Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - пятница, 22 сентября 2017 г. Сейчасъ на порталѣ посѣтителей - 11.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

КНИГА МОЛЕБНЫХЪ ПѢНІЙ.

Послѣ́дованіе моле́бна за боля́щаго.

Іере́й, облече́нъ въ фело́нь, начина́етъ: Благослове́нъ Бо́гъ на́шъ, всегда́, ны́нѣ и при́сно и во вѣ́ки вѣко́въ.

Ли́къ: Ами́нь. Сла́ва Тебѣ́, Бо́же на́шъ, сла́ва Тебѣ́. Царю́ Небе́сный... Трисвято́е, И по Отче на́шъ... Го́споди поми́луй, 12. Сла́ва, и ны́нѣ. Пріиди́те, поклони́мся.., три́жды. И псало́мъ 142: Го́споди, услы́ши моли́тву мою́... Сла́ва, и ны́нѣ. Аллилу́ія.., три́жды.

Внегда́ же чте́тъ кли́рикъ предрече́нная со псалмо́мъ, іере́й та́йно чте́тъ моли́тву сію́ о себѣ́:

Поми́луй мя́, Бо́же, поми́луй мя́ и отъ грѣхо́въ мои́хъ очи́сти мя́: согрѣши́хъ бо и беззако́нновахъ предъ Тобо́ю зрѣ́ніемъ, слы́шаніемъ, обоня́ніемъ, вку́сомъ, осяза́ніемъ, по́мысломъ и сло́вомъ, па́че же дѣ́ломъ и похотѣ́ніемъ, о ни́хже ка́яся и Тебѣ́ въ се́рдцѣ сокруше́нномъ исповѣ́даяся, смире́нно молю́: прости́ ми́ и отпусти́, и да́ждь ми́ со дерзнове́ніемъ мольбу́ мою́ непосты́дно простре́ти къ Тебѣ́ о рабѣ́ Твое́мъ [и́мярекъ]. Услы́ши мя́, Го́споди, о не́мже прошу́ Тя́, и да не грѣхо́въ мои́хъ ра́ди возбрани́ши ми́ благода́ти Свята́го Твоего́ Ду́ха, и возвращу́ся то́щъ, но при́зри ми́лостивно на раба́ Твоего́ и услы́ши въ ча́съ се́й. Твое́ бо е́сть, е́же ми́ловати и спаса́ти на́съ, Бо́же на́шъ, и Тебѣ́ сла́ву возсыла́емъ, Отцу́ и Сы́ну и Свято́му Ду́ху, ны́нѣ и при́сно, и во вѣ́ки вѣко́въ, ами́нь.

Та́же глаго́летъ іере́й или́ діа́конъ ектенію́ сію́ о больно́мъ.

Ми́ромъ Го́споду помо́лимся. Ли́къ: Го́споди поми́луй.

О свы́шнѣмъ ми́рѣ, и о спасе́ніи ду́шъ на́шихъ, Го́споду помо́лимся.

О ми́рѣ всего́ мíра, благостоя́ніи святы́хъ Бо́жіихъ церкве́й, и соедине́ніи всѣ́хъ, Го́споду помо́лимся.

О рабѣ́ Бо́жіи [и́мярекъ] и о е́же прости́ти ему́ вся́кое прегрѣше́ніе во́льное и нево́льное, и ми́лостиву бы́ти ему́, Го́споду помо́лимся.

О е́же вско́рѣ, я́ко со́тнича о́трока, Ханане́ину дще́рь и Петро́ву те́щу, сло́вомъ си́лы Своея́ ми́лостивно исцѣли́ти и отъ одра́ болѣ́зни воздви́гнути его́, Го́споду помо́лимся.

О е́же, я́коже иногда́ разсла́бленнаго сло́вомъ Боже́ственныя Своея́ благода́ти, ско́ро отъ одра́ болѣ́зни воздви́гнути и здра́ва сотвори́ти, Го́споду помо́лимся.

О е́же не презрѣ́ти прилѣ́жная моле́нія раба́ Своего́, но ми́лостивно услы́шати и поми́ловати его́, и здра́віе ему́ пода́ти, Го́споду помо́лимся.

О е́же посѣти́ти его́ посѣще́ніемъ Свята́го Своего́ Ду́ха, и исцѣли́ти вся́къ неду́гъ и вся́кую болѣ́знь, въ не́мъ гнѣздя́щуюся, сла́вы ра́ди и́мене Своего́, Го́споду помо́лимся.

О е́же ми́лостивно, я́коже ханане́инъ, услы́шати гла́съ моле́нія на́съ, недосто́йныхъ рабо́въ Свои́хъ, къ Нему́ вопію́щихъ, и я́коже тоя́ дще́рь поми́ловати и исцѣли́ти больна́го раба́ Своего́ [и́мярекъ], Го́споду помо́лимся.

Заступи́, спаси́, поми́луй и сохрани́ раба́ Твоего́ [и́мярекъ] и на́съ, Свое́ю благода́тію.

Пресвяту́ю, Пречи́стую, Преблагослове́нную, Сла́вную Влады́чицу на́шу Богоро́дицу и Приснодѣ́ву Марíю, [со всѣ́ми святы́ми помяну́вше, са́ми себе́ и другъ дру́га, и ве́сь живо́тъ на́шъ Христу́ Бо́гу предади́мъ. Ли́къ: Тебѣ́, Го́споди].

Возглаше́ніе: Яко подоба́етъ Тебѣ́ вся́кая сла́ва, че́сть и поклоне́ніе, Отцу́ и Сы́ну и Свято́му Ду́ху, ны́нѣ и при́сно и во вѣ́ки вѣко́въ. Ли́къ: Ами́нь.

