Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - четвергъ, 29 iюня 2017 г. Сейчасъ на порталѣ посѣтителей - 22.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

СЛУЖЕБНИКЪ.

Чи́нъ Свяще́нныя и Боже́ственныя Литургíи.

[Проскоми́дія].

Хотя́й свяще́нникъ Боже́ственное соверша́ти Тайнодѣй́ствіе, до́лженъ е́сть пе́рвѣе у́бо примире́нъ бы́ти со всѣ́ми и не имѣ́ти что́ на кого́, и се́рдце же, ели́ка си́ла, отъ лука́выхъ блюсти́ помысло́въ, воздержа́тися же съ ве́чера и трезви́тися да́же до вре́мене священнодѣ́йствія.

Вре́мени же наста́вшу, вхо́дитъ въ хра́мъ и соедини́вся со діа́кономъ, творя́тъ вку́пѣ къ восто́ку предъ святы́ми две́рьми поклоне́нія три́.

Та́же глаго́летъ діа́конъ: Благослови́, влады́ко.

Свяще́нникъ: Благослове́нъ Бо́гъ на́шъ, всегда́, ны́нѣ и при́сно, и во вѣ́ки вѣко́въ, ами́нь.

Начина́етъ глаго́лати діа́конъ: Царю́ Небе́сный... Трисвято́е, по Отче на́шъ.

Свяще́нникъ: Яко Твое́ е́сть Ца́рство...

Та́же глаго́лютъ:

Поми́луй на́съ, Го́споди, поми́луй на́съ; вся́каго бо отвѣ́та недоумѣ́юще, сію́ Ти моли́тву я́ко Влады́цѣ, грѣ́шніи прино́симъ: поми́луй на́съ.

Сла́ва: Го́споди, поми́луй на́съ, на Тя́ бо упова́хомъ; не прогнѣ́вайся на ны́ зѣло́, ниже́ помяни́ беззако́ній на́шихъ, но при́зри и ны́нѣ я́ко благоутро́бенъ, и изба́ви ны́ отъ вра́гъ на́шихъ; Ты́ бо еси́ Бо́гъ на́шъ, и мы́ лю́діе Твои́, вси́ дѣла́ руку́ Твое́ю, и и́мя Твое́ призыва́емъ.

И ны́нѣ: Милосе́рдія две́ри отве́рзи на́мъ, благослове́нная Богоро́дице, надѣ́ющіися на Тя́ да не поги́бнемъ, но да изба́вимся Тобо́ю отъ бѣ́дъ: Ты́ бо еси́ спасе́ніе ро́да христіа́нскаго.

Та́же отхо́дятъ ко ико́нѣ Христо́вѣ и цѣлу́ютъ ю́, глаго́люще:

Пречи́стому Твоему́ о́бразу покланя́емся, Благíй, прося́ще проще́нія прегрѣше́ній на́шихъ, Христе́ Бо́же: во́лею бо благоволи́лъ еси́ пло́тію взы́ти на Кре́стъ, да изба́виши, я́же созда́лъ еси́, отъ рабо́ты вра́жія. Тѣ́мъ благода́рственно вопіе́мъ Ти́: ра́дости испо́лнилъ еси́ вся́, Спа́се на́шъ, прише́дый спасти́ мíръ.

Та́же цѣлу́ютъ и ико́ну Богоро́дицы, глаго́люще тропа́рь:

Милосе́рдія су́щи исто́чникъ, ми́лости сподо́би на́съ, Богоро́дице, при́зри на лю́ди согрѣши́вшія, яви́ я́ко при́сно си́лу Твою́: на Тя́ бо упова́юще, ра́дуйся вопіе́мъ Ти́, я́коже иногда́ Гавріи́лъ безпло́тныхъ архистрати́гъ.

Та́же, прикло́нь главу́, іере́й глаго́летъ:

Го́споди, низпосли́ ру́ку Твою́ съ высоты́ свята́го жили́ща Твоего́ и укрѣпи́ мя́ въ предлежа́щую слу́жбу Твою́, да неосужде́нно предста́ну стра́шному престо́лу Твоему́, и безкро́вное священнодѣ́йствіе совершу́, я́ко Твоя́ е́сть си́ла во вѣ́ки вѣко́въ, ами́нь.

