Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - суббота, 16 декабря 2017 г. Сейчасъ на порталѣ посѣтителей - 4.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

КНИГА МОЛЕБНЫХЪ ПѢНІЙ.

Послѣ́дованіе въ недѣ́лю Правосла́вія.

По сконча́ніи чте́нія часо́въ стоя́щу архіере́ю на обы́чнѣмъ мѣ́стѣ въ облаче́ніи, отъ олтаря́ изхо́дятъ архимандри́ти, игу́мени, свяще́нницы, діа́кони; свяще́нницы же изно́сятъ ико́ну Спаси́телеву и Богоро́дичну, и полага́ютъ посредѣ́ це́ркве на анало́гіи.

Протодіа́конъ начина́етъ: Благослови́, Влады́ко.

Архіере́й: Благослове́нъ Бо́гъ на́шъ...

Ли́къ: Ами́нь. И пою́тъ: Царю́ Небе́сный...

Чте́цъ: Трисвято́е, [и по Отче на́шъ...] Го́споди, поми́луй, [12]. Пріиди́те поклони́мся...

И псало́мъ 74.

Исповѣ́мыся Тебѣ́, Бо́же, исповѣ́мыся Тебѣ́, и призове́мъ и́мя Твое́, повѣ́мъ вся́ чудеса́ Твоя́. Егда́ пріиму́ вре́мя, а́зъ правоты́ возсужду́. Раста́яся земля́ и вси́ живу́щіи на не́й, а́зъ утверди́хъ столпы́ ея́. Рѣ́хъ беззако́ннующимъ, не беззако́ннуйте, и согрѣша́ющимъ, не возноси́те ро́га. Не воздвиза́йте на высоту́ ро́га ва́шего, и не глаго́лите на Бо́га непра́вду: я́ко ниже́ отъ исхо́дъ, ниже́ отъ за́падъ, ниже́ отъ пусты́хъ го́ръ. Яко Бо́гъ Судія́ е́сть: сего́ смиря́етъ, и сего́ возно́ситъ. Яко ча́ша въ руцѣ́ Госпо́дни, вина́ нерастворе́на испо́лнь растворе́нія, и уклони́ отъ сея́ въ сію́: оба́че дро́ждіе Его́ не истощи́ся, испію́тъ вси́ грѣ́шніи земли́. Азъ же возра́дуюся въ вѣ́къ, воспою́ Бо́гу Іа́ковлю, и вся́ ро́ги грѣ́шныхъ сломлю́, и вознесе́тся ро́гъ пра́веднаго.

Сла́ва и ны́нѣ. Аллилу́ія, [три́жды].

Діа́конъ чте́тъ ектенію́ обы́чную, да́же до «О пла́вающихъ...» и а́біе прилага́етъ сію́:

О еже ми́лостивымъ о́комъ призрѣ́ти на святу́ю Свою́ Це́рковь и соблюсти́ ю́ невриди́му и непреобори́му отъ ересе́й и суевѣ́рій, и ми́ромъ Свои́мъ огради́ти, Го́споду помо́лимся.

О е́же утиши́ти раздира́ніе ея́, и си́лою Свята́го Ду́ха обрати́ти всѣ́хъ отсту́пльшихъ къ позна́нію и́стины, и сопричести́ къ избра́нному Своему́ ста́ду, Го́споду помо́лимся.

О е́же просвѣти́ти мы́сли, невѣ́ріемъ помраче́нныхъ, свѣ́томъ Своего́ богоразу́мія, вѣ́рныхъ же Свои́хъ укрѣпи́ти и непоколеби́мыхъ въ правовѣ́ріи соблюсти́, Го́споду помо́лимся.

[О изба́витися на́мъ... и про́чее.]

Посе́мъ: Бо́гъ Госпо́дь и яви́ся на́мъ.., гла́съ 4:

Благода́рни су́ще недосто́йніи раби́ Твои́, Го́споди, о Твои́хъ вели́кихъ благодѣя́ніихъ на на́съ бы́вшихъ, сла́вяще Тя́ хва́лимъ, благослови́мъ, благодари́мъ, пое́мъ, и велича́емъ Твое́ благоутро́біе, и ра́бски любо́вію вопіе́мъ Ти́: Благодѣ́телю, Спа́се на́шъ, сла́ва Тебѣ́.

