Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - четвергъ, 14 декабря 2017 г. Сейчасъ на порталѣ посѣтителей - 11.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

КНИГА МОЛЕБНЫХЪ ПѢНІЙ.

Послѣ́дованіе благода́рственнаго и моле́бнаго пѣ́нія ко Го́споду Бо́гу,
пѣва́емаго въ де́нь Рождества́ е́же по пло́ти Спаси́теля на́шего Іису́са Христа́,
и воспомина́нія избавле́нія Це́ркве и держа́вы Россíйскія отъ наше́ствія га́лловъ и съ ни́ми два́десяти язы́къ.

Повнегда́ соверши́тися Боже́ственнѣй Литургíи, исхо́дятъ священнослужа́щіи отъ олтаря́, и ста́вше посредѣ́ це́ркве, и сотво́рше покло́ны три́, начина́ютъ си́це:

Діа́конъ глаго́летъ: Благослови́, влады́ко.
И предстоя́тель возглаша́етъ:

Сла́ва Святѣ́й, и Единосу́щнѣй, и Животворя́щей и Нераздѣ́льнѣй Тро́ицѣ, всегда́, ны́нѣ, и при́сно и во вѣ́ки вѣко́въ.

Ли́къ: Ами́нь. Царю́ Небе́сный...

Чте́цъ: Трисвято́е, и по Отче на́шъ... Го́споди, поми́луй, [12]. Сла́ва, и ны́нѣ, Пріиди́те, поклони́мся... [Три́жды.]

И начина́ютъ пѣ́ти проро́чество свята́го проро́ка Иса́іи:

Чте́цъ: Услы́шите до послѣ́днихъ земли́. Яко съ на́ми Бо́гъ.

Могу́щіи покаря́йтеся. Яко съ на́ми Бо́гъ.

Аще бо па́ки возмо́жете, и па́ки побѣжде́ни бу́дете. Яко съ на́ми Бо́гъ.

И и́же а́ще совѣ́тъ совѣщава́ете, разори́тъ Госпо́дь. Яко съ на́ми Бо́гъ.

И сло́во, е́же а́ще возглаго́лете, не пребу́детъ въ ва́съ. Яко съ на́ми Бо́гъ.

Стра́ха же ва́шего не убои́мся, ниже́ смути́мся. Яко съ на́ми Бо́гъ.

Го́спода же Бо́га на́шего Того́ освяти́мъ, и То́й бу́детъ на́мъ въ стра́хъ. Яко съ на́ми Бо́гъ.

И а́ще на Него́ надѣ́яся бу́ду, бу́детъ мнѣ́ во освяще́ніе. Яко съ на́ми Бо́гъ.

И упова́я бу́ду на Него́, и спасу́ся Имъ. Яко съ на́ми Бо́гъ.

Се́ а́зъ и дѣ́ти, я́же ми́ даде́ Бо́гъ. Яко съ на́ми Бо́гъ.

Лю́діе ходя́щіи во тьмѣ́, ви́дѣша свѣ́тъ ве́лій. Яко съ на́ми Бо́гъ.

Живу́щіи во странѣ́ и сѣ́ни сме́ртнѣй, свѣ́тъ возсія́етъ на вы́. Яко съ на́ми Бо́гъ.

Яко Отроча́ роди́ся на́мъ. Сы́нъ, и даде́ся на́мъ. Яко съ на́ми Бо́гъ.

Его́же нача́льство бы́сть на ра́мѣ Его́. Яко съ на́ми Бо́гъ.

И ми́ра Его́ нѣ́сть предѣ́ла. Яко съ на́ми Бо́гъ.

И нарица́ется и́мя Его́, Вели́ка Совѣ́та Ангелъ. Яко съ на́ми Бо́гъ.

Чу́денъ, Совѣ́тникъ. Яко съ на́ми Бо́гъ.

Бо́гъ крѣ́покъ, Власти́тель, Нача́льникъ ми́ра. Яко съ на́ми Бо́гъ.

Оте́цъ бу́дущаго вѣ́ка. Яко съ на́ми Бо́гъ.

Съ на́ми Бо́гъ, разумѣ́йте, язы́цы, и покаря́йтеся. Яко съ на́ми Бо́гъ.

Сла́ва Отцу́, и Сы́ну, и Свято́му Ду́ху.

Съ на́ми Бо́гъ, разумѣ́йте, язы́цы, и покаря́йтеся. Яко съ на́ми Бо́гъ.

И ны́нѣ и при́сно и во вѣ́ки вѣко́въ, ами́нь.

Съ на́ми Бо́гъ, разумѣ́йте, язы́цы, и покаря́йтеся. Яко съ на́ми Бо́гъ.

Чте́цъ: Аллилу́ія, аллилу́ія, аллилу́ія, сла́ва Тебѣ́, Бо́же. [Три́жды.]

