Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - суббота, 18 ноября 2017 г. Сейчасъ на порталѣ посѣтителей - 21.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

ТРІОДІОНЪ, СІЕСТЬ ТРИПѢСНЕЦЪ,
Съ Бо́гомъ Святы́мъ, обдержа́й подоба́ющее ему́ послѣ́дованіе.

Слу́жба во святу́ю и Вели́кую сре́ду.

[НА ВЕЧЕРНИ,]
Въ то́йже святы́й и Вели́кій вто́рникъ ве́чера, во свѣти́льничное, обы́чное стихосло́віе.
На Го́споди воззва́хъ.., поста́вимъ стихо́въ 10 и пое́мъ стихи́ры самогла́сны, гла́съ 1:

Гла́съ 2:

Душе́вною лѣ́ностію воздрема́вся, не стяжа́хъ, Женише́ Христе́, горя́ща свѣти́льника, и́же отъ добродѣ́телей, и дѣ́вамъ уподо́бихся бу́имъ, во вре́мя дѣ́ланія глумля́ся. Утро́бы щедро́тъ Твои́хъ не затвори́ мнѣ́, Влады́ко, но оттря́съ мо́й омраче́нный со́нъ, возста́ви, Ми́лостиве, и съ му́дрыми введи́ дѣ́вами въ черто́гъ Тво́й, идѣ́же гла́съ чи́стый пра́зднующихъ и вопію́щихъ непреста́нно: Го́споди, сла́ва Тебѣ́! [Два́жды.]

Гла́съ 4:

Скры́вшаго тала́нтъ осужде́ніе слы́шавши, о душе́, не скрыва́й словесе́ Бо́жія, возвѣща́й чудеса́ Его́, да умножа́ющи дарова́ніе, вни́деши въ ра́дость Го́спода твоего́. [Два́жды.]

Гла́съ 6:

Пріиди́те, вѣ́рніи, дѣ́лаимъ усе́рдно Влады́цѣ: подава́етъ бо рабо́мъ бога́тство; и по ра́венству кíйждо да многоусугу́бимъ благода́ти тала́нтъ: о́въ у́бо му́дрость да прино́ситъ дѣ́лы благи́ми, о́въ же слу́жбу свѣ́тлости да соверша́етъ. Да пріобща́ется же сло́вомъ вѣ́рный, та́йны ненауче́нному, и да расточа́етъ бога́тство убо́гимъ другíй. Си́це бо заимова́нное многоусугу́бимъ и, я́ко строи́теліе вѣ́рніи благода́ти, Влады́чнія ра́дости сподо́бимся. Тоя́ на́съ сподо́би, Христе́ Бо́же, я́ко Человѣколю́бецъ. [Два́жды.]

Егда́ пріи́деши во сла́вѣ со а́нгельскими си́лами и ся́деши на престо́лѣ, Іису́се, разсужде́нія, да мя́, Па́стырю Благíй, не разлучи́ши: пути́ бо десны́я вѣ́си, развраще́ни же су́ть шу́іи. Да не у́бо съ ко́злищи гру́баго мя́ грѣхо́мъ погуби́ши, но десны́мъ мя́ сочета́въ овца́мъ, спаси́, я́ко Человѣколю́бецъ.

Женише́, добро́тою кра́сный па́че всѣ́хъ человѣ́къ, призва́вый на́съ къ трапе́зѣ духо́внѣй черто́га Твоего́! Нелѣ́пый мо́й зра́къ прегрѣше́ній совлецы́ прича́стіемъ страда́ній Твои́хъ и, оде́ждею сла́вы украси́въ Твоея́ красоты́, сообѣ́дника свѣ́тла мя́ покажи́ Твоего́ Ца́рствія, я́ко Милосе́рдъ.

Сла́ва, и ны́нѣ, гла́съ 7:

Се́ тебѣ́ тала́нтъ Влады́ка вверя́етъ, душе́ моя́. Стра́хомъ пріими́ да́ръ, заи́мствуй Да́вшему ти́, раздава́й ни́щимъ и стяжи́ дру́га Го́спода, да ста́неши одесну́ю Его́, егда́ пріи́детъ во сла́вѣ, и услы́шиши блаже́нный гла́съ: вни́ди, ра́бе, въ ра́дость Го́спода твоего́! Тоя́ досто́йна мя́ сотвори́, Спа́се, заблуди́вшаго, вели́кія ра́ди Твоея́ ми́лости.

Вхо́дъ со Ева́нгеліемъ. Свѣ́те ти́хій...

Проки́менъ, псало́мъ 131-й, гла́съ 6: Воскресни́, Го́споди, въ поко́й Тво́й,* Ты́ и Киво́тъ святы́ни Твоея́. Сти́хъ: Помяни́, Го́споди, Дави́да и всю́ кро́тость его́.

Исхо́да чте́ніе. [Глава́ 2.]

Сни́де дще́рь фарао́нова измы́тися на рѣку́, и рабы́ни ея́ прохожда́ху при рѣцѣ́. И ви́дѣвши ковче́жецъ въ лучи́цѣ, посла́вши рабы́ню, взя́ и́. Отве́рзши же, ви́дитъ отроча́, пла́чущееся въ ковче́жцѣ; и пощаде́ е́ дще́рь фарао́ня и рече́: отъ дѣте́й евре́йскихъ сіе́. И рече́ сестра́ его́ дще́ри фарао́новѣ: хо́щеши ли призову́ ти́ жену́ корми́лицу отъ евре́й и воздои́тъ ти́ отроча́? И рече́ е́й дще́рь фарао́нова: иди́. Ше́дши же отрокови́ца, призва́ ма́терь отроча́те. Рече́ же къ не́й дще́рь фарао́нова: соблюди́ ми́ отроча́ сіе́ и воздо́й ми́ е́; а́зъ же да́мъ ти́ мзду́. Взя́ же отроча́ жена́ и доя́ше е́. Возмужа́вшу же отроча́ти, введе́ е́ ко дще́ри фарао́новѣ, и бы́сть е́й въ сы́на, и нарече́ и́мя ему́: Моисе́й, глаго́лющи: отъ воды́ взя́хъ его́.

Проки́менъ, псало́мъ 132-й, гла́съ 4: Се́ что́ добро́ или́ что́ красно́,* но е́же жи́ти бра́тіи вку́пѣ. Сти́хъ: Яко мѵ́ро на главѣ́, сходя́щее на браду́, браду́ Ааро́ню.

Іова чте́ніе. [Глава́ 1.]

