Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - суббота, 18 ноября 2017 г. Сейчасъ на порталѣ посѣтителей - 28.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

ТРІОДІОНЪ, СІЕСТЬ ТРИПѢСНЕЦЪ,
Съ Бо́гомъ Святы́мъ, обдержа́й подоба́ющее ему́ послѣ́дованіе.

Недѣ́ля, въ ню́же чте́тся свяще́нное и свято́е Ева́нгеліе при́тчи мытаря́ и фарисе́я.

[ВЕЧЕРЪ.]

Не помо́лимся фарисе́йски, бра́тіе, и́бо вознося́й себе́ смири́тся; смири́мъ себе́ предъ Бо́гомъ, мыта́рски поще́ніемъ зову́ще: очи́сти ны́, Бо́же, грѣ́шныя.

Фарисе́й тщесла́віемъ побѣжда́емь, и мыта́рь покая́ніемъ приклоня́емь, приступи́ста къ Тебѣ́, еди́ному Влады́цѣ. Но о́въ у́бо похвали́вся, лиши́ся благи́хъ; о́въ же ничто́же вѣща́въ, сподо́бися дарова́ній. Въ си́хъ воздыха́ніихъ утверди́ мя́, Христе́ Бо́же, я́ко Человѣколю́бецъ.

Сла́ва, гла́съ 8:

Вседержи́телю Го́споди, вѣ́мъ, коли́ко мо́гутъ сле́зы: Езекíю бо отъ вра́тъ сме́ртныхъ возведо́ша, грѣ́шную отъ многолѣ́тныхъ согрѣше́ній изба́виша, мытаря́ же па́че фарисе́я оправда́ша. И молю́ся, съ ни́ми причта́въ, поми́луй мя́.

И ны́нѣ, богоро́диченъ 1-й, рядова́го гла́са.

На литíи стихи́ра свята́го оби́тели, по обы́чаю. Сла́ва, гла́съ 3:

Мытаря́ и фарисе́я разли́чіе разумѣ́вши душе́ моя́, о́наго у́бо возненави́ждь горды́нный гла́съ, о́ваго же ревну́й благоумиле́нной моли́твѣ, и возопíй: Бо́же, очи́сти мя́, грѣ́шнаго, и поми́луй мя́.

И ны́нѣ, богоро́диченъ воскре́сенъ, въ то́йже гла́съ.

На стихо́внѣ стихи́ры осмогла́сника, по алфави́ту. Сла́ва, гла́съ 5:

Отягче́нныма очи́ма мои́ма отъ беззако́ній мои́хъ, не могу́ воззрѣ́ти и ви́дѣти высоту́ небе́сную, но пріими́ мя, я́ко мытаря́ ка́ющася, Спа́се, и поми́луй мя́.

И ны́нѣ, богоро́диченъ, въ то́йже гла́съ:

Хра́мъ и Две́рь еси́, [Пала́та и Престо́лъ Царе́въ, Дѣ́во всечестна́я, Еюже Изба́витель мо́й, Христо́съ Госпо́дь, во тмѣ́ спя́щимъ яви́ся, Со́лнце сы́й пра́вды, просвѣти́ти хотя́, я́же созда́ по о́бразу Своему́ руко́ю Свое́ю. Тѣ́мже, Всепѣ́тая, я́ко Ма́терне дерзнове́ніе къ Нему́ стяжа́вшая, непреста́нно моли́, спасти́ся душа́мъ на́шимъ].

[По Ны́нѣ отпуща́еши:] тропа́рь Богоро́дице Дѣ́во.., глаго́лется три́жды. И быва́етъ благослове́ніе хлѣ́бовъ, и раздая́ніе. И чте́ніе ве́ліе въ посла́ніихъ апо́стольскихъ.

[Зри́:] Послѣ́дованіе прилучи́вшагося свята́го въ недѣ́лю сію́, и въ блу́днаго, пое́мъ въ пято́къ на повече́ріи, или́ егда́ екклисіа́рхъ разсу́дитъ. Аще то́кмо не случи́тся ко́его вели́каго свята́го, или́ свята́го хра́му, зане́ хра́мъ и не вели́каго свята́го, бо́льши вослѣ́дуется вели́каго свята́го, на сво́й ему́ хра́мный пра́здникъ, е́же до́лжно е́сть бдѣ́нію быва́ти, и ника́коже оставля́ти въ па́мять его́, ниже́ прелага́ется на и́нъ де́нь. Но пое́мъ слу́жбу хра́му, я́коже и Срѣ́тенію Госпо́дню, во вся́ дни́, въ ня́же и Срѣ́теніе Госпо́дне быва́етъ.


НА УТРЕНИ,

По шести́ псалмѣ́хъ: Бо́гъ Госпо́дь.., на гла́съ осмогла́сника. И глаго́лемъ тропа́рь воскре́сенъ, два́жды. Богоро́диченъ еди́ножды. И обы́чная стихосло́вія, сѣда́льны осмогла́сника. По непоро́чныхъ тропари́: Ангельскій собо́ръ... Ипакои́. Степе́нны и проки́менъ гла́са. Вся́кое дыха́ніе... Ева́нгеліе воскре́сно ря́ду. Воскресе́ніе Христо́во... Псало́мъ 50-й.

Сла́ва, гла́съ 8:

Покая́нія отве́рзи ми́ две́ри Жизнода́вче, у́тренюетъ бо ду́хъ мо́й ко хра́му свято́му Твоему́, хра́мъ нося́й тѣле́сный ве́сь оскверне́нъ, но, я́ко Ще́дръ, очи́сти благоутро́бною Твое́ю ми́лостію.

