ре нѣ́кая пра́здновати: свяще́нное умове́ніе; Та́йную ве́черю, преда́ніе я́вѣ е́же по на́мъ стра́шныхъ Та́инъ; преесте́ственную моли́тву; и са́мое то преда́тельство.

Поне́же бо евре́йская фа́ска по пятцѣ́ жре́тися имя́ше, бя́ше же у́бо прикла́дно, образова́нію послѣ́дствовати и и́стинѣ, въ то́мъ я́вѣ и е́же по на́мъ Па́сцѣ жре́тися — Христу́, предвари́въ Госпо́дь на́шъ Іису́съ Христо́съ, я́коже боже́ственніи отцы́ глаго́лютъ, дѣ́йствуетъ ту́ю со ученики́ въ ве́черъ четвертка́. То́й бо ве́черъ и пято́къ ве́сь, еди́нъ де́нь у евре́й вмѣня́ется, — си́це бо они́ чи́слятъ нощеде́нство глаго́люще. Дѣ́йствова у́бо сію́ и тогда́ (я́коже нѣ́цыи рѣ́ша) со ученики́ по зако́ну, и́хже еди́нъ е́сть и боже́ственный Златоу́стъ. Пе́рвое, про́сто стоя́ще и опоя́сани, въ сапоги́ обуве́ни, жезлы́ подпира́ющеся, и и́на ели́ка зако́нъ повелѣва́етъ, — да не законопресту́пенъ вознепщу́ется. Сія́ бо Зеведе́й угото́ва — се́й бо скуде́ль нося́й воды́, я́коже вели́кій глаго́летъ Аѳана́сій, а́ще и́ніи и́нако о се́мъ рѣ́ша. Пото́мъ же ученико́мъ соверше́ннѣйшая показу́я, и е́же по на́мъ Па́схи та́инство предае́тъ на го́рницѣ, уже́ наше́дшей но́щи. Ве́чери бо, глаго́летъ, бы́вшей, возлеже́ со двѣмана́десять. Зри́ же, я́ко не сіе́ бя́ше зако́нная па́сха, — ве́черя бо и возлежа́ніе, и хлѣ́бъ, и вода́, — та́мо же вся́ печена́ огне́мъ, и безква́сна. Пре́жде же нача́тія е́же вечеря́ти, [си́це бо глаго́летъ боже́ственный Златоу́стъ] отъ ве́чери востае́тъ, и полага́етъ ни́зу ри́зы, и во́ду во умыва́льницу влива́етъ, Са́мъ самодѣ́йствуяй вся́, вку́пѣ у́бо Іу́ду усрамля́я, вку́пѣ же и други́мъ ученико́мъ воспомина́я, е́же старѣ́йшинства не иска́ти. Якоже и по умове́ніи наказу́етъ, глаго́ля: хотя́й бы́ти пе́рвый, да бу́детъ всѣ́хъ послѣ́дній, Самого́ Себе́ положи́въ во указа́ніе. Явля́ется же, я́ко пре́жде всѣ́хъ Іу́ду умы́ Христо́съ, безсту́днѣ предсѣ́дша; послѣди́ же къ Петру́ прихо́дитъ, се́й же, те́пльшій ины́хъ сы́й, Учи́телю возбраня́етъ, и оставля́етъ па́ки зѣ́льнѣе. Умы́въ у́бо и́хъ но́ги и возвыше́ніе пресла́вное смире́ніемъ показа́въ, взе́мъ ри́зы па́ки и возле́гъ, наказу́етъ и́хъ люби́ти дру́гъ дру́га и старѣ́йшинства не иска́ти. Яду́щимъ же и́мъ, и о преда́тельствѣ вво́дитъ нача́ло. Мяту́щимся же о словеси́ ученико́мъ, глаго́летъ Іису́съ Іоа́нну еди́ному та́йно: ему́же Азъ омочи́въ хлѣ́бъ пода́мъ, то́й е́сть предая́й Мя́. Аще бо бы́ вѣ́далъ Пе́тръ сло́во, а́ки сы́й ины́хъ те́пльшій, Іу́ду уби́лъ бы бя́ше. И па́ки: омочи́вый со Мно́ю въ соли́ло ру́ку, я́коже обоя́ бы́ша. Та́же ма́ло что́ оста́вль, взе́мъ хлѣ́бъ, глаго́летъ: пріими́те, яди́те; и ча́шу подо́бнѣ: пíйте отъ нея́ вси́, ре́къ, сія́ е́сть Кро́вь Моя́ Но́ваго Завѣ́та; сіе́ твори́те въ Мое́ воспомина́ніе. Оба́че и Са́мъ сіе́ творя́, ядя́ше и пія́ше съ ни́ми. Зри́ же, я́ко хлѣ́бъ глаго́летъ Тѣ́ло Свое́, а не опрѣсно́къ, да постыдя́тся у́бо и́же же́ртвѣ опрѣсно́къ принося́щіи. По хлѣ́бѣ же вни́де во Іу́ду сатана́, — искуша́яй бо его́ пре́жде, ны́нѣ всеконе́чно въ него́ всели́ся. И изше́дъ, глаго́летъ: сложе́ніе положи́ архіере́емъ, да преда́стъ Его́ и́мъ на три́десятихъ сре́бреницѣхъ.

