Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - пятница, 22 сентября 2017 г. Сейчасъ на порталѣ посѣтителей - 8.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

ТРІОДІОНЪ, СІЕСТЬ ТРИПѢСНЕЦЪ,
Съ Бо́гомъ Святы́мъ, обдержа́й подоба́ющее ему́ послѣ́дованіе.

Слу́жба въ суббо́ту тре́тія седми́цы Вели́каго поста́.

ВЪ ПЯТОКЪ ВЕЧЕРА,
Обы́чное стихосло́віе. На Го́споди воззва́хъ.., поста́вимъ стихо́въ 10 и пое́мъ самогла́сенъ дне́, два́жды, гла́съ 7:

Та́же му́ченичны 4 окто́иха, прилучи́вшагося гла́са, и въ мине́и 4. Сла́ва, поко́инъ гла́са. И ны́нѣ, богоро́диченъ 1-й гла́са. Вхо́дъ. Свѣ́те ти́хій...


Проки́менъ, псало́мъ 59-й, гла́съ 4: Да́ждь на́мъ по́мощь отъ ско́рби* и су́етно спасе́ніе человѣ́ческо. Сти́хъ: Бо́же, отри́нулъ ны́ еси́ и низложи́лъ еси́ на́съ.

Бытія́ чте́ніе. [Глава́ 8.]

Сѣ́де ковче́гъ въ мѣ́сяцъ седмы́й, въ два́десять седмы́й де́нь мѣ́сяца, на гора́хъ Арара́тскихъ. Вода́ же уходя́щи умаля́шеся да́же до деся́таго мѣ́сяца, и въ деся́тый мѣ́сяцъ, въ пе́рвый де́нь мѣ́сяца, яви́шася верси́ го́ръ. И бы́сть по четы́редесятихъ дне́хъ отве́рзе Но́е око́нце ковче́га, е́же сотвори́. И посла́ вра́на (ви́дѣти, а́ще уступи́ла вода́ отъ лица́ земли́,) и изше́дъ, не возврати́ся, до́ндеже изся́че вода́ отъ земли́. И посла́ голуби́цу по не́мъ, ви́дѣти, а́ще уступи́ла вода́ отъ лица́ земли́. И не обрѣ́тши голуби́ца поко́я нога́ма свои́ма, возврати́ся къ нему́ въ ковче́гъ, я́ко вода́ бя́ше по всему́ лицу́ всея́ земли́. И просте́ръ ру́ку свою́, прія́тъ ю́, и внесе́ ю́ къ себѣ́ въ ковче́гъ. И преме́дливъ еще́ се́дмь дне́й, па́ки посла́ голуби́цу изъ ковче́га. И возврати́ся къ нему́ голуби́ца къ ве́черу и имѣ́яше суче́цъ ма́сличенъ съ ли́ствіемъ во устѣ́хъ свои́хъ. И позна́ Но́е, я́ко уступи́ вода́ отъ лица́ земли́. И преме́дливъ еще́ се́дмь дне́й други́хъ, па́ки посла́ голуби́цу, и не преложи́ возврати́тися къ нему́ пото́мъ. И бы́сть въ пе́рвое и шестьсо́тное лѣ́то житія́ Но́ева, въ пе́рвый де́нь пе́рваго мѣ́сяца, изся́че вода́ отъ лица́ земли́. И откры́ Но́е покро́въ ковче́га, его́же сотвори́, и ви́дѣ, я́ко изся́че вода́ отъ лица́ земли́. Въ мѣ́сяцъ же вторы́й, въ два́десять седьмы́й де́нь мѣ́сяца, и́зсше земля́. И рече́ Госпо́дь Бо́гъ Но́еви, глаго́ля: Изы́ди изъ ковче́га ты́, и жена́ твоя́, и сы́нове твои́, и жены́ сыно́въ твои́хъ съ тобо́ю, и вся́ звѣ́ри, ели́цы су́ть съ тобо́ю; и вся́ку пло́ть отъ пти́цъ да́же до ското́въ, и вся́къ га́дъ, дви́жущійся по земли́, изведи́ съ собо́ю. И расти́теся и мно́житеся на земли́. И изы́де Но́е, и жена́ его́, и сы́нове его́, и жены́ сыно́въ его́ съ ни́мъ. И вси́ звѣ́ріе, и вси́ ско́ти, и вся́ пти́цы, и вся́ га́ды дви́жущіяся, по ро́ду своему́ на земли́, изыдо́ша изъ ковче́га. И созда́ Но́е же́ртвенникъ Го́сподеви и взя́ отъ всѣ́хъ ското́въ чи́стыхъ и отъ всѣ́хъ пти́цъ чи́стыхъ, и вознесе́ во всесожже́ніе на же́ртвенникъ. И обоня́ Госпо́дь воню́ благоуха́нія.