Бы́сть я́ко де́нь се́й, сы́нове Іовлевы и дще́ри его́ пія́ху вино́ въ дому́ бра́та своего́ старѣ́йшаго. И се́ вѣ́стникъ пріи́де ко Іову и рече́ ему́: супру́ги воло́въ оря́ху и осли́цы пася́хуся бли́зъ и́хъ, и прише́дше плѣни́тели плѣни́ша и́хъ, и о́троки изби́ша мече́мъ, и спасо́хся а́зъ еди́нъ, и пріидо́хъ возвѣсти́ти тебѣ́. Еще́ сему́ глаго́лющу, пріи́де и́нъ вѣ́стникъ и рече́ ко Іову: о́гнь спаде́ съ небесе́, и пожже́ о́вцы и па́стыри поядѣ́ подо́бнѣ, спасо́хся же а́зъ еди́нъ, и пріидо́хъ возвѣсти́ти тебѣ́. Еще́ сему́ глаго́лющу, пріи́де и́нъ вѣ́стникъ и рече́ ко Іову: ко́нницы сотвори́ша нача́льства три́, и окружи́ша вельблю́ды и плѣни́ша и́хъ, и о́троки изби́ша мечми́, спасо́хся же а́зъ еди́нъ, и пріидо́хъ возвѣсти́ти тебѣ́. Еще́ сему́ глаго́лющу, и́нъ вѣ́стникъ пріи́де, глаго́ля Іову: сыно́мъ твои́мъ и дще́ремъ твои́мъ яду́щимъ и пію́щимъ у бра́та своего́ старѣ́йшаго, внеза́пу вѣ́тръ вели́къ на́йде отъ пусты́ни и косне́ся четы́ремъ угло́мъ хра́мины, и паде́ хра́мина на дѣ́ти твоя́, и сконча́шася, спасо́хся же а́зъ еди́нъ, и пріидо́хъ возвѣсти́ти тебѣ́. Та́ко (услы́шавъ) Іовъ, воста́въ, растерза́ ри́зы своя́, и остриже́ власы́ главы́ своея́, (и посы́па пе́рстію главу́ свою́,) и па́дъ на зе́млю, поклони́ся (Го́сподеви), и рече́: са́мъ на́гъ изыдо́хъ отъ чре́ва ма́тере моея́, на́гъ и отыду́ та́мо; Госпо́дь даде́, Госпо́дь отъя́тъ; я́ко Го́сподеви изво́лися, та́ко бы́сть; бу́ди и́мя Госпо́дне благослове́нно (во вѣ́ки). Во всѣ́хъ си́хъ приключи́вшихся ему́ ничто́же согрѣши́ Іовъ предъ Го́сподемъ (ниже́ устна́ма свои́ма) и не даде́ безу́мія Бо́гу.

И а́біе: Да испра́вится моли́тва моя́... Ева́нгеліе отъ Матѳе́я, зача́ло 102. И про́чая Преждеосвяще́нныхъ.



[НА ПОВЕЧЕРІИ.]
Во святы́й и Вели́кий вто́рникъ повече́ріе вели́кое.

На не́мже пое́мъ трипѣ́снецъ, творе́ніе господи́на Андре́я Кри́тскаго, гла́съ 2.
Пѣ́снь 3.

Ирмо́съ: Непло́дствовавшій мо́й у́мъ плодоно́сенъ, Бо́же, покажи́ ми, Дѣ́лателю до́брыхъ, Насади́телю благи́хъ, благоутро́біемъ Твои́мъ.

Кончи́ны вре́мя: обрати́мся про́чее, — Христо́съ учи́тъ; пріи́детъ бо во мгнове́ніи, пріи́детъ и не уме́длитъ, суди́ти мíру всему́.

Внеза́пное Своего́ прише́ствія Христо́съ явля́я, рече́, Но́ево дре́вле ненаде́жное тлѣ́ніе навести́ся хотя́щее земли́.

Отве́рзеся черто́гъ, украси́ся съ ни́мъ Боже́ственный бра́къ, Жени́хъ бли́зъ призыва́яй на́съ, угото́вимся про́чее.

Си́моновъ до́мъ, Невмѣсти́маго вездѣ́, вмѣсти́ Тя́, Іису́се Царю́, и жена́ грѣ́шная мѵ́ромъ Тя́ пома́за.

Благово́нія та́инственнаго испо́лнена жена́, пе́рваго изба́вися злово́нія, Спа́се, мно́гихъ грѣхо́въ. Мѵ́ро бо источа́еши жи́зни.

Небе́сная Пи́ще а́лчущимъ, Животе́ Са́мъ сы́й, я́лъ еси́, Христе́, съ человѣ́ки, проявля́я снисхожде́ніе Твое́.

Неблагода́рный учени́къ отве́ргся Тебе́, Христе́, собо́рище всебеззако́нныхъ люде́й сподвиза́ше на Тя́, на преда́ніе обра́щься.

Сла́ва, [тро́иченъ]: Со Отце́мъ Тебѣ́, Сы́ну, и Ду́ху пра́вому, еди́ному Естеству́ покланя́юся и воспѣва́ю, Ли́цы раздѣля́я и Существо́мъ соединя́я.

И ны́нѣ, богоро́диченъ: Ро́ждшая Тя́ Агница, Па́стыря и Агнца, при́сно мо́литъ, Іису́се Бо́же, о всѣ́хъ лю́дехъ, вѣ́рующихъ въ Тя́.

[Ирмо́съ: Непло́дствовавшій мо́й у́мъ плодоно́сенъ, Бо́же, покажи́ ми, Дѣ́лателю до́брыхъ, Насади́телю благи́хъ, благоутро́біемъ Твои́мъ].

[Го́споди, поми́луй, три́жды. Сла́ва, и ны́нѣ.]
Сѣда́ленъ, гла́съ 1. Подо́бенъ: Ли́къ а́нгельскій.

Се́ лука́вый совѣ́тъ вои́стинну собра́ся неи́стовно, я́ко осу́жденника осуди́ти горѣ́ Сѣдя́щаго, я́ко Судію́ всѣ́хъ Го́спода; ны́нѣ собира́ется съ Пила́томъ Иродъ, Анна, вку́пѣ же и Каіа́фа испыта́ти Еди́наго Долготерпѣли́ваго.

Пѣ́снь 8.

Ирмо́съ: Въ купинѣ́ Моисе́ю Дѣ́вы чу́до на Сина́йстѣй горѣ́ Прообрази́вшаго иногда́, по́йте, благослови́те и превозноси́те во вся́ вѣ́ки.

Не невѣ́дый вре́мя на́шего сконча́нія, Держа́й вѣ́ки, де́нь о́ный не вѣ́дѣти предрече́, но предѣ́лы всѣ́мъ положи́ къ смиреному́дрію.

Егда́ ся́деши, Судіе́, разлуча́яй, я́коже ре́клъ еси́, па́стырь отъ ове́цъ ко́злища, Спа́се, стоя́нія о́наго изба́ви на́съ, не лиши́ же на́съ Боже́ственныя десни́цы Твоея́.

Ты́ еси́ Па́сха на́ша, Пожре́ный за всѣ́хъ, я́ко Агнецъ и Же́ртва, и прегрѣше́ній очище́ніе, и Твоя́ Боже́ственныя Стра́сти превозно́симъ, Христе́, во вся́ вѣ́ки.

Дре́ву уподо́бися, и селу́, и хра́минѣ, все́ житіе́, душе́ моя́; тѣ́мже стяжи́ къ Бо́гу гото́во се́рдце, да не что́ тлѣ́ніемъ пло́ти оста́виши.

Не къ фарисе́омъ, Спа́се, ни къ Си́мону то́кмо изво́лилъ еси́ во храмъ на снѣ́дь вни́ти, но уже́ и мытари́ вку́пѣ и блудни́цы Твое́ почерпа́ютъ милосе́рдіе.

Сребролю́біе рачи́тельствуяй преда́тель Іу́да, о истощи́вшемся мѵ́рѣ печа́шеся: про́чее же о прода́ніи Влады́ки, къ беззако́ннымъ прише́дъ, о цѣнѣ́ согласова́ше.

