Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - пятница, 22 сентября 2017 г. Сейчасъ на порталѣ посѣтителей - 7.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

ТРІОДІОНЪ, СІЕСТЬ ТРИПѢСНЕЦЪ,
Съ Бо́гомъ Святы́мъ, обдержа́й подоба́ющее ему́ послѣ́дованіе.

Слу́жба въ понедѣ́льникъ сы́рныя седми́цы.

ВЪ НЕДѢЛЮ ВЕЧЕРА,
На Го́споди воззва́хъ.., пое́мъ я́ко обы́чно: стихи́ры осмогла́сника 3 и мине́и настоя́щаго свята́го 3. Сла́ва, и ны́нѣ, богоро́диченъ.

На стихо́внѣ же оставля́ется осмогла́сникъ и пое́мъ самогла́сенъ дне́, о́ба ли́ка вку́пѣ. Гла́съ 8:

Сти́хъ: Къ Тебѣ́ возведо́хъ о́чи мо́и, живу́щему на небеси́. Се́ я́ко о́чи ра́бъ въ руку́ госпо́дій свои́хъ, я́ко о́чи рабы́ни въ руку́ госпожи́ своея́, та́ко о́чи на́ши ко Го́споду Бо́гу на́шему, до́ндеже уще́дритъ ны́.

И па́ки то́йже самогла́сенъ:

Ласкосе́рдствовавше...

Сти́хъ 2: Поми́луй на́съ, Го́споди, поми́луй на́съ, я́ко по мно́гу испо́лнихомся уничиже́нія, наипа́че напо́лнися душа́ на́ша поноше́нія гобзу́ющихъ и уничиже́нія го́рдыхъ.

И пое́мъ му́чениченъ въ то́йже гла́съ:

Му́ченцы Госпо́дни, вся́ко мѣ́сто освяща́ете и вся́къ неду́гъ врачу́ете, и ны́нѣ моли́те изба́витися сѣ́тей вра́жіихъ душа́мъ на́шимъ, мо́лимся.

Сла́ва, и ны́нѣ, богоро́диченъ, гла́съ то́йже:

Небе́сная пою́тъ Тя́, Благода́тная, Ма́ти Безневѣ́стная, и мы́ славосло́вимъ неизслѣ́дованное Твое́ Рождество́, Богоро́дице, моли́ спасти́ся душа́мъ на́шимъ.


ВЪ ПОНЕДѢЛЬНИКЪ СЫРНЫЙ НА УТРЕНИ,
На Бо́гъ Госпо́дь: Тропа́рь свято́му, два́жды. Сла́ва, и ны́нѣ, богоро́диченъ по гла́су.

По 1-мъ стихосло́віи сѣда́ленъ осмогла́сника.
И чте́мъ сло́во Вели́каго Васи́лія [о е́же, Внима́й себѣ́...]

По 2-мъ стихосло́віи пое́мъ тріо́ди, гла́съ 1. Подо́бенъ: Ка́мени запеча́тану.

Отверзо́шася боже́ственнаго покая́нія преддве́рія, присту́пимъ усе́рдно, очи́стивше тѣлеса́, бра́шенъ и страсте́й отложе́нія творя́ще, я́ко послу́шницы Христа́, призва́вшаго мíръ въ Ца́рствіе небе́сное, десяти́ны всего́ лѣ́та принося́ще всѣ́хъ Царю́, я́ко да и Воскресе́ніе Его́ любо́вію у́зримъ.

Сла́ва, то́йже па́ки. И ны́нѣ, богоро́диченъ:

Ру́цѣ Твои́ боже́ственныя, и́миже Содѣ́теля носи́ла еси́, Дѣ́во Пресвята́я, воплоще́нна Божество́мъ, просте́рши, умоли́, изба́витися на́мъ отъ искуше́ній, и страсте́й, и бѣ́дъ, восхваля́ющимъ Тя́ любо́вію, и вопію́щимъ Тебѣ́: сла́ва Все́льшемуся въ Тя́, сла́ва Проше́дшему изъ Тебе́, сла́ва Свободи́вшему на́съ рождество́мъ Твои́мъ.