Та́же творя́тъ и къ лико́мъ покло́ны по еди́ному,
и та́ко отхо́дятъ въ же́ртвенникъ, глаго́люще:

Вни́ду въ до́мъ Тво́й, поклоню́ся ко хра́му свято́му Твоему́, въ стра́сѣ Твое́мъ. Го́споди, наста́ви мя́ пра́вдою Твое́ю, вра́гъ мои́хъ ра́ди испра́ви предъ Тобо́ю пу́ть мо́й. Яко нѣ́сть во устѣ́хъ и́хъ и́стины, се́рдце и́хъ су́етно, гро́бъ отве́рстъ горта́нь и́хъ: язы́ки свои́ми льща́ху. Суди́ и́мъ, Бо́же, да отпаду́тъ отъ мы́слей свои́хъ, по мно́жеству нече́стія и́хъ изри́ни я́, я́ко преогорчи́ша Тя́, Го́споди. И да возвеселя́тся вси́ упова́ющіи на Тя́, во вѣ́ки возра́дуются, и всели́шися въ ни́хъ, и похва́лятся о Тебѣ́ лю́бящіи и́мя Твое́. Яко Ты́ благослови́ши пра́ведника, Го́споди: я́ко ору́жіемъ благоволе́нія вѣнча́лъ еси́ на́съ.

Вше́дше же во святи́лище, творя́тъ покло́ны три́, предъ свято́ю трапе́зою, и цѣлу́ютъ свято́е Ева́нгеліе и святу́ю трапе́зу.

Та́же пріе́млютъ въ ру́ки своя́ кíйждо стиха́рь сво́й, и творя́тъ покло́ны три́ къ восто́ку, глаго́люще въ себѣ́ кíйждо: Бо́же, очи́сти мя́, грѣ́шнаго, и поми́луй мя́.

Та́же прихо́дитъ ко свяще́ннику діа́конъ, держа́ въ деснѣ́й руцѣ́ стиха́рь со ораре́мъ, и подклони́въ ему́ главу́, глаго́летъ: Благослови́, влады́ко, стиха́рь со ораре́мъ.

Свяще́нникъ глаго́летъ: Благослове́нъ Бо́гъ на́шъ всегда́, ны́нѣ и при́сно, и во вѣ́ки вѣко́въ.

Та́же отхо́дитъ діа́конъ во еди́ну страну́ святи́лища, облачи́тся въ стиха́рь, моля́ся си́це: Возра́дуется душа́ моя́ о Го́сподѣ, облече́ бо мя́ въ ри́зу спасе́нія, и оде́ждею весе́лія одѣ́я мя́. Яко жениху́ возложи́ ми вѣне́цъ, и я́ко невѣ́сту украси́ мя красото́ю.

И ора́рь у́бо цѣлова́въ, налага́етъ на лѣ́вое ра́мо.

Нарука́вницы же налага́я на ру́ки, на десну́ю у́бо, глаго́летъ: Десни́ца Твоя́, Го́споди, просла́вися въ крѣ́пости. Десна́я Твоя́ рука́, Го́споди, сокруши́ враги́ и мно́жествомъ сла́вы Твоея́ сте́рлъ еси́ супоста́ты.

На лѣ́вую же, глаго́летъ: Ру́цѣ Твои́ сотвори́стѣ мя́ и созда́стѣ мя́. Вразуми́ мя́ и научу́ся за́повѣдемъ Твои́мъ.

Та́же отше́дъ въ предложе́ніе, уготовля́етъ свяще́нная. Святы́й у́бо ди́скосъ поставля́етъ о шу́юю страну́, поти́рь же, е́же е́сть святу́ю ча́шу, о десну́ю, и про́чая съ ни́ми.

Свяще́нникъ же си́це облачи́тся: пріе́мъ стиха́рь въ лѣ́вую ру́ку, и поклони́вся три́жды къ восто́ку, я́коже рече́ся, назна́менуетъ, глаго́ля: Благослове́нъ Бо́гъ на́шъ всегда́, ны́нѣ и при́сно, и во вѣ́ки вѣко́въ. Ами́нь.

Та́же облачи́тся, глаго́ля: Возра́дуется душа́ моя́ о Го́сподѣ, облече́ бо мя́ въ ри́зу спасе́нія, и оде́ждею весе́лія одѣ́я мя́. Яко жениху́ возложи́ ми вѣне́цъ, и я́ко невѣ́сту украси́ мя красото́ю.

