Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - пятница, 22 сентября 2017 г. Сейчасъ на порталѣ посѣтителей - 9.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

ТРІОДІОНЪ, СІЕСТЬ ТРИПѢСНЕЦЪ,
Съ Бо́гомъ Святы́мъ, обдержа́й подоба́ющее ему́ послѣ́дованіе.

Недѣ́ля втора́я святы́хъ посто́въ.
Пое́тся настоя́щее послѣ́дованіе, [и́же] во святы́хъ отца́ на́шего Григо́рія, архіепи́скопа Ѳессалони́тскаго, чудотво́рца, Пала́мы, сложе́нное отъ всесвятѣ́йшаго патріа́рха Филоѳе́я.

ВЪ СУББОТУ ВЕЧЕРА,
Поста́вимъ стихо́въ 10 и пое́мъ стихи́ры воскре́сны 3, и восто́чны [Анато́ліевы3 и настоя́щія свята́го на 4, гла́съ 2. Подо́бенъ: Кíими похва́льными пѣ́сньми?

Кíими пѣснопѣ́ній цвѣта́ми вѣнча́имъ іера́рха, благоче́стія побо́рника и нече́стія проти́вника, те́плаго вѣ́ры предста́теля, вели́каго наста́вника и учи́теля, цѣвни́цу всекра́сную Ду́ха, златосія́ющій язы́къ, исто́чникъ, кипя́щій то́ки исцѣле́ній вѣ́рнымъ, вели́каго и досточу́днаго Григо́рія?

Кíими, земноро́дніи, устна́ми восхва́лимъ іера́рха, Це́ркве учи́теля, свѣ́та Боже́ственнаго проповѣ́дника, небеснотаи́нника Тро́ицы, ве́ліе мона́шествующихъ украше́ніе, дѣя́ніемъ и видѣ́ніемъ просія́вшаго, Ѳессалони́тскую похвалу́, сограждани́на иму́щаго, мѵрото́чнаго на небесѣ́хъ, боже́ственнаго и пречу́днаго Дими́трія?

Сла́ва, гла́съ 6:

Преподо́бне, треблаже́нне, святѣ́йшій о́тче, па́стырю до́брый и Архипа́стыря Христа́ учениче́, положи́вый ду́шу о овца́хъ, са́мъ и ны́нѣ, о́тче на́шъ богоно́се Григо́ріе, испроси́ моли́твами твои́ми дарова́ти на́мъ ве́лію ми́лость.

И ны́нѣ, богоро́диченъ, пе́рвый гла́са.

На литíи стихи́ра хра́ма. Сла́ва, и ны́нѣ, богоро́диченъ.

На стихо́внѣ, по алфави́ту. Сла́ва, гла́съ 8:

Бо́дрый язы́къ тво́й ко учи́тельству, во ушесѣ́хъ серде́чныхъ возглаша́я, лѣни́выхъ ду́ши возставля́етъ, и боговѣща́нными словесы́ твои́ми лѣ́ствица обрѣта́ется, отъ земли́ къ Бо́гу вознося́щая. Тѣ́мже, Григо́ріе, Ѳесса́ліи чу́до, не преста́й моля́ся Христу́ просвѣти́ти Боже́ственнымъ свѣ́томъ чту́щія тя́.

И ны́нѣ, богоро́диченъ:

Безневѣ́стная Дѣ́во, [Яже Бо́га неизрече́нно заче́нши пло́тію, Ма́ти Бо́га Вы́шняго, Твои́хъ рабо́въ мольбы́ пріими́, Всенепоро́чная, всѣ́мъ подаю́щи очище́ніе прегрѣше́ній, ны́нѣ на́ша моле́нія пріе́млющи, моли́ спасти́ся всѣ́мъ на́мъ].

Ны́нѣ отпуща́ещи... Трисвято́е, [и по Отче на́шъ...]. Тропа́рь: Богоро́дице Дѣ́во.., три́жды. И про́чее послѣ́дованіе бдѣ́нія.



НА УТРЕНИ,
По шестопса́лміи: Бо́гъ Госпо́дь... Тропа́рь воскре́сенъ, два́жды. Сла́ва, свята́го гла́съ 8:

Правосла́вія свѣти́льниче, Це́ркве утвержде́ніе и учи́телю, мона́ховъ добро́то, богосло́вовъ побо́рниче непребори́мый, Григо́ріе чудотво́рче, Ѳессалони́тская похвало́, проповѣ́дниче благода́ти, моли́ся вы́ну спасти́ся душа́мъ на́шимъ.

И ны́нѣ, богоро́диченъ, въ то́йже гла́съ:

Иже на́съ ра́ди рожде́йся [отъ Дѣ́вы, и распя́тіе претерпѣ́въ, Благíй, испрове́ргій сме́ртію сме́рть и Воскресе́ніе явле́й я́ко Бо́гъ, не пре́зри, я́же созда́лъ еси́ руко́ю Твое́ю, яви́ человѣколю́біе Твое́, Ми́лостиве. Пріими́ ро́ждшую Тя́, Богоро́дицу, моля́щуюся за ны́, и спаси́, Спа́се на́шъ, лю́ди отча́янныя].

И обы́чное стихосло́віе. И чте́ніе въ Шестодне́вцѣ. Степе́нна гла́са. Вся́кое дыха́ніе... Ева́нгеліе у́треннее. Воскресе́ніе Христо́во... Псало́мъ 50-й. Сла́ва: Покая́нія отве́рзи ми́ две́ри... И ны́нѣ, подо́бенъ: На спасе́нія стези́... Та́же, на гла́съ 6: Поми́луй мя́, Бо́же... Та́же: Мно́жества содѣ́янныхъ мно́ю лю́тыхъ...

Кано́нъ осмогла́сника воскре́сенъ, со ирмосо́мъ, на 4, и тріо́ди на 4, и свята́го на 6, гла́съ 8.
Пѣ́снь 1.

Ирмо́съ: Колесницегони́теля фарао́ня погрузи́ чудотворя́й иногда́ Моисе́йскій же́злъ, крестообра́зно порази́въ и раздѣли́въ мо́ре, Изра́иля же бѣглеца́, пѣшехо́дца спасе́, пѣ́снь Бо́гови воспѣва́юща.

Воспріе́мше те́плыми слеза́ми блу́днаго гла́съ, Тебѣ́, Отцу́ всѣ́хъ и Бо́гу, припа́даемъ вопію́ще: я́ко согрѣши́хомъ, отъ Тебе́ удали́вшеся и блуду́ рабо́тавше, пріими́ на́ше покая́ніе.

Ца́рское преоби́дѣвъ благоро́діе, е́же дарова́лъ еси́ мнѣ́, мене́ ра́ди Сло́ве, Человѣ́къ бы́вый, лю́тѣ осуди́хся угоди́ти свинія́мъ, грѣхо́внымъ вку́сомъ, но пощади́ мя́, Спа́се, милосе́рдіемъ Твои́мъ.

На колѣ́ну па́дающа мя́, я́коже пе́рвѣе блу́днаго, Влады́ко Го́споди, Ты прите́къ пріими́, и рука́ма объе́мъ, пода́ждь ми́ о́бразы Твоего́ спасе́нія, вмѣ́сто нае́мника, Человѣколю́бче, па́ки Твоего́ сы́на сотворя́я.

Богоро́диченъ: Богоявле́нія Тобо́ю сподо́бися, Богора́дованная, человѣ́ческое естество́: еди́на бо хода́таица, Дѣ́во, была́ еси́ Бо́гу и человѣ́комъ. Тѣ́мъ, я́ко Бо́жію Тя́ Роди́тельницу, вси́ досто́йно сла́вимъ.