О, блаже́нныхъ ру́къ! О, власо́въ и усте́нъ цѣлому́дренныя блудни́цы! Имиже возлія́, Спа́се, мѵ́ро на но́зѣ Твои́, отира́ющи я́ и ча́сто облобыза́ющи.

Возлежа́щу Тебѣ́, Сло́ве, жена́ предста́вши и, у но́гъ рыда́ющи, сткля́ницу, Спа́се, истощи́ мѵ́ра на главу́ Тебе́, Безсме́ртнаго Мѵ́ра.

Благослови́мъ Отца́, и Сы́на, и Свята́го Ду́ха, Го́спода.

[Тро́иченъ:] Со Отце́мъ Сы́на и Свята́го Ду́ха, Святу́ю Тро́ицу въ Божествѣ́ Еди́номъ сла́вимъ, вопію́ще: Свя́тъ, Свя́тъ, Свя́тъ еси́ во вѣ́ки.

И ны́нѣ, богоро́диченъ: Моли́твами, Спа́се, Пречи́стыя Твоея́ Ма́тере и Твои́хъ апо́столъ ми́лости Твоя́ на́мъ низпосли́ бога́тно и ми́ръ Тво́й пода́ждь лю́демъ Твои́мъ.

Та́же: Хва́лимъ, благослови́мъ, покланя́емся Го́сподеви, [пою́ще и превознося́ще во вся́ вѣ́ки].

Ирмо́съ: Въ купинѣ́ Моисе́ю Дѣ́вы чу́до [на Сина́йстѣй горѣ́ Прообрази́вшаго иногда́, по́йте, благослови́те и превозноси́те во вся́ вѣ́ки].

Пѣ́снь 9.

Ирмо́съ: Преесте́ственно пло́тію заче́ншую во чре́вѣ, отъ Отца́ безлѣ́тно предвозсія́вшее Сло́во, въ пѣ́снехъ немо́лчныхъ велича́емъ, вѣ́рніи.

Дѣ́ланія вре́мя, спасе́нія намѣ́реніе: тала́нтъ взе́мши, дре́вній о́бразъ, душе́ моя́, купи́ вѣ́чную жизнь.

Яко свѣщи́ свѣ́тлыя украси́вше ду́ши, Жениху́ приходя́щу къ нетлѣ́нному бра́ку, пре́жде заключе́нія двере́й вни́демъ съ Ни́мъ.

Показа́ти хотя́, Іису́се, преесте́ственное Твоего́ смире́нія всѣ́мъ, я́лъ еси́ въ дому́ Си́моновѣ, вечеря́въ, а́лчущихъ Пи́ще.

Хлѣ́бъ сы́й Животворя́щій, снѣ́лъ еси́, Іису́се, съ Си́мономъ фарисе́емъ, да блудни́ца пріобря́щетъ некупи́мую благода́ть Твою́ истоща́ніемъ мѵ́ра.

Ру́цѣ мои́ скверна́вѣ, устнѣ́ блудни́чи во мнѣ́, нечи́сто мое́ житіе́, растлѣ́нны у́ды, но осла́би ми и оста́ви, — вопіе́тъ блудни́ца Христу́.

Присту́пльши жена́ къ нога́ма Твои́ма, Спа́се, возлива́ше мѵ́ро, благоуха́нія исполня́ющи, и мѵ́ра исполня́ема дѣ́лъ очище́нія.

Арома́ты богатѣ́ю, добродѣ́тельми же нище́тствую, я́же и́мамъ, Тебѣ́ приношу́: да́ждь Са́мъ, я́же и́маши, и осла́би ми́, и оста́ви, — вопіе́тъ блудни́ца Христу́.

Мѵ́ро у мене́ тлѣ́нное, мѵ́ро у Тебе́ жи́зни, Мѵ́ро бо Тебе́ и́мя излія́нное на досто́йныя, но осла́би ми́ и оста́ви, — вопіе́тъ блудни́ца Христу́.

Сла́ва, [тро́иченъ]: Безнача́ленъ еси́, Отче, Несозда́ненъ еси́, Сы́не, Сопресто́ленъ и Ду́ше: Еди́но Три́ Естество́мъ и Три́ Ли́цами, Еди́нъ Бо́гъ Истинный.

И ны́нѣ, богоро́диченъ: Богоро́дице, упова́ніе чту́щихъ Тя́ при́сно, не преста́й, моля́щи изъ Тебе́ Роди́вшагося, изба́вити мя́ бѣ́дъ и вся́кихъ искуше́ній.

[Ирмо́съ: Преесте́ственно пло́тію заче́ншую во чре́вѣ, отъ Отца́ безлѣ́тно предвозсія́вшее Сло́во, въ пѣ́снехъ немо́лчныхъ велича́емъ, вѣ́рніи].


[НА УТРЕНИ.]
Во святу́ю и Вели́кую сре́ду на у́трени, по шестопса́лміи: Аллилу́ія.., на гла́съ 8, и тропа́рь три́жды: Се́, Жени́хъ... Зри́ въ понедѣ́льникъ вели́кій. И стихосло́віе.

По 1 стихосло́віи сѣда́ленъ, гла́съ 3. Подо́бенъ: Красотѣ́ дѣ́вства.

Блудни́ца приступи́ къ Тебѣ́, мѵ́ро со слеза́ми излива́ющи на но́зѣ Твои́, Человѣколю́бче, и смра́да зо́лъ избавля́ется повелѣ́ніемъ Твои́мъ! Дыша́ же благода́ть Твою́ учени́къ неблагода́рный, сію́ отлага́етъ и смра́домъ одѣва́ется, сребролю́біемъ продая́ Тебе́. Сла́ва, Христе́, благоутро́бію Твоему́!

Сла́ва, и ны́нѣ, то́йже.

По 2-мъ стихосло́віи сѣда́ленъ, гла́съ 4. Подо́бенъ: Удиви́ся Іо́сифъ.

Іу́да льсте́цъ, сребролю́бія рачи́тельствуяй, преда́ти Тя́, Го́споди, Сокро́вище Живота́, ле́стно поуча́шеся, отону́дуже и упи́вся, тече́тъ ко іуде́омъ, глаго́летъ беззако́ннымъ: что́ ми́ хо́щете да́ти, и а́зъ ва́мъ преда́мъ, во е́же распя́ти Его́?

Сла́ва, и ны́нѣ, то́йже.

По 3-мъ стихосло́віи сѣда́ленъ, гла́съ 1. Подо́бенъ: Гро́бъ Тво́й.

Блудни́ца въ пла́чѣ вопія́ше, Ще́дре, отира́ющи те́плѣ пречи́стѣи Твои́ но́зѣ власы́ главы́ своея́ и изъ глубины́ стеня́щи: не отри́ни мя́, ниже́ омерзи́, Бо́же мо́й, но пріими́ мя́ ка́ющуюся и спаси́, я́ко еди́нъ Человѣколю́бецъ.

Сла́ва, и ны́нѣ, то́йже.

Чте́нія же вся́ отъ сказа́нія, е́же отъ Матѳе́я свята́го Ева́нгелія дне́. Та́же Ева́нгеліе отъ Іоа́нна, зача́ло 41-е, бли́зъ конца́, безъ престу́пки: Во вре́мя о́но, свидѣ́тельствоваше наро́дъ сы́й со Іису́сомъ, егда́ Ла́заря возгласи́ отъ гро́ба... Коне́цъ въ зача́лѣ 43-мъ: Яже у́бо Азъ глаго́лю, я́коже рече́ Мнѣ́ Оте́цъ, та́ко глаго́лю. Псало́мъ 50-й.

