Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - суббота, 18 ноября 2017 г. Сейчасъ на порталѣ посѣтителей - 26.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

ТРІОДІОНЪ, СІЕСТЬ ТРИПѢСНЕЦЪ,
Съ Бо́гомъ Святы́мъ, обдержа́й подоба́ющее ему́ послѣ́дованіе.

Слу́жба въ суббо́ту свята́го и пра́веднаго Ла́заря.

ВЪ ПЯТОКЪ ВЕЧЕРА,
Во свѣти́льничное, обы́чное стихосло́віе. На Го́споди воззва́хъ.., поста́вимъ стихо́въ 10 и пое́мъ самогла́сенъ дне́, два́жды, и му́чениченъ, и пра́веднаго Ла́заря самогла́сныхъ 5, творя́ще я́ се́дмь.
Самогла́сенъ, гла́съ 8:

Му́чениченъ: Му́ченицы Госпо́дни, моли́те Бо́га на́шего и испроси́те душа́мъ на́шимъ мно́жество щедро́тъ, и очище́ніе мно́гихъ прегрѣше́ній, мо́лимся.

Та́же пое́мъ свята́го Ла́заря самогла́сны 5. Творе́ніе благочести́ваго царя́ господи́на Льва́ Прему́драго, гла́съ 6.

Го́споди, Ла́заревъ хотя́ гро́бъ ви́дѣти, во́лею хотя́й во гро́бъ всели́тися, вопроша́лъ еси́: гдѣ́ положи́сте его́? Увѣ́дѣвъ же, е́же не невѣ́далъ еси́, и возглаша́лъ, его́же люби́лъ еси́: Ла́заре гряди́ во́нъ! И послу́ша бездыха́нный дыха́ніе Даю́щаго ему́, Тебе́, Спа́са душа́мъ на́шимъ. [Два́жды.]

Го́споди, на гро́бъ четверодне́внаго прише́лъ еси́ Ла́заря и надъ гро́бомъ сле́зы пролія́въ, мертвеца́ четверодне́вна возста́вилъ еси́, Кла́се живота́. Тѣ́мже сме́рть свя́зана бы́сть гла́сомъ, пелены́ разрѣши́шася рука́ми. Тогда́ ра́дости испо́лнися мно́жество учени́къ, и еди́но отъ всѣ́хъ служа́шеся согла́сіе: благослове́нъ еси́, Спа́се, поми́луй на́съ. [Дважды.]

Го́споди, гла́съ Тво́й разруши́ а́дово ца́рствіе, и сло́во вла́сти Твоея́ возста́ви изъ гро́ба четверодне́внаго, и бы́сть Ла́зарь пакибытія́ проображе́ніе спаси́тельное. Вся́ возмо́жна Тебѣ́, Влады́ко, всѣ́хъ Царю́, да́руй рабо́мъ Твои́мъ очище́ніе и ве́лію ми́лость. [Еди́ножды.]

Го́споди, увѣ́рити хотя́ ученико́мъ Твои́мъ изъ ме́ртвыхъ Твое́ Воскресе́ніе, на гро́бъ Ла́заревъ прише́лъ еси́ и, возгласи́вшу Ти́ сего́, а́дъ плѣни́ся и отпусти́ четверодне́вна, вопію́ща Тебѣ́: благослове́нный Го́споди, сла́ва Тебѣ́. [Еди́ножды.]

Го́споди, пое́мь ученики́ Твоя́, въ Виѳа́нію прише́лъ еси́, да возста́виши Ла́заря и, прослези́вся надъ ни́мъ зако́номъ естества́ человѣ́ча, я́ко Бо́гъ, того́ четверодне́вна воздви́глъ еси́, и вопія́ше Ти́, Спа́се: благослове́нный Го́споди, сла́ва Тебѣ́. [Еди́ножды.]

Сла́ва, гла́съ 8:

Предста́въ гро́бу Ла́зареву, Спа́се на́шъ, и возгласи́въ ме́ртваго, я́ко отъ сна́ воскреси́лъ еси́: оттрясе́ тлѣ́ніе нетлѣ́нія ма́ніемъ, и изы́де сло́вомъ, свя́занный укро́йми. Вся́ мо́жеши, вся́ Тебѣ́ рабо́таютъ, Человѣколю́бче, вся́ повину́ются Ти́, Спа́се на́шъ, сла́ва Тебѣ́.

И ны́нѣ, гла́съ то́йже:

Душеполе́зную соверши́вше Четыредеся́тницу, возопіи́мъ: ра́дуйся, гра́де Виѳа́ніе, оте́чество Ла́зарево; ра́дуйтеся, Ма́рѳа и Марíя, того́ сестры́, зау́тра бо Христо́съ прихо́дитъ оживи́ти глаго́ломъ уме́ршаго бра́та. Его́же гла́съ услы́шавъ, го́рькій и несы́тый а́дъ стра́хомъ вострепета́въ и вельми́ возстена́въ, отпу́ститъ Ла́заря, укро́йми обя́зана. Его́же чудеси́ собо́ръ евре́йскій удиви́вся, съ ва́іемъ и вѣ́твьми Того́ сря́щутъ, и явя́тся похваля́ющіи дѣ́ти, Ему́же зави́дятъ отцы́. Благослове́нъ гряды́й во и́мя Госпо́дне, Ца́рь Изра́илевъ.

Вхо́дъ. Свѣ́те ти́хій...

Проки́менъ, псало́мъ 123-й, гла́съ 6: По́мощь на́ша во и́мя Го́спода,* сотво́ршаго не́бо и зе́млю. Сти́хъ: Яко а́ще не Госпо́дь бы бы́лъ въ на́съ, да рече́тъ у́бо Изра́иль.

Бытія́ чте́ніе. [Главы́ 49 и 50.]

Преста́ Іа́ковъ, завѣща́я сыно́мъ свои́мъ, и возложи́въ Іа́ковъ но́зѣ свои́ на о́дръ, у́мре и приложи́ся къ лю́демъ свои́мъ. И припа́дъ Іо́сифъ на лице́ отца́ своего́, пла́кася (го́рько) о не́мъ и облобыза́ его́. И повелѣ́ Іо́сифъ рабо́мъ свои́мъ погреба́телемъ погребсти́ отца́ своего́, и погребо́ша погреба́тели Изра́иля. И испо́лнишася ему́ четы́редесять дне́й, та́ко бо исчисля́ются днíе погребе́нія, и пла́кася его́ Еги́петъ се́дмьдесятъ дне́й. Егда́ же преидо́ша днíе пла́ча, глаго́ла Іо́сифъ къ вельмо́жамъ фарао́новымъ, глаго́ля: а́ще обрѣто́хъ благода́ть предъ ва́ми, рцы́те о мнѣ́ во у́ши фарао́ну, глаго́люще: оте́цъ мо́й закля́ мя́ пре́жде сконча́нія (своего́), глаго́ля: во гро́бѣ, его́же ископа́хъ себѣ́ въ земли́ Ханаа́ни, та́мо мя́ погреби́. Ны́нѣ у́бо возше́дъ, погребу́ отца́ моего́ и возвращу́ся. И реко́ша фарао́ну по словеси́ Іо́сифову. И рече́ фарао́нъ къ Іо́сифу: взы́ди, погреби́ отца́ твоего́, я́коже закля́ тя́. И взы́де Іо́сифъ погребсти́ отца́ своего́, и совзыдо́ша съ ни́мъ вси́ раби́ фарао́ни, и старѣ́йшины до́му его́, и вси́ старѣ́йшины земли́ Еги́петскія, и ве́сь до́мъ Іо́сифовъ и бра́тія его́, и ве́сь до́мъ отца́ его́ и сро́дницы его́; о́вцы же и волы́ оста́виша въ земли́ Гесе́мъ. И совзыдо́ша съ ни́мъ и колесни́цы и ко́нницы, и бы́сть по́лкъ вели́къ зѣло́. И пріидо́ша на гумно́ Ата́дово, е́же е́сть объ о́нъ по́лъ Іорда́на, и рыда́ша его́ рыда́ніемъ ве́ліимъ и крѣ́пкимъ зѣло́, и сотвори́ пла́чь отцу́ своему́ се́дмь дне́й. И ви́дѣша жи́тели земли́ Ханаа́нскія пла́чь на гумнѣ́ Ата́довѣ, и рѣ́ша: пла́чь вели́къ се́й е́сть еги́птяномъ; сего́ ра́ди нарече́ся и́мя мѣ́сту тому́: Пла́чь Еги́петскъ, е́же е́сть объ о́нъ по́лъ Іорда́на. И сотвори́ша ему́ та́ко сы́нове его́, я́коже заповѣ́да и́мъ. И взя́ша его́ сы́нове его́ въ зе́млю Ханаа́ню, и погребо́ша его́ въ пеще́рѣ Сугу́бѣй, ю́же стяжа́ Авраа́мъ, пеще́ру въ стяжа́ніе гро́ба отъ Ефро́на Хетте́анина, пря́мо Мамврíи. И возврати́ся Іо́сифъ во Еги́петъ, са́мъ и бра́тія его́, и вси́ совозше́дшіи погребсти́ отца́ его́. Ви́дѣвше же бра́тія Іо́сифовы, я́ко у́мре оте́цъ и́хъ, рѣ́ша: да не когда́ воспомя́нетъ зло́бу на́шу Іо́сифъ и воздая́ніемъ возда́стъ на́мъ за вся́ зла́я, я́же показа́хомъ ему́. И прише́дше ко Іо́сифу, реко́ша: оте́цъ тво́й закля́ пре́жде кончи́ны своея́, глаго́ля: та́ко рцы́те Іо́сифу: оста́ви и́мъ непра́вду и грѣ́хъ и́хъ, я́ко лука́вая тебѣ́ показа́ша. И ны́нѣ пріими́ непра́вду рабо́въ Бо́га отца́ твоего́. И пла́кася Іо́сифъ глаго́лющимъ и́мъ къ нему́. И прише́дше къ нему́ реко́ша: се́ мы́ тебѣ́ раби́. И рече́ къ ни́мъ Іо́сифъ: не бо́йтеся, Бо́жій бо е́смь а́зъ. Вы́ совѣща́сте на мя́ зла́я, Бо́гъ же совѣща́ о мнѣ́ во блага́я, дабы́ бы́ло я́коже дне́сь, и препита́лися бы лю́діе мно́зи. И рече́ и́мъ: не бо́йтеся, а́зъ препита́ю ва́съ и до́мы ва́ши. И утѣ́ши и́хъ, и глаго́ла и́мъ по се́рдцу и́хъ. И всели́ся Іо́сифъ во Еги́птѣ са́мъ и бра́тія его́, и ве́сь до́мъ отца́ его́, и поживе́ Іо́сифъ лѣ́тъ сто́ де́сять. И ви́дѣ Іо́сифъ Ефре́мли дѣ́ти до тре́тіяго ро́да, и сы́нове Махи́ра, сы́на Манассíина, роди́шася при бе́дрѣхъ Іо́сифовыхъ. И рече́ Іо́сифъ бра́тіи свое́й, глаго́ля: а́зъ умира́ю; посѣще́ніемъ же посѣти́тъ ва́съ Бо́гъ и изведе́тъ ва́съ отъ земли́ сея́ въ зе́млю, о не́йже кля́тся Бо́гъ отце́мъ на́шимъ, Авраа́му, Исаа́ку, и Іа́кову. И закля́ Іо́сифъ сы́ны Изра́илевы, глаго́ля: въ посѣще́ніи, и́мже посѣти́тъ ва́съ Бо́гъ, совознеси́те и ко́сти моя́ отсю́ду съ ва́ми. И сконча́ся Іо́сифъ сы́й лѣ́тъ ста́ десяти́, и погребо́ша его́, и положи́ша въ ра́цѣ во Еги́птѣ.