Кано́ны же пое́мъ, я́коже обы́чай: во окто́ихѣ и въ мине́и свято́му. Въ ко́ихъ же пѣ́снехъ прихо́дитъ трипѣ́снецъ, а́ще ли е́сть двоирмо́сенъ, оставля́емъ о́ба кано́на окто́иха, и пое́мъ въ мине́и кано́нъ со ирмосо́мъ на 6 и въ тріо́ди на 8.

Кано́нъ мине́и, и настоя́щій трипѣ́снецъ, творе́ніе господи́на Іо́сифа, гла́съ 1.
Пѣ́снь 1.

Ирмо́съ: Пѣ́снь побѣ́дную пои́мъ вси́ Бо́гу, [сотво́ршему ди́вная чудеса́ мы́шцею высо́кою и спа́сшему Изра́иля, я́ко просла́вися].

Свѣ́тлая предпра́зднства воздержа́нія, свѣ́тлая предпу́тія поста́ дне́сь. Тѣ́мже стеце́мся въ наде́ждѣ, бра́тіе, и усе́рдіи мно́зѣмъ.

Ада́му пра́отцу преступле́ніемъ поревнова́хъ, изгна́нъ бы́хъ отъ сла́дости, окая́нный. Тѣ́мже припа́даю Ти́ въ покая́ніи и пла́чи: Го́споди, спаси́ мя́.

Нача́ло умиле́нія и покая́нія, злы́хъ отчужде́ніе, и страсте́й воздержа́ніе. Тѣ́мже потщи́мся отсѣче́ніе лука́выхъ дѣ́лъ сотвори́ти.

Богоро́диченъ: Но́щію прегрѣше́ній омраче́нъ, къ Тебѣ́, Ро́ждшей су́щимъ во тмѣ́ Со́лнце пра́вды, Христа́, ны́нѣ прибѣга́ю прилѣ́жно: Влады́чице, спаси́ мя́.

Иный трипѣ́снецъ. Ирмо́съ то́йже.

Се́ предотве́рзеся покая́нія две́рь, боголю́бцы, пріиди́те у́бо, потщи́мся вни́ти то́ю, пре́жде да́же не заключи́тъ сію́ Христо́съ, я́ко недосто́йнымъ на́мъ.

Ве́сну возвѣща́ющая прибли́жися сія́, ны́нѣ предочисти́тельная седми́ца всечестна́я, свяще́нныхъ посто́въ, тѣлеса́ и ду́ши всѣ́хъ просвѣща́ющая.

Сла́ва, тро́иченъ: Несли́тная, несозда́нная, Тро́ице Свята́я, Еди́нице преблага́я, Отче, и Сы́не, и Ду́ше сро́дный, покланя́ющіяся Тебѣ́ вѣ́рно, при́сно спаса́й.

[И ны́нѣ,] богоро́диченъ: Побѣди́шася, Всечестна́я, въ Тебѣ́ предѣ́лы, Дѣ́во, естества́: пребыва́еши бо ро́ждши безъ му́жа Бо́га, я́коже пре́жде рождества́, Чи́стая, па́ки невреди́ма.

Таже ирмо́съ: Пѣ́снь побѣ́дную пои́мъ вси́ Бо́гу, сотво́ршему ди́вная чудеса́ мы́шцею высо́кою и спа́сшему Изра́иля, я́ко просла́вися.

По 3-й пѣ́сни сѣда́ленъ. Сла́ва, и ны́нѣ, богоро́диченъ.

По 6-й пѣ́сни конда́къ и и́косъ свята́го.

Пѣ́снь 8.

Ирмо́съ: Его́же ужаса́ются а́нгели [и вся́ во́инства, я́ко Творца́ и Го́спода, по́йте, свяще́нницы, просла́вите, о́троцы, благослови́те, лю́діе, и превозноси́те во вся́ вѣ́ки].

Житіе́ мое́ все́ блу́дно ижди́въ, гра́жданомъ рабо́тахъ го́рькимъ и лука́вымъ, но жела́юща мя́ къ Твои́мъ щедро́тамъ ны́нѣ обрати́тися, Христе́, не пре́зри.