И а́біе пою́тъ: Бо́гъ Госпо́дь и яви́ся на́мъ.., гла́съ 4.

Сти́хъ: Исцѣли́ мя́, Го́споди, я́ко смято́шася ко́сти моя́ и душа́ моя́ смяте́ся зѣло́.

Тропа́рь, гла́съ то́йже:

Ско́рый въ заступле́ніи еди́нъ сы́й, Христе́, ско́рое свы́ше покажи́ посѣще́ніе стра́ждущему рабу́ Твоему́, и изба́ви отъ неду́гъ и лю́тыхъ болѣ́зней, и воздви́гни во е́же пѣ́ти и сла́вити Тя́, моли́твами Богоро́дицы, еди́не Человѣколю́бче.

Сла́ва: При́зри ми́лостивно, Го́споди, милосе́рднымъ Твои́мъ о́комъ на смире́нное на́ше моле́ніе, и не презрѣ́въ е́, человѣколю́бно посѣти́ болѣ́знію одержи́маго раба́ Твоего́, на́ми ны́нѣ къ Тебѣ́ припа́дающаго, и си́лою Твоего́ благосе́рдія воздви́гни его́, моли́твами Богоро́дицы, еди́не Человѣколю́бче.

И ны́нѣ: Моле́ніе те́плое и Стѣно́ необори́мая, ми́лости Исто́чниче, мíрови Прибѣ́жище, прилѣ́жно вопіе́мъ Ти́: Богоро́дице Влады́чице, предвари́, и отъ бѣ́дъ и болѣ́зней изба́ви раба́ Своего́, Еди́на вско́рѣ предста́тельствующая.

Посе́мъ псало́мъ 50: Поми́луй мя́, Бо́же...

Абіе пою́тъ или́ са́мъ іере́й чте́тъ кано́нъ сíй, гла́съ 3.
Пѣ́снь 1.

Ирмо́съ: Пресѣка́емое мо́ре жезло́мъ дре́вле, Изра́иль про́йде я́ко по пусты́ни, и крестообра́зно я́вѣ, предуготовля́етъ стези́. Сего́ ра́ди пои́мъ во хвале́ніи чу́дному Бо́гу на́шему, я́ко просла́вися.

Сти́хъ: Го́споди, да не я́ростію Твое́ю обличи́ши мене́, ниже́ гнѣ́вомъ Твои́мъ нака́жеши мене́.

Въ де́нь печа́ли наше́дшія на ны́, къ Тебѣ́, Спа́се, припа́дающе, Твоея́ ми́лости про́симъ: облегчи́ болѣ́зни раба́ Твоего́, рцы́ и на́мъ, я́ко и со́тнику: иди́, се́ здра́въ е́сть о́трокъ тво́й.

Сти́хъ: Поми́луй мя́, Го́споди, я́ко не́мощенъ е́смь.

Мольбы́ и моле́нія принося́ще, съ воздыха́ніемъ и вѣ́рою къ Тебѣ́ вопіе́мъ, Сы́не Бо́жій, поми́луй на́съ и воздви́гни отъ одра́ лежа́щаго, я́коже разсла́бленнаго сло́вомъ, рекíй: возьми́ о́дръ тво́й и отпуща́ютъ ти ся грѣси́ твои́.

Сла́ва: Твоего́, Христе́, о́браза подо́бію кла́няющеся, сего́ вѣ́рою лобза́емъ и боля́щему здра́вія про́симъ, подража́юще кровоточи́вую, я́же воскри́лію ри́зъ Твои́хъ прикосну́вшися, исцѣле́ніе неду́га прія́ла е́сть.

И ны́нѣ, богоро́диченъ: Пречи́стая Госпоже́ Богоро́дице, всѣ́мъ извѣ́стная Помо́щнице, не пре́зри на́съ къ Тебѣ́ припа́дающихъ, но моли́, я́ко Блага́я, Сы́на Своего́ и Бо́га на́шего пода́ти здра́віе боля́щему, да Тя́ съ на́ми прославля́етъ.

Пѣ́снь 3.

Ирмо́съ: Иже отъ не су́щихъ вся́ приведы́й, Сло́вомъ созида́емая, соверша́емая Ду́хомъ, Вседержи́телю Вы́шній, въ любви́ Твое́й утверди́ мене́.

Сти́хъ: Исцѣли́ мя́, Го́споди, я́ко смято́шася ко́сти моя́ и душа́ моя́ смяте́ся зѣло́.

Отъ тя́жкихъ болѣ́зней на зе́млю приве́рженый, къ Тебѣ́, Христе́, на́ми вопіе́тъ: пода́ждь здра́віе тѣлеси́, я́коже Езекíи пла́кавшуся къ Тебѣ́.

Сти́хъ: И Ты́, Го́споди, доко́лѣ? Обрати́ся, Го́споди, и изба́ви ду́шу мою́.

При́зри на на́ше смире́ніе и не помяни́ беззако́ній на́шихъ, но вѣ́ры ра́ди боля́щаго, я́коже прокаже́ннаго сло́вомъ исцѣли́, да Твое́, Христе́, сла́вится и́мя.

Сла́ва: Це́ркви, ю́же еси́ освяти́лъ еси́, Христе́, не да́ждь поно́са, но воздви́гни неви́димо на одрѣ́ болѣ́зни лежа́щаго, и́же мо́лится Тебѣ́, да не реку́тъ невѣ́рніи: гдѣ́ е́сть Бо́гъ и́хъ?

И ны́нѣ, богоро́диченъ: Къ Тебѣ́, Богоро́дице, ру́цѣ воздѣ́юще вопіе́мъ: услы́ши ра́бъ Твои́хъ моли́тву и спаси́ въ неду́зѣ лежа́щаго, да отъ болѣ́зни воста́въ, возда́стъ обѣ́ты, я́же въ печа́ли глаго́лаша уста́ его́.