Иный кано́нъ свята́го, гла́съ 4.

Ирмо́съ: Отве́рзу уста́ моя́, и напо́лнятся Ду́ха, и сло́во отры́гну Цари́цѣ Ма́тери, и явлю́ся, свѣ́тло торжеству́я, и воспою́, ра́дуяся, Тоя́ чудеса́.

Ри́торовъ боже́ственніи, и богосло́вовъ изря́дніи, и язы́цы боговѣща́нніи, пріиди́те сни́дитеся въ соедине́ніе, воспѣ́ти по достоя́нію духори́тора, боже́ственнаго Григо́рія.

Сто́лпъ вѣ́ры, Це́ркве побо́рникъ, вели́кій Григо́рій да восхва́лится мно́ю, всеизря́дный па́стырь Ѳессалони́тскій, красота́ чи́на іера́ршескаго вои́стинну.

Отъ младе́нства возжела́лъ еси́ лу́чшее житіе́ и соверше́нное, о́тче, отъ ю́ности возлюби́лъ еси́ мудрова́ніе, и купнонра́венъ, и единому́дренъ показа́лся еси́ тезоиме́нствующаго тебѣ́, о́тче Григо́ріе.

Богоро́диченъ: Бу́ди ми́, Всенепоро́чная, живота́ пу́ть, наставля́ющій мя́ къ Боже́ственнымъ селе́ніемъ: прельсти́хся бо и къ про́пастемъ зло́бы поползну́хся, отъ ни́хже мя́ возведи́ хода́тайствомъ Твои́мъ.

Пѣ́снь 3.

Ирмо́съ: Небе́снаго кру́га Верхотво́рче, Го́споди, и Це́ркве Зижди́телю, Ты́ мене́ утверди́ въ любви́ Твое́й, жела́ній кра́ю, вѣ́рныхъ утвержде́ніе, еди́не Человѣколю́бче.

Убоя́вся мои́хъ дѣ́лъ, и дале́чнаго отше́ствія, и расточе́ннаго Твоего́ бога́тства, его́же ижди́хъ въ блу́дныхъ стремле́ніихъ, въ покая́ніи къ Тебѣ́ зову́, Отцу́ и Бо́гу моему́: согрѣши́хъ, спаси́ мя́.

На земли́ согрѣша́я, небесе́ убоя́хся: си́це бо ми́ бу́детъ су́дъ тогда́ препира́яй, егда́ вся́ческая предста́нутъ, Сло́ве, пра́веднымъ судо́мъ Твои́мъ суди́мая.

Мра́чная и скве́рная мя́ помышле́нія пита́ху, егда́ отъ Тебе́, Спа́се, дале́че бы́хъ блу́дный, ны́нѣ же зову́ Ти́: согрѣши́хъ, согрѣши́хъ, спаси́ те́плѣ прибѣга́ющаго милосе́рдію Твоему́.

Богоро́диченъ: Обожи́ся, Дѣ́во, Ада́мово смѣше́ніе: изъ чре́ва бо Твоего́ Бо́гъ плотоно́сецъ яви́ся, Имже воззва́ни бы́хомъ отъ дре́вняго осужде́нія, солга́ни наде́ждею дре́вле обоже́нія.

Иный.

Ирмо́съ: Твоя́ пѣсносло́вцы, Богоро́дице, живы́й и незави́стный Исто́чниче, ли́къ Себѣ́ совоку́пльшія, духо́вно утверди́, въ боже́ственнѣй Твое́й сла́вѣ, вѣнце́въ сла́вы сподо́би.

Струи́ Боже́ственныхъ уче́ній твои́хъ сохраня́ющіи, вся́кія ко́зни злосла́вныхъ избѣга́емъ, и вся́ избива́емъ твои́ми свяще́нными списа́ньми полки́ си́хъ, Григо́ріе.

Прему́дрости бу́ія злосла́вныхъ разруши́лъ еси́, блаже́нне, Бо́жію Прему́дрость Ѵпоста́сную имѣ́я въ се́рдцѣ твое́мъ, е́юже съ шу́момъ порази́лъ еси́ гнила́я си́хъ шата́нія.

Умертви́въ пло́ти тлѣ́емыя вся́кое сладостра́стіе, прему́дре, по́стнически оживи́лъ еси́ души́ твоея́ движе́нія, и сію́ Боже́ственный орга́нъ богосло́вія показа́лъ еси́.

Богоро́диченъ: Въ ра́зумѣ ума́ и произволе́ніи, сту́дное же и блу́дное житіе́ прилѣ́жно возлюби́хъ, но любо́вію Боже́ственною мя́ свяжи́, моли́твами Твои́ми, Дѣ́во Богоневѣ́стная.

Конда́къ, гла́съ 4:

Ны́нѣ вре́мя дѣ́лательное яви́ся, при две́рехъ су́дъ, воста́немъ у́бо постя́щеся, принесе́мъ сле́зы умиле́нія, ми́лостынями, зову́ще: согрѣши́хомъ па́че песка́ морска́го. Но осла́би, Содѣ́телю всѣ́хъ, я́ко да пріи́мемъ нетлѣ́нныя вѣнцы́.

Сѣда́ленъ, гла́съ 4. Подо́бенъ: Ско́ро предвари́.

Пре́лесть попали́лъ еси́ злосла́вныхъ, прему́дре, вѣ́ру изъясни́лъ еси́ правосла́вныхъ до́брѣ, и мíръ просвѣти́лъ еси́. Отону́дуже побѣдоно́сный побѣди́тель показа́лся еси́, сто́лпъ Це́ркве, и́стинный іера́рхъ, моля́ся не преста́й Христу́, спасти́ся всѣ́мъ на́мъ.

Сла́ва, то́йже. И ны́нѣ, богоро́диченъ:

Ско́ро пріими́, Влады́чице, моле́нія на́ша и сія́ принеси́ Сы́ну Твоему́ и Бо́гу, Госпоже́ Всенепоро́чная, погаси́ обстоя́нія злосла́вныхъ языковре́дныхъ, укроти́ ко́зни и низложи́ де́рзость вооружа́ющихся безбо́жныхъ, Пречи́стая, на рабы́ Твоя́.

Пѣ́снь 4.

Ирмо́съ: Ты́ моя́ крѣ́пость, Го́споди, Ты́ моя́ и си́ла, Ты́ мо́й Бо́гъ, Ты́ мое́ ра́дованіе, не оста́вль нѣ́дра Отча, и на́шу нищету́ посѣти́въ. Тѣ́мъ съ проро́комъ Авваку́момъ зову́ Ти: си́лѣ Твое́й сла́ва, Человѣколю́бче.

Отмета́тельное оте́ческихъ ми́ повелѣ́ній бога́тство, е́же ми́ дарова́лъ еси́, въ сладостра́стіи ижди́въ, бы́хъ Боже́ственныхъ дарова́ній ни́щъ, окая́нный. Тѣ́мже ка́ющася со исповѣ́даніемъ не омерзи́ мене́, Влады́ко Го́споди.

Боголѣ́пно воспріи́мъ нищету́, мене́, дале́че Тебе́ дре́вле бы́вшаго, Собо́ю къ Себѣ́ присвоя́еши, и освяща́еши мя́ къ весе́лію, Человѣколю́бче: тѣ́ло Твое́ Боже́ственное, Сло́ве, воззва́ніе мое́, весе́лія творя́.

Да дале́че слеза́ми непреста́нными, вѣ́чныя му́ки изба́вимся, ю́же угото́ва Богъ лука́вымъ духово́мъ, я́ко блу́дный, вопіе́мъ: согрѣши́хомъ Ти́, Отче, но пріими́ вся́ прибѣга́ющія ны́ къ Твое́й ми́лости.