И трипѣ́снецъ, творе́ніе господи́на Космы́, его́же краестро́чіе: Τετράδι ψαλῶ, сíесть: Въ сре́ду воспою́. Ирмосы́ по два́жды. Тропари́ на 12. Послѣди́ же ирмо́съ, о́ба ли́ка вку́пѣ. Гла́съ 2.

Пѣ́снь 3.

[Τ] Ирмо́съ: На ка́мени мя́ вѣ́ры утверди́въ, разшири́лъ еси́ уста́ моя́ на враги́ моя́, возвесели́бося ду́хъ мо́й, внегда́ пѣ́ти: нѣ́сть свя́тъ, я́коже Бо́гъ на́шъ, и нѣ́сть пра́веденъ, па́че Тебе́, Го́споди.

[Ε] Во тще́тныхъ собо́рище беззако́нныхъ, и мы́слію собира́ется злонра́вною, осужде́на Изба́вителя изрещи́ Тя́, Христе́. Ему́же пое́мъ: Ты́ еси́ Бо́гъ на́шъ, и нѣ́сть свя́тъ, па́че Тебе́, Го́споди.

[Τ] Лю́тый совѣ́тъ беззако́нныхъ, притворя́ется богобо́рныя души́ су́щій, я́ко злопотре́бна пра́веднаго уби́ти Христа́. Ему́же пое́мъ: Ты́ еси́ Бо́гъ на́шъ, и нѣ́сть свя́та, па́че Тебе́, Го́споди.

Конда́къ, гла́съ 4. Подо́бенъ: Вознесы́йся.

Па́че блудни́цы, Бла́же, беззако́нновавъ, слезъ ту́чи ника́коже Тебѣ́ принесо́хъ, но молча́ніемъ, моля́ся припа́даю Ти́, любо́вію облобыза́я пречи́стѣи Твои́ но́зѣ, я́ко да оставле́ніе мнѣ́, я́ко Влады́ка, пода́си долго́въ, зову́щу Ти́, Спа́се: отъ скве́рныхъ дѣ́лъ мои́хъ изба́ви мя́.

Икосъ:

Яже пе́рвѣе блудни́ца жена́, внеза́пу цѣлому́дренна яви́ся, возненави́дѣвши дѣла́ сту́днаго грѣха́ и сла́дости тѣле́сныя, помина́ющи сту́дъ мно́гій и су́дъ муче́нія, его́же претерпя́тъ блудни́цы и скве́рніи, отъ ни́хже пе́рвый е́смь а́зъ, и бою́ся, но пребыва́ю въ зло́мъ обы́чаи, безу́мный. Блу́дная же жена́ убоя́вшися, и потща́вшися, ско́ро пріи́де, вопію́щи ко Изба́вителю: Человѣколю́бче и Ще́дре, отъ скве́рныхъ дѣ́лъ мои́хъ изба́ви мя́.

Синакса́рій.

Стихи́: Жена́, полага́ющи тѣлеси́ Христо́ву мѵ́ро,
                      Никоди́мовъ предпрія́тъ смѵрнало́й.

Во святу́ю и Вели́кую сре́ду пома́завшія Го́спода мѵ́ромъ жены́-блудни́цы па́мять твори́ти повелѣ́ша боже́ственнѣйшіи отцы́, зане́ ма́ло пре́жде спаси́тельныя Стра́сти сіе́ бы́сть.

Вше́дшу бо Іису́су во Іерусали́мъ, и въ дому́ прокаже́ннаго Си́мона бы́вшу, жена́ къ Нему́ приступи́ и излія́ на главу́ Его́ о́ное многоцѣ́нное мѵ́ро. Учине́но у́бо сего́ ра́ди бы́сть здѣ́, да по Спа́сову словеси́ вездѣ́ и во всѣ́хъ о́ноя теплѣ́йшее дѣ́ло проповѣ́стся. Откуду́ же, подви́гшися, пріи́де? — Зане́же сострада́тельное Христо́во зря́ше и ко всѣ́мъ общи́тельное, и ны́нѣ па́че, егда́ въ до́мъ прокаже́ннаго того́ ви́дѣ введе́на, его́же нечи́ста и отрече́нна во обще́ніе зако́нъ повелѣва́ше бы́ти, — помы́сли у́бо жена́, я́коже о́наго прока́зу, си́це и ея́ душе́вный неду́гъ исцѣли́тъ. И у́бо возлежа́щу Ему́ на ве́чери, на ве́рхъ главы́ Его́ ліе́тъ мѵ́ро, я́ко цѣно́ю су́щее дина́рій тре́хъ со́тъ, е́же е́сть шестьдеся́тъ асса́рій, пѣ́нязей де́сять, сре́бренниковъ тріе́хъ. Ейже ученицы́ запрети́ша и наипа́че Іу́да Искаріо́тскій, но Христо́съ сію́ заступи́, да не пресѣку́тъ до́браго ея́ намѣ́ренія. Та́же и погребе́ніе Свое́ воспомина́етъ, Іу́ду отвраща́я преда́тельства и жену́ по́чести сподобля́я — е́же вездѣ́ по вселе́ннѣй сея́ до́брому дѣ́лу проповѣ́датися.

Вѣ́домо же бу́ди, я́ко жена́ сія́ еди́на у́бо мни́тся нѣ́кимъ бы́ти у евангели́стовъ всѣ́хъ. — Нѣ́сть же, но у тріе́хъ у́бо, я́коже глаго́летъ боже́ственный Златоу́стый (Бесѣ́да на Матѳ. 13), еди́на и та́яжде е́сть, я́же и блудни́ца си́це именова́ся, у Іоа́нна же — не ктому́, но друга́я нѣ́кая чу́дная и житіе́ иму́щая честно́е, — Марíя, сестра́ Ла́зарева, я́же, не а́ки блудни́ца су́щи, Христо́мъ люби́ма бѣ́.

Си́хъ же о́вая у́бо Марíя, пре́жде шести́ дне́й Па́схи, въ дому́ свое́мъ, и́же въ Виѳа́ніи, на ве́чери возлежа́щу, мѵ́ра пома́заніе содѣ́я, на кра́снѣи Онаго но́зѣ сіе́ излива́ющи и главны́ми власы́ сія́ отира́ющи. Изоби́лія цѣны́ на́нь употребля́ющи и, а́ки Бо́гу, мѵ́ро принося́щи, вѣ́дяше бо извѣ́стно, я́ко и въ же́ртвахъ приноша́шеся еле́й Бо́гу, и свяще́нницы мѵ́ромъ пома́зовахуся (Исхо́дъ, глава́ 30), и Іа́ковъ дре́вле сто́лпъ пома́за Бо́гу (Быт. 28 и 35). Принесе́ же сіе́ да́рствующи я́вѣ Учи́телю, а́ки Бо́гу, па́ки оживле́нія ра́ди бра́тняго. Тѣ́мже ниже́ мзда́ е́й обѣщава́ется, егда́ и са́мъ Іу́да ро́пщетъ, я́ко любостяжа́теленъ.