Проки́менъ, псало́мъ 124-й, гла́съ 4: Надѣ́ющіися на Го́спода,* я́ко гора́ Сіо́нъ не подви́жится во вѣ́къ. Сти́хъ: Яко не оста́витъ Госпо́дь жезла́ грѣ́шныхъ на жре́бій пра́ведныхъ.

При́тчей чте́ніе. [Глава́ 31.]

Сы́не, отверза́й уста́ твоя́ сло́ву Бо́жію и суди́ вся́ здра́во. Отверза́й уста́ твоя́ и суди́ пра́ведно, разсужда́й же убо́га и не́мощна. Жену́ до́блю кто́ обря́щетъ? Дража́йши е́сть ка́менія многоцѣ́ннаго такова́я. Дерза́етъ на ню́ се́рдце му́жа ея́, такова́я до́брыхъ коры́стей не лиши́тся. Дѣ́лаетъ бо му́жу своему́ блага́я во все́ житіе́. Обрѣ́тши во́лну и ле́нъ, сотвори́ благопотре́бное рука́ма свои́ма. Бы́сть, я́ко кора́бль, ку́плю дѣ́ющій, издале́ча собира́етъ себѣ́ бога́тство. И востае́тъ изъ но́щи, и даде́ бра́шна до́му и дѣла́ рабы́нямъ. Узрѣ́вши село́, — купи́, отъ плодо́въ же ру́къ свои́хъ насади́ стяжа́ніе. Препоя́савши крѣ́пко чре́сла своя́, утверди́тъ мы́шцы своя́ на дѣ́ло. И вкуси́, я́ко добро́ е́сть дѣ́лати, и не угаса́етъ свѣти́льникъ ея́ всю́ но́щь. Ла́кти своя́ простира́етъ на поле́зная, ру́цѣ же свои́ утвержда́етъ на вретено́. И ру́цѣ свои́ отверза́етъ убо́гому, дла́нь же простре́ ни́щу. Не пече́тся о су́щихъ въ дому́ му́жъ ея́, егда́ гдѣ́ заме́длитъ: вси́ бо у нея́ одѣ́яни су́ть. Сугу́ба одѣя́нія сотвори́ му́жу своему́, отъ виссо́на же и порфи́ры себѣ́ одѣя́нія. Сла́венъ быва́етъ во вратѣ́хъ му́жъ ея́, внегда́ а́ще ся́детъ въ со́нмищи со старѣ́йшины жи́тельми земли́. Плащани́цы сотвори́ и продаде́ финикíаномъ, опоя́санія же — ханане́омъ. Уста́ своя́ отве́рзе внима́тельно и зако́нно, и чи́нъ заповѣ́да язы́ку своему́. Крѣ́постію и лѣ́потою облече́ся и возвесели́ся во дни́ послѣ́днія. Тѣ́сны стези́ до́му ея́, бра́шна же лѣ́ностнаго не яде́. Уста́ своя́ отве́рзе му́дро и зако́нно. Ми́лостыня же ея́ возста́ви ча́да ея́ и обогати́шася, и му́жъ ея́ похвали́ ю́. Мно́ги дще́ри стяжа́ша бога́тство, мно́ги сотвори́ша си́лу: ты́ же предуспѣ́ла и превознесла́ся еси́ надъ всѣ́ми. Ло́жнаго угожде́нія и су́етныя добро́ты же́нскія нѣ́сть въ тебѣ́: жена́ бо разу́мная благослове́нна е́сть. Стра́хъ же Госпо́день сія́ да хва́литъ. Дади́те е́й отъ плодо́въ усте́нъ ея́, и да хвали́мь бу́детъ во вратѣ́хъ му́жъ ея́.

И про́чее послѣ́дованіе Преждеосвяще́нныхъ, я́ко обы́чно.

[Зри́:] Вѣ́домо бу́ди, я́ко отъ дне́сь ниже́ му́чениченъ, ниже́ богоро́диченъ, ниже́ осмогла́сникъ пое́тся, да́же до суббо́ты свята́го Ѳомы́.


ВЪ ТОЙЖЕ ПЯТОКЪ, ПОВЕЧЕРІЕ ГЛАГОЛЕМЪ ВЕЛИКОЕ.
На повече́ріи пое́мъ настоя́щій кано́нъ, творе́ніе свята́го отца́, господи́на Андре́я Кри́тскаго, Іерусалими́ты. Гла́съ 1.

Пѣ́снь 1.

Ирмо́съ: Пѣ́снь побѣ́дную пои́мъ вси́ Бо́гу, сотво́ршему ди́вная чудеса́ мы́шцею высо́кою и спа́сшему Изра́иля, я́ко просла́вися.

Припѣ́въ: Сла́ва Тебѣ́, Бо́же на́шъ, сла́ва Тебѣ́.

Ме́ртва четверодне́вна воскреси́въ, Спа́се мо́й, Ла́заря, тли́ измѣни́лъ еси́ мы́шцею высо́кою и показа́лъ еси́, я́ко Си́льный, вла́сть Твою́.

Возгласи́въ Ла́заря изъ гро́ба, а́біе воскреси́лъ еси́, но а́дъ до́лѣ го́рцѣ рыда́ше и стеня́ трепета́ше, Спа́се, вла́сти Твоея́.

Прослези́лся еси́, Го́споди, надъ Ла́заремъ, показу́я воплоще́ніе смотре́нія Твоего́, и я́ко естество́мъ Бо́гъ сы́й, естество́мъ по на́мъ бы́лъ еси́ Человѣ́къ.

Ма́рѳины сле́зы и Марíины утоли́лъ еси́, Го́споди, изъ ме́ртвыхъ Ла́заря воскреси́въ, Спа́се, и показа́въ одухновле́нна ме́ртваго вла́стію Твое́ю.

Зако́номъ естества́ человѣ́ча вопроси́лъ еси́, Влады́ко: гдѣ́ положе́нъ бы́сть Ла́зарь? Показу́я всѣ́мъ, Спа́се, и́стинное е́же къ на́мъ смотре́ніе Твое́.

Закле́пы сокруши́лъ еси́ тогда́ а́довы, возгласи́въ Ла́заря, и держа́ву стря́слъ еси́ борца́, и покори́лъ еси́ пре́жде Креста́, трепета́ти Тебе́, еди́не Спа́се.

Свя́зня Ла́заря, отъ а́да держи́маго, Влады́ко, я́ко Бо́гъ предвари́лъ еси́ и разрѣши́лъ еси́ отъ у́зъ: къ Твоему́ бо вся́, Си́льне, и́дутъ повелѣ́нію.

Сла́ва, [тро́иченъ]: Отца́ просла́вимъ, Сы́на, и Ду́ха, Тро́ицу Нераздѣ́льную, во Еди́ницѣ Естества́, и со а́нгелы Ю, я́ко Еди́наго Несозда́ннаго Бо́га славосло́вимъ.

И ны́нѣ, богоро́диченъ: Непрело́жно родила́ еси́, Дѣ́во Ма́ти, Созда́теля естества́, отъ Свята́го Ду́ха по благоволе́нію Отчу бы́вша е́же есмы́, кромѣ́ измѣне́нія и смѣше́нія.

Пѣ́снь 2.

Ирмо́съ: Вонми́, не́бо, и возглаго́лю, и воспою́ Христа́, еди́наго Человѣколю́бца.

Сла́ва Тебѣ́, возгласи́вшему то́кмо и изъ гро́ба ме́ртва четверодне́вна дру́га воздви́гшему Ла́заря.

Услы́ша гла́са Твоего́ безду́шный, и одушевле́нъ отъ ме́ртвыхъ воста́ а́біе, сла́вя Тя́, Го́споди.

Повелѣ́ніе живоно́снаго гла́са Твоего́ пріи́мъ, смердя́щій воста́ отъ гро́ба, Спа́се мо́й, Ла́зарь.

Прослези́лся еси́ надъ дру́гомъ, Спа́се мо́й, увѣря́я на́ше, я́коже носи́лъ еси́, естество́, и сего́ воскреси́лъ еси́.

Вострепета́, я́коже ви́дѣ а́дъ, па́ки теку́ща а́біе свя́зана укро́йми, гла́сомъ къ здѣ́шнему животу́.

[Сла́ва:] Ужасо́шася евре́йстіи наро́ди, егда́ возгласи́въ, Спа́се, воскреси́лъ еси́ сло́вомъ смердя́щаго Ла́заря.

[И ны́нѣ:] Сотрясо́шася сокро́вища а́дова, я́ко одушевле́нъ бы́сть а́біе ни́зу Ла́зарь, тогда́ гла́сомъ Оживи́вшаго.

Пѣ́снь 3.

Ирмо́съ: Ка́мень, его́же небрего́ша зи́ждущіи, се́й бы́сть во главу́ у́гла: то́й е́сть Ка́мень, на не́мже утверди́ Це́рковь Христо́съ, ю́же отъ язы́къ искупи́.

Чу́до стра́нное и пресла́вное! Ка́ко Созда́тель всѣ́хъ, е́же не невѣ́дяше, я́ко не вѣ́дый вопроша́ше: гдѣ́ лежи́тъ, его́же рыда́ете? Гдѣ́ погребе́ся Ла́зарь, его́же пома́лѣ изъ ме́ртвыхъ жи́ва ва́мъ воскрешу́ Азъ?

Ка́мень, его́же тебѣ́ привали́ша погре́бшіи тя́, сего́ взя́ти Іису́съ повелѣ́въ, а́біе воскреси́ тя́, возгласи́въ тебѣ́: Ла́заре, воста́ни, гряди́ ко Мнѣ́! Да твоего́ а́дъ устраши́тся гла́са.

