Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - пятница, 22 сентября 2017 г. Сейчасъ на порталѣ посѣтителей - 8.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

ТРІОДІОНЪ, СІЕСТЬ ТРИПѢСНЕЦЪ,
Съ Бо́гомъ Святы́мъ, обдержа́й подоба́ющее ему́ послѣ́дованіе.

Недѣля мясопустная.

[ВЕЧЕРЪ.]

Егда́ хо́щеши пріити́, судъ пра́ведный сотвори́ти, Судіе́ Пра́веднѣйшій, на престо́лѣ сла́вы Твоея́ сѣдя́й, рѣка́ о́гненная предъ Твое́ суди́лище ужаса́ющая влече́тъ всѣ́хъ, предстоя́щимъ Тебѣ́ небе́снымъ си́ламъ, человѣ́комъ же суди́мымъ стра́хомъ, я́коже ко́ждо содѣ́ла. Тогда́ насъ пощади́ и ча́сти, Христе́, сподо́би спаса́емыхъ, я́ко Благоутро́бенъ, вѣ́рою мо́лимъ Тя́.

Кни́ги разгну́тся, явле́на бу́дутъ дѣя́нія человѣ́ковъ предъ нестерпи́мымъ суди́лищемъ, возшуми́тъ же юдо́ль вся стра́шнымъ скрежета́ніемъ пла́ча, вся́ ви́дящи согрѣши́вшія, вѣ́чнующимъ му́камъ судо́мъ пра́веднымъ Твои́мъ отпуща́емыя, и бездѣ́льно пла́чущія, Ще́дре. Тѣ́мже Тя́ мо́лимъ, Бла́же: пощади́ на́съ, пою́щихъ Тя́, еди́не Многоми́лостиве.

Возглася́тъ трубы́, и истоща́тся гро́бы, и воскре́снетъ человѣ́ческое все́ естество́ трепе́щущее: до́брая содѣ́явшіи, въ ра́дости ра́дуются, ча́юще мзду воспрія́ти; согрѣши́вшіи же трепе́щутъ, лю́тѣ рыда́юще, въ му́ку посыла́еми и отъ избра́нныхъ разлуча́еми. Го́споди сла́вы, уще́дри на́съ я́ко Благій, и ча́сти сподо́би возлюби́вшихъ Тя́!

Пла́чу и рыда́ю, егда́ въ чу́вство пріиму́ о́гнь вѣ́чный, тму кромѣ́шную и та́ртаръ, лю́тый червь, скре́жетъ же па́ки зу́бный и непреста́нный, болѣ́знь иму́щу бы́ти безъ мѣ́ры согрѣши́вшимъ, и Тебе́, Преблага́го, нра́вомъ лука́вымъ прогнѣ́вавшимъ, отъ ни́хже еди́нъ и пе́рвый е́смь а́зъ окая́нный. Но, Судіе́, ми́лостію Твое́ю спаси́ мя я́ко Благоутро́бенъ.

Сла́ва, гла́съ 8:

Егда́ поста́вятся престо́ли и отве́рзутся кни́ги, и Бо́гъ на судѣ́ ся́детъ, о кíй стра́хъ тогда́ а́нгеломъ предстоя́щимъ въ стра́сѣ, и рѣцѣ́ о́гненнѣй влеку́щей! Что́ сотвори́мъ тогда́, во мно́гихъ грѣсѣ́хъ пови́нніи человѣ́цы, егда́ же услы́шимъ зову́ща Его́, благослове́нныя Отца́ въ Ца́рство, грѣ́шныя же отсыла́юща въ му́ку? Кто́ потерпи́тъ стра́шнаго о́наго изрече́нія? Но, еди́не Человѣколю́бче Спа́се, Царю́ вѣко́въ, пре́жде да́же кончи́на не приспѣ́етъ, покая́ніемъ обрати́въ, поми́луй мя́.

И ны́нѣ, богоро́диченъ 1-й, гла́са. Вхо́дъ. Свѣ́те ти́хій... Проки́менъ: Госпо́дь воцари́ся.., и про́чее.

На литíи, Сла́ва, самогла́сенъ, гла́съ 7:

Госпо́дни разумѣ́вше за́повѣди, та́ко поживе́мъ: а́лчущія напита́имъ, жа́ждущія напои́мъ, нагíя облече́мъ, стра́нныя введе́мъ, боля́щія и въ темни́цѣ су́щія посѣти́мъ. Да рече́тъ и къ на́мъ Хотя́й суди́ти все́й земли́: пріиди́те, благослове́нніи Отца́ Моего́, наслѣ́дуйте угото́ванное вамъ Ца́рствіе.

И ны́нѣ [богоро́диченъ]:

Подъ кро́въ Тво́й, Влады́чице, вси́ земноро́дніи, прибѣга́юще, вопіе́мъ Ти́: Богоро́дице, упова́ніе на́ше, изба́ви ны́ отъ безмѣ́рныхъ прегрѣше́ній и спаси́ ду́ши на́ша.

На стихо́внѣ стихи́ры осмогла́сника, по алфави́ту. Сла́ва, гла́съ 8:

Увы́ мнѣ́, мра́чная душе́! доко́лѣ отъ злы́хъ не отрѣва́ешися? доко́лѣ уны́ніемъ слези́ши? что́ не помышля́еши о стра́шномъ часѣ́ сме́рти? что́ не трепе́щиши вся́ стра́шнаго суди́ща Спа́сова? у́бо что́ отвѣща́еши? или́ что́ отрече́ши? Дѣла́ твоя́ предстоя́тъ на обличе́ніе твое́, дѣя́нія облича́ютъ клеве́щуща. Про́чее, о душе́, вре́мя наста́, тецы́, предвари́, вѣ́рою возопíй: согрѣши́хъ, Го́споди, согрѣши́хъ Ти́, но вѣ́мъ, Человѣколю́бче, благоутро́біе Твое́, Па́стырю до́брый, да не разлучи́ши мене́ одесну́ю Тебе́ предстоя́нія, вели́кія ра́ди ми́лости Твоея́.

И ны́нѣ, богоро́диченъ:

Безневѣ́стная Дѣ́во, [Яже Бо́га неизрече́нно заче́нши пло́тію, Ма́ти Бо́га Вы́шняго, Твои́хъ рабо́въ мольбы́ пріими́, Всенепоро́чная, всѣ́мъ подаю́щи очище́ніе прегрѣше́ній, ны́нѣ на́ша моле́нія пріе́млющи, моли́ спасти́ся всѣ́мъ на́мъ].

Отпусти́тельный [тропа́рь]: Богоро́дице Дѣ́во.., три́жды. И про́чее послѣ́дованіе бдѣ́нія. И быва́етъ чте́ніе въ Дѣя́ніихъ апо́стольскихъ.