Сла́ва, гла́съ 3:

Твои́хъ благодѣя́ній и даро́въ ту́не, я́ко раби́ непотре́бніи сподо́блшеся, Влады́ко, къ Тебѣ́ усе́рдно притека́юще, благодаре́ніе по си́лѣ прино́симъ и Тебе́, я́ко Благодѣ́теля и Творца́ сла́вяще, вопіе́мъ: сла́ва Тебѣ́, Бо́же преще́дрый.

И ны́нѣ, гла́съ 4:

Якоже вы́шнія тве́рди благолѣ́піе, и ни́жнюю споказа́лъ еси́ красоту́ свята́го селе́нія сла́вы Твоея́, Го́споди, утверди́ сіе́ во вѣ́къ вѣ́ка, и пріими́ на́ша въ не́мъ непреста́нно приноси́мая Тебѣ́ моле́нія Богоро́дицею, всѣ́хъ Животе́ и Воскресе́ніе.

Протодіа́конъ: Во́нмемъ.

Архіере́й: Ми́ръ всѣ́мъ.

Чте́цъ: И ду́хови твоему́.

Діа́конъ: Прему́дрость, во́нмемъ.

Чте́цъ: Проки́менъ, гла́съ 4:

Насажде́ни въ дому́ Госпо́дни,* во дво́рѣхъ Бо́га на́шего процвѣту́тъ.

Сти́хъ: Возвесели́тся пра́ведникъ о Го́сподѣ, и упова́етъ на Него́.

Апо́столъ къ Ри́мляномъ, зача́ло 121.

Бра́тіе, молю́ вы́, блюди́теся отъ творя́щихъ ра́спри и раздо́ры, кромѣ́ уче́нія, ему́же вы́ научи́стеся, и уклони́теся отъ ни́хъ. Таковíи бо Го́сподеви на́шему Іису́су Христу́ не рабо́таютъ, но своему́ чре́ву: и́же благи́ми словесы́ благослове́ніемъ прельща́ютъ сердца́ незло́бивыхъ. Ва́ше бо послуша́ніе ко всѣ́мъ дости́же: ра́дуюся же е́же о ва́съ, хощу́ же ва́съ му́дрыхъ у́бо бы́ти во благо́е, просты́хъ же въ зло́е. Бо́гъ же ми́ра да сокруши́тъ сатану́ подъ но́ги ва́ша вско́рѣ. Благода́ть Го́спода на́шего Іису́са Христа́ съ ва́ми, ами́нь.

Ева́нгеліе отъ Матѳе́я, глава́ 18, зача́ло 75.

Рече́ Госпо́дь: блюди́те, да не пре́зрите еди́наго (отъ) ма́лыхъ си́хъ: глаго́лю бо ва́мъ, я́ко а́нгели и́хъ на небесѣ́хъ вы́ну ви́дятъ лице́ Отца́ Моего́ небе́снаго. Пріи́де бо Сы́нъ Человѣ́ческій взыска́ти и спасти́ поги́бшаго. Что́ ва́мъ мни́тся? А́ще бу́детъ нѣ́коему человѣ́ку сто́ ове́цъ, и заблу́дитъ еди́на отъ ни́хъ, не оста́витъ ли де́вятьдесятъ и де́вять въ гора́хъ, и ше́дъ и́щетъ заблу́ждшія? И а́ще бу́детъ обрѣсти́ ю́, ами́нь глаго́лю ва́мъ, я́ко ра́дуется о не́й па́че, не́же о девяти́десятихъ и девяти́ незаблу́ждшихъ. Та́ко нѣ́сть во́ля предъ Отце́мъ ва́шимъ небе́снымъ, да поги́бнетъ еди́нъ отъ ма́лыхъ си́хъ. Аще же согрѣши́тъ къ тебѣ́ бра́тъ тво́й, иди́ и обличи́ его́ между́ тобо́ю и тѣ́мъ еди́нѣмъ: а́ще тебе́ послу́шаетъ, приобрѣ́лъ еси́ бра́та твоего́. Аще ли тебе́ не послу́шаетъ, поими́ съ собо́ю па́ки еди́наго или́ два́, да при устѣ́хъ двою́ или́ тріе́хъ свидѣ́телей ста́нетъ вся́къ глаго́лъ. Аще же не послу́шаетъ и́хъ, повѣ́ждь Це́ркви, а́ще же и Це́рковь преслу́шаетъ, бу́ди тебѣ́ я́коже язы́чникъ и мыта́рь. Ами́нь бо глаго́лю ва́мъ: ели́ка а́ще свя́жете на земли́, бу́дутъ свя́зана на небеси́, и ели́ка а́ще разрѣшите́ на земли́, бу́дутъ разрѣше́на на небесѣ́хъ.

