Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - пятница, 22 сентября 2017 г. Сейчасъ на порталѣ посѣтителей - 5.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

ТРІОДІОНЪ, СІЕСТЬ ТРИПѢСНЕЦЪ,
Съ Бо́гомъ Святы́мъ, обдержа́й подоба́ющее ему́ послѣ́дованіе.

Слу́жба въ суббо́ту вторы́я седми́цы Вели́каго поста́.

ВЪ ПЯТОКЪ ВЕЧЕРА ВТОРЫЯ СЕДМИЦЫ,

Самогла́сенъ, гла́съ 4:

Ны́нѣ вре́мя благопрія́тное, ны́нѣ де́нь спасе́нія, во мно́жествѣ ми́лости Твоея́ посѣти́ мою́ ду́шу и бре́мя беззако́ній мои́хъ осла́би, Еди́не Человѣколю́бче.

Проки́менъ, псало́мъ 39-й. Гла́съ 4: Ми́лость Твоя́ и и́стина Твоя́,* вы́ну да засту́питѣ мя́. Сти́хъ: Терпя́ потерпѣ́хъ Го́спода, и вня́тъ ми́ [и услы́ша моли́тву мою́].

Бытія́ чте́ніе. [Главы́ 5 и 6.]

Бѣ́ Но́е лѣ́тъ пяти́ со́тъ, и роди́ сы́ны три́: Си́ма, Ха́ма, Іа́феѳа. И бы́сть: егда́ нача́ша человѣ́цы мно́зи быва́ти на земли́, и дще́ри роди́шася и́мъ, ви́дѣвше же сы́нове Бо́жіи дще́ри человѣ́чи, я́ко добры́ су́ть, поя́ша себѣ́ жены́ отъ всѣ́хъ, я́же избра́ша. И рече́ Госпо́дь Бо́гъ: не и́мать Ду́хъ Мо́й пребыва́ти въ человѣ́цѣхъ си́хъ во вѣ́къ, зане́ су́ть пло́ть, бу́дутъ же днíе и́хъ лѣ́тъ сто́ два́десять. Исполи́ни же бя́ху на земли́ во дни́ о́ны, и пото́мъ, егда́ вхожда́ху сы́нове Бо́жіи къ дще́ремъ человѣ́ческимъ, и рожда́ху себѣ́. Тíи бя́ху исполи́ни, и́же отъ вѣ́ка человѣ́цы имени́тіи. Ви́дѣвъ же Госпо́дь Бо́гъ, я́ко умно́жишася зло́бы человѣ́ковъ на земли́ и вся́къ помышля́етъ въ се́рдцѣ свое́мъ прилѣ́жно на зла́я во вся́ дни́. И помы́сли Бо́гъ, я́ко сотвори́ человѣ́ка на земли́, и размы́сли. И рече́ Бо́гъ: потреблю́ человѣ́ка, его́же сотвори́хъ отъ лица́ земли́: отъ человѣ́ка да́же до скота́ и отъ га́дъ да́же до пти́цъ небе́сныхъ, зане́ размы́слихъ, я́ко сотвори́хъ я́. Но́е же обрѣ́те благода́ть предъ Го́сподемъ Бо́гомъ.

Проки́менъ, псало́мъ 40, гла́съ 6: Азъ рѣ́хъ: Го́споди, поми́луй мя́,* исцѣли́ ду́шу мою́, [я́ко согрѣши́хъ Ти́]. Сти́хъ: Блаже́нъ разумѣва́яй на ни́ща и убо́га, [въ де́нь лю́тъ изба́витъ его́ Госпо́дь].

При́тчей чте́ніе. [Главы́ 6 и 7.]

