Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - пятница, 22 сентября 2017 г. Сейчасъ на порталѣ посѣтителей - 8.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

ТРІОДІОНЪ, СІЕСТЬ ТРИПѢСНЕЦЪ,
Съ Бо́гомъ Святы́мъ, обдержа́й подоба́ющее ему́ послѣ́дованіе.

Въ суббо́ту мясопу́стную.
Па́мять соверша́емъ всѣ́хъ отъ вѣ́ка усо́пшихъ правосла́вныхъ христіа́нъ, оте́цъ и бра́тій на́шихъ.

[ВЕЧЕРЪ,]

Отъ вѣ́ка ме́ртвыхъ дне́сь всѣ́хъ по и́мени, вѣ́рою пожи́вшихъ благоче́стно, па́мять сотворя́юще, вѣ́рніи, Спа́са и Го́спода воспои́мъ, прося́ще прилѣ́жно си́мъ въ ча́съ суда́ отвѣ́тъ благíй да́ти, Тому́ Самому́ Бо́гу на́шему, все́й судя́щему земли́, десна́го Его́ предстоя́нія получи́ти въ ра́дости, въ ча́сти пра́ведныхъ, и во святы́хъ жре́біи свѣ́тлѣмъ, и досто́йнымъ бы́ти небе́снаго Ца́рствія Его́.

Твое́ю кро́вію человѣ́ки, Спа́се, искупи́вый, и сме́ртію Твое́ю отъ сме́рти го́рькія изба́вивый на́съ, и жи́знь вѣ́чную подая́й на́мъ Воскресе́ніемъ Твои́мъ, вся́ упоко́й, Го́споди, усо́пшія благоче́стно, или́ въ пусты́няхъ, или́ во градѣ́хъ, или́ въ мо́ри, или́ на земли́, или́ на вся́комъ мѣ́стѣ: цари́ же, свяще́нники, архіере́и, мона́хи, и бѣльцы́, въ во́зрастѣ вся́комъ всеро́дномъ, и сподо́би я́ небе́снаго Ца́рствія Твоего́.

Изъ ме́ртвыхъ воста́ніемъ Твои́мъ, Христе́, не ктому́ сме́рть облада́етъ уме́ршими благоче́стно. Тѣ́мже мо́лимся прилѣ́жно: рабы́ Твоя́ упоко́й во дво́рѣхъ Твои́хъ, и въ нѣ́дрѣхъ Авраа́ма, отъ Ада́ма да́же до дне́сь, послужи́вшія Тебѣ́ чи́сто, отцы́ и бра́тію на́шу, дру́ги вку́пѣ и сро́дники, вся́каго человѣ́ка, въ житіи́ послужи́вша вѣ́рно, и къ Тебѣ́ преста́вльшася многови́дно и многообра́зно, Бо́же, и сподо́би я́ небе́снаго Ца́рствія Твоего́.

Сла́ва, гла́съ 8:

Пла́чу и рыда́ю, егда́ помышля́ю сме́рть, и ви́жду во гробѣ́хъ лежа́щую по о́бразу Бо́жію созда́нную на́шу красоту́, безобра́зну, и безсла́вну, не иму́щу ви́да. Оле чудесе́! Что е́же о на́съ сіе́ бы́сть та́инство? Ка́ко преда́хомся тлѣ́нію? Ка́ко припряго́хомся сме́рти? Вои́стинну Бо́жіимъ повелѣ́ніемъ, я́коже есть пи́сано, подаю́щаго преста́вльшимся поко́й.

И ны́нѣ, богоро́диченъ пе́рвый, гла́са. Свѣ́те ти́хій...

Вмѣ́сто же проки́мна пое́мъ Аллилу́ія, на гла́съ 8:

Сти́хъ: Блаже́ни, я́же избра́лъ и прія́лъ еси́, Го́споди, и па́мять и́хъ въ ро́дъ и ро́дъ.

Сти́хъ: Ду́ши и́хъ во благи́хъ водворя́тся.

На стихо́внѣ, му́чениченъ гла́са и два́ ме́ртвена, Іоа́нна Дамаскина́.

Стихи́ же припѣва́емъ вышерече́нныя: Блаже́ни, я́же избра́лъ и прія́лъ еси́, Го́споди, и па́мять и́хъ въ ро́дъ и ро́дъ. И: Ду́ши и́хъ во благи́хъ водворя́тся.

Сла́ва, гла́съ 6:

Нача́токъ ми́ и соста́въ зижди́тельное Твое́ бы́сть повелѣ́ніе: восхотѣ́въ бо отъ неви́димаго и ви́димаго естества́ жи́ва мя́ соста́вити, отъ земли́ у́бо тѣ́ло созда́въ, да́лъ же ми́ еси́ ду́шу, Боже́ственнымъ Твои́мъ и животворя́щимъ вдохнове́ніемъ. Тѣ́мже, Спа́се, рабы́ Твоя́ во странѣ́ живы́хъ и въ кро́вѣхъ пра́ведныхъ упоко́й.

И ны́нѣ, богоро́диченъ, гла́съ то́йже:

Моли́твами Ро́ждшія Тя́, Христе́, му́ченикъ Твои́хъ, и апо́столъ, и проро́къ, и святи́телей, преподо́бныхъ, и пра́ведныхъ, и всѣ́хъ святы́хъ, усо́пшія рабы́ Твоя́ упоко́й.

Ны́нѣ отпуща́еши... Тропа́рь, гла́съ 8:

Глубино́ю му́дрости человѣколю́бно вся́ стро́яй, и поле́зное всѣ́мъ подава́яй, еди́не Содѣ́телю, упоко́й, Го́споди, ду́ши ра́бъ Твои́хъ: на Тя́ бо упова́ніе возложи́ша, Творца́ и Зижди́теля и Бо́га на́шего.

Сла́ва, и ны́нѣ, богоро́диченъ, гла́съ то́йже:

Тебе́ и стѣ́ну, и приста́нище и́мамы, и моли́твенницу благопрія́тну къ Бо́гу, Его́же родила́ еси́, Богоро́дице безневѣ́стная, вѣ́рныхъ спасе́ніе.

Ектенія́ и отпу́стъ.

[Зри́:] По отпуще́ніи же вече́рни, твори́мъ въ притво́рѣ паннихи́ду за усо́пшихъ, и пое́мъ кано́нъ рядова́го гла́са ме́ртвымъ.


НА УТРЕНИ,

По шестопса́лміи: Аллилу́ія, на гла́съ 8. Тропа́рь: Глубино́ю му́дрости.., два́жды. Сла́ва, и ны́нѣ, богоро́диченъ: Тебе́ и стѣ́ну, и приста́нище... И обы́чное стихосло́віе. Чту́тся же и слова́ о ме́ртвыхъ, къ Кори́нѳяномъ въ 1-мъ посла́ніи. Пою́тъ же ся и непоро́чны на двѣ́ статіи́, съ припѣ́вы: Благослове́нъ еси́, Го́споди, научи́ мя.., на гла́съ 5.

И по ни́хъ тропари́ ме́ртвыхъ, гла́съ 5:

Припѣ́въ: Благослове́нъ еси́, Го́споди, научи́ мя оправда́ніемъ Твои́мъ.

Святы́хъ ли́къ обрѣ́те исто́чникъ жи́зни и две́рь ра́йскую, да обря́щу и а́зъ пу́ть покая́ніемъ: поги́бшее овча́ а́зъ е́смь, воззови́ мя, Спа́се, и спаси́ мя.

Припѣ́въ: Благослове́нъ еси́, Го́споди, [научи́ мя оправда́ніемъ Твои́мъ].