НА УТРЕНИ,

Бо́гъ Госпо́дь.., на гла́съ тропаря́ осмогла́сника. Тропа́рь воскре́сный, и богоро́диченъ, и обы́чное стихосло́віе. Чте́мъ же и о нищелю́біи сло́во Богосло́ва, на три́ дѣле́нія, его́же нача́ло: Му́жіе бра́тіе, и соубо́зіи... И поліеле́й. [Обы́чныя два́ псалма́. Припѣва́емъ же къ си́мъ и тре́тій псало́мъ: На рѣка́хъ Вавило́нскихъ.., со аллилу́іею кра́сною.] Степе́нны гла́са. Проки́менъ и Ева́нгеліе у́треннее рядово́е. Псало́мъ 50-й. Сла́ва, гла́съ 8: Покая́нія отве́рзи ми́ две́ри... И ны́нѣ, богоро́диченъ, подо́бенъ: На спасе́нія стези́... Та́же гла́съ 6: Поми́луй мя́ Бо́же... Мно́жества содѣ́янныхъ мно́ю лю́тыхъ... И кано́нъ воскре́сенъ и Богоро́дицы на 6, и тріо́ди на 8.

Кано́нъ, творе́ніе господи́на Ѳео́дора Студи́та, гла́съ 6.

Пѣ́снь 1.

Ирмо́съ: Помо́щникъ и Покрови́тель бы́стъ мнѣ́ во спасе́ніе, Се́й мо́й Бо́гъ, и просла́влю Его́, Бо́гъ отца́ моего́, и вознесу́ Его́: сла́вно бо просла́вися.

Де́нь стра́шный всенеизглаго́ланнаго Твоего́ прише́ствія страшу́ся, помышля́я. Убоя́вся, прови́жду, въ о́ньже предся́деши суди́ти живы́я и ме́ртвыя, Бо́же мо́й Всеси́льне.

Егда́ пріи́деши, Бо́же, во тма́хъ и ты́сящахъ а́нгельскихъ небе́сныхъ нача́лъ, и мене́ на о́блацѣхъ срѣ́сти Тя́, Христе́, окая́ннаго, сподо́би.

Гряди́, пріими́, душе́ моя́, то́й ча́съ и де́нь, егда́ Бо́гъ я́вѣ надста́нетъ, и рыда́й, пла́чи, обрѣсти́ся чиста́ въ ча́съ истяза́нія.

Ужаса́етъ мя́ и страши́тъ о́гнь негаси́мый гее́нскій, че́рвь го́рькій, скре́жетъ зубо́въ, но осла́би ми, оста́ви, и стоя́нію мя́, Христе́, избра́нныхъ Твои́хъ соучини́.

Возжелѣ́ннаго Твоего́ гла́са, святы́я Твоя́ зову́щаго на ра́дость, да услы́шу и а́зъ, окая́нный, и обря́щу Ца́рствія небе́снаго неизрече́нное наслажде́ніе.

Не вни́ди со мно́ю въ су́дъ, нося́й моя́ дѣя́нія, словеса́ изыску́яй и исправля́яй стремле́нія, но щедро́тами Твои́ми презира́я моя́ лю́тая, спаси́ мя, Всеси́льне.

Сла́ва, тро́иченъ: Тріѵпоста́сная Еди́нице, нача́льнѣйшая Госпоже́ всѣ́хъ, совершеннонача́льное Пренача́ліе, Сама́ на́съ спаси́, Отче и Сы́не и Ду́ше Пресвяты́й.

[И ны́нѣ,] богоро́диченъ: Кто́ роди́ Сы́на, несѣ́янна о́тчимъ зако́номъ? Сего́ у́бо ражда́етъ Оте́цъ безъ ма́тере. Пресла́вное чу́до! Ты́ бо родила́ еси́, Чи́стая, Бо́га вку́пѣ и Человѣ́ка.

Катава́сія: Помо́щникъ и Покрови́тель бы́стъ мнѣ́ во спасе́ніе, Се́й мо́й Бо́гъ, и просла́влю Его́, Бо́гъ отца́ моего́, и вознесу́ Его́: сла́вно бо просла́вися.

Пѣ́снь 3.

Ирмо́съ: Утверди́, Го́споди, на ка́мени за́повѣдей Твои́хъ подви́гшееся се́рдце мое́, я́ко еди́нъ Свя́тъ еси́ и Госпо́дь.

Госпо́дь гряде́тъ и кто́ стерпи́тъ страхъ Его́, кто яви́тся лицу́ Его́? Но гото́ва бу́ди, о душе́, ко срѣ́тенію!

Предвари́мъ, пла́чемъ, примири́мся Бо́гу пре́жде конца́: стра́шно бо суди́ще, на не́мже вси́ обнаже́ни ста́немъ.

Поми́луй, Го́споди, поми́луй мя́, — вопію́ Ти, — егда́ пріи́деши со а́нгелы Твои́ми отда́ти всѣ́мъ по достоя́нію дѣя́ній.

Нестерпи́мый, Го́споди, гнѣ́въ, ка́ко стерплю́ суда́ Твоего́, преслу́шавъ Твое́ повелѣ́ніе? Но пощади́, пощади́ мя въ ча́съ суда́.

Обрати́ся, воздохни́, душе́ окая́нная, пре́жде да́же житія́ торжество́ конца́ не пріи́метъ, пре́жде да́же две́ри черто́га не затвори́тъ Госпо́дь.

Согрѣши́хъ, Го́споди, я́коже ины́й никто́же отъ человѣ́къ, прегрѣши́въ па́че человѣ́ка. Пре́жде суда́ ми́лостивъ бу́ди ми́, Человѣколю́бче.

Сла́ва, тро́иченъ: Тро́ице проста́я, несозда́нная, безнача́льное Естество́ въ Тро́ицѣ воспѣва́емое Ѵпоста́сей, спаси́ ны, вѣ́рою покланя́ющіяся держа́вѣ Твое́й.

[И ны́нѣ,] богоро́диченъ: Прозябла́ еси́, Пречи́стая, безсѣ́меннымъ рождество́мъ живо́е Сло́во, воплоще́нное во утро́бѣ Твое́й, непрело́жное. Сла́ва, Богома́ти, Рождеству́ Твоему́!

Катава́сія: Утверди́, Го́споди, на ка́мени за́повѣдей Твои́хъ подви́гшееся се́рдце мое́, я́ко еди́нъ Свя́тъ еси́ и Госпо́дь.

