Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - пятница, 22 сентября 2017 г. Сейчасъ на порталѣ посѣтителей - 8.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

ТРІОДІОНЪ, СІЕСТЬ ТРИПѢСНЕЦЪ,
Съ Бо́гомъ Святы́мъ, обдержа́й подоба́ющее ему́ послѣ́дованіе.

Слу́жба во вто́рникъ сы́рныя седми́цы.

ВЪ ПОНЕДѢЛЬНИКЪ ВЕЧЕРА,
На Го́споди воззва́хъ.., стихи́ры, я́ко обы́чно.

На стихо́внѣ самогла́сенъ, два́жды. Гла́съ 8:

И глаго́лемъ обы́чныя стихи́, я́коже вчера́.

Му́чениченъ: Му́ченицы Госпо́дни, моли́те Бо́га на́шего и испроси́те душа́мъ на́шимъ мно́жество щедро́тъ и очище́ніе мно́гихъ прегрѣше́ній, мо́лимся.

Сла́ва, и ны́нѣ, богоро́диченъ:

Пресла́вную и Пречи́стую Богоро́дицу Истинную, я́ко Ма́терь Бо́жію, воспои́мъ благоче́стно, ра́доватися То́й глаго́люще, я́ко а́нгелъ: ра́дуйся, Ма́ти Свята́я воплоще́ннаго Сы́на Бо́жія; ра́дуйся, жили́ще Свята́го Ду́ха, моля́щая при́сно о на́съ во е́же спасти́ся душа́мъ на́шимъ.

И про́чее послѣ́дованіе.



ВО ВТОРНИКЪ СЫРНЫЙ НА УТРЕНИ,
По 2-мъ стихосло́віи сѣда́ленъ, гла́съ 8. Подо́бенъ: Прему́дрость и Сло́во.

Преблагíй Сло́ве, со Отце́мъ и Ду́хомъ созда́вый ви́димая вку́пѣ и неви́димая, неизрече́нною му́дростію Твое́ю свѣ́тлаго поста́ вре́мя прейти́ въ ми́рѣ глубо́цѣ благоволи́, Благоутро́бне, разрѣша́я пре́лесть го́рькаго грѣха́, подая́ умиле́ніе и исцѣле́ній сле́зы, и прегрѣше́ній проще́ніе, да несумнѣ́нною душе́ю, усе́рднымъ ду́хомъ постя́щеся, со а́нгелы пое́мъ держа́ву Твою́.

Сла́ва, то́йже. И ны́нѣ, богоро́диченъ:

Прему́дрость и Сло́во въ Твое́мъ чре́вѣ заче́ншая неизрече́нно, Ма́ти Бо́жія, мíру родила́ еси́ мíръ Содержа́щаго, и на объя́тіяхъ держа́ла еси́ вся́ объе́млющаго Пищеда́теля всѣ́хъ, и Созда́теля, и Го́спода, тѣ́мже молю́ Тя́, Всепѣ́тая Дѣ́во, и вѣ́рою сла́влю Тя́, изба́витися прегрѣше́ній мои́хъ, егда́ и́мамъ предста́ти предъ лице́мъ Созда́теля моего́, Влады́чице Дѣ́во Чи́стая, Твою́ по́мощь тогда́ ми́ да́руй, и́бо мо́жеши, ели́ка хо́щеши, Всенепоро́чная.

Чте́мъ же и вели́каго Васи́лія сло́во о благодаре́ніи. Та́же псало́мъ 50-й.

Кано́ны пое́мъ осмогла́сника и мине́и, я́коже въ понедѣ́льникъ указа́ся; та́кожде и въ про́чее послѣ́дуй.

И трипѣ́снецъ господи́на Іо́сифа. Гла́съ 3.
Пѣ́снь 2.

Ирмо́съ: Яко ту́ча на тро́скотъ и я́ко и́ней на сѣ́но, да сни́дутъ на зе́млю глаго́ли мои́.

Яко у́тро возсія́ на́мъ покая́нія зари́, преддве́рія свѣ́тло воздержа́нія.

Тмы́ мя́ изба́ви, Христе́, внѣ́шнія мно́жествомъ ми́лости Твоея́, я́ко еди́нъ Ми́лостивъ.

Огня́ мя́ исхити́ и че́рвія, Спа́се, неусыпа́ющаго, покая́нія прилѣжа́ніемъ очище́нна.

Богоро́диченъ: Дѣ́во Всепѣ́тая, бу́ди на́мъ пу́ть покая́нія ко спасе́нія веду́щій две́ремъ.

Иный, гла́съ 2.

Ирмо́съ: Внемли́те, лю́діе Мои́, [зако́ну Моему́, приклони́те у́хо ва́ше во глаго́лы у́стъ Мои́хъ, я́ко и́мя Твое́, Го́споди, призва́хъ].

Вре́мя покая́нія наста́, потщи́мся, христолю́бцы, очи́ститися всѣ́хъ прегрѣше́ній и яви́тися Влады́цѣ блаже́нни.