И ны́нѣ, богоро́диченъ:

На спасе́нія стези́ наста́ви мя́, Богоро́дице, сту́дными бо окаля́хъ ду́шу грѣхми́, и въ лѣ́ности все́ житіе́ мое́ ижди́хъ, но, Твои́ми моли́твами, изба́ви мя́ отъ вся́кія нечистоты́.

Та́же, гла́съ 6:

Поми́луй мя́, Бо́же, по вели́цѣй ми́лости Твое́й, и по мно́жеству щедро́тъ Твои́хъ, очи́сти беззако́ніе мое́.

Мно́жества содѣ́янныхъ мно́ю лю́тыхъ, помышля́я, окая́нный, трепе́щу стра́шнаго дне́ су́днаго, но, надѣ́яся на ми́лость благоутро́бія Твоего́, я́ко Дави́дъ вопію́ Ти: поми́луй мя́, Бо́же, по вели́цѣй Твое́й ми́лости.

Кано́нъ воскре́сенъ осмогла́сника, со ирмосо́мъ, на 4, и крестовоскре́сный на два́, и Богоро́дицы на два́, и въ тріо́ди на 6.

[Кано́нъ,] творе́ніе Гео́ргія. Его́же краестро́чіе въ богоро́дичнахъ: Гео́ргія. Гла́съ 6:
Пѣ́снь 1.

Ирмо́съ: Яко по су́ху пѣшеше́ствовавъ Изра́иль по бе́зднѣ стопа́ми, гони́теля фарао́на ви́дя потопля́ема, Бо́гу побѣ́дную пѣ́снь пои́мъ, вопія́ше.

При́тчами вводя́й вся́ Христо́съ, къ житія́ исправле́нію, мытаря́ возвыша́етъ отъ смире́нія, показа́въ фарисе́я возвыше́ніемъ смиря́ема.

Отъ смире́нія че́сть высокотворя́щую, отъ возноше́нія же паде́ніе ви́дя лю́тое, мытаре́вымъ ревну́й до́брымъ, и фарисе́йскую зло́бу возненави́ждь.

Отъ возноше́нія испражня́ется вся́кое благо́е, отъ смире́нія же потребля́ется вся́кое зло́е. Еже облобыза́имъ, вѣ́рніи, гнуша́ющеся я́вѣ о́браза тщесла́внаго.

Смиренному́дрымъ бы́ти Свои́мъ ученико́мъ хотя́ всѣ́хъ Ца́рь, наказу́я, уча́ше ревнова́ти мытаре́ву воздыха́нію и смире́нію.

Сла́ва: Яко мыта́рь, стеню́, и рыда́ньми немо́лчными, Го́споди, ны́нѣ прихожду́ Твоему́ благоутро́бію: уще́дри и мене́, смире́ніемъ жи́знь ны́нѣ препровожда́юща.

[И ны́нѣ,] богоро́диченъ: Ра́зумъ, совѣ́тъ, ча́яніе, тѣ́ло, ду́шу и ду́хъ, Влады́чице, возлага́ю къ Тебѣ́: лю́тыхъ вра́гъ и напа́стей, и бу́дущаго преще́нія изба́ви, и спаси́ мя.

Катава́сія: Отве́рзу уста́ моя́...

Пѣ́снь 3.

Ирмо́съ: Нѣ́сть свя́тъ, я́коже Ты́, Го́споди Бо́же мо́й, вознесы́й ро́гъ вѣ́рныхъ Твои́хъ, Бла́же, и утверди́вый на́съ на ка́мени исповѣ́данія Твоего́.

Отъ гно́ища у́бо страсте́й смире́нный возноша́ется, отъ высоты́ же добродѣ́телей низпа́даетъ лю́тѣ вся́къ высокосе́рдый, его́же о́браза зло́бы убѣжи́мъ.

Тщесла́віе оттщетѣва́етъ бога́тство пра́вды, смире́ніе же расточа́етъ страсте́й мно́жество: е́же подража́ющія ны́, ча́сти покажи́ мытаре́вы, Спа́се.

Яко мыта́рь и мы́, бію́щеся въ пе́рси, умиле́ніемъ вопіе́мъ, — очи́сти, Бо́же, на́съ грѣ́шныхъ, — я́ко да сего́ пріи́мемъ оставле́ніе.

Къ ре́вности пріи́демъ вѣ́рніи, исправля́юще кро́ткое, смире́нію соживу́ще въ стена́ніи се́рдца, пла́чѣ же и моли́твѣ, я́ко да и́мамы отъ Бо́га проще́ніе.

Сла́ва: Отри́немъ, вѣ́рніи, высокохва́льную горды́ню, возноше́ніе же лю́тое, и дме́ніе ме́рзкое, и злѣ́йшее фарисе́ево Бо́гу нелѣ́пое свирѣ́пство.

[И ны́нѣ,] богоро́диченъ: Въ Тебѣ́ еди́номъ прибѣ́жищи надѣ́явся, да не отпаду́ до́браго ча́янія, но да улучу́ Твою́ по́мощь, Чи́стая, вся́каго вре́да лю́тыхъ избавля́емый.

Сѣда́льны, Гла́съ 4. Подо́бенъ: Ско́ро предвари́.

Смире́ніе вознесе́ одержи́маго злы́ми, мытаря́ возстена́вша, и е́же — очи́сти, — къ Зижди́телю воззва́ша. Возноше́ніе же низложи́ отъ пра́вды окая́ннаго фарисе́я велерѣ́чующа. Тѣ́мже поревну́имъ до́брымъ, злы́хъ отступа́юще.

