Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - вторникъ, 17 октября 2017 г. Сейчасъ на порталѣ посѣтителей - 10.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

ТРІОДІОНЪ, СІЕСТЬ ТРИПѢСНЕЦЪ,
Съ Бо́гомъ Святы́мъ, обдержа́й подоба́ющее ему́ послѣ́дованіе.

Недѣ́ля, въ ню́же чте́тся свяще́нное и свято́е Ева́нгеліе, при́тчи блу́днаго сы́на.

[ВЕЧЕРЪ.]

Въ безгрѣ́шную страну́ и живо́тную ввѣ́рихся, посѣ́явъ грѣ́хъ, серпо́мъ пожа́въ кла́сы лѣ́ности, и рукоя́тіемъ связа́въ дѣя́ній мои́хъ снопы́, я́же и постла́хъ не на гумнѣ́ покая́нія, но молю́ Тя, превѣ́чнаго Дѣ́лателя на́шего Бо́га, вѣ́тромъ Твоего́ любоблагоутро́бія развѣ́й пле́ву дѣ́лъ мои́хъ, и пшени́цу да́ждь души́ мое́й — оставле́ніе, въ небе́сную Твою́ затворя́я мя жи́тницу, и спаси́ мя.

Позна́имъ, бра́тіе, та́инства си́лу, отъ грѣха́ бо ко оте́ческому до́му восте́кшаго блу́днаго сы́на Преблагíй Оте́цъ предустрѣ́тъ, лобза́етъ, и па́ки Своея́ сла́вы позна́ніе да́руетъ, и та́инственное вы́шнимъ соверша́етъ весе́ліе, закала́я тельца́ упита́ннаго, да мы́ досто́йно сожи́тельствуемъ, закла́вшему же человѣколю́бному Отцу́ и сла́вному заколе́нію, Спа́су душъ на́шихъ.

Сла́ва, гла́съ 2:

О, коли́кихъ благъ окая́нный себе́ лиши́хъ! О, какова́ Ца́рствія отпадо́хъ стра́стный а́зъ! Бога́тство изнури́въ, е́же прія́хъ за́повѣдь преступи́хъ. Увы́ мнѣ́, стра́стная душе́! Огню́ вѣ́чному про́чее осу́дишися. Тѣ́мже пре́жде конца́ возопíй Христу́ Бо́гу: я́ко блу́днаго пріими́ мя сы́на, Бо́же, и поми́луй мя́.

И ны́нѣ, богоро́диченъ 1-й, гла́са.
Вхо́дъ. Свѣ́те ти́хій... Проки́менъ: Госпо́дь воцари́ся...

На литíи, по обы́чаю, стихи́ра хра́ма. Сла́ва, гла́съ 4:

Яко блу́дный сы́нъ пріидо́хъ и а́зъ, Ще́дре, житіе́ все́ ижди́вый во отше́ствіи. Расточи́хъ бога́тство, е́же да́лъ еси́ мнѣ́, Отче: пріими́ мя ка́ющася, Бо́же, и поми́луй мя́.

И ны́нѣ, богоро́диченъ, того́жде гла́са:

[При́зри на моле́нія Твои́хъ ра́бъ, Всенепоро́чная, утоля́ющи лю́тая на ны́ воста́нія, вся́кія ско́рби на́съ измѣня́ющи, Тя́ бо еди́ну тве́рдое и извѣ́стное утвержде́ніе и́мамы, и Твое́ предста́тельство стяжа́хомъ, да не постыди́мся, Влады́чице, Тя́ призыва́ющіи, потщи́ся на умоле́ніе Тебѣ́ вѣ́рно вопію́щихъ: ра́дуйся, Влады́чице, всѣ́хъ по́моще, ра́досте и покро́ве, и спасе́ніе ду́шъ на́шихъ.]

На стихо́внѣ осмогла́сника, по алфави́ту. Сла́ва, самогла́сенъ, гла́съ 6:

Оте́ческаго да́ра расточи́въ бога́тство, съ безслове́сными скоты́ пасо́хся, окая́нный, и тѣ́хъ жела́я пи́щи, гла́домъ та́яхъ не насыща́яся, но возврати́вся къ благоутро́бному Отцу́, взыва́ю со слеза́ми: пріими́ мя, я́ко нае́мника припа́дающа человѣколю́бію Твоему́, и спаси́ мя.

И ны́нѣ, богоро́диченъ:

Творе́цъ и Изба́витель мо́й, [Пречи́стая, Христо́съ Госпо́дь, изъ Твои́хъ ложе́снъ проше́дъ, въ мя́ оболкíйся, пе́рвыя кля́твы Ада́ма свободи́. Тѣ́мже Ти́, Всечи́стая, я́ко Бо́жіи Ма́тери же и Дѣ́вѣ, вои́стинну вопіе́мъ немо́лчно: ра́дуйся а́нгельски, ра́дуйся, Влады́чице, предста́тельство, и покро́ве, и спасе́ніе ду́шъ на́шихъ].