Ма́рѳа и Марíя, Го́споди, рыда́ньми вопія́стѣ: се́ его́же люби́лъ еси́, четверодне́венъ смерди́тъ; а́ще бы еси́ бы́лъ здѣ́, тогда́ не бы́ у́мерлъ Ла́зарь. Но, я́ко неразлу́ченъ вездѣ́, сего́ а́біе возгласи́въ, воздви́глъ еси́.

Пролія́въ надъ дру́гомъ сле́зы смотре́нія ра́ди, показа́лъ еси́ пло́ть отъ на́съ взе́млемую, существо́мъ, не мнѣ́ніемъ, Спа́се, соедини́вшуюся Тебѣ́, и я́ко Человѣколю́бецъ Бо́гъ, сего́ а́біе возгласи́въ, воздви́глъ еси́.

Увы́ мнѣ́ вои́стинну, ны́нѣ погибо́хъ! — вопія́ше а́дъ, си́це возглаша́ше сме́рти, глаго́ля, — се́ Назоряни́нъ до́льняя подвиза́ и утро́бу мою́ посѣка́я, бездыха́нна ме́ртва возгласи́въ, воздви́же.

Гдѣ́ евре́йское безу́міе? Гдѣ́ невѣ́ріе? Доко́лѣ, чуждíи, доко́лѣ, лестцы́, зрите́ уме́ршаго, гла́сомъ исходя́ща, и не вѣ́руете Христу́? Вои́стинну сы́нове тмы́ вси́ вы́.

Сла́ва, [тро́иченъ]: Еди́наго отъ Тро́ицы вѣ́мъ Тя́, а́ще и воплоти́лся еси́, Еди́наго и сла́влю, Сы́на воплоще́нна, отъ Богоро́дицы безсѣ́менно прозя́бшаго, и со Отце́мъ и Ду́хомъ Еди́наго Сы́на славосло́вима.

И ны́нѣ, богоро́диченъ: Стра́нное и стра́шное видѣ́ніе смотре́нія, е́же предзрѣ́ша нело́жніи проро́цы Дѣ́ву Богоро́дицу: безсѣ́менно у́бо заче́ншую и нетлѣ́нно ро́ждшую Бо́га, пребыва́ющую же по рождествѣ́ Чи́стую.

Пѣ́снь 4.

Ирмо́съ: Взя́тся со́лнце, и луна́ ста́ въ чи́нѣ свое́мъ, возне́слся еси́, Долготерпѣли́ве, на дре́во и водрузи́лъ еси́ на не́мъ Це́рковь Твою́.

Прослези́лся еси́, Го́споди, надъ Ла́заремъ, показа́въ, я́ко Человѣ́къ еси́, и воздви́глъ еси́, Влады́ко, уме́ршаго, и показа́лъ еси́ лю́демъ, я́ко Сы́нъ еси́ Бо́жій.

Бездыха́нный услы́ша повелѣ́ніе Твое́, — гряди́ во́нъ, Ла́заре! — текíй, воста́ше съ пелена́ми, и скака́ше, Бла́же, показу́я держа́ву Твою́.

Ма́рѳины сле́зы и Марíины утоли́лъ еси́, Христе́ Бо́же, возгласи́въ Ла́заря самовла́стно, воздви́глъ еси́ гла́сомъ, и поклони́ся Тебѣ́.

Прослези́вся, я́ко Человѣ́къ, надъ Ла́заремъ, воздви́глъ еси́ его́, я́ко Бо́гъ. Вопроси́лъ еси́: гдѣ́ погребе́ся четверодне́вный? Увѣря́я, Бла́же, вочеловѣ́ченіе Твое́.

Стра́сти зна́менія и Креста́ Твоего́, увѣря́ти хотя́, Бла́же, а́дово несы́тное чре́во растерза́въ, возста́вилъ еси́, я́ко Бо́гъ, четверодне́внаго.

Кто́ ви́дѣ, кто́ слы́ша, я́ко воста́ человѣ́къ ме́ртвый смердя́щій? Илія́ у́бо воздви́же и Елиссе́й, но не отъ гро́ба, но ниже́ четверодне́вна.

Пое́мъ Твое́, Го́споди, могу́тство, пое́мъ и стра́сти, Христе́: о́нѣмъ бо, я́ко благоутро́бенъ, чудодѣ́йствовалъ еси́, си́ми же смотри́тельно я́тъ еси́, я́ко Человѣ́къ.

Бо́гъ еси́ и Человѣ́къ, и́стинствуяй вещьми́ и имены́, предста́лъ еси́ гро́бу пло́тію, Сло́ве, и воздви́глъ еси́, я́ко Бо́гъ, четверодне́внаго.

Ужасо́шася, Влады́ко, евре́йстіи наро́ди, я́ко ви́дѣша воста́вша ме́ртва изъ гро́ба Ла́заря со гла́сомъ Твои́мъ, и пребы́ша непокорли́ви чудесе́мъ Твои́мъ.

Сла́ва, [тро́иченъ]: Безнача́льно возсія́лъ еси́ отъ Отца́ Твоего́, я́ко Еди́нъ сы́й отъ Тро́ицы, Спа́се: въ лѣ́то въ Ду́сѣ изъ дѣ́вственныхъ Ты́ проше́лъ еси́ крове́й, пло́ть взе́мъ, Пресу́щественный.

И ны́нѣ, богоро́диченъ: Зача́тіе безсѣ́менное Богоро́дицы, рождество́ кромѣ́ стра́сти тлѣ́нія: Бо́гъ бо обоя́ чудодѣ́йствовавый, истощи́ Себе́, да на́мъ соедини́тся.

Пѣ́снь 5.

Ирмо́съ: Тво́й ми́ръ да́ждь на́мъ, Сы́не Бо́жій: ино́го бо, ра́звѣ Тебе́, Бо́га не зна́емъ, и́мя Твое́ имену́емъ, я́ко Бо́гъ живы́хъ и ме́ртвыхъ еси́.

Жи́знь сы́й, Го́споди, и Свѣ́тъ и́стинный, Ла́заря возгласи́въ, воскреси́лъ еси́: я́ко Си́ленъ бо всѣ́мъ показа́лъ еси́, я́ко Бо́гъ живы́хъ и ме́ртвыхъ еси́.

Нестерпи́мое Твое́ повелѣ́ніе, Іису́се, не терпя́ а́дъ, мно́гихъ пріе́мый, убоя́ся, и четверодне́вна су́ща Ла́заря, со гла́сомъ жи́ва, а не ме́ртва дая́ше.

Пе́рсть совоку́пль ду́ху, дре́вле бре́ніе Ду́хомъ жи́зни, одуши́вый, Сло́ве, сло́вомъ Твои́мъ, и ны́нѣ же сло́вомъ воскреси́лъ еси́ отъ тли́ дру́га изъ преиспо́днихъ.

Ма́нію Твоему́, Го́споди, сопроти́вися никто́же: егда́ бо ме́ртваго гласи́лъ еси́ Ла́заря, а́біе бездыха́нный востава́ше, и у́зы нося́, нога́ма хожда́ше.

О, іуде́йское безу́міе! О, омраче́ніе враго́въ! Кто́ ви́дѣ мертвеца́ изъ гро́ба востаю́ща? Илія́ дре́вле воскреси́, но не отъ гро́ба, но ниже́ четверодне́вна.

Непобѣди́ме, Долготерпѣли́ве, вся́ на́съ ра́ди творя́й, я́ко Бо́гъ, и терпя́й, я́ко Человѣ́къ, прича́стники вся́ ны́ сотвори́ Ца́рствія Твоего́, моли́твами Ла́заревыми.

Сла́ва, [тро́иченъ]: Пребезнача́льная, Собезнача́льная, Единоче́стная Тро́ице, Отче Вседержи́телю и Сы́не и Ду́ше Святы́й, Еди́нице Свята́я Тріѵпоста́сная, су́щія отъ Ада́ма спаса́й, вѣ́рно Тя́ воспѣва́ющія.

И ны́нѣ, богоро́диченъ: Пречи́стое чре́во Твое́ освяти́, Чи́стая, пло́ть изъ него́ пріе́мый Пребоже́ственный, въ Тро́ицѣ Покланя́емый, изъ Отца́ — Сло́во, и съ Ду́хомъ Бо́гъ.

Пѣ́снь 6.

Ирмо́съ: Отве́рглъ мя́ еси́ во глубины́ се́рдца морска́го, и спа́слъ еси́ мя́, Спа́се, отъ рабо́ты сме́ртныя, и разрѣши́лъ еси́ у́зы беззако́ній мои́хъ.

Вопроси́лъ еси́, — гдѣ́ е́сть? — вся́ Вѣ́дый; прослези́лся же еси́, Спа́се, я́ко Человѣ́къ естество́мъ, воздви́глъ мя́ еси́ ме́ртва повелѣ́ніемъ Твои́мъ.

Возгласи́лъ мя́ еси́, Спа́се, изъ а́да преиспо́дняго, — вопіе́тъ Ла́зарь къ Тебѣ́, Разруши́телю а́да, — и воздви́глъ мя́ еси́ ме́ртва повелѣ́ніемъ Твои́мъ.

Одѣ́ялъ мя́ еси́, Спа́се, въ бре́нное тѣ́ло и вдохну́лъ ми́ еси́ жи́знь, и ви́дѣхъ свѣ́тъ Тво́й, и воздви́глъ мя́ еси́ ме́ртва повелѣ́ніемъ Твои́мъ.

Одуши́лъ еси́ Ты́, бездыха́нный о́бразъ пло́ти моея́, Спа́се, стягну́лъ мя́ еси́ костьми́ и жи́лами, и воздви́глъ мя́ еси́ ме́ртва повелѣ́ніемъ Твои́мъ.

Всеснѣ́дное растерза́въ чре́во а́дово, исто́ргнулъ мя́ еси́, Спа́се, Твое́ю вла́стію и воздви́глъ мя́ еси́ ме́ртва повелѣ́ніемъ Твои́мъ.

Носи́лъ еси́, Спа́се, смѣше́ніе мое́ всецѣ́ло, сохрани́лъ же еси́ чи́сту пречи́стую утро́бу, изъ нея́же проше́лъ еси́, воплоти́вся, Еди́нъ сы́й Тро́ицы.

Сла́ва, тро́иченъ: Тро́ице Свята́я, прославля́ю Твое́ благоутро́біе и со а́нгелы пою́ трисвяту́ю пѣ́снь; поми́луй ду́ши на́съ, воспѣва́ющихъ Тя́.

И ны́нѣ, богоро́диченъ: Въ пречи́стую Твою́ утро́бу вни́де Сло́во, соблюде́ же па́ки по рождествѣ́ сію́ чи́стую, Богороди́тельнице. Чу́до вои́стинну пресла́вное!

Пѣ́снь 7.