По́стъ чи́стый, безгрѣ́шный потщи́мся соверши́ти ны́нѣ непреста́нно, да обря́щемъ прегрѣше́ній оставле́ніе.

Еси́ бо, Христе́, Многоми́лостивъ, всѣ́хъ Бла́же, при́сно пріе́мляй въ покая́ніе, тѣ́мже вси́ Тя́ при́сно сла́вимъ.

Сла́ва, тро́иченъ: Тро́ицу во Еди́ницѣ просла́вимъ, несѣко́мую, неслія́нну, нераздѣ́льну Существо́мъ, раздѣ́льна же Ли́цы Бо́га.

[И ны́нѣ,] богоро́диченъ: Чи́стая Дѣ́во Ма́ти, умоли́, Его́же воплоти́ла еси́, я́ко Человѣ́ка, Дѣ́во, и Сло́ва, да спасе́тъ отъ бѣ́дъ рабы́ Твоя́.

Ирмо́съ: Внемли́те, лю́діе Мои́, зако́ну Моему́, приклони́те у́хо ва́ше во глаго́лы у́стъ Мои́хъ, я́ко и́мя Твое́, Го́споди, призва́хъ.

Пѣ́снь 8.

Ирмо́съ: Изъ Безнача́льнаго Отца́ рожде́ннаго [пре́жде вѣ́къ Бо́га и въ послѣ́дняя отъ Богоро́дицы въ пло́ть обле́кшася, я́ко соверше́нна Человѣ́ка и Бо́га и́стинна, по́йте, благослови́те и превозноси́те во вся́ вѣ́ки].

Раска́янія вре́мя, покая́нія показа́ти плоды́ досто́йны Бо́гу, душе́ моя́, потщи́ся, воста́ни и возопíй прилѣ́жно въ поще́ніихъ и моли́твахъ: по́йте, благослови́те и превозноси́те Христа́ во вѣ́ки.

Предочи́стимъ, бра́тіе, душе́вная чу́вства и Го́сподеви ны́нѣ прилѣпи́мся о́бразы умиле́нія, вопію́ще чи́стѣ покая́ніемъ чи́стымъ: по́йте, благослови́те и превозноси́те Христа́ во вѣ́ки.

Уловля́ющаго врага́ ласкосе́рдными воспомина́ньми, и невоздержа́ніемъ сла́сти кра́ткія паля́ща чу́вство, умертви́ти потщи́мся прилѣ́жною моли́твою, пою́ще, благословя́ще и превознося́ще Христа́ во вѣ́ки.

Богоро́диченъ: Онебеси́вшая на́ше земно́е, Отрокови́це, смѣше́ніе, олядѣ́вшую и истлѣ́вшую души́ моея́ бразду́, ту́чами Твои́хъ щедро́тъ плодоно́сну добродѣ́тельми покажи́, вопію́щу и превознося́щу Христа́ во вѣ́ки.

Иный.

Ирмо́съ: Въ купинѣ́ Моисе́ю [Дѣ́вы чу́до на Сина́йстѣй горѣ́ Прообрази́вшаго иногда́, по́йте, благослови́те и превозноси́те во вся́ вѣ́ки].

Предочи́стимся ны́нѣ не бра́шны то́кмо, но и дѣя́ньми, и начне́мъ, вѣ́рніи, те́плымъ помышле́ніемъ, да Созда́телю свѣ́тли яви́мся во вѣ́ки.

Си́це на́мъ пости́тися подоба́етъ не во враждѣ́ и бра́ни, не въ за́висти и рве́ніи, не во тщесла́віи и ле́сти сокрове́ннѣй, но, я́коже Христо́съ, въ смиренному́дріи.

Ми́лующіи, — рече́, — ни́щія, Спа́су взаи́мъ даю́тъ разу́мно. О, ра́дости неуподоби́мыя! Подае́тъ бо бога́тно воздая́нія до́брыхъ во вся́ вѣ́ки.

Благослови́мъ Отца́, и Сы́на, и Свята́го Ду́ха, Го́спода.

Тро́иченъ: Сла́ва Отцу́, и Сы́ну, и Свято́му Ду́ху: Еди́нъ бо Бо́гъ, Три́. Со а́нгелы непреста́нно, человѣ́цы, восхваля́емъ Тя́, Всесвята́я Тро́ице, во вся́ вѣ́ки.

[И ны́нѣ,] богоро́диченъ: Ра́дуйся, Дѣ́во Чи́стая, Богоро́дице Марíе, очисти́лище мíра, правосла́вныхъ ро́гъ, моли́ изба́витися отъ негаси́маго огня́ Тя́ славосло́вящимъ во вся́ вѣ́ки.

Хва́лимъ, благослови́мъ, покланя́емся Го́сподеви...

Ирмо́съ: Въ купинѣ́ Моисе́ю Дѣ́вы чу́до на Сина́йстѣй горѣ́ Прообрази́вшаго иногда́, по́йте, благослови́те и превозноси́те во вся́ вѣ́ки.

Пѣ́снь 9.