Друга́я же, я́вѣ блудни́ца, пре́жде двою́ дню́ Па́схи, въ то́йже Виѳа́ніи еще́ су́щу Христу́ и въ дому́ бы́вшу Си́мона прокаже́ннаго на ве́чери, и тогда́ возлежа́щу, многоцѣ́нное о́ное мѵ́ро на главу́ излива́етъ, я́коже свяще́нный Матѳе́й и Ма́рко повѣствова́ша. О се́й же блудни́цѣ и ученицы́ негоду́ютъ, къ ми́лостыни Христу́ тща́тельно угото́ванное извѣ́стно прови́дѣвше; се́й же и мзда́ даде́ся — е́же всю́ду по вселе́ннѣй до́брому ея́ дѣ́лу просла́витися.

Овіи у́бо еди́ну, язы́комъ же Златы́й си́це двѣ́ женѣ́ бы́ти глаго́летъ. Су́ть же нѣ́цыи, и три́ сія́ бы́ти глаго́лютъ: двѣ́ у́бо — предрече́ннѣи, Стра́сти Христо́вой къ две́ремъ приближа́ющейся, тре́тію же — ину́ю, пре́жде си́хъ, па́че же пе́рвую, та́мо бли́зъ среды́ про́повѣди Ева́нгельскія сіе́ сотво́ршую, я́же и блудни́ца и грѣ́шница бѣ́, вну́трь же до́му не прокаже́ннаго, но фарисе́я Си́мона, на но́зѣ Христа́ Самаго́, и наединѣ́, мѵ́ро излія́вшая. Егда́ и еди́нъ фарисе́й соблазня́шеся, е́йже и мзду́ Спа́съ — оставле́ніе грѣхо́въ — да́руетъ. О се́й же то́кмо само́й, боже́ственный Лука́ въ свое́мъ Ева́нгеліи, бли́зъ среды́, я́коже рече́ся, повѣству́етъ (Зача́ло 33). И по по́вѣсти о се́й блудни́цѣ, а́біе наво́дитъ, си́це глаго́ля: И бы́сть по се́мъ, и То́й прохожда́ше сквозѣ́ гра́ды и ве́си, благовѣству́я и проповѣ́дуя Ца́рствіе Бо́жіе, отъ ни́хже явля́ется, я́ко не во вре́мя Стра́сти сіе́ бы́сть. Мни́тся у́бо и отъ вре́мене, и отъ пріе́мшихъ Его́, и отъ мѣ́ста, и ли́цъ, и домо́въ, еще́ же и отъ нра́ва мѵропома́занія, тре́мъ бы́ти жена́мъ си́мъ: двѣ́ у́бо — блудни́цы, тре́тію же — Ла́зареву бы́ти сестру́ Марíю, житіе́мъ сія́ющую честны́мъ. И и́ный у́бо до́мъ бы́ти фарисе́я Си́мона, другíй же — прокаже́ннаго Си́мона въ Виѳа́ніи, и и́ный па́ки до́мъ — Марíи и Ма́рѳы, се́стръ Ла́заревыхъ, въ то́йже Виѳа́ніи. Якоже отъ си́хъ сразумѣ́ти е́сть, я́ко и двѣ́ ве́черѣ бѣ́сте Христу́, и обои́ въ Виѳа́ніи: еди́на у́бо — пре́жде шести́ дне́й Па́схи въ дому́ Ла́заревѣ, егда́ ядя́ше съ ни́мъ и Ла́зарь, я́коже гро́мовъ сы́нъ [Іоа́ннъ] повѣству́етъ, глаго́ля си́це: Пре́жде шести́ дне́й Па́схи, пріи́де Іису́съ въ Виѳа́нію, идѣ́же бѣ́ Ла́зарь уме́рый, его́же воздви́же отъ ме́ртвыхъ. Сотвори́ша у́бо Ему́ ве́черю та́мо, и Ма́рѳа служа́ше, Ла́зарь же еди́нъ бѣ́ отъ совозлежа́щихъ Ему́. Марíя у́бо, пріе́мши ли́тру мѵ́ра на́рда писти́ки многоцѣ́ннаго, пома́за но́зѣ Іису́совѣ и отре́ власы́ свои́ми но́зѣ Его́ (Іоан. 41). Друга́я же ве́черя бы́сть Ему́ пре́жде двою́ дню́ Па́схи, еще́ су́щу въ Виѳа́ніи Христу́, въ дому́ Си́мона прокаже́ннаго, егда́ и блудни́ца пріи́де къ Нему́, многоцѣ́нное мѵ́ро излива́ющи, я́коже свяще́нный Матѳе́й повѣству́етъ, глаго́ля, я́ко отъ Христа́ ко ученико́мъ: Вѣ́сте, я́ко по двою́ дню́ Па́сха бу́детъ... И пома́лѣ па́ки нано́ситъ: Іису́су же бы́вшу въ Виѳа́ніи, въ дому́ Си́мона прокаже́ннаго, приступи́ къ Нему́ жена́, алава́стръ мѵ́ра иму́щи тяжкоцѣ́ннаго, и возлива́ше на главу́ Его́ возлежа́щаго (Матѳ. 108). Ему́же согласу́етъ и Ма́рко, глаго́ля: Бѣ́ же Па́сха, и опрѣсно́цы по двою́ дню́, и су́щу Ему́ въ Виѳа́ніи въ дому́ Си́мона прокаже́ннаго возлежа́щу, — пріи́де жена́.., и ели́ка по се́мъ (Марк. 63).

Пря́щіися же и глаго́лющіи, еди́ну и ту́южде бы́ти у четы́рехъ евангели́стовъ жену́, пома́завшую Го́спода мѵ́ромъ, еди́наго и того́жде мня́тъ бы́ти Си́мона, фарисе́я же и прокаже́ннаго, его́же и отца́ Ла́заря же и се́стръ его́, Марíи и Ма́рѳы, бы́ти нѣ́цыи изда́ша; и еди́ну ве́черю и ту́южде, и то́йжде и еди́нъ до́мъ его́, и́же въ Виѳа́ніи, у него́же и го́рница по́стлана угото́вася, и та́инственную Ве́черю бы́ти, — не до́брѣ мня́тъ. Сíи бо двѣ́ ве́чери, внѣ́ Іерусали́ма въ Виѳа́ніи, бѣ́стѣ Христу́, пре́жде шести́ и пре́жде двою́ (я́коже рече́ся) дню́ зако́нныя Па́схи, егда́ и жены́ мѵ́ра разли́чно Христу́ принесо́ша. Та́йная же Ве́черя и по́стланная го́рница вну́трь гра́да Іерусали́ма благоукраси́шася, пре́жде еди́наго, зако́нныя Па́схи и Стра́сти Христо́вы, дне́; о́віи у́бо — въ дому́ невѣ́домаго человѣ́ка, о́віи же — въ дому́ (я́коже глаго́лютъ) напе́рсника и ученика́ Іоа́нна во свято́мъ Сіо́нѣ, идѣ́же и ученицы́, стра́ха ра́ди іуде́йска, бя́ху сокрове́ни, и Ѳомино́ бы́сть осяза́ніе по воскресе́ніи, и Свята́го Ду́ха прише́ствіе на Пятьдеся́тницу, и и́ная нѣ́кая неизрече́нная и та́инственная соверши́шася.