Сы́не, храни́ зако́ны отца́ твоего́ и не отри́ни наказа́нія ма́тере твоея́. Навяжи́ же я́ на твою́ ду́шу при́сно и обяжи́ и́хъ о твое́й вы́и. Егда́ хо́диши, води́ ю́, и съ тобо́ю да бу́детъ, егда́ же спи́ши, да храни́тъ тя́, да, востаю́щу ти́, глаго́летъ съ тобо́ю. Зане́ свѣти́льникъ за́повѣдь зако́на, и свѣ́тъ, и пу́ть жи́зни, и обличе́ніе, и наказа́ніе, еже сохрани́ти тя́ отъ жены́ мужа́ты и отъ наважде́нія язы́ка чужда́го. Сы́не, да не побѣди́тъ тя́ добро́ты по́хоть, ниже́ уловле́нъ бу́ди твои́ма очи́ма, ниже́ да совосхи́тишися вѣ́ждами ея́. Цѣна́ бо блудни́цы, ели́ка еди́наго хлѣ́ба, жена́ же муже́й честны́я ду́ши уловля́етъ. Ввя́жетъ ли кто́ о́гнь въ нѣ́дра, ри́зъ же (свои́хъ) не сожже́тъ ли? Или́ ходи́ти кто́ бу́детъ на у́гліяхъ о́гненныхъ, но́гъ же не сожже́тъ ли? Та́ко вше́дый къ женѣ́ мужа́тѣй не безъ вины́ бу́детъ, ниже́ вся́къ прикаса́яйся е́й. Не ди́вно, а́ще кто́ я́тъ бу́детъ кра́дый: кра́детъ бо, да насы́титъ ду́шу свою́ а́лчущую; а́ще же я́тъ бу́детъ, возда́стъ седмери́цею и вся́ имѣ́нія своя́ да́въ, изба́витъ себе́. Прелюбодѣ́й же, за ску́дость ума́, поги́бель души́ свое́й содѣва́етъ, болѣ́зни же и безче́стіе понесе́тъ, поноше́ніе же его́ не загла́дится во вѣ́къ. Испо́лнена бо ре́вности я́рость му́жа ея́: не пощади́тъ въ де́нь суда́, не измѣни́тъ ни еди́ною цѣно́ю вражды́, ниже́ разрѣши́тся мно́гими дарми́. Сы́не, храни́ моя́ словеса́, моя́ же за́повѣди скры́й у себе́. Сы́не, чти́ Го́спода и укрѣпи́шися, кромѣ́ же Его́ не бо́йся ино́го.

И про́чее послѣ́дованіе Преждеосвяще́нныхъ.



ВЪ СУББОТУ ВТОРЫЯ СЕДМИЦЫ НА УТРЕНИ,
Аллилу́ія... и тропари́, гла́съ 2:

Апо́столи, му́ченицы и проро́цы, святи́теліе, преподо́бніи и пра́ведніи, до́брѣ по́двигъ соверши́вшіи и вѣ́ру соблю́дшіи, дерзнове́ніе иму́щіи ко Спа́су, о на́съ Того́, я́ко Бла́га, моли́те спасти́ся, мо́лимся, душа́мъ на́шимъ. [Два́жды.]

Сла́ва, ме́ртвенъ:

Помяни́, Го́споди, я́ко Бла́гъ, рабы́ Твоя́, и ели́ка въ житіи́ согрѣши́ша, прости́, никто́же бо безгрѣ́шенъ, то́кмо Ты́, могíй и преста́вленнымъ да́ти поко́й.

И ны́нѣ, богоро́диченъ:

Ма́ти Свята́я Неизрече́ннаго Свѣ́та, а́нгельскими Тя́ пѣ́сньми почита́юще, благоче́стно велича́емъ.