Посе́мъ:

Поми́луй на́съ, Бо́же, по вели́цѣй ми́лости Твое́й, мо́лимся Ти, услы́ши и поми́луй.

По: Еще́ мо́лимся о Святѣ́йшемъ Прави́тельствующемъ Сѵно́дѣ...

Не хотя́й сме́рти грѣ́шныхъ, но ожида́яй обраще́нія и покая́нія, обрати́ всѣ́хъ отсту́пльшихъ, къ святѣ́й Твое́й Це́ркви, мо́лимъ Ти ся, милосе́рдый Го́споди, услы́ши и поми́луй.

Устро́ивый мíръ се́й въ сла́ву Твою́, сотвори́, да и проти́вящіися Твоему́ сло́ву обратя́тся, и вку́пѣ со всѣ́ми вѣ́рными, и́стинною вѣ́рою и благоче́стіемъ, Тебе́ Бо́га на́шего просла́вятъ, мо́лимъ Ти ся, всеси́льный Тво́рче, услы́ши и поми́луй.

Да́вый за́повѣдь Твою́ на́мъ, е́же люби́ти Тебе́ Бо́га на́шего и бли́жняго своего́, сотвори́, да не́нависти, вражды́, оби́ды, мздои́мства, клятвопресту́пства, и про́чая беззако́нія прекратя́тся, и́стинная же любо́вь да ца́рствуетъ въ сердца́хъ на́шихъ, мо́лимъ Ти ся, Спаси́телю на́шъ, услы́ши и ми́лостивно поми́луй.

Архіере́й, возгла́съ: Услы́ши ны́, Бо́же, Спаси́телю на́шъ...

Ли́къ: Ами́нь.

Протодіа́конъ: Го́споду, помо́лимся.

Ли́къ: Го́споди, поми́луй.

Моли́тва:

Всевы́шній Бо́же, Влады́ко и Содѣ́телю всея́ тва́ри, наполня́яй вся́ вели́чествомъ Твои́мъ, и содержа́й си́лою Твое́ю! Тебѣ́ вседарови́тому Го́споду на́шему мы́ недосто́йніи благодаре́ніе прино́симъ, я́ко не отвраща́ешися на́съ беззако́ній ра́ди на́шихъ, но па́че предваря́еши ны́ щедро́тами Твои́ми. Ты́ ко избавле́нію на́шему посла́лъ еси́ единоро́днаго Твоего́ Сы́на, и благовѣсти́лъ безмѣ́рное Твое́ къ ро́ду человѣ́ческому снизхожде́ніе: я́ко хотѣ́ніемъ хо́щеши, и ожида́еши, е́же обрати́тися на́мъ къ Тебѣ́, и спасе́нымъ бы́ти: Ты́, снизходя́ къ не́мощи на́шего естества́, укрѣпля́еши на́съ всеси́льною Свята́го Твоего́ Ду́ха благода́тію, утѣша́еши спаси́телною вѣ́рою, и соверше́нною наде́ждою вѣ́чныхъ бла́гъ, и руково́дствуя избра́нныхъ Твои́хъ въ го́рній Сіо́нъ, соблюда́еши я́ко зѣ́ницу о́ка. Исповѣ́дуемъ, Го́споди, вели́кое Твое́ и безприкла́дное человѣколю́біе и милосе́рдіе. Но ви́дяще мно́гихъ поползнове́нія, прилѣ́жно Тя́, всеблагíй Го́споди, мо́лимъ: при́зри на Це́рковь Твою́, и ви́ждь, я́ко Твое́ спаси́телное благовѣ́стіе а́ще и ра́достно прія́хомъ, но те́рніе суеты́ и страсте́й твори́тъ о́ное въ нѣ́кіихъ малопло́дно, въ нѣ́кіихъ же и безпло́дно, и по умноже́нію беззако́ній о́віи ересьми́, о́віи раско́ломъ проти́вящеся ева́нгельской Твое́й и́стинѣ, отступа́ютъ отъ достоя́нія Твоего́, отрѣва́ютъ Твою́ благода́ть, и поверга́ютъ себе́ суду́ Твоего́ Пресвята́го Сло́ва. Премилосе́рдый и всеси́льный, не до конца́ гнѣ́ваяйся Го́споди! Бу́ди ми́лостивъ, мо́литъ Тя́ Твоя́ Це́рковь, представля́ющи Тебѣ́ Нача́лника и Соверши́теля спасе́нія на́шего, Іису́са Христа́. Бу́ди ми́лостивъ на́мъ, укрѣпи́ на́съ въ правовѣ́ріи си́лою Твое́ю, заблужда́ющимъ же просвѣти́ разу́мныя о́чи свѣ́томъ Твои́мъ боже́ственнымъ, да уразумѣ́ютъ Твою́ и́стину, умягчи́ и́хъ ожесточе́ніе и отве́рзи слу́хи, да позна́ютъ гла́съ Тво́й и обратя́тся къ Тебѣ́ Спаси́телю на́шему. Испра́ви, Го́споди, ины́хъ развраще́ніе и жи́знь несогла́сную христіа́нскому благоче́стію: сотвори́, да вси́ свя́то и непоро́чно поживе́мъ, и та́ко спаси́телная вѣ́ра укорени́тся, и плодоно́сна въ сердца́хъ на́шихъ пребу́детъ. Не отврати́ лица́ Твоего́ отъ на́съ, Го́споди, возда́ждь на́мъ ра́дость спасе́нія Твоего́, пода́ждь, Го́споди, и па́стыремъ Це́ркве Твоея́ святу́ю ре́вность, и попече́ніе и́хъ о спасе́ніи и обраще́ніи заблужда́ющихъ, ду́хомъ ева́нгельскимъ раствори́: да та́ко вси́ руководи́ми дости́гнемъ, идѣ́же соверше́ніе вѣ́ры, исполне́ніе наде́жды, и и́стинная любо́вь: и та́мо съ ли́ки чистѣ́йшихъ небе́сныхъ си́лъ просла́вимъ Тебе́ Го́спода на́шего, Отца́ и Сы́на и Свята́го Ду́ха, во вѣ́ки вѣко́въ, ами́нь.