Ирмо́съ: Су́щимъ въ пещи́ отроко́мъ Твои́мъ, Спа́се, не прикосну́ся, ниже́ стужи́, о́гнь. Тогда́ тріе́, я́ко еди́нѣми усты́, поя́ху и благословля́ху, глаго́люще: благослове́нъ Бо́гъ оте́цъ на́шихъ.

Надъ мертвеце́мъ прослези́лся еси́, Спа́се Человѣколю́бче, да пока́жеши всѣ́мъ лю́демъ, я́ко Бо́гъ сы́й, на́съ ра́ди Человѣ́къ яви́лся еси́, и во́лею прослези́лся еси́, о́бразы на́мъ предлага́я серде́чныя любве́.

Четверодне́вный Ла́зарь, Спа́се, я́ко услы́ша ни́зу гла́съ Тво́й, воста́въ, воспѣ́ Тя́ и, ра́дуяся, си́це вопія́ше: Ты́ Бо́гъ и Созда́тель мо́й, Тебѣ́ покланя́юся и пою́ Воскреси́вшаго мя́!

Аще и у́зами обложе́нъ е́смь, — Ла́зарь ни́зу вопія́ше Свободи́телю, — но ника́коже во чре́вѣ пребу́ду а́довѣ, а́ще то́кмо воззове́ши мя́: Ла́заре, гряди́ во́нъ! Ты́ бо Свѣ́тъ мо́й и Живо́тъ.

Молю́ тя́, Ла́заре, — а́дъ рече́, — воста́ни, изы́ди отъ закле́повъ мои́хъ ско́ро, отыди́ у́бо; добро́ бо мнѣ́ еди́наго рыда́ти го́рцѣ отъе́млема, не́жели всѣ́хъ, и́хже пре́жде а́лча поглоти́хъ.

О, что́ косни́ши, Ла́заре? — глаго́летъ, — гряди́ во́нъ, зове́тъ стоя́ Дру́гъ тво́й; изы́ди у́бо, да и а́зъ осла́бу пріиму́, отне́лѣже бо тя́ снѣдо́хъ, на блева́ніе пи́ща устро́ися ми́.

Что́ не воста́неши, Ла́заре, ско́ро? — воззва́ изъ до́лу а́дъ, рыда́я, — что́ не а́біе воскре́съ, тече́ши отсю́ду? Да не и други́хъ ми́ плѣни́тъ Христо́съ, воскреси́въ тя́.

Удивля́емъ бы́лъ еси́, Влады́ко Христе́, чу́дная тогда́ содѣ́лавъ мно́гая, свѣ́тъ бо слѣпы́мъ, глухи́мъ же у́ши отве́рзлъ еси́ сло́вомъ, и дру́га Ла́заря изъ ме́ртвыхъ, я́ко Бо́гъ возгласи́въ, воздви́глъ еси́.

Сла́ва, тро́иченъ: Тро́ическую воспои́мъ пѣ́снь, сла́вяще Безнача́льнаго Отца́ и Сы́на и Ду́ха Пра́ваго, Еди́нственное Еди́но Существо́, е́же Тро́ически воспои́мъ: Свя́тъ, Свя́тъ, Свя́тъ еси́, Тро́ице.

И ны́нѣ, богоро́диченъ: Яко Еди́наго отъ Тро́ицы Тя́, Христе́, сла́вимъ, я́ко отъ Дѣ́вы вопло́щься, кромѣ́ преложе́нія человѣ́чески вся́ претерпѣ́лъ еси́, не отсту́пль естества́ Оте́ческа, Іису́се, а́ще и соедини́лся еси́ на́мъ.

Пѣ́снь 8.

Ирмо́съ: Небеса́ небе́съ и вода́, я́же превы́ше небе́съ, благослови́те, по́йте Го́спода и превозноси́те Его́ во вѣ́ки.

Творе́цъ и Содержи́тель всѣ́хъ, за милосе́рдіе во Виѳа́нію пріи́де воздви́гнути Ла́заря.

Четверодне́вный смердя́ и пово́йми обя́занъ, измѣни́ся дыха́ніемъ бездыха́нный, возгласи́вшу Ти́, Го́споди.

Іуде́йстіи лю́діе, я́ко ви́дѣша уме́ршаго, Твои́мъ гла́сомъ воста́вша, Христе́, распыха́хуся.

Омраче́нніи о свѣ́тѣ, іуде́е, что́ не вѣ́руете Ла́зареву воста́нію, Христо́ву начина́нію?

Да ра́дуется Сіо́нъ и да пое́тъ Жизнода́вца, воскреси́вшаго сло́вомъ отъ гро́ба Ла́заря.

Во́и небе́сніи и ро́дъ земны́хъ воспѣ́ша Тя́, егда́, Спа́се мо́й, Ла́заря воздви́глъ еси́.

Сла́ва, [тро́иченъ]: Со Отце́мъ и Сы́номъ Ду́ха славосло́влю и, поя́ немо́лчно, взыва́ю: Трисвяты́й, сла́ва Тебѣ́!

И ны́нѣ, богоро́диченъ: Тебе́ благословлю́ и покланя́юся Ро́ждшемуся изъ Дѣ́вы, не разлу́чшуся престо́ла святы́я сла́вы Твоея́.

Пѣ́снь 9.

Ирмо́съ: Сотвори́ держа́ву мы́шцею Свое́ю, низложи́ бо си́льныя со престо́лъ и вознесе́ смире́нныя Бо́гъ Изра́илевъ, въ ни́хже посѣти́ на́съ Восто́къ съ высоты́ и напра́вилъ ны́ е́сть на пу́ть ми́ра.

Да пое́тъ чу́до Виѳа́нія съ на́ми: въ не́й бо прослези́ся Созда́тель, зако́номъ естества́ пло́ти, Ла́заря воскреша́я, и Ма́рѳины сле́зы про́чее, и пла́чь Марíинъ въ ра́дость прелага́я, мертвеца́ воздви́глъ е́сть.

Увѣря́я, Сло́ве, Воскресе́ніе Твое́, призва́лъ еси́ Ла́заря изъ гро́ба и воздви́глъ еси́, я́ко Бо́гъ, да пока́жеши лю́демъ Бо́га же и Человѣ́ка вку́пѣ вои́стиннѣ су́ща, и воздви́гша хра́мъ тѣлесе́ Твоего́.

Стря́слъ еси́ врата́ и вереи́ желѣ́зныя, устраши́лъ еси́ а́дъ гла́сомъ Твои́мъ, ужасе́ся же съ ни́мъ и сме́рть а́біе, я́ко ви́дѣша Ла́заря, Спа́се, су́ща въ ни́хъ у́зника, одушевле́нна гла́сомъ и воскре́сша.

Ужасо́шася вси́, я́ко ви́дѣша Тя́, Спа́се, слезя́ща, Ла́заря уме́рша, и глаго́лаху наро́ди: ви́ждь, ка́ко его́ любля́ше. Абіе у́бо возгласи́лъ еси́ его́, и воста́въ бездыха́нный, отложи́ тлѣ́ніе повелѣ́ніемъ Твои́мъ.

Потрясо́шася врата́, сокруши́шася вереи́, разрѣши́шася у́зы ме́ртваго гла́сомъ си́лы Христо́вы, и а́дъ го́рько воздыха́ше, рыда́я, и свои́мъ вопія́ше: увы́ мнѣ́! кíй и отку́ду гла́съ, оживля́яй ме́ртвыя?

Воста́ни отсю́ду, послу́шавъ гла́са, Дру́гъ бо тво́й во́нъ приглаша́етъ тя́: Се́й е́сть пре́жде воскреси́вый ме́ртвыя. Илія́ у́бо воздви́же ме́ртва и Елиссе́й ку́пно: но Се́й бѣ́ о́нѣми и глаго́ляй и дѣ́йствуяй.

Пое́мъ Твою́, Сло́ве, непобѣди́мую крѣ́пость: костьми́ бо и жи́лами уме́рша воздви́глъ еси́ сло́вомъ Твои́мъ, я́ко всѣ́хъ Созда́тель, и сего́ воскреси́лъ еси́, Спа́се, отъ преиспо́днихъ, я́коже вдо́выя сы́на су́ща на одрѣ́.

Сла́ва, [тро́иченъ]: Тро́ице Всесвята́я, Отче Безнача́льный Бо́же, Собезнача́льный Сы́не и Боже́ственный Сло́ве, Утѣ́шителю Благíй, Ду́ше Святы́й Бо́жій: Еди́ный и Трисо́лнечный Свѣ́те, Соесте́ственное Существо́, Еди́не Бо́же и Го́споди, уще́дри мíръ.

И ны́нѣ, богоро́диченъ: Вся́ сотвори́вый въ прему́дрости, Іису́се, и во всего́ мя́ оболкíйся изъ Дѣ́вы, и ве́сь пребыва́яй при́сно въ нѣ́дрѣхъ Отца́, Святы́й Ду́хъ Тво́й, Христе́, на ста́до Твое́ низпосла́въ, я́ко Бо́гъ, осѣни́ на́съ.

Вмѣ́сто Досто́йна.., ирмо́съ: Сотвори́ держа́ву...



ВЪ СУББОТУ СВЯТАГО И ПРАВЕДНАГО ЛАЗАРЯ, НА ПОЛУНОЩНИЦѢ,

На пе́рвомъ трисвято́мъ, по Отче на́шъ.., тропа́рь: Общее воскресе́ніе... На послѣ́днемъ трисвято́мъ, по Отче на́шъ.., конда́къ: Всѣ́хъ ра́дость — Христо́съ... Го́споди, поми́луй, 12. И отпу́стъ. Моли́твы же: Помяни́, Го́споди.., не глаго́лемъ.


НА УТРЕНИ,
На Бо́гъ Госпо́дь: Тропа́рь, гла́съ 1:

Общее воскресе́ніе пре́жде Твоея́ Стра́сти увѣря́я, изъ ме́ртвыхъ воздви́глъ еси́ Ла́заря, Христе́ Бо́же. Тѣ́мже и мы́, я́ко о́троцы побѣ́ды зна́менія нося́ще, Тебѣ́, Побѣди́телю сме́рти, вопіе́мъ: оса́нна въ вы́шнихъ, благослове́нъ Гряды́й во и́мя Госпо́дне. [Три́жды.]

Та́же стихосло́віе: Рече́ Госпо́дь Го́сподеви моему́...

По 1-мъ стихосло́віи сѣда́ленъ, гла́съ 1: Подо́бенъ: Ка́мени запеча́тану.

Уще́дривъ Ма́рѳины и Марíины сле́зы, отвали́ти ка́мень отъ гро́ба повелѣ́лъ еси́, Христе́ Бо́же, воскреси́лъ еси́, возгласи́въ ме́ртваго, мíра Жизнода́вче, Собо́ю увѣря́я воскресе́ніе. Сла́ва си́лѣ Твое́й, Спа́се, сла́ва вла́сти Твое́й, сла́ва сло́вомъ вся́ Соста́вившему.