Сѣда́ленъ, гла́съ 6:

Помышля́ю де́нь стра́шный и пла́чуся дѣя́ній мои́хъ лука́выхъ: ка́ко отвѣща́ю безсме́ртному Царю́? ко́имъ же дерзнове́ніемъ воззрю́ на Судію́, блу́дный азъ? Благоутро́бный Отче, Сы́не Единоро́дный, Ду́ше Святы́й, поми́луй мя́.

Сла́ва:

Во юдо́ли пла́ча, въ мѣ́стѣ е́же положи́лъ еси́, егда́ ся́деши, Ми́лостиве, сотвори́ти пра́ведный су́дъ, не объяви́ моя́ та́йная, ниже́ посрами́ мене́ предъ а́нгелы, но пощади́ мя, Бо́же, и поми́луй мя́.

И ны́нѣ, богоро́диченъ:

Упова́ніе мíра, блага́я Богоро́дице Дѣ́во, Твое́ и еди́ное стра́шное предста́тельство молю́: умилосе́рдися на удобообстоя́тельныя лю́ди, умоли́ ми́лостиваго Бо́га изба́витися душа́мъ на́шимъ отъ вся́каго преще́нія, еди́на Благослове́нная.

Пѣ́снь 4.

Ирмо́съ: Услы́ша проро́къ прише́ствіе Твое́, Го́споди, и убоя́ся, я́ко хо́щеши отъ Дѣ́вы роди́тися и человѣ́комъ яви́тися, и глаго́лаше: услы́шахъ слу́хъ Тво́й и убоя́хся, сла́ва си́лѣ Твое́й, Го́споди.

Наста́ де́нь, уже́ при две́рехъ су́дъ, душе́, бо́дрствуй, идѣ́же ца́ріе вку́пѣ и кня́зи, бога́тіи и убо́зіи собира́ются, и воспріи́метъ по достоя́нію содѣ́янныхъ отъ человѣ́къ кíйждо.

Въ чину́ свое́мъ мона́хъ и іера́рхъ, ста́рый и ю́ный, ра́бъ и влады́ка истя́жется, вдови́ца и дѣ́ва испра́вится. И всѣ́мъ го́ре тогда́, не имѣ́вшимъ житіе́ непови́нное.

Неумы́тный су́дъ Тво́й, неутае́нное Твое́ суди́ще хитросло́вія, не витíй худо́жество кра́дущее, не свидѣ́телей непщева́ніе отража́ющее пра́ведное: въ Тебѣ́ бо, Бо́зѣ всѣ́хъ, сокрове́нная предстоя́тъ.

Да не пріиду́ въ зе́млю пла́ча, да не ви́жду мѣ́сто тмы́, Христе́ мо́й Сло́ве, ниже́ свя́занъ бу́ду рука́ма и нога́ма, внѣ́ черто́га Твоего́ изве́рженный, оде́жду нетлѣ́нія оскверне́нную имѣ́яй всеокая́нный.

Внегда́ отлучи́ши грѣ́шныя отъ пра́ведныхъ, судя́й мíру, еди́наго отъ ове́цъ мя́ Твои́хъ сопричти́, отъ ко́злищъ разлуча́я мя́, Человѣколю́бче, во е́же услы́шати гла́са о́наго благослове́ннаго Твоего́.

Испыта́нію быва́ему и кни́гамъ отверза́емымъ содѣ́янныхъ, что́ сотвори́ши, о душе́ окая́нная? что́ отвѣща́еши на суди́щи, не иму́щая пра́вды плоды́ принести́ Христу́ и Содѣ́телю твоему́?

Слы́ша бога́таго во пла́мени му́ки рыданосло́вія, пла́чуся и рыда́ю окая́нный, того́жде сы́й осужде́нія, и молю́ся: поми́луй мя́, Спа́се мíра, во вре́мя суда́.

Сла́ва, тро́иченъ: Сы́на отъ Отца́ и Ду́ха сла́влю, я́ко отъ со́лнца свѣ́тъ и лучу́: Оваго у́бо рожде́ственнѣ, зане́ и рожде́ніе, Оваго же происхо́днѣ, зане́ и происхожде́ніе, — Собезнача́льную Боже́ственную Тро́ицу, покланя́емую отъ вся́кія тва́ри.

[И ны́нѣ,] богоро́диченъ: Дѣ́вая, Младе́нца роди́вшая и чистоту́ соблю́дшая, чи́стая Ты́ яви́лася еси́, Бо́га ро́ждши и Человѣ́ка, еди́наго Того́ во обою́ зра́ку: чу́до Твое́, Дѣ́во Ма́ти, ужаса́етъ вся́кій слу́хъ и по́мыслъ.

Катава́сія: Услы́ша проро́къ прише́ствіе Твое́, Го́споди, и убоя́ся, я́ко хо́щеши отъ Дѣ́вы роди́тися и человѣ́комъ яви́тися, и глаго́лаше: услы́шахъ слу́хъ Тво́й и убоя́хся, сла́ва си́лѣ Твое́й, Го́споди.

Пѣ́снь 5.

Ирмо́съ: Отъ но́щи у́тренююща, Человѣколю́бче, просвѣти́, молю́ся, и наста́ви и мене́ на повелѣ́нія Твоя́, и научи́ мя, Спа́се, твори́ти во́лю Твою́.

Тре́петъ неисповѣди́мый и стра́хъ та́мо: пріи́детъ бо Госпо́дь, и дѣ́ло съ Ни́мъ коего́ждо отъ человѣ́къ. И кто́ отсю́ду про́чее себе́ не воспла́четъ?

Рѣка́ о́гненная смуща́етъ мя́, истаява́етъ мя́, стру́жетъ мя́ скре́жетъ зубо́въ, тма́ бе́здны. И ка́ко, или́ что́ содѣ́явъ, Бо́га уми́лостивлю?

Пощади́, пощади́, Го́споди, раба́ Твоего́, да не когда́ преда́си мене́ го́рькимъ мучи́телемъ а́нгеломъ лю́тымъ, въ ни́хже нѣ́сть та́мо поко́я обрѣсти́.

Кня́зь и во́ждь та́мо вку́пѣ, бога́тый и безсла́вный, вели́кій ку́пно и ма́лый испра́вится ра́вно. Го́ре кому́ждо про́чее неугото́вленному!

Осла́би, оста́ви, Го́споди, и прости́ ели́ка Ти́ согрѣши́хъ, и не покажи́ мя та́мо предъ а́нгелы во осужде́ніи огня́ и студа́ неконча́емаго.

Пощади́, пощади́, Го́споди, созда́ніе Твое́! Согрѣши́хъ, осла́би ми́, я́ко естество́мъ Чи́стый, Са́мъ еси́ еди́нъ, и и́ный ра́звѣ Тебе́ никто́же е́сть внѣ́ скве́рны.