Та́же пріе́мъ епитрахи́ль и назна́менавъ, облага́ется е́ю, глаго́ля: Благослове́нъ Бо́гъ, излива́яй благода́ть Свою́ на свяще́нники Своя́, я́ко мѵ́ро на главѣ́, сходя́щее на браду́, браду́ Ааро́ню, сходя́щее на оме́ты оде́жди его́.

Та́же пріе́мъ по́ясъ и опоясу́яся, глаго́летъ: Благослове́нъ Бо́гъ, препоясу́яй мя́ си́лою и положи́ непоро́ченъ пу́ть мо́й, соверша́яй но́зѣ мои́, я́ко еле́ни, и на высо́кихъ поставля́яй мя.

Нарука́вницы же, я́ко вы́ше рече́ся.

Та́же пріе́мъ набе́дренникъ, а́ще и́мать, и благослови́въ и́, и цѣлова́въ, глаго́летъ: Препоя́ши ме́чь Тво́й по бедрѣ́ Твое́й, Си́льне, красото́ю Твое́ю и добро́тою Твое́ю, и наляцы́, и успѣва́й, и ца́рствуй и́стины ра́ди, и кро́тости, и пра́вды, и наста́витъ Тя́ ди́вно десни́ца Твоя́, всегда́, ны́нѣ и при́сно, и во вѣ́ки вѣко́въ. Ами́нь.

Та́же пріе́мъ фело́нь и благослови́въ, цѣлу́етъ глаго́ля си́це: Свяще́нницы Твои́, Го́споди, облеку́тся въ пра́вду, и преподо́бніи Твои́ ра́достію возра́дуются всегда́, ны́нѣ и при́сно, и во вѣ́ки вѣко́въ. Ами́нь.

Та́же отше́дше въ предложе́ніе, умыва́ютъ ру́ки, глаго́люще: Умы́ю въ непови́нныхъ ру́цѣ мои́, и обы́ду же́ртвенникъ Твой́, Го́споди, е́же услы́шати ми́ гла́съ хвалы́ Твоея́, и повѣ́дати вся́ чудеса́ Твоя́. Го́споди, возлюби́хъ благолѣ́піе до́му Твоего́ и мѣ́сто селе́нія сла́вы Твоея́. Да не погуби́ши съ нечести́выми ду́шу мою́, и съ му́жи крове́й живота́ моего́. Ихже въ рука́хъ беззако́нія, десни́ца и́хъ испо́лнися мзды́. Азъ же незло́біемъ мои́мъ ходи́хъ, изба́ви мя́, Го́споди, и поми́луй мя́. Нога́ моя́ ста́ на правотѣ́, въ це́рквахъ благословлю́ Тя́, Го́споди.

Та́же поклоне́нія три́ предъ предложе́ніемъ сотво́рше, глаго́лютъ кíйждо:

Бо́же, очи́сти мя́, грѣ́шнаго, и поми́луй мя́. И: Искупи́лъ ны́ еси́ отъ кля́твы зако́нныя честно́ю Твое́ю Кро́вію, на Крестѣ́ пригвозди́вся и копіе́мъ пробо́дся, безсме́ртіе источи́лъ еси́ человѣ́комъ, Спа́се на́шъ, сла́ва Тебѣ́.

Та́же глаго́летъ діа́конъ: Благослови́, влады́ко.

И начина́етъ свяще́нникъ: Благослове́нъ Бо́гъ на́шъ всегда́, ны́нѣ и при́сно, и во вѣ́ки вѣко́въ. Діа́конъ: Ами́нь.