Отпусти́тельный [тропа́рь]: Богоро́дице Дѣ́во.., три́жды. И про́чее послѣ́дованіе бдѣ́нія, я́ко обы́чно.



НА УТРЕНИ,

На Бо́гъ Госпо́дь: Тропа́рь осмогла́сника воскре́сенъ и богоро́диченъ. Обы́чное стихосло́віе и поліеле́й. Обы́чныя два́ псалма́. Припѣва́емъ же къ си́мъ и тре́тій псало́мъ: На рѣка́хъ Вавило́нскихъ.., со аллилу́іею кра́сною. Степе́нны и проки́менъ, гла́са. Вся́кое дыха́ніе... Ева́нгеліе у́треннее. Та́же, Сла́ва, гла́съ 8: Покая́нія отве́рзи ми́ две́ри... И ны́нѣ, богоро́диченъ, подо́бенъ: На спасе́нія стези́... Та́же гла́съ 6: Поми́луй мя́ Бо́же... Мно́жества содѣ́янныхъ мно́ю лю́тыхъ... Кано́нъ воскре́сенъ со ирмосо́мъ на 4, и крестовоскре́сный на два́, и Богоро́дицы на два́, и тріо́ди на 6. Мине́и же послѣ́дованіе пое́мъ на повече́ріи, въ пято́къ ве́чера.

Кано́нъ, творе́ніе господи́на Іо́сифа. Гла́съ 2.
Пѣ́снь 1.

Ирмо́съ: Моисе́йскую пѣ́снь воспріи́мши, возопíй, душе́: Помо́щникъ и Покрови́тель бы́сть мнѣ́ во спасе́ніе, се́й мо́й Богъ, и просла́влю Его́.

Іису́се Бо́же, ка́ющася пріими́ ны́нѣ и мене́, я́ко блу́днаго сы́на, все́ житіе́ въ лѣ́ности жи́вша, и Тебе́ прогнѣ́вавша.

Еже ми́ да́лъ еси́ пре́жде, злѣ расточи́хъ Боже́ственное бога́тство, удали́хся отъ Тебе́, блу́дно жи́въ: благоутро́бне Отче, пріими́ у́бо и мене́ обраща́ющася.

Сла́ва: Объя́тія ны́нѣ оте́ческая просте́ръ, пріими́, Го́споди, и мене́, я́коже блу́днаго, Всеще́дре, я́ко да благода́рно просла́влю Тя́.

[И ны́нѣ,] богоро́диченъ: На мнѣ́, Бо́же, всю́ показа́въ благосты́ню, пре́зри мои́хъ мно́жество согрѣше́ній, я́ко Благодѣ́тель, боже́ственными Ма́тере Твоея́ мольба́ми.

Катава́сіи же пое́мъ ирмосы́ кано́на: Моисе́йскую пѣ́снь воспріи́мши, возопíй, душе́: Помо́щникъ и Покрови́тель бы́сть мнѣ́ во спасе́ніе, се́й мо́й Богъ, и просла́влю Его́.

Пѣ́снь 3.

Ирмо́съ: Непло́дствовашій мо́й у́мъ плодоно́сенъ, Бо́же, покажи́ ми, Дѣ́лателю до́брыхъ, Насади́телю благи́хъ, благоутро́біемъ Твои́мъ.

Ве́сь внѣ́ бы́въ себе́, умовре́дно прилѣпи́хся страсте́й обрѣта́телемъ, но пріими́ мя, Христе́, я́коже блу́днаго.

Блу́днаго гла́су поревнова́въ, вопію́: согрѣши́хъ, Отче, я́коже о́наго у́бо, и мене́ обыми́ ны́нѣ, и не отри́ни мене́.

Сла́ва: Объя́тія Твоя́ просте́ръ, Христе́, ми́лостивно пріими́ мя, отъ страны́ да́льныя грѣха́ и страсте́й обраща́ющася.

[И ны́нѣ,] богоро́диченъ: До́брая въ жена́хъ, обогати́ и мене́ до́брыхъ ви́ды, грѣхи́ мно́гими обнища́вшаго, Чи́стая, я́ко да сла́влю Тя́.

Ирмо́съ: Непло́дствовашій мо́й у́мъ плодоно́сенъ, Бо́же, покажи́ ми, Дѣ́лателю до́брыхъ, Насади́телю благи́хъ, благоутро́біемъ Твои́мъ.

Сѣда́ленъ, гла́съ 1. Подо́бенъ: Гро́бъ Тво́й.