Агнца Бо́жія проповѣ́давше, и закла́ни бы́вше я́коже а́гнцы, и къ жи́зни нестарѣ́емѣй, святíи, и присносу́щнѣй преста́вльшеся. Того́ прилѣ́жно, му́ченицы, моли́те, долго́въ разрѣше́ніе на́мъ дарова́ти.

Припѣ́въ: Благослове́нъ еси́, Го́споди, [научи́ мя оправда́ніемъ Твои́мъ].

Въ пу́ть у́зкій хо́ждшіи приско́рбный, вси́ въ житіи́ кре́стъ, я́ко яре́мъ, взе́мшіи, и Мнѣ́ послѣ́довавшіи вѣ́рою, пріиди́те наслади́теся, и́хже угото́вахъ ва́мъ по́честей и вѣнцо́въ небе́сныхъ.

Припѣ́въ: Благослове́нъ еси́, Го́споди, [научи́ мя оправда́ніемъ Твои́мъ].

Образъ е́смь неизрече́нныя Твоея́ сла́вы, а́ще и я́звы ношу́ прегрѣше́ній: уще́дри Твое́ созда́ніе, Влады́ко, и очи́сти Твои́мъ благоутро́біемъ, и возжелѣ́нное оте́чество пода́ждь ми́, рая́ па́ки жи́теля мя́ сотворя́я.

Припѣ́въ: Благослове́нъ еси́, Го́споди, [научи́ мя оправда́ніемъ Твои́мъ].

Дре́вле у́бо отъ не су́щихъ созда́вый мя́, и о́бразомъ Твои́мъ Боже́ственнымъ почты́й, преступле́ніемъ же за́повѣди па́ки мя́ возврати́вый въ зе́млю, отъ нея́же взя́тъ бы́хъ, на е́же по подо́бію возведи́ дре́внею добро́тою возобрази́тися.

Припѣ́въ: Благослове́нъ еси́, Го́споди, [научи́ мя оправда́ніемъ Твои́мъ].

Упоко́й, Бо́же, рабы́ Твоя́, и учини́ я́ въ раи́, идѣ́же ли́цы святы́хъ, Го́споди, и пра́ведницы сія́ютъ я́ко свѣти́ла, усо́пшія рабы́ Твоя́ упоко́й, презира́я и́хъ вся́ согрѣше́нія.

Сла́ва: Трисія́тельное еди́наго Божества́, благоче́стно пое́мъ, вопію́ще: Свя́тъ еси́, Отче Безнача́льный, Собезнача́льный Сы́не, и Боже́ственный Ду́ше, просвѣти́ на́съ, вѣ́рою Тебѣ́ служа́щихъ, и вѣ́чнаго огня́ исхити́.

И ны́нѣ: Ра́дуйся Чи́стая, Бо́га пло́тію ро́ждшая во спасе́ніе всѣ́хъ, Еюже ро́дъ человѣ́ческій обрѣ́те спасе́ніе: Тобо́ю да обря́щемъ ра́й, Богоро́дице Чи́стая благослове́нная.

Аллилу́ія, аллилу́ія, аллилу́ія, сла́ва Тебѣ́, Бо́же. [Три́жды.]

Посе́мъ ектенія́ о усо́пшихъ: Па́ки и па́ки... Іере́й моли́тву: Бо́же духо́въ...

Мы́ же: Го́споди поми́луй, 40. И по возгла́сѣ сѣда́ленъ, гла́съ 5:

Поко́й, Спа́се на́шъ, съ пра́ведными рабы́ Твоя́, и сія́ всели́ во дворы́ Твоя́, я́коже е́сть пи́сано: презира́я, я́ко бла́гъ, прегрѣше́нія и́хъ во́льная и нево́льная, и вся́ я́же въ вѣ́дѣніи и не въ вѣ́дѣніи, Человѣколю́бче.

Сла́ва, и ны́нѣ, богоро́диченъ:

Отъ Дѣ́вы возсія́вый мíру, Христе́ Бо́же, и сы́ны свѣ́та То́ю показа́вый, поми́луй на́съ.

Стихосло́вимъ же: Го́сподеви пое́мъ... Кано́нъ же пое́мъ свята́го оби́тели на 6, и тріо́ди на 8. Пое́тъ же ся и 2-я пѣ́снь безъ стихосло́вія. И пѣ́сни Псалти́ра.

Кано́нъ Студи́та творе́ніе, въ тро́ичныхъ и богоро́дичныхъ тропаре́хъ краестро́чіе: Недосто́йнаго Ѳео́дора. Гла́съ 8.
Пѣ́снь 1.

Ирмо́съ: Пѣ́снь возсле́мъ, лю́діе, чу́дному Бо́гу на́шему, свободи́вшему Изра́иля отъ рабо́ты, пѣ́снь побѣ́дную пою́ще и вопію́ще: пои́мъ Тебѣ́, Еди́ному Влады́цѣ.

Вси́ помо́лимся Христу́, творя́ще па́мять дне́сь отъ вѣ́ка ме́ртвыхъ, да вѣ́чнаго огня́ изба́витъ я́, въ вѣ́рѣ усо́пшія и наде́ждѣ жи́зни вѣ́чныя.

Глубино́ю суде́бъ Твои́хъ, Христе́, всепрему́дрѣ Ты́ предопредѣли́лъ еси́ коего́ждо кончи́ну жи́зни, предѣ́лъ и о́бразъ. Тѣ́мже я́же покры́ гро́бъ во вся́кой странѣ́, на судѣ́ спаси́, Всеще́дрый.

Преде́лы жи́зни на́шея да́вый, тѣ́мже усо́пшія отъ жите́йскія но́щи, дне́ невече́рняго сы́ны покажи́, Го́споди, свяще́нники правосла́вныя, цари́ же и вся́ лю́ди Твоя́.

Яже покры́ вода́, и бра́нь пожа́тъ, тру́съ же я́же объя́тъ, и убíйцы уби́ша, и о́гнь я́же попали́, вѣ́рныя, Ми́лостиве, въ ча́сти учини́ пра́ведныхъ.

Вся́ презира́яй плотскíя до́лги на́ша, Спа́се на́шъ, во вся́комъ во́зрастѣ всего́ ро́да человѣ́ча, предъ суди́щемъ Твои́мъ поста́ви неосужде́ны, Тебѣ́, Созда́телю, отвѣща́ющія.

Сла́ва, тро́иченъ: Тріеди́наго Естества́ пою́ Ли́ца Самоѵпоста́сная: Нерожде́нна Отца́, Сы́на Ро́ждшагося, и Ду́ха Свята́го, — безнача́льное Ца́рство, вла́сть, Божество́ еди́но.

[И ны́нѣ,] богоро́диченъ: Вои́стинну Ты́ яви́лася еси́ не́бо на земли́, бо́льшее вы́шняго небесе́, Безневѣ́стная Дѣ́во: изъ Тебе́ бо возсія́ Со́лнце въ мíрѣ, влады́чествуяй пра́вдою.

Катава́сія: Пѣ́снь возсле́мъ, лю́діе, чу́дному Бо́гу на́шему, свободи́вшему Изра́иля отъ рабо́ты, пѣ́снь побѣ́дную пою́ще и вопію́ще: пои́мъ Тебѣ́, Еди́ному Влады́цѣ.

Пѣ́снь 2.

Ирмо́съ: Ви́дите ви́дите, я́ко Азъ есмь Богъ вашъ, пре́жде вѣкъ рожде́нный отъ Отца́, и отъ Дѣ́вы въ послѣ́дняя безъ му́жа заче́ншійся, и разруши́вый грѣхъ пра́отца Ада́ма, я́ко Человѣколю́бецъ.

