Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - суббота, 18 ноября 2017 г. Сейчасъ на порталѣ посѣтителей - 27.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

ТРІОДІОНЪ, СІЕСТЬ ТРИПѢСНЕЦЪ,
Съ Бо́гомъ Святы́мъ, обдержа́й подоба́ющее ему́ послѣ́дованіе.

Слу́жба во святы́й и Вели́кій вто́рникъ.

[НА ВЕЧЕРНИ,]
Во святы́й и Вели́кій понедѣ́льникъ ве́чера, по предначина́тельномъ псалмѣ́, обы́чное стихосло́віе: Ко Го́споду, внегда́ скорбѣ́ти ми́, воззва́хъ...
На Го́споди воззва́хъ.., поста́вимъ стихо́въ 10 и пое́мъ стихи́ры самогла́сны дне́ 4, по два́жды, а два́, по еди́ножды, гла́съ 1:

Гла́съ 5:

Дости́гше, вѣ́рніи, спаси́тельную Стра́сть Христа́ Бо́га, неизрече́нное Его́ долготерпѣ́ніе просла́вимъ, я́ко да благоутро́біемъ Свои́мъ совоздви́гнетъ и на́съ, умерщвле́нныхъ грѣхо́мъ, я́ко Бла́гъ и Человѣколю́бецъ. [Два́жды.]

Го́споди, гряды́й къ страда́нію, Твоя́ утвержда́я ученики́, глаго́лалъ еси́, осо́бь пріе́мъ и́хъ: ка́ко глаго́лъ Мои́хъ не по́мните, я́же пре́жде реко́хъ ва́мъ? Яко вся́кому проро́ку нѣ́сть пи́сано, то́кмо во Іерусали́мѣ убіе́ну бы́ти. Ны́нѣ у́бо вре́мя настои́тъ, е́же реко́хъ ва́мъ: се́ бо предаю́ся рука́ма грѣ́шныхъ пору́ганъ бы́ти, и́же и Кресту́ Мя́ пригвозди́вше и погребе́нію преда́вше, оме́рзена вмѣня́тъ, я́ко ме́ртва. Оба́че дерза́йте: тридне́венъ бо воста́ну въ ра́дость вѣ́рныхъ и жи́знь вѣ́чную. [Два́жды.]

Го́споди, къ та́инству неизглаго́ланному Твоего́ смотре́нія, не довлѣ́ющи сыно́въ Зеведе́овыхъ ма́ти, проша́ше Тя́, вре́меннаго ца́рства по́чести дарова́тися ча́домъ ея́, но вмѣ́сто тоя́, ча́шу сме́рти обѣща́лъ еси́ пи́ти друго́мъ Твои́мъ, ю́же ча́шу пре́жде си́хъ пи́ти Са́мъ глаго́лалъ еси́, грѣхо́въ очище́ніе. Тѣ́мже Тебѣ́ вопіе́мъ: Спасе́ніе ду́шъ на́шихъ, сла́ва Тебѣ́! [Два́жды.]

Го́споди, соверше́ннѣйшая му́дрствовати Твоя́ наказу́я ученики́, не уподо́битися язы́комъ глаго́лалъ еси́, во е́же облада́ти ме́ньшими: не та́ко бо бу́детъ ва́мъ, Мои́мъ ученико́мъ, я́ко ни́щій хотя́ е́смь. Пе́рвый у́бо ва́съ, да бу́детъ всѣ́мъ слуга́; нача́льствуяй же, я́ко нача́льствуемый; предызя́щный же, я́ко послѣ́днѣйшій. Ибо пріидо́хъ Са́мъ обнища́вшему Ада́му послужи́ти и избавле́ніе да́ти за мно́гихъ ду́шу Мою́, вопію́щихъ Ми́: сла́ва Тебѣ́!

Гла́съ 8:

Изсо́хшія смоко́вницы за непло́діе, преще́нія убоя́вшеся, бра́тіе, плоды́ досто́йны покая́нія принесе́мъ Христу́, подаю́щему на́мъ ве́лію ми́лость.

Сла́ва, и ны́нѣ, гла́съ то́йже:

Втору́ю Еву еги́птяныню обрѣ́тъ змíй глаго́лы, тща́шеся ласка́ньми запя́ти Іо́сифа, но то́й оста́вивъ ри́зу, бѣжа́ грѣха́, и на́гъ не стыдя́шеся, я́коже первозда́нный пре́жде преслуша́нія. Того́ моли́твами, Христе́, поми́луй на́съ.

Та́же вхо́дъ со Ева́нгеліемъ. Свѣ́те ти́хій...

Проки́менъ, псало́мъ 127-й. Гла́съ 6: Благослови́тъ тя́ Госпо́дь отъ Сіо́на* и у́зриши блага́я Іерусали́ма. Сти́хъ: Блаже́ни вси́ боя́щіися Го́спода, ходя́щіи въ путе́хъ Его́.

Исхо́да чте́ніе. [Глава́ 1.]