Тѣ́мже сіе́ у́бо мни́тся ми́, и и́стинѣ, Златоглаго́ливаго па́че извѣ́стнѣе бы́ти, я́ко двѣ́ у́бо сія́ жены́ вмѣня́ются: еди́на у́бо, я́коже рече́ся у тріе́хъ евангели́стовъ, — блудни́ца су́щи и грѣ́шница, на главу́ Христо́ву мѵ́ро возлія́вшая; ина́я же, у Іоа́нна, — Марíя, сестра́ Ла́зарева, самѣ́мъ же Боже́ственнымъ нога́мъ Христо́вымъ сіе́ прине́сшая и возлія́вшая. Ины́я у́бо, я́же въ Виѳа́ніи, ве́чери; и́ную же бы́ти Та́йную. И я́вственно и отъ о́ныхъ, по по́вѣсти о блудни́цѣ се́й, ученики́ Спа́съ ко гра́ду посыла́етъ угото́вати Па́сху. Иди́те, глаго́ля, во гра́дъ ко о́нсицѣ и рцы́те: Учи́тель глаго́летъ: у тебе́ сотворю́ Па́сху со ученики́ Мои́ми. И па́ки: и сря́щетъ вы́ человѣ́къ, скудѣ́льникъ воды́ нося́, и то́й пока́жетъ ва́мъ го́рницу ве́лію по́стланную, та́мо угото́вайте на́мъ. Они́ же отше́дше, глаго́летъ, обрѣто́ша, я́коже заповѣ́да и́мъ, и угото́ваша Па́сху, я́вѣ зако́нную, при две́рехъ су́щую, ю́же и прише́дъ, соверши́ со ученики́, я́коже боже́ственный Златоу́стъ глаго́летъ. Та́же и Ве́чери быва́емой, сíесть Та́йной, и Боже́ственному умове́нію посредѣ́ содѣ́яну бы́вшу, па́ки возле́гъ, и на́шу предае́тъ Па́сху — на са́мой трапе́зѣ, я́коже язы́комъ Златы́й Іоа́ннъ повѣству́етъ, и сія́ у́бо та́ко.

Боже́ственный же Іоа́ннъ, къ сему́ и Ма́рко, боже́ственніи евангели́сти, и мѵ́ра ви́дъ приложи́ша, «вѣ́рное» сіе́ именова́вше и «многоцѣ́нное». Возмнѣ́ша же «пистико́нъ», сíесть «вѣ́рное» нарещи́, «неле́стное же и нерастворе́нное и ввѣ́ренное въ чистоту́», не́гли же и нарица́ніе бѣ́ нѣ́кое сіе́, изря́днѣйшаго и пе́рваго мѵ́ра. Прилага́етъ же Ма́рко, я́ко и сосу́дъ сокруши́ отъ тща́нія жена́, а́ки тѣсновхо́дный, и́же и «алава́стръ» имену́етъ. Есть же се́й сосу́дъ сткля́ный, я́коже глаго́летъ свяще́нный Епифа́ній, безъ рукоя́ти сотворе́нный нѣ́кія, и́же и «викíонъ» си́це глаго́лется. Бѣ́ же мѵ́ро о́ное сложе́ное отъ ви́довъ у́бо и и́ныхъ мно́гихъ, па́че же отъ си́хъ — смѵ́рны, цвѣ́та кинамо́ма благоуха́нна, сíесть тро́сти арома́тскія, и еле́я.

Но Иже у́мнымъ мѵ́ромъ пома́завыйся, Христе́ Бо́же, находя́щихъ страсте́й свободи́ и поми́луй на́съ, я́ко еди́нъ Свя́тъ и Человѣколю́бецъ, ами́нь.

Пѣ́снь 8.

[Ρ] Ирмо́съ: Глаго́лъ мучи́телевъ поне́же превозмо́же, седмери́цею пе́щь разжже́на бы́сть иногда́, въ не́йже о́троцы не опали́шася, царе́во попра́вше велѣ́ніе, но вопія́ху: вся́ дѣла́ Госпо́дня, Го́спода по́йте и превозноси́те во вся́ вѣ́ки.

[Α] Излива́ющи жена́ мѵ́ро честно́е Влады́чню и Боже́ственному стра́шному верху́, Христе́, слѣдо́въ Твои́хъ пречи́стыхъ прикосну́ся оскверне́ныма дла́ньма, и вопія́ше: вся́ дѣла́ Госпо́дня, Го́спода по́йте и превозноси́те во вся́ вѣ́ки.

[Δ] Слеза́ми омыва́етъ но́зѣ, пови́нная грѣхо́мъ, Созда́вшаго и отира́етъ власы́ свои́ми. Тѣ́мже въ житіи́ содѣ́янныхъ не погрѣши́ избавле́нія, но вопія́ше: вся́ дѣла́ Госпо́дня, Го́спода по́йте и превозноси́те во вся́ вѣ́ки.

[Ι] Священнодѣ́йствуется избавле́ніе благонра́внѣй, отъ спаси́тельныхъ утро́бъ же и сле́зъ исто́чника, въ не́мже исповѣ́даніемъ измы́вшися, не стыдя́шеся, но вопія́ше: вся́ дѣла́ Госпо́дня, Го́спода по́йте и превозноси́те во вся́ вѣ́ки.

Та́же: Хва́лимъ, благослови́мъ, [покланя́емся Го́сподеви, пою́ще и превознося́ще во вся́ вѣ́ки.]

И па́ки ирмо́съ: Глаго́лъ мучи́телевъ [поне́же превозмо́же, седмери́цею пе́щь разжже́на бы́сть иногда́, въ не́йже о́троцы не опали́шася, царе́во попра́вше велѣ́ніе, но вопія́ху: вся́ дѣла́ Госпо́дня, Го́спода по́йте и превозноси́те во вся́ вѣ́ки].

Честнѣ́йшую.., не пое́мъ.

Пѣ́снь 9.

[Ψ] Ирмо́съ: Душа́ми чи́стыми и нескве́рными устна́ми, пріиди́те, возвели́чимъ Нескве́рную и Пречи́стую Ма́терь Емману́илеву, Еюже изъ Нея́ къ Рожде́нному принося́ще моли́тву: пощади́ ду́ши на́ша, Христе́ Бо́же, и спаси́ на́съ.

[Α] Неразу́менъ я́влься и лука́въ ревнообра́зникъ, да́ръ достойнобоже́ственъ сло́вомъ продае́тъ. Имже до́лгъ разрѣши́ся грѣхо́въ, кра́дый лю́тый Іу́да любобоже́ственную благода́ть. Пощади́ ду́ши на́ша, Христе́ Бо́же, и спаси́ на́съ.

[Λ] Глаго́летъ, ше́дъ, беззако́ннымъ князе́мъ: что́ ми́ хо́щете да́ти и а́зъ Христа́ ва́мъ иско́маго хотя́щимъ преда́мъ? Присвое́ніе Христо́во Іу́да отри́нувый зла́томъ. Пощади́ ду́ши на́ша, Христе́ Бо́же, и спаси́ на́съ.

[Ω] О, слѣпо́тнаго сребролю́бія, нечести́ве! Отону́дуже забве́ніе получи́лъ еси́, я́ко души́ ника́коже равностоя́теленъ мíръ, я́коже научи́лся еси́: отча́яніемъ бо са́мъ себе́ удави́лъ еси́, вже́гся, преда́телю. Пощади́ ду́ши на́ша, Христе́ Бо́же, и спаси́ насъ.