Ви́дите, ви́дите, я́ко Азъ е́смь Бо́гъ ва́шъ, пра́веднымъ судо́мъ водрузи́вый предѣ́лы жи́зни, въ нетлѣ́ніе отъ тли́ пріе́мляй вся́ усо́пшія въ наде́жди вѣ́чнаго воскре́снія.

Отъ четы́рехъ коне́цъ, Го́споди, пріе́мляй вѣ́рно усо́пшія въ мо́ри или́ на земли́, или́ въ рѣка́хъ, исто́чницѣхъ, или́ е́зерѣхъ, или́ въ рове́нницѣхъ снѣ́дь звѣре́мъ бы́вшія, и пти́цамъ, и гадо́мъ, вся́ упоко́й.

Въ Твое́й дла́ни вся́ческая, Го́споди, предразсуди́лъ еси́, разрѣ́шшіяся въ соста́вы четы́ри: въ прише́ствіи Твое́мъ собра́въ воскреси́, вся я́же въ невѣ́дѣніи, и ра́зумѣ, проща́я тѣ́мъ прегрѣше́нія.

О, стра́шнаго Твоего́ втора́го, Го́споди, прише́ствія! Зане́ я́ко въ ви́дѣ мо́лніи на зе́млю прише́дъ, воздви́гнеши все́ созда́ніе Твое́ суди́тися, въ вѣ́рѣ Тебѣ́ тогда́ пожи́вшихъ, срѣ́тшихъ Тя́ съ Тобо́ю бы́ти сподо́би.

Сла́ва, тро́иченъ: Пресоверше́нная Еди́нице, Пребоже́ственная, Тріѵпоста́сная: Нерожде́нне Отче, и Сы́не Единоро́дне, Ду́ше отъ Отца́ исходя́й, Сы́номъ же явля́яйся, — Существо́ еди́но и Естество́, Госпо́дьство, Ца́рство, спаси́ всѣ́хъ на́съ.

[И ны́нѣ,] богоро́диченъ: Неизглаго́ланное чу́до Твоего́ Рождества́, Ма́ти Дѣ́во: ка́ко бо и ражда́еши, и Чиста́ еси́ въ то́мже? Ка́ко Отроча́ ражда́еши, и не вѣ́си иску́са му́жеска отню́дъ? Якоже вѣ́сть па́че естества́ отъ Мене́ новолѣ́пно Сло́во Бо́жіе ро́ждшееся.

Катава́сія: Ви́дите ви́дите, я́ко Азъ есмь Богъ вашъ, пре́жде вѣкъ рожде́нный отъ Отца́, и отъ Дѣ́вы въ послѣ́дняя безъ му́жа заче́ншійся, и разруши́вый грѣхъ пра́отца Ада́ма, я́ко Человѣколю́бецъ.

Пѣ́снь 3.

Ирмо́съ: Утвержде́й руко́ю Твое́ю, Сло́ве Бо́жій, небеса́ просвеще́ніемъ Твоего́ и́стиннаго позна́нія, утверди́ и на́съ, на Тя́ надѣ́ющихся сердца́.

Преше́дшія житія́ тече́ніе въ сла́вѣ благоче́стной пра́веднымъ одѣ́ятися вѣнце́мъ сподо́би, Бо́же, и вѣ́чныхъ бла́гъ наслади́тися.

Напра́сно восхище́нныя, попаля́емыя отъ мо́лніи, и изме́рзшія мра́зомъ, и вся́кою ра́ною, упоко́й, Бо́же, егда́ огне́мъ вся́ иску́сиши.

Присному́тное житія́ мо́ре преплы́вшія, Христе́, въ нетле́нное Твоего́ житія́ сподо́би приста́нище притещи́, правосла́внымъ житіе́мъ окормле́ныя.

Ихже вся́кое естество́ морски́хъ и пти́цъ небе́сныхъ, прія́тъ снѣде́ніе, Христе́, Твои́ми судьба́ми, воскреси́ Бо́же, въ послѣ́дній де́нь со сла́вою.

Сла́ва, тро́иченъ: Умно Боже́ственную Еди́ницу, въ Три́ Ли́ца про́сто, ку́пно е́же пресѣщи́, совокупля́ю несѣко́мая: я́коже бо ско́рость мо́лніи, трисія́ющая ви́дится во еди́нствѣ.

[И ны́нѣ,] богоро́диченъ: Недоумѣ́нное Твое́ чу́до: безъ му́жа бо ражда́еши и дѣ́вство Твое́, Чи́стая, соблюда́еши ро́ждши. Тѣ́мже а́нгелъ мно́жество, и человѣ́ческій ро́дъ пое́тъ Тя́ во вѣ́ки.

Катава́сія: Утвержде́й руко́ю Твое́ю, Сло́ве Бо́жій, небеса́ просвеще́ніемъ Твоего́ и́стиннаго позна́нія, утверди́ и на́съ, на Тя́ надѣ́ющихся сердца́.

Сѣда́ленъ, гла́съ 5. Подо́бенъ: Собезнача́льное Сло́во.

На́съ ра́ди претерпѣ́вый кре́стъ и сме́рть, и умертви́вый адъ, и совоскреси́вый ме́ртвыя, преста́вльшіяся отъ на́съ, Спа́се, упоко́й, я́ко Человѣколю́бецъ Бо́гъ, и въ тре́петное и стра́шное прише́ствіе Твое́, Жизнода́вче, я́ко имѣ́яй мно́жество ми́лости, Ца́рствія Твоего́ сподо́би.

Сла́ва, то́йже. И ны́нѣ, богоро́диченъ:

Ско́рый Тво́й покро́въ, и по́мощь, и ми́лость покажи́ на рабѣ́хъ Твои́хъ, и во́лны, Чи́стая, укроти́ су́етныхъ помышле́ній, и па́дшую ду́шу мою́ возста́ви, Богоро́дице: вѣ́мъ бо, вѣ́мъ Дѣ́во, я́ко мо́жеши, ели́ка и хо́щеши.

Пѣ́снь 4.

Ирмо́съ: Изъ горы́ приосѣне́нныя, Сло́ве, проро́къ, еди́ныя Богоро́дицы, хотя́ща воплоти́тися богови́дно усмотри́ и со стра́хомъ славосло́вяше си́лу Твою́.

Отцы́ и пра́отцы, дѣ́ды и пра́дѣды, отъ пе́рвыхъ и да́же до послѣ́днихъ, во благозако́ніи уме́ршія и благовѣ́ріи, вся́ помяни́, Спа́се нашъ.

Въ горѣ́, на пути́, на мѣ́стѣхъ пусты́хъ житіе́ оста́вльшія въ вѣ́рѣ, мона́хи же и бѣльцы́, ю́ноши и ста́рцы, со святы́ми, Христе́, всели́.

Отъ печа́ли и ра́дости преше́дшія ненаде́жно, вѣ́рою а́біе премѣни́вшія житіе́, въ благоде́нствіи пострада́вшія, или́ злоде́нствіи, вся́ упоко́й, Спа́се на́шъ.

Яже уби́ ме́чь, и ко́нь совосхи́ти, гра́дъ, снѣ́гъ и ту́ча умноже́нная: я́же удави́ пли́нѳа, или́ пе́рсть посы́па, Христе́ Спа́се на́шъ, упоко́й.

Сла́ва, тро́иченъ: Стра́нно я́ко Еди́но, и Три́, Божество́ все по Еди́ному Лицу́ нераздѣ́льно: Оте́цъ бо, Сынъ, и Ду́хъ Святы́й е́сть покланя́емь, я́ко Единъ Богъ.