Образъ житія́ моего́ сра́мный и лю́тый, ми́лость безмѣ́рная, Человѣколю́бче Спа́се, Твоего́ благоутро́бія, покая́нія вре́мя да́ждь ми́ прося́щу и любо́вію Тя́ пою́щу.

Ка́инову поревнова́хъ окая́нному житію́, ума́ достоя́ніе умертви́въ и́стинно, и трепе́щу суда́ Твоего́, Благодѣ́телю, не осуди́ мене́ съ си́мъ во вѣ́ки.

Богоро́диченъ: Дѣ́во Всепѣ́тая, еди́на къ Бо́гу вѣ́рныхъ су́щи по́мощь тве́рдая, тмы́ мя́ изба́ви и муче́нія належа́щаго лука́вно живу́щимъ.

Иный.

Ирмо́съ: Пѣ́снь Тебѣ́ прино́симъ безпло́тныхъ, [я́коже о́троцы въ пещи́, и, пою́ще, глаго́лемъ: благослови́те вся́ дѣла́ Госпо́дня Го́спода].

Сіе́ вре́мя е́сть покая́нія, тѣ́мже благому́дренно начне́мъ, бра́тіе, вопію́ще: благослови́те дѣла́ Госпо́дня Го́спода.

Дне́сь бра́шенъ отре́кшеся, потщи́мся дѣ́ломъ и прегрѣше́ній досто́йно ка́ятися: благослови́те дѣла́ Госпо́дня Го́спода.

Благослови́мъ Отца́, и Сы́на, и Свята́го Ду́ха, Го́спода.

Тро́иченъ: Сла́ва Тебѣ́, Неви́димая Тро́ице Свята́я, во Еди́ницѣ покланя́емая, Юже вѣ́рно сла́вимъ: спаса́й рабы́ Твоя́ отъ вся́каго вре́да.

[И ны́нѣ,] богоро́диченъ: Ра́дуйся Всеблаже́нная Чи́стая Дѣ́во; ра́дуйся Госпо́дня Рабо́ и Ма́ти; ра́дуйся покро́ве мíра, Богоро́дице Благослове́нная, Марíе Всесвѣ́тлая.

Хва́лимъ, благослови́мъ, покланя́емся Го́сподеви...

Ирмо́съ: Пѣ́снь Тебѣ́ прино́симъ безпло́тныхъ, я́коже о́троцы въ пещи́, и, пою́ще, глаго́лемъ: благослови́те вся́ дѣла́ Госпо́дня Го́спода.

Пѣ́снь 9.

Ирмо́съ: Свѣтоно́сный о́блакъ, [въ о́ньже всѣ́хъ Влады́ка, я́ко до́ждь съ небесе́ на руно́, сни́де и воплоти́ся на́съ ра́ди, бы́въ Человѣ́къ, Безнача́льный, велича́емъ вси́ я́ко Ма́терь Бо́га на́шего Чи́стую].

Ми́рнымъ постоя́ніемъ, чи́стою любо́вію свяще́ннѣйшее вре́мя свята́го поста́ воспріи́мемъ, вѣ́рніи, прося́ще оставле́нія, и́хже кíйждо согрѣши́, я́ко да та́мошнюю улучи́мъ ра́дость.

Се́ вре́мя покая́нія, предпра́зднственный се́й посто́въ вхо́дъ, воста́ни, душе́ моя́, Благодѣ́телю и Бо́гу те́плѣ примири́ся, я́ко да суда́ избѣ́гнеши о́наго пра́веднаго и стра́шнаго вои́стинну.

Посто́въ вхо́ды и преддве́рія, вси́ да не оскверни́мъ злѣ́ невоздержа́ніемъ и пія́нствомъ, но въ чистотѣ́ помышле́ній усе́рдно вни́демъ, пріе́мше нетлѣ́нія вѣнцы́ и трудо́въ досто́йнѣ плоды́.

Богоро́диченъ: О на́съ моля́щи Блага́го не преста́й, не́мощь на́шу Вѣ́дущаго Еди́наго, гла́да же, и па́губы, и тру́са, и вся́каго озлобле́нія изба́витися чту́щему Тя́ гра́ду, Богоро́дице, упова́ніе земноро́дныхъ.

Иный.