Сла́ва, тро́иченъ: Еди́ницу естество́мъ Тя́, Тро́ице, воспѣва́ю, безнача́льную, непости́жную, нача́льственное, ца́рское, пресоверше́нное Еди́нство, Бо́га, и Свѣ́та, и Живота́, и Содѣ́теля мíру.

[И ны́нѣ,] богоро́диченъ: Въ Рождествѣ́ Твое́мъ па́че естества́, Чи́стая, зако́ны естества́ Тебѣ́ разори́шася я́вѣ, и́бо безъ сѣ́мене ражда́еши Превѣ́чнаго Бо́га, отъ Отца́ рожде́ннаго.

Катава́сія: Отъ но́щи у́тренююща, Человѣколю́бче, просвѣти́, молю́ся, и наста́ви и мене́ на повелѣ́нія Твоя́, и научи́ мя, Спа́се, твори́ти во́лю Твою́.

Пѣ́снь 6.

Ирмо́съ: Возопи́хъ всѣ́мъ се́рдцемъ мои́мъ къ Ще́дрому Бо́гу, и услы́ша мя́ отъ а́да преиспо́дняго, и возведе́ отъ тли́ живо́тъ мо́й.

Во стра́шнѣмъ, Христе́, прише́ствіи Твое́мъ, егда́ яви́шися съ небесе́, и поста́вятся престо́ли, и кни́ги разгну́тся: пощади́, пощади́ тогда́, Спа́се, созда́ніе Твое́.

Та́мо ничто́же помощи́ мо́жетъ, Бо́гу су́щу Судіи́, ни тща́ніе, ни ко́зни, ни сла́ва, ни дру́жба, ра́звѣ отъ дѣ́лъ крѣ́пость твоя́, о душе́ моя́!

Та́мо вку́пѣ кня́зь и во́ждь, ни́щій и бога́тый, душе́, ни оте́цъ возмо́жетъ ни ма́ти помога́ющи, ни избавля́яй бра́тъ осужде́нія.

Стра́шное, душе́, истяза́ніе помышля́ющи Судіино́, ужасни́ся отсю́ду, угото́ви сло́во, да не осу́дишися у́зами вѣ́чными.

Возми́ твое́! — да не услы́шу Го́споди, отсыла́емь отъ Тебе́, ниже́, е́же — поиди́ во о́гнь прокля́тыхъ, — но — возжелѣ́ннаго гла́са пра́ведныхъ.

Адскихъ вра́тъ изба́ви мя́, Го́споди, про́пасти, и тмы́ несвѣти́мыя отъ преиспо́днихъ, и огня́ негаси́маго, и вся́кія ины́я му́ки вѣ́чныя.

Сла́ва, тро́иченъ: Тро́ичнаго еди́нства Божество́ пою́, Отца́, и Сы́на, и Боже́ственнаго Ду́ха, Еди́наго Нача́ла держа́ву, сораздѣля́емаго Треми́ Начерта́ньми.

[И ны́нѣ,] богоро́диченъ: Две́рь Ты́ еси́, Юже еди́нъ про́йде вше́дый и изше́дый, и ключи́ не разрѣши́вый дѣ́вства, Чи́стая, Іису́съ, созда́вый Ада́ма, и Сы́нъ Тво́й.

Катава́сія: Возопи́хъ всѣ́мъ се́рдцемъ мои́мъ къ Ще́дрому Бо́гу, и услы́ша мя́ отъ а́да преиспо́дняго, и возведе́ отъ тли́ живо́тъ мо́й.

Конда́къ, гла́съ 1:

Егда́ пріи́деши, Бо́же, на зе́млю со сла́вою, и трепе́щутъ вся́ческая, рѣка́ же о́гненная предъ суди́щемъ влече́тъ, кни́ги разгиба́ются, и та́йная явля́ются. Тогда́ изба́ви мя́ отъ огня́ неугаси́маго и сподо́би мя́ одесну́ю Тебе́ ста́ти, Судіе́ Пра́веднѣйшій.

Икосъ:

Стра́шное суди́ще Твое́ помышля́я, Преблагíй Го́споди, и де́нь су́дный, ужаса́юся и бою́ся, отъ со́вѣсти моея́ облича́емь. Егда́ и́маши сѣ́сти на престо́лѣ Твое́мъ и твори́ти испыта́ніе, тогда́ отрещи́ся грѣхо́въ никто́же возмо́жетъ, и́стинѣ облича́ющей, и боя́зни содержа́щей: вельми́ у́бо возшуми́тъ тогда́ о́гнь гее́нскій, грѣ́шницы же возскреже́щутъ. Тѣ́мже мя́ поми́луй пре́жде конца́, и пощади́ мя, Судіе́ Пра́веднѣйшій.

Синакса́рь.

Стихи́: Егда́ судя́й земли́, Судіе́ всѣ́хъ, ся́деши.

             Пріиди́те, о́наго гла́са, досто́йна и мене́ усуди́.