Богоро́диченъ: Собезнача́льное Отцу́ Сло́во Сый и Ду́ху, отъ Неискусому́жныя Дѣ́вы ражда́ется кромѣ́ зако́на: пребы́въ у́бо е́же бѣ́, пребы́въ же па́ки е́же отъ на́съ прія́тъ. Во двою́ бо естеству́ еди́нъ Сы́нъ е́сть, во обою́ храня́ есте́ственное.

Иный.

Ирмо́съ: Неизслѣ́дный Бо́жій совѣ́тъ, е́же отъ Дѣ́вы воплоще́нія Тебе́, Вы́шняго, проро́къ Авваку́мъ усмотря́я, зовя́ше: сла́ва си́лѣ Твое́й, Го́споди.

Отве́рзъ уста́ твоя́, о́тче прему́дре, Боже́ственную прему́дрость проповѣ́далъ еси́, е́йже поуча́лся еси́ въ се́рдцѣ твое́мъ при́сно, и Варлаа́ма су́етнаго несмы́сленна и безу́мна показа́лъ еси́.

Заше́лъ еси́, сладча́йшій, въ зе́млю, со́лнце зако́номъ естества́, возсія́еши же у́тро со Христо́мъ, со́лнце невече́рнее, вся назира́я моли́твами твои́ми.

Яви́ благода́ть тебе́, блаже́нне Бо́жій, похвалу́ и утвержде́ніе преве́ліе правосла́вныхъ, и па́стыря блага́го, и богосло́ва втора́го, и ста́да бо́драго храни́теля.

Богоро́диченъ: Ушеса́ мнѣ́ отве́рзи душе́вныя, Ма́ти Бо́жія, роди́вшая пре́жде ушеса́ Отве́рзша глухо́му, и Боже́ственнымъ внима́ти словесе́мъ и исполня́ти сподо́би.

Пѣ́снь 5.

Ирмо́съ: Вску́ю мя́ отри́нулъ еси́ отъ лица́ Твоего́, Свѣ́те незаходи́мый, и покры́ла мя́ е́сть чужда́я тма́ окая́ннаго? Но обрати́ мя, и къ свѣ́ту за́повѣдей Твои́хъ пути́ моя́ напра́ви, молю́ся.

Бога́тства и дарова́ній Боже́ственныхъ лиши́хся, и въ страну́ пріидо́хъ благи́хъ живо́тныхъ гла́домъ та́я, но Ты́ мя́, Отче, я́ко Благíй, дре́внія сла́вы и сла́дости, благосе́рдія ра́ди Твоего́, испо́лни.

По́мыслъ блу́днаго, въ блудѣ́ житіе́ ижди́вша пріи́мше, Отцу́ Ми́лостивому притеце́мъ, несумнѣ́нною вѣ́рою и сокруше́ніемъ се́рдца, я́ко да согрѣше́ній оставле́ніе пріи́мемъ.

Не косни́, душе́ моя́, въ да́льнѣй странѣ́ пребыва́ющи, но тецы́ вско́рѣ, Бо́гу и Отцу́ исповѣ́дающися, да пріи́меши разрѣше́ніе, и́хже злѣ́ содѣ́лала еси́, житіе́ изнури́вши.

Богоро́диченъ: Свѣ́тлый Тя́ о́блакъ, нося́й Со́лнце пра́вды, въ Тебѣ́ носи́мое, Пречи́стая Дѣ́во, вѣ́мы, неразу́мія тму́ и́дольскую отгоня́ющее и ра́зумомъ и́стиннымъ просвѣща́ющее.

Иный.

Ирмо́съ: Ужасо́шася вся́ческая о Боже́ственнѣй сла́вѣ Твое́й: Ты́ бо, неискусобра́чная Дѣ́во, имѣ́ла еси́ во утро́бѣ надъ всѣ́ми Бо́га, и родила́ еси́ Безлѣ́тнаго Сы́на, всѣ́мъ, воспѣва́ющимъ Тя́, ми́ръ подава́ющая.

Серпо́мъ слове́съ твои́хъ и свяще́нными списа́ньми посѣ́клъ еси́ е́реси тернови́дныя и пле́велъ ло́жная прозябе́нія, Правосла́вія же благочести́вая положи́лъ еси́ сѣ́мена, священнонача́льне Григо́ріе.

Словеса́ твоя́, всему́дре, и честна́я списа́нія су́ть роса́ небе́сная, ме́дъ ка́менный, хлѣбъ а́нгельскій притека́ющимъ, питіе́, бра́шно, сла́дость, наслажде́ніе, Григо́ріе, и исто́чникъ живы́я воды́.

Общаго тя́ учи́теля познава́етъ земля́ и мо́ре, сто́лпъ свяще́нный Правосла́вія и оружеполо́жницу Боже́ственныхъ догма́тъ честну́ю, прему́драго богосло́ва свяще́ннаго, сожи́теля, соприча́стника, апо́столомъ единонра́внаго.

Богоро́диченъ: Струя́ми умиле́нія, скве́рны се́рдца моего́, Непоро́чная, отмы́й, Дѣ́во, и покая́нія о́бразы мнѣ́ да́руй, Твои́ми къ Ще́дрому Бо́гу свяще́нными моле́ніи, Его́же неизрече́нно родила́ еси́.

Пѣ́снь 6.

Ирмо́съ: Моли́тву пролію́ ко Го́споду и Тому́ возвѣщу́ печа́ли моя́, я́ко зо́лъ душа́ моя́ испо́лнися и живо́тъ мо́й а́ду прибли́жися, и молю́ся, я́ко Іо́на: отъ тли́, Бо́же, возведи́ мя.

Юнѣ́йшій бы́хъ сы́нъ Тво́й и бога́тство Твое́ злѣ́ ижди́хъ, удале́ніемъ зла́го житія́, и благи́хъ Твои́хъ лиша́яся, Человѣколю́бче, прихожду́ Тебѣ́, Отцу́ и Бо́гу моему́, и прошу́ проще́нія.

Стра́нничество безчеловѣ́чное получи́хъ и пасти́ свиніи́ осужде́нъ бы́хъ, я́ко мое́ расточи́хъ бога́тство, е́же ми́лостивно вско́рѣ по́далъ еси́, и бы́хъ отъ всѣ́хъ на́гъ, но Ты́, я́ко Бо́гъ мо́й, уще́дри.

Не и́мамъ дерзнове́нія, Человѣколю́бче, воззрѣ́ти и ви́дѣти, согрѣши́въ на не́бо, безмѣ́рную высоту́, ни нарещи́ся сынъ Твой, блу́дный, но уще́дри мя́ ту́не, имѣ́яй безмѣ́рную ми́лость.

Богоро́диченъ: Несказа́нное Твое́ Рождество́ и неизрече́нный рождества́ Твоего́ о́бразъ, Дѣви́це, я́ко Бо́га вы́ше ума́ ражда́еши, дѣ́вство нескве́рное иму́щи, тѣ́мъ Тя́ вси́ и́стинную Богоро́дицу досто́йно сла́вимъ.

Иный.

Ирмо́съ: Боже́ственное сіе́ и всечестно́е соверша́юще пра́зднество, богому́дріи, Богома́тере, пріиди́те, рука́ми воспле́щимъ, отъ Нея́ ро́ждшагося Бо́га сла́вимъ.

Растерза́ся су́етное шата́ніе и язы́къ Варлаа́ма безу́мнаго, словесы́, и велѣ́ніи, и ра́зума острото́ю прему́драго царя́, и твое́ю, Григо́ріе.