Посе́мъ протодіа́конъ, ста́въ на угото́ваннѣмъ мѣ́стѣ, возглаша́етъ:

Кто́ Бо́гъ ве́лій я́ко Бо́гъ на́шъ? Ты́ еси́ Бо́гъ творя́й чудеса́ еди́нъ.

Та́же повы́сшимъ гла́сомъ: Кто́ Бо́гъ ве́лій я́ко Бо́гъ на́шъ? [Ты́ еси́ Бо́гъ творя́й чудеса́ еди́нъ.]

И па́ки высоча́йшимъ гла́сомъ: Кто́ Бо́гъ ве́лій я́ко Бо́гъ на́шъ? [Ты́ еси́ Бо́гъ творя́й чудеса́ еди́нъ.]

Правосла́вія де́нь пра́зднующе, правосла́вніи лю́діе, наипа́че просла́вимъ Вино́вника всѣ́хъ бла́гъ — Бо́га, Иже Сы́й благослове́нъ во вѣ́ки. Се́й Бо́гъ на́шъ, промышля́я и утвержда́я возлю́бленное Свое́ достоя́ніе — святу́ю Це́рковь, пра́отцевъ преступле́ніемъ отпа́дшихъ, утѣша́я нело́жнымъ Свои́мъ сло́вомъ, еще́ въ Раи́ основа́ніе е́й положи́; Се́й Бо́гъ на́шъ, руково́дствуя ко о́ному спаси́тельному обѣтова́нію, не несвидѣ́тельствована Себе́ оста́ви, но хотя́щее бы́ти спасе́ніе провозвѣсти́лъ пе́рвѣе чрезъ пра́отцевъ и проро́ковъ, живописа́лъ разли́чными о́бразы; Се́й Бо́гъ на́шъ, многоча́стнѣ и многообра́знѣ дре́влѣ глаго́лавый отце́мъ во проро́цѣхъ, въ послѣ́докъ днíй си́хъ глаго́ла на́мъ въ Сы́нѣ, Имже и вѣ́ки сотвори́, Иже возвѣсти́ Отчее о на́съ благоволе́ніе, откры́ та́инства небе́сная, увѣ́ри си́лою Свята́го Ду́ха о и́стинѣ благовѣ́стія, посла́ апо́столы во ве́сь мíръ проповѣ́дати Ева́нгеліе Ца́рствія, утверди́ о́ное разли́чными си́лами и чудеса́ми.