Сла́ва, и ны́нѣ, то́йже.

Та́же стихосло́вимъ непоро́чны и пое́мъ тропари́ воскре́сны: Благослове́нъ еси́, Го́споди... Ангельскій собо́ръ... И про́чая, я́ко обы́чай е́сть въ недѣ́лю.

Пото́мъ сѣда́ленъ, гла́съ 5. Подо́бенъ: Собезнача́льное Сло́во.

Исто́чникъ прему́дрости и предвѣ́дѣнія, во Виѳа́нію прише́дъ, съ Ма́рѳою су́щихъ вопроша́лъ еси́: гдѣ́ положи́сте, ре́къ, дру́га Ла́заря? Его́же ра́ди прослези́въ, Благоутро́бне, четверодне́вна ме́ртва воскреси́лъ еси́ гла́сомъ Твои́мъ, Человѣколю́бче и Ще́дрый, я́ко Жизнода́вецъ и Госпо́дь.

Сла́ва, и ны́нѣ, то́йже.

Та́же глаго́лемъ: Воскресе́ніе Христо́во... и псало́мъ 50-й. Ева́нгеліе же не чте́мъ, то́кмо во хра́мѣ свята́го Ла́заря. Чте́ніе же твори́мъ: толкова́ніе е́же отъ Іоа́нна Ева́нгелія того́ дне́, сло́во 63-е и 64-е.

Кано́на два́: до шесты́я пѣ́сни творе́ніе господи́на Ѳеофа́на, отону́дуже начина́емъ четверопѣ́снецъ.

Пе́рвый кано́нъ со ирмосо́мъ на 8, другíй на 6, гла́съ 8.
Пѣ́снь 1.

Ирмо́съ: Пои́мъ Го́сподеви, прове́дшему лю́ди Своя́ сквозѣ́ Чермно́е мо́ре, я́ко Еди́нъ сла́вно просла́вися.

Ла́заря уме́ршаго ма́ніемъ Боже́ственнымъ воскреси́лъ еси́, я́ко Созда́тель сы́й, и живота́ сокро́вище, Человѣколю́бче.

Сло́вомъ четверодне́внаго Ла́заря возгласи́лъ еси́, Безсме́ртне, темнообра́зное а́дово разруши́въ крѣ́постію ца́рство.

Всѣмъ Пребоже́ственнаго позна́ніе Божества́ показа́лъ еси́, изъ ме́ртвыхъ возста́вивъ четверодне́внаго Ла́заря, Влады́ко.

Дне́сь Виѳа́нія предвозвѣща́етъ Воскресе́ніе Христа́ Жизнода́вца, воста́ніемъ Ла́заревымъ ликовству́ющи.

Другíй кано́нъ, творе́ніе Іоа́нна мона́ха, гла́съ 8.

Ирмо́съ: Во́ду проше́дъ, [я́ко су́шу, и еги́петскаго зла́ избѣжа́въ, изра́ильтянинъ вопія́ше: Изба́вителю и Бо́гу на́шему пои́мъ].

Пре́жде отъ не су́щихъ приве́дъ вся́ческую тва́рь, и вѣ́дый серде́чная сокро́вища предглаго́леши, я́ко Влады́ка, ученико́мъ Ла́зарево успе́ніе.

Человѣ́ка естество́мъ осуществова́выйся, Христе́, отъ Дѣ́вы, Ла́зарево Ты́ погребе́ніе навы́кнути вопроша́лъ еси́, я́ко Человѣ́къ, не невѣ́дый, я́ко Бо́гъ, идѣ́же лежа́ше.

Сла́ва: Увѣря́я, Сло́ве, Твое́ Воскресе́ніе, вои́стинну, я́ко отъ сна́, люби́маго воскреси́лъ еси́ уже́ смердя́ща, четверодне́вна мертвеца́ отъ гро́ба.

И ны́нѣ, богоро́диченъ: Чи́ни Тя́ а́нгелъ и человѣ́къ, Безневѣ́стная Ма́ти, хва́лятъ непреста́нно: Созда́теля бо си́хъ, я́коже Младе́нца, во объя́тіихъ Твои́хъ носи́ла еси́.

Катава́сія: Во́ду проше́дъ, я́ко су́шу, и еги́петскаго зла́ избѣжа́въ, изра́ильтянинъ вопія́ше: Изба́вителю и Бо́гу на́шему пои́мъ.

Пѣ́снь 3.

Ирмо́съ: Ты́ еси́ утвержде́ніе притека́ющихъ къ Тебѣ́, Го́споди, Ты́ еси́ Свѣ́тъ омраче́нныхъ, и пое́тъ Тя́ ду́хъ мо́й.

Два́ предлага́я дѣ́йства Твоя́, показа́лъ еси́ суще́ствъ, Спа́се, сугу́бство: Бо́гъ бо еси́ и Человѣ́къ.

Бе́здна сы́й ра́зума, Ты́ вопроша́еши, — гдѣ́ положи́ся ме́ртвый? — хотя́ воскреси́ти, Животода́вче, лежа́щаго.

Мѣ́ста преходя́й, я́ко бы́въ Человѣ́къ, яви́лся еси́ опи́санъ, исполня́я вся́ческая, я́ко Бо́гъ неопи́санный.

Ла́заря воздви́глъ еси́ Боже́ственнымъ, Христе́, глаго́ломъ, и мене́, мно́гими прегрѣше́ньми уме́рша, возста́ви, молю́ся.

Иный.

Ирмо́съ: Небе́снаго кру́га [Верхотво́рче, Го́споди, и Це́ркве Зижди́телю, Ты́ мене́ утверди́ въ любви́ Твое́й, жела́ній кра́ю, вѣ́рныхъ утвержде́ніе, еди́не Человѣколю́бче].

Предста́въ Ты́ гро́бу, Чудотво́рче Го́споди, въ Виѳа́ніи надъ Ла́заремъ прослези́лся еси́, зако́номъ естества́, пло́ть Твою́ увѣря́я, Іису́се Бо́же мо́й, ю́же воспрія́лъ еси́.

Марíинъ пла́чь Ты́ а́біе утоли́лъ еси́, Спа́се, и Ма́рѳѣ показу́я самовла́стное. Ты́ бо воскресе́ніе, Ты́ и живо́тъ, я́коже ре́клъ еси́, и́стина бо еси́, и всѣ́хъ Госпо́дь.

Сла́ва: Обви́таго укро́йми люби́маго Ла́заря, Го́споди, отъ а́да те́мнаго исхи́тилъ еси́ Ты́, сло́вомъ Твои́мъ всемо́щнымъ сме́рти разве́ргъ закле́пы же и ца́рствія.

И ны́нѣ, [богоро́диченъ]: Всели́лся еси́ въ Дѣ́ву пло́тски, Го́споди, яви́лся еси́ человѣ́комъ, я́коже лѣ́ть бѣ́ ви́дѣну Тебѣ́ бы́ти, Юже и показа́лъ еси́, я́ко и́стинную Богоро́дицу и вѣ́рныхъ Помо́щницу, еди́не Человѣколю́бче.

Катава́сія: Небе́снаго кру́га Верхотво́рче, Го́споди, и Це́ркве Зижди́телю, Ты́ мене́ утверди́ въ любви́ Твое́й, жела́ній кра́ю, вѣ́рныхъ утвержде́ніе, еди́не Человѣколю́бче.

Сѣда́ленъ, гла́съ 4. Подо́бенъ: Удиви́ся Іо́сифъ.

Вку́пѣ предста́стѣ Христу́ Ла́заревѣ сестрѣ́, и слезя́ще го́рцѣ, и пла́чущѣ его́, рѣ́ша Ему́: Го́споди, у́мре Ла́зарь. Онъ же, я́ко Бо́гъ, не невѣ́дый погреба́нія, вопроша́ше, я́ко Человѣ́къ: гдѣ́ положи́стѣ его́? И приступи́въ ко гро́бу, возглаша́ше четверодне́внаго Ла́заря. Онъ же а́біе воста́ и покланя́шеся Воскреси́вшему.

Сла́ва, и ны́нѣ, гла́съ 8. Подо́бенъ: Прему́дрости.

Провѣ́дый вся́ческая, я́ко Творе́цъ, въ Виѳа́ніи проре́клъ еси́ ученико́мъ Твои́мъ: дру́гъ на́шъ Ла́зарь, у́спе дне́сь. И вѣ́дый, вопроси́лъ еси́, ре́клъ: гдѣ́ положи́сте его́? И Отцу́ помоли́лся еси́, прослези́вся, я́ко Человѣ́къ, тѣ́мже и возгласи́въ, его́же люби́лъ еси́, отъ а́да возста́вилъ еси́, Го́споди, четверодне́внаго Ла́заря. Сего́ ра́ди вопіе́мъ Тебѣ́: пріими́, Христе́ Бо́же, дерза́ющихъ приноси́ти хвале́ніе Тебѣ́ и сподо́би всѣ́хъ сла́вы Твоея́.

Пѣ́снь 4.

Ирмо́съ: Услы́шахъ, Го́споди, смотре́нія Твоего́ та́инство, разумѣ́хъ дѣла́ Твоя́ и просла́вихъ Твое́ Божество́.

Не посо́бника тре́буяй, но смотре́нія соверша́яй неизрече́нное, моля́ся, возста́вилъ еси́ ме́ртва, четверодне́внаго, Всеси́льне.

Отцу́ Соприсносу́щное Сло́во, и Бо́гъ, пре́жде зри́мый, ны́нѣ, я́ко Человѣ́къ, мо́лится, моли́твы всѣ́хъ Пріе́мляй.

Гла́съ Тво́й разруши́, Спа́се, сме́ртную всю́ си́лу, основа́нія же а́дова Боже́ственною Твое́ю си́лою поколеба́шася.

Богоро́диченъ: Дѣ́ву воспои́мъ, я́ко по рождествѣ́ Дѣ́ву пребы́вшую и ро́ждшую Христа́ Бо́га, отъ пре́лести мíръ изба́вльшаго.

Иный.

Ирмо́съ: Ты́ моя́ крѣ́пость, Го́споди, [Ты́ моя́ и си́ла, Ты́ мо́й Бо́гъ, Ты́ мое́ ра́дованіе, не оста́вль нѣ́дра Отча, и на́шу нищету́ посѣти́въ. Тѣ́мъ съ проро́комъ Авваку́момъ зову́ Ти: си́лѣ Твое́й сла́ва, Человѣколю́бче].

Ты, я́ко Па́стырь, исхи́тилъ еси́, Христе́, человѣ́ка, растлѣ́вша уже́ четверодне́вна, Зижди́телю, отъ во́лка лю́таго вои́стинну и всея́дца, я́ко Всеси́ленъ же и Госпо́дь, си́мъ проявля́я всемíрную сла́ву Твоего́ ны́нѣ тридне́внаго воста́нія.