Проки́менъ псало́мъ 60-й, гла́съ 6: Услы́ши, Бо́же, моле́ніе мое́,* вонми́ моли́твѣ мое́й. Сти́хъ: Отъ коне́цъ земли́ къ Тебѣ́ воззва́хъ.

При́тчей чте́ніе. [Главы́ 10 и 11.]

Уста́ пра́веднаго ка́плютъ прему́дрость, язы́къ же непра́веднаго поги́бнетъ. Устнѣ́ муже́й пра́ведныхъ ка́плютъ благода́ти, уста́ же нечести́выхъ развраща́ются. Мѣ́рила льсти́вая ме́рзость предъ Го́сподемъ, вѣ́съ же пра́ведный прія́тенъ Ему́. Идѣ́же а́ще вни́детъ досажде́ніе, та́мо и безче́стіе, уста́ же смире́нныхъ поуча́ются прему́дрости. Умира́яй пра́ведникъ, оста́ви раска́яніе, удо́бна же быва́етъ и посмѣя́тельна нечести́выхъ поги́бель. Соверше́нство пра́выхъ наста́витъ и́хъ и поползнове́ніе отрица́ющихся плѣни́тъ и́хъ. Не упо́льзуютъ имѣ́нія въ де́нь я́рости, пра́вда же изба́витъ отъ сме́рти. Пра́вда непоро́чнаго исправля́етъ пути́, нече́стіе же впа́даетъ въ непра́вду. Пра́вда муже́й пра́выхъ изба́витъ и́хъ, безсовѣ́тіемъ же уловля́ются беззако́нніи. Сконча́вшуся му́жу пра́ведну, не поги́бнетъ наде́жда, похвала́ же нечести́выхъ поги́бнетъ. Пра́ведникъ отъ ло́ва убѣ́гнетъ, въ него́же мѣ́сто предае́тся нечести́вый. Во устѣ́хъ нечести́выхъ сѣ́ть гра́жданомъ, чу́вство же пра́ведныхъ благопоспѣ́шно. Во благи́хъ пра́ведныхъ испра́вится гра́дъ, и въ поги́бели нечести́выхъ ра́дованіе. Во благослове́ніи пра́выхъ возвы́сится гра́дъ, усты́ же нечести́выхъ раскопа́ется. Руга́ется гра́жданомъ лише́нный ра́зума, му́жъ же му́дрый безмо́лвіе во́дитъ.

И про́чее послѣ́дованіе Преждеосвяще́нныхъ.



ВЪ СУББОТУ ТРЕТІЯ СЕДМИЦЫ, НА УТРЕНИ,

Тропа́рь на Аллилу́ія.., [гла́съ 2]:

Апо́столи, му́ченицы и проро́цы, [святи́теліе, преподо́бніи и пра́ведніи, до́брѣ по́двигъ соверши́вшіи и вѣ́ру соблю́дшіи, дерзнове́ніе иму́щіи ко Спа́су, о на́съ Того́, я́ко Бла́га, моли́те спасти́ся, мо́лимся, душа́мъ на́шимъ]. [Два́жды.]

