Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - среда, 24 мая 2017 г. Сейчасъ на порталѣ посѣтителей - 11.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

ТРЕБНИКЪ ДОПОЛНИТЕЛЬНЫЙ.
Чи́нъ благослове́нія супру́гъ, ча́дъ неиму́щихъ.

Іере́й: Благослове́нно Ца́рство... Ли́къ: Ами́нь.

Му́жу и женѣ́, прикло́ншимъ колѣ́на, глаго́летъ іере́й ектенію́ сію́: Ми́ромъ Го́споду помо́лимся, да́же до О пла́вающихъ... Та́же сію́:

О е́же сохрани́тися рабо́мъ Бо́жіимъ (и́мя ре́къ), Го́споду помо́лимся.

О е́же сохрани́тися и́мъ неврежде́ннымъ отъ вся́каго наи́тія сатани́на, Го́споду помо́лимся.

О е́же соблюсти́ и́хъ отъ ко́зней вра́жіихъ, Го́споду помо́лимся.

О изба́витися и́мъ и на́мъ отъ вся́кія ско́рби..., и про́чая. Возгла́съ: Яко подоба́етъ Тебѣ́... Ли́къ: Ами́нь. Іере́й: Го́споду помо́лимся, и чте́тъ моли́тву сію́:

Услы́ши ны́, Милосе́рде и Всемогу́щій Бо́же, да е́же дѣ́ется служи́телствомъ на́шимъ, сіе́ испо́лнится Твое́ю благода́тію. Бу́ди ми́лостивъ, Го́споди, моле́ніямъ на́шимъ, и воспомяни́ уста́вы Твоя́, и́миже умно́женія человѣ́ческаго ро́да уста́вилъ еси́, ми́лостивнѣ предста́ни, да е́же Тобо́ю сочета́но бы́сть, сіе́ Твое́ю по́мощію сохрани́тся. Бо́же Преблагíй, вла́стію си́лы Твоея́, отъ несу́щихъ вся́ сотвори́вый, и вся́кихъ ве́щей нача́тки установи́вый, человѣ́ка во о́бразъ Бо́жій сотвори́вый, съ неразлу́чною по́мощію жены́, да тѣлеси́ же́нскому да́си отъ му́жеска нача́токъ, уча́: ника́коже разлучи́тися, е́же Бо́гу отъ еди́наго установи́ти подоба́ше. Бо́же на́шъ, Иже высо́кою та́йною супру́жества сою́зъ, во е́же и́мъ предзна́меновати та́йну Христа́ съ Це́рковію, соедине́ніе освяти́лъ еси́: и́мже невѣ́ста совокупля́ется му́жу, и дру́жество пе́рвѣе установле́нное сицевы́мъ да́руется благослове́ніемъ, е́же са́мое то́кмо ни прароди́тельнымъ грѣхо́мъ, ниже́ пото́помъ Но́евымъ разори́ся. Сего́ ра́ди при́зри, Милосе́рде, на рабы́ Твоя́ сія́ (и́мя ре́къ) супру́жнымъ сою́зомъ свя́занныя, Твоего́ же прибѣ́жища и по́мощи прося́щія, да бу́детъ въ ни́хъ и́го ми́лости, и ми́ра и ра́дованія, и ничто́же въ ни́хъ отъ дѣ́лъ и́хъ сатана́ обря́щетъ, да бу́дутъ плодо́витіи и да у́зрятъ сы́ны сыно́въ свои́хъ, да́же до тре́тіяго и четве́ртаго ро́да, къ возждѣле́нной ста́рости дости́гнутъ и вни́дутъ въ небе́сную ски́нію. Яко ми́лостивъ и человѣколю́бецъ Бо́гъ еси́... Ли́къ: Ами́нь.

Воста́вшимъ супру́гомъ, кропи́тъ я́ іере́й свяще́нною водо́ю.

Чте́ніе паремíй отъ Товíи, глава́ 8-я:

Тогда́ воста́ Товíя отъ ло́жа, и рече́: воста́ни, сестро́, и помо́лимся, да поми́луетъ ны́ Госпо́дь. И нача́ Товíя глаго́лати: Благослове́нъ еси́ Бо́же оте́цъ на́шихъ, и благослове́но и́мя Твое́ свято́е и сла́вное во вѣ́ки! Да благословя́тъ Тя́ небеса́ и вся́ созда́нія Твоя́! Ты́ сотвори́лъ еси́ Ада́ма, и да́лъ еси́ ему́ помо́щницу Еву, утвержде́ніе — жену́ его́. И ны́нѣ, Го́споди, не блудодѣя́нія ра́ди а́зъ пое́млю сестру́ мою́ сію́, но по и́стинѣ: повели́ поми́ловану ми́ бы́ти, и съ не́ю состарѣ́тися. И рече́ съ ни́мъ: ами́нь.