Ирмо́съ: Тебе́ ви́дѣную две́рь [Іезекíилемъ проро́комъ, е́юже никто́же про́йде, то́кмо Бо́гъ еди́нъ, Богоро́дице Дѣ́во, пѣ́сньми почита́емъ].

Введе́ся вре́мя, душе́ моя́, покая́нія, не небрези́, а́лчущимъ да́ждь хлѣ́бъ, моли́ся Го́сподеви на вся́кій де́нь, и но́щь, и ча́съ, да спасе́тъ тя́.

Мя́съ и про́чихъ бра́шенъ я́коже удале́ніе сотвори́хомъ, та́ко и вся́кія вражды́ къ бли́жнимъ вку́пѣ, блуда́ же, и лжи́, и вся́кія зло́бы убѣжи́мъ.

Сла́ва, тро́иченъ: Еди́ному покланя́юся Естество́мъ безнача́льному Божеству́, Треми́ же Ли́цами сла́влю въ Тро́ицѣ Еди́ницу нераздѣ́льную и сопресто́льную.

[И ны́нѣ,] богоро́диченъ: Ты́ еси́ вѣ́рныхъ, Дѣ́во, похвала́, упова́ніе и предста́тельство, Тя́ пѣ́сньми пѣ́ній сла́вимъ непреста́нно, Богоро́дице Марíе, спаси́ рабы́ Твоя́.

Ирмо́съ: Тебе́ ви́дѣную две́рь Іезекíилемъ проро́комъ, е́юже никто́же про́йде, то́кмо Бо́гъ еди́нъ, Богоро́дице Дѣ́во, пѣ́сньми почита́емъ.

Свѣти́ленъ окто́иха. Сла́ва, свято́му, а́ще е́сть; а́ще ли ни́: Сла́ва, и ны́нѣ, богоро́диченъ.

На стихо́внѣ стихи́ра самогла́сна, гла́съ 3:

На вся́кое вре́мя по́стъ поле́зенъ е́сть, изволя́ющимъ и творя́щимъ и́: ниже́ бо искуше́ніе де́монское дерза́етъ на постя́щагося, но и храни́тели жи́зни на́шея а́нгели, люботру́днѣйше съ на́ми пребыва́ютъ, посто́мъ очи́стившимися.

Сти́хъ: Испо́лнихомся зау́тра ми́лости Твоея́, Го́споди, и возра́довахомся, и возвесели́хомся. Во вся́ дни́ на́ша возвесели́хомся, за дни́ въ ня́же смири́лъ ны́ еси́, лѣ́та въ ня́же ви́дѣхомъ зла́я. И при́зри на рабы́ Твоя́ и на дѣла́ Твоя́, и наста́ви сы́ны и́хъ.

И пое́мъ па́ки ту́же стихи́ру.

Та́же сти́хъ: И бу́ди свѣ́тлость Го́спода Бо́га на́шего на на́съ, и дѣла́ ру́къ на́шихъ испра́ви на на́съ и дѣ́ло ру́къ на́шихъ испра́ви.

Му́чениченъ: Святы́хъ страстоте́рпцевъ па́мять, пріиди́те, лю́діе вси́, почти́мъ, зане́ позо́ръ бы́вше а́нгеломъ и человѣ́комъ, побѣ́дныя вѣнцы́ отъ Христа́ прія́ша и мо́лятся о душа́хъ на́шихъ.

Сла́ва, и ны́нѣ, богоро́диченъ, то́йже гла́съ:

Безъ сѣ́мене зачала́ еси́ отъ Ду́ха Свята́го, и славосло́вяще воспѣва́емъ Тя́: ра́дуйся, Всесвята́я Дѣ́во.

Вѣ́домо же бу́ди, я́ко въ понедѣ́льникъ сы́рныя недѣ́ли яди́мъ два́жды дне́мъ.

Источникъ: Тріо́діонъ, сíесть трипѣ́снецъ. — Кíевъ: Въ тѵпогра́фіи Кíево-Пече́рской Успе́нской Ла́вры, 1864. — Л. 28 об. – 31.

/ Къ оглавленію раздѣла /


Наверхъ / Къ титульной страницѣ

0