Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - суббота, 18 ноября 2017 г. Сейчасъ на порталѣ посѣтителей - 25.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

ТРІОДІОНЪ, СІЕСТЬ ТРИПѢСНЕЦЪ,
Съ Бо́гомъ Святы́мъ, обдержа́й подоба́ющее ему́ послѣ́дованіе.

Слу́жба въ сре́ду сы́рныя седми́цы.

ВО ВТОРНИКЪ ВЕЧЕРА,
Отъ нача́ла вече́рни начина́емъ покло́ны. На Го́споди воззва́хъ... стихи́ры, я́ко обы́чно.

На стихо́внѣ самогла́сенъ, гла́съ 1:

Сти́хъ: Къ Тебѣ́ возведо́хъ о́чи мои́...

И па́ки ту́же стихи́ру.

Сти́хъ: Поми́луй на́съ, Го́споди, поми́луй на́съ...

Му́чениченъ: О, до́брыя ку́пли ва́шея, святíи! Яко кро́ви да́сте и небеса́ наслѣ́довасте и, вре́менно искуси́вшеся, вѣ́чно ра́дуетеся. Вои́стинну до́брая ва́ша ку́пля: тлѣ́нная бо оста́вльше, нетлѣ́нная воспрія́сте, и, со а́нгелы лику́юще, пое́те непреста́нно Тро́ицу Единосу́щную.

Сла́ва, и ны́нѣ, крестобогоро́диченъ. Подо́бенъ: Прехва́льніи му́ченицы.

Дѣ́ва Нескве́рная, иногда́ на дре́вѣ ви́дѣвши, Его́же роди́ изъ безсѣ́менныя утро́бы, не терпя́щи утро́бнаго уязвле́нія, власы́ терза́ющи, глаго́лаше: ма́ніемъ Содержа́й тва́рь всю́, ка́ко, я́ко осужде́нный, на Кре́стъ вознесе́нъ еси́, вся́ко хотя́й спасти́ человѣ́чество?

Ны́нѣ отпуща́еши... По трисвято́мъ, тропа́рь: Богоро́дице Дѣ́во, ра́дуйся... Покло́нъ 1. Сла́ва: Крести́телю Христо́въ... Покло́нъ 1. И ны́нѣ: Моли́те за ны́... Покло́нъ 1. Подъ Твое́ благоутро́біе прибѣга́емъ, Богоро́дице.., безъ покло́на. Го́споди, поми́луй, 40. Сла́ва, и ны́нѣ. Честнѣ́йшую херуви́мъ... Именемъ Госпо́днимъ благослови́, о́тче. Іере́й: Сы́й благослове́нъ Христо́съ Бо́гъ на́шъ... И мы́ глаго́лемъ моли́тву: Небе́сный Царю́... И покло́ны три́ вели́кія, съ моли́твою свята́го Ефре́ма: Го́споди и Влады́ко живота́ моего́... и про́чихъ, 12. Па́ки сконча́вше покло́ны, глаго́лемъ моли́тву вышепи́санную: Го́споди и Влады́ко живота́ моего́... и покло́нъ еди́нъ вели́кій. Трисвято́е. [И] по Отче на́шъ... Го́споди, поми́луй, 12. Сла́ва, и ны́нѣ. Го́споди, поми́луй, три́жды. Благослови́. И отпу́стъ.

Повече́ріе пое́мъ вели́кое съ покло́ны. По Досто́йно е́сть.., тропари́ дневны́я и хра́му. И отпу́стъ ме́ньшій. Та́кожде и проти́ву пятка́ твори́мъ.

Въ сре́ду сы́рную Полу́нощница, съ покло́ны ея́.


НА УТРЕНИ,
Пое́мъ Аллилу́ія.., въ настоя́щій гла́съ окто́иха, и тро́ичны гла́са, и обы́чныя каѳи́смы двѣ́.

[Зри́:] Яко въ сре́ду и въ пято́къ седми́цы сы́рныя недѣ́ли пое́мъ Аллилу́ія... Сотворя́емъ и покло́ны ве́черъ и у́тро, я́коже вы́ше рече́ся. И по́стъ соверша́емъ по чи́ну, а́ще и ко́его-ли́бо прилучи́тся свята́го, и тропа́рь имѣ́яй бу́детъ. Междоча́сія же не пое́мъ.

Аще же пра́здникъ Срѣ́тенія Госпо́дня или́ хра́мъ ко́его свята́го, пое́мъ тропа́рь и покло́новъ не твори́мъ, то́чію по три́ покло́ны вели́кихъ.

По 1-мъ стихосло́віи сѣда́льны осмогла́сника кре́стны.

По 2-мъ же стихосло́віи сѣда́ленъ тріо́ди, гла́съ 2. Подо́бенъ: Благоутро́бія су́щи.

Съ ми́ромъ прейти́ на́мъ, смире́ннымъ, предочище́ніе благоволи́ посто́въ, неизрече́ннымъ человѣколю́біемъ Твои́мъ, Христе́ Бо́же, низложи́ вра́жія кова́рствія, и Кресто́мъ Твои́мъ вся́ спаси́, Еди́не свѣ́дый серде́чная.