Боже́ственную цѣвни́цу Ду́ха, трубу́, я́вѣ проповѣ́дающую Боже́ственныя та́йны, Ѳессалони́тскаго предсѣда́теля, богосло́вскій язы́къ, пѣ́сньми почти́мъ.

Лю́демъ иногда́ предводи́тель, я́ко столпъ о́гненный, вѣ́ры враги́ попали́лъ еси́, вѣ́рныхъ же состоя́нія просвѣти́лъ еси́, богому́дре о́тче Григо́ріе.

Богоро́диченъ: Бу́ди ми́ Всечи́стая Влады́чице, тишина́ и приста́нище утѣше́нія, преводя́щее къ Боже́ственному приста́нищу невла́емому, бу́рю страсте́й мои́хъ укроти́вши.

Конда́къ свято́му, гла́съ 8. Подо́бенъ: Взбра́нной.

Прему́дрости свяще́нный и Боже́ственный орга́нъ, богосло́вія свѣ́тлую согла́сно трубу́, воспѣва́емъ тя́, Григо́ріе богоглаго́льниче, но, я́ко у́мъ Уму́ пе́рвому предстоя́й, къ Нему́ у́мъ на́шъ, о́тче, наста́ви, да зове́мъ: ра́дуйся, проповѣ́дниче благода́ти.

Икосъ. Подо́бенъ: Ангелъ предста́тель.

Ангелъ яви́лся еси́ на земли́, неизрече́нная Бо́жія человѣ́комъ возвѣща́я. Безпло́тныхъ бо гла́сы, отъ человѣ́ческихъ сы́й, и пло́тію употребля́яся, удиви́лъ еси́ на́съ и вопи́ти тебѣ́, богоглаго́ливе, увѣща́лъ еси́ сія́: ра́дуйся, и́мже тма́ сокры́ся; ра́дуйся, и́мже свѣ́тъ взы́де. Ра́дуйся, несозда́ннаго Божества́ а́нгеле; ра́дуйся, созда́ннаго и бу́яго вои́стинну обличи́телю. Ра́дуйся, высоту́ невосходи́мую, Боже́ственное естество́ рекíй; ра́дуйся, глубину́ неудо́бь ви́димую, дѣ́йство рекíй; ра́дуйся, я́ко сла́ву Бо́жію до́брѣ ре́клъ еси́; ра́дуйся, я́ко мнѣ́нія злодѣ́евъ отре́клъ еси́. Ра́дуйся, свѣти́льниче, показа́вый Со́лнце; ра́дуйся, ча́ше, питія́ Боже́ственнаго пода́тельнице. Ра́дуйся, и́мже и́стина просіява́етъ; ра́дуйся, и́мже помрачи́ся лжа́. Ра́дуйся, проповѣ́дниче благода́ти.

Синакса́рій.

Стихи́: Свѣ́та свѣ́тлаго проповѣ́дника ны́нѣ вои́стинну ве́лія.

             Исто́чникъ свѣ́та къ Незаходи́мому во́дитъ Свѣ́ту.

Се́й Боже́ственнаго и Невече́рняго Свѣ́та сы́нъ, и́стинный вои́стину Бо́жій человѣ́къ и чу́дный Боже́ственныхъ слу́га и служи́тель, оте́чество у́бо имя́ше всѣ́хъ градо́въ ца́рствующее, роди́тели же пресвѣ́тлыя и сла́вныя. Не внѣ́шняго то́кмо и по чу́вству человѣ́ка, но мно́го па́че вну́тренняго и неви́димаго, добродѣ́телію и наказа́ніемъ украси́ти тща́шеся. Ма́лу же су́щу зѣло́ во́зрастомъ тому́, оте́цъ сконча́ся, ма́ти же его́, и бра́тію, и сестры́ въ наказа́ніи, и зако́нѣ, и свяще́нныхъ пи́сменѣхъ пита́ше же и наказа́ше, и внѣ́шнѣй му́дрости ко учи́телемъ посыла́ше, до́брѣ навыка́ти разумѣ́. То́й острото́ю естества́ тща́ніе со уче́ніемъ смѣси́въ, вма́лѣ же вся́кую слове́сную хи́трость получи́.

Егда́ же бѣ́ два́десяти лѣ́тъ, вся́ земна́я и со́ній ху́ждшая вмѣни́въ, къ Вино́вному вся́кія му́дрости и пода́телю Бо́гу востещи́ иска́ше, и соверше́ншимъ житіе́мъ всего́ себе́ Тому́жде возложи́ти. Отону́дуже и открыва́етъ боголюбе́зное намѣ́реніе ма́тери, и мно́гую любо́вь къ Бо́гу своему́, и разжже́нное жела́ніе, и о́ную подо́бнѣ обрѣта́етъ си́ми боля́щую отъ до́лга вре́мене, и о ра́вныхъ тому́ ра́дующуюся. Абіе у́бо ма́ти дѣ́ти къ себѣ́ собра́вши, и «се́, а́зъ и дѣ́ти», съ весе́ліемъ ре́кши, «я́же ми́ даде́ Бо́гъ», мы́сль же и́хъ искуша́етъ, ю́же и́мутъ о до́брыхъ, и намѣ́реніе вели́каго Григо́рія и́мъ открыва́етъ. Онъ же поуща́тельная словеса́ къ ни́мъ употреби́въ, вма́лѣ вся́ поко́рны имя́ше, и къ подо́бнѣй ему́ любви́ и бѣжа́нію житія́ послѣ́дующія прилѣ́жно. Отону́дуже и су́щая убо́гимъ ева́нгельски разда́въ, любо́вь же ца́рскую, и че́сти, и плеска́ніе су́щее въ ца́рскихъ, благоду́шно оста́вивъ, Христу́ послѣ́дова.

Ма́терь у́бо и сестры́ въ дѣ́вственницѣ сочини́въ, бра́тію же взе́мъ, и святы́ни тезоимени́тую го́ру Аѳо́нскую дости́гъ. Но бра́тію у́бо тогда́ во ины́хъ оби́телехъ пребы́ти увѣщава́етъ, и поне́же вре́мени не даю́щу соедине́нымъ дру́гъ дру́гу бы́ти, и житіе́ по Бо́гу соверши́ти. Са́мъ же въ покоре́ніе чу́днаго нѣ́коего му́жа, съ безмо́лвіемъ еди́ному Бо́гу живу́щаго, предае́тся, и́менемъ Никоди́ма. У него́же вся́кой за́повѣди, вся́кой добродѣ́тели, во смире́ніи души́ дѣ́лы научи́вся, и заступле́ніе Всечи́стыя Богоро́дицы, и ко всѣ́мъ непобори́мую по́мощь во открове́ніи та́йномъ та́мо пріи́мъ. По отше́ствіи о́наго къ Бо́гу, и въ Вели́цѣй ла́врѣ лѣ́та нѣ́кая пожи́въ, съ вели́кимъ тща́ніемъ и соверше́ннымъ ра́зумомъ, любо́вію безмо́лвія, отъ ла́вры отхо́дитъ и пусты́ню лобыза́етъ.