Сла́ва, [ме́ртвенъ]:

Помяни́, Го́споди, [я́ко Бла́гъ, рабы́ Твоя́, и ели́ка въ житіи́ согрѣши́ша, прости́, никто́же бо безгрѣ́шенъ, то́кмо Ты́, могíй и преста́вленнымъ да́ти поко́й].

И ны́нѣ, [богоро́диченъ]:

Ма́ти Свята́я [Неизрече́ннаго Свѣ́та, а́нгельскими Тя́ пѣ́сньми почита́юще, благоче́стно велича́емъ].

По 1-мъ стихосло́віи глаго́лемъ сѣда́льны му́ченичны осмогла́сника, прилучи́вшагося гла́са, три́, и богоро́диченъ. По 2-мъ же стихосло́віи глаго́лемъ сѣда́ленъ поко́инъ, гла́съ 5. Поко́й, Спа́се на́шъ... Отъ Дѣ́вы возсія́вый... О си́хъ всѣ́хъ указа́ся въ мимоше́дшую суббо́ту. И чте́ніе въ Шестодне́вцѣ. Пое́мъ же кано́нъ мине́и, и свята́го оби́тели, и четверопѣ́снецъ по чи́ну и́хъ. Здѣ́ не стихосло́вимъ Го́сподеви пое́мъ.., но а́біе глаго́лемъ ирмо́съ мине́и.

Четверопѣ́снецъ, его́же краегране́сіе сицево́: Пое́тъ сія́ Іо́сифъ. Творе́ніе господи́на Іо́сифа. И стихосло́вятся пѣ́сни. Гла́съ 4.

Пѣ́снь 6.

Ирмо́съ: Пріидо́хъ во глубины́ морскíя, [и потопи́ла мя́ е́сть бу́ря мно́гихъ грѣхо́въ, но я́ко Бо́гъ изъ глубины́ возведи́ живо́тъ мо́й, Многоми́лостиве].

Кро́вными напои́сте ка́плями благочести́выхъ сердца́, злочести́выхъ же полки́ я́вѣ въ ни́хъ потопи́сте, страстоте́рпцы достосла́вніи.

Просла́вивше удесы́ свои́ми всѣ́хъ Влады́ку, ны́нѣ прославля́етеся непреста́нно: сла́ва вѣ́рнымъ, страда́льцы, су́ще и вели́цыи засту́пницы.

Въ ро́вѣ положи́лся еси́ преиспо́днѣмъ, вѣ́рою у́бо уме́ршимъ поко́й, Сло́ве, пода́ждь, свяще́нныхъ страда́лецъ мольба́ми, и согрѣше́ній проще́ніе.

Богоро́диченъ: Да Тя́ гла́сы немо́лчными восхва́лимъ, Дѣ́во, гла́сы на́ша сія́ пріими́ и очище́ніе долго́въ прія́ти, Сы́на Твоего́ умоли́.

Иный господи́на Ѳео́дора, гла́съ 8.

Ирмо́съ: Содержи́ма мя́, пріими́, Человѣколю́бче, [грѣхи́ мно́гими, и припа́дающа щедро́тамъ Твои́мъ, я́ко проро́ка, Го́споди, и спаси́ мя].

Ны́нѣ му́ченикъ торжество́, стеце́мся и, страда́нія и́хъ всечестна́я ублажа́юще, Христа́ си́хъ вѣнча́вшаго воспои́мъ.

Боже́ственною разжига́еми любо́вію Христо́вою на у́глехъ огня́ преходи́сте, я́ко на росѣ́, Того́ пою́ще, му́ченицы блаже́нніи.

Сла́ва, тро́иченъ: Тя́, Тро́ице Пребезнача́льная и Боже́ственная Еди́нице, Свѣ́тъ и Свѣ́ты пою́, Живота́ и Животы́, Ума́, Сло́ва, Ду́ха же Свята́го, и Свя́та, Еди́наго Бо́га.

Богоро́диченъ: Отъ ко́рене твоего́ возсія́ цвѣ́тъ жи́зни, Іессе́е пра́отче, взыгра́й, спаса́яй мíръ, отъ Чи́стыя Отрокови́цы Христо́съ Бо́гъ.