И стихосло́вимъ еди́ну каѳи́сму: Рече́ Госпо́дь Го́сподеви моему́... Та́же сѣда́льны му́ченичны окто́иха три́, и ме́ртвенъ, и богоро́диченъ. И чте́ніе въ Шестодне́вцѣ. Та́же: Блаже́ни непоро́чніи.., пое́мъ на двѣ́ статіи́. И помина́етъ свяще́нникъ усо́пшія, я́коже обы́чно. Въ коне́цъ же каѳи́смы пое́мъ: Благослове́нъ еси́, Го́споди... Святы́хъ ли́къ... и про́чая. Во Сла́ва же, И ны́нѣ, ектенія́ о усо́пшихъ. Моли́тву: Бо́же духо́въ и вся́кія пло́ти...

И а́біе сѣда́ленъ, гла́съ 5:

Поко́й, Спа́се нашъ, съ пра́ведными рабы́ Твоя́, и сія́ всели́ во дворы́ Твоя́, я́коже е́сть пи́сано, презира́я, я́ко Бла́гъ, прегрѣше́нія и́хъ во́льная и нево́льная, и вся́, я́же въ вѣ́дѣніи и не въ вѣ́дѣніи, Человѣколю́бче.

Сла́ва, конецъ. И ны́нѣ, богоро́диченъ:

Отъ Дѣ́вы возсія́вый мíру, Христе́ Бо́же, сы́ны свѣ́та То́ю показа́вый, поми́луй на́съ.

Кано́нъ мине́и, со ирмосо́мъ, на 6, и свята́го оби́тели, на 4: глаго́лется бо ирмо́съ и тропа́рь безъ стихо́въ, и держи́мъ стихи́ отъ Тогда́ потща́шася влады́ки... Не стихосло́вимъ бо пѣ́сней отъ нача́ла до 6-я пѣ́сни во всѣ́хъ суббо́тахъ святы́я Четыредеся́тницы, до ака́ѳиста. Отъ шесты́я же пѣ́сни начина́ются трипѣ́снцы, и пое́тся мине́и по дню́ свята́го и трипѣ́снцы; стихосло́вятся же и пѣ́сни.

Четверопѣ́снецъ господи́на Іо́сифа, его́же краегране́сіе: Пѣ́ніе сіе́ Іо́сифово. Гла́съ 8.

Пѣ́снь 6.

Ирмо́съ: Моли́тву пролію́ ко Го́споду [и Тому́ возвѣщу́ печа́ли моя́, я́ко зо́лъ душа́ моя́ испо́лнися и живо́тъ мо́й а́ду прибли́жися, и молю́ся, я́ко Іо́на: отъ тли́, Бо́же, возведи́ мя].

Святíи мно́жайшими му́ками, мно́гія враго́въ тмы́ низложи́ти сподо́бишася, Спа́се, и мно́гихъ бла́гъ Твои́хъ улучи́ша, моли́твами и́хъ, я́ко Бла́гъ, мно́гая моя́ очи́сти прегрѣше́нія.

Воспои́мъ Христо́вы страстоте́рпцы, и возопіи́мъ къ ни́мъ единому́дренно: Влады́чнимъ подо́бницы страсте́мъ, ду́шъ на́шихъ стра́сти исцѣли́те, пости́тися же отъ зла́го обы́чая на́съ укрѣпи́те.

Преложи́лъ еси́ сме́рть на со́нъ, болѣ́зненно во гро́бѣ поспа́лъ еси́ и ме́ртвымъ живо́тъ дарова́лъ еси́; преста́вльшіяся у́бо, Спа́се, сподо́би стоя́нія избра́нныхъ, страстоте́рпецъ святы́хъ мольба́ми.

Богоро́диченъ: Пости́тися ми́ и отступи́ти отъ вся́каго грѣха́ укрѣпи́, Отрокови́це, си́льнаго и безгрѣ́шнаго Сло́ва, воплоще́нна неизрече́нно ро́ждшая, и да́ждь ми́ чисти́тельную оскверне́ній, Всенепоро́чная, сле́зу.

Иный, господи́на Ѳео́дора, гла́съ 3.