[1]. Та́же пріе́млетъ свяще́нникъ лѣ́вою у́бо руко́ю просфору́, десно́ю же свято́е копіе́, и зна́менуя и́мъ три́жды верху́ печа́ти просфоры́, глаго́летъ: Въ воспомина́ніе Го́спода и Бо́га, и Спа́са на́шего Іису́са Христа́. [Три́жды.] И а́біе водружа́етъ копіе́ въ десну́ю страну́ печа́ти, и глаго́летъ рѣ́жа: Яко овча́ на заколе́ніе веде́ся. Въ лѣ́вую же: И я́ко а́гнецъ непоро́ченъ пря́мо стригу́щаго его́ безгла́сенъ, та́ко не отверза́етъ у́стъ Свои́хъ. Въ го́рнюю же страну́ печа́ти: Во смире́ніи Его́ су́дъ Его́ взя́тся. Въ до́льнюю же страну́: Ро́дъ же Его́ кто́ исповѣ́сть? Діа́конъ же, взира́я благоговѣ́йно на сицево́е та́инство, глаго́летъ на еди́нѣмъ ко́емждо рѣ́заніи: Го́споду помо́лимся, держа́ и ора́рь въ руцѣ́. По си́хъ глаго́летъ: Возми́, влады́ко. Свяще́нникъ же, вложи́въ свято́е копіе́ отъ ко́свенныя десны́я страны́ просфоры́, взима́етъ Святы́й Хлѣ́бъ, глаго́ля си́це: Яко взе́млется отъ земли́ живо́тъ Его́. И положи́въ и́ взна́къ на святѣ́мъ ди́скосѣ, ре́кшу діа́кону: Пожри́, влады́ко, жре́тъ его́ крестови́дно, си́це глаго́ля: Жре́тся Агнецъ Бо́жій, взе́мляй грѣ́хъ мíра, за мірскíй живо́тъ и спасе́ніе. И обраща́етъ горѣ́ другу́ю страну́, иму́щую кре́стъ. Діа́конъ глаго́летъ: Прободи́, влады́ко. Свяще́нникъ же, пробода́я и́ въ десну́ю страну́ копіе́мъ, глаго́летъ: Еди́нъ отъ во́инъ копіе́мъ ре́бра Его́ прободе́, и а́біе изы́де кро́вь и вода́. И ви́дѣвый свидѣ́тельствова и и́стинно е́сть свидѣ́тельство его́. Діа́конъ же, пріе́мъ вино́ и во́ду, глаго́летъ ко свяще́ннику: Благослови́, влады́ко, свято́е соедине́ніе. И взе́мъ надъ ни́ми благослове́ніе, влива́етъ во святы́й поти́ръ отъ вина́ вку́пѣ и воды́.

[2] Свяще́нникъ же, пріе́мъ въ ру́цѣ втору́ю просфору́, глаго́летъ: Въ че́сть и па́мять преблагослове́нныя Влады́чицы на́шея Богоро́дицы и Приснодѣ́вы Марíи, Ея́же моли́твами пріими́, Го́споди, же́ртву сію́ въ пренебе́сный Тво́й же́ртвенникъ. И взе́мъ ча́стицу, полага́етъ ю́ одесну́ю Свята́го Хлѣ́ба, бли́зъ среды́ его́, глаго́ля: Предста́ Цари́ца одесну́ю Тебе́, въ ри́зы позлаще́нны одѣ́яна, преукраше́нна.

[3] Та́же пріе́мъ тре́тію просфору́, глаго́летъ: Честна́го сла́внаго проро́ка, Предте́чи и Крести́теля Іоа́нна. И взе́мъ пе́рвую ча́стицу, полага́етъ ю́ ошу́юю страну́ Свята́го Хлѣ́ба, творя́ нача́ло пе́рваго чи́на.

Та́же глаго́летъ: Святы́хъ сла́вныхъ проро́ковъ: Моисе́я и Ааро́на, Иліи́ и Елиссе́я, Дави́да и Іессе́я, святы́хъ тріе́хъ отроко́въ, и Даніи́ла проро́ка, и всѣ́хъ святы́хъ проро́ковъ. И взе́мъ ча́стицу, полага́етъ ю́ до́лѣ пе́рвыя ча́стицы благочи́нно.

Та́же па́ки глаго́летъ: Святы́хъ сла́вныхъ и всехва́льныхъ апо́столъ Петра́ и Па́вла, и про́чихъ всѣ́хъ святы́хъ апо́столовъ. И та́ко полага́етъ тре́тію ча́стицу до́лѣ вторы́я, скончава́я пе́рвый чи́нъ.

Та́же глаго́летъ: Иже во святы́хъ оте́цъ на́шихъ святи́телей: Васи́лія Вели́каго, Григо́рія Богосло́ва и Іоа́нна Златоу́стаго, Аѳана́сія и Кири́лла Александрíйскихъ, Никола́я Мѵрликíйскаго, Михаи́ла Кíевскаго, Петра́, Алексíя, Іо́ны, Фили́ппа Ермоге́на и Ти́хона Моско́вскихъ, Ники́ты, епи́скопа Новгоро́дскаго, Лео́нтія, епи́скопа Росто́вскаго, и всѣ́хъ святы́хъ святи́телей. И взе́мъ четве́ртую ча́стицу, полага́етъ ю бли́зъ пе́рвыя ча́стицы, творя́ второ́е нача́ло.