[Ми́рная ектенія́:]

Діа́конъ: Ми́ромъ Го́споду помо́лимся.

Ли́къ: Го́споди поми́луй.

Діа́конъ: О свы́шнѣмъ ми́рѣ, и о спасе́ніи ду́шъ на́шихъ, Го́споду помо́лимся.

Ли́къ: Го́споди поми́луй.

О ми́рѣ всего́ мíра, благостоя́ніи святы́хъ Бо́жіихъ церкве́й, и соедине́ніи всѣ́хъ, Го́споду помо́лимся.

Ли́къ: Го́споди поми́луй.

О святѣ́мъ хра́мѣ се́мъ, и съ вѣ́рою, благоговѣ́ніемъ и стра́хомъ Бо́жіимъ входя́щихъ въ о́нь, Го́споду помо́лимся.

Ли́къ: Го́споди поми́луй.

О Святѣ́йшемъ Прави́тельствующемъ Сѵно́дѣ, и о митрополи́тѣ на́шемъ [и́мярекъ, его́же о́бласть], честнѣ́мъ пресви́терствѣ, во Христѣ́ діа́конствѣ, о все́мъ при́чтѣ и лю́дѣхъ, Го́споду помо́лимся].

Ли́къ: Го́споди поми́луй.

О Благочести́вѣйшемъ, Самодержа́внѣйшемъ, Вели́комъ Госуда́рѣ на́шемъ Импера́торѣ [и́мярекъ] всея́ Россíи, и о Супру́гѣ Его́, Благочести́вѣйшей Госуда́рынѣ Императри́цѣ [и́мярекъ], о Ма́тери Его́, Благочести́вѣйшей Госуда́рынѣ Императри́цѣ [и́мярекъ], о Благовѣ́рномъ Госуда́рѣ, Наслѣ́дникѣ и Вели́комъ Кня́зѣ [и́мярекъ], и о все́мъ Ца́рствующемъ До́мѣ, о все́й пала́тѣ, и во́инствѣ Ихъ, Го́споду помо́лимся.

Ли́къ: Го́споди поми́луй.

О пособи́ти и покори́ти подъ но́зѣ Ихъ вся́каго врага́ и супоста́та, Го́споду помо́лимся.

Ли́къ: Го́споди поми́луй.

О гра́дѣ се́мъ, [аще въ монастырѣ́: О святѣ́й оби́тели се́й,] вся́комъ гра́дѣ и странѣ́, и вѣ́рою живу́щихъ въ ни́хъ, Го́споду помо́лимся.

Ли́къ: Го́споди поми́луй.

О благорастворе́ніи возду́ховъ, о изоби́ліи плодо́въ земны́хъ, и вре́менѣхъ ми́рныхъ, Го́споду помо́лимся.

Ли́къ: Го́споди поми́луй.

О пла́вающихъ, путеше́ствующихъ, неду́гующихъ, стра́ждущихъ, плѣне́нныхъ, и о спасе́ніи и́хъ, Го́споду помо́лимся.

Ли́къ: Го́споди поми́луй.

О е́же испра́витися моли́твѣ на́шей се́й, я́ко кади́лу предъ Спаси́телемъ на́шимъ Бо́гомъ, и прія́тися се́й же́ртвѣ серде́цъ и усте́нъ, исповѣ́дающихся Го́сподеви въ де́нь спасе́нія, услы́шавшему на́съ въ де́нь печа́ли, Го́споду помо́лимся.

Ли́къ: Го́споди поми́луй.

О е́же благосе́рдіемъ и ми́лостію призрѣ́ти на Благочести́вѣйшаго Импера́тора на́шего, и побѣдоно́сное ца́рство Его́, полага́ющихъ побѣ́дныя вѣнцы́ къ подно́жію но́гу Иму́щаго язы́ки достоя́ніе Свое́ и одержа́ніе Свое́ концы́ земли́, Царя́ царе́мъ и Го́спода господе́мъ, Тому́, вси́ припа́дше, помо́лимся.

Ли́къ: Го́споди поми́луй.

О е́же дарова́ти на́мъ благода́ть отъ ны́нѣ и до вѣ́ка, вѣ́рою и любо́вію возвѣща́ти спасе́ніе, и си́лу, и Ца́рство Бо́га на́шего, и о́бласть Христа́ Его́, пода́вшему держа́вѣ Его́ си́лу и возда́вшему на́мъ ра́дость спасе́нія Своего́, Го́споду помо́лимся.

Ли́къ: Го́споди поми́луй.

О изба́витися на́мъ отъ вся́кія ско́рби, гнѣ́ва и ну́жды, Го́споду помо́лимся.

Ли́къ: Го́споди поми́луй.

Заступи́, спаси́, поми́луй [и сохрани́ на́съ, Бо́же, Твое́ю благода́тію.

Ли́къ: Го́споди поми́луй.