Тя́ Жи́знь ви́дяще су́щіи съ Ма́рѳою, Христе́, вопія́ху: а́ще бы бы́лъ еси́ здѣ́, Го́споди, Просвѣще́ніе всѣ́хъ и Жи́знь, отню́дъ не бы́ у́мерлъ, ме́ртвъ не яви́лся бы Ла́зарь. Жи́знь же уме́ршихъ, Ты́ Человѣколю́бче сы́й, въ ра́дость пла́чь и́хъ прелага́еши.

Сла́ва: Тя́ исто́чника боя́тся, Го́споди, бе́здны, Тебѣ́ рабо́таютъ во́ды вся́ческія, Тебе́ трепе́щутъ, Христе́, вереи́ а́довы, и закле́пы держа́вою Твое́ю разруша́ются, Ла́зарю воскре́сшу изъ ме́ртвыхъ гла́сомъ Твои́мъ, Всеси́льне Спа́се Человѣколю́бче.

[И ны́нѣ,] богоро́диченъ: Ты́ — вѣ́рнымъ похвала́ еси́, Безневѣ́стная, Ты́ — предста́тельство, Ты́ — и прибѣ́жище христіа́номъ, стѣна́ и приста́нище: къ Сы́ну бо Твоему́ моле́нія прино́сиши, Всенепоро́чная, и спаса́еши отъ бѣ́дъ, вѣ́рою и любо́вію Богоро́дицу Чи́стую Тя́ вѣ́дущія.

Катава́сія: Ты́ моя́ крѣ́пость, Го́споди, Ты́ моя́ и си́ла, Ты́ мо́й Бо́гъ, Ты́ мое́ ра́дованіе, не оста́вль нѣ́дра Отча, и на́шу нищету́ посѣти́въ. Тѣ́мъ съ проро́комъ Авваку́момъ зову́ Ти: си́лѣ Твое́й сла́ва, Человѣколю́бче.

Пѣ́снь 5.

Ирмо́съ: Вску́ю мя́ отри́нулъ еси́ [отъ лица́ Твоего́, Свѣ́те незаходи́мый, и покры́ла мя́ е́сть чужда́я тма́ окая́ннаго? Но обрати́ мя, и къ свѣ́ту за́повѣдей Твои́хъ пути́ моя́ напра́ви, молю́ся].

Предста́въ Ла́зареву гро́бу, Человѣколю́бче, сего́ призва́лъ еси́, и жи́знь по́далъ еси́: я́ко Жи́знь сы́й безсме́ртная человѣ́комъ всѣ́мъ, я́ко Бо́гъ бу́дущее прообразу́я я́вѣ воскресе́ніе.

Свя́занъ нога́ма Ла́зарь хожда́ше, — чу́до въ чудесѣ́хъ! — и́бо Бо́лій яви́ся возбраня́ющаго, Укрѣпля́яй и́ Христо́съ, Его́же сло́ву вся́ раболѣ́пно слу́жатъ, я́ко Бо́гу и Влады́цѣ рабо́тающа.

Ме́ртва, смердя́ща Ла́заря воздви́гнувый, Христе́, четверодне́вна, возста́ви мя́, уме́рша ны́нѣ грѣхи́ мои́ми, и положе́на въ ро́вѣ и те́мнѣй сѣ́ни сме́ртнѣй, и я́ко Благоутро́бенъ изба́ви и спаси́ мя́.

Иный, ирмо́съ то́йже.

Отцу́ сла́ву подая́, я́ко не богопроти́вный бы́лъ еси́, моля́ся, предстоя́щій увѣря́я наро́дъ, Долготерпѣли́ве, и благодаре́ніе Твоему́ Отцу́ принося́, повелѣ́ніемъ воздвиза́еши Ла́заря.

О, гла́са Боговѣща́ннаго и Боже́ственныя си́лы, Спа́се, держа́вы Твоея́! Еюже а́дова врата́ всея́дныя сме́рти сокруши́лъ еси́, но исхити́ мя́ отъ страсте́й мои́хъ, я́коже пре́жде четверодне́вна Твоего́ дру́га Ла́заря.

Сла́ва: Моли́твами Ла́заря, Ма́рѳы же и Марíи, на́съ сподо́би зри́телей бы́ти Креста́ и Страсте́й Твои́хъ, Го́споди, и свѣтоно́сицы дне́й и цари́цы Воскресе́нія Твоего́, Человѣколю́бче.

И ны́нѣ, богоро́диченъ: Ма́тернее дерзнове́ніе къ Сы́ну Твоему́ иму́щи, Пречи́стая, сро́днаго промышле́нія о на́съ не пре́зри, мо́лимся, я́ко Тя́ еди́ну христіа́не ко Влады́цѣ умилостивле́ніе благопрія́тное предлага́емъ.

Катава́сія: Вску́ю мя́ отри́нулъ еси́ отъ лица́ Твоего́, Свѣ́те незаходи́мый, и покры́ла мя́ е́сть чужда́я тма́ окая́ннаго? Но обрати́ мя, и къ свѣ́ту за́повѣдей Твои́хъ пути́ моя́ напра́ви, молю́ся.

Отсе́лѣ начина́ется четверопѣ́снецъ господи́на Космы́: ирмосы́ по два́жды, тропари́ на 12.
Пѣ́снь 6.

Ирмо́съ: Іо́ну въ ки́тѣ, Го́споди, еди́наго всели́лъ еси́, мене́ же свя́зана мре́жами вра́жіими, я́ко отъ тли́ о́наго, спаси́.

Любо́вь Тебе́ въ Виѳа́нію, Го́споди, отведе́ къ Ла́зарю, и сего́ уже́ смердя́ща воскреси́лъ еси́, я́ко Бо́гъ, и отъ у́зъ а́довыхъ спа́слъ еси́.

Ма́рѳа у́бо отча́яшеся Ла́заря, я́ко ви́дѣ четверодне́вна, Христо́съ же истлѣ́вшаго воскреси́, я́ко Бо́гъ, и къ жи́зни преста́ви глаго́ломъ.

Иный, Іоа́нна мона́ха, гла́съ то́йже.

Ирмо́съ: Очи́сти мя́, Спа́се, [мно́га бо беззако́нія моя́, и изъ глубины́ зо́лъ возведи́, молю́ся, къ Тебѣ́ бо возопи́хъ, и услы́ши мя́, Бо́же спасе́нія моего́].

Бо́гъ сы́й и́стинный, Ла́зарево вѣ́далъ еси́ успе́ніе, и сіе́ ученико́мъ Твои́мъ провозвѣсти́лъ еси́, увѣря́я, Влады́ко, Божества́ Своего́ неопредѣ́льное дѣ́йство.

Пло́тію опи́санъ сы́й Неопи́санный, въ Виѳа́нію прише́дъ, я́ко Человѣ́къ, Влады́ко, слези́ши надъ Ла́заремъ, я́ко Бо́гъ же, хотя́, воскреша́еши четверодне́внаго.

Катава́сія: Очи́сти мя́, Спа́се, мно́га бо беззако́нія моя́, и изъ глубины́ зо́лъ возведи́, молю́ся, къ Тебѣ́ бо возопи́хъ, и услы́ши мя́, Бо́же спасе́нія моего́.

Конда́къ, гла́съ 2. Подо́бенъ: Вы́шнихъ ища́.

Всѣ́хъ ра́дость — Христо́съ, Истина, Свѣ́тъ, Живо́тъ и мíра Воскресе́ніе, су́щимъ на земли́ яви́ся Свое́ю бла́гостію и бы́сть о́бразъ Воскресе́нія, всѣ́мъ подая́ Боже́ственное оставле́ніе.

Икосъ:

Ученико́мъ Созда́тель всѣ́хъ предвѣща́, глаго́ля, — бра́тія и зна́еміи, на́шъ дру́гъ у́спе, — си́ми предглаго́ля и уча́, я́ко вся́ вѣ́си, я́ко Созда́тель всѣ́хъ. Идемъ у́бо и уви́димъ стра́нное погребе́ніе и рыда́ніе Марíино, и Ла́заревъ гро́бъ у́зримъ, та́мо бо хощу́ чудодѣ́йствовати, соверша́я Креста́ предначина́ніе и всѣ́мъ подая́ Боже́ственное оставле́ніе.

Синакса́рій.

Стихи́: Рыда́еши, Іису́се, — сіе́ сме́ртнаго существа́;

              Оживля́еши дру́га Твоего́, — сіе́ Боже́ственныя крѣ́пости.

Въ то́йже де́нь воста́ніе пра́зднуемъ свята́го и пра́веднаго дру́га Христо́ва Ла́заря Четверодне́внаго.

Се́й евре́инъ у́бо бя́ше ро́домъ, фарисе́й же е́ресію, и сы́нъ, я́коже нѣ́гдѣ обрѣ́теся, фарисе́я сы́й Си́мона, отъ Виѳа́ніи ве́си происходя́. Го́споду же на́шему Іису́су Христу́, по земли́ творя́щу хожде́нія о спасе́ніи ро́да на́шего, и си́це въ содру́жество Ему́ соединя́ется. Поне́же бо къ Си́мону Христо́съ ча́сто бесѣ́доваше, а́ки и тому́ о воскресе́ніи ме́ртвыхъ зѣло́ моля́щуся, и къ до́му его́ прихожда́ше мно́гажды, Ла́зарь въ сво́йство возлюбля́ется, не то́йже еди́нъ, но и сестрѣ́ его́ двѣ́, Ма́рѳа я́вѣ и Марíя.

Уже́ бо спаси́тельной Стра́сти приближа́ющейся, ельма́ подоба́ше воскресе́нія та́инству извѣ́стнѣе увѣ́ритися. Бя́ше у́бо пребыва́я Іису́съ объ о́нъ по́лъ Іорда́на, пе́рвѣе Іаи́рова о́трочища и вдови́ча сы́на воскреси́въ изъ ме́ртвыхъ. Дру́гъ же его́ Ла́зарь неду́гомъ тя́жкимъ объя́тъ бы́въ, у́мре. Іису́съ у́бо и не сы́й та́мо, ученико́мъ глаго́летъ: «Ла́зарь, дру́гъ на́шъ, у́спе». И ма́ло па́ки преста́въ, «Ла́зарь», рече́, «у́мре». Прихо́дитъ у́бо въ Виѳа́нію, Іорда́нъ оста́вль, отъ се́стръ его́ возвѣще́нъ бы́въ. Разстои́тъ же отъ Іерусали́ма Виѳа́нія, а́ки ста́дій пятьна́десять. И предусрѣто́стѣ сестрѣ́ Ла́заревѣ, глаго́лющѣ: «Го́споди, а́ще бы еси́ бы́лъ здѣ́, не бы́ у́мерлъ на́шъ бра́тъ; но и ны́нѣ а́ще Тебѣ́ хоти́тельно, воздви́гнеши и́, мо́жеши бо». Вопроша́етъ же наро́да Іису́съ: «гдѣ́ положи́сте его́?» И а́біе вси́ предыдя́ху на гро́бъ. И ка́мени взя́ту бы́вшу, Ма́рѳа глаго́летъ: «Го́споди, уже́ смерди́тъ, четверодне́венъ бо е́сть». Помоли́вся Іису́съ и сле́зы надъ лежа́щаго испусти́въ, гла́сомъ ве́ліимъ воззва́: «Ла́заре гряди́ во́нъ!» И а́біе уме́рый изы́де и, разрѣше́нъ бы́въ, оты́де въ до́мъ.