Сла́ва:

Смире́ніе дре́вле вознесе́ мытаря́, пла́чемъ возопи́вша, — очи́сти, — и оправди́ся. Того́ подража́имъ вси́, во глубину́ зо́лъ впа́дшіи, возопіи́мъ Спа́су изъ глубины́ се́рдца: согрѣши́хомъ, очи́сти еди́не Человѣколю́бче.

И ны́нѣ, богоро́диченъ:

Ско́ро пріими́, Влады́чице, моле́нія на́ша, и сія́ принеси́ Твоему́ Сы́ну и Бо́гу, Госпоже́ Всенепоро́чная, разрѣши́ обстоя́нія къ Тебѣ́ притека́ющихъ, сокруши́ ко́зни, и низложи́ де́рзость вооружа́ющихся безбо́жно на рабы́ Твоя́, Пречи́стая.

Пѣ́снь 4.

Ирмо́съ: Христо́съ моя́ си́ла, Бо́гъ и Госпо́дь, честна́я Це́рковь боголѣ́пно пое́тъ, взыва́ющи, отъ смы́сла чи́ста, о Го́сподѣ пра́зднующи.

Изря́дный показа́ пу́ть возноше́нія — смире́ніе, Сло́во смири́вшееся да́же и до зра́ка ра́бія, Его́же подража́я вся́кій, возноша́ется смиря́яся.

Вознесе́ся пра́ведникъ, и низпаде́ фарисе́й: во мно́жествѣ же зо́лъ отягча́емый смири́ся, но вознесе́ся мыта́рь, ненаде́жно оправда́емый.

Нищеты́ хода́тай, отъ бога́тства добродѣ́телей, безу́міе яви́ся: и бога́тство а́біе смире́ніе оправда́нія отъ кра́йнія нищеты́, ю́же стя́жимъ.

Предре́клъ еси́, Влады́ко, велему́дрствующимъ противоста́ти вся́чески, и смире́ннымъ благода́ть Твою́ подая́, Спа́се, смири́вшимся ны́нѣ на́мъ Твою́ благода́ть низпосли́.

Сла́ва: Къ Боже́ственному возноше́нію при́сно возводя́ на́съ Спа́съ и Влады́ка, высокотво́рное показа́ смире́ніе: но́ги бо ученико́мъ Свои́ма рука́ма обмы́.

[И ны́нѣ,] богоро́диченъ: Яко Свѣ́тъ непристу́пный, Дѣ́во, ро́ждшая, души́ моея́ тму́ свѣти́тельною заре́ю разжени́, и къ стезя́мъ спасе́нія житіе́ мое́ руково́дствуй.

Пѣ́снь 5.

Ирмо́съ: Бо́жіимъ свѣ́томъ Твои́мъ, Бла́же, у́тренюющихъ Ти́ ду́ши любо́вію озари́, молю́ся, Тя́ вѣ́дѣти, Сло́вѣ Бо́жій, и́стиннаго Бо́га, отъ мра́ка грѣхо́внаго взыва́юща.

Фарисе́евы добродѣ́тели потщи́мся подража́ти, и поревнова́ти мытаре́ву смире́нію, во обою́ ненави́дяще безмѣ́стное мнѣ́ніе и па́губу паде́ній.

Пра́вды тече́ніе тще́тное обличи́ся, сопря́гъ въ не́мъ фарисе́й мнѣ́ніе, а́біе же мыта́рь высокотво́рною добродѣ́телію стяжа́ спу́тника — смире́ніе.

Колесни́чникъ въ добродѣ́телехъ мня́шеся тещи́ фарисе́й, но пѣ́шій, па́че лидíйскія колесни́цы текíй, мыта́рь до́брѣ предвари́, припря́гъ щедро́тѣ смире́ніе.

Мытаре́ву при́тчу вси́ уразумѣ́вше умо́мъ, пріиди́те поревну́имъ слеза́мъ, ду́хъ сокруше́нный Бо́гу принося́ще, грѣхо́въ и́щуще оставле́нія.

Сла́ва: Возносли́вый и зло́бный, гордели́вый же и де́рзый дале́че отри́немъ, разу́мніи, фарисе́евъ нра́въ, лю́тый велехва́льный, я́ко да не обнажи́мся Боже́ственныя благода́ти.

[И ны́нѣ,] богоро́диченъ: Же́злъ си́лы, Блага́я, всѣ́мъ низпосли́ на́мъ, къ Тебѣ́ прибѣга́ющимъ, облада́ти посредѣ́ всѣ́хъ вра́гъ подаю́щи, и вся́каго вре́да изыма́ющи.

Пѣ́снь 6.

Ирмо́съ: Жите́йское мо́ре, воздвиза́емое зря́ напа́стей бу́рею, къ ти́хому приста́нищу Твоему́ прите́къ, вопію́ Ти: возведи́ отъ тли́ живо́тъ мо́й, Многоми́лостиве.

Житія́ по́прище мыта́рь вку́пѣ и фарисе́й теча́ста, но о́въ у́бо высокоу́міемъ содержи́мь, сра́мнѣ утону́, о́въ же смире́ніемъ спасе́ся.

Житія́ бѣ́дное премину́юще мы́ тече́ніе, подража́имъ мытаре́во у́бо мудрова́ніе ревни́тельно, бѣжи́мъ же киче́нія ме́рзкаго фарисе́я, и жи́ви бу́демъ.

Нра́вомъ поревну́имъ Спа́са Іису́са и Его́ смире́нію, жела́юще непреста́нное ра́дости селе́ніе получи́ти, во странѣ́ живу́щихъ водворя́ющеся.