Пресвяту́ю, Пречи́стую, Преблагослове́нную, Сла́вную Влады́чицу на́шу Богоро́дицу и Приснодѣ́ву Марíю, со всѣ́ми святы́ми помяну́вше, са́ми себе́ и другъ дру́га, и ве́сь живо́тъ на́шъ Христу́ Бо́гу предади́мъ.

Ли́къ: Тебѣ́, Го́споди.

Возглаше́ніе: Яко подоба́етъ Тебѣ́ вся́кая сла́ва, че́сть и поклоне́ніе, Отцу́ и Сы́ну и Свято́му Ду́ху, ны́нѣ и при́сно и во вѣ́ки вѣко́въ.

Ли́къ: Ами́нь.

Посе́мъ: Бо́гъ Госпо́дь, и яви́ся на́мъ... И пою́тся сія́:
Ли́къ 1-й, гла́съ 6-й:

Сла́ва въ вы́шнихъ Бо́гу и на земли́ ми́ръ: дне́сь воспріе́млетъ Виѳлее́мъ Сѣдя́щаго при́сно со Отце́мъ; дне́сь а́нгели Младе́нца рожде́ннаго боголѣ́пно славосло́вятъ: сла́ва въ вы́шнихъ Бо́гу, и на земли́ ми́ръ, въ человѣ́цѣхъ благоволе́ніе.

Ли́къ 2-й, гла́съ то́йже:

Сла́ва въ вы́шнихъ Бо́гу и на земли́ ми́ръ: се́ бо Агнецъ Виѳлее́мскъ льва́ и змíя на́ми попра́въ, мíру ми́ръ дарова́. Тѣ́мъ со а́нгелы Младе́нцу Міродержа́вному боголѣ́пну сла́ву принесе́мъ: сла́ва въ вы́шнихъ Бо́гу, и на земли́ ми́ръ, въ человѣ́цѣхъ благоволе́ніе.

Ли́къ 1-й, Сла́ва, гла́съ 1-й:

Спаси́, Го́споди, лю́ди Твоя́ и благослови́ достоя́ніе Твое́, побѣ́ды Благовѣ́рному Импера́тору на́шему [имяре́къ], на сопроти́вныя да́руя и Твое́ сохраня́я Кресто́мъ Твои́мъ жи́тельство.

И ны́нѣ, богоро́диченъ, гла́съ 1-й:

Всемíрную сла́ву, отъ человѣ́къ прозя́бшую и Влады́ку ро́ждшую, небе́сную две́рь воспои́мъ, Марíю Дѣ́ву, безпло́тныхъ пѣ́снь и вѣ́рныхъ удобре́ніе: Сія́ бо яви́ся не́бо и хра́мъ Божества́, Сія́, прегражде́ніе вражды́ разруши́вши, ми́ръ введе́ и Ца́рствіе отве́рзе; Сію́ у́бо иму́ще вѣ́ры утвержде́ніе, Побо́рника и́мамы, изъ Нея́ ро́ждшагося Го́спода. Дерза́йте у́бо, дерза́йте, лю́діе Бо́жіи, и́бо То́й побѣди́тъ враги́, я́ко Всеси́ленъ.

Діа́конъ: Во́нмемъ. Предстоя́тель: Ми́ръ всѣ́мъ.
Чте́цъ: И ду́хови твоему́.
И чте́тся паремія́ сія́:
[Вѣ́домо же да бу́детъ, я́ко идѣ́же мно́зи су́ть діа́кони, діа́конъ да чте́тъ ю́, а не чте́цъ обы́чный.]
Діа́конъ пе́рвенствуяй: Прему́дрость.
Діа́конъ чты́й: Проро́чества Иса́іина чте́ніе. [Глава́ 14.]
Па́ки пе́рвенствующій: Во́нмемъ.

Та́ко глаго́летъ Госпо́дь на царя́ Вавило́нска: ты́ ре́клъ еси́ во умѣ́ твое́мъ: на не́бо взы́ду, вы́ше звѣ́здъ небе́сныхъ поста́влю престо́лъ мо́й, ся́ду на горѣ́ высо́цѣ, на гора́хъ высо́кихъ, я́же къ сѣ́веру, взы́ду вы́ше о́блакъ, бу́ду подо́бенъ Вы́шнему. Ны́нѣ же во а́дъ сни́деши, и во основа́нія земли́. Ви́дѣвшіи тя́ удивя́тся о тебѣ́ и реку́тъ: се́й человѣ́къ раздража́яй зе́млю, потряса́яй цари́, положи́вый вселе́нную всю́ пу́сту и гра́ды ея́ разсы́па, плѣне́нныхъ не разрѣши́. Сія́ глаго́летъ Госпо́дь Савао́ѳъ: я́коже глаго́лахъ, та́ко бу́детъ, и я́коже совѣща́хъ, та́ко пребу́детъ, е́же погуби́ти ассирíанъ на земли́ Мое́й, и на гора́хъ Мои́хъ, и бу́дутъ въ попра́ніе и оты́мется отъ ни́хъ яре́мъ и́хъ, и сла́ва и́хъ отъ ра́менъ и́хъ оты́мется. Се́й совѣ́тъ, его́же совѣща́ Госпо́дь на всю́ вселе́нную, и сія́ рука́ на вся́ язы́ки вселе́нныя. Яже бо Бо́гъ Святы́й совѣща́, кто́ разори́тъ? И ру́ку Его́ высо́кую кто́ отврати́тъ?