Объя́тія Отча отве́рсти ми́ потщи́ся, блу́дно ижди́хъ мое́ житіе́, на бога́тство неиждива́емое взира́яй щедро́тъ Твои́хъ, Спа́се, ны́нѣ обнища́вшее мое́ се́рдце не пре́зри. Тебѣ́ бо, Го́споди, во умиле́ніи зову́: согрѣши́хъ, Отче, на не́бо и предъ Тобо́ю.

Сла́ва, то́йже. И ны́нѣ, богоро́диченъ, подо́бенъ:

Безневѣ́стная Чи́стая Богоро́дице Дѣ́во, еди́на вѣ́рныхъ предста́тельнице и покро́ве, бѣ́дъ, и скорбе́й, и лю́тыхъ обстоя́ній всѣ́хъ свободи́, на Тя́ наде́жды, Отрокови́це, иму́щихъ, и ду́ши на́ша спаси́ боже́ственными моли́твами Твои́ми.

Пѣ́снь 4.

Ирмо́съ: Еже отъ Дѣ́вы Твое́ рождество́ проро́къ предзря́, возпроповѣ́даше, вопія́: слу́хъ Твой услы́шахъ и убоя́хся, я́ко отъ ю́га и изъ горы́ святы́я пріосѣне́нныя прише́лъ еси́, Христе́.

Бога́тство благи́хъ, е́же да́лъ ми́ еси́, Небе́сный Отче, расточи́хъ злѣ́, стра́ннымъ гра́жданомъ порабоще́нъ. Тѣ́мже вопію́ Ти: согрѣши́хъ Ти́, пріими́ мя я́ко блу́днаго дре́вле, просте́ръ объя́тія мнѣ́ Твоя́.

Вся́кой зло́бѣ порабо́тихся, прини́кнувъ окая́нно страсте́й дѣ́лателемъ, и себе́ внѣ́ бы́хъ несмотре́ніемъ, уще́дри мя, Спа́се, Пренебе́сный Отче, прибѣга́юща ко мно́гимъ Твои́мъ щедро́тамъ.

Сла́ва: Вся́каго студа́ испо́лнихся, не смѣ́я воззрѣ́ти на высоту́ небе́сную, и́бо безслове́сно прини́кнувъ грѣху́. Ны́нѣ же, обра́щься, вопію́ умиле́ніемъ: согрѣши́хъ Ти́, пріими́ мя, Всецарю́.

[И ны́нѣ,] богоро́диченъ: Человѣ́комъ по́моще, упова́ніе тве́рдое всѣ́мъ христіа́номъ, прибѣ́жище, Чи́стая, спаса́емымъ, спаси́ мя, Дѣ́во, ма́терними Твои́ми мольба́ми и бу́дущія жи́зни сподо́би.

Ирмо́съ: Еже отъ Дѣ́вы Твое́ рождество́ проро́къ предзря́, возпроповѣ́даше, вопія́: слу́хъ Твой услы́шахъ и убоя́хся, я́ко отъ ю́га и изъ горы́ святы́я пріосѣне́нныя прише́лъ еси́, Христе́.

Пѣ́снь 5.

Ирмо́съ: Но́щи преше́дшей, прибли́жися де́нь, и Свѣ́тъ мíру возсія́, сего́ ра́ди хва́лятъ Тя́ а́нгельстіи чи́ни и славосло́вятъ Тя́ вся́ческая.

Порабо́тихся гра́жданомъ стра́ннымъ и въ страну́ тлетво́рную отыдо́хъ, и испо́лнихся студа́, ны́нѣ же обраща́яся зову́ Ти, Ще́дре: согрѣши́хъ.

Оте́ческая Твоя́ благоутро́бія ны́нѣ отве́рзи ми́, отъ злы́хъ обрати́вшуся, Небе́сный Отче, и не отри́ни мене́, имѣ́яй премно́гую ми́лость.

Сла́ва: Не смѣ́ю воззрѣ́ти горѣ́ на высоту́, безъ числа́, Христе́, прогнѣ́вавъ Тя́, но вѣ́дый Твоя́ щедро́ты ми́лостивныя, взыва́ю: согрѣши́хъ Ти́, очи́сти и спаси́ мя.

[И ны́нѣ,] богоро́диченъ: Всесвята́я Дѣ́во Благода́тная, Очище́ніе всѣмъ ро́ждшая, мои́хъ согрѣше́ній тя́жкое бре́мя Твои́ми моли́твами облегчи́.

Ирмо́съ: Но́щи преше́дшей, прибли́жися де́нь, и Свѣ́тъ мíру возсія́, сего́ ра́ди хва́лятъ Тя́ а́нгельстіи чи́ни и славосло́вятъ Тя́ вся́ческая.