Посе́мъ глаго́летъ іере́й или́ діа́конъ ектеніи́ сія́:

Поми́луй на́съ, Бо́же, по вели́цѣй ми́лости Твое́й, мо́лимъ Ти ся, услы́ши и поми́луй.

Ли́къ: Го́споди, поми́луй, три́жды.

Еще́ мо́лимъ Ти ся, Врачу́ ду́шъ и тѣле́съ, и со умиле́ніемъ къ Тебѣ́ въ се́рдцѣ сокруше́нномъ припа́даемъ и, стеня́ще, вопіе́мъ: исцѣли́ болѣ́знь, уврачу́й стра́сти души́ и тѣ́ла раба́ Твоего́ [и́мярекъ], и прости́ ему́, я́ко Благосе́рдъ, вся́ согрѣше́нія во́льная и нево́льная, и ско́ро воздви́гни отъ одра́ болѣ́зни, и ми́лостивно услы́ши и вско́рѣ поми́луй.

Ли́къ: Го́споди, поми́луй, три́жды.

Іере́й глаго́летъ возгла́съ: Яко Ты́ еси́ Исто́чникъ исцѣле́ній и благи́хъ Пода́тель, Христе́ Бо́же на́шъ, и Тебѣ́ сла́ву возсыла́емъ, со Безнача́льнымъ Твои́мъ Отце́мъ, и Пресвяты́мъ, и Благи́мъ, и Животворя́щимъ Твои́мъ Ду́хомъ, ны́нѣ и при́сно, и во вѣ́ки вѣко́въ. Ли́къ: Ами́нь.

Сѣда́ленъ, гла́съ 8:

Якоже воздви́глъ еси́ Петро́ву те́щу и спа́слъ еси́ разсла́бленнаго, носи́ма на одрѣ́, та́ко и ны́нѣ посѣти́ боля́щаго раба́ Твоего́, Ми́лостиве: Ты́ бо Еди́нъ еси́ понесы́й неду́ги ро́да на́шего, и Тебе́ Еди́наго свѣ́мы терпѣли́ваго, и милосе́рдаго, и ми́лостиваго Врача́ ду́шъ и тѣле́съ, Христа́ Бо́га на́шего, наводя́щаго неду́ги и па́ки возставля́ющаго, и подава́ющаго проще́ніе ка́ющимся о согрѣше́ніихъ, еди́не Милосе́рде и Всеми́лостиве.

Сла́ва: Азъ грѣ́шный пла́чуся, на одрѣ́ мое́мъ лежа́, проще́ніе пода́ждь, Христе́ Бо́же, грѣхо́мъ мои́мъ, я́же отъ ю́ности моея́ сотвори́хъ, и отъ болѣ́зни мя́ воздви́гни, да сла́влю еди́наго Всеми́лостиваго ду́шъ и тѣле́съ Врача́.

И ны́нѣ, богоро́диченъ: Умилосе́рдися, Влады́чице, и воздви́гни мя́ отъ одра́ болѣ́зненнаго, крѣ́пость бо моя́ во мнѣ́ изнемо́же, и ве́сь неча́яніемъ одержи́мь е́смь. Ма́ти Бо́жія Пречи́стая, исцѣли́ мя́, неду́гующа лю́тѣ: Ты́ бо еси́ Помо́щница христіа́номъ.

Пѣ́снь 4.

Ирмо́съ: Положи́лъ еси́ къ на́мъ тве́рдую любо́вь, Го́споди: Единоро́днаго бо Твоего́ Сы́на за ны́ на сме́рть да́лъ еси́. Тѣ́мже Ти́ зове́мъ, благодаря́ще: сла́ва си́лѣ Твое́й, Го́споди.

Сти́хъ: Спаси́ мя́ ра́ди ми́лости Твоея́.

Тебѣ́, Тво́рче, мо́лимся, вся́ грѣхи́ раба́ Твоего́ прости́, не хо́щеши бо сме́рти грѣ́шнаго; и оживи́ и уздра́ви его́ болѣ́знующаго, да воста́въ, послу́житъ Ти́, исповѣ́дая съ на́ми Твою́ благода́ть.

Сти́хъ: Яко нѣ́сть въ сме́рти помина́яй Тебе́, во а́дѣ же кто́ исповѣ́стся Тебѣ́?

Уже́ отча́яннаго лю́тымъ неду́гомъ и къ сме́рти прибли́жившагося, возврати́, Христе́, на живо́тъ, и да́ждь пла́чущимъ утѣше́ніе, да вси́ прославля́емъ Твоя́ свята́я чудеса́.

Сла́ва: Сле́зы Манассíины, ниневи́тянъ покая́ніе и Дави́дово исповѣ́даніе пріи́мъ, вско́рѣ си́хъ спа́слъ еси́. И на́ша моли́твы ны́нѣ пріими́, Благосе́рде Го́споди, и пода́ждь здра́віе боля́щему, о не́мже Тя́ мо́лимъ.

И ны́нѣ, богоро́диченъ: Пода́ждь на́мъ Твою́ ми́лость, Госпоже́, всегда́ на Тя́ надѣ́ющимся, и испроси́ здра́віе боля́щему, враче́бніи Твои́ ру́цѣ, съ Предте́чею, Богоро́дице, ко Христу́ Бо́гу простира́ющи.

Пѣ́снь 5.

Ирмо́съ: На земли́ Неви́димый яви́лся еси́ и человѣ́комъ во́лею сожи́лъ еси́, Непостижи́мый, и, къ Тебѣ́ у́тренююще, воспѣва́емъ Тя́, Человѣколю́бче.