Проки́менъ, гла́съ 7:

Кто́ Бо́гъ ве́лій, я́ко Бо́гъ на́шъ? Ты́ еси́ Бо́гъ, творя́й чудеса́.

Сти́хъ 1-й: Сказа́лъ еси́ въ лю́дехъ си́лу Твою́.

Сти́хъ 2-й: Рѣ́хъ: ны́нѣ нача́хъ, сія́ измѣ́на десни́цы Вы́шняго.

Сти́хъ 3-й: Помяну́хъ дѣла́ Госпо́дня, я́ко помяну́ отъ нача́ла чудеса́ Твоя́.

И паки: Кто́ Бо́гъ ве́лій, [я́ко Бо́гъ на́шъ? Ты́ еси́ Бо́гъ, творя́й чудеса́].

Ко Евре́емъ посла́нія свята́го апо́стола Па́вла чте́ніе. [Зача́ло 329.]
Діа́конъ: Во́нмемъ.

Бра́тіе, не доста́нетъ ми́ повѣству́ющу вре́мене о Гедео́нѣ, Вара́цѣ же и Сампсо́нѣ, и Іефѳа́и, о Дави́дѣ же и Самуи́лѣ, и о други́хъ проро́цѣхъ, и́же вѣ́рою побѣди́ша ца́рствія, содѣ́яша пра́вду, получи́ша обѣтова́нія, загради́ша уста́ льво́въ, угаси́ша си́лу о́гненную, избѣго́ша о́стрея меча́, возмого́ша отъ не́мощи, бы́ша крѣ́пцы во бране́хъ, обрати́ша въ бѣ́гство полки́ чужди́хъ. Тѣ́мже у́бо и мы́, толи́къ иму́ще облежа́щь на́съ о́блакъ свидѣ́телей, го́рдость вся́ку отло́жше, и удо́бь обстоя́тельный грѣ́хъ, терпѣ́ніемъ да тече́мъ на предлежа́щій на́мъ по́двигъ, взира́юще на Нача́льника вѣ́ры и Соверши́теля Іису́са.

Предстоя́тель: Ми́ръ ти́. Чте́цъ: И ду́хови твоему́.
Діа́конъ: Прему́дрость. Чте́цъ: Аллилу́ія, гла́съ 7.

Госпо́дь крѣ́пость лю́демъ Свои́мъ да́стъ, Госпо́дь благослови́тъ лю́ди Своя́ ми́ромъ.

Та́же діа́конъ: И о сподо́битися на́мъ слы́шанію свята́го Ева́нгелія, Го́спода Бо́га мо́лимъ.
Ли́къ: Го́споди, поми́луй. [Три́жды.]
Діа́конъ: Прему́дрость, про́сти, услы́шимъ свята́го Ева́нгелія.
И предстоя́тель: Ми́ръ всѣ́мъ. Лю́діе: И ду́хови твоему́.
Предстоя́тель: Отъ Матѳе́я свята́го Ева́нгелія чте́ніе. [Зача́ло 98.]
Ли́къ: Сла́ва Тебѣ́, Го́споди, сла́ва Тебѣ́.
Діа́конъ: Во́нмемъ. Предстоя́тель:

Рече́ Госпо́дь Свои́мъ ученико́мъ: услы́шати и́мате бра́ни и слы́шанія бра́немъ. Зри́те, не ужаса́йтеся, подоба́етъ бо всѣ́мъ си́мъ бы́ти, но не тогда́ е́сть кончи́на. Воста́нетъ бо язы́къ на язы́къ и ца́рство на ца́рство, и бу́дутъ гла́ди и па́губы, и тpу́си по мѣ́стомъ. Вся́ же сія́ нача́ло болѣ́знемъ. Бу́детъ бо тогда́ ско́рбь ве́лія, якова́ же нѣ́сть была́ отъ нача́ла мíра досе́лѣ, ниже́ и́мать бы́ти. И а́ще не бы́ша прекрати́лися днíе о́ны, не бы́ у́бо спасла́ся вся́ка пло́ть. Избра́нныхъ же ра́ди прекратя́тся днíе о́ны.

Ли́къ: Сла́ва Тебѣ́, Го́споди, сла́ва Тебѣ́.

Абіе діа́конъ глаго́летъ ектенію́ сію́:

Рце́мъ вси́ отъ всея́ души́, и отъ всего́ помышле́нія на́шего рце́мъ.