Пѣ́снь 6.

Ирмо́съ: Во глубинѣ́ грѣхо́внѣй содержи́мь е́смь, Спа́се, и въ пучи́нѣ жите́йстѣй обурева́емь, но, я́коже Іо́ну отъ звѣ́ря, и мене́ отъ страсте́й возведи́ и спаси́ мя.

Глубина́ согрѣше́ній содержи́тъ мя́ при́сно, и треволне́ніе грѣхо́въ погружа́етъ мя́, окорми́ мя ко приста́нищу жи́зни, Христе́ Бо́же, и спаси́ мя, Царю́ сла́вы.

Бога́тство оте́ческое расточи́хъ лю́тѣ и, обнища́въ, студа́ испо́лнихся, порабоще́нъ непло́дными помышле́ньми, тѣ́мже Ти́ вопію́: Человѣколю́бче, уще́дри и спаси́ мя.

Сла́ва: Гла́домъ иста́явша вся́кихъ бла́гъ и устрани́вшася отъ Тебе́, Всеблагíй, уще́дри обраща́ющася мя́ ны́нѣ и спаси́, Христе́, пою́ща Твое́ человѣколю́біе.

[И ны́нѣ,] богоро́диченъ: Спа́са и Влады́ку ро́ждшая Христа́, спасе́нія мя́, Отрокови́це, сподо́би, обнища́вша отъ вся́кихъ бла́гъ, Дѣ́во Чи́стая, да пою́ Твоя́ вели́чія.

Ирмо́съ: Во глубинѣ́ грѣхо́внѣй содержи́мь е́смь, Спа́се, и въ пучи́нѣ жите́йстѣй обурева́емь, но, я́коже Іо́ну отъ звѣ́ря, и мене́ отъ страсте́й возведи́ и спаси́ мя.

Конда́къ, гла́съ 3. Подо́бенъ: Дѣ́ва дне́сь.

Оте́ческія сла́вы Твоея́ удали́хся безу́мно, въ злы́хъ расточи́въ е́же ми́ пре́далъ еси́ бога́тство. Тѣ́мже Ти́ блу́днаго гла́съ приношу́: согрѣши́хъ предъ Тобо́ю, Отче Ще́дрый, пріими́ мя ка́ющася, и сотвори́ мя я́ко еди́наго отъ нае́мникъ Твои́хъ.

Икосъ:

Спа́су на́шему на вся́къ де́нь уча́щу Свои́мъ гла́сомъ, писа́нія услы́шимъ о блу́дномъ, и цѣлому́дренномъ па́ки. И сего́ вѣ́рою подража́емъ до́брое покая́ніе, Вѣ́дущему та́йная всѣ́хъ, смире́ніемъ се́рдца воззове́мъ: согрѣши́хомъ Ти́, Отче Ще́дрый, и никогда́же досто́йни есмы́ нарещи́ся ча́да, я́коже пре́жде; но, я́ко естество́мъ сы́й человѣколюби́въ, Ты́ пріими́ и сотвори́ мя, я́ко еди́наго отъ нае́мникъ Твои́хъ.

И быва́етъ чте́ніе пре́жде синаксаря́ въ мине́и, та́же въ тріо́ди по чи́ну.

Стихи́: Блу́дникъ, а́ще кто́ е́сть я́ко а́зъ, дерза́й, гряди́:

             Бо́жіихъ бо щедро́тъ всѣ́мъ отве́рзеся две́рь.