Сти́хъ: Утруди́хся воздыха́ніемъ мои́мъ.

Дще́рь Іаи́рову уже́ уме́ршую, я́ко Бо́гъ оживи́лъ еси́, и ны́нѣ возведи́, Христе́ Бо́же, отъ вра́тъ сме́ртныхъ боля́щаго: Ты́ бо еси́ всѣ́мъ пу́ть живота́.

Сти́хъ: Измы́ю на вся́ку но́щь ло́же мое́, слеза́ми мои́ми посте́лю мою́ омочу́.

Сы́на вдови́ча оживи́въ, Спа́се, тоя́ сле́зы преложи́лъ еси́ на ра́дость. И ны́нѣ спаси́ неду́гомъ тлѣ́ющаго раба́ твоего́, да и на́ша ско́рбь и болѣ́знь на ра́дость пре́йдетъ.

Сла́ва: Огненная болѣ́знь иногда́, Христе́, те́щи Петро́вой прикоснове́ніемъ Твоея́ руки́ исцѣлѣ́. И ны́нѣ та́яжде всеси́льная Твоя́ десни́ца да воста́витъ боля́щаго раба́ Твоего́, да воста́въ, я́коже и сія́, послу́житъ Тебѣ́.

И ны́нѣ, богоро́диченъ: Въ ско́рби су́ще грѣ́шніи, и не иму́ще къ Бо́гу дерзнове́нія, къ Тебѣ́, Пречи́стая Богома́ти, вопіе́мъ: моли́ Сы́на Твоего́, пода́ти боля́щему здра́віе душе́вное же и тѣле́сное.

Пѣ́снь 6.

Ирмо́съ: Бе́здна послѣ́дняя грѣхо́въ обы́де мя́, и исчеза́етъ ду́хъ мо́й; но простры́й, Влады́ко, высо́кую Твою́ мы́шцу, я́ко Петра́ мя́, Упра́вителю, спаси́.

Сти́хъ: Смяте́ся отъ я́рости о́ко мое́.

Бе́здну ми́лости имѣ́яй, Христе́ Бо́же, внуши́ моле́нію рабо́въ Твои́хъ, и я́коже Петро́мъ Тави́ѳу воскреси́лъ еси́, си́це и ны́нѣ въ болѣ́зни лежа́щаго воздви́гни, послу́шавъ церко́вныя моли́твенники.

Сти́хъ: Обетша́хъ во всѣ́хъ вразѣ́хъ мои́хъ.

Врачу́ ду́шъ и тѣле́съ на́шихъ, понесы́й неду́ги всего́ мíра, Христе́, Ене́я Петро́мъ исцѣли́вый и Евти́ха Па́вломъ воскреси́вый, и ны́нѣ боля́щаго исцѣли́ святы́хъ апо́столъ моли́твами.

Сла́ва: Преложи́, Христе́, на ра́дость рыда́ніе о неду́жномъ ны́нѣ скорбя́щихъ, да Твою́ получи́вше ми́лость, вни́демъ въ до́мъ Тво́й со обѣтова́нными да́ры, сла́вяще Тя́ со Отце́мъ и Ду́хомъ во Еди́номъ Существѣ́ Нераздѣ́льнаго Бо́га.

И ны́нѣ, богоро́диченъ: Пріиди́те, о дру́зи, припаде́мъ къ Бо́жіей Ма́тери: Та́ бо и́мать вла́сть неду́жныя исцѣля́ти съ безме́здникома вку́пѣ, духо́внымъ помазу́юще моли́твъ Свои́хъ богопрія́тныхъ еле́омъ.

Посе́мъ же а́біе іере́й или́ діа́конъ глаго́летъ ектенію́:

Па́ки и па́ки... Заступи́, спаси́... и про́чая.

Возгла́съ: Яко Ты́ еси́ Ца́рь ми́ра, благоутро́бія Пучи́на, и ми́лости Исто́чникъ и Спа́съ душа́мъ на́шимъ, и Тебѣ́ сла́ву возсыла́емъ, со Безнача́льнымъ Твои́мъ Отце́мъ, и Пресвяты́мъ, и Благи́мъ, и Животворя́щимъ Твои́мъ Ду́хомъ, ны́нѣ и при́сно, и во вѣ́ки вѣко́въ. Ли́къ: Ами́нь.

Абіе же пою́тъ или́ чту́тъ конда́къ, гла́съ 2:

На одрѣ́ болѣ́зни лежа́щаго и сме́ртною ра́ною уя́звленнаго, я́коже дре́вле воздви́глъ еси́, Спа́се, Петро́ву те́щу и я́коже разсла́бленнаго на одрѣ́ носи́маго, и ны́нѣ, Милосе́рде, посѣти́ и исцѣли́: Ты́ бо еди́нъ еси́ болѣ́зни и неду́ги ро́да на́шего понесы́й и вся́ могíй, я́ко Многоми́лостивъ.

Та́же іере́й или́ діа́конъ глаго́летъ: Во́нмемъ. Іере́й: Ми́ръ всѣ́мъ. Ли́къ: И ду́хови Твоему́.

Проки́менъ, гла́съ 1:

Исцѣли́ мя́, Го́споди, я́ко смято́шася ко́сти моя́,* и душа́ моя́ смяте́ся зѣло́. Сти́хъ: Поми́луй мя́, Го́споди, я́ко не́мощенъ е́смь.

Діа́конъ: Го́споду помо́лимся. Ли́къ: Го́споди, поми́луй.