Сему́ спаси́тельному открове́нію послѣ́дующе, сего́ благовѣ́стія держа́щеся, вѣ́руемъ во еди́наго Бо́га Отца́, Вседержи́теля, Творца́ не́бу и земли́, ви́димымъ же всѣ́мъ и неви́димымъ. И во еди́наго Го́спода Іису́са Христа́, Сы́на Бо́жія, Единоро́днаго, Иже отъ Отца́ рожде́ннаго пре́жде всѣ́хъ вѣ́къ; Свѣ́та отъ Свѣ́та, Бо́га и́стинна отъ Бо́га и́стинна, рожде́нна, несотворе́нна, единосу́щна Отцу́, Имже вся́ бы́ша. На́съ ра́ди человѣ́къ и на́шего ра́ди спасе́нія сше́дшаго съ небе́съ и воплоти́вшагося отъ Ду́ха Свя́та и Марíи Дѣ́вы, и вочеловѣ́чшася. Распя́таго же за ны́ при Понтíйстѣмъ Пила́тѣ, и страда́вша, и погребе́нна. И воскре́сшаго въ тре́тій де́нь по писа́ніемъ. И возше́дшаго на небеса́, и сѣдя́ща одесну́ю Отца́. И па́ки гряду́щаго со сла́вою, суди́ти живы́мъ и ме́ртвымъ, Его́же Ца́рствію не бу́детъ конца́. И въ Ду́ха Свята́го, Го́спода, животворя́щаго, Иже отъ Отца́ исходя́щаго, Иже со Отце́мъ и Сы́номъ споклоня́ема и ссла́вима, глаго́лавшаго проро́ки. Во еди́ну святу́ю, собо́рную и апо́стольскую Це́рковь. Исповѣ́дуемъ еди́но креще́ніе во оставле́ніе грѣхо́въ. Ча́емъ воскресе́нія ме́ртвыхъ, и жи́зни бу́дущаго вѣ́ка. Ами́нь.

Сія́ вѣ́ра апо́стольская, сія́ вѣ́ра оте́ческая, сія́ вѣ́ра правосла́вная, сія́ вѣ́ра вселе́нную утверди́.

Еще́ же собо́ры святы́хъ оте́цъ, и и́хъ преда́нія и писа́нія Боже́ственному открове́нію согла́сная, пріе́млемъ и утвержда́емъ.

Аще сему́ Госпо́дню о на́съ промышле́нію и открове́нію спаси́телному врази́ Правосла́вія и проти́вишася, но помяну́ Госпо́дь поноше́нія ра́бъ Свои́хъ: ху́льники бо сла́вы Своея́ поруга́, и продерза́тели и враги́ Правосла́вія боя́зненны и бѣжа́тели яви́.

Якоже у́бо плѣня́ющихъ ра́зумъ сво́й въ послуша́ніе Боже́ственному открове́нію и подвиза́вшихся за о́ное ублажа́емъ и восхваля́емъ; та́ко проти́вящихся се́й и́стинѣ, а́ще ожида́вшему и́хъ обраще́нія и раска́янія Го́споду не пока́яшася, Свяще́нному Писа́нію послѣ́дующе и пе́рвенствующія Це́ркве преда́ній держа́щеся, отлуча́емъ и анаѳема́тствуемъ.

Отрица́ющимъ бытіе́ Бо́жіе и утвержда́ющимъ, я́ко мíръ се́й е́сть самобы́тенъ, и вся́ въ не́мъ безъ про́мысла Бо́жія и по слу́чаю быва́ютъ: Ана́ѳема! [Три́жды].

Глаго́лющимъ Бо́га не бы́ти Ду́хъ, но пло́ть; или́ не бы́ти Его́ пра́ведна, милосе́рда, прему́дра, всевѣ́дуща, и подо́бная хуле́нія произнося́щимъ: Ана́ѳема! [Три́жды].

Дерза́ющимъ глаго́лати, я́ко Сы́нъ Бо́жій не единосу́щный и не равноче́стный Отцу́, та́кожде и Ду́хъ Святы́й, и исповѣ́дающимъ Отца́ и Сы́на и Свята́го Ду́ха, не еди́наго бы́ти Бо́га: Ана́ѳема! [Три́жды].

Безу́мнѣ глаго́лющимъ, я́ко не ну́жно бы́ти ко спасе́нію на́шему и ко очище́нію грѣхо́въ прише́ствіе въ мíръ Сы́на Бо́жія во пло́ти, и Его́ во́льное страда́ніе, сме́рть и воскресе́ніе: Ана́ѳема! [Три́жды].