Сія́ имена́ сыно́въ Изра́илевыхъ, входя́щихъ во Еги́петъ вку́пѣ со Іа́ковомъ отце́мъ и́хъ, кíйждо со всѣ́мъ до́момъ свои́мъ внидо́ша: Руви́мъ, Симео́нъ, Левíй, Іу́да, Иссаха́ръ, Завуло́нъ и Веніами́нъ, Да́нъ и Нефѳали́мъ, Га́дъ и Аси́ръ. Іо́сифъ же бя́ше во Еги́птѣ. Бя́ше же всѣ́хъ ду́шъ, изше́дшихъ изъ Іа́кова, се́дмьдесятъ пя́ть. Умре же Іо́сифъ и вся́ бра́тія его́ и ве́сь ро́дъ о́ный. Сы́нове же Изра́илевы возрасто́ша и умно́жишася, и мно́зи бы́ша и укрѣпи́шася зѣло́, зѣло́: умно́жи же и́хъ земля́. Воста́ же ца́рь и́нъ во Еги́птѣ, и́же не зна́ше Іо́сифа. Рече́ же язы́ку своему́: се́ ро́дъ сыно́въ Изра́илевыхъ вели́кое мно́жество, и укрѣпля́ется па́че на́съ; пріиди́те у́бо, прехи́тримъ и́хъ, да не когда́ умно́жатся; и егда́, а́ще приключи́тся на́мъ бра́нь, приложа́тся и сíи къ супоста́томъ, и одолѣ́вше на́мъ, изы́дутъ изъ земли́ (на́шея). И приста́ви надъ ни́ми приста́вники дѣ́лъ, да озло́бятъ и́хъ въ дѣ́лѣхъ. И созда́ша гра́ды тве́рды фарао́ну: Пи́ѳо, и Рамесси́, и Онъ, и́же е́сть Иліопо́ль. Поели́ку же и́хъ смиря́ху, толи́ко мно́жайшіи быва́ху и укрѣпля́хуся зѣло́, зѣло́. И гнуша́хуся еги́птяне сынми́ Изра́илевыми. И наси́ліе творя́ху еги́птяне сыно́мъ Изра́илевымъ ну́ждею. И болѣ́зненну тѣ́мъ жи́знь творя́ху въ дѣ́лѣхъ жесто́кихъ, бре́ніемъ, и плинѳодѣ́ланіемъ, и всѣ́ми дѣ́лы, я́же въ поля́хъ, во всѣ́хъ дѣ́лѣхъ, и́миже порабоща́ху и́хъ съ ну́ждею. И рече́ ца́рь еги́петскій ба́бамъ евре́йскимъ, еди́ной и́хъ и́мя Сепфо́ра, и и́мя второ́й Фу́я. И рече́ (и́мъ): егда́ ба́бите евре́анынямъ, и су́ть къ рожде́нію: а́ще у́бо му́жескій по́лъ бу́детъ, убива́йте его́, а́ще же же́нскій, снабдѣва́йте его́. Убоя́шася же ба́бы Бо́га и не сотвори́ша, я́коже повелѣ́ и́мъ ца́рь еги́петскій, и живля́ху му́жескій по́лъ. Призва́ же ца́рь еги́петскій ба́бы и рече́ и́мъ: что́ я́ко сотвори́сте ве́щь сію́, и оживля́ете му́жескій по́лъ? Реко́ша же ба́бы фарао́ну: не я́ко жены́ еги́птяныни, та́ко и жены́ евре́аныни: ражда́ютъ бо пре́жде не́же вни́ти къ ни́мъ ба́бамъ, и ражда́ху. Бла́го же творя́ше Бо́гъ ба́бамъ, и мно́жахуся лю́діе и укрѣпля́хуся зѣло́.

Проки́менъ, псало́мъ 128-й, гла́съ 6: Благослови́хомъ вы́* во и́мя Госпо́дне. Сти́хъ: Мно́жицею бра́шася со мно́ю отъ ю́ности моея́.

Іова чте́ніе. [Глава́ 1.]

Человѣ́къ нѣ́кій бя́ше во странѣ́ Авситидíйстѣй, ему́же и́мя — Іовъ. И бѣ́ человѣ́къ о́нъ и́стиненъ, непоро́ченъ, пра́веденъ, богочести́въ, удаля́яйся отъ вся́кія лука́выя ве́щи. Бы́ша же ему́ сы́нове се́дмь и дще́ри три́. И бя́ху ско́ти его́: ове́цъ се́дмь ты́сящъ, вельблю́довъ три́ ты́сящи, супру́гъ воло́въ пя́ть со́тъ, и осли́цъ пасо́мыхъ пя́ть со́тъ, и слу́гъ мно́го зѣло́, и дѣла́ ве́лія бя́ху ему́ на земли́, и бѣ́ человѣ́къ о́ный благоро́днѣйшій су́щихъ отъ восто́къ со́лнца. Сходя́щеся же сы́нове его́ дру́гъ ко дру́гу, творя́ху пи́ръ на кíйждо де́нь, спое́млюще вку́пѣ и три́ сестры́ своя́, я́сти и пи́ти съ ни́ми. И егда́ скончава́шася днíе пи́ра, посыла́ше Іовъ и очища́ше и́хъ, востая́ зау́тра: и приноша́ше о ни́хъ же́ртвы по числу́ и́хъ, и тельца́ еди́наго о грѣсѣ́, о душа́хъ и́хъ. Глаго́лаше бо Іовъ: не́гли когда́ сы́нове мои́ согрѣши́ша и въ мы́сли свое́й зла́я помы́слиша проти́ву Бо́га? Та́ко у́бо творя́ше Іовъ вся́ дни́. И бы́сть я́ко де́нь се́й: и се́ пріидо́ша а́нгели Бо́жіи предста́ти предъ Го́сподемъ и діа́волъ пріи́де съ ни́ми. И рече́ Госпо́дь діа́волу: отку́ду прише́лъ еси́? И отвѣща́въ діа́волъ Го́сподеви, рече́: обше́дъ зе́млю и проше́дъ поднебе́сную, се́ е́смь. И рече́ ему́ Госпо́дь: вня́лъ ли еси́ мы́слію твое́ю на раба́ Моего́ Іова? Зане́ нѣ́сть, я́ко о́нъ, на земли́ человѣ́къ: непоро́ченъ, и́стиненъ, богочести́въ, удаля́яйся отъ вся́кія лука́выя ве́щи. Отвѣща́ же діа́волъ и рече́ предъ Го́сподемъ: еда́ ту́не Іовъ чти́тъ Го́спода? Не Ты́ ли огради́лъ еси́ внѣ́шняя его́ и вну́тренняя до́му его́, и я́же внѣ́ всѣ́хъ су́щихъ его́ о́крестъ? Дѣла́ же руку́ его́ благослови́лъ еси́ и скоты́ его́ мно́ги сотвори́лъ еси́ на земли́. Но посли́ ру́ку Твою́ и косни́ся всѣ́хъ, я́же и́мать, а́ще не въ лице́ Тя́ благослови́тъ? Тогда́ рече́ Госпо́дь діа́волу: се́ вся́, ели́ка су́ть ему́, даю́ въ ру́ку твою́, но самого́ да не косне́шися. И изы́де діа́волъ отъ Го́спода.