Ученицы́ же по ве́чери изыдо́ша на го́ру Елео́нскую, въ нѣ́кое село́, глаго́лемое Геѳсимани́. По мно́зѣ же глаго́летъ и́мъ Іису́съ: вы́ вси́ соблазните́ся о Мнѣ́ въ нощи́ се́й. Пе́тръ же рече́: а́ще и вси́, а́зъ не отве́ргуся Тебе́. Бя́ше же по́здѣ, си́рѣчь глубоконо́щіе. Онъ же глаго́ла: пре́жде да́же не возгласи́тъ пѣ́тель два́щи, отве́ржешися Мене́ три́жды. Еже и бы́сть, боя́знію безмѣ́рною Петру́ я́ту бы́вшу, Бо́гу немощно́е показу́ющу естества́, и ку́пно поне́же вселе́нную ему́ вручи́, — да отъ своего́ естества́ удобоводи́тельное разумѣ́въ, ми́лостивенъ бу́детъ къ согрѣша́ющимъ. Оба́че, трикра́тное Петро́во отверже́ніе, всѣ́хъ человѣ́ковъ грѣ́хъ къ Бо́гу изобразова́ше: пе́рвое — за́повѣдь, ю́же преступи́ Ада́мъ; второ́е — пи́саннаго зако́на преступле́ніе; тре́тіе же — са́мое воплоще́ніе Сло́ва. Еже па́ки послѣди́ Спа́съ трегу́бымъ покая́ніемъ исцѣли́, за е́же, — Пе́тре, лю́биши ли Мя́, — три́жды изрещи́.

По си́хъ же глаго́летъ ученико́мъ, (человѣ́ческое показу́я, — я́ко стра́шна всѣ́мъ сме́рть:) приско́рбна е́сть душа́ Моя́ да́же до сме́рти. И, преше́дъ я́ко ка́мене верже́ніе, помоли́ся трикра́ты, ре́къ: Отче Мо́й! Аще не возмо́жетъ ча́ша сія́ прейти́ отъ Мене́, а́ще ю́ не пію́, да бу́детъ во́ля Твоя́! И па́ки: Отче, а́ще мо́щно, да ми́мо и́детъ отъ Мене́ ча́ша сія́. Ку́пно у́бо я́ко человѣ́къ сіе́ глаго́ля, ку́пно же и діа́вола преходя́ хи́тростно, я́ко да непщу́я и Онаго человѣ́ка бы́ти, за е́же не́гли боя́тися, сме́рти ра́ди кре́стныя не пресѣче́тъ та́инства. Возвра́щся же и обрѣ́тъ ученики́ сно́мъ погруже́ны, къ Петру́ обраща́ется, си́це глаго́ля: ни еди́наго ли часа́ возмого́сте побдѣ́ти со Мно́ю? — си́рѣчь: ты́, глаго́ляй да́же и до сме́рти подвиза́тися, си́це со́нствуеши съ про́чими.