Сла́ва, то́йже. И ны́нѣ, крестобогоро́диченъ. Подо́бенъ:

Предстоя́щи Кресту́ Твоему́, безсѣ́менно Ро́ждшая Тя́, и не терпя́щи зрѣ́ти непра́ведно стра́ждуща, рыда́ше съ пла́чемъ и вопія́ше Ти́: ка́ко стра́ждеши, естество́мъ безстра́стный, сладча́йшій Сы́не? Пою́ Твою́ кра́йнюю благосты́ню.

Здѣ́ чте́мъ сло́во о постѣ́, вели́каго Васи́лія, его́же нача́ло: Утѣша́йте, утѣша́йте... И псало́мъ 50-й.


Кано́нъ во окто́ихѣ Кресту́, со ирмосо́мъ на 6, и въ мине́и свята́го, на 4, и въ тріо́ди, на 4. Въ ко́ихъ же пѣ́снехъ приспѣ́етъ трипѣ́снецъ, и пое́мъ кано́нъ тріо́ди, со ирмосо́мъ на 6, и трипѣ́снецъ, на 8. И послѣди́ ирмо́съ трипѣ́снца. Въ си́хъ же пѣ́снехъ оставля́ется кано́нъ окто́иха и мине́и. И пое́мъ мине́и въ вы́шнихъ пѣ́снехъ си́це: 1-я пѣ́снь кано́на окто́иха, со ирмосо́мъ на 4, и въ мине́и свята́го 1-ю и 3-ю пѣ́снь, на 6, и въ тріо́ди, на 4. Подо́бнѣ пое́мъ осму́ю съ шесто́ю и девя́тую съ седмо́ю пѣ́сньми.

Кано́нъ тріо́ди, гла́съ 4. Творе́ніе господи́на Андре́я Кри́тскаго.
Пѣ́снь 1.

Ирмо́съ: Воспою́ Тебѣ́, Го́споди Бо́же мо́й, я́ко изве́лъ еси́ лю́ди изъ рабо́ты еги́петскія, покры́лъ же еси́ колесни́цы фарао́новы и си́лу.

Постя́ся Госпо́дь человѣ́чески, ко изображе́нію на́шему, побѣжда́етъ искуси́теля, показу́я на́ше и предѣ́лы подпису́я на́мъ.

Моисе́й боже́ственый въ Сина́и воздержа́ніемъ Бо́гу лице́мъ къ Лицу́ глаго́лати сподо́бися, тому́, вѣ́рніи, поревну́имъ.

Очи́сти, Го́споди, лю́ди Твоя́ и призрѣ́въ, я́ко Бо́гъ, ми́лостивымъ о́комъ, посѣти́ всѣ́хъ мно́жествомъ ми́лости Твоея́.

Богоро́диченъ: Къ Тебѣ́ вси́ притека́емъ, Богоро́дице, я́ко побо́рницѣ тве́рдѣй, на моли́тву дви́жуще Тя́, изба́вити ста́до Твое́ отъ вся́каго обстоя́нія.

Пѣ́снь 3.

Ирмо́съ: Въ Го́сподѣ Бо́зѣ мое́мъ се́рдце мое́ утверди́ся, тѣ́мъ немощству́ющіи препоя́сашася си́лою.

Чу́дный Ено́хъ воздержа́ніемъ преложи́ся отъ земли́, тому́ образоревну́юще преложи́мся отъ тли́ къ животу́.

Моли́твами и поще́ньми Изба́вителя умо́лимъ, сра́дуется бо Созда́тель покая́нію созда́ній Свои́хъ.

Гото́вися, о душе́, и предочи́стися пре́жде стра́сти Христо́вы, да воскресе́ніемъ духо́вно спра́зднуеши Ему́.

Богоро́диченъ: Яко ро́ждшая Бо́га, о на́съ непреста́нно моли́ся, къ Тебѣ́ бо, Богоро́дице, грѣ́шніи прибѣга́емъ.

Та́же трипѣ́снецъ Іо́сифа. Гла́съ 2.
Пѣ́снь 3.

Ирмо́съ: На ка́мени мя́ вѣ́ры [утверди́въ, разшири́лъ еси́ уста́ моя́ на враги́ моя́, возвесели́бося ду́хъ мо́й, внегда́ пѣ́ти: нѣ́сть свя́тъ, я́коже Бо́гъ на́шъ, и нѣ́сть пра́веденъ, па́че Тебе́, Го́споди].

Просте́рлъ еси́ дла́ни на Крестѣ́ Твое́мъ, умертви́лъ еси́ умерщвле́ніемъ Твои́мъ кля́тву, оживи́лъ еси́ стра́стію Твое́ю человѣ́ки. Тѣ́мже пое́мъ Твое́ Боже́ственное распя́тіе, Іису́се Человѣколю́бче, Бо́же на́шъ.

Снѣ́дію дре́ва умертви́вшеся, дре́вомъ ожи́хомъ Креста́ Твоего́. Того́ у́бо прино́симъ Тебѣ́ въ моли́тву, благода́ть и ми́лость на́мъ низпосли́, Благодѣ́телю Влады́ко Многоми́лостиве.