Та́же: Да испра́вится моли́тва моя́...

И посе́мъ Ева́нгеліе отъ Матѳе́я, зача́ло 98: Во вре́мя о́но, сѣдя́щу Іису́су... И про́чее послѣ́дованіе Преждеосвяще́нныхъ, по обы́чаю. Та́ко до́лженствуетъ бы́ти и въ Вели́кій вто́рникъ и въ Вели́кую сре́ду.

[Зри́:] Аще же нѣ́сть Преждеосвяще́нныя, пое́мъ на Го́споди воззва́хъ.., полови́ну отъ стихи́ръ, на 6. Стихи́ра, гла́съ 1: Гряды́й Госпо́дь къ во́льной стра́сти.., два́жды. Дости́гше, вѣ́рніи.., два́жды. Го́споди, къ та́инству неизглаго́ланному.., два́жды. Сла́ва, и ны́нѣ. Го́споди, гряды́й къ страда́нію... По си́хъ вхо́дъ съ Ева́нгеліемъ и Свѣ́те ти́хій... Та́же проки́менъ, и паремíи, и Ева́нгеліе. Та́же: Сподо́би Го́споди... И ектенія́: Испо́лнимъ вече́рнюю... На стихо́внѣ, отъ тѣ́хже стихи́ръ, стихи́ра, гла́съ 5: Го́споди, соверше́ннѣйшая му́дрствовати... Сти́хъ: Къ Тебѣ́ возведо́хъ о́чи мои́... И па́ки ту́южде стихи́ру. Сти́хъ: Поми́луй на́съ, Го́споди... Гла́съ 8: Изсо́хшія смоко́вницы... Сла́ва, и ны́нѣ, гла́съ то́йже: Втору́ю Еву... Та́же: Ны́нѣ отпуща́еши... И про́чая обы́чная, съ покло́ны. И по коне́чномъ трисвято́мъ и по Отче на́шъ... Го́споди, поми́луй, 12. Та́же моли́тва: Всесвята́я Тро́ице... и Бу́ди и́мя Госпо́дне... И отпу́стъ.

Си́це у́бо твори́мъ во вто́рникъ и въ сре́ду.

[Зри́:] На трапе́зѣ же яди́мъ сухояде́ніе и си́мъ удовля́емся. И я́коже въ пе́рвую недѣ́лю свята́го сего́ поста́, си́це и въ сія́ дни́, въ Вели́кій понедѣ́льникъ, во вто́рникъ и въ сре́ду, пости́тися подоба́етъ.

[Зри́:] Вѣ́дати бо подоба́етъ, я́ко и Шесты́й вели́кій Собо́ръ повелѣ́ спаси́тельныя Стра́сти дни́ въ постѣ́, и моли́твѣ, и умиле́ніи се́рдца сотворя́ти вѣ́рнымъ. Въ полу́нощи же Вели́кія суббо́ты оставля́ти по́стъ, [по] боже́ственнымъ евангели́стомъ Матѳе́ю и Луцѣ́: о́вому у́бо «по́здѣ въ суббо́ту» глаго́ланіемъ; о́вому же «у́тромъ глубо́кимъ», ме́длемое на́мъ но́щи напису́ющимъ.


[НА ПОВЕЧЕРІИ.]
Во святы́й и Вели́кій понедѣ́льникъ ве́чера, повече́ріе глаго́лемъ вели́кое.

На повече́ріи трипѣ́снецъ господи́на Андре́я Кри́тскаго, гла́съ 8.
Пѣ́снь 2.

Ирмо́съ: Вонми́, не́бо, и возглаго́лю, и воспою́ Христа́, отъ Дѣ́вы ро́ждшагося во спасе́ніе на́ше.

По́йдемъ со Христо́мъ къ горѣ́ Елео́нстѣй, та́йно со апо́столы соводвори́мся Ему́.

Разумѣ́й, смире́нное мое́ се́рдце, что́ е́сть жерно́вная при́тча? О не́йже пре́жде рече́ Христо́съ, и истрезви́ся про́чее.

Гото́ви сама́ себе́, о душе́ моя́, ко исхо́ду: прише́ствіе приближа́ется неумоли́маго Судіи́.

Богоро́диченъ: Пречи́стая Богоро́дице Дѣ́во, еди́на Всепѣ́тая, Сы́на Твоего́ моли́ о рабѣ́хъ Твои́хъ.

Инъ, гла́съ то́йже.

Ирмо́съ: Ви́дите, ви́дите, я́ко Азъ е́смь Бо́гъ, дре́вле Изра́иля сквозѣ́ Чермно́е мо́ре проведы́й, и пита́вый, и спасы́й, и отъ го́рькія рабо́ты свободи́вый фарао́новы.

Ви́дите, ви́дите, я́ко Азъ е́смь Бо́гъ, Иже пре́жде бытія́ всѣ́хъ, и пре́жде сотворе́нія земли́ и не́ба, вѣ́мъ вся́, и ве́сь сы́й во Отцѣ́, и всего́ ношу́ въ Себѣ́.

Сло́вомъ соста́вихъ не́бо вку́пѣ и зе́млю: со Отце́мъ бо бѣ́хъ, и сло́вомъ ношу́ вся́, я́ко Сло́во, му́дрость, и си́ла, и о́бразъ, и содѣйстви́теленъ, и равнодѣ́теленъ.

Кто́ времена́ положи́? Кто́ вѣ́ки соблюда́яй? Кто́ вся́ опредѣля́яй и совоздвиза́яй? Ра́звѣ Безнача́льный при́сно сы́й со Отце́мъ, я́коже заря́ во свѣ́тѣ.

О, безмѣ́рнаго Твоего́ человѣколю́бія, Іису́се! Сказа́лъ бо еси́ на́мъ сконча́нія свы́ше вре́мя, скры́въ ча́съ, уясни́въ же свѣ́тло о́бразы его́.

