Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - пятница, 22 сентября 2017 г. Сейчасъ на порталѣ посѣтителей - 9.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

ТРІОДІОНЪ, СІЕСТЬ ТРИПѢСНЕЦЪ,
Съ Бо́гомъ Святы́мъ, обдержа́й подоба́ющее ему́ послѣ́дованіе.

Слу́жба въ недѣ́лю ва́ій.

ВЪ СУББОТУ ВАІЙ, НА МАЛѢЙ ВЕЧЕРНИ,
Поста́вимъ стихи́ 4 и пое́мъ настоя́щія стихи́ры, гла́съ 6. Подо́бенъ: Тридне́вно.

Се́ Ца́рь тво́й, Сіо́не, кро́токъ и спаса́яй гряде́тъ на жребя́ти, враги́ взыску́яй порази́ти въ крѣ́пости; ра́дуйся и красу́йся съ ва́іемъ пра́зднующи.

Воспле́щимъ согла́сно, вѣ́рніи, вѣ́тви добродѣ́телей и мы́, я́ко о́троцы ны́нѣ принося́ще Христу́, и Сему́ Боже́ственныхъ дѣ́лъ распростре́мъ одѣя́нія, и та́инственно Сего́ пріи́мемъ.

Ва́ія добродѣ́телей, бра́тіе, принесе́мъ Христу́ Бо́гу, гряду́щему на́съ ра́ди человѣ́чески пострада́ти во́лею, Божества́ крѣ́постію всѣ́мъ безстра́стіе дарова́ти.

Сла́ва, и ны́нѣ, подо́бенъ то́йже:

На плеща́хъ херуви́мскихъ, я́ко Бо́гъ, носи́мый, сѣда́етъ на жребя́, на́съ ра́ди на снѣ́дь гряды́й хотѣ́ніемъ. Пріиди́те, усе́рдно Сего́ съ ва́іемъ воспои́мъ.

На стихо́внѣ, гла́съ 2. Подо́бенъ: До́ме Евфра́ѳовъ.

Свѣтли́ся, Сіо́не* Но́вый, ва́іемъ,* воспѣва́й со о́троки,* се́ Ца́рь тво́й спаса́яй* къ стра́сти гряде́тъ.

Сти́хъ: Изъ у́стъ младе́нецъ и ссу́щихъ* соверши́лъ еси́ хвалу́.

Весели́теся,* Ада́ме и Ево,* съ проро́ки,* се́ призва́ти ва́съ стра́стію* Госпо́дь прихо́дитъ.

Сти́хъ: Го́споди, Госпо́дь нашъ,* я́ко чу́дно и́мя Твое́ по все́й земли́.

Горѣ́ со Отце́мъ* и Ду́хомъ,* а́нгельскую Пріе́мый пѣ́снь,* обнищава́етъ стра́нно до́лѣ* и о́троческую пѣ́снь пріе́млетъ.

Сла́ва, и ны́нѣ, подо́бенъ то́йже:

Пою́ Твое́ стра́шное* смотре́ніе стра́хомъ,* е́же — оса́нна! — взыва́ю Тебѣ́,* мене́ бо гряде́ши спасти́,* Благослове́нный Го́споди.

Ны́нѣ отпуща́еши... Трисвято́е. И про́чее, я́коже обы́чай.

И тропари́, гла́съ 1:

Общее воскресе́ніе пре́жде Твоея́ Стра́сти увѣря́я, изъ ме́ртвыхъ воздви́глъ еси́ Ла́заря, Христе́ Бо́же. Тѣ́мже и мы́, я́ко о́троцы побѣ́ды зна́менія нося́ще, Тебѣ́, Побѣди́телю сме́рти, вопіе́мъ: оса́нна въ вы́шнихъ, благослове́нъ Гряды́й во и́мя Госпо́дне.

И другíй, гла́съ 4:

Спогре́бшеся Тебѣ́ креще́ніемъ, Христе́ Бо́же на́шъ, безсме́ртныя жи́зни сподо́бихомся Воскресе́ніемъ Твои́мъ, и воспѣва́юще зове́мъ: оса́нна въ вы́шнихъ, благослове́нъ Гряды́й во и́мя Госпо́дне.

И быва́етъ отпу́стъ. И вхо́димъ въ трапе́зу.



ВЪ СУББОТУ ВАІЙ ВЕЧЕРА, НА ВЕЛИЦѢЙ ВЕЧЕРНИ,
По предначина́тельномъ псалмѣ́, обы́чное стихосло́віе: Блаже́нъ му́жъ.., каѳи́сма вся́. На Го́споди воззва́хъ.., поста́вимъ стихо́въ 10 и пое́мъ стихи́ры самогла́сны 5, повторя́юще я́, гла́съ 6:

Дне́сь благода́ть Свята́го Ду́ха на́съ собра́, и вси́, взе́мше кре́стъ Тво́й, глаго́лемъ: благослове́нъ Гряды́й во и́мя Госпо́дне, оса́нна въ вы́шнихъ. [Дважды.]

Имѣ́яй престо́лъ не́бо, и подно́жіе зе́млю, Бо́га Отца́ Сло́во и Сы́нъ Соприсносу́щный на жребя́ти безслове́снѣмъ смири́ся дне́сь, въ Виѳа́нію прише́дъ. Тѣ́мже дѣ́ти евре́йскія, вѣ́тви рука́ми держа́ще, хва́ляху гла́сомъ: оса́нна въ вы́шнихъ, благослове́нъ гряды́й Ца́рь Изра́илевъ. [Два́жды.]

Пріиди́те и мы́ дне́сь, ве́сь Но́вый Изра́иль, я́же отъ язы́къ Це́рковь, со проро́комъ Заха́ріею возопіи́мъ: ра́дуйся зѣло́, дщи́ Сіо́нова, проповѣ́дуй, дщи́ Іерусали́мова, я́ко се́ Ца́рь тво́й гряде́тъ тебѣ́ кро́токъ и спаса́яй, и всѣ́дый на жребя́ о́сле, сы́на подъяре́мнича. Пра́зднуй, я́же дѣте́й, вѣ́тви рука́ми держа́щи, похвали́: оса́нна въ вы́шнихъ, благослове́нъ гряды́й Ца́рь Изра́илевъ. [Два́жды.]

Честно́е воскресе́ніе Твое́ прообразу́я на́мъ, воздви́глъ еси́ уме́ршаго повелѣ́ніемъ Твои́мъ бездыха́ннаго Ла́заря, дру́га, Бла́же, изъ гро́ба четверодне́вна смердя́ща. Тѣ́мже и на жребя́ возше́дъ обра́зно, я́коже на колесни́цѣ носи́мь, язы́ки укротѣва́я, Спа́се. Сего́ ра́ди и хвале́ніе прино́ситъ возлю́бленный Изра́иль изъ у́стъ ссу́щихъ и младе́нецъ незло́бивыхъ, зря́щихъ Тя́, Христе́, входя́ща во святы́й градъ, пре́жде шести́ дне́й Па́схи. [Два́жды.]