Въ сíй де́нь втора́го и неумы́тнаго прише́ствія Христо́ва па́мять твори́мъ, ю́же боже́ственнѣйшіи отцы́ по двою́ при́тчу положи́ша, я́ко да не кто́ во о́ну Бо́жіе человѣколю́біе увѣ́давъ, лѣ́ностно поживе́тъ, глаго́ля: человѣколюби́въ е́сть Бо́гъ, и егда́ грѣ́ха отлучу́ся, гото́во и́мамъ все́ соверши́ти. Се́й стра́шный де́нь здѣ́ учини́ша, да сме́ртію и ча́яніемъ бу́дущихъ злы́хъ устраши́вше, лѣ́ностно живу́щія къ добродѣ́тели возведу́тъ, не надѣ́ющіяся къ человѣколю́бному то́чію, но взира́ти я́ко и пра́веденъ е́сть Судія́ и отдае́тъ кому́ждо по дѣло́мъ его́. Ина́ко же, и душа́мъ преше́дшимъ, подоба́ше пріити́ и Судіи́: о́бразъ же нѣ́кій, и настоя́щій пра́здникъ, поне́же у́бо коне́цъ всѣ́хъ пра́здниковъ полага́ется ны́нѣ, я́коже и о́нъ всѣ́хъ бу́детъ по на́мъ коне́чный. Подоба́етъ бо смотри́ти, я́ко въ бу́дущую недѣ́лю нача́ло мíра, и са́мое отъ рая́ паде́ніе положа́тъ Ада́мово: настоя́щій же всѣ́хъ дне́й коне́цъ, и мíру самому́. Въ мясопу́стѣ же сію́ положи́ша, сокраща́юще, мню́, пи́щу и объяде́ніе стра́ха ра́ди пра́здника, и къ ми́лости бли́жняго на́съ созыва́юще. И ина́ко: поне́же пита́вшеся изгна́хомся изъ Еде́ма, и подъ судо́мъ бы́хомъ и кля́твою, посему́ здѣ́ настоя́щій положи́ша пра́здникъ, и я́ко хо́щемъ [и́мамы] въ другу́ю недѣ́лю Ада́момъ, по о́бразу Еде́мскому изгна́тися, до́ндеже Христо́съ прише́дъ, па́ки на́съ возведе́тъ къ раю́. Второ́е же прише́ствіе рече́ся, зане́ и пе́рвѣе пло́тію къ на́мъ пріи́де, но ти́хо и безъ сла́вы. Ны́нѣ же съ преесте́ственными чудесы́ пріи́детъ, и съ явле́нною свѣ́тлостію съ небе́съ и съ тѣ́ломъ, я́ко да позна́нъ бу́детъ всѣ́ми. Яко Се́й е́сть Иже и пе́рвѣе прише́дый, и ро́дъ человѣ́чь изба́вивый, и суди́ти па́ки хотя́й Са́мъ, а́ще до́брѣ да́нная Ему́ соблюде́. Когда́ у́бо бу́детъ сіе́ прише́ствіе, никто́же вѣ́сть, сіе́ бо и Госпо́дь апо́столомъ скры́. Тогда́ у́бо зна́менія нѣ́кая яви́ предвари́ти, я́же нѣ́цыи отъ святы́хъ простра́ннѣе изъясни́ша. Глаго́лется же, я́ко по седми́хъ ты́сящахъ лѣ́тъ прише́ствіе Его́ бу́детъ. Пре́жде же Его́ прише́ствія пріи́детъ анти́христъ, и роди́тся, я́ко глаго́летъ святы́й Ипполи́тъ Ри́мскій, отъ жены́ скве́рны и дѣви́цы мни́мыя, отъ евре́й же су́щи, отъ пле́мене Да́нова, и́же бя́ше о́трокъ Іа́ковль. И ходи́ти у́бо и́мать по Христу́ проходя́ жи́тельство, и чудеса́ соверши́тъ, ели́ка у́бо и Христо́съ дѣ́йствова, и ме́ртвыя воскреси́тъ. Оба́че по мечта́нію вся́ содѣ́етъ: и рожде́ніе, и пло́ть, и про́чая вся́, я́коже глаго́летъ апо́столъ. И тогда́, глаго́ля, откры́ется сы́нъ па́губы, во вся́кой си́лѣ, и зна́меніихъ, и чудесѣ́хъ ло́жныхъ (2 Сол. зач. 275). Оба́че не са́мъ діа́волъ въ пло́ть претвори́тся, я́коже изъ Дама́ска глаго́летъ Іоаннъ, но человѣ́къ, отъ блуда́ роди́вся, все́ сатанино́ дѣ́йствіе пріи́метъ и внеза́пу воста́нетъ, та́же бла́гъ и кро́токъ всѣ́мъ яви́тся. И гла́дъ тогда́ ве́лій бу́детъ. Угоди́тъ лю́демъ, и Боже́ственная писа́нія про́йдетъ, и посту́ навы́кнетъ, и пону́дится отъ человѣ́къ, и ца́рь проповѣ́стся, и возлю́битъ мно́жае евре́йскій ро́дъ, и во Іерусали́мъ дости́гнетъ, и хра́мъ и́хъ воздви́гнетъ. Пре́жде же седми́хъ лѣ́тъ, я́коже глаго́летъ Даніи́лъ, прíидетъ Ено́хъ и Илія́, проповѣ́дающе лю́демъ не пріима́ти его́. Се́й же е́мь и́хъ уму́читъ, та́же и главы́ и́хъ отсѣче́тъ. Благоче́ствовати же изво́лившіи дале́че отбѣ́гнутъ, и́хже въ гора́хъ обрѣ́тъ, де́монми иску́ситъ. Ума́лятся же се́дмь лѣ́тъ о́ная избра́нныхъ ра́ди, и гла́дъ бу́детъ вели́къ, стихíямъ всѣ́мъ превраща́емымъ, я́ко потреби́тися вма́лѣ уже́ всѣ́мъ. По си́хъ же внеза́пу я́ко мо́лнія съ небе́съ Госпо́дне прише́ствіе бу́детъ, предыду́щу честно́му Его́ кресту́, и о́гненная рѣка́ клоко́щущи Ему́ преды́детъ, всю́ зе́млю отъ скве́рны очища́ющи. Ятъ же бу́детъ а́біе и анти́христъ, и его́ слуги́, и предадя́тся вѣ́чному огню́. Воструби́вшимъ же а́нгеломъ, пріи́детъ внеза́пу отъ коне́цъ земли́ и отъ всѣ́хъ стихíй вся́къ человѣ́ческій ро́дъ во Іерусали́мъ, я́ко среда́ мíра то́й; и та́мо сѣдо́ша престо́ли на судѣ́. Оба́че съ свои́ми тѣлесы́ и душа́ми, всѣ́мъ къ нетлѣ́нію престихíованнымъ, и еди́нъ иму́щимъ зра́къ, и тѣ́мъ же стихíямъ на лу́чшее пріе́мшимъ измѣне́ніе. И разлучи́тъ еди́нѣмъ сло́вомъ Госпо́дь пра́ведныя отъ грѣ́шныхъ. И по́йдутъ благи́хъ дѣ́латели, вѣ́чный живо́тъ пріе́млюще, грѣ́шніи же — въ вѣ́чную па́ки му́ку, и никогда́же си́хъ преста́ніе бу́детъ. Вѣ́домо же, я́ко не поста́ тогда́ взы́щетъ, и наготы́, и чуде́съ, Христо́съ, добра́ бо и сія́; но мно́жицею си́хъ лу́чшая — ми́лостыню я́вѣ и просты́ню [сострада́ніе]. Рече́тъ бо пра́веднымъ и грѣ́шнымъ ше́сть нѣ́кихъ за́повѣдей: Взалка́хъ бо, и да́сте Ми́ я́сти; возжада́хъ, и напои́сте Мя́; стра́ненъ бѣ́хъ, и введо́сте Мя́; на́гъ, и одѣ́ясте Мя́; бо́ленъ бѣ́хъ, и посѣти́сте Мя́; въ темни́цѣ бѣ́хъ, и пріидо́сте ко Мнѣ́. Ели́ко бо сотвори́сте еди́ному си́хъ ме́ньшихъ, Мнѣ́ сотвори́сте. Яже мо́жетъ вся́къ кто́ сотвори́ти по си́лѣ. Тогда́ у́бо вся́къ кто́ исповѣ́сть, я́ко Госпо́дь Іису́съ Христо́съ, во сла́ву Бо́га Отца́ (Флп. зач. 240). Му́ки у́бо, я́же свяще́нное Ева́нгеліе предаде́, сія́ су́ть: та́мо бу́детъ пла́чь и скре́жетъ зубо́въ; че́рвь и́хъ не сконча́ется и о́гнь и́хъ не уга́снетъ (Матѳ. зач. 105). И: вложи́те его́ во тму́ кромѣ́шную (Марк. зач. 42). Яже у́бо вся́ свѣ́тло Це́рковь Бо́жія пріе́мши, непщу́етъ, пи́щи [сла́дости] у́бо и Ца́рствію небе́сному бы́ти, съ Бо́гомъ святы́хъ спребыва́нію, бу́дущему о́нымъ сія́нію всегда́шнему и восхожде́нію. Муче́нію же и тмѣ́, и сицевы́мъ отъ Бо́га удале́нію, и душа́мъ со́вѣстію иждиве́нію, ка́ко лѣ́ностію и пи́щею вре́менною Боже́ственнаго сія́нія лиши́шася. Неизрече́ннымъ человѣколю́біемъ Твои́мъ, Христе́ Бо́же, жела́тельнаго Твоего́ гла́са на́съ сподо́би, и су́щимъ одесну́ю Тебе́ сопричти́, и поми́луй на́съ, ами́нь.