Въ сíй де́нь блу́днаго сы́на воззва́ніе пра́зднуемъ, е́же боже́ственніи отцы́ на́ши второ́е въ тріо́ди учини́ша, вины́ ра́ди сицевы́я. Поне́же бо су́ть нѣ́цыи мно́гая безмѣ́стная въ себѣ́ свѣ́дуще, блу́днѣ же зѣло́ отъ ю́наго во́зраста живу́ще, и пія́нствы, и нечистота́ми упражня́ющеся, и во глубину́ злы́хъ си́це впа́дше, во отча́яніе прихо́дятъ, е́же у́бо рожде́ніе е́сть го́рдости, и отвсю́ду къ попече́нію добродѣ́тели ника́коже приходи́ти хотя́тъ, и злы́хъ у́зы предлага́юще, тѣ́мже и го́ршимъ злы́мъ при́сно впа́даютъ. Человѣколю́бно и оте́чески святíи отцы́, и къ таковы́мъ человѣ́комъ иму́ще, и отвести́ отъ отча́янія хотя́ще, такову́ю при́тчу здѣ́ по пе́рвой учини́ша, отча́янія стра́сть изъ ко́рене востерза́юще, и къ добродѣ́тели воспрія́тію возставля́юще, и человѣколю́бная и преблага́я Бо́жія благоутро́бія мно́жае согрѣши́вшимъ, блу́днымъ показу́юще, я́ко ничто́же е́сть отъ грѣхо́въ, е́же Его́ человѣколю́бный ра́зумъ побѣди́тъ, отъ сея́ при́тчи Христо́вы сіе́ представля́юще. Два́ у́бо сы́на су́ть человѣ́ка, си́рѣчь, Богочеловѣ́ка Сло́ва, пра́ведніи и грѣ́шніи. Старѣ́йшій у́бо е́сть, въ за́повѣдехъ Бо́жіихъ, и во благо́мъ Его́ при́сно пребыва́яй, и никогда́же отъ Него́ отступа́яй. Юный же, грѣ́хъ возлюби́вый, и съ Бо́гомъ сопребыва́нія сту́дными дѣ́лы отрекíйся, и о не́мъ Бо́жіе человѣколю́біе ижди́въ, блу́днѣ пожи́вый. Яко е́же по о́бразу цѣ́ло не соблюда́яй, и лука́вому де́мону послѣ́дствовавый и рабо́тавый сластьми́ о́наго хотѣ́ніемъ, и не возмо́гъ жела́ніе испо́лнити. Несы́тная бо ве́щь грѣ́хъ, согрѣва́ющій обы́чаемъ, ра́ди вре́меннаго наслажде́нія, его́же и рожце́мъ уподобля́етъ, я́ко свинія́мъ су́щая пи́ща. Рожцы́ бо, пе́рвѣе у́бо сла́дко нѣ́что предлага́ютъ, послѣди́ же жестоко́ нѣ́что, и а́ки пле́вы быва́ютъ, я́же весьма́ стяжа́ и грѣ́хъ. Едва́ у́бо возбну́въ блу́дный, я́ко гла́домъ добродѣ́тели погиба́я, прихо́дитъ ко Отцу́, глаго́ля: Отче, согрѣши́хъ на не́бо и предъ Тобо́ю, и нѣ́смь досто́инъ нарещи́ся сы́нъ Тво́й. То́й же пріе́млетъ сего́ ка́ющася, не поноша́я, но раскрыля́яся и обыма́я, Боже́ственныя и Оте́ческія утро́бы показу́етъ. И дае́тъ ему́ оде́жду, си́рѣчь, свято́е креще́ніе, и печа́ть и обруче́ніе — благода́ть Всесвята́го Ду́ха. Къ си́мъ же и сапоги́, да не ктому́ отъ змíевъ и скорпíй уязвя́тся по Бо́гу его́ стопы́, но наипа́че о́нѣхъ главы́ сокруши́ти возмо́гутъ. Пото́мъ же презѣ́льнѣйшею ра́достію и Тельца́ упита́ннаго его́ ра́ди закала́етъ — Сы́на Своего́ Единоро́днаго Оте́цъ, и Пло́ти Его́ дае́тъ причасти́тися и Кро́ви. И а́ще чудя́ся старѣ́йшій сы́нъ пребезчи́сленному Его́ милосе́рдію, глаго́летъ, ели́ко убо́ и рече́. Человѣколю́бецъ же, и о́наго молча́ти твори́тъ, вводя́ ти́хими словесы́, и кро́ткими, и любе́зными: ты́ всегда́ со Мно́ю еси́, — глаго́ля, — и пора́доватися подоба́ше, и Отцу́ спи́рствовати, я́ко сы́нъ Мо́й се́й ме́ртвъ бя́ше грѣхо́мъ пре́жде, и оживе́, раска́явся о ни́хже дѣ́яше безслове́сныхъ; и поги́бшій, я́ко дале́че Ми́ бы́въ обы́чаемъ сласте́й, и обрѣ́теся Мно́ю, милосе́рдіемъ Свои́мъ пострада́вшимъ, и ми́лостивнымъ нра́вомъ призва́вшимъ его́. Мо́жетъ же при́тча сія́, и къ лю́демъ евре́йскимъ, и къ на́мъ взя́тися. Сея́ у́бо ра́ди вины́ и при́тча сія́ здѣ́ отъ святы́хъ оте́цъ учини́ся: востерза́ющи у́бо, я́коже рече́ся, отча́яніе и боя́знь, е́же до́брымъ дѣло́мъ каса́тися; поуща́ющи же въ покая́ніе и раска́яніе, и́же я́ко блу́днаго согрѣши́вша, е́же у́бо и ору́жіе е́сть велича́йшее, во отгна́ніе сопроти́внаго стрѣ́лъ, и поможе́ніе крѣ́пкое. Неизрече́ннымъ человѣколю́біемъ Твои́мъ, Христе́ Бо́же на́шъ, поми́луй на́съ, ами́нь.