Сти́хъ: Ди́венъ Бо́гъ во святы́хъ Свои́хъ, Бо́гъ Изра́илевъ.

Огня́, и меча́, и сме́рти не убоя́вшеся, исповѣ́даніе соблюдо́сте спасе́нія, отъ Христа́, блаже́нніи, укрѣпля́еми.

Сти́хъ: Ду́ши и́хъ во благи́хъ водворя́тся.

Въ ме́ртвыхъ свобо́дь, я́ко Сы́й Нача́льникъ живота́ и сме́рти, Ты́ упоко́й, я́же прія́лъ еси́, и во дворы́ Твоя́ всели́, Человѣколю́бче.

Ирмо́съ: Содержи́ма мя́, пріими́, Человѣколю́бче, грѣхи́ мно́гими, и припа́дающа щедро́тамъ Твои́мъ, я́ко проро́ка, Го́споди, и спаси́ мя.

Конда́къ, [гла́съ 8]:

Со святы́ми упоко́й, [Христе́, ду́ши ра́бъ Твои́хъ, идѣ́же нѣ́сть болѣ́знь, ни печа́ль, ни воздыха́ніе, но жи́знь безконе́чная].

Икосъ:

Са́мъ Еди́нъ еси́ Безсме́ртный, [сотвори́вый и созда́вый человѣ́ка: земнíи у́бо отъ земли́ созда́хомся и въ зе́млю ту́южде по́йдемъ, я́коже повелѣ́лъ еси́, созда́вый на́съ, и рекíй на́мъ: я́ко земля́ еси́ и въ зе́млю оты́деши, а́може вси́ человѣ́цы по́йдемъ, надгро́бное рыда́ніе творя́ще пѣ́снь: Аллилу́ія, Аллилу́ія, Аллилу́ія].

Пѣ́снь 7.

Ирмо́съ: Юноши три́ [въ Вавило́нѣ, велѣ́ніе мучи́телево на бу́йство прело́жше, посредѣ́ пла́мене вопія́ху: благослове́нъ еси́, Го́споди, Бо́же оте́цъ на́шихъ].

Кому́, лю́бящи стра́сти безслове́сныя, вои́стинну, душе́, уподо́билася еси́? Кого́ превосходя́ща имѣ́ла еси́ во грѣсѣ́хъ? Возопíй Христу́: спаси́ мя́, Благíй.

Святíи, во святы́хъ Почива́ющаго моли́те прилѣ́жно, въ сія́ святы́я дни́ освяти́ти всѣ́хъ благочести́выхъ мудрова́нія.

Вы́шній, въ ми́лости Бога́тый и Благíй, рабо́мъ Твои́мъ оставле́ніе пре́жде усо́пшимъ пода́ждь, лико́мъ пра́ведныхъ сія́ сопричита́я, я́ко Человѣколю́бецъ.

Богоро́диченъ: Родил́а еси́ кромѣ́ зако́новъ естества́, Созда́теля бы́вша Человѣ́ка, Чи́стая, Того́ у́бо моли́ всѣ́хъ беззако́нія презрѣ́ти ны́нѣ и прегрѣше́нія.

Иный.

Ирмо́съ: Ангеломъ о́троки [изъ огня́ спасы́й и гремя́щую пе́щь преложи́вый на ро́су, благослове́нъ еси́, Бо́же оте́цъ на́шихъ].

Честны́хъ му́ченикъ показа́вый па́мяти, ра́дость Це́ркви Твое́й и душе́вное утѣше́ніе, благослове́нъ еси́ во вѣ́ки, Го́споди Бо́же оте́цъ на́шихъ.

Не лже́мъ Ти́, Христе́, ни отмѣта́емся, — му́ченицы вопія́ху посредѣ́ муче́ній, беззако́нныя судіи́ удивля́юще, благослове́нъ еси́ во вѣ́ки, Го́споди Бо́же оте́цъ на́шихъ.