Та́же па́ки глаго́летъ: Свята́го апо́стола, первому́ченика и архидіа́кона Стефа́на, святы́хъ вели́кихъ му́чениковъ: Дими́трія, Гео́ргія, Ѳео́дора Ти́рона, Ѳео́дора Стратила́та, и всѣ́хъ святы́хъ му́ченикъ. И му́ченицъ: Ѳе́клы, Варва́ры, Киріакíи, Евфи́міи и Параске́вы, Екатери́ны и всѣ́хъ святы́хъ му́ченицъ. И взе́мъ пя́тую ча́стицу, полага́етъ ю́ до́лѣ пе́рвыя ча́стицы, су́щія нача́ломъ втора́го чи́на.

Та́же глаго́летъ: Преподо́бныхъ и богоно́сныхъ оте́цъ на́шихъ: Анто́нія, Евѳи́мія, Са́ввы, Ону́фрія, Аѳана́сія Аѳо́нскаго, Анто́нія и Ѳеодо́сія Пече́рскихъ, Се́ргія Ра́донежскаго, Варлаа́ма Ху́тынскаго, Серафи́ма Саро́вскаго и всѣ́хъ преподо́бныхъ оте́цъ. И преподо́бныхъ матере́й: Пелагíи, Ѳеодо́сіи, Анастасíи, Евпраксíи, Февро́ніи, Ѳеоду́ліи, Евфроси́ніи, Марíи Еги́птяныни и всѣ́хъ святы́хъ преподо́бныхъ матере́й. И та́ко взе́мъ шесту́ю ча́стицу, полага́етъ ю́ до́лѣ вторы́я ча́стицы, во исполне́ніе втора́го чи́на.

По си́хъ же глаго́летъ: Святы́хъ и чудотво́рцевъ, безсре́бреникъ: Космы́ и Даміа́на, Ки́ра и Іоа́нна, Пантелеи́мона и Ермола́я, и всѣ́хъ святы́хъ безсре́брениковъ. И взе́мъ седму́ю ча́стицу, полага́етъ ю́ ве́рхъ, творя́ тре́тіе нача́ло, по чи́ну.

Та́же па́ки глаго́летъ: Святы́хъ и пра́ведныхъ богооте́цъ Іоаки́ма и Анны, [и свята́го [и́мярекъ], его́же е́сть хра́мъ и его́же е́сть де́нь], святы́хъ равноапо́стольныхъ Меѳо́дія и Кири́лла, учи́телей Слове́нскихъ, свята́го благовѣ́рнаго и равноапо́стольнаго вели́каго кня́зя Влади́міра, и блаже́нныя вели́кія княги́ни Россíйскія Ольги и всѣ́хъ святы́хъ, и́хже моли́твами посѣти́ ны, Бо́же. И полага́етъ осму́ю ча́стицу до́лѣ пе́рвыя благочи́нно.

Еще́ же къ си́мъ глаго́летъ: Иже во святы́хъ отца́ на́шего Іоа́нна, архіепи́скопа Константинопо́льскаго, Златоу́стаго. [Аще пое́тся литургíя его́.] Аще же пое́тся Вели́каго Васи́лія, того́ помина́етъ. И та́ко взе́мъ девя́тую ча́стицу, полага́етъ ю́ въ коне́цъ тре́тіяго чи́на во исполне́ніе.

[4] Та́же пріе́мъ четве́ртую просфору́, глаго́летъ: Помяни́, Влады́ко Человѣколю́бче, правосла́вное епи́скопство Це́ркве Россíйскія, Господи́на на́шего высокопреосвяще́ннѣйшаго митрополи́та [и́мярекъ], Первоіера́рха Ру́сскія Зарубе́жныя Це́ркве, архіепи́скопа [или́ епи́скопа [и́мярекъ], его́же е́сть епа́рхія], честно́е пресви́терство, во Христѣ́ діа́конство, и ве́сь свяще́нническій чи́нъ: [а́ще во оби́тели: архимандри́та, или́ игу́мена, и́мярекъ] и всю́ бра́тію на́шу, я́же призва́лъ еси́ во Твое́ обще́ніе, Твои́мъ благоутро́біемъ, всеблагíй Влады́ко. И взе́мъ ча́стицу, полага́етъ ю́ до́лѣ Свята́го Хлѣ́ба.