Пѣ́снь 7.

Ирмо́съ: Херуви́мы подража́юще, о́троцы въ пещи́ ликовствова́ху, вопію́ще: благослове́нъ еси́, Бо́же, я́ко и́стиною и судо́мъ наве́лъ еси́ сія́ вся́ грѣ́хъ ра́ди на́шихъ, препѣ́тый, и препросла́вленный во вся́ вѣ́ки.

Сла́достемъ тѣле́снымъ приклони́хся всеокая́нно, и порабо́тихся весьма́ стра́стнымъ изобрѣ́теніемъ, и стра́ненъ бы́хъ отъ Тебе́, Человѣколю́бче. Ны́нѣ же зову́ блу́днаго гла́сомъ: согрѣши́хъ, Христе́, не пре́зри мене́, я́ко еди́нъ Ми́лостивъ.

Взыва́ю, — согрѣши́хъ, — ника́коже воззрѣ́ти дерза́я на высоту́ небе́сную, Всецарю́, я́ко въ безу́міи еди́нъ Тя́ прогнѣ́вахъ, отве́ргся Твои́хъ повелѣ́ній, тѣ́мже я́ко еди́нъ Благíй, не отве́ржи мене́ отъ Твоего́ лица́.

Сла́ва: Апо́столъ, Го́споди, и проро́къ, и преподо́бныхъ, и честны́хъ му́ченикъ, и пра́ведныхъ мольба́ми прости́ ми вся́, я́же согрѣши́хъ, прогнѣ́вавъ, Христе́, бла́гость Твою́: я́ко да пѣсносло́влю Тя́ во вся́ вѣ́ки.

[И ны́нѣ,] богоро́диченъ: Херуви́мъ я́вльшися, и серафи́мъ, Богоро́дице, и всѣ́хъ свѣтлѣ́йшая небе́сныхъ во́инствъ, съ си́ми умоли́, Его́же воплоти́ла еси́ Боже́ственное Сло́во, Всенепоро́чная, Безнача́льнаго Отца́, я́ко да бла́гъ вѣ́чнующихъ вси́ сподо́бимся.

Ирмо́съ: Херуви́мы подража́юще, о́троцы въ пещи́ ликовствова́ху, вопію́ще: благослове́нъ еси́, Бо́же, я́ко и́стиною и судо́мъ наве́лъ еси́ сія́ вся́ грѣ́хъ ра́ди на́шихъ, препѣ́тый, и препросла́вленный во вся́ вѣ́ки.

Пѣ́снь 8.

Ирмо́съ: Въ купинѣ́ Моисе́ю Дѣ́вы чу́до на Сина́йстѣй горѣ́ Прообрази́вшаго иногда́, по́йте, благослови́те и превозноси́те во вся́ вѣ́ки.

Сше́дый на зе́млю спасти́ міръ во́льною нището́ю за милосе́рдіе мно́гое, обнища́вшаго мя́ ны́нѣ отъ вся́каго благодѣя́нія, я́ко Ми́лостивый, спаси́.

Отъ Твои́хъ за́повѣдей удали́вся, порабо́тихся всеокая́нно лестцу́: обраща́ющагося же ны́нѣ, я́ко блу́днаго дре́вле припа́дающа Тебѣ́, пріими́ Пренебе́сный Отче. Благослови́мъ Отца́, и Сы́на, и Свята́го Ду́ха, Го́спода.

Тлетво́рными помышле́ньми объе́мся, омрачи́хся, и отъ Тебе́ удали́хся, весь внѣ́ себе́ бы́въ, Ще́дре. Тѣ́мже въ покая́ніи припа́дающа Тебе́, спаси́.

[И ны́нѣ,] богоро́диченъ: Богороди́тельнице Чи́стая, низве́рженныхъ исправле́ніе еди́на, испра́ви и мене́, вся́кими грѣха́ми сокруше́ннаго всего́ и смире́ннаго.

Ирмо́съ: Въ купинѣ́ Моисе́ю Дѣ́вы чу́до на Сина́йстѣй горѣ́ Прообрази́вшаго иногда́, по́йте, благослови́те и превозноси́те во вся́ вѣ́ки.

Пѣ́снь 9.

Ирмосъ: Отъ земноро́дныхъ кто́ слы́ша таково́е? Или́ кто ви́дѣ когда́, я́ко Дѣ́ва обрѣ́теся, во чре́вѣ иму́щая и безболѣ́зненно Младе́нца поро́ждшая? Таково́е Твое́ чу́до, и Тя́, Чи́стая Богоро́дице, велича́емъ.