Вся вѣ́си, вся́ зна́еши, Іису́се, я́ко имѣ́яй все́ въ Себѣ́ Оте́ческое достоя́ніе Боже́ственнѣ, и всего́ Ду́ха всажде́на нося́й въ Себѣ́, соприсносу́щнаго Отцу́.

Влады́ко Го́споди, вѣко́въ Тво́рче, сподо́би и на́съ свяще́нный о́ный тогда́ гла́съ услы́шати, зову́щій избра́нныя Отца́ въ Ца́рство небе́сное.

Сла́ва, [тро́иченъ]: Безнача́льная, Несозда́нная Тро́ице, Нераздѣ́льная Еди́нице, Тро́е Су́щая и Еди́но! Отче, Сы́не и Ду́ше, Еди́ный Бо́же, пріими́ пѣ́ніе отъ бре́нныхъ язы́къ, я́коже отъ у́стъ пла́менныхъ.

[И ны́нѣ,] богоро́диченъ: Селе́ніе свято́е яви́лася еси́, Дѣ́во, Бо́жіе: въ Тя́ бо Небе́сный Ца́рь всели́вся пло́тію, про́йде кра́сный, человѣ́ка въ Себѣ́ вообрази́въ Боже́ственнѣ.

[Ирмо́съ: Ви́дите, ви́дите, я́ко Азъ е́смь Бо́гъ, дре́вле Изра́иля сквозѣ́ Чермно́е мо́ре проведы́й, и пита́вый, и спасы́й, и отъ го́рькія рабо́ты свободи́вый фарао́новы.]

[Го́споди, поми́луй, три́жды. Сла́ва, и ны́нѣ.]
Сѣда́ленъ, гла́съ 2. Подо́бенъ: Милосе́рдія су́щи.

Милосе́рдіемъ дви́жимь, Христе́, во́лею преды́деши страда́ти, Благодѣ́телю, хотя́й страсте́й на́съ изба́вити, и е́же во а́дѣ осужде́нія. Тѣ́мже честна́я Твоя́ воспѣва́емъ Страда́нія, и сла́вимъ, Спа́се, кра́йнее Твое́ вси́ схожде́ніе.

Пѣ́снь 8.

Ирмо́съ: Ангели и небеса́, на престо́лѣ сла́вы Сѣдя́щаго, и я́ко Бо́га непреста́нно сла́вимаго, благослови́те, по́йте, и превозноси́те Его́ во вѣ́ки.

Вся́ко слы́шала еси́, душе́, ка́ко Христо́съ боже́ственнымъ ученико́мъ Свои́мъ провозглаша́ше, глаго́ля сконча́ніе; разумѣ́вши же Тво́й коне́цъ, угото́вися про́чее: вре́мя исхо́да пріи́де.

Позна́ла еси́, непло́дная душе́, лука́ваго раба́ при́тчу? Бо́йся и не небрези́ о дарова́ніи, его́же прія́ла еси́, да не сокры́еши въ зе́млю, но да ку́плю дѣ́еши.

Да уясни́тся свѣща́, да преизліе́тся сея́ и еле́й, я́коже дѣ́вамъ тогда́ сострада́ніе, да обря́щеши, душе́ моя́, черто́гъ Христо́въ тогда́ отве́рстый.

Въ суббо́ту бѣ́гство и въ зимѣ́ глаго́ля Учи́тель, седма́го бу́рю предгада́тельствуетъ настоя́щаго вѣ́ка, въ не́мже на́йдетъ, я́ко зима́, кончи́на.

Яко ско́рость мо́лніи преходя́щая, та́ко тогда́ бу́детъ стра́шное о́ное Влады́ки твоего́ прише́ствіе, душе́ моя́; слы́шала еси́, гото́ва про́чее бы́ти потщи́ся.

Егда́ пріи́детъ Судія́ съ ты́сящами и тма́ми а́нгельскихъ чино́въ и си́лъ, тогда́ кíй стра́хъ, душе́ моя́, кíй тре́петъ, — увы́ мнѣ́! — наги́мъ стоя́щимъ всѣ́мъ.

Благослови́мъ Отца́, и Сы́на, и Свята́го Ду́ха, Го́спода.

Еди́нъ Бо́гъ у́бо Тро́ица: ни Отцу́ изступи́вшу въ сыновство́, ниже́ Сы́ну премѣни́вшуся во исхожде́ніе, но сво́йственная и обое́ — Свѣ́тъ; Бо́га, Три́ сла́влю во вѣ́ки.

И ны́нѣ, богоро́диченъ: Моли́твами, Бо́же, Богоро́дицы, пріими́ моли́тву на́шу, возниспосли́ же ми́лости Твоя́ на вся́ бога́тно и ми́ръ Тво́й пода́ждь лю́демъ Твои́мъ.

Хва́лимъ, благослови́мъ, покланя́емся Го́сподеви, пою́ще и превознося́ще во вся́ вѣ́ки.

Та́же ирмо́съ: Ангели и небеса́, на престо́лѣ [сла́вы Сѣдя́щаго, и я́ко Бо́га непреста́нно сла́вимаго, благослови́те, по́йте, и превозноси́те Его́ во вѣ́ки].

Пѣ́снь 9.

Ирмо́съ: Проявле́нное на горѣ́ законополо́жнику во огни́ и купинѣ́, Рождество́ Приснодѣ́вы, въ на́ше вѣ́рныхъ спасе́ніе, пѣ́сньми немо́лчными велича́емъ.

Слы́шала еси́, душе́ моя́, Судіи́ предвозглаша́ющу и уча́щу тя́ вре́мене кончи́ны? Гото́ви я́же на исхо́дъ дѣла́, да не я́ко неиску́сна, Бо́га отве́ржена бу́деши.

Отъ смоко́вницы, о душе́ моя́, научи́ся кончи́ны! Егда́ мла́до бу́детъ ли́ствіе и прозя́бнетъ вѣ́твіе, жа́твы ча́съ про́чее; и ты́, егда́ сія́ уви́диши, разумѣ́й, я́ко при две́рехъ е́сть.