Ли́къ: Го́споди поми́луй.

Го́споди Вседержи́телю, Бо́же оте́цъ на́шихъ, мо́лимъ Ти ся, услы́ши и поми́луй.

Ли́къ: Го́споди поми́луй.

Поми́луй на́съ, Бо́же, по вели́цѣй ми́лости Твое́й, мо́лим Ти ся, услы́ши и поми́луй.

Ли́къ: Го́споди поми́луй. [Три́жды.]

Еще́ мо́лимся о Благочести́вѣйшемъ, Самодержа́внѣйшемъ Вели́комъ Госуда́рѣ на́шемъ, Импера́торѣ [и́мярекъ] всея́ Россíи: о держа́вѣ, побѣ́дѣ, пребыва́ніи, ми́рѣ, здра́віи, спасе́ніи Его́, и Го́споду Бо́гу на́шему наипа́че поспѣши́ти и пособи́ти Ему́ во всѣ́хъ, и покори́ти подъ но́зѣ Его́ вся́каго врага́ и супоста́та.

Ли́къ: Го́споди поми́луй. [Три́жды.]

Еще́ мо́лимся о Супру́гѣ Его́, Благочести́вѣйшей Госуда́рынѣ Императри́цѣ [и́мярекъ], о ма́тери Его́, Благочести́вѣйшей Госуда́рынѣ Императри́цѣ [и́мярекъ], о Благовѣ́рномъ Госуда́рѣ, Наслѣ́дникѣ Его́ и Вели́комъ Кня́зѣ [и́мярекъ] и о все́мъ Ца́рствующемъ До́мѣ.

Ли́къ: Го́споди поми́луй. [Три́жды.]

Еще́ мо́лимся о Святѣ́йшемъ Прави́тельствующемъ Сѵно́дѣ, [а́ще подъ митрополи́томъ, приглаго́летъ: и о митрополи́тѣ на́шемъ, и́мярекъ, его́же о́бласть] и все́й во Христѣ́ бра́тіи на́шей.

Ли́къ: Го́споди поми́луй. [Три́жды.]

Еще́ моли́мся о все́мъ Ихъ христолюби́вомъ во́инствѣ.

Ли́къ: Го́споди поми́луй. [Три́жды.]

Еще́ мо́лимся, о е́же прія́ти Го́споду Спаси́телю на́шему исповѣ́даніе и благодаре́ніе на́съ, недосто́йныхъ рабо́въ Свои́хъ, я́ко не по беззако́ніемъ на́шимъ сотвори́лъ е́сть на́мъ, ниже́ по грѣхо́мъ на́шимъ возда́лъ е́сть на́мъ, но и въ годи́ну искуше́нія, прише́дшую на всю́ вселе́нную, изба́вилъ ны́ е́сть, и внегда́ обыше́дше обыдо́ша на́съ врази́ на́ши, яви́лъ е́сть на́мъ спасе́ніе Свое́.

Ли́къ: Го́споди поми́луй. [Три́жды.]

Авраа́мову десяти́ну, по е́же низложи́ти ему́ четы́ри цари́ и плѣне́нныя свободи́ти, руко́ю Мелхиседе́ка пріе́мый, и внегда́ погря́знути фарао́ну и во́емъ его́ въ мо́ри Чермнѣ́мъ, Моисе́я и Маріа́мы пѣ́сни же и тимпа́номъ и лико́мъ отъ столпа́ о́блачна внима́вый, и царя́ по се́рдцу Твоему́ Дави́да побѣди́тельная Тебѣ́ Еди́ному восписова́ти научи́вый, Са́мъ и ны́нѣ, Го́споди си́лъ, за е́же разруши́ти Тебѣ́ врага́ и мѣ́стника, и спасти́ Пома́заннаго Твоего́, и Держа́ву Россíйскую просла́вити, и Це́рковь утверди́ти, я́коже изъ у́стъ младе́нецъ, отъ всѣ́хъ на́съ уго́дныя Тебѣ́ соверши́ хвалы́, ду́ши на́ша во спасе́ніе Твое́ исчеза́ющія, я́ко всесожже́ніе пріими́, гла́съ ра́дости на́шея услы́ши, и во пре́дняя, усе́рдно мо́лимъ Ти ся, отъ дне́й печа́ли поми́луй.

Ли́къ: Го́споди поми́луй. [Три́жды.]

Еще мо́лимся о побѣдоно́сныхъ вожде́хъ и во́инѣхъ на́шихъ, и о всѣ́хъ ревни́телехъ вѣ́ры и пра́вды, въ годи́ну искуше́нія ду́ши своя́ за бра́тію свою́ положи́вшихъ, я́ко да да́стъ и́мъ Ца́рь Сла́вы въ де́нь пра́веднаго Своего́ воздая́нія живо́тъ вѣ́чный и вѣнцы́ нетлѣ́нія, на́съ же всѣ́хъ въ и́хъ ду́сѣ и вѣ́рѣ и единомы́сліи утверди́тъ.