Ирмо́съ: Глубина́ страсте́й [воста́ на мя́ и бу́ря проти́вныхъ вѣ́тровъ, но́, предвари́въ, мя Ты́ спаси́, Спа́се, и изба́ви отъ тли́, я́ко спа́слъ еси́ отъ звѣ́ря проро́ка].

Му́чениковъ па́мять соверша́емъ боже́ственно, мучениколю́бцы, пріиди́те возра́дуемся, пѣ́сньми ты́я вѣнча́юще, Подвигополо́жника Христа́ благослови́мъ.

Ра́нъ пе́рвѣе иску́съ пріе́мше, пото́мъ же ка́меніемъ побіе́ни бы́вше, претре́ни бы́вше, звѣре́мъ на снѣ́дь да́ни бы́сте, и закла́ни бы́сте, я́ко а́гнцы Христо́вы, но живете́ при́сно, страстоте́рпцы.

Сла́ва, тро́иченъ: Три́ Еди́нымъ Естество́мъ совокупля́я, Еди́но же Треми́ разсѣка́я Ли́цы, Яже Божество́ е́сть: Саве́ллія же и Арія, равномѣ́рныя стремни́ны отбѣга́ю.

И ны́нѣ, богоро́диченъ: Дѣ́ва яви́лася еси́ и по рождествѣ́, чисто́тствуеши во обою́ и ражда́еши: страннолѣ́пное видѣ́ніе, глаго́лемое и разумѣва́емое, содѣ́янное въ Тебѣ́, Богома́ти.

[Сти́хъ:] Сла́ва Тебѣ́, Бо́же на́шъ, сла́ва Тебѣ́. Или́ сти́хъ: Ди́венъ Бо́гъ во святы́хъ Свои́хъ, [Бо́гъ Изра́илевъ].

Му́чениченъ: Кро́вь ва́шего терпѣ́нія Го́споду мо́лится непреста́нно о на́съ, му́ченицы, тѣ́мже и ны́нѣ помоли́теся пости́тися на́мъ отъ страсте́й безче́стія.

Сти́хъ: Ду́ши и́хъ во благи́хъ водворя́тся.

Поко́инъ: Всему́ хотя́й суди́ти мíру, предстоя́щимъ тма́мъ а́нгеловъ, неосужде́нно тогда́ предста́ти Тебѣ́ сподо́би усо́пшія вѣ́рно, Всеще́дрый.

Ирмо́съ: Глубина́ страсте́й воста́ на мя́ и бу́ря проти́вныхъ вѣ́тровъ, но́, предвари́въ, мя Ты́ спаси́, Спа́се, и изба́ви отъ тли́, я́ко спа́слъ еси́ отъ звѣ́ря проро́ка.

Конда́къ, [гла́съ 8]:

Со святы́ми упоко́й, [Христе́, ду́ши ра́бъ Твои́хъ, идѣ́же нѣ́сть болѣ́знь, ни печа́ль, ни воздыха́ніе, но жи́знь безконе́чная].

Икосъ:

Са́мъ Еди́нъ еси́ Безсме́ртный, [сотвори́вый и созда́вый человѣ́ка: земнíи у́бо отъ земли́ созда́хомся и въ зе́млю ту́южде по́йдемъ, я́коже повелѣ́лъ еси́, созда́вый на́съ, и рекíй на́мъ: я́ко земля́ еси́ и въ зе́млю оты́деши, а́може вси́ человѣ́цы по́йдемъ, надгро́бное рыда́ніе творя́ще пѣ́снь: Аллилу́ія, Аллилу́ія, Аллилу́ія].

Пѣ́снь 7.

Ирмо́съ: Отроцы евре́йстіи въ пещи́ [попра́ша пла́мень дерзнове́нно и на ро́су о́гнь преложи́ша, вопію́ще: благослове́нъ еси́, Го́споди Бо́же, во вѣ́ки].

Ту́чами крове́й угаси́сте, пресла́вніи, пла́мень пре́лести; огня́ у́бо бу́дущаго на́съ моли́твами, я́же ко Христу́, изба́вите, Госпо́дни страстоте́рпцы.