Іере́й: Яко Свя́тъ еси́, Бо́же на́шъ, и на святы́хъ почива́еши, и Тебѣ́ сла́ву возсыла́емъ, Отцу́ и Сы́ну и Свято́му Ду́ху, ны́нѣ и при́сно, и во вѣ́ки вѣко́въ. Ли́къ: Ами́нь.

И пою́тъ:

Вся́кое дыха́ніе да хва́литъ Го́спода. Сти́хъ: Хвали́те Бо́га во святы́хъ Его́, [хвали́те Его́ во утвержде́ніи си́лы Его́].

Діа́конъ: И о сподо́битися на́мъ слы́шанію свята́го Ева́нгелія, Го́спода Бо́га мо́лимъ. Ли́къ: Го́споди, поми́луй, три́жды. Іере́й: Ми́ръ всѣ́мъ. Ли́къ: И ду́хови твоему́. Діа́конъ: Прему́дрость, про́сти, услы́шимъ свята́го Ева́нгелія. Іере́й: Отъ Іоа́нна [или́ Луки́, или́ Матѳе́я] свята́го Ева́нгелія чте́ніе. Ли́къ: Сла́ва Тебѣ́, Го́споди, [сла́ва Тебѣ́]. Діа́конъ: Во́нмемъ.

Іере́й же чте́тъ, а́ще му́жескій по́лъ е́сть больны́й, Ева́нгеліе сіе́.
Аще въ це́ркви, на престо́лѣ, а́ще же въ дому́, надъ главо́ю больна́го [отъ Іоа́нна, глава́ 4. Зача́ло 13]:

Во вре́мя о́но, бѣ́ нѣ́кій царе́въ му́жъ, его́же сы́нъ боля́ше въ Капернау́мѣ. Се́й слы́шавъ, я́ко Іису́съ пріи́де отъ Іуде́и въ Галиле́ю, и́де къ Нему́ и моля́ше Его́, да сни́детъ и исцѣли́тъ сы́на Его́, хотя́ше бо умре́ти. Рече́ у́бо Іису́съ къ нему́: а́ще зна́меній и чуде́съ не ви́дите, не и́мате вѣ́ровати. Глаго́ла къ Нему́ царе́въ му́жъ: Го́споди, сни́ди, пре́жде да́же не у́мретъ отроча́ мое́. Глаго́ла ему́ Іису́съ: иди́, сы́нъ тво́й жи́въ е́сть. И вѣ́рова человѣ́къ словеси́, е́же рече́ ему́ Іису́съ, и идя́ше. Абіе же входя́щу ему́, се́ раби́ его́ срѣто́ша его́ и возвѣсти́ша ему́, глаго́люще: я́ко сы́нъ тво́й жи́въ е́сть. Вопроша́ше у́бо отъ ни́хъ ча́съ, въ кото́рый легча́е ему́ бы́сть, и рѣ́ша ему́: я́ко вчера́ въ ча́съ седмы́й оста́ви его́ о́гнь. Разумѣ́въ же оте́цъ, я́ко то́й бѣ́ ча́съ, въ о́ньже рече́ ему́ Іису́съ: я́ко сы́нъ тво́й жи́въ е́сть. И вѣ́рова са́мъ и ве́сь до́мъ его́. Сіе́ па́ки второ́е зна́меніе сотвори́ Іису́съ, прише́дъ отъ Іуде́и въ Галиле́ю.

Аще же жена́ е́сть больна́я, въ дому́ надъ главо́ю ея́, въ це́ркви же на престо́лѣ, сіе́ Ева́нгеліе чте́тъ [отъ Луки́, глава́ 4. Зача́ло 16]:

Во вре́мя о́но, вни́де Іису́съ въ до́мъ Си́моновъ, и исхожда́ше гла́съ о Не́мъ во вся́ко мѣ́сто страны́. Те́ща же Си́монова бѣ́ одержи́ма огне́мъ ве́ліимъ, и моли́ша Его́ о не́й. И ста́въ надъ не́ю, запрети́ огню́, и оста́ви ю́. Абіе же воста́вши, служа́ше и́мъ. Заходя́щу же со́лнцу, вси́, ели́цы имѣ́яху боля́щія неду́ги разли́чными, привожда́ху и́хъ къ Нему́, Онъ же на еди́номъ коего́ждо и́хъ ру́цѣ возло́жъ, исцѣля́ше и́хъ.

Аще же дѣви́ца е́сть больна́я, сіе́ Ева́нгеліе глаго́летъ [отъ Матѳе́я, глава́ 9. Зача́ло 32]:

Во вре́мя о́но, кня́зь нѣ́кій прише́дъ ко Іису́су, кла́няшеся Ему́, глаго́ля: я́ко дщи́ моя́ ны́нѣ у́мре, но прише́дъ, возложи́ на ню́ ру́ку Свою́, и оживе́тъ. И воста́въ Іису́съ, по не́мъ и́де, и ученицы́ Его́. И се́ жена́ кровоточи́ва прикосну́ся воскри́лію ри́зы Его́. Глаго́лаше бо въ себѣ́: а́ще то́кмо прикосну́ся ри́зѣ Его́, спасе́на бу́ду. Іису́съ же обра́щься, и ви́дѣвъ ю́, рече́: дерза́й, дщи́, вѣ́ра твоя́ спасе́ тя́. И спасе́на бы́сть жена́ отъ часа́ того́. И прише́дъ Іису́съ въ до́мъ кня́жь, и ви́дѣ сопца́ и наро́дъ мо́лвящъ, глаго́ла и́мъ: отыди́те, не у́мре бо дѣви́ца, но спи́тъ. И руга́хуся Ему́. Егда́ же изгна́нъ бы́сть наро́дъ, вше́дъ, я́тъ ю́ за ру́ку, и воста́ дѣви́ца. И изы́де вѣ́сть сія́ по все́й земли́ то́й.