Ирмо́съ: Тебе́, неопали́мую купину́ [и Святу́ю Дѣ́ву, Ма́терь Свѣ́та и Богоро́дицу, наде́жду всѣ́хъ на́съ, велича́емъ].

Отве́рзи на́мъ ми́лости Твоея́ пречи́стыя утро́бы, покая́ніе человѣ́комъ во спасе́ніе дарова́вый, еди́не Спа́се Многоми́лостиве.

Увы́ мнѣ́! Ко́е стра́шное о́ное неумы́тное суди́лище, на не́мже и́мамы на́зи твори́ти сло́во, и́хже въ житіи́ злѣ́ содѣ́яхомъ?

Одожди́ на́мъ благоутро́бія, Благодѣ́телю, ка́плю, потопля́ющую на́шу скве́рну всю́, вины́ покая́нія на́мъ подава́я.

Вси́ усе́рднымъ се́рдцемъ въ свята́го поста́ преддве́рія свѣ́тло совше́дше, благода́рственныя пѣ́сни Христу́ принесе́мъ.

Богоро́диченъ: Тя́ крѣ́пкую Предста́тельницу и извѣ́стную Наде́жду, воспѣва́юще благоче́стно, мо́лимъ: Сы́на Твоего́ моли́, Дѣ́во, спасти́ся на́мъ.

Иный.

Ирмо́съ: Дѣ́вство Твое́, Богоро́дице нескве́рная, [е́же не опали́ Огнь Боже́ственный, велича́емъ].

Ны́нѣ предочи́стимся въ постѣ́, и слеза́хъ, и въ ве́ліихъ исправле́ніихъ, да обря́щемъ ве́лію ми́лость.

Ны́нѣ подража́имъ му́дрыя дѣ́вы, христолю́бцы, и потщи́мся Христа́ усрѣ́сти со свѣща́ми свѣ́тлыми.

Ны́нѣ подража́имъ Илію́ пости́вшася и бѣжа́вша отъ лука́выя Іезаве́ли, да та́ко вознесе́мся отъ земли́.

Сла́ва, тро́иченъ: Святы́й, Святы́й, Святы́й, Трисвяты́й, Отче Вседержи́телю, и Сы́не Единосу́щне со Ду́хомъ, еди́но Божество́.

[И ны́нѣ,] богоро́диченъ: О Тебѣ́ хва́лимся и къ Тебѣ́ прибѣга́емъ, Чи́стая, Приснодѣ́во Честна́я, муче́нія изба́ви вся́ ны́.

Ирмо́съ: Дѣ́вство Твое́, Богоро́дице нескве́рная, е́же не опали́ Огнь Боже́ственный, велича́емъ.

На стихо́внѣ стихи́ра самогла́сна, гла́съ 3:

Любе́зно, лю́діе, по́стъ облобыза́имъ, приспѣ́ бо духо́вныхъ подвиго́въ нача́ло, оста́вимъ тѣле́сное сладостра́стіе, возрасти́мъ душе́вная дарова́нія, спостра́ждемъ, я́ко раби́ Христо́ви, да и спросла́вимся, я́ко ча́да Бо́жія, и Ду́хъ Святы́й въ на́съ все́лься, просвѣти́тъ ду́ши на́ша.

Сти́хъ: Испо́лнихомся зау́тра ми́лости Твоея́, [Го́споди, и возра́довахомся, и возвесели́хомся. Во вся́ дни́ на́ша возвесели́хомся, за дни́ въ ня́же смири́лъ ны́ еси́, лѣ́та въ ня́же ви́дѣхомъ зла́я. И при́зри на рабы́ Твоя́ и на дѣла́ Твоя́, и наста́ви сы́ны и́хъ].

Па́ки ту́же стихи́ру.

Сти́хъ: И бу́ди свѣ́тлость [Го́спода Бо́га на́шего на на́съ, и дѣла́ ру́къ на́шихъ испра́ви на на́съ и дѣ́ло ру́къ на́шихъ испра́ви].

Му́чениченъ: Царе́й и мучи́телей стра́хъ отри́нуша Христо́вы во́ини, и благодерзнове́нно, и му́жественно Того́ исповѣ́даша, всѣ́хъ Го́спода Бо́га и Царя́ на́шего, и мо́лятся о душа́хъ на́шихъ.

Сла́ва, и ны́нѣ, богоро́диченъ:

Богоро́дице, предста́тельство всѣ́хъ моля́щихся, на Тебе́ надѣ́емся и Тобо́ю хва́лимся, въ Тебѣ́ все́ упова́ніе на́ше е́сть. Моли́ изъ Тебе́ Роди́вшагося о непотре́бныхъ рабѣ́хъ Твои́хъ.

Источникъ: Тріо́діонъ, сíесть трипѣ́снецъ. — Кíевъ: Въ тѵпогра́фіи Кíево-Пече́рской Успе́нской Ла́вры, 1864. — Л. 31 – 33 об.

/ Къ оглавленію раздѣла /


Наверхъ / Къ титульной страницѣ

0