Не пріе́млющимъ благода́ти искупле́нія Ева́нгеліемъ проповѣ́даннаго, я́ко еди́нственнаго на́шего ко оправда́нію предъ Бо́гомъ сре́дства: Ана́ѳема! [Три́жды].

Дерза́ющимъ глаго́лати, я́ко Пречи́стая Дѣ́ва Марíя не бы́сть пре́жде рождества́, въ рождествѣ́ и по рождествѣ́ Дѣ́ва: Ана́ѳема! [Три́жды].

Не вѣ́рующимъ, я́ко Ду́хъ Святы́й умудри́ проро́ковъ и апо́столовъ, и чрезъ ни́хъ возвѣсти́ на́мъ и́стинный пу́ть къ вѣ́чному спасе́нію, и утверди́ сіе́ чудеса́ми, и ны́нѣ въ сердца́хъ вѣ́рныхъ и и́стинныхъ христіа́нъ обита́етъ и наставля́етъ и́хъ на вся́кую и́стину: Ана́ѳема! [Три́жды].

Отме́щущимъ безсме́ртіе души́, кончи́ну вѣ́ка, су́дъ бу́дущій и воздая́ніе вѣ́чное за добродѣ́тели на небесѣ́хъ, а за грѣхи́ осужде́ніе: Ана́ѳема! [Три́жды].

Отме́щущимъ вся́ та́инства свята́я, Це́рковію Христо́вою содержи́мая: Ана́ѳема! [Три́жды].

Отверга́ющимъ собо́ры святы́хъ оте́цъ и и́хъ преда́нія, Боже́ственному открове́нію согла́сная, и Правосла́вно-Каѳоли́ческою Це́рковію благоче́стно храни́мая: Ана́ѳема! [Три́жды].

Помышля́ющимъ, я́ко правосла́вніи Госуда́ри возво́дятся на престо́лы не по особли́вому о ни́хъ Бо́жію благоволе́нію и при пома́заніи дарова́нія Свята́го Ду́ха къ прохожде́нію вели́каго сего́ зва́нія на ни́хъ не излива́ются: и та́ко дерза́ющимъ проти́ву и́хъ на бу́нтъ и измѣ́ну: Ана́ѳема! [Три́жды].

Руга́ющимъ и ху́лящимъ святы́я ико́ны, и́хже свята́я Це́рковь ко воспомина́нію дѣ́лъ Бо́жіихъ и уго́дниковъ Его́, ра́ди возбужде́нія взира́ющихъ на о́ныя ко благоче́стію, и ко о́ныхъ подража́нію пріе́млетъ, и глаго́лющимъ о́ныя бы́ти и́долы: Ана́ѳема! [Три́жды].

Всѣ́мъ же о Правосла́віи подвиза́вшимся словесы́, писа́ніи, уче́ніи, страда́ніи и богоуго́днымъ житіе́мъ, я́ко защи́тникомъ и посо́бникомъ о́наго, Христо́ва Це́рковь воспомина́ніе творя́щи, восклица́етъ:

Свято́му Благовѣ́рному и Равноапо́стольному Царю́ Константи́ну и ма́тери его́ Еле́нѣ, правосла́внымъ гре́ческимъ Царе́мъ: Вели́кому Ѳеодо́сію, Ѳеодо́сію Юнѣ́йшему, Іустиніа́ну и про́чимъ правосла́внымъ Царе́мъ и Цари́цамъ гре́ческимъ: Вѣ́чная па́мять! [Три́жды].

Благовѣ́рному и Равноапо́стольному Вели́кому Кня́зю Влади́міру, Благовѣ́рнѣй Вели́цѣй Княги́нѣ Ользѣ, и про́чимъ Благовѣ́рнымъ Царе́мъ и Вели́кимъ Князе́мъ, Цари́цамъ и вели́кимъ Княги́нямъ, и всѣ́мъ отъ ро́да Царе́й и Вели́кихъ Князе́й Россíйскихъ преста́вльшимся: Вѣ́чная па́мять! [Три́жды].