Прише́дъ же обо́нполъ пото́ка Ке́дрскаго, идѣ́же бѣ́ вертогра́дъ, водвори́ся та́мо со ученики́ Свои́ми. Ча́сто же та́мо приходи́ти обы́чай имѣ́яше, тѣ́мъ и Іу́да вѣ́дяше мѣ́сто, и́же нѣ́кихъ отъ во́инъ взе́мъ, и наро́ду послѣ́дующу, пріи́де на Іису́са, да́въ и́мъ лобза́нія зна́меніе. Сіе́ же рече́, зане́же мно́гажды удержа́нъ бы́въ, неявле́нъ отъ среды́ и́хъ прохожда́ше; я́коже и здѣ́ Са́мъ Христо́съ пре́жде исхо́дитъ къ ни́мъ, глаго́ля: кого́ и́щете? — они́ же Его́ и еще́ не познава́ху, не бо́ но́щь претыка́нія бя́ше, свѣти́ла бо бѣ́ша, глаго́летъ, и свѣщи́ горя́ща, и стра́хомъ па́дше отлучи́шася; и па́ки прише́дшимъ, Са́мъ отвѣщава́ше. Іу́дѣ же сотво́ршу сложе́ніе, Христо́съ глаго́летъ: дру́же, на не́мже еси́, си́рѣчь, на не́же прише́лъ еси́, Іу́до, благовре́менно е́сть. И па́ки глаго́летъ: я́ко на разбо́йника ли изыдо́сте со ору́жіемъ и древесы́ я́ти Мя́? Въ нощи́ же пріидо́ша, да не нѣ́кая молва́ отъ наро́да бу́детъ. Тогда́ те́плѣйшій — Пе́тръ извле́къ но́жъ, отъ ве́чери бо бя́ху къ сицевы́мъ угото́влени, архіере́ева раба́, Ма́лха и́менемъ, порази́въ, десно́е у́хо отсѣче́. Вѣ́дяше же Іису́съ, я́ко архіере́е реку́тъ, — не до́брѣ зако́нъ слы́шаше и уча́ше, — возбраня́етъ у́бо Петру́ Христо́съ, — я́ко не добро́ е́сть послу́шнику су́щу духо́внаго Му́жа, меча́ употребля́ти, — Ма́лхово же у́хо исцѣля́етъ. Емше же у́бо Іису́са, свя́зана приво́дятъ на дво́ръ архіере́я Анны, и́же бѣ́ те́сть Каіа́фы. Та́мо бо бя́ху вси́ со́брани на Христа́ глася́щіи, фарисе́е и кни́жницы. Здѣ́ я́же на Петра́ отъ отрокови́цы, отверже́ніе его́ быва́етъ, и но́щи посредѣ́ ижди́вшейся, пѣ́тель возгласи́ тре́тіе; о́нъ же помяну́въ, воспла́кася го́рько. И вре́мени уже́ ко у́тру прише́дшу, отъ Анны ко архіере́ю Каіа́фѣ Христа́ приво́дятъ, идѣ́же и оплева́ніе прія́тъ, и лжесвидѣ́тели воззва́ни бы́ша. И озаря́ющу дню́ къ Пила́ту его́ посыла́етъ Каіа́фа. Приве́дшіи же его́, глаго́летъ, не внидо́ша въ прето́ръ, да не оскверня́тся, но да ядя́тъ па́сху. Собира́ются у́бо, я́ко беззако́нно не́гли архіере́и и фарисе́и тогда́ содѣ́яша преложи́вше Па́сху, я́коже глаго́летъ боже́ственный Златоу́стъ. Въ но́щь бо о́ну подоба́ше и́мъ ту́ю я́сти, но Христо́ва ра́ди убíйства преложи́ша. А я́ко тогда́ до́лжно бя́ше и́мъ я́сти ю́, — яви́ Христо́съ, пре́жде ве́черю но́щію яды́й, та́же тайнонаучи́въ соверше́ннымъ, — или́ я́ко въ зако́нномъ о́бразѣ подоба́ше, я́коже рече́но бы́сть, и и́стинѣ бы́ти. Іоа́ннъ бо, пре́жде пра́здника, глаго́летъ, Па́схи.

Си́хъ ра́ди всѣ́хъ бы́вшихъ въ четверто́къ, и но́щь его́ тогда́шную и мы́ пра́зднуемъ, помина́ніе стра́шныхъ и неизрече́нныхъ дѣ́лъ о́ныхъ и дѣя́ній со стра́хомъ творя́ще.

Неизрече́ннымъ Твои́мъ благоутро́біемъ, Христе́ Бо́же на́шъ, поми́луй на́съ, ами́нь.

Пѣ́снь 7.

[Ο] Ирмо́съ: Отроцы въ Вавило́нѣ пе́щнаго пла́мене не убоя́шася, но, посредѣ́ пла́мене вве́ржени, ороша́еми, поя́ху: благослове́нъ еси́, Го́споди, Бо́же оте́цъ на́шихъ.