Уста́ загради́вше льво́въ, му́къ же опале́нія претерпѣ́вше, страстоте́рпцы, сла́дость лу́чшую наслѣ́довасте, ея́же улучи́ти моли́теся и на́мъ во вѣ́ки.

Всѣ́мъ свѣ́томъ просвѣти́вшеся Ду́ха, до́бліи страстоте́рпцы, преста́вльшимся вѣ́рнымъ осла́бу проси́те, и рая́ вхо́дъ, и жи́зни прича́стіе.

Богоро́диченъ: Пѣ́снь приношу́ Ти́, Дѣ́во, не пре́зри мене́ злы́ми одержи́маго, но да́ждь, Чи́стая, исправле́ніе соверше́нное посто́мъ и всѣ́мъ житіе́мъ благонра́внымъ.

Иный.

Ирмо́съ: Пла́мень ороси́вый пе́щный [и о́троки неопали́мы спасы́й, благослове́нъ еси́ во вѣ́ки, Го́споди, Бо́же оте́цъ на́шихъ].

Огнь, и ме́чь, и звѣ́ри, страстоте́рпцы, я́ко сла́дость вмѣни́вше, внегда́ страда́ти удиви́сте убíйцы ва́ша, воспѣва́юще Бо́га оте́цъ на́шихъ.

На у́ды разсѣка́еми и опаля́еми, Бо́гу принесо́стеся же́ртва благово́нная, Христо́вы му́ченицы, но Того́ о на́съ при́сно моли́те.

Тро́иченъ: Въ Тро́ицѣ Еди́наго Бо́га сла́влю: Отца́, Сы́на и Ду́ха, — Еди́ницу про́стую, Тро́ицу честну́ю, нача́ло преднача́льное и единосу́щное.

Богоро́диченъ: Всесвята́я Влады́чице Богоро́дице, моли́твы рабо́въ Твои́хъ пріе́млющи, принеси́ всѣ́хъ Бо́гу, да спасе́тъ на́съ отъ вся́каго искуше́нія.

Сти́хъ: Святы́мъ, и́же су́ть на земли́ Его́, удиви́ Госпо́дь вся́ хотѣ́нія Своя́ въ ни́хъ.

Му́чениченъ: Му́чениковъ собо́ри, съ небесе́ предста́вше, ва́съ воспѣва́ющія благослови́те, освяти́те, усе́рдно посто́въ вре́мя сконча́ти.

Сти́хъ: Блаже́ни, я́же избра́лъ и прія́лъ еси́, Го́споди, [и па́мять и́хъ въ ро́дъ и ро́дъ].

Ме́ртвенъ: Вѣ́рою къ Тебѣ́ преста́вльшіяся, вѣ́дый дѣла́ человѣ́ковъ, во́льная и нево́льная прегрѣше́нія проща́я, упоко́й, я́ко Бо́гъ.

Ирмо́съ: Пла́мень ороси́вый пе́щный и о́троки неопали́мы спасы́й, благослове́нъ еси́ во вѣ́ки, Го́споди, Бо́же оте́цъ на́шихъ.

Пѣ́снь 8.

Ирмо́съ: Побѣди́тели мучи́теля [и пла́мене благода́тію Твое́ю бы́вше, за́повѣдемъ Твои́мъ зѣло́ прилежа́ще, о́троцы вопія́ху: благослови́те, вся́ дѣла́ Госпо́дня, Го́спода].

Му́къ ви́ды не́мощію тѣ́ла претерпѣ́вше, вра́чеве боля́щимъ, страстоте́рпцы, яви́стеся. Тѣ́мже зову́: мою́ неду́гующую ду́шу исцѣли́те во вре́мя поста́ покая́ніемъ.