Та́же ирмо́съ: Душа́ми чи́стыми и нескве́рными устна́ми, [пріиди́те, возвели́чимъ Нескве́рную и Пречи́стую Ма́терь Емману́илеву, Еюже изъ Нея́ къ Рожде́нному принося́ще моли́тву: пощади́ ду́ши на́ша, Христе́ Бо́же, и спаси́ на́съ.]

Ексапостила́рій, три́жды, я́ко обы́чно:

Черто́гъ Твой ви́жду, Спа́се мо́й, украше́нный, и оде́жды не и́мамъ, да вни́ду въ о́нь. Просвѣти́ одѣя́ніе души́ моея́, Свѣтода́вче, и спаси́ мя́.

На хвали́техъ поста́вимъ стихи́ 4 и пое́мъ сія́ самогла́сны, гла́съ 1:

Тебе́, Дѣ́выя Сы́на, блудни́ца позна́вши Бо́га, глаго́лаше, въ пла́чи моля́щися, я́ко сле́зъ досто́йная содѣ́лавшая: разрѣши́ до́лгъ, я́коже и а́зъ власы́; возлюби́ лю́бящую, пра́ведно ненави́димую, и бли́зъ мытаре́й Тебе́ проповѣ́мъ, Благодѣ́телю Человѣколю́бче.

Многоцѣ́нное мѵ́ро блудни́ца смѣси́ со слеза́ми и излія́ на пречи́стѣи но́зѣ Твои́, облобыза́ющи. Оную а́біе оправда́лъ еси́, на́мъ же проще́ніе да́руй, Пострада́вый о на́съ, и спаси́ на́съ.

Егда́ грѣ́шная приноша́ше мѵ́ро, тогда́ учени́къ соглаша́шеся пребеззако́ннымъ. Овая у́бо ра́довашеся, истоща́ющи мѵ́ро многоцѣ́нное, се́й же тща́шеся прода́ти Безцѣ́ннаго. Сія́ Влады́ку познава́ше, а се́й отъ Влады́ки разлуча́шеся. Сія́ свобожда́шеся, а Іу́да ра́бъ быва́ше врагу́. Лю́то е́сть лѣ́ность, ве́ліе покая́ніе: е́же мнѣ́ да́руй, Спа́се, пострада́вый о на́съ, и спаси́ на́съ.

О, Іу́дина окая́нства! Зря́ше блудни́цу, цѣлу́ющую стопы́, и умышля́ше ле́стію преда́нія цѣлова́ніе. Оная власы́ разрѣши́, а се́й я́ростію вяза́шеся, нося́ вмѣ́сто мѵ́ра злосмра́дную зло́бу: за́висть бо не вѣ́сть предпочита́ти поле́зное. О, Іу́дина окая́нства! Отъ него́же изба́ви, Бо́же, ду́ши на́ша.

Сла́ва, гла́съ 2:

Грѣ́шная тече́ къ мѵ́ру, купи́ти многоцѣ́нное мѵ́ро, е́же пома́зати Благодѣ́теля, и мѵропрода́телю вопія́ше: да́ждь ми́ мѵ́ро, да пома́жу и а́зъ Очи́стившаго вся́ моя́ грѣхи́.

И ны́нѣ, гла́съ 6:

Погруже́ная грѣхо́мъ, обрѣ́те Тя́, приста́нище спасе́нія, ви́ждь и мѵ́ра со слеза́ми растворя́ющую, Тебѣ́ вопія́ше: ви́ждь, согрѣша́ющихъ покая́нія ожида́яй. Но, Влады́ко, спаси́ мя отъ волны́ грѣхо́вныя, вели́кія ра́ди Твоея́ ми́лости.

На стихо́внѣ стихи́ры самогла́сны, гла́съ 6:

Дне́сь Христо́съ прихо́дитъ въ до́мъ фарисе́овъ, и жена́ грѣ́шница приступи́вши къ нога́мъ, валя́шеся, вопію́щи: ви́ждь погруже́нную грѣхо́мъ, отча́янную дѣя́ній ра́ди, негнуша́емую отъ Твоея́ бла́гости, и да́ждь ми́, Го́споди, оставле́ніе злы́хъ, и спаси́ мя.

Сти́хъ: Испо́лнихомся зау́тра ми́лости Твоея́, Го́споди, [и возра́довахомся, и возвесели́хомся. Во вся́ дни́ на́ша возвесели́хомся, за дни́ въ ня́же смири́лъ ны́ еси́, лѣ́та въ ня́же ви́дѣхомъ зла́я. И при́зри на рабы́ Твоя́ и на дѣла́ Твоя́, и наста́ви сы́ны и́хъ].

Простре́ блудни́ца власы́ Тебѣ́, Влады́цѣ, простре́ Іу́да ру́цѣ беззако́ннымъ: о́ва у́бо прія́ти оставле́ніе, о́въ же взя́ти сре́бреники. Тѣ́мже Тебѣ́ вопіе́мъ, про́даному и свобо́ждшему на́съ: Го́споди, сла́ва Тебѣ́!

Сти́хъ: И бу́ди свѣ́тлость Го́спода Бо́га на́шего на на́съ, [и дѣла́ ру́къ на́шихъ испра́ви на на́съ и дѣ́ло ру́къ на́шихъ испра́ви].

Приступи́ жена́ злосмра́дная и оскверне́ная, сле́зы пролива́ющи, лю́бящи, Спа́се, стра́сть исповѣ́дающи: ка́ко воззрю́ къ Тебѣ́, Влады́цѣ? Са́мъ бо прише́лъ еси́ спасти́ блудни́цу. Изъ глубины́ уме́ршую мя́ воскреси́, Иже Ла́заря воздви́гнувый изъ гро́ба четверодне́вна. Пріими́ мя окая́нную, Го́споди, и спаси́ мя.

Сти́хъ: Исповѣ́мся Тебѣ́, Го́споди, всѣ́мъ се́рдцемъ мои́мъ, [повѣ́мъ вся́ чудеса́ Твоя́].

Отча́янная житія́ ра́ди и увѣ́домая нра́ва ра́ди, мѵ́ра нося́щая приступи́ Тебѣ́, вопію́щи: да не отве́ржеши мене́, блу́дную, Роди́выйся отъ Дѣ́вы; да не пре́зриши моя́ сле́зы, ра́досте а́нгеловъ; но пріими́ мя, ка́ющуюся, ю́же не отри́нулъ еси́ согрѣша́ющую, Го́споди, вели́кія ра́ди Твоея́ ми́лости.

Сла́ва, и ны́нѣ, самогла́сенъ, гла́съ 8. Творе́ніе Кассіа́ны и́нокини.

Го́споди, я́же во мно́гія грѣхи́ впа́дшая жена́, Твое́ ощути́вшая Божество́, мѵроно́сицы взе́мши чинъ, рыда́ющи, мѵ́ро Тебе́ пре́жде погребе́нія прино́ситъ. — Увы́ мнѣ́, — глаго́лющи, — я́ко но́щь мнѣ́ е́сть разжже́ніе блуда́ невоздержа́нна, мра́чное же и безлу́нное раче́ніе грѣха́. Пріими́ моя́ исто́чники сле́зъ, Иже облака́ми производя́й мо́ря во́ду. Приклони́ся къ мои́мъ воздыха́ніемъ серде́чнымъ, приклони́вый небеса́, неизрече́ннымъ Твои́мъ истоща́ніемъ, да облобыжу́ пречи́стѣи Твои́ но́зѣ, и отру́ сія́ па́ки главы́ моея́ власы́, и́хже въ раи́ Ева, по полу́дни, шу́момъ у́ши огласи́вши, стра́хомъ скры́ся. Грѣхо́въ мои́хъ мно́жества и суде́бъ Твои́хъ бе́здны кто́ изслѣ́дитъ? Душеспа́сче Спа́се мо́й, да мя́, Твою́ рабу́, не пре́зриши, Иже безмѣ́рную имѣ́яй ми́лость.