Пѣ́снь 7.

Ирмо́съ: Согрѣши́хомъ, беззако́нновахомъ, непра́вдовахомъ предъ Тобо́ю, ниже́ соблюдо́хомъ, ниже́ сотвори́хомъ, я́коже заповѣ́далъ еси́ на́мъ, но не преда́ждь на́съ до конца́, отце́въ Бо́же.

Припаде́мъ и воспла́чемся пре́жде суда́ о́наго, вѣ́рніи, егда́ небеса́ поги́бнутъ, звѣ́зды спаду́тъ, и вся́ земля́ поколе́блется, да ми́лостива обря́щемъ въ коне́цъ отце́въ Бо́га.

Неумы́тное истяза́ніе, стра́шный е́сть та́мо су́дъ, идѣ́же Судія́ неутае́нъ е́сть, идѣ́же лица́ нѣ́сть въ дарѣ́хъ прія́ти, тогда́ пощади́ мя, Влады́ко, и изба́ви вся́каго гнѣ́ва Твоего́ стра́шнаго.

Госпо́дь гряде́тъ суди́ти, кто́ стерпи́тъ видѣ́ніе Его́? Вострепещи́, душе́ окая́нная, вострепещи́, и угото́ви исхо́дищу дѣла́ твоя́, да ми́лостива и милосе́рда обря́щеши Его́, отце́въ Бо́га благослове́нна.

Негаси́мый о́гнь смуща́етъ мя́, горча́йшій черве́й скре́жетъ, а́дъ душетлѣ́нный страши́тъ мя́, благоумиле́нъ отню́дъ не быва́ю, но, Го́споди, Го́споди, пре́жде конца́ утверди́ мя стра́хомъ Твои́мъ.

Припа́даю Ти́, и приношу́ Тебѣ́ я́коже сле́зы глаго́лы моя́: согрѣши́хъ, я́коже не согрѣши́ блудни́ца, и беззако́нновахъ, я́ко и́ный никто́же на земли́, но уще́дри, Влады́ко, творе́ніе Твое́, и призови́ мя.

Обрати́ся, душе́, пока́йся, откры́й сокрове́нная, глаго́ли Бо́гу вся вѣ́дущему: Ты́ вѣ́си моя́ та́йная, еди́не Спа́се, но Са́мъ мя́ поми́луй, я́коже пое́тъ Дави́дъ, по ми́лости Твое́й.

Сла́ва, тро́иченъ: Три́, Еди́но Существо́мъ, и Еди́но Ли́цами, Три́ пою́ Сія́: Оте́цъ, Сынъ, и Святы́й Духъ, — еди́на си́ла, хотѣ́ніе и дѣ́йство. Еди́нъ Богъ Трисвяты́й, Ца́рство еди́но единонача́льнѣйшее.

[И ны́нѣ,] богоро́диченъ: Прохо́дитъ краснѣ́йшій отъ черто́га чре́ва Твоего́ Бо́гъ, я́коже Ца́рь одѣ́янный боготка́нною багряни́цею, обагре́нія та́йнаго пречи́стыхъ крове́й Твои́хъ, Безневѣ́стная, и ца́рствуетъ земле́ю.

Катава́сія: Согрѣши́хомъ, беззако́нновахомъ, непра́вдовахомъ предъ Тобо́ю, ниже́ соблюдо́хомъ, ниже́ сотвори́хомъ, я́коже заповѣ́далъ еси́ на́мъ, но не преда́ждь на́съ до конца́, отце́въ Бо́же.

Пѣ́снь 8.

Ирмо́съ: Его́же во́инства небе́сная сла́вятъ, и трепе́щутъ херуви́ми и серафи́ми, вся́ко дыха́ніе и тва́рь, по́йте, благослови́те и превозноси́те во вся́ вѣ́ки.

Стра́шнаго втора́го Твоего́, Го́споди, прише́ствія помышля́я срѣ́теніе, трепе́щу преще́нія Твоего́, бою́ся гнѣ́ва Твоего́: отъ сего́ мя часа́, — зову́, — спаси́ во вѣ́ки.

Тебѣ́, Бо́гу судя́щу вся́ческая, кто стерпи́тъ земноро́денъ, сы́й стра́стенъ? Негаси́мый бо о́гнь тогда́, и че́рвь скреже́щущій вельми́, осужде́нныя пріи́метъ во вѣ́ки.

Вся́кое дыха́ніе егда́ призове́ши, е́же разсуди́ти, Христе́, вку́пѣ, вели́кій страхъ тогда́, ве́лія ну́жда, то́кмо помога́ющимъ дѣя́ніемъ во вѣ́ки.

Всѣ́хъ Судіе́, Бо́же мо́й и Го́споди, да услы́шу тогда́ гла́са Твоего́ вожделѣ́ннаго, да уви́жду свѣ́тъ Тво́й вели́кій, да узрю́ вселе́нія Твоя́, да узрю́ сла́ву Твою́, ра́дуяся во вѣ́ки.

Правосу́де Спа́се, поми́луй и изба́ви мя́ огня́ и преще́нія, его́же мнѣ́ на судѣ́ пра́ведно подъя́ти; осла́би ми́ пре́жде конца́, добродѣ́телію и покая́ніемъ.