Ли́къ: Сла́ва Тебѣ́, Го́споди, сла́ва Тебѣ́.

И а́біе пою́тъ сія́:

Сла́ва: Моли́твами всѣ́хъ святы́хъ Твои́хъ, Ми́лостиве, очи́сти мно́жества согрѣше́ній на́шихъ.

И ны́нѣ: Моли́твами Богоро́дицы, Ми́лостиве, очи́сти мно́жества согрѣше́ній на́шихъ.

Та́же сти́хъ: Поми́луй на́съ, Бо́же, по вели́цѣй ми́лости Твое́й и по мно́жеству щедро́тъ Твои́хъ очи́сти беззако́нія на́ша.

И стихи́ру сію́, гла́съ 6. Подо́бенъ: Все́ отло́жше.

Не оста́ви на́съ тщи́хъ во упова́ніи на́шемъ, Бо́же Преми́лостивый, но пріими́, я́ко Влады́ко, моле́нія рабо́въ Твои́хъ: ско́рби бо обдержа́тъ ны́ о болѣ́знующемъ рабѣ́ Твое́мъ; прибѣ́жища же не стяжа́хомъ нигдѣ́же въ бѣда́хъ на́шихъ, утѣше́нія не и́мамы, ниже́ по́мощи, развѣ́ Тебе́, Тво́рче мíра, Упова́ніе и Спасе́ніе вѣ́рнымъ. Тѣ́мъ, къ Тебѣ́ припа́даемъ и смире́нно мо́лимъ: воздви́гни ско́ро отъ одра́ болѣ́зни, на́ми ны́нѣ Тебѣ́ прилѣ́жно моля́щагося, и изба́ви его́ отъ вся́каго зла́го обстоя́нія.

Посе́мъ же іере́й или́ діа́конъ глаго́летъ:

Спаси́, Бо́же, лю́ди Твоя́ и благослови́ достоя́ніе Твое́, посѣти́ мíръ Тво́й ми́лостію и щедро́тами, возвы́си ро́гъ христіа́нъ правосла́вныхъ и низпосли́ на ны́ ми́лости Твоя́ бога́тыя, и ми́лостивно вско́рѣ воздви́гни отъ одра́ болѣ́зни раба́ Твоего́ [и́мярекъ], моли́твами Всепречи́стыя Влады́чицы на́шея Богоро́дицы и Приснодѣ́вы Марíи, си́лою Честна́го и Животворя́щаго Креста́, предста́тельствы честны́хъ небе́сныхъ си́лъ безпло́тныхъ, честна́го сла́внаго проро́ка, Предте́чи и Крести́теля Іоа́нна, святы́хъ сла́вныхъ и всехва́льныхъ апо́столъ, и́же во святы́хъ оте́цъ на́шихъ и вселе́нскихъ вели́кихъ учи́телей и святи́телей Васи́лія Вели́каго, Григо́рія Богосло́ва и Іоа́нна Златоу́стаго, и и́же во святы́хъ отца́ на́шего Никола́я, архіепи́скопа Мѵрлѵкíйскаго, чудотво́рца, и́же во святы́хъ оте́цъ на́шихъ, всея́ Россíи чудотво́рцевъ Петра́, Алексíя, Іо́ны и Фили́ппа, святы́хъ сла́вныхъ и добропобѣ́дныхъ му́чениковъ, святы́хъ враче́въ безсре́бренниковъ Космы́ и Даміа́на, Ки́ра и Іоа́нна, Пантелеи́мона и Ермола́я, святы́хъ и пра́ведныхъ богооте́цъ Іоаки́ма и Анны и свята́го [и́мярекъ] (его́же е́сть хра́мъ), и всѣ́хъ святы́хъ, мо́лимъ Тя́, Многоми́лостиве Го́споди, услы́ши на́съ грѣ́шныхъ, моля́щихся Тебѣ́ и поми́луй на́съ.

Ли́къ: Го́споди, поми́луй, [12].

Іере́й же возглаша́етъ: Ми́лостію и щедро́тами и человѣколю́біемъ Единоро́днаго Сы́на Твоего́, съ Ни́мже благослове́нъ еси́, со Пресвяты́мъ, и Благи́мъ, и Животворя́щимъ Твои́мъ Ду́хомъ, ны́нѣ и при́сно, и во вѣ́ки вѣко́въ.

Ликъ: Аминь.

Пѣ́снь 7.

Ирмо́съ: Пре́жде о́бразу злато́му, перси́дскому чти́лищу, о́троки не поклони́шася тріе́, пою́ще посредѣ́ пе́щи: отце́въ Бо́же, благослове́нъ еси́.

Сти́хъ: Отступи́те отъ мене́, вси́ дѣ́лающіи беззако́ніе.

Креста́ Твоего́, Го́споди, Животво́рнаго, и́мже сме́рть поги́бе и ме́ртвіи оживотворе́ни бы́ша, Боже́ственнымъ зна́меніемъ, ны́нѣ боля́щаго воздви́гни, я́коже при Еле́нѣ уме́ршую дѣви́цу.

Сти́хъ: Яко услы́ша Госпо́дь гла́съ пла́ча моего́.

До́лгую, Го́споди, и лю́тую болѣ́знь Іовлю, на гно́ищи въ че́рвіяхъ сѣдя́щаго и благода́рнѣ моля́щагося, сло́вомъ изцѣли́лъ еси́. И ны́нѣ болѣ́знующаго и на́ми моля́щагося Тебѣ́, я́ко Бла́гъ, исцѣли́ неви́димо моли́твами святы́хъ Твои́хъ.