Любо́вь же при́сно къ любви́ приложи́въ и съ Бо́гомъ бы́ти вы́ну жела́я, кра́йнему жестоковожде́нію себе́ издае́тъ, и внима́ніемъ у́бо прилѣ́жнымъ всегда́ чу́вства удержа́въ, къ Бо́гу же у́мъ возвы́сивъ, и во все́ вре́мя моли́твы упражне́ніе, и о Боже́ственныхъ поуче́ніе сотвори́въ, и житіе́ упра́вивъ изря́дно. Де́монскія бра́ни по́мощію Бо́жіею вся́чески побѣжда́етъ, и всено́щными стоя́ньми исто́чники сле́зъ ду́шу очи́стивъ, сосу́дъ избра́нный даро́въ Бо́жіяго Ду́ха бы́сть, и боговидѣ́нія ча́стая ви́дѣ. И чу́днѣйше, я́ко и прехожде́ніе ра́ди исма́ильтескихъ нахожде́ній на Ѳессалони́ку, и въ Ве́рскій ски́тъ отше́дъ, и съ нѣ́кими гра́жданы понужда́емь бесѣ́довати. Та́же по жи́тельству прилѣ́жно прехожда́ше, въ не ма́лыхъ у́бо лѣ́тѣхъ, соверше́нно и тѣ́ло и ду́шу очи́стивъ, и Бо́жіимъ велѣ́ніемъ ве́ліе пома́заніе свяще́нства прія́тъ, и я́ко нѣ́кій невеще́ственный, и, я́ко рещи́, внѣ́ себе́ бы́въ, та́йная сего́ соверши́въ, я́ко то́кмо зри́мь, душа́мъ зря́щихъ умиля́тися. Ве́лій вои́стинну бѣ́, и по Бо́гу живу́щимъ духоно́сецъ познава́шеся, явля́шеся же сицевы́й сы́й, и внѣ́шняя зря́щимъ: держа́ву имы́й на де́моны, и отъ и́хъ пре́лести и кова́рства облада́емыя избавля́я, непло́діе древе́съ въ благопло́діе преложи́въ, бу́дущая прови́дѣ, и ины́ми Боже́ственнаго Ду́ха дарова́ньми же и плоды́ украша́шеся.

Поне́же е́же у́бо добродѣ́тели дѣ́йствовати, въ на́шей вла́сти лежи́тъ, а е́же во искуше́нія впа́сти, нѣ́сть въ на́съ. Кромѣ́ же си́хъ нѣ́сть соверше́ніе, или́ явле́ніе вѣ́ры къ Бо́гу, [сше́дшее бо, глаго́летъ, дѣя́ніе и стра́сть, въ бла́зѣ соверша́етъ по Бо́гу человѣ́ка,] въ разли́чная и ча́стая искуше́нія па́сти, вели́кій се́й попуща́ется, да всѣ́ми, и соверше́нъ вои́стинну яви́тся.

А я́же отвсю́ду, кíй у́мъ помы́слитъ? Ко́е изрещи́ возмо́жетъ сло́во? Яже пре́жнихъ бо́льшія ко́зни лю́таго бори́теля, и я́же новоявле́нныхъ богобо́рцовъ на него́ навѣ́ты, и клеветы́, и ели́ко о благоче́стіи подвиза́ся, во всѣ́хъ тре́хъ ко два́десятимъ лѣ́тѣхъ, отъ тѣ́хъ претерпѣ́ озлобле́нія и ско́рби разли́чныя. Ита́льскій бо звѣ́рь, калаврíйскій Варлаа́мъ, внѣ́шнею му́дростію велему́дрствуетъ, и суето́ю свои́хъ помышле́ній, вся́ помышля́я вѣ́дати, лю́тую воздвиза́етъ бра́нь на Це́рковь Христо́ву, и на благочести́вую на́шу вѣ́ру, и на держа́щія сію́ извѣ́стно. Общую бо благода́ть Отца́, Сы́на и Свята́го Ду́ха, и свѣ́тъ бу́дущаго вѣ́ка, я́коже и пра́ведніи возсія́ютъ, я́ко со́лнце, я́ко и Христо́съ предпоказа́ на горѣ́ возсія́вый, и про́сто, всю́ си́лу и дѣ́йство Тріѵпоста́снаго Божества́ и все́ ра́знствующее каково́-ли́бо бу́ди Боже́ственнаго естества́, созда́нное бы́ти умовре́дно научи́, и благоче́стно несозда́нны му́дрствующія Боже́ственнѣйшій о́ный свѣ́тъ, и всю́ си́лу и дѣ́йство, я́ко ниеди́ному су́щу но́вому отъ пребыва́ющихъ есте́ственнѣ въ Бо́зѣ, словесы́ же и списа́ньми простра́ннѣйшими, двобо́жныя именова́ и многобо́жныя, я́коже іуде́и, Саве́ллій же и Арій имену́ютъ насъ.

Си́хъ ра́ди у́бо Боже́ственный Григо́рій, я́ко благоче́стія побо́рникъ и предста́тель пресвѣ́тлый, и пре́жде всѣ́хъ о се́мъ и предборя́ся и оклевета́емь, по́сланъ бы́въ отъ Це́ркве въ Константинопо́ль, и прихо́дитъ. Боже́ственнѣйшему у́бо царю́ Андрони́ку о благоче́стіи предзащища́ющу, четве́ртому отъ Палеоло́говъ, Собо́ръ свяще́нный собира́ется. И Варлаа́му прише́дшу, и его́ предотме́тнымъ злосла́внымъ уче́ніемъ, и на благоче́стіе оглаго́ланіемъ, Ду́ха Бо́жія испо́лнися вели́кій Григо́рій, и въ си́лу необори́мую обле́кся свы́ше, уста́ его́, на Бо́га отве́рстая, загради́, и до конца́ посрами́, и огнедухнове́нными словесы́ же и списа́ньми, его́ хвра́стныя е́реси, я́ко пе́пелъ, сотвори́. Тѣ́мже и студа́ не претерпѣ́въ благоче́стія ра́тникъ, къ лати́номъ, отону́дуже пріи́де, бѣ́гомъ оты́де. По о́номъ же а́біе многобѣ́дствіи собо́рнѣ изоблича́етъ и списа́нія сего́ словесы́ сопроти́вными разсыпа́етъ. А и́же о́ныхъ причасти́вшеся па́губы, ниже́ та́ко преста́ша бори́ти на Це́рковь Бо́жію.

Отону́дуже и ну́ждею мно́гою свяще́ннаго Собо́ра, и самаго́ царя́, и пре́жде всѣ́хъ Боже́ственнымъ велѣ́ніемъ увѣ́рився, Григо́рій на архіере́йскій престо́лъ возво́дится и Ѳессалони́тскія свяще́нныя Це́ркве па́стырь поставля́ется. Тѣ́мже и вя́щшія по́двиги, мно́гихъ пре́жднихъ о Правосла́внѣй вѣ́рѣ до́блественнѣ соверша́етъ и терпѣ́ливѣ. Лука́выя бо прее́мники Акинди́на и Варлаа́ма, мно́гія я́вльшіяся и лю́тыя, и лю́тыхъ звѣре́й лю́тая рожде́нія, и си́хъ уче́нія же и списа́нія не еди́ножды, или́ два́жды, или́ три́жды, но мно́гажды и мно́гими, ниже́ при еди́номъ царѣ́, или́ патріа́рсѣ, но при тріе́хъ по прее́мству ски́птровъ держа́щихъ, и патріа́рсѣхъ равночи́сленныхъ, и собо́рѣхъ неудобосчисля́емыхъ, словесы́ же и писа́ньми богодухнове́нными многови́дно возвраща́етъ и до конца́ побѣжда́етъ. И нѣ́цыи непрело́жно иму́ще, ни во что́же полага́юще го́рній су́дъ, та́ко пребы́ша, и всѣ́хъ бо ересе́й су́ть еще́ оста́тки безсту́дствующіи на побѣди́вшихъ я́ святы́хъ, да не глаго́лю вседе́рзый ро́дъ іуде́йскій, да́же и до ны́нѣ имы́й неи́стовство на Христа́. Таковы́я у́бо я́ко вкра́тцѣ и толи́кія вели́каго Григо́рія побѣ́ды на нечести́выя.