[И ны́нѣ,] богоро́диченъ: Напра́ви насъ, Дѣ́во, моли́твами Твои́ми, окормля́ющи обурева́емыя волно́ю грѣха́, во спаси́тельная приста́нища, Господороди́тельнице, избавля́ющи отъ вся́кихъ лю́тыхъ.

Катава́сія: Изъ горы́ приосѣне́нныя, Сло́ве, проро́къ, еди́ныя Богоро́дицы, хотя́ща воплоти́тися богови́дно усмотри́ и со стра́хомъ славосло́вяше си́лу Твою́.

Пѣ́снь 5.

Ирмо́съ: Утренюетъ ду́хъ мо́й къ Тебѣ́, Бо́же, зане́ свѣ́тъ повелѣ́нія прише́ствія Твоего́, и́миже у́бо озари́ у́мъ на́шъ, Влады́ко, и наста́ви на стезю́ жи́зни.

Коего́ждо па́мять уме́ршихъ благоче́стно отъ вѣ́ка дне́сь творя́ще, Го́споди, прилѣ́жно Ти́ вопіе́мъ: вся́ упоко́й со святы́ми Твои́ми.

Отъ вся́каго, я́же прія́лъ еси́, ро́да и ро́да въ царѣ́хъ, въ князѣ́хъ, или́ мона́шествующихъ правосла́вныя, Ще́дре, вѣ́чнаго изба́ви муче́нія.

Всѣ́хъ, я́же созда́лъ еси́ поле́зная вѣ́дый, и́мже попусти́лъ еси́, Го́споди, внеза́пными паде́жьми ненаде́жно умре́ти, изба́ви му́ки вся́кія, Бо́же на́шъ.

Огня́ при́сно паля́щаго, и отъ тмы́ несвѣти́мыя, скре́жета зубна́го, и че́рвія безконе́чно му́чащаго и вся́каго муче́нія изба́ви, Спа́се на́шъ, вся́ вѣ́рно уме́ршія.

Сла́ва, тро́иченъ: Единопресто́льная, Безнача́льная, Тріѵпоста́сная Еди́нице, раздѣле́ніемъ Еди́нство, и вопроти́въ Ли́цы Естество́ иму́щая, во еди́но на́съ совокупи́ хотѣ́ніе Твои́хъ за́повѣдей.

[И ны́нѣ,] богоро́диченъ: Па́че огнезра́чныхъ серафи́мовъ яви́лася еси́ Чи́стая Честнѣ́йшая, поро́ждши си́мъ непристу́пнаго Іису́са Спа́са, воплоще́ніемъ обожи́вшаго земноро́дныхъ смѣше́ніе.

Катава́сія: Утренюетъ ду́хъ мо́й къ Тебѣ́, Бо́же, зане́ свѣ́тъ повелѣ́нія прише́ствія Твоего́, и́миже у́бо озари́ у́мъ на́шъ, Влады́ко, и наста́ви на стезю́ жи́зни.

Пѣ́снь 6.

Ирмо́съ: Содержи́ма мя́, пріими́, Человѣколю́бче, грѣхи́ мно́гими, и припа́дающа щедро́тамъ Твои́мъ, я́ко проро́ка, Го́споди, и спаси́ мя.

Сме́рти разрѣши́въ болѣ́зни, пострада́въ, Нача́льниче жи́зни Бо́же на́шъ, усо́пшія отъ вѣ́ка рабы́ Твоя́ упоко́й.

Неизглаго́ланными Твои́ми судьба́ми, я́же уби́ша чаро́вная напое́нія, отра́вы, ко́стная удавле́нія, со святы́ми, Го́споди, упоко́й.

Егда́ суди́ти бу́деши вся́ческимъ, стоя́щимъ наги́мъ и открове́нымъ предъ лице́мъ Твои́мъ: тогда́, Ще́дре, пощади́ послужи́вшія Ти́ вѣ́рно, Бо́же.

Послѣ́днею у́бо трубо́ю воструби́вшу Твоему́ арха́нгелу, въ воскресе́ніе жи́зни всѣ́хъ, тогда́ Христе́, рабы́ Твоя́ упоко́й.

Отъ вѣ́ка я́же прія́лъ еси́ вѣ́рныя, Бо́же, ро́дъ вся́кій человѣ́ческій сподо́би во вѣ́ки со служа́щими Тебѣ́, сла́вити Тя́.

Сла́ва, тро́иченъ: Богонача́ліе Трисвято́е, Единопресто́льное, Отче, Сы́не со Святы́мъ Ду́хомъ, Ты́ еси́ Бо́гъ мо́й, вседержи́тельствомъ Твои́мъ содержа́й все́.

[И ны́нѣ,] богоро́диченъ: Отъ ко́рене твоего́ возсія́ Цвѣ́тъ Жи́зни, Іессе́е пра́отче, взыгра́й, спаса́яй міръ: отъ Чи́стыя Отрокови́цы Христо́съ Богъ.

Катава́сія: Содержи́ма мя́, пріими́, Человѣколю́бче, грѣхи́ мно́гими, и припа́дающа щедро́тамъ Твои́мъ, я́ко проро́ка, Го́споди, и спаси́ мя.

Конда́къ, [гла́съ 8]:

Со святы́ми упоко́й, Христе́, ду́ши ра́бъ Твои́хъ, идѣ́же нѣ́сть болѣ́знь, ни печа́ль, ни воздыха́ніе, но жи́знь безконе́чная.

Икосъ:

Са́мъ Еди́нъ еси́ Безсме́ртный, сотвори́вый и созда́вый человѣ́ка: земнíи у́бо отъ земли́ созда́хомся и въ зе́млю ту́южде по́йдемъ, я́коже повелѣ́лъ еси́, созда́вый мя́, и рекíй ми́: я́ко земля́ еси́ и въ зе́млю оты́деши, а́може вси́ человѣ́цы по́йдемъ, надгро́бное рыда́ніе творя́ще пѣ́снь: аллилу́ія.

Синакса́рій пе́рвѣе мине́и, та́же настоя́щій.

Стихи́: Не воспомина́й прегрѣше́ній уме́ршихъ, Сло́ве.

             Благíя Твоя́ щедро́ты ме́ртвы не показу́яй.