Сла́ва: Вси́ вѣ́мы, я́ко вся́ко умре́ти на́мъ е́сть, Тебѣ́ Бо́гу та́ко изво́лившу, но на ма́лое вре́мя, Ми́лостиве, здра́вія про́симъ боля́щему: премѣни́ отъ сме́рти того́ на живо́тъ, пода́ждь скорбя́щимъ утѣше́ніе.

И ны́нѣ, богоро́диченъ: Посо́бствуй и помози́ на́шей нищетѣ́, Богоро́дице, Ты́ вѣ́си вре́мя и ча́съ, когда́ умоли́ти Сы́на Своего́ и Бо́га на́шего пода́ти здра́віе боля́щему и проще́ніе всѣ́хъ согрѣше́ній.

Пѣ́снь 8.

Ирмо́съ: Служи́ти Живо́му Бо́гу въ Вавило́нѣ о́троцы претерпѣ́вше, о мусикíйскихъ орга́нѣхъ неради́ша и, посредѣ́ пла́мене стоя́ще, боголѣ́пную пѣ́снь воспѣва́ху, глаго́люще: благослови́те, вся́ дѣла́ Госпо́дня, Го́спода.

Сти́хъ: Услы́ша Госпо́дь моле́ніе мое́.

Наказу́я, наказа́лъ еси́, Влады́ко, болѣ́знію раба́ Твоего́, и ско́ро исцѣли́, Ми́лостиве Христе́ Бо́же, и еще́ сме́рти не преда́ждь су́днѣ, да Тебѣ́ покая́ніемъ возда́стъ. Са́мъ бо ре́клъ еси́: не хощу́ сме́рти грѣ́шнаго.

Сти́хъ: Госпо́дь моли́тву мою́ прія́тъ.

Го́споди Ми́лостиве, Твоя́ пресла́вная чудеса́ и до на́съ ны́нѣ да достига́ютъ: бѣ́сы прожени́, неду́ги и ра́ны исцѣли́, болѣ́зни уврачу́й, потво́ры и чародѣя́нія, и вся́кія я́звы изба́ви ны́.

Сла́ва: Запрети́вый, Христе́, морски́мъ вѣ́тромъ и стра́хъ ученико́въ на ра́дость преложи́вый, запрети́ и ны́нѣ тя́жкимъ болѣ́знемъ тружда́ющимъ Твоего́ раба́, да вси́ возвесели́мся, хва́ляще Тя́ во вѣ́ки.

И ны́нѣ, богоро́диченъ: Изба́ви, Богоро́дице, отъ обыше́дшихъ на́съ печа́лей, бѣ́дъ же и скорбе́й, и всѣ́хъ разли́чныхъ неду́говъ, отра́вы и чародѣя́ній, и уро́ковъ разли́чныхъ человѣ́къ и напра́сныя сме́рти, мо́лимся.

Пѣ́снь 9.

Ирмо́съ: На Сина́йстѣй горѣ́ ви́дѣ Тя́ въ купинѣ́ Моисе́й, неопа́льно о́гнь Божества́ заче́ншую во чре́вѣ; Даніи́лъ же Тя́ ви́дѣ го́ру несѣко́мую; же́злъ прозя́бшій, Иса́ія взыва́ше, отъ ко́рене Дави́дова.

Сти́хъ: Да постыдя́тся и смяту́тся вси́ врази́ мои́.

Исто́чниче жи́зни, пода́телю ми́лости, Христе́, не отврати́ лица́ Твоего́ отъ на́съ, но облегчи́ болѣ́зни утружде́нному болѣ́знію и воздви́гни его́, я́коже Ѳадде́омъ А́вгаря, да при́сно Тебе́ сла́витъ, со Отце́мъ и Ду́хомъ Святы́мъ Еди́наго Бо́га.

Сти́хъ: Да возвратя́тся и устыдя́тся зѣло́ вско́рѣ.

Ева́нгельскому вѣ́рующе глаго́лу, Твое́ и́щемъ обѣща́ніе, Христе́: проси́те бо, — ре́клъ еси́, — и да́стся ва́мъ. Тѣ́мъ ны́нѣ прося́ще, мо́лимъ Тя́: воста́ви отъ одра́ здра́ва, лю́тымъ пове́рженнаго неду́гомъ, да Тя́ съ на́ми вку́пѣ велича́етъ.

Сла́ва: Уму́ченый неду́гомъ и вну́трь неви́димыми ра́нами, Тебѣ́, Христе́, на́ми вопіе́тъ. Не ра́ди на́съ, Го́споди, вси́ бо есмы́ по́лны грѣхо́въ, но Ма́терними и Предте́чи Твоего́ моли́твами, пода́ждь исцѣле́ніе боля́щему.

И ны́нѣ, богоро́диченъ: Бо́жія Ма́ти Пречи́стая, со всѣ́ми святы́ми призыва́емъ Тя́, со а́нгелы и арха́нгелы, съ проро́ки и патріа́рхи, со апо́столи и святи́тели, съ преподо́бными и пра́ведными, моли́ся Христу́ Бо́гу на́шему, пода́ти здра́віе боля́щему, да Тя́ вси́ велича́емъ.

Посе́мъ: Досто́йно е́сть... Трисвято́е, и по Отче на́шъ...

Тропари́ сія́, гла́съ 6:

Поми́луй на́съ, Го́споди, поми́луй на́съ; [вся́каго бо отвѣ́та недоумѣ́юще, сію́ Ти́ моли́тву я́ко Влады́цѣ грѣ́шніи прино́симъ: поми́луй на́съ].