Пре́жде шести́ дне́й Па́схи пріи́де Іису́съ во Виѳа́нію. И приступи́ша къ Нему́ ученицы́ Его́, глаго́люще Ему́: Го́споди, гдѣ́ хо́щеши угото́ваемъ Ти́ я́сти Па́сху? Онъ же посла́ и́хъ: иди́те въ пре́днюю ве́сь и обря́щете человѣ́ка, скуде́ль воды́ нося́ща, послѣ́дуйте ему́ и до́му влады́цѣ рцы́те: Учи́тель глаго́летъ, у тебе́ сотворю́ Па́сху со ученики́ Мои́ми. [Два́жды.]

Сла́ва, 1-ю стихи́ру: Дне́сь благода́ть Свята́го Ду́ха... И ны́нѣ, па́ки то́йже.
Вхо́дъ. Свѣ́те ти́хій... Проки́менъ: Госпо́дь воцари́ся, въ лѣ́поту облече́ся...

Бытія́ чте́ніе. [Глава́ 49.]

Призва́ Іа́ковъ сы́ны своя́ и рече́ и́мъ: собери́теся, да возвѣщу́ ва́мъ, что́ сря́щетъ ва́съ въ послѣ́днія дни́; собери́теся и послу́шайте мене́, сы́нове Іа́ковли, послу́шайте Изра́иля, послу́шайте отца́ ва́шего. Іу́до, тебе́ похва́лятъ бра́тія твоя́! Ру́цѣ твои́ на плещу́ вра́гъ твои́хъ; покло́нятся тебѣ́ сы́нове отца́ твоего́. Ски́менъ льво́въ Іу́да, отъ лѣ́торасли, сы́не мо́й, возше́лъ еси́. Возле́гъ, усну́лъ еси́, я́ко ле́въ и я́ко ски́менъ: кто́ возбу́дитъ его́? Не оскудѣ́етъ кня́зь отъ Іу́ды и во́ждь отъ чре́слъ его́, до́ндеже пріи́дутъ отложе́ная ему́, и То́й ча́яніе язы́ковъ. Привязу́яй къ лозѣ́ жребя́ свое́ и къ ви́нничію жребца́ осля́те своего́; испере́тъ вино́мъ оде́жду свою́ и кро́вію гро́здія одѣя́ніе свое́; радостотво́рны о́чи его́ па́че вина́, и бѣлы́ зу́бы его́ па́че млека́.

Проро́чества Софо́ніева чте́ніе. [Глава́ 3.]

Та́ко глаго́летъ Госпо́дь: ра́дуйся, дщи́ Сіо́нова, зѣло́, проповѣ́дуй, дщи́ Іерусали́мова, весели́ся и преукраша́йся отъ всего́ се́рдца твоего́, дщи́ Іерусали́мля! Отъя́тъ Госпо́дь непра́вды твоя́ и изба́вилъ тя́ е́сть изъ руки́ вра́гъ твои́хъ, воцари́тся Госпо́дь посредѣ́ тебе́ и не у́зриши зла́ ктому́. Во вре́мя о́но рече́тъ Госпо́дь Іерусали́му: дерза́й, Сіо́не, да не ослабѣ́ютъ ру́це твои́! Госпо́дь Бо́гъ тво́й въ тебѣ́: Си́льный спасе́тъ тя́, наведе́тъ на тя́ весе́ліе, и обнови́тъ тя́ въ любви́ Свое́й, и возвесели́тся о тебѣ́ во украше́ніи, я́ко въ де́нь пра́здника. И соберу́ сотре́ныя твоя́; го́ре, кто́ пріи́метъ на́нь поноше́ніе! Се́ Азъ сотворю́ въ тебѣ́, тебе́ ра́ди, глаго́летъ Госпо́дь, во вре́мя о́но: и спасу́ утисне́нную и отринове́нную пріиму́, и положу́ я́ въ похвале́ніе и имени́ты по все́й земли́.

Проро́чества Заха́ріина чте́ніе. [Глава́ 9.]

Та́ко глаго́летъ Госпо́дь: ра́дуйся зѣло́, дщи́ Сіо́ня, проповѣ́дуй, дщи́ Іерусали́мля, се́ Ца́рь тво́й гряде́тъ тебѣ́, пра́веденъ и спаса́яй, То́й кро́токъ и всѣ́дъ на подъяре́мника и жребца́ ю́на. И потреби́тъ колесни́цы отъ Ефре́ма и ко́ни отъ Іерусали́ма, и потреби́тъ лу́къ бра́нный и мно́жество, и ми́ръ отъ язы́ковъ, и облада́етъ вода́ми отъ мо́ря до мо́ря и отъ рѣ́къ до исхо́дищъ земли́. И ты́ въ кро́ви завѣ́та твоего́ испусти́лъ еси́ у́зники твоя́ отъ ро́ва, не иму́ща воды́. Ся́дите въ твердѣ́лѣхъ, свя́зани со́нмища, и за еди́нъ де́нь прише́льствія твоего́ сугу́бо возда́мъ ти́. Зане́же напряго́хъ тя́ Себѣ́, Іу́до, я́ко лу́къ, испо́лнихъ Ефре́ма, и воздви́гну ча́да твоя́, Сіо́не, на ча́да е́ллинска, и осяжу́ тя́, я́ко ме́чь ра́тника. И Госпо́дь на ни́хъ яви́тся, и изы́детъ, я́ко мо́лнія, стрѣла́ Его́, и Госпо́дь Бо́гъ Вседержи́тель въ трубу́ востру́битъ и по́йдетъ въ шу́мѣ преще́нія Своего́. Госпо́дь Вседержи́тель защити́тъ и́хъ.

На литíи стихи́ры самогла́сны, гла́съ 1:

Всесвяты́й Ду́хъ, апо́столы научи́вый глаго́лати ины́ми стра́нными язы́ки, То́й дѣ́темъ евре́йскимъ неискусозло́бнымъ повелѣва́етъ зва́ти: оса́нна въ вы́шнихъ, благослове́нъ гряды́й Ца́рь Изра́илевъ.

Собезнача́льный и Соприсносу́щный, Сы́нъ и Сло́во Отчее, на жребя́ти безслове́сномъ сѣдя́, пріи́де дне́сь во гра́дъ Іерусали́мъ, Его́же херуви́ми со стра́хомъ зрѣ́ти не мо́гутъ, дѣ́ти восхвали́ша, съ ва́іемъ и вѣ́твьми, хвалу́ та́инственно воспѣва́юще: оса́нна въ вы́шнихъ, оса́нна Сы́ну Дави́дову, прише́дшему спасти́ отъ пре́лести ве́сь ро́дъ на́шъ.