И а́біе: Бла́го е́сть... Трисвято́е съ покло́ны, и ча́съ 1-й безъ стихосло́вія. Быва́ютъ же и покло́ны, по чи́ну и́хъ. И литíя. И отпу́стъ. И про́чее, я́коже пре́жде указа́ся въ понедѣ́льникъ вели́кій.


[НА ЧАСѢХЪ,]

На 6-мъ часѣ́, тропа́рь проро́чества, гла́съ 8:

Дне́сь лука́вое собра́ся со́нмище и на Тя́ тще́тная поучи́шася. Днесь отъ согла́сія удавле́ніе Іу́да обруча́етъ, Каіа́фа же нево́лею исповѣ́дуетъ, я́ко Еди́нъ за всѣ́хъ воспріе́млеши сме́рть во́лею, Изба́вителю на́шъ Христе́ Бо́же, сла́ва Тебѣ́!

Проки́менъ, псало́мъ 133-й, гла́съ 4: Благослови́тъ Тя́ Госпо́дь отъ Сіо́на,* сотвори́вый не́бо и зе́млю. Сти́хъ: Се́ ны́нѣ благослови́те Го́спода, вси́ раби́ Госпо́дни.

Проро́чества Іезекíилева чте́ніе. [Главы́ 2 и 3.]

Рече́ Госпо́дь ко мнѣ́: сы́не человѣ́чь! Послю́ тя́ Азъ къ до́му Изра́илеву, огорчева́ющимъ Мя́, и́же огорчи́ша Мя́, са́ми и отцы́ и́хъ отверго́шася Мене́ до дне́шняго дне́. И сы́нове жестоколи́чніи и твердосерде́чніи; Азъ послю́ тя́ къ тѣ́мъ, и рече́ши къ ни́мъ: та́ко глаго́летъ Адонаи́ Госпо́дь. Аще у́бо услы́шатъ или́ убоя́тся, зане́ до́мъ огорчева́яй е́сть, и позна́ютъ, я́ко проро́къ еси́ ты́ посредѣ́ и́хъ. И ты́, сы́не человѣ́чь, да не убои́шися и́хъ, ни ужаса́йся отъ лица́ и́хъ, зане́ разсвирѣ́пѣютъ и обы́дутъ тя́ о́крестъ, посреди́ бо скорпíевъ ты́ живе́ши; слове́съ и́хъ не убо́йся и отъ лица́ и́хъ не ужаса́йся, зане́ до́мъ огорчева́яй е́сть. И возглаго́леши словеса́ Моя́ къ ни́мъ: а́ще у́бо услы́шатъ или́ убоя́тся, зане́ до́мъ прогнѣ́ваяй е́сть. И ты́, сы́не человѣ́чь, послу́шай Глаго́лющаго къ тебѣ́, не бу́ди огорчева́яй, я́коже до́мъ преогорчева́яй, отве́рзи уста́ твоя́, и снѣ́ждь, я́же Азъ даю́ тебѣ́. И ви́дѣхъ, и се́ рука́, просте́рта ко мнѣ́, и въ не́й сви́токъ кни́жный. И разви́ его́ пре́до мно́ю, и въ то́мъ пи́сана бы́ша пре́дняя и за́дняя, и впи́сано бя́ше въ не́мъ: рыда́ніе, и жа́лость, и го́ре. И рече́ ко мнѣ́: сы́не человѣ́чь, снѣ́ждь сви́токъ се́й, и иди́ и рцы́ сыно́мъ Изра́илевымъ. И отверзо́хъ уста́ моя́, и напита́ мя́ сви́ткомъ си́мъ. И рече́ ко мнѣ́: сы́не человѣ́чь, уста́ твоя́ снѣдя́тъ и чре́во твое́ насы́тится сви́тка сего́, да́ннаго тебѣ́. И снѣдо́хъ его́, и бы́сть во устѣ́хъ мои́хъ, я́ко ме́дъ сла́докъ.

Проки́менъ, псало́мъ 134-й, гла́съ 6: Боя́щіися Го́спода,* благослови́те Го́спода. Сти́хъ: Хвали́те и́мя Госпо́дне, хвали́те, раби́ Го́спода.

Чте́ніе Ева́нгелія. И по чи́ну трисвято́е съ покло́ны, и отдае́мъ стихосло́віе часо́въ. Девя́тый же ча́съ начина́емъ отъ трисвята́го, въ не́мже и послѣ́днее быва́етъ чте́ніе отъ Ева́нгелія. Та́же глаго́лемъ: Не преда́ждь на́съ... Трисвято́е съ покло́ны. Та́кожде и блаже́нны. Творя́ще и обы́чныя покло́ны. Глаго́лемъ же и конда́къ Вели́кія среды́, и хра́ма свята́го или́ святы́я. Сла́ва: Со святы́ми упоко́й... И ны́нѣ: хра́ма Богоро́дицы. Аще же ни́, глаго́лемъ: Предста́тельство христіа́нъ... Го́споди, поми́луй, 40, и три́ вели́кія покло́ны и 12 ма́лыя. Трисвято́е и покло́ны три́. Го́споди, поми́луй, 12, и моли́тва: Всесвята́я Тро́ице... Та́же: Досто́йно е́сть... Сла́ва, и ны́нѣ. И, вмѣ́сто отпу́ста, глаго́летъ настоя́тель моли́тву: Влады́ко Многоми́лостиве.., всю́ до конца́. Се́й же глаго́лемѣй, мы́, ни́цъ па́дше на зе́млю, мо́лимся. И по исполне́ніи тоя́, на́мъ воста́вшимъ, преклоня́ется и то́й са́мъ къ бра́тіи и про́ситъ проще́нія, глаго́ля: Благослови́те, отцы́ святíи, и прости́те ми́, грѣ́шному, я́же согрѣши́хъ во все́й жи́зни мое́й и во все́й святѣ́й Четыредеся́тницѣ, сло́вомъ, дѣ́ломъ, помышле́ніемъ и всѣ́ми мои́ми чу́вствы. Бра́тіямъ же отвѣща́вшимъ: Бо́гъ да прости́тъ ти́, честны́й о́тче. Та́же прихо́дятъ и бра́тія два́ два́, про́сятъ подо́бнѣ и тíи проще́нія, глаго́люще: Прости́ мя́, о́тче святы́й.., и про́чее, я́коже вы́ше писа́ся. И пріе́мше проще́ніе, и́демъ въ ке́лліи на́ша и молчи́мъ до часа́ вече́рняго. Въ собо́рныхъ же хра́мѣхъ и приходски́хъ росхо́дъ не быва́етъ, но, по проще́ніи, трезво́нъ въ дво́и.

Источникъ: Тріо́діонъ, сíесть трипѣ́снецъ. — Кíевъ: Въ тѵпогра́фіи Кíево-Пече́рской Успе́нской Ла́вры, 1864. — Л. 357 об. – 365 об.

/ Къ оглавленію раздѣла /


Наверхъ / Къ титульной страницѣ

0