[Ν] Помава́я главо́ю Іу́да, зла́я предзрѣ́въ, подви́же, благовре́меніе искíй преда́ти Судію́ на осужде́ніе, Иже всѣ́хъ е́сть Госпо́дь и Бо́гъ оте́цъ на́шихъ.

[Υ] Ва́мъ Христо́съ, друго́мъ, вопія́ше: еди́нъ преда́стъ Мя́. Весе́лія забы́вше, ско́рбію и стра́хомъ одержи́ми бя́ху: кто́ се́й, скажи́, — глаго́люще, — Бо́же оте́цъ на́шихъ?

[Μ] Иже со Мно́ю ру́ку свою́ въ соли́ло вложи́тъ де́рзостію, тому́ оба́че добро́ бы врата́ житія́ пройти́ никогда́же. Сего́, и́же бѣ́ преда́тель, явля́ше Бо́гъ оте́цъ на́шихъ.

Пѣ́снь 8.

[Ν] Ирмо́съ: За зако́ны оте́ческія блаже́нніи въ Вавило́нѣ ю́ноши, предбѣ́дствующе, царю́ющаго оплева́ша повелѣ́ніе безу́мное и, совоку́плени, и́мже не свари́шася огне́мъ, Держа́вствующему досто́йную воспѣва́ху пѣ́снь: Го́спода по́йте, дѣла́, и превозноси́те во вся́ вѣ́ки.

[Ο] Сообѣ́дницы блаже́нніи, въ Сіо́нѣ сло́вомъ претерпѣ́вше, апо́столи, послѣ́доваху Па́стырю, я́ко а́гнцы; и совоку́плени, Его́же не разлучи́шася Христа́, Боже́ственнымъ сло́вомъ пита́еми, благода́рственно вопія́ху: Го́спода по́йте, дѣла́, и превозноси́те во вся́ вѣ́ки.

[Ν] Зако́нныя дру́жбы злоимени́тый Искаріо́тъ во́лею забы́въ, я́же но́зѣ умы́, угото́ви на преда́ніе, и Тво́й яды́й Хлѣ́бъ — Тѣ́ло Боже́ственное, воздви́же ко́въ на Тя́, Христе́, и вопи́ти не разумѣ́: Го́спода по́йте, дѣла́, и превозноси́те во вся́ вѣ́ки.

[Ε] Пріима́ше рѣши́тельное грѣха́ Тѣ́ло, безсо́вѣстный, и Кро́вь, излива́емую за мíръ, Боже́ственную, но не стыдя́шеся пія́, ю́же продая́ше на цѣнѣ́, о зло́бѣ же не негодова́ и вопи́ти не разумѣ́: Го́спода по́йте, дѣла́, и превозноси́те во вся́ вѣ́ки.

Пѣ́снь 9.

[Ξ] Ирмо́съ: Стра́нствія Влады́чня и безсме́ртныя трапе́зы на го́рнѣмъ мѣ́стѣ высо́кими умы́, вѣ́рніи, пріиди́те, наслади́мся, возше́дша Сло́ва, отъ Сло́ва научи́вшеся, Его́же велича́емъ.

[Α] Иди́те, — ученико́мъ Сло́во рече́, — Па́сху на го́рничномъ мѣ́стѣ, е́юже у́мъ утвержда́ется, и сію́ тайноводи́тельно угото́вите безква́снымъ и́стиннымъ сло́вомъ, тве́рдое же благода́ти велича́йте.

[Δ] Содѣ́тельницу Оте́цъ пре́жде вѣ́къ Прему́дрость ражда́етъ Мя́; нача́токъ путе́й, въ дѣла́ созда́, ны́нѣ та́йно соверша́емая; Сло́во бо несозда́нное сы́й естество́мъ, гла́сы присвоя́юся, его́же ны́нѣ прія́хъ.

[Ω] Яко Человѣ́къ сы́й существо́мъ, не мечта́ніемъ, си́це Бо́гъ нра́вомъ воздая́нія, естество́ соедини́вшееся Мнѣ́. Христа́ еди́наго тѣ́мъ Мя́ зна́йте, отъ ни́хже, въ ни́хже, я́же е́смь, спаса́юща.

Ексапостила́рій, три́жды.

Черто́гъ Твой ви́жду, Спа́се мо́й, украше́нный, и оде́жды не и́мамъ, да вни́ду въ о́нь. Просвѣти́ одѣя́ніе души́ моея́, Свѣтода́вче, и спаси́ мя́.