Въ сíй де́нь па́мять отъ вѣ́ка благоче́стно сконча́вшихся человѣ́ковъ всѣ́хъ боже́ственнѣйшіи отцы́ узако́ниша соверша́ти, вины́ ра́ди сицевы́. Поне́же бо нѣ́цыи безго́дную мно́гажды на стра́нствѣ подъя́ша сме́рть: въ мо́ри же и непрохо́дныхъ гора́хъ, стремни́нахъ же и про́пастехъ, и па́губахъ, и гла́дѣхъ, и запале́ніяхъ, и ле́дахъ, и бра́нехъ, и сту́деняхъ, и ины́я вся́кія сме́рти претерпѣ́вше, ра́вно же и убо́зіи су́ще и немощнíи, и узако́ненныхъ псалмо́въ и пѣ́сней па́мяти не получи́ша, человѣколю́бнѣ боже́ственніи отцы́ дви́жими, о́бщно па́мять си́хъ всѣ́хъ твори́ти собо́рнѣй Це́ркви узако́ниша, отъ свяще́нныхъ апо́столъ пріе́мше, да и узако́ненныхъ по ча́сти нѣ́кимъ слу́чаемъ не получи́вше, ны́нѣ о́бщею па́мятію и сíи помина́ются, показу́юще, я́ко и я́же о ни́хъ быва́емая, вели́ку тѣ́мъ хода́тайствуютъ по́льзу. По еди́ному у́бо о́бразу си́це Бо́жія Це́рковь па́мять сотворя́етъ душа́мъ. Второ́е же, поне́же второ́е Христо́во прише́ствіе положи́ти на у́трешній де́нь хотя́ху, прили́чно и душа́мъ па́мять сотворя́ютъ, я́коже у́бо стра́шнаго Судію́ и необинове́ннаго умоля́юще, обы́чную ми́лость къ ни́мъ употреби́ти и обѣтова́ннѣй тѣ́хъ учини́ти пи́щи. Ина́ко же, и Ада́мово изгна́ніе святíи хотя́ще въ пріиду́щую изложи́ти недѣ́лю, я́коже нѣ́кое поко́ище предумышля́ютъ. И коне́чнѣе всѣ́хъ, е́же по на́мъ, настоя́щимъ ны́нѣ упокое́ніемъ, да отту́ду я́ко изъ нача́ла на́чнутъ. Еже бо послѣ́днѣйшее всѣ́хъ отъ на́съ, пожи́вшихъ, отъ неумы́тнаго Судіи́ бу́детъ испыта́ніе, и да человѣ́ки си́ми устраши́вше, къ поста́ подвиго́мъ сотворя́тъ благоудо́бны. Въ суббо́ту же при́сно душа́мъ па́мять твори́мъ, я́ко суббо́та упокое́ніе зна́менуетъ евре́йски. И уме́ршихъ у́бо, я́ко отъ жите́йскихъ и про́чихъ всѣ́хъ упоко́ившихся и въ поко́ищнѣмъ дни́, за ни́хъ мольбы́ твори́мъ, е́же у́бо и на вся́ку удержа́ся быва́ти суббо́ту, а е́же ны́нѣ собо́рнѣ помина́емъ, за вся́каго моля́щеся благочести́ваго. Вѣ́дуще у́бо боже́ственніи отцы́, я́ко я́же за усо́пшихъ быва́емыя па́мяти, глаго́лю, ми́лостыни и слу́жбы вели́ку тѣ́мъ подаю́тъ осла́бу и по́льзу, и осо́бнѣ и о́бще сіе́ Це́ркви твори́ти поуща́ютъ, отъ святы́хъ апо́столъ сіе́ пріе́мше, я́ко рече́ся. Якоже и Ареопаги́тъ глаго́летъ Діони́сій: Яко по́льзуютъ ду́ши о ни́хъ быва́емая. Явѣ у́бо и отъ и́ныхъ мно́гихъ. Но и отъ по́вѣсти по свято́му Мака́рію, и́же му́жа нечести́ва е́ллина су́ху лби́ну на пути́ мимоходя́ обрѣ́тъ, вопроша́ше: Аще нѣ́кое когда́ во а́дѣ утешѣ́нія чу́вство и́мутъ? Та́я же отвѣща́: Мно́гу тѣ́мъ осла́бу имѣ́ти, внегда́ за усо́пшихъ мо́лишися, о́тче, ре́кши. Бя́ше бо сіе́ творя́ вели́кій и моля́ся Бо́гу, увѣ́дати жела́я, а́ще по́льза нѣ́кая преждеусо́пшимъ отсю́ду бы́сть. Но и Григо́рій Бесѣ́довникъ, моли́твою царя́ Трая́на спасе́, слы́шавъ отъ Бо́га, никогда́же ему́ о нечести́вѣмъ моли́тися. Ей у́бо, и богоме́рзкаго Ѳео́фила Ѳеодо́ра цари́ца святы́ми мужми́ и исповѣ́дники отъ муче́ній исхи́ти и спасе́, я́коже повѣствова́ся. Составля́етъ же о усо́пшихъ дая́нія я́ко блага́я, и Богосло́въ Григо́рій въ надгро́бнѣмъ сло́вѣ, е́же къ Кеса́рію бра́ту. Вели́кій же Златоу́стъ, е́же къ Филипписíомъ, та́ко рече́: Умы́слимъ отше́дшимъ по́льзу, дади́мъ и́мъ прили́чное поможе́ніе, ми́лостыни, глаго́лю, и приноше́нія, и́бо вели́кую отра́ду си́мъ ве́щь прино́ситъ, и наипа́че пріобрѣ́теніе и по́льзу. Ни бо́ всу́е, я́коже ключи́ся, сія́ узаконоположи́шася, и Бо́жіей Це́ркви отъ Его́ всему́дрыхъ учени́къ преда́шася, е́же на стра́шныхъ та́йнахъ па́мять твори́ти свяще́ннику о усо́пшихъ въ вѣ́рѣ. И па́ки: Во твое́мъ учине́ніи, съ ча́ды и сро́дники снаслѣ́дника да и́мать писа́ніе твое́, и Судіино́ и́мя. И па́мять ти́ да не безча́ствуетъ ни́щихъ, и а́зъ си́мъ спору́чникъ. Глаго́летъ же и вели́кій Аѳана́сій: Аще и на возду́хъ во благоче́стіи сконча́выйся положе́нъ бы́сть, не отрица́йся ма́сла и свѣ́щъ, Христа́ Бо́га призыва́я, на гро́бѣ запали́ти: прія́тна бо су́ть сія́ Бо́гу, и мно́гое сія́ принося́ща воздая́ніе. Аще у́бо грѣ́шенъ уме́рый, да разрѣши́ши его́ прегрѣше́нія; а́ще ли же пра́веденъ, да мзда́мъ приложе́ніе бу́детъ. Аще же не́гли кто́ стра́ненъ и ни́щъ сы́й, не и́мать о си́хъ пеку́щагося, но Бо́гъ пра́веденъ и человѣколю́бецъ сы́й, намѣ́ритъ и о́ному за нищету́, я́ко вѣ́сть, ра́вну ми́лость. Инако же, и принося́й за сицевы́я, мзды́ соприча́ствуетъ, я́ко любо́вь о спасе́ніи бли́жняго показу́яй. Якоже ино́го помазу́яй мѵ́ромъ, о́нъ себе́ пре́жде благоуха́етъ, я́коже и повелѣ́нная, и завѣ́ты въ сицевы́хъ. Не исполня́ющіи же, су́дъ вся́чески имѣ́ти бу́дутъ, до́ндеже у́бо второ́е пріи́детъ Христо́во прише́ствіе. Ели́ка у́бо за усо́пшихъ быва́ютъ, по́льзу даю́тъ, я́коже боже́ственніи отцы́ глаго́лютъ, и наипа́че ма́лая нѣ́кая содѣ́лавшимъ блага́я, егда́ съ живу́щими бя́ху