Показа́лъ еси́ Влады́ко, Твои́мъ ученико́мъ высокотво́рное смире́ніе: ле́нтіемъ препоя́санъ по чре́сломъ, но́зѣ умы́лъ еси́, и сему́ о́бразу подража́ти повелѣ́лъ еси́.

Сла́ва: Житіе́ проидо́ста фарисе́й добродѣ́тельми, и мыта́рь прегрѣше́ньми. Но о́въ у́бо отъ го́рдости умовре́дныя, отступи́ смире́нія, о́въ же возноша́ется, смиренному́дръ я́влься.

[И ны́нѣ,] богоро́диченъ: На́га простото́ю, не хи́тростною же жи́знію созда́на, преступле́нія ле́стію одѣ́я мя́ вра́гъ и пло́ти дебельство́мъ: ны́нѣ же Твои́мъ хода́тайствомъ, Отрокови́це, спаса́юся.

Конда́къ, гла́съ 4. Подо́бенъ: Яви́лся еси́ дне́сь.

Фарисе́ева убѣжи́мъ высокоглаго́ланія, и мытаре́вѣ научи́мся высотѣ́ глаго́лъ смире́нныхъ, покая́ніемъ взыва́юще: Спа́се мíра, очи́сти рабы́ Твоя́.

Вторы́й конда́къ, гла́съ 3. Подо́бенъ: Дѣ́ва дне́сь.

Воздыха́нія принесе́мъ мыта́рская Го́сподеви, и къ Нему́ присту́пимъ, грѣ́шніи, я́ко Влады́цѣ: хо́щетъ бо спасе́нія всѣ́хъ человѣ́ковъ, оставле́ніе подае́тъ всѣ́мъ ка́ющимся. На́съ бо ра́ди воплоти́ся, Бо́гъ сы́й, Отцу́ собезнача́льный.

Икосъ:

Са́ми себе́, бра́тіе, вси́ смири́мъ воздыха́ньми, рыда́ньми побіе́мъ со́вѣсть, да въ судѣ́ тогда́ вѣ́чномъ та́мо яви́мся, вѣ́рніи, непови́нни, получи́вше оставле́ніе. Та́мо бо е́сть вои́стинну ослабле́ніе, е́же ви́дѣти та́мъ ны́нѣ умо́лимъ: та́мо болѣ́знь отбѣже́, печа́ль и изъ глубины́ воздыха́нія, во Еде́мѣ ди́внѣмъ, его́же Христо́съ Зижди́тель, Бо́гъ сы́й, Отцу́ собезнача́льный.

Предисло́віе вкра́тцѣ синакса́рей, ре́кше, собра́ній Ксанѳопу́ла на тріо́дныя синакса́ри.

Ники́фора Калли́ста Ксанѳопу́ла собра́нія на знамени́тыя пра́здники тріо́ди, еди́нъ кíйждо отъ ни́хъ виносло́вствующая, ка́ко, и когда́ сіе́ изъ нача́ла бы́сть, и каковы́я ра́ди вины́ си́це ны́нѣ имѣ́ются, и отъ святы́хъ и богоно́сныхъ оте́цъ учини́шася съ нѣ́которыми вѣ́дѣньми ча́стными, начина́ющаяся отъ [недѣ́ли] мытаря́ и фарисе́я, и конча́щаяся да́же до [недѣ́ли] всѣ́хъ святы́хъ.

До́лженствуетъ у́бо мѣ́сячный синакса́рій, на седьмо́й пѣ́сни пре́жде, я́ко обы́чай, чита́тися, пото́мъ же настоя́щій.

Рече́ши у́бо по о́ныхъ чте́ніихъ си́це:

Стихи́ на тріо́ди:

          Зижди́телю го́рнихъ и до́льнихъ,

          Трисвяту́ю у́бо пѣ́снь отъ а́нгеловъ,

          Трипѣ́снецъ же и отъ человѣ́ковъ пріими́.

На мытаря́ и фарисе́я:

          Фарисе́йски кто́ живе́тъ, Це́ркви дале́че быва́етъ,

          Христо́съ бо вну́трь, о смире́нніи, пріе́млемый.