Кто́ ра́звѣ Тебе́ ины́й Твоего́ зна́етъ Отца́? Или́ кто́, кромѣ́ Тебе́, вѣ́сть ча́съ или́ де́нь? У Тебе́ бо сокро́вища прему́дрости вся́ вну́трь су́ть, Христе́ Бо́же.

Кни́ги у́бо разгну́тся тогда́, престо́ломъ поста́вленнымъ; дѣя́нія же облича́тся, наги́мъ стоя́щимъ всѣ́мъ; ни свидѣ́телемъ, ни клеветнико́мъ прису́тствующимъ: обнаже́на бо вся́ Бо́гу.

Гряде́тъ всѣ́хъ Судія́, изведе́нъ бы́ти на су́дъ; на престо́лѣ херуви́мстѣ Сѣдя́й — я́ко пови́нный предста́ти Пила́ту, и вся́ пострада́ти, да спасе́тся Ада́мъ.

Прибли́жися Па́сха на́мъ вели́кая и Боже́ственная; по двою́ бо днíю преднауча́етъ Христо́съ, страда́нія пропису́я де́нь, въ о́ньже Отцу́ Же́ртва приведе́тся.

При Крестѣ́ Твое́мъ, Спа́се, предстоя́щи Ма́ти и Твое́ непра́ведное зря́щи заколе́ніе, вопія́ше: увы́ Мнѣ́, Ча́до Мое́! Увы́ Мнѣ́, Незаходи́мый Свѣ́те! Просія́й всѣ́мъ, Со́лнце сла́вы, свѣ́тъ.

Сла́ва, [тро́иченъ]: О, Еди́нице Свята́я: Тро́ице Еди́но Божество́, и Тро́ица Еди́нице Бо́же, Тріѵпоста́сное Естество́, Единоче́стная, и Нераздѣ́льная Сла́во, изба́ви отъ бѣ́дъ ду́ши на́ша!

И ны́нѣ, богоро́диченъ: Пріими́ Ма́терь Твою́, Христе́, въ моли́тву, да моли́твами Ея́ умири́ши мíръ, и утверди́ши ца́рствія ски́птры, и це́ркви Твоя́ совокупи́ши во еди́но.

Ирмо́съ 9-я пѣ́сни: Проявле́нное на горѣ́ [законополо́жнику во огни́ и купинѣ́, Рождество́ Приснодѣ́вы, въ на́ше вѣ́рныхъ спасе́ніе, пѣ́сньми немо́лчными велича́емъ], за Досто́йно... И покло́нъ до земли́.

Трисвято́е. И по Отче на́шъ... Конда́къ дне́. Та́же: Го́споди си́лъ, съ на́ми бу́ди... И про́чее обы́чное. И отпу́стъ.



[НА УТРЕНИ.]

Во святы́й и Вели́кий вто́рникъ на у́трени: Аллилу́ія.., на гла́съ 8. Тропа́рь три́жды: Се́, Жени́хъ гряде́тъ... Пи́санъ въ понедѣ́льникъ Вели́кій. И обы́чное стихосло́віе.

По 1-мъ стихосло́віи сѣда́ленъ, гла́съ 4. Подо́бенъ: Вознесы́йся на Крестъ.

Жениха́, бра́тіе, возлю́бимъ, свѣщи́ своя́ украси́мъ, въ добродѣ́телехъ сія́юще и вѣ́рѣ пра́вой, да, я́ко му́дрыя Госпо́дни дѣ́вы, гото́ви вни́демъ съ Ни́мъ на бра́ки: Жени́хъ бо да́ры, я́ко Бо́гъ, всѣ́мъ подае́тъ нетлѣ́нный вѣне́цъ.

Сла́ва, и ны́нѣ, то́йже.

По 2-мъ стихосло́віи сѣда́ленъ, гла́съ 4. Подо́бенъ: Удиви́ся Іо́сифъ.

Совѣ́тъ, Спа́се, беззако́нный на Тя́ свяще́нницы и кни́жницы за́вистію собра́вше лю́тѣ, въ преда́тельство подвиго́ша Іу́ду; тѣ́мже безсту́дно исхожда́ше, глаго́лаше на Тя́ беззако́ннымъ лю́демъ: Что́ ми, — глаго́летъ, — дади́те, и а́зъ ва́мъ Его́ преда́мъ въ ру́ки ва́ша? Осужде́нія сего́ изба́ви, Го́споди, ду́ши на́ша.

Сла́ва, и ны́нѣ, то́йже.

По 3-мъ стихосло́віи сѣда́ленъ, гла́съ 8. Подо́бенъ: Прему́дрости.

Іу́да ра́зумомъ сребролю́бствуетъ, на Учи́теля вражде́бнѣ подвиза́ется, совѣ́туетъ, поуча́ется преда́нію, свѣ́та отпа́даетъ, тму пріи́мъ, соглаша́етъ цѣ́ну, продае́тъ Безцѣ́ннаго; тѣ́мже и удавле́ніе — возме́здіе, е́же содѣ́я, обрѣта́етъ, окая́нный, и лю́тую сме́рть, преда́въ Тебе́, Го́спода. Того́ на́съ ча́сти изба́ви, Христе́ Бо́же, прегрѣше́ній оставле́ніе да́руя пра́зднующимъ вѣ́рою пречи́стую Стра́сть Твою́.

Сла́ва, и ны́нѣ, то́йже.

Та́же: И о сподо́битися на́мъ... Ева́нгеліе отъ Матѳе́я, зача́ло 90-е, безъ престу́пки: Во вре́мя о́но, совѣ́тъ пріе́мше вси́ фарисе́е на Іису́са, я́ко да обольстя́тъ Его́ сло́вомъ... Коне́цъ въ зача́лѣ 96-мъ: Благослове́нъ Гряды́й во и́мя Госпо́дне. Посе́мъ псало́мъ 50-й. Та́же: Спаси́, Бо́же, лю́ди Твоя́... Го́споди, поми́луй, 12. Посе́мъ ектенія́ ма́лая.

Та́же конда́къ, гла́съ 2. Подо́бенъ: Вы́шнихъ ища́.