Та́же помина́етъ и́же во во вла́сти су́ть, глаго́ля си́це: Помяни́, Го́споди, стра́ждущую страну́ Россíйскую, правосла́вныя лю́ди ея́, во оте́чествіи и въ разсѣ́яніи су́щія, и правосла́вныя лю́ди страны́ сея́.

Та́же помина́етъ, и́хже и́мать живы́хъ, по и́мени, и на ко́еждо и́мя взем́летъ ча́стицу, глаго́ля: Помяни́, Го́споди, [и́мярекъ]. И та́ко взе́мъ ча́стицы, полага́етъ я́ до́лѣ Свята́го Хлѣ́ба.

[5] Та́же взе́мъ пя́тую просфору́, глаго́летъ: О па́мяти и оставле́ніи грѣхо́въ Святѣ́йшихъ Патріа́рховъ, правосла́вныхъ и Благочести́выхъ Царе́й и Благочести́выхъ Цари́цъ, блаже́нныхъ созда́телей свята́го хра́ма сего́ [а́ще въ оби́тели: святы́я оби́тели сея́]. Та́же помина́етъ рукоположи́вшаго его́ архіере́я, и други́хъ, и́хже хо́щетъ, усо́пшихъ по и́мени. На ко́еждо и́мя взима́етъ ча́стицу, приглаго́ля: Помяни́, Го́споди, [и́мярекъ]. И коне́чнѣ глаго́летъ си́це: И всѣ́хъ въ наде́ждѣ воскресе́нія, жи́зни вѣ́чныя и Твоего́ обще́нія усо́пшихъ, правосла́вныхъ оте́цъ и бра́тій на́шихъ, Человѣколю́бче Го́споди. И взима́етъ ча́стицу.

По се́мъ глаго́летъ: Помяни́, Го́споди, и мое́ недосто́инство, и прости́ ми вся́кое согрѣше́ніе, во́льное же и нево́льное. И взима́етъ ча́стицу.

И пріе́мъ гу́бу, собира́етъ на ди́скосъ ча́стицы до́лѣ Свята́го Хлѣ́ба, я́коже бы́ти во утверже́ніи, и не испа́днути чесому́.

Та́же діа́конъ пріе́мъ кади́льницу и ѳиміа́мъ вложи́въ въ ню́, глаго́летъ къ свяще́ннику: Благослови́, влады́ко, кади́ло.

И а́біе са́мъ глаго́летъ: Го́споду помо́лимся.

И свяще́нникъ моли́тву кади́ла: Кади́ло Тебѣ́ прино́симъ, Христе́ Бо́же на́шъ, въ воню́ благоуха́нія духо́внаго, е́же пріе́мъ въ пренебе́сный Тво́й же́ртвенникъ, возниспосли́ на́мъ благода́ть Пресвята́го Твоего́ Ду́ха.

Діа́конъ: Го́споду помо́лимся.

Свяще́нникъ покади́въ звѣзди́цу, полага́етъ верху́ Свята́го Хлѣ́ба, глаго́ля: И прише́дши звѣзда́, ста́ верху́, идѣ́же бѣ́ Отроча́.

Діа́конъ: Го́споду помо́лимся.

Іере́й, покади́въ пе́рвый покро́вецъ, покрыва́етъ Святы́й Хлѣ́бъ съ ди́скосомъ, глаго́ля: Госпо́дь воцари́ся, въ лѣ́поту облече́ся: облече́ся Госпо́дь въ си́лу и препоя́сася, и́бо утверди́ вселе́нную, я́же не подви́жится. Гото́въ престо́лъ Тво́й отто́лѣ: отъ вѣ́ка Ты́ еси́. Воздвиго́ша рѣ́ки, Го́споди, воздвиго́ша рѣ́ки гла́сы своя́. Во́змутъ рѣ́ки сотре́нія своя́, отъ гласо́въ во́дъ мно́гихъ. Ди́вны высоты́ морскíя, ди́венъ въ высо́кихъ Госпо́дь. Свидѣ́нія Твоя́ увѣ́ришася зѣло́. До́му Твоему́ подоба́етъ святы́ня, Го́споди, въ долготу́ днíй.