Въ настоя́щій же де́нь, съ Бо́гомъ и тріо́дь начина́емъ, ю́же у́бо мно́зи отъ святы́хъ и богоно́сныхъ красотодѣ́тель на́шихъ оте́цъ, до́брѣ и я́ко досто́яше, отъ Свята́го дви́жими Ду́ха, сложи́вше пѣсносодѣ́лаша. Пе́рвый же всѣ́хъ сіе́ умы́сли, три́ глаго́лю пѣ́сни, во о́бразъ, мню́, Святы́я и Живонача́льныя Тро́ицы, вели́кій творе́цъ Косма́, въ вели́кой и свято́й Страсте́й Го́спода и Бо́га и Спа́са на́шего Іису́са Христа́ седми́цѣ, по именова́нію вкра́тцѣ, коего́ждо дне́ краегране́сьми умы́сливъ пѣ́сни. Отъ него́же и про́чіи отъ оте́цъ, па́че же ины́хъ, Ѳео́доръ и Іо́сифъ Студи́те, по ре́вности о́наго, и про́чимъ недѣ́лямъ [седми́цамъ] святы́я и вели́кія Четыредеся́тницы счини́вше, тѣ́хъ оби́тели Студíйстѣй пе́рвѣе преда́ша. Наипа́че пѣ́сни учини́вше, и уста́вивше, и друга́я кни́зѣ, отону́дуже и когда́, отъ оте́цъ собра́вше и сниска́вше. И поне́же у́бо пе́рвый дне́й недѣ́ля заключа́етъ я́ко воскре́сна, пе́рвая су́щи, и осма́я, и коне́чная, изря́дно содѣ́лающе второ́му дню́, ре́кше, понедѣ́льнику, пе́рвую уста́виша пѣ́снь. Абіе же тре́тіему дню́, ре́кше, вто́рнику, пѣ́снь втору́ю. Четве́ртому, ре́кше, средѣ́, тре́тію. Пя́тому — четве́ртую, е́же е́сть, четвертку́. И шесто́му дню́, ре́кше, пятку́, пя́тую пѣ́снь. Шесту́ю же, суббо́тѣ, я́вѣ у́бо и седьму́ю, и про́чія двѣ́, осму́ю и девя́тую, я́же о́бщно вси́ дни́ я́ко и́стиннѣйша и́мутъ. Якоже у́бо боже́ственный Косма́, въ Вели́цѣй Суббо́тѣ положи́ четверопѣ́снецъ, та́мо сотвори́въ, а́ще и по́слѣжде прему́дрѣйшій ца́рь Ле́въ, повелѣ́въ въ соверше́ніе кано́нъ епи́скопомъ Идру́нскимъ, мона́ха Ма́рка, содѣ́ла. Потре́бовательнѣ же, тріо́ди имену́ется, ни бо́ при́сно трипѣ́снецъ и́мать, и́бо всесоверше́нна пра́вила предлага́етъ. Но мню́ отъ мно́жайшаго именова́ніе прія́ти, или́ е́же вели́кія ра́ди седми́цы, я́коже рече́но бы́сть пре́жде бы́вша. Мы́сль у́бо святы́мъ на́шимъ отце́мъ, кни́гою тріо́ди все́ю, вкра́тцѣ все́ ели́ко о на́съ Бо́жія благодѣя́нія изнача́ла воспомяну́ти, и на воспомина́ніе всѣ́мъ изложи́ти: ка́ко отъ Него́ со́здани бы́хомъ, и отъ пи́щи ра́йскія изгна́хомся, и да́нную на́мъ ко обуче́нію за́повѣдь отве́ргше, и отве́ржени бы́хомъ за́вистію первозло́бника змíя и врага́, низло́женнаго за го́рдость. И ка́ко пребыва́хомъ отве́ржени отъ благи́хъ, и отъ діа́вола води́ми. Ка́ко же Сы́нъ и Сло́во Бо́жіе милосе́рдіемъ Свои́мъ пострада́въ, преклони́въ небеса́, сни́де, и въ Дѣ́ву всели́ся, и на́съ ра́ди бы́сть Человѣ́къ, и по Нему́ жи́тельствомъ на небеса́ восхожде́ніе показа́, ре́кше, смире́ніемъ предводи́тельно, и посто́мъ, и отверже́ніемъ злы́хъ, и про́чими Его́ дѣя́ніи. Ка́ко же пострада́, и воскре́се, и на небеса́ взы́де па́ки, и Ду́ха Свята́го низпосла́ святы́мъ Свои́мъ ученико́мъ и апо́столомъ, и ка́ко Сы́нъ Бо́жій, и Бо́гъ соверше́нный, отъ си́хъ всѣ́хъ проповѣ́дася. Что́ же па́ки боже́ственніи апо́столи, благода́тію Пресвята́го Ду́ха содѣ́йствоваша, я́ко отъ коне́цъ святы́хъ всѣ́хъ вку́пѣ собра́ша про́повѣдію, наполня́юще вы́шній ми́ръ, е́же и мы́сль бя́ше изнача́ла Созда́вшему. Но въ си́хъ у́бо тріо́ди мы́сль, настоя́щія три́ пра́здники, — мытаря́ и фарисе́я, и блу́днаго, и втора́го прише́ствія, — я́коже нѣ́кое предобуче́ніе и поуще́ніе святы́ми отцы́ умы́слися. Якоже предустро́итися, и гото́вымъ на́мъ бы́ти къ духо́внымъ подвиго́мъ посто́въ, отъ обы́чая скве́рное навыкнове́ніе оста́вльшимъ. И пе́рвѣе у́бо всѣ́хъ мытаре́ву и фарисе́еву на́мъ при́тчу предлага́ютъ, и предвозгла́сною седми́цею имену́ютъ. Якоже бо къ тѣле́снымъ бра́немъ отходи́ти хотя́щіи, отъ воево́дъ бра́ни вре́мя преднавыка́ютъ, я́ко да ору́жія очи́стивше и угла́дивше, и друга́я вся́ до́брѣ устро́ивше, и вся́ко претыка́ніе отъ среды́ сотво́рше, къ подвиго́мъ усе́рдно воспря́таются, и е́же къ потре́бѣ снабдя́тъ. Мно́гажды же и пре́жде сраже́нія, и словеса́, и по́вѣсти, и при́тчи себѣ́ прино́сятъ, и на ре́вность изощря́юще о́нѣхъ ду́ши, лѣ́ность же, и боя́знь, и уны́ніе, и друго́е, а́ще что́ бѣ́дно, отгоня́ще. Та́ко и боже́ственніи отцы́ предтру́бятъ поще́ніе послѣ́дующее на де́моны ополче́ніе, я́ко бы душа́мъ на́шимъ нѣ́кую предвзя́тую стра́сть, и я́дъ до́лгимъ содѣ́ланный вре́менемъ очи́стити. Еще́ же и е́же не иму́ще отъ благи́хъ, потща́вшеся стя́жимъ, и я́ко подо́бно вооружи́вшеся, та́ко гото́ви къ поста́ подвиго́мъ да по́йдемъ. Поне́же у́бо пе́рвое ору́жіе къ добродѣ́тели — покая́ніе и смире́ніе, и па́ки преткнове́ніе къ вели́чайшему смире́нію — го́рдость и выше́ніе, настоя́щую отъ Боже́ственнаго Ева́нгелія достовѣ́рную при́тчу пе́рвую всѣ́хъ излага́ютъ. Фарисе́емъ у́бо, го́рдости и дме́нія отложи́ти на́мъ стра́сть поуча́юще; мытаре́мъ же па́ки сопроти́вное стра́сти сея́, смире́ніе и покая́ніе проти́ву сотвори́ти. Поне́же бо пе́рвая и го́ршая стра́сть — горды́ня и дме́ніе, я́ко тѣ́ми съ небесе́ паде́ніе діа́волу бы́сть е́же пре́жде у́бо Денни́цѣ, си́хъ же ра́ди тмѣ́ бы́вшу, и глаго́лему. Но и родонача́льнику Ада́му, си́хъ ра́ди отъ пи́щи изгна́ніе. Поуща́ютъ си́ми, о́бразомъ нѣ́кимъ святíи о свои́хъ исправле́ніихъ никому́же вы́ситися, и на бли́жняго востая́ти, но при́сно смире́нну бы́ти: Госпо́дь бо го́рдымъ сопротивля́ется, смире́ннымъ же дае́тъ благода́ть. Лу́чше бо е́сть согрѣша́ющему обраща́тися, не́жели исправля́ющемуся вы́ситися. Глаго́лю бо, рече́, ва́мъ: я́ко сни́де мыта́рь оправда́нъ па́че, не́жели фарисе́й. Объявля́етъ у́бо при́тча, ни еди́ному же вы́ситися, а́ще и блага́я дѣ́яй е́сть, но при́сно смиря́тися, и моли́тися отъ души́ Бо́гу, а́ще и въ послѣ́дняя зла́я впаде́тъ, я́ко не дале́че спасе́нія е́сть. Мыта́рь у́бо е́сть, и́же да́ни отъ князе́й е́мляй, и за кра́йнюю непра́вду купу́яй и пріобрѣта́яй отсю́ду. Фарисе́й же я́коже отсѣ́ченъ кто́ не́гли, и про́чихъ преимѣ́яй ра́зумомъ. Саддуке́й же отъ Саддо́ика нѣ́коего, е́же е́сть пра́веденъ: седе́къ бо пра́вда. Три́ же бя́ху у евре́й е́реси: ессе́и, фарисе́и и саддуке́и, и́же ниже́ воскресе́нію, ниже́ а́нгелу, ниже́ ду́ху бы́ти пріе́мляху.