Преддве́рія отверзо́шася поще́нія, по́прище приближа́ется воздержа́нія, горя́щимъ усе́рдіемъ воста́немъ, пріе́млюще да́ръ богода́нный, утоля́ющій зно́й прегрѣше́ній.

Вре́мя блаже́нное поста́, лучи́ испуща́ющее покая́нія возсія́, присту́пимъ любоче́стно, отгоня́юще тму́ глубоча́йшую лѣ́ности, вси́ веселя́щеся.

По́стъ освяти́мъ любому́дренно, проповѣ́даимъ воздержа́ніе страсте́й, возопіи́мъ во слеза́хъ Влады́цѣ: да́ждь на́мъ, Го́споди, благода́ть, содѣ́йствующую въ Твоя́ хотѣ́нія, Многоми́лостиве.

Пріи́мше дарова́нія поста́, просла́вимъ Да́вшаго во спасе́ніе, и сіе́ содѣ́лаимъ трудолю́бно, да оставле́ніе согрѣше́ній на́шихъ отъ руки́ воспріи́мемъ Сотво́ршаго.

Богоро́диченъ: Утоли́ смуще́ніе страсте́й мои́хъ, исцѣли́ я́звы души́ моея́, воздви́гни мя́ отъ сна́ уны́нія хода́тайствомъ Твои́мъ и предста́тельствомъ, Пресвята́я Влады́чице, Ма́ти Дѣ́во.

Иный, гла́съ то́йже:

Ирмо́съ: Непло́дствовавшій мо́й у́мъ [плодоно́сенъ, Бо́же, покажи́ ми, Дѣ́лателю до́брыхъ, Насади́телю благи́хъ, благоутро́біемъ Твои́мъ].

Возне́сшуся Ти́, Спа́се, во́лею на Кре́стъ, вся́ тва́рь земна́я подви́жеся, и раздра́ся хра́мная завѣ́са.

Уязви́лся еси́ на Крестѣ́, Іису́се мо́й, мене́ ра́ди, и прободе́нъ въ ре́бра, Бла́же, отню́дуже вѣ́рою покланя́юся Боже́ственнѣй держа́вѣ Твое́й.

Сла́ва, тро́иченъ: Прекло́нь колѣ́на на зе́млю, Отцу́ покланя́юся, Сы́на сла́влю, и Ду́ха воспѣва́ю, единово́льное нача́ло и Тріѵпоста́сное.

Богоро́диченъ: Непостижи́мо е́сть та́инство, Чи́стая, Твоего́ рожде́нія: ражда́еши бо, Марíе, неискусому́жно Бо́га и пребыва́еши нетлѣ́нна.

Сла́ва Тебѣ́, Бо́же на́шъ, сла́ва Тебѣ́.

По́стное вре́мя си́лою Твое́ю, Христе́, освяти́въ, спаси́ вся́ ны́ сѣте́й вра́жіихъ, покланя́ющіяся Тебѣ́.

Ирмо́съ: Непло́дствовавшій мо́й у́мъ плодоно́сенъ, Бо́же, покажи́ ми, Дѣ́лателю до́брыхъ, Насади́телю благи́хъ, благоутро́біемъ Твои́мъ.

Сѣда́ленъ мине́и свято́му. Сла́ва, и ны́нѣ, крестобогоро́диченъ.

Пѣ́снь 4.

Ирмо́съ: Услы́шахъ слу́хъ Тво́й и убоя́хся, разумѣ́хъ дѣла́ Твоя́ и ужасо́хся, Го́споди.

Авраа́мъ добродѣ́телію и страннолю́біемъ Тро́ицу прія́тъ, а́нгельски прише́дшую.

Бога́тство некра́домое воздержа́нія е́сть да́ръ, и си́мъ обогати́выйся, обогати́тся Божество́мъ.

Сла́ва: Пріиди́те, воспла́чимъ вку́пѣ сло́вомъ, вѣ́рою вопію́ще: Бо́же, очи́сти ны́, мно́го согрѣ́шшія.

Богоро́диченъ: Ма́ти Непоро́чная, Благослове́нная, Чи́стая Дѣ́во, Сы́ну Твоему́ и Бо́гу на́шему о мíрѣ моли́ся.

Пѣ́снь 5.

Ирмо́съ: Возсія́вый свѣ́тъ, и просвѣти́вый у́тро, и показа́вый де́нь, сла́ва Тебѣ́, сла́ва Тебѣ́, Іису́се Сы́не Бо́жій.

Пости́вся дре́вле Моисе́й въ горѣ́ Сина́йстѣй, богови́децъ яви́ся, и Илія́ на о́гненнѣй колесни́цѣ возноша́шеся.

Поще́ніемъ иногда́ му́дрый Иса́ія у́гля о́наго клеще́ю вкуша́етъ, егда́ ко устна́мъ его́ прикосну́ся.

Сла́ва: Пости́вся пре́жде Даніи́лъ и тріе́ о́троцы вку́пѣ, че́люсти льво́въ сокруши́вше, горя́щій пла́мень попра́ша.