Пре́жде шести́ дне́й Па́схи, гла́съ Тво́й услы́шася, Го́споди, во глубина́хъ а́довыхъ, тѣ́мже и Ла́заря четверодне́вна воздви́глъ еси́. Дѣ́ти же евре́йскія взыва́ху: оса́нна, Бо́же на́шъ, сла́ва Тебѣ́.

Гла́съ 2:

Входя́щу Ти́, Го́споди, во Святы́й гра́дъ, на жребя́ти сѣдя́, потща́лся еси́ пріити́ на стра́сть, да соверши́ши зако́нъ и проро́ки. Дѣ́ти же евре́йскія, воскресе́нія побѣ́ду предвозвѣща́юще, срѣта́ху Тя́ съ вѣ́твьми и ва́іемъ, глаго́люще: благослове́нъ еси́, Спа́се, поми́луй на́съ.

Сла́ва Тебѣ́, Христе́, въ вы́шнихъ сѣдя́щему на престо́лѣ и ны́нѣ ча́емому съ честны́мъ Твои́мъ Кресто́мъ. Тѣ́мже весели́тся дщи́ Сіо́нова, ра́дуются язы́цы земнíи, вѣ́тви держа́тъ дѣ́ти, ри́зы же — ученицы́, и вся́ вселе́нная научи́ся вопи́ти Тебѣ́: благослове́нъ еси́, Спа́се, поми́луй на́съ.

Сла́ва, и ны́нѣ, гла́съ 3:

Пре́жде шести́ дне́й бытія́ Па́схи, пріи́де Іису́съ во Виѳа́нію, воззва́ти уме́рша четверодне́вна Ла́заря и проповѣ́дати воскресе́ніе. Срѣто́ша же его́ и жены́, Ма́рѳа и Марíя, сестры́ Ла́заревы, вопію́ще къ Нему́: Го́споди, а́ще бы́ еси́ бы́лъ здѣ́, не бы́ у́мерлъ бра́тъ на́шъ. Тогда́ глаго́ла къ ни́мъ: не предреко́хъ ли ва́мъ: вѣ́руяй въ Мя́, а́ще и у́мретъ, жи́въ бу́детъ? Покажи́те ми́, гдѣ́ положи́сте его́? И вопія́ше къ нему́ Зижди́тель всѣ́хъ: Ла́заре, гряди́ во́нъ!

И обы́чныя литíи моли́твы въ па́перти.

На стихо́внѣ стихи́ры самогла́сны, гла́съ 8:

Ра́дуйся и весели́ся, гра́де Сіо́не, красу́йся и ра́дуйся, Це́ркви Бо́жія, се́ бо Ца́рь тво́й пріи́де въ пра́вдѣ, на жребя́ти сѣдя́, отъ дѣте́й воспѣва́емый: оса́нна въ вы́шнихъ, благослове́нъ еси́, Имѣ́яй мно́жество щедро́тъ, поми́луй на́съ.

Сти́хъ: Изъ у́стъ младе́нецъ и ссу́щихъ соверши́лъ еси́ хвалу́.

Пріи́де Спа́съ дне́сь во гра́дъ Іерусали́мъ, испо́лнити Писа́ніе, и вси́ прія́ша въ ру́ки ва́ія, ри́зы же подстила́ху Ему́, вѣ́дуще, я́ко То́й е́сть Бо́гъ на́шъ, Ему́же херуви́ми вопію́тъ непреста́нно: оса́нна въ вы́шнихъ, благослове́нъ еси́, Имѣ́яй мно́жество щедро́тъ, поми́луй на́съ.

Сти́хъ: Го́споди, Госпо́дь на́шъ, я́ко чу́дно и́мя Твое́ по все́й земли́.

На херуви́мѣхъ носи́мый и пѣва́емый отъ серафи́мъ, возсѣ́лъ еси́ на жребя́ Дави́дски, Бла́же, и дѣ́ти Тя́ воспѣва́ху боголѣ́пно, іуде́е же ху́ляху беззако́нно, стро́потное язы́ковъ, сѣда́лище жребца́ прообразова́ше, изъ невѣ́рія въ вѣ́ру претворя́емое. Сла́ва Тебѣ́, Христе́, еди́не Ми́лостиве и Человѣколю́бче.

Сла́ва, гла́съ 6: Дне́сь благода́ть Свята́го Ду́ха на́съ собра́... И ны́нѣ, па́ки то́йже.

Ны́нѣ отпуща́еши... Трисвято́е, и про́чее по обы́чаю. И глаго́лемъ тропа́рь отпусти́тельный, гла́съ 1: Общее воскресе́ніе.., два́жды. Инъ тропа́рь, гла́съ 4: Спогре́бшеся Тебѣ́.., еди́ножды. И Бу́ди и́мя Госпо́дне.., три́жды. И псало́мъ: Благословлю́ Го́спода... И предложи́тся чте́ніе: Сло́во торже́ственное пра́здника. О уста́вахъ Госпо́дскихъ пра́здниковъ — въ концѣ́ кни́ги сея́.


ВЪ НЕДѢЛЮ ЦВѢТОНОСІЯ, НА УТРЕНИ,
На Бо́гъ Госпо́дь.., тропаря́ о́ба: Общее воскресе́ніе.., два́жды. Сла́ва, и ны́нѣ: Спогре́бшеся Тебѣ́ креще́ніемъ...

По 1-мъ стихосло́віи сѣда́ленъ, гла́съ 4. Подо́бенъ: Удиви́ся Іо́сифъ.

Съ вѣ́твьми у́мно очище́ни душа́ми, я́коже дѣ́ти, Христа́ восхва́лимъ вѣ́рно, велегла́сно зову́ще Влады́цѣ: благослове́нъ еси́, Спа́се, въ мíръ прише́дый спасти́ Ада́ма отъ дре́внія кля́твы, духо́вно бы́въ, Человѣколю́бче, Но́вый Ада́мъ, я́коже благоволи́лъ еси́. Вся́, Сло́ве, къ поле́зному устро́ивый, сла́ва Тебе́!

Сла́ва, и ны́нѣ, ины́й сѣда́ленъ, гла́съ 4. Подо́бенъ: Яви́лся еси́.

Четверодне́вна Ла́заря отъ гро́ба возста́вивый, Го́споди, вся́ научи́лъ еси́ вопи́ти съ ва́іемъ и вѣ́твьми Тебѣ́: благослове́нъ еси́, Гряды́й.

И чте́ніе во Ева́нгеліи Толково́мъ Іоа́нна Златоу́стаго.

По 2-мъ стихосло́віи сѣда́ленъ, гла́съ 4. Подо́бенъ: Удиви́ся.