На хвали́техъ поста́вимъ стихи́ 4 и пое́мъ стихи́ры самогла́сны, гла́съ 2:

Стека́ется про́чее собо́рище іуде́йское, да Содѣ́теля и Зижди́теля вся́ческихъ Пила́ту преда́стъ. О, беззако́нныхъ! О, невѣ́рныхъ! Яко Гряду́щаго суди́ти живы́мъ и ме́ртвымъ, на су́дъ гото́вятъ; Исцѣля́ющаго стра́сти, ко Страсте́мъ уготовля́ютъ. Го́споди Долготерпѣли́ве, ве́лія Твоя́ ми́лость, сла́ва Тебѣ́!

Іу́да беззако́нный, Го́споди, омочи́вый на Ве́чери ру́ку въ соли́лѣ съ Тобо́ю, простре́ къ беззако́ннымъ ру́цѣ прія́ти сре́бреники; и мѵ́ра умы́сливый цѣ́ну, Тебе́, Безцѣ́ннаго, не убоя́ся прода́ти; но́зѣ простры́й, во е́же умы́ти, Влады́ку облобыза́ льсти́вно, во е́же преда́ти беззако́ннымъ; ли́ка же апо́стольскаго отве́ргся, и три́десять пове́ргъ сре́бреники, Твоего́ тридне́внаго воскресе́нія не вѣ́дѣ, и́мже поми́луй на́съ.

Іу́да преда́тель, льсти́въ сы́й, льсти́внымъ лобза́ніемъ предаде́ Спа́са Го́спода, и Влады́ку всѣ́хъ, я́ко раба́, продаде́ іуде́омъ; я́ко овча́ на заколе́ніе, та́ко послѣ́доваше Агнецъ Бо́жій, Сы́нъ Отчій, еди́нъ Многоми́лостивый.

Іу́да, ра́бъ и льсте́цъ, учени́къ и навѣ́тникъ, дру́гъ и діа́волъ отъ дѣ́лъ яви́ся: послѣ́доваше бо Учи́телю, и на Него́ поуча́шеся преда́нію, глаго́лаше въ себѣ́: преда́мъ Того́ и пріобря́щу собра́нная имѣ́нія. Иска́ше же и мѵ́ру про́дану бы́ти, и Іису́са ле́стію я́ти. Отдаде́ цѣлова́ніе, предаде́ Христа́. И я́ко овча́ на заколе́ніе, си́це послѣ́доваше, еди́нъ Благоутро́бный и Человѣколю́бецъ.

Сла́ва, и ны́нѣ, гла́съ то́йже:

Его́же проповѣ́да Агнца Иса́ія, гряде́тъ на заколе́ніе во́льное и плещи́ дае́тъ на ра́ны, лани́ты — на зауше́нія, лица́ же не отврати́ отъ срамоты́ заплева́ній, сме́ртію же безобра́зною осужда́ется. Вся́ Безгрѣ́шный во́лею пріе́млетъ, да всѣ́мъ да́руетъ изъ ме́ртвыхъ воскресе́ніе.

На стихо́внѣ стихи́ры самогла́сны, гла́съ 8:

Дне́сь е́же на Христа́ лука́вое собра́ся собо́рище, и на Него́ тще́тная совѣ́товаше, преда́ти Пила́ту на сме́рть Непови́ннаго. Дне́сь имѣ́ніемъ удавле́ніе Іу́да себѣ́ облага́етъ и лиша́ется обою́ду жи́зни — привре́менныя и Боже́ственныя. Дне́сь Каіа́фа нево́лею проро́чествуетъ: у́не, — глаго́ля, — Еди́ному умре́ти за лю́ди. Пріи́де бо за грѣхи́ на́ша пострада́ти, да на́съ свободи́тъ отъ рабо́ты вра́жія, я́ко Бла́гъ и Человѣколю́бецъ.

Сти́хъ: Яды́й хлѣ́бы Моя́, возвели́чи на Мя́ запина́ніе.