Егда́ ся́деши, Судіе́, я́ко Благоутро́бенъ, и пока́жеши стра́шную сла́ву Твою́, Христе́, о кíй стра́хъ тогда́, пе́щи горя́щей, и всѣ́мъ боя́щимся нестерпи́маго суди́ща Твоего́!

Благослови́мъ Отца́ и Сы́на и Свята́го Ду́ха, Го́спода.

Еди́наго Бо́га по Существу́ чту́, Три́ Ѵпоста́си пою́ опредѣли́тельнѣ, и́ныя, но не и́наковыя: поне́же Божество́ еди́но въ Тріе́хъ Ли́цѣхъ, и́бо Оте́цъ, и Сы́нъ, и Боже́ственный Ду́хъ.

[И ны́нѣ,] богоро́диченъ: Изъ свѣтлѣ́йшаго чре́ва Твоего́ проше́дъ, я́ко Жени́хъ изъ черто́га возсія́ Христо́съ, Свѣ́тъ ве́лій су́щимъ во тмѣ́, и́бо пра́вды Со́лнце облиста́въ, просвѣти́, Чи́стая, мíръ.

Хва́лимъ, благослови́мъ, покланя́емся Го́сподеви, пою́ще и превознося́ще во вся́ вѣ́ки.

Ирмо́съ: Его́же во́инства небе́сная сла́вятъ, и трепе́щутъ херуви́ми и серафи́ми, вся́ко дыха́ніе и тва́рь, по́йте, благослови́те и превозноси́те во вся́ вѣ́ки.

Пѣ́снь 9.

Ирмо́съ: Безсѣ́меннаго зача́тія рождество́ несказа́нное, Ма́тере Безму́жныя нетлѣ́ненъ Пло́дъ: Бо́жіе бо рожде́ніе обновля́етъ естества́. Тѣ́мже Тя́ вси́ ро́ди, я́ко Богоневѣ́стную Ма́терь, правосла́вно велича́емъ.

Госпо́дь гряде́тъ грѣ́шныя му́чити, пра́ведныя же спасти́: воспла́чемся, и возрыда́имъ, и пріи́мемъ чу́вство о́наго дне, въ о́ньже безвѣ́стная и та́йная откры́въ, человѣ́комъ отда́стъ по достоя́нію.

Пристра́шенъ и тре́петенъ бы́сть Моисе́й, ви́дя Тя́ отъ за́днихъ. Ка́ко же постою́, лице́ Твое́ ви́дя тогда́ а́зъ окая́нный, егда́ пріи́деши съ небесе́? Но пощади́ мя, Ще́дре, ми́лостивнымъ Твои́мъ призрѣ́ніемъ.

Даніи́лъ убоя́ся часа́ истяза́нія, а́зъ же, окая́нный, что́ постражду́ отъ него́, гряды́й Го́споди, стра́шнаго дне́? Но да́ждь ми́ пре́жде конца́ благоуго́дно Тебѣ́ послужи́ти и улучи́ти Ца́рствіе Твое́.

Огнь гото́вится, че́рвь устроя́ется; весе́ліе, сла́ва, ослабле́ніе, свѣтъ невече́рній, ра́дость пра́ведныхъ. И кто́ блаже́нный избѣ́гнути не восхо́щетъ муче́нія пе́рвыхъ, наслѣ́дивый втора́я?

Да мя́ не отврати́тъ отъ лица́ Твоего́, Го́споди, я́рость Твоего́ гнѣ́ва, ниже́ да услы́шу гла́са кля́твеннаго, во о́гнь отсыла́ющаго, но да вни́ду въ ра́дость нетлѣ́ннаго Твоего́ черто́га и а́зъ тогда́ со святы́ми Твои́ми.

Умъ уязви́ся, тѣ́ло острупи́ся, болѣ́знуетъ ду́хъ, сло́во изнемо́же, житіе́ умертви́ся, коне́цъ при две́рехъ. Тѣ́мже, окая́нная моя́ душе́, что́ сотвори́ши, егда́ пріи́детъ Судія́ испыта́ти твоя́?

Сла́ва, тро́иченъ: Еди́наго Единороди́телю, Единоро́днаго Сы́на Отче, и Еди́не Еди́наго Свѣ́те, Свѣ́та Сія́ніе; и Еди́ный Еди́не Еди́наго Бо́га, Святы́й Ду́ше, Го́спода Госпо́дь, вои́стинну Сы́й. О, Тро́ице Еди́нице Свята́я, спаси́ мя, богосло́вяща Тя!

[И ны́нѣ,] богоро́диченъ: Чу́до Рождества́ Твоего́ удивля́етъ мя́, Всенепоро́чная, ка́ко зачина́еши безсѣ́менно Необыме́ннаго? Рцы́, ка́ко дѣ́вствуеши ро́ждши я́ко Ма́ти? Еже па́че естества́ вѣ́рою пріе́мъ, Рожде́нному поклони́ся: ели́ка хо́щетъ бо, и мо́жетъ.

Катава́сія: Безсѣ́меннаго зача́тія рождество́ несказа́нное, Ма́тере Безму́жныя нетлѣ́ненъ Пло́дъ: Бо́жіе бо рожде́ніе обновля́етъ естества́. Тѣ́мже Тя́ вси́ ро́ди, я́ко Богоневѣ́стную Ма́терь, правосла́вно велича́емъ.

Ексапостиларій [воскресенъ]. Таже настоящій. Подобенъ: Со ученики́ взы́демъ.

Стра́шный день суда́ и неизрече́нныя Твоея́ сла́вы помышля́я, трепе́щу, Го́споди, вся́ко, и, трясы́йся, стра́хомъ вопію́: на зе́млю егда́ пріи́деши суди́ти, Христе́ Бо́же, вся́ческая со сла́вою, отъ вся́каго изба́ви мя муче́нія, одесну́ю Тебе́, Влады́ко, сподо́бивый мя ста́ти.

[Слава,] другій. [Подобенъ:] Жены́ услы́шите.

Се день гряде́тъ Го́спода Вседержи́теля и кто стерпи́тъ страхъ прише́ствія о́наго? День бо я́рости есть и пещь горя́щая, въ о́ньже Судія́ ся́детъ, и по достоя́нію дѣя́ній кому́жде отдая́й.

[И нынѣ,] богородиченъ:

Часъ испыта́нія и стра́шнаго прише́ствія Человѣколю́бца Влады́ки помышля́я, весь трепе́щу, и сѣ́туя, вопію́ Ти: Судіе́ мой Пра́веднѣйшій, и еди́не Многоми́лостиве, ка́ющася пріими́ мя, Богоро́дицы моли́твами.