Богоро́диченъ: Богороди́тельнице Чи́стая, Бо́га во чре́вѣ Твое́мъ носи́вшая нетлѣ́нно, сохрани́ ста́до Твое́ и соблюди́ невреди́мо.

Пѣ́снь 6.

Ирмо́съ: Якоже проро́ка Іо́ну отъ ки́та изба́вилъ еси́, Христе́ Бо́же, и мене́ изъ глубины́ прегрѣше́ній возведи́ и спаси́ мя, еди́не Человѣколю́бче.

Іо́ну въ ки́тѣ честно́е спасе́ поще́ніе иногда́: пости́мся у́бо отъ се́рдца и убѣжи́мъ о́наго въ гее́ннѣ тлѣ́нія.

Ниневи́тяне же па́ки гнѣ́въ Бо́жій претвори́ша те́плымъ покая́ніемъ и любо́вію: тѣ́мъ ны́нѣ любе́зно вси́ поревну́имъ.

Сла́ва: Настоя́щій по́стъ созыва́етъ на́съ на покая́ніе, притеце́мъ у́бо съ любо́вію и уразумѣ́имъ, что́ е́сть да́ръ воздержа́нія.

Богоро́диченъ: Несказа́нно ро́ждшая Спа́са мíру, Христа́ Бо́га на́шего, Того́ моля́щи не преста́й, ро́дъ ве́сь спасти́ воспѣва́ющихъ Тя́.

Конда́къ свята́го. Аще святы́й не и́мать кондака́, глаго́лемъ му́чениченъ гла́са, и́же и сѣда́ленъ.

Пѣ́снь 7.

Ирмо́съ: Оте́цъ на́шихъ Бо́же, не посрами́ на́съ, но да́руй на́мъ со дерзнове́ніемъ вопи́ти Тебѣ́: благослове́нъ еси́, Бо́же оте́цъ на́шихъ.

Бу́демъ и мы́, я́ко Даніи́лъ о́ный, львы́ иногда́ посто́мъ укроти́вый въ ро́вѣ рыка́ющія.

Юношамъ тре́мъ поревну́имъ со стра́хомъ, да убѣ́гнемъ огня́ гее́нскаго, я́коже сíи вавило́нскія пе́щи.

Сла́ва: Пости́мся и мы́ чи́стымъ се́рдцемъ, и очи́стимъ тѣ́ло, и ве́сь вся́ко ду́хъ Бо́гу посвяти́мъ.

Богоро́диченъ: Дѣ́во Ма́ти Чи́стая, изъ Тебе́ воплоще́ннаго Превѣ́чнаго Сло́ва моля́щи не преста́й спасти́ся душа́мъ на́шимъ.

Пѣ́снь 8.

Ирмо́съ: Царя́ Христа́, Его́же исповѣ́даша плѣне́нніи о́троцы, въ пещи́ глаго́люще ве́ліимъ гла́сомъ: вся́ дѣла́, по́йте Го́спода.

Пости́вся пре́жде Іо́сифъ, смѣше́нія избѣже́ беззако́нныя жены́ и ца́рство улучи́. Тѣ́мже и мы́ угаси́мъ поще́ніемъ разжже́нныя стрѣ́лы врага́ веліа́ра.

Поще́ніемъ Дави́дъ побѣ́ду поста́ви на иноплеме́нника и ца́рство обрѣ́те. Тѣ́мже и мы́ пріи́мемъ воздержа́ніемъ побѣ́ду на враги́ и во Го́сподѣ вѣнча́ни бу́демъ.

Сохрани́мъ и мы́ добродѣ́тели и́хъ: Іовлево му́жество, Іа́ковле незло́біе, вѣ́ру Авраа́мову, цѣлому́дріе Іо́сифово и Дави́дову до́блесть.

Богоро́диченъ: Царя́ Христа́, Его́же роди́ на́мъ Дѣ́ва Марíя, и по Рождествѣ́ пребы́сть Дѣ́ва Чи́стая, вся́ дѣла́ Госпо́дня, Го́спода по́йте и превозноси́те Его́ во вѣ́ки.

Та́же трипѣ́снецъ и́ный.

Ирмо́съ: Въ пе́щь о́гненную [ко отроко́мъ евре́йскимъ снизше́дшаго и пла́мень въ ро́су прело́жшаго Бо́га, по́йте дѣла́, я́ко Го́спода, и превозноси́те во вся́ вѣ́ки].

Крестоявле́нно Моисе́й дла́ни возводя́ на горѣ́, враги́ побѣжда́ше. Ты́ же, Спа́се, на Крестѣ́ ру́цѣ просте́ръ, умертви́лъ еси́ всепа́губное а́да мучи́тельство.

Гвоздьми́ прибіе́нъ на Крестѣ́ и въ ре́бра прободе́нъ, Христе́ Спа́се мо́й, кля́твы изба́вилъ еси́ земноро́дныя и ра́дости несконча́емыя о́бщники показа́лъ еси́. Тѣ́мже благослови́мъ человѣколю́біе Твое́.

Воздержа́нія вре́мя возсія́вшее мы́сленно просвѣща́етъ душе́вная чу́вства и страсте́й мглу́ отго́нитъ. Тѣ́мже лобыза́имъ сіе́ отъ се́рдца, превознося́ще во вѣ́ки.