сопричте́ни. Аще у́бо и нѣ́кая [су́ть] я́ко долго́въ къ цѣлому́дрію мно́гихъ, Боже́ственное глаго́летъ писа́ніе, но Бо́жіе человѣколю́біе я́ко на мно́жае побѣжда́етъ. Аще бо ра́вный вѣ́съ обря́щется до́брыхъ и гну́сныхъ, побѣжда́етъ человѣколю́бное. Аще же и ма́ло что́ злы́хъ мѣ́рило отягча́ется, преодолѣва́етъ па́ки преблаго́е. Вѣ́домо же бу́ди, я́ко позна́ютъ та́мо дру́гъ дру́га вси́, я́же зна́ютъ же, и я́же никогда́же ви́дѣша, [я́коже боже́ственный глаго́летъ Златоу́стый, отъ при́тчи къ бога́тому и Ла́зарю сіе́ составля́я,] оба́че не тѣле́снымъ нѣ́кимъ о́бразомъ: еди́нъ бо во́зрастъ вси́, и я́же отъ бытія́ позна́нія пріи́мутъ, зри́тельнымъ же о́комъ душе́внымъ, я́ко и Богосло́въ въ надгро́бнѣмъ сло́вѣ къ Кеса́рію глаго́летъ: Тогда́, глаго́ля, Кеса́рія узрю́ свѣ́тла, сла́вна, яко́въ ми́ во снѣ́ мно́гащи яви́лася еси́, бра́тій любе́знѣйшій. Вели́кій же и мно́гій Аѳана́сій, а́ще и не глаго́летъ си́це въ словесѣ́хъ ко кня́зю Антіо́ху, но въ сло́вѣ о усо́пшихъ глаго́летъ: Яко и да́же до о́бщаго воскресе́нія, даде́ся святы́мъ дру́гъ дру́га познава́ти и свесели́тися, грѣ́шніи же и сего́ лиши́шася. Святы́мъ же му́ченикомъ, и я́же отъ на́съ твори́мая назира́ти даде́ся, и посѣща́ти. Тогда́ же дру́гъ дру́га вси́ позна́ютъ, егда́ и сокрове́ная всѣ́хъ явя́тся. Вѣ́домо же бу́ди, я́ко ны́нѣ въ нѣ́кихъ мѣ́стѣхъ отлуче́нныхъ ду́ши святы́хъ пребыва́ютъ, и грѣ́шныхъ па́ки осо́бь: о́віи упова́ніемъ ра́дующеся, о́віи же злы́хъ ча́яніемъ печа́лующеся. Не взя́ша бо святíи обѣтова́нія благи́хъ и еще́, я́коже глаго́летъ боже́ственный апо́столъ: Бо́гу лу́чшее нѣ́что о на́съ предувѣ́дѣвшу, да не кромѣ́ на́съ соверша́тся. Подоба́етъ же вѣ́дати, я́ко не вси́ въ про́пасти впада́ющіи, и во о́гнь, и въ мо́ре, и глаго́лемыя па́губы, и сту́дени, и гла́дъ, по повелѣ́нію Бо́жію сіе́ стра́ждутъ: сія́ бо су́ть Бо́жія судьбы́, и́хже о́ва быва́ютъ по благоволе́нію, о́ва же по попуще́нію; друга́я же и вѣ́дѣнія ра́ди и преще́нія, и уцѣломудре́нія ины́хъ быва́ютъ. И предразуми́тельнымъ у́бо сло́вомъ вѣ́сть вся́ и зна́етъ, и во́лею Его́ быва́ютъ, я́коже и о пти́цахъ глаго́летъ свято́е Ева́нгеліе. Не опредѣлева́етъ же си́це бы́ти, кромѣ́ нѣ́кіихъ, вку́пѣ е́же дѣ́ятися по слу́чаю: о́вому у́бо удави́тися, о́вому же умре́ти, и о́вому у́бо ста́ру, о́вому же мла́ду. Но еди́ною опредѣли́ собо́рное человѣ́ческое вре́мя, и толи́кія сме́ртей о́бразы, вну́трь у́бо толи́кихъ време́нъ, разли́чны сме́ртей о́бразы нано́сятся. Не у́бо испе́рва повелѣва́ющу Бо́гу, зна́ющу у́бо къ жи́тельству еди́наго коего́ждо, совѣ́тъ Бо́жій, вре́мя же и о́бразъ сме́рти его́ сокраща́етъ. Аще ли же предопредѣле́ніе жи́зни, глаго́летъ вели́кій Васи́лій, но земля́ еси́, и въ зе́млю оты́деши гада́тельствуется. Глаго́летъ бо апо́столъ къ Кори́нѳяномъ пиша́: Зане́ недосто́йнѣ причаща́етеся, сего́ ра́ди въ ва́съ мно́зи не́мощни и нездра́ви, и спя́тъ дово́льно, си́рѣчь, умира́ютъ мно́зи (Зач. 149). И Дави́дъ глаго́летъ: Да не возведе́ши мене́ въ преполове́ніе дне́й мои́хъ. И: измѣ́рены положи́лъ еси́ дни́ моя́ (Псал. 101 и 38). И Соломо́нъ: Сы́не, чти́ отца́ твоего́ и ма́терь, я́ко да бу́деши многолѣ́тенъ. И па́ки: Да не у́мреши не во вре́мя. И во Іовѣ, ко Елифа́зу Бо́гъ глаго́летъ: Потреби́лъ бы́хъ у́бо ва́съ, а́ще не за Іова раба́ Моего́ (Іов. 42). Якоже показу́ется, не предѣ́лу бы́ти жи́зни. Аще же кто́ сіе́ глаго́летъ: предѣ́лъ ми́ разумѣва́й Бо́жій, во́лю Его́: ему́же бо хо́щетъ, прилага́етъ, умаля́етъ же друга́го, вся́ къ по́льзѣ устроя́я, и егда́ восхо́щетъ Бо́гъ, усмотря́етъ и о́бразъ тогда́, и вре́мя. Предѣ́лъ у́бо кого́ждо жи́зни е́сть, я́коже вели́кій глаго́летъ Аѳана́сій, во́ля и совѣ́тъ Бо́жій, си́мъ сло́вомъ и глубино́ю суде́бъ Твои́хъ Христе́, исцѣли́ши. И е́же вели́каго Васи́лія сме́рти глаго́люща наво́дятся, предѣ́ломъ жи́зни сконча́вшимся, предѣ́лы же жи́зни, во́лю глаго́лемъ Бо́жію. Аще бо предѣ́лъ е́сть жи́зни, чесо́ ра́ди мо́лимся Бо́гу, и враче́мъ и за дѣ́ти мо́лимся? Вѣ́дати же и сіе́ подоба́етъ, я́ко креще́нніи младе́нцы пи́щи насладя́тся, непросвѣ́щенніи же и язы́честіи, ниже́ въ пи́щу, ниже́ въ гее́нну по́йдутъ. Исходя́щи у́бо душа́ отъ тѣ́ла, ни еди́но попече́ніе здѣ́шнихъ и́мать, но о та́мошнихъ при́сно пече́тся. Трети́ны у́бо твори́мъ, я́ко въ тре́тій де́нь человѣ́къ ви́да измѣня́ется. Девяти́ны же, я́ко тогда́ все́ расти́чется зда́ніе, храни́му се́рдцу еди́ному. Четыредесяти́ны же, я́ко и са́мое се́рдце тогда́ погиба́етъ. И рожде́ніе бо си́це происхо́дитъ: въ тре́тій бо де́нь живопису́ется се́рдце, въ девя́тый же составля́ется въ пло́ть, въ четыредеся́тый же въ соверше́нный ви́дъ вообража́ется. За сію́ вину́ душа́мъ па́мять твори́мъ, я́же въ пра́ведныхъ Твои́хъ селе́ніихъ учини́, Влады́ко Христе́, и поми́луй на́съ, я́ко еди́нъ Безсме́ртенъ, ами́нь.