Увы́ мнѣ́, ка́ко преидо́ша вси́ днíе мои́ въ лѣ́ности! И се́ коне́цъ приближа́ется, вари́тъ несоверше́нна до́брыми дѣ́лы прія́ти мя́, до́брѣ сконча́вшіи тече́ніе, му́ченицы, да ми́ коне́цъ благíй бу́детъ, моли́теся.

Ка́плями крове́й запале́нія безбо́жія угаси́сте, боже́ственніи страстоте́рпцы, и отше́дшимъ отъ сего́ житія́ испроси́те вои́стинну Боже́ственный поко́й и содѣ́янныхъ разрѣше́ніе во вѣ́ки.

Богоро́диченъ: Іезекíиль Тя́ две́рь непроходи́мую, Чи́стая, прови́дѣ, покая́нія врата́ всѣ́мъ отверза́ющую отча́яннымъ. Тѣ́мже молю́ Тя́: стези́ мнѣ́ отве́рзи ко о́нымъ веду́щія упокое́ніемъ.

Иный.

Ирмо́съ: Изъ Безнача́льнаго Отца́ [рожде́ннаго пре́жде вѣ́къ Бо́га и въ послѣ́дняя отъ Богоро́дицы въ пло́ть обле́кшася, я́ко соверше́нна Человѣ́ка и Бо́га и́стинна, по́йте, благослови́те и превозноси́те во вся́ вѣ́ки].

Многострада́льныя ра́ны разли́чно претерпѣ́вше, о́віи у́бо сгорѣ́вше, друзíи сожже́ни бы́вше, инíи же посѣка́еми, веселите́ся, страда́льцы, воспѣва́юще Христу́: по́йте, благослови́те и превозноси́те во вся́ вѣ́ки.

Кровьми́ ва́шими освяща́ете концы́, ма́лыми кропле́ньми, струи́ исцѣле́ній всѣ́мъ источа́юще, всехва́льніи му́ченицы. Тѣ́мже вопіете́ при́сно: по́йте, благослови́те и превозноси́те во вся́ вѣ́ки.

Благослови́мъ Отца́, и Сы́на, и Свята́го Ду́ха, Го́спода.

Тріѵпоста́сная Еди́нице, Отче, Сы́не и Ду́ше Живы́й, еди́но Божество́, еди́но Ца́рство, Тебе́ хва́лятъ незаходи́маго Свѣ́та а́нгельская во́инства, и мы́, су́щіи на земли́, пое́мъ, благослови́мъ и превозно́симъ во вся́ вѣ́ки.

Богоро́диченъ: Се́ вси́ ро́ди блажи́мъ Тя́, Пречи́стая, вели́чія Твоя́ зря́ще: Ты́ бо ражда́еши преесте́ственно всѣ́хъ Творца́, Бо́га су́ща и Человѣ́ка. Тѣ́мже Тя́ благослови́мъ и превозно́симъ во вся́ вѣ́ки.

Сти́хъ: Ди́венъ Бо́гъ во святы́хъ Свои́хъ, [Бо́гъ Изра́илевъ].

Страстоте́рпцевъ ли́че, моли́теся ко Спа́су спасти́ ны́, моли́твы и ны́нѣ творя́ще, служи́ти чи́стѣ воздержа́ніемъ Ему́: по́йте, благослови́те и превозноси́те во вся́ вѣ́ки.

Сти́хъ: Ду́ши и́хъ во благи́хъ водворя́тся.

Усо́пшія благоче́стно наде́ждею воскресе́нія, къ вѣ́чной жи́зни воста́ти, Го́споди, сподо́би, хвали́ти Тя́ чи́стѣ, и сла́вити псало́мски: по́йте, благослови́те и превозноси́те во вся́ вѣ́ки.

Хва́лимъ, благослови́мъ, покланя́емся Го́сподеви, [пою́ще и превознося́ще во вся́ вѣ́ки].