Бо́гъ же, неизрече́нными о́бразы, и къ восто́ку сего́ отсыла́етъ учи́теля. Посыла́ется у́бо я́ко старѣ́йшина отъ Ѳессалоникíи въ Константи́нь гра́дъ, примири́ти ра́знствующія цари́. Пое́млется же отъ ага́ряновъ и держи́тся во все́ лѣ́то, мѣста́ отъ мѣ́стъ, и гра́ды отъ градо́въ, страда́льчески преходя́ и уча́ небоя́зненно Христо́ву Ева́нгелію. И о́выя у́бо утвержда́я и увѣщава́я, еще́ и моля́ въ вѣ́рѣ пребы́ти, коле́блющіяся же въ не́й, и нѣ́кая недоумѣ́нія и взыска́нія о бы́вшихъ тогда́ предлага́ющія, богому́дренно утвержда́я, и исцѣле́ніе, въ ни́хже глаго́лаху, дово́льнѣйшее отдая́ше. Про́чимъ же невѣ́рнымъ и окая́нно отто́ргшимся христіа́номъ, и отлучи́вшимся ко о́нымъ и влеку́щимъ на́ша о воплоще́нномъ смотре́ніи Го́спода и Бо́га на́шего, и о поклоне́ніи отъ на́съ честна́го Креста́, и святы́хъ ико́нъ, мно́гажды не обину́яся глаго́лаше. Еще́ же о Моаме́ѳѣ [Магоме́тѣ], и мно́гихъ ины́хъ взыска́ніихъ отъ ни́хъ предложе́нныхъ, о́выя у́бо имя́ше о себѣ́ дивя́щіяся, о́выя же на себе́ неи́стовствующія и ру́ки простира́ющія, и́же и му́ченически сконча́ли бы его́, а́ще бы не Бо́жіимъ про́мысломъ, наде́ждею пѣ́нязей, ю́же имя́ху о не́мъ, пощаде́нъ бы́въ. Та́же отъ христолюби́выхъ свобожда́шеся вели́кій и къ своему́ ста́ду му́ченикъ безкро́вный свѣ́тло па́ки отхо́дитъ. Ко ины́мъ мно́гимъ и вели́кимъ дарова́ніемъ же и пе́рвенствомъ, я́же имя́ше, ра́нами Христо́выми и то́й украси́ся, и я́же Христо́ва, по Па́влу, имы́й въ себѣ́ лише́нія.

И да пока́жемъ нѣ́кая о́наго начертава́ющая, сія́ бя́ху его́ сво́йства: е́же со превосхожде́ніемъ кро́ткое и смире́нное, [здѣ́ не о Бо́зѣ и Боже́ственныхъ сло́во, и́бо въ си́хъ и зѣло́ бѣ́ побо́рникъ,] непамятозло́біе зѣло́ и незло́біе, е́же тща́тися по си́лѣ, бла́гшимъ возда́ти, къ нему́ въ нѣ́кихъ я́вльшимся злы́мъ, е́же отню́дъ удо́бно на нѣ́кія не пріима́ти словеса́. Еже къ гря́дущимъ всегда́ напа́стемъ терпѣли́вое и великоду́шное, е́же вся́кія сла́сти и тщесла́вія вы́шшее. Еже худо́му при́сно бы́ти, и неизбы́точественному во всѣ́хъ потре́бахъ тѣле́сныхъ, и́бо въ толи́кое вои́стинну вре́мя не изнемо́гшу. Еже терпѣ́нія безмо́лвное же и ти́хое, и при́сно благода́тное, та́ко до кра́я ему́ сотворе́но, я́ко и отъ внѣ́шнихъ я́вѣ бы́ти ви́дящимъ всѣ́мъ, е́же разу́мное при́сно, и внима́тельное же и неразлива́тельное. Имже послѣ́довательное, е́же никогда́ очесе́мъ его́ бы́ти тщи́мъ сле́зъ, но болѣ́зновати си́мъ по исто́чникомъ сле́зъ. Та́ко у́бо изъ нача́ла да́же до конца́ на стра́сти и де́моны страда́льчески подвиза́вся, и отъ Христо́вы Це́ркве дале́че еретики́ изгна́въ, и Правосла́вную вѣ́ру словесы́ же и списа́ньми изъясни́въ, и тѣ́ми, я́коже печа́тію, все́ Писа́ніе Богодухнове́нное запечатлѣ́въ, я́ко его́ житіе́ и сло́во я́коже сло́ву нѣ́коему бы́ти и печа́ти житія́ и сло́ва святы́хъ.

Еще́ же свое́ ста́до о тре́хъ и десяти́ лѣ́тѣхъ апо́стольски и богоуго́дно упа́съ, и нра́вными словесы́ украси́въ, и ко огра́дѣ небе́снѣй упра́вивъ, и, я́ко рещи́, о́бщій дѣ́латель яви́вся живы́хъ же и пото́мъ бу́дущихъ правосла́вныхъ всѣ́хъ, къ премíрнѣй жи́зни прелага́ется, пожи́въ всѣ́хъ лѣ́тъ, три́ ко шести́десятимъ. И ду́хъ у́бо въ ру́цѣ Бо́жіи предлага́етъ, тѣ́ло же па́ствѣ оставля́етъ, изря́дно въ коне́цъ просвѣще́нное же и просла́вленное, я́ко нѣ́кій жре́бій и сокро́вище пречестно́е. Чудесы́ бо Христо́съ на кíйждо де́нь вѣ́рно приходя́щія благодѣ́йствуетъ и неду́говъ вся́ческихъ измѣне́ніе да́руетъ, отъ ни́хже не ма́ло исто́рія о не́мъ повѣ́даетъ.

Того́ у́бо моли́твами, Бо́же, поми́луй на́съ, ами́нь.


Пѣ́снь 7.

Ирмо́съ: Отъ Іуде́и доше́дше, о́троцы, въ Вавило́нѣ иногда́, вѣ́рою Тро́ическою пла́мень пе́щный попра́ша, пою́ще: отце́въ Бо́же, благослове́нъ еси́.

Дерзнове́нія не и́мамъ, е́же нарещи́ся сы́нъ Тво́й, Отче Человѣколю́бче, я́ко еди́наго отъ нае́мникъ Твои́хъ бы́ти, молю́ся, не гнуша́йся мене́, зову́ща: оте́цъ на́шихъ Бо́же, благослове́нъ еси́.

Оскверни́вше пе́рвымъ житіе́мъ жизнь и погуби́вше благоро́діе пе́рвое, притеце́мъ Еди́ному Отцу́ и Бо́гу на́шему, покая́ніемъ те́плымъ прія́ти спасе́ніе.

Же́стокъ граждани́нъ, ему́же рабо́тати окая́нный осуди́хся: гла́дъ же, его́же подъя́хъ, свинія́мъ угожда́я, крѣ́покъ и нестерпи́мь, но, обра́щься, прошу́: Спа́се, поми́луй мя́.

Богоро́диченъ: Умерщвле́нное естество́ оживи́ла еси́, еди́на Живо́тъ ро́ждшая, Дѣ́во Богоро́дице, тѣ́мже Тя́ спасе́ніе, вѣ́рніи, свѣ́мы, оте́цъ на́шихъ Бо́га пло́тію ро́ждшую.

Иный.

Ирмо́съ: Не послужи́ша тва́ри богому́дріи, па́че Созда́вшаго, но, о́гненное преще́ніе му́жески попра́вше, ра́довахуся, пою́ще: препѣ́тый отце́въ Госпо́дь и Бо́гъ, благослове́нъ еси́.

Словесе́мъ бесѣ́дующіи, и списа́ніемъ твои́мъ, Григо́ріе, ра́зуму поуча́ются Бо́жію, и по́лны явля́ются прему́дрости Бо́жія духо́вныя, и несозда́нную благода́ть, и дѣ́йство Бо́жіе богосло́вствуютъ.