Діа́конъ: Го́споду помо́лимся. Покры́й, влады́ко.

Іере́й же, покади́въ вторы́й покро́вецъ, покрыва́етъ святы́й поти́ръ, глаго́ля: Покры́ небеса́ добродѣ́тель Твоя́, Христе́, и хвалы́ Твоея́ испо́лнь земля́.

Діа́конъ: Го́споду помо́лимся. Покры́й, влады́ко.

Іере́й же, покади́въ покро́въ, си́рѣчь возду́хъ, и покрыва́я обоя́, глаго́летъ: Покры́й на́съ кро́вомъ крилу́ Твое́ю, отжени́ отъ на́съ вся́каго врага́ и супоста́та. Умири́ на́шу жи́знь, Го́споди, поми́луй на́съ и мíръ Тво́й, и спаси́ ду́ши на́ша, я́ко Бла́гъ и Человѣколю́бецъ.

Та́же пріе́мъ свяще́нникъ кади́льницу, кади́тъ предложе́ніе, глаго́ля три́жды: Благослове́нъ Бо́гъ на́шъ, си́це благоволи́вый, сла́ва Тебѣ́. Діа́конъ же на ко́емждо глаго́летъ: Всегда́, ны́нѣ и при́сно, и во вѣ́ки вѣко́въ. Ами́нь.

И покланя́ются благоговѣ́йно о́ба, три́жды.

Та́же пріе́мъ діа́конъ кади́льницу, глаго́летъ: О предложе́нныхъ Честны́хъ Дарѣ́хъ, Го́споду помо́лимся.

Свяще́нникъ же моли́тву предложе́нія: Бо́же, Бо́же на́шъ, Небе́сный Хлѣ́бъ, пи́щу всему́ мíру, Го́спода на́шего и Бо́га Іису́са Христа́ посла́вый, Спа́са и Изба́вителя и Благодѣ́теля, благословя́ща и освяща́юща на́съ, Са́мъ благослови́ предложе́ніе сіе́, и пріими́ е́ въ пренебе́сный Тво́й же́ртвенникъ. Помяни́, я́ко Бла́гъ и Человѣколю́бецъ, прине́сшихъ и и́хже ра́ди принесо́ша, и на́съ неосужде́ны сохрани́ во священнодѣ́йствіи Боже́ственныхъ Твои́хъ Та́инъ. Яко святи́ся и просла́вися пречестно́е и великолѣ́пое и́мя Твое́, Отца́, и Сы́на, и Свята́го Ду́ха, ны́нѣ и при́сно, и во вѣ́ки вѣко́въ. Ами́нь.

И посе́мъ твори́тъ отпу́стъ та́мо, глаго́ля си́це: Сла́ва Тебѣ́, Христе́ Бо́же, упова́ніе на́ше, сла́ва Тебѣ́.

Діа́конъ: Сла́ва, и ны́нѣ. Го́споди, поми́луй, три́жды. Благослови́.

Свяще́нникъ глаго́летъ отпу́стъ.

Аще у́бо е́сть недѣ́ля: Воскресы́й изъ ме́ртвыхъ...

Аще ли же ни́: Христо́съ, и́стинный Бо́гъ на́шъ, моли́твами Пречи́стыя Своея́ Ма́тере, и́же во святы́хъ отца́ на́шего Іоа́нна, архіепи́скопа Константинопо́льскаго, Златоу́стаго, [а́ще же соверша́ется литургíя Вели́каго Васи́лія, глаго́летъ: Васи́лія Вели́каго, архіепи́скопа Кесарíи Каппадокíйскія,] и всѣ́хъ святы́хъ, поми́луетъ и спасе́тъ на́съ, я́ко Бла́гъ и Человѣколю́бецъ.

Діа́конъ: Ами́нь.

По отпу́стѣ же кади́тъ діа́конъ свято́е предложе́ніе. Та́же отхо́дитъ, и кади́тъ святу́ю трапе́зу круго́мъ крестови́дно, глаго́ля въ себѣ́: Во гро́бѣ пло́тски, во а́дѣ же съ душе́ю я́ко Бо́гъ, въ раи́ же съ разбо́йникомъ и на престо́лѣ бы́лъ еси́ Христе́, со Отце́мъ и Ду́хомъ, вся́ исполня́яй неопи́санный.