Ирмо́съ: Изъ Безнача́льнаго Отца́ рожде́ннаго пре́жде вѣ́къ Бо́га и въ послѣ́дняя отъ Богоро́дицы въ пло́ть обле́кшася, я́ко соверше́нна Человѣ́ка и Бо́га и́стинна, по́йте, благослови́те и превозноси́те во вся́ вѣ́ки.

Пѣ́снь 9.

Ирмо́съ: Уста́вы прешла́ еси́ [естества́, Содѣ́теля заче́нши и Го́спода, и две́рь спасе́нія мíрови была́ еси́, тѣ́мъ Тя́, Богоро́дице, непреста́нно велича́емъ].

Яви́стеся, боже́ственніи, я́ко у́гліе, вещество́ лука́вое безбо́жіе попали́вше, и мече́мъ бѣсо́вскія полки́ посѣ́кше, до́бліи страстоте́рпцы, свѣтово́дцы серде́цъ на́шихъ.

Тму́ муче́ній проидо́сте и къ свѣ́ту мы́сленному пресели́стеся, до́бліи страстоте́рпцы, тѣ́мже просвѣти́те смире́нную ду́шу мою́, омраче́нную согрѣше́ньми.

Поболѣ́ша, болѣ́зни пренося́ще, пресла́вніи страстоте́рпцы, тѣлесе́, и ны́нѣ преста́вльшимся вѣ́рнымъ неболѣ́зненный поко́й про́сятъ и рая́ наслажде́ніе.

Богоро́диченъ: Яви́ся, Чи́стая Влады́чице, Боже́ственная помо́щница непотре́бнымъ рабо́мъ Твои́мъ во вре́мя воздержа́нія, моли́твы на́ша принося́щи Го́сподеви, вѣ́ки ца́рствующему.

Иный.

Ирмо́съ: Тебе́, Безсме́ртный Исто́чникъ, [и святы́хъ исцѣле́нія человѣ́чу ро́ду подаю́ща, при́сно велича́емъ, я́ко спаса́еши ду́ши на́ша].

Якоже о́гнь вложе́ни бы́вше отъ Бо́га въ зе́млю, попали́сте вся́кую ле́сть и́дольскую, вже́гше свѣти́ло въ концы́ благоче́стія, страстоте́рпцы Христо́вы.

Ва́съ ни пла́мень, ни заколе́ніе, ни коле́са, ни стягну́тія, ни опале́нія, ни ина́я му́ка го́рькая разлучи́ отъ любве́ Христо́вы, страстоте́рпцы.

Тро́иченъ: Еди́но и Три́ воспѣва́ю благоче́стно Божество́ зра́комъ, Ли́цы совокупля́я и раздѣля́я: Оте́цъ, Сы́нъ и Святы́й Ду́хъ, Сія́ еди́но су́ть.

Богоро́диченъ: Тя́, отъ ко́рене Іессе́ова и Дави́да пра́отца прозя́бшій же́злъ, Всепречи́стая Чи́стая, велича́емъ, я́ко спаса́еши ду́ши на́ша.

Сти́хъ: Святы́мъ, и́же су́ть на земли́ Его́, [удиви́ Госпо́дь вся́ хотѣ́нія Своя́ въ ни́хъ].

Мно́жество му́ченикъ честно́е, Христа́ моли́те, въ ми́рѣ исполня́ющимъ на́мъ тече́ніе посто́въ, ви́дѣти и поклони́тися и страсте́мъ Его́.

Сти́хъ: Блаже́ни, я́же избра́лъ и прія́лъ еси́, Го́споди, [и па́мять и́хъ въ ро́дъ и ро́дъ].

Ме́ртвыхъ и живы́хъ, я́ко Бо́гъ, умертви́вый сме́рть, и жи́знь воста́ніемъ Твои́мъ всѣ́мъ подая́й, Христе́, упоко́й и рабы́ Твоя́, я́же преста́вилъ еси́.