Стра́сти всегуби́тельныя душе́вныя, сла́сти смертоно́сныя по́стъ умерщвля́етъ, и и́стинно въ постоя́ніи твори́тъ се́рдца устремле́нія и движе́нія. Се́й у́бо вѣ́рою воспріи́мемъ любе́зно.

Не поста́ нача́ло настоя́щій святы́й де́нь, вѣ́рніи, вѣ́дуще, се́й чи́стымъ помышле́ніемъ почти́мъ, но вхо́дъ, глаго́люще, и прише́ствіе къ преддве́рію по́стному.

Предпріе́млетъ де́сно боголюбе́зную ду́шу предпу́тіями добрѣ́йшій по́стъ, предочисти́тельныхъ по́честей преподо́бный, степе́ньми и лѣ́ствицею, къ се́й прило́жься ны́нѣшній де́нь.

Богоро́диченъ: Отве́рзи толку́щимъ на́мъ и ми́лость Твою́ призыва́ющимъ, ско́рое человѣ́ковъ Прибѣ́жище, и тве́рдая во всѣ́хъ Дѣ́во Помо́щнице, и су́щимъ въ ну́ждахъ извѣ́стная Засту́пнице.

Иный.

Ирмо́съ: Въ купинѣ́ Моисе́ю [Дѣ́вы чу́до на Сина́йстѣй горѣ́ Прообрази́вшаго иногда́, по́йте, благослови́те и превозноси́те во вся́ вѣ́ки].

Вознесы́йся на Кре́стъ, всѣ́хъ Влады́ко, Ада́ма со Евою па́ки воззва́лъ еси́, и въ ра́й, Христе́ Спа́се, вве́лъ еси́, Тя́ воспѣва́ющія во вся́ вѣ́ки.

Тебѣ́ возне́сшуся, Христе́, на Кре́стъ во́лею, лучи́ со́лнечныя стра́хомъ помрачи́шася, и за́йде де́нь. Отону́дуже Тя́ разбо́йникъ Бо́га исповѣ́да во вся́ вѣ́ки.

Благослови́мъ Отца́, и Сы́на, и Свята́го Ду́ха, Го́спода.

Тро́иченъ: Ра́вна Отцу́ Сы́на и Свята́го Ду́ха, вѣ́ровахомъ бы́ти Святу́ю Тро́ицу въ Божествѣ́ Еди́номъ. Ейже вѣ́рою покланя́емся, Аріево уче́ніе при́сно попира́юще.

Богоро́диченъ: Ка́ко Тя́ воспою́, я́коже подоба́етъ, Богоро́дице Дѣ́во, смра́дными грѣха́ми а́зъ ны́нѣ помраче́нный? Но у́бо, Пресвята́я, прости́ мое́ дерзнове́ніе убо́гаго моего́ пѣ́нія.

Сла́ва Тебѣ́, Бо́же на́шъ, сла́ва Тебѣ́.

Кре́сте, вѣ́рныхъ упова́ніе, царе́й ору́жіе, свяще́нниковъ сла́во, мона́шествующихъ крѣ́посте, твое́ю си́лою вся́ тя́ славосло́вящія спаса́й во вѣ́ки.

Хва́лимъ, благослови́мъ, покланя́емся Го́сподеви...

Ирмо́съ: Въ купинѣ́ Моисе́ю Дѣ́вы чу́до на Сина́йстѣй горѣ́ Прообрази́вшаго иногда́, по́йте, благослови́те и превозноси́те во вся́ вѣ́ки.

И стихосло́вится Честнѣ́йшая...

Пѣ́снь 9.

Ирмо́съ: Велича́емъ вси́ человѣко́любіе Твое́, Христе́, Спа́се на́шъ, Сла́во ра́бъ Твои́хъ и Вѣ́нче вѣ́рныхъ, возвели́чивый па́мять Ро́ждшія Тя́.

Моисе́й во Еги́птѣ мо́ре раздѣли́, и лю́ди проведе́, и сія́ препита́ въ пусты́ни непрохо́днѣй, посто́мъ творя́ чудеса́.

Іису́съ Нави́нъ воздержа́ніемъ лю́ди освяти́ и наслѣ́дствова зе́млю обѣтова́нную, Іорда́нъ преше́дъ пре́жде.

Гедео́нъ о́ный, то́кмо съ треми́ сты́ муже́й хлепта́вшими, побѣжда́етъ иноплеме́нники воздержа́ніемъ и моли́твою. Тому́, ревну́юще, и мы́ уподо́бимся.

Богоро́диченъ: Ра́дуйся, Всечестна́я, Чи́стая, дѣ́вства похвало́, а́нгеловъ утвержде́ніе, человѣ́ковъ помо́щнице, мíра ра́досте, Марíе, и Ма́ти, и Рабо́ Бо́га на́шего.

Та́же трипѣ́снецъ.