Надъ дру́гомъ Твои́мъ, Христе́, сле́зы то́чиши та́йно, и воздвиза́еши изъ ме́ртвыхъ Ла́заря, лежа́ща ме́ртва, въ не́мже сострада́ніе показа́лъ еси́ человѣколю́бно. Увѣ́дѣвше же Твое́ прише́ствіе, Іису́се, мно́жество младе́нецъ изыдо́ша дне́сь, въ рука́хъ ва́ія держа́ще, — оса́нна, — Тебе́ взыва́юще, — благослове́нъ еси́, во е́же мíръ спасти́ Прише́дый.

Сла́ва, и ны́нѣ, ины́й сѣда́ленъ, гла́съ 1. Подо́бенъ: Ка́мени запеча́тану.

Восхвали́те согла́сно, лю́діе и язы́цы: Царь бо а́нгельскій взы́де ны́нѣ на жребя́, и гряде́тъ Хотя́й на Крестѣ́ порази́ти враги́, я́ко Си́ленъ. Сего́ ра́ди и дѣ́ти съ ва́іемъ взыва́ютъ пѣ́снь: сла́ва Тебѣ́, прише́дшему Побѣди́телю; сла́ва Тебѣ́, Спа́су Христу́; сла́ва Тебѣ́, благослове́нному, еди́ному Бо́гу на́шему.

И чте́ніе того́же сло́ва.

Та́же поліеле́й. [Велича́ніе:

Велича́емъ Тя́, Живода́вче Христе́, оса́нна въ вы́шнихъ, и мы́ Тебѣ́ вопіе́мъ: благослове́нъ Гряды́й во и́мя Госпо́дне.

Псало́мъ избра́нный: Го́споди, Госпо́дь на́шъ...]

И по поліеле́и сѣда́ленъ, гла́съ 8. Подо́бенъ: Повелѣ́нное.

На престо́лѣ херуви́мстѣ, и на жребя́ти возсѣ́дъ на́съ ра́ди, и къ стра́сти во́льней дости́гъ, дне́сь слы́шитъ дѣте́й, возглаша́ющихъ: Оса́нна! Наро́довъ, вопію́щихъ: Сы́не Дави́довъ, ускори́ спасти́, и́хже созда́лъ еси́, Благослове́нне Іису́се! На сіе́ бо прише́лъ еси́, да разумѣ́емъ сла́ву Твою́!

Сла́ва, и ны́нѣ, па́ки то́йже.
И чте́ніе твори́мъ о пра́здницѣ, Сло́во ки́ръ Андре́я Кри́тскаго.

Та́же, степе́нна, 1-й антифо́нъ 4-го гла́са. Проки́менъ, гла́съ 4: Изъ у́стъ младе́нецъ и ссу́щихъ* соверши́лъ еси́ хвалу́. Сти́хъ: Го́споди, Госпо́дь на́шъ, я́ко чу́дно и́мя Твое́ по все́й земли́. Вся́кое дыха́ніе... Ева́нгеліе отъ Матѳе́я, зача́ло 83. Воскресе́ніе Христо́во.., не глаго́лемъ. Но а́біе псало́мъ 50-й. Та́же іере́й, взе́мъ кади́ло, кади́тъ крестообра́зно, глаго́ля моли́тву на благослове́ніе ва́ія.

Діа́конъ: Го́споду помо́лимся. Мы́ же: Го́споди поми́луй.

Го́споди Бо́же нашъ, сѣдя́й на херуви́мѣхъ, возста́вивый си́лу Твоего́ Сы́на, Го́спода на́шего Іису́са Христа́, да спасе́тъ мíръ Кресто́мъ, и погребе́ніемъ, и воскресе́ніемъ Свои́мъ. Его́же и ны́нѣ, прише́дша во Іерусали́мъ на во́льную стра́сть, лю́діе, сѣдя́щіи во тмѣ́ и сѣ́ни сме́ртнѣй, пріе́мше воскресе́нія зна́менія — вѣ́тви древе́съ и ва́ія фи́никъ, воскресе́ніе зна́менующе, срѣто́ша. Са́мъ, Влады́ко, и на́съ по подража́нію о́нѣхъ, въ предпра́зднственный се́й де́нь, ва́ія и ве́тви древе́съ въ рука́хъ нося́щихъ, соблюди́ и сохрани́. Да я́коже о́ніи наро́ди и дѣ́ти — оса́нна! — Тебѣ́ приноша́ху, и мы́ та́кожде въ пѣ́снехъ и пѣ́ніихъ духо́вныхъ, животворя́щаго и тридне́внаго Воскресе́нія дости́гнемъ, въ То́мже Христѣ́ Іису́сѣ, Го́сподѣ на́шемъ. Съ Ни́мже благослове́нъ еси́, съ Пресвяты́мъ, и Благи́мъ, и Животворя́щимъ Твои́мъ Ду́хомъ, ны́нѣ и при́сно, и во вѣ́ки вѣко́въ, ами́нь.

Егда́ же цѣлу́ютъ бра́тія Ева́нгеліе, раздава́етъ игу́менъ ва́ія.

Сла́ва, гла́съ 2: Дне́сь Христо́съ вхо́дитъ во гра́дъ Виѳа́нію, на жребя́ти сѣдя́й, безслове́сіе разрѣша́я язы́къ злѣ́йшее, дре́вле свирѣ́пѣющее.

И ны́нѣ, па́ки то́йже. Та́же: Поми́луй мя́, Бо́же...
Стихи́ра, гла́съ 6:

Дне́сь благода́ть Свята́го Ду́ха на́съ собра́, [и вси́, взе́мше кре́стъ Тво́й, глаго́лемъ: благослове́нъ Гряды́й во и́мя Госпо́дне, оса́нна въ вы́шнихъ].

Посе́мъ моли́тва: Спаси́, Бо́же, лю́ди... Го́споди, поми́луй, 12.

И по возгла́сѣ, кано́нъ: ирмосы́ по два́жды, тропари́ на 12. Катава́сія: ирмо́съ, о́ба ли́ка. Творе́ніе господи́на Космы́, его́же краегране́сіе: Ὡσαννὰ Χριστός, εὐλογημένος Θεός. Гла́съ 4.

Пѣ́снь 1.

[Ω] Ирмо́съ: Яви́шася исто́чницы бе́здны вла́ги неприча́стны, и откры́шася мо́ря волну́ющася основа́нія бу́рею: ма́ніемъ бо запрети́лъ еси́ ему́, изря́дныя же лю́ди спа́слъ еси́, пою́щія побѣ́дную пѣ́снь Тебѣ́, Го́споди.

[Σ] Изъ у́стъ младе́нецъ незло́бивыхъ и ссу́щихъ хвалу́ Твои́хъ ра́бъ соверши́лъ еси́, разруши́ти супоста́та и отмсти́ти, стра́стію Креста́, паде́ніе дре́вняго Ада́ма, дре́вомъ же воскреси́ти сего́, пою́ща побѣ́дную пѣ́снь Тебѣ́, Го́споди.