Ирмо́съ: Тебе́, Безсме́ртный Исто́чникъ, и святы́хъ исцѣле́нія человѣ́чу ро́ду подаю́ща, при́сно велича́емъ, я́ко спаса́еши ду́ши на́ша.

Ексапостила́рій:

Не́бо звѣзда́ми украси́вый, я́ко Бо́гъ, и Твои́ми святы́ми всю́ зе́млю просвѣти́вый, Содѣ́телю всѣ́хъ, пою́щія Тя́ спаса́й.

Сла́ва:

Живы́ми и ме́ртвыми облада́яй, я́ко Богъ, упоко́й Твоя́ рабы́ въ селе́ніихъ избра́нныхъ, а́ще бо и согрѣши́ша, Спа́се, но не отступи́ша отъ Тебе́.

И ны́нѣ, [богоро́диченъ]:

Сла́дость а́нгеловъ, скорбя́щихъ ра́дость, христіа́нъ предста́тельнице, Дѣ́во, Ма́ти Госпо́дня, заступи́ на́съ и изба́ви вѣ́чныхъ му́къ.

На хвали́техъ му́ченичны гла́са. Сла́ва, самогла́сенъ за упоко́й. И ны́нѣ, богоро́диченъ.

На стихо́внѣ ме́ртвены стихи́ры господи́на Ѳеофа́на, прилучи́вшагося гла́са. Сла́ва, и ны́нѣ, богоро́диченъ.



НА ЛИТУРГІИ,

Блаже́нны гла́са, на 6. По вхо́дѣ тропари́: Апо́столи, му́ченицы... Помяни́ Го́споди... Сла́ва: Со святы́ми упоко́й... И ны́нѣ: Тебе́ и стѣ́ну... Проки́менъ [гла́съ 8]: Весели́теся о Го́сподѣ [и ра́дуйтеся, пра́ведніи]. Сти́хъ: Блаже́ни, и́хже оста́вишася беззако́нія [и и́хже прикры́шася грѣси́]. Другíй, [гла́съ 6]: Ду́ши и́хъ во благи́хъ водворя́тся. Апо́столъ дне́, [ко Евре́емъ], зача́ло 309. И ме́ртвенъ, къ Солу́няномъ зача́ло 270. Аллилу́ія, [гла́съ 4]: Воззва́ша пра́ведніи [и Госпо́дь услы́ша и́хъ, и отъ всѣ́хъ скорбе́й и́хъ изба́ви и́хъ. Сти́хъ: Мно́ги ско́рби пра́веднымъ и отъ всѣ́хъ и́хъ изба́витъ я́ Госпо́дь]: Сти́хъ: Блаже́ни, я́же избра́лъ [и прія́лъ еси́, Го́споди, и па́мять и́хъ въ ро́дъ и ро́дъ]. Ева́нгеліе отъ Ма́рка, зача́ло 6. И отъ Іоа́нна, зача́ло 16. Прича́стенъ: Ра́дуйтеся пра́ведніи о Го́сподѣ, [пра́вымъ подоба́етъ похвала́]. Другíй: Блаже́ни, я́же избра́лъ и прія́лъ еси́, Го́споди, [и па́мять и́хъ въ ро́дъ и ро́дъ].

[Зри́:] Си́це у́бо быва́етъ слу́жба за упоко́й въ три́ суббо́ты свята́го и Вели́каго поста́, егда́ ни еди́нъ е́сть пра́здникъ отъ тріе́хъ: Предте́чевъ, святы́хъ Четы́редесяти му́чениковъ или́ Благовѣ́щенія.

Источникъ: Тріо́діонъ, сíесть трипѣ́снецъ. — Кíевъ: Въ тѵпогра́фіи Кíево-Пече́рской Успе́нской Ла́вры, 1864. — Л. 153 об. – 157 об.

/ Къ оглавленію раздѣла /


Наверхъ / Къ титульной страницѣ

0