Ча́съ, душе́, конца́ помы́сливши и посѣче́нія смоко́вницы убоя́вшися, да́нный тебѣ́ тала́нтъ трудолю́бно дѣ́лай, окая́нная, бо́дрствующи и зову́щи: да не пребу́демъ внѣ́ черто́га Христо́ва.

Икосъ:

Что́ уныва́еши, душе́ моя́ окая́нная? Что́ мечта́еши безвре́менно попече́нія неполе́зная? Что́ упражня́ешися къ мимотеку́щимъ? Послѣ́днѣйшій ча́съ е́сть отсе́лѣ, и разлучи́тися и́мамы отъ су́щихъ здѣ́. До́ндеже вре́мя и́маши, возни́кни, зову́щи: согрѣши́хъ Ти́, Спа́се мо́й, не посѣцы́ мене́, я́коже непло́дную смоко́вницу, но, я́ко благоутро́бенъ, Го́споди, уще́дри со стра́хомъ зову́щую: да не пребу́демъ внѣ́ черто́га Христо́ва.

Синакса́рій.

Стихи́: Вто́рникъ велича́йшій дѣ́въ де́сять но́ситъ,
                  Побѣ́ду нося́щихъ неумы́тнаго Влады́ки.

Во святы́й и Вели́кій вто́рникъ десяти́ дѣ́въ при́тчи па́мять твори́мъ, зане́ таковы́я при́тчи, восходя́ во Іерусали́мъ Госпо́дь, на Стра́сть гряды́й, Свои́мъ глаго́лаше ученико́мъ, су́ть же при́тчи, я́же и ко іуде́емъ простира́ше. Десяти́ у́бо дѣ́въ при́тчу на ми́лостыню обраща́я, рече́, вку́пѣ и уча́ е́же пре́жде конца́ всѣ́мъ гото́вымъ бы́ти. Зане́ о дѣ́вствѣ мно́го тѣ́мъ ска́зоваше и о скопцѣ́хъ: мно́гую же и сла́ву дѣ́вство и́мать, вели́ко бо е́сть, я́ко вои́стинну. Но да не кто́, сіе́ дѣ́ло исправля́я, небреже́тъ о други́хъ, па́че же о ми́лостыни, е́же свѣща́ дѣ́вства просвѣща́ется, вво́дитъ свяще́нное Ева́нгеліе при́тчу сію́: и пя́ть у́бо му́дрыхъ нари́четъ, я́ко съ дѣ́вствомъ и мно́гій и бога́тый ми́лостыни еле́й приложи́вшихъ; и пя́ть же бу́ихъ, я́ко и тѣ́хъ дѣ́вство у́бо иму́щихъ, ми́лостыню же — несравне́нну. Сего́ бо ра́ди бу́ія, зане́ бо́льшее испра́вивше, о ме́ньшемъ же небрего́ша, и ничто́же блудни́цъ ра́знствоваху, я́ко они́ у́бо тѣлесы́, сія́ же имѣ́ніи побѣжде́ни бы́ша.

Но́щи же настоя́щаго житія́ мимотеку́щей, воздрема́шася вся́ дѣ́вы, сíесть умро́ша, со́нъ бо сме́рть глаго́лется. И спя́щимъ и́мъ, во́пль посреди́ но́щи бы́сть. И о́вы у́бо, оби́льно еле́й приложи́вшія, две́ремъ отве́рзшимся, внидо́ша съ женихо́мъ; бу́ія же, недово́льный еле́й иму́щія, по снѣ́ иска́ху его́. Но му́дрыя хотѣ́вшія у́бо да́ти, не мо́гшія же, пре́жде вше́ствія отвѣща́ша, глаго́люще: еда́ когда́ не удовлѣ́етъ на́мъ и ва́мъ? Иди́те къ продаю́щимъ, сíесть убо́гимъ, и купи́те, — но неудо́бно, по сме́рти бо сіе́ невозмо́жно, еже и о бога́томъ и Ла́зарѣ показу́етъ Авраа́мъ, глаго́ля: ну́жда у́бо преходи́ти отсю́ду та́мо. Но бу́ія, прише́дши непросвѣще́ны, си́це вопію́тъ, во врата́ ударя́юще: Го́споди, Го́споди, отве́рзи на́мъ! Са́мъ же Госпо́дь Собо́ю стра́шный о́ный отвѣ́тъ дае́тъ: отыди́те, ре́къ, не вѣ́мъ ва́съ; ка́ко бо а́ще уви́дите жениха́, вѣ́на не иму́щія, ми́лостыни са́мыя?

Сего́ у́бо ра́ди о́браза при́тча десяти́ дѣ́въ, здѣ́ положена́ бы́ти богоно́сными отцы́ учини́ся, наказу́ющая на́съ при́сно бдѣ́ти и гото́вымъ бы́ти къ срѣ́тенію и́стиннаго Жениха́ благи́ми дѣя́ніи, па́че же ми́лостынею, зане́ безвѣ́стенъ де́нь и ча́съ кончи́ны; я́коже и Іо́сифомъ [уча́тъ] цѣлому́дріе стяжа́ти, и смоко́вницею — при́сно пло́дъ духо́вный предлага́ти. Иже бо дѣ́ло, еди́ное и пребо́льшее, у́бо я́вѣ дѣ́лаетъ, о други́хъ же небреже́тъ, па́че же о ми́лостыни, — не вхо́дитъ со Христо́мъ въ вѣ́чное упокое́ніе, но возвраща́ется вспя́ть посра́мленъ. Ничто́же бо печа́льнѣйше и сра́ма испо́лненнѣйше, я́коже дѣ́вство, побѣжда́емое имѣ́ніемъ.

Но о, Женише́ Христе́, съ му́дрыми на́съ сочета́й дѣ́вами, и избра́нному Твоему́ сопричти́ ста́ду и поми́луй на́съ, ами́нь.

Та́же двоепѣ́снецъ, его́же краестро́чіе: Τρίτῃ τε, сíесть: Во вто́рникъ же. Творе́ніе господи́на Космы́: ирмо́съ по два́жды, стихи́ же на 12. Послѣди́ же ирмо́съ, о́ба ли́ка вку́пѣ. Гла́съ 2.