Святы́хъ всѣ́хъ пѣснодѣ́лателей Твои́хъ моли́твами, Христе́ Бо́же на́шъ, поми́луй на́съ, ами́нь.

Пѣ́снь 7.

Ирмо́съ: Росода́тельну у́бо пе́щь содѣ́ла а́нгелъ преподо́бнымъ отроко́мъ, халде́и же опаля́ющее велѣ́ніе Бо́жіе, мучи́теля увѣща́ вопи́ти: благослове́нъ еси́, Бо́же оте́цъ на́шихъ.

Оправда́нія дѣ́лы возвыша́емый, сѣтьми́ тщесла́вія лю́тѣ превознесе́ся фарисе́й, безмѣ́рно хваля́ся; мыта́рь же ле́гкимъ крило́мъ смире́нія вознесе́ся, Бо́гу прибли́жися.

Смире́нія а́ки лѣ́ствицею употреби́вся о́бразомъ мыта́рь, къ небе́сной высотѣ́ возвы́сися; горды́нею же гнило́ю и безу́міемъ окая́нный возне́сся фарисе́й, сни́де до а́да преиспо́дняго.

Пра́ведныхъ ловя́ у́бо лука́вый, образми́ тщесла́вія кра́детъ, грѣ́шныхъ же сѣтьми́ отча́янія связу́етъ. Но у́бо отъ обои́хъ зо́лъ, мытаря́ ревни́теліе, изба́витися потщи́мся.

Моли́твою Бо́гу на́шему припаде́мъ, слеза́ми и те́плыми воздыха́ніи, подража́юще мытаре́во высокотво́рное смире́ніе, пою́ще, вѣ́рніи: благослове́нъ еси́, Бо́же оте́цъ на́шихъ.

Сла́ва: Наказу́яй ученики́ предглаго́лалъ еси́, Влады́ко, не му́дрствовати высо́кая, совводи́тися же смире́ннымъ уча́, Спа́се. Тѣ́мже зове́мъ Тебѣ́, вѣ́рніи: благослове́нъ еси́, Бо́же оте́цъ на́шихъ.

И ны́нѣ, богоро́диченъ: Іа́ковлю Тя́ добро́ту и Боже́ственную лѣ́ствицу, отъ до́лу ю́же ви́дѣ пе́рвѣе, просте́ртую къ высотѣ́, вѣ́мы, Чи́стая, низводя́щую свы́ше Бо́га воплоще́нна, и земны́я па́ки возводя́щую.

Пѣ́снь 8.

Ирмо́съ: Изъ пла́мене преподо́бнымъ ро́су источи́лъ еси́ и пра́веднаго же́ртву водо́ю попали́лъ еси́: вся́ бо твори́ши, Христе́, то́кмо е́же хотѣ́ти. Тя́ превозно́симъ во вся́ вѣ́ки.

Смиренному́дреннымъ нра́вомъ ми́лостива Го́спода мыта́рь, воздохну́въ, обрѣ́те и спасе́нъ бы́сть: о́бразомъ же лю́тымъ язы́ка велерѣ́чиваго, пра́вды отпаде́ фарисе́й.