Ли́къ: Го́споди поми́луй. [Три́жды.]
Предстоя́тель:

Услы́ши ны́, Бо́же Спаси́телю на́шъ, упова́ніе всѣ́хъ конце́въ земли́ и су́щихъ въ мо́ри дале́че, и ми́лостивъ, ми́лостивъ бу́ди, Влады́ко, о грѣсѣ́хъ на́шихъ, и поми́луй ны́. Ми́лостивъ бо и человѣколю́бецъ Бо́гъ еси́, и Тебѣ́ сла́ву возсыла́емъ, Отцу́ и Сы́ну и Свято́му Ду́ху, ны́нѣ и при́сно и во вѣ́ки вѣко́въ.

Ли́къ: Ами́нь.
Діако́нъ: Во́нмемъ, и въ умиле́ніи се́рдца, колѣ́на ду́шъ и тѣле́съ на́шихъ прекло́ньше, Го́споду помо́лимся.

Предстоя́тель же со все́ю це́рковію, прекло́нь колѣ́на, со вся́кимъ внима́ніемъ и умиле́ніемъ, глаго́летъ моли́тву сію́ велегла́сно:

Бо́же Вели́кій и Непостижи́мый, Отче Безнача́льный, Собезнача́льный Сы́не и Ду́ше Соприсносу́щный, осуществу́яй не су́щая, спаса́яй погиба́ющія, животворя́й ме́ртвыя, творя́й по во́ли Твое́й въ си́лѣ небе́снѣй и въ селе́ніи земнѣ́мъ, и ди́внымъ Твои́мъ про́мысломъ управля́яй вся́ческая! Приклони́ у́хо Твое́ съ высоты́ святы́я Твоея́ и пріими́ отъ на́съ, смире́нныхъ и недосто́йныхъ рабо́въ Твои́хъ, и́мже ве́ліе Твое́ отъ бѣ́дъ и всегуби́тельства спасе́ніе яви́лъ еси́, се́рдцемъ и усты́ возноси́мая Тебѣ́ благода́рственная сія́ моле́нія, исповѣ́данія и славосло́вія. Яко не по беззако́ніямъ на́шимъ сотвори́лъ еси́ на́мъ, Го́споди, ниже́ по грѣхо́мъ на́шимъ возда́лъ еси́ на́мъ. Ты́ глаго́лалъ еси́ дре́вле сыново́мъ Изра́илевымъ, я́ко, а́ще не послу́шаютъ гла́са Твоего́ храни́ти и твори́ти вся́ за́повѣди Твоя́, наведе́ши на ни́хъ язы́къ безсту́денъ лице́мъ, и́же сокруши́тъ и́хъ во градѣ́хъ и́хъ, до́ндеже разоря́тся стѣ́ны и́хъ. И мы́ вѣ́дѣхомъ, я́ко пріи́де глаго́лъ стра́шный се́й на ня́ и на отцы́ на́ша, оба́че преще́нія Твоего́ не убоя́вшеся и о милосе́рдіи Твое́мъ вознеради́вше, оста́вихомъ пу́ть пра́вды Твоя́ и ходи́хомъ въ во́ляхъ серде́цъ на́шихъ и не искуси́хомъ имѣ́ти въ ра́зумѣ и се́рдцѣ Тебе́, Бо́га ра́зумовъ и серде́цъ, еще́ же и оте́ческая преда́нія ни во что́же вмѣни́вше, прогнѣ́вахомъ Тя́ о чужди́хъ. Ихже ра́ди, я́коже дре́вле сыно́въ Изра́илевыхъ, та́ко и на́съ объя́тъ лю́тое обстоя́ніе, и о и́хъ же ревнова́хомъ наставле́ніихъ, си́хъ враго́въ имѣ́яхомъ бу́іихъ и звѣронра́вныхъ. Но Ты́, Го́споди Бо́же Ще́дрый и Ми́лостивый, Долготерпѣли́вый и Многоми́лостивый и Истинный, и пра́вду