Ви́ждь, Христе́, печа́ль се́рдца, ви́ждь мое́ обраще́ніе, ви́ждь сле́зы, Спа́се, и не пре́зри мене́, но обыми́ па́ки благоутро́бія ра́ди, мно́жеству спаса́емыхъ пречита́я, я́ко да пою́ благода́рно ми́лости Твоя́.

Яко разбо́йникъ вопію́, — помяни́ мя! — я́ко мытарь, умили́вся, бію́ въ пе́рси и зову́ ны́нѣ, — очи́сти, я́коже блу́днаго, пріими́ мя, Всеще́дрый, отъ всѣ́хъ зо́лъ мои́хъ, Всецарю́, я́ко да пою́ Твое́ кра́йнее снизхожде́ніе!

Воздохни́ ны́нѣ, душе́ моя́ всеокая́нная, и возопíй Христу́: мене́ ра́ди во́лею обнища́вый, Го́споди, обнища́вшаго мя́ отъ вся́каго благодѣя́нія, до́брыхъ бога́тствомъ, я́ко Благíй и Многоми́лостивый еди́нъ, обогати́ мя.

Сла́ва: Еже иногда́ содѣ́лалъ еси́ весе́ліе блу́днаго, Бла́же, обраще́ніемъ во́льнымъ, сіе́ ны́нѣ сотвори́ и на мнѣ́, окая́нномъ, простира́я ми́ честна́я Твоя́ объя́тія, да, спа́сся, пѣсносло́влю кра́йнее Твое́ снизхожде́ніе.

[И ны́нѣ,] богоро́диченъ: Свѣ́тлыми моли́твами Твои́ми Дѣ́во, мы́сленная моя́ очеса́ омраче́нная зло́бою, просвѣти́, молю́ся, и къ путе́мъ покая́нія введи́ мя, я́ко да до́лжно Тя́ пѣсносло́влю, па́че сло́ва Сло́во воплоти́вшую.

Ирмосъ: Отъ земноро́дныхъ кто́ слы́ша таково́е? Или́ кто ви́дѣ когда́, я́ко Дѣ́ва обрѣ́теся, во чре́вѣ иму́щая и безболѣ́зненно Младе́нца поро́ждшая? Таково́е Твое́ чу́до, и Тя́, Чи́стая Богоро́дице, велича́емъ.

Ексапостила́рій осмогла́сника. Та́же настоя́щій тріо́ди. Подо́бенъ: Жены́ услы́шите.

Бога́тство, е́же ми́ да́лъ еси́, благода́ти, окая́нный отше́дъ, непотре́бно злѣ́ ижди́хъ, Спа́се, блу́дно пожи́въ, де́мономъ льсти́вно расточи́хъ. Тѣ́мже мя́ обраща́ющася, я́коже блу́днаго пріими́, Отче Ще́дрый, и спаси́.

Ины́й, подо́бенъ:

Расточи́хъ бога́тство Твое́ ижди́въ, Го́споди, и лука́вымъ де́мономъ повину́хся окая́нный, но, Спа́се Всеблагоутро́бне, блу́днаго уще́дри и оскве́рншася очи́сти, пе́рвую отдая́й мнѣ́ оде́жду Твоего́ Ца́рствія.

Богоро́диченъ, подо́бенъ:

Свята́я Ма́ти Дѣ́во, ве́ліе проповѣ́даніе апо́столовъ, му́чениковъ, и проро́ковъ, и преподо́бныхъ, Твоего́ Сы́на и Го́спода уми́лостиви на́мъ, рабо́мъ Твои́мъ, Богороди́тельнице, егда́ ся́детъ суди́ти по достоя́нію коего́ждо.

На хвали́техъ стихи́ры осмогла́сника воскре́сны 4, и восто́ченъ [Анато́ліевъ1, и тріо́ди самогла́сны 3, гла́съ 2.

Блу́днаго гла́съ приноша́ю Ти́, Го́споди: согрѣши́хъ предъ очи́ма Твои́ма, Благíй, расточи́хъ бога́тство Твои́хъ дарова́ній. Но пріими́ мя ка́ющася, Спа́се, и спаси́ мя.

Гла́съ 4:

Сти́хъ: Воскресни́ Го́споди Бо́же мо́й, [да вознесе́тся рука́ Твоя́, не забу́ди убо́гихъ Твои́хъ до конца́].

Яко блу́дный сы́нъ пріидо́хъ и а́зъ, Ще́дре, житіе́ все́ ижди́вый во отше́ствіи, расточи́хъ бога́тство, е́же да́лъ ми́ еси́, Отче. Пріими́ мя ка́ющася, Бо́же, и поми́луй мя́.

Гла́съ 8:

Сти́хъ: Исповѣ́мся Тебѣ́, Го́споди, всѣ́мъ се́рдцемъ мои́мъ, [повѣ́мъ вся́ чудеса́ Твоя́].