Сла́ва: Го́споди, поми́луй на́съ, [на Тя́ бо упова́хомъ; не прогнѣ́вайся на ны́ зѣло́, ниже́ помяни́ беззако́ній на́шихъ, но при́зри и ны́нѣ я́ко благоутро́бенъ, и изба́ви ны́ отъ вра́гъ на́шихъ; Ты́ бо еси́ Бо́гъ на́шъ, и мы́ лю́діе Твои́, вси́ дѣла́ руку́ Твое́ю, и и́мя Твое́ призыва́емъ].

И ны́нѣ: Милоcе́рдія две́ри отве́рзи на́мъ, благослове́нная Богоро́дице, [надѣ́ющіися на Тя́ да не поги́бнемъ, но да изба́вимся Тобо́ю отъ бѣ́дъ: Ты́ бо еси́ спасе́іе ро́да христіа́нскаго].

Абіе же по си́хъ іере́й или́ діа́конъ глаго́летъ ектенію́ сію́:

Поми́луй на́съ, Бо́же, по вели́цѣй ми́лости Твое́й, мо́лимъ Ти ся, услы́ши и поми́луй.

Ли́къ: Го́споди, поми́луй, три́жды.

Еще́ мо́лимся Тебѣ́, Всеми́лостивому Го́споду, я́коже Езекíины сле́зы, Манассíино и ниневи́тянъ покая́ніе, и Дави́дово исповѣ́даніе прія́лъ еси́, и ско́ро тѣ́хъ поми́ловалъ еси́, и на́ша во умиле́ніи приноси́мыя Ти́ мольбы́ пріими́, Всеблагíй Царю́, и, я́ко Ще́дръ, поми́луй лю́тѣ боля́щаго раба́ Твоего́, здра́віе ему́ да́руя, со слеза́ми мо́лимъ Ти ся, Исто́чниче жи́зни и безсме́ртія, услы́ши и ско́ро поми́луй.

Ли́къ пое́тъ: Го́споди, по́милуй, три́жды.

Діа́конъ же возглаша́етъ: Па́ки и па́ки, со умиле́ніемъ (колѣ́на прекло́нше,) Го́споду помо́лимся.

Ли́къ пое́тъ: Го́споди, поми́луй, три́жды.

Іере́й же, со всѣ́ми предстоя́щими (колѣ́на прекло́нше,) со вся́кимъ внима́ніемъ и умиле́ніемъ глаго́летъ моли́тву сію́:

Бо́же Си́льный и Ми́лостивый, вся́ стро́яй на спасе́ніе ро́да на́шего, при́зри, смире́нно мо́лимъ Тя́, на прилѣ́жную мольбу́ на́шу и ми́лостивно посѣти́ раба́ Твоего́ [и́мярекъ], нарица́ющаго и́мя Христа́ Твоего́, и отпусти́ и прости́ ему́ вся́ согрѣше́нія во́льная и нево́льная, и́миже Твою́ бла́гость прогнѣ́ва и Твою́ я́рость раздражи́; вся́къ же неду́гъ его́ тѣле́сный исцѣли́ и вся́кое наше́ствіе непрія́зненное дале́че отъ него́ сотвори́, воздви́гни его́ отъ одра́ болѣ́зненнаго, и да́руй его́ здра́ва душе́ю и тѣ́ломъ Це́ркви Твое́й святѣ́й, до́брыми дѣ́лы и словесы́ благи́ми сла́вяща со всѣ́ми вѣ́рными Твои́ми и́мя Христа́ Твоего́, съ Ни́мже благослове́нъ еси́, съ Пресвяты́мъ и Благи́мъ и Животворя́щимъ Твои́мъ Ду́хомъ, ны́нѣ и при́сно, и во вѣ́ки вѣко́въ.

Ли́къ: Ами́нь.

Абіе же (воста́въ) твори́тъ отпу́стъ, ре́къ: Прему́дрость.

Ли́къ: Честнѣ́йшую херуви́мъ...

Іере́й: Сла́ва Тебѣ́, Христе́ Бо́же, Упова́ніе на́ше, сла́ва Тебѣ́.

Ли́къ: Сла́ва, и ны́нѣ. Го́споди поми́луй, три́жды. Благослови́.

Іере́й же глаго́летъ отпу́стъ се́й:

Христо́съ, Истинный Бо́гъ на́шъ, моли́твами Пречи́стыя Своея́ Ма́тере, свята́го сла́внаго проро́ка, Предте́чи и Крести́теля Іоа́нна, святы́хъ сла́вныхъ и всехва́льныхъ апо́столъ, и святы́хъ безме́здныхъ враче́въ Космы́ и Даміа́на, и всѣ́хъ святы́хъ Свои́хъ, поми́луетъ и спасе́тъ на́съ (и раба́ Своего́ [и́мярекъ]), я́ко Бла́гъ и Человѣколю́бецъ. Ли́къ: Ами́нь.

Посе́мъ же, а́ще изво́лятъ, пою́тъ или́ чту́тъ:

При́зри на моле́нія Твои́хъ ра́бъ, Всенепоро́чная, [утоля́ющи лю́тая на ны́ воста́нія, вся́кія ско́рби на́съ измѣня́ющи, Тя́ бо еди́ну тве́рдое и извѣ́стное утвержде́ніе и́мамы, и Твое́ предста́тельство стяжа́хомъ, да не постыди́мся, Влады́чице, Тя́ призыва́ющіи, потщи́ся на умоле́ніе Тебѣ́ вѣ́рно вопію́щихъ: ра́дуйся, Влады́чице, всѣ́хъ по́моще, ра́досте и покро́ве, и спасе́ніе ду́шъ на́шихъ].

И отхо́дятъ во своя́ си, благодаря́ще Бо́га.

Источникъ: Послѣ́дованіе моле́бна за боля́щаго. — М., 1763. — 12 л.

/ Къ оглавленію раздѣла /


Наверхъ / Къ титульной страницѣ

0