Сла́ва, тро́иченъ: Въ Тре́хъ Ли́цѣхъ Еди́но Естество́ чти́мъ, Отца́, и Сы́на, и Ду́ха, проро́чески вопію́ще: благослове́нъ еси́ во вѣ́ки, Го́споди Бо́же оте́цъ на́шихъ.

Богоро́диченъ: Ка́ко, я́ко Ма́ти ражда́еши и Дѣ́ва пребыла́ еси́? — Яко Бо́га роди́хъ, не испыту́й ми́ о́браза, ели́ка бо хо́щетъ, твори́тъ, — Богоотрокови́ца вопіе́тъ.

Сти́хъ: Святы́мъ, и́же су́ть на земли́ Его́, удиви́ Госпо́дь [вся́ хотѣ́нія Своя́ въ ни́хъ].

Му́ченическій ли́че богоизбра́нный, рабы́ твоя́ сподо́би, покло́нники бы́ти Боже́ственному и Животворя́щему Спа́сову Кресту́.

Сти́хъ: Блаже́ни, я́же избра́лъ и прія́лъ еси́, Го́споди, [и па́мять и́хъ въ ро́дъ и ро́дъ].

Жи́зни сокро́вище, Царю́ Безсме́ртне, я́же избра́лъ еси́ рабы́ Твоя́ въ вѣ́рѣ и наде́ждѣ, вѣ́чныя Твоея́ жи́зни сподо́би.

Ирмо́съ: Ангеломъ о́троки изъ огня́ спасы́й и гремя́щую пе́щь преложи́вый на ро́су, благослове́нъ еси́, Бо́же оте́цъ на́шихъ.

Пѣ́снь 8.

Ирмо́съ: Изба́вителю всѣ́хъ [Всеси́льне, посредѣ́ пла́мене благоче́ствовавшія, снизше́дъ, ороси́лъ еси́ и научи́лъ еси́ пѣ́ти: вся́ дѣла́, благослови́те, по́йте Го́спода].

Небоя́зненнымъ иду́ще мудрова́ніемъ къ болѣ́зненнымъ трудо́мъ, му́ченицы, болѣ́зни плотскíя подъя́сте, и къ неболѣ́зненному наслажде́нію преста́вльшеся, вся́кую болѣ́знь се́рдца облегча́ете.

Вы́шняя тлѣ́нными измѣни́вше, плотски́ми мя́ истлѣ́вша страстьми́, поще́ніемъ спаси́те, и моли́твами прилѣ́жными, му́ченицы боже́ственніи, всѣ́хъ Бо́га моля́ще.

Моли́твами, Христе́, му́ченикъ Твои́хъ ми́лости Твоя́ всѣ́мъ низпосли́, и къ Тебѣ́, Благоутро́бному, преста́вльшимся отъ житія́, разрѣше́ніе пода́ждь долго́въ и боже́ственный поко́й.

Богоро́диченъ: Яко ро́ждшая Бо́га безгрѣ́шнаго, на́ша грѣхи́ потреби́ Ма́терними Твои́ми моли́твами, Богоро́дице, и спаси́ вопію́щія: благослови́те, вся́ дѣла́ Госпо́дня, Го́спода.

Иный.

Ирмо́съ: Богоглаго́ливіи о́троцы [въ пещи́, со огне́мъ пла́мень попира́юще, поя́ху: благослови́те, дѣла́ Госпо́дня, Го́спода].

Огнепа́льныя му́ки претерпѣ́вше, я́ко ороше́ніе, страда́льцы, съ ра́достію взыва́сте: благослови́те, дѣла́ Госпо́дня, Го́спода.

Богово́инственный по́лкъ му́ченикъ, побѣди́вый ле́сть, побѣди́тельно взыва́ше: благослови́те, дѣла́ Госпо́дня, Го́спода.

Благослови́мъ Отца́, и Сы́на, и Свята́го Ду́ха, Го́спода.