[Α] Хвале́ніе Це́рковь преподо́бныхъ, живу́щему въ Сіо́нѣ, Тебѣ́, Христе́, прино́ситъ; о Тебѣ́ же Изра́иль, Творцѣ́ свое́мъ, ра́дуется, и го́ры — язы́цы противообра́зніи каменосерде́чніи, отъ лица́ Твоего́ возвесели́шася, пою́ще побѣ́дную пѣ́снь Тебѣ́, Го́споди.

Катава́сія: Яви́шася исто́чницы...

Пѣ́снь 3.

[Ν] Ирмо́съ: Точа́щій, краесѣко́мый повелѣ́ніемъ Твои́мъ, тве́рдый сса́ша Ка́мень изра́ильтестіи лю́діе. Ка́мень же — Ты́ еси́, Христе́, и Жи́знь, на не́мже утверди́ся Це́рковь, зову́щая: оса́нна, благослове́нъ еси́, Гряды́й.

[Ν] Мертвеца́ четверодне́вна повелѣ́ніемъ Твои́мъ, изъ ме́ртвыхъ съ тре́петомъ а́дъ испусти́ Ла́заря. Воскресе́ніе бо — Ты́, Христе́, и Жи́знь, въ не́мже утверди́ся Це́рковь, зову́щи: оса́нна, благослове́нъ еси́, Гряды́й.

[Α] Воспо́йте, лю́діе, боголѣ́пно въ Сіо́нѣ и моли́тву воздади́те Христу́ во Іерусали́мѣ: Са́мъ гряде́тъ во сла́вѣ со о́бластію, въ Не́мже утверди́ся Це́рковь, зову́щи: оса́нна, благослове́нъ еси́, Гряды́й.

Ипакои́, гла́съ 6:

Съ вѣ́твьми воспѣ́вше пре́жде, съ древесы́ послѣди́ я́ша Христа́ Бо́га, неблагода́рніи іуде́е. Мы́ же, вѣ́рою непрело́жною при́сно почита́юще, я́ко Благодѣ́теля, вы́ну вопіе́мъ Ему́: благослове́нъ еси́, Гряды́й, Ада́ма воззва́ти.

И чте́ніе пра́здника.

Пѣ́снь 4.

[Χ] Ирмо́съ: Христо́съ гряды́й — я́вственно Бо́гъ на́шъ, пріи́детъ и не закосни́тъ отъ горы́ пріосѣне́нныя ча́щи, Отрокови́цы ражда́ющія, Неискусому́жныя, проро́къ дре́вле глаго́летъ. Тѣ́мъ вси́ вопіе́мъ: сла́ва си́лѣ Твое́й, Го́споди.

[Ρ] Да то́чатъ весе́ліе крѣ́пкое масти́тельное го́ры и вси хо́лми, и древа́ дубра́вная да взыгра́ютъ. Христа́ хвали́те, язы́цы, и Тому́, вси́ лю́діе, ра́дующеся, возопíйте: сла́ва си́лѣ Твое́й, Го́споди.

[Ι] Крѣ́постію ца́рствуяй вѣ́ки Госпо́дь, облече́нъ пріи́детъ: Сего́ красоты́ же и сла́вы, несравне́нно е́сть благолѣ́піе въ Сіо́нѣ. Тѣ́мже вси́ вопіе́мъ: сла́ва си́лѣ Твое́й, Го́споди.

[Σ] Пя́дію измѣ́ривый не́бо, дла́нію же — зе́млю, Госпо́дь пріи́де, Сіо́нъ бо избра́, въ не́мже жи́ти и ца́рствовати изво́ли, и возлюби́ лю́ди, вѣ́рно вопію́щія: сла́ва си́лѣ Твое́й, Го́споди.

Пѣ́снь 5.

[Τ] Ирмо́съ: На го́ру Сіо́нъ взы́ди, благовѣству́яй и Іерусали́му проповѣ́дуяй, въ крѣ́пости вознести́ гла́съ: пресла́вная глаго́лашася о Тебѣ́, Гра́де Бо́жій, ми́ръ на Изра́иля и спасе́ніе язы́комъ.

[Ο] Въ вы́шнихъ сѣдя́й на херуви́мѣхъ Бо́гъ и призира́яй на смире́нныя, То́й гряде́тъ во сла́вѣ со о́бластію, и испо́лнятся вся́ческая Боже́ственныя хвалы́ Его́, ми́ръ на Изра́иля и спасе́ніе язы́комъ.

[Σ] Сіо́не Бо́жій, горо́ свята́я, и Іерусали́ме, о́крестъ о́чи твои́ возведи́, и ви́ждь со́бранная ча́да твоя́ въ тебѣ́: се́ бо пріидо́ша издале́ча поклони́тися Царю́ твоему́, ми́ръ на Изра́иля и спасе́ніе язы́комъ.

Пѣ́снь 6.

[Ε] Ирмо́съ: Возопи́ша съ весе́ліемъ пра́ведныхъ ду́си: ны́нѣ мíру Завѣ́тъ Но́вый завѣща́ется, и кропле́ніемъ да обновя́тся лю́діе Бо́жія Кро́ве.

[Υ] Пріими́, Изра́илю, Бо́жіе ца́рство, и пребыва́яй во тмѣ́, свѣ́тъ да у́зритъ вели́кій, и кропле́ніемъ да обновя́тся лю́діе Боже́ственныя Кро́ве.

[Λ] Разрѣше́ны своя́ ю́зники, Сіо́не, испусти́ и отъ ро́ва невѣ́денія безво́дна изведи́, и кропле́ніемъ да обновя́тся лю́діе Боже́ственныя Кро́ве.

Конда́къ самогла́сенъ, гла́съ 6:

На престо́лѣ на небеси́, на жребя́ти на земли́ носи́мый, Христе́ Бо́же, а́нгеловъ хвале́ніе и дѣте́й воспѣва́ніе прія́лъ еси́, зову́щихъ Ти: благослове́нъ еси́, Гряды́й, Ада́ма воззва́ти.

Икосъ:

Поне́же а́да связа́лъ еси́, Безсме́ртне, и сме́рть умертви́лъ еси́, и мíръ воскреси́лъ еси́, съ ва́іями младе́нцы восхваля́ху Тя́, Христе́, я́ко побѣди́теля, зову́ще Ти́ дне́сь: оса́нна Сы́ну Дави́дову! Не ктому́ бо, рече́, закла́ни бу́дутъ младе́нцы за Младе́нца Марíина, но за вся́ младе́нцы и ста́рцы Еди́нъ распина́ешися. Не ктому́ на на́съ вмѣсти́тся ме́чь: Твоя́ бо ре́бра прободу́тся копіе́мъ. Тѣ́мже, ра́дующеся, глаго́лемъ: благослове́нъ, Гряды́й, Ада́ма воззва́ти.