Благочести́вѣйшимъ Госуда́ремъ Импера́торомъ: Петру́ Пе́рвому, Петру́ Второ́му, Петру́ Тре́тіему, Па́влу Пе́рвому, Алекса́ндру Пе́рвому, Никола́ю Пе́рвому, Алекса́ндру Второ́му и Алекса́ндру Тре́тіему, и Благочести́вѣйшимъ Госуда́рынямъ Императри́цамъ: Екатери́нѣ Пе́рвѣй, Аннѣ Іоа́нновнѣ, Елисаве́тѣ Петро́внѣ, Екатери́нѣ Вторѣ́й, Елисаве́тѣ Алексíевнѣ, Марíи Ѳео́доровнѣ, Алекса́ндрѣ Ѳео́доровнѣ и Марíи Алекса́ндровнѣ: Вѣ́чная па́мять! [Три́жды].

Святѣ́йшимъ Патріа́рхомъ Константинопо́льскимъ, Александрíйскимъ, Антіохíйскимъ, Іерусали́мскимъ и Всероссíйскимъ, и преосвяще́ннымъ Митрополи́томъ, Архіепи́скопомъ и Епи́скопомъ правосла́внымъ: Вѣ́чная па́мять! [Три́жды].

Пострада́вшимъ и убіе́ннымъ въ разли́чныхъ похо́дѣхъ за правосла́вную вѣ́ру и оте́чество князе́мъ, боля́ромъ, христоимени́тому во́инству и всѣ́мъ правосла́внымъ христіа́номъ въ и́стиннѣй вѣ́рѣ и благоче́стіи и наде́жди воскресе́нія сконча́вшимся: Вѣ́чная па́мять! [Три́жды].

Правосла́вная Христо́ва Це́рковь, торже́ственно воспомина́ющи подвиза́вшихся во благоче́стіи, и сіе́ всѣ́мъ свои́мъ христоимени́тымъ ча́домъ къ подража́нію представля́ющи, имѣ́етъ та́кожде до́лгъ восхваля́ти по́двиги си́хъ, и́же ны́нѣ, спаси́телною вѣ́рою и добродѣ́телію приуготовля́юще себе́ къ вѣ́чному блаже́нству, утвержда́ютъ Правосла́віе.

Посе́мъ возглаша́етъ:

Христіа́нскаго благоче́стія ревни́телю, защи́тнику и покрови́телю Христо́вы Це́ркве, Благочести́вѣйшему, Самодержа́внѣйшему, Вели́кому Госуда́рю на́шему Импера́тору Никола́ю Алекса́ндровичу, Самоде́ржцу Всероссíйскому, и ины́хъ стра́нъ Госуда́рю и облада́телю, пода́ждь, Го́споди, благоде́нственное и ми́рное житіе́, здра́віе же и спасе́ніе и во все́мъ благо́е поспѣше́ніе, на враги́ же побѣ́ду и одолѣ́ніе, и сохрани́ его́ на мно́га лѣ́та. Многая лѣта! [9-жды].

И супру́гѣ Его́, Благочести́вѣйшей Госуда́рынѣ Императри́цѣ Алекса́ндрѣ Ѳео́доровнѣ; Ма́тери Его́, Благочасти́вѣйшей Госуда́рынѣ Императри́цѣ Марíи Ѳео́доровнѣ; Наслѣ́днику Его́, Благовѣ́рному Госуда́рю и Цесаре́вичу и Вели́кому Кня́зю Алексíю Никола́евичу, и всему́ Ца́рствующему До́му: Мно́гая лѣ́та! [Три́жды].

Святѣ́йшему Прави́тельствующему Всероссíйскому Сѵно́ду: Мно́гая лѣ́та! [Три́жды].

Святѣ́йшимъ Патріа́рхомъ правосла́внымъ: Константинопо́льскому, Александрíйскому, Антіохíйскому и Іерусали́мскому: Мно́гая лѣ́та! [Три́жды].

Преосвяще́нному [и́мярекъ]: Мно́гая лѣ́та! [Три́жды].

Преосвяще́ннымъ правосла́внымъ Митрополи́томъ, Архіепи́скопомъ и Епи́скопомъ и всему́ освяще́нному при́чту: Мно́гая лѣ́та! [Три́жды].

Благовѣ́рнымъ: Прави́тельствующему Сѵнкли́ту, военача́льникомъ, градонача́льникомъ, христолюби́вому во́инству и всѣ́мъ правосла́внымъ христіа́номъ, пра́во содержа́щимъ спаси́тельную вѣ́ру и повину́ющимся Христо́вѣй Це́ркви, пода́ждь, Го́споди, ми́ръ, тишину́, благоде́нствіе, изоби́ліе плодо́въ земны́хъ и Мно́гая лѣ́та! [Три́жды].