[Тро́иченъ:] Съ Сы́номъ Отцу́ поклони́мся и Всесвято́му Ду́ху, вси́ вѣ́рно возопіи́мъ: Тро́ице, Яже во Еди́нствѣ, спаси́ ду́ши на́ша.

Богоро́диченъ: Ты́ и Дѣ́ва, и Ма́ти яви́лася еси́, ро́ждши безъ му́жа, Бо́га всѣ́хъ, Всечи́стая, но Того́ моли́, спасти́ рабы́ Твоя́.

Сти́хъ: Ди́венъ Бо́гъ во святы́хъ Свои́хъ, Бо́гъ Изра́илевъ.

Страстоте́рпецъ моли́твами, Твоя́ рабы́, и поклони́тися, и ви́дѣти, Христе́ Спа́се, сподо́би, Животворя́щій Кре́стъ, Твоея́ бла́гости.

Сти́хъ: Ду́ши и́хъ во благи́хъ водворя́тся.

Разори́вый держа́ву сме́рти, изъ ме́ртвыхъ воста́ніемъ Твои́мъ, преста́вльшіяся упоко́й со избра́нными Твои́ми, хвали́ти Тя́, Го́спода.

Хва́лимъ, благослови́мъ, покланя́емся Го́сподеви, [пою́ще и превознося́ще во вся́ вѣ́ки].

Ирмо́съ: Богоглаго́ливіи о́троцы въ пещи́, со огне́мъ пла́мень попира́юще, поя́ху: благослови́те, дѣла́ Госпо́дня, Го́спода.

Пѣ́снь 9.

Ирмо́съ: Ева у́бо неду́гомъ [преслуша́нія кля́тву всели́ла е́сть, Ты́ же, Дѣ́во Богоро́дице, прозябе́ніемъ чревоноше́нія мíрови благослове́ніе процвѣла́ еси́. Тѣ́мъ Тя́ вси́ велича́емъ].

Укрѣпи́вше на ка́мени мы́сленномъ мудрова́ніе, страстоте́рпцы, неразвра́тно, вся́ вра́жія кова́рства побѣди́сте, тѣ́мже мя́, развраща́ема къ страсте́мъ душетлѣ́ннымъ, утверди́те къ Бо́гу моли́твами.

Боже́ственный и свѣтоза́рный вои́стинну, собо́ре му́ченикъ, моли́ Преблага́го Влады́ку, во вре́мя воздержа́нія проще́ніе прегрѣше́ній на́мъ всѣ́мъ дарова́ти и вѣ́чное ра́дованіе.

Человѣколю́бче, еди́не Бла́же, рабы́ Твоя́ въ наде́ждѣ воскресе́нія почи́вшія, вѣ́чнаго свѣ́та Твоего́ невече́рняго сподо́би причасти́тися и пи́щи наслажде́нія, да Тя́ со стра́хомъ велича́емъ.

Богоро́диченъ: Свѣ́та жили́ще Твоя́ бы́сть всесвята́я утро́ба, Всечи́стая, тѣ́мже вѣ́рно вопію́ Ти́: зѣ́ницы души́ моея́ озари́ и стезю́ пра́вую покажи́, Тебе́ при́сно блажа́щему.

Иный.

Ирмо́съ: Велича́емъ Тя́, Ма́терь Бо́жію, [и сла́вимъ Тя́, Богоро́дице Дѣ́во, я́ко Спа́са ро́ждшую ду́шъ на́шихъ].

Му́чениковъ па́мять соверша́емъ, вѣ́рніи, да тѣ́хъ причасти́мся сла́вы, восхваля́юще страда́льчество по́двиговъ и́хъ.

Ва́шего му́жества звѣ́ріе убоя́шася зѣло́, угасе́ о́гнь, сокруши́шася лу́цы, въ ва́съ, страда́льцы, ди́венъ Бо́гъ.

Сла́ва, тро́иченъ: Пребезнача́льное Естество́, Тріѵпоста́сная Еди́нице, Отче, Сы́не и Ду́ше Святы́й, Свѣ́те и Жи́зне Богонача́льная, Тебе́ славосло́вящія сохраня́й.