Ирмо́съ: Отъ Бо́га Бо́га Сло́ва, [неизрече́нною му́дростію прише́дшаго обнови́ти Ада́ма, я́дію въ тлѣ́ніе па́дшаго лю́тѣ, отъ Святы́я Дѣ́вы неизрече́нно воплоти́вшагося на́съ ра́ди, вѣ́рніи, единому́дренно пѣ́сньми велича́емъ].

На Крестѣ́ просте́ръ Боже́ственныя дла́ни, совокупи́лъ еси́ пре́жде расточе́нныя, Изба́вителю, и Отцу́ осужде́нное, хода́тайствомъ, я́ко да́ръ, прине́слъ еси́ существо́ человѣ́ковъ. Сего́ ра́ди пое́мъ пречи́стое Твое́ распя́тіе.

Свята́го поста́ возсія́вшая благода́ть, лучи́ испуща́етъ на́мъ предочища́ющія, па́ки тече́ніе помышле́ній и зѣ́ницы тму́ отгоня́ющія, вѣ́рніи, сего́ ра́ди усе́рдно се́й воспріи́мемъ.

Свѣтоно́сное поще́ніе, дарова́ній Боже́ственныхъ ча́шу поче́рпшее на́мъ, дне́сь всѣ́мъ предъявля́етъ. Хотя́щіи сея́ причасти́тися на по́льзу души́, всѣ́хъ Влады́цѣ, содѣ́йствовати на́мъ помо́лимся.

Гвоздьми́ Боже́ственныхъ Твои́хъ ру́къ пригвозди́лъ еси́, Ще́дре, на́ша грѣхи́ на Крестѣ́; копіе́мъ же ре́бръ Твои́хъ растерза́лъ еси́ лука́вое писа́ніе согрѣше́ній и паде́ній лю́тыхъ. Сего́ ра́ди пое́мъ пречи́стое Твое́ распя́тіе.

Добродѣ́телей добрѣ́йшая отверза́ется стезя́, по́прище боже́ственныхъ поще́ній, сіе́ всѣ́мъ благоукраша́ется, подвиза́тися зако́нно хотя́щіи, проси́те Христа́ ми́рное отъ высоты́ вре́мя на́мъ дарова́ти.

Богоро́диченъ: Скорѣ́йшею моли́твою, бо́дрымъ Твои́мъ покро́вомъ, держа́вною Твое́ю, Влады́чице Чи́стая, по́мощію, ны́нѣ соблюди́ вѣ́рныя Твоя́ рабы́ отъ вся́каго сопроти́внаго прило́га, и страсте́й, и прегрѣше́ній, и напа́стей спаси́.

Иный.

Ирмо́съ: Преесте́ственно пло́тію [заче́ншую во чре́вѣ, отъ Отца́ безлѣ́тно предвозсія́вшее Сло́во, въ пѣ́снехъ немо́лчныхъ велича́емъ, вѣ́рніи].

На дре́вѣ кре́стнѣмъ во́лею пригво́ждься, всѣ́хъ на́съ свободи́лъ еси́ кля́твы зако́нныя, тѣ́мъ Тя́ по до́лгу велича́емъ, Христе́.

Вси́ покланя́емся страсте́мъ Твои́мъ, Спа́се, я́же во́лею воспрія́лъ еси́, да свободи́ши ро́дъ человѣ́ческій рабо́ты вра́жія.

Тро́иченъ: Присносу́щно Оте́цъ и нетлѣ́нно Сы́на роди́, и Ду́хъ е́сть единосу́щенъ Отцу́ же и Сы́нови, Нераздѣ́льная Тро́ица.

Богоро́диченъ: Да́ти проще́нія прегрѣше́ній, Марíе Преблагослове́нная, отъ Тебе́ вопло́щшагося моли́ Спа́са, на́мъ грѣ́шнымъ.

Сла́ва Тебѣ́, Бо́же на́шъ, сла́ва Тебѣ́.

Лобыза́ющія тя́, си́лою твое́ю, Кре́сте, по́стное вре́мя прейти́ въ ми́рѣ сподо́би и изба́ви рабо́ты вра́жія.

Ирмо́съ: Преесте́ственно пло́тію заче́ншую во чре́вѣ, отъ Отца́ безлѣ́тно предвозсія́вшее Сло́во, въ пѣ́снехъ немо́лчныхъ велича́емъ, вѣ́рніи.

Свѣти́ленъ во окто́ихѣ гла́са, тро́иченъ, три́жды.

На стихо́внѣ самогла́сенъ дне́, гла́съ 1:

Отъ бра́шенъ постя́щися, душе́ моя́, и страсте́й не очи́стившися, всу́е ра́дуешися неяде́ніемъ: а́ще бо не вина́ ти бу́детъ ко исправле́нію, я́ко ло́жная возненави́дѣна бу́деши отъ Бо́га, и злы́мъ де́мономъ уподо́бишися, николи́же яду́щимъ. Да не у́бо согрѣша́ющи, по́стъ непотре́бенъ сотвори́ши, но непоколеби́ма къ стремле́ніемъ безмѣ́стнымъ пребыва́й, мня́щи предстоя́ти распя́тому Спа́су, па́че же сраспя́тися тебе́ ра́ди Распе́ншемуся, вопію́щи къ Нему́: помяни́ мя́, Го́споди, егда́ пріи́деши во Ца́рствіи Твое́мъ.