Синакса́рій.

Стихи́: На жребя́ всѣ́дъ, сло́вомъ Простры́й не́бо,
              Человѣ́ки Взыску́яй, разрѣши́ти безслове́сія.

Въ сíй де́нь сла́вный и пресвѣ́тлый пра́здникъ ва́ій пра́зднуемъ вины́ ра́ди сицевы́я:

По воста́ніи Ла́заревѣ изъ ме́ртвыхъ, мно́зи, ви́дѣвше бы́вшее, вѣ́роваху во Христа́. И у́бо утвержда́ется су́дъ іуде́йскою со́нмицею — Христа́ же, и самаго́ уби́ти Ла́заря. Бѣ́гаетъ у́бо Іису́съ, мѣ́сто зло́бѣ дая́, іуде́и же въ пра́здникъ Па́схи уби́ти Его́ поуче́ніе положи́ша. И вре́мени бѣ́гства да́ну бы́вшу до́лгу. Пре́жде шести́ дне́й Па́схи, глаго́летъ, пріи́де Іису́съ во Виѳа́нію, идѣ́же бѣ́ Ла́зарь уме́рый, и та́мо обѣ́ду бы́вшу, ядя́ше съ Ни́мъ и Ла́зарь, сестра́ же его́ Марíя на Христо́вѣ но́зѣ мѵ́ро излива́ше.

И нау́тріе посыла́етъ ученики́ Своя́ привести́ осли́цу и жребя́. И Имѣ́яй престо́лъ — не́бо, всѣ́дъ на жребя́, вхо́дитъ во Іерусали́мъ, дѣ́ти же евре́йскія и са́ми подстила́ху Ему́ ри́зы своя́ и вѣ́тви фи́никовъ, о́выя у́бо рѣ́жуще, другíя же и въ рука́хъ нося́ще, вопія́ху Ему́, предсыла́юще: «оса́нна Сы́ну Дави́дову, благослове́нъ Гряды́й во и́мя Госпо́дне, Ца́рь Изра́илевъ!» Сіе́ же бы́сть, о́нѣхъ язы́ки подви́гшу Всесвято́му Ду́ху, въ сла́ву и благохвале́ніе Христо́во. Явля́ху же Христо́ву на сме́рть побѣ́ду ва́іами, сíесть, вѣ́твьми: «ва́ія» бо у евре́овъ вѣ́твь мя́гкая глаго́лется. Обы́чай бо бя́ше, я́ко побѣди́теле по́двиговъ или́ бра́ній нѣ́кіихъ, вѣ́твьми древе́съ присноцвѣту́щихъ въ побѣ́дныхъ провожде́ніихъ почита́еми и обводи́ми бя́ху. Гада́тельственно же зна́меноваше жребе́цъ, су́щія ны́ отъ язы́къ лю́ди, на не́мже всѣ́дъ Христо́съ и препочи́въ, Одолѣ́тель и Побѣди́тель, Ца́рь же всея́ земли́ нарече́ся.

О се́мъ пра́здницѣ и проро́къ глаго́лаше Заха́рія: «ра́дуйся зѣло́, дщи́ Сіо́нова, се́ Ца́рь тво́й гряде́тъ тебѣ́ кро́токъ, и всѣ́дъ на подъяре́мника и жребца́ осля́, сы́на подъяре́мнича» (Зах. 9, 9). И Дави́дъ па́ки о дѣ́техъ: «изъ у́стъ младе́нецъ и ссу́щихъ соверши́лъ еси́ хвалу́» (Псал. 8, 3).

Но входя́щу, рече́, Христу́ потрясе́ся ве́сь Іерусали́мъ, и во отмще́ніе наро́ди отъ архіере́й поощре́ни бы́вше, смотря́ху Его́ уби́ти. То́й же тая́шеся, кры́яся и явля́яся, при́тчами глаго́лаше и́мъ.

Неизрече́ннымъ Твои́мъ милосе́рдіемъ, Христе́ Бо́же на́шъ, побѣди́тели ны́ безслове́сныхъ страсте́й сотвори́, и Твою́ свѣ́тлую на смѣ́рть побѣ́ду, я́сное же и живоно́сное Воскресе́ніе ви́дѣти сподо́би, и поми́луй на́съ ны́нѣ и при́сно, и во вѣ́ки вѣко́въ, ами́нь.

Пѣ́снь 7.

[Ο] Ирмо́съ: Спасы́й во огни́ авраа́мскія Твоя́ о́троки и халде́и уби́въ, я́же Пра́вда пра́ведно уловля́ше, препѣ́тый Го́споди, Бо́же оте́цъ на́шихъ, благослове́нъ еси́.

[Γ] Покланя́ющеся лю́діе и со ученики́ ра́дующеся, съ ва́іемъ, — оса́нна Сы́ну Дави́дову, — зовя́ху, — препѣ́тый Го́споди, Бо́же оте́цъ, благослове́нъ еси́.

[Η] Неискусозло́бное мно́жество, еще́ младе́нствующее естество́, боголѣ́пно Тя́, Царю́ Изра́ильтескій и Ангельскій, воспѣ́тъ: препѣ́тый Го́споди, Бо́же оте́цъ, благослове́нъ еси́.

[Μ] Съ ва́іемъ Тя́, Христе́, вѣ́твьми похваля́ху мно́жества, — благослове́нъ, прише́дый Ца́рь вѣко́въ! Вопія́ху же: препѣ́тый Го́споди, Бо́же оте́цъ, благослове́нъ еси́.

Пѣ́снь 8.

[Ε] Ирмо́съ: Весели́ся, Іерусали́ме, торжеству́йте, лю́бящіи Сіо́на: Ца́рствуяй бо во вѣ́ки Госпо́дь си́лъ пріи́де. Да благоговѣ́етъ вся́ земля́ отъ лица́ Его́ и да вопіе́тъ: благослови́те, вся́ дѣла́ Госпо́дня, Го́спода.

[Ν] На жребя́ мла́до всѣ́дъ Ца́рь тво́й, Сіо́не, предста́ Христо́съ: безслове́сную бо и́дольскую пре́лесть разруши́ти и неудержа́нное стремле́ніе уста́вити всѣ́хъ язы́къ пріи́де, во е́же пѣ́ти: вся́ дѣла́, по́йте Го́спода.

[Ο] Бо́гъ тво́й, ра́дуйся Сіо́не зѣло́, воцари́ся во вѣ́ки Христо́съ. Се́й, я́коже пи́сано е́сть, — кро́ткій и спаса́яй, пра́ведный Изба́витель на́шъ, пріи́де на жребя́ти, ко́нское свирѣ́пство уби́ти враго́въ, не вопію́щихъ: благослови́те, вся́ дѣла́ Госпо́дня, Го́спода.