Пѣ́снь 8.

[Τ] Ирмо́съ: Велѣ́нію мучи́телеву преподо́бніи тріе́ о́троцы не повину́вшеся, въ пе́щь вве́ржени, Бо́га исповѣ́даху, пою́ще: благослови́те, дѣла́ Госпо́дня, Го́спода.

[Ρ] Лѣ́ность дале́че на́съ отве́ржимъ и свѣ́тлыми свѣща́ми безсме́ртнаго Жениха́ Христа́ пѣ́ніемъ усря́щимъ, — благослови́те, — вопію́ще, — дѣла́ Госпо́дня, Го́спода.

[Ι] Да удовлѣ́етъ общи́тельный души́ на́шея еле́й въ сосу́дѣхъ, я́ко да не на ку́плю поло́жше вре́мя по́честей, пое́мъ: благослови́те, дѣла́ Госпо́дня, Го́спода.

[Τ] Тала́нтъ ели́цы отъ Бо́га прія́сте, равноси́льную благода́ть по́мощію да́вшаго Христа́ возрасти́те, пою́ще: благослови́те, дѣла́ Госпо́дня, Го́спода. Хва́лимъ, благослови́мъ, [покланя́емся Го́сподеви, пою́ще, и превознося́ще во вся вѣ́ки].

И па́ки ирмо́съ: Велѣ́нію мучи́телеву [преподо́бніи тріе́ о́троцы не повину́вшеся, въ пе́щь вве́ржени, Бо́га исповѣ́даху, пою́ще: благослови́те, дѣла́ Госпо́дня, Го́спода].

Честнѣ́йшую... не пое́мъ.

Пѣ́снь 9.

[Η] Ирмо́съ: Невмѣсти́маго Бо́га во чре́вѣ вмѣсти́вшая и ра́дость мíру роди́вшая, Тя́ пое́мъ, Богоро́дице Дѣ́во.

[Τ] Ученико́мъ, Благíй, — бди́те, — ре́клъ еси́, — въ о́ньже ча́съ пріи́детъ Госпо́дь, не разумѣ́ете, отда́ти кому́ждо.

[Ε] Во второ́мъ Твое́мъ и стра́шномъ прише́ствіи, Влады́ко, десны́мъ овца́мъ мя́ сопричти́, прегрѣше́ній презрѣ́въ мои́хъ мно́жества.

И па́ки, вмѣ́сто: Досто́йно.., ирмо́съ: Невмѣсти́маго Бо́га [во чре́вѣ вмѣсти́вшая и ра́дость мíру роди́вшая, Тя́ пое́мъ, Богоро́дице Дѣ́во].

Ексапостила́рій, три́жды:

Черто́гъ Твой ви́жду, Спа́се мо́й, украше́нный, и оде́жды не и́мамъ, да вни́ду въ о́нь. Просвѣти́ одѣя́ніе души́ моея́, Свѣтода́вче, и спаси́ мя́.

На хвали́техъ поста́вимъ стихо́въ 4 и пое́мъ стихи́ры самогла́сны, повторя́юще, гла́съ 1:

Во свѣ́тлостехъ святы́хъ Твои́хъ ка́ко вни́ду недосто́йный? Аще бо дерзну́ совни́ти въ черто́гъ, — оде́жда мя облича́етъ, я́ко нѣ́сть бра́чна, и, свя́занъ, изве́рженъ бу́ду отъ а́нгеловъ. Очи́сти, Го́споди, скве́рну души́ моея́ и спаси́ мя́, я́ко Человѣколю́бецъ. [Два́жды.]

Гла́съ 2:

Душе́вною лѣ́ностію воздрема́вся, не стяжа́хъ, Женише́ Христе́, горя́ща свѣти́льника, и́же отъ добродѣ́телей, и дѣ́вамъ уподо́бихся бу́имъ, во вре́мя дѣ́ланія глумля́ся. Утро́бы щедро́тъ Твои́хъ не затвори́ мнѣ́, Влады́ко, но оттря́съ мо́й омраче́нный со́нъ, возста́ви, и съ му́дрыми введи́ дѣ́вами въ черто́гъ Тво́й, идѣ́же гла́съ чи́стый пра́зднующихъ и вопію́щихъ непреста́нно: Го́споди, сла́ва Тебѣ́! [Два́жды.]

Сла́ва, и ны́нѣ, гла́съ 4:

Скры́вшаго тала́нтъ осужде́ніе слы́шавши, о душе́, не скрыва́й словесе́ Бо́жія, возвѣща́й чудеса́ Его́, да умножа́ющи дарова́ніе, вни́деши въ ра́дость Го́спода твоего́.

На стихо́внѣ стихи́ры самогла́сны, гла́съ 6:

Пріиди́те, вѣ́рніи, дѣ́лаимъ усе́рдно Влады́цѣ: подава́етъ бо рабо́мъ бога́тство; и по ра́венству кíйждо да многоусугу́бимъ благода́ти тала́нтъ: о́въ у́бо му́дрость да прино́ситъ дѣ́лы благи́ми, о́въ же слу́жбу свѣ́тлости да соверша́етъ. Да пріобща́ется же сло́вомъ вѣ́рный, та́йны ненауче́нному, и да расточа́етъ бога́тство убо́гимъ другíй. Си́це бо заимова́нное многоусугу́бимъ и, я́ко строи́теліе вѣ́рніи благода́ти, Влады́чнія ра́дости сподо́бимся. Тоя́ на́съ сподо́би, Христе́ Бо́же, я́ко Человѣколю́бецъ.

Сти́хъ: Испо́лнихомся зау́тра ми́лости Твоея́, Го́споди, [и возра́довахомся, и возвесели́хомся. Во вся́ дни́ на́ша возвесели́хомся, за дни́ въ ня́же смири́лъ ны́ еси́, лѣ́та въ ня́же ви́дѣхомъ зла́я. И при́зри на рабы́ Твоя́ и на дѣла́ Твоя́, и наста́ви сы́ны и́хъ].