Дне́сь Іу́да нищелю́бія сокрыва́етъ лице́, и лихои́мства открыва́етъ зра́къ: не ктому́ о ни́щихъ пече́тся, не ктому́ мѵ́ро продае́тъ грѣ́шныя, но Небе́сное Мѵ́ро, и отъ Него́ усвоя́етъ сре́бренники. Тече́тъ ко іуде́омъ, глаго́летъ беззако́ннымъ: что́ ми́ хо́щете да́ти и а́зъ ва́мъ преда́мъ Его́? О, сребролю́бія преда́теля! Удобопрода́тельную твори́тъ ку́плю, къ во́лѣ купу́ющихъ Непродае́маго ку́плю твори́тъ; не ску́пъ явля́ется къ цѣнѣ́, но, я́ко раба́ бѣжа́щаго, продае́тъ: обы́чай бо кра́дущимъ мета́ти честна́я. Ны́нѣ же пове́рже Свята́я псо́мъ учени́къ, бѣсова́ніе бо сребролю́бія на своего́ Влады́ку неи́стовитися сотвори́ его́. Его́же искуше́нія бѣжи́мъ, зову́ще: Долготерпѣли́ве Го́споди, сла́ва Тебѣ́!

Сти́хъ: Исхожда́ше во́нъ и глаго́лаше вку́пѣ.

Нра́въ тво́й льсти́ исполня́ется, беззако́нный Іу́до: неду́гуя бо сребролю́біемъ, пріобрѣ́лъ еси́ человѣконенавидѣ́ніе. Аще бо бога́тство люби́лъ еси́, почто́ ко Уча́щему о нищетѣ́ прише́лъ еси́? Аще же и люби́лъ еси́, вску́ю про́далъ еси́ Безцѣ́ннаго, преда́въ на убіе́ніе? Ужасни́ся, со́лнце, возстени́, земле́, и, дви́жащися, возопи́: Незло́биве Го́споди, сла́ва Тебѣ́!

Сти́хъ: Сло́во законопресту́пное возложи́ша на Мя́.

Да никто́же, о вѣ́рніи, Влады́чнія Ве́чери тайноненауче́нъ, никто́же отню́дъ, я́ко Іу́да, льсти́вно да присту́питъ къ Трапе́зѣ: о́нъ бо укру́хъ пріе́мъ, на Хлѣ́ба уклони́ся. Образомъ у́бо сы́й учени́къ, ве́щію же сы́й убíйца. Со іуде́и у́бо веселя́ся, со апо́столы же водворя́яся; ненави́дя — лобыза́ше, лобыза́я же — продава́ше Искупи́вшаго на́съ кля́твы, Бо́га и Спа́са ду́шъ на́шихъ.

Сла́ва, гла́съ то́йже: Нра́въ тво́й льсти́... И ны́нѣ, гла́съ 5:

Тайново́дствуя Твоя́, Го́споди, ученики́, учи́лъ еси́, глаго́ля: о дру́зи, зри́те, да никíйже стра́хъ ва́съ разлучи́тъ отъ Мене́! Аще бо и стражду́, но за мíръ. Не блазни́теся у́бо о Мнѣ́, не пріидо́хъ бо, да послу́жатъ Ми́, но послужи́ти и положи́ти ду́шу Мою́ избавле́ніе за мíръ. Аще у́бо вы́ дру́зи Мои́ есте́, Мене́ подража́йте: хотя́й пе́рвый бы́ти, да бу́детъ послѣ́дній; влады́ка, я́ко служи́тель. Пребу́дите во Мнѣ́, да гро́здъ принесете́: Азъ бо е́смь лоза́ живо́тная.

Бла́го есть исповѣ́датися Го́сподеви...



[НА ЧАСѢХЪ,]
Совокупля́емъ и ча́съ пе́рвый, въ не́мже глаго́лемъ и тропа́рь проро́чества, гла́съ 3:

Зауше́нный за ро́дъ человѣ́ческій, и не прогнѣ́вавыйся, свободи́ отъ истлѣ́нія живо́тъ на́шъ, Го́споди, и спаси́ на́съ.

Сла́ва, и ны́нѣ, то́йже.

Проки́менъ, гла́съ 1: Да разумѣ́ютъ язы́цы,* я́ко и́мя Тебѣ́ — Госпо́дь. Сти́хъ: Бо́же, кто́ уподо́бится Тебѣ́?

Проро́чества Іеремíина чте́ніе. [Главы 11 и 12.]