[Σ] Оскудѣва́етъ Боже́ственныхъ огражде́ній, законопресту́пное со́нмище непокори́выхъ, поне́же до́мъ моли́твы Бо́жія — верте́пъ сотвори́ша разбо́йническъ, отъ се́рдца Изба́вителя отри́нувше, Ему́же вопіе́мъ: благослови́те, вся́ дѣла́ Госпо́дня, Го́спода.

Честнѣ́йшую... не пое́мъ.

Пѣ́снь 9.

[Θ] Ирмо́съ: Бо́гъ Госпо́дь и яви́ся на́мъ, соста́вите пра́здникъ и, веселя́щеся, пріиди́те, возвели́чимъ Христа́, съ ва́іями и ве́твьми пѣ́сньми зову́ще: благослове́нъ Гряды́й во и́мя Го́спода, Спа́са на́шего.

[Ε] Язы́цы, вску́ю шата́етеся? Пи́сменницы и свяще́нницы, почто́ тще́тнымъ поучи́стеся? Кто́ Се́й, ре́кше, Ему́же дѣ́ти съ ва́іемъ и вѣ́твьми, пѣ́сньми зову́тъ: благослове́нъ Гряды́й во и́мя Го́спода, Спа́са на́шего.

[Ο] Се́й Бо́гъ на́шъ, Ему́же никто́же подо́бенъ, пра́ведный вся́къ пу́ть изобрѣ́тъ, даде́ возлю́бленному Изра́илю. По си́хъ же съ человѣ́ки поживе́, я́влься, благослове́нъ Гряды́й во и́мя Го́спода, Спа́са на́шего.

[Σ] Собла́зны стези́, что́ бли́зъ ва́съ положи́сте, непокори́віи? Но́ги ва́ша ско́ры кро́вь излія́ти Влады́чню, но воскре́снетъ вся́ко спасти́ зову́щія: благослове́нъ Гряды́й во и́мя Го́спода, Спа́са на́шего.

Свѣти́льна же не глаго́лемъ, но а́біе: Свя́тъ Госпо́дь Бо́гъ на́шъ.., три́жды, на гла́съ 4.

На хвали́техъ поста́вимъ стихо́въ 6 и пое́мъ стихи́ры самогла́сны 4, повторя́юще два́, гла́съ 4:

Мно́жество наро́да, Го́споди, постила́ху по пути́ ри́зы своя́, друзíи же рѣ́заху вѣ́тви отъ древе́съ и ноша́ху. Предыду́щіи же и послѣ́дующіи зовя́ху, глаго́люще: оса́нна Сы́ну Дави́дову, благослове́нъ еси́ Прише́дый и па́ки Гряды́й во и́мя Госпо́дне. [Два́жды.]

Хотя́щу Тебѣ́ вни́ти во Святы́й гра́дъ, Го́споди, вѣ́тви садо́въ лю́діе ноша́ху, Тебе́ пою́ще, всѣ́хъ Влады́ку, и зря́ще Тя́ на жребя́ти сѣдя́ща, я́коже на херуви́мѣхъ зря́ху. Сего́ ра́ди си́це вопія́ху: оса́нна въ вы́шнихъ, благослове́нъ еси́ Прише́дый и па́ки Гряды́й во и́мя Госпо́дне. [Два́жды.]

Изыди́те, язы́цы, изыди́те, и лю́діе, и ви́дите дне́сь Царя́ Небе́снаго, я́ко на престо́лѣ высо́цѣ, на жребя́ти ху́дѣ во Іерусали́мъ входя́ща. Ро́де іуде́йскій невѣ́рный и прелюбодѣ́йный, пріиди́ и ви́ждь, Его́же ви́дѣ Иса́ія во пло́ти, на́съ ра́ди пріити́ иму́ща, ка́ко уневѣща́етъ Себѣ́, я́ко цѣлому́дренный Но́вый Сіо́нъ и отлага́етъ осужде́нную со́нмицу. Яко въ нетлѣ́нномъ же бра́цѣ и нескве́рномъ, нескве́рніи стеко́шася благохва́ляще, неискусозло́бніи дѣ́ти. Съ ни́миже и мы́ пою́ще, возопіе́мъ пѣ́снь а́нгельскую: оса́нна въ вы́шнихъ, Иму́щему ве́лію ми́лость.

Общее воскресе́ніе пре́жде во́льныя стра́сти Твоея́ во увѣре́ніе всѣ́хъ предпоказа́вый, Христе́ Бо́же, Ла́заря у́бо въ Виѳа́ніи держа́вною си́лою Твое́ю, четверодне́вна ме́ртва, воскреси́лъ еси́; слѣпце́мъ же, е́же ви́дѣти, я́ко Свѣтода́вецъ, дарова́лъ еси́, Спа́се; и во Святы́й гра́дъ со ученики́ Твои́ми вше́лъ еси́, сѣдя́ на жребя́ти о́сли, проро́ческая исполня́яй проповѣ́данія, я́коже на херуви́мѣхъ носи́мый, и дѣ́ти евре́йстіи съ вѣ́твьми и ва́іями предсрѣта́ху Тя́. Тѣ́мже и мы́, вѣ́тви ма́сличныя нося́ще и ва́ія, благода́рственно Тебѣ́ вопіе́мъ: оса́нна въ вы́шнихъ, благослове́нъ Гряды́й во и́мя Госпо́дне.

Сла́ва, и ны́нѣ, гла́съ 6:

Пре́жде шести́ дне́й Па́схи пріи́де Іису́съ въ Виѳа́нію. И приступи́ша къ Нему́ ученицы́ Его́, глаго́люще Ему́: Го́споди, гдѣ́ хо́щеши угото́ваемъ Ти́ я́сти Па́сху? Онъ же посла́ и́хъ: иди́те въ пре́днюю ве́сь и обря́щете человѣ́ка, скуде́ль воды́ нося́ща, слѣ́дуйте ему́ и до́му влады́цѣ рцы́те: Учи́тель глаго́летъ, у тебе́ сотворю́ Па́сху со ученики́ Мои́ми.

Славосло́віе вели́кое. И тропа́рь: Общее воскресе́ніе... Та́же ектеніи́, и ча́съ пе́рвый, и оглаше́ніе, и обы́чный отпу́стъ, и литíя внѣ́ монастыря́.



НА ЛИТУРГІИ,

Антифо́нъ 1, гла́съ 2, псало́мъ 114-й:

[Сти́хъ: 1:] Возлюби́хъ, я́ко услы́шитъ Госпо́дь гла́съ моле́нія моего́.

Припѣ́въ: Моли́твами Богоро́дицы, Спа́се, спаси́ на́съ.

Сти́хъ: 2: Яко приклони́ у́хо Свое́ мнѣ́, и во дни́ моя́ призову́.

[Припѣ́въ:] Моли́твами Богоро́дицы, Спа́се, спаси́ на́съ.