Егда́ пріи́деши во сла́вѣ со а́нгельскими си́лами и ся́деши на престо́лѣ, Іису́се, разсужде́нія, да мя́, Па́стырю Благíй, не разлучи́ши: пути́ бо десны́я вѣ́си, развраще́ни же су́ть шу́іи. Да не у́бо съ ко́злищи гру́баго мя́ грѣхо́мъ погуби́ши, но десны́мъ мя́ сочета́въ овца́мъ, спаси́, я́ко Человѣколю́бецъ.

Сти́хъ: И бу́ди свѣ́тлость Го́спода Бо́га на́шего на на́съ, [и дѣла́ ру́къ на́шихъ испра́ви на на́съ и дѣ́ло ру́къ на́шихъ испра́ви].

Женише́, добро́тою кра́сный па́че всѣ́хъ человѣ́къ, призва́вый на́съ къ трапе́зѣ духо́внѣй черто́га Твоего́! Нелѣ́пый мо́й зра́къ прегрѣше́ній совлецы́ прича́стіемъ страда́ній Твои́хъ и, оде́ждею сла́вы украси́въ Твоея́ красоты́, сообѣ́дника свѣ́тла мя́ покажи́ Твоего́ Ца́рствія, я́ко Милосе́рдъ.

Сла́ва, и ны́нѣ, гла́съ 7:

Се́ тебѣ́ тала́нтъ Влады́ка вверя́етъ, душе́ моя́. Стра́хомъ пріими́ да́ръ, заи́мствуй Да́вшему, раздава́й ни́щимъ и стяжи́ дру́га Го́спода, да ста́неши одесну́ю Его́, егда́ пріи́детъ во сла́вѣ, и услы́шиши блаже́нный гла́съ: вни́ди, ра́бе, въ ра́дость Го́спода твоего́! Тоя́ досто́йна мя́ сотвори́, Спа́се, заблуди́вшаго, вели́кія ра́ди Твоея́ ми́лости.

И про́чее послѣ́дованіе, я́ко обы́чно.



[НА ЧАСѢХЪ.]
Часы́ со обы́чнымъ стихосло́віемъ и чте́ніе Ева́нгелія.

На 6-мъ часѣ́ тропа́рь проро́чества, гла́съ 1:

Безмѣ́рно согрѣша́ющимъ бога́тно прости́, Спа́се, и сподо́би на́съ неосужде́нно поклони́тися Твоему́ свято́му Воскресе́нію, моли́твами Пречи́стыя Твоея́ Ма́тере, Еди́не Многоми́лостиве.

Проки́менъ, псало́мъ 129-й. Гла́съ 6: Яко у Го́спода ми́лость,* и мно́гое у Него́ избавле́ніе. Сти́хъ: Изъ глубины́ воззва́хъ къ Тебѣ́, Го́споди, Го́споди, услы́ши гла́съ мо́й.

Проро́чества Іезекíилева чте́ніе. [Главы́ 1 и 2.]

Внегда́ идя́ху (живо́тная), идя́ху (и коле́са), и внегда́ стоя́ти и́мъ, стоя́ху (и коле́са съ ни́ми), и егда́ воздвиза́хуся отъ земли́, воздвиза́хуся съ ни́ми (и коле́са), я́ко ду́хъ жи́зни бя́ше въ колесѣ́хъ. И подо́біе надъ главо́ю живо́тныхъ я́ко твердь, я́ко видѣ́ніе криста́лла, просте́ртое надъ кри́лами и́хъ свы́ше. И подъ тве́рдію кри́ла и́хъ просте́рта, паря́ще дру́гъ ко дру́гу, кому́ждо два́ спряже́на, прикрыва́юще тѣлеса́ и́хъ. И слы́шахъ гла́съ кри́лъ и́хъ, — внегда́ паря́ху, — я́ко гла́съ во́дъ мно́гихъ, я́ко гла́съ Бо́га Саддаи́; и внегда́ ходи́ти и́мъ, гла́съ сло́ва, я́ко гла́съ полка́, и внегда́ стоя́ти и́мъ, почива́ху кри́ла и́хъ. И се́ гла́съ превы́ше тве́рди, су́щія надъ главо́ю и́хъ. Внегда́ стоя́ти и́мъ, низпуска́хуся кри́ла и́хъ. И надъ тве́рдію, я́же надъ главо́ю и́хъ, я́ко видѣ́ніе ка́мене сапфи́ра, подо́біе престо́ла на не́мъ, и на подо́біи престо́ла подо́біе я́коже ви́дъ человѣ́чь сверху́. И ви́дѣхъ я́ко видѣ́ніе иле́ктра, я́ко видѣ́ніе огня́ вну́трь его́ о́крестъ отъ видѣ́нія чре́слъ и вы́ше, и отъ видѣ́нія чре́слъ да́же до до́лу ви́дѣхъ видѣ́ніе огня́ и свѣ́тъ его́ о́крестъ. Яко видѣ́ніе дуги́, егда́ е́сть на о́блацѣхъ въ де́нь дождя́, та́ко стоя́ніе свѣ́та о́крестъ. Сіе́ видѣ́ніе подо́біе сла́вы Госпо́дни.

Проки́менъ, псало́мъ 130-й, гла́съ 4: Да упова́етъ Изра́иль на Го́спода* отъ ны́нѣ и до вѣ́ка. Сти́хъ: Го́споди, не вознесе́ся се́рдце мое́, ниже́ вознесо́стеся о́чи мои́.

И про́чее. Вку́пѣ же пое́мъ и 9-й ча́съ безъ каѳи́смы, и чте́мъ Ева́нгеліе. И блаже́нны пое́мъ, и Помяни́ на́съ Го́споди.., съ покло́ны. И про́чее все́, я́коже и въ понедѣ́льникъ указа́ся.

Источникъ: Тріо́діонъ, сíесть трипѣ́снецъ. — Кíевъ: Въ тѵпогра́фіи Кíево-Пече́рской Успе́нской Ла́вры, 1864. — Л. 350 – 357.

/ Къ оглавленію раздѣла /


Наверхъ / Къ титульной страницѣ

0