На хвали́техъ стихи́ры воскре́сны осмогла́сника 4, и восто́ченъ [Анато́ліевъ] еди́нъ, и тріо́ди 4. Гла́съ 6. Самогла́сны.

Сти́хъ: Хвали́те Его́ въ кимва́лѣхъ доброгла́сныхъ, хвали́те Его́ въ кимва́лѣхъ восклица́нія. Вся́кое дыха́ніе да хва́литъ Го́спода.

Помышля́ю де́нь о́ный и ча́съ, егда́ и́мамы вси́ на́зи и я́ко осужде́ни, неумы́тному Судіи́ предста́ти, тогда́ труба́ возшуми́тъ вельми́, и основа́нія земли́ подви́жатся, и ме́ртвіи отъ гробо́въ воскре́снутъ, и во́зрастомъ еди́нѣмъ вси́ бу́дутъ, и всѣ́хъ та́йная явле́нна предста́нутъ предъ Тобо́ю: и возрыда́ютъ, и воспла́чутся, и во о́гнь кромѣ́шный оты́дутъ, и́же никогда́же пока́яшася; и въ ра́дость и весе́ліе, пра́ведныхъ жре́бій вни́детъ въ черто́гъ небе́сный.

Сти́хъ: Исповѣ́мся Тебѣ́, Го́споди, всѣ́мъ се́рдцемъ мои́мъ, [повѣ́мъ вся́ чудеса́ Твоя́].

О, каковы́й ча́съ тогда́ и де́нь стра́шный, егда́ ся́детъ Судія́ на престо́лѣ стра́шномъ! Кни́ги разгиба́ются, и дѣя́нія облича́ются, и та́йная тмы́ явле́на быва́ютъ, а́нгели обтека́ютъ, собира́юще вся язы́ки. Пріиди́те, услы́шите, ца́ріе и кня́зи, раби́ и свобо́дни, грѣ́шницы и пра́ведницы, бога́тіи и ни́щіи, я́ко гряде́тъ Судія́, хотя́й суди́ти все́й вселе́ннѣй. И кто́ претерпи́тъ предъ лице́мъ Его́, егда́ а́нгели предста́нутъ, облича́юще дѣя́нія, помышле́нія и мы́сли, я́же въ нощи́ и во дни́? О, каковы́й ча́съ тогда́! Но пре́жде да́же не приспѣ́етъ кончи́на, потщи́ся зову́щи, душе́: Бо́же, обрати́въ, спаси́ мя, я́ко еди́нъ Благоутро́бенъ.

Гла́съ 8.

Сти́хъ: Возвеселю́ся и возра́дуюся о Тебѣ́, [пою́ и́мени Твоему́, Вы́шній].

Даніи́лъ проро́къ, му́жъ жела́ній бы́въ, власти́тельное Бо́жіе ви́дѣвъ, си́це вопія́ше: Судія́ сѣ́де, и кни́ги разгну́шася. Блюди́, душе́ моя́, пости́ши ли ся? — бли́жняго твоего́ не пре́зри. Отъ бра́шенъ воздержи́ши ли ся? — бра́та твоего́ не осужда́й. Да не во о́гнь отсыла́ема сгори́ши я́ко во́скъ, но да безъ поткнове́нія введе́тъ тя́ Христо́съ въ Ца́рствіе Свое́.

Гла́съ 1.

Сти́хъ: Воскресни́ Го́споди Бо́же мо́й, да вознесе́тся рука́ Твоя́, [не забу́ди убо́гихъ Твои́хъ до конца́].

Предочи́стимъ себе́, бра́тіе, цари́цею добродѣ́телей: се́ бо пріи́де, бога́тство намъ благи́хъ подаю́щи, страсте́й утоля́етъ дме́нія, и Влады́цѣ примиря́етъ прегрѣши́вшія. Тѣ́мже съ весе́ліемъ сію́ пріи́мемъ, вопію́ще Христу́ Бо́гу: воскресы́й изъ ме́ртвыхъ, неосужде́ны на́съ сохрани́, славосло́вящія Тя́, еди́наго Безгрѣ́шнаго.

Сла́ва, па́ки то́йже сти́хъ. И ны́нѣ, [богоро́диченъ]:

Преблагослове́нна еси́, [Богоро́дице Дѣ́во, Вопло́щшимъ бо ся изъ Тебе́ а́дъ плѣни́ся, Ада́мъ воззва́ся, кля́тва потреби́ся, Ева свободи́ся, сме́рть умертви́ся, и мы́ ожи́хомъ. Тѣ́мъ, воспѣва́юще, вопіе́мъ: благослове́нъ Христо́съ Бо́гъ, благоволи́вый та́ко, сла́ва Тебѣ́].

Славосло́віе вели́кое, ектеніи́, и отпу́стъ.

Та́же обы́чная литія́ въ притво́рѣ, въ не́йже пое́мъ: Сла́ва, и ны́нѣ, стихи́ру ева́нгельскую. Присовокупля́емъ и ча́съ 1-й, въ не́мже чте́тся оглаше́ніе преподо́бнаго отца́ на́шего Ѳео́дора Студи́та.


НА ЛИТУРГІИ,

Изобрази́тельная и блаже́нна гла́са на 6, и отъ кано́на тріо́ди пѣ́снь 6-я, на 4. Проки́менъ, гла́съ 3: Ве́лій Госпо́дь на́шъ, [и ве́лія крѣ́пость Его́,* и ра́зума Его́ нѣ́сть числа́.] Сти́хъ: Хвали́те Го́спода, я́ко бла́гъ псало́мъ, [Бо́гови на́шему да услади́тся хвале́ніе]. Апо́столъ къ Кори́нѳяномъ, зача́ло 140. Аллилу́ія, гла́съ 8: Пріиди́те, возра́дуемся Го́сподеви, воскли́кнемъ Бо́гу Спаси́телю на́шему. Сти́хъ: Предвари́мъ лице́ Его́ во исповѣ́даніи, и во псалмѣ́хъ воскли́кнемъ Ему́. Ева́нгеліе отъ Матѳе́я, зача́ло 106. Прича́стенъ: Хвали́те Го́спода съ небе́съ, [хвали́те Его́ въ вы́шнихъ]. Другíй: Ра́дуйтеся, пра́ведніи, о Го́сподѣ, [пра́вымъ подоба́етъ похвала́].

Источникъ: Тріо́діонъ, сíесть трипѣ́снецъ. — Кíевъ: Въ тѵпогра́фіи Кíево-Пече́рской Успе́нской Ла́вры, 1864. — Л. 21 об. – 28 об.

/ Къ оглавленію раздѣла /


Наверхъ / Къ титульной страницѣ

0