Свята́я Тро́ице, си́хъ просла́ви и утверди́ да́же до конца́ въ правовѣ́ріи; развра́тники же и ху́льники Правосла́вныя вѣ́ры и Христо́вы Це́ркве, и не повину́ющимся о́нѣй, обрати́, и сотвори́, да пріи́дутъ въ позна́ніе вѣ́чныя Твоея́ и́стины, моли́твами Пресвяты́я Влады́чицы на́шея Богоро́дицы, и Приснодѣ́вы Марíи, и всѣ́хъ святы́хъ. Ами́нь.

И по моли́твѣ се́й а́біе архіере́й глаго́летъ:

Сла́ва Тебѣ́ Бо́гу, Благода́телю на́шему, во вѣ́ки вѣко́въ.

Ли́къ: Ами́нь. И пое́тъ пѣ́снь свята́го Амвро́сія. Во вре́мя же пѣ́нія тоя́ архіере́е, архимандри́ты, и все́ свяще́нное собра́ніе цѣлу́ютъ святы́я ико́ны на анало́гіахъ.

Тебе́ Бо́га хва́лимъ, Тебе́ Го́спода исповѣ́дуемъ, Тебе́ превѣ́чнаго Отца́ вся́ земля́ велича́етъ; Тебѣ́ вси́ а́нгели, Тебѣ́ небеса́ и вся́ си́лы, Тебѣ́ херуви́ми и серафи́ми непреста́нными гла́сы взыва́ютъ: свя́тъ, свя́тъ, свя́тъ, Госпо́дь Бо́гъ Савао́ѳъ, по́лны су́ть небеса́ и земля́ вели́чества сла́вы Твоея́. Тебе́ пресла́вный апо́стольскій ли́къ, Тебе́ проро́ческое хвале́бное число́, Тебе́ хва́литъ пресвѣ́тлое му́ченическое во́инство; Тебе́ по все́й вселе́ннѣй исповѣ́дуетъ свята́я Це́рковь: Отца́ непостижи́маго вели́чества, покланя́емаго Твоего́ и́стиннаго и единоро́днаго Сы́на, и Свята́го Утѣ́шителя Ду́ха. Ты́, Царю́ сла́вы, Христе́, Ты́ Отца́ присносу́щный Сы́нъ еси́, Ты́ ко избавле́нію пріе́мля человѣ́ка, не возгнуша́лся еси́ дѣви́ческаго чре́ва; Ты́ одолѣ́въ сме́рти жа́ло, отве́рзлъ еси́ вѣ́рующимъ Ца́рство Небе́сное. Ты́ одесну́ю Бо́га сѣди́ши во сла́вѣ Отчей, Судія́ пріити́ вѣ́ришися. Тебе́ у́бо про́симъ: помози́ рабо́мъ Твои́мъ, и́хже честно́ю Твое́ю кро́вію искупи́лъ еси́; сподо́би со святы́ми Твои́ми въ вѣ́чнѣй сла́вѣ Твое́й ца́рствовати. Спаси́ лю́ди Твоя́, Го́споди, и благослови́ достоя́ніе Твое́; испра́ви я́, и вознеси́ и́хъ во вѣ́ки; во вся́ дни благослови́мъ Тебе́ и восхва́лимъ и́мя Твое́ во вѣ́къ и во вѣ́къ вѣ́ка. Сподо́би, Го́споди, въ де́нь се́й безъ грѣха́ сохрани́тися на́мъ; поми́луй на́съ, Го́споди, поми́луй на́съ; бу́ди ми́лость Твоя́, Го́споди, на на́съ, я́коже упова́хомъ на Тя́. На Тя́, Го́споди, упова́хомъ, да не постыди́мся во вѣ́ки, ами́нь.

Та́же быва́етъ обыкнове́нный отпу́стъ, и а́біе начина́ется литургíя. Аще же изво́литъ архіере́й, послѣ́дованіе сіе́ быва́етъ и предъ оконча́ніемъ литургíи предпи́саннымъ же о́бразомъ.

Источникъ: Послѣ́дованіе въ недѣ́лю Правосла́вія.. — Петрогра́дъ: Сѵнода́льная Тѵпогра́фія, 1915. — 43 с.

/ Къ оглавленію раздѣла /


Наверхъ / Къ титульной страницѣ

0