Фарисе́ева киче́нія произволе́нія, и именова́нія чистоты́, бѣжи́мъ, вѣ́рніи: ревну́юще мытаре́ву до́брѣ поми́лованному смире́нію и нра́ву.

Гла́сы мытаре́вы, вѣ́рніи, вѣща́имъ въ це́ркви святѣ́й, — Бо́же, очи́сти, — да съ ни́мъ улучи́мъ проще́ніе, па́губы велехва́льнаго изба́вльшеся фарисе́я.

Воздыха́нію мытаре́ву вси́ поревну́имъ, и Бо́гу бесѣ́дующе, те́плыми слеза́ми возопіи́мъ Ему́: Человѣколю́бче, согрѣши́хомъ, благоутро́бне Ще́дрый, очи́сти и спаси́.

Благослови́мъ Отца́, и Сы́на, и Свята́го Ду́ха, Го́спода.

Стена́ніемъ мытаре́вымъ Бо́гъ преклони́ся, оправди́въ же сего́, всѣ́мъ показа́ преклоня́тися при́сно, воздыха́ньми же и слеза́ми, прегрѣше́ній прося́ще разрѣше́ніе.

И ны́нѣ, богоро́диченъ: Не вѣ́мъ па́че Тебе́ ино́го заступле́нія, Тя́ предлага́ю моли́твенницу, Чи́стая Всенепоро́чная. Тя́ ко изъ Тебе́ Рожде́нному хода́таицу дви́жу: всѣ́хъ оскорбля́ющихъ мя́ свобо́дна покажи́.

Пѣ́снь 9.

Ирмо́съ: Бо́га человѣ́комъ невозмо́жно ви́дѣти, на Него́же не смѣ́ютъ чи́ни а́нгельстіи взира́ти; Тобо́ю бо, Всечи́стая, яви́ся человѣ́комъ Сло́во воплоще́нно, Его́же велича́юще, съ небе́сными во́и, Тя́ ублажа́емъ.

Пу́ть возноше́нія — смире́ніе, отъ Христа́ взе́мше спасе́нія о́бразъ, мытаре́ву обы́чаю поревну́имъ, киче́ніе возноше́нія дале́че отмета́юще, нра́вомъ же смиренному́дрія Бо́га умоля́юще.

Душе́вную горды́ню отве́ржимъ, нра́въ пра́вый смиренному́дрія стя́жимъ, себе́ оправда́ти не тщи́мся, тщесла́вія киче́ніе возненави́димъ, и съ мытаре́мъ Бо́га умо́лимъ.

Моли́твы Содѣ́телю ми́лости принесе́мъ мыта́рскія, фарисе́йскихъ отвраща́ющеся неблагода́рныхъ моли́твъ, и велехва́льныхъ гла́совъ, и́же на бли́жняго су́дъ возво́дятъ, да Бо́га ми́лостива и свѣ́тъ привлече́мъ.

Мно́гимъ прегрѣше́ній собра́ніемъ отягче́нъ, изоби́ліемъ зло́бы мытаря́ преидо́хъ, и фарисе́ево велехва́льное киче́ніе притяжа́хъ, отвсю́ду пу́стъ всѣ́хъ бы́въ благи́хъ, Го́споди, пощади́ мя.

Твоего́ сподо́би блаже́нства, Тебе́ ра́ди ду́хомъ ни́щихъ су́щихъ: уче́ніемъ бо Твоего́ повелѣ́нія, ду́хъ сокруше́нный Тебѣ́ прино́симъ, Спа́се, пріе́мъ, спаси́ Тебѣ́ служа́щія.

Сла́ва: Бо́гу мыта́рь нѣ́когда помоли́выйся, въ це́рковь вѣ́рнѣ вше́дъ, оправда́ся: воздыха́ньми бо и слеза́ми прише́дъ, сокруше́ніемъ же се́рдца, все́ отложи́ грѣхо́въ бре́мя очище́ньми.

И ны́нѣ, богоро́диченъ: Пѣ́ти, сла́вити, и блажи́ти Тя́ дава́й на́мъ, досто́йно чту́щимъ Тя́, Пречи́стая, и Рождество́ Твое́ велича́ющимъ, еди́на Благослове́нная. Ты́ бо еси́ похвала́ христіа́номъ, и къ Бо́гу моли́твенница благопрія́тная.

Ексапостила́рій воскре́сный. Та́же тріо́ди. Подо́бенъ: Со ученики́ взы́демъ.

Сла́ва: Высокоре́чія убѣжи́мъ фарисе́ева злѣ́йшаго, смире́нію же навы́кнемъ мытаре́ву изря́днѣйшему, да вознесе́мся, вопію́ще къ Бо́гу со о́нѣмъ: очи́сти рабы́ Твоя́, роди́выйся отъ Дѣ́вы, Христе́ Спа́се, во́лею, и кре́стъ претерпѣ́вый, совоздви́гнувый мíръ Твои́мъ Боже́ственнымъ могу́тствомъ.

И ны́нѣ, богоро́диченъ, подо́бенъ:

Творе́цъ созда́нія, и Бо́гъ всѣ́хъ, пло́ть человѣ́ческую прія́тъ изъ непоро́чныя утро́бы Твоея́, Всепѣ́тая Богоро́дице, и тлѣ́нное мое́ естество́ все́ обнови́, па́ки я́коже пре́жде рождества́ оста́вль по рождествѣ́. Отону́дуже Тя́ вѣ́рою вси́ восхваля́юще, зове́мъ: ра́дуйся мíру сла́во.