Го́споди, скажи́ ми́, и уразумѣ́ю; тогда́ ви́дѣхъ начина́нія и́хъ. Азъ же, я́ко а́гня незло́бивое, ведо́мое на заколе́ніе, не разумѣ́хъ, я́ко на мя́ помы́слиша по́мыслъ лука́вый, глаго́люще: пріиди́те и вложи́мъ дре́во въ хлѣ́бъ его́, и истреби́мъ его́ отъ земли́ живу́щихъ, и и́мя его́ да не помяне́тся ктому́. Госпо́дь Савао́ѳъ, судя́й пра́ведно, испыту́яй сердца́ и утро́бы! Да ви́жду мще́ніе Твое́ на ни́хъ, я́ко къ Тебѣ́ откры́хъ оправда́ніе мое́. Сего́ ра́ди сія́ глаго́летъ Госпо́дь на му́жы Анаѳо́ѳски, и́щущія души́ моея́, глаго́лющія: да не проро́чествуеши о и́мени Госпо́дни, а́ще ли же ни́, у́мреши въ рука́хъ на́шихъ. Сего́ ра́ди сія́ глаго́летъ Госпо́дь си́лъ: се́ Азъ посѣщу́ на ни́хъ: ю́ноши и́хъ мече́мъ у́мрутъ, и сы́нове и́хъ и дще́ри и́хъ сконча́ются гла́домъ. И оста́нка не бу́детъ отъ ни́хъ, наведу́ бо зла́я на живу́щія во Анаѳо́ѳе въ лѣ́то посѣще́нія и́хъ. Пра́веденъ еси́, Го́споди, я́ко отвѣща́ю къ Тебѣ́, оба́че судьбы́ возглаго́лю къ Тебѣ́. Что́ я́ко путь нечести́выхъ спѣ́ется, угобзи́шася вси́ творя́щіи беззако́нія? Насади́лъ еси́ и́хъ, и укорени́шася: ча́да сотвори́ша и сотвори́ша пло́дъ. Бли́зъ еси́ Ты́ у́стъ и́хъ, дале́че же отъ утро́бъ и́хъ. И Ты́, Го́споди, разумѣ́еши мя́, ви́дѣлъ мя́ еси́ и искуси́лъ еси́ се́рдце мое́ предъ Тобо́ю. Собери́ и́хъ, я́ко о́вцы на заколе́ніе, и очи́сти и́хъ въ де́нь заколе́нія и́хъ. Доко́лѣ пла́кати и́мать земля́ и трава́ вся́ се́льная и́зсхнетъ отъ зло́бы живу́щихъ на не́й? Погибо́ша ско́ти и пти́цы, я́ко реко́ша: не у́зритъ Бо́гъ путе́й на́шихъ. Но́зи твои́ теку́тъ и разслабля́ютъ тя́. Иди́те, собери́те вся́ звѣ́ри се́льныя, и да пріи́дутъ снѣ́сти е́. Па́стыріе мно́зи растли́ша виногра́дъ Мо́й, оскверни́ша ча́сть Мою́, да́ша ча́сть жела́емую Мою́ въ пусты́ню непрохо́дную. Положи́ша въ потребле́ніе па́губы. Яко сія́ глаго́летъ Госпо́дь о всѣ́хъ сосѣ́дѣхъ лука́выхъ, прикаса́ющихся наслѣ́дію Моему́, е́же раздѣли́хъ лю́демъ Мои́мъ, Изра́илю: се́ Азъ исто́ргну и́хъ отъ земли́ и́хъ и до́мъ Іу́динъ изве́ргну отъ среды́ и́хъ. И бу́детъ, егда́ исто́ргну ихъ, обращу́ся и поми́лую и́хъ, и вселю́ и́хъ, кого́ждо въ достоя́ніе свое́ и кого́ждо въ зе́млю свою́.

Проки́менъ, гла́съ 8: Помоли́теся и воздади́те* Го́сподеви Бо́гу на́шему. Сти́хъ: Вѣ́домъ во Іуде́и Бо́гъ, во Изра́или ве́ліе и́мя Его́.

[Зри́:] Подоба́етъ вѣ́дати, я́ко литíи за упоко́й въ притво́рѣ не быва́етъ до недѣ́ли Ѳомины́.

Про́чія же часы́ пою́тся трипса́лмны, про́сто.

Источникъ: Тріо́діонъ, сíесть трипѣ́снецъ. — Кíевъ: Въ тѵпогра́фіи Кíево-Пече́рской Успе́нской Ла́вры, 1864. — Л. 365 об. – 375 об.

/ Къ оглавленію раздѣла /


Наверхъ / Къ титульной страницѣ

0