Ме́чь и стрѣ́лы злосла́вныхъ сокруши́лъ еси́, и го́рдость Варлаа́мову, и вся́кую си́лу ерети́ческую, я́ко тка́ніе паучи́ны расточи́лъ еси́, а́ки ка́мень превели́кій, іера́рше.

Запечатлѣ́ся твои́ми словесы́ и догма́ты вѣ́ра благочести́выхъ, и де́рзость е́реси ста́, Григо́ріе, и низложе́ніе правосла́вія преста́, и крѣ́пость злосла́вныхъ.

Богоро́диченъ: Струи́ Тя исто́чника, усо́хшіи страсте́й болѣ́зньми, вѣ́дуще вои́стинну, почерпа́емъ спасе́ніе и Боже́ственныя струи́, и взыва́емъ: благослове́нъ, Всечи́стая, Пло́дъ Твоего́ чре́ва.

Пѣ́снь 8.

Ирмо́съ: Седмери́цею пе́щь халде́йскій мучи́тель богочести́вымъ неи́стовно разжже́, си́лою же лу́чшею спасе́ны сія́ ви́дѣвъ, Творцу́ и Изба́вителю вопія́ше: о́троцы, благослови́те, свяще́нницы, воспо́йте, лю́діе, превозноси́те во вся́ вѣ́ки.

Безмѣ́рнаго, Влады́ко, и мно́гаго милосе́рдія Твоего́, вѣ́мы бога́тство въ Тя́ вѣ́ровавшіи. Тѣ́мже Ти́ припа́даемъ съ блу́днымъ вси́ те́плѣ: пріими́ согрѣши́вшія и къ Тебѣ́ прибѣ́гшія: нѣ́сть бо, нѣ́сть грѣ́хъ, Ще́дре, Твое́ человѣколю́біе побѣди́ти могíй.

Милосе́рдія ра́ди, Влады́ко, Себе́ смири́въ, па́дшимъ Твои́мъ сыно́мъ прибли́жился еси́: Самъ бо Человѣколю́бче срѣ́лъ еси́ па́дшихъ, и облобыза́еши, и спасе́ніе да́руеши: а́ще кто́ и до́лу па́днетъ, ми́лостивъ Сы́й не гнѣ́ваешися, я́ко Человѣколю́бецъ.

Стра́шнѣйшій су́дъ мене́ усря́щетъ, о Влады́ко, я́ко Тя́ человѣколю́бца и незло́бива зря́, не притека́ю къ Тебѣ́, блу́днаго зовы́й гла́сомъ, но въ лѣ́ности житіе́ препровожда́ю. Ты́ у́бо ми́лостивъ бу́ди ми́ и осужде́нія о́наго исхити́, Ще́дре, покая́нія ра́ди.

Тро́иченъ: Не три́ бо́ги сла́вимъ, но Еди́но Божество́, Три́ же вои́стинну Ѵпоста́си чти́мъ: Отца́ нерожде́нна, и рожде́нна Сы́на отъ Отца́, и исхо́дна отъ Отца́ Свята́го Ду́ха, — Бо́га Еди́наго Три́, а́ще и зва́ніе ко́еждо, я́коже Бо́гъ е́сть вѣ́рно сла́вимая.

Богоро́диченъ: Отъ мно́гихъ мя́, Всенепоро́чная, напа́стей преклоне́на и печа́лей бу́рею потопля́ема, Приста́нище спасе́нія, Твое́ю моли́твою, Пречи́стая, изба́ви и, отъ всѣхъ исхити́вши, спаси́, да Тя́ досто́йно, я́ко те́плую Предста́тельницу, сла́влю Богоро́дицу во вся́ вѣ́ки.

Иный.

Ирмо́съ: Отроки благочести́выя въ пещи́ Рождество́ Богоро́дичо спасло́ е́сть, тогда́ у́бо образу́емое, ны́нѣ же дѣ́йствуемое, вселе́нную всю́ воздвиза́етъ пѣ́ти Тебѣ́: Го́спода по́йте, дѣла́, и превозноси́те Его́ во вся́ вѣ́ки.

Предстои́ши ны́нѣ престо́лу Всеще́драго, я́ко богосло́вовъ подо́бный и си́мъ единонра́вный, всему́дре Григо́ріе, Ѳессалони́тскій предсѣда́телю, іера́рховъ добро́то, свѣ́тло украси́вся сла́вою священнонача́лія, Бо́гу и ны́нѣ служа́.

Вѣ́дый чи́стое твоего́ помышле́нія Бо́гъ, и пре́жде чре́ва, и пре́жде зача́тія, вѣ́рному возглаго́ла боже́ственному царю́ я́вѣ, Це́ркве необори́маго бы́ти тя́ побо́рника, тѣ́мже пра́вильнымъ извѣ́ствомъ, мѵ́ромъ запечатлѣ́нъ еси́ священнонача́льства.

Побѣжда́ется я́вѣ и бѣ́дствуетъ собра́ніе Поликинди́на дла́нію твое́ю и му́дрыми твои́ми глаго́лы, пресла́вне Григо́ріе, Ѳессалони́тскій предсѣда́телю, и, я́ко исчеза́етъ ды́мъ, исчезе́ гнило́е безу́міе, твои́мъ громогла́снымъ и богосло́внымъ язы́комъ.

Богоро́диченъ: Сло́во Бо́жіе въ Тебѣ́, Дѣ́во, человѣ́ческое естество́ погружа́емое страстьми́, возобрази́ кра́йнею благосты́нею, и все обнови́ и посвяти́, тѣ́мже, Тобо́ю спасе́ни, Тя́ славосло́вимъ во вся́ вѣ́ки.

Пѣ́снь 9.

Ирмо́съ: Ужасе́ся о се́мъ не́бо, и земли́ удиви́шася концы́, я́ко Бо́гъ яви́ся человѣ́комъ пло́тски, и чре́во Твое́ бы́сть простра́ннѣйшее небе́съ. Тѣ́мъ Тя́, Богоро́дицу, а́нгеловъ и человѣ́къ чинонача́лія велича́ютъ.

Ра́дости и весе́лія ны́нѣ, мене́ ра́ди закла́вшемуся Твоему́ тельцу́, испо́лни сего́ отъ Тебе́ ча́ющую мою́ ду́шу, Бо́же, заблужде́на пріими́ мя́, и умерщвле́на къ жи́зни возведи́, и въ Боже́ственную оде́жду спасе́нія, въ нетлѣ́ніе мя́ облецы́.

Ду́ши, удале́ныя отъ Бо́га и Боже́ственныхъ дарова́ній лише́нныя, пріиди́те те́плѣ и, блу́днаго обраще́ніе воспріи́мше, зове́мъ: Отче Благíй, Иже на небесѣ́хъ, согрѣши́хомъ Ти́ вси́, очи́сти и спаси́ прибѣга́ющія къ ми́лости Твое́й.

Яко имы́й милосе́рдія мно́жество мно́гое, не гнуша́йся мене́, Го́споди, Го́споди, во мно́гихъ сласте́хъ бога́тство ижди́вша, и прибѣга́юща ны́нѣ, и зову́ща блу́днаго гла́сомъ: согрѣши́хъ Ти́, спаси́ прибѣга́ющаго къ ми́лости Твое́й.

Богоро́диченъ: Спасе́нія приста́нище и наставле́ніе, и предста́тельницу Тя́ и́мамъ ра́бъ Тво́й, лю́тыхъ всѣ́хъ препя́тій, я́ко Блага́я, къ Бо́гу мольба́ми Твои́ми, Влады́чице, да изба́влюся, я́ко на Тя́ всю́ мою́ наде́жду возложи́хъ любо́вію, да вѣ́рою велича́ю Тя́.