На хвали́техъ стихи́ры воскре́сны осмогла́сника 4 и тріо́ди самогла́сны 4:

Не помо́лимся фарисе́йски, бра́тіе... Фарисе́й тщесла́віемъ... [пи́саны на вече́рни.]

Сти́хъ: Воскресни́, Го́споди, Бо́же мо́й, да вознесе́тся рука́ Твоя́, не забу́ди убо́гихъ Твои́хъ до конца́.

Гла́съ 3: Мытаря́ и фарисе́я разли́чіе разумѣ́вши, душе́ моя́, о́наго у́бо возненави́ждь горды́нный гла́съ, о́ваго же ревну́й благоумиле́нной моли́твѣ, и возопíй: Бо́же, очи́сти мя́, грѣ́шнаго, и поми́луй мя́.

Сти́хъ: Исповѣ́мся Тебѣ́, Го́споди, всѣ́мъ се́рдцемъ мои́мъ, повѣ́мъ вся́ чудеса́ Твоя́.

Фарисе́я велехва́льный гла́съ, вѣ́рніи, возненави́дѣвше, мытаре́вой же благоумиле́нной моли́твѣ поревнова́вше, не высо́кая му́дрствуемъ, но, себе́ смиря́юще, со умиле́ніемъ воззове́мъ: Бо́же, очи́сти грѣхи́ на́ша.

Сла́ва, гла́съ 8:

Отъ дѣ́лъ похвале́ньми, фарисе́я оправда́юща себе́ осуди́лъ еси́, Го́споди, и мытаря́ смири́вшася, и воздыха́ньми очище́нія прося́ща оправда́лъ еси́: не внима́еши бо велему́дреннымъ помысло́мъ, и сокруше́нная се́рдца не уничижа́еши. Тѣ́мже и мы́ Тебѣ́ припа́даемъ во смире́ніи, пострада́вшему на́съ ра́ди: пода́ждь оставле́ніе и ве́лію ми́лость.

И ны́нѣ, [богоро́диченъ]:

Преблагослове́нна еси́, Богоро́дице Дѣ́во, [Вопло́щшимъ бо ся изъ Тебе́ а́дъ плѣни́ся, Ада́мъ воззва́ся, кля́тва потреби́ся, Ева свободи́ся, сме́рть умертви́ся, и мы́ ожи́хомъ. Тѣ́мъ, воспѣва́юще, вопіе́мъ: благослове́нъ Христо́съ Бо́гъ, благоволи́вый та́ко, сла́ва Тебѣ́].

Славосло́віе вели́кое и отпу́стъ. И обы́чно литíя въ притво́рѣ, въ не́йже пое́мъ: Сла́ва, и ны́нѣ, стихи́ру у́треннюю ева́нгельскую. И ча́съ пе́рвый.

[Зри́:] Подоба́етъ вѣ́дати, я́ко стихи́ры вся́ 11 у́треннія ева́нгельскія, отъ сея́ настоя́щія недѣ́ли, и да́же до [недѣ́ли] всѣ́хъ святы́хъ, на литíяхъ у́треннихъ пою́тся въ притво́рѣ, на Сла́ва, и ны́нѣ.

Вѣ́стно же бу́ди, я́ко отъ сея́ недѣ́ли начина́емъ чести́ въ притво́рѣ, по отпу́стѣ литíи, оглаше́нія свята́го отца́ на́шего Ѳео́дора Студи́та. И а́ще та́мо е́сть игу́менъ, чту́тся отъ него́, а́ще же ни́, то́ отъ екклисіа́рха, стоя́щимъ и со внима́ніемъ послу́шающимъ бра́тіямъ. По сконча́ніи же чте́нія глаго́лемъ тропа́рь преподо́бному Ѳео́дору, Гла́съ 8: Правосла́вія наста́вниче.., безъ богоро́дична. И соверше́нный отпу́стъ.


НА ЛИТУРГІИ,

Блаже́нна осмогла́сника [на 6] и отъ кано́на [тріо́ди] пѣ́снь 6-я [на 4]. Проки́менъ прилучи́вшагося гла́са. Апо́столъ къ Тимоѳе́ю, зача́ло 296. Аллилу́ія [гла́са]. Ева́нгеліе отъ Луки́, зача́ло 89. Прича́стенъ: Хвали́те Го́спода съ небе́съ, [хвали́те Его́ въ вы́шнихъ].

[Зри́:] Подоба́етъ вѣ́дати, я́ко въ се́й седми́цѣ постя́тся трекля́тіи арме́ни, ме́рзскій и́хъ по́стъ, глаго́лемый арциву́ріевъ. Мы́ же, [мона́си] на кíйждо де́нь [се́ же, и въ сре́ду и пято́къ,] вкуша́емъ сы́ръ и я́ица, [въ 9-й ча́съ.] Міря́не же ядя́тъ мя́со, развраща́юще о́нѣхъ велѣ́ніе толи́кія е́реси.

[Зри́:] Аще случи́тся пра́здникъ Срѣ́тенія Госпо́дня въ суббо́ту мясопу́стную, слу́жба уме́ршихъ пое́тся въ гробни́цѣ вся́, ве́черъ и у́тро. Аще ли нѣ́сть гробни́цы, то пое́тся въ сію́ суббо́ту предъ недѣ́лею о блу́днѣмъ, а та́мо, въ суббо́ту мясопу́стную, то́чію пра́зднику еди́ному пое́тся.

Источникъ: Тріо́діонъ, сíесть трипѣ́снецъ. — Кíевъ: Въ тѵпогра́фіи Кíево-Пече́рской Успе́нской Ла́вры, 1864. — Л. 1 – 7.

/ Къ оглавленію раздѣла /


Наверхъ / Къ титульной страницѣ

0