Глаго́лемъ се́й два́жды.

Та́же му́чениченъ: Ва́съ, прехва́льніи му́ченицы, ни ско́рбь, ни тѣснота́, ни гла́дъ, ни гоне́ніе, ни бѣда́, ни я́рость звѣре́й, ни ме́чь, ниже́ о́гнь претя́й разлучи́ти отъ Бо́га возмого́ша. Любо́вію же па́че къ Нему́, я́ко въ чужди́хъ подви́гшеся тѣлесѣ́хъ, естество́ забы́сте, сме́рть презрѣ́вше, тѣ́мже и по достоя́нію болѣ́зней ва́шихъ мзду́ прія́сте, небе́снаго Ца́рствія наслѣ́дницы бы́сте. Моли́теся о душа́хъ на́шихъ.

Сла́ва, и ны́нѣ, крестобогоро́диченъ. Подо́бенъ: Небе́сныхъ чино́въ.

Вознесе́нна я́ко ви́дѣ на Крестѣ́ Агнца, Непоро́чная Дѣ́ва, пла́чущи, вопія́ше: Сладча́йшее Мое́ Ча́до! Что́ но́вое и пресла́вное видѣ́ніе? Ка́ко Держа́й вся́ дла́нію, на дре́вѣ пригвозди́лся еси́ пло́тію?

Та́же: Бла́го е́сть... Трисвято́е. И [по] Отче на́шъ... И тропа́рь: Въ хра́мѣ стоя́ще сла́вы Твоея́... Го́споди, поми́луй, 40. Сла́ва, и ны́нѣ. Честнѣ́йшую херуви́мъ... Именемъ Госпо́днимъ благослови́, о́тче. Іере́й: Сы́й благослове́нъ Христо́съ Бо́гъ на́шъ, всегда́, ны́нѣ и при́сно, и во вѣ́ки вѣко́въ, ами́нь. Та́же: Небе́сный Царю́... И твори́мъ 3 покло́ны вели́кія съ моли́твою свята́го Ефре́ма: Го́споди и Влады́ко живота́ моего́... И про́чихъ покло́новъ 12, излегка́, утомле́нія ра́ди, глаго́люще себѣ́ вта́й на кíйждо покло́нъ: Бо́же, очи́сти мя́, грѣ́шнаго. И па́ки, сконча́вше покло́ны, глаго́лемъ моли́тву всю́ вышепи́санную: Го́споди и Влады́ко живота́ моего́... И покло́нъ еди́нъ вели́кій. Присовокупля́емъ же и 1-й ча́съ. Начина́етъ игу́менъ, или́ екклисіа́рхъ, или́ предстоя́щій мона́хъ: Пріиди́те, поклони́мся.., три́жды. Покло́ны 3, и ча́съ 1-й. Въ о́ньже чте́мъ и оглаше́нія Студи́това. На 1-мъ часѣ́: Тропа́рь: Зау́тра услы́ши гла́съ мо́й.., ско́ро, безъ пѣ́нія. Стопы́ моя́ напра́ви... и Да испо́лнятся уста́... По трисвято́мъ тропа́рь: Ско́ро предвари́... Го́споди, поми́луй, 40. И моли́тву: Иже на вся́кое вре́мя... Го́споди, поми́луй, три́жды. Сла́ва, и ны́нѣ. Честнѣ́йшую херуви́мъ... Именемъ Госпо́днимъ... И обы́чныя покло́ны. Трисвято́е. Го́споди, поми́луй, 12. Христе́, Свѣ́те... И отпу́стъ. И исхожде́ніе въ притво́ръ. И литíя за упоко́й.


ВЪ ТУЮЖДЕ СРЕДУ СЫРНУЮ,
Пое́мъ часы́, 3-й и 6-й, съ покло́ны, и тропари́ по́стными. На часѣ́хъ въ кампа́нъ не ударя́ютъ.

На 6-мъ часѣ́ тропа́рь проро́чества, гла́съ 3:

Царю́ Святы́й всеси́льне, Его́же боя́тся и трепе́щутъ вся́ческая, спаси́ на́съ, мо́жеши бо прости́ти грѣхи́, я́ко Благоутро́бенъ.

Сла́ва, и ны́нѣ, то́йже.

Проки́менъ, гла́съ 6: Спаси́, Го́споди, лю́ди Твоя́* и благослови́ достоя́ніе Твое́. Сти́хъ: Къ Тебѣ́, Го́споди, воззову́, [Бо́же мо́й, да не премолчи́ши отъ мене́].

Проро́чества Іо́илева чте́ніе. [Глава́ 2.]