Та́же псало́мъ 50: Поми́луй мя́, Бо́же, по вели́цѣй ми́лости твое́й..., въ не́мже и покади́въ святи́лище же и хра́мъ ве́сь, вхо́дитъ па́ки во святы́й олта́рь, и покади́въ святу́ю трапе́зу па́ки, и свяще́нника, кади́льницу у́бо отлага́етъ на мѣ́сто свое́, са́мъ же прихо́дитъ ко іере́ю.

И ста́вше вку́пѣ предъ свято́ю трапе́зою, покланя́ются три́жды, въ себѣ́ моля́щеся и глаго́люще:

Царю́ Небе́сный, Утѣ́шителю, Ду́ше и́стины, И́же вездѣ́ сы́й и вся́ исполня́яй, Сокро́вище благи́хъ и жи́зни Пода́телю, пріиди́ и всели́ся въ ны́, и очи́сти ны́ отъ вся́кія скве́рны, и спаси́, Бла́же, ду́ши на́ша.

Сла́ва въ Вы́шнихъ Бо́гу, и на земли́ ми́ръ, въ человѣ́цѣхъ благоволе́ніе. [Два́жды.]

Го́споди, устнѣ́ мои́ отве́рзеши, и уста́ моя́ возвѣстя́тъ хвалу́ Твою́.

Та́же цѣлу́ютъ, свяще́нникъ у́бо свято́е Ева́нгеліе, діа́конъ же святу́ю трапе́зу.

И посе́мъ подклони́въ діа́конъ свою́ главу́ свяще́ннику, держа́ и ора́рь треми́ пе́рсты десны́я руки́, глаго́летъ: Вре́мя сотвори́ти Го́сподеви, влады́ко, благослови́.

Свяще́нникъ, зна́менуя его́, глаго́летъ: Благослове́нъ Бо́гъ на́шъ, всегда́, ны́нѣ и при́сно, и во вѣ́ки вѣко́въ.

Та́же діа́конъ: Помоли́ся о мнѣ́, влады́ко святы́й.

Свяще́нникъ: Да испра́витъ Госпо́дь стопы́ Твоя́.

И па́ки діа́конъ: Помяни́ мя, влады́ко святы́й.

Свяще́нникъ: Да помяне́тъ тя́ Госпо́дь Бо́гъ во Ца́рствіи Свое́мъ, всегда́, ны́нѣ и при́сно, и во вѣ́ки вѣко́въ.

Діа́конъ же: Ами́нь, и поклони́вся, исхо́дитъ сѣ́верными две́рьми, поне́же ца́рскія две́ри до вхо́да не отверза́ются. И ста́въ на обы́чномъ мѣ́стѣ, пря́мо святы́хъ двере́й, покланя́ется со благоговѣ́ніемъ, три́жды, глаго́ля въ себѣ́: Го́споди, устнѣ́ мои́ отве́рзеши, и уста́ моя́ возвѣстя́тъ хвалу́ Твою́.

И посе́мъ начина́етъ глаго́лати: Благослови́, влады́ко.
И начина́етъ свяще́нникъ: Благослове́но Ца́рство...



Вѣ́дати подоба́етъ: Аще безъ діа́кона слу́житъ іере́й, въ проскоми́діи діа́конскихъ сло́въ, и на литургíи предъ Ева́нгеліемъ, и на отвѣ́тъ его́: Благослови́, влады́ко..., и Прободи́, влады́ко..., и Вре́мя сотвори́ти..., да не глаго́летъ, то́чію ектеніи́ и чино́вное предложе́ніе.

Аще же собо́ромъ слу́жатъ свяще́нніи мно́зи, дѣ́йство проскоми́діи еди́нъ іере́й то́кмо да твори́тъ и глаго́летъ изображе́нная. Про́чіи же служи́тели ничто́же проскоми́діи осо́бно да глаго́лютъ.

Источникъ: Чи́нъ Свяще́нныя и Боже́ственныя Литургíи, и́же во святы́хъ отца́ на́шего Іоа́нна Златоу́стаго. — Тисне́ніе тре́тіе. — Джорданви́лль: Тѵпогра́фія преп. Іова Поча́евскаго, 2006. — С. 3-34.

/ Къ оглавленію раздѣла /


Наверхъ / Къ титульной страницѣ

0