Пѣ́снь 7.

Ирмо́съ: Въ нача́лѣ зе́млю основа́вый и небеса́ сло́вомъ утверди́вый, благослове́нъ еси́ во вѣ́ки, Го́споди, Бо́же оте́цъ на́шихъ.

Благоче́стно отъ вѣ́ка преста́вльшихся па́мять творя́ще, вопіе́мъ: благослове́нъ еси́ во вѣ́ки, Го́споди, Бо́же оте́цъ на́шихъ.

Внеза́пу благоче́стно уме́ршія, и отъ стремни́ны вся́ческія па́дшія, дре́ва, желѣ́за, вся́каго ка́мене, упоко́й, Бо́же, усо́пшія вѣ́рныя.

Въ стра́шное Твое́ прише́ствіе, Ще́дре, одесну́ю ове́цъ Твои́хъ поста́ви, правосла́вно Ти́ въ жи́зни послужи́вшія, Христе́, и преста́вльшіяся къ Тебѣ́.

Въ ли́цѣ, Христе́, избра́нныхъ Твои́хъ вчини́ Твоя́ рабы́, вопи́ти Тебѣ́: благослове́нъ еси́ во вѣ́ки, Го́споди, Бо́же оте́цъ на́шихъ.

Отъ земли́ пе́рсть содѣ́тельствовавый, пло́ть Ду́хомъ оживотвори́вый, Спа́се ще́дрый, я́же прія́лъ еси́, упоко́й, Бо́же, въ нестарѣ́ющемъ животѣ́.

Сла́ва, тро́иченъ: Якоже Треми́ Со́лнцы Божество́, Еди́нымъ Свѣ́та срастворе́ніемъ, да воспое́тся, Оте́цъ, и Сынъ, и Боже́ственный Ду́хъ, еди́нъ Естество́мъ, но Три́ Ѵпоста́сьми.

[И ны́нѣ,] богоро́диченъ: Дави́дское согла́сно воспѣва́емъ Ти́ пѣ́ніе, го́ру Тя́ Бо́жію нарица́юще, Дѣ́во, въ не́йже всели́вся пло́тію Сло́во, обоготвори́ на́съ духо́вно въ Себѣ́.

Катава́сія: Въ нача́лѣ зе́млю основа́вый и небеса́ сло́вомъ утверди́вый, благослове́нъ еси́ во вѣ́ки, Го́споди Бо́же оте́цъ на́шихъ.

Пѣ́снь 8.

Ирмо́съ: На горѣ́ святѣ́й просла́вльшася и въ купинѣ́ огне́мъ Приснодѣ́вы Моисе́ови та́йну я́вльшаго, Го́спода по́йте и превозноси́те во вся́ вѣ́ки.

Сокруши́вый пе́рвѣе сѣ́нь сме́ртную, возсія́въ я́ко со́лнце изъ гро́ба, сы́ны Воскресе́нія Твоего́ сотвори́, Го́споди сла́вы, вся́ уме́ршія въ вѣ́рѣ, во вѣ́ки.

Безвѣ́стныхъ и сокрове́нныхъ Свѣ́дѣтелю, егда́ и́маши откры́ти дѣла́ тмы́ и совѣ́ты серде́цъ на́шихъ, тогда́ не истяжи́ сло́ва со всѣ́ми вѣ́рою усо́пшими.

Егда́ и́маши сѣ́сти на престо́лѣ, и повели́ши на су́дъ предста́ти, со́браннымъ трубо́ю отъ коне́цъ земли́, тогда́ пощади́ всѣ́хъ, Христе́, я́ко ми́лостивый.

Уме́ршимъ напра́сно отъ слу́чаевъ, отъ кли́ча же зѣ́льнаго и ско́раго тече́нія, зауше́нія, удавле́нія же, и ляга́нія, Го́споди сла́вы, вѣ́рою усо́пшимъ осла́би во вѣ́ки. Благослови́мъ Отца́ и Сы́на и Свята́го Ду́ха, Го́спода.

Яко Еди́ницу Существо́мъ пою́ Тя, я́ко Тро́ицу Ли́цы Тя́ чту́: Отче, и Сы́не, и Ду́ше Пресвяты́й, безнача́льную держа́ву Твоего́ Ца́рствія сла́влю во вѣ́ки.

[И ны́нѣ,] богоро́диченъ: Струи́ живы́я Исто́чникъ запечатлѣ́нный, показа́лася еси́, Богоро́дице Дѣ́во: безъ му́жа бо Го́спода ро́ждши, безсме́ртія вѣ́рныя напая́еши водо́ю во вѣ́ки. Хва́лимъ, благослови́мъ, [покланя́емся Го́сподеви, пою́ще и превознося́ще во вся́ вѣ́ки].

Ирмо́съ: На горѣ́ святѣ́й просла́вльшася и въ купинѣ́ огне́мъ Приснодѣ́вы Моисе́ови та́йну я́вльшаго, Го́спода по́йте и превозноси́те во вся́ вѣ́ки.

Пѣ́снь 9.

Ирмо́съ: Проявле́нное на горѣ́ законополо́жнику во огни́ и купинѣ́, Рождество́ Приснодѣ́вы, въ на́ше вѣ́рныхъ спасе́ніе, пѣ́сньми немо́лчными велича́емъ.

Идѣ́же е́сть веселя́щихся жили́ще святы́хъ Твои́хъ, Го́споди, вся́ отъ вѣ́ка усо́пшія, въ вѣ́рѣ же и наде́жди ра́доватися сподо́би.

Уме́ршія Бо́жіимъ преще́ніемъ, сме́ртныхъ громо́въ вся́кихъ съ небесе́ изнесе́нныхъ, земли́ разсѣ́дшейся, мо́рю возшумѣ́вшуся, вся вѣ́рныя, Христе́, упоко́й.

Вся́кій во́зрастъ, ста́рцы и ю́ныя, младе́нцы и дѣ́ти, и ссу́щія млеко́, му́жеское естество́ и же́нское, упоко́й, Бо́же, я́же прія́лъ еси́ вѣ́рныя.

Отъ ядови́тыхъ угрызе́ній уме́ршія, отъ поглоще́нія зміе́въ, отъ попра́нія ко́ней, и отъ удавле́нія, и обѣ́шенія отъ и́скренняго, вѣ́рою Ти́ послужи́вшія упоко́й.

Коего́ждо по и́мени въ вѣ́рѣ уме́ршія, отъ вѣ́ка и отъ ро́да родо́въ, неосужде́нно предста́ти Тебѣ́, Сло́ве, въ прише́ствіи Твое́мъ сподо́би.

Сла́ва, тро́иченъ: Еди́ный въ Тро́ицѣ, Бо́же, сла́ва Тебѣ́ непреста́нно: а́ще бо и Бо́гъ кíйждо, но Еди́нъ естество́мъ е́сть, Оте́цъ, и Сы́нъ, и Ду́хъ, трисвѣ́тлыми сво́йствы.

[И ны́нѣ,] богоро́диченъ: Па́че ума́ Рождество́ Твое́: ражда́еши бо пре́жде Су́щаго, и млеко́мъ пита́еши несказа́нно, Пищеда́вца мíру. Держи́ши же Содержа́щаго вся́, Христа́ еди́наго, Изба́вителя на́шего, Всенепоро́чная.

Катава́сія: Проявле́нное на горѣ́ законополо́жнику во огни́ и купинѣ́, Рождество́ Приснодѣ́вы, въ на́ше вѣ́рныхъ спасе́ніе, пѣ́сньми немо́лчными велича́емъ.

Ексапостила́рій. Подо́бенъ: Не́бо звѣзда́ми.

Живы́ми и ме́ртвыми облада́яй я́ко Богъ, упоко́й Твоя́ рабы́ въ селе́ніихъ избра́нныхъ, а́ще бо и согрѣши́ша, Спа́се, но не отступи́ша отъ Тебе́.

Сла́ва, другíй. Подо́бенъ: Жены́ услы́шите.

Упоко́й рабы́ Твоя́ во странѣ́ живы́хъ, Го́споди, отону́дуже отбѣже́ болѣ́знь, печа́ль вку́пѣ и воздыха́ніе. Очи́сти я́ко Человѣколю́бецъ, я́же въ житіи́ согрѣши́ша: еди́нъ бо безгрѣ́шный еси́ и ми́лостивый, ме́ртвыхъ и живы́хъ Влады́ка.

[И ны́нѣ,] богоро́диченъ:

Марíе Богоневѣ́сто, Христа́ непреста́нно моли́ о на́съ, рабѣ́хъ Твои́хъ, съ богоглаго́ливыми проро́ки, и му́ченикъ собо́ры, іера́рхи же и преподо́бными, и всѣ́ми пра́ведными, снаслѣ́дники бы́ти небе́снаго Ца́рствія.