храня́й, и творя́й ми́лость въ ты́сящи, отъе́мляй беззако́нія, и непра́вды, и грѣхи́, на вре́мя ма́ло оста́вль на́съ, ми́лостію ве́ліею поми́ловалъ еси́ и, посѣти́въ жезло́мъ непра́вды на́ша, я́коже ще́дритъ оте́цъ сы́ны, та́ко уще́дрилъ еси́ на́съ. Призрѣ́лъ бо еси́ на ско́рбь на́шу и на потребле́ніе Ца́рствующаго гра́да, въ не́мже отъ лѣ́тъ дре́внихъ призва́ся и́мя Твое́, и на моле́нія на́ша, я́же не на на́ша пра́вды упова́юще поверго́хомъ предъ Тобо́ю, но на щедро́ты Твоя́ мно́ги, Го́споди, и да́лъ еси́ на́мъ хребе́тъ нечести́выхъ супоста́товъ, Благочести́вѣйшаго же царя́ на́шего Алекса́ндра Па́вловича вѣнча́лъ еси́ ору́жіемъ благоволе́нія Твоего́, да отъ лица́ Христа́ Твоего́ исчеза́юще исче́знутъ, я́ко ды́мъ, врази́ Твои́, лю́бящіи же Тебе́ возсія́ютъ, я́ко восто́къ со́лнца въ си́лѣ свое́й. Ви́дѣхомъ, Го́споди, ви́дѣхомъ и вси́ язы́цы ви́дѣша въ на́съ, я́ко Ты́ еси́ Бо́гъ, и нѣ́сть ра́звѣ Тебе́, Ты́ убіе́ши и жи́ти сотвори́ши, порази́ши и исцѣли́ши, и нѣ́сть, и́же и́зметъ отъ руку́ Твое́ю. Тѣ́мже утверди́ся се́рдце на́ше во Го́сподѣ на́шемъ, вознесе́ся ро́гъ на́шъ въ Бо́зѣ на́шемъ, возвесели́хомся о спасе́ніи Твое́мъ. Благодари́мъ Тя́, Го́споди, я́ко наказу́я наказа́лъ еси́ ны́ вма́лѣ, да не сме́рти во вѣ́ки преда́си на́съ. Да́ждь на́мъ, Го́споди, па́мять сего́ сла́внаго Твоего́ посѣще́нія тве́рду и непреста́нну имѣ́ти въ себѣ́, я́ко да въ Тебѣ́ утвержде́ни сыно́внимъ стра́хомъ и вѣ́рою и любо́вію, и Твое́ю крѣ́постію огражде́ни, вы́ну, я́коже дне́сь, пое́мъ и славосло́вимъ и́мя Свято́е Твое́. Утверди́ благослове́ніе Твое́ и на Благочести́вѣйшемъ, Самодержа́внѣйшемъ, Вели́комъ Госуда́рѣ на́шемъ, Импера́торѣ [и́мярекъ] всея́ Россíи, и Ду́хъ Тво́й Благíй да почи́етъ на Не́мъ вы́ну. Пода́ждь въ благочести́вой держа́вѣ Его́ па́стыремъ — святы́ню, прави́телемъ — су́дъ и пра́вду, наро́ду — ми́ръ и тишину́, зако́намъ — си́лу и вѣ́рѣ — преспѣ́яніе. О, Премилосе́рдый Го́споди! Проба́ви ми́лость Твою́ вѣ́дущимъ Тя́, но и неи́щущимъ Тебе́ явле́нъ бу́ди, еще́ и враго́въ на́шихъ сердца́ къ Тебѣ́ обрати́, и всѣ́мъ язы́комъ и племено́мъ во Еди́нѣмъ Истиннѣмъ Христѣ́ Твое́мъ позна́нъ бу́ди. Да отъ восто́къ со́лнца до за́падъ, всѣ́ми у́бо язы́ки, еди́нѣмъ же се́рдцемъ, вси́ язы́цы восклица́ютъ Тебѣ́ гла́сомъ ра́дованія:

И возглаша́етъ ве́ліимъ гла́сомъ:
Сла́ва Тебѣ́, Бо́гу, Спаси́телю всѣ́хъ, во вѣ́ки вѣко́въ. Ли́къ: Ами́нь.
И а́біе пое́тъ славосло́віе вели́кое: Сла́ва въ вы́шнихъ Бо́гу...
или́
Пѣ́снь свята́го Амвро́сія, епи́скопа Медіола́нскаго:

Тебе́ Бо́га хва́лимъ, Тебе́ Го́спода исповѣ́дуемъ, Тебе́ превѣ́чнаго Отца́ вся́ земля́ велича́етъ; Тебѣ́ вси́ а́нгели, Тебѣ́ небеса́ и вся́ си́лы, Тебѣ́ херуви́ми и серафи́ми непреста́нными гла́сы взыва́ютъ: свя́тъ, свя́тъ, свя́тъ, Госпо́дь Бо́гъ Савао́ѳъ, по́лны су́ть небеса́ и земля́ вели́чества сла́вы Твоея́. Тебе́ пресла́вный апо́стольскій ли́къ, Тебе́ проро́ческое хвале́бное число́, Тебе́ хва́литъ пресвѣ́тлое му́ченическое во́инство; Тебе́ по все́й вселе́ннѣй исповѣ́дуетъ свята́я Це́рковь: Отца́ непостижи́маго вели́чества, покланя́емаго Твоего́ и́стиннаго и единоро́днаго Сы́на, и Свята́го Утѣ́шителя Ду́ха. Ты́, Царю́ сла́вы, Христе́, Ты́ Отца́ присносу́щный Сы́нъ еси́, Ты́ ко избавле́нію пріе́мля человѣ́ка, не возгнуша́лся еси́ дѣви́ческаго чре́ва; Ты́ одолѣ́въ сме́рти жа́ло, отве́рзлъ еси́ вѣ́рующимъ Ца́рство Небе́сное. Ты́ одесну́ю Бо́га сѣди́ши во сла́вѣ Отчей, Судія́ пріити́ вѣ́ришися. Тебе́ у́бо про́симъ: помози́ рабо́мъ Твои́мъ, и́хже честно́ю Твое́ю кро́вію искупи́лъ еси́; сподо́би со святы́ми Твои́ми въ вѣ́чнѣй сла́вѣ Твое́й ца́рствовати. Спаси́ лю́ди Твоя́, Го́споди, и благослови́ достоя́ніе Твое́; испра́ви я́, и вознеси́ и́хъ во вѣ́ки; во вся́ дни благослови́мъ Тебе́ и восхва́лимъ и́мя Твое́ во вѣ́къ и во вѣ́къ вѣ́ка. Сподо́би, Го́споди, въ де́нь се́й безъ грѣха́ сохрани́тися на́мъ; поми́луй на́съ, Го́споди, поми́луй на́съ; бу́ди ми́лость Твоя́, Го́споди, на на́съ, я́коже упова́хомъ на Тя́. На Тя́, Го́споди, упова́хомъ, да не постыди́мся во вѣ́ки, ами́нь.

Діа́конъ: Прему́дрость...
И глаго́лется отпу́стъ се́й:

Иже во я́слехъ Виѳлее́мскихъ, я́ко Агнецъ возлегíй, сопроти́вныхъ же, крѣ́покъ я́ко ле́въ, сокруши́вый, и вѣ́рныя о́вцы Своя́ на пу́ть пра́вды и спасе́нія и ми́ра наста́вивый и упасы́й, Христо́съ, Истинный Бо́гъ и Спаси́тель на́шъ, моли́твами Пречи́стыя Своея́ Ма́тере и всѣ́хъ святы́хъ, поми́луетъ и спасе́тъ на́съ, я́ко Бла́гъ и Человѣколю́бецъ. [Ли́къ: Ами́нь.]

Діа́конъ же возглаша́етъ:

Благоде́нственное и ми́рное житіе́, здра́віе же и спасе́ніе, и во все́мъ благо́е поспѣше́ніе, на враги́ же побѣ́ду и одолѣ́ніе, пода́ждь, Го́споди, Благочести́вѣйшему, Самодержа́внѣйшему, Вели́кому Госуда́рю на́шему Импера́тору [и́мярекъ] всея́ Россíи, Супру́гѣ Его́, Благочести́вѣйшей Госуда́рынѣ Императри́цѣ [и́мярекъ], Ма́тери Его́, Благочести́вѣйшей Госуда́рынѣ Императри́цѣ [и́мярекъ], Благовѣ́рному Госуда́рю, Наслѣ́днику и Вели́кому Кня́зю [и́мярекъ], и всему́ Ца́рствующему До́му, и сохрани́ Ихъ на мно́гая лѣ́та.

Пѣ́вчіе пою́тъ: Мно́гая лѣ́та.., на о́ба ли́ка по три́жды.

Во блаже́нномъ успе́ніи вѣ́чный поко́й пода́ждь, Го́споди, у́спшему рабу́ Твоему́, Благочести́вѣйшему Вели́кому Госуда́рю Импера́тору Алекса́ндру Пе́рвому, и сотвори́ Ему́ вѣ́чную па́мять.

Пѣ́вчіе пою́тъ: Вѣ́чная па́мять.., три́жды.

Христолюби́вому Всероссíйскому побѣдоно́сному во́инству, мно́гая лѣ́та.

Ли́къ: Мно́гая лѣ́та.., три́жды.
Пѣва́ему же многолѣ́тію начина́ется зво́нъ, и быва́етъ до ве́чера.

Источникъ: Послѣ́дованіе благода́рственнаго и моле́бнаго пѣ́нія ко Го́споду Бо́гу, пѣва́емаго въ де́нь Рождества́ е́же по пло́ти Спаси́теля на́шего Іису́са Христа́, и воспомина́нія избавле́нія Це́ркве и держа́вы Россíйскія отъ наше́ствія га́лловъ и съ ни́ми два́десяти язы́къ. // Рождество Христово. Служба на праздникъ Рождества, еже по плоти, Господа Бога и Спаса нашего Іисуса Христа, съ приложеніемъ минейныхъ сказаній, избранныхъ статей, объяснительныхъ примѣчаній и нотныхъ пѣснопѣній. — М.: Синодальная Типография, 1900. — С. 156-170.

/ Къ оглавленію раздѣла /


Наверхъ / Къ титульной страницѣ

0