Та́ко глаго́летъ Госпо́дь: обрати́теся ко Мнѣ́ всѣ́мъ се́рдцемъ ва́шимъ въ постѣ́, и въ пла́чи, и въ рыда́ніи, и расто́ргните сердца́ ва́ша, а не ри́зы ва́ша, и обрати́теся ко Го́споду Бо́гу ва́шему, я́ко ми́лостивъ и ще́дръ е́сть, долготерпѣли́въ и многоми́лостивъ, и раскаява́яйся о зло́бахъ. Кто́ вѣ́сть, обрати́тся ли, и раска́ется, и оста́витъ за собо́ю благослове́ніе, и же́ртву, и возлія́ніе Го́споду Бо́гу ва́шему? Воструби́те трубо́ю въ Сіо́нѣ, освяти́те по́стъ, проповѣ́дите цѣльбу́; собери́те лю́ди, освяти́те це́рковь, избери́те старѣ́йшины, совокупи́те младе́нцы ссу́щія сосцы́: да изы́детъ жени́хъ отъ ло́жа своего́ и невѣ́ста отъ черто́га своего́. Между́ степе́ньми же́ртвенника воспла́чутся жерцы́ служа́щіи Го́споду, и реку́тъ: пощади́, Го́споди, лю́ди Твоя́, и не да́ждь достоя́нія Твоего́ на укори́зну, да не облада́ютъ и́ми язы́цы, да не реку́тъ во язы́цѣхъ: гдѣ́ е́сть Бо́гъ и́хъ? И возревнова́ Госпо́дь о земли́ Свое́й, и пощадѣ́ лю́ди Своя́. И отвѣща́ Госпо́дь лю́демъ Свои́мъ, и рече́: се́, А́зъ ва́мъ послю́ пшени́цу, и вино́, и ма́сло древя́ное, и насы́титеся и́хъ, и не да́мъ ва́съ къ сему́ на поруга́ніе во язы́цѣхъ, и су́щаго отъ сѣ́вера отжену́ отъ ва́съ, и отри́ну его́ на зе́млю безво́дную, и погублю́ лице́ его́ въ мо́ри пе́рвѣмъ, и за́дняя его́ въ мо́ри послѣ́днѣмъ: и взы́детъ гни́лость его́, и взы́детъ смра́дъ его́, я́ко возвели́чи дѣла́ своя́. Дерза́й, земле́, ра́дуйся и весели́ся, я́ко возвели́чи Госпо́дь, е́же сотвори́ти. Дерза́йте ско́ти по́льстіи, я́ко прозя́бнуша поля́ пусты́ни, я́ко дре́во принесе́ пло́дъ сво́й, виногра́дъ и смо́кви да́ша си́лу свою́. И ча́да Сіо́ня ра́дуйтеся, и весели́теся о Го́сподѣ Бо́зѣ ва́шемъ, я́ко даде́ ва́мъ пи́щу въ пра́вду, и одожди́тъ ва́мъ до́ждь ра́нній и по́здный, я́коже и пре́жде. И напо́лнятся гу́мна ва́ша пшени́цы, и преизлію́тся точи́ла вино́мъ и еле́емъ. И возда́мъ ва́мъ вмѣ́сто лѣ́тъ, въ ня́же поядо́ша пру́зи и мши́ца, и си́плеве, и гу́сеницы, си́ла Моя́ вели́кая, ю́же посла́хъ на вы́. И снѣ́сте яду́ще и насы́титеся, и похвали́те и́мя Го́спода Бо́га ва́шего, я́же сотвори́ съ ва́ми чудеса́: и не посра́мятся лю́діе Мои́ во вѣ́къ.

Проки́менъ, гла́съ 7: Госпо́дь крѣ́пость лю́демъ Свои́мъ да́стъ,* Госпо́дь благослови́тъ лю́ди Своя́ ми́ромъ. Сти́хъ: Принеси́те Го́сподеви, сы́нове Бо́жіи, [принеси́те Го́сподеви, сы́ны о́вни].

Та́же: Ско́ро да предваря́тъ... Трисвято́е. И про́чая, по обы́чаю поста́. И моли́тва: Бо́же и Го́споди си́лъ... Вку́пѣ же пое́мъ и 9-й ча́съ, и моли́тву: Влады́ко, Го́споди Іису́се Христе́, Бо́же на́шъ...

Посе́мъ изобрази́тельная и блаже́нны: Во Ца́рствіи Твое́мъ.., ско́ро, безъ пѣ́нія. Сла́ва, и ны́нѣ. Помяни́ на́съ, Го́споди... и покло́ны три́. Ли́къ небе́сный.., и прочая. И по Отче на́шъ: Кондаки́, хра́ма и свято́му. Сла́ва, конда́къ: Со святы́ми упоко́й... И ны́нѣ, конда́къ: Предста́тельство христіа́нъ... Го́споди, поми́луй, 40. Сла́ва, и ны́нѣ. Честнѣ́йшую херуви́мъ... Покло́ны три́ вели́кія, и про́чихъ 12.

Посе́мъ другíй ли́къ начина́етъ вече́рню: Пріиди́те, поклони́мся.., три́жды. И псало́мъ: Благослови́, душе́ моя́, Го́спода... И про́чая.

Источникъ: Тріо́діонъ, сíесть трипѣ́снецъ. — Кíевъ: Въ тѵпогра́фіи Кíево-Пече́рской Успе́нской Ла́вры, 1864. — Л. 33 об. – 39 об.

/ Къ оглавленію раздѣла /


Наверхъ / Къ титульной страницѣ

0