Иный.

Ирмо́съ: Вся́къ земноро́дный да взыгра́ется, Ду́хомъ просвѣща́емь, да торжеству́етъ же безпло́тныхъ умо́въ естество́, почита́ющее свяще́нное торжество́ Богома́тере, и да вопіе́тъ: ра́дуйся, Всеблаже́нная Богоро́дице, Чи́стая Приснодѣ́во.

Зерца́ло Бо́жіе бы́лъ еси́, Григо́ріе: е́же бо по о́бразу нескве́рное соблю́лъ еси́, у́мъ же влады́ку на стра́сти плотскíя му́жески поста́вивъ, е́же по подо́бію воспрія́лъ еси́. Отону́дуже до́мъ бы́лъ еси́ Святы́я Тро́ицы свѣтлѣ́йшій.

Ца́рь благочести́вый крила́таго тя́ воздухохо́дна показу́етъ, сему́ спобо́рствующа, я́ко всего́ испо́лнена Боже́ственнаго Ду́ха, на суему́дреннаго неи́стовствующаго Варлаа́ма, глаго́лющаго на высоту́ непра́ведная Бо́гу, его́же пра́ведно побѣди́лъ еси́.

Ве́сь бы́въ прему́дрости лу́чшія испо́лненъ, пресла́вне, свѣ́тъ мíрови просвѣти́лъ еси́, Правосла́вія источи́въ догма́ты: дру́жествомъ бо изря́днаго любому́дрія, прему́дре, Боже́ственный стра́хъ во чре́вѣ зача́лъ еси́, и словеса́ Ду́ха породи́лъ еси́.

Богоро́диченъ: Пѣ́снь Тебѣ́, вѣ́рніи, согла́сно прино́симъ благодаре́нія: Ты́ бо дре́внюю разруши́ла еси́ на́шу кля́тву, Богороди́тельнице, и благослове́ніе вси Боже́ственное пріе́млемъ, спасе́ніе, просвѣще́ніе, и ми́лость Тобо́ю, и ра́дость вѣ́чную.

Ексапостила́рій воскре́сенъ. Сла́ва, свята́го. Подо́бенъ: Со ученики́.

Ра́дуйся, отце́въ похвало́, богосло́вовъ уста́, безмо́лвія селе́ніе, прему́дрости до́ме, учи́телей кра́йность, пучи́но сло́ва. Ра́дуйся, дѣя́нія орга́не, видѣ́нія кра́йность и исцѣли́телю неду́говъ человѣ́ческихъ. Ра́дуйся, Ду́ха хра́ме, и уме́рый и живы́й, о́тче.

И ны́нѣ, богоро́диченъ:

Влады́чице, всѣ́хъ Влады́чице, и всѣ́хъ вы́шшая, всѣ́хъ же превосходя́щая го́рнихъ во́инствъ, простри́ руку́ держа́вну и сохрани́ мíръ, свяще́нники благослови́, Тебѣ́ священнодѣ́йствующія, мона́хи же прости́, моля́щія Тебе́. ИМПЕРАТОРА умири́ и су́щія въ пала́тѣ, во́инство же укрѣпи́ во вре́мя бра́ни, се́й гра́дъ соблюди́, Свята́я Богоро́дице, и ны́нѣ на́съ сподо́би ви́дѣти небе́сное Ца́рство и ра́йскую две́рь, егда́ ся́детъ Судія́ суди́ти вселе́ннѣй, во второ́мъ и стра́шномъ суди́лищи, Влады́чице а́нгеловъ.

На хвали́техъ поста́вимъ стихо́въ 8 и пое́мъ стихи́ры воскре́сны 5 и настоя́щія 3, гла́съ 1. Подо́бенъ: Небе́сныхъ чино́въ.

Блаже́нную въ мíрѣ жи́знь соверши́въ, и ны́нѣ блаже́нныхъ сра́дуешися собо́ромъ, и на земли́ кро́ткихъ, я́ко кро́ткій живе́ши, іера́рше Григо́ріе, благода́тію же чуде́съ богатѣ́еши отъ Бо́га, ю́же подае́ши чту́щимъ тя́.

[Сти́хъ: Уста́ пра́веднаго поуча́тся прему́дрости, и язы́къ его́ возглаго́летъ су́дъ.]

Правосла́вія догма́ты насади́лъ еси́, злосла́вія, блаже́нне, отсѣка́я те́рніе, и вѣ́ры сѣ́мя умножа́я до́брѣ, одожде́ніемъ слове́съ твои́хъ, стокра́тный кла́съ, я́ко дѣ́ятельный земледѣ́латель, Бо́гу прине́слъ еси́.

[Сти́хъ: Услы́шите сія́, вси́ язы́цы, внуши́те, вси́, живу́щіи по вселе́ннѣй.]

Непоро́чнаго твоего́ житія́, блаже́нне, свѣ́тлости удиви́шася а́нгелъ и человѣ́къ собо́ри, и́бо произволе́ніемъ тве́рдый страда́лецъ и по́стникъ яви́лся еси́, и іера́рхъ, и досто́йный служи́тель Бо́жій, и дру́гъ и́скренній.

И глаго́лемъ сти́хъ: Воскресни́, Го́споди Бо́же мо́й, да вознесе́тся рука́ Твоя́, не забу́ди убо́гихъ Твои́хъ до конца́.

И пое́мъ самогла́сенъ, гла́съ 6:

Во тмѣ́ согрѣше́ній ходя́щимъ, Свѣ́тъ возсія́лъ еси́, Христе́, вре́менемъ воздержа́нія, и благоуха́нный де́нь стра́сти Твоея́ покажи́ на́мъ, да вопіе́мъ Тебѣ́: воста́ни, Бо́же, поми́луй на́съ.

Сла́ва, то́йже. И ны́нѣ: Преблагослове́нна еси́... Славосло́віе вели́кое: И отпу́стъ.



НА ЛИТУРГІИ,

Блаже́нны гла́са, на 6. И свята́го пѣ́снь 3, на 4. Проки́менъ, гла́съ 5: Ты́, Го́споди, сохрани́ши ны́ и соблюде́ши ны́ отъ ро́да сего́ и во вѣ́къ. Сти́хъ: Спаси́ мя, Го́споди, я́ко оскудѣ́ преподо́бный. [И свята́го, гла́съ 1: Уста́ моя́ возглаго́лютъ прему́дрость, и поуче́ніе се́рдца моего́ ра́зумъ.] Апо́столъ ко Евре́емъ, зача́ло 304. [И святи́телю, ко Евре́емъ, зача́ло 318.] Аллилу́ія гла́са. [И святи́телю, гла́съ 2: Уста́ пра́веднаго поуча́тся прему́дрости, и язы́къ его́ возглаго́летъ су́дъ.] Ева́нгеліе отъ Ма́рка, зача́ло 7. [И святи́телю, Ева́нгеліе отъ Іоа́нна, зача́ло 36.] Прича́стенъ: Хвали́те Го́спода съ небе́съ, [хвали́те Его́ въ вы́шнихъ. Другíй: Въ па́мять вѣ́чную бу́детъ пра́ведникъ, отъ слу́ха зла́ не убои́тся].

Источникъ: Тріо́діонъ, сíесть трипѣ́снецъ. — Кíевъ: Въ тѵпогра́фіи Кíево-Пече́рской Успе́нской Ла́вры, 1864. — Л. 158 – 165 об.

/ Къ оглавленію раздѣла /


Наверхъ / Къ титульной страницѣ

0