На хвали́техъ стихи́ры на 4, гла́съ 8. Подо́бенъ: Во Еде́мѣ ра́й.

Пріиди́те пре́жде конца́ вси́, бра́тіе, пе́рсть на́шу ви́дяще, и естества́ на́шего немощно́е, и ху́дость на́шу и коне́цъ у́зримъ, и орга́ны сосу́да пло́тнаго, и я́ко пра́хъ человѣ́къ, снѣдь че́рвіемъ и тлѣ́ніе, я́ко сухíя ко́сти на́ша вся́ко не иму́щія дыха́нія. Во гро́бы вни́кнемъ: гдѣ́ сла́ва? гдѣ́ добро́та зра́ка? гдѣ́ благоглаго́ливый язы́къ? гдѣ́ бро́ви? или́ где о́ко? — вся́ пра́хъ и сѣ́нь. Тѣ́мже пощади́, Спа́се, всѣ́хъ на́съ.

Что́ прельща́ется человѣ́къ, хваля́ся? Что́ всу́е смуща́ется, бре́ніе и са́мъ вма́лѣ? Что́ не помышля́етъ персть, я́ко пра́хъ, смѣше́ніе, и гно́я, и тлѣ́нія отложе́ніе? Аще у́бо бре́ніе есмы́, человѣ́цы, что прилѣпи́хомся земли́? И а́ще Христу́ есмы́ сро́дни, что не притека́емъ къ Нему́? И вси́ отве́ргше привре́менную и теку́щую жи́знь, Жи́зни нетлѣ́нней послѣ́дующе, я́же е́сть Христо́съ, Просвѣще́ніе ду́шъ на́шихъ.

Руко́ю Твое́ю созда́вый Ада́ма, и поста́вивый предѣ́лъ нетлѣ́нія и ме́ртвости, Спа́се, и жи́зни во благода́ти, тлѣ́нія же премѣни́вый, къ пе́рвой преложи́въ жи́зни, Са́мъ рабы́ Твоя́, Влады́ко, я́же прія́лъ еси́ отъ на́съ, съ пра́ведными упоко́й, и въ ли́цѣ избра́нныхъ, и си́хъ имена́ написа́въ въ кни́зѣ живо́тнѣй, и воскреси́въ во гла́сѣ арха́нгеловѣ и трубы́ шу́мѣ, сподо́би я́ небе́снаго Ца́рствія Твоего́.

Христо́съ воскре́се, разрѣши́въ у́зы Ада́ма первозда́ннаго и а́дову разруши́въ крѣ́пость. Дерза́йте вси, ме́ртвіи! Умертви́ся сме́рть, плѣне́нъ бы́сть и а́дъ съ не́ю, и Христо́съ воцари́ся, распны́йся и воскресы́й. То́й на́мъ дарова́ нетлѣ́ніе пло́ти, То́й воздвиза́етъ на́съ, и да́руетъ воскресе́ніе на́мъ, и сла́вы о́ныя съ весе́ліемъ вся́ сподобля́етъ, въ вѣ́рѣ непрекло́ннѣй вѣ́ровавшія те́плѣ въ Него́.

Сла́ва, гла́съ 2, ме́ртвенъ:

Яко цвѣ́тъ увяда́етъ, и я́ко сѣ́нь ми́мо гряде́тъ, и разруша́ется вся́кій челове́къ. Па́ки же глася́щей трубѣ́, ме́ртвіи вси́ я́ко въ тру́сѣ воста́нутъ къ Твоему́ срѣ́тенію, Христе́ Бо́же. Тогда́, Влады́ко, я́же преста́вилъ еси́ отъ на́съ, во святы́хъ Твои́хъ учини́ селе́ніихъ ду́хи, Влады́ко, Твои́хъ рабо́въ при́сно.

И ны́нѣ, богоро́диченъ:

Ра́дуйся, Марíе Богоро́дице, хра́ме неразори́мый, па́че же святы́й, я́коже вопіе́тъ проро́къ: святы́й хра́мъ Тво́й, ди́вный въ пра́вду.

На стихо́внѣ подо́бны стихи́, Ѳеофа́на, осмогла́сника, по гла́су.
Сла́ва, гла́съ 6. Дамаски́ново:

Болѣ́знь Ада́му бы́сть дре́ва вкуше́ніемъ дре́вле во Еде́мѣ, егда́ змій я́дъ изблева́: тѣмъ бо вни́де смерть всеро́дная, снѣда́ющая человѣ́ка. Но прише́дъ Влады́ка низложи́ змíя, и упокое́ніе на́мъ дарова́, къ Нему́ у́бо возопіи́мъ: пощади́, Спа́се, и, я́же прія́лъ еси́, со избра́нными Твои́ми упоко́й.

И ны́нѣ, богоро́диченъ, гла́съ то́йже:

Ты́ еси́, Бо́гъ на́шъ, вся́ въ му́дрости содѣва́яй и соверша́яй, проро́ки посла́лъ еси́, Христе́, прорещи́ Твое́ прише́ствіе, и апо́столы, проповѣ́дати Твоя́ вели́чія: и о́віи у́бо прореко́ша прише́ствіе Твое́, о́віи же креще́ніемъ просвѣти́ша язы́ки; му́ченицы же, пострада́вше, прія́ша я́же возжела́ху. И мо́литъ Тя́ ли́къ обои́хъ, съ Ро́ждшею Тя́: упоко́й, Бо́же, ду́ши, я́же прія́лъ еси́, и на́съ сподо́би Ца́рствія Твоего́, кре́стъ претерпѣ́вый мене́ ра́ди осужде́ннаго, Изба́вителю мо́й и Бо́же.

Бла́го есть исповѣ́датися... Трисвято́е. Тропа́рь: Глубино́ю му́дрости... Сла́ва, и ны́нѣ: Тебе́ и стѣ́ну...
Присовокупля́емъ же и пе́рвый ча́съ. И отпу́стъ.



НА ЛИТУРГІИ,

Изобрази́тельная и отъ кано́на тріо́ди, пѣ́снь 3-я, и 6-я. Проки́менъ Апо́стола, гла́съ 6: Ду́ши и́хъ* во благи́хъ водворя́тся. Сти́хъ: Къ Тебѣ́, Го́споди, воздвиго́хъ ду́шу мою́, [Бо́же мо́й, на Тя́ упова́хъ, да не постыжу́ся во вѣ́къ]. Апо́столъ къ Кори́нѳяномъ, зача́ло 146. Другíй за упоко́й, къ Солу́няномъ, зача́ло 270. Аллилу́ія, гла́съ 6: Блаже́ни, я́же избра́лъ, и прія́лъ еси́, Го́споди. Сти́хъ: И па́мять ихъ въ ро́дъ и ро́дъ. Ева́нгеліе отъ Луки́, зача́ло 105. Друго́е усо́пшимъ, отъ Іоа́нна, зача́ло 16. Кинони́къ: Блаже́ни, я́же избра́лъ, и прія́лъ еси́, Го́споди, и па́мять и́хъ въ ро́дъ и ро́дъ.

[Зри́:] Вѣ́дати же подоба́етъ, я́ко сіе́ послѣ́дованіе быва́етъ непремѣ́нно и въ суббо́ту святы́я Пятдеся́тницы.

Источникъ: Тріо́діонъ, сíесть трипѣ́снецъ. — Кíевъ: Въ тѵпогра́фіи Кíево-Пече́рской Успе́нской Ла́вры, 1864. — Л. 12 об. – 20 об.

/ Къ оглавленію раздѣла /


Наверхъ / Къ титульной страницѣ

0