Сти́хъ 3: Объя́ша мя́ болѣ́зни сме́ртныя, бѣды́ а́довы обрѣто́ша мя́.

[Припѣ́въ:] Моли́твами Богоро́дицы, Спа́се, спаси́ на́съ.

Сти́хъ 4: Ско́рбь и болѣ́знь обрѣто́хъ, и и́мя Госпо́дне призва́хъ.

[Припѣ́въ:] Моли́твами Богоро́дицы, Спа́се, спаси́ на́съ.

Сла́ва, и ны́нѣ.

[Припѣ́въ:] Моли́твами Богоро́дицы, Спа́се, спаси́ на́съ.

Антифо́нъ 2, псало́мъ 115-й.

[Сти́хъ: 1:] Вѣ́ровахъ, тѣ́мже возглаго́лахъ, а́зъ же смири́хся зѣло́.

[Припѣ́въ:] Спаси́ ны́, Сы́не Бо́жій, возсѣ́дый на жребя́, пою́щія Ти́: Аллилу́ія.

Сти́хъ 2: Что́ возда́мъ Го́сподеви о всѣ́хъ, я́же воздаде́ ми́?

[Припѣ́въ:] Спаси́ ны́, Сы́не Бо́жій, [возсѣ́дый на жребя́, пою́щія Ти́: Аллилу́ія.]

Сти́хъ 3: Ча́шу спасе́нія пріиму́, и и́мя Госпо́дне призову́.

[Припѣ́въ:] Спаси́ ны́, Сы́не Бо́жій, [возсѣ́дый на жребя́, пою́щія Ти́: Аллилу́ія.]

Сти́хъ 4: Моли́твы моя́ Го́сподеви возда́мъ, предъ всѣ́ми людьми́ Его́.

[Припѣ́въ:] Спаси́ ны́, Сы́не Бо́жій, [возсѣ́дый на жребя́, пою́щія Ти́: Аллилу́ія.]

Сла́ва, и ны́нѣ: Единоро́дный Сы́не...

Антифо́нъ 3, гла́съ 1, псало́мъ 117-й:

[Сти́хъ: 1:] Исповѣ́дайтеся Го́сподеви, я́ко Бла́гъ, я́ко въ вѣ́къ ми́лость Его́.

Тропа́рь, [гла́съ 1]: Общее воскресе́ніе [пре́жде Твоея́ Стра́сти увѣря́я, изъ ме́ртвыхъ воздви́глъ еси́ Ла́заря, Христе́ Бо́же. Тѣ́мже и мы́, я́ко о́троцы побѣ́ды зна́менія нося́ще, Тебѣ́, Побѣди́телю сме́рти, вопіе́мъ: оса́нна въ вы́шнихъ, благослове́нъ Гряды́й во и́мя Госпо́дне].

Сти́хъ 2: Да рече́тъ у́бо до́мъ Изра́илевъ: я́ко Бла́гъ, я́ко въ вѣ́къ ми́лость Его́.

[Тропа́рь, гла́съ 1]: Общее воскресе́ніе [пре́жде Твоея́ Стра́сти увѣря́я, изъ ме́ртвыхъ воздви́глъ еси́ Ла́заря, Христе́ Бо́же. Тѣ́мже и мы́, я́ко о́троцы побѣ́ды зна́менія нося́ще, Тебѣ́, Побѣди́телю сме́рти, вопіе́мъ: оса́нна въ вы́шнихъ, благослове́нъ Гряды́й во и́мя Госпо́дне].

Сти́хъ 3: Да рече́тъ у́бо до́мъ Ааро́нь: я́ко Бла́гъ, я́ко въ вѣ́къ ми́лость Его́.

[Тропа́рь, гла́съ 1]: Общее воскресе́ніе [пре́жде Твоея́ Стра́сти увѣря́я, изъ ме́ртвыхъ воздви́глъ еси́ Ла́заря, Христе́ Бо́же. Тѣ́мже и мы́, я́ко о́троцы побѣ́ды зна́менія нося́ще, Тебѣ́, Побѣди́телю сме́рти, вопіе́мъ: оса́нна въ вы́шнихъ, благослове́нъ Гряды́й во и́мя Госпо́дне].

Сти́хъ 4: Да реку́тъ у́бо вси́, боя́щіися Го́спода: я́ко Бла́гъ, я́ко въ вѣкъ ми́лость Его́.

[Тропа́рь, гла́съ 1]: Общее воскресе́ніе [пре́жде Твоея́ Стра́сти увѣря́я, изъ ме́ртвыхъ воздви́глъ еси́ Ла́заря, Христе́ Бо́же. Тѣ́мже и мы́, я́ко о́троцы побѣ́ды зна́менія нося́ще, Тебѣ́, Побѣди́телю сме́рти, вопіе́мъ: оса́нна въ вы́шнихъ, благослове́нъ Гряды́й во и́мя Госпо́дне].

Вхо́дъ: Благослове́нъ Гряды́й во и́мя Госпо́дне, благослови́хомъ вы́ изъ до́му Госпо́дня, Бо́гъ Госпо́дь, и яви́ся на́мъ.

Тропа́рь, [гла́съ 1]: Общее воскресе́ніе... Сла́ва, [тропа́рь, гла́съ 4]: Спогре́бшеся Тебѣ́ креще́ніемъ, Христе́... И ны́нѣ, конда́къ, [гла́съ 6]: На престо́лѣ на небеси́... Та́же, трисвято́е. Проки́менъ Апо́стола, гла́съ 4: Благослове́нъ Гряды́й во и́мя Госпо́дне,* Бо́гъ Госпо́дь, и яви́ся на́мъ. Сти́хъ: Исповѣ́дайтеся Го́сподеви, я́ко Бла́гъ, я́ко въ вѣ́къ ми́лость Его́. Апо́столъ къ Филипписíемъ, зача́ло 247. Аллилу́ія, гла́съ 1: Воспо́йте Го́сподеви пѣ́снь но́ву, я́ко ди́вна сотвори́ Госпо́дь. Сти́хъ: Ви́дѣша вси́ концы́ земли́ спасе́ніе Бо́га на́шего. Ева́нгеліе отъ Іоа́нна, зача́ло 41. И быва́етъ Литургíя Златоу́стова. Прича́стенъ: Благослове́нъ Гряды́й во и́мя Госпо́дне, Бо́гъ Госпо́дь, и яви́ся на́мъ. Аллилу́ія, три́жды.

На трапе́зѣ утѣше́ніе: яди́мъ ры́бы и вино́ піе́мъ, благодаря́ще Бо́га.

Источникъ: Тріо́діонъ, сíесть трипѣ́снецъ. — Кíевъ: Въ тѵпогра́фіи Кíево-Пече́рской Успе́нской Ла́вры, 1864. — Л. 335 – 342 об.

/ Къ оглавленію раздѣла /


Наверхъ / Къ титульной страницѣ

0