Ижди́хъ блу́дно Оте́ческаго имѣ́нія бога́тство, и расточи́въ, пу́стъ бы́хъ, въ страну́ всели́вся лука́выхъ гра́жданъ, и ктому́ не терпя́ съ ни́ми сожи́тельства, обра́щься вопію́ Ти, Ще́дрому Отцу́: согрѣши́хъ на не́бо и предъ Тобо́ю, и нѣ́смь досто́инъ нарещи́ся сы́нъ Тво́й. Сотвори́ мя я́ко еди́наго отъ нае́мникъ Твои́хъ, Бо́же, и поми́луй мя́.

Сла́ва, гла́съ 6:

Отче Благíй, удали́хся отъ Тебе́, не оста́ви мене́, ниже́ непотре́бна покажи́ Ца́рствія Твоего́: врагъ вселука́вый обнажи́ мя и взя́тъ мое́ бога́тство, душе́вная дарова́нія блу́дно расточи́хъ. Воста́въ у́бо, обра́щься къ Тебѣ́ вопію́: сотвори́ мя я́ко еди́наго отъ нае́мникъ Твои́хъ, мене́ ра́ди на Крестѣ́ пречи́стѣи Твои́ ру́цѣ простры́й, да лю́таго звѣ́ря исхити́ши мя́, и въ пе́рвую оде́жду облече́ши мя́, я́ко еди́нъ Многоми́лостивъ.

И ны́нѣ, [богоро́диченъ]:

Преблагослове́нна еси́, Богоро́дице Дѣ́во, [Вопло́щшимъ бо ся изъ Тебе́ а́дъ плѣни́ся, Ада́мъ воззва́ся, кля́тва потреби́ся, Ева свободи́ся, сме́рть умертви́ся, и мы́ ожи́хомъ. Тѣ́мъ, воспѣва́юще, вопіе́мъ: благослове́нъ Христо́съ Бо́гъ, благоволи́вый та́ко, сла́ва Тебѣ́].

Славосло́віе вели́кое, ектеніи́, и отпу́стъ.
И обы́чно литíя, на не́йже пое́тся Сла́ва, и ны́нѣ, стихи́ра ева́нгельская. И чту́тся оглаше́нія. И ча́съ пе́рвый въ притво́рѣ, и соверше́нный отпу́стъ.



НА ЛИТУРГІИ,

Блаже́нна осмогла́сника на 6 и тріо́ди пѣ́снь 6-я на 4. Проки́менъ Апо́стола по гла́су. Апо́столъ къ Кори́нѳяномъ, зача́ло 135. Аллилу́ія гла́са. Ева́нгеліе отъ Луки́, зача́ло 79. Прича́стенъ: Хвали́те Го́спода съ небе́съ, [хвали́те Его́ въ вы́шнихъ].

[Зри́:] Подоба́етъ вѣ́дати, я́ко въ седми́цѣ мясопу́стной Аллилу́ія не пое́мъ, оставля́емъ же и еди́ну каѳи́сму Псалти́ра отъ у́трени и глаго́лемъ сію́ на вече́рни. Пѣ́сней во Псалти́ри не глаго́лемъ. Не пое́тся же и междоча́сіе и кано́нъ моле́бный Пресвятѣ́й Богоро́дицѣ, пое́мый на повече́ріи; повече́ріе же пое́тся ма́лое. Та́кожде твори́мъ въ седми́цѣ сы́рной, ра́звѣ среды́ и пятка́, но о се́мъ все́мъ та́мо ука́за ищи́. Прочита́емъ же въ се́й недѣ́ли въ ко́й-лю́бо де́нь на у́трени сло́во свята́го Мака́рія о Четырдеся́тницѣ и Пятдеся́тницѣ, его́же нача́ло: Ча́дца моя́, ра́дуется се́рдце мое́ ва́съ ра́ди...

Вѣ́домо же да е́сть, я́ко послѣ́дованіе прилуча́ющихся святы́хъ въ суббо́ту и въ недѣ́лю мясопу́стную, пое́тся въ мимоше́дшихъ повече́ріяхъ. Та́кожде о суббо́тѣ и недѣ́ли сыропу́стной твори́мъ, или́ ка́ко настоя́тель изво́литъ, кромѣ́ а́ще гдѣ́ случи́тся вели́каго свята́го па́мять.

Источникъ: Тріо́діонъ, сíесть трипѣ́снецъ. — Кíевъ: Въ тѵпогра́фіи Кíево-Пече́рской Успе́нской Ла́вры, 1864. — Л. 7 об. – 12 об.

/ Къ оглавленію раздѣла /


Наверхъ / Къ титульной страницѣ

0