Сіе́ стра́нное чу́до на за́висть воздвиза́етъ евре́йскія лю́ди, и на Христа́ возбѣша́ются. Іису́съ же, па́ки укло́нься, оты́де. Архіере́и же и Ла́заря уби́ти помышля́ху, зане́ мно́зи, его́ зря́ще, ко Христу́ прилага́хуся. Но о́нъ мы́слимая разумѣ́въ, къ Ки́прскому о́строву избѣга́етъ, и та́мо пребыва́я, по́слѣжде отъ апо́столовъ архіере́й показу́ется Ките́йскаго гра́да. До́брѣ же и боголюбе́знѣ пожи́въ, по тридесятолѣ́тномъ вре́мени ожи́тія своего́, умира́етъ па́ки и та́можде погреба́ется, мно́гая чудеса́ содѣ́явъ. Глаго́лется же, по ожи́тіи ничесо́же я́сти, кромѣ́ услажда́ющаго. И я́ко его́ омофо́ръ Пречи́стая Бо́жія Ма́ти, Свои́ма угото́вльши рука́ма, ему́ дарова́.

Сего́ честны́я и святы́я мо́щи прему́дрѣйшій ца́рь Ле́въ, отъ нѣ́коего видѣ́нія Боже́ственнѣйшаго, отту́ду прене́съ, въ созда́ннѣмъ отъ него́ въ Константиногра́дѣ, во и́мя сего́ свята́го хра́мѣ, че́стно и многоцѣ́нно полага́етъ, одесну́ю въ хра́мъ входя́ще, въ проти́вной свяще́нному олтарю́ стѣнѣ́. И ны́нѣ еще́ пребыва́ютъ честны́я его́ мо́щи, неизрече́нное нѣ́кое благово́ніе соверша́юще.

Пра́здноватися же въ настоя́щій де́нь вчини́ся его́ воста́ніе, зане́ святíи и богоно́сніи отцы́ на́ши, па́че же святíи апо́столи, по четыредесятодне́внѣмъ постѣ́ за очище́ніе, святы́я Стра́сти Го́спода на́шего Іису́са Христа́ хотя́ще жре́ти, поне́же сіе́ чу́до нача́ло и вину́ наипа́че обрѣто́ша іуде́йскаго на Христа́ неи́стовства, посему́ здѣ́ преесте́ственное сіе́ чу́до положи́ша. Еже у́бо евангели́стъ Іоа́ннъ са́мъ спису́етъ, я́ко други́мъ евангели́стомъ оста́вльшимъ сіе́, я́вѣ еще́ жи́въ бѣ́ Ла́зарь и ви́димь. Глаго́лется у́бо, я́ко и сего́ ра́ди самаго́ и про́чее списа́ся Ева́нгеліе, и я́ко ничесо́же о безнача́льномъ Рождествѣ́ Христо́вѣмъ друзíи воспомяну́ша. Се́ бо бя́ше иско́мое увѣ́ритися, я́ко Сы́нъ Бо́жій и Бо́гъ бѣ́ Христо́съ, и я́ко воскре́се, и воскресе́ніе бу́детъ ме́ртвымъ, е́же Ла́заремъ па́че увѣря́ется.

Ничто́же отъ е́же во а́дѣ Ла́зарь, рече́, — или́ я́ко не оста́влено бы́сть ви́дѣти я́же та́мо, или́ ви́дѣвшу, молча́ти о си́хъ повелѣ́но бы́сть.

Отсе́лѣ и вся́къ человѣ́къ ны́нѣ уме́рый, «Ла́зарь» глаго́лется, и гро́бная оде́жда па́ки «лаза́рома» нарица́ется, гада́тельствующему сло́ву, е́же въ па́мять пе́рваго Ла́заря приходи́ти. Аще бо о́нъ сло́вомъ Христо́вымъ воста́ и оживе́ па́ки, та́ко и се́й, а́ще и у́мре, въ послѣ́днѣй трубѣ́ воста́въ, вѣ́чно жи́ти бу́детъ.

Моли́твами дру́га Твоего́ Ла́заря, Христе́ Бо́же, поми́луй на́съ, ами́нь.

Пѣ́снь 7.

Ирмо́съ: Отроцы евре́йстіи въ пещи́ попра́ша пла́мень дерзнове́нно и на ро́су о́гнь преложи́ша, вопію́ще: благослове́нъ еси́, Го́споди Бо́же, во вѣ́ки.

Прослези́вся, я́ко человѣ́къ, Ще́дре, воскреси́лъ еси́, я́ко Бо́гъ, су́щаго во гро́бѣ, и разрѣ́шся отъ а́да, Ла́зарь взыва́ше: благослове́нъ еси́, Го́споди Бо́же, во вѣ́ки.

Изы́де пово́йми обвя́занъ, про́пасти а́да же и тмы́ убѣ́гъ Влады́чнимъ сло́вомъ, Ла́зарь взыва́я: благослове́нъ еси́, Го́споди Бо́же, во вѣ́ки.

Иный.

Ирмо́съ: Отъ Іуде́и доше́дше, [о́троцы, въ Вавило́нѣ иногда́, вѣ́рою Тро́ическою пла́мень пе́щный попра́ша, пою́ще: отце́въ Бо́же, благослове́нъ еси́].

Надъ дру́гомъ прослези́вся, Ма́рѳины, Ще́дре, сле́зы утоли́лъ еси́, и стра́стію во́льною отъя́лъ еси́ отъ лица́ люде́й Твои́хъ вся́кую сле́зу, оте́цъ на́шихъ Бо́же, благослове́нъ еси́.

Живота́ сокро́вище, ме́ртваго, я́ко отъ сна́, Спа́се, воздви́глъ еси́, и сло́вомъ а́дову утро́бу расто́ргнувъ, воскреси́лъ еси́, пою́ща: оте́цъ на́шихъ Бо́же, благослове́нъ еси́.

Мертвеца́ смердя́ща, свя́зана пово́йми, Влады́ко, воздви́гнулъ еси́, и мене́, свя́занаго плени́цами прегрѣше́ній, возста́ви, пою́ща: оте́цъ на́шихъ Бо́же, благослове́нъ еси́.

Катава́сія: Отъ Іуде́и доше́дше, о́троцы, въ Вавило́нѣ иногда́, вѣ́рою Тро́ическою пла́мень пе́щный попра́ша, пою́ще: отце́въ Бо́же, благослове́нъ еси́.

Пѣ́снь 8.

Ирмо́съ: Мусикíйскимъ орга́номъ согласу́ющимъ и лю́демъ безчи́сленнымъ, покланя́ющимся о́бразу въ Деи́рѣ, три́ о́троцы не повину́вшеся, Го́спода воспѣва́ху и славосло́вяху во вся́ вѣ́ки.

Яко Па́стырь а́гнца взыска́лъ еси́, отъ во́лка лю́таго губи́теля восхи́тивъ, растлѣ́вша обнови́лъ еси́, пою́ща Тебѣ́: по́йте и превозноси́те во вся́ вѣ́ки.

Яко Человѣ́къ гро́ба взыска́лъ еси́, ме́ртваго, я́ко Содѣ́тель, воскреси́лъ еси́, повелѣ́ніемъ Твои́мъ Влады́чнимъ, Его́же а́дъ ужасе́ся, вопію́ща Тебѣ́: по́йте и превозноси́те во вся́ вѣ́ки.

Иный.

Ирмо́съ: Царя́ Небе́снаго, [Его́же пою́тъ во́и а́нгельстіи, хвали́те и превозноси́те во вся́ вѣ́ки].

Вопроша́еши у́бо, я́ко Человѣ́къ, я́ко Бо́гъ же, воскреша́еши сло́вомъ четверодне́внаго. Тѣ́мже Тя́ пое́мъ и превозно́симъ во вся́ вѣ́ки.

Тебѣ́ благоразу́мно Влады́ко, я́коже до́лжное Марíя приноша́етъ мѵ́ро, воспѣва́ющи во вся́ вѣ́ки.

Призыва́еши у́бо, я́ко Человѣ́къ, Отца́, я́ко Бо́гъ же, Ла́заря воздвиза́еши. Тѣ́мже Тя́ пое́мъ, Христе́, во вѣ́ки.

Хва́лимъ, благослови́мъ, [покланя́емся Го́сподеви, пою́ще, и превознося́ще во вся вѣ́ки].

Катава́сія: Царя́ Небе́снаго, Его́же пою́тъ во́и а́нгельстіи, хвали́те и превозноси́те во вся́ вѣ́ки.

Честнѣ́йшая... не стихосло́вится.

Пѣ́снь 9.

Ирмо́съ: Чи́стую сла́вно почти́мъ, лю́діе, Богоро́дицу, о́гнь Божества́ пріи́мшую во чре́вѣ неопа́льно, пѣ́сньми велича́емъ.

Лю́діе, ви́дѣвше ходя́ща мертвеца́ четверодне́вна, удиви́вшеся чудеси́, вопія́ху Изба́вителю, Бо́га Тя́ въ пѣ́снехъ велича́юще.

Предувѣря́я сла́вное воста́ніе Твое́, о Спа́се мо́й, ме́ртва четверодне́вна изъ а́да свобожда́еши Ла́заря, пѣ́сньми Тя́ велича́юща.

Иный.

Ирмо́съ: Вои́стинну Богоро́дицу, [Тя́ исповѣ́дуемъ, спасе́нніи Тобо́ю, Дѣ́во Чи́стая, съ безпло́тными ли́ки Тя́ велича́юще].

Почита́я Твоего́ Отца́ и показу́я, я́ко не богопроти́венъ еси́, моли́тву дѣ́еши, Христе́, самовла́стно воздви́гъ четверодне́внаго.

Изъ гро́ба четверодне́внаго Ла́заря воздвиза́еши, тридне́внаго, Христе́, Твоего́ воста́нія всеи́стиннаго всѣ́мъ показу́я свѣдѣ́теля.