Та́же Ева́нгеліе отъ Іоа́нна, зача́ло 6:

Во вре́мя о́но, бра́къ бы́сть въ Ка́нѣ Галиле́йстѣй... По Ева́нгеліи: Го́споду помо́лимся, и чте́тъ моли́тву сію́:

Го́споди Іису́се Христе́, преблагослове́нныя Дѣ́вы Марíи, обруче́нныя Іо́сифови, Пресвятѣ́йшій Сы́не! Въ раи́ земно́мъ жени́тву установи́вый ко умно́женію и сохране́нію ро́да человѣ́ческаго, и ту́южде въ прише́ствіи Твое́мъ чуде́снѣ почита́вый, и нача́тка чуде́съ Твои́хъ освяти́вый, благослови́ рабы́ Твоя́ сія́ (и́мя ре́къ), я́же сочета́лъ еси́, заступле́ніемъ Преблагослове́нныя Дѣ́вы Марíи, Ма́тере Твоея́, и моле́нми всѣ́хъ святы́хъ Твои́хъ, благослови́ти и отъ вся́каго связа́нія, злодѣ́йствія и волхвова́нія сатаны́ и слу́гъ его́ свободи́ти; да́ждь и́мъ чадоро́дія благода́ть, да свобо́днѣ соверша́ютъ жени́тву свою́ и оплодонося́тъ ло́же свое́, во е́же роди́ти и воспита́ти ча́да въ хвалу́ и сла́ву Твою́: во и́мя Отца́, и Сы́на и Свята́го Ду́ха. Ами́нь.

Го́споду помо́лимся. Го́споди поми́луй.

Го́споди Іису́се Христе́, Сы́не Бо́га Жива́го, Иже чре́во Пресвяты́я Дѣ́вы Марíи чуде́снѣ плодно́ сотвори́лъ еси́, да отъ Ду́ха Свя́та зачне́тъ, роди́тъ и воспита́етъ Тя́, Бо́га и Спа́са на́шего. Мо́лимтися и ми́лися Тебѣ́ дѣ́емъ, премилосе́рде Го́споди, да си́мъ рабо́мъ Твои́мъ (и́мя ре́къ) пло́дъ пода́си, о е́же и́мъ роди́ти и воспита́ти ча́да въ живо́тъ вѣ́чный. Бо́же Превѣ́чный, Ты́ благосови́лъ еси́ прароди́тели на́ша супру́жествомъ, благослови́ и сія́, да́руя и́мъ пло́дъ сѣ́мене и оживотвори́ утро́бу невѣ́сты, е́же бы имѣ́ти наслѣ́діе до́ма христіа́нскаго во благо́е: во и́мя Отца́, и Сы́на и Свята́го Ду́ха. Ами́нь. Покади́въ супру́жники, благословля́етъ ча́шу о́бщую вина́, и при кажде́ніи глаго́летъ:

Благослове́ніе Бо́га Отца́, и Сы́на и Свята́го Ду́ха, да сни́детъ на ва́съ и всегда́ да пребыва́етъ на ва́съ. Подава́я и́мъ ча́шу съ вино́мъ, глаго́летъ: Пíйте, и расти́те, и умножа́йте въ се́рдцѣ свое́мъ вѣ́ру и любо́вь къ Бо́гу, Иже да умно́житъ сѣ́мя ва́ше, во сла́ву Бо́жію и въ ра́дость ва́шу: во и́мя Отца́, и Сы́на и Свята́го Ду́ха. Ами́нь.

Ектенія́, и отпу́стъ.

Источникъ: Во славу Святыя, Единосущныя, Животворящія и Нераздѣлимыя Троицы, Отца, и Сына и Святаго Духа, благословеніемъ святѣйшаго Господина Германа, Православнаго Патріарха Сербскаго, Архіепископа Карловачкаго и Митрополита, и пр. и пр. напечатася сія книга: Дополнительный Требникъ, изъ разныхъ церковныхъ книгъ собранная и на свѣтъ изданная, трудомъ и иждивеніемъ Іерея Василія Николаевичьа, Пароха Ирижкаго. — Новый Садъ: Въ печатни М. Димитріевичьа, 1887. — С. 245-249.

/ Къ оглавленію раздѣла /


Наверхъ / Къ титульной страницѣ

0