Богоро́диченъ: Благослови́мъ Тя́, Бо́га Изра́илева, отъ Дѣ́вы яви́вшагося мíру и воздви́гшаго ро́гъ спасе́нія на́шего.

Сти́хъ: Святы́мъ, и́же су́ть на земли́ Его́, [удиви́ Госпо́дь вся́ хотѣ́нія Своя́ въ ни́хъ].

Моли́твенницы мíра, страстоте́рпцы Христо́вы, Того́ ви́дѣти Кре́стъ и поклони́тися сподо́бите всѣ́хъ, моли́твами ва́шими.

Сти́хъ: Блаже́ни, я́же избра́лъ и прія́лъ еси́, Го́споди, [и па́мять и́хъ въ ро́дъ и ро́дъ].

Идѣ́же истека́етъ исто́чникъ жи́зни, Сы́не Бо́жій, и посѣще́нія Твоего́ лица́ просвѣще́ніе, къ Тебѣ́ преста́вльшіяся учини́.

Ирмо́съ: Велича́емъ Тя́, Ма́терь Бо́жію, и сла́вимъ Тя́, Богоро́дице Дѣ́во, я́ко Спа́са ро́ждшую ду́шъ на́шихъ.

Та́же: Досто́йно е́сть... Свѣти́ленъ: Не́бо звѣзда́ми... Сла́ва, Живы́ми... И ны́нѣ, богоро́диченъ: Сла́дость а́нгеловъ..; та́кожде ука́зъ на хвали́техъ и на стихо́внѣ, [зри́] въ суббо́ту втору́ю поста́. Та́же: Бла́го е́сть.., и ча́съ 1-й, и отпу́стъ.


НА ЛИТУРГІИ,

Блаже́нна гла́са, [на 6. По вхо́дѣ тропари́: Апо́столи, му́ченицы... Помяни́ Го́споди... Сла́ва: Со святы́ми упоко́й... И ны́нѣ: Тебе́ и стѣ́ну...] Проки́менъ дне́, [гла́съ 8: Весели́теся о Го́сподѣ и ра́дуйтеся, пра́ведніи. Сти́хъ: Блаже́ни, и́хже оста́вишася беззако́нія и и́хже прикры́шася грѣси́]. И заупоко́й, [гла́съ 6: Ду́ши и́хъ во благи́хъ водворя́тся]. Апо́столъ ко Евре́емъ, зача́ло 325. Другíй, заупоко́й, [къ Солу́няномъ зача́ло 270]. Аллилу́ія, [гла́съ 4: Воззва́ша пра́ведніи и Госпо́дь услы́ша и́хъ, и отъ всѣ́хъ скорбе́й и́хъ изба́ви и́хъ. Сти́хъ: Мно́ги ско́рби пра́веднымъ и отъ всѣ́хъ и́хъ изба́витъ я́ Госпо́дь. И заупоко́й,] гла́съ 6: [Блаже́ни, я́же избра́лъ и прія́лъ еси́, Го́споди, и па́мять и́хъ въ ро́дъ и ро́дъ]. Ева́нгеліе отъ Ма́рка, зача́ло 8. И заупоко́й, [отъ Іоа́нна, зача́ло 16.] Прича́стенъ дне́: [Ра́дуйтеся пра́ведніи о Го́сподѣ, пра́вымъ подоба́етъ похвала́]. И заупоко́й: [Блаже́ни, я́же избра́лъ и прія́лъ еси́, Го́споди, и па́мять и́хъ въ ро́дъ и ро́дъ].

Источникъ: Тріо́діонъ, сíесть трипѣ́снецъ. — Кíевъ: Въ тѵпогра́фіи Кíево-Пече́рской Успе́нской Ла́вры, 1864. — Л. 188 об. – 191 об.

/ Къ оглавленію раздѣла /


Наверхъ / Къ титульной страницѣ

0