Хо́диши и слези́ши, вѣща́еши же, Спа́се мо́й, человѣ́ческое показу́я Твое́ дѣ́йство, Боже́ственное же явля́я, воздвиза́еши Ла́заря.

Содѣ́ялъ еси́ неизрече́нно, Влады́ко Спа́се мо́й, по обою́ двою́ Твое́ю естеству́, самовла́стною во́лею спасе́ніе мое́.

Катава́сія: Вои́стинну Богоро́дицу, Тя́ исповѣ́дуемъ, спасе́нніи Тобо́ю, Дѣ́во Чи́стая, съ безпло́тными ли́ки Тя́ велича́юще.

Та́же, на гла́съ 1: Свя́тъ Госпо́дь Бо́гъ на́шъ.., три́жды.

Ексапостила́рій самогла́сенъ, два́жды.

Сло́вомъ Твои́мъ, Сло́ве Бо́жій, Ла́зарь ны́нѣ возска́четъ, къ житію́ па́ки поте́къ, и съ вѣ́твьми лю́діе Тя́, Держа́вне, почита́ютъ, я́ко въ коне́цъ погуби́ши а́дъ сме́ртію Твое́ю.

Сла́ва, и ны́нѣ, и́нъ, подо́бенъ, еди́ножды:

Ла́заремъ тя́ Христо́съ уже́ разруша́етъ, сме́рте, и гдѣ́ твоя́, а́де, побѣ́да? Виѳа́ніи пла́чь ны́нѣ на тебе́ преставля́ется, вси́ вѣ́тви побѣ́ды Тому́ принесе́мъ.

На хвали́техъ поста́вимъ стихо́въ 8, и пое́мъ стихи́ры самогла́сны, гла́съ 1.

Сти́хъ: Сотвори́ти въ ни́хъ су́дъ напи́санъ, [сла́ва сія́ бу́детъ всѣ́мъ преподо́бнымъ Его́].

Воскресе́ніе и Жи́знь человѣ́комъ сы́й, Христе́, гро́бу Ла́зареву предста́лъ еси́, увѣря́я на́мъ два́ существа́ Твоя́, Долготерпѣли́ве, я́ко Бо́гъ и Человѣ́къ, отъ Чи́стыя Дѣ́вы прише́лъ еси́. Якоже бо Человѣ́къ, вопроша́лъ еси́: гдѣ́ погребе́ся? И я́коже Богъ, воскреси́лъ еси́ живоно́снымъ манове́ніемъ четверодне́внаго.

Ла́заря уме́рша, четверодне́внаго, воскреси́лъ еси́ изъ а́да, Христе́, пре́жде Твоея́ сме́рти, потря́съ сме́ртную держа́ву, и еди́нѣмъ люби́мымъ, всѣ́хъ человѣ́къ провозвѣща́яй изъ тли́ свобожде́ніе. Тѣ́мже, покланя́ющеся Твое́й всеси́льнѣй вла́сти, вопіе́мъ: благослове́нъ еси́, Спа́се, поми́луй на́съ.

Ма́рѳа и Марíя Спа́су глаго́ластѣ: а́ще бы здѣ́ бы́лъ еси́, Го́споди, не бы́ у́мерлъ Ла́зарь. Христо́съ же, Воскресе́ніе усо́пшихъ, сего́ уже́ четверодне́внаго изъ ме́ртвыхъ воскреси́. Пріиди́те, вси́ вѣ́рніи, Сему́ поклони́мся, гряду́щему во сла́вѣ, спасти́ ду́ши на́ша.

Божества́ Твоего́, Христе́, подава́я ученико́мъ Твои́мъ о́бразъ, въ наро́дѣхъ смиря́лъ еси́ Себе́, утаи́тися хотя́. Тѣ́мже апо́столомъ, я́ко Провѣ́децъ Бо́гъ, Ла́зареву сме́рть предре́клъ еси́. Въ Виѳа́ніи же прису́тствуяй лю́демъ, дру́га Твоего́ гро́ба не невѣ́дый, увѣ́дѣти вопроша́лъ еси́, я́ко Человѣ́къ. Но Тобо́ю четверодне́венъ воскресы́й, Боже́ственную Твою́ держа́ву яви́, Всеси́льне Го́споди, сла́ва Тебѣ́.

Гла́съ 4:

Четверодне́вна воздви́глъ еси́ дру́га Твоего́, Христе́, и Ма́рѳино и Марíино рыда́ніе утоли́лъ еси́, показу́я всѣ́мъ, я́ко Ты́ еси́ вся́ соверша́яй Боже́ственною си́лою, самовла́стнымъ хотѣ́ніемъ. Ему́же херуви́ми вопію́тъ непреста́нно: оса́нна въ вы́шнихъ, благослове́нъ еси́, надъ всѣ́ми Бо́же, сла́ва Тебѣ́.

Ма́рѳа Марíи вопія́ше: Учи́тель предстои́тъ и глаша́етъ тя́, приступи́. Она́ же ско́ро прише́дши, идѣ́же бѣ́ стоя́ Госпо́дь, и ви́дѣвши возопи́, па́дши поклони́ся, пречи́стѣи но́зѣ Твои́ облобыза́ющи, глаго́лаше: Го́споди, а́ще бы́ еси́ здѣ́ бы́лъ, не бы́ у́бо у́мерлъ бра́тъ на́шъ.

Гла́съ 8:

Сти́хъ: Воскресни́, Го́споди Бо́же мой, да вознесе́тся рука́ Твоя́, [не забу́ди убо́гихъ Твои́хъ до конца́].

Ла́заря, уме́рша въ Виѳа́ніи, воздви́глъ еси́ четверодне́вна: то́кмо бо преста́лъ еси́ гро́бу, гла́съ живо́тъ уме́ршему бы́сть, и воздохну́въ, а́дъ отрѣши́ стра́хомъ. Ве́ліе чу́до, Многоми́лостиве Го́споди, сла́ва Тебѣ́!

Сти́хъ: Исповѣ́мся Тебѣ́, Го́споди, всѣ́мъ се́рдцемъ мои́мъ, [повѣ́мъ вся́ чудеса́ Твоя́].

Якоже ре́клъ еси́, Го́споди, Ма́рѳѣ, — Азъ е́смь Воскресе́ніе, — дѣ́ломъ сло́во испо́лнилъ еси́, изъ а́да воззва́въ Ла́заря. И мене́, Человѣколю́бче, ме́ртва страстьми́, я́ко Сострада́теленъ, воскреси́, молю́ся.

Сла́ва, гла́съ 2:

Ве́ліе и пресла́вное чу́до соверши́ся дне́сь, я́ко мертвеца́ четверодне́внаго, изъ гро́ба Христо́съ возгласи́въ, воздви́же и дру́га призва́: славосло́вимъ Его́, я́ко Пресла́вна, да моли́твами пра́веднаго Ла́заря спасе́тъ ду́ши на́ша.

И ны́нѣ, [богоро́диченъ]:

Преблагослове́нна еси́, Богоро́дице Дѣ́во, [Вопло́щшимъ бо ся изъ Тебе́ а́дъ плѣни́ся, Ада́мъ воззва́ся, кля́тва потреби́ся, Ева свободи́ся, сме́рть умертви́ся, и мы́ ожи́хомъ. Тѣ́мъ, воспѣва́юще, вопіе́мъ: благослове́нъ Христо́съ Бо́гъ, благоволи́вый та́ко, сла́ва Тебѣ́].

Та́же: Славосло́віе вели́кое, [ектеніи́] и отпу́стъ.



НА ЛИТУРГІИ,

Блаже́нна, пѣ́снь 3-я и 6-я, на 8. По вхо́дѣ: Тропа́рь пра́зднику. Сла́ва, и ны́нѣ, конда́къ. Вмѣ́сто трисвята́го пое́мъ: Ели́цы во Христа́ крести́стеся, во Христа́ облеко́стеся. Аллилу́ія. Проки́менъ, гла́съ 3: Госпо́дь просвѣще́ніе мое́* и Спаси́тель мо́й, кого́ убою́ся? Сти́хъ: Госпо́дь защи́титель живота́ моего́, отъ кого́ устрашу́ся? Апо́столъ ко Евре́омъ, зача́ло 333, отъ полу́: Бра́тіе, ца́рство непоколеби́мо... Коне́цъ: Іису́съ Христо́съ вчера́ и дне́сь, То́йже и во вѣ́ки. Аллилу́ія, гла́съ 5: Госпо́дь воцари́ся, въ лѣ́поту облече́ся. Сти́хъ: Ибо утверди́ вселе́нную, я́же не подви́жится. Ева́нгеліе отъ Іоа́нна, зача́ло 39: Во вре́мя о́но, бѣ́ нѣ́кто боля́ Ла́зарь... Коне́цъ: И ви́дѣвше, я́же сотвори́ Іису́съ, вѣ́роваша въ Него́. Прича́стенъ: Изъ у́стъ младе́нецъ и ссу́щихъ соверши́лъ еси́ хвалу́. Аллилу́ія, три́жды.

На трапе́зѣ учрежда́емся варе́ніемъ со еле́емъ, а́ще же и икру́ и́мамы, да да́стся коему́ждо бра́ту по три́ о́нгіи, и вино́ піе́мъ.

[Зри́:] Подоба́етъ вѣ́дати: Аще хра́мъ пра́веднаго Ла́заря, по обы́чной каѳи́смѣ, поліеле́й. Велича́ніе святи́тельское и псало́мъ: Услы́шите сія́, вси́ язы́цы... Та́же сѣда́ленъ, и́же по 3-й пѣ́сни. И житіе́ свята́го Ла́заря, отъ Ники́фора Ксанѳопу́ла напи́санно. Степе́нна, антифо́нъ 1-й, 4-го гла́са. Проки́менъ, [гла́съ 4]: Честна́ предъ Го́сподемъ... Сти́хъ: Что́ возда́мъ Го́сподеви... Вся́кое дыха́ніе... Ева́нгеліе отъ Іоа́нна, зача́ло 36: Азъ е́смь две́рь... Псало́мъ 50-й. Стихи́ра, гла́съ 6: Го́споди, гла́съ Тво́й разруши́... Кано́ны два́, на 14. И катава́сія 2-го кано́на. По 3-й пѣ́сни, сѣда́ленъ пра́здника. По 6-й пѣ́сни, конда́къ: Всѣ́хъ ра́дость... и и́косъ. И про́чее послѣ́дованіе, я́коже указа́ся.

Источникъ: Тріо́діонъ, сíесть трипѣ́снецъ. — Кíевъ: Въ тѵпогра́фіи Кíево-Пече́рской Успе́нской Ла́вры, 1864. — Л. 321 об. – 334 об.

/ Къ оглавленію раздѣла /


